\id TIT
\h Tito
\toc1 Tito
\mt Te Guijtz Lo Tito
\c 1
\s Bacuaa Pabl lo Tito
\p
\v 1 Narä Pabl, nacä xmos Dios, apost xten Jesucrist, te
gacnää́ guiroobru xcäḻrililajz reni agule Dios, te gacbeezareni
didxlii ni rusia xcäḻnabajṉnu.
\v 2 Cayunlojzanu yäḻnabajṉ par tejpas nani Dios, ni
digacdi guinii didx-xhii, biaꞌnni diidx guniidxni cheni
gajdli guedxliuj guirixtiej.
\v 3 Niluxh che bidzujṉ dxej ni agulexgaa Dios, laani
baluiini xtiidxni. Siꞌcza baniidxni xtiidxni loä te
gusuleꞌäni siꞌc gunibee Xtiosnu ni rusḻaa nurnu neṉ
dojḻ.
\v 4 Cacuaä guijtzre lojlu, Tito, xiꞌnä lo yäḻrililajz
ni riaꞌpnu xcuent Jesucrist. Rniabä lo Dios Xtadnu näj
lo Dad Jesucrist ni rbää nuurnu neṉ dojḻ, gacnäjreni
luj, gulaslajzreni luj, guscuecdxizareni lajzlu.
\s Dzuun ni rujn Tito guedx Creta
\p
\v 5 Che basaꞌnä́lu lo yuj ni treꞌ lo nisdoo, ni laa Creta,
basaꞌnä́lu te guluuxlu dzuun ni di niajldi nuluxä roꞌc,
näjza te cuelu rebeṉgool loj reguidoo neṉ tejga reguejdx
siꞌcni gunibeä gunlu.
\v 6 Gule beṉgool ni nabaṉsaꞌc, te naꞌc guiniyaj bejṉreni,
nanab gacni chääl tejtis gunaa, riäjḻza chalilajz rexiꞌnni,
naꞌc guibajṉreni siꞌctisni rlajz tiejxhreni, jiureni
xtidx xtadreni.
\v 7 Niguii ni rnibee guidoo rcanäj rexhixten Dios, niꞌcni
riäjḻ gaꞌpni te yäḻnabaṉya. Naꞌc gacni te beṉnajd, naꞌc
gacni te beṉnadxechaꞌ, naꞌc gacni beṉgu, naꞌc gacni te
bejṉ ni rdxagdijḻ bejṉ, naꞌcza xcaꞌni meel ni dini niunsaꞌc
gaan.
\v 8 Nanab gacni te bejṉ ni rudedlaa rolijzni jiaꞌn
beṉ biooz, riäjḻza chanälajzni dzunsaꞌc, gac nasiṉni, chu
xcäriejnni; guibaṉsaꞌcni nez lo Dios, sigajcza nez lo
rebejṉ, guibaṉnayani nez lo Dios, naꞌc gunni nani rlajztis
tiejxhni.
\v 9 Riäjḻ chanuutisni lo didxlii ni bisieedni te gac
gulidxnäjzani bejṉ xtidx Dios, te guzejcni diidx lo rebejṉ
ni rniyaj xtidx Dios.
\p
\v 10 Yuꞌ xhidajl beṉguijdx, bejṉ ni rnii diidx ni xhet
sajcdi, näjza xhidajl bejṉ ni rnii didx-xhii ni rusguee.
Näjza lo rexpeṉ Israel ni riuduxh leii yuꞌ saꞌ bejṉre.
\v 11 Saꞌ redee ni nanab jiäu roꞌni, saꞌcsi rusgueereni
xhidalro saꞌreni, ruluiireni ni di riäjḻ guluiireni te
gunreni gaan meel.
\p
\v 12 Te niguii ni siääd lagajc lajdxreni guniini xcuent
lagajc rebeṉ lajdxni: “Rebejṉ ni najc cretenses rniduxhreni
didx-xhii, niälajzzareni. Rlajzreni gausaꞌcreni niluxh
di rlajzreni gunreni dzuun.”
