\id REV
\h Apocalipsis
\toc1 Apocalipsis
\mt Rediidx Nani Bacuaa Juan Xcuent Recos Ni Churu Gac
\c 1
\s Baluiloj Jesucrist lo Juan
\p
\v 1 Dee najc rediidx ni badeed Dios loj Jesucrist te guluilojnini loj rexmosni, xcuent recos nani di gaclaa gac. Jesucrist baxhaḻ xanglni lo Juan, te baluiini guiraa recosga lojni.
\v 2 Niꞌcni bacuaa Juan lo guijtzre guiraa xtidx Dios nani baluii Jesucrist lojni, xcuent guiraa recos nani bahuilojpacni.
\p
\v 3 Chicbaa renani roḻ guijtzre xcuent recos ni churu gac, renani riuza rediidxga, renani rguchee rediidxga neṉ lastooni saꞌcsi siäddzuṉgajxh redxej che soob rediidxga.
\s Juan cagucuaa guijtzga lo gajdz guidoo
\p
\v 4 Narä nacä Juan. Cagucuaä guijtzre loj guigajdz reguidoo ni treꞌ lo región Asia. Dios guspalajz laꞌtu, guscuecdxini lajtzu, lagajc Dios ni sigajc najc nadxej, sigajcza gujcni naii, sigajcza sajcni par tejpas. Xcaꞌzatu xcäḻruspalajz näj xcäḻrbedxilajz guigajdz resprit ni sugaꞌ guideb gabi cadro rnibeeni,
\v 5 näj xcäḻruspalajz, xcäḻrbedxilajz Jesucrist nani gunilii diidx ni badeed Dios lojni, nani ganiddoo gubaṉsac lo rebeṉgut, nani rnibeeza lo guiraa reṟeii loj guedxliujre. Laani sanälazduxhni nuure, laani rudzucajni xtojḻnu con xtiejnni.
\v 6 Laani bejnni gacnu te beṉro, te guedxro, gaczanu bixhojz lo Dios Xtadni. Suchäꞌp xpalaꞌnni, sugaꞌpni yäḻrnibee par tejpas. Sugacni siꞌc.
\p
\v 7 ¡Coḻgacbee! Laani sibisacni lo rexcäjy, luxh guiragajc rebejṉ suhuii lojni, nägajc renani gudzujd cuäꞌ xcustiini. Guiraa rebejṉ guedxliujre soon xcuentni. Siꞌcti, sugacni siꞌc.
\p
\v 8 ―Narä nacä ganid, nacäza lult, siꞌc najc reletr A con Z ―rnii Dad Dios―. Nabaṉä nadxej, sigajcza gubaṉä naii, sigajcza sibanä par tejpas, dipacna gacä steꞌca. Rapä yäḻrnibeduxhru lo chutis.
\s Bahuiä loj Jesucrist lo xcäḻrdimbichaꞌni
\p
\v 9 Narä, Juan, bejtztu, näjza ni cadednäjtu trabajw xcuent Jesucrist, ni riunäjzatu cadro rnibee Dios, ni rsiudzutznäjzatu lo xtidx Jesucrist, guyuꞌä lo yuj nani treꞌ lo nisdoo, ni laa Patmos. Roꞌc baxhaḻreni narä pres saꞌcsi basuleꞌä xtidx Dios näjza diidx xcuent ni bejn Jesucrist lo guedxliujre.
\v 10 Te dumingw, laḻ ni cayunää́ Dios, guzacä astoo canixcaḻä, dina niacbeä caro yuꞌä, dxejcti nez detzä biejn diagä xseꞌ te ni gunii dipduxh, astoo te trompet,
\v 11 najni loä:
\p ―Narä nacä ganiddoo, nacäza lult. Lo te guitzro bacuaa nani fiilu, dxejcti baxhaḻ guijtzga loj guigajdz guidoo ni yuꞌ nez Asia, neṉ reguejdxre: Éfeso, Esmirna, Pérgamo, Tiatira, Sardis, Filadelfia, näjza Laodicea.
\p
\v 12 Dxejc gubireä te bahuiä chuniꞌc canii loä. Che gubireä bahuiä lo gajdz gandilier oor.
\v 13 Galäii guigajdz recandilieerga, sugaꞌ te ni najc Xiꞌn Dios nani gujc Xiꞌn Niguii, najcwni te lajd ni rdzujṉ lo niꞌlini, lastoozani naliib te cinturoṉ gulajg ni najc ganaxduj oor.
\v 14 Yejcni näjza xquidxejcni najczareni nolbäj siꞌc xquichlajd xiil, nolbäj siꞌc yejg. Dxejcru rbebajl lojni.
\v 15 Niꞌni rdimbichaꞌ siꞌc guiib ni laa bronz che cayejcni lo guiboo. Xseꞌni riejn nadipduxh astoo che riäjt nisro neṉ regueuu.
\v 16 Ladbee caꞌ ṉaani gajdz balxhaguibaa; roꞌni rii te espaad ni guiroꞌp laad caj roꞌni; dxejctiru lojni rujn siꞌc rujn loj gubijdx che cagusanijni guideb lagaa.
\p
\v 17 Che bahuiä lojni, biabrloä nez lojni siꞌc te beṉgut. Dxejcti batzuubni ṉaani xladbeeni yecä, dxejc guniini loä, najni:
\p ―Naꞌc guidxejblu, narä nacä ni gubajṉ galooli, narä nacäza ni guibajṉ lult.
\v 18 Narä nacä ni nabajṉpac; gutä, niluxh ṉaj nabaṉä par tejpas. Rapä yäḻrnibee lo yäḻgujt näjza lo gabijl.
\v 19 Niꞌcni bacuaa recos ni abahuiilu, nani cayajc ṉaj, näjza nani churu gac.
\v 20 Dee najc laa yäḻxhigaꞌtz xten regajdz balxhaguibaa ni bahuiilu lo ṉaä ladbee näjza regajdz gandilier oor: guigajdz balguibaa sälojni xangl Dios xten reguidoo. Dxejc gajdz gandilieerga sälojni guigajdz reguidooga.
\c 2
\s Rediidx nani chää loj rexpejṉ guidoo Éfeso
\p
\v 1 Dxejcti najni loä:
\p ―Bacuaa rediidxre lo xangl Dios xten guidoo Éfeso: “Nani caꞌ guigajdz balxhaguibaa ṉaani ladbee, näjza nani rsiaj galäii guigajdz gandilier oor, rnii rediidxre lojtu:
\v 2 Narä numbeä xhi redzuun rujntu, xhi trabajw rdejdtu rujntu dzuunga, näjza xho rsiudzuꞌtztu. Dizatu guchagsaꞌtu beṉlatsiaj; näjza balaꞌtztu xho rujn rebejṉ nani rniireni najcreni apost ni rnii xtidx Dios, luxh direni gac, luxh laꞌtu gucbegajctu cagusgueereni bejṉ.
\v 3 Rsiudzuꞌtztu, rujntu huant xcuent xtidxä, gajdtu guidxajg.
\v 4 Empac yuꞌ te quej ni rbeꞌcä xcuenttu: dirutu chanälajz narä siꞌcni huinälajztu narä ganiddoo.
\v 5 Niꞌcni coḻguzaa lajztu caro banijttu, coḻgusiejch lajztu, coḻyejn lagajc redzuun ni bejntu galoo che guslojtu huililajztu xtidxä. Palga ditu gusiechlajztu, sudzucaä xcandilieertu cadro sugaꞌni.
\v 6 Laaca rujntu rbälaztu xtzuun rebejṉ ni laa nicolaítas, saꞌcsi näjza narä rbixlazä xtzuunreni.
\v 7 Nani yuꞌ diajgni te cuadiajgni diidx, sucuadiajgni diidx ni rnii Sprit Dxan xten Dios loj reguidoo: loj renani gun gaan lo dojḻ, gudedä gauni ninejxh ni rcaj lo yajg yäḻnabajṉ, ni yuꞌ xhaguibaa cadro yuꞌ Dios.”
\s Rediidx ni rniini loj rexpejṉ guidoo ni yuꞌ Esmirna
\p
\v 8 Dxejcti najni loä:
\p ―Bacuaa rediidxre lo xangl Dios xten guidoo ni yuꞌ Esmirna: “Nani najc ganiddoo, nani najcza lult, nani agujt, dxejctiru gubaṉsacni par tejpas, rnii diidxre lojtu:
\v 9 Narä nanä xho cadejdlu trabajw, nanäza guxilii rajplu, niluxh nez loj Dios yuꞌ xhidajl xhixtenlu. Nanäza yuꞌreni rniyajlu. Reni rniyajlu rniireni najcreni rexpejṉ Israel, luxh direni gac. Najcreni xpejṉ xquidobäz beṉdxab.
\v 10 Naꞌc guidxejblu trabajw nani agojl tedlu. Aree beṉdxab gusäḻ gaii saꞌtu neṉ latzguiib, te gacbeeni don la guliitu ahuililajztu xtidx Dios, te tedzatu trabajw tzuu dxej. Coḻgutip lajztu mase guettu, dxejcti narä gunidxä te coroṉ xten yäḻnabajṉ.
\v 11 Nani rlajz cuadiajg diidx sucuadiajgni diidx ni rnii Sprit Dxan xten Dios loj reguidoo: nani gun gaan lo dojḻ, xhet gundi yäḻgujt ni rojpga lojni.”
\s Rediidx ni rniini lo rexpejṉ guidoo ni yuꞌ Pérgamo
\p
\v 12 Dxejcti najni loä:
\p ―Bacuaa rediidxre lo xangl Dios xten guidoo ni yuꞌ Pérgamo: “Nani caꞌ spaad ni caduxh roꞌni guiroꞌp laad rnii rediidxre lojtu:
\v 13 Narä nanä caro rbäjztu, rbäjztu lo guejdx cadro rnibee Beṉdxab. Rsiudzuꞌtztu xcuent xtidxä. Laḻtis rsiudzuꞌtztu rililajztu xtidxä, mase neṉ redxej cheni baguꞌtreni Antipas, ni gunii diidx xcuenta, nani gusudzutzpac nez loä, nani baguꞌtreni neṉ guejdx cadro rnibee Beṉdxab.
