\id EPH
\h Efesios
\toc1 Efesios
\mt Te Guijtz Lo Rebeṉ Efesios
\c 1
\s Bacuaa Pabl lo rebeṉ guidoo neṉ guedx Éfeso
\p
\v 1 Narä, Pabl, nacä apost xten Jesucrist saꞌcsi siꞌc
rlajz Dios. Cacuaä guijtzre loj rebejṉ nani huililajz
xtiidxni, loj reni rujn siꞌcpac rniini neṉ guedx Éfeso.
\v 2 Xcaꞌtu yäḻracnäj, yäḻrbedxi lajz xten Xtadnu Dios,
näjza xten Dad Jesucrist.
\s Rusuleꞌ Pabl xtidx Jesucrist
\p
\v 3 Rliäꞌpnu xpalaꞌn Dios, Dad näj Xtad Jesucrist. Dios
racnäj nuure, xcuent Crist runiidxni guiraa reyäḻracnäj
xcaꞌ lastoonu, astoo yuꞌlanu xhaguibaa.
\v 4 Laani gule nuure, che gajdli guirixtiej guedxliujre,
te gacnu xpejṉni, te guibaṉnayanu nez lojni con yäḻrinälajz.
\v 5 Sigajcza anungäjḻ xcaꞌni nuure te gacnu siꞌc xiꞌnpacni
saꞌcsi abiääd Jesucrist te gusḻaani nuure neṉ dojḻ, siꞌc
ni gunibee Dios saꞌcsi balaslajzni nuure.
\v 6 Gucnäj Dios nuure te guiliäꞌpnu xpalaꞌn Dios, saꞌcsi
lagajc laani acuaꞌni nuure, abejnni nuure tejsi con xiꞌnni
ni sanälajzni.
\v 7 Laani basḻaani nuure neṉ dojḻ xcuent xtiejnni, laani
badzucajni xtojḻnu xcuent xcäḻruslaslajzni
\v 8 nani banidxduxhni loonu. Guideb yäḻnajn, guideb
xcäriejn
\v 9 basuleꞌni loonu xhigab xhigaꞌtzni xcuent redzuun
ni rlajzni gunni, xhigabza ni bejnni galooli.
\v 10 Luxh sidzujṉ dxej sisiojbpac xhigab ni bejn Dios.
Che guidzujṉ dxejga sutojp Dios guiraali, sudeedni guinibee
Jesucrist guiraꞌti ni yuꞌ xhaguibaa, sigajc recos ni
yuꞌ lo guedxliuj.
\p
\v 11 Arajpnu te xcäḻnasaꞌc Jesucrist, saꞌcsi galooli
bejn Dios xhigab guniidxni yäḻnasaꞌcga. Lagajc Dios
benchee guiraꞌti ni yuꞌ, luxh rujnpacni nani abejnni
xhigab najc laaca gunni
\v 12 te guiliäꞌp bejṉ xpalaꞌn xcäḻrnibeeni xcuentnu,
nani ganiddoo biolilaaznu xtidx Jesucrist.
\v 13 Näjza laꞌtu, che biejn diajgtu redidx gulii, rediidx
ni rusḻaa bejṉ lo dojḻ, dxejc huililajztu xtidx Jesucrist,
dxejc gujczatu tejsi con laani. Dxejc cuaꞌtu Sprit Dxan
xten Dios, niꞌc najc siꞌc seen ahuililajztu, siꞌcni biaꞌn
Dios diidx.
\v 14 Baniidx Dios Sprit Dxan xtenni te cuääzni neṉ
lastoonu, te niꞌc najc seen xcaꞌnu yäḻnasaꞌc nani guniidx
Dios che abaluuxni xtzuunni, nalajznu gusḻaani guiraa
rexpejṉni te guiliäꞌpreni xpalaꞌnni lo xcäḻrnibeeni.
\s Rniab Pabl gudeed Dios yäḻnajn loj renani ahuililajz
\p
\v 15 Niꞌcni näjza narä, saꞌcsi abiejn diagä xho rililajztu
xtidx Dad Jesucrist näjza xho sanälajztu guiraa rexpejṉ
Jesucrist,
\v 16 dina gusaṉä gudedä xquixtios lo Dios xcuent laꞌtu.
Rnaduxh lazä laꞌtu che rniabä lo Dios.
\v 17 Rniabä lo Xtios Dad Jesucrist, xtadni ni rnibee
xhaguibaa, guniidxni lojtu te yäḻnanduxh, te yäḻruluiloj
recos xhigaꞌtz te gacbeduxhrutu xcuent Gueb Dios.
