\id COL
\h Colosenses
\toc1 Colosenses
\mt Te Guijtz Lo Rebeṉ Colosas
\c 1
\s Bacuaa Pabl loj rebeṉ guidoo ni yuꞌ guedx Colosas
\p
\v 1 Narä, Pabl nacä te apost xten Jesucrist. Dios gule
narä. Narä näjza bejtznu Timoteu
\v 2 cagucuaanu reguijtzre loj rebeṉ Colosas nani nabaṉnaya
rujnreni siꞌcpacni rlajz Dios, näjza reni najc bejtznu
lo xtidx Jesucrist. Xcaꞌtu yäḻracnäj näjza yäḻrbedxilajz
xten Dios xtadnu.
\s Rniab Pabl gudeed Dios yäḻnajn xtenni
\p
\v 3 Rdeednu xquixtios lo Dios xtad Dad Jesucrist rniabnu
lojni xcuenttu guixe-guixee.
\v 4 Abiejn diajgnu xho rililajztu xtidx Dad Jesucrist,
näjza xho sanälajztu rebejṉ ni ahuililajz xtidx Jesucrist,
\v 5 saꞌcsi cabäjztu xcaꞌtu reyäḻnasaꞌc ni yuchee xhaguibaa
par laꞌtu. Laa xcuent reniꞌc ni biejn diajgtu cheni
bacuadiajgtu xtidxlii Jesucrist xcuent yäḻrusḻaa lo
dojḻ.
\v 6 Laa rediidxga ni abiääd lojtu sigajc ni bireꞌchni
guideb lo guedxliuj, luxh cayac xhidajlru rebejṉ ni cayacbee
diidxre, asalilajzreni diidxga, sigajc guzajctu laꞌtu.
Cheni biejn diajgtu xtidx Jesucrist, dxejc biembeezatu
guliipac najc xcäḻrulaslajz Dios.
\v 7 Sigajcza bisieedtuni lo Epafras, ni sanuutis cayacnäjni
nuure lo dzuun. Laani najc te beṉsaꞌc, yuꞌni lojtu cayujnpacni
xtzuun Jesucrist lacuaa nuure.
\v 8 Laani abasuleꞌni diidx loonu xho sanälajz saꞌtu
saꞌcsi nabajṉ Sprit Dxan xten Dios neṉ lastootu.
\p
\v 9 Laa niꞌcni dxejli nani biejn diajgnu diidxre xcuenttu,
di cuääz cabedx-canabnu lo Dios, canabnu gacbeduxhtu xho
rlajz Dios guntu, guniidxni guiraa yäḻnajn näjza gusanijni
xcäriejntu
\v 10 te guibajṉtu siꞌcni nungäjḻ guibajṉ bejṉ ni sanajl
Dad Jesucrist, te guspaatu lajzni lo guiraa redzuun.
Chanuuzatu gunrutu guiraa redzunsaꞌc näjza jianijru
xcäriejntu xcuent yäḻriembee Dios.
\v 11 Tioobrutu loj xcäḻnadip, xcäḻrnibee Dios te guibaa
lajztu gusutiplajztu, cueꞌcdxilajztu loj xhitis ni sajctu.
\v 12 Guibalajznu guideednu xquixtios loj xtadnu Dios
nani basudzuꞌtz nuure te xcaꞌnu yäḻnabajṉ par tejpas
sigajc guiraa rebejṉ nani ahuililajz xtiidxni yuꞌreni
lo xpianijni.
\v 13 Laani abasḻaani nuure loj xcäḻrnibee yäḻnacäjy,
abateedni nuure lo xcäḻrnibee xiꞌnni ni sanälajzni.
\v 14 Laa xiꞌnni ni basḻaa nuure neṉ dojḻ cheni baxheꞌni
xtiejnni, gujtni lo crujz, dxejc gudijxni rextojḻnu.
\s Gubisacnu loj Dios xcuent xcäḻgujt Jesucrist
\p
\v 15 Rut rajcdi ruhuii lo Gueb-Dios, niluxh xiꞌnni najc
siꞌcpac najc Dios; siꞌcpac rujn lojni. Laani guyuꞌni
galodoo luxh rnibeeni lo guiralii ni yuꞌ lo guedxliuj.
