\id 1JN
\h 1 Juan
\toc1 1 Juan
\mt Nihánj me cartá ꞌo̱ caꞌnéé Juan rihaan nij síí noco̱ꞌ man Jesucristó a
\c 1
\s Cata̱j xnaꞌanj Juan cheꞌé se vaa queneꞌen rihaan maꞌa̱n soꞌ a
\p
\v 1 Dan me se núj me se cata̱j xnaꞌanj núj rihaan nij soj cheꞌé ꞌo̱ síí cayáán ga̱a naá asi̱j guun cheꞌe̱ Yaꞌanj quiꞌyaj Yaꞌanj chumii̱, ne̱ ina̱nj se vaa cuno maꞌa̱n núj do̱ꞌ, se vaa queneꞌen rihaan maꞌa̱n núj do̱ꞌ, se vaa cutaꞌ núj raꞌa núj xráá do̱ꞌ, cheꞌé ina̱nj rasu̱u̱n vaa da̱nj cata̱j xnaꞌanj núj rihaan soj a. Dan me se cata̱j xnaꞌanj núj cheꞌé síí me Snana̱ Yaꞌanj, ne̱ soꞌ me síí quiꞌya̱j ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ado̱nj.
\v 2 Dan me se caꞌnaꞌ soꞌ, ne̱ queneꞌen núj man soꞌ, ne̱ nihánj me se nataꞌ núj rihaan nij soj cheꞌé soꞌ se vaa asino canicunꞌ soꞌ ga̱ Rej níꞌ Yaꞌanj rej ya̱nj Yaꞌanj ga̱a naá, ga̱a ne̱ ya̱j me se caꞌnaꞌ soꞌ rej ya̱nj níꞌ a.
\v 3 Dan me se nataꞌ núj rihaan maꞌa̱n nij soj cheꞌé se vaa queneꞌen núj do̱ꞌ, cheꞌé se vaa cuno núj do̱ꞌ, cheꞌé rej caꞌve̱e cunu̱u rcuaꞌa̱a̱n soj ga̱ núj, ne̱ dan me se cunu̱u rcuaꞌa̱a̱n níꞌ ga̱ Rej níꞌ Yaꞌanj ga̱ Taꞌníí soꞌ Jesucristó a.
\v 4 Ne̱ achrón núj nana̱ nihánj rihaan yanj naya̱a̱ soj, cheꞌé rej caꞌve̱e gu̱un niha̱ꞌ uxrá ya̱ rá nimán ta̱ranꞌ níꞌ ado̱nj.
\s Ase vaa yaꞌan chuguu̱n roꞌ, da̱nj vaa Yaꞌanj, ne̱ caꞌve̱e cunu̱u sa̱ꞌ nimán níꞌ quiꞌya̱j soꞌ a
\p
\v 5 Ne̱ nihánj roꞌ, me nana̱ cataj xnaꞌanj Jesucristó cuno núj, ne̱ nataꞌ núj nana̱ nihánj rihaan soj, ne̱ dan me se ase vaa ꞌo̱ yaꞌan chuguu̱n vaa Yaꞌanj, ne̱ rej va̱j Yaꞌanj me se nuviꞌ rej rmi̱ꞌ rej va̱j soꞌ maꞌ.
\v 6 Cheꞌé dan sese cata̱j níꞌ se vaa si̱j chéé ga̱ Yaꞌanj me níꞌ, ne̱ sese chéé níꞌ rej rmi̱ꞌ, ga̱a ne̱ tuꞌva rmaꞌa̱n níꞌ vaa ga̱a na̱nj ado̱nj. Ne̱ ne nocoꞌ níꞌ nana̱ ya̱ yoꞌ ga̱a a̱ maꞌ.
\v 7 Tza̱j ne̱ sese chéé níꞌ rej chuguu̱n sa̱ꞌ rej va̱j maꞌa̱n Yaꞌanj, ne̱ veꞌé sa̱ꞌ mán ta̱ranꞌ níꞌ, ne̱ navi̱j nu̱ꞌ cacunꞌ tumé níꞌ, quiꞌya̱j ton cayanj man Jesús Taꞌníí Yaꞌanj ga̱a caviꞌ soꞌ cheꞌé níꞌ, ne̱ ꞌo̱ cunu̱u sa̱ꞌ nimán níꞌ ado̱nj.
\p
\v 8 Dan me se sese cata̱j níꞌ se vaa a̱ doj cacunꞌ ne tumé níꞌ, ne̱ dan me se tihaꞌ yuꞌunj níꞌ man maꞌa̱n níꞌ na̱nj ado̱nj. Ne̱ né si̱j aꞌmii nana̱ ya̱ me níꞌ a̱ maꞌ.
\v 9 Tza̱j ne̱ sese nata̱ꞌ ya̱ níꞌ rihaan Yaꞌanj cheꞌé cacunꞌ tumé níꞌ, ne̱ nica̱ quiꞌya̱j Yaꞌanj cheꞌé níꞌ, ne̱ dan me se cata̱j soꞌ se vaa navij cacunꞌ tumé níꞌ, ne̱ tinavi̱j soꞌ nu̱ꞌ se chiꞌi̱i̱ ma̱n nimán níꞌ ado̱nj.
\v 10 Dan me se sese cata̱j níꞌ se vaa a̱ doj ne quiꞌya̱j níꞌ cacunꞌ, ne̱ ꞌyaj níꞌ síí ne̱ man nda̱a maꞌa̱n Yaꞌanj vaa ga̱a na̱nj chugua̱nj. Ne̱ sese caꞌmi̱i̱ níꞌ da̱nj, ne̱ né si̱j uno snana̱ Yaꞌanj me níꞌ ga̱a maꞌ.
\c 2
\s Jesucristó me síí aꞌmii yuꞌunj cheꞌé níꞌ a
\p
\v 1 Ase vaa taꞌníí ꞌu̱nj roꞌ, da̱nj vaa soj, tinu̱j, nocoj. Ne̱ achrón ꞌu̱nj nu̱ꞌ nana̱ nihánj rihaan yanj nihánj, cheꞌé rej se̱ quiꞌyaj soj cacunꞌ maꞌ.
\p Dan me se sese quiꞌya̱j níꞌ cacunꞌ, ne̱ vaa ꞌo̱ síí nica̱ ina̱nj nimán aꞌmii yuꞌunj cheꞌé níꞌ rihaan Rej níꞌ Yaꞌanj, ne̱ Jesucristó me soꞌ ado̱nj.
\v 2 Ne̱ soꞌ me síí caviꞌ cheꞌé rej caꞌve̱e navi̱j cacunꞌ tumé níꞌ ado̱nj. Tza̱j ne̱ né cheꞌe̱ ma̱an do̱j se‑cacu̱nꞌ níꞌ me caviꞌ soꞌ maꞌ. Caviꞌ soꞌ cheꞌé cacunꞌ tumé cunuda̱nj nij yuvii̱ ma̱n rihaan chumii̱ ado̱nj.
