\id JAS
\h Santiago
\toc1 Santiago
\mt Guijtz Nani Bacuaa Santiaag
\c 1
\s Santiaag rucuaa guijtz loj renani nareꞌch lo guedxliuj
\p
\v 1 Narä Santiaag, xmos Dios näjza xten Dad Jesucrist,
ruxhaḻä xtixtios loj guitzubitioꞌp cuaa rexpejṉ Israel
ni nareꞌch lo guedxliujre.
\s Yäḻnajn nani runiidx Dios loonu
\p
\v 2 Rebetzä lo xtidx Dios, coḻguibalazduxhtis che rsiajctu
recos nani ruquiiltu cuälaztu xnezyuj Dios,
\v 3 saꞌcsi che rsiajctu reniꞌc, rsiajctureni te don
la guliipac ahuililajztu xtidx Dios, dxejc rsieedrutu
yäḻrbecdxi lajz.
\v 4 Dxejcti yäḻrbecdxilajz sajc gunni xtzuunni neṉ
lastootu, te gactu beṉsaꞌc, bejṉ ni aguyajl lo xtidx Dios,
nani xhet cayäädxdi xcäḻnajnni.
\p
\v 5 Palga yuꞌ tejtu ni cayäädx xcäḻnajnni, suguiniabnini
lo Dios, saꞌcsi Dios rudeedduxhni yäḻnajn loj guiraꞌti
bejṉ, luxh dini guinii didxlaa lojni. Palga guiniab bejṉni,
sudeedza Diosni.
\v 6 Niluxh che guiniabni, suchalilajzpacni, naꞌc guntioꞌp
lajzni, saꞌcsi bejṉ ni runtioꞌp lajzni najc siꞌc bäj
ni sanä bej, nezree-nezreꞌc sääbni.
\v 7 Nani najc siꞌc, naꞌc gunni xhigab yuꞌ xhi xcaꞌni
lo Dad Jesucrist.
\v 8 Saꞌcsi nani runtioꞌp lajzni, lo guiraa ni rujnni
nadxej rujnni tej xhigab, guixee rujnni xteꞌca xhigab,
di gacdi chanuuni tejsi xhigab.
\p
\v 9 Te saꞌnu ni najc nadolajz, suguibalajzni saꞌcsi
najcni beṉro saꞌcsi guläs Diosni,
\v 10 sigajcza bejtznu ni yuꞌ xhixtenni, suguibalajzni
saꞌcsi abaluii Dios lojni najcni bejṉ ni xhet sajcdini,
saꞌcsi nägajc laani sinitlojni siꞌc rnitloj reguii ni
yuꞌ lo cuaan ni yuꞌ loniaa.
\v 11 Saꞌcsi che rliejn gubijdz näjza te belaa, li rgoḻ
recuaanga, li riuii reguii ni caj lojni, dxejc rtejbreni,
dxejcti agunijt xcäḻsacruni. Siꞌcza sinitloj te bejṉ
ni yuduxh xhixtenni laḻ ni yuꞌni lo xnezyujni.
\s Xhi xcaꞌni che tedni trabajw
\p
\v 12 Chicbaa niguii ni rsiudzuꞌtz laḻ ni cadejdni trabajw,
saꞌcsi che agunii Dios didxsaꞌc xcuent nani bejnni sicaꞌni
coroṉ xten yäḻnabajṉ par tejpas ni biaꞌn Dios diidx
gudeedni loj rebejṉ ni sanälajz Dios.
\v 13 Che gunijt tejtu, rujntu dojḻ, naꞌc gäbtu: “Dios
bejn banitä”, saꞌcsi di gacdi quiquiil Dios te gunni
cosguijdx, digacdi gunijt Dios, luxh sigajcza di gacdi
gun Dios gunijt te bejṉ, gunni dojḻ.
\v 14 Niluxh tejgatu runijt che rcäjy xcäriejntu saꞌcsi
riajb yejctu guntu cosguijdx.
\v 15 Che riajb yejctu guntu cosguijdx, runijttu rujntu
dojḻ, luxh dojḻ che abejntuni, riädnäni yäḻgujt.
\p
\v 16 Saꞌä ni sanälazä, naꞌc gusaantu gusgueereni laꞌtu.