\v 16 Por laani benchee Dios guiralii ni yuꞌ xhaguibaa
ni yuꞌza lo guedxliuj, renani ruzeṉ sigajc renani di
guzeṉ: reṟeii, näjza reni rnibee loj rexangl Dios, näjza
reni rnibee loj rexangl beṉdxab, nägajcza reyäḻrnibee
xten reguixhajg, sigajczani loj regubier, lo reguxhtis
ni rajp yäḻrnibee, guiraani guc-chee por laani, näjza par
laani.
\v 17 Alanabajṉ Jesucrist galooli, che gajdli guirixtiej
guedxliuj. Por laani yuꞌ guiraꞌti ni yuꞌ.
\v 18 Laani najc nani rnibee guidoo, nalajznu rebejṉ
nani ahuililajz xtiidxni. Laani najc ni guläxtiej guiraꞌti.
Ganiddoo laani huäjs lo rebeṉgut te rnibeeni. Loj guiraꞌti
ni yuꞌ laatisni najc nani sajc guinibee.
\v 19 Saꞌcsi bidxaglajz Dad Dios gaꞌp Jesucrist guiralii
yäḻrnibee nani najc xten Dios,
\v 20 por lagajcza Jesucrist badzuꞌ Dios guiraꞌti ni
yuꞌ, guibiꞌreni lojni, reni yuꞌ lo guedxliuj sigajc reni
yuꞌ xhaguibaa, saꞌcsi abiäjḻ-lajzni, aguredxi lajzni saꞌcsi
bixeꞌ xtiejn Jesucrist lo crujz.
\p
\v 21 Luxh laꞌtu gujctu siꞌc beṉzijt lo Dios saꞌcsi
galoo rdxeꞌchtu lo Dios neṉ lastootu xcuent redzunguijdx
nani bejntu.
\v 22 Niluxh ṉaj abiäjḻ-lajz Dios abadzuꞌ Jesucrist laꞌtu,
agucnayatu gubiꞌtu lo Dios xcuent xtiejn Jesucrist ni
baxheꞌni lo crujz cheni gujtni. Niꞌc bejnni te che suutu
nez lojni, xhetiru xtojḻtu, xhet xhi guiniidi Dios lojtu
saꞌcsi anayapactu.
\v 23 Niluxh riäjḻ chanuu sudzuꞌtztu, cuedxitu lo yäḻrililajz.
Naꞌc gusaantu chu gusiejch-lajztu te cuälaztu xtidx Jesucrist
nani abiejn diajgtu. Rediidxga abasuleꞌzanu loj guiraa
rebejṉ ni ṟeꞌ lo guedxliujre. Luxh lagajc narä, Pabl
rusuleꞌä diidxga saꞌcsi parpac niꞌc gule Dios narä.
\s Dzuun guidoo najc xcuent Pabl
\p
\v 24 N̲aj rbalazä cadedä trabajw xcuenttu saꞌcsi retrabajw
ni cadedä lagajc narä cagusaꞌ nani cayäädx lo retrabajw
xten Crist xcuent guidoo, nalajznu rebejṉ ni ahuililajz
xtiidxni, ni najc siꞌc tiejxh Jesucrist.
\v 25 Niꞌc nacä te bejṉ ni rusuleꞌ diidx neṉ guidooga.
Dzuunga baniidx Dios gunä par xcäḻnasaꞌctu te gusuleꞌäpac
guiragajc xtidx Dios,
\v 26 te gacbeenu rexhigabxhigaꞌtz nani najc xhigaꞌtz
galododuxh niluxh ṉaj abaluiini redidx-xhigaꞌtzre loj
rexpejṉni.
\v 27 Lojreni bejn Dios xhigab guluiini reyäḻnasaꞌc
xten yäḻrdimbichaꞌ xten redidx-xhigaꞌtz ni cagusuleꞌni
loj rebeṉzijt. Yäḻxhigaꞌtzre säloj Jesucrist rbäjz neṉ
lastootu niꞌc runlojtu chaläjztu lo yäḻrdimbichaꞌ xten
Dios.
\p
\v 28 Rusuleꞌnu diidx xcuent Jesucrist, ruliidxnu guiraa
rebejṉ, guideb yäḻnajn ruluiinu te guisaꞌ yäḻnajn xten
guiraa rebejṉ xcuent Jesucrist che guidzujṉreni nez
loj Jesucrist.