\v 18 Rniabäza lo Dios jianij xcäriejntu te gacbeetu
xhiniꞌc najc speranz xten yäḻracrejdxtu lo xtiidxni,
te gacbeetu lacti saru, lacti sajc yäḻnasaꞌc ni gudeed
Dios lo Jesucrist näjza loj rexpejṉni,
\v 19 te gacbeezatu lacti gurobduxh najc yäḻrnibee nani
rajpni nez loonu nani ahuililajz xtiidxni. Guiraa redee
ruluii lacti nadip najc yäḻrnibee xten Dios.
\v 20 Lagajc yäḻrnibeere bejn dzuun par Jesucrist. Con
yäḻrnibeere baspajṉ Dios Jesucrist lo rebeṉgut, te gurejni
xladbee Dios cadro rnibeeni xhaguibaa.
\v 21 Maazru sajcni lo chutis gubier, lo chutis yäḻrnibee,
lo xhitis yäḻnadip, lo chutis ni rnibee; maazru sajcni
lo chutis nani abibee te guinibee, sigajc ṉaj, sigajc
neṉ redxej ni churu jiääd.
\v 22 Niluxh badeed Dios guiraꞌtini ladzṉaa Jesucrist,
laazani bejn bibee Jesucrist gunibeeni lo guiraa xhixten
xquidooni.
\v 23 Rebeṉ guidoore najc siꞌc tiejxh xten Jesucrist,
luxh sigajc rudeed Dios guiralii loj Jesucrist, sigajcza
rudeed Jesucrist guiralii loj rebejṉ ni najc xquidooni.
\c 2
\s Rusḻaa Dios nurnu saꞌcsi rinälajzni nurnu
\p
\v 1 Laani baniidxni yäḻnabajṉ lojtu che najctu siꞌc beṉgut nez loj Dios saꞌcsi rujntu dojḻ.
\v 2 Galoo gubajṉtu lo dojḻ, entis lo xnez guedxliujre guzajtu, biutu xtidx beṉdxab nani rnibee guedxliujre. Sprit xtenni rujn dzuun neṉ lastoo rexiꞌnni nani di gucuadiajg xtidx Dios.
\v 3 Luxh galoo, näj nuure nadxaagnu lojreni, biennu siꞌc ni rlajz tiejxhnu. Dxejc biennu siꞌctisni rlajz tiejxhnu, siꞌctisni biajb xhigabnu. Nungäjḻ guidxeꞌch Dios loonu, sigajc bidxeꞌchni loj guiraa rebeṉ guedxliuj.
\v 4 Niluxh balaslajz Dios nuure. Con xcäḻsanälazduxhni huinälajzni nuure.
\v 5 Mase anajcnu beṉgut lo dojḻ, laani baniidxni yäḻnabajṉ loonu. Rajpnu yäḻnabajṉre con Jesucrist. Saꞌcsi balaslajzni nuure basḻaani nuure neṉ dojḻ.
\v 6 Baspaṉsacni nuure con Jesucrist; sigajcza bejnni cuenäjnu Jesucrist xhaguibaa,
\v 7 te neṉ redxej ni churu jiääd, guluilojni lacti sajc xcäḻnasaꞌc xten yäḻrulaslajzni, niꞌc sanälajzni nuure, najcni huenduxh loonu por Jesucrist.
\v 8 Saꞌcsi rulaslajz Dios nuure, niꞌc basḻaani nuure neṉ dojḻ che huililajznu xtiidxni. Luxh et saꞌcsi yuꞌ xhi biennu; dee najc nani banidx-xliaꞌ Dios loonu.
\v 9 Xhet xcuent xhi dzunsaꞌcdi ni biennu, te di chu tejtu gac nayedxlajzdi.
\v 10 Dios najc ni benchee nuure. Sigajcza con Jesucrist bejnni gacnu bejṉ ni rujn dzunsaꞌc nani galooli agunibee Dios jienpacnu.
\s Yäḻrbedxilajz ni rajpnu por Jesucrist
\p
\v 11 Niꞌc coḻsnaj lajztu xho gujctu galoo. Ditu niajc rexpejṉ Israel. Rniireni laꞌtu ꞌbeṉzijtꞌ saꞌcsi ditu chu bee siꞌc ruꞌ rexpejṉ Israel. Saꞌcsi lagajc con ṉaareni rusäḻreni bee.
