\id HEB
\h Hebreos
\toc1 Hebreos
\mt Te Guijtz Nani Biääd Loj Rebeṉ Hebree
\c 1
\s Agunii Xiꞌn Dios xtidx Xtadni
\p
\v 1 Neṉ redxe galoo garen-garen mood guninäj Dios retoxtadgoldoonu.
Xhidajlza huält guniini por reniguii ni bacuaa xtiidxni.
\v 2 Neṉ redxejre aguniini loonu por Xiꞌnni, lojzani
badeed Dios yäḻrnibee guncheeni guedxliujre, badeedzani
guiraꞌti lojni.
\v 3 Laani najc xtuxh xten xcäḻrdimbichaꞌ Dios, laani
najczani sigajc najc Dios, laazani rapchee guiraꞌti con
xtiidxni ni rnibee. Cheni gulujx basiani xtojḻnu, gurejni
xladbee Gueb Dios xhaguibaa te canibeeni.
\s Sacduxhru Xiꞌn Dios loj rexangl Dios
\p
\v 4 Roꞌc gurej Xiꞌn Dios saꞌcsi sajcruni loj reangl
xten Dios, saꞌcsi acuaꞌni yäḻrnibee siꞌc te bejṉ ni riannäj
xhixten Xtadni. Lajzani sajcru lo relaj rexangl Dios.
\v 5 Saꞌcsi Dios di niäjb loj nicla tej rexanglni:
\q Luj najclu Xiꞌnä. Narä guleälu te guinibeelu.
\m Dizani niäjb xcuent nicla tej rexanglni:
\q Narä gacä xtadni, laani gacni xiꞌnä.
\m
\v 6 Niluxh che biädnäni Xiꞌn xtebni lo guedxliuj, guniini:
\q Guiraa rexangl xten Dios, ¡Coḻgaṉ Xiꞌnä!
\m
\v 7 Che gunii Dios xcuent rexanglni räjpni:
\q Rujnni ruxhuṉ rexanglni siꞌc bej, rujnni rbebajl rexmosni.
\m
\v 8 Niluxh xcuent Xiꞌnni guniini:
\q Luj najc Dios.
\q Nabajṉlu par tejpas;
\q xcäḻrnibeelu par tejpas najc te yäḻrnibesaꞌc.
\q
\v 9 Ahuinälajzlu xhigabsaꞌc, dipaclu nichaglajz xhigabguijdx,
\q niꞌcni Dios ni najc Xtioslu, baniidxru yäḻrbalajz lojlu
quela loj resaꞌlu.
\m
\v 10 Rniizani:
\q Luj, Dad, che guslojli bencheelu guiraꞌti,
\q bencheelu cad soob guedxliuj, ṉaazalu bencheelu reguibaa.
\q
\v 11 Laareni sinitlojreni, niluxh luj nabajṉlu par tejpas.
\q Guiraareni siujx siꞌc riujx te lajd.
\q
\v 12 Suseꞌtlureni siꞌc rieꞌt te laꞌ lajd, sidxaareni siꞌc
rdxaa te lajd.
\q Niluxh luj dilu guidxaa.
\q Laḻgajctis nabajṉlu, di rexijzlu ted.
\m
\v 13 ¿Gucxha räjp Dios lo te xanglni scree, ä? Räjpni:
\q Gurej xladbeä te guinibeelu dxejli cheni gudzugä guiraa
ni rdxeꞌch lojlu ladz niꞌlu.
\m
\v 14 Guiraa rexangl Dios najc sprit, ruxhaḻ Diosreni
te chayacnäjreni rebejṉ ni xcaꞌ yäḻnabajṉ par tejpas.
\c 2
\s Naꞌc gusaanni diidx ni rusḻaani lo dojḻ
\p
\v 1 Niꞌcni nanab jiunu xtidx Dios ni abiejn diajgnu,
te naꞌc guibicajnu lo xnezyujni.
\v 2 Anajntu aguzojb diidx ni gunii rexangl Dios neṉ
redxe galoo. Luxh reni di nusoob diidxga bejnreni dojḻ,
dxejc bateed Diosreni trabajw.
\v 3 ¿Xho gac guibicaj xcäḻnaj Dios yejcnu palga dinu
jiu rextidx Dios xcuent yäḻrusḻaa lo dojḻ, ä? Ni Dad,
Jesucrist basaꞌn diidxga lo rexpejṉpacni, dxejc laareni
basuleꞌreni rediidxre loonu.
\v 4 Niluxh Dios baluii najc diidxga guliipac saꞌcsi
bejnni reseen, näjza yäḻrdxeloduxh, näjza xhidajl remilagrw.
Badeedzani Sprit Dxan xtenni loj renani ahuililajz xtiidxni
te gun tejgareni garen-garen xtzuunreni siꞌctis ni rlajz
Dios gunreni.
\s Nani guläxtiej yäḻrusḻaa bejṉ lo dojḻ
\p
\v 5 Di Dios gudeed yäḻrnibee lo rexanglni te guinibeereni
guedxliucoob ni cagusäꞌtnu ṉaj.
\v 6 Guyuꞌ tej ni bacuaa xtidx Dios lo guijtz, räjpni:
\q ¿Chu najc niguii, te guinalajz Dios laani?
\q ¿Chu najc xiꞌn niguii te jiädhuiizaluni?
\q
\v 7 Nagabsi dxej guxiiru sajcni lo reangl xhaguibaa,
\q dxejcti badedsaclu xcäḻnasaꞌcni,
\q badedsaclu xpalaꞌnni,
\q badeedzalu yäḻrnibee lojni te guinibeeni guiraꞌti ni
bencheelu.
\q
\v 8 Badeedlu guinibeeni guiralii ni yuꞌ lo guedxliuj.
\m Cheni badeed Dios guiraꞌti te guinibeeni, xhetliidi
basaꞌn Dios ni digacdi guinibeeni, niluxh ṉaj ruhuiinu
gajdni guinibee guiralii niꞌc.
\v 9 Alga rhuiinu Jesucrist, ni bejn Dios guxiiru sajcni
lo reangl xten Dios che guyuꞌni lo guedxliuj balsi dxej.
Che baluux Jesucrist xtzuunni lo guedxliuj, badeed Dios
yäḻrdimbichaꞌ näjza xpalaꞌnni lojni. Saꞌcsi sanälajz
Dios nuurnu basaanni gudejd Xiꞌnni trabajwduxh, gujtni
lacuaa niejtnu.
\p
\v 10 Dios benchee guiralii ni yuꞌ lo guedxliujre, ṉajli
rnibeeza Dios guiraꞌti. Luxh Diosre rlajz chanäni xhidajl
xiꞌnni xhaguibaa, niꞌcni baxhaḻ Dios xiꞌnpacni Jesucrist
te guläxtiejni yäḻrusḻaa bejṉ lo dojḻ che gudejdni trabajwduxh
lo crujz.
\v 11 Saꞌcsi Jesucrist, ni rujn chasanäj bejṉ te yäḻnabaṉya,
näjza reni risanäj yäḻnabaṉya, tejtis najc xtadreni.
Niꞌcni di Xiꞌn Dios guitujy guiniini lojreni: “betzä”.
\v 12 Scree caj lo xtidx Dios:
\q Chasuleꞌä lo rebetzä xho najclu,
\q siliäꞌpäza xpalaꞌnlu lojreni.
\m
\v 13 Räjpzani:
\q Sibäzä gacnäj Dios narä.
\m Ste lajt guniini:
\q Bahuii loä näjza rexiꞌnä ni baniidx Dios loä.
\p
\v 14 Te famiḻ najc tejsi bääl, tejsiza rejn; niꞌcni
che biääd Jesucrist lo guedxliuj guyuꞌ tiejxhni näj
xtiejnni siꞌc beṉguedxliuj, gujtzani te gujc bejnni gunijt
nani rnibee yäḻgujt, nalajznu, beṉdxab.
\v 15 Te siꞌc basḻaani guiraa reni rdxejb yäḻgujt, najcreni
siꞌc reni yuꞌtis loj xlam̲ni guideb nabajṉreni, lacti
rdxejbreni yäḻgujt.
\v 16 Guliini dini niääd te gacnäjni reangl xten Dios,
biäädni te gacnäjni guiralii rexajg toAbram.
\v 17 Niꞌcni gujcni siꞌcpac te bejtznu, te gac gacni
te bixhojz xten Dios ni rulaslajz, te bixhozsaꞌcza xten
Dios, siꞌcni rlajz Dios gacni te gusḻaani rebejṉ lo dojḻ.
\v 18 Saꞌcsi lagajc laani gudejdni trabajw, luxh baquiilza
beṉdxabni niujnni dojḻ, niꞌc ṉaj sajc gacnäjni renani
ruquiil beṉdxab gun dojḻ.
\c 3
\s Jesucrist sajcru loj Moisés
\p
\v 1 Niꞌcni bejtznu, reni anabaṉsaꞌc, saꞌcsi najctu reni
gurejdx Dios gac xiꞌnni, coḻyembee Jesucrist ni baxhaḻ
Dios loonu. Laani najc bixhojz ni sajcru, rusuleꞌzani
xtidx Dios xcuent nani ahuililajznu.
\v 2 Laani huinuutis guyuꞌni lo Dios ni guleni te gunni
dzuunre. Sigajc ni bensaꞌc toMoisés xtzuun Dios che
guyuꞌni loj rexpejṉ Israel, sigajcza bensaꞌc Jesucrist
dzuun che biäädni lo guedxliuj.
\v 3 Sigajc ni yuꞌru xpalaꞌn dad lo xpalaꞌn rexiꞌnni,
sigajcza yuꞌru xpalaꞌn Jesucrist lo xpalaꞌn toMoisés.
\v 4 Yuꞌ xtad guiraa refamiḻ lo guedxliuj, niluxh guleꞌc
Dios guiralii bejṉ, bencheezani guedxliuj.