\v 14 Niluxh yuꞌ tiop-choṉ xtojḻtu. Lojtu nadxaag gaii bejṉ ni rujn siꞌc bejṉ toBalaam agujc xchero. Laani baseedni Balac xho gunni te jiajb rexpejṉ Israel neṉ dojḻ, baseednireni gaureni recos ni gurej lo dxan nez loj rebanäjb, baseedzani rexpejṉ Israel guesnäjreni chutis gunaa.
\v 15 Sigajcza nadxaag lojtu gaii bejṉ ni riu rediidx ni rusuleꞌ reni laa nicolaítas.
\v 16 Coḻgusiechxgaa lajztu, te di jiäḻgacä lojtu te gucuanää́reni spaad ni yuꞌ roꞌä.
\v 17 Nani rlajz cuadiajg diidx, sucuadiajgni diidx ni rnii Sprit Dxan xten Dios loj reguidoo: renani gun gaan lo dojḻ, lojni gudedä yätxtiil ni laa mana ni yuchee-xhigaꞌtz. Sudedäza lojni te guibäz ni najc nol, lojni caj te lajni ni nacoob, nani rutru racbeedi, xtebtis nani xcaꞌni.”
\s Rediidx nani rniini lo rexpejṉ guidoo ni yuꞌ Tiatira
\p
\v 18 Dxejcti najni loä:
\p ―Bacuaa rediidxre lo xangl Dios xten guidoo ni yuꞌ Tiatira: “Xiꞌn Dios nani rbebajl balojni, ni rdimbichaꞌ niꞌni siꞌc bronz, niꞌc rnii rediidxre lojtu:
\v 19 Ananä xtzuuntu, sanälajztu saꞌtu, nanä xho rililajztu xtidxä, xho racnäjtu resaꞌtu, näjza xho rsiudzuꞌtztu, runduxhtu huant. Nanäza cayujntu dzunroru ṉaj loj ni bejntu che guslojtu.
\v 20 Niluxh yuꞌ xhicuent rdxeꞌchä lojtu. Rcäjbtu riuꞌtu loj te gunaa ni laa Jezabel. Laani rniisini najcni te profeꞌt, gunaa ni rnii xtidx Dios, rusgueetisni bejṉ. Luxh xcäḻruseedni cagusgueeni rexpeṉä nani ahuililajz xtidxä, te ṉaj rujnreni cosguijdx, siꞌc yäḻresnäj ni di gac chäälni, rajwzareni nani gurej lo dxan xten rebanäjb.
\v 21 Aguläzä xchej te gusiechlajzni, gusaanni gunni dojḻ, luxh naaddini gusiechlajzni xcuent redzunguijdx ni rujnni.
\v 22 Luxh palga laani dini gusaan gunni redzuun nani rujnni, narä siguixäni, gudedä te yäḻracxhuro. Luxh sutedä trabajwduxh guiraa renani bennäjni dzunguijdx palga direni gusiejch lajzreni, palga direni guchaa xmoodreni.
\v 23 Sugutxhiä, sunitloä rexiꞌn gunaaga, te siꞌc gacbee guiraa rebejṉ ni yuꞌ neṉ reguidoo narä nacä ni rulaꞌtz rexhigab ni yuꞌ xcäriejnreni, näjza yäḻrililajz ni yuꞌ neṉ lastooreni. Te gacbeezareni narä sunidxä lo tejgatu ni riäjḻ xcaꞌtu xcuent redzuun ni rujntu.
\v 24 Dxejc loj guiraa reni yuꞌ lo guedx Tiatira, laꞌtu ni di guirinajl xnezyuj Jezabel, laꞌtu ni di gumbee nani rniireni najc recosduxh xten beṉdxab, xhetru rniädi lojtu, dirunä gutalä xtzuuntu.
\v 25 Coḻyapdzuꞌtz rextidxä nani arajptu dxejli ni guibisacä lojtu.
\v 26 Nani gun gaan lo dojḻ, näjza nani cagusoob xtidxä dxe lultli, lojni sudedä yälrnibee te guinibeeni renacioṉ.
\v 27 Siꞌcni baniidx Xtadä yäḻrnibee loä, sudedä yäḻrnibee lojni, te guinibeeni guiraa rebeṉ guedxliuj, gunnäjni yäḻguxhtis lojreni te barguiib siꞌc rujn ni runchee guesbajṉ, rliaꞌni guiraa regues nani xhet sajcdi.
\v 28 Sunidxäza baleꞌ xhaguibaa ni rii rsildoo (ni säloj guibaṉnäjnu Dios).
\v 29 Nani rlajz cuadiajg sucuadiajgni diidx ni rnii Sprit Dxan xten Dios loj reguidoo.”
\c 3
\s Rediidx nani rniini lo rexpejṉ guidoo ni yuꞌ Sardis
\p
\v 1 Dxejcti najni loä:
\p ―Bacuaa rediidxre lo xangl Dios xten guidoo ni yuꞌ
Sardis: “Siꞌc naj nani rajp guigajdz Sprit xten Dios
näj guigajdz rebal xhaguibaa: Narä nanä guiraa redzuun
nani rujntu, rnii rebejṉ nabajṉtu, niluxh narä nanä ascanu
agujttu, dirutu gun xtzunä.
\v 2 Coḻguibajṉ, coḻgulaꞌtzru nani rapsijctu xcuent rextidxä
nani ameer nitloj neṉ lastootu. Narä ruhuiä ditu niunsaꞌc
dzuun xtenä nez loj Dios.
\v 3 Coḻgusnaj lajztu rediidx ni basuleꞌreni lojtu, nani
abacuadiajgtu, coḻgusoob rediidxga, coḻgusiech lajztu.
Palga ditu guibajṉ, palga ditu guchaa xmoodtu, sidzuṉä
nez lojtu siꞌc te gubaan, nicla gaantu coṟ guidzuṉä lojtu.
\v 4 Niluxh yuꞌ gaiisi bejṉ lo guedx Sardis nani naya,
nani gajdreni gun dojḻ. Sajcwreni ladnolbäj te sanäreni
narä xhaguibaa, saꞌcsi laareni säbyäjḻreni.
\v 5 Nani gun gaan lo dojḻ, niꞌc sajc gacwni ladnol, luxh
dizana gucheꞌnä lajni loj xlibr cadro caj laj renani
sibajṉnäj Dios par tejpas. Sicäpäza nez loj Xtadä näjza
nez loj guiraa rexquixhajgni, bejṉga najc rexpeṉä.
\v 6 Nani rlajz cuadiajg diidx, sucuadiajgni diidx ni
rnii Sprit Dxan xten Dios loj reguidoo.”
\s Rediidx nani rniini lo rexpejṉ guidoo ni yuꞌ Filadelfia
\p
\v 7 Dxejcti najni loä:
\p ―Bacuaa rediidxre lo xangl Dios xten guidoo yuꞌ Filadelfia:
“Nani najc dxan, nani najc guliipac, nani rajp xliäii
toDavid (ni säloj guiragajc yäḻrnibee), nani che ruxhalni,
rut rusäuudi, nani che rusäuuni, rut ruxhaldi, laani rniini
diidxre lojtu:
\v 8 Narä nanä xhiniꞌc rujntu. Siꞌc te puert ni naxhal,
ni rut rusäudi, siꞌcza sunidxä yäḻrnibee lojtu te gusuleꞌtu
xtidxä, rutliidi sajc gusäuu roꞌtu. Mase guxii nadip-nadaantu,
atu canii xtidxä, ditu cuatzlajz xtidxä.
\v 9 Suhuiitu xho gunä rebejṉ ni yuꞌ lo guidobäz xten
beṉdxab. Rniisireni najcreni xpejṉ Israel, luxh direni
gac; rusgueereni bejṉ. Narä sunäpac jiädzuxhijbreni
nez lojtu, sunäza gacbeepacreni sanälazduxhä laꞌtu.
\v 10 Saꞌcsi basoobtu xtidxä ni gunibeä sutijptu, naꞌc
jieedtu, niꞌcni narä sacnää́zatu che guidzujṉ dxej tedtu
trabajw. Luxh oṟga ameer guidzujṉ lo guideb guedxliuj,
luxh sidejd guiraa rebeṉ guedxliuj trabajw, te guibee
rebeṉsaꞌc lo rebeṉ guedxliuj.
\v 11 Narä di gaclaa jiäḻä; gopdzuꞌtz ni rajptu, te rut
gudzucajdi ni gunidxä xcaꞌtu.
\v 12 Nani gun gaan lo dojḻ, narä gunäni siꞌc te pilajr
neṉ xquidoo Xtioozä, nalajznu, sajcni te bejṉ nani gac
guinibee cadro yuꞌ Dios. Sibajṉni roꞌc par tejpas, diruni
guirii roꞌc. Lojni gucuaä laj Dios näjza laj guejdx
xten Dios ni najc Jerusaléncoob, nani guirii xhaguibaa
cadro yuꞌ Dios; lojni sucuaäza laä ni najcza nacoob
saꞌcsi najcni xpeṉä.
\v 13 Nani rlajz cuadiajg diidx, sucuadiajgni ni rnii
Sprit Dxan xten Dios loj reguidoo.”
\s Rediidx nani rniini lo rexpejṉ guidoo ni yuꞌ Laodicea
\p
\v 14 Dxejcti najni loä:
\p ―Bacuaa rediidxre lo xangl Dios xten guidoo ni yuꞌ
Laodicea: “Nani laa Amén (ni säloj sugacni siꞌc), nani
najc testiigw ni rniliipac, ni di cuääz guiniini didxliiga,
nani guläxtiej guedxliujre näj guiralii ni benchee Dios,
laani rniini scree:
\v 15 Nanä redzuun ni cayujntu. Ditu sasaꞌc lo xnezyuä,
dizatu cuälaz xnezyuä. ¡Maläii guntu tejni o steeni!