\v 17 Guiraa recoshueen, guiraa recossaꞌc xhaguibaali
siäädreni loonu; Dios ruxhaḻreni, lagajc Dios ni benchee
rebajl xhaguibaa, Dios nani di guchaa, sigajctis najcni.
\v 18 Lagajc xcuentni bejn Dios gacnu xpejṉni saꞌcsi
huililajznu xtidxliipacni, te gacnu rebeṉ galoo loj rexpejṉni.
\s Xho nanab jiennu
\p
\v 19 Acanajntu recosre, saꞌä ni sanälazä. Niluxh tejgatu
nanab gusquejṉni te gucuadiajgni, per gaclaani te guiniini,
gaclaazani te guidxeꞌchni,
\v 20 saꞌcsi xcäḻrdxeꞌch bejṉ dini gun xcäḻnasaꞌc Dios.
\v 21 Niꞌcni coḻcuälaz guiraa recosguijdx, guiraa recoslatsiaj
ni riaꞌn. Guideb yäḻnadolajz coḻchalilajz xtidx Dios
ni basuleꞌnu, ni yuꞌpac lastootu, saꞌcsi niꞌc najc ni
sajc gusḻaa xaimtu lo dojḻ.
\p
\v 22 Niluxh baluii lo guiraꞌti bejṉ najctu bejṉ ni
rusoobpactu xtidx Dios, xhet bejṉdi ni rucuadiajgtis
xtiidxni, ni rusgueeni lagajc laani.
\v 23 Saꞌcsi palga najc te bejṉ te nani rucuadiajgtis
xtidx Dios, niluxh dini gusoob diidxga, najcni siꞌc te
bejṉ ni ruhuii lojni loj te guihuajn.
\v 24 Saꞌcsi che ruhuiini xho najcni, sägajcni, riaḻlazgajcni
xho najcni.
\v 25 Niluxh nani ruhuidzuꞌtz lo leisaꞌc, nalajznu leii
nani rusḻaa bejṉ, luxh rusobpacni leiiga, nani lacuaa
jiaḻlajzni nani riejn diajgni, rujnpacni ni caj lo leiiga,
bejṉga najc ni sajp yäḻrbalajzpac lo xhitis ni rujnni.
\p
\v 26 Palga yuꞌ tejtu ni rujn xhigab najcni te bejṉ
ni raṉduxh Dios, niluxh di gacdi gusäuni roꞌni, guiraloj
rniini, bejṉga rusguee lagajc laani, luxh xhet sajcdi
yäḻrajṉ Dios xtenni.
\v 27 Yäḻrajṉ Dios ni najc guliipac, ni xhet nuꞌchdi
lojni najc scree: chahuiini rebisiäjb, näjza regunaa
ni agujt chäälni che yuꞌ xhi rquiinreni, näjza naꞌc säblajztu
guntu nani rujn rebeṉ guedxliuj ni di chalilajz xtidx
Dios.
\c 2
\s Nanab tebloj jiennäänu guiraꞌti bejṉ
\p
\v 1 Resaꞌä, laꞌtu ahuililajztu xtidx Dad Jesucrist ni
rajp guiraa yäḻrdimbichaꞌ, niꞌc di gacdi guntu xhigab
sajcru tej bejṉ lo sabejṉni.
\v 2 Palga guidzujṉ te bejṉ xquidootu yuꞌ niloor ṉaani,
najcwni ladsaꞌc, dxejcti jiuꞌza te bejṉ nani xhet rajpdi,
najcwni ladyujxh, ladbeed,
\v 3 dxejcti laꞌtu jiurutu nani najcw ladsaꞌcga, naatu:
“Ree gurej lo yagxhilsaꞌcre”, dxejcti gäblu lo bejṉ ni
xhet rajpdi: “Rec gusulii o gurej lo yujre”,
\v 4 ¿la xhet rujnditu xhigab garenca najc tej bejṉ
lo saꞌni, ä? Luxh dxejc acayajctu siꞌc juejz ni rujn
xhigab guijdx.
\p
\v 5 ¡Coḻgucuadiajg, betzä ni sanälazä! Agule Dios bejṉ
nani xhet rajpdi lo guedxliujre te gaꞌpreni yäḻrililazduxh,
te lo xcäḻrnibee Dios xcaꞌreni xcäḻnasaꞌc ni biaꞌn diidx
gudeed Dios loj renani sanälajzni.