\v 13 Niluxh guliini, niꞌcni gudiḻnäjreni, te chalilazsaꞌcreni
xtidx Jesucrist,
\v 14 te naꞌcruza gucuadiajgreni rediidx ni rdxällajz
rexpeṉ Israel, niclaza rediidx ni rnibee bejṉ ni gulälaz
didxlii.
\p
\v 15 Loj renani rujn xhigabya, guiraꞌti najc naya, niluxh
loj reni di chalilajz, ni xhet nayadi najc xhigabreni,
guiraꞌti nacdxuudx, xcäriejnlireni nacdxuudx.
\v 16 N̲aj rujnsireni siꞌcni numbeereni Dios, niluxh ni
rujnreni huenliisi ruzeṉ direni nililajz, najcreni beṉguijdx,
direni jiu xtidx Dios, digacdi gunreni nicla tej dzunsaꞌc.
\c 2
\s Rulijdx Pabl Tito guluisaꞌcni rebejṉ
\p
\v 1 Niluxh luj guniitis rediidx ni ruluisaꞌc.
\v 2 Baluii rebeṉgool gac beṉya, bejṉ ni yuꞌ xcäriejnni,
bejṉ ni rumbee xhiniꞌc najc dzunsaꞌc, xhiniꞌc najc dzunguijdx,
bejṉ ni rajpza yäḻrililajz, yäḻsanälajz, näjza ni rbecdxi
lajzni.
\v 3 Sigajcza, regunagool, nanab guibajṉreni siꞌc te ni
yusaꞌc lo Dios, naꞌc guiniireni diidx ni di riäjḻ guiniireni,
naꞌcza soozreni. Riäjḻ guluiireni redidxsaꞌc
\v 4 te guluiireni regunaa dxaꞌp chu xcäriejnreni, chanälajzreni
chäälreni näj rexiꞌnreni.
\v 5 Gacreni nasiṉ, guibaṉnayareni, xcanäsaꞌcreni rolijzreni,
gacreni beṉsaꞌc gusoobreni xtidx chäälreni, te rut guiniyajdi
xtidx Dios.
\p
\v 6 Sigajcza gojz lo rebiꞌn riäjḻ chu xcäriejnreni.
\v 7 Luj guzuj te fiireni xho riäjḻ gun bejṉ dzunsaꞌc.
Che guluiilureni, saru baluii guiraa reni riäjḻ guluiilu.
\v 8 Didxsaꞌc gunii te rut gacdi guiniyaj diidxga, te
siꞌc guitujy chutis ni rlajz guidxeꞌch lojtu te xhet
xhi didxguijdxdi gac guiniireni xcuentlu.
\p
\v 9 Balijdx remos te gusoobreni xtidx xlam̲reni, te gunsaꞌcreni
dzuun, naꞌc guzejcreni diidx lo rexlam̲reni.
\v 10 Naꞌc cuanreni alga guibaṉsaꞌcreni te guluii xcäḻnabajṉreni
lacti sacduxh xtidx Dios ni basḻaa nuurnu neṉ dojḻ.
\p
\v 11 Saꞌcsi abiääd xcäḻracnäj Dios, abiädnäni yälrusḻaa
neṉ dojḻ lo guiraa rebejṉ.
\v 12 La xcäḻracnäj Dios ni ruluii nuurnu gusaꞌnnu redzunguijdx,
näjza dzuun xten guedxliujre te guibaṉsaꞌcnu, te chonälajznu
Dios lo guedxliujre.
\v 13 Ruluiizani nuurnu cuääznu guidzujṉ dxej ni soob
xtiidxni ni basaꞌnni loonu xcuent dxej che jiääd Gueb
Dios näj Xtad Jesucristnu ni rusḻaa nuurnu lo dojḻ.
\v 14 Laani gujtni te gusḻaani nuurnu lo guiraa redoḻguijdx,
te basiani nuurnu te gacnu xpejṉni, gaczanu te bejṉ ni
rdxaglajz rujn dzunsaꞌc.
\p
\v 15 Diidxre gunii, balijdx, basuleꞌ siꞌc te beṉnajn.
