\id TIT
\h Tito
\toc1 Tito
\mt Nihánj me cartá caꞌnéé Pabló rihaan Titó a
\c 1
\p
\v 1 ꞌU̱nj roꞌ, me síí cuꞌna̱j Pabló nu̱u̱ rihaan Yaꞌanj, ne̱ cuneꞌ Jesucristó mán ꞌu̱nj caꞌa̱nj nata̱ꞌ ꞌu̱nj rihaan nij yuvii̱ narii Yaꞌanj cheꞌé rej nari̱ꞌ nij soꞌ stucua̱nj Cristó, ne̱ nari̱ꞌ nij soꞌ snana̱ Yaꞌanj nana̱ ya̱, ne̱ veꞌé uxrá canoco̱ꞌ nij soꞌ man Yaꞌanj, quiꞌya̱j nana̱ ya̱ yoꞌ a.
\v 2 Ga̱a ne̱ gu̱un ya̱ rá nij yuvii̱ se vaa ca̱yáán nij yuvii̱ ga̱ Yaꞌanj nu̱ꞌ cavii nu̱ꞌ caꞌanj, nda̱a vaa cataꞌ tuꞌva Yaꞌanj asi̱j naá ndoꞌo, ne̱ xa̱ꞌ Yaꞌanj, tza̱j ne̱ ne aꞌmii ne̱ Yaꞌanj maꞌ.
\v 3 Ga̱a ne̱ ga̱a quisíj güii cachrón Yaꞌanj, ne̱ tihaa̱n Yaꞌanj rihaan níꞌ nana̱ cataꞌ tuꞌva soꞌ a. Da̱nj quiꞌyaj soꞌ ga̱a caꞌneꞌ soꞌ suun rihanj se vaa caꞌmi̱i̱ natáj ꞌu̱nj snana̱ soꞌ, ne̱ xa̱ꞌ soꞌ, tza̱j ne̱ soꞌ me Yaꞌanj Si̱j Tinanii man níꞌ rihaan Sayuun ado̱nj.
\p
\v 4 Dan me se qui̱ꞌyáá ꞌu̱nj yanj nihánj caꞌne̱j ꞌu̱nj rihaan so̱ꞌ si̱j cuꞌna̱j Titó a. Amán rá so̱ꞌ nana̱ sa̱ꞌ cheꞌé Cristó nana̱ natáꞌ ꞌu̱nj rihaan so̱ꞌ, ne̱ cuya̱a̱n vaa nana̱ amán rá níꞌ, ne̱ cheꞌé dan ase vaa ꞌo̱ taꞌníj roꞌ, da̱nj vaa so̱ꞌ rihanj, tinu̱j. Me rá ꞌu̱nj quiꞌya̱j Rej níꞌ Yaꞌanj do̱ꞌ, Cristó Jesús Si̱j Tinanii man níꞌ rihaan Sayuun do̱ꞌ, se lu̱j cheꞌé so̱ꞌ, ne̱ ga̱a̱ xe̱j nimán so̱ꞌ, quiꞌya̱j ro̱j soꞌ a.
\s Me rá Pabló se vaa cune̱ꞌ Titó do̱j síí tu̱mé sa̱ꞌ rihaan Yaꞌanj man nij síí noco̱ꞌ man Cristó ya̱nj estadó Creta a
\p
\v 5 Tanáj ꞌu̱nj mán so̱ꞌ yoꞌóó ta̱j rihaan na yaꞌa̱nj cuꞌna̱j Creta, cheꞌé se vaa doj suun ataa ti̱navíí ꞌu̱nj rej yoꞌ, ne̱ me rá ꞌu̱nj ti̱navíí so̱ꞌ nij suun yoꞌ a. Me rá ꞌu̱nj se vaa cune̱ꞌ so̱ꞌ do̱j síí tu̱mé sa̱ꞌ rihaan Yaꞌanj man nij síí noco̱ꞌ man Cristó ya̱nj ꞌo̱ ꞌo̱ chumanꞌ rej yoꞌ, nda̱a vaa a̱j caꞌnéꞌ ꞌu̱nj suun rihaan so̱ꞌ ado̱nj.