\v 6 Niluxh laꞌtu agulälaztu rebejṉ nani xhet rajpdi.
¿Xhixh xhet laadi rebejṉ ni rajp ni rusacsítu, li rgobxhajxhreni
laꞌtu, rinäreni laꞌtu loj reguxhtis, ä?
\v 7 ¿La xhet laadi rebejṉ ni rajp ni rniyaj loj Dios
ni sacduxh? Laꞌtu abirilajtu rexiꞌn Dios.
\p
\v 8 Palga guliitu cagusoobtu leii xten xṟeiinu Dios,
siꞌcni caj lo xquijtz Dios scree: “Coḻchanälajz saꞌtu
sigajc rinälajztu lagajc laꞌtu”, laaca rujntu.
\v 9 Niluxh palga rinälajzrutu tej cuaa bejṉ lo stee
cuaa bejṉ, cayujntu dojḻ, luxh xleii Dios rnii najctu
beṉ dojḻ, bejṉ ni rbälaz leii.
\v 10 Palga yuꞌ te bejṉ ni rusoob guiraa ni caj lo xleii
Moisés, niluxh runijtni lo tejtis diidx ni caj lo leii,
abanijtpacni, najcni siꞌcni dini nusoob nicla tej diidx
lo guideb leiiga.
\v 11 Saꞌcsi lagajc Dios ni gunii: “Naꞌc guesnäjlu bejṉ
ni di gac chäällu”, lagajc laani guniizani: “Naꞌc juꞌtlu.”
Palga dilu guesnäj bejṉ ni di gac chäällu, niluxh ruguꞌtlu
te bejṉ, abanijtlu xcuent guiralii releii.
\v 12 Laꞌtu coḻguinii, coḻguibajṉ siꞌc rebejṉ ni gun
Dios yäḻguxhtis con xtiidxni ni rusḻaa bejṉ lo dojḻ.
\v 13 Saꞌcsi renani di gulaslajz bejṉ, che gun Dios yäḻguxhtisreni,
dizani gulaslajz laareni. Sajcru yäḻrulaslajz lo yäḻguxhtis.
\s Yäḻrililajz näj dzuun ni rujn bejṉ
\p
\v 14 Resaꞌä, ¿xhi sajc palga guinii te bejṉ: “Ahuililazä
xtidx Dios”, niluxh dini gun dzuun ni riäjḻ gunni, ä?
Saꞌ yäḻrililajzre, ¿la susḻaanini lo dojḻ, ä?
\v 15 Palga yuꞌ te bejtznu o te bisiajnnu ni dini gaꞌp
xhajbni, luxh xhetiza xhi gauni, xhi yäni,
\v 16 luxh gäb tejtu lojni: “Sucuedxi lajzlu jiilu, suguidxaꞌ
lajzlu, suguidxaj xqueꞌlu”, niluxh dini gudeed nani caquiinni,
¿xhi sajc rediidx ni räjpni lojni, ä?
\v 17 Sigajcza yäḻrililajz nani di guquiil bejṉ gunreni
xtzuun Dios najc siꞌc te ni agujt, saꞌcsi dini guquiil
bejṉ gunreni dzuun.
\p
\v 18 Yuꞌza reni naa: “Luj rajplu yäḻrililajz, narä runä
xtzuun Dios; baluii narä xcäḻrililajzlu xhet näjdi xtzuun
Dios, dxejcti narä suluiä xcäḻrililazä xcuent rextzuun
Dios ni runä.”
\v 19 Laꞌtu rililajztu yuꞌ tejtis Dios. Laaca rujnlu,
niluxh näjza rebeṉdxab rililajz yuꞌ tejtis Dios, racdijtlireni,
rdxebduxhrenini.
\v 20 ¿La di rlajztu gacbeetu, beṉnayääl? ¿La ditu gan,
yäḻrililajz ni di guichagnäj xtzuun Dios najc te yäḻrililazgut?
\v 21 Dios badzucaj xtojḻ toxtadgoldoonu Abram saꞌcsi
bejnni siꞌc gunibee Dios gunni, che badzuubni xingaanni
Isaꞌc lo piään, nuguꞌtnini nez lo Dios.
