\id 1TH
\h 1 Tesalonicenses
\toc1 1 Tesalonicenses
\mt Guijtz Ganid Lo Rebeṉ Tesalónica
\c 1
\s Bacuaa Pabl con rexamigwni lo guidoo guedx Tesalónica
\p
\v 1 Narä, Pabl, näjza Silvan, näjza Timoteu cacuaanu guijtzre
lojtu, resaꞌnu ni yuꞌ guidoo lo guedx Tesalónica, reni
yuꞌ lo Dios Xtadnu näjza lo Dad Jesucrist. Guspaa Dios
näjza Jesucrist lajztu, guscuecdxizareni lajztu.
\s Xho huililajz beṉ Tesalónica xtidx Dios
\p
\v 2 Guet-guejt rdeednu xquixtios lo Dios xcuent guiraatu,
rnaduxhza laaznu laꞌtu cheni rbejdx rniabnu lo Dios.
\v 3 Ruzäꞌtnu lo Dios xtadnu xho rujntu dzuun saꞌcsi
rililajztu xtidx Dios; näjza xho runduxhtu dzuun te
racnäjtu saꞌtu ni xhet rajpdi saꞌcsi rinälajztu Dios;
näjza xho rutip lajztu cabäjztu guibiꞌ Dad Jesucrist
lo guedxliuj.
\v 4 Bejtznu, racbeenu sanälajz Dios laꞌtu, laani aguleni
laꞌtu.
\v 5 Saꞌcsi che basuleꞌnu xtidx Dios lojtu, et ganax
diidxtis gujcni, niluxh xcäḻrnibee Sprit Dxan xten Dios
neṉ lastootu bejn gucbeepactu diidx ni najc didxlii.
Nanchesaꞌctu xho gujcnu che guyuꞌnu lojtu. Siꞌc baluiinu
laꞌtu te guibaṉsaꞌctu.
\p
\v 6 Sigajcni nabaṉnäjnu Dad Jesucrist sigajcza gusloj
cuaꞌtu xmoodnu, basoobzatu diidx guideb xcäḻrbalajz Sprit
Dxan xten Dios ni baniidxni lojtu, mase gudejdtu trabajw.
\v 7 Siꞌc gujc te baluiitu loj guiraa reni rililajz
nez Macedonia näjza nez Acaya xho nungäjḻ gac.
\v 8 Niꞌc abireꞌch xtidx Dios, xhet nejzdi Macedonia
näjza Acayatis, bireꞌchza diidx guira nejz. Roꞌc najnreni
xho sanälajztu Dios, niꞌc xhetru nanabti guiniinu lojreni.
\v 9 Alga lagajc laareni rujyreni diidx xho guyuꞌnu
lojtu; nägajcza xho basaantu gojṉtu rebanäjb te rajṉtu
Dios ni nabajṉpac ni najc guliipac.
\v 10 Rujyzareni diidx xho cabäjzzatu guibisac Jesucrist
lo guedxliuj. Laazani najc Xiꞌn Dios ni guläs Dios lo
rebeṉgut, Jesucrist ni rusḻaa nuurnu lo xcäḻrdxeꞌch Dios
ni churu siääd.
\c 2
\s Xhi bejn Pabl neṉ guedx Tesalónica
\p
\v 1 N̲aj lagajc laꞌtu najntu, bejtznu, et xliaꞌdi bioꞌpnu
lojtu.
\v 2 Et najntu xho gudéreni loonu, basacsíreni nuurnu
guedx Filipos. Niluxh mase gudejdnu trabajw, gusutijpnu
lo Dios, xhet bidxejbtinu basuleꞌnu xtidx Dios lojtu,
mase gudejdnu trabajwduxh.
\v 3 Saꞌcsi dinu nulijdx laꞌtu con didx-xhii, niclaza
didx-dxuudx, niclaza diidx ni rusguee.
\v 4 Saꞌcsi rsoobnu xtidx Dios basannäjni nuurnu xtiidxni,
niꞌc rusuleꞌnu xtidx Dios. Dinu guinii diidx te jiansaꞌcnu
lo bejṉ, rniinu diidx te jiansaꞌcnu lo Dios ni ruhuii
lastoonu.