\v 5 Basoob Moisés diidx siꞌc te mos, cuanäjni rexpeṉ
Dios siꞌcni gunibee Dios gunni, te baluiini xho gac redzuun
ni gajd gac dxejc, luxh ṉaj agujc redzuunga.
\v 6 Niluxh Jesucrist basoob diidx siꞌc xiꞌnpac Dios.
Cuanäjni xfamiḻ Dios. Nurnu najcnu xfamiḻ Dios palga
chanuutis sudzuꞌtznu lo xtiidxni, palga guibalajztisnu,
palga gutiplajznu dxejli ni guibiꞌ Jesucrist.
\s Yäḻrusilajz xten rexpejṉ Dios
\p
\v 7 Niꞌcni, siꞌcpac rnii Sprit Dxan xten Dios:
\q N̲aj, palga jiendiajgtu xseꞌni,
\q
\v 8 naꞌc gun-najdtu lastootu siꞌc bejn rebejṉ ni bidxechnäj
Dios che cuansajreni lo reyubijdz.
\q
\v 9 Roꞌc bidxechnäj retoxtadgoldootu Dios saꞌcsi direni
nililajz Dios siädnäreni,
\q niluxh bahuiireni redzunduxh ni bejn Dios nez lojreni
tiuu ijz.
\q
\v 10 Niꞌcni laḻ ni cadxeꞌch Dios loj rebejṉga, bejn Dios
xhigab:
\q Sujiannäjreni xhigabguijdxreni,
\q dina gusanä jiuꞌreni xcäḻrusilazä.
\q
\v 11 Niꞌcni bidxeꞌch Dios lojreni,
\q bejn Dios te xhigabduxh,
\q di rebejṉga jiuꞌ te gusilaznäjni.
\p
\v 12 Bejtznu, coḻnatiro andi chu tejtu rujn xhigabguijdx,
rlajz guibicaj lo Dios, ni nabajṉ par tejpas, saꞌcsi dini
chalilajz xtiidxni.
\v 13 Niꞌcni coḻgulijdx resaꞌtu guixe-guixee, laga najcni
nadxej; te di chu tejtu gacnajd lastooni xcuent reyäḻrusguee
xten redojḻ.
\v 14 Saꞌcsi palga chanuunu sudzuꞌtznu lo xtidx Dios
ni huililajznu che biembeenuni, dxejc yuꞌ xhi rajpnu
con Jesucrist.
\v 15 Siꞌc caj lo guijtz:
\q Nadxej, palga jiendiajgtu xseꞌ Dios,
\q naꞌc gunnajdtu lastootu siꞌc bejn rebejṉ ni bidxechnäj
Dios lo reyubijdz.
\m
\v 16 ¿Chu reniꞌcni bidxechnäj Dios che biendiajgreni
xtiidxni? ¿La et laadi guiraa rebejṉ ni gulää Moisés
guedx Egipto, ä?
\v 17 ¿Chuxh loj bidxeꞌch Dios tiuu ijz lo reyubijdz,
ä? ¿La et laadi reni biajb lo dojḻ, dxejc gujtreni, huijiajbreni
nez loj reyubijdz, ä?
\v 18 ¿Chu loj räjpni dipacreni jiuꞌ lo xcäḻrusilajzni?
Loj reni di nusoob xtiidxni.
\v 19 Niꞌc ruhuiinu di niajcdi niuꞌreni lo yäḻrusilajz
saꞌcsi direni nililajz xtidx Dios.
\c 4
\p
\v 1 Niꞌcni palga biaꞌn diidx siuꞌpacnu lo yäḻrusilajz
con Dios, nanab jiaꞌpnu lagajc nuure didi yuꞌ chu tejnu
di gun gaan jiuꞌ lo yäḻrusilajzga.
\v 2 Saꞌcsi nuure abiejn diaagzanu diidx ni rusia dojḻ,
sigajc biejn diajg rebejṉga; niluxh xliaꞌsi biejn diajgreni
diidxga saꞌcsi bacuadiajgrenini niluxh direni nililajzni.
\v 3 Luxh nuure ni ahuililaaznu siuꞌnu lo yäḻrusilajzga;
caj lo guijtz gunii Dios rediidxre:
\q Niꞌcni bidxeꞌchä lojreni, benä te xhigabduxh,
\q di rebejṉga jiuꞌ te gusilaznäjreni narä.
\m Mase abaluuxni xtzuunni cheni birixtiejli guedxliuj.
\v 4 Saꞌcsi loj stee guijtz caj diidx ni guniini xcuent
dxej ni rusilajz bejṉ:
\q Xhoꞌp dxej bejn Dios xtzuunni, dxejcti basilajzni tebdxej.
\q Xhet bejndini dxejga.
\m
\v 5 Stehuält guniini:
\q Di rebejṉga jiuꞌ te gusilaznäjreni narä.
\m
\v 6 Niluxh yuꞌ reni gajd jiuꞌ loj yäḻrusilajzga, luxh
reni biejn diajgni diidx ni rusia dojḻ di niuꞌ saꞌcsi
direni nusoob xtiidxni.
\v 7 Niꞌcni basoob Dios ste dxej gac “nadxej”. Gudejd
xhidajl ijz che gunisac Dios xcuent yäḻrusilajz. Badeed
Dios gunii toDavid rediidxre:
\q Nadxej, palga jiendiajgtu xseꞌni, naꞌc gunnajdtu lastootu.
\m
\v 8 Paru nudeed Josué yäḻrusilajzga loj rexpeṉ Israel,
diru Dios ninisac xcuent stee dxejre.
\v 9 N̲aj riaꞌnza te yäḻrusilajz par rexpejṉ Dios,
\v 10 saꞌcsi nani riuꞌ lo xcäḻrusilaznäj Dios, rusilajzzani
lo xtzuunni sigajc basilajz Dios lo xtzuunni.
\v 11 Nanab chanuu gusoobnu xtiidxni te jiuꞌnu lo yäḻrusilajzga,
te di chu tejnu ni gacnajd lajzni siꞌc ni gucnajd lajz
renani di nililajz.
\p
\v 12 Saꞌcsi nasesduxh xtidx Dios, yuduxhza xcäḻrnibee
xtidx Dios. Najcni siꞌc te guchiil ni caduxh roꞌni, rääzni
nez neṉ redzujt näj yojb. Sigajcza xtidx Dios rääz nez
cadro rliaꞌ saꞌ xsprit näjza xaim bejṉ. Ruluiiza xtidx
Dios rexhigab ni yuꞌ lastoo bejṉ, näjza redzuun ni rlajz
lastoo bejṉ gun.
\v 13 Xheti xhi bencheedi Dios ni nagaꞌtz nez lojni.
Guiralii guyasi ruhuii Dios. Sajpnu gudeednu cuent lo
Dios.
\s Bixhojz ni sajcru najc Jesucrist
\p
\v 14 Jesucrist, Xiꞌn Dios, najc xpixhojzpacnu ni sajcru,
nani abiuꞌ loj Dios. Niꞌcni nanab chanuu sudzuꞌtznu
chalilaaznu xtidx Dios.
\v 15 Xpixhojznu ni sajcru sajc gulaslajzni nuure te
di jiajbnu lo dojḻ, saꞌcsi laani sigajcza gudejdni trabajw,
baquiil beṉdxabni te niujnni dojḻ, niluxh dini niujn
dojḻ.
\v 16 Riäjḻpac naꞌc guidxeebnu cuedx-guiniabnu lo Xtiosnu
ni sanälajz nuure. Naꞌcza guitujynu, te gulaslajzni nuure,
guideb xcäḻracnäjni gacnäjzani nuure.
\c 5
\p
\v 1 Galooli guiraa rebixhojz ni sajcru nabee lo rebejṉ.
Bixhojz ni sajcru rniab lo Dios xcuent rebejṉ. Luxh
lojni rudeed rebejṉ regon näjza reguidxaa ni gudeedni
lo Dios te jiäu lo xtojḻreni nez lo Dios.
\v 2 Rdejdza bixhojz trabajw sigajc beṉguedxliuj, niꞌc
sajc gaꞌpni yäḻnadolajz loj rebejṉ nani nayääl näjza
reni abanijt lo Dios.
\v 3 Niluxh saꞌcsi näjza laani rujnni dojḻ, nanab gudeedni
guidxaa lo Dios te jiäu lo rextojḻni sigajc rudeedni
guidxaa lo Dios te riäu lo xtojḻ rebejṉ.
\p
\v 4 Rut sajcdi gac bixhojz xcuentcani. Dios najc ni
rbejdxni te gacni bixhojz, dxejc rudeedni xpalaꞌnni lojni
siꞌc badeednini lo Aarón.
\v 5 Siꞌcza di Jesucrist niajc bixhojz ni sajcru xcuentcani.
Dios najc nani gulälajni gacni bixhojz ni sajcru, räjpni
lojni:
\q Luj najclu Xiꞌnä, narä guleälu nadxej te guinibeelu.
\m
\v 6 Scree cajza lo xtidx Dios stee lajt:
\q Luj najclu bixhojz par tejpas sigajc gujc te niguii
ni laa Melquisedec.
\m
\v 7 Cheni gubajṉ Jesucrist lo guedxliujre, gurejdx-gunabzani
lo Dios, guredxaꞌni biinzani lo Dios nani sajc nudzucajni
lo yäḻgujt; Dios bacuadiajg xtiidxni saꞌcsi huinälajz
Jesucrist Dios.
\v 8 Niꞌcni Jesucrist mase najcni Xiꞌn Dios bisieedni
basoobni diidx luxh näj niꞌc gudejdni trabajw.
\v 9 Che bidzujṉ dxej baluuxni guiraa redzuun ni rlajz
Dios gunni, laani gujcni nani rudeed ḻaa bejṉ nani rusoob
xtiidxni lo dojḻ par tejpas
\v 10 saꞌcsi Dios gulälajni bixhojz ni sajcru, gujcni
bixhojz sigajc gujc Melquisedec.