\v 22 Coḻhuii xho tejsi junt sadxaag xcäḻrililajz toAbram
dzuun ni bejnni, dxejcti saꞌcsi bejnni nani gunibee Dios
gunni, bejn Dios gujc xcäḻrililajzni saꞌ yälrililajz
nani rlajz Dios gaꞌp rexpejṉni.
\v 23 Dxejcti huileꞌ xtidx Dios cadro caj scree: “Abram
huililajz ni räjp Dios lojni, niꞌcni badzucaj Dios xtojḻni,
cuaꞌ Dios Abram siꞌc te beṉnaya.” Birilajzani “xamiigw
Dios.”
\p
\v 24 Niꞌcni ruhuiitu rcaꞌ Dios te bejṉ siꞌc beṉnaya
nez lojni xcuent xtzuun Dios ni rujnzani, xhet ganaxtis
xcuent xcäḻrililajz bejṉga.
\v 25 Sigajcza gusajc toRahab, ni gujc te gunadxab. Dios
badzucajza xtojḻni, bejn Dios xhigab najcni te beṉnaya
saꞌcsi bejnni xtzuun Dios che badeedni rolijzni bacuaꞌtzloj
tioꞌp xpejṉ Israel ni gujc guixhajg ni sagulaꞌtz guejdxga,
dxejc gucnäjnireni te siireni steꞌca nez yuj.
\v 26 Sigajc ni di gacdi guibajṉ tiejxh bejṉ palga xheti
sprit, sigajcza di gacdi guibajṉ yäḻrililajz palga dini
gun dzuun ni rnibee Dios gunni.
\c 3
\s Rediidx nani rnii luudxnu
\p
\v 1 Resaꞌä, naꞌc gac xhidajltu bejṉ ni ruluii xtidx
Dios, saꞌcsi anajnnu rac yäḻguxhtisroru rebejṉ nani ruluii
xtiidxni.
\v 2 Saꞌcsi guiragajcnu riennu xhidajl cuaa dojḻ. Palga
yuꞌ te bejṉ ni di gunijt lo diidx ni rniini, laani najcni
te beṉsaꞌc, rajcza rnibeeni guideb tiejxhni.
\v 3 Palga rusäḻnu guiib ni ruꞌ roꞌ cabaii te chääni
cadro rlajznu jiini, rnibeezanu guideb xtiejxhni.
\v 4 Coḻhuii rebarcwro, mase siolduxhreni, luxh rebeduxh
rulanaareni, niluxh capitán ni rusaj barcw lo nisdoo,
te guibbäz ni caj xhajn barcw neṉ nis, con niꞌctis rinänini
cadrotis rlajzni.
\v 5 Sigajcza najc luudxnu, najcni te labäz tiejxhnu,
luxh coḻhuii lacti didxro rniini. Najcni siꞌc te balbäz
ni rajc ruzeꞌc guiragajc reyajg ni yuꞌ dajn.
\v 6 Luxh luudxnu najc siꞌc te bajl. Rnii luudxnu guiraa
redidxdxuudx ni rnii rebeṉ guedxliujre nani rdxeꞌch
lo Dios. Lo guiraa relaꞌ ni najc tiejxhnu, laa luuxdnu
ni rundxuudx guideb tiejxhnu. Luudxnu ralguij con xquiboo
gabijl.
\v 7 Rebejṉ sajc gusiacdooreni guiraloj guidxaa, guiraa
maneꞌ, guiraa bäḻ, guiraa man lo nisdoo, abasiacdoo bejṉreni,
\v 8 per nicla tej bejṉ di gacdi gusiacdoo lujdxni.
Dini cuedxi, guidxani cosguijdx, najcni siꞌc te bäḻ ni
rauyaꞌni ruguꞌtni te bejṉ.
\v 9 Lagajc luudxnu rliäꞌpnu xpalaꞌn Dios Xtadnu, lagajc
laani rniyajnu sabejṉnu ni benchee Dios sigajc najcni.
\v 10 Tejsi roꞌnu rnileꞌ lo Dios nägajcza rgue lo bejṉ.
Rebetzä, ¡xhet siꞌcdi nungäjḻdi gacni!