\v 12 Dxejc sugaꞌtu ditu gumbee Jesucrist. Zijt yuꞌtu loj rexpejṉ Israel, najctu beṉzijt. Nicla gumbeetu rediidx ni biaꞌn Dios loj rexpejṉ Israel. Ditu niunloj gusḻaa Dios laꞌtu lo dojḻ, dizatu niembee Gueb Dios lo guedxliujre.
\v 13 Niluxh ṉaj ayuꞌtu lo Jesucrist, laꞌtu ni guyuꞌ zijt lo Dios galoo. N̲aj agubigtu lo Dios saꞌcsi abia xtojḻtu con xtiejn Jesucrist.
\v 14 Jesucrist najc ni rbecdxi lajznu. Laani bejn gujc rexpejṉ Israel tejsi con rebeṉzijt. Laani badzucajni redzuun xten leii te gujc rexpejṉ Israel tejsi con rebeṉzijt.
\v 15 Lagajc con tiejxh Jesucrist ni gojḻ lo crujz banijtni redzuun xten leii nani bejn bidxeꞌch rexpejṉ Israel lo rebeṉzijt. Lagajc laani bejnni bidxagsaꞌreni te gujcreni tejsi che huililajzreni xtiidxni, gujcreni te beṉcoob. Dxejc gulecdxini lajznireni.
\v 16 Con yäḻgujt ni gujtni lo crujz badzuꞌni guiroꞌpreni lo Dios te gujcreni tejsi. Siꞌc guläjz rdxechnäj saꞌreni.
\p
\v 17 Cajza lo guijtz rediidxre:
\q Biäädni te basuleꞌni xho gaꞌp rebejṉ yäḻrbedxi lajz rebejṉ ni sugaꞌ zijt lo Dios näjza reni sugaꞌ gajxh lo Dios.
\m
\v 18 Laani bejn sajc jiuꞌ guiroꞌp cuaa bejṉ lo Dios con tejsi xhigab, näjza tejsi Sprit.
\v 19 Niꞌcni dirutu gac beṉzijt, bejṉ ni rut numbeedi. Anajctu tejsi con rexpejṉni, najczatu saꞌ rexpejṉ Dios.
\v 20 Laꞌtu najctu siꞌc te yuro. Laꞌtu najctu siꞌc padeer xten yuꞌga. Reapost näjza reprofeꞌt najc siꞌc cheni birixtiej yuꞌga. Jesucrist najc siꞌc guiro ni gusuj squiin yuꞌga, guij ni sajcru, saꞌcsi Jesucrist rnibee.
\v 21 Cayunsaꞌc Dios yuꞌga, cayajc yuꞌga con laꞌtu, caroobni te gacni xquidodxan Jesucrist.
\v 22 Sigajcza laꞌtu näjza rexpejṉ Israel ni huililajz najctu tejsi con Jesucrist. Cagustioobtu guidooga te neṉni cuääz Sprit Dxan xten Dios.
\c 3
\s Pabl nungäjḻ chanä xtidx Dios lo rebeṉzijt
\p
\v 1 Niꞌcni yuꞌä neṉ latzguiib, narä, Pabl saꞌcsi cagusuleꞌä Jesucrist, te jiädnää́ xtiidxni lojtu, najctu beṉzijt.
\v 2 Pet abiejn diajgtu lacti hueen najc Dios baniidxni dzuunre loä, jiädnää́ xtiidxni lojtu.
\v 3 Dios baluiini xhigab-xhigaꞌtzni loä (siꞌcni bacuaä lojtu galoo).
\v 4 Che goḻtu guijtzga, sacbeetu cati ananä rexhigabxhigaꞌtz xten Jesucrist.
\v 5 Xhigab-xhigaꞌtzre di bejṉ niembee galoo, niluxh ṉaj Sprit Dxan xten Dios abaluiinini loj reapost näjza loj reprofeꞌt.
\v 6 Dee najc xhigab-xhigaꞌtzga: por rediidx xcuent Jesucrist ni rusḻaa bejṉ neṉ dojḻ rujn Dios gac reni najc beṉzijt tejsi con reni najc xpeṉ Israel, guidxaag saꞌreni, gacreni tejsi bejṉ. Guiroꞌpreni xcaꞌ yälnasaꞌc siꞌc biaꞌn Dios diidx.
\p
\v 7 Narä nacä te apost xten dzuun ni baniidxni, por xcäḻrulaslajz Dios ni cuaxliaꞌä. Dios baniidx dzuunre loä con xcäḻrnibeduxhni.