\v 16 Niꞌcni, saꞌcsi najctu siꞌc nistiib, ditu gac siꞌc
nisnajḻ, niclaza gactu siꞌc nislaa, sibäroꞌä laꞌtu.
\v 17 Saꞌcsi rniilu: Riꞌcw narä, rapä xhidalduxh xhixtenä,
xhet rquinädi. Luxh dilu gan xhet rajpdilu, alga najclu
beṉ gubijn, te beṉ probduxhlu, di lojlu jien, luxh sugaꞌlu
xhabäälu nez lo Dios.
\v 18 Niꞌcni rulidxälu siilu loä oor xtenä nani agudejd
lo guiboo te gaclu riꞌcw; gusii loä ladnol gacwlu, te
di guitujylu suulu xhabäälu; gusiiza unguent loä te
chää balojlu, te jieṉ lojlu.
\v 19 Rebejṉ nani sanälazä, reniꞌc rulidxä, runäza riareni
che et laadi rujnreni. Niꞌcni coḻsäblajz; coḻgusiejch
lajztu.
\v 20 Coḻhuii, ana sugaꞌä roxläꞌ lastootu, cagusezä, cabedxaꞌä.
Palga yuꞌ chu tejtu ni jiejn diajgni xseꞌä, guxhalni
xpuert lastooni, siuꞌä lastooni, te gacnää́ni, te guibaṉsaꞌczani
nez loä.
\v 21 Loj nani gun gaan lo dojḻ, lojni gudedä guinibenäjni
narä xhaguibaa, saꞌcsi näj narä abenä gaan lo dojḻ, niꞌcni
gurenää́ Xtadä cadro rnibeeni xhaguibaa.
\v 22 Nani rlajz cuadiajg diidx, sucuadiajgni diidx ni
rnii Sprit Dxan xten Dios loj reguidoo.”
\c 4
\s Caläꞌpreni xpalaꞌn Dios xhaguibaa
\p
\v 1 Che gulujx bacuaä rediidxga, guläsä loä, bahuiä astoo
naxhal ro puert xhaguibaa. Dxejcru gunii xseꞌ nani biejn
diagä ganiddoo, nani riejn siꞌc xseꞌ te trompet, najni
loä:
\p ―Huäꞌp, gudaa ree, te guluiä lojlu recos ni churu gac
che luux gac recosre.
\p
\v 2 Lagajc dxejc astoocanu siꞌcni huij sprit xtenä
xhaguibaa. Roꞌc bahuiä te yagxhilro cadro rbej nani
rnibee xhaguibaa, luxh roꞌc sobgaꞌ nani rnibeeni.
\v 3 Nani sobgaꞌ lo yagxhilga, rieṉni siꞌc te guisaꞌc
ni rbebalsejs, siꞌc reguisaꞌc ni laa jaspe, näj cornalina.
Guideb gabi yagxhil cadro rnibeeni dejd te xquitgubijdx
ni rbebalsejs siꞌc guisaꞌc ni laa esmeralda.
\v 4 Guideb gabi cadro rnibeeni sugaꞌ sgaḻbitajp yagxhil,
loj reyagxhilga sobgaꞌ gaḻbitajp rebeṉgool, najcwreni
ladnol, yuꞌ coroṉ oor yejc tejgareni.
\v 5 Nez lo yagxhilro cadro rnibeeni ṟii reyäḻrdinyaꞌ
näjza guzii. Nez loj cadro rnibeeni cayaḻguij gajdz
bajl ni najc gajdz Sprit Dxan xten Dios.
\v 6 Nez loj cadro rnibeeni yuꞌ astoocanu te nisdoo
ni rieṉ siꞌc te guihuanro, rdimbichasejsni.
\p Galäii yagxhilroga näjza guideb gabini sugaꞌ tajp
man, guideb nez lojreni näjza nez dejtzreni yuꞌ balojni.
\v 7 Manganidga najc siꞌc te lioṉ; man ni rojpga najc
siꞌc te gonbäz; man ni riojṉga rujn lojni siꞌc rujn
loj te niguii; man ni rdajpga najcni siꞌc te bisiro
cagutajt xhaguibaa.
\v 8 Niluxh guidap remanga tejgareni yuꞌ xhoꞌp xhigareni,
guideb gabireni, näj nez neṉreni liguidxa balojreni, niluxh
direni gusilajz, dxej-yääl caniireni:
\q Dxan, dxan, dxan najc Dad Dios ni rajp yäḻrnibeduxh,
\q nani yuꞌ galooli, nani yuꞌ ṉaj, nani churu jiääd.
\p
\v 9 Guidap remanga rliäꞌpreni xpalaꞌn Dios, rusuxhijbreni
rajṉrenini, rdeedzareni xquixtios loj nani rnibee par
tejpas.
\v 10 Dxejc guigaḻbitap rebeṉgool, suzuxhijbzareni loj
nani rbej lo yagxhilro, te gaṉreni nani nabajṉ par tejpas.
Sucuaareni xcoroṉreni nez loj xyagxhilroni, siniireni
lojni, säjpreni:
\q
\v 11 Dad Dios baxhuaannu, Guejbpaclu riäjḻ xcaꞌ guiraa
rebalaꞌn, guiraa reyäḻruzuxhijb, guiraa reyäḻrnibee,
\q saꞌcsi Guejblu guläxtiej guiraꞌti nani yuꞌ ṉaj,
\q yuꞌreni saꞌcsi rlajz Guejblu chureni,
\q niꞌcni benchee Guejblu guiraareni.
\c 5
\s Te guijtz näj te ni najc Xiil xten Dios
\p
\v 1 Dxejcru narä Juan bahuiä lo nani sobgaꞌ lo yagxhilroga.
N̲aani ladbee caꞌni te libr, najcni siꞌc te biliu guijtz.
Caj diidx nez lojni caj diidx nez dejtzni, nadxeꞌni, caj
gajdz seii lojni.
\v 2 Dxejcti bahuiä lo te xangl Dios ni nadipduxh, dip
guniini, najni:
\p ―¿Chuniꞌc riäjḻ guxhal guijtzre? ¿Chuniꞌc riäjḻ gutiäjs
reseiire?
\p
\v 3 Niluxh nicla tej bejṉ di nidxäjl ni riäjḻ gutiäjs
reseiiga te guxhalni guijtzga; nicla xhaguibaa, nicla
lo guedxliujre, nicla xhajiät nez neṉ guedxliuj. Niclaza
nidxäjl chu niajc nuhuii lo guijtzga.
\v 4 Narä ronduxhä saꞌcsi nicla tej rut riäjḻdi gutiäjs
reseiiga, niclaza ni riäjḻ goḻ guijtzga, niclaza ni riäjḻ
fiitis lo guijtzga.
\v 5 Dxejcti gunii te beṉgool loä, najni:
\p ―Naꞌcru goonlu. Bahuii gan, niguii ni rniireni Lioṉ,
xagdoo toJudá, xagdoo toDavid, abejnni gaan lo yäḻgujt
niꞌc ṉaj riäjḻ guxhalni guijtzga, gutiäjszani guigajdz
reseiiga.
\p
\v 6 Dxejc bahuiä nez cadro sugaꞌ yagxhilroga näj guidap
remanga, näj cadro sugaꞌ guiraa rebeṉgool luxh te galäiiga
sugaꞌ tej ni najc Xiil xten Dios, astoo abaguꞌtrenini.
Sojb gajdz xcaꞌchni näjza gajdz balojni, ni najc gajdz
Sprit xten Dios nani ruxhaḻni guiraa nez lo guedxliuj.
\v 7 Laani gubigni, cuaꞌni guijtzga, guläänini ṉaa ladbee
xten nani sobgaꞌ lo yagxhilroga canibee.
\v 8 Che cuaꞌni guijtzga, guidap remanga näjza guigaḻbitap
rebeṉgool bazuxhijbreni nez loj Xiilga. Tejga rebeṉgoolga
caꞌ te arp, caꞌzareni taz oor guidxa te ni najc siꞌc
yaal. Yaalga najc guiraa reyäḻrbejdx, yäḻrniab xten rexpejṉ
Dios.
\v 9 Cayoḻzareni te dicoob ni najc scree:
\q Guejblu sacduxh,
\q riäjḻpac xcaꞌ Guejblu guijtzga,
\q gutiäjs Guejblu reseiiga, saꞌcsi baguꞌt rebejṉlu,
\q näjza xtiejnlu gudijx xcuent bejṉ lo Dios.
\q Gudijxlu xcuent bejṉ ni najc garen-garen ṟaz,
\q ni rnii garen-garen didxsaj,
\q ni siääd garen-garen guejdx lo garen-garen ladxbejṉ.
\q
\v 10 Badeedlu gacreni ṟeii näjza bixhojz lo Dios.
\q Laareni sinibeereni rebeṉ guedxliuj.
\p
\v 11 Che bahuiä, biejn diagä xseꞌ xhidalduxh xangl Dios
ni sugaꞌ guideb gabi yagxhilro cadro rbej nani rnibee,
näjza xseꞌ guidap reman, näjza xseꞌ guiraa rebeṉgool.
Luxh di gacdi guigab xangl Dios ni treꞌ roꞌc saꞌcsi
xhidalduxhtej najcreni, xhidalduxh miyoṉ najcreni.
\v 12 Dipduxh najc xseꞌreni, caniireni scree:
\q Sacduxh Xiil nani baguꞌtreni,
\q niꞌc riäjḻ xcaꞌni yäḻrnibeduxh, yäḻrapduxh, yäḻnanduxh,
yäḻmilagwr.
\q Riäjlza guiliäꞌpnu xpalaꞌnni, guzuxhijbnu lojni gaṉnuni,
gudeednu xquixtios lojni.