\v 6 Xa̱ꞌ nij síí tumé sa̱ꞌ man yuvii̱ rihaan Yaꞌanj, tza̱j ne̱ vaa cheꞌé cune̱ꞌ so̱ꞌ ina̱nj síí nuviꞌ cacunꞌ tumé do̱ꞌ, síí vaa o̱rúnꞌ chana̱ nica̱ do̱ꞌ á. Da̱nj na̱nj uún, ne̱ amán rá nij taꞌníí soꞌ niꞌya̱j nij soꞌ man Yaꞌanj, ne̱ taj cacunꞌ caꞌve̱e cuta̱ꞌ nii xráá nij soꞌ se vaa síí niha̱ꞌ rá quiꞌya̱j se nij do̱ꞌ, síí tucuáá do̱ꞌ, me nij soꞌ maꞌ.
\v 7 Cheꞌé se suun nica̱j síí tumé sa̱ꞌ man nij síí noco̱ꞌ man Cristó me se‑su̱u̱n Yaꞌanj roꞌ, vaa cheꞌé nari̱i̱ so̱ꞌ man síí nuviꞌ cacunꞌ tumé do̱ꞌ, síí ne xta̱ꞌ nimán do̱ꞌ, síí ne yaꞌa̱an rá do̱ꞌ, síí ne niha̱ꞌ rá coꞌo̱ na vinó do̱ꞌ, síí ne yuva̱a̱ do̱ꞌ, síí ne niha̱ꞌ rá tiha̱ꞌ tuviꞌ quiri̱ꞌ saꞌanj do̱ꞌ a.
\v 8 Tana̱nj nari̱i̱ so̱ꞌ man síí niha̱ꞌ rá cara̱nꞌ yuvii̱ avii ꞌó chumanꞌ tucuá soꞌ do̱ꞌ, síí niha̱ꞌ rá quiꞌya̱j se sa̱ꞌ do̱ꞌ, síí veꞌé acaj cuentá do̱ꞌ, síí nica̱ rá do̱ꞌ, síí nica̱j xraan man Yaꞌanj do̱ꞌ, síí tumé sa̱ꞌ man maꞌa̱n do̱ꞌ ado̱nj.
\v 9 Raan canoco̱ꞌ nij soꞌ snana̱ Yaꞌanj nana̱ tucuꞌyón núj rihaan nij yuvii̱ a. Da̱nj quiꞌya̱j nij soꞌ, ga̱a ne̱ gu̱un nucua̱j nij soꞌ nago̱ꞌ nij soꞌ stucua̱nj Yaꞌanj tucuáán sa̱ꞌ man ꞌó nij yuvii̱, ne̱ gu̱un nucua̱j nij soꞌ quiꞌya̱j nij soꞌ se vaa ca̱nica̱j nimán nij síí tucuꞌyón tucuáán ne̱ na̱nj ado̱nj.
\s Me rá Pabló se vaa ca̱ráán Titó chrej rihaan nij síí noco̱ꞌ man Cristó se vaa se̱ canocoꞌ nij soꞌ ꞌó tucuáán a
\p
\v 10 Dan me se ma̱n ndoꞌo síí tucuáá do̱ꞌ, síí tuꞌva rmaꞌa̱n do̱ꞌ, síí tihaꞌ yuꞌunj do̱ꞌ, rej Creta a. Ne̱ síí chiꞌi̱i̱ doj rihaan ꞌó nij soꞌ me nij síí taj se vaa no̱ xcúún nij snóꞌo noco̱ꞌ man Cristó canoco̱ꞌ nij soꞌ nu̱ꞌ tucuáán noco̱ꞌ nij yuvii̱ israelitá a.
