\id 1PE
\h 1 Pedro
\toc1 1 Pedro
\mt Guijtz Ganid Nani Bacuaa Pedr
\c 1
\s Pedr cacuaa guijtz loj reni rililajz ni nareꞌch
\p
\v 1 Narä Pedr, te apost xten Jesucrist, cacuaä guijtzre
loj renani agule Dios gac rexpejṉni nani rbäjz siꞌc
beṉzijt lo reguedx Ponto, Galacia, Capadocia, Asia, näjza
Bitinia.
\v 2 Xtadnu Dios gule laꞌtu galooli bencheeni niguii,
aguleni laꞌtu par lagajc laani te gun Sprit Dxan xtenni
xtzuunni neṉ lastootu te gusoobtu xtidx Jesucrist te
jia lastootu con xtiejn Jesucrist. Rniabä lo Dios gacnäduxhruni
laꞌtu, guscuecdxini lastootu lo guiraliiti.
\s Te yäḻnabajṉ ni cabääznu
\p
\v 3 Coḻguiliäꞌp xpalaꞌn Dios ni najc Xtad Jesucrist,
Dios nani xcuent xcäḻrulaslazduxhni bejnni gojpnu te
yäḻnabaṉcoob saꞌcsi baspaṉsacni Jesucrist loj rebeṉgut.
Saꞌcsi rajpnu yälnabaṉcoob, niꞌc nadippac lajznu.
\v 4 Niꞌcni laani suniidxni te yäḻrusalajz ni di nitloj,
ni di xhiṉ, ni di jiuii siꞌc riuii rebalajg. Yäḻrusalajzga
aguluchedzuꞌtzni xhaguibaa par laꞌtu,
\v 5 nani cayapdzuꞌtz xcäḻmilaagwr xten Dios saꞌcsi
rililajztu xtiidxni, te guluii Dios guiraꞌti ni rajpni
par laꞌtu, ni arapcheeni te guluiinireni lojtu che luux
guedxliujre.
\p
\v 6 Niꞌcni rbalazduxhtu, mase nanab tedtu balti trabajw
gaieꞌsi dxej lo guedxliujre,
\v 7 te guzeṉ xho rililajztu. Xcäḻrililajztu sajcru
lo oor nani rnitloj, niluxh xcäḻrililajztu di nitloj,
mase tedni lo guiboo, niꞌcni sinii Dios didxsaꞌc, didxro,
siliäꞌpni xpalaꞌntu che guibisac Jesucrist lo guedxliujre
guideb xcäḻmilaagwrni, näjza xcäḻrdimbichaꞌni.
\p
\v 8 Mase gajdtu fii lojni, sanälajztuni. Mase ditu fii
lojni ṉaj, ahuililajztu xtiidxni, rbalazduxhtu guideb
yäḻrbalajz ni rut rajcdi rusuleꞌ, saꞌni yuꞌ xhaguibaatis,
\v 9 saꞌcsi xcäḻrililajztu susḻaa xaimtu lo dojḻ, sicaꞌtu
yäḻnabajṉ par tejpas.
\p
\v 10 Luxh xcuent yäḻrusḻaa dojḻre, rebejṉ nani gunii
xtidx Dios agujc xchero, laareni abasulexgaareni xcuent
xcäḻracnäj Diosre nani siääd lojtu. Luxh bisiedduxhreni,
gunabdiidxzareni,
\v 11 te rlajzreni gacbeereni chu bejṉ o gucpac gac
nani cagusäꞌt Sprit xten Crist ni yuꞌ neṉ lastooreni
che gunixgaani xho nungäjḻ ted Jesucrist trabajw, dxejcru
xcasacni yäḻrnibee.