\v 29 Xcuent dzuunre guideb xtipä runä dzuun con guiraa
yäḻrnibee nani runiidx Jesucrist narä.
\c 2
\p
\v 1 Rlazä gacbeetu lacti cadedä trabajw xcuentu, näjza
xcuent reni yuꞌ guedx Laodicea, näjza xcuent guiraa reni
gajd gumbee narä.
\v 2 Te tioob lastoo guiraatu saꞌcsi abidxagsaꞌ lastootu
lo yäḻsanälajz, näjza te gaꞌptu guiraa reyäḻnasaꞌc ni
rajp bejṉ che racbesaꞌcreni xtidx Dios. Te gumbeezatu
guiraa redidx-xhigaꞌtz xten Dios xtadnu näjza Dad Jesucrist.
\v 3 Neṉ lastoo Dios näjza lastoo Jesucrist nagaꞌtz
guiraa reyäḻnasaꞌc xten guiraa reyäḻnajn, guiraa yäḻnumbee.
\v 4 Dee rniä lojtu te di gusguee chu gusgueetu con
rediidx-xhii.
\v 5 Te palga ruti narä roꞌc, canaj lazä laꞌtu, cabaa
lazä cahuiä laaca cayujntu, sugatzuꞌtztu loj yäḻrililajz
xten Jesucrist.
\p
\v 6 Niꞌcni sigajc ni huililajztu xtidx Jesucrist, sigajcza
coḻchasanäj Jesucrist.
\v 7 Coḻsudzuꞌtz lo Jesucrist siꞌc rsiobdzuꞌtz xlobaa
te yajg. Coḻsudzuꞌtz lo yäḻrililajz xten Jesucrist siꞌc
ni abisieedtu. Coḻgudedduxhru xquixtios lo Dios.
\s Yäḻnabaṉcoob ni rudeed Jesucrist
\p
\v 8 Coḻhuii, naꞌc gusaantu guxhiid bejṉ xcäḻrililajztu
con xtiidxtisreni näjza rediidx nani xhet sajcdi, siꞌc
najc xtidx rebeṉ galoo, näjza siꞌc najc diidx xcuent
xhigab xten rebeṉ guedxliuj, di rediidxga gac siꞌcni
rlajz Jesucrist.
\p
\v 9 Saꞌcsi guiralii ni najc Dios, lagajc niꞌc najc Jesucrist,
niluxh yuꞌ tiejxh Jesucrist.
\v 10 Xhet cayäädxdi lo yäḻnabajṉ xten Dios ni rajptu
saꞌcsi najctu tejsi con Jesucrist. Laani rnibee guiraa
reyäḻguxhtis, guiraa reyäḻrnibee ni yuꞌ guira lajt.
\v 11 Saꞌcsi huililajztu Jesucrist aguyuꞌtu bee, niluxh
xhet beedi nani rusäḻ bejṉ con ṉaareni, alga xpee Jesucrist,
ni najc yäḻrusia xtojḻ bejṉ saꞌcsi rusaan bejṉ redzunguijdx,
rujnreni tejsi xhigab con Jesucrist. Siꞌc najc xpee
Jesucrist.
\v 12 Cheni gurobnistu najcni siꞌcni agujttu niꞌc bigaꞌtztu
con Jesucrist, najczani siꞌcni gubaṉsactu con laani saꞌcsi
huililajztu rajp Dios yäḻrnibee nani gulässac Jesucrist
lo rebeṉgut.
\v 13 Che najctu siꞌc beṉgut lo dojḻ, näjza saꞌcsi di
bee niuꞌ tiejxhtu, dxejcli baniidx Dios yäḻnabajṉ par
tejpas lojtu con Jesucrist, badzucajni guiraa rextojḻnu.
\v 14 Dios badzucaj guiraa releii nani basäuu nuure
neṉ dojḻ, badzucajnini lojni, saꞌcsi bacuaanini lo crujz,
cadro gudijx Jesucrist guiralii rextojḻnu.
\v 15 Cheni gujt Jesucrist lo crujz bejnni gaan loj
reyäḻguxhtis näjza guiraa reyäḻrnibee xten beṉdxab näjza
rexspritni. Basanxtujynireni nez loj guiraa rebejṉ.
