\id 2TI
\h 2 Timoteo
\toc1 2 Timoteo
\mt Guijtz Ni R̲ojp Lo Timoteu
\c 1
\s Stee guijtz ni baxhaḻ Pabl loj Timoteu
\p
\v 1 Narä Pabl, nacä apost xten Jesucrist. Dios gule
narä, xcuent yäḻnabajṉ ni gudeed Dios loj reni yunäj
Jesucrist, siꞌc ni biaꞌn diidx.
\v 2 Cacuaä guijtzre lojlu, Timoteu, xiꞌnä lo yäḻrililajz.
Rinälazä luj. Rniabä lo Xtadnu Dios näj lo Dad Jesucrist
gacnäj luj, gulaslajzreni luj, guscuecdxireni lajzlu.
\s Rusuleꞌni xcuent Jesucrist
\p
\v 3 Rnaj lazälu che rniabä lo Dios dxej-yääl. Dxejc
rdedä xquixtios por luj lo Dios. Naya xcärienä yuꞌä
lo Dios, runä xtzuunni siꞌc bejnza rextadgoldoä.
\v 4 Rnaj lazä xho biinlu, ṉaj rlazä fiä lojlu te guibalazä.
\v 5 Rnaj lazäza yuꞌpac yäḻrililajz lastoolu siꞌcni
guyuꞌni galoo lastoo xmam̲lu Loida dxejcru lastoo xnanlu
Eunice siꞌcza yuꞌ yäḻrililajzga lastoolu ṉaj.
\p
\v 6 Niꞌcni rniä lojlu ṉaj, siꞌcni rcanäj bejṉ rodäj
te di juiini, siꞌcza cuanäduxh reyäḻnajn ni baniidx Dios
lojlu cheni basuä ṉaä yejclu.
\v 7 Saꞌcsi di Dios nuniidx te lastoo ni rdxejb loonu,
baniidxni te lastoo ni rsiutijp, baniidxni te lastoo
ni rinälajz, baniidxzani yuduxh xcäriejnnu.
\v 8 Naꞌc guitujylu guiniilu rediidx xten Xtad Jesucristnu,
naꞌcza guituinäjlu narä saꞌcsi yuꞌä neṉ latzguiib xcuent
Jesucrist. Näj luj gudejd trabajw ni siääd xcuent yäḻrusuleꞌ
xtidx Dios siꞌctis gacnäj Dios luj.
\v 9 Dios ni gulää nurnu neṉ dojḻ, gurejdx nurnu te guibaṉsaꞌcnu
lojtisni. Gurejdxni nuurnu xhet saꞌcsi biennu dzuṉsaꞌc,
alga saꞌcsi siꞌc rlajzni laani, saꞌcsi balaslajzni nuurnu
xcuent Jesucrist galooli che gajdli guncheeni guedxliuj.
\v 10 Niluxh cheni biääd Jesucrist ni badzucaj rextojḻnu
lo guedxliujre, baluiloj yäḻrulaslajzga. Jesucrist banitloj
yäḻrnibee xten yäḻgujt. Xtiidxni, ni rusuleꞌ xho rbicaj
dojḻ, baluii yäḻnabajṉ, näjza yäḻnabajṉ par tejpas.
\p
\v 11 Dios gule narä te gacä te ni rusuleꞌ xtiidxni,
te gacäza te apost, näjza te bejṉ ni ruluii loj reni
di gac xpejṉ Israel.
\v 12 Niꞌcni rdedä trabajw xcuent guiraa rediidxre.
Niluxh dina guituiyä, saꞌcsi narä nanä chu xtiidx huililazä,
nancheä laani sajc gapdzuꞌtzni dzuun ni baniidxni loä
dxejli cheni guibiꞌni.
\p
\v 13 Chanuu guluiilu redidxsaꞌc ni banidxä lojlu. Gubajṉza
lo yäḻrililajz näj lo yäḻsanälajz ni rajpnu saꞌcsi yuꞌnu
lo Jesucrist.
\v 14 Cuanädzuꞌtz reyäḻnajn ni baniidx Dios lojlu näj
Sprit Dxan xtenni ni rbäjz neṉ lastoonu.