\s Rxhuṉriezgw gusaꞌnni xcäḻrililajzni
\p
\v 11 Rlajznu guiniinu xhidalduxhru diidx xcuent Melquisedec,
niluxh naganduxh gusuleꞌnuni lojtu saꞌcsi nadyejctu,
ditu gacbee.
\v 12 Agujc xchej huililajztu rediidx xcuent Jesucrist.
Ariäjḻ gusuleꞌtu rediidxre ṉaj, niluxh alga rquiinrutu
chu gusuleꞌ rediidxre lojtu stehuält, luxh rediidxre
najc rediidx guyasi xten Dios. Agucsactu siꞌc bäz. Rlajztu
yäsactu leꞌch lacuaa gautu yäjt, bääl; nalajznu, redidxnagajn
xten Dios.
\v 13 Reni najc siꞌc bäz, räꞌ leꞌchtis, direni gumbesaꞌc
redidxsaꞌc xten Dios.
\v 14 Niluxh rebeṉ guyajl rajw yäjt. Sigajcza redidxnagajn
xten Dios najc par rebejṉ ni aguyajl lo xtidx Dios, renani
ayuꞌ xcäriejnni, arumbeereni nani najc dzunsaꞌc, nani
najcza dzunguijdx.
\c 6
\p
\v 1 Nanab guisieedrunu xtidx Dios te churu xcäriejnnu.
Naꞌc guisieedtisnu didx-guyasi xcuent Jesucrist. Naꞌc
guluiitisnu diidx xcuent yäḻrusiechlajz, xcuent redzuun
ni rujn rejt bejṉ, näj yäḻrililajz xtidx Dios.
\v 2 Naꞌc guluiitisnu xcuent yäḻrobnis, näj yäḻrudzubṉaa
yejc bejṉ, näj xcuent yäḻrbajṉsac rebeṉgut, näj xcuent
yäḻguxhtis par tejpas.
\v 3 Alga doꞌo guisieedru xtidx Dios te churu xcäriejnnu,
palga siꞌc guniidx Dios jiennu.
\p
\v 4 Yuꞌ bejṉ ni abianij xcäriejnni, ni acuaꞌ reyäḻnasaꞌc
ni rudeed Dios, ni rbäjz Sprit Dxan xten Dios neṉ lastooreni,
\v 5 luxh bidxaglajzreni xtidx Dios näj yäḻrnibee xten
Dios ni churu jiääd.
\v 6 Palga laareni guibisacreni lo saꞌ yäḻnabajṉ ni
gojpreni galoo, diru gacdi guidxaa xmodreni stehuält,
saꞌcsi dxejc sajcni siꞌc ni lagajc laareni gucuasacreni
Xiꞌn Dios lo crujz, nalajznu susanxtujyreni Jesucrist
nez loj rebejṉ.
\v 7 Beṉ guedxliuj ni biejn diajgni najc siꞌc najc yuj
ni räꞌ nis che riajbtis nisguij. Palga yujga gudeed
yälnasaꞌc loj reni rujn dzuun lojni, sunleꞌ Dios yujga.
\v 8 Niluxh palga gudeed yujga ganax yaguejch näjza
cuaan ni xhet sajcdi, xliaꞌsini, sujn rebejṉ gac nadeni
te checni.
\s Diidx ni rusudzuꞌtz lastoonu
\p
\v 9 Mase rniinu scree lojtu, anajnnu huililajztu xtidx
Jesucrist näjza xtiidxni ni rusḻaa lo dojḻ.
\v 10 Saꞌcsi Dios najc ni rujn yäḻguxhtissaꞌc, diza lajzni
jiäḻ ni rujntu laꞌtu näj yäḻsanälajz ni rajptu par laani
che racnäjtu rebejtznu lo yäḻrililajz, luxh guixe-guixee
siꞌc rujntu.
\v 11 N̲aj rlajznu tejgatu chanuu gaꞌp lagajc yäḻrbalajzre
dxe lultli, te gac guiraa ni cabäjztu.
\v 12 Rlajznu naꞌc gactu bejṉ ni rbedxitis, alga guntu
sigajc bejn rebeṉ galoo, gopdzuꞌtzreni yäḻrililajz ni
batipduxh lajzreni, guläjzreni te cuaꞌreni reyäḻnasaꞌc
ni biaꞌn diidx gudeed Dios lojreni.
\p
\v 13 Luxh che biaꞌn Dios diidx loj toxtadgoldoonu Abram,
guniini por lagajc laani saꞌcsi ruti stee ni sajcru
lojni.
\v 14 Scree gunii Dios: “Guliä sacnää́ luj, sunidxäza
xhidajl xiꞌnlu.”
\v 15 Cheni aguläjz Abram xchej, gusojb diidx, cuaꞌni
nani gunii Dios lojni.
\v 16 Saꞌcsi cheni rniliipac bejṉ te diidx, rniireni
diidxga por laj steꞌca bejṉ ni sajcru lojreni, sas che
rusäꞌtreni laj bejṉga xhetru yuꞌdi xhi gunreni biejy.
\v 17 Rlajz Dios gacbeepac rexagdoo toAbram sisiojbpac
diidx ni biaꞌnni che guniini loj Abram galooli. Sisiojbpac
xtiidxni, saꞌcsi guniini diidx con lagajc lajni che biaꞌnni
diidxga.
\v 18 Niꞌcni ṉaj yuꞌ tiop diidx ni digacdi guichaa saꞌcsi
digacdi guinii Dios didx-xhii, rusoobpacni xtiidxni, rudeedzani
yäḻrbedxilajz loj renani gubig-guxuṉ lojni, loj reni sanuu
loj yäḻrililajz xtiidxni nani abaniidxni loonu por lagajc
lajni.
\v 19 Laa niꞌcni cabääznu ni rusudzuꞌtz lajznu siꞌc
duu-guiib con ancl ni rniazdzuꞌtz te barcw. Siꞌc rusudzuꞌtzni
lastoonu te jionnu cadro yuꞌni detz ladró.
\v 20 Lagajc roꞌc biuꞌ Jesucrist xcuent nuure, te galooli
baxhalni xnez Dios loonu, te gujcni bixhojzro par tejpas
siꞌc gujcza bixhojz nani laa Melquisedec.
\c 7
\s Jesucrist najc bixhojzro siꞌc najc Melquisedec
\p
\v 1 Galoo che gujc Melquisedec ṟeii xten guedx Salem,
gujcni bixhojzro xten Gueb Dios. Che gubiꞌ Abram che
gulujx gueṟ cadro baguꞌtni reṟeii ni bidxeꞌch lojni,
huichagloj Melquisedecni, sas gunabni lo Dios te gacnäjru
Dios Abram.
\v 2 Dxejcti bejn Abram tzuu cuaa guiraa ni bejnni gaan,
te badeedni tej cuaani loj Melquisedec. Laj Melquisedec
säloj “ṟeii ni runsaꞌc yäḻguxhtis”, dxejctiru ṟeii xten
guedx Salem sälojzani “ṟeii xten yäḻrbedxilajz”.
\v 3 Baluiilojni lojreni, niluxh dinu gan chu najc xtadni,
niclaza chu najc xnanni, niclaza chu najc resaꞌni. Dizanu
gan guc gojlni niclaza guc gujtni. Gujcni siꞌc najc
Xiꞌn Dios. Najctiszani bixhojzro par tejpas.
\p
\v 4 N̲aj coḻhuii, lacti te beṉsaꞌc, te beṉro najc Melquisedec.
Lojni badeed toxtadgoldoonu Abram tejga ni sajcru lo
tejga tzuu ni bejnni gaan. Luxh Abram najc bejṉ ni sajcru
lo rexpejṉni.
\v 5 Leii xten Moisés, rnibee xcaꞌ rebixhojz ni najc
xfamiḻ Leví te cuaa lo saꞌreni siꞌc ni badeed toAbram
loj Melquisedec, mase najcreni rexagdoo Abram.
\v 6 Niluxh di Melquisedec gac xfamiḻ Leví. Niluxh badeed
Abram te cuaa xhixtenni loj Melquisedec. Dxejcti benleꞌni
Abram ni biannäj xtidx Dios.
\v 7 N̲aj rut sajcdi guinii garenca, saꞌcsi nani sajcru
runleꞌ yejc nani guxiiru sajc.
\v 8 N̲aj rebixhojz ni rcaꞌ tejga lo tzuu ni rajpreni,
najc bejṉ ni rejt. Niluxh rnii xtidx Dios xcuent Melquisedec
ni cuaꞌ te cuaani galooli: najcni siꞌc te bixhojz nani
nabajṉ par tejpas.
\v 9 Niꞌcni sajc guiniinu xcuent Leví nani rcaꞌ te cuaa,
lagajc laani agudijx te cuaaga che badeed Abram tejga
yejc tzuuga lo Melquisedec.
\v 10 Saꞌcsi mase gajd xiꞌn toAbram chu che huichagloj
Melquisedecni, batijpni lastooni saꞌcsi abiaꞌn diidx
sudeed Dios xajgni. Niꞌcni che agudijxni te cuaaga najcni
siꞌcni suganäjni rexajgni.
\p
\v 11 Rexpejṉ Israel cuaꞌ leii che gujc bixhojz relevitas,
reni najc rexiꞌn toAarón. Paru niajc niujnreni nibaṉsaꞌc
rebejṉ ni huisanäj leiiga, dirureni niquiin niääd stee
bixhojz ni di gac siꞌc Aarón, alga siꞌc najc bixhojz
Melquisedec najcni.
\v 12 Saꞌcsi cheni rdxaa te cuaa bixhojz nanab näjza
leiiga guidxaa.
\v 13 Niluxh rnii xtidx Dios, Dad Jesucrist najc bejṉ
xten garenca famiḻ. Luxh nicla tej bixhojz gajd gac
bejṉ xten famiḻga.
\v 14 Huenliisi najnnu najc Dad Jesucrist te bejṉ xten
xfamiḻ toJudá, niluxh di Moisés ninii gac te rexpejṉ
Judá bixhojz.