\v 11 Vaa cheꞌé ndoꞌo caꞌne̱ꞌ rá nij soꞌ ga̱ nana̱ vaa da̱nj qui̱ꞌyáá so̱ꞌ na̱nj á. ꞌO̱ se riꞌ ndoꞌo rá queꞌe̱e̱ nij tucua̱ yuvii̱, ꞌyaj nij soꞌ ga̱a tucuꞌyón nij soꞌ nana̱ vaa da̱nj nana̱ ne nó xcúún nij soꞌ tu̱cuꞌyón nij soꞌ na̱nj ado̱nj. Ne̱ ina̱nj saꞌanj quiri̱ꞌ u̱u̱n nij soꞌ, rá nij soꞌ, dan ꞌyaj chiꞌi̱i̱ nij soꞌ ado̱nj.
\p
\v 12 Dan me se ꞌo̱ tuviꞌ maꞌa̱n nij soꞌ síí nataꞌ snana̱ yaꞌanj noco̱ꞌ nij soꞌ roꞌ, cataj soꞌ se vaa xa̱ꞌ nij síí ma̱n Creta, tza̱j ne̱ síí ne̱ me nij soꞌ, ne̱ xcuu chiꞌi̱i̱ me nij soꞌ, ne̱ ina̱nj síí rmi̱i̱ me rá cara̱a u̱u̱n rque me nij soꞌ, taj maꞌa̱n tuviꞌ nij soꞌ niꞌya̱j soꞌ man nij soꞌ a.
\v 13 Ne̱ dan me se ya̱ uxrá cataj soꞌ cheꞌé nij tuviꞌ soꞌ na̱nj ado̱nj. Cheꞌé dan sca̱ꞌ ina̱nj cata̱j xnaꞌanj so̱ꞌ cheꞌé se‑cacu̱nꞌ nij soꞌ rihaan nij soꞌ, ga̱a ne̱ caꞌve̱e ca̱nica̱j nimán nij soꞌ canoco̱ꞌ nij soꞌ stucua̱nj níꞌ si̱j amán rá niꞌya̱j man Cristó, ne̱ ga̱a̱ sa̱ꞌ nimán nij soꞌ ado̱nj.
\v 14 Dan me se da̱nj qui̱ꞌyáá so̱ꞌ, ga̱a ne̱ se̱ gaa na̱nj xca̱j nij soꞌ cuentá cheꞌé nij cuentó u̱u̱n nanó nij yuvii̱ israelitá á. Ne̱ se̱ cuno nij soꞌ suun caꞌneꞌ nij síí naꞌvej rá canoco̱ꞌ tucuáán ya̱ rihaan nij soꞌ maꞌ.
\p
\v 15 Dan me se xa̱ꞌ yuvii̱ vaa sa̱ꞌ nimán, tza̱j ne̱ sa̱ꞌ vaa cunuda̱nj rasu̱u̱n rihaan nij soꞌ, ne̱ xa̱ꞌ yuvii̱ vaa chiꞌi̱i̱ nimán, tza̱j ne̱ da̱j a̱ rasu̱u̱n ruviꞌ niꞌya̱j nij síí chiꞌi̱i̱ síí ne amán rá niꞌya̱j man Cristó roꞌ, chiꞌi̱i̱ vaa ta̱ranꞌ rasu̱u̱n rihaan nij soꞌ na̱nj ado̱nj. Síí vaa da̱nj roꞌ, quiriꞌ raa̱ nij soꞌ do̱ꞌ, nimán nij soꞌ do̱ꞌ, ne̱ ne acaj nij soꞌ cuentá a̱ maꞌ.
\v 16 Neꞌen nij soꞌ man Yaꞌanj, taj maꞌa̱n nij soꞌ, tza̱j ne̱ niꞌya̱j níꞌ se vaa ꞌyaj nij soꞌ, ne̱ xcaj níꞌ cuentá se vaa ne neꞌen uxrá nij soꞌ man Yaꞌanj a̱ maꞌ. Tana̱nj síí nachriꞌ yuvii̱ man do̱ꞌ, síí tucuáá do̱ꞌ, me nij soꞌ, ne̱ taj va̱j a̱ doj suun sa̱ꞌ caꞌve̱e quiꞌya̱j nij soꞌ a̱ maꞌ.