\v 5 Anajntu xho basuleꞌnu xtidx Dios. Nicla tej dinu
ninii xhi stee diidx ni xhet sajcdi lojtu. Dizanu nusuleꞌ
xtidx Dios te xhigaꞌtz niennu gaan xhi nicaꞌnu. Dios
nanchee xcuent ni riennu.
\v 6 Dizanu nidiil guiliäꞌp bejṉ xpalaꞌnnu, niclaza laꞌtu,
niclaza chu stee bejṉ, mase nungäjḻ niennu niacbeetu
rajpnu yäḻrnibee saꞌcsi baxhaḻ Jesucrist nuurnu.
\v 7 Niluxh guc nadolajznu che guyuꞌnu lojtu, cuanäjnu
laꞌtu siꞌc rcanäj te naṉ rexpäzni.
\v 8 Saꞌcsi huinälazduxhnu laꞌtu, biennu xhigab xhet
ganaxdi xtidx Dios guiniidxnu lojtu, näjza lagajc xaimnu
guniidxnu te guseednu laꞌtu xtidx Dios saꞌcsi sanälazduxhnu
laꞌtu.
\v 9 Bejtznu, laꞌtu rnalajztu xho biennu dzuun te biennu
gaan xcäḻnabaannu. Biennu dzuun dxej-yääl, te di niednäjtu
nuurnu laḻ ni basuleꞌnu xtidx Dios lojtu.
\p
\v 10 Lagajc laꞌtu nancheetu, sigajc nanchee Dios, laaca
biennu che guyuꞌnu lojtu: gujcnu bejṉ ni raṉduxh Dios,
gujcnu beṉdxojṉ, gujcnu beṉsaꞌc.
\v 11 Anajntu xho baliidxnu laꞌtu, xho bascuecdxinu lajztu
siꞌc runnäj te dad rexingaanni.
\v 12 Guiraa dee biennu, te guibaṉsaꞌctu siꞌc nungäjḻ
gun reni najc xiꞌn Dios, lagajc Dios ni gurejdx laꞌtu
te chunäjtuni lo xcäḻrnibeeni näjza lo xcäḻrdimbichaꞌni.
\p
\v 13 Niꞌcni rdedduxhnu xquixtios lo Dios saꞌcsi che
biejn diajgtu xtidx Dios ni basuleꞌnu lojtu, cuaꞌtuni
siꞌc xtidx Dios xhet siꞌc xtiidxdi beṉ guedxliuj. Niluxh
gulii xtidx Diosni, saꞌcsi rusiani lastoo renani rililajz.
\v 14 Bejtznu, dxejcti bejntu lagajc siꞌc rujn rebejṉ
xquidoo Dios neṉ reguedx Judea reni najc xpeṉ Jesucrist;
luxh gusajctu lagajc ni gusajcreni, basacsí rebeṉ lajdxtu
laꞌtu. Sigajcza birinajl rexpeṉ Israelreni.
\v 15 Rexpeṉ Israel baguꞌt Dad Jesucrist, siꞌcza baguꞌtreni
lagajc rexprofeꞌtreni, renani bacuaa xtidx Dios, barilaagwzareni
nuurnu. Direni chanälajz Dios, dizareni gusaan chanajl
rebejṉ Jesucrist.
\v 16 Che rlajznu gulijdxnu reni digac rexpeṉ Israel,
te näjza laareni ḻaareni lo dojḻ, direni gusaan, siꞌctis
cagutajḻreni xtojḻreni. Niluxh ṉaj abiäädpac yäḻrdxeꞌch
xten Dios yejcreni.
\s Rlajz Pabl nihuisacni roꞌc
\p
\v 17 Bejtznu, mase biriinu roꞌc, ṉaj dirunu guihuii lojtu,
rnalazduxhnu laꞌtu, batijp lajznu jioꞌpnu roꞌc, rlazduxhnu
fisacnu lojtu.
\v 18 Rlajznu nioꞌpnu, narä, Pabl xhidal huält rlazä niälä,
niluxh beṉdxab di nusaan.
\v 19 ¿Xhiniꞌc najc xcäḻrbääznu, xcäḻrbalajznu, xcäḻracnaronu?
Lagajc laꞌtu gactuni che suunu nez loj Jesucrist che
jiädsac Dad Jesucrist.