\p
\v 3 Dan me se nihánj me rej neꞌen níꞌ se vaa si̱j noco̱ꞌ man Cristó me níꞌ a. Dan me se sese uno níꞌ suun caꞌneꞌ Jesucristó rihaan níꞌ, ne̱ si̱j noco̱ꞌ ya̱ man soꞌ me níꞌ ado̱nj.
\v 4 Tza̱j ne̱ sese taj ꞌo̱ soꞌ se vaa si̱j noco̱ꞌ man Cristó me soꞌ ne̱ ne uno soꞌ suun caꞌneꞌ Cristó rihaan níꞌ, ne̱ síí ne̱ me soꞌ, ne̱ né si̱j aꞌmii nana̱ ya̱ me soꞌ maꞌ.
\v 5 Tza̱j ne̱ síí uno snana̱ Cristó roꞌ, soꞌ me síí ya̱ ya̱ aráj cochro̱j rihaan Yaꞌanj chugua̱nj. Cheꞌé dan, sese quiꞌya̱j níꞌ da̱nj, ne̱ caꞌve̱e gu̱un ya̱ rá níꞌ se vaa si̱j noco̱ꞌ man Cristó me níꞌ ado̱nj.
\v 6 Ne̱ síí taj se vaa ꞌo̱ nocoꞌ soꞌ man Cristó roꞌ, ase vaa quiꞌyaj Jesús, da̱nj ina̱nj nó xcúún soꞌ quiꞌya̱j maꞌa̱n soꞌ uún ado̱nj.
\p
\v 7 Dan me se ꞌe̱e̱ raj man soj, tinu̱j, nocoj. Ne̱ nihánj me se cachro̱n ꞌu̱nj cheꞌé ꞌo̱ suun aꞌnéꞌ ꞌu̱nj rihaan soj cuno̱ soj chugua̱nj. Tza̱j ne̱ né su̱u̱n aꞌneꞌ naca̱ ꞌu̱nj rihaan soj me nana̱ nihánj maꞌ. Veé nana̱ cuno soj asi̱j guun cheꞌe̱ soj canocoꞌ soj man Cristó me nana̱ nihánj na̱nj ado̱nj.
\v 8 Dan me se cachro̱n uún ꞌu̱nj ꞌo̱ suun naca̱ aꞌnéꞌ ꞌu̱nj rihaan soj cuno̱ soj, ne̱ ya̱ ya̱ suun naca̱ tucuꞌyón Cristó me suun nihánj, ne̱ cuno soj suun nihánj ado̱nj. ꞌO̱ se va̱j navi̱j rej rmi̱ꞌ rihaan chumii̱ nihánj, ne̱ Cristó roꞌ, me yaꞌan chuguu̱n, ne̱ dan me se guun cheꞌe̱ snana̱ soꞌ cuchuguu̱n snana̱ soꞌ rihaan chumii̱ nihánj ado̱nj.
\p
\v 9 Ne̱ xa̱ꞌ síí taj se vaa va̱j soꞌ rej chuguu̱n ga̱ snana̱ Cristó ne̱ nachriꞌ soꞌ niꞌya̱j soꞌ man tinúú soꞌ, ne̱ si̱j va̱j gue̱e̱ rej rmi̱ꞌ me ya̱ soꞌ na̱nj chugua̱nj.
\v 10 Ne̱ síí ꞌe̱e̱ rá man tinúú me se soꞌ me síí chéé rej chuguu̱n ga̱ snana̱ Cristó, ne̱ se̱ caꞌvee naxru̱ꞌ soꞌ maꞌ.
\v 11 Ne̱ xa̱ꞌ síí nachriꞌ man tinúú, tza̱j ne̱ soꞌ me síí va̱j rej rmi̱ꞌ, ne̱ ꞌo̱ chéé gue̱e̱ soꞌ rej rmi̱ꞌ na̱nj á. Ne neꞌen soꞌ me rej va̱j soꞌ a̱ maꞌ. ꞌO̱ se caráán rihaan soꞌ, quiꞌyaj rej rmi̱ꞌ va̱j soꞌ na̱nj ado̱nj.
\p
\v 12 Dan me se achrón ꞌu̱nj nu̱ꞌ nana̱ nihánj naya̱a̱ soj xni̱i, cheꞌé se navij cacunꞌ tumé soj rihaan Yaꞌanj cheꞌé se noco̱ꞌ soj man Cristó ado̱nj.
\p
\v 13 Achrón ꞌu̱nj nu̱ꞌ nana̱ nihánj naya̱a̱ soj si̱j vaa taꞌníí, cheꞌé se a̱j neꞌen soj man síí cayáán ga̱ Yaꞌanj asi̱j tacóó chumii̱ a.
\p Achrón ꞌu̱nj nu̱ꞌ nana̱ nihánj naya̱a̱ soj si̱j tachru̱u̱, cheꞌé se a̱j quiꞌyaj canaán soj rihaan Síí Chre̱e ado̱nj.
\p Achrón ꞌu̱nj nu̱ꞌ nana̱ nihánj naya̱a̱ soj xni̱i, cheꞌé se a̱j neꞌen soj man Rej níꞌ Yaꞌanj ado̱nj.
\p
\v 14 Achrón ꞌu̱nj nu̱ꞌ nana̱ nihánj naya̱a̱ soj si̱j vaa taꞌníí, cheꞌé se a̱j neꞌen soj man síí cayáán ga̱ Yaꞌanj asi̱j tacóó chumii̱ ado̱nj.
\p Achrón ꞌu̱nj nu̱ꞌ nana̱ nihánj naya̱a̱ soj si̱j tachru̱u̱, cheꞌé se nucua̱j ndoꞌo nimán soj rihaan sayuun, ne̱ ꞌo̱ uno soj snana̱ Yaꞌanj, ne̱ a̱j quiꞌyaj canaán soj rihaan Síí Chre̱e na̱nj ado̱nj.
\p
\v 15 Se̱ guun rá soj ni̱ꞌyaj soj chumii̱ nihánj do̱ꞌ, nij rasu̱u̱n ma̱n rihaan chumii̱ nihánj do̱ꞌ maꞌ. ꞌO̱ se xa̱ꞌ síí me rá niꞌya̱j chumii̱ nihánj, tza̱j ne̱ né si̱j aráj cochro̱j man Rej níꞌ Yaꞌanj me soꞌ maan chugua̱nj.
\v 16 ꞌO̱ se rihaan chumii̱ nihánj vaa ndoꞌo se me rá nee̱ man yuvii̱ quiꞌya̱j yoꞌ do̱ꞌ, vaa ndoꞌo se me rá yuvii̱ ni̱ꞌyaj yuvii̱ do̱ꞌ, vaa ndoꞌo rasu̱u̱n ꞌyaj uun xta̱ꞌ nimán yuvii̱ do̱ꞌ, tza̱j ne̱ né ra̱su̱u̱n cavii rihaan Rej níꞌ Yaꞌanj me nu̱ꞌ nij rasu̱u̱n vaa da̱nj maꞌ. ꞌO̱ se na̱nj rasu̱u̱n ma̱n rihaan chumii̱ nihánj me nij rasu̱u̱n yoꞌ na̱nj ado̱nj.