\p
\v 13 Dxejcti biejn diagä xseꞌ guiragajcreni, guiraa
reni benchee Dios ni yuꞌ xhaguibaa, näj guiraa reni yuꞌ
loj guedxliujre, näjza guiraa reni yuꞌ xhajiät nez neṉ
guedxliuj näj lo nisdoo, biejn diagä caniireni scree:
\q Loj nani sobgaꞌ lo yagxhilro cadro rnibeeni,
\q näjza loj ni najc Xiil xten Dios, laatisni sacduxhni,
\q guiliäꞌpnu xpalaꞌnni, guzuxhijbnu nez lojni gaṉnuni,
\q gäbzanu rinibeeni par tejpas.
\p
\v 14 Dxejcti guidap remanga rnigajcreni scree:
\p ―Sugacni siꞌc.
\p Dxejcti guigaḻbitap rebeṉgool bazuxhijbreni nez loj
nani nabajṉ par tejpas, gojṉrenini.
\c 6
\s Guigajdz reseii
\p
\v 1 Dxejcti bahuiä loj ni najc Xiil xten Dios. Batiäjsni
tej seiiga. Biejn diagä gunii tej lo guidap remanga,
luxh che guniini riejn xseꞌni siꞌc che ni canii guzii,
najni loä:
\p ―Gudaa te fiilu.
\p
\v 2 Dxejc bahuiä lo te cabai nol. Nani bijb dejtzni
caꞌ te arcw nani rucuaa fleꞌch. Badeedreni te coroṉ
lojni. Biriini cayujnni gaan te chanuutis gunni gaan.
\p
\v 3 Che batiäjsni ni rojp seiiga, biejn diagä gunii
ni rojp manga, najni loä:
\p ―Gudaa te fiilu.
\p
\v 4 Dxejc bahuiä lo te cabai xniaa. Loj nani bijb cabai
xniaaga badeedreni yäḻrnibee gudzucajni yäḻnadoo, yäḻrbedxilajz,
lo guedxliujre, te juꞌt saꞌ rebejṉ. Badeedreni te spadro
cuaꞌni.
\p
\v 5 Dxejcti che batiäjsni ni riojṉ seiiga, biejn diagä
gunii ni riojṉ manga, najni loä:
\p ―Gudaa te fiilu.
\p Dxejc bahuiä lo te cabai yas. Nani bijbni naazni te
balans.
\v 6 Biejn diagä astoo galäii guidap remanga, birii xseꞌ
te ni canii scree:
\p ―Tej kiḻ xob xcaꞌlu gunlu dzuun tebdxej; choṉ kiḻ
salbaad xcaꞌlu gunlu dzuun tebdxej. Niluxh naꞌc guhuaḻlu
bin niclaza seꞌt.
\p
\v 7 Dxejcti che batiäjsni ni rdap seiiga, biejn diagä
gunii ni rdajp manga, najni loä:
\p ―Gudaa te fiilu.
\p
\v 8 Dxejc bahuiä lo te cabai gojtz. Nani bijbni laa
yäḻgujt, luxh dejtzni siädnalgajc ni rnibee gabijl. Gulaꞌni
rebejṉ ni reꞌ lo guedxliujre gujcreni tajp galaꞌ, dxejc
loj redee badeedreni guinibeereni lo te cuaa rebeṉguedxliuj
te juꞌtreni rebejṉga con spaad, näj yäḻrliaan, näj yäḻracxhuu,
näjza remanduxh ni yuꞌ dajn.
\p
\v 9 Dxejcti che batiäjsni ni rajc gaii seiiga, bahuiä
nez niꞌ xpiändxan Dios, roꞌc nagaꞌ xaim rebejṉ nani baguꞌtreni
saꞌcsi huililajzreni xtidx Dios, näjza saꞌcsi gusutijpreni
basuleꞌreni xtidx Dios.
\v 10 Dipduxh caniireni, canabreni lo Dios, räjpreni:
\p ―Dad, ni najc Dxan, ni najc guliipac. ¿Gucli cuääz, gaclaa
gun Guejblu yäḻguxhtis loj reni baguꞌt nuure lo guedxliuj
te quiixreni ni bejnreni?
\p
\v 11 Dxejcti cuaꞌreni te ladnolbäj gojt tejgareni.
Dxejc räjpreni lojreni cuäzsijcreni, gusilajzreni, laḻ
ni guizaꞌ resaꞌreni ni rusuleꞌ xtidx Dios, ni churu guguꞌtreni
sigajc baguꞌtreni laareni.
\p
\v 12 Bahuiäza cheni batiäjsni ni rajc xhoꞌp seiiga,
luxh gujc te xuduxh, bigasboo loj gubijdx siꞌc te ladyas,
sas bäii gujc guidebni siꞌc rejn.
\v 13 Rebajl ni yuꞌ xhaguibaa bitejbreni lo guedxliujre,
siꞌc rtejb rebetz yagxhejṉ che rusniib te beduxh yajgga.
\v 14 Dxejcti gunitloj guibaa siꞌcni rnitloj te guijtz
che ṟeꞌni, rajcni te biliu. Guiraa redajn näjza reyuj
ni reꞌ galäii lo nisdoo biniibreni, bidxaa xlajdreni.
\v 15 Niꞌcni guiraa rebeṉ guedxliuj, rebejṉ nani rnibee,
näjza rebeṉro, näjza recapitán, näjza rebeṉ rapduxh, näjza
rebeṉ ni nadiplajzreni, näjza remos, näjza renani rut
lojdi yuꞌreni, guiragajcreni baxuṉreni, huicuatzlojreni
neṉ rebiliää neṉ redajn.
\v 16 Dxejc räjpreni loj redajn, loj reguilaj:
\p ―Coḻguitejb yejcnu, coḻgucuaꞌtz nuure loj nani rbej
lo yagxhilro xhaguibaa näjza loj yäḻguxhtis xten nani
najc Xiil xten Dios.
\v 17 Saꞌcsi abidzujṉ dxero xten xcäḻguxhtisni, ¿chuniꞌc
sajc suu nez lojni?
\c 7
\s Tegayuu tiubitajp miḻ rexpejṉ Israel
\p
\v 1 Dxejcti bahuiä lo tajp xangl Dios ni sugaꞌ loj
guidajp laad guedxliuj. Caguscuääzreni guidajp rebej
xten guedxliuj te xhet bejdi guibiꞌ lo guedxliuj nicla
lo nisdoo niclaza yejc reyajg.
\v 2 Bahuiä lo stee xangl Dios, ni siääd nez cadro rliejn
gubijdx, caꞌni seii xten Gueb Dios ni nabajṉ par tejpas.
Dipduxh guniini lo guidap xangl Dios ni rajp yäḻrnibee
te gunreni daan lo guedxliuj, näjza lo nisdoo.
\v 3 Räjpni lojreni:
\p ―Guläzsijctero, laḻ ni guicuaanu te seen lo cuaj reni
najc xpejṉ Dios, te dxejcru sajc guntu daan lo yuj, näj
loj nisdoo, näj loj reyajg.
\p
\v 4 Dxejcti biejn diagä najreni bal bejṉ guyuꞌ seenga
lo cuajreni, basaꞌreni tegayuu tiubitajp miḻ bejṉ ni
bibee loj rexpejṉ Israel.
\v 5 Loj rexpejṉ Judá bibee tzubitioꞌp miḻ; loj rexpejṉ
Rubén bibee tzubitioꞌp miḻ; loj rexpejṉ Gad bibee tzubitioꞌp
miḻ;
\v 6 loj rexpejṉ Aser bibee tzubitioꞌp miḻ; loj rexpejṉ
Neftalí bibee tzubitioꞌp miḻ; loj rexpejṉ Manasés bibee
tzubitioꞌp miḻ;
\v 7 loj rexpejṉ Simeón bibee tzubitioꞌp miḻ; loj rexpejṉ
Leví bibee tzubitioꞌp miḻ; loj rexpejṉ Isacar bibee
tzubitioꞌp miḻ;
\v 8 loj rexpejṉ Zabulón bibee tzubitioꞌp miḻ; loj rexpejṉ
José bibee tzubitioꞌp miḻ; loj rexpejṉ Benjamín bibee
tzubitioꞌp miḻ.
\s Beṉguixhuj ni najcw ladnolbäj
\p
\v 9 Dxejcti bahuiä lo xhidalduxh bejṉ, beṉguixhuj, nicla
tej bejṉ digacdi gulabreni. Garen-garen ladx-bejṉ siäädreni,
garen-garen najc lajdxreni, näj ṟaz xtenreni, näj xtiidxreni.
Sugaꞌreni nez loj yagxhilro xten ni rnibee, näjza nez
lojni ni najc Xiil xten Dios. Najcwreni ladnolbäj, caꞌzareni
zijṉ.
\v 10 Dipduxh rniireni, räjpreni:
\q Dios ni rnibee lo yagxhilro, näjza nani najc Xiilre,
\q basḻaareni nuure lo xtojḻnu.
\p
\v 11 Sugaꞌza guiraa rexangl Dios guideb gabi yagxhilro
cadro rnibeeni, näjza guideb gabi rebeṉgool näjza guidap
remanga, dxejcti bazuxhijbreni, basajbreni lojreni nez
lo Dios,
\v 12 räjpreni:
\q Sugacni siꞌc. Loj Xtiostisnu coḻyeꞌtz sacduxhni;
\q coḻguiliäꞌp xpalaꞌnni;
\q laatisni rajpni yäḻnajn;
\q lojtisni coḻgudeed xquixhtios, laatisni coḻgaṉ,
\q coḻsuxhijb lojni; laatisni rajpni yäḻrnibee näjza yäḻmilagwr.
\q Sugacni siꞌc par tejpas.
\p
\v 13 Dxejc gunii te beṉgool loä, najni:
\p ―Renani najcw reladnolbäjre, ¿chu najcreni? ¿Casiäädreni?
\p
\v 14 Dxejcti räpä lojni:
\p ―Dad, anajn Guejblu.