Di gusaanlu cuälazreni luj.
\c 3
\s Ni riäjḻ gun reni rlilajz
\p
\v 1 Basnaj lajz rebejṉ gusoobreni xtiidx rebejṉ ni
rnibee näjza reguxhtis, gusoobreni xtiidxreni, xcäjbzareni
gunreni xhitis dzunsaꞌc.
\v 2 Naꞌc guiniyajreni bejṉ, cuedxireni, gaczareni bensaꞌc,
saru gac nadolajzreni loj chutis bejṉ.
\p
\v 3 Saꞌcsi galoo sigajcza xheti xcäriejnnu, dizanu gusoob
xtidx Dios; basguee bejṉ nuurnu, yuꞌtisnu lo guiraasi
doḻguijdx näjza lo ni rchaglajztis rujn tiejxhnu, nabajṉtisnu
lo doḻguijdx, rudxonlajznu, rdxeꞌch bejṉ loonu, rdxeꞌchzanu
lo saꞌnu.
\v 4 Niluxh che baluiloj xcäḻrulaslajz näjza xcäḻrinälajz
Dios ni rusḻaa nuurnu näjza rebeṉ guedxliuj lo dojḻ,
\v 5 dxejc basḻaa Dios nuurnu lo dojḻ, xhet saꞌcsi yuꞌdi
xhi dzunsaꞌc biennu, alga saꞌcsi balaslajzni nuurnu.
Basḻaa Dios nuurnu lo dojḻ saꞌcsi bidiib lastoonu, te
biäjt xtojḻnu te najcnu beṉcoob, saꞌcsi bascoobza Xsprit
Dxan xten Dios xcäriejnnu.
\v 6 Baniidx Dios cuääzpac Xsprit Dxanni neṉ lastoonu
xcuent ni bejn Jesucrist ni basḻaa nuurnu,
\v 7 te saꞌcsi rujn Dios cuent najcnu beṉsaꞌc saꞌcsi
abadzucajni xtojḻnu, ṉaj sicaꞌnu xcäḻnasaꞌcnu ni cabääznu,
nalaaznu yäḻnabajṉ par tejpas.
\p
\v 8 Dee ni najc guliipac, niꞌcni rlazä chanuutislu guiniilu
rediidxre loj rebejṉ, te rebejṉ ni rililajz xtidx Dios
gunduxhreni ganax dzunsaꞌc. Rediidxre najc laaca, sacduxhreni
loonu.
\v 9 N̲aj basaan rediidx ni najc xliaꞌsi, rediidx ni gunii
rebeṉ galoo, yäḻrdiḻdiidx xcuent xleii toMoisés saꞌcsi
guiraa rebiejyga xhet sajcdini, xhetza huendi rujnreni.
\p
\v 10 Palga yuꞌ te bejṉ ni gun laꞌ saꞌ rebeṉ guidoo,
gunii lojni tej o tioꞌp huält. Palga dini jiejn, coḻcuääni
lojtu.
\v 11 Saꞌcsi anajntu saꞌ bejṉga abaṟoꞌnni, agulälazni
didxlii, lagajc xtojḻni sujn nitni.
\s Diidx ni bacuaani lojtis Tito
\p
\v 12 Che guxhaḻä Artemas o Tíquico lojlu, gudahuiipac
narä lo guedx Nicópolis. Roꞌc abenä xhigab tedä rebäinajḻ.
\v 13 Gucnäduxh licenciaad Zenas näjza Apolos, badeed
guiraa ni rquiinreni te chanuureni xpiajreni, te xhet
jiäädxdireni.
\v 14 Suguisieedza resaꞌnu gunreni dzunsaꞌc te gacnäjreni
che guiquiinnureni, te naꞌc guibajṉreni xliaꞌsi.
\s Ruxhaḻni xtixtios
\p
\v 15 Guiraa reni yunäj narä ruxhaḻ xtixtios lojlu.
Badeedza xtixtios loj resaꞌnu lo yäḻrililajz. Dios gacnäj
guiraatu. Sugacni siꞌc.