\p
\v 15 Luxh huenliisi najc ni rniinu, saꞌcsi abiricaj
ste bixhojz ni najc sigajc gujc Melquisedec.
\v 16 Luxh dini niajc bixhojz siꞌc rnii releii ni guyuꞌ
dxejc. Laani gujcni bixhojz xcuent yäḻrnibee ni najc
par tejpas, ni rut gacdi gutzujḻ.
\v 17 Scree najc diidx ni gunii Dios xcuentni:
\q Luj najclu bixhojz par tejpas siꞌc gujc te niguii ni
laa Melquisedec.
\m
\v 18 Dxejcti gunijt leii saꞌcsi xliaꞌsi gujcni, di niajcdi
niujn bejṉ siꞌcni rniini.
\v 19 Di xleii toMoisés niujn gaan nibaṉsaꞌc bejṉ. N̲aj
lacuaa leiiga rajpnu te xcäḻrililazsaꞌc; niꞌc rujn rbignu
lo Dios.
\p
\v 20 Dios bejn gacni bixhojz con xtidxliini, ni guniini
con lagajc lajni.
\v 21 Stecuaa rebixhojz gujcreni bixhojz niluxh et con
didxliidire, con laj te beṉro, niluxh bixhojzre guc bixhojz
con didxlii, con laj nani räjp:
\q Agunilii Dios diidx con lagajc lajni,
\q niluxh dini gusiech lajzni, räjpni:
\q “Luj najclu te bixhojzro par tejpas,
\q lagajc siꞌc gujc Melquisedec.”
\m
\v 22 Niꞌcni, Jesucrist najc ni rujn rileꞌ rediidxre,
luxh diidxre sajcruni loj xleii Moisés.
\v 23 Guyuꞌ xhidalduxh stecuaa rebixhojz, saꞌcsi rejtreni,
digacdi chanuureni gacreni bixhojz.
\v 24 Niluxh Jesucrist rajpni yäḻnabajṉ par tejpas, ṉaj
najczani bixhojz par tejpas.
\v 25 Niꞌc rajcza rusḻaani bejṉ lo dojḻ par tejpas.
Rusḻaani guiraa renani rbig lo Dios por laani, saꞌcsi
anabajṉni par tejpas te canabni lo Dios xcuent laareni.
\p
\v 26 Jesucrist najc bixhojzro nani rquiinnu. Laani
najc dxan, dini niujn dojḻ, agubicajni lo rebeṉ-dojḻ, huäjszani
jiaaru xhaguibaa.
\v 27 Dini gac siꞌc stecuaa rebixhojz ni nanab juꞌt
man guixe-guixee te guzeꞌc bixhojzroni lo Dios te ganid
jiaa lagajc xtojḻni. Dxejcti sajc guibiꞌni guzeꞌcnini
lo Dios xcuent xtojḻ rebejṉ. Niluxh Jesucrist tejtis
huält gudejdni trabajw, bejnnini cheni cuajni lo crujz,
baxheꞌni xtiejnni xcuent nuure, gujtni. Siꞌc gudijxni
xtojḻnu par tejpas.
\v 28 Leii xten Moisés rusaan gac bixhojzro te bejṉ
nani rejt, niluxh didxlii ni gunii Dios con lagajc lajni
guleni tejni gac bixhojzro lagajc Xiꞌnni nani naya, nani
nabaṉsaꞌc par tejpas.
\c 8
\s Jesucrist najc nani rusiäjḻ diidx
\p
\v 1 Diidx ni sajcru loj rediidx ni caniinu najc scree:
bixhojz ni najc xpixhojzronu agurej xladbee Dios lo
xcäḻrdimbichaꞌni xhaguibaa.
\v 2 Neṉ yuꞌ ni najc dxan, neṉ guidoo ni benchee Dios
yuꞌ bixhojzre, xhet neṉdi guidoo ni runchee rebeṉ lo
guedxliuj.
\v 3 Guiraa rebixhojz rajc rudeedreni gojṉ lo Dios, rajcza
juꞌtreni guidxaa te gusejcreni lo Dios xcuent xtojḻreni,
niꞌcni nanab gaꞌp Jesucrist xhi gudeedni lo Dios.
\v 4 Paru sugaꞌni lo guedxliujre, nicla bixhojz dini
niajc, saꞌcsi yuꞌ bixhojz ni rudeed regojṉ siꞌc ni rnibee
xleii Moisés.
\v 5 Niluxh redzuun ni rujn rebixhojzga najc siꞌc te
balaa xten guiraꞌti ni yuꞌ xhaguibaa. Najnnu najcreni
balaa saꞌcsi balijdx Dios Moisés cheni agojl gunni xquidoo
Dios, räjp Dios lojni: “Bahuii te gunlu guiraꞌti siꞌcpac
ni baluiä lojlu lo dan Sinaí.”
\v 6 Niluxh xpixhojznu Jesucrist rujn dzuun ni sajcru,
saꞌcsi najcni nani sugaꞌ galäii xnezyuj Dios loj rebeṉ
guedxliuj, gusuleꞌni diidx ni gunii Dios cheni bejnni
xhigabcoob, basaꞌnni didxcoob loj rebeṉ guedxliuj. Luxh
didxcoobre sacduxhruni.
\p
\v 7 Paru niajc nusiejch leii ni badeed Dios galooli
lo Moisés lajz rebejṉ, di niquiin niujn Dios ste xhigabcoob.
\v 8 Niluxh bahuii Dios xhet cayunsaꞌcdi rebeṉ guedxluij,
dxejc räjpni:
\q N̲aj rniliä sidzujṉ redxej che gunä stee xhigab,
\q jiaꞌn stee diidx loj rexpejṉ Israel näjza loj rexpejṉ
Judá te xcaꞌreni didxcoob.
\q
\v 9 Xhet siꞌcdi xhigab ni benä che biaꞌnä diidx loj retoxtadgoldooreni
neṉ redxej ni gunazä ṉaareni te gulää́reni lajdx rebeṉ
Egipto.
\q Laareni direni nusoob xtidxä niꞌc basaꞌnäreni, diruna
niuäreni.
\q Siꞌc gunii Dad, Gueb Dios.
\q
\v 10 Niluxh diidx nani runä xhigab rlazä jiaꞌn diidx
loj rexpejṉ Israel neṉ redxejre gac scree, räjp Dad:
\q Sunä chu rexleiä lo xcäriejnreni, sucuaäza xtidxä neṉ
lastooreni.
\q Dxejcti narä gacä Xtiosreni, laareni gac rexpeṉä.
\q
\v 11 Rut chu tejdi guluii saꞌni,
\q nicla bejtzni, nicla chu stee bejṉ gäbreni, “coḻyembee
Dad”,
\q saꞌcsi alanumbee guiraareni narä, rebäz sigajc rebeṉgool.
\q
\v 12 Narä sulaslazäreni susiaä redzundxuudx ni bejnreni,
diru lazä guizaj rextojḻreni, nicla latzsiaj ni bejnreni.
\m
\v 13 Che biaꞌn Dios didxcoob, diidx nani biaꞌnni galoo
agujcni didx-biejw, luxh nani anajc didx-biejw, xhetru sajcdini.
\c 9
\s Xquidoo guedxliujre näjza guidoo xhaguibaa
\p
\v 1 Laaca ṉaj. Diidx ni biaꞌn galoo badeed leii xho gunreni che rajṉreni Dios, näjza xho gac guidoo lo guidxliujre.
\v 2 Guc-chee guidoo dxejcti gojḻ te ladro galäiini te gujcni tioꞌp yuꞌ. Yuꞌ ni najc ganid laani yudxan. Roꞌc sugaꞌ candilieer, näjza mex cadro nagaꞌ yätxtiil ni aguc leꞌ
\v 3 Ni rojp yuꞌga najc dejtz ladro, roꞌc najc yudxanduxh.
\v 4 Roꞌc sugaꞌ te guiib cadro ruꞌ yaal. Najcni ganax oor. Roꞌc yuꞌza te guijn ni laa “arco de pacto”, najcwni ganax oor, sigajc dejtzni, sigajcza neṉni. Neṉga yuꞌ te boꞌt ganax oor. Neṉ boꞌtga, yuꞌ yätxtiil ni laa mana. Lagajcza neṉ guijnga yuꞌ bar xten toAarón nani bigaꞌ, guyuꞌ bid lojni, näjza guij cadro bacuaa Dios xleii toMoisés.
\v 5 Yejc guijnga caj tioꞌp figur oor ni najc siꞌc xangl Dios. Laareni rujn racbee bejṉ sugaꞌ Dios roꞌc. Lagajc redee rusäuu con rexhigareni cadro ruxheꞌ bixhojzro xtiejn guidxaa xcuent xtojḻ rebejṉ. Roꞌcti di gacdiru guiniirunu xcuentreni ṉaj.
\p
\v 6 Che gulujx gusucheereni, riuꞌ rebixhojz siꞌcsi siꞌc neṉ guidoo, neṉ yudxan te rajṉreni Dios siꞌc gunibee Dios.
\v 7 Niluxh neṉ stee yuꞌga ni laa yudxanduxh, roꞌc rajc riuꞌ bixhojzrotis. Xtebtisni riuꞌni, luxh tejtis huält neṉ teb ijz, te chanäni xtiejn reguidxaa ni gudeedni te jia xtojḻni näjza te jia xtojḻ rebejṉ ni najc xpejṉ Israel.
\v 8 Luxh guiraa reniꞌc ruluii Sprit Dxan xten Dios loonu, gajd yudxanduxh guxal che sugasijc yuꞌ ganid, yuꞌ ni laa dxan, cadro sanuu rajṉreni Dios.
\v 9 Guiraa ni gujc galoo najc siꞌc te balaa, baluiini xho gacni ṉaj. Regon näjza reman ni rudeedreni lo Dios direni nusansaꞌc xcäriejn reni rudeed gojn lo Dios, saꞌcsi xtiejn reman rusäutisni lo xtojḻ rebejṉ.