\v 12 Baluii Dios lojreni, di rediidxga soob neṉ redxej
ni nabajṉreni, alga par laꞌtu najc rediidxga. N̲aj agunii
rebejṉ ni rusuleꞌ xtidx Dios rediidxga lojtu. Abasuleꞌreni
xtidx Jesucrist saꞌcsi xhaguibaali baxhaḻ Dios Sprit
Dxan xtenni te cuääzni neṉ lastooreni. Näjza rexangl
Dios ni rbäjz xhaguibaa rlajz gacbeerureni rediidxga.
\s Xcäḻnabaṉnayanu nez loj Dios
\p
\v 13 Niꞌcni, coḻsanij xcäriejntu, coḻgusudzuꞌtz lastootu,
guideb lastootu coḻyenloj yäḻracnäj xten Dios ni abiaꞌn
diidx xcaꞌnu che guibisac Jesucrist lo guedxliuj.
\v 14 Gactu siꞌc biuux nani rusoob xtidx xtadni. Naꞌcru
xcäjbtu guntu redzunguijdx ni bejntu galoo che gajdtu
gumbee Dios.
\v 15 Dios ni gule laꞌtu najc dxan. Sigajcza laꞌtu, loj
guiralii ni rujntu coḻyajc beṉdxan.
\v 16 Saꞌcsi lo xtidx Dios caj scree: “Sajctu beṉdxan
saꞌcsi narä nacä dxan.”
\p
\v 17 Palga laꞌtu rniitu “Dad” lo Dios nani tebloj rujn
yäḻguxhtis loj guiraa bejṉ xcuent dzuun ni bejnni, laꞌtu
riäjl guidxejbtuni guiraa dxej ni nabaṉsijctu lo guedxliujre.
\v 18 Anajntu di Dios nudeed yäḻnasaꞌc ni rnitlojdi,
siꞌc oor näjza plaꞌt, te basḻaani laꞌtu lo recostumbr
ni cuaꞌtu lo retoxtadgoldootu. Recostumbrga xhet saꞌcdireni.
Di Dios nudeed oor nicla plaꞌt te basḻaani laꞌtu,
\v 19 badeedni rejn ni sacduxh te basḻaani laꞌtu loj
xtojḻtu. Rejn siꞌc xtiejn te xiil ni naya, xhetpac najcdini,
xtiejn lagajc Jesucrist.
\v 20 Guliipacni che gajdli guirixtiej guedxliujre, gule
Dios Jesucrist, niluxh ṉajru, neṉ redxelult che gajd guedxliujre
nitloj, biädluilojni par xcäḻnasaꞌctu,
\v 21 laꞌtu nani rililajz xtidx Dios xcuent Jesucrist.
Luxh Dios baspaṉsac Jesucrist loj rebeṉgut, badeedni
yäḻrnibee lojni, niꞌcni ahuililajztu xtidx Dios, luxh
Diostis cayenlojtu ṉaj.
\p
\v 22 N̲aj saꞌcsi abasoobtu xtidxliini, te siꞌc abasiatu
lastootu te gac chanälajztu saꞌtu, ṉaj guideb lastootu
coḻchanälajzpac saꞌtu.
\v 23 Saꞌcsi acuaꞌtu xcäḻnabaṉcoobtu xcuent xtidx Dios
ni najc par tejpas, et xcuentdi xtidx beṉ guedxliuj ni
rnitloj. Laꞌtu najctu siꞌc cuaan ni rliejn lo bejdz
ni siääd xhaguibaa, xhet lo bejdzdi ni rnitloj.
\v 24 Galooli gunii Dios scree:
\q Guiraa rebeṉ guedxliuj najc siꞌc recuaan,
\q guiraa xcäḻnasaꞌcreni najc siꞌc reguii ni rcaj lo cuaan,
\q recuaan rgoḻ, lirtejbza reguii xtenni,
\q
\v 25 niluxh xtidx xtad Jesucristnu rsiudzuꞌtzni tejpas.
\m Luxh diidxre najc diidx ni basuleꞌreni lojtu.
