\id 1TI
\h 1 Timoteo
\toc1 1 Timoteo
\mt Guijtz Ganid Lo Timoteu
\c 1
\s Pabl rucuaa te guijtz lo Timoteu
\p
\v 1 Narä Pabl, nacä te apost xten Jesucrist, rucuaä guijtzre
lojlu. Nacä apost saꞌcsi siꞌc gunibee Dios ni rusḻaa
nuurnu lo dojḻ näjza Dad Jesucrist nani cholääznu.
\v 2 Timoteu, luj najclu siꞌcpac xinganä lo yäḻrililajz.
Xtadnu Dios näjza Xtad Jesucristnu gacnäjlu, gulaslajzreni
luj, guscuecdxireni lastoolu.
\s Pabl rulijdx xcuent reni ruluii diidx-xhii
\p
\v 3 Che siaꞌä reguedx Macedonia, gunibeä jiaꞌnlu guedx
Éfeso te gulijdxlu gaii bejṉ te naꞌc guluiireni garenca
diidx,
\v 4 te naꞌc jiutejreni rexcuent rebeṉtiemp, te naꞌcza
jiuduxhreni chu gujc rexpeṉgoldooreni, saꞌcsi di rediidxre
gacnäj guiroobru lastooreni siꞌc rustioob yäḻrililajz
lastoonu. N̲aj rnibeä siꞌc chanuu gulijdxlu rebejṉ.
\p
\v 5 Rulijdxnu bejṉ te gaꞌpreni yäḻrinälajz saꞌreni.
Ganid nanab gacnaya lastooreni, nanab gaꞌpreni xhigabsaꞌc,
nanabza chalilajzpacreni.
\v 6 Yuꞌreni abaṟoꞌn rediidxre, riejytis roꞌreni saniduxhreni
diidx ni xhet sajcdi.
\v 7 Rlajzreni gacreni bejṉ ni najn leii, niluxh niclaza
laareni direni gacbee xhi säloj ni rniireni, niclaza
xhi säloj rediidx ni ruluiireni, räjpreni, ꞌdidxliipac
deeꞌ.
\p
\v 8 Anajnnu leii xten Dios najc sacduxhni, palga jiennu
siꞌcni rniipacni.
\v 9 Najnnu di leii gac par beṉsaꞌc, najcni par reni
najc beṉlatsiaj ni di jiu leii xten Dios, näjza reni
di gusoob diidx; par rebeṉ guijdx, näjza rebeṉdojḻ; par
reni di jiu Dios, näjza reni rusguee; par reni ruguꞌt
xtadni, xnanni, näjza guiraa reni ruguꞌt bejṉ;
\v 10 par reni resnäj te gunaa ni digac chäälreni, näjza
reni resnäj lagajc saniguiireni; par reni rbajn bejṉ;
reni rnii didx-xhii; reni rnii didx-xhii siꞌc didxleꞌ
parsi rusguee saꞌreni; näjza bejṉ ni rujn xhitis xhi
xtee dzuun ni digac dzunsaꞌc,
\v 11 nalajznu saꞌ redzunsaꞌc ni rulijdx xtidx Dios-leꞌ,
diidx ni rusḻaa lo dojḻ. Narä biannää́ diidxre.
\s Rudeedni xquixtios lo Dios saꞌcsi rulaslajznini
\p
\v 12 Rdedä xquixtios lo Dad Jesucrist ni runiidx yäḻrnibee
narä saꞌcsi najnni nasobdidxä, niꞌcni guleni narä gunä
xtzuunni.
\v 13 Luxh galoo guniyaä́ni, birinaḻä xpejṉni, basacsíäreni.
Niluxh Dios balaslajz narä, saꞌcsi dina niacbeä xhiniꞌc
cayunä, saꞌcsi gajdna chalilazä.
\v 14 Niluxh lacti guroob gujc yäḻracnäj xte Xtadnu,
guideb yäḻrililajz, näj yäḻsanälajz ni rajp Jesucrist.
\p
\v 15 Diidxre najc guliduxh, nanab chalilajzpactuni:
Jesucrist biääd lo guedxliujre te gusḻaani rebeṉ dojḻ;
lo rebeṉ dojḻ narä nacäru beṉdoḻduxh.