\v 8 Luxh masä guxiiru sacä lo guiraa rexpejṉni, loä baniidxni xcäḻracnäjni te lo rebeṉzijt gusuleꞌä xtiidxni, nalajznu redidxcoob xcuent xcäḻnasaꞌc Jesucrist,
\v 9 te gusuleꞌä lo guiraa bejṉ rexhigabxhigaꞌtz nani bacuaꞌtz Dios lojnu galooli. Dios benchee guiralii ni yuꞌ.
\v 10 Siꞌc gujc te ṉaj jien guiralii yäḻnanduxh xten Dios. Reni najc xpejṉpacni neṉ xquidooni guluii yäḻnajnre lo rexangl Dios, loj reni rnibee xhaguibaa.
\v 11 Galooli bejn Dios xhigabre par tejpas, niꞌcni biääd xtadnu Jesucrist te guzojb xhigab ni bejn Dios.
\v 12 Con Jesucrist dinu guidxejb guibignu, guiniabnu lo Dios saꞌcsi ahuililajznu xtiidxni.
\v 13 Naꞌc gac-huin lajztu saꞌcsi cadedä trabajw xcuenttu. Coḻguibalajz; dee najc xcäḻnasaꞌctu.
\s Xcäḻsanälajz Jesucrist
\p
\v 14 Niꞌcni ruzuxhibä nez loj Xtad Dad Jesucrist
\v 15 nani badeed lajni lo guiraa reni yuꞌ xhaguibaa näjza reni yuꞌ lo guedxliuj,
\v 16 rniabä loj Dad xhaguibaa gutijpni lastootu con yäḻrnibee xcuent Sprit Dxan xtenni, saꞌcsi yuduxh xcäḻnasaꞌcni lo xcäḻrdimbichaꞌni xhaguibaa.
\v 17 Rniabäza lo Dios te jiädläjz Jesucrist neṉ lastootu saꞌcsi ahuililajztu. Te che agusudzuꞌtztu, agusutijptu lo yäḻrinälajz
\v 18 dxejc sajc gacbeetu sigajc guiraa rexpejṉpacni lacti gulajg, lactiza siool, lacti jiät, lactiza jiaa najc yäḻsanälajz xten Jesucrist.
\v 19 Te gumbeezatu xcäḻsanälajz Jesucrist ni najc gurobduxhtej, digacdi guichalonuni. Te chaza lastootu, näjza xcäriejntu con guiraa rexcäḻnasaꞌc Dios.
\p
\v 20 Dios rnibeduxh. Sajc gunidxduxhruni loj xhitis ni rniabnu lojni, loj recos ni riennu xhigab. Con Sprit Dxan ni rujn dzuun neṉ lastoonu suniidxni reyäḻnasaꞌc.
\v 21 Loj Diosre coḻdeed xquixtios. Coḻguiliäꞌp xpalaꞌnni neṉ guidoo xcuent Dad Jesucrist guira dxej, par tejpas. Sugacni siꞌc.
\c 4
\s Por Sprit Dxan nadxaag saꞌnu
\p
\v 1 Narä yuꞌä lojtis Jesucrist te rsuleꞌätis xtiidxni.
Niꞌcni rniabä lojtu, guibajṉtu siꞌcni nungäjḻ, siꞌcni
bejnzatu xhigab cheni gurejdxni laꞌtu.
\v 2 Coḻguibajṉ con yäḻnalaslajz, näjza yäḻnadolajz, coḻcuecdxi
lajztu. Coḻyujn huant resaꞌtu con yäḻrinälajz saꞌni.
\v 3 Coḻhuii te guidxaag saꞌtu gactu tejsi con Sprit
Dxan ni ruscuecdxilajztu.
\v 4 Siꞌc tejsi tiejxh najcnu loj Jesucrist, tejsiza
najc xhigabnu con laani, tejsiza najc yäḻrunloj ni rajptu
xcuent diidx nani gurejdxtu.
\v 5 Rajptu tejsi Dad, tejsi yäḻrililajz, tejsi yäḻrobnis,
\v 6 tejsi Dios, tejsi Xtad guiraanu nani rnibee guiraꞌti
lo guiraanu.
\p
\v 7 Lo tejganu abaniidxni dzuun siꞌctis bejn Jesucrist
xhigab guniidxni lo tejganu.
\v 8 Niꞌcni caj lo reguijtz:
\q Che huäꞌpni xhaguibaa, cadro rnibeeni,
\q abejnni gaan loj guiraa yäḻrnibee,
\q dxejcti badeedni dzuun lo rexpejṉni lo guedxliuj.
\p
\v 9 ¿Xhi säloj cadro caj, “huäꞌpni”? Dee säloj ganid
biäjtni maazru jiät lo guedxliuj.