\v 20 Laꞌtu najc ni ruspaa lajznu ni rliäꞌpza xpalaꞌnnu
nez lo Dios.
\c 3
\p
\v 1 Dxejc, che dirunu nutijp lajznu, biennu xhigab bianxtebä
guedx Atenas.
\v 2 Dxejc baxhaḻä Timoteu, bejtznu nez loj Jesucrist,
te biädhuiini laꞌtu, saꞌcsi laani najcni te xpeṉ Dios
ni runnäj nuurnu dzuun, rniini xtidx Jesucrist, te guscuecdxini
lajztu, guzudzuꞌtzni xcäḻrililajztu.
\v 3 Te nicla tejtu di guidxejb che jiääd reyäḻhuin
saꞌcsi laꞌtu anajntu agule Dios nuurnu niꞌc sidejdnu
trabajw.
\v 4 Cheni yusijcnu lojtu, rnixgaanu lojtu sidejdnu trabajw;
niluxh siꞌcni agusojb diidxga ṉaj.
\v 5 Niꞌcni diruna nutiplazä, baxhaḻä chu jiädnä diidx
xho najc xcäḻrililajztu, saꞌcsi cadxebä andi abasguee
beṉdxab laꞌtu, luxh xliaꞌsi biennu dzuun guyuꞌnu lojtu.
\p
\v 6 N̲aj agubiꞌ Timoteu, biädhuiini laꞌtu. Biadnäni ganax
didxlii xho sanuu rililajztu xtidx Jesucrist, xho rinälajztuni,
näjza sanuutis rnalajztu nuurnu, rlajzzatu fiitu loonu,
sigajcza nuurnu rlajznu fiinu lojtu.
\v 7 Niꞌcni, betznu, masä riäädx xhixtennu, masä rdeednu
trabajw, rbalajznu saꞌcsi laꞌtu sanuutis rililajztu xtidx
Dios.
\v 8 N̲aj laaca rdxunnu saꞌcsi racbeenu sudzuꞌtztu nez
loj xtidx Dad Jesucrist.
\v 9 Xhocha gac guideednu xquixtios lo Dios xcuent guiraatu
näj xcuent yäḻrbalajz ni yuꞌ lastoonu xcuent laꞌtu nez
lo Dios.
\v 10 Dxej-yääl rniabnu lo Dios gusaanni jiophuiinu laꞌtu
te gusaꞌnu guiraa rediidx ni cayäädx gacbeetu xcuent
xcäḻrlilajztu.
\p
\v 11 Rniabnu lo Xtadnu Dios, näjza lo Dad Jesucrist,
gacnäjreni nuurnu te gac jiophuiinu laꞌtu.
\v 12 Rniabzanu lo Dad Jesucrist, gunni gustiobruni lastootu
te gaꞌprutu yäḻrinälajz loj resaꞌtu näjza loj guiraa
rebejṉ, siꞌcni rinälajznu laꞌtu,
\v 13 te gunni sudzuꞌtz lastootu, naꞌc gaꞌptu dojḻ nez
lo Xtadnu Dios, che jiääd Jesucrist näjza guiraa rexpejṉni
xhaguibaali.
\c 4
\s Guibajṉnu siꞌc rchaglajz Dios
\p
\v 1 N̲aj, rebejtznu, rniabduxhnu lojtu, rulijdxnu laꞌtu
con laj Dad Jesucrist, guibajṉtu siꞌcni baluiinu laꞌtu
nungäjḻ guibajṉtu te guspaatu lajz Dios, te siꞌc chanuutis
guibaṉsaꞌctu nez lo Dios.
\p
\v 2 Laꞌtu, anajntu rediidx ni baluiinu lojtu con xcäḻrnibee
Dad Jesucrist.
\v 3 Lagajc Dios rlajz nayatis guibaṉsaꞌctu, naꞌc gun
niguii dojḻ guesnäj gunaa ni di gac chäälni, sigajcza
naꞌc guesnäj gunaa niguii ni di gac chäälni.
\v 4 Tejgatu gantu xho guibaṉnäjtu chäältu nayatis näjza
xpalaꞌnni.