Laani bejnni gaanreni cheni cuajni lo crujz.
\s Coḻquiil recos ni najc xten xhaguibaa
\p
\v 16 Nicla tejtu naꞌc cubee saꞌni xcuent reyäḻrajw
näjza reyäḻräꞌ, niclaza xcuent redxe lanij näjza rexchej
rebäicoob, näjza redxej ni rusilajzni.
\v 17 Guiraa redee najc siꞌcsi te balaa xten nani churu
jiääd, te guluiireni ni rujn balaaga, nalajznu niꞌc najc
Jesucrist.
\v 18 Naꞌc gusaantu gudzucaj bejṉ xcäḻnasaꞌctu te gunreni
gactu nadolajz, te gaṉtu reangl. Saꞌ bejṉga richuꞌ loj
nani gajdreni fii; rchaloreni najcreni beṉro xcuent
lagajc xhigabreni.
\v 19 Laareni direni chanajl Jesucrist nani rnibee, nani
rujn ṟoobru tiejxhni, nalajznu rexpejṉni, saꞌcsi lojni
rcaꞌreni ni rquiin lastooreni, te ruchaagni saꞌ tejgareni
siꞌc nadxaquiid bääl cuäꞌ dzujt lo tiejxh bejṉ, te gacreni
tejsi con Dios.
\p
\v 20 Laꞌtu agujttu con Jesucrist, abiriitu lo rexhigab
xten guedxliujre. N̲aj ¿xhicuent guibajṉtu sigajctis
nabajṉ rebejṉ nani di gumbee xtidx Jesucrist, ä? ¿Xhicuent
rusoobtu rediidx ni caj lo releii? Loj releii caj saꞌ
diidxre:
\v 21 “Di chahuaḻlu dee, di gaulu niꞌc, di caṉlu dec.”
\v 22 Luxh guiraa redee rnitloj che runnäjnini dzuun.
Luxh guiraa saꞌ leiiga najc diidxtis nani ruluii bejṉ.
\v 23 Guluiicani saꞌ releiiga rieṉ asdoo ruluiireni
yäḻnanduxh, luxh che rusoob bejṉ releiiga rchaloreni
rajṉreni Dios, rchaloreni rac nadolajzreni, rusacsíreni
lagajc tiejxhreni. Niluxh xlaiꞌsi rujnreni guiraa redzuunga,
saꞌcsi sanuutis rujnreni siꞌctisni rlajz tiejxhreni.
\c 3
\p
\v 1 Palga anabaṉsactu con Jesucrist, coḻquiil reyäḻnasaꞌc
ni yuꞌ xhaguibaa cadro sobgaꞌ Jesucrist xladbee Dios.
\v 2 Coḻyejn xhigab xcuenttis reyäḻnasaꞌc ni yuꞌ xhaguibaa,
naꞌc guntu xhigabtis xcuent reni yuꞌ lo guedxliuj.
\v 3 Laꞌtu anajctu siꞌc beṉgut loj reyäḻnasaꞌc ni yuꞌ
lo guedxliuj, luxh yäḻnabajṉ ni rajptu ṉaj, yäḻnabajṉga
nagaꞌtz con Dios xcuent Jesucrist.
\v 4 Che guluiilosac Jesucrist ni najc xcäḻnabajṉtu,
dxejc näjza laꞌtu suluiilojtu con laani lo xcäḻrdimbichaꞌni.
\s Yäḻnabaṉbiejw con yäḻnabaṉcoob
\p
\v 5 Coḻcuälaz redzunguijdx xten guedxliuj nani rujntu,
yäḻrusguee gunaxteb, yäḻrujn recosdxuudx, recos ni rdxaglajz
tiejxhtu, rexhigab-guijdx, yäḻrsiäb-lajz xhi xten bejṉ, guiraa
redee rujn runijt bejṉ lo Dios sigajc rujn bejṉ che
rajṉ bejṉ rebanäjb.
\v 6 Guiraa redzuunga rujn riääd xcäḻrdxeꞌch Dios yejc
renani rujn saꞌ redzuunga.
\v 7 Näjza laꞌtu bejntu saꞌ redzunguijdxga galoo cheni
guyuꞌtu lo saꞌ yäḻnabajṉga.