\v 10 Lagajc nani biäjtga, lagajc laani huäꞌpni jiaaru
lo guiraa rexhaguibaa te sajc guinibeeni guibaa näjza
guedxliuj.
\v 11 Lagajc laani badeedni xtzuun tejgareni. Yuꞌreni
badeedni gac apost, yuꞌreni badeedni gac profeꞌt, gaiireni
badeedni gusuleꞌ xho rusḻaa xtiidxni bejṉ lo dojḻ, sgaiireni
badeedni gac siꞌc ni gaꞌp rebeṉ guidoo, sgaiireni badeedni
guluii rexpejṉni.
\v 12 Guiraa redee badeedni te guluiireni rexpejṉ Jesucrist,
te gunreni dzuun te gustajḻreni rebejṉ ni gac xquidoo
Jesucrist.
\v 13 Nungäjḻ gac dzuunre che guidzujṉli dxej ni nadxaag-saꞌnu
guiraanu loj yäḻrililajz, che guidzujṉli dxej riembesaꞌcnu
Xiꞌn Dios, dxejc anajcnu beṉguyajl lo xtiidxni, siꞌc te
ni aguroob loj xcäḻrnibee Jesucrist.
\v 14 Dirunu gac siꞌc rebiuux ni teraꞌtsi rusiejch lajzni,
rucuadiajgreni xtidx chutis bejṉ, mase xhitis diidx ruluiini.
Dxejc riajbreni lo redidx-xhii xten bejṉ nani rusguee,
nani cabäjztis gusguee bejṉ.
\v 15 Maazru hueen chonuunu loj redidxlii xten Jesucrist
con yäḻrinälajz te tioobnu lo guiraa recos xten nani
rnibee, lagajc Jesucrist.
\v 16 Loj Jesucrist nazdzuꞌtz guiraa rexpejṉni, te siꞌcni
nazdzuꞌtzsaꞌreni sääreni, najcreni tejsi loj tiejxh Jesucrist,
racnäj saꞌreni segun xhi dzuun rujn tejgareni, casieedrureni
te cayajc xhidajlru rebejṉga con yäḻsanälajz.
\s Te yäḻnabaṉcoob con Jesucrist
\p
\v 17 Laa niꞌcni rniä rniabäza con laj Dad Jesucrist
naꞌcru guibajṉtu siꞌc nabajṉ rebejṉ nani di gumbee Dios.
Laareni rujn siꞌctis ni riajb yejcreni.
\v 18 Nayääl xcäriejnreni, direni gaꞌp xcäḻnabajṉ Dios
saꞌcsi nadduxh lastooreni.
\v 19 Redee che gucnajd xcäriejnreni gusloj bejnreni
guiraloj yäḻrtujy, guiraa redojḻ ni di nungäjḻ gunreni.
\v 20 Niluxh laꞌtu xhet siꞌcdi bisieedtu loj Jesucrist.
\v 21 Palga abiejn diajgtu xtiidxni, niluxh abaluiini
lojtu didxlii ni siädnä Jesucrist,
\v 22 coḻgusaan yäḻnabaṉyujxh ni gojptu: Lo yäḻnabaṉyujxhga
rujn bejṉ siꞌctis ni rlajzni. Dxejcti siꞌc runijtni
laꞌtu lo Dios.
\v 23 Coḻgusiejch lajztu, coḻgusia xcäriejntu,
\v 24 te gactu beṉcoob nani bejn Dios, coḻchanuu te yäḻnabaṉsaꞌc,
te yäḻnabaṉya xten xtidxliini.
\p
\v 25 Coḻguṟoꞌn diidx-xhii, coḻnii didxlii lo resaꞌtu
saꞌcsi tejsi najcnu guiraanu.
\p
\v 26 Che guidxeꞌchtu, naꞌc guntu dojḻ. Naꞌc gusaantu
chu xcäḻrdxeꞌchtu guideb dxej che chääzli gubijdx.
\v 27 Naꞌc gusaantu jiuꞌ beṉdxab neṉ lastootu.
\p
\v 28 Nani rilajn, naꞌcru cuanni. Laaca gunni dzuun con
ṉaani te gunni te dzunsaꞌc nani gudeed meel lojni te
gac gacnäjzani rebejṉ nani xhet rajpdi.
\p
\v 29 Naꞌc gusaantu guirii nicla tej didxguijdx roꞌtu.
Coḻnii ganax didxsaꞌc te gacnäjni guisieed reni rucuadiajg
xtiidxtu.
\v 30 Naꞌc guntu gac-huin lajz Sprit Dxan xten Dios.