\p
\v 15 Anajnlu guiraa reni siääd reguedx Asia gulälaz
narä; lo redee nadxaag Figelo näj Hermógenes.
\v 16 Dad Jesucrist gacnäj reni yuꞌ rolijz Onesíforo
saꞌcsi balti huält biädspaani lazä, dini nitujy saꞌcsi
yuꞌä neṉ latzguiib.
\v 17 Che bidzujṉni guedx Roma, gudiilpacni narä te bidxälni
narä.
\v 18 Dad Jesucrist gulaslajz laani che guidzujṉ dxej
ni guibiꞌ Jesucrist. Luj anajnlu balti dzunsaꞌc bejnni
che guyuꞌni guedx Éfeso.
\c 2
\s Te ni runsaꞌc xtzuun Jesucrist
\p
\v 1 Niꞌcni xiꞌnä, guzutijp saꞌcsi rulaslajz Jesucrist
luj, racnäjnilu.
\v 2 Rediidx ni abiejn diajglu guniä nez loj xhidal
bejṉ lagajc rediidxga guniini lo rebejṉ ni rililajzpac,
loj rebejṉ ni sajc guluiiza diidxga lo stecuaa bejṉ.
\p
\v 3 Batijp lajzlu tednäjlu narä trabajw siꞌc te soldadsaꞌc
xten Jesucrist.
\v 4 Di te soldaad gun dzuun ni bejnni che gajdni gac
soldaad. Rujnni xtzuun bejṉ ni guleni gacni soldaad,
te siꞌc guspaani lajz bejṉga.
\v 5 Sigajcza, ni rguijt digacdi xcaꞌni yäḻnasaꞌc palga
dini quitsaꞌc siꞌc riäjḻ quitni.
\v 6 Bejṉ ni rujn dzuun loniaa nanab xcaꞌni xcäḻnasaꞌcni
ganidoo.
\v 7 Bejn xhigab xcuent ni rniä lojlu, dxejc sujn Dios
gacbeelu guiraani.
\p
\v 8 Basnaj lajzlu Jesucrist, te xagdoo toDavid ni huäjz
lo rebeṉgut. Dee najc xtidx Dios ni rudzucaj dojḻ, siꞌc
ni rusuleꞌä lojlu.
\v 9 Niꞌcni cagutipä lazä cadedä trabajw, caduä cadeṉ
siꞌc te bejṉ ni baguꞌt sabejṉni. Niluxh digacdi xcaduu
xtidx Dios.
\v 10 Niꞌcni cadedä trabajwre te gacnää́ reni agule Dios
te näjza reniꞌc chalilajz xtiidxni te guibajṉreni lo
bianij xten Jesucrist par tejpas.
\q
\v 11 Guliiduxh najc diidxre;
\q palga agujtnu con laani, sibaṉnäjzanu laani.
\q
\v 12 Palga rdejdnu trabajw, sinibenäjzanu laani.
\q Palga dinu guicäꞌp numbeenuni, dizani guicäjp numbeeni
nuurnu loj Xtadni Dios.
\q
\v 13 Mase dinu chanuu lo xtiidxni, laani susoobni xtiidxni
saꞌcsi digacdi cuatzlajzni diidx lagajc laani.
\s Te bejṉ nani abia xtzuunni
\p
\v 14 Basnaj lajz rebejṉ xcuent rediidxre, gunibee lojreni
nez lo Dad Jesucrist naꞌc tiḻdiidxreni saꞌcsi saꞌ diidxga
xhet sajcdini, ruxhiṉtisni reni riendiajgni.
\v 15 Batijp lajzlu te guidzujṉlu lo Dios siꞌc te bejṉ
ni runsaꞌc dzuun, xheti xhicuent guitujylu, saꞌcsi ruluisaꞌcpaclu
xtidxliitis Dios.
\v 16 Gulälaz yäḻrniyaj näjza xhidalduxh diidx ni xhet
sajcdi, saꞌcsi renani rucuadiajg rediidxga riajbrureni
lo redoḻguijdx.