\c 2
\p
\v 1 Niꞌcni coḻgusaan guiraa redzunguijdx ni yuꞌ lo
guedxliuj, naꞌc gusgueetu saꞌtu, naꞌc guntiop lajztu, naꞌc
chuguij lajztu xhixten saꞌtu, naꞌc guiniyaj saꞌtu.
\v 2 Siꞌc riojl rebäzniteꞌ leꞌch, siꞌcza coḻquiil xtidx
Dios par sprittu. Coḻjiojḻ xtidx Dios te gustioobruni
laꞌtu lo yäḻrusḻaa lo dojḻ,
\v 3 palga agucbeetu lacti hueen najc xcäḻracnäj Jesucrist.
\s Crist najc siꞌc te guij ni nabajṉ
\p
\v 4 Coḻguibig loj Jesucrist ni najc siꞌc te guij ni
nabajṉ. Laani suniidx yäḻnabajṉ par tejpas loonu. Rebejṉ
badzucaj guijga, niluxh Dios gulenini saꞌcsi sacduxhni.
\v 5 Sigajcza tejgatu najctu siꞌc guij ni nabajṉ, niꞌc
coḻgusaan xcaꞌ Dios laꞌtu, reguibajṉ, te con laꞌtu gunchee
Dios te yuꞌ cadro cuääz Sprit xtenni, te gactu rexpixhojz
Dios, nani nayapac lastooreni. Niꞌcni saꞌcsi najctu tejtis
con Dad Jesucrist sudeedtu lo Dios guiraa xcäḻnasaꞌctu
con xprit xtentu. Dee najc nani rchaglajz Dios.
\v 6 Saꞌcsi galooli gunii Dios scree:
\q Aguleꞌcä te bejṉ neṉ guedx Sión, nalajznu Jerusalén,
\q ni gac siꞌc te guisaꞌc, te guiro ni rsiuj squiin te
yuro.
\q Chutis bejṉ ni chalilajz xtiidxni, dini jianxtujy.
\m
\v 7 Lojtu ni ahuililajz xtiidxni najcni siꞌc te guisacduxh,
niluxh loj renani gajd chalilajz xtiidxni, najcni:
\q Guij ni gulälaz renani cayunchee yuꞌ,
\q lagajc guijga gujc guijpac ni baliib squiin xten yuꞌga
\m
\v 8 näjza:
\q Te guij ni rliaj niꞌ bejṉ, ni ruzäḻtaꞌreni,
\q laareni riajbreni saꞌcsi direni gusoob xtidx Dios,
\q luxh agunibexgaa Dios nitlojreni.
\s Renani gule Dios
\p
\v 9 Laꞌtu najctu te cuaa bejṉ ni agule Dios, tejgatu
najctu rebixhojz ni najc siꞌc ṟeii xten Dios. Laꞌtu
najctu te beṉnaya, te beṉsaꞌc, rexpejṉpacni. Aguleni laꞌtu
te gusuleꞌtu reyäḻnasacduxh ni bejn Dios ni gurejdxtu
che guyuꞌtu lo nezyunacäjy xten guedxliujre te biuꞌtu
lo nezyuj ni rdimbichasejz xten Dios.
\v 10 Laꞌtu galoo rut najcditu, niluxh ṉaj najctu rexpejṉpac
Dios. Galoo gajd Dios gulaslajztu, luxh ṉaj abalaslajz
Dios laꞌtu.
\s Coḻguibajṉ lo xnezyuj Dios
\p
\v 11 Rebetzä ni sanälazä, nabajṉtu lo guedxliujre siꞌc
beṉzijt, ni rbäjz te laad, niꞌc rniabduxhä lojtu, naꞌc
guntu recosguijdx xten guedxliujre, ni rutijḻ neṉ lastoo
bejṉ te cuälazreni xnezyuj Dios.
\v 12 Coḻguibaṉsaꞌc laḻ ni yuꞌtu loj rebeṉzijt ni di
gac xpejṉ Israel te palga guiniyajreni laꞌtu gäbreni
najctu beṉlatsiaj, che fiireni redzunsaꞌc ni rujntu, siliäꞌppacreni
xpalaꞌn Dios che jiädsac Jesucrist te gunni yäḻguxhtis.