\v 10 Dee najc ganaxtis xhi rajwni, ni räꞌni, con yäḻrobnis, o xhi stee dzuun ni rujn bejṉ te ria ganaxtis tiejxhreni che guidzujṉli dxej cheni guchaa Dios guiraꞌti.
\p
\v 11 Niluxh abiääd Jesucrist, ṉaj laani najc bixhojzro xcuent redidxcoob ni sajcru ṉaj. Nacoob guidoro cadro biuꞌ bixhojzre, nasaꞌcruni ṉaj. Xhet con ṉaadi bejṉ guc-cheeni. Dizani gac guidoo guedxliujre.
\v 12 Abiuꞌ Jesucrist cadro najcpac yuꞌ ni laa dxanduxh, niluxh xhet xtiejndi redxib, regon; ganax lagajc xtiejnni caꞌni biuꞌni yudxanduxh tejtis huält, te siꞌc basḻaani nuure lo dojḻ par tejpas.
\v 13 Reni basia xtojḻ bejṉ galoo najc redee: xtiejn regon näjza redxib, näj cobdäj xten reguidxaa ni rejc neṉ guidodxanga; bastiojbni guiroꞌpreni yejc reni yuꞌ xtojḻni.
\v 14 Paḻga basia redee xtojḻ bejṉ, aticaxh xtiejn Jesucrist sajc gusia dojḻ, saꞌcsi rajpni yäḻnabajṉ par tejpas. Lagajc laani badeedni xtiejnni lo Dios. Niluxh najcni renya saꞌcsi dini niujn dojḻ, rusiazani xcäriejnnu xcuent retzuun ni xhet sajcdi, te chunu loj Dios ni nabajṉ par tejpas.
\p
\v 15 Niꞌcni Jesucrist najc nani sugaꞌ galäii: nez lo Dios näjza nez loj rebeṉ guedxliuj xcuent didxcoob. Yäḻgujt xten Jesucrist najc te gudzucajni xtojḻ rebeṉ näjza xtojḻ renani bejn siꞌcni caj lo leii, te xcaꞌ guiraa reni agurejdx Dios yäḻnabajṉ par tejpas, siꞌc biaꞌn diidx galooli.
\v 16 Didxcoobre najc siꞌc che rlajz tej bejṉ guinibee xho guidis xhixtenni che agojl guetni, nanab gucuaa bejṉga lo te guijtz xho guidisni, dxejcti gucuaani lajni. Niluxh xhet sajcdi guijtzga che gajd bejṉga guet.
\v 17 Xhet sajcdi guijtzga che nabaṉsijc nani bejnni. Sajcni che agujt bejṉga.
\v 18 Niꞌcni che biaꞌn Dios diidx loj rexpejṉ Israel galoo, gujt te man te bixeꞌ rejn.
\v 19 Che gulujx gunii Moisés rediidx siꞌc ni caj lo leii loj guiraa rexpejṉ Israel, baguꞌtni rebiseṟ, redxib, cuaꞌni rejnga näjza nis, bahuajdxni guid-xiil xniaa näjza te laꞌ yajg balagbäz, hysopo, dxejcti bastiojbni rejn yejc guijtz cadro caj leii, näjza yejc rebejṉ.
\v 20 Dxejc guniini lojreni: “Rejnre najc seen sileꞌpac diidx ni abaxhaḻ Dios lojtu.”
\m
\v 21 Sigajcza bastiojb Moisés rejn guidoo näj guiraa renani rquiin rebixhojz che rajṉreni Dios.
\v 22 Leii xten Moisés rnibee jia guiralii con rejn, palga di rejn guixeꞌ, di xtojḻ bejṉ jia.
\s Xtiejn Jesucrist rudzucaj dojḻ
\p
\v 23 Niꞌcni biquiinpac gujt remanre, bixeꞌ xtiejnni te basiani reni najc xpalaa reni yuꞌ xhaguibaa, niluxh reni yuꞌ xhaguibaa rquiin guixeꞌ xtiejn te ni sajcru.
\v 24 Di Jesucrist niuꞌ neṉ guidoo ni benchee rebejṉ, ni najc xpalaa guidoopac xten Dios xhaguibaa. Laani biuꞌni lagajc xhaguibaa, te laani sugaꞌni nez lojpac Dios te caniini xcuent nuure loj Dios.
\v 25 Bixhojzro xten xpeṉ Israel biuꞌ neṉ yuꞌ ni laa dxanduxh tejtis huält neṉ teb ijz, caꞌni xtiejn reguidxaa. Niluxh Crist biuꞌ xquidoopac Dios xhaguibaa tejtis huält par tejpas, luxh caꞌni lagajc xtiejnni. Di guiquiin jiuꞌruni balti huält.
\v 26 Palga nanab gunni siꞌcni rujn rebixhojz, sajpni por niejtni te chinaduxh huält cheli birixtiej guedxliuj. Luxh ṉaj, cheni bidzujṉ dxej, baluiloj Jesucrist tejtis huält, lagajc laani badeedzani xtiejnni lo Dios cheni gujtni, cuajni lo crujz te siꞌc badzucajni par tejpas xtojḻ rebejṉ.
\v 27 Guiraa bejṉ nanabpac guetreni tejtis huält, dxejctiru sidejdreni yäḻguxhtis xten Dios.
\v 28 Sigajcza tejtis huält badeed Jesucrist xtiejnni ni bixeꞌ lo crujz te badzucajni xtojḻ xhidalduxh bejṉ. Luxh loj renani cabäjzni suluiilojni stehuält, xhet te gudzucajdiruni dojḻ, alga te gusaꞌni xcäḻrusḻaa renani cabäjzni.
\c 10
\p
\v 1 Saꞌcsi leii xten toMoisés najctis siꞌc te balaa
xten nani siääd ṉaj. Niluxh dini gac siꞌcpac redidxcoobga.
Niꞌcni leii, con xtiejn reguidxaa ni rxeꞌ cazob ijz digacdi
gunsaꞌcni rebejṉ nani guibig lo Dios, saꞌcsi di xtiejn
man gudzucajpac rextojḻreni.
\v 2 Paru niajc nibicajpac xtojḻ reni rudeed xtiejn
guidxaa, aguläjz rudeedreni xtiejn guidxaa, saꞌcsi che
gubicaj xtojḻreni, diru xcäriejnreni gumbee dojḻ.
\v 3 Niluxh yäḻrejt man näj yäḻrudeedreni rejn casob
ijz rusnajtisreni lajzreni xcuent dojḻ.
\v 4 Saꞌcsi digacdi gudzucajpac regon näjza xtiejn redxib
xtojḻ bejṉ.
\p
\v 5 Niꞌcni che biääd Jesucrist lo guedxliuj räjpni
lo Dios:
\q Di rlajzlu xtiejn guidxaa niclaza regon niluxh abejnlu
gacä nigui-guedxliuj.
\q
\v 6 Dilu nichaglajz yäḻrejc xten guidxaa niclaza yäḻrudeed
rejn, niclaza gojn ni rudeed rebejṉ te gusiani xtojḻreni.
\q
\v 7 Dxejc räpä: “Narä basiälä te gunä siꞌcni rlajzlu
Dad, Dios, (siꞌcni caj neṉ reguijtz xcuent ni sacä).”
\p
\v 8 Che gulujx gunii Jesucrist diidxga: “Di rlajzlu,
dizalu guidxaglajz xcäḻrejt guidxaa näjza regon niclaza
xcäḻrejc guidxaa, niclaza yäḻrudeed rejn xcuent xtojḻ
bejṉ siꞌcni caj lo leii gun bejṉ.”
\v 9 Dxejcti räjpni: “Narä siälä, te gunä siꞌcpac ni
rlajzlu, Dad Dios.” Dxejc badzucaj Jesucrist nani gujc
galoo, te guläxtiejni didxcoob ni biaꞌn Dios loonu ṉaj.
\v 10 Abasia Dios lastoonu saꞌcsi bejn Jesucrist siꞌc
rlajz Dios cheni baxheꞌni xtiejnni lo crujz tejtis huält
par tejpas.
\p
\v 11 Guiraa rexpixhojz Israel rujnreni dzuun guixe-guixee
te rudeedreni lagajctis guidxaa, näjza xtiejn reman, guiraa
siꞌctis ni caj lo leii, niluxh reniꞌc digacdi gudzucaj
dojḻ.
\v 12 Niluxh Jesucrist tejtis huält baxheꞌ xtiejnni
lo crujz te badzucajni xtojḻ rebejṉ par tejpas. N̲aj
agurejni xladbee Dios cadro rnibeeni.
\v 13 Roꞌc cabäjzni guiraa ni rdxeꞌch lojni te cuereni
ladzniꞌni.
\v 14 Niꞌcni tejtis huält cuajni lo crujz te basiani
par tejpas guiraa renani ahuililajz xtiidxni.
\v 15 Sigajcza rnii Sprit Dxan xten Dios loonu; najni:
\q
\v 16 Diidx nani jiannää́reni neṉ redxejre gac scree,
\q naj Dad Dios: sucuaä rextidxä lo xcäriejnreni,
\q susäḻäza xtidxä neṉ lastooreni.
\m Dxejcti räjpni:
\q
\v 17 Diru lazä guizaj rextojḻreni nicla rextoḻguijdxreni.
\m
\v 18 Niꞌcni, cheni abia xtojḻ bejṉ, diru quiquiin gudeedreni
guidxaa te jia rextojḻreni.
\s Nanab guibignu lo Dios
\p
\v 19 Niꞌcni resaꞌnu, naꞌc guidxejbtu, sajc jiuꞌnu yudxanduxh
cadro bixeꞌ xtiejn Dad Jesucrist nani abadeedni lo Dios.
\v 20 N̲aj yuꞌ te nezyuj, nezsiucoob, nezyuj xten xcäḻnabaṉcoobnu
ni baxhalni che badzucajni ladroga. Niꞌc säloj cheni
biuꞌni neṉ yudxanduxh, badeedni lagajc xtiejnni lo Dios.