\v 17 Ne̱ va̱j navi̱j chumii̱ nihánj ado̱nj. Ne̱ va̱j navi̱j nu̱ꞌ se vaa me rá nij yuvii̱ ma̱n rihaan chumii̱ nihánj quiꞌya̱j nij soꞌ na̱nj ado̱nj. Tza̱j ne̱ síí ꞌyaj nda̱a vaa me rá Yaꞌanj me se ca̱yáán soꞌ nu̱ꞌ cavii nu̱ꞌ caꞌanj ga̱ Yaꞌanj chugua̱nj.
\s Nataꞌ Juan cheꞌé síí taꞌyunj taj se vaa Si̱j Caꞌnéé Yaꞌanj Ti̱nanii man Yuvii̱ rihaan Sayuun me soꞌ a
\p
\v 18 Dan me se ase vaa taꞌníj vaa soj, ne̱ me raj cuno̱ soj nana̱ nihánj ado̱nj. ꞌO̱ se nichrunꞌ navi̱j güii man níꞌ, ne̱ a̱j cuno soj nana̱ se vaa caꞌna̱ꞌ maꞌa̱n síí ta̱j riꞌyunj man Cristó, ne̱ cata̱j soꞌ se vaa Si̱j Caꞌnéé Yaꞌanj Ti̱nanii man Yuvii̱ rihaan Sayuun me soꞌ, ne̱ nihánj me se a̱j caꞌnaꞌ queꞌe̱e̱ síí ta̱j riꞌyunj man Cristó, ne̱ cheꞌé dan neꞌen ya̱ níꞌ se vaa ya̱ nichrunꞌ navi̱j güii man níꞌ ado̱nj.
\v 19 Dan me se ase vaa tinúú níꞌ vaa nij soꞌ asi̱j rque̱, tza̱j ne̱ caꞌanj yaníj nij soꞌ rihaan níꞌ, ne̱ né ya̱ ya̱ tinu̱j níꞌ me nij soꞌ a̱ maꞌ. ꞌO̱ se caꞌanj yaníj nij soꞌ rihaan níꞌ cheꞌé rej caꞌve̱e xca̱j níꞌ cuentá se vaa né tinu̱j níꞌ me ta̱ranꞌ nij soꞌ a̱ maan ado̱nj.
\p
\v 20 Ne̱ xa̱ꞌ soj, tza̱j ne̱ nu̱u̱ Nimán Yaꞌanj nimán soj, ne̱ xcaj soj cuentá ne̱ neꞌen cunuda̱nj soj nana̱ ya̱ ꞌyaj Nimán Yaꞌanj ado̱nj.
\v 21 Né cheꞌe̱ se ne neꞌen soj nana̱ ya̱ me cachrón ꞌu̱nj nana̱ nihánj naya̱a̱ soj maꞌ. Tana̱nj achrón ꞌu̱nj nana̱ nihánj cheꞌé se si̱j neꞌen nij nana̱ ya̱ me soj, ne̱ a̱j neꞌen soj se vaa ino̱ doj vaa nana̱ ne̱ ga̱ nana̱ ya̱ nana̱ noco̱ꞌ níꞌ ado̱nj.
\p
\v 22 Ne̱ síí ne̱ me se soꞌ me síí taj se vaa né Si̱j Caꞌnéé Yaꞌanj Ti̱nanii man Yuvii̱ rihaan Sayuun me Jesús chugua̱nj. Dan me se síí ta̱j riꞌyunj man Cristó me soꞌ chugua̱nj. Ne̱ dan me se ne aráj cochro̱j soꞌ rihaan Rej níꞌ Yaꞌanj do̱ꞌ, rihaan Taꞌníí Yaꞌanj do̱ꞌ maꞌ.
\v 23 Dan me se xa̱ꞌ síí ne aráj cochro̱j rihaan Taꞌníí Yaꞌanj, tza̱j ne̱ si̱j ne nocoꞌ man Rej níꞌ Yaꞌanj me soꞌ ado̱nj. Tza̱j ne̱ síí nataꞌ ya̱ se vaa veꞌé nocoꞌ soꞌ man Taꞌníí Yaꞌanj roꞌ, soꞌ me síí noco̱ꞌ ya̱ man Rej níꞌ Yaꞌanj uún ado̱nj.
\p
\v 24 Ne̱ xa̱ꞌ soj, tza̱j ne̱ ꞌo̱ cuno̱ soj nana̱ cuno soj ga̱a guun cheꞌe̱ soj canocoꞌ soj man Cristó á. Sese quiꞌya̱j soj da̱nj, ne̱ si̱j noco̱ꞌ ya̱ man Taꞌníí Yaꞌanj do̱ꞌ, man maꞌa̱n Rej níꞌ Yaꞌanj do̱ꞌ, me soj chugua̱nj.
\v 25 Ne̱ nihánj me nana̱ cataꞌ tuꞌva maꞌa̱n Cristó rihaan níꞌ, se vaa caꞌve̱e ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ya̱ ado̱nj.
\p
\v 26 Dan me se cachrón ꞌu̱nj nu̱ꞌ nana̱ nihánj naya̱a̱ soj cheꞌé rej xca̱j soj cuentá cheꞌé nij síí me rá tiha̱ꞌ yuꞌunj man soj ado̱nj.
\v 27 Ne̱ xa̱ꞌ soj, tza̱j ne̱ cheꞌé se nu̱u̱ Nimán Yaꞌanj nimán soj quiꞌyaj Cristó, ne̱ cheꞌé dan ꞌo̱ nocoꞌ soj man Cristó, ne̱ taj cheꞌé tu̱cuꞌyón nii doj nana̱ man soj a̱ maꞌ. Tana̱nj cheꞌé se nu̱u̱ Nimán Yaꞌanj nimán soj, cheꞌé dan a̱j nariꞌ soj nana̱ cheꞌé nu̱ꞌ rasu̱u̱n, ne̱ ina̱nj nana̱ ya̱ nariꞌ soj ado̱nj. Né na̱na̱ ne̱ me nana̱ nariꞌ soj, quiꞌyaj Nimán Yaꞌanj maꞌ. Dan me se ꞌo̱ canoco̱ꞌ soj man Cristó, nda̱a vaa tucuꞌyón ya̱ Nimán Yaꞌanj man soj ado̱nj.
\s Taꞌni̱j Yaꞌanj me níꞌ a
\p
\v 28 Dan me se ase vaa taꞌníj vaa nij soj rihanj, ne̱ me rá ꞌu̱nj se vaa ꞌo̱ canoco̱ꞌ xraan soj man Cristó, cheꞌé rej asa̱ꞌ caꞌnaꞌ uún soꞌ rihaan chumii̱ nihánj, ne̱ ga̱a̱ dínj nimán níꞌ, ne̱ se̱ guun naꞌa̱j níꞌ a̱ doj maꞌ.
\v 29 Dan me se neꞌen soj se vaa síí sa̱ꞌ ina̱nj me Cristó, ne̱ cheꞌé dan neꞌen soj se vaa nu̱ꞌ nij síí ꞌyaj sa̱ꞌ roꞌ, ta̱ranꞌ nij soꞌ me síí cunuu sa̱ꞌ nimán quiꞌyaj soꞌ ado̱nj.