\p
\v 13 Niꞌcni, saꞌcsi huililajztu xtidx Jesucrist, coḻgusoob
xtidx guiraa reni rnibeetu lo guedxliujre, siꞌc najc
presidentro,
\v 14 regubernadoor nani ruxhaḻni te rujnreni yäḻguxhtis
rebeṉdojḻ näjza te guiliäꞌpni xpalaꞌn rebeṉ nani laaca
rujnreni.
\v 15 Saꞌcsi Dios rlajz guntu recossaꞌc te cuecdxitu
rextidxnayääl ni rnii reni di rlajz gumbee didxlii xcuent
Jesucrist.
\p
\v 16 Coḻguibajṉ siꞌc bejṉ ni rut rnibeedi, naꞌcza guntu
latsiaj saꞌcsi rut rnibeeditu, coḻguibajṉ siꞌc guinibee
Dios.
\v 17 Gaꞌptu yäḻnadolajz loj guiraasi bejṉ. Coḻchanälajz
saꞌtu ni rililajz. Coḻguidxejb Dios, coḻguiliäꞌp xpalaꞌn
presidentro.
\s Gudejd Jesucrist trabajw te baluiini xho jiennu
\p
\v 18 Laꞌtu ni najc mos, guideb yäḻnadolajz coḻgusobdiajg
guiraa xtidx rexlam̲tu, xhet ganaxdi relam̲saꞌc ni najc
nadolajz, näjza relam̲ ni najc beṉguijdx.
\v 19 Saꞌcsi rchaglajz ruhuii Dios te bejṉ palga saꞌcsi
rililajz te bejṉ xtidx Dios rujn bejṉ huant che rdejdni
trabajw luxh xhet bejndini.
\v 20 Palga laꞌtu rujntu latsiaj niꞌcni rusacsíni laꞌtu,
¿xhi guntu gaan palga rujntu huant rdejdtu trabajw?
Niluxh palga laꞌtu rdejdtu trabajw saꞌcsi rujntu redzunsaꞌc,
luxh rujntu huant, niꞌc najc laaca nez loj Dios.
\v 21 Te guntu siꞌc gurejdx Diostu, saꞌcsi gudejdza Jesucrist
trabajw xcuenttu te guluiini xho guntu che chanuutu
lo xnezyujni.
\v 22 Laani dini niujn nicla tej dojḻ, laani dini nusguee
nicla tej bejṉ con didx-xhii.
\v 23 Che guniyajreni lojni, dini nudzuꞌ yäḻrniyajga.
Che cadejdni trabajw, dini nudzuꞌ diidx niluxh bateedni
lagajc laani ladzṉaa Dios ni rujn yäḻguxhtissaꞌc.
\v 24 Gudeed Jesucrist trabajw siꞌc te beṉdoḻduxh, bacuaarenini
lo crujz te roꞌc gusacsíduxh tiejxhni xcuent xtojḻnu,
te naꞌc gunrunu dojḻ, te guibaṉsaꞌcnu lo xnezyuj Dios.
Gudiḻguijdxreni tiejxhni te basiajcni laꞌtu.
\v 25 Saꞌcsi galoo gujctu siꞌc rexiil ni rut rajpdi,
rijreni nezree-nezrec. Niluxh ṉaj agubisactu lo xpaxtoortu
näjza nani randzuꞌ xaimtu, Jesucrist.
\c 3
\s Xho nanab guibaṉnäjtu chäältu
\p
\v 1 Sigajcza laꞌtu, regunaa ni abachṉaa, coḻgusoob xtidx
chäältu, te mase yuꞌ tejreni ni di chalilajz xtidx Dios,
sililajzni xtidx Dios saꞌcsi fiini xho rujntu mase xhet
rniidilu.