\v 5 Xhet siꞌc ni rujndi regunadxab näjza reniguii, nicla
siꞌc ni rujn rebejṉ ni di gumbee Dios.
\v 6 Rut chutejditu gusguee bejtzni lo redzunguijdxre,
saꞌcsi Dios susacsí guiraa rebejṉ ni rujnza redojḻre,
niꞌcni abiniinu lojtu, agunixgaanu diidxre lojtu.
\v 7 Saꞌcsi Dios gurejdxni nuurnu te guibajṉnu lo yäḻnabaṉnaya
xtenni, xhet lo yäḻnabaṉdxuudxdi.
\v 8 Niꞌcni bejṉ ni di gucuadiajg rediidxre, dini gac
xtiidx te bejṉ ni dini cuadiajg, xtiidxpac Dios ni dini
cuadiajg, Dios nani abaniidx Sprit Dxan xtenni loonu.
\p
\v 9 Ditu guiquiin gucuaäru diidx xho chanälajztu resaꞌtu,
saꞌcsi lagajc Dios abaluiitu xho chanälajztu resaꞌtu.
\v 10 Luxh rinälajztu guiraa reni rililajz, guiraa reni
siääd guideb nez Macedonia. Niꞌcni rniabnu lojtu bejtznu,
chäꞌpru xcäḻrinälajztu.
\v 11 Coḻgutijp lajztu, dxitis coḻguibajṉ, coḻjiu xtzuuncatu,
lagajc ṉaatu coḻyejn dzuun siꞌcni agunibeenu guntu.
\v 12 Te fii rebejṉ ni di chalilajz laaca nabaṉsaꞌctu,
nägajcza te xhet jiäädxdi xhi rquiintu.
\s Xho gac che jiädsac Jesucrist lo guedxliuj
\p
\v 13 Bejtznu, rlajznu gacbeetu xcuent rebeṉgut te di
gac-huin lajztu siꞌc rujn rebejṉ ni di chalilajz xtidx
Dios.
\v 14 Siꞌc ni rililajznu gujt Jesucrist, dxejc gubaṉsacni,
sigajcza rililajznu suspaṉsac Dios guiraa reni nagayejs
neṉ baa, renani huililajz xtidx Jesucrist. Luxh che guibiꞌ
Jesucrist, siädnänireni.
\p
\v 15 Xcuent xcäḻrnibee Jesucrist rniä lojtu, nuurnu
ni nabajṉnu che jiädsac Jesucrist, dinu nid loj reni
nagayejs neṉ baa.
\v 16 Saꞌcsi lagajc Dad Jesucrist siäjt lo guedxliujre,
sibedxaꞌni, siejnza xseꞌ guixhajg ni rnibee, sibedxaꞌza
trompet xten Dios. Dxejc sibaṉxgaa reni nagayejs neṉ
baa, reni huililajz xtidx Crist.
\v 17 Dxejc nuure ni nabaṉsijcnu sidxaagnureni neṉ rebäj
te lo bej chachagloonu Dad. Siꞌc chonnu cholaznäjnuni
par tejpas.
\v 18 Niꞌcni rniä lojtu, coḻcuecdxilajz saꞌtu con rediidxre.
\c 5
\p
\v 1 Niluxh xcuent redxejga, reijzga, xhet riquiinditu
gucuaäni lojtu,
\v 2 saꞌcsi laꞌtu anansaꞌctu sidzujṉ dxej ni jiääd Jesucrist
cheni rut cayunlojdini, sigajc che riääd te gubaan yääl.
\v 3 Che canii bejṉ: “laaca dxunnu, dxunsaꞌcnu”, chela
gacbeereni acadejdreni trabajw siꞌc che rdzujṉ yäḻnayan
te gunaa che rajl xiꞌnni, luxh digacdi guxuṉreni lojni.
\v 4 Niluxh bejtznu, di gac nayäältu te di che xhet cayunlojditu
dxej xten Jesucrist, guidzuṉxhigaꞌtz dxejga siꞌc gubaan.
\v 5 Saꞌcsi guiraatu najctu beṉsaꞌc nabajṉtu lo bianij,
lo rdxee, dinu gac beṉguijdx, dinu guibajṉ lo yääl, lo
yäḻrcäjy.