\v 16 Niꞌcni balaslajz Dios narä, mase nacä beṉdoḻduxh
lo guiraareni, te ganid con narä guluiini xho rbäjz Jesucrist
te chalilajz bejṉ xtiidxni, te filoj reni churu chalilajz
xtiidxni te gaꞌpreni yäḻnabajṉ par tejpas.
\v 17 Dios najc ṟeii, ṟeii ni di guet, ṟeii ni di guzeṉ,
laatisni najc Gueb Dios ni nanduxh, niꞌcni coḻguiliäꞌp
xpalaꞌnni, coḻgajṉni guideb guibajṉtu näjza par tejpas.
Siꞌc gacni.
\p
\v 18 Xiꞌnä, Timoteu, dee najc yäḻrulijdx ni runidxä lojlu
te gucuasaꞌclu siꞌc te soldaad ni abisieed, sigajc ni
gunii reprofeꞌt xcuentlu galoo.
\v 19 Di gunijtlu yäḻrililajz, bejnza xhigabsaꞌc, saꞌcsi
yuꞌreni abaṟoꞌn xtidx Dios, niꞌc abanijtreni yäḻrililajz.
\v 20 Siꞌc gusajc Himeneo näj Alejandro, luxh abatedäreni
ladzṉaa beṉdxab te guisieedreni naꞌc guiniyaꞌreni Dios.
\c 2
\s Ruluiini xho guiniabreni lo Dios
\p
\v 1 Rulidxälu ganiddoo cueedxlu, guiniablu lo Dios, gudeedlu
xquixtios lo Dios xcuent guiraa rebejṉ.
\v 2 Guiniabzalu xcuent reṟeii näj guiraa reni rnibee
lo guedxliujre, te gac guibaṉdxinu, te gac chanuunu xnez
Dios, te saru guibajṉnu.
\v 3 Saꞌ yäḻrniabga najc laaca, luxh siꞌc rdxaglajz Dios
ni rusḻaa nurnu lo dojḻ guiniabnu lojni.
\v 4 Dios rlajz ḻaa guiraa bejṉ lo dojḻ, rlajzzani gacbeepacreni
xtidxliini.
\v 5 Yuꞌ tejtis Dios, näjza tejtisza nani rusiäjḻ diidx
lo Dios näjza loj rebeṉ guedxliuj. Laani najc Jesucrist
ni gujcza niguii.
\v 6 Jesucrist gujt lo crujz te gudijxni redojḻ xten
guiraanu ni treꞌ lo guedxliuj. Dee gujc che gojl dxej
ni gule Dios.
\v 7 Dios gule narä te gacä apost te gusuleꞌä xtiidxni,
yäḻrililajz näjza didxlii lo reni di gac xpejṉ Israel.
Siꞌc ni rlajz Jesucrist rniä didxlii, dina guiniä diidx
ni rusguee.
\p
\v 8 Niꞌcni rlazä guiraatis lajt guiniab rebejṉ lo Dios,
saru guiliäs ṉaareni, gusaanreni yäḻrdxeꞌch, naꞌc gunreni
biejy.
\v 9 Siꞌcza regunaa, saru gacwreni xhajbreni, naꞌc gacreni
gunaroxhi, cuedxireni. Xhet siꞌcdi regunaa ni entis rsiucheduxh
con oor o perl o ladsajc, rajc guichniil yejcni te guidxeloj
bejṉreni.
\v 10 Masru ruchaag gunreni siꞌcni rchalglajz Dios, siꞌc
riäjḻ gun guiraa regunaa ni yuꞌ lo Dios.
\v 11 Riäjḻ dxitis gucuadiajg regunaa xtidx Dios ni
rusuleꞌ reniguii.
\v 12 Dina xcäbä gusuleꞌ te gunaa diidx lo guiraa rebejṉ,
niclaza guinibeeni lo reniguii, dxitis cueni lo rebejṉ
ni cagucuadiajg diidx nani cagusuleꞌni.
\v 13 Saꞌcsi ganid benchee Dios Adán, dxejctiru bencheeni
Eva.
