\id 2PE
\h 2 Pedro
\toc1 2 Pedro
\mt Guijtz Ni R̲ojp Ni Bacuaa Pedr
\c 1
\s Pedr rucuaa te guijtz loj reni ahuililajz
\p
\v 1 Narä nacä Simón Pedr, ni rujn xtzun Jesucrist, te
apost xtenni. Rucuaä guijtzre lojtu nani rililajz xtidx
Dios sigajc ni rililajznu, saꞌcsi bahuii Dios loonu siꞌc
beṉnaya xcuent Xtiosnu Jesucrist nani basḻaa nuurnu
lo dojḻ.
\v 2 Rniabä lo Dios gacnäduxhruni laꞌtu, guscuecdxiruni
lastootu, te gacbeerutu xtidx Dios näjza Dad Jesucrist.
\s Xho riäjl gac rexpejṉ Crist
\p
\v 3 Saꞌcsi xcäḻrnibee Dios baniidx guiraꞌti ni rquiinnu
te guibaṉsaꞌcnu, te gacnu beṉnaya nez lojni, xcuent rililajzpac
xtiidxni ni nansaꞌcnu xcuent Jesucrist nani gurejdx
nuure, nani gule nuure te xcaꞌzanu xcäḻrdimbichaꞌni, näjza
guiraa xcäḻnansaꞌcni.
\v 4 Lagajc xcuent redee baniidxni rextidxliini, rextidxsacduxhni.
Palga chalilajznu xtiidxni, sajcnu xpejṉni, sajcnu beṉsaꞌc
siꞌc najcni saꞌcsi abiriinu loj redzunguijdx ni chaglajz
rujn rebejṉ ni ruxhiṉ guedxliujre.
\v 5 Niꞌcni nanab gacbeenu xho nabaṉnu lo guedxliujre.
Siroobru xcäḻrililajztu sacnäjni laꞌtu te guibaṉsaꞌcnu
lo Dios; luxh saꞌcsi nabaṉsaꞌctu, siroobru xcäḻnajntu
xcuent dzunsaꞌc näjza dzunguijdx.
\v 6 Luxh palga guroob xcäḻnajntu xcuent dzunsaꞌc näjza
dzunguijdx sajc guinibeetu tiejxhtu te naꞌc guntu dzunguijdx.
Che guinibeetu tiejxhtu, sibedxi lajztu. Che arajptu
yäḻrbedxilajz, sajctu beṉsaꞌc, beṉdxan.
\v 7 Che anajctu beṉsaꞌc, beṉdxan, sinälajztu resaꞌtu;
che asanälajztu saꞌtu, arajptu yäḻsanälajz saꞌtu xten
Jesucrist.
\p
\v 8 Palga laꞌtu rusoobtu guiraa rediidxre, luxh chanuutis
caroobreni neṉ lastootu, ditu guibaṉxliaꞌ; sujnpactu
xtzun Dios, luxh rediidxre sacnäjrutu gumbeetu Dad Jesucrist.
\v 9 Saꞌcsi renani di gaꞌp rediidxre, najcni siꞌc te
lotiäꞌp ni di fii, o te ni di gacdi fii zijt, niꞌcni abiäḻlajzni
xho basia Dios rextojḻni nani bejnni galoo.
\v 10 Niꞌcni rniä lojtu rebetzä, coḻsejs, coḻguisieed
xtidx Dios te gacbeepactu, guluilojzatu lo bejṉ xho gurejdx,
xho gule Dios laꞌtu, saꞌcsi laḻ ni chanuu gucuadiajgtu
rediidxga, dipactu gunijt lo Dios.
\v 11 Palga guibajṉtu siꞌc lo guedxliujre, siuꞌpactu
xhaguibaa cadro rnibee Dad Jesucrist par tejpas.
\p
\v 12 Niꞌcni anasugaꞌä te gusnaä lajztu xcuent rediidxre,
mase anajntureni, mase risutzuꞌtztu yäḻrililajz xten
didxlii ni yuꞌ neṉ lastootu.
\v 13 Narä runä xhigab laaca runä che rusnaä lajztu,
te gusnibä laꞌtu, te gusnaä lajztu. Siꞌcza gunä guideb
ni nabaṉä lo guedxliujre.
\v 14 Ananä asiäddzuṉgajxh dxej ni xcaꞌ Dios narä, saꞌcsi
abaluii Dad Jesucrist niꞌc loä.
\v 15 Niꞌcni cayunduxhä dzuun ṉaj, te che guiquiinni
sinaj lajztu xtidxä che aguꞌtä.