Laani najc te seen xten Dios najctu xpejṉ Dios, niꞌc
rbäjzni neṉ lastootu che guidzujṉli dxej ni chäätu lo
Dios.
\p
\v 31 Coḻguṟoꞌn yäḻnabaṉdxuudx xtentu, näj yäḻrdxeꞌch,
näj yäḻrdxagdijḻ saꞌni, näj yäḻrbedxaꞌ, näj yäḻrgue. Coḻguibicaj
lo guiraa redojḻga, naꞌc gactu beṉguijdx.
\v 32 Nungäjḻ gactu huen loj resaꞌtu, coḻgulaslajz resaꞌtu,
coḻsiäjḻ lajztu con resaꞌtu ni rujn dojḻ lojtu siꞌc
rsiäjḻ Dios lajzni rextojḻtu xcuent Dad Jesucrist.
\c 5
\s Xho nanab guibajṉ rexiꞌn Dios
\p
\v 1 Coḻguibajṉ siꞌc nabajṉ Dios, saꞌcsi najctu xiꞌnni nani sanälajzni.
\v 2 Coḻchasanäj yäḻsanälajz sigajcni huinälajz Jesucrist nuure cheni badeedni lagajc laani lo Dios, cuajni lo crujz, gujtni. Laani gujcni siꞌc gojn, gujczani yäḻrbibyaal ni bidxaglajz Dios.
\p
\v 3 Nicla gusäꞌttu yäḻrusguee chääl bejṉ, nicla redoḻ dxuudx, niclaza yäḻsanälaztej xhixtentisni. Nicla gusäꞌttuni lo saꞌtu, saꞌcsi xhet siꞌcdi nungäjḻ gun bejṉ ni nabaṉ-naya.
\v 4 Sigajcza coḻcuälaz diidx ni rujn xtujy, näjza didxnajd, näjza didxṉaj nani digac laaca. Coḻgudeedtis xquixtios lo Dios.
\v 5 Laꞌtu anajntu nicla tej ni rusguee chälbejṉ, nicla tej beṉdxuudx, nicla tej ni sanälaztej xhixtentisni, nicla renani rajṉ rebanäjb, nicla tej reniꞌc di xcaꞌ yäḻnasaꞌc loj Jesucrist, dizareni jiuꞌ lo xcäḻrnibee Jesucrist, xcäḻrnibee Dios.
\v 6 Naꞌc gusaantu gusguee bejṉ laꞌtu con diidx ni xhet sajcdi saꞌcsi xcuent redzuunga riääd xcäḻrdxeꞌch Dios loj rebejṉ ni di gusoob xtiidxni.
\v 7 Naꞌc guntu sigajc rujnreni.
\p
\v 8 Galoo nacäjytis xcäriejntu gubajṉtu, luxh ṉaj abasanij Jesucrist xcäriejntu. Coḻguibajṉ siꞌc nungäjḻ guibajṉ nani abianij xcäriejnni.
\v 9 Saꞌcsi nani abianij xcäriejnni rujn dzunsaꞌc, rniini didxgulii.
\v 10 Coḻguisieed xhiniꞌc rchaglajz Dios.
\v 11 Naꞌc guntu redzundxuudx nani rujn reni nacäjy xcäriejnreni, coḻtilnäj reni rujn saꞌ dzunguijdxga.
\v 12 Saꞌcsi te xtujyli najc jieinu diidx xcuent xtzuunreni ni runxhigaꞌtzreni.
\v 13 Niluxh guiraa saꞌ redzuunre ni rdiḻnäjnu, huenliisi sieṉ xhi najcreni, suzeṉni lo xpianij Jesucrist. Saꞌcsi guiraꞌti ni ruzeṉ najc nianij.
\v 14 Niꞌcni caj loj reguijtz, räjp Dios:
\q Gubajṉ, huistie luj ni rejslu.
\q ¡Huistie lo dojḻ, luj ni nagaꞌlu lo dojḻ siꞌc beṉgut,
\q te gusanij Jesucrist xcäriejnlu!
\p
\v 15 Coḻhuii, coḻsiṉ, naꞌc guibajṉtu siꞌc te bejṉ nani di gacbee, coḻguibajṉ siꞌc bejṉ nani yuꞌ xcäriejnni.
\v 16 Coḻtedsaꞌc redxej saꞌcsi neṉ redxejre ganax cosguijdx rujn bejṉ.
\v 17 Niꞌcni naꞌc guibajṉtu siꞌc rebejṉ nani di gacbee, coḻyacnasiṉ, te gacbeetu xhiniꞌc najc ni rlajz Dad xhaguibaa guntu.