\v 21 Jesucrist najc xpixhojzronu nani rnibee rexpejṉ
Dios.
\v 22 Niꞌcni doꞌo guibigrunu lo Dios guideb lastosaꞌcnu,
naꞌc guidxejbdinu, naꞌcza guitujydinu. Con yäḻrililajzpac
abia lastoonu xcuent rexhigabguijdx, abidiibza tiejxhnu
lo nis-ya.
\v 23 Doꞌo chanuu sudzuꞌtznu lo xtiidxni nani huililajznu,
naꞌc guchaanu xhigabnu saꞌcsi susoob Dios diidx ni biaꞌnni
loonu.
\v 24 N̲aj doꞌo guihuii xho jiennu te gacnäj saꞌnu te
siꞌc chonälajznu saꞌnu nägajcza te jiennu ganax dzunsaꞌc.
\v 25 Naꞌc jiennu siꞌc rujn rebejṉ nani diru jiääd che
rdxagsaꞌnu. Nanab guiliidxnu resaꞌnu saꞌcsi ṉaj asiäddzuṉgajxh
dxej ni guibiꞌ Dad Jesucrist.
\p
\v 26 Palga chanuu jienrunu dojḻ, niluxh abiejn diajgnu
xtidx Jesucrist, diru gacdi guibicaj xtojḻnu dxejc.
\v 27 Dxejcsii guidxeebtisnu guilääznu yäḻguxhtisduxh
xten Dios näj guiboo ni guzeꞌc renani rdxeꞌch loj Dios.
\v 28 Cheni guyuꞌ chu tej ni di niujn siꞌc caj lo xleii
Moisés, niluxh bidxaag xtidx tioꞌp o choṉ ni nancheepac,
räjpreni dini nusoob leii, gujt bejṉga, rut balaslajzdini.
\v 29 Maazru yäḻrusacsíduxh nanab ted renani ruläj yejc
Xiꞌn Dios cheni direni gusobdiajg xtiidxni. Alga ruṟoꞌnreni
xtiejnni ni baxheꞌni lo crujz te basianini. Rusanxtujyzani
Sprit Dxan xten Dios nani badeed didxcoob lojni.
\v 30 Anancheenu gunii Dios: “Narä susquixä bejṉ; loä
siguijx bejṉ”, räjp Dios. Stehuält guniini: “Dad sujn
yäḻguxhtis rexpejṉni.”
\v 31 ¡Cosduxh gac bejṉ ni jiajb ladzṉaa Dios nani nabajṉ
par tejpas!
\p
\v 32 Niluxh coḻsnaj lajztu xho gujctu galoo; cheni
entis cuaꞌtu xtidx Dios, xho batip lajztu, gudejdtu trabajw
saꞌcsi cuaꞌtu xtidx Dios.
\v 33 Guyuꞌ resaꞌtu gudéreni lojni, yuꞌ reni basacsí
laꞌtu nez loj rebejṉ. Guyuꞌza huält astoo gudejdzatu
trabajw saꞌcsi cahuiitu rebejṉ nani basacsíreni, cadejdzareni
trabajw.
\v 34 Laꞌtu banaj lajztu renani yuꞌ latzguiib, guideb
yäḻrbalajz batip lajztu che cuaꞌreni guiraa xhixtentu,
saꞌcsi gucbeetu xhaguibaa rajptu reyäḻnasaꞌc ni sajcru,
niluxh yuꞌni par tejpas.
\v 35 Naꞌc gunijttu xcäḻrililajz xtidx Jesucrist, saꞌcsi
yäḻrililajzga gun xcaꞌtu yäḻnabajṉ par tejpas.
\v 36 Laꞌtu nanab cuedxitu te che abejntu ni rlajz Dios,
dxejc xcaꞌtu nani aguniini guniidxni.
\v 37 Saꞌcsi xtidx Dios ni biaꞌn rnii:
\q Asiäddzuṉgajxhpac dxej ni jiäädni,
\q asiäddzuṉgajxhpac dxej ni jiääd nani siääd, dipacni
gaclaa.
\q
\v 38 Renani nabaṉsaꞌc sibaṉnäj yäḻrililajz,
\q niluxh palga yuꞌ chutej ni guidxejb chalilajz,
\q diniꞌc gun guibaa lazä.
\m
\v 39 Niluxh nuure dinu gac siꞌc reni rusaan yäḻrililajz
te nitreni loj dojḻ. Nuure najcnu renani rililajz xtidx
Jesucrist te ḻaa xaimnu par tejpas.
\c 11
\s Yäḻrililajz
\p
\v 1 ¿Xhiniꞌc najc yäḻrililajz? Yäḻrililajz säloj cabääznu sajcpac tejni gajd gac, yuꞌpacza ni mase dinu fiini, najcni siꞌcni abahuiinuni.
\v 2 Dios huinälajz retoxtadgoldoonu saꞌcsi huililajzreni xtiidxni.
\p
\v 3 Saꞌcsi rililajznu, najnnu benchee Dios reguedxliuj, bencheeni guibaa, bencheezani guiraa nani rhuiinu. Con xtiidxtisni bencheeni nani dinu guihuii.
\p
\v 4 Gojpza toAbel yäḻrililajz badzubyaalni rexquidxaani lo Dios. Yäḻrbijbyaal xtenni sajcru loj yäḻrbibyaal xten toCaín. Niꞌcni gunii Dios najc toAbel beṉsaꞌc. N̲aj mase agujt Abel, sanuutis racbeenu xcuent yäḻrililajz ni gojpni.
\p
\v 5 Sigajcza gojp Enoc yäḻrililajz, niꞌc sinä Dios Enoc xhaguibaa, guideb nabajṉni, te naꞌc niejtni. Diru rebejṉ nidxälni saꞌcsi asinä Diosni xhaguibaa. Luxh räjp Dios xcuentni che gajd Dios jinäni, gubaṉsaꞌcni, baspaani lajz Dios.
\v 6 Rut chu tejdi sajc guspaa lajz Dios palga dini chalilajz, saꞌcsi che guibigni lojni, nanab chalilajzni yuꞌ Dios, chalilajzzani sudeed Dios xcäḻnasaꞌcni loj renani rguiilni, nalajznu renani rlajz gumbeepac Dios.
\p
\v 7 Gojpza toNoé yäḻrililajz. Che räjp Dios lojni siajbpac nisguij ni gajdreni fii, huililajzni. Bejnni siꞌc ni räjp Dios. Bidxejbni saꞌcsi najni rusoob Dios xtiidxni, niꞌc bencheeni te canuduxh te di niejt rexiꞌnni. Saꞌcsi gojpni yäḻrililajzga, bejnni gubibde rebejṉ guedxliuj, gunijtreni saꞌcsi direni nililajz xtiidxni. Dxejcti cuaꞌni yäḻnabaṉsaꞌc ni siääd xcuent yäḻrililajz.
\p
\v 8 Saꞌcsi gojp toAbram yäḻrililajz, basoobni xtidx Dios che gurejdx Diosni, biriini lajdxni te huijni cadro gudeed Dios yuj lojni te cuääzni roꞌc. Biriini lajdxni, mase dini gan caro chääni.
\v 9 Gojp toAbram yäḻrililajz, niꞌc huiläjzni siꞌc beṉzijt loj reyuj ni räjp Dios gudeedni lojreni. Roꞌc guläjzreni siꞌc lajdx beṉzijt. Guläjzni neṉ reyuguijd, sigajcza bejn toIsaac näjza toJacoob, saꞌcsi näjza lojreni räjp Dios gudeedni yujga.
\v 10 Niluxh toAbram cayunloj te guejdx nani sudzuꞌtz, te guejdx nani cuäxtiej Dios, nani gunchee lagajc Dios.
\p
\v 11 Sigajcza gojp toSara yäḻrililajz te mase anajcni beṉgool niluxh agudejd chu xiꞌnni, cuaꞌni yäḻrnibee xten Dios te gujcni nan, guyuꞌ te xiꞌnni, saꞌcsi huililajzni susoob Dios xtiidxni.
\v 12 Niꞌcni mase siäddzuṉgajxh dxej ni guet toAbram, guyuꞌ xhidalduxh xajgni. Siꞌc rebalxhaguibaa näj siꞌc reguibäzluleꞌ xten yujxh ni treꞌ roꞌ nisdoo, siꞌc najcreni xhidalduxh, nicla gac guigabreni.
\p
\v 13 Guiraa rebejṉre gujt, direni nicaꞌ yuj nani räjp Dios gudeedni lojreni; niluxh saꞌcsi rajpreni yäḻrililajz, bahuiireni lo yujga zitro, niꞌc bibalajzreni, saꞌcsi anajreni najcreni beṉzijt, cansajsireni lo guedxliuj.
\v 14 Reni rnii siꞌc, rniliireni caguilsijcreni cadro gac lajdxreni.
\v 15 Paru niujnreni xhigab lajdxreni najc guejdx cadro biriireni, pet niajc nibisacreni roꞌc.
\v 16 Niluxh laareni rlajzreni te lajdxreni ni sajcru, nalajznu lajdx Dios xhaguibaa, niꞌc rguiilreni. Niꞌcni di Dios guitujy gäbreni najcni Dios xtenreni, luxh alabencheeni guejdx cadro cuääzreni xhaguibaa.
\p
\v 17 Gojpza toAbram yäḻrililajz niꞌcni cheni bateed Diosni preeb, räjpni loj Abram gudeedni Isaac lojni lacuaa gudeedni xhiil, cuäjbni guguꞌtni xiꞌnni lacuaa xhiil, luxh Dios ni najc tejtis aräjp lojni galooli:
\v 18 “Isaac guniidx chu xhidajl xajglu, xagdoolu.”
\v 19 Saꞌcsi nanchee toAbram rajp Dios yäḻrnibee te guspajṉni rebeṉgut. Luxh siꞌcza cuasacni xiꞌnni, ascanu loj rebeṉgut cuasacni xiꞌnni.