\c 3
\p
\v 1 Dan me se xca̱j soj cuentá se vaa cunuu ꞌe̱e̱ uxrá rá Rej níꞌ Yaꞌanj niꞌya̱j soꞌ man níꞌ, ne̱ nda̱a taꞌníí Yaꞌanj guun níꞌ, quiꞌyaj Yaꞌanj chugua̱nj. Cheꞌé dan ne neꞌen nij síí ma̱n rihaan chumii̱ nihánj da̱j si̱j me níꞌ maan chugua̱nj. ꞌO̱ se ne neꞌen nij soꞌ man maꞌa̱n Yaꞌanj uún a̱ maan ado̱nj.
\v 2 Tinu̱j, nocoj, cuano̱ nihánj me se taꞌni̱j Yaꞌanj me níꞌ, ne̱ ataa xca̱j níꞌ cuentá da̱j si̱j ga̱a̱ níꞌ quiꞌya̱j Yaꞌanj vaa güii ado̱nj. Ma̱an se neꞌen níꞌ se vaa asa̱ꞌ caꞌnaꞌ Cristó, ne̱ ase vaa soꞌ roꞌ, da̱nj ga̱a̱ maꞌa̱n níꞌ uún ado̱nj. ꞌO̱ se queneꞌe̱n níꞌ man soꞌ, ne̱ xca̱j ya̱ níꞌ cuentá da̱j vaa xa̱ꞌ soꞌ na̱nj ado̱nj.
\v 3 Ne̱ nij síí uun ya̱ rá se vaa queneꞌe̱n nij soꞌ man Cristó roꞌ, ya̱ cunu̱u sa̱ꞌ nimán nij soꞌ quiꞌya̱j nij soꞌ, ne̱ ase vaa sa̱ꞌ nimán Cristó roꞌ, da̱nj ga̱a̱ sa̱ꞌ nimán nij soꞌ uún ado̱nj.
\p
\v 4 Dan me se nu̱ꞌ nij síí ꞌyaj cacunꞌ roꞌ, nij soꞌ me nij síí naꞌvej rá cuno̱ stucua̱nj Yaꞌanj a. ꞌO̱ se cacunꞌ me raj cata̱a ga̱a ne unóꞌ stucua̱nj Yaꞌanj a.
\v 5 Ne̱ neꞌen nij soj se vaa caꞌnaꞌ Cristó rihaan chumii̱ nihánj, cheꞌé rej caꞌve̱e tinavi̱j soꞌ cacunꞌ tumé yuvii̱, ne̱ a̱ doj cacunꞌ taj tumé soꞌ maꞌ.
\v 6 Ne̱ ta̱ranꞌ nij síí ꞌo̱ nocoꞌ man soꞌ roꞌ, né si̱j noco̱ꞌ cacunꞌ me nij soꞌ maꞌ. Ne̱ nij síí noco̱ꞌ tucuáán ꞌyaj cacunꞌ roꞌ, né si̱j neꞌen man Cristó me nij soꞌ maan ado̱nj.
\v 7 Dan me se ase vaa taꞌníj vaa soj rihanj, tinu̱j, nocoj, ne̱ se̱ guun tiha̱ꞌ yuꞌunj a̱ doj yuvii̱ man soj maan chugua̱nj. Síí ꞌyaj sa̱ꞌ roꞌ, síí sa̱ꞌ me soꞌ, ne̱ ase vaa maꞌa̱n Cristó vaa soꞌ ado̱nj.
\v 8 Ne̱ síí ꞌyaj cacunꞌ me se síí noco̱ꞌ stucua̱nj Síí Chre̱e me soꞌ na̱nj ado̱nj. ꞌO̱ se asi̱j guun cheꞌe̱ Yaꞌanj quiꞌyaj Yaꞌanj chumii̱ nihánj, ne̱ si̱j ꞌyaj ina̱nj cacunꞌ me Síí Chre̱e na̱nj ado̱nj. Ne̱ caꞌnaꞌ Taꞌníí Yaꞌanj rihaan chumii̱ nihánj, cheꞌé rej caꞌve̱e tiri̱ꞌ soꞌ nu̱ꞌ se vaa ꞌyaj Síí Chre̱e yoꞌ ado̱nj.
\p
\v 9 Ne̱ ta̱ranꞌ nij síí caꞌngaa naca̱ nimán quiꞌyaj Yaꞌanj roꞌ, né ꞌo̱ ꞌyaj nij soꞌ cacunꞌ a̱ maꞌ. ꞌO̱ se Yaꞌanj me síí quiꞌyaj caꞌngaa naca̱ nimán nij soꞌ, ne̱ se̱ caꞌvee ꞌo̱ quiꞌya̱j nij soꞌ cacunꞌ, ese maꞌa̱n Yaꞌanj quiꞌyaj caꞌngaa naca̱ nimán nij soꞌ na̱nj ado̱nj.
\v 10 Ne̱ nihánj me xca̱j níꞌ cuentá ni̱ꞌyaj níꞌ, ga̱a ne̱ cunu̱u ya̱a̱n níꞌ taꞌníí Yaꞌanj do̱ꞌ, taꞌníí Síí Chre̱e do̱ꞌ ado̱nj. Dan me se nij síí ne ꞌyaj se sa̱ꞌ roꞌ, né si̱j noco̱ꞌ man Yaꞌanj me nij soꞌ maꞌ. Dan me se né si̱j ꞌe̱e̱ rá man tinúú me nij soꞌ a̱ maan ado̱nj.
\s No̱ xcúún níꞌ cunu̱u ꞌe̱e̱ rá níꞌ man tuviꞌ níꞌ a
\p
\v 11 ꞌO̱ se nana̱ nihánj me nana̱ cuno soj asi̱j guun cheꞌe̱ soj canocoꞌ soj man Yaꞌanj, ne̱ nana̱ nihánj taj se vaa no̱ xcúún níꞌ cunu̱u ꞌe̱e̱ rá níꞌ man tuviꞌ níꞌ chugua̱nj.
\v 12 Dan me se se̱ quiꞌyaj níꞌ nda̱a vaa quiꞌyaj síí cuꞌna̱j Caín ga̱a naá maꞌ. ꞌO̱ se si̱j noco̱ꞌ stucua̱nj Síí Chre̱e me soꞌ, ne̱ ticaviꞌ ya̱ soꞌ tinúú soꞌ ado̱nj. Ne̱ me cheꞌé quiꞌyaj soꞌ da̱nj, rá soj ga̱. ꞌO̱ se nu̱ꞌ rasu̱u̱n quiꞌyaj soꞌ me se ina̱nj chiꞌi̱i̱ ndoꞌo quiꞌyaj maꞌa̱n soꞌ, ne̱ tinúú soꞌ me se sa̱ꞌ ina̱nj vaa rasu̱u̱n quiꞌyaj tinúú soꞌ, ne̱ cheꞌé dan guun xco̱j ruva̱a̱ rá soꞌ niꞌya̱j soꞌ tinúú soꞌ ado̱nj.
\p
\v 13 Dan me se se̱ caꞌanj rá soj sese nachri̱ꞌ nij síí ma̱n rihaan chumii̱ nihánj ni̱ꞌyaj nij soꞌ man soj, maan tinu̱j, maan nocoj.