\v 11 ¿La rbää bejṉ nisnejxh näjza nisrop lo tejsi bisie,
ä?
\v 12 Betzä, ¿la caxajsi sajc xcaj aceituṉ loj te yagiigw,
ä? ¿O la sajc xcaj iigw lo te yaguub, ä? Sigajcza digacdi
guirii nisnejxh näjza nisrop lo tejsi bisie.
\s Yäḻnajn ni siääd xhaguibaa
\p
\v 13 ¿Chuniꞌc lo guiraatu yuꞌ xcäriejnni, nanduxhni,
ä? Suguluiini xho najcni xcuent xcäḻnabaṉsaꞌcni, sugunni
xtzuunni guideb yäḻnadolajz ni rudeed xcäriejnni.
\v 14 Niluxh palga yuꞌ yäḻrdxeꞌch lo saꞌlu ni runnanḻaa
lastoolu, näjza rujnlu guiraꞌti parsi xcäḻnasaꞌc lagajc
luj, naꞌc gaclu guyalajz, saꞌcsi niꞌc najc siꞌc ni caniilu
didxrusguee xcuent xtidxlii Dios.
\v 15 Saꞌcsi saꞌ yäḻnajnre, xhet xhaguibaadi siäädni,
alga najcni yäḻnajn xten guedxliujre, xten rebeṉ guedxliuj,
xtenza rebeṉdxab.
\v 16 Saꞌcsi cadro yuꞌ yäḻrdxeꞌch lo saꞌni, näj cadro
rujn bejṉ guiraꞌti parsi xcäḻnasaꞌc lagajc laani, roꞌc
yuꞌ biejy, yuꞌ guiraloj latsiaj.
\v 17 Niluxh yäḻnajn ni ruxhaḻ Dios, ganiddoo najcni
naya, dxejcti rulecdxini xcäriejn bejṉ, dxejc rujnni rajc
bejṉ nadolajz lo saꞌreni, rujnzani saru runnäj bejṉ saꞌreni,
rulazlajz bejṉ saꞌreni, rujnzareni guiraloj dzunsaꞌc,
runleꞌpacreni xtiidxreni, direni guinii tej diidx laaga
cayujnreni garenca dzuun.
\v 18 Renani rguiil yäḻrbedxi, yäḻrbedxi rbeꞌcreni te
xcaꞌreni te yäḻnabaṉnaya nez loj Dios siꞌc xcäḻnasaꞌcreni.
\c 4
\s Ni nabaṉnäj guedxliuj
\p
\v 1 ¿Casiääd rebiejy, reyäḻrdxeꞌch lo saꞌni ni casiajctu?
¿La direni jiääd xcuent lagajc xhigab ni yuꞌ lastootu,
ä? Lagajc rexhigabga rujn biejy neṉ lastootu, ruscäjyreni
xcäriejntu.
\v 2 Laꞌtu rlajztu gaꞌptu nani ditu gaꞌp, dxejcti ruguꞌttu
saꞌtu. Rsiäblajztu xhixten saꞌtu, luxh saꞌcsi digacdi
xcaꞌtuni, dxejc rucuanäjtu saꞌtu, rdiḻnäjtu saꞌtu. Ditu
gaꞌp nani rlajztu saꞌcsi ditu guiniabni loj Dios.
\v 3 Rniabtuni, niluxh dini guniidxnini saꞌcsi xhet laadi
najc xhigabtu gunabtuni, alga gunabtuni saꞌcsi rlajztu
gunijttuni siꞌcni rlajztu.
\v 4 ¡Aii! Bejṉ ni di gandzuꞌ Diostis. ¿La ditu gan
bejṉ nani rlajz gun redzuun ni rujn rebeṉ guedxliuj,
bejṉga rdxeꞌchreni lo Dios, ä? Niꞌcni palga yuꞌ chu tejtu
ni rlajz chanuu lo ni rajc lo guedxliujre, bejṉga rdxeꞌch
lo Dios.
\v 5 O ¿la rchalotu xliaꞌsi caj lo xtidx Dios rediidxre:
“Sprit ni baxhaḻ Dios te cuääzni neṉ lastoonu, randzuꞌni
nuurnu saꞌcsi rlajzni guinibeeni nuurnu”?