\p Dxejc najni loä:
\p ―Redee najc renani agudejd yäḻtrabajwduxh, renani abia
rextojḻreni saꞌcsi xtiejn Xiil xten Dios agudijx xtojḻreni.
\v 15 Niꞌcni sugaꞌreni nez loj yagxhilro xten Dios dxej-yääl
cayujnreni xtzuunni neṉ xquidooni. Niꞌcni sacnäj nani
sobgaꞌ lo yagxhilroga guiraa renani sugaꞌ nez lojni,
sunäjtisni laareni.
\v 16 Dirureni guiliaan, niclaza jiojḻreni, diza gubijdx
guzeꞌc lojreni, dizareni gacnanlaa.
\v 17 Saꞌcsi nani najc Xiil xten Dios ni sobgaꞌ galäii
loj yagxhilro xten Dios, laani cayajpnireni siꞌc xilbäz,
sinänireni cadro yuꞌ nisya ni rudeed yäḻnabajṉ par tejpas.
Suspijdz Dios nisbee balojreni, dirureni goon par tejpas.
\c 8
\s Ni rajc gajdz seiiga
\p
\v 1 Che batiäjsni ni rajc gajdz seiiga, gucdxi xhaguibaa
siꞌcti med oṟ.
\v 2 Dxejcti bahuiä loj guigajdz xangl Dios ni sugaꞌ
nez loj Dios. Lojreni badeedreni gajdz trompeꞌt.
\v 3 Dxejctiru biääd stee angl, caꞌni te bacue ni najc
ganax oor, bazujnini nez loj piändxan. Badeedreni lojni
naclejn yaal te cachaagnini loj guiraa rextidx xpejṉ
Dios ni rniireni che rbedx-rniabreni lo Dios, te checni
lo piändxan ni najc ganax oor, ni yuꞌ nez loj yagxhilroga.
\v 4 Dxejcti gujxhga nägajc rextidx rexpejṉ Dios, birii
ladsṉaa xangl Dios ni caꞌ bacue, huäꞌpreni nez loj Dios.
\v 5 Dxejcti lagajc anglga cuaꞌni guiboo ni dzuub lo
piändxanga, bachajni bacue, dxejcti baslojnini lo guedxliuj.
Dxejc guyuꞌ te guziduxh, bidinyaduxh, gujcza te xuduxh.
\s Retrompeꞌt
\p
\v 6 Dxejcti guigajdz rexangl Dios ni caꞌ guigajdz retrompeꞌt,
guzusiṉreni te guisloj goḻreni retrompeꞌtga.
\p
\v 7 Che biḻ trompetganid, guixob näj guiboo nuꞌchreni
rejn gusloj cayajbreni loj guedxliuj. Dxejcti huejc
ni riojṉ laꞌ guedxliuj, huejcza ni riojṉ laꞌ reyajg näjza
guiralii recuaan.
\p
\v 8 Che biḻ ni ṟojp xangl Dios trompeꞌt ni caꞌni, ascanu
yuꞌ chu bacuaani biajb siꞌc te danro ni cayejc loj nisdoo.
Dxejcti gujc ni riojṉ laꞌ nisdoo siꞌc rejn.
\v 9 Dxejcti gujt ni riojṉ laꞌ rebäjl näj guiraa reman
ni yuꞌ loj nisdoo. Gunitlojza ni riojṉ laꞌ rebarcw ni
sazaj lo nisdoo.
\p
\v 10 Che biḻ ni riojṉ xangl Dios trompeꞌt ni caꞌni,
biajb te balro xhaguibaa, cayejcni siꞌc te balguejd.
Bitejbni loj ni riojṉ laꞌ regueuu, näjza cadro rliejn
nis.
\v 11 Laj bajlga najc Ajenjo, ni säloj te cos ni naṉladuxh.
Ni riojṉ laꞌ nis gujc nis naṉladuxh. Dxejcti gujt xhidalduxh
bejṉ xcuent nisnaṉlaaga.
\p
\v 12 Che biḻ ni rdajp xangl Dios trompeꞌt ni caꞌni,
guxhijṉ ni riojṉ laꞌ gubijdx, näjza ni riojṉ laꞌ bäii,
näjza ni riojṉ laꞌ rebal xhaguibaa, bicäjyreni. Dxejcti
dirureni guzanij ni riojṉ laꞌ dxej, näj ni riojṉ laꞌ
yääl.
\p
\v 13 Dxejcti bahuiä xhaguibaa, biejn diagä siꞌc te bisij
cagutajt nez galäii xhaguibaa. Biejn diagä cabedxaꞌni,
caniini rediidxre:
\p ―¡Aii! ¡Aii! ¡Aii! Riaduxhä rebeṉ guedxliuj che guisloj
goḻ schoṉ rexangl Dios retrompeꞌt ni caꞌreni. Sidejd
rebeṉ guedxliuj trabajwduxhru.
\c 9
\p
\v 1 Che biḻ ni rgaii xangl Dios trompeꞌt, bahuiä lo
te bal xhaguibaa ni bitejb lo guedxliujli. Bajl xhaguibaaga
cuaꞌni liäii ni ruxhal roꞌ gabijl.
\v 2 Baxhaltini roꞌ gabijl, dxejc huäjs te gujxh roꞌni
siꞌc räjs gujxh roꞌ te orguiboro. Dxejcti gujxhga basäuni
loj gubijdx, gudxajni lo bej.
\v 3 Dxejcti lo gujxhga birii betzsu gusujreni guideb
lo guedxliuj. Cuaꞌreni yäḻrnibee gacreni nialajz siꞌc
nialajz renaxejb.
\v 4 Cuaꞌ remanga yäḻrnibee naꞌc gunreni daan loj reguixaꞌ,
loj recuaan, loj reyagbajṉ; rebejṉtis nani xhet beedi
xten Dios caj lo cuajreni, reniꞌc gusacsíreni.
\v 5 Cuaꞌreni yäḻrnibee naꞌc juꞌtni bejṉ, gaii bäii gusacsíreni
xcäḻnayanreni bejṉ. Luxh xcäḻnayanreni najc siꞌc yäḻnayan
cadro rauyaꞌ te naxejb te bejṉ.
\v 6 Neṉ redxejga, siguiil rebejṉ yäḻgujt, luxh direni
guidxälni. Luxh mase rlajzreni guetreni, sibicaj yäḻgujt
lojreni.
\p
\v 7 Rebetzsure najc siꞌc recabaii ni suchee te chääreni
lo gueṟ. Yejcreni yuꞌ te ni najc siꞌc te coroṉ oor;
luxh lojreni rujn siꞌc loj rebejṉ.
\v 8 Xquichejcreni siꞌc najc xquichejc gunaa; reläjyreni
najc siꞌc läjy lioṉ.
\v 9 Luxh guideb tiejxhreni caj siꞌc guiib ni rusäudzuꞌtzreni.
Rubeduxh rexhigaareni, siꞌc rubej che ruxuṉ xhidalduxh
cabaii näj xcaṟreni che agojl chääreni gueṟ.
\v 10 Xhibaanreni najc siꞌc xhibaan naxejb, xcuchreni
yuꞌ yäḻnayan te gusacsíreni rebeṉ guedxliuj gaii bäii.
\v 11 Yuꞌza ni rnibee lojreni, xangl beṉdxab ni birii
gabijl. Xtidx hebreo laani Abadón, xtidx griegw, laani
Apolión.
\p
\v 12 N̲aj agudejd tej casionroga, ṉaj cayäädx stioꞌpni.
\p
\v 13 Che biḻ ni rxhoꞌp xangl Dios trompeꞌt, biejn diagä
te xseꞌ bejṉ ni lascanu siäädni galäii guidajp recaꞌch
ni caj loj xpiändxan ni nac-chee ganax oor, ni yuꞌ nez
loj Dios.
\v 14 Luxh xseꞌ bejṉga canii loj ni najc rxhoꞌp xangl
Diosga, ni caꞌ trompeꞌt:
\p ―Basḻaa guidap reangl nani caduu nez rogueuu ni laa
Eufrates.
\p
\v 15 Dxejcti basḻaani guidap reanglga te juꞌtreni ni
riojṉ laꞌ beṉ guedxliuj. Luxh gule Dios reanglga parpac
dxejga, bäiiga, ijzga.
\v 16 Biejn diagä bal najc guiraa resoldaad ni rbijb
cabaii: najcreni tioꞌp gayuu miyoṉ.
\p
\v 17 Scree bahuiä lo bacaḻ recabaiiga näjza renani
bijb recabaiiga. Lastoo reni bijb recabaii caj te guiib,
najcni xniaa näj zul näj gojtz. Dxejcru yejc recabaiiga
najc siꞌc yejc te beedz. Roꞌreni carii bajl näj gujxh,
näj sufr.
\v 18 Ni riojṉ cuaa bejṉ gujt xcuent guichoṉ replaag
nani carii roꞌ recabaii, xcuent bajl näj gujxh, näjza
sufr.
\v 19 Recabaii runnäj daan roꞌreni näjza xhibaanreni,
saꞌcsi xhibaanreni najc siꞌc bäḻ, yuꞌ yejcreni, näj niꞌc
runnäjreni daan.
\p
\v 20 Luxh guiraa rebejṉ nani di replaagre nuguꞌt, direni
nusiejch lajzreni xcuent ni cayujn ṉaareni, te rajṉreni
rebeṉdxab, näjza rebanäjb ni nac-chee oor, näjza plaꞌt,
näjza latón, näjza guij, näjza yajg. Luxh rebanäjbga di
gacdi fiireni, di diajgreni jiejn, di gacdi sareni.
\v 21 Diza rebejṉga nusiejch lajzreni xcuent xcäḻruguꞌtreni,
xcäḻrujnreni yäḻbidxaa, xcäḻresnäjreni bejṉ ni di gac
chäälni, niclaza xcäḻgubaanreni.