\v 14 ꞌO̱ se cheꞌé se cunuu ꞌe̱e̱ rá níꞌ man tinúú níꞌ roꞌ, cheꞌé dan neꞌen níꞌ se vaa a̱j tanáj xco̱ níꞌ chrej chiꞌi̱i̱ chrej quiꞌya̱j cavi̱ꞌ níꞌ, ne̱ a̱j cunuu sa̱ꞌ nimán níꞌ, ne̱ caꞌve̱e ca̱yáán níꞌ ga̱ Yaꞌanj ado̱nj. Ne̱ síí ne ꞌe̱e̱ rá man tuviꞌ me se adi̱ꞌ se vaa nij síí caviꞌ roꞌ, vaa nij soꞌ na̱nj ado̱nj.
\v 15 Dan me se xa̱ꞌ ta̱ranꞌ nij síí nachriꞌ niꞌya̱j man tinúú me se ase vaa síí ticaviꞌ man tinúú roꞌ, vaa nij soꞌ, ne̱ neꞌen soj se vaa síí vaa da̱nj roꞌ, ne vaa iꞌna̱ꞌ nimán soꞌ rihaan Yaꞌanj a̱ maꞌ.
\v 16 Ne̱ Cristó roꞌ, me síí caꞌvej rá cavi̱ꞌ cheꞌé níꞌ, ne̱ cheꞌé dan neꞌen níꞌ se vaa ꞌe̱e̱ rá soꞌ man níꞌ ado̱nj. Ne̱ cheꞌé dan no̱ xcúún níꞌ caꞌne̱j nimán níꞌ cavi̱ꞌ níꞌ cheꞌé tinúú níꞌ chugua̱nj.
\p
\v 17 Dan me se sese vaa ndoꞌo rasu̱u̱n ma̱n rihaan chumii̱ nihánj ni̱caj ꞌo̱ soꞌ, ne̱ nda̱ꞌ se neꞌen soꞌ se vaa achiin ndoꞌo rasu̱u̱n man tinúú soꞌ tza̱j ne̱ naꞌvej rá soꞌ ra̱cuíj soꞌ man tinúú soꞌ, ne̱ né si̱j ꞌe̱e̱ rá man tuviꞌ nda̱a vaa ꞌe̱e̱ rá Yaꞌanj man níꞌ me soꞌ a̱ maan ado̱nj.
\v 18 Dan me se ase vaa taꞌníj vaa soj chugua̱nj. Dan me se se̱ guun cata̱j u̱u̱n níꞌ nana̱ u̱u̱n se vaa ꞌe̱e̱ rá níꞌ man tuviꞌ níꞌ maꞌ. Tana̱nj quiꞌya̱j níꞌ se sa̱ꞌ nda̱a vaa taj nana̱ ya̱ a.
\s Taj cheꞌé gu̱un naꞌa̱j níꞌ ni̱ꞌyaj níꞌ Yaꞌanj maꞌ
\p
\v 19 Dan me se sese quiꞌya̱j níꞌ da̱nj, ne̱ queneꞌe̱n níꞌ se vaa si̱j noco̱ꞌ ya̱ nana̱ ya̱ me níꞌ, ne̱ dan me se gu̱un ya̱ ya̱ rá nimán níꞌ rihaan Yaꞌanj ado̱nj.
\v 20 ꞌO̱ se nda̱ꞌ se caꞌve̱e nano̱ rá níꞌ cheꞌé cacunꞌ tumé níꞌ, tza̱j ne̱ sa̱ꞌ doj vaa Yaꞌanj rihaan nimán níꞌ, ne̱ Yaꞌanj me síí neꞌen cunuda̱nj ado̱nj.
\v 21 Tinu̱j, nocoj, sese nuviꞌ cacunꞌ tumé níꞌ rá níꞌ, ne̱ se̱ cuchuꞌviꞌ níꞌ caꞌmi̱i̱ níꞌ ga̱ Yaꞌanj maꞌ.
\v 22 Dan me se me maꞌa̱n rasu̱u̱n cachi̱nj níꞌ rihaan Yaꞌanj, ne̱ rque̱ Yaꞌanj cunuda̱nj se vaa cachi̱nj niꞌya̱j níꞌ rihaan soꞌ, cheꞌé se si̱j uno suun caꞌneꞌ soꞌ me níꞌ, ne̱ uun niha̱ꞌ rá soꞌ niꞌya̱j soꞌ se sa̱ꞌ ꞌyaj níꞌ ado̱nj.
\v 23 Dan me se nihánj me suun caꞌneꞌ Yaꞌanj cuno̱ níꞌ a. Me rá Yaꞌanj cuchuma̱n rá níꞌ ni̱ꞌyaj níꞌ man Taꞌníí soꞌ Jesucristó, ne̱ me rá Yaꞌanj cunu̱u ꞌe̱e̱ rá níꞌ ni̱ꞌyaj níꞌ man tuviꞌ níꞌ nda̱a vaa caꞌneꞌ Yaꞌanj suun rihaan níꞌ a.
\v 24 Ne̱ síí uno suun caꞌneꞌ Yaꞌanj rihaan níꞌ roꞌ, soꞌ me síí ꞌo̱ nocoꞌ man Yaꞌanj, ne̱ ꞌo̱ ne Yaꞌanj ga̱ soꞌ ado̱nj. Ne̱ nihánj me rej neꞌen níꞌ se vaa ꞌo̱ ne Yaꞌanj ga̱ níꞌ na̱nj ado̱nj. ꞌO̱ se rqué Yaꞌanj Nimán Yaꞌanj man níꞌ ado̱nj.
\c 4
\s Caꞌmii Juan cheꞌé nana̱ rqué Nimán Yaꞌanj do̱ꞌ, cheꞌé nana̱ ne̱ do̱ꞌ a
\p
\v 1 Tinu̱j, nocoj, se̱ guun cuno̱ soj me maꞌa̱n nana̱ maꞌ. Asino xca̱j soj cuentá sese nana̱ rqué Nimán Yaꞌanj me nana̱ caꞌmii ꞌo̱ soꞌ á. ꞌO̱ se a̱j caꞌnaꞌ ndoꞌo síí ne̱ rihaan chumii̱ nihánj, ne̱ taj nij soꞌ se vaa si̱j nataꞌ snana̱ Yaꞌanj me nij soꞌ, tza̱j ne̱ tuꞌva rmaꞌa̱n nij soꞌ na̱nj á.
\v 2 Tza̱j ne̱ nihánj me se vaa quiꞌya̱j soj, ga̱a ne̱ caꞌve̱e xca̱j soj cuentá me nana̱ me nana̱ rqué Nimán Yaꞌanj ado̱nj. Sese cata̱j ꞌo̱ soꞌ se vaa Jesucristó me Síí Caꞌnéé Yaꞌanj Ti̱nanii man Yuvii̱ rihaan Sayuun, ne̱ guun Jesucristó yuvii̱ caꞌnaꞌ soꞌ, cata̱j ꞌo̱ soꞌ, ne̱ nana̱ yoꞌ me nana̱ rqué Nimán Yaꞌanj ado̱nj.