\s Renani bahuii loj yäḻnasaꞌc xten Crist
\p
\v 16 Che basuleꞌnu lojtu xcäḻrnibee näj xcäḻrdimbichaꞌ
Dad Jesucrist, xcuent ni guibisacpacni, dinu niniitisni,
dizanu nusguee laꞌtu, saꞌcsi abahuiloonu xcäḻrdimbichaꞌni.
\v 17 Saꞌcsi che badeed Dios xtadnu yäḻrnibee, yäḻrdimbichaꞌ
lojni, dxejc biejn diajgnu gunii Dios, birii xseꞌni neṉ
te za ni gurej xhaguibaa, räjpni: “Dee najc xiꞌnä ni
sanälazä, rbanälazduxhäni.”
\v 18 Lagajc nuure biejn diajgnu xseꞌ Dios che guniini
xhaguibaali che guyunäjnu Jesucrist lo dajn ni najc
dxan.
\p
\v 19 Niꞌcni ṉaj guliiru rediidx ni gunii reprofeꞌt.
Niꞌcni sujntu laaca palga gusobdiajglu rediidxga, saꞌcsi
najcreni siꞌc te bajl ni rusanij te lajt ni nacäjy, susanijreni
xcäriejntu dxejli ni jiääd bajl xhaguibaa. Dxejc lagajc
laani susanij lastoonu.
\v 20 Niluxh ganiddoo nanab gacbeetu dee: nicla tej
bejṉ sajc guinii laatisni sajc guinii xhi säloj xtidx
Dios,
\v 21 saꞌcsi nicla tej diidx ni bacuaa reprofeꞌt dini
gac diidx ni biajbtis yejcreni. Guiraliireni bacuaareni
ganaxtis diidx ni badeed Xprit Dxan Dios lojreni gucuaareni.
\c 2
\s Rebejṉ nani rusguee
\r (Judas 4‑13)
\p
\v 1 Niluxh galoo biricajza te cuaa bejṉ ni basguee
rexpejṉ Israel, sigajcni siääd stee cuaa bejṉ ni susguee
laꞌtu. Laareni guluixhigaꞌtzreni didx-xhii nani rujn
rusiejxh lajz bejṉ xcäḻrililajzreni, sibälazreni lagajc
Dad Jesucrist nani gudijx xcuent xtojḻreni. Niluxh renani
rusguee, siojb nitlojreni par tejpas.
\v 2 Xhidajlza bejṉ sinajlreni lo xcäḻnabaṉguijdxreni,
dxejcti niꞌc gun siniyaj xhidajl bejṉ xnezyuj xtidxlii
Dios.
\v 3 Saꞌcsi ruguilajzreni xmeeltu, xhixtentu, niꞌc siädgusgueereni
laꞌtu te xcaꞌreni xhixtentu. Niluxh xcäḻgujxhtisreni
nani gun Dios, näjza xcäḻrnitlojreni cabäzgajcreni agujc
xchero.
\p
\v 4 Najcni siꞌc saꞌcsi di Dios niäḻlajz rextojḻ rexanglni
nani bejn dojḻ, niluxh baxhaḻnireni gabijl, basäunireni
neṉ reguednacäjy cadro cabäjzreni dxej ni gun Dios xcäḻguxhtisni.
\v 5 Sigajcza rebejṉ ni guyuꞌ galoo, banitloj Diosreni,
basḻaa Dios xcäḻnabajṉ Noétis näjza sgajdzreni, saꞌcsi
basuleꞌ Noé xtidx guluii Dios. Luxh baxhaḻni nisguiro
te biädnitlojni guiraa rebejṉ nani di nucuadiajg xtidx
Dios.
\v 6 Bejn Dios yäḻguxhtis xten guedx Sodoma näjza guedx
Gomorra, baseꞌcni reguejdxga, gujcreni cobdäj. Siꞌc bejn
Dios te gacbee bejṉ xho runnäj Dios rebejṉ ni di gusoob
xtidx Dios.
\v 7 Gulää Dios Loꞌt ni gujc te beṉsaꞌc lo reguejdxga,
saꞌcsi guc-huin lajzni xcuent relatsiaj ni bejn rebeṉdojḻga.
\v 8 Guideb ni guläjs Loꞌt, te beṉsaꞌc, lo guejdxga, dxej,
yääl guc-huin lastooni xcuent nani bahuiini, nani biejn
diajgni, xcuentza latsiaj ni bejnreni, saꞌcsi beṉsaꞌcni.