\c 10
\s Te angl ni caꞌ te guijtz
\p
\v 1 Bahuiä stee xangl Dios ni rajp yäḻrnibeduxh, siädjiäjtni
xhaguibaa, li yuꞌni neṉ bäj, yejcni dejd xquitgubijdx,
luxh lojni najc siꞌc gubijdx. Reniꞌni najc siꞌc tioꞌp
pilajr bajl.
\v 2 Caꞌni te librbäzeꞌ, naxhal libreꞌga. Bazujni niꞌni
ladbee loj nisdoo, bazujni niꞌni ladbäjgw lo yuj,
\v 3 dxejc guredxaduxh anglga siꞌc rbedxaꞌ beedz. Dxejcru
gunii guigajdz guzii sigajcsa.
\v 4 Che gulujx gunii guziiga, narä rlazä nucuaä lo guijtz
nani guniireni, per biejn diagä xseꞌ tej ni gunii xhaguibaali,
najni loä:
\p ―Guluchedzuꞌtz rediidxga nani gunii reguzii, naꞌc gucuaaluni.
\p
\v 5 Angl nani suj niꞌni loj nisdoo näjza loj yuj, guläs
ṉaani ladbee nez xhaguibaa.
\v 6 Guniliini diidx con laj GuebDios ni nabajṉ par
tejpas, ni guläxtiej xhaguibaa näjza guiraa ni treꞌ xhaguibaa;
ni guläxtiej guedxliujre näjza guiraa ni treꞌ lojni;
ni guläxtiej nisdoo näjza guiraa ni treꞌ neṉ nisdoo.
Räjpni:
\p ―Diru redxejre gaclaa.
\v 7 Che guidzujṉtis dxej ni agojl goḻ ni najc rgajdz
xangl Dios ni caꞌ trompeꞌt, dxejc abazaꞌ rextidxxhigaꞌtz
Dios, siꞌc ni basuleꞌ redadeꞌ ni gunii xtidx Dios agujc
xchero.
\p
\v 8 Dxejc gunisac xseꞌ nani gunii xhaguibaali, stehuält
biejn diagä caniini loä, najni:
\p ―Huij, te xcaꞌlu libreꞌ ni naxhal ni yuꞌ ladzṉaa angl
ni suj te laad niꞌni loj nisdoo, stelaad niꞌni lo guedxliuj.
\p
\v 9 Dxejcti huaꞌä lo anglga, räpä lojni:
\p ―Guniidxlu libreꞌga.
\p Laani najni loä:
\p ―Anire, cuaꞌni, gudajwni. Sun nanḻaani xqueꞌlu, niluxh
roꞌlu sajcni nejxh siꞌc dzujn.
\p
\v 10 Dxejcti cuaꞌä libreꞌga lo ṉaa anglga, dxejc gudauäni.
Roꞌä guyuꞌni nejxh siꞌc dzujn, luxh che gudäm̲äni, lacti
guc nanḻaani xqueꞌä.
\v 11 Dxejc najni loä:
\p ―Nanab chasulesaclu xtidx Dios xcuent nani churu gac
loj xhidalduxh bejṉ, näjza guejdx, näjza renani rnii garen-garen
xtiidxreni, näjza loj reṟeii.
\c 11
\s Tioꞌp niguii ni rusuleꞌ xtidx Dios
\p
\v 1 Dxejcti baniidxni loä siꞌc te biquii nani rurejxh. Dxejc guyuꞌ chu naj loä:
\p ―Huisu te charejxhlu xquidoo Dios, näjza piändxan, balabza balti bejṉ rusuxhijb neṉga.
\v 2 Naꞌc gutiexhlu gabi loleꞌ guidooga, saꞌcsi niꞌc acuaꞌ rebeṉzijtni te tiubitioꞌp bäii chaläjsreni guedxdxan siꞌctis ni rlajzreni.
\v 3 Narä sudedä yäḻrnibee lo tioꞌp dadeꞌ ni guinii diidx xcuentä, luxh guideb najcwreni ladyas, susuleꞌreni xtidxä lojreni te miḻ tioꞌpgayuu gayojṉ dxej.
\p
\v 4 Guiroꞌpreni najc siꞌc tioꞌp yag oliib, siꞌc tioꞌp gandilieer ni sugaꞌ nez lo Dios.
\v 5 Palga yuꞌ chu bejṉ rlajz gun latsiaj loj redadeꞌga, sirii bajl roꞌreni te chec nani rdxeꞌch lojreni. Luxh siꞌcpac riäjḻ guet chutis ni rlajz gun latsiajreni.
\v 6 Guiroꞌp redadeꞌga rajp yäḻrnibee te gusäureni xhaguibaa te naꞌc jiajb nisguij guideb neṉ redxej nani cagusuleꞌreni xtidx Dios, rajpzareni yäḻrnibee te guchaareni nis te gacni rejn, rajpzareni yäḻrnibee te jiädgusacsí xhitis plaag lo guedxliuj, siꞌctis huält ni rlajzreni.
\v 7 Che luux gusuleꞌreni xtidx Dios, dxejcti ni najc siꞌc te man nialajz sirii gabijl te jiädchagdijḻni guiroꞌpreni. Sujnni gaanreni, suguꞌtnireni.
\v 8 Dxejcti jiaꞌn guiroꞌp rebeṉgutga lad caii xten guejdx cadro bacuaareni Dad Jesucrist lo crujz. Guejdxroga rbälajzareni Sodoma näjza Egipto.
\v 9 Choṉ dxej garol guiraa rebejṉ ni siääd guedxbäz, ni siääd guedxro, ni najc garen-garen ṟaz, ni rnii garen-garen xtidx guiraa rebejṉ guedxliuj, suhuii loj guiroꞌp rebeṉgutga, direni gusaan guigaꞌtzreni neṉ baa.
\v 10 Guiraa renani nabajṉ lo guedxliujre sibalazduxhreni saꞌcsi gujtreni. Luxh saꞌcsi rbalajzduxhreni, suxhaḻzareni xhi xcaꞌ saꞌreni; saꞌcsi guiroꞌp redadeꞌ ni basuleꞌ xtidx Dios baxhaḻ trabajwduxh lojreni.
\v 11 Che gudejd choṉ dxej garolga, baspaṉsac Diosreni, dxejcti huitiesacreni. Guiraa reni bahuii lojreni, bidxebduxhreni.
\v 12 Dxejcti biejn diajg guiroꞌpreni xseꞌ te ni canii dipduxh desde xhaguibaali, räjpni lojreni:
\p ―Coḻchäꞌp jiaare.
\p Dxejcti huäꞌpreni xhaguibaa lo te za, luxh guiraa renani rdxeꞌch lojreni, bahuiireni huäꞌpreni xhaguibaa.
\v 13 Lagajc oṟga gujc te xuduxh, gurebäꞌn tej lo tzuu laꞌ guejdxga, gujt gajdz miḻ bejṉ lo xu ni gujc roꞌc. Rebejṉ ni biaꞌn roꞌc bidxebduxhreni, guslojreni caläꞌpreni xpalaꞌn Dios ni yuꞌ xhaguibaa.
\p
\v 14 Siꞌctigulujxnirojpcasioon,luxhagojlguidzujṉniriojṉga.
\s Ni rajc gajdz xangl Dios goḻ trompeꞌt
\p
\v 15 Che biḻ ni rajc gajdz xangl Dios trompeꞌt ni caꞌni, dxejc biejn xseꞌ reni dipduxh canii xhaguibaa, cayäjpreni:
\q Xcäḻrnibee guedxliuj agudejd ladzṉaa Dad Dios näjza Jesucrist;
\q luxh laani sinibeeni par tejpas.
\m
\v 16 Gaḻbitajp rebeṉgool nani sobgaꞌ lo troṉ xtenreni cadro rnibee Dios, biabrlojreni nez loj Dios te caläꞌpreni xpalaꞌn Dios.
\v 17 Räjpreni:
\q Xquixtioste Guejblu Dios, nani rajp yäḻrnibeduxh,
\q nani najclu, nani gujclu, nani churu gac,
\q saꞌcsi acuaꞌlu xcäḻrnibeduxhlu te agusloj canibeelu.
\q
\v 18 Bidxeꞌch rebeṉ guedxliuj lojlu,
\q luxh abidzujṉ dxej guidxeꞌchlu lojreni,
\q gunlu yäḻguxhtis rebeṉgut, te gudeedlu cossaꞌc loj rexpejṉlu,
\q lo renani gunii xtidx Dios, lo renani huililajz xtiidxlu, lo renani rusuxhijbni nez lojlu;
\q rebeṉproob sigajc rebeṉro.
\q Abidzujṉza dxej che cuäcajlu renani bejn daan guedxliujre,
\q te nitlojreni par tejpas.
\p
\v 19 Dxejc bixal xquidoo Dios ni yuꞌ xhaguibaa, neṉ guidooga bieṉ te guijn cadro yuꞌ guij cadro caj rediidx ni biaꞌn Dios loj rexpejṉ Israel. Dxejcti lacti bidinyaꞌ, lacti guiniiza reguziro, gujc te xu, dxejc biajb te guixobroduxh.
\c 12
\s Te gunaa näj te ni najc siꞌc te gutiatzro
\p
\v 1 Dxejcti guyuꞌ te senro xhaguibaa: te gunaa ni najcw
siꞌc gubijdx, niꞌni sojb bäii, yejcni yuꞌ te coroṉ ni
nac-chee tzubitioꞌp balxhaguibaa.
\v 2 Gunaare nuxiꞌnni. Rbedxaꞌni saꞌcsi agusloj cayuꞌ
yoob xqueꞌni te gaal xiꞌnni, cadejdni trabajwduxh.
\v 3 Dxejcti bahuiä stee seen xhaguibaa: te manxniaa
ni rujn lojni siꞌc loj te gutiatzro, manduxhni. Yuꞌ gajdz
bitiuyejcni, sojb tzuu xcaꞌchni. Tejga yejcni yuꞌ te
coroṉ, najcreni gajdz coroṉ.