\v 2 Saꞌcsi fiini xho riulu xtiidxni näjza xho rniilu
nadolajz lojni, näjza xho nabaṉnäsaꞌcluni.
\v 3 Naꞌc gusucheetu ganax lo jiaatis, siꞌc najc guichniil
yejctu, näjza biaoor ni rcaj diajgtu, guejntu, ṉaatu, näjza
ladsaꞌc ni najc sacru.
\v 4 Coḻgusuchenäj lastootu yäḻnadolajz, yäḻrbecdxi lajz,
näjza yäḻsanälajz, saꞌcsi direni nitloj, luxh sacduxhreni
nez loj Dios.
\v 5 Galoo siꞌcza bejn regunaa ni gujc xpejṉ Dios ni
huililajz xtidx Dios, basucheereni lastooreni, basoobreni
xtidx chäälreni.
\v 6 Siꞌc gujc toSara, basobdiajgni xtidx toAbram, guniizani
lo toAbram, Dad. N̲aj najctu siꞌc laani palga rujntu redzunsaꞌc,
näjza naꞌc guidxejbditu.
\p
\v 7 Sigajcza laꞌtu, niguii ni abachṉaa, coḻguibaṉnäsaꞌc
chäältu. Coḻgapdani saꞌcsi dini gacnadip siꞌc te niguii;
nanab guntu siꞌc saꞌcsi näjza lojreni badeed Dios yäḻnabajṉ
par tejpas. Coḻyejn siꞌc, te gucuadiajg Dios che cuedx-guiniabtu
lojni.
\s Renani rdejd trabajw che laaca rujnreni
\p
\v 8 Dee najc ni caniä loj guiraatu, saru coḻguibaṉnäj
saꞌtu. Coḻgulaslajz saꞌtu, coḻchanälajz saꞌtu siꞌc rinälajz
te niguii bejtzni. Gactu beṉsaꞌc, beṉnadolajz.
\v 9 Naꞌc gudzuꞌtu didxguijdx che guiniireni didxguijdx
lojtu, naꞌcza gudzuꞌtu didxyaj che guiniireni didxyaj
lojtu. Alga gunab lo Dios gacnäjnireni, saꞌcsi niꞌcni
gule Dios laꞌtu, te sicaꞌzatu reyäḻnasaꞌc ni guniidxni
lojtu.
\v 10 Saꞌcsi scree caj lo xtidx Dios:
\q Nani rchaglajz guibajṉni,
\q luxh rlajzzani saru tedni redxej lo guedxliujre,
\q sugudxojnni guinii roꞌni didxnaj näjza didx-xhii.
\q
\v 11 Guibicajni loj redzunguijdx, sugunni redzunsaꞌctis.
\q Suquiilni yäḻrbedxi te niꞌc chanuuni.
\q
\v 12 Saꞌcsi ruhuii Dios rebejṉ ni rujn dzunsaꞌc,
\q rucuadiajgzani xtiidxreni che rniabreni lojni.
\q Niluxh rudzuréni lojni, rbälazzani renani rujn latsiaj.
\m
\v 13 ¿Chu laa ni gun latsiaj laꞌtu, palga laꞌtu rbaali
lajztu rujntu dzunsaꞌc?
\v 14 Palga caxäjsi tedtu trabajw che guntu redzunsaꞌc.
¡Chicbaatu! Naꞌc guntu xhigab, niclaza guidxejbtu xcäḻruchejbreni.
\v 15 Coḻgusaan guinibee Dad Jesucrist neṉ lastootu,
gususiṉ te gudzuꞌtu diidx loj reni rniabdiidx lojtu
xhicuent runlojtu guibiꞌ Jesucrist. Guideb yäḻnadolajz
saru gudzuꞌtu diidx.
\v 16 Coḻguibaṉsaꞌc te cuedxi xcäḻriejntu te che guiniyajreni
laꞌtu saꞌcsi nabaṉsaꞌctu loj Crist, jianxtujy reni rniyaj
laꞌtu.