\v 6 Niluxh runiidxru Dios xcäḻracnäjni loonu. Niꞌcni
rnii xtiidxni scree: “Dios rdxechnäj renani runnaro
lagajc laareni, niluxh rudeedruni xcäḻracnäjni lo rebeṉnadolajz.”
\v 7 Coḻjiuꞌpac lo xnezyuj Dios. Coḻsudzuꞌtzpac te di
guntu ni rlajz beṉdxab, te guxuṉni lojtu.
\v 8 Coḻguibigru lo Dios te guibigzani lojtu. Beṉdojḻ,
coḻquiib ṉaatu, nalajznu naꞌcru guntu latsiaj; coḻgusia
lastootu, laꞌtu ni runtioꞌp lajztu.
\v 9 Sugacnaj lajztu, suchuti xliajs, coḻyonduxh. Coḻguchaa
xcäḻruxijstu, coḻcaꞌ yäḻhuin, coḻguchaa xcäḻrbalajztu,
coḻcaꞌ yäḻroon.
\v 10 Coḻyajc siꞌc bejṉ ni xhetliidi sajc nez loj Dad
Jesucrist, te laani guiliäsni laꞌtu gunni laꞌtu beṉro.
\s Naꞌc guiniyajtu saꞌtu
\p
\v 11 Rebetzä, naꞌc guiniyajtu resaꞌtu. Saꞌcsi renani
rniyaj saꞌni o rujnni yäḻguxhtis saꞌni, reniꞌc rniyaj
xleii Dios, rujnreni yäḻguxhtis xleii Dios luxh palga
guntu siꞌc, dirutu gac renani rusoob xtidx Dios, alga
najctu juejz xten leii.
\v 12 Tejtis najc nani runiidx leii loonu, tejtis najc
juejz; najcni nani rajc rusḻaa bejṉ lo dojḻ, nani sajcza
gunitloj bejṉ. Laꞌtu, ¿chuxh najctu te guntu yäḻguxhtis
lo saꞌtu, ä?
\s Dinu gan xhi gac guixee
\p
\v 13 N̲aj coḻcuadiajg dee, laꞌtu ni rniitu, nadxej o guixee
chonnu te guejdx nezrec. Roꞌc guideednu tebijz te guiziinu,
guitoꞌnu te jiennu gaan meel.
\v 14 Luxh nicla gantu xho gac xcäḻnabajṉtu guixee.
Xcäḻnabajṉtu najc siꞌcsi te za nani rieṉloj teṟaꞌtbäz,
dxejcti rnitlojni.
\v 15 Hueenru guiniitu scree: “Palga rlajz Dios sibaannu,
te jiennu dee o dec.”
\v 16 Niluxh siꞌc ni rujntu ṉaj, rajc guyalajztu rniitu
didxro; luxh guiraa redidxroga najc dojḻ.
\v 17 Niꞌcni ni najn xho riäjl gunni, palga dini gun
siꞌc, rujnni dojḻ.
\c 5
\s Rulijdxni rebejṉ ni yuꞌ xhidajl xhixtenni
\p
\v 1 Coḻgucuadiajg xtidxä, bejṉ ni yuꞌ xhidajl xhixtentu.
Coḻyoon, coḻcuedxaꞌ xcuent recasionduxh ni sactu.
\v 2 Guiraa rexhixtentu nani rajptu aguxhijṉ, luxh rexhajbtu
agudajw rebaguiidni.
\v 3 Oor näjza plaꞌt xtentu agubibtiejnni, aguxhijṉni.
Lagajc dee gun gacbee Dios ditu niujn ni rlajz Dios
guntu, lagajc niꞌc gun chectu, nitlojtu. ¡Xliaꞌsi batiedajntu
xhixtentu neṉ redxej lultga!
\v 4 ¡Coḻhuii! Ditu niguixsaꞌc loj reni bejn xtzuuntu,
niꞌcni laareni cayujnreni yäḻquij lo Dios xcuenttu.
Luxh xhadiajgli Dios xten reangl ni yuꞌ xhaguibaa abidzujṉ
yäḻquij xtentu ni cabeꞌc renani batieꞌ xcäḻnasaꞌctu.