\v 8 Niluxh ṉaj näjza laꞌtu coḻgusaan recosre; nalajznu
yäḻrdxeꞌch, yäḻrucheꞌch saꞌni, yäḻrujn latzsiaj saꞌni,
yäḻrniyaj saꞌni, näjza rediidx-dxuudx ni rniitu.
\v 9 Naꞌc gusgueetu resaꞌtu, saꞌcsi nanab gusaantu nani
bejntu cheni guyuꞌtu loj redzunguijdx.
\v 10 Coḻyajc te beṉcoob, ni guixe-guixee cayanijru xcäriejnni,
te gumbesaꞌctu Dios, te gactu sigajc najc Dios ni benchee
beṉguedxliuj.
\v 11 Lo yäḻnabaṉcoobre rutiru beṉzijt, niclaza xpeṉ
Israel, rutiza rebejṉ ni ruꞌ bee, niclaza bejṉ ni di chu
bee; rutiza beṉzijt, niclaza bejṉ ni siääd zitduxh; rutiza
mos, niclaza bejṉ nani di chu lo bejṉ, saꞌcsi che rililajz
te bejṉ xtidx Jesucrist najcni tebloj con guiraa reni
rililajz xtidx Jesucrist; guiraareni najc xpejṉ Jesucrist.
\p
\v 12 N̲aj agule Dios laꞌtu te gactu xpejṉni nani gac
naya, nani sanälajzni, coḻguibajṉ con yäḻrulaslajz, naꞌc
guidxeꞌchtu, coḻyacnadoo con yäḻnadolajz, coḻniiza nadolajz.
\v 13 Coḻyujn huant, naꞌc guidxeꞌchtu loj saꞌtu, palga
yuꞌ chu saꞌtu rdxeꞌch loj saꞌni, coḻgusiäjḻ-lajztu sigajcni
basiäjḻ-lajz Dad Jesucrist lojnu xcuent rextojḻnu.
\v 14 Che abejntu guiraa recosre, coḻguiilru yäḻsanälajz
nani rusaꞌ loj guiraa recosre.
\v 15 Xcäḻrbedxilajz Dios guinibee neṉ lastootu, saꞌcsi
parpac niꞌc gurejdxni laꞌtu, te gaczatu tejsi con rexpejṉ
Jesucrist. Coḻgudeed xquixtios loj Dios.
\p
\v 16 Xtidx Jesucrist chuduxh neṉ lastootu con guiraa
yäḻnajn, te guluiitu, te gulijdxtu tejga resaꞌtu con redij
nani guläꞌp toDavid xpalaꞌn Dios, näjza redij nani roḻtu,
näjza redij nani rliäꞌp xpalaꞌn Dios. Redijga goḻnu
te guideednu xquixtios lo Dios neṉ lastoonu.
\v 17 Guiraꞌti nani guntu, sigajc rediidx ni rniitu, sigajcza
redzuun ni rujntu, coḻyejn guiraani con laj Dad Jesucrist,
coḻdeed xquixtios lo Dios xtadnu con laj Jesucrist.
\s Xho nanab guibajṉ te famiḻ ni najc xpejṉ Jesucrist
\p
\v 18 Regunaa nani abachṉaa, coḻgusoob xtidx chäältu
saꞌcsi siꞌc rlajz Dad Jesucrist.
\v 19 Reniguii nani abachṉaa, coḻchanälajz chäältu, naꞌc
guidxechnäjtureni.
\v 20 Reni najc biuux, coḻgusoob xtidx xtadtu loj guiraꞌti,
saꞌcsi siꞌc rchaglajz Dad Jesucrist.
\v 21 Reni najc Dad, naꞌc gucheꞌchtu rexiꞌntu, didi gac-huin
lajzreni.
\v 22 Reni najc mos, coḻgucuadiajg xtidx xlam̲tu lo guedxliujre
loj guiraꞌti xtzuunni. Naꞌc gunsaꞌctu dzuun che cahuiitisreni
siꞌc rujn renani ruspaa lajz bejṉtis. Con yäḻnadolajz
coḻyejn dzuun saꞌcsi sanälajztu Dios.
\v 23 Guiraꞌti nani guntu, coḻyejnni guideb lastootu
siꞌc xtzuun Dios, et siꞌc xtzuundi rebejṉtis.