\c 2
\s Nataꞌ Pabló cheꞌé tucuáán ya̱ cuchru̱j Titó rihaan nij síí noco̱ꞌ man Cristó a
\p
\v 1 Ne̱ ma̱ꞌán so̱ꞌ me se tu̱cuꞌyón so̱ꞌ nana̱ nda̱a vaa taj tucuáán ya̱ na̱nj á.
\v 2 Cata̱j xnaꞌanj so̱ꞌ rihaan nij chii nga̱ se vaa síí na̱j nimán gu̱un nij soꞌ á. Ga̱a̱ chij rá nij soꞌ á. Xca̱j nij soꞌ cuentá da̱j quiꞌya̱j maꞌa̱n nij soꞌ á. ꞌO̱ cuchuma̱n rá nij soꞌ ni̱ꞌyaj nij soꞌ man Yaꞌanj, ne̱ ga̱a̱ ꞌe̱e̱ rá nij soꞌ tuviꞌ nij soꞌ, ne̱ nda̱ꞌ se ranꞌ nij soꞌ sayuun, tza̱j ne̱ ꞌo̱ xraan canoco̱ꞌ nij soꞌ man Cristó a.
\v 3 Dan me se veé da̱nj veꞌé ndoꞌo quiꞌya̱j nij chana̱ chij uún, ga̱a ne̱ caꞌve̱e xca̱j yuvii̱ cuentá se vaa chana̱ sa̱ꞌ noco̱ꞌ uxrá man Yaꞌanj me nij noꞌ a. Se̱ nanó nij chana̱ chij cuentó ne̱ cheꞌé tuviꞌ nij noꞌ maꞌ. Se̱ gaa niha̱ꞌ rá nij noꞌ gu̱un xno̱ nij noꞌ maꞌ. Tana̱nj gu̱un nij noꞌ chana̱ veꞌé tucuꞌyón man tuviꞌ,
\v 4 ga̱a ne̱ caꞌve̱e nago̱ꞌ noꞌ chrej sa̱ꞌ man nij chana̱ taꞌa̱j se vaa ga̱a̱ ꞌe̱e̱ rá nij chana̱ taꞌa̱j nica̱ noꞌ do̱ꞌ, taꞌníí noꞌ do̱ꞌ a.
\v 5 Ne̱ veꞌé tu̱mé nij chana̱ taꞌa̱j da̱j quiꞌya̱j maꞌa̱n nij noꞌ do̱ꞌ, ina̱nj nica̱ noꞌ coto̱j ga̱ noꞌ do̱ꞌ, veꞌé tu̱mé nij noꞌ veꞌ tucuá nij noꞌ do̱ꞌ á. Ne̱ chana̱ sa̱ꞌ gu̱un nij noꞌ, ne̱ veꞌé cuno̱ nij noꞌ rihaan nica̱ nij noꞌ á. Da̱nj quiꞌya̱j nij noꞌ, cata̱j chana̱ chij rihaan nij noꞌ, ga̱a ne̱ se̱ gaa na̱nj caꞌmi̱i̱ yuvii̱ ne nocoꞌ man Cristó nana̱ qui̱j cheꞌé snana̱ Yaꞌanj a.
\p
\v 6 Ne̱ nago̱ꞌ so̱ꞌ chrej nucua̱j man nij síí tachru̱u̱ uún se vaa xca̱j nij soꞌ cuentá da̱j ga̱a̱ quiꞌya̱j nij soꞌ á.
\v 7 Ne̱ ma̱ꞌán so̱ꞌ roꞌ, veꞌé qui̱ꞌyáá so̱ꞌ nu̱ꞌ suun sa̱ꞌ, ne̱ queneꞌe̱n nij tinúú níꞌ da̱j ꞌyáá so̱ꞌ, ga̱a ne̱ cuya̱a̱n quiꞌya̱j nij soꞌ ga̱ so̱ꞌ á. Ina̱nj tucuáán ya̱ tu̱cuꞌyón so̱ꞌ á. Ne̱ guún so̱ꞌ ꞌo̱ síí niꞌya̱nj aꞌmii a.