\v 9 Anajn Dios xho racnäjni rebeṉsaꞌc te rbäänireni
lo retrabajw ni cadejdreni, anajnza Dios xho gusacsíni
rebeṉdojḻ cheni guidzujṉli dxej ni gunni xcäḻguxhtisreni.
\p
\v 10 Guliduxhni, sujnru Dios yäḻguxhtis loj rebejṉ nani
rlajz gun siꞌctisni rlajz tiejxhreni, näjza renani rbälaz
xcäḻrnibee Dios. Najcreni bejṉ ni di guidxejb, rujnreni
ni riajbtis yejcreni, direni guidxejb guiniyajreni rexangl
Dios ni rdimbichaꞌ.
\v 11 Niluxh nicla tej rexangl Dios ni rajpru yäḻrnibee
lo rebejṉre, direni guiniyaj, cueꞌcreni xquejreni lo Dios.
\p
\v 12 Luxh, rebejṉga najc siꞌc reguidxaa nani xheti xcäriejnreni,
cabäjztisreni chu guiniaazreni te guetreni. Rniyajreni
luxh direni gan xhiniꞌc rniireni. Niluxh sigajc rnitloj
reguidxaa, sigajcza sinitlojreni.
\v 13 Bejnreni dojḻ, niꞌc sinitlojreni, sidejdreni yälrusacsiduxh
xcuent rextojḻreni. Laareni rchaglajzreni guntisreni
laniro rdxee. Laareni najcreni siꞌc te cosdxuudx o siꞌc
te manch ni rcaj lo te ladnol, rbaali lajzreni rusgueereni
laꞌtu laḻ ni cayajc lanij cayaunäjreni laꞌtu.
\p
\v 14 Digacdi fiireni loj te gunaa, li rsiaꞌ lajzreni,
direni guidxajg rujnreni dojḻ, rusgueereni rebejṉ te
gunzareni dojḻ, ruluiireni lastooreni te säblajzreni
meel, najcreni bejṉ nani batzubde Dios,
\v 15 agulälazreni nezyusaꞌc, abanijtreni, ṉaj sanajlreni
xnezyuj Balaam, xiꞌn Beor, nani huichaglajzru nani rquijx
yäḻlatsiaj.
\v 16 Niluxh gudiḻnäj Diosni xcuent xtojḻni, bejn Dios
gunii te mandip siꞌc xseꞌ bejṉ, te bascuääzni profeꞌtga,
dini nusaan niujnni nani cayujnni, cayujnni siꞌc te bejṉ
ni rajc yejcni.
\p
\v 17 Rebeṉ latsiajre najc siꞌc te bisie cadro xheti
nis, najczareni siꞌc rexcäjy ni sanä bej nezree nezrec
che cabiꞌ te bero. Laareni suꞌreni lo xcäjy par tejpas
che gun Dios yäḻguxhtis.
\v 18 Saꞌcsi rniduxhreni didxro, niluxh xhet sajcdi rediidxga
luxh rniireni huenduxh najc gun bejṉ ni rlajztis tiejxhreni,
con yäḻlatsiaj rusgueereni rebejṉ nani entis birii loj
reni rujn saꞌ dzunguijdxga.
\v 19 Rusgueereni, rniireni rut gudxojndini palga jiädnajlnireni,
niluxh lagajc laareni najcreni mos, saꞌcsi rnibee latsiajreni.
Xhitis ni rnibee te bejṉ, niꞌc rusäuni neṉ latzguiib.
\v 20 Saꞌcsi palga agubicaj te bejṉ loj redzunguijdx
xten guedxliuj saꞌcsi huililajzreni xtidx Dad Jesucrist
nani rusḻaa rebejṉ lo guiraa dojḻ, dxejctiru gubisacni
loj xtojḻni, abixhidsacreni lo xtojḻreni, nalajz najcreni
siꞌc che gajdreni gumbee xtidx Dios.
\v 21 Huenru direni niembee xnezyuj Dios, quela che abiembeereni
nezyujga, cuälazreni didx dxan, xtidx Dios ni basuleꞌreni
lojreni.
\v 22 Dxejcsii rsiojb diidx ni najc scree: “Rbisac te
bäꞌcw loj xcäḻrdzujbni. Cuch ni entis gojz richusacni
lo xpajṉni.”
\c 3
\s Xho gac che guibisac Jesucrist
\p
\v 1 Rebetzä, dee najc ni rojp guijtz ni caguxhaḻä lojtu; lo guiroꞌp guijtzre cagusnibä laꞌtu xcuent reyäḻrulijdx ni gusnaj lajztu.