\v 24 Anajntu lo Dad Jesucrist sicaꞌtu yäḻnasaꞌc ni
najc yäḻnabajṉ par tejpas, saꞌcsi loj Dad Jesucrist rujntu
dzuun.
\v 25 Niluxh nani rujn recosguijdx, lagajc xcuent recosguijdxga
gudeed Dios lojni, saꞌcsi tebloj rujn Dios guiraa rebeṉguijdx.
\c 4
\p
\v 1 Renani najc lam̲, coḻdeed loj rexmostu nani riäjḻ
xcaꞌreni saꞌcsi anantu näjza laꞌtu rajptu xlam̲tu xhaguibaa.
\p
\v 2 Coḻchanuu coḻnab lo Dios, coḻsusiṉ che rniabtu lo
Dios. Coḻgudeed xquixtios lo Dios.
\v 3 Coḻnabza lo Dios con nuure te gacnäj Dios narä
gusuleꞌä xtidx Jesucrist, te gusuleꞌä redidx-xhigaꞌtz
xten Crist. Xcuent niꞌcza yuꞌä neṉ latzguiib.
\v 4 Coḻnab lo Dios te guyasi gusuleꞌä rediidxga siꞌcni
riäjl guiniä.
\p
\v 5 Coḻguibaṉsiṉ loj rebejṉ nani di gumbee xtidx Jesucrist,
coḻgusuleꞌ diidx cheni riäjl guiniitu lojreni.
\v 6 Rextiidxtu nanab gacni siꞌc rchaglajz Dios, saruduxhza
gac xtiidxtu te gacbeetu xho riäjl gudzuꞌtu diidx loj
tejgareni.
\s Lult xtixtios
\p
\v 7 Tíquico, bejtznu ni sanälajznu, ni runsaꞌc dzuun,
ni najc xmos Dad Jesucrist, laani gusuleꞌni diidx lojtu
xcuent guiraa rextzunä.
\v 8 Ruxhaḻäni lojtu te gacbeepactu xho yuꞌä, te guspaani
lajztu.
\v 9 Laani jiädnäzani Onésimo nani najc te betznu ni
sanälajznu. Laani najc tej resaꞌtu. Laareni gusuleꞌzareni
guiraꞌti nani cadeednu ree.
\p
\v 10 Aristarco, nani yunäj narä neṉ latzguiib, ruxhaḻni
xtixtios lojtu näjza Marcw, betz prim̲ xten Bernabé (abacuaä
lojtu xcuentni, xho guntu, palga jiädhuiini laꞌtu, sacru
coḻhuiini).
\v 11 Näjza Jesús nani laaza Justo, ruxhaḻ xtixtios lojtu.
Laatisreni najc rexpejṉ Israel nani cayacnäj loj dzuun
xten xcäḻrnibee Dios. Laareni ruspaa lazä.
\v 12 Epafras, ni najc te saꞌtu, ruxhaḻ xtixtios lojtu,
luxh rniabduxhni xcuenttu lo Dios te sudzuꞌtztu guntu
guiragajc ni rlajz Dios guntu.
\v 13 Narä rniliä xho rdzuun Epafras xcuent laꞌtu, näjza
xcuent rebejṉ ni yuꞌ guedx Laodicea, näjza guedx Hierápolis.
\v 14 Lucas, doctoor ni sanälajznu, näjza Demas ruxhaḻzareni
xtixtios lojtu.
\p
\v 15 Coḻdeed xtixtios loj rebejtznu nani yuꞌ guedx
Laodicea, näjza loj Ninfas, näjza lo rebejṉ nani reꞌ rolijzni.
\v 16 Cheni agulujx biḻtu guijtzre, coḻguxhaḻni te jieḻni
neṉ guidoo xten guedx Laodicea, dxejcti coḻyeḻza guijtz
nani baxhaḻä lo rebeṉ guedx Laodicea.
\v 17 Coḻyeꞌtz loj Arquipo: “Bahuisaꞌc xtzuun Dad Jesucrist
nani cuaꞌlu lojni. Bensaꞌc dzuunga.”
\p
\v 18 Lagajc narä Pabl rucuaä xtixtiosre con lagajc
ṉaä, con lagajc xleträ. Coḻgusnaj-lajztu narä yuꞌä latzguiib.
Gacnäj Dios laꞌtu. Sugacni siꞌc.