\v 4 Dxejcti xhibaanni cagobxajxhni ni riojṉ laꞌ rebalxhaguibaa,
dxejcti bacuaanireni lo guedxliuj. Dxejcti biädsu manroga
nez loj gunaaga ni ameer gaal xiꞌnni, te gauni xiꞌnni
che gaalni.
\v 5 Dxejcti gojl xiꞌn gunaaga, najcni te niguii, luxh
te bar guiib nungäjḻ guinibenäjni lo guiraa rebeṉ guedxliuj.
Guläsgajcreni bäzga te sanärenini xhaguibaa cadro rnibee
Dios.
\v 6 Dxejcti baxuṉ gunaaga, siini nez loj reyubijdz cadro
yuꞌ te lajt ni basuchee Dios te cuääzni, te roꞌc guyaannini
te miḻ tioꞌp gayuu gayojṉ dxej.
\p
\v 7 Dxejc guyuꞌ gueṟ xhaguibaa, xangl Dios nani laa
Miguejl näj resaꞌni bacuanäjreni gutiatzro. Gutiatzroga
näjza rexanglni gudiḻduxhreni,
\v 8 niluxh direni niujn gaan, luxh di niajcdiru niaꞌn
manga näjza resaꞌni xhaguibaa.
\v 9 Dxejcti bacuaareni manroga näjza resaꞌni lo guedxliujre.
Laani najc ni gujc bäḻ galoroga, ni najc gueb Beṉdxab,
ni laaza Satanás, ni rusguee guideb guedxliujre.
\p
\v 10 Dxejcti biejn diagä xseꞌ te ni canii dipduxh xhaguibaali,
räjpni:
\p ―Abidzujṉ yäḻrusḻaa lo dojḻ, näj yäḻmilagwr, näj yäḻrnibero
xten Dios, näjza yäḻrnibee xten Jesucrist, saꞌcsi agulääreni
bejṉ nani entis rbeꞌc xquej rexpejṉ Dios loj Dios dxej-yääl.
\v 11 Laareni gujc bejnreni gaan loj beṉdxabre, xcuent
xtiejn ni najc Xiil xten Dios, näjza saꞌcsi huililazsaꞌcreni
xtidx Dios, dizareni nidxejb mase niejtzareni.
\v 12 Niꞌcni, guiraa laꞌtu ni yuꞌ xhaguibaa näjza gueb
xhaguibaa, coḻquibalazduxh. Niluxh riaduxhnu renani rbäjz
lo guedxliujre, näjza lo nisdoo, saꞌcsi abiäjt beṉdxab
lo guedxliuj, luxh cadxechduxhni saꞌcsi anajnni guxii
dxej rajpni.
\p
\v 13 Che gucbee gutiatzroga abacuaarenini lo guedxliuj,
birinajlni gunaa nani guyuꞌ xiꞌngaanni te gusacsínini.
\v 14 Dxejc badeed Dios lo gunaaga tioꞌp xhiga xten
bisiro, te gac gutajtni nez lo reyubijdz cadro nac-chee
cadro cuääzni. Choṉ ijz garol guyuꞌni roꞌc, nacuatzlojni
lo bäḻga.
\v 15 Dxejcti roꞌ gutiatzrore birii nis siꞌc te gueuu
te nusloꞌni gunaaga.
\v 16 Dxejc gucnäj guedxliuj gunaaga, baxhal guedxliuj
roꞌni, guꞌni gueuu ni birii roꞌ gutiatzroga.
\v 17 Dxejc bidxechduxh gutiatzroga loj gunaaga, niꞌc
sääni te gucuanäjni sgaii rexiꞌn gunaaga, renani cagusoob
diidx ni gunibee Dios, renani rililajzza xtidx Jesucrist.
\c 13
\s Tioꞌp manduxh
\p
\v 1 Narä gusuä lo yujxh ni treꞌ roꞌ nisdoo, dxejc bahuiä
carii te manro lo nisdoo. Sojb tzuu xcaꞌchni. Dxejc
lo tejga xcaꞌchni yuꞌ te coroṉ. Yuꞌ gajdz bitiuyejcni
cadro caj diidx ni rniyaj Dios.
\v 2 Manduxhre najc siꞌc te beedz, niꞌni najc siꞌc niꞌ
te os, luxh roꞌni najc siꞌc roꞌ te bedzro. Gutiatzroga
badeed xcäḻmilaagwrni lojni, näjza troṉ cadro rbejni,
näjza xcäḻrnibeduxhni.
\v 3 Dxejcti bahuiä te yejcni najc ascanu yuꞌ chu batiuugni
con madxed, ameer guetni, luxh biajc cadro gurujg yejcni.
Niꞌcni rdxeloduxh guiralii rebejṉ guedxliuj, sanajlreni
manduxhga.
\v 4 Bazuxhijbreni gojṉreni gutiatzroga saꞌcsi badeedni
xcäḻrnibeeni lo manduxhga, dxejctiru bazuxhijbreni gojṉzareni
manroga, räjpreni:
\p ―¿Chu stee najc siꞌc manrore, ä? ¿Chu laa ni gac guichagdijḻni,
gucuanäjnini?
\p
\v 5 Yuꞌ chu badeedza lo manroga diidx dxejcti gusloj
caniini guiraloj didx-guyalajz, diidx ni rniyaj Dios.
Yuꞌza chu badeed gaꞌpni yäḻrnibee tiubitioꞌp bäii, gunni
siꞌctis ni rlajzni.
\v 6 Baxhalni roꞌni, guniyaduxhni Dios, guniyajni laj
Dios, näjza xquidoo Dios, nalajznu renani yuꞌ xhaguibaa.
\v 7 Dxejcti yuꞌ chu basaan bacuanäj manroga rexpejṉ
Dios. Bejn manroga gaan rexpejṉ Dios, dxejcti gunibee
manroga guiraa reguedxbäz, näj guiraa rebejṉ ni rnii
garen-garen xtiidxreni, näjza guiraa reguedxroduxh.
\v 8 Dxejcti guiraa rebeṉ guedxliuj sazuxhijbreni, sagajṉreni
manroga, guiraa rebejṉ nani di lajreni nicaj lo libr
xten yäḻnabajṉ xten Xiil nani gujt xcuentreni, saꞌcsi
galooli guirixtiej guedxliuj cuaj lo guijtzre laj guiraa
ni gac xpejṉ Dios.
\p
\v 9 Palga yuꞌ chu rlajz cuadiajgni, sugucuadiagsaꞌcni.
\v 10 Palga yuꞌ chu nungäjḻ jiäuu neṉ latzguiib, siäuupacni.
Chutis ni juꞌt te bejṉ con te madxed, con madxedza guetni.
Niꞌcni renani anumbee Dios, riäjḻ gunreni huant, chanuutis
chalilazsaꞌcreni xtidx Dios.
\p
\v 11 Dxejcti bahuiä loj stee manro, cariini neṉ yuj.
Sojb tioꞌp xcaꞌchni siꞌc xcaꞌch te xiil, rniini siꞌc
rnii te gutiatz.
\v 12 Luxh rnibeezani siꞌcni rnibee manroga lagajc nez
loj manroga, rujnzani rusuxhijb rebeṉ guedxliuj loj manrogalooga
ni gurujc yejcni, luxh biajc yejcni.
\v 13 Manroga ni birii neṉ yuj rujnzani remilagwrro,
rujnni rtejb bal-guiboo xhaguibaali, rtejbni lo guedxliuj
nez loj rebejṉ.
\v 14 Rusgueeni rebejṉ nani nabajṉ lo guedxliuj xcuent
remilagwrro nani rujnni nez loj manrogalooga. Guinibeeni
gun rebeṉ guedxliuj te banäjb siꞌc najc manroga nani
batiuug madxed yejcni, luxh biajcza yejcni.
\v 15 Dxejcti man ni rojpga baspajṉ banäjbga te guinii
banäjbga, dxejcti gunibeeni guet guiraa rebejṉ nani di
guzuxhijb lojni te gaṉrenini.
\v 16 Gunibeezani chu bejṉ te seen lo cuajni o ṉaani
ladbee, guiraa rebejṉ ni xhet rajpdi, guiraa rebejṉ ni
rajp, guiraa reni najc mos, guiraa reni najc lam̲, guiraa
reni najc beṉro, guiraa reni najcza beṉbäz.
\v 17 Gunibeezani digacdi sii, digacdiza gutoꞌ bejṉ palga
xhet seendi caj ṉaani o lo cuajni. Seenga najc laj manga
o numbr xten laj manga.
\v 18 Dee rquiin yäḻnajn. Renani rajp yäḻnajn sugulabreni
xseen manga, numbrga najc siꞌc xnumbr bejṉ; numbr xten
manga najc xhoꞌp gayuu gayoṉbixhoꞌp.
\c 14
\s Dij ni roḻ te gayuu tiubitajp miḻ
\p
\v 1 Che bahuiä stee, bahuiä sugaꞌ Xiil xten Dios yejc
dajn ni laa Sión. Suganäjni te gayuu tiubitajp miḻ bejṉ
nani caj lo cuajreni laj Xiil näj laj Xtadni.
\v 2 Biejn diagä rubej xhaguibaali, rubeduxh, riejnni
siꞌc rubej xhidajl gueuro, näj te guziro; riejnzani siꞌcni
riejn che cayoḻ xhidajl bejṉ ni roḻ arp.
\v 3 Cayoḻreni te dicoob nez loj troṉ cadro rbej nani
rnibee, näjza nez loj guidap reni najc siꞌc man ni nabajṉpac,
näjza nez loj rebeṉgool. Rutliidi gujc bisieeddi dijga,
xtebtis tegayuu tiubitajp miḻ bejṉ nani guḻaa lo rebeṉ
guedxliuj.
\v 4 Reniguiire najc renani gajd xhiṉ con gunaa; nicla
tejreni di niesnäj te gunaa, najcreni beṉ dxan. Laareni
rinajlreni Xiil xten Dios cadrotis sääni. Redee guḻaa
lo rebeṉ guedxliuj siꞌc te gojn lo Dios näjza lo Xiil
xten Dios. Gojnre najc siꞌc gonganid ni rudeed bejṉ
xten te coseꞌch.