\v 2 Coḻgusnaj lajztu rediidx ni gunii reprofeꞌt agujc xchero, näjza rediidx ni gunii Dad Jesucrist nani basuleꞌ reapost.
\p
\v 3 Ganiddoo, coḻgacbee dee: che asiäddzuṉgajxh redxelult, siääd rebejṉ ni rgubee rextidx Dios, laareni sujnreni siꞌctis ni rlajz tiejxhreni.
\v 4 Siniabdiidxreni: “¿Xhicuent gajd Jesucrist guibisac siꞌcni biaꞌn diidx? Cheni gujtli rextadgoldoonu, guiraꞌti sanuutis najcni siꞌc gujcni cheni guc-cheeli guedxliujre.”
\v 5 Niluxh che rniireni siꞌc, rlajzpac jiäḻlajzreni agujc xchero benchee Dios xhaguibaa xcuent xtiidxtisni, näjza guniitis Dios te siꞌc guc-chee guedxliuj, biriini neṉ nis, ṉaj treꞌni loj nisga.
\v 6 Dxejcti gunitloj guiraꞌti ni yuꞌ lo guedxliujga che biajb te nisguiro, gunitlojni.
\v 7 Niluxh xhaguibaa näjza guedxliuj ni treꞌ ṉaj, cayajp Diosreni xcuent xtiidxni te checreni che guidzujṉ dxej ni gunni yäḻguxhtis, che gunitlojni rebeṉdojḻ.
\p
\v 8 Rebetzä, naꞌc jiäḻlajztu, Jesucrist ruhuii tebdxej siꞌc te tzugayuu ijz, rhuiizani te tzugayuu ijz siꞌc tebdxej.
\v 9 Di gaclaa gusoob Dios diidx ni biaꞌn, siꞌc rujn bejṉ xhigab raclaani, niluxh cabecdxiru lajzni xcuent laꞌtu, saꞌcsi cabäjzni gusiejch lajztu, saꞌcsi di rlajzni nitloj nicla tejtu.
\p
\v 10 Niluxh sidzujṉ dxej che guibisac Jesucrist lo guedxliujre siꞌc rdzujṉ te gubaan, rut gacbeedi siäädni. Dxejcti sibicaj xhaguibaa, gac te bieiduxh, guiraꞌti sialni lo te guiboduxh, guedxliujre näjza guiraꞌti ni treꞌ lojni, guiragajcni sejcni.
\p
\v 11 Saꞌcsi sinitloj guiraa redee, niꞌc nanab guibaṉnayatu lo guedxliujre, naꞌc guntu dojḻ.
\v 12 Coḻcuäjz dxejtis ni jiääd Dios lo guedxliuj. Dxejc sejc xhaguibaa, sinitlojni, luxh guiralii ni yuꞌ sialni lo guiboro.
\v 13 Niluxh abasaꞌn Dios diidx loonu, niꞌcni cayenloonu te guibacoob, te guedxliucoob, cadro gunreni ganaxtis dzunsaꞌc, xhetiru dojḻ.
\p
\v 14 Niꞌcni rebetzä ni sanälazä, saꞌcsi cabääznu guiraa ni gac, coḻyejn huant te che guibisac Dios, sidxälni laꞌtu dxitis nabajṉtu, nabaṉnayatu, xhetiru xtojḻtu.
\v 15 Coḻhuii xhi dzuun bejn Dad Jesucrist niꞌc rajpnu yäḻrusḻaa lo dojḻ. Sigajcza bacuaa bejtznu Pabl ni sanälajznu. Bacuaani saꞌcsi badeed Dios yäḻnajn lojni.
\v 16 Neṉ guiraa rexquijtzni bacuaani xcuent rediidxre. Yuꞌ gaii guijtz ni bacuaani ni najc naganduxh. Luxh bejṉ ni guxii racbee, ni runtioꞌp lajzreni, reniꞌc ruxhiid rextiidxni, sigajc runnäjreni guiraa xtidx Dios, niꞌcni sinitlojreni.
\p
\v 17 Niꞌcni rebetzä ni sanälazä, saꞌcsi ananxgaatu rediidxre, coḻnatiru didi jiajbtu ladzṉaa renani gusgueetu, te naꞌc gunijttu xcäḻrsiudzuꞌtztu lo xtidx Dios.
\v 18 Coḻgustioob xcäriejntu con yäḻracnäj näjza yäḻnajn xten Dad Jesucrist nani rusḻaa nuure lo dojḻ. Suguiliäꞌpnu xpalaꞌn Dad Jesucrist, ṉaj näjza par tejpas. Sugacni siꞌc.