\v 14 Luxh et Adandi basguee beṉdxab, beṉdxab basguee
gunaaga, dxejc biajbni neṉ dojḻ.
\v 15 Niluxh siḻiaa regunaa, palga jiureni xtzuunreni
siꞌc nan, palga chanuu chalilajzreni xtidx Dios, palga
chanälajzreni saꞌreni, palga chutisreni lo Dios, gaczareni
gunasaꞌc cuedxireni.
\c 3
\s Xho riäjḻ gac reni rnibee
\p
\v 1 Dee najc didx gulii: palga rlajz te niguii gaꞌp
dzuun xten Dios, gusuleꞌni xtidx Dios, guinibeeni rebejṉ,
te dzunsaꞌc najc ni rlajzni gunni.
\v 2 Niꞌcni, ni rlajz gac nani rnibee, riäjḻ guibaṉsaꞌcni
te naꞌc chu xhicuent guiniyaj rebejṉni. Riäjḻ gacni
chääl tejtis gunaa, riäjḻ susiṉni, gacni te beṉsaꞌc, cuedxini,
te guibaṉsaꞌcni. Riäjḻza di gudxojnni rolijzni guidzujṉ
bejṉ, nägajc riäjḻ gacni te bejṉ ni nansaꞌc te guluiini.
\v 3 Naꞌc gacni te beṉgu, nicla te ni rdxagdijḻ bejṉ,
naꞌcza gacni te nani rsiaꞌ lajzni gaꞌpni xhidajl meel,
riäjḻ cuedxi lajzni, naꞌc chanälajzni meel.
\v 4 Riäjḻ guinibesaꞌcni rolijzni, saru gunni te gusoob
rexiꞌnni xtiidxni.
\v 5 Saꞌcsi palga di te bejṉ gan xho guinibeeni lagajc
rolijzni, aticaxh gac gaꞌpni guidoo xten Dios.
\v 6 Di riäjḻ guinibee te beṉcoob nani entis huililajz,
te di guschäꞌpni xpalaꞌnni sas jiajbni lo lagajc xcäḻṉaj
Dios ni biajb beṉdxab.
\v 7 Luxh riäjḻza guinii reni di chalilajz xtidx Dios
laaca najcni, te naꞌc jianxtujyni, te naꞌcza jiajbni ladzṉaa
beṉdxab.
\s Xho riäjḻ gac reni rcanäj neṉ guidoo
\p
\v 8 Siꞌcza rediaconos riäjḻ gacreni bejṉ ni yuꞌ xcäriejnreni,
nanab gunreni siꞌcpac ni rniireni, naꞌcza soozreni, naꞌc
xcaꞌreni meel ni direni niunsaꞌc gaan.
\v 9 Riäjḻ gapdzuꞌtzni rediidx nagajn xten yäḻrililajz,
niꞌc nanab gac naya lastooreni.
\v 10 Riäjḻ fixgaatu xho nabajṉreni. Palga nabaṉsaꞌcreni,
rutza gacdi gucuaquijdireni, sajc gacreni diacono.
\v 11 Regunaa ni rlajz gac diaconas riäjḻza chu xcäriejnreni,
naꞌc güireni diidx ni di guchaag, naꞌc soozreni, gacreni
gunasaꞌc, cuedxireni, gunreni siꞌcpac ni rniireni lo guiraꞌti
dzuun.
\v 12 Riäjḻ gac rediacono chääl tejtis gunaa. Riäjḻ
guinibesaꞌcni rexiꞌnni näj guiraa reni yuꞌ rolijzni.
\v 13 Saꞌcsi rediaconos ni runsaꞌc xtzuunni, sanälajz
bejṉreni, dizareni guidxejb rsiudzuꞌtz lastooreni lo
xcäḻrililajz xtidx Jesucrist.
\s Gurobduxh najc yäḻxhigaꞌtz xten Jesucrist
\p
\v 14 Cacuaä diidxre lojlu, niluxh rlazä jiädhuigaä laꞌtu.
\v 15 Luxh palga gaclaä, anajnlu xho riäjḻ guibajṉ bejṉ
rolijz Dios, nalajznu xquidoo Gueb Dios ni nabajṉ par
tejpas. Guidoore rniasdzuꞌtz näjza ruluiiru didxlii
xten Dios.