\v 3 Tza̱j ne̱ nu̱ꞌ nij síí taj se vaa né si̱j caꞌnéé Yaꞌanj man me Jesús me se né na̱na̱ rqué Nimán Yaꞌanj me yoꞌ maꞌ. ꞌO̱ se snana̱ síí ta̱j riꞌyunj man Cristó me yoꞌ, ne̱ dan me se a̱j cuno soj se vaa caꞌna̱ꞌ nij soꞌ ado̱nj. Ne̱ ya̱j nihánj me se a̱j ma̱n ndoꞌo nij soꞌ rihaan chumii̱ nihánj cuano̱ chugua̱nj.
\p
\v 4 Tza̱j ne̱ ya̱j nihánj me se síí ya̱ noco̱ꞌ man Yaꞌanj me nij soj, tinu̱j, nocoj. Ne̱ a̱j quiꞌyaj canaán soj rihaan nij síí ne̱ cuano̱ ado̱nj. ꞌO̱ se nu̱u̱ Nimán Yaꞌanj nimán soj, ne̱ nucua̱j doj Nimán Yaꞌanj rihaan Síí Chre̱e va̱j rihaan chumii̱ nihánj chugua̱nj.
\v 5 Ne̱ nij síí ne̱ yoꞌ, tza̱j ne̱ ma̱an síí ma̱n rihaan chumii̱ nihánj me nij soꞌ, ne̱ cheꞌé dan ina̱nj aꞌmii nij soꞌ nda̱a vaa nariꞌ nij soꞌ rihaan chumii̱ nihánj, ne̱ uno nij síí ma̱n rihaan chumii̱ nihánj snana̱ nij soꞌ na̱nj á.
\v 6 Tza̱j ne̱ síí ya̱ noco̱ꞌ man Yaꞌanj me níꞌ, ne̱ nij síí neꞌen man Yaꞌanj roꞌ, uno nij soꞌ snana̱ níꞌ ado̱nj. Ne̱ xa̱ꞌ síí ne nocoꞌ man Yaꞌanj, tza̱j ne̱ ne uno nij soꞌ snana̱ níꞌ a̱ maꞌ. Cheꞌé dan neꞌen níꞌ me síí nu̱u̱ Nimán Yaꞌanj nimán, ne̱ neꞌen níꞌ me síí nu̱u̱ nana̱ tihaꞌ yuꞌunj nimán chugua̱nj.
\s No̱ xcúún níꞌ cunu̱u ꞌe̱e̱ rá níꞌ man tuviꞌ níꞌ, cheꞌé se ꞌe̱e̱ rá Yaꞌanj man níꞌ a
\p
\v 7 Tinu̱j, nocoj, no̱ xcúún níꞌ ga̱a̱ ꞌe̱e̱ rá níꞌ man tuviꞌ níꞌ ado̱nj. ꞌO̱ se Yaꞌanj me síí rqué rej nucua̱j rihaan níꞌ ga̱a̱ ꞌe̱e̱ rá níꞌ man tuviꞌ níꞌ a. Cheꞌé dan nu̱ꞌ síí ꞌe̱e̱ rá man tuviꞌ me se síí caꞌngaa naca̱ nimán quiꞌyaj Yaꞌanj me nij soꞌ ado̱nj. Ne̱ neꞌen nij soꞌ man Yaꞌanj ado̱nj.
\v 8 Ne̱ síí ne ꞌe̱e̱ rá man tuviꞌ me se ataa xca̱j soꞌ cuentá cheꞌé Yaꞌanj na̱nj ado̱nj. ꞌO̱ se ataa xca̱j soꞌ cuentá se vaa Yaꞌanj me síí ꞌe̱e̱ ina̱nj rá man níꞌ ado̱nj.
\v 9 Ne̱ nihánj me cata̱j xnaꞌanj ꞌu̱nj rihaan soj me cheꞌé neꞌen níꞌ se vaa ꞌe̱e̱ rá Yaꞌanj man níꞌ a. Dan me se nda̱ꞌ se o̱rúnꞌ ya̱ Taꞌníí Yaꞌanj, tza̱j ne̱ caꞌnéé Yaꞌanj man Taꞌníí soꞌ rihaan chumii̱ nihánj, cheꞌé rej caꞌve̱e ga̱a̱ iꞌna̱ꞌ nimán níꞌ nu̱ꞌ cavii nu̱ꞌ caꞌanj quiꞌya̱j soꞌ a.
\v 10 Ne̱ vaa cheꞌé xca̱j níꞌ cuentá se vaa ne cara̱a̱ cochro̱j níꞌ rihaan Yaꞌanj asino ya̱a̱n maꞌ. Tana̱nj asino ya̱a̱n me se cunuu ꞌe̱e̱ rá Yaꞌanj niꞌya̱j Yaꞌanj man níꞌ, ga̱a ne̱ caꞌnéé soꞌ man Taꞌníí soꞌ cheꞌé rej cavi̱ꞌ Taꞌníí soꞌ yan tinavi̱j Taꞌníí soꞌ cacunꞌ tumé níꞌ a.
\v 11 Tinu̱j, nocoj, cheꞌé se ꞌe̱e̱ rá Yaꞌanj man níꞌ da̱nj roꞌ, cheꞌé dan no̱ xcúún níꞌ ga̱a̱ ꞌe̱e̱ rá níꞌ man tuviꞌ níꞌ ado̱nj.
\v 12 A̱ doj yuvii̱ ne queneꞌe̱n rihaan man maꞌa̱n Yaꞌanj nu̱ꞌ cavii nu̱ꞌ caꞌnaꞌ maꞌ. Tza̱j ne̱ sese ga̱a̱ ꞌe̱e̱ rá níꞌ man tuviꞌ níꞌ, ne̱ ya̱ ya̱nj Yaꞌanj nimán níꞌ, ne̱ a̱j cunuu sa̱ꞌ nimán níꞌ nda̱a vaa guun rá Yaꞌanj ga̱a cunuu ꞌe̱e̱ rá Yaꞌanj man níꞌ a.
\p
\v 13 Dan me se cheꞌé se rqué Yaꞌanj Nimán Yaꞌanj rihaan níꞌ roꞌ, cheꞌé dan neꞌen níꞌ se vaa si̱j noco̱ꞌ man Yaꞌanj me níꞌ ne̱ ꞌo̱ ne soꞌ nimán níꞌ a.
\v 14 Ne̱ a̱j neꞌen núj se vaa caꞌnéé Rej níꞌ Yaꞌanj man Taꞌníí soꞌ rihaan chumii̱ nihánj cheꞌé rej gu̱un soꞌ Síí Ti̱nanii rihaan Sayuun man nij síí ma̱n rihaan chumii̱ nihánj, ne̱ a̱j nataꞌ núj nana̱ yoꞌ rihaan yuvii̱ ado̱nj.
\v 15 Ne̱ síí taj rihaan tuviꞌ se vaa Taꞌníí Yaꞌanj me Jesús roꞌ, soꞌ me síí ꞌo̱ nocoꞌ man Yaꞌanj, ne̱ ꞌo̱ ne Yaꞌanj ga̱ soꞌ chugua̱nj.