\v 17 Saꞌcsi hueenru tedtu trabajw che cayuntu te dzunsaꞌc,
palga siꞌc rlajz Dios, lacuaa tedtu trabajw saꞌcsi cayujntu
dojḻ.
\p
\v 18 Saꞌcsi sigajcza tejtis gujt Jesucrist xcuent rextojḻnu.
Xhetliidi xtojḻni guyuꞌ nez loj Dios, niluxh gudejdni
trabajwduxh xcuent rebeṉdojḻ. Bejnni siꞌc te gac guibignu
lo Dios saꞌcsi gujt tiejxh Jesucrist, luxh guyusac sprit
xtenni lo tiejxhni te gubaṉsacni.
\v 19 Che gajd xpritni guibisac lo tiejxhni, huij spritni
basuleꞌni diidx loj resprit ni yuꞌ latzguiib.
\v 20 Respritga najc renani di nusoob xtidx Noé che
basuleꞌni xtidx Dios lojreni. Guläjz Dios rebejṉga guiraa
redxej ni cayujn Noé barcwro agujc xchero. Basḻaa Dios
xcäḻnabajṉ xhujṉtis bejṉ, xhet gujcdireni gudejdreni
lo nisguiro ni biajb guideb guedxliujre.
\v 21 Che ṟobnisnu ṉaj, rusnaalajznu rebejṉga; yäḻṟobnisga
ruluiloj xho rusḻaa Diosnu lo dojḻ. Et saꞌcsi riäjt
beed lo tiejxhnu neṉ nisga, alga saꞌcsi dxejc rniabnu
lo Dios guniidxni te xcäriensaꞌc, saꞌcsi sajc xcaꞌnuni
xcuent ni gubaṉsac Jesucrist lo rebeṉgut.
\v 22 Che birii Jesucrist loj rebeṉgut, biuꞌni xhaguibaa
cadro gurejni xladbee Dios te roꞌc rnibeeni loj rexangl
Dios, näjza loj guiraa resprit ni rajc rnibee, ni yuꞌ
lo guedxliuj näjza xhaguibaa.
\c 4
\s Coḻyejn xtzuun Dios
\p
\v 1 Niꞌcni saꞌcsi agudejd Jesucrist trabajw cuajni
lo crujz xcuentnu, sigajcza laꞌtu riäjḻ guntu xhigab
sidejdtu trabajw lo guedxliujre saꞌcsi nani agudejd
trabajw, diruni gun dojḻ,
\v 2 te guideb nabajṉni lo guedxliuj, guibajṉni siꞌc
rlajz Dios, diruni guibajṉ te gunni redzunguijdx xten
guedxliujre.
\v 3 Saꞌcsi bejntu siꞌctis ni rlajztu galoo, bejntu siꞌc
rujn rebejṉ ni di gumbee Dios, bejntu siꞌcni rlajz tiejxhtu,
bejntu latsiaj, gusojztu, bejntu relaniro, gudedcaj gusojztu,
luxh bejntu cosxtuiduxh bazuxhijbzatu loj rebanäbdxab.
\v 4 Dxejcti rebejṉ ni rujn recosga ṉaj, rdxelojreni
saꞌcsi dirutu gun ni rlajzreni, niꞌc rniyajreni laꞌtu.
\v 5 Niluxh laareni suureni nez loj Jesucrist ni agojḻ
gun yäḻguxhtis loj guiraa rebejṉ, rebejṉ ni nabajṉ näjza
renani agujt, te gusuleꞌreni xcuent nani bejnreni.
\v 6 Niꞌcni basuleꞌ Jesucrist xtidx Dios loj reni agujt,
te mase che gubajṉreni lo guedxliuj gujcreni yäḻguxhtis
siꞌctis ni rajc bejṉ, dxejc gujtreni, ṉaj sprit xtenreni
sinuu guibajṉ siꞌc ni rlajz Dios.
\p
\v 7 Asiäddzuṉgajxh dxej che guibisac Jesucrist lo guedxliujre.