\v 16 Rdxeloyaduxh guiralii bejṉ yäḻxhigaꞌtz xten xcäḻnajn
Dios:
\q Dios biääd lo guedxliuj siꞌc te beṉguedxliuj,
\q Sprit Dxan xten Dios gunii beṉdxanni;
\q bahuii rexangl Dios lojni;
\q basuleꞌreni xtiidxni lo rebejṉ ni di gac xpejṉ Israel;
\q guira lajt huililajz bejṉ xtiidxni;
\q huäjsni lo xcäḻrdimbichaꞌ Dios xhaguibaa.
\c 4
\s Reni rbicaj lo xnezyuj Dios
\p
\v 1 Aguniipac Sprit Dxan siääd redxej che chu reni
guṟoꞌn yäḻrililajz, sucuadiajgreni xtidx rebejṉ ni rusguee
näj xtidx rebeṉdxab,
\v 2 nicla jiureni rniireni didx-xhii ni rusguee, saꞌcsi
xhetiru xcäriejnreni, anajcni siꞌc najc cadro rudxujy
te guiblaa: xhetru racbeedini.
\v 3 Suluii rebejṉre naꞌc guchṉaa bejṉ, suluiizareni
naꞌc gau bejṉ guiraloj, niluxh Dios bejnpac redee te
xcaꞌ rebejṉ ni rlilajz, ni racbeeza didxlii, te gudeedreni
xquixtios lo Dios.
\v 4 Guiralii reni benchee Dios najc laaca, di riäjḻ
cuälaznu xhi rcaꞌnu che rudeednu xquixtios loj Dios.
\v 5 Saꞌcsi xtidx Dios näj yäḻrbedx-rniab lo Dios runsaꞌc
guiraꞌti.
\s Te ni runsaꞌc xtzuun Jesucrist
\p
\v 6 Palga susnajlu lajz rebejtznu rediidxre, sajclu
te mossaꞌc xten Jesucrist, luxh siꞌc sisieedruzalu diidx
xten yäḻrililajz, näj yäḻrluisaꞌc ni sanuulu.
\v 7 Naꞌc jiulu ni rnii regunaroyeii ni xheti xtzuunni.
Bisieed sudzuꞌtz lastoolu lo xtidx Dios.
\v 8 Guxii sajc guinibduxh bejṉ te gusutijpni tiejxhni.
Niluxh sacduxhru cucheeni xtidx Dios neṉ lastooni, saꞌcsi
racnäjni bejṉ lo yäḻnabajṉre näjza lo yäḻnabajṉ ni najc
par tejpas.
\v 9 Dee najc didxlii, riäjḻ chalilajz guiraatuni.
\v 10 Niꞌc riennu dzuun, rdeednu trabajw, saꞌcsi cabäjznu
Gueb Dios ni nabajṉ, ni rusḻaa bejṉ lo dojḻ, ganiddoo
renani rililajz xtiidxni.
\p
\v 11 Sajplu guinibeelu soob rediidxre, näjza guluiilu
rediidxre.
\v 12 Di gusaanlu cuälazreni luj saꞌcsi najclu biꞌn;
riäjḻ gaclu te ni suu te fii guiraa reni rililazsaꞌcpac
xho rniilu, xho nabajṉlu, xho sanälajzlu saꞌlu, xho rililajzlu,
näjza xho rajplu xhigabsaꞌc.
\v 13 Laḻ ni guidzuṉä roꞌc, biḻ xtidx Dios lo rebejṉ,
balijdxreni, baluiiza xtidx Dios lojreni.
\v 14 Di gusaanlu reyäḻnajn ni baniidx Dios lojlu cheni
basuj rebeṉgool ṉaareni yejclu por xtidx Dios, guniireni
diidx xcuent nani churu gac.
\p
\v 15 Guet-guejt basnaj lajzlu rediidxre, biusaꞌc rediidxre,
te gac fii guiraareni xho sanuulu lo xtidx Dios.