\v 17 Luxh diidx ni ruluiireni suxhiṉgajcni lastoo bejṉ
siꞌc rxhiṉlajz tiejxh bejṉ. Niꞌc casiajc Himeneo näj
Fileto.
\v 18 Abanijtreni lo didxlii. Caniireni ala huäjs bejṉ
lo rebeṉgut. Siꞌc cagusiejchreni lajz gaii rebejṉ ni
rlilajz.
\v 19 Niluxh xtidx Dios rsiudzuꞌtzni siꞌc te guij nani
nadipduxh, luxh rajpnu diidxre siꞌc te seen: “Dad guibaa
anumbee guiraa reni najc xpejṉni”; näjza “Nanab guibicajreni
lo redoḻguijdx, guiraa reni ahuililajz xtidx Jesucrist.”
\p
\v 20 Neṉ te yuro, xhet ganaxdi cos oṟ näjza cos plat
yuꞌ. Yuꞌza cos yajg näj cos bajṉ; yuꞌreni najc parsi
te laniro, yuꞌza reni rquiin guixe-guixee.
\v 21 Sigajcza te bejṉ ni rlajz gun dzuunro xten Dios,
riäjḻ guibicajni loj redoḻguijdx ni xhet sajcdi. Dxejcti
Dad Jesucrist sacnäjni te gunni redzunro xtenni.
\p
\v 22 Gubicaj lo redzunguijdx ni rujn rebejṉ, huinuu
yäḻnabaṉsaꞌc, yäḻrililajz, yäḻsanälajz, gulecdxiza lajzlu
näj reni rujn xtzuun Dios, naya lastooreni rbedx-rniabreni
lo Dios.
\v 23 Naꞌc jiulu rediidx ni ruluii rebejṉ guedxliuj.
Anajnlu rediidxga rujn rdiḻnäj rebejṉ saꞌni.
\v 24 Niluxh te xmos Dad guibaa di riäjḻ guchaagni reni
rdijḻ; riäjḻ gacni beṉsaꞌc loj guiraatis bejṉ. Riäjḻza
guluisaꞌcni; riäjḻza gutip lajzni che xhet laadi rujn
bejṉ lojni.
\v 25 Guideb yäḻnadolajz guluiilu reni rdxeꞌch loj rediidx
ni ruluiilu. Cuääzlu gaxäjsi gusiejch lajzreni gun Dios
gacbeereni didxgulii,
\v 26 te jianij xcäriejnreni te guiriireni ladzṉaa beṉdxab,
te gunreni ni rlajztis Dios.
\c 3
\s Xho gac rebejṉ neṉ redxelult
\p
\v 1 Nanab gacbeelu neṉ redxelult sidzujṉ dxej tedtu
trabajw.
\v 2 Saꞌcsi suꞌ bejṉ ni chanälajz lagajctis laani, ni
rinälajz xmeeltisni, bejṉ ni rniyaduxhtis, bejṉ ni rchaglajz
chäꞌp xpalaꞌntisni, bejṉ ni rniyaj Dios; suꞌ bejṉ ni
di gusoob xtidx xtadreni, suꞌ bejṉ ni di gudeed xquixtios
lo Dios, suꞌ bejṉ ni najc beṉguijdxtis.
\v 3 Neṉ redxelultga suꞌza bejṉ ni di chanälajz saꞌni,
bejṉ ni di lajzni jiäjḻ, bejṉ ni rusgueduxh; bejṉ ni
digacdi guscuääz doḻguijdx ni rujnreni; bejṉ ni guyalazduxh;
bejṉ nani ruṟoꞌn guiraꞌti dzunsaꞌc.
\v 4 Neṉ redxelultga suꞌ bejṉ ni rutoꞌ saꞌreni; bejṉ
ni di guidxejb gunreni ni riajbtis yejcreni, bejṉ ni
rchalosi najcreni beṉsacduxh; bejṉ ni rchaglajzru gun
nani rchaglajz tiejxhreni lacuaa chanälajzreni Dios.