\v 6 Niꞌcni di nungäjḻ guidiesnu siꞌc rejs stecuaa bejṉ,
niꞌcni nungäjḻ sunasiṉnu naꞌcza jiennu redojḻ ni rlajz
tiejxhnu.
\v 7 Reni rejs, rejsreni yääl, reni rsiojz, rsiojzreni
yääl.
\v 8 Niluxh nuure nabajṉnu lo rdxee, niꞌcni nanab naꞌc
jiennu siꞌc, riäjḻ xcaꞌnu yäḻrililajz näjza yäḻrinälajz
siꞌc rcaꞌ soldaad gamangw guiib ni rajcwni, ni rusäuu
lastooni. Riäjḻza guiläzdzuꞌtznu saꞌcsi yäḻrusḻaa lo
dojḻ najc siꞌc xhumbrel-guiib ni ruꞌ yejc soldaad ni
rusäuu yejcni.
\v 9 Saꞌcsi di Dios nibe nuurnu te chonnu gabijl, alga
guleni nuurnu te xcaꞌnu yäḻnabajṉ ni rudeed xiꞌnni, Jesucrist.
\v 10 Saꞌcsi gujt Jesucrist lacuaa nuurnu, te guibaṉnäjnuni
masä nabajṉnu lo guedxliujre o nagayejsnu neṉ baa che
guibiꞌni.
\v 11 Niꞌcni, coḻguspaa lajz saꞌtu, tejtu sigajcza steetu,
sigajcni cayujntu ṉaj.
\s Rulijdx Pabl resaꞌni
\p
\v 12 Bejtznu, rniabduxhnu lojtu, coḻhuiduxh reni ruluii
xtidx Dios lojtu, saꞌcsi aguleꞌc Dadreni te guinibeereni,
te gulijdxreni laꞌtu.
\v 13 Riäjḻza chanälazduxhtureni xcuent dzuun ni rujnreni.
Coḻcuedxi con resaꞌtu.
\p
\v 14 Rulijdxnu laꞌtu, bejtznu, coḻgulijdx reni najc beṉlatsiaj;
coḻsudzuꞌtz lajz reni guxii rbalajz lo xnez Dios; coḻgacnäj
reni di gumbesaꞌc xtidx Dios, coḻcuecdxi lajz guiraasi
bejṉ.
\p
\v 15 Coḻhuii di chu tejtu gunza doḻguijdx lo rebejṉ
ni rujn doḻguijdx. Laaca guntu ganax dzunsaꞌc lo saꞌtu,
sigajcza lo chutis bejṉ.
\p
\v 16 Coḻguibalajztis guideb nabajṉtu.
\v 17 Naꞌc cuääz guiniitu lo Dios.
\v 18 Mase xhitis rsiajctu, coḻdeed xquixtios lo Dios,
saꞌcsi siꞌc rlajz Dios gun reni rililajz Jesucrist.
\p
\v 19 Di cuälaztu xtidx Sprit Dxan xten Dios ni rniini
neṉ lastootu.
\v 20 Naꞌc cuälaztu xtidx reni rnii xtidx Dios xcuent
nani churu gac.
\v 21 Coḻquiil guiraa rediidx, coḻjiannäjtis rediidx
ni najc didxsaꞌc.
\v 22 Coḻbicaj lo guiralii doḻguijdx.
\p
\v 23 Lagajc Dios, Dios ni rbecdxi lajztu, gusiapac lastootu,
te cucheeni xaimtu, näj lastootu, näjza tiejxhtu, te naꞌc
guntu dojḻ ni di riäjḻ guntu te cuääztu dxej ni guibisac
Dad Jesucrist.
\v 24 Dad ni gurejdx laꞌtu rujnza guiraa ni rniini, niꞌc
sujnzani guiraa redzuunre.
\s Ruzadiidxnireni
\p
\v 25 Bejtznu, coḻnab lo Dios xcuent nuurnu.
\p
\v 26 Coḻgudeed xtixtios lo rebejtznu ni yuꞌ roꞌc.
\p
\v 27 Con laj Dad Jesucrist rnibeä, goḻtu guijtzre loj
guiraa rebejtznu.
\p
\v 28 Gacnäj Dad Jesucrist laꞌtu. Sugacni siꞌc.