\v 16 Ne̱ a̱j neꞌen núj se vaa ꞌe̱e̱ rá Yaꞌanj man níꞌ, ne̱ amán rá núj se vaa ꞌe̱e̱ rá soꞌ man níꞌ ado̱nj.
\p Yaꞌanj me síí ꞌe̱e̱ rá man níꞌ na̱nj á. Ne̱ síí ꞌo̱ ꞌe̱e̱ rá man tuviꞌ roꞌ, soꞌ me síí ꞌo̱ nocoꞌ man Yaꞌanj, ne̱ ꞌo̱ ne Yaꞌanj nimán soꞌ ado̱nj.
\v 17 Ne̱ cheꞌé dan sese ꞌe̱e̱ rá níꞌ man tuviꞌ níꞌ, ne̱ asa̱ꞌ quisíj güii caꞌne̱ꞌ Yaꞌanj cacunꞌ cheꞌé yuvii̱, ne̱ gu̱un ya̱ rá níꞌ se vaa cavi̱i̱ sa̱ꞌ níꞌ ado̱nj. ꞌO̱ se queneꞌe̱n níꞌ se vaa ase vaa quiꞌyaj Cristó ga̱a va̱j soꞌ rihaan chumii̱ nihánj roꞌ, da̱nj ꞌyaj maꞌa̱n níꞌ uún ado̱nj.
\v 18 Cheꞌé dan síí ya̱ ya̱ ꞌe̱e̱ rá man tuviꞌ roꞌ, a̱ doj ne chuꞌviꞌ soꞌ maꞌ. Síí chuꞌviꞌ me síí uun rá se vaa quiꞌya̱j Yaꞌanj sayuun man soꞌ, ne̱ né si̱j ya̱ ya̱ ꞌe̱e̱ rá man tuviꞌ me síí guun da̱nj rá maꞌ.
\p
\v 19 Dan me se ꞌe̱e̱ rá níꞌ man tuviꞌ níꞌ cheꞌé se asino cunuu ꞌe̱e̱ rá maꞌa̱n Yaꞌanj man níꞌ a.
\v 20 Ne̱ sese cata̱j ꞌo̱ soꞌ se vaa aráj cochro̱j soꞌ rihaan Yaꞌanj, ne̱ sese nachriꞌ soꞌ niꞌya̱j soꞌ tinúú soꞌ, ne̱ síí ne̱ me soꞌ ado̱nj. ꞌO̱ se sese ruviꞌ ya̱ tinúú soꞌ niꞌya̱j soꞌ tza̱j ne̱ ne ꞌe̱e̱ rá soꞌ man tinúú soꞌ, ne̱ asa̱ꞌ caꞌve̱e cara̱a̱ cochro̱j soꞌ rihaan Yaꞌanj, sese ne ruviꞌ Yaꞌanj niꞌya̱j soꞌ ga̱.
\v 21 Ne̱ nihánj me suun caꞌneꞌ Cristó rihaan níꞌ cuno̱ níꞌ, se vaa síí aráj cochro̱j rihaan Yaꞌanj roꞌ, no̱ xcúún soꞌ ga̱a̱ ꞌe̱e̱ rá soꞌ man tuviꞌ soꞌ uún ado̱nj, taj Cristó a.
\c 5
\p
\v 1 Cunuda̱nj nij síí amán rá se vaa me Jesús Síí Caꞌnéé Yaꞌanj Ti̱nanii man Yuvii̱ rihaan Sayuun roꞌ, a̱j caꞌngaa naca̱ nimán nij soꞌ quiꞌyaj Yaꞌanj chugua̱nj. Ne̱ cheꞌé dan nij síí aráj cochro̱j rihaan Yaꞌanj roꞌ, no̱ xcúún nij soꞌ ga̱a̱ ꞌe̱e̱ rá nij soꞌ man nij síí caꞌngaa naca̱ nimán na̱nj á.
\v 2 Ne̱ sese aráj cochro̱j níꞌ rihaan Yaꞌanj, ne̱ sese uno níꞌ nij suun caꞌneꞌ Yaꞌanj cuno̱ níꞌ, ne̱ ya̱ síí ꞌe̱e̱ rá man nij taꞌníí Yaꞌanj me uún níꞌ ado̱nj.
\v 3 Ne̱ sese uno níꞌ nij suun caꞌneꞌ Yaꞌanj cuno̱ níꞌ, ne̱ si̱j aráj cochro̱j rihaan Yaꞌanj me níꞌ chugua̱nj.
\s Sese cuchuma̱n rá níꞌ ni̱ꞌyaj níꞌ man Jesús, ne̱ quiꞌya̱j canaán níꞌ rihaan se nij ma̱n rihaan chumii̱ nihánj a
\p Ne̱ ne sayu̱u̱n vaa cuno̱ níꞌ nij suun caꞌneꞌ Yaꞌanj rihaan níꞌ maꞌ.
\v 4 ꞌO̱ se cunuda̱nj nij síí caꞌngaa naca̱ nimán quiꞌyaj Yaꞌanj roꞌ, ꞌyaj canaán nij soꞌ rihaan se nij ma̱n rihaan chumii̱ nihánj ado̱nj. Ne̱ cheꞌé se amán rá níꞌ niꞌya̱j níꞌ man Jesús roꞌ, cheꞌé dan a̱j quiꞌyaj canaán níꞌ rihaan chumii̱ nihánj na̱nj ado̱nj.
\v 5 Dan me se síí amán rá se vaa Jesús me Taꞌníí Yaꞌanj roꞌ, soꞌ me síí ꞌyaj canaán rihaan se nij ma̱n rihaan chumii̱ nihánj ado̱nj.
\p
\v 6 Nihánj me Jesucristó síí caꞌnaꞌ cata̱ꞌ ne, ne̱ ꞌo̱ se ne caꞌna̱ꞌ soꞌ cata̱ꞌ ne u̱u̱n soꞌ maꞌ. Dan me se caꞌnaꞌ soꞌ cata̱ꞌ ne soꞌ, ne̱ caꞌnaꞌ soꞌ caya̱nj ton man soꞌ ne̱ cavi̱ꞌ soꞌ cheꞌé níꞌ uún ado̱nj. ꞌO̱ se Nimán Yaꞌanj taj xnaꞌanj rihaan níꞌ, ne̱ amán ya̱ rá níꞌ, ese ya̱ uxrá aꞌmii Nimán Yaꞌanj ado̱nj.
\v 7 ꞌO̱ se vaꞌnu̱j nij rasu̱u̱n taj xnaꞌanj rihaan níꞌ cheꞌé Jesucristó ado̱nj.
\v 8 Dan me se cheꞌé Nimán Yaꞌanj do̱ꞌ, cheꞌé na cataꞌ ne Jesucristó do̱ꞌ, cheꞌé ton cavii man Jesucristó ga̱a caviꞌ soꞌ do̱ꞌ roꞌ, cheꞌé dan xcaj níꞌ cuentá cheꞌé soꞌ, ne̱ cuya̱a̱n aꞌmii vaꞌnu̱j nij rasu̱u̱n yoꞌ a.