\v 5 Nicla tej didx-xhii di guirii roꞌreni, saꞌcsi xhetliidi
xtojḻreni, nayareni sugaꞌreni nez loj troṉ cadro rnibee
Dios.
\s Rediidx nani bazuleꞌ jioṉ rexangl Dios
\p
\v 6 Dxejcti bahuiä loj stee xangl Dios, rutajtni nez
galäii xhaguibaa, siädnäni diidx ni najc par tejpas xten
Dios te gusuleꞌnini loj rebeṉ guedxliuj, guiraa lo reguedxro,
guiraa lo reguedxbäz, loj rebeṉ ni najc garen-garen ṟaz,
nani rnii garen-garen xtiidreni.
\v 7 Dipduxh guniini, räjpni:
\p ―Coḻguidxejb Dios, coḻguiliäꞌp xpalaꞌn Dios saꞌcsi
abidzujṉ oṟ gunni yäḻguxhtis guiraa rebejṉ. Coḻguzuxhijb
loj nani benchee xhaguibaa, näjza guedxliuj, näjza nisdoo,
näjza cadro rliejn nis.
\p
\v 8 Dxejcti siädnajl stee angl nani canii:
\p ―Abiajb, abiajb guejdxroga nani laa Babilonia, saꞌcsi
baquiilni guzojz guiraa reguejdx xten guedxliuj xcuent
xcäḻ-latsiajni, xcuent dojḻ ni bejnni guideb lagaa; najcni
siꞌc reni räꞌ nejp.
\p
\v 9 Dxejc biädnajl ni riojṉ xangl Dios, dipduxh guniini,
Räjpni:
\p ―Palga yuꞌ chu bejṉ guzuxhijb loj manroga o loj banäjb
ni najc siꞌc manroga, o xcäjbni xcaꞌni xseen manro lo
cuajni o lo ṉaani,
\v 10 sidxechduxh Dios lojni, di xcäḻguxhtisduxh Dios
tedcaj lojni. Sidejdpacni trabajwduxh neṉ balro näjza
azufr nez loj rexangl Dios näjza nez loj Xiil xten Dios.
\v 11 Luxh gujxh xten reni cayejc säꞌp nez lojreni guixe-guixee
par tejpas. Digacdi gusilajzreni dxej-yääl, renani guzuxhijb,
reni gojṉ manroga näjza reni gojṉ banäjb ni najc siꞌc
manroga, chutisza ni rcaꞌ seen xten lajni.
\v 12 Niꞌcni renani huililajz xtidx Dios, reni rusoobza
xtidx Dios, ni rinuutis lo xnezyuj Jesucrist, nanab di
guidxajgreni.
\p
\v 13 Biejn diagä xseꞌ te ni caniini loä xhaguibaali:
\p ―Scree bacuaa: “Chicbaa rebejṉ ni guet ṉajli nani
rililajz xtidx Jesucrist.” “Guliini”, naj Sprit Dxan
xten Dios: “Te gusilajzreni, naꞌcru gunreni dzuun, saꞌcsi
anancheenu xhi dzuun bejnreni.”
\s Yäḻnasaꞌc ni rudeed guedxliujre
\p
\v 14 Dxejcti bahuiä treꞌ te bänol, loj bänolga sobgaꞌ
te ni najc siꞌc Xiꞌn Dios ni gujc Niguii. Yuꞌ te coroṉ
ganaxduj oor yejcni, dxejcti ṉaani caꞌni te guiboz ni
caduxh roꞌni.
\v 15 Dxejcti birii te xangl Dios loj xquidoo Dios, dipduxh
caniini loj ni sobgaꞌ loj bäjga, räjpni:
\p ―Basäḻ xquibozlu, batiuug, te batieꞌ yäḻnasaꞌc, saꞌcsi
agojl oṟ guireꞌ yäḻnasaꞌc, guideb guedxliuj aguyajḻni.
\p
\v 16 Dxejcti nani sobgaꞌ lo bäjga basniibni xquibozni,
batiuugni yäḻnasaꞌc ni caj lo guedxliujre.
\p
\v 17 Dxejcti stee xangl Dios birii neṉ guidoo ni yuꞌ
xhaguibaa, caꞌzani te guiboz ni caduxh roꞌni.
\v 18 Dxejcti birii stee xangl Dios nez loj piändxan
xten Dios. Laani rajpni yäḻrnibee lo balro. Dipduxh
guniini, räjpni loj ni caꞌ guiboz ni caduxh roꞌni, räjpni:
\p ―Basäḻ xquibozlu nez niꞌ reyaguub, batiuug guiraa reresim̲
uub ni yuꞌ lo guedxliujre, saꞌcsi aguyajlreni.
\p
\v 19 Dxejc batiuug anglga guiraa reresim̲ uub ni yuꞌ
lo guedxliujre nalajznu rebeṉguijdx, basäḻnireni neṉ
tanc cadro guläjreni yejcni saꞌcsi rdxechduxh Dios lojreni.
\v 20 Dxejcti baläjreni yejc reuub nez orii te guejdx.
Biriiduxh rejn yejcreni, gutiäs rejnga, bidzujṉ rejnga
roꞌli recabaii, gujcni siꞌc che riuꞌ nisro gueuu, biäjtni
siꞌcti choṉ gayuu mil metr guideb gabi cadro baläjreni
yejc reuub.
\c 15
\s Guigajdz xangl Dios näj lult xcäḻguxhtis Dios
\p
\v 1 Dxejcti bahuiä stee senro xhaguibaa, nani bascheloduxh
narä. Bahuiä loj gajdz xangl Dios, tejgareni caꞌ te plaag
ni gusacsí rebeṉ guedxliuj. Redeetis najc lult, saꞌcsi
che ted redee ati agulujx yäḻrdxeꞌch xten Dios.
\p
\v 2 Dxejcti bahuiä loj tej ni najc siꞌc te nisdoo ni
najc siꞌc biidr nuꞌchni bajl. Dxejcti galäii nisdooga
sugaꞌ renani bejn gaan loj manroga näjza lo banäjb ni
najc siꞌc manroga, ni bejnza gaan di nicaꞌreni seen xten
lajni. Caꞌreni arp xten Dios.
\v 3 Cayoḻreni dij xten toMoisés ni gujc xpejṉ Dios,
cayoḻzareni dij xten Xiil xten Dios. Scree najc dijga:
\q Sacduxh, ruscheloj guiraa redzuun ni rujn Guejblu, Dad
Dios, ni rajp guiraa yäḻrnibee.
\q Rujn Guejblu ganax dzunsaꞌc, rnii Guejblu ganax didxlii.
\q Guejblu rnibee loj guiralii reguejdx ni yuꞌ lo guedxliuj.
\q
\v 4 Bahuii, Dad, ¿chu laa ni di guidxejb Guejblu ni di
guiliäꞌp xpalaꞌn Guejblu?
\q Saꞌcsi Guejbtislu najc dxan, niꞌcni guiraa reguejdx
ni yuꞌ guedxliuj siädzuxhijbreni,
\q siädgajṉreni Guejblu,
\q saꞌcsi abaluiloj guiraa rextzunsaꞌcpac Guejblu.
\p
\v 5 Dxejcti bahuiä xhaguibaa, bixal roꞌ yuꞌ ni najc
dxanro neṉ guidoo, cadro yuchee guij cadro caj xleii
toMoisés.
\v 6 Roꞌ yudxanroga birii gajdz xangl Dios ni caꞌ plaag
te gusacsíreni rebeṉ guedxliuj. Najcwreni te ladliṉ
ni najc nolbäj, ni rdimbichaduxh. Dejd siꞌc te cinturoṉ
lastooreni ni najc ganaxduj oor.
\v 7 Dxejcti yuꞌ tajp reni najc siꞌc man nabajṉ ni yuꞌ
nez loj Dios xhaguibaa. Tej reni badeed loj tejga reanglga
te coꞌp ni najc ganaxduj oor. Guidxa tejga rexhijgga
xcäḻguxhtisro Dios nani nabajṉ par tejpas.
\v 8 Gudxaj guidoo ni najc yudxanroruga gujxh ni siääd
xcuent xcäḻmilaagwr, xcäḻrdimbichaduxh xten Dios. Rut
gujcdi biuꞌ neṉ yudxanroruga che gulujxli guiraa replaag
ni caꞌ guigajdz reanglga.
\c 16
\s Rexhijg ni guidxa xcäḻguxhtis Dios
\p
\v 1 Dxejcti biejn diagä xseꞌ te ni canii dipduxh xquidoolini,
caniini loj guigajdz rexangl Dios, räjpni:
\p ―Coḻchäj, coḻchasloj guigajdz rexhijgga lo guedxliuj,
coḻcaꞌ rexhijg ni guidxa xcäḻguxhtis Dios.
\p
\v 2 Anglgaloo ni huij, baslojni ni yuꞌ neṉ xhijg ni
caꞌni lo guedxliuj. Dxejc loj guiraa rebejṉ nani caj
xseen manduxh, reni rusuxhijb, rajṉreni banäjb ni najc
siꞌc manroga, birii tiejxhni te guedxyanduxh ni najc
siꞌc cancer.
\p
\v 3 Dxejc ni rojp anglga baslojni ni yuꞌ neṉ xhijg
ni caꞌni loj nisdoo, te bejnni gubixhloj nisdooga gujcni
siꞌc rejn xten te beṉgut. Dxejcti gujt guiralii reman
ni yuꞌ lo nisdoo.
\p
\v 4 Ni riojṉ anglga baslojni ni yuꞌ neṉ xhijg ni caꞌni
loj regueuu näjza cadro rliejn nis. Gubixhlojreni gujcreni
rejn.
\v 5 Dxejcti biejn diagä gunii angl ni rajp yäḻrnibee