\v 16 Gopdzuꞌtz lagajc luj näjza rediidx ni ruluiilu;
guzudzuꞌtz lo guiraa rediidxre, te siꞌc ḻaalu lo dojḻ,
te ḻaaza reni rucuadiajg xtiidxlu.
\c 5
\s Xho guibaṉnäjnu reni rlilajz
\p
\v 1 Naꞌc quidxaꞌlu loj te beṉgool; guninäjni siꞌc xtadlu,
balijdx rebiꞌn siꞌc bejtzlu,
\v 2 balijdx renanbeṉgool siꞌc xnanlu, balijdx redxap
steeb siꞌc rebisiajnlu con rexhigabsaꞌc.
\p
\v 3 Gucnäj rebiuud ni guliipac rquiin chu gacnäjreni
te chu xhi gaureni.
\v 4 Niluxh palga yuꞌ chu biuud yuꞌ xiꞌnni o xajgni,
suguisiedxgaareni guibaṉ nayareni lo xnez Dios, te quiixreni
diꞌn ni nasääbreni lo xtadreni, näj xnanreni ni basḻaareni,
saꞌcsi niꞌc najc laaca, rdxaglajzza Diosni.
\v 5 Gunaa ni najcpac biuud, abiaꞌn xtebni, niꞌc rbäjztisni
lo Dios, dxej-yääl rbejdx-rniabni lo Dios.
\v 6 Niluxh biuud ni nabajṉ cadedgustisni najc siꞌc
te ni agujt neṉ dojḻ.
\v 7 Basuleꞌ rediidxre lojreni te rut gucuaquijdireni.
\v 8 Palga yuꞌ chutej ni di gacnäj resaꞌni, lagajc reni
rbäjz rolijzni, niꞌc agulälaz xtidx Dios, beṉguijdxru
najcni lo rebejṉ nani di chalilajz xtidx Dios.
\p
\v 9 Di gucuaalu laj rebiuud lo guijtz te gacnäjtuni
palga gajdni chu gayojṉ ijz. Riäjḻza gac biuudga te
gunaa ni gubaṉnäsaꞌc chäälni.
\v 10 Riäjḻza gumbee bejṉni xcuent redzunsaꞌc ni rujnni;
palga basḻaani rexiꞌnni, palga badedlaani rolijzni gues
beṉ zijt, palga gudiibni niꞌ rexpejṉ Dios te siꞌc guzeṉ
xcäḻnadolajzni, palga racnäjni reni rdejd trabajw, palgaza
riuni rujnni guiraꞌti redzunsaꞌc.
\p
\v 11 Niluxh naꞌc gucuaalu laj biuud ni yuꞌ guxiiru
ijz saꞌcsi che guichaglajzreni te niguii, siäḻlajzreni
diidx ni biaꞌnreni lo Jesucrist, te rlajzni guchṉasacreni.
\v 12 Dxejc siuꞌreni neṉ dojḻ saꞌcsi rbälazreni rediidx
ni biaꞌnreni che galoo bejnreni xhigab ninuureni lo
xtzuun Dios.
\v 13 Dxejc siaꞌ lojreni xhet gundireni, rijreni rolijz
bejṉ ricuereni. Luxh malaii niꞌctis gunreni. Niluxh
rliäszareni didxxhii, richuꞌreni lo xhitis, rniizareni
diidx ni di guchaag guiniireni.
\v 14 Niꞌcni rlazä rebiuud ni najc dxaꞌpru guchṉaareni
stehuält, chu xiꞌnreni, fisaꞌcreni rolijzreni te naꞌc
guiniyajreni rebejṉ ni rdxeꞌch lojnu.
\v 15 Saꞌcsi yuꞌ gaii biuud ni alagubicaj lo xnez Dios
sanajlreni beṉdxab.
\p
\v 16 Pal yuꞌ tej resaꞌnu ni najc saꞌni te biuud, riäjḻ
gacnäjnini, naꞌc gusaanni gutajlni xtzuun guidoo, te siꞌc
guidoo sajc gacnäj rebiuud ni rquiinpac chu gacnäjreni.