\v 5 Neṉ redxelult suꞌ bejṉ ni najc siꞌc beṉguidoo, ascanu
rusoobreni xtidx Dios, niluxh naadireni xcaꞌreni yäḻnadip
näj yäḻrnibee xten Jesucrist ni ruchaa lastoo bejṉ.
\p Naꞌc guchaaglu rebejṉga,
\v 6 saꞌcsi loj saꞌ bejṉre yuꞌ reni richuꞌ rolijz bejṉ,
sasgueereni regunanayääl ni rujn dojḻ. Regunaare rinuu
rujreni ni rlajztis tiejxhreni, rujnreni guiraloj.
\v 7 Rebejṉre rsiedduxh didxcoob, niluxh di didxlii xten
Jesucrist jiuꞌ yejcreni.
\v 8 Sigajcni gujc Janes näjza Jambres ni bidxeꞌch loj
Moisés, sigajcza najc rebejṉre, cadxechnäjreni didxlii
xten Jesucrist, najcreni bejṉ ni aguxhijṉ xcäriejnreni,
luxh direni gacbee xtidx Dios, direni gaꞌp yäḻrililajz.
\v 9 Niluxh direni chanuu xchej, saꞌcsi huenliisi suhuii
guiraa rebejṉ najcreni beṉguijdx. Siꞌcza gusajc guiroꞌp
reni bidxeꞌch loj Moisés.
\s Pabl rnibee sudzuꞌtz Timoteu
\p
\v 10 Luj sanuutislu lo nani rusuleꞌä, näj xho nabaṉä,
näj xhicuent runä dzuunre, lo xcäḻrililazä, lo xcäḻnadolazä,
lo xcäḻsanälazä, näjza xho batip lazä.
\v 11 Najnlu xho basacsíreni narä gudedäza trabajw ladzṉaa
rebejṉ neṉ reguejdx xten Antioquía, guedx Iconio, näjza
guedx Listra. Gudedä trabajw niluxh Dios basḻaa narä
loj guiraa retrabajwga.
\v 12 Guliduxh guiraa reni rlajz chutis loj Jesucrist
sidejdpacreni trabajw.
\v 13 Niluxh rebeṉguijdx näj reni rusguee, sinuutisreni
redoḻguijdx, sinuuru gusgueereni bejṉ, luxh susgueeza
bejṉ laareni.
\p
\v 14 Luj huinuu guzudzuꞌtz loj ni abisieedlu, nani ahuililajzzalu,
luj anajnlu chuniꞌc baluiini lojlu.
\v 15 Cheni biuuxlilu racbeelu xtidx Dios, ni ruluiilu
xho guiriilu neṉ dojḻ te xcaꞌlu yäḻnabajṉ par tejpas
saꞌcsi rililajzlu xtidx Jesucrist.
\q
\v 16 Guiraa rediidx xten Dios ni caj lo guijtz, lagajc
Dios baniidxni te xcajni lo guijtz.
\q Guiralii xtidx Dios najc laaca te guluii nuurnu xhiniꞌc
najc didxlii,
\q te gacbeenu xhi najc didx-xhii,
\q te gacbeezanu xho riäjḻ guibaṉsaꞌcnu.
\q
\v 17 Te susiṉ niguii ni najc xpejṉ Dios,
\q te gac gunni guiraa redzunsaꞌc ni riäjḻ gunni.
\c 4
\p
\v 1 Rulidxälu nez lo Dios näjza nez lo Dad Jesucrist
ni jiääd siꞌc ṟeii te gunni yäḻguxhtis loj reni nabajṉ
näjza loj reni agujt; rniäza dee lojlu:
\v 2 basuleꞌ xtidx Dios, gususiṉ lo Dios mase xhitis
oṟ. Baluii rebeṉ dojḻ, gudiḻnäj reni di rlajz guzobdiidx
xtidx Dios, balidxnäj resaꞌtu xtidx Dios.
\v 3 Saꞌcsi sidzujṉ dxej di rebejṉ guidxaglajz gucuadiajg
yäḻrluisaꞌc; alga diidx ni najc lagajc siꞌc najc xhigabreni
rlajzreni jiendiajgreni, niꞌcni siguiilreni xhidajl bejṉ
ni ruluii te guisieedreni ganax ni rlajzreni gucuadiajgreni.