\v 8 Ina̱nj nana̱ sa̱ꞌ caꞌmi̱i̱ so̱ꞌ á. Ga̱a ne̱ gu̱un naꞌa̱j nij síí ta̱j riꞌyunj man níꞌ cheꞌé se se̱ caꞌvee caꞌmi̱i̱ nij soꞌ nana̱ nij cheꞌé níꞌ a.
\p
\v 9 Ne̱ narque̱ so̱ꞌ chrej nucua̱j man nij mozó se vaa veꞌé cuno̱ nij mozó rihaan se‑ruꞌve̱e̱ mozó, ne̱ quiꞌya̱j suun nij mozó nu̱ꞌ suun caꞌne̱ꞌ nij ruꞌvee rihaan nij soꞌ á. Ne̱ quiꞌya̱j mozó cara̱nꞌ rá se‑ruꞌve̱e̱ mozó ni̱ꞌyaj soꞌ man mozó yoꞌ á. Se̱ caꞌmii tuꞌva̱ mozó rihaan se‑ruꞌve̱e̱ mozó maꞌ.
\v 10 Se̱ quiꞌyaj itu̱u̱ mozó siꞌyaj se‑ruꞌve̱e̱ mozó maꞌ. Tana̱nj veꞌé ina̱nj quiꞌya̱j mozó á. Dan ga̱a ne̱ queneꞌe̱n cunuda̱nj yuvii̱ da̱j ꞌyaj mozó ne̱ xca̱j yuvii̱ cuentá se vaa veꞌé vaa tucuáán tucuꞌyón níꞌ stucua̱nj Yaꞌanj Si̱j Tinanii man níꞌ rihaan Sayuun ado̱nj.
\p
\v 11 Dan me se a̱j xcaj níꞌ cuentá se vaa quiꞌyaj ndoꞌo Yaꞌanj se lu̱j cheꞌé cunuda̱nj yuvii̱, se vaa caꞌve̱e nani̱i̱ cunuda̱nj nij yuvii̱ rihaan chrej chiꞌi̱i̱ do̱ꞌ, rihaan sayuun do̱ꞌ,
\v 12 ne̱ cheꞌé dan xcaj níꞌ cuentá se vaa no̱ xcúún níꞌ caꞌne̱ꞌ rá níꞌ ga̱ rasu̱u̱n naꞌvej rá Yaꞌanj quiꞌya̱j níꞌ a. Ne̱ se̱ quiꞌyaj níꞌ ina̱nj se vaa me rá nij síí noco̱ꞌ se‑chre̱j chumii̱ nihánj quiꞌya̱j nij soꞌ maꞌ. Xca̱j níꞌ cuentá da̱j quiꞌya̱j níꞌ, ne̱ tucuáán nica̱ quiꞌya̱j níꞌ, ne̱ quiꞌya̱j níꞌ ina̱nj se vaa me rá Yaꞌanj quiꞌya̱j níꞌ ya̱j ga̱a yáán níꞌ rihaan chumii̱ nihánj cuano̱ á.
\v 13 Ne̱ na̱ꞌvi̱j ndoꞌo níꞌ caꞌna̱ꞌ uún Taꞌanj níꞌ síí uun chij ndoꞌo Síí Tinanii man níꞌ rihaan Sayuun, Jesucristó Si̱j Caꞌnéé Yaꞌanj, ne̱ dan me se uun niha̱ꞌ uxrá rá níꞌ cheꞌé se uun ya̱ rá níꞌ se vaa caꞌna̱ꞌ uún soꞌ a. Ne̱ xa̱ꞌ soꞌ, tza̱j ne̱ queneꞌe̱n níꞌ se vaa niꞌndaj ya̱ sa̱ꞌ veꞌé vaa soꞌ ado̱nj.