\v 9 Dan me se na̱nj uno níꞌ nana̱ nataꞌ tuviꞌ níꞌ rihaan níꞌ, ne̱ cheꞌé dan vaa cheꞌé doj cuno̱ níꞌ nana̱ nataꞌ Yaꞌanj rihaan níꞌ a. ꞌO̱ se nataꞌ Yaꞌanj nana̱ nihánj rihaan níꞌ cheꞌé Taꞌníí soꞌ a.
\v 10 Síí amán rá niꞌya̱j man Taꞌníí Yaꞌanj roꞌ, soꞌ me síí uun ya̱ rá se vaa nana̱ ya̱ me snana̱ Yaꞌanj a. Tza̱j ne̱ síí naꞌvej rá cuchuma̱n rá snana̱ Yaꞌanj roꞌ, soꞌ me síí uun rá se vaa síí ne̱ me Yaꞌanj a. ꞌO̱ se ne cuchuma̱n rá soꞌ nana̱ nataꞌ Yaꞌanj rihaan soꞌ cheꞌé Taꞌníí Yaꞌanj maꞌ.
\v 11 Ne̱ nana̱ nataꞌ Yaꞌanj rihaan níꞌ taj se vaa caꞌve̱e ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj, quiꞌyaj Yaꞌanj, cheꞌé se caviꞌ Taꞌníí Yaꞌanj cheꞌé níꞌ a.
\v 12 Síí noco̱ꞌ man Taꞌníí Yaꞌanj me síí a̱j guun cheꞌe̱ yáán ga̱ Yaꞌanj nu̱ꞌ cavii nu̱ꞌ caꞌanj ya̱ ado̱nj. Tza̱j ne̱ síí naꞌvej rá canoco̱ꞌ man soꞌ roꞌ, se̱ cayáán soꞌ ga̱ Yaꞌanj maꞌ.
\s Nataꞌ Juan da̱j queneꞌe̱n níꞌ se vaa ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj a
\p
\v 13 Dan me se a̱j cachronj nana̱ nihánj naya̱a̱ nij soj si̱j amán rá niꞌya̱j se‑chuvi̱i Taꞌníí Yaꞌanj, cheꞌé rej queneꞌe̱n soj se vaa a̱j guun cheꞌe̱ soj yáán soj ga̱ Yaꞌanj nu̱ꞌ cavii nu̱ꞌ caꞌanj ado̱nj.
\v 14 Ne̱ cuano̱ nihánj me se a̱ doj ne chuꞌviꞌ níꞌ cachi̱nj niꞌya̱j níꞌ ꞌo̱ rasu̱u̱n rihaan Yaꞌanj a̱ maꞌ. ꞌO̱ se a̱j neꞌen ya̱ níꞌ se vaa sese caꞌve̱j rá soꞌ ni̱caj níꞌ rasu̱u̱n cachíín niꞌya̱j níꞌ rihaan soꞌ, ne̱ uno soꞌ ado̱nj.
\v 15 Ne̱ cheꞌé se neꞌen níꞌ se vaa cuno̱ soꞌ me maꞌa̱n nana̱ cachi̱nj niꞌya̱j níꞌ rihaan soꞌ, cheꞌé dan neꞌen níꞌ se vaa quiꞌya̱j soꞌ nda̱a vaa cachi̱nj niꞌya̱j níꞌ rihaan soꞌ ado̱nj.
\s Caꞌmii Juan cheꞌé cacunꞌ a
\p
\v 16 Dan me se sese neꞌen níꞌ man tinúú níꞌ ꞌyaj soꞌ me maꞌa̱n cacunꞌ, ne̱ cachi̱nj niꞌya̱j níꞌ cheꞌé soꞌ rihaan Yaꞌanj, ne̱ Yaꞌanj me síí cara̱a̱ xꞌnaa cheꞌé cacunꞌ quiꞌyaj soꞌ ado̱nj. Tza̱j ne̱ sese neꞌen níꞌ man tinúú níꞌ ꞌyaj soꞌ cacunꞌ noco̱o ndoꞌo cacunꞌ quiꞌya̱j cavi̱ꞌ nu̱ꞌ soꞌ rihaan Yaꞌanj, ne̱ taj cheꞌé cachi̱nj niꞌya̱j níꞌ rihaan Yaꞌanj cheꞌé soꞌ a̱ maꞌ. Dan me se vaa cacunꞌ u̱u̱n, ne̱ vaa cacunꞌ noco̱o ndoꞌo quiꞌya̱j cavi̱ꞌ nu̱ꞌ níꞌ rihaan Yaꞌanj ado̱nj. Cheꞌé cacunꞌ noco̱o yoꞌ me se se̱ cachíín niꞌya̱j soj maꞌ.
\v 17 Dan me se me maꞌa̱n se nij ꞌyaj níꞌ me cacunꞌ chugua̱nj. Tza̱j ne̱ se̱ caviꞌ nu̱ꞌ níꞌ rihaan Yaꞌanj quiꞌya̱j me maꞌa̱n cacunꞌ yoꞌ maꞌ. ꞌO̱ se caꞌve̱e tinavi̱j Yaꞌanj cacunꞌ yoꞌ ado̱nj.
\p
\v 18 Dan me se neꞌen níꞌ se vaa nu̱ꞌ nij síí caꞌngaa naca̱ nimán quiꞌyaj Yaꞌanj roꞌ, ne ꞌyaj nij soꞌ cacunꞌ a̱ maan ado̱nj. ꞌO̱ se tumé Taꞌníí Yaꞌanj man nij soꞌ, ne̱ se̱ caꞌvee quiꞌya̱j chiꞌi̱i̱ Síí Chre̱e man nij soꞌ a̱ maꞌ.
\p
\v 19 Ne̱ neꞌen níꞌ se vaa síí caꞌngaa naca̱ nimán quiꞌyaj Yaꞌanj me níꞌ ado̱nj. Tza̱j ne̱ cunuda̱nj nij yuvii̱ ma̱n rihaan chumii̱ nihánj roꞌ, ꞌni̱j raꞌa Síí Chre̱e man nij soꞌ na̱nj ado̱nj.
\p
\v 20 Ne̱ neꞌen níꞌ se vaa a̱j caꞌnaꞌ Taꞌníí Yaꞌanj, ne̱ caꞌvee xcaj níꞌ cuentá cheꞌé Yaꞌanj ya̱ quiꞌyaj Taꞌníí Yaꞌanj, ne̱ neꞌen níꞌ se vaa me níꞌ síí noco̱ꞌ man maꞌa̱n ya̱ Taꞌníí soꞌ Jesucristó, ne̱ Jesucristó roꞌ, maꞌa̱n Yaꞌanj ya̱ me soꞌ, ne̱ soꞌ me síí quiꞌya̱j ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ado̱nj.
\p
\v 21 Ase vaa taꞌníj vaa nij soj rihanj, tinu̱j, nocoj. Dan me se cata̱j xnaꞌanj ꞌu̱nj rihaan soj se vaa tu̱mé ndoꞌo soj man soj rihaan yaꞌanj quiꞌyaj maꞌa̱n yuvii̱ á.