\v 4 Susäuureni diajgreni te di jiendiajgreni xtidxlii
Dios; alga xhitis diidx gucuadiajgreni.
\v 5 Niluxh luj huinuutis lo xtidx Dios, batiplajz yäḻhuin,
guniitis xho rudzucaj Dios rextojḻreni, beṉsaꞌc xtzuunlu.
\p
\v 6 Saꞌcsi narä sugaꞌä ree te juꞌtreni narä, asiäddzuṉgajxh
dxej ni guetä.
\v 7 Agulujx bacuaä siꞌc te soldaad ni huicuasaꞌc lo
gueṟ, agulujx xnezyuä, gopdzutzä yäḻrililajz.
\v 8 N̲aj cabäzä xcaꞌa yäḻnasaꞌc ni guniidx Dad xhaguibaa,
suniidxni yäḻnabaṉsaꞌc. Dad najc juejz ni runsaꞌc yäḻguxhtis.
Niluxh xhet loätis guniidxni yaḻnabaṉsaꞌc. Sudeednini
loj guiraa rebejṉ ni catiplajz cabäjzreni dxej cheni
guibisac Jesucrist.
\s Rediidx ni räjpni lojtis Timoteu
\p
\v 9 Basaaga lajzlu jiädhuigajlu narä;
\v 10 saꞌcsi abasaꞌn Demas narä. Sanälajzruni redzuun
xten guedxliujre, ṉaj sääni guedx Tesalónica. Baxhaḻä
Cresent sää lo reguejdx ni reꞌ nez Galacia. Baxhaḻä
Tito sää guedx Dalmacia.
\v 11 Xtebtis Lucas suganäj narä. Gudiil Marcw te jiädnäluni
saꞌcsi sajc gacnäjni narä lo xtzun Dios.
\v 12 Tíquico baxhaḻä sää guedx Éfeso.
\v 13 Cheni jiäädlu, jiädnälu caꞌp ni basaꞌnä guedx Troas
rolijz Carpo, näj rexlibrä; di jiäḻza lajzlu rexquitzä.
\v 14 Alejandro, ni najc gubetzguiib, basacsíduxhni narä.
Dios quiixni sigajcni bejnni.
\v 15 Luj bahuii te di gunni xhi gunni luj saꞌcsi rdxechduxhni
lo xtidx Dios ni rusuleꞌnu.
\p
\v 16 Galoo che bazecä diidx lo reguxhtis, rut gucnäjdi
narä; guiraareni gulälazreni narä. Rniabä lo Dios naꞌc
guchagcuentni nani bejnreni.
\v 17 Niluxh Dad ni yuꞌ xhaguibaa gucnäj narä, baniidxni
yäḻnadip te gujc guniä guiraa xtidx Dios te biejn diajg
reni digac xpeṉ Israel xtidx Dios. Luxh gucnäj Dios
narä gulääni narä ladzṉaareni, siꞌc roꞌ te beedz.
\v 18 Susḻaani narä loj guiraa redoḻguijdx, saptzuꞌtzni
narä, sigucheezani narä te chunää́ni lo xcäḻrnibeeni xhaguibaa.
Lojni coḻdeed xquixtios, coḻgaṉduxhni par tejpas. Sugacni
siꞌc.
\s Rudeedni xtixtios lo rexamigwni
\p
\v 19 Badeed xtixtios lo Prisca näjza lo Aquila näjza
loj resaꞌ Onesíforo.
\v 20 Erasto biaꞌn guedx Corinto, niluxh basaꞌnä Trófimo
guedx Mileto saꞌcsi cayacxhuuni.
\v 21 Jiädgajlu ansde guisloj rebäinajḻ. Eubulo, Pudente,
Lino, Claudia, näjza guiraa rebejtznu ni yuꞌ lo Jesucrist
ree, ruxhaḻreni xtixtios lojlu.
\p
\v 22 Dad Jesucrist chunäj xaimlu. Dios gacnäj guiraatu.
Sugacni siꞌc.