\v 14 Ne̱ soꞌ me síí caꞌnéé nimán cavi̱ꞌ cheꞌé níꞌ, cheꞌé rej caꞌve̱e caꞌne̱ꞌ rá níꞌ ga̱ me maꞌa̱n tucuáán chiꞌi̱i̱ canocoꞌ níꞌ ga̱a rque̱, ne̱ caꞌve̱e cunu̱u sa̱ꞌ níꞌ, ne̱ gu̱un níꞌ yuvii̱ noco̱ꞌ man o̱rúnꞌ soꞌ, ne̱ gu̱un niha̱ꞌ ndoꞌo rá níꞌ quiꞌya̱j níꞌ suun sa̱ꞌ ado̱nj.
\v 15 Nana̱ nihánj me chrej sa̱ꞌ ya̱ nago̱ꞌ so̱ꞌ rihaan nij tinúú níꞌ, ne̱ sca̱ꞌ ndoꞌo caꞌmi̱i̱ so̱ꞌ, caꞌne̱ꞌ so̱ꞌ suun rihaan nij soꞌ, ga̱a ne̱ caꞌne̱ꞌ rá nij soꞌ ga̱ se chiꞌi̱i̱ á. Ne̱ da̱nj qui̱ꞌyáá so̱ꞌ do̱ꞌ, da̱nj caꞌmi̱i̱ so̱ꞌ do̱ꞌ, ga̱a ne̱ daj chiha̱a̱ míj se̱ guun cata̱j yuvii̱ se vaa taj yuꞌvee nó so̱ꞌ do̱ꞌ, nana̱ aꞌmii so̱ꞌ do̱ꞌ a̱ maꞌ.
\c 3
\s Veꞌé quiꞌya̱j níꞌ rihaan yuvii̱ cheꞌé se tinanii Yaꞌanj man níꞌ rihaan sayuun a
\p
\v 1 Cata̱j uún so̱ꞌ rihaan nij yuvii̱ se vaa cara̱a̱ cochro̱j nij yuvii̱ rihaan nij síí nica̱j suun, ne̱ cuno̱ nij yuvii̱ rihaan nij soꞌ á. Caꞌve̱j nij yuvii̱ quiꞌya̱j nij yuvii̱ suun aꞌneꞌ nij síí nica̱j suun rihaan nij soꞌ, ne̱ me maꞌa̱n suun sa̱ꞌ quiꞌya̱j nij soꞌ á.
\v 2 Se̱ caꞌmii chiꞌi̱i̱ nij soꞌ ni̱ꞌyaj nij soꞌ tuviꞌ nij soꞌ maꞌ. Se̱ canó tuviꞌ nij soꞌ ga̱ tuviꞌ nij soꞌ maꞌ. Ma̱an se veꞌé ina̱nj quiꞌya̱j nij soꞌ, ne̱ nica̱ꞌ ndoꞌo caꞌmi̱i̱ nij soꞌ rihaan cunuda̱nj yuvii̱ a.
\p
\v 3 Dan me se asi̱j rque̱, ne̱ síí niꞌyo̱n rmaꞌa̱n me maꞌa̱n níꞌ, ne̱ síí tucuáá me níꞌ, ne̱ canocoꞌ níꞌ tucuáán tihaꞌ yuꞌunj, ne̱ quiꞌyaj níꞌ náá guun se vaa guun rá nee̱ man níꞌ quiꞌya̱j yoꞌ a. Dan me se qui̱j me rá níꞌ niꞌya̱j níꞌ tuviꞌ níꞌ, ne̱ guun xco̱j ruva̱a̱ rá níꞌ niꞌya̱j níꞌ tuviꞌ níꞌ, ne̱ quitáá riꞌyunj tuviꞌ níꞌ niꞌya̱j nij soꞌ man níꞌ, ne̱ nachriꞌ níꞌ man tuviꞌ níꞌ a.