\p
\v 20 Näjza toIsaac gojp yäḻrililajz benleꞌni toJacoob näjza toEsaú, räjpni xhiniꞌc gun tejgareni.
\v 21 Gojpza toJacoob yäḻrililajz, che agojl guetni, benleꞌni guiroꞌp rexiꞌn toJosé. Dxejcti huistieni guzucajni yejc bastoṉ xtenni te siꞌc gojṉni Dios.
\v 22 ToJosé gojp yäḻrililajz. Che agojl guetni, räjpni sirii rexpejṉ Israel lajdx Egipto, gunibeezani xho gunnäjreni xtzujtni.
\p
\v 23 Gojp rexcuzajn Moisés yäḻrililajz, niꞌc cheni gojḻ Moisés, bacuaꞌtzrenini choṉ bäii, saꞌcsi bahuiireni bäzdaanni. Direni niu xtidx ṟeii ni gunibeeni, räjpni juꞌtreni bäz niguii.
\v 24 ToMoisés gojp yäḻrililajz, niꞌcni che aguroobni di rlajzni nirilajni xiꞌn xindxaꞌp ṟeii xten Egipto.
\v 25 Bejnni xhigab tednäjni trabajw rexpejṉ Dios lacuaa niujnni redzuun ni rchaglajz rujn rebeṉ Egipto, saꞌcsi najc reniꞌc dojḻ, luxh teraꞌtsi ruspaareni lajz bejṉ.
\v 26 Par laani maazru sajc tedni lagajc trabajw ni gudejd Jesucrist lacuaa niajpni reyäḻnasaꞌc xten Egipto saꞌcsi laani cabäjztisni reyäḻnasaꞌc nani churu gudeed Dios lojni.
\v 27 Gojp toMoisés yäḻrililajz biriini lajdx reEgipto, dini nidxejb yäḻrdxeꞌch xten ṟeii, huinuutis gusudzuꞌtzni siꞌcni najc xhigabni, ruhuiini loj nani di guzeṉ, nalajznu Dios.
\p
\v 28 Gojp Moisés yäḻrililajz bejnni lanij xten pascw. Gunibeeni baroobreni rejn roꞌ xpuert rexpejṉ Israel te che ted angl xten yäḻgujt nicla te xingan galoo xten rexpejṉ Israel di guet.
\v 29 Gojp rexpejṉ Israel yäḻrililajz gudejdreni galäii nisdoo ni laa nisdoxniaa luxh asdoo loj yubijdz rsiajreni siꞌc gudejdreni. Niluxh che rlajz rebejṉ Egipto nidejd, gubiꞌ nis, dxejc guloꞌreni neṉ nis.
\p
\v 30 Xcuent yäḻrililajz gurebäꞌn paderguij xten guedx Jericó, cheni basaꞌ gajdz dxej caded huält rexpejṉ Israel guejdxga.
\v 31 ToRahab, te gunaguijdx, gojpzani yäḻrililajz niꞌc dini niejt che gujt renani di nuzobdiidx, saꞌcsi laani bacuaꞌtzni gaii bejṉ nani sagulaꞌtz xho najc guejdxga.
\p
\v 32 ¿Xhiruxh guiniä? Di gaḻdi guiniä xcuent toGedeón, xcuent toBarac, xcuent toSansón, xcuent toJefté, xcuent toDavid, xcuent toSamuel, näjza xcuent retoprofeꞌt.
\v 33 Guiraareni gojp yäḻrililajz niꞌc bejnreni gaan xhidajl reguejdx, bensaꞌcreni yäḻguxhtis, cuaꞌreni xcäḻracnäj Dios ni biaꞌn diidx xcaꞌreni, basäureni roꞌ rebeedz.
\v 34 Guyuꞌreni neṉ te balduxh luxh xhet gujcdireni, gojl baxuṉreni te di niejtreni con espaad. Reni gujc beṉrdxajg, guzutzuꞌtzreni gujcreni nadipduxh, gujcreni beṉduxh lo gueṟ, barilaagwreni resoldaad xten reni rdxeꞌch lojreni.
\v 35 Guyuꞌ regunaa ni cuasac rextogoolreni, gubaṉsacreni lo rebeṉgut.
\p Sgaiireni gujt xcuent yäḻrusacsí lacuaa nicäjbreni nusiech lajzreni te nusḻaa bejṉreni saꞌcsi rlajzreni xcaꞌreni stee yäḻnabajṉ ni sajcru.
\v 36 Sgaiireni gudejd trabajw guniyaj bejṉreni, gudinnäj bejṉreni chiir, cuaduuzareni cadeṉ, guyuꞌzareni latzguiib.
\v 37 Guyuꞌza reni gujt che bacuaa bejṉ guij yejcreni o che gujcreni tioꞌp laꞌ con sieṟ. Guyuꞌza reni basacsí bejṉ te guṟoꞌnreni yäḻrililajz. Guyuꞌza reni gujt con spaad. Guyuꞌ reni cuanzaj nezree nezrec, gojtreni guid-xiil näjza guid-dxib, saꞌcsi xhet rajpdireni luxh entis rdejdreni trabajw rusacsí bejṉreni.
\v 38 Saꞌ rebejṉga di nungäjḻ rebeṉ guedxliuj niääd rebejṉga lojreni. Cuanzaj rebejṉga nez lo reyubijdz cad xhet yuꞌdi xhi gaureni nicla nis te yäreni; cuanzajreni nez neṉ redajn, nez neṉ rebiliää näj nez neṉ guedduxh ni yuꞌ neṉ yuj.
\v 39 Guiraa rebejṉga gojp yäḻrililajz, luxh niꞌcni huäꞌp xpalaꞌnreni, niluxh direni nicaꞌ ni biaꞌn diidx gudeed Dios lojreni,
\v 40 saꞌcsi bejn Dios xhigab gunni te dzunsaꞌc lojreni. Bejn Dios xhigab guniidxni yälnasaꞌc loonu, ṉaj tejsi guicaꞌnu con laareni nani biaꞌn diidx guniidx Dios.
\c 12
\s Guihuiitisnu lo Jesucrist
\p
\v 1 Niꞌc najcni siꞌcni sugaꞌnu galäii guiraa rebejṉre
luxh cahuiireni xcäḻrililaaznu. Niꞌc doꞌo guisaꞌn te
laad guiraa reni rusäu lo xnejznu, näjza redojḻ ni ruxhiid
nuure lo xcäḻnabajṉnu, te di jieednu chosaanu nez lo
nezyuj ni sasanäänu nez cadro chonnu.
\v 2 Doꞌo guihuidzuꞌtz nez loj Dad Jesucrist nani guläxtiej,
nani guluuxza xcäḻrililajznu. Jesucrist gudejd trabajw
lo crujz, dini nitujy gujtni lo saꞌ yäḻgujtga, saꞌcsi
najnni cheni agudejdni trabajw, sicaꞌni yäḻrbalajz; ṉaj
agurejni xladbee Dios cadro rnibeeni.
\p
\v 3 Coḻyujn xhigab laꞌtu xho gudejd Jesucrist ladzṉaa
rebeṉ dojḻ, te naꞌc guidxajgtu, naꞌcza jieedtu laḻ ni
cabäjztuni.
\v 4 Laꞌtu gajd xtiejntu guixeꞌ lo yäḻrucuanäj dojḻ.
\v 5 ¿La abiäḻ lajztu xho balijdx Dios laꞌtu siꞌc xiꞌnni,
ä? Scree caj xtiidxni lo reguijtz; räjpni:
\q Xinä, naꞌc cuälazlu xcäḻnaj Dad niclaza jieedlu che
tiḻnäjni luj.
\q
\v 6 Saꞌcsi siꞌc runnaj Dad renani sanälajzni,
\q rujnni riaa guiraa renani rcaꞌni siꞌc xiꞌnni.
\m
\v 7 Palga gatijp lajzlu lo xcäḻnaj Dios, sicaꞌni luj
siꞌc xiꞌnni, saꞌcsi ¿chu dad di gunnaj xiꞌnni?
\v 8 Niluxh palga di Dios gunnaj laꞌtu siꞌcni runnajni
guiraa rexiꞌnni, ditu gac xiꞌnpacni, najctu xiꞌn redoḻguijdx.
\v 9 Anajntu cheni gucnu biuux lo guedxliujre, bennaj
xtadnu nuure te rsoobnu xtiidxni, te runsaꞌczanu siꞌcni
rlajzni. ¿Xhicuent dinu cuadiajg xtidx xtadnu ni yuꞌ
xhaguibaa te siꞌc jiaꞌpnu yäḻnabajṉ, ä?
\v 10 Xtadnu lo guedxliujre bennajreni nuure tioꞌp-choṉ
dxej, te gac gusoobnu xtiidxni. Niluxh siꞌc runnaj Dios
nuure te jiaꞌpnu te yäḻnabaṉya, te gac nayazanu sigajc
najcni laani.
\v 11 Guliini xhet xhi yäḻnajdi ni rchalonu najc laaca
che rsiajcnuni, racnaj tiejxhnu niluxh riaꞌnnu et laadi.
Niluxh guiraa renani agudejd loj yäḻnajga rusoob xtiidxni,
rcaꞌreni te yäḻnabaṉya ni rbecdxilajzreni.
\s Riez guzeꞌni xtidx Dios
\p
\v 12 Niꞌcni coḻsudzuꞌtz reṉaatu ni abadxajg, coḻsudzuꞌtz
yecxhijbtu ni abadxajg,
\v 13 te coḻquiil nezyuj xten xtidx Jesucrist te sudzuꞌtz
niꞌtu. Naꞌc guibicajtu lo xnezyujni.
\p
\v 14 Coḻquiil xho cuedxinäjtu guiraa rebejṉ. Coḻchanä
te yäḻnabaṉya, saꞌcsi renani di guibaṉyadi, digacdi fiireni
loj Dad Jesucrist.
