\id 2JN
\h 2 Juan
\toc1 2 Juan
\mt Guijtz Ni R̲ojp Ni Bacuaa Juan
\c 1
\s Diidx gulii näjza yäḻrinälaaznu resaꞌnu
\p
\v 1 Narä nacä beṉgool. Cagucuaä guijtzre lojlu naneꞌ
nani agule Dios, näjza loj rexiꞌnlu. Rinälazäpac laꞌtu
luxh xhet xtebädi; näjza guiraa reni rililajz xtidx
Dios sanälajztu.
\v 2 Nuure rinälaaznu laꞌtu saꞌcsi yuchee neṉ lastoonu
rediidx nani najc gulii, luxh dilajznu jiäḻ rediidxre.
\v 3 Xtadnu Dios, näjza Jesucrist Xiꞌnni, gacnäj nuunu,
jiareni nuunu, guscuecdxi lajznu con xcäḻnajn didxlii
näjza yälrinälajz.
\p
\v 4 Bibalazduxhä che gucbeä yuꞌ rexiꞌnlu ni rusoob
xtidx Dios siꞌc gunibee Dios loonu gusoobnuni.
\v 5 Naneꞌ ni gule Dios, diidx nani rniabä gusoob guejblu
ṉaj dini gac didxcoob, niluxh lagajc diidx ni biejn diaagnu
galooli, che huililaazlinu xtidx Jesucrist. Lagajc dee
najc nani gunibee Dios loonu: nungäjḻpac chanälaaznu
resaꞌnu.
\v 6 Sinälaaznu resaꞌnu palga cagusoobnu xtidx Dios.
Dee najc xtidx Dios ni biejn diaagnu galooli, che huililaazlinu
xtidx Jesucrist: chanälaaznu resaꞌnu.
\s Rebejṉ ni rnii garenca diidx ni xhet guliidi
\p
\v 7 Balti bejṉ birii loonu, ṉaj cagusgueereni xhidajl
bejṉ ni ṟeꞌ lo guedxliuj. Caniireni di Jesucrist niajc
niguii che biäädni lo guedxliuj. Saꞌ bejṉre najc beṉrusguee.
Saꞌ bejṉre rdxeꞌchreni loj Jesucrist.
\v 8 Coḻgaꞌp laꞌtu te naꞌc chalilajztu xtiidxreni, didi
xliaꞌsi biennu dzuun roꞌc, te xcaꞌtu guiraa ni guniidx
Dios lojtu.
\p
\v 9 Chutis bejṉ ni rlajz guguꞌch xtiidxpacni lo xtidx
Jesucrist, di bejṉga gumbee Dios. Niluxh chutis bejṉ
ni riu xtidx Jesucrist, rumbeeni Dios, rumbeezani Jesucrist
Xiꞌn Dios.
\v 10 Palga jiääd te bejṉ rolijztu ni di chasanäj xtidx
Jesucrist, naꞌc xcäjbtu jiuꞌni rolijztu, naꞌcza guiniitu
lojni, “Xchan. Biuꞌ.”
\v 11 Saꞌcsi chutis bejṉ ni guinii “xchan” loj te bejṉ
ni di chasanäj xtidx Jesucrist, cayacnäjzani redzunguijdx
ni rujn bejṉga.
\s Rudeedni xtixtios
\p
\v 12 Xhidalduxhru diidx rlazä guiniä lojtu, niluxh di
rlazä gucuaäreni lo guijtz. Cabäzä jiädhuiä lojtu roꞌc
te guiniä rediidxre lojpactu, te guibaalajztu.
\v 13 Rexiꞌn bäjllu, nani aguleza Dios, ruxhaḻ xtixtios
lojlu. Niꞌctis najc ni rucuaä lojtu. Sugacni siꞌc.