\p
\v 17 Rebeṉgool ni rnibesaꞌc guidoo, riäjḻ chanälajzrutureni
näj gudeedrutu guiraa nani rquiinreni, siꞌc najc reni
rusulesaꞌc xtidx Dios, rulidxsaꞌcreni laꞌtu con xtidx
Dios.
\v 18 Saꞌcsi lo xtidx Dios caj scree: “Naꞌc gusäḻlu
guijxh roꞌ gon che rusiani triuu”; siꞌcza caj stee diidx:
“Riäjḻ gax bejṉ ni rujn dzuun.”
\p
\v 19 Naꞌc cucuadiajglu xtidx tej ni rucuaquij te beṉgool
palga ruti tioꞌp, choṉ testiigw.
\v 20 Niluxh reni sanuu rujntis dojḻ, riäjḻ gulijdxlureni
nez loj rebeṉ guidoo, te näjza laareni guidxejbreni.
\v 21 Nez loj Dios, nez loj Dad Jesucrist, nez lojza reangl
ni gule Dios, rulidxduxhälu chanuulu lo rediidxre, naꞌc
jiurulu tej bejṉ lo saꞌni. Bejn tebloj loj guiraa rebejṉ.
\v 22 Naꞌc gusiojb lajzlu gusujlu ṉaalu yejc te bejṉ,
te gacni beṉ guidoo palga gajdni guisieed guibaṉsaꞌcni
lo xnez Dios saꞌcsi lagajc yejclu jiajb rextojḻni. Gubicaj
lo guiraa doḻguijdx.
\p
\v 23 Naꞌcru yälu ganax nis. Guꞌza tudxeꞌn bin saꞌcsi
racxhuu xqueꞌlu, näjza saꞌcsi yuꞌru rexcäḻracxhuulu.
\p
\v 24 Yuꞌ bejṉ ruzeṉgajc rextojḻni niꞌc rajcni castiigw,
niluxh yuꞌ bejṉ ni di xtojḻni guzeṉgajc.
\v 25 Sigajcsa redzunsaꞌc ni rujn bejṉ; yuꞌreni ruzeṉgajc,
niluxh mase dini guzeṉgajc, digacdi jianxhigaꞌtzni, sidzujṉ
dxej suzeṉni.
\c 6
\p
\v 1 Reni najc mos riäjḻ cuadiajgreni xtidx xlam̲reni,
te naꞌc guiniyaj rebejṉ laj Dios niclaza xtidx Dios
ni rusuleꞌnu.
\v 2 Palga yuꞌ remos ni najc xlam̲ni te nani rlilajz,
naꞌc cuälazreni rextiidxni saꞌcsi najcni bejtzni lo
xcäḻrililajz Jesucrist. Riäjḻ gunsaꞌcrureni xtzuunni,
saꞌcsi najcreni saꞌni loj yäḻrililajz xten Dios, luxh
sanälajzzarenini. Rediidxre baluii, basuleꞌ.
\s Yäḻnabaṉsaꞌc näjza te lastoo ni rbedxi
\p
\v 3 Palga yuꞌ chu ruluii garenca diidx, diidx ni digac
didxsaꞌc, siꞌc najc xtidx Jesucrist, näjza xhet siꞌc diidxdi
ni ruluii xho guibaṉsaꞌc bejṉ,
\v 4 bejṉga rlajz guiliäꞌp lagajc xpalaꞌnni, niluxh xhet
najndini. Siꞌc te yäḻguijdx yuꞌtis yejcni yäḻguiniab
diidx, yäḻrdiḻdiidx. Luxh redee rujn rdxeꞌch lajzreni,
rujnni rdxeꞌch bejṉ lo saꞌni, rujnni rniyaj bejṉ, rujnzani
di bejṉ guinisaꞌc lo saꞌni.
\v 5 Rujnzani rdiḻnäj bejṉ saꞌni. Guiraa redee gun bejṉ
ni aguxhijṉ xcäriejnni, bejṉ ni diru gaꞌp didxlii. Rchaloreni
sujnreni ganduxh xcuent rediidx ni ruluiireni. Gubicaj
lo saꞌ bejṉre.
\v 6 Niluxh yäḻnabaṉsaꞌc näjza te lastoo ni rebedxi,
redee saꞌcduxh.