\v 5 Agubaṉsaꞌcpactu lo guedxliujre, bejntu lanij siꞌctis
ni rlajztu, abastioꞌtu lastootu neṉ redxej xten yäḻruguꞌt.
\v 6 Gudiiltu xho baguꞌttu rebeṉsaꞌc luxh laareni dxiitis
gusujreni, xhet bejndireni te naꞌc nuguꞌttureni.
\s Coḻcuääz jiädxhii Diostu
\p
\v 7 Resaꞌä, dxitis coḻcuääz guidzujṉ dxej cheni jiääd
Dad Jesucrist. Coḻhuii xho rujn bejṉ ni rbeꞌc binij,
dxitis rbäjzni gac xcäjlni laḻ ni riajb nisguigaloo
näjza nisguij ni riajb lult.
\v 8 Siꞌcza laꞌtu coḻcuäzdxi, coḻgustioob lastootu saꞌcsi
asiäddzuṉgajxh dxej ni jiääd Dad Jesucrist.
\v 9 Resaꞌä, naꞌc chaleꞌctu xquej saꞌtu, didi gun Dios
yäḻguxhtis laꞌtu, saꞌcsi asiäddzuṉgajxh dxej che guidzujṉ
Dios ni najc Juejz.
\v 10 Rebetzbidä, coḻhuii xho gudejd reniguii nani bacuaa
xtidx Dios trabajw galoo, xho guläjzzareni.
\v 11 Coḻhuii xho rniinu chicbaa renani guläzdxi lo
trabajw ni gudejdreni. Abiejn diajgzatu xho bejn Job
che gudejdni trabajw, anajnzatu xho guzajcni xcuent redzunsaꞌc
ni bennäsac Diosni, ni ruluiloj xho riaduxh Dios bejṉ,
rapduxhni yäḻrulaslajz.
\p
\v 12 Rebetzä, che riaꞌntu diidx lo te bejṉ, gunatiro
palga gusäꞌttu xhaguibaa, o guedxliuj, o xhi steeni. Che
naatu: “Mbaj”, niꞌctisza coḻguinii. Che naatu: “Naꞌc”,
niꞌctisza coḻguinii te naꞌc gun Dios yäḻguxhtis laꞌtu.
\p
\v 13 ¿La yuꞌ tejtu ni cadejd trabajw, ä? Suguiniabni
lo Dios. ¿La yuꞌ chu tejtu ni cabalajz, ä? Sugoḻni dij
te guiliäꞌpni xpalaꞌn Dios.
\v 14 ¿La yuꞌ chu tejtu ni cayacxhuu, ä? Sucueedxni rebeṉgool
ni rnibee neṉ guidoo, te guiniabreni lo Dios xcuentni
laḻ ni cagusäḻzareni seꞌt lo cuajni con laj Jesucrist.
\v 15 Luxh palga rililajzpacreni che canabreni, siajc
beṉracxhuuga, siliäs Jesucrist bejṉga. Luxh palga bejnni
dojḻ, sibicaj xtojḻni.
\v 16 Niꞌcni coḻguxhobdojḻ lo saꞌtu, coḻnab lo Dios xcuent
saꞌtu te jiajctu. Che rniabduxh te beṉ naya lo Dios,
dzunroza rujn Dios.
\v 17 Elías, te bejṉ ni gunii xtidx Dios agujc xchero,
gujcza te bejṉ sigajc najcnu. Gunabdipni loj Dios te
naꞌc jiajb nisguij, luxh di nisguij niajb lo guedxliuj
choṉ ijz garol.
\v 18 Dxejc gunabsacni lo Dios, dxejc bixal xhaguibaa,
biabsac nisguij, dxejcru gujc reyäḻnasaꞌc xtenreni lo
guedxliuj.
\p
\v 19 Rebetzä, palga yuꞌ chu tejtu ni guibicaj lo xtidx
Dios, luxh yuꞌ chu gacnäj guibisacni lo xtidx Dios,
\v 20 sugacbee bejṉ nani racnäj guirii beṉdojḻ lo xnezyuguijdxni
te guibisacni lo Dios, bejṉga agucnäjni te guḻaa xaimni
lo yäḻgujt, te gubicajza guiraa xtojḻni, mase xhidalduxh
najc xtojḻni.