Niꞌcni ganax laaca coḻyejn xhigab, coḻgusiṉ xcäriejntu
te saru cuedx-guiniabtu lo Dios.
\v 8 Niluxh ni maazru sajc najc yäḻsanälajz resaꞌtu
saꞌcsi che rinälajztu resaꞌtu, riaḻlajztu xtojḻ saꞌtu.
\v 9 Saru gurenäj bejṉ ni rdzujn rolijzlu, naꞌc jiejytu.
\v 10 Abaniidx Dios loj tejgatu te dzuun ni sajc guntu.
Dzuunga coḻyacnäj resaꞌtu, te siꞌc guluiitu lo resaꞌtu
laaca cayunsaꞌctu guiraꞌti nani baniidx Dios lojtu.
\v 11 Palga tejtu najc xtzuunni guluiini xtidx Dios,
suguiniini ascanu najcni xtiidxpac Dios. Palga tejtu
najc xtzuunni gacnäjni saꞌni, sugunnini, guideb yäḻnadip
yäḻnadaan ni rudeed Dios lojni, te guiraꞌtis ni rajc
sujn guiliäꞌp xpalaꞌn Dios xcuent Jesucrist. Saꞌcsi
laatisni riäjḻ chäꞌp xpalaꞌnni, laatisni riäjl guinibeeni
tejpas. Sugacni siꞌc.
\s Xho nanab tednu trabajw
\p
\v 12 Rebetzä ni sanälazä, naꞌc guidxelojtu saꞌcsi cadejdtu
trabajw ni najc siꞌc guiboo, ni siääd te gactu preeb.
Naꞌc guntu xhigab xhichaniꞌc casiajctu.
\v 13 Coḻguibalajz saꞌcsi sigajc ni cadejdtu trabajw
saꞌni gudejd Jesucrist, sigajcza sibalajztu che guiluiloj
xcäḻrdimbichaꞌ Jesucrist.
\v 14 Palga rniyajreni laꞌtu saꞌcsi rililajztu xtidx
Jesucrist, chicbaa laꞌtu, saꞌcsi rbäjz Xprit Dxan xten
Dios guideb xcäḻrdimbichaꞌni neṉ lastootu.
\v 15 Gunatiro, andi gusaantu ted tejtu trabajw saꞌcsi
baguꞌttu bejṉ, o saꞌcsi gulajntu xhi xten bejṉ, o saꞌcsi
bejntu latsiaj, o saꞌcsi huichuꞌni lo xcuent saꞌni ni
xhet nungäjḻdi gacbeeni.
\v 16 Palga yuꞌ chu tej tedni trabajw saꞌcsi rililajzni
xtidx Jesucrist, naꞌc guitujyni, alga suguiliäꞌpni xpalaꞌn
Dios xcuent Jesucrist.
\p
\v 17 Abidzujṉ dxej che ganid rexpejṉ Dios ted trabajw.
Luxh palga ganid nuurnu gacnu yäḻguxhtis luxh ahuililaaznu
xtiidxni, ¡xhocha gun rebejṉ nani di chalilajz xtidx
Dios xcuent Jesucrist!
\v 18 Lo xtidx Dios caj scree:
\q Lacti naganlajz rḻiaa rebeṉnaya lo dojḻ,
\q ¿xhocha gunäjni rebejṉ nani di chalilajz xtidx Dios
näjza rebeṉdojḻ?
\m
\v 19 Niꞌcni, guiraatu nani cadejd trabajw xcuent xtidx
Dios siꞌcni rlajz Dios, coḻgudeed xprittu lo Dios ni
di gusguee, ni bencheetu, te chanuutis guntu ni riäjḻ
guntu.