\v 7 Saꞌcsi xhet biopnädinu lo guedxliujre, luxh sigajcza
xhet sajcdi chonänu che guetnu.
\v 8 Niluxh palga rajpnu xhi gaunu, xhi gajcwnu, con niꞌc
riäjḻ guibalaaznu.
\v 9 Niluxh reni rlajz gaꞌp xhidalduxh meel, riajbreni
lo xhigab guijdx, rujnzareni xhidajl dzuun ni xhet sajcdi,
ni rujn daan, ni rusiääz bejṉ lo yäḻruxhiṉ, lo yäḻrnitloj.
\v 10 Saꞌcsi yäḻrinälajzni meel najc xlobaa guiraa redzunguijdx.
Yuꞌza bejṉ ni rlazduxh gaꞌpni meel, rusaanreni xcäḻrililajz
Dios, dxejc lagajc laareni rujn rdedduxhreni trabajw.
\s Dzun-huen xten yäḻrililajz
\p
\v 11 Niluxh luj, bejṉ xten Dios, baxuꞌṉ lo guiraa dee,
te chanuulu lo xcäḻxhigabsaꞌclu näjza yäḻnabaṉsaꞌclu;
te chanajllu yäḻrililajz näjza yäḻsanälajz; te chanuulu
lo yäḻrbecdxi lajz näjza yäḻnadolajz.
\v 12 Benduxh dzuun xcuent yäḻrililajz Jesucrist, gunazdzuꞌtz
yäḻnabajṉ ni najc par tejpas. Niꞌcni gurejdx Dioslu,
luxh aguniilu rililajzlu xtidx Dios nez loj xhidajl
bejṉ, te anancheereni.
\v 13 N̲aj rulidxälu nez loj Dios ni rudeed yäḻnabajṉ
lo guiraa ni yuꞌ lo guedxliujre, näjza nez loj Jesucrist,
ni basuleꞌ xtiidxni nez lo Poncio Pilaꞌt,
\v 14 rnibeä guzobsaꞌclu guiraa rediidx ni rniä lojlu,
naꞌc guchaaluni, te naꞌc guiniyajreni luj ṉaj niclaza
cheni jiääd Xtad Jesucristnu.
\v 15 Sidzujṉ dxejga nani agunii Dios guidzujṉni. Dios
ni najc leꞌ sujn scree saꞌcsi laatisni najc Dios, najcni
ṟeii xten reṟeii, rnibeezani reni rnibee.
\v 16 Laatisni dini guet, nabajṉni lo bianij cadro rut
rajcdi rbig. Nicla te bejṉ gajd fii lojni, niclaza gac
fiireni lojni. Xtebtis laani riäjḻ gaꞌp rebejṉ xpalaꞌnni.
Laani rajp yäḻrnibee par tejpas. Sugacni siꞌc.
\p
\v 17 Balijdx reni rajp xhidajl xhixtenni lo guedxliujre,
naꞌc guschäꞌpreni xpalaꞌnreni, niclaza chanälajzreni
xhixtentisreni. Huenru chanälajzreni Dios ni nabajṉ,
ni runiidx loonu guiralii xhixtennu ni rquiinnu te guibalajznu.
\v 18 Balijdxreni gunreni dzunsaꞌc, gundajnreni dzunsaꞌc,
gacnäjreni reni xhet rajpdi, cuenäsaꞌcreni saꞌreni.
\v 19 Siꞌc gaꞌpreni yälnasaꞌc ni guzudzuꞌtzreni che
jiääd Jesucrist, te guiniaztzuꞌtzreni yäḻnabajṉ par tejpas.
\s Rulijdxni Timoteu
\p
\v 20 Timoteu, cuanäj ni rniä lojlu. Naꞌc jiulu didxguijdx
ni yuꞌ lo guedxliujre, niclaza didx-xhii, niclaza rediidx
ni rusguee, ni rbälajreni ꞌyäḻnajnꞌ.
\v 21 Saꞌcsi yuꞌ reni sanuu yäḻnajnre niꞌc banijtreni
lo Dios xcuent yäḻrililajz. Gacnäj Dios luj. Sugacni
siꞌc.