\v 18 Lacuaa yätu nejp nani runijt bejṉ, coḻgapchee Sprit Dxan xten Dios neṉ lastootu.
\v 19 Coḻnii loj resaꞌtu rediidx nani gunii rebejṉ tiemp guläꞌpreni xpalaꞌn Dios, coḻyeḻza redij xten Dios, con reyäḻrieḻ coḻguiliäꞌp xpalaꞌn Dios neṉ lastootu.
\v 20 Di jiäḻ lajztu gudeedtu xquixtios lo Dios xtadnu con laj Dad Jesucrist.
\s Xho guibaṉnäj saꞌ rexpejṉ Jesucrist
\p
\v 21 Saꞌcsi rajṉtu Jesucrist, coḻgusoob xtidx saꞌtu.
\p
\v 22 Lojtu, regunaa ni abachṉaa, rniä scree: Coḻgusoob xtidx chäältu siꞌc rusoobzatu xtidx Dad Jesucrist.
\v 23 Saꞌcsi niguii rnibee gunaa siꞌcni rnibee Jesucrist xquidooni, niluxh laazani rusḻaani rexpejṉ guidooni lo redojḻ, najcreni siꞌc tiejxhni.
\v 24 Niꞌcni, sigajc rusoob rebeṉ guidooga nani rnibee Jesucrist gunreni, sigajcza nungäjḻ gusoob regunaa ni abachṉaa nani guinibeetis chäälreni gunreni.
\p
\v 25 Lojtu, reniguii ni abachṉaa rniä scree: Coḻchanälajz chäältu sigajc ni huinälajz Jesucrist rexpeṉ guidooni, badeedni lagajc tiejxhni loj Dios cheni cuajni lo crujz por laareni
\v 26 te basiani xtojḻ rexpejṉ guidooni, te gujcreni te beṉcoob, abidiib lastooreni con xtiidxni siꞌc rdiib te cos con nis
\v 27 te che xcaꞌni rexpeṉ guidooni, najcreni te guidoo ni sajcru, te guidoo nani xheti xtojḻni, te guidoo nani sugadzuꞌtz, te guidoo xhet xhi riäädxdi, najcni te guidoya, xheti xhi xtojḻdini.
\v 28 Sigajcza, te niguii nani abachṉaa nungäjḻ chanälajz chäälni sigajc sanälajzni lagajc tiejxhni. Nani sanälajz chäälni sanälajz lagajc laani.
\v 29 Ruti chu te bejṉ ni rbälaz tiejxhni; alga rajpni tiejxhni ruyaanni tiejxhni sigajc rajp Jesucrist rexpeṉ guidooni.
\v 30 Najczanu tejsi loj tiejxh Jesucrist, loj xpäälni, loj rextzujtni.
\v 31 “Niꞌcni che guchṉaa te niguii rusaꞌnni xtadni, xnanni, te xcaꞌni gunaa, te gac guiroꞌpreni siꞌc tejsi bääl, siꞌc tejsi bejṉ.”
\v 32 Dee najc te diidx xhigaꞌtzduxh; li te “¿chuj?” najcni. Niluxh narä rniä xcuent Jesucrist con rexpeṉguidooni.
\v 33 Niluxh nanabpac chanälajz tejgatu chäältu sigajc sanälajztu tiejxhtu. Dxejcti gunaa gaꞌpzani xpalaꞌn chäälni.
\c 6
\p
\v 1 Lojtu biuux, rniä scree: Coḻgucuadiajg xtidx Jesucrist,
colgusoob xtidx xtadtu saꞌcsi niꞌc sajc nez loj Dios.
\v 2 Coḻgaꞌp xpalaꞌn xtadtu, xnantu, saꞌcsi niꞌc najc
didx galoo xten leii nani runiidx xhi xcaꞌtu palga gusoobtu
diidxga;
\v 3 “Te saruduxh guibajṉtu xchero lo guedxliujre.”
\p
\v 4 Laꞌtu, Dad ni najc guzajn, naꞌc guntu guidxeꞌch rexiꞌntu
lojtu. Coḻgusḻaareni con yäḻnaj, coḻgulijdxreni con xtidx
Jesucrist.
\p
\v 5 Laꞌtu ni najc mos, coḻgusoob xtidx xlam̲tu lo guedxliujre,
coḻcuadiajg xtiidxni, xhet xhi steedi xhigabdi guntu
neṉ lastootu. Coḻyejn xtzuunni siꞌcni najc xtzuun Jesucrist.