\p
\v 4 Tza̱j ne̱ ga̱a xcaj níꞌ cuentá cheꞌé Yaꞌanj Si̱j Tinanii man níꞌ rihaan Sayuun, se vaa soꞌ me síí me rá ra̱cuíj man níꞌ, ga̱a ne̱ queneꞌen níꞌ se vaa cunuu ꞌe̱e̱ rá soꞌ man níꞌ a.
\v 5 Dan me se tinanii Yaꞌanj man níꞌ rihaan chrej chiꞌi̱i̱ do̱ꞌ, rihaan sayuun do̱ꞌ ado̱nj. Né cheꞌe̱ se sa̱ꞌ quiꞌyaj maꞌa̱n níꞌ me tinanii Yaꞌanj man níꞌ rihaan sayuun maꞌ. Tana̱nj cunuu ꞌe̱e̱ rá maꞌa̱n Yaꞌanj niꞌya̱j soꞌ man níꞌ, ne̱ rqué Yaꞌanj Nimán Yaꞌanj rihaan níꞌ, dan cunuu naca̱ nimán níꞌ ne̱ cunuu sa̱ꞌ nimán níꞌ ado̱nj.
\v 6 Dan me se ma̱an cheꞌé Jesucristó Si̱j Caꞌnéé Yaꞌanj, Si̱j Tinanii man níꞌ rihaan Sayuun me rqué ndoꞌo Yaꞌanj Nimán soꞌ nimán níꞌ na̱nj ado̱nj.
\v 7 Se lu̱j quiꞌyaj soꞌ me se tinavij soꞌ cacunꞌ xráá níꞌ, ne̱ cunuu sa̱ꞌ nimán níꞌ, quiꞌyaj soꞌ, ne̱ ma̱an cheꞌé dan rque̱ ndoꞌo Yaꞌanj se sa̱ꞌ rihaan níꞌ ne̱ caꞌa̱nj níꞌ ca̱yáán níꞌ ga̱ soꞌ nu̱ꞌ cavii nu̱ꞌ caꞌanj nda̱a vaa naꞌvi̱j ya̱ níꞌ na̱nj ado̱nj.
\v 8 Ya̱ uxrá vaa nu̱ꞌ nana̱ nihánj ado̱nj.
\s Nataꞌ Pabló cheꞌé nij yuvii̱ ꞌyaj xraꞌ taꞌa̱j nij síí noco̱ꞌ man Yaꞌanj a
\p Ne̱ me rá ꞌu̱nj sca̱ꞌ caꞌmi̱i̱ so̱ꞌ nu̱ꞌ nana̱ nihánj rihaan nij yuvii̱ amán rá niꞌya̱j man Yaꞌanj, cheꞌé rej xca̱j nij soꞌ cuentá se vaa no̱ xcúún nij soꞌ quiꞌya̱j nij soꞌ suun sa̱ꞌ ina̱nj á. Sese da̱nj quiꞌya̱j nij soꞌ, ne̱ si̱j vaa sa̱ꞌ me nij soꞌ, ne̱ cavi̱i̱ sa̱ꞌ doj yuvii̱, quiꞌya̱j nij soꞌ ado̱nj.
\v 9 Tza̱j ne̱ se̱ canó tuvíꞌ so̱ꞌ ga̱ yuvii̱ maꞌ. Síí niꞌyo̱n me síí ꞌyaj da̱nj chugua̱nj. Se̱ nanó rá so̱ꞌ cheꞌé xií so̱ꞌ ga̱a naá da̱j si̱j me nij soꞌ maꞌ. Se̱ canó tuvíꞌ so̱ꞌ cheꞌé stucua̱nj Moisés maꞌ. ꞌO̱ se né se racuíj man yuvii̱ me nana̱ anó tuviꞌ yoꞌ maꞌ. Tana̱nj nana̱ snúú rmaꞌa̱n me yoꞌ ado̱nj.