\v 15 Coḻhuisaꞌc te di gunijt chutejtu lo xcäḻracnäj
Dios, coḻnatiro gac chu tejtu siꞌc te cuanlaa ni rujn
daan, saꞌcsi saꞌ bejṉga suxhiṉni guiraa renani ahuililajz.
\v 16 Nicla tejtu naꞌc gaꞌp stee gunaa te laad, nungäjḻ
cuäznäjni chäältisni. Naꞌcza gactu bejṉ ni di jiu xtidx
Dios, siꞌc gujc toEsaú cheni batoꞌni xcäḻnasaꞌcni ni
najc xtenni saꞌcsi najcni xingan galoo xtadni. Batoꞌnini
te cuaꞌni yäḻrajwtis.
\v 17 Anajntu, cheni rlajzni niunleꞌ xtadnini te nicaꞌni
ni najc xten xingangalooni, dini nicaꞌni mase guc-huin
lajzni, binduxhni. Dxejcti diru niajcdi nicaꞌnini.
\p
\v 18 Coḻnatiro, saꞌcsi laꞌtu diꞌtu nibig lo te dajn
cadro rajc rsiaj bejṉ, te dajn ni galoo cayecduxh guiboo,
cadro nacäjy, nacäiboo, cayajcza bedonduxh.
\v 19 Diza diajgtu niejn xseꞌ trompet, xseꞌ Dios siꞌc
biendiajg rexpejṉ Israel agujc xchero. Luxh che biejn
diajgreni rediidxga, direni nutiplajz, gunabduxhreni naꞌcru
guiniini lojreni.
\v 20 (Saꞌcsi direni nutiplajz diidx ni caniini, räjpni:
“Palga ted te mantis guläj xhuj dajnga, coḻjuꞌtni con
guij.”)
\v 21 Te yäḻnadxebduxh najc nani guzeṉ roꞌc, lagajc toMoisés
räjp: “Cayacditä yäḻrdxejb.”
\p
\v 22 Niluxh laꞌtu agubigtu lo dajn xten Sión, cad najc
lajdx Dios ni nabajṉpac, nalajznu guedx Jerusalén ni
yuꞌ xhaguibaa cadro yuꞌ xhidalduxh xangl Dios,
\v 23 cadro reꞌ reni caläꞌp xpalaꞌn Dios. Roꞌc reꞌza
reni najc xiꞌn Dios, renani acaj lajni xhaguibaa. Agubigzatu
lo Diospac, ni najc Juejz xten guiraanu, näjza loj resprit
xten rebejṉ nani abasia Dios te anajcreni beṉnasaꞌc.
\v 24 Agubigzanu loj Jesucrist nani sugaꞌ galäii nez
loj Dios näj beṉguedxliuj xcuent didxcoob ni biaꞌn Dios,
näjza lo xtiejn Jesucrist ni badeedni lo Dios xcuent
nuure. Jesucrist rniab jiäjḻ lajz Dios, luxh niꞌc sajcru
loj nani rniab xtiejn toAbel. Xtiejn toAbel rniab quiix
nani baguꞌtni.
\p
\v 25 Niꞌc coḻnatiro te di cuälaztu nani canii lojtu
rextiidxni. Palga di rebejṉ nidedbia saꞌcsi gulälaz
nani baluii bejṉ ni siääd guedxliujre, ¿xho jiennu tedbianu
palga guilälaznu nani ruluii nani siääd xhaguibaali?
\v 26 Xseꞌ Dios basniib guedxliuj galooli, niluxh ṉaj
rnisacni: “Ste huält susnibä xhet ganaxdi guedxliuj,
susnibä näjza xhaguibaa.”
\v 27 Che gunii “ste huält”, niꞌc säloj guibicaj renani
benchee Dios ni rac rniib, te jiaꞌn renani digacdi guiniib.
\v 28 Luxh saꞌcsi lajdxnu ni guniidx Dios digacdi guiniibni,
doꞌo guideed xquixtios lo Dios xcuentni, te siꞌc chunu
loj Dios, chonälaaznuni guideb yäḻrdxejb näjza yäḻnadolajz,
\v 29 saꞌcsi Xtiosnu najc siꞌc te balduxh ni ruseꞌc,
ni runitlojza.
\c 13
\s Xho guspaa bejṉ lajz Dios
\p
\v 1 Coḻchanuu lo yäḻrinälajz saꞌni.
\v 2 Di gusaantu gudeedtu rolijztu guidzujṉ biooz, saꞌcsi
loj reni bejn siꞌc, yuꞌreni badeed rolijzreni bidzujṉ
xangl Dios rolijzreni, niluxh direni niacbee chu najcreni.
\p
\v 3 Coḻsnaj lajztu reni yuꞌ neṉ latzguiib, ascanu la
laꞌtu ni yunäreni latzguiib. Coḻsnajza lajztu renani
basacsí bejṉ, ascanu la laꞌtu ni cagusacsíreni saꞌcsi
näjza laꞌtu najctu beṉguedxliuj siꞌc najcreni.
\p
\v 4 Coḻgaꞌp xpalaꞌn yäḻguchṉaa te guibaṉ-nayatu con
chäältu saꞌcsi sujn Dios yäḻguxhtis rebejṉ ni resnäj
chääl bejṉ näjza reni rusguee rebeṉxteb.
\p
\v 5 Naꞌc chanälajztu meel, coḻguibalaznäj ni rajptu,
saꞌcsi Dios agunii: “Dipacna gusanälu, dizana cuälazälu.”
\v 6 Niꞌc dinu guidxeeb guiniinu:
\q Dad ni yuꞌ xhaguibaa najc ni rcanäj narä;
\q dina guidxebä xhitis ni gunnäj bejṉ narä.
\p
\v 7 Coḻsnaj lajztu renani baluii guibaṉsaꞌctu, ni basuleꞌza
xtidx Dios lojtu; coḻhuii xho nabajṉreni te sigajcza
coḻchanä xcäḻrililajzreni.
\p
\v 8 Sigajc gujc Jesucrist naii, sigajcza najcni nadxej,
sigajcza sajcni par tejpas.
\v 9 Naꞌc gusaantu gusiejchreni lajztu xcuent steꞌca
yäḻruluii ni digac siꞌc najc xtidx Jesucrist. Sacduxh
sudzuꞌtz lastoonu lo yäḻracnäj ni ruluii xtidx Dios,
xhet lojdi yäḻrajwtis. Xhet sajcdi rebejṉ nani rujntis
xhigab xcuent yäḻrajw.
\p
\v 10 Nuurnu rajpnu garenca piään, roꞌc digacdi xcaꞌ
rebixhojz xhi gaureni siꞌc ni cuaꞌreni neṉ guidoguijd
galoo.
\v 11 Saꞌcsi xpixhojzro xpejṉ Israel rinä xtiejn reman
neṉ yuꞌ ni laa dxanduxh te biäu lo dojḻ xten rebejṉ,
niluxh rizeꞌcreni xpääl remanga te laad, dejtz guejdxga.
\v 12 Siꞌcza gujt Jesucrist te laad, dejtz guejdx, te
basiani xtojḻ rebejṉ xcuent lagajc xtiejnni.
\v 13 N̲aj coḻchoꞌ chonnu loj Jesucrist te laad dejtz
guejdx te guideednu trabajw näjza yäḻxtujy siꞌcni gudejd
Jesucrist.
\v 14 Saꞌcsi lo guedxliujre dxunlaasinu, niluxh caguiilnu
laadxnu ni chu jiäädru, te roꞌc guidxunnu par tejpas.
\v 15 Guideb xcäḻracnäj Jesucrist doꞌo guideedtisnu
xquixtios lo Dios siꞌc te gojn ni gudeednu lojni, guiliäꞌpnu
xpalaꞌnni näj jieḻnu redij.
\v 16 Naꞌcza jiäḻlajztu guntu huen, gacnäj saꞌtu, saꞌcsi
reniꞌcni najc redzuun ni rdxaglajz Dios.
\p
\v 17 Coḻcuadiajg xtidx reni rnibee laꞌtu, saꞌcsi laareni
rcanäjreni lastoonu, siꞌcza laareni sudeedreni cuent
lo Dios. Coḻyujn guibalajzreni gunreni xtzuunreni, naꞌc
gac-huin lajzreni saꞌcsi palga gac-huin lajzreni, xhet
sajcdini par laꞌtu.
\p
\v 18 Coḻnab lo Dios xcuent nuunu, saꞌcsi racbeenu naya
xcäriejnnu, rlaaznu laaca jiennu guiraꞌti dzuun.
\v 19 Rniä lojtu, guiniabrutu loj Dios, te gun Dios jiojb
guibiꞌä jiäḻä lojtu.
\s Te didxleꞌ näj lult xtixtios
\p
\v 20 Dios xten yäḻrbedxilajz ni baspajṉ Dad Jesucrist
lo rebeṉgut, Jesucrist najc baxtorduxh xten rexiil xcuent
rejn ni bejn gusojb didxcoob xtenni ni najc par tejpas.
\v 21 Dios gun gactu beṉsaꞌc, beṉdxojn loj xhitis te
guntu ni rlajzni, näj gunni loj guiraa nuure siꞌc ni
rlajzni xcuent Jesucrist. ¡Coḻspaa lajz Jesucrist par
tejpas! ¡Sugacni siꞌc!
\p
\v 22 Resaꞌnu, rniabä lojtu, coḻcuecdxi lajztu, coḻcuadiajg
rediidx ni rulijdxre, saꞌcsi riojbga cacuaä te labäz
guijtzre lojtu.
\v 23 Coḻyacbee abirii bejtznu Timoteu latzguiib. Palga
guidzuṉgajni ree, siädnää́ni jiädhuiä laꞌtu.
\p
\v 24 Coḻgudeed xtixtios loj guiraa renani ruluii laꞌtu
näj loj guiraa rebejtznu ni rililajz. Rebeṉ Italia ruxhaḻ
xtixtios lojtu.
\p
\v 25 Gacnäj Dios guiraatu. Sugacni siꞌc.