\c 5
\s Yäḻrulijdx loj renani ahuililajz xtidx Dios
\p
\v 1 Narä nacä te beṉgool, bahuiä trabajw ni gudejd Jesucrist,
bahuiäza xcäḻrdimbichaꞌ Jesucrist ni guniidxni loonu
che guibisacni lo guedxliujre. Niꞌcni rulidxä laꞌtu
ni najc rebeṉgool,
\v 2 coḻgajp renani rililajz xtidx Dios nani rajptu
fiipactu xhi rujnreni. Coḻgaꞌpreni siꞌc te bejṉ ni rajp
xiil, coḻyejnni guideb yejc, guideb lajztu. Coḻyejn siꞌc
saꞌcsi siꞌc rlajz Dios guntu, naꞌc gunlojtu meel. Coḻguibalajz
cayajptu rexpejṉ Dios.
\v 3 Naꞌc guinibeetu lojreni siꞌc rnibee te lam̲ loj
reni rujn xtzuunni, coḻguluiireni xho gunreni con xcäḻnabaṉsaꞌclu.
\v 4 Che guibisac Jesucrist, ni rajp nuure, laani suniidxni
xcuentnu, te yäḻnasacduxh nani dipac nitloj.
\p
\v 5 Sigajcza laꞌtu ni najc biꞌn, coḻgusobdiajg xtidx
rebeṉgool. Guiraatu coḻjiu xtidx saꞌtu, coḻguluii saꞌtu
guideb nadolajz. Saꞌcsi:
\q Dios rbälaz rebejṉ ni runnaro lagajc laareni,
\q niluxh racnäjni rebejṉ ni najc nadolajz.
\m
\v 6 Niꞌcni guideb yäḻnadolajz coḻjiu lo Dios saꞌcsi
rajpni yäḻrnibeduxh, te guiliäꞌpni xpalaꞌntu che gaḻ
dxej ni guibisacni.
\v 7 Coḻgudeed guiraa reyärsiaꞌ ni yuꞌ lastootu lo Jesucrist
te guscuecdxini xcäriejntu saꞌcsi laani sanälajzni laꞌtu.
\p
\v 8 Coḻgusanij xcäriejntu, coḻsusiṉ saꞌcsi rdxeꞌch beṉdxab
lojtu, cansaxhigaꞌtzni siꞌc te beedz nialajz, caguiilni
chu guxhiṉni.
\v 9 Coḻsudzuꞌtz nez lojni, guideb lastootu coḻchalilajz
xtidx Dios, saꞌcsi anajntu sigajcza cayunnäjni guiraa
rebetznu ni nabajṉ lo guedxliujre.
\v 10 Che agudejdtu trabajw tiop-choṉ dxej, Dios nani
rajp guiraa yäḻracnäj, nani gurejdx laꞌtu te näjza laꞌtu
xcaꞌtu xcaḻrdimbichaꞌni xcuent lagajc Jesucrist, lagajc
laani sunsaꞌcni laꞌtu, bejṉ ni rsiudzuꞌtz lo xtiidxni,
bejṉ ni nadip lajzni, bejṉ ni di guidxejb.
\v 11 Laani rajpni yäḻrnibeduxh par tejpas, guiliäꞌpnu
xpalaꞌnni par tejpas. Sugacni siꞌc.
\p
\v 12 Siädnä Silvan guijtzre lojtu. Runä xhigab najcni
te bejṉ nani huililazsaꞌc xtidx Dios. Abacuaä baleꞌsi
diidxre lojtu te gulidxä laꞌtu, te guiniliä lojtu dee
najc xcäḻracnäjpac Dios. Coḻsudzuꞌtz xcuent yäḻracnäjre.
\p
\v 13 Rexpejṉ Dios ni reꞌ lo guedx Babilonia ruxhaḻ
xtixtios lojtu saꞌcsi gule Dios laꞌtu sigajc guleni
laareni. Marcw, ni najc siꞌc xiꞌnä, ruxhaḻza xtixtios
lojtu.
\v 14 Coḻguinii “xchan” lo tejga saꞌtu roꞌc.
\p Rniabä lo Dios guscuecdxini lastoo guiraatu ni rililajz
xtidx Crist.