\v 10 Sese vaa ꞌo̱ síí ꞌyaj xraꞌ taꞌa̱j yuvii̱, ne̱ cata̱j xnaꞌanj so̱ꞌ rihaan soꞌ se vaa caꞌne̱ꞌ rá soꞌ ga̱ suun ꞌyaj da̱nj a. Nda̱a vi̱j caꞌmi̱i̱ so̱ꞌ rihaan soꞌ, ne̱ sese se̱ caꞌvej rá soꞌ cuno̱ soꞌ, ne̱ se̱ caꞌvej so̱ꞌ nichru̱nꞌ soꞌ rihaan soj maꞌ.
\v 11 ꞌO̱ se xa̱ꞌ síí ꞌyaj xraꞌ taꞌa̱j yuvii̱, tza̱j ne̱ a̱j tanáj soꞌ tucuáán ya̱, ne̱ tumé soꞌ cacunꞌ ado̱nj. Ne̱ ma̱an cheꞌé cacunꞌ ata̱ soꞌ roꞌ, ꞌyaj yu̱u̱n cheꞌe̱ riꞌ soꞌ na̱nj ado̱nj.
\s Suun caꞌneꞌ Pabló rihaan Titó a
\p
\v 12 Caꞌne̱j ꞌu̱nj man síí cuꞌna̱j Artemas cuchi̱ꞌ soꞌ rihaan so̱ꞌ, ne̱ sese se̱ caꞌvee cuchi̱ꞌ soꞌ, ne̱ caꞌne̱j ꞌu̱nj man síí cuꞌna̱j Tíquico a. Asa̱ꞌ cuchiꞌ soꞌ rihaan so̱ꞌ, ne̱ raꞌya̱nj cuchi̱ꞌ so̱ꞌ chumanꞌ Nicópolis, ga̱a ne̱ nari̱ꞌ tuviꞌ níꞌ ado̱nj. ꞌO̱ se guun rá ꞌu̱nj ca̱yáán ꞌu̱nj chumanꞌ yoꞌ tiempó acoj ndoꞌo ado̱nj.
\v 13 Ra̱cuíj so̱ꞌ man síí cuꞌna̱j Zenas licenciadó síí aꞌmii cheꞌé yuvii̱ rihaan cuese̱ do̱ꞌ, man síí cuꞌna̱j Apolos do̱ꞌ, quiꞌya̱j chuvi̱i ro̱j soꞌ caꞌa̱nj ro̱j soꞌ á. Taj se cachi̱in man ro̱j soꞌ, qui̱ꞌyáá so̱ꞌ maꞌ. ꞌO̱ se me maꞌa̱n rasu̱u̱n achiin man ro̱j soꞌ, ne̱ rque̱ so̱ꞌ na̱nj á.
\p
\v 14 Ne̱ me rá ꞌu̱nj nari̱ꞌ ꞌó nij tinúú níꞌ quiꞌya̱j ndoꞌo nij soꞌ suun sa̱ꞌ cheꞌé tuviꞌ nij soꞌ síí achiin ya̱ rasu̱u̱n man uún chugua̱nj. Sese da̱nj ꞌyaj nij soꞌ, ne̱ vaa se gúnꞌ man nij soꞌ chugua̱nj.
\s Veꞌé cuma̱n nij tuvi̱ꞌ Titó, rá nij tuvi̱ꞌ Pabló a
\p
\v 15 Me rá cunuda̱nj nij yuvii̱ ya̱nj ga̱ ꞌu̱nj cuano̱ se vaa veꞌé ca̱yáán so̱ꞌ ado̱nj. Ne̱ cata̱j so̱ꞌ rihaan nij síí ꞌe̱e̱ rá man níꞌ nij síí noco̱ꞌ man Yaꞌanj se vaa veꞌé cuma̱n cunuda̱nj nij soꞌ á. Me rá ꞌu̱nj ꞌo̱ quiꞌya̱j ndoꞌo Yaꞌanj se lu̱j cheꞌé cunuda̱nj nij soj na̱nj ado̱nj.