\v 6 Coḻyejn xtzuunni, niluxh xhet che sugaꞌtisreni, cahuiireni,
parsi jiansaꞌctu lojreni. Maazru hueen guntu dzuun siꞌc
xmos Jesucrist; coḻyejn guiraꞌti siꞌcni rujntu xtzuunpactu;
siꞌcni rlajz Dios.
\v 7 Coḻyujn xtzuunni guideb lastootu siꞌc xmos Jesucrist,
et siꞌcdi xmos beṉ guedxliuj.
\v 8 Anajntu dzunsaꞌc ni gun tejgatu, lagajcza xcuent
niꞌc xcaꞌtu loj Dad Jesucrist, mase najctu mos o mase
rutlojdi yuꞌtu.
\p
\v 9 Lojtu, relam̲, rniä scree: Sigajcza coḻyujn lojreni.
Coḻgusaan yäḻrusacsí, saꞌcsi anajntu yuꞌ xlam̲tu xhaguibaa,
luxh tebloj najc guiraa rebejṉ nez lojni.
\s Nani gacw rexpejṉ Jesucrist lo guerr
\p
\v 10 Didx lult ni rniä, saꞌä, najc scree: Coḻsutijp lo
xcäḻracnäj Jesucrist, coḻsudzuꞌtz lo xcäḻnadip xcäḻrnibeeni.
\v 11 Coḻgajcw xhabguiib xten Dios te gac sudzuꞌtztu
lo reyäḻrusguee xten beṉdxab.
\v 12 Saꞌcsi xhet beṉ guedxliujtis cadiḻnäjnu. Cadiḻnäjzanu
reguxhtis xte yäḻcäjy, näjza reyäḻrnibee, rebejṉ nani
rnibee loj reyäḻcäjyre, näjza rexangl beṉdxab nani rnibee
bej xten guedxliujre.
\v 13 Niꞌcni coḻcaꞌ guideb lad-guiib xten Dios nani runiidxni
loonu te gac sudzuꞌtznu neṉ dxej ni guideednu trabajwduxh,
te che agudejdni, laḻtis sisiudzuꞌtznu.
\v 14 Coḻsudzuꞌtz pues. Xqueꞌtu coḻguliib sindoor-guiib
ni najc xtidx Jesucrist, coḻgajcw gamangw-guiib ni najc
rextzunsaꞌc xten Dios ni rujntu.
\v 15 Coḻcuaa gurach-guiib niꞌtu (niꞌc najc xtidx Jesucrist
ni ruscuecdxi lajztu).
\v 16 Coḻcaꞌ escud-guiib ni najc yäḻrililajz te con yäḻrililajz
xtidx Dios di beṉdxab gun gaan gusguee laꞌtu con rextidx-xhiini.
\v 17 Coḻcaꞌ yäḻrusḻaa xten Dios lo dojḻ siꞌc te xhumbrel-guiib
chu yejctu; coḻcaꞌza lans xten Sprit Dxan xten Dios
ni najc xtidx Dios.
\v 18 Coḻnab lo Dios guiraa dxej; coḻnab lojni con Sprit
Dxan xtenni; coḻsusiṉtis; naꞌc jieedtu guiniabtu lo
Dios xcuent guiraa xpejṉni.
\v 19 Coḻnabza lo Dios por narä te guniidx Dios diidx
cheni gaḻ guiniä, te naꞌc guidxebä guiniä che guluiä
didx-xhigaꞌtz xten yäḻrusḻaa bejṉ lo dojḻ.
\v 20 Xcuent rediidxga ni yuꞌä neṉ latzguiib, caduä con
cadeṉ. Niꞌcni coḻnab lo Dios te naꞌc guidxebä guiniä
rediidxga siꞌcpacni säbyäjl guiniäni.
\s Lult xtixtios
\p
\v 21 Niluxh te gacbeetu xho sasaj rextzunä, nägajcza
xho yuꞌä narä, Tíquico, saꞌnu ni sanälajznu, ni runsaꞌcza
xtzun Dad Jesucrist, siääd lojtu te gusuleꞌni diidx.
\v 22 Laapacni ruxhaḻä lojtu, te gacbeetu xho yuꞌnu, te
siꞌc guscuecdxini lajztu.
\p
\v 23 Rniabä yäḻrbedxilajz par resaꞌnu, näjza yäḻrililajz
con yäḻsanälajz xten Dios Xtadnu näjza xten Dad Jesucrist.
\v 24 Gacnäj Dios guiraa reni di gusguee, reni sanälajzpac
Dad Jesucrist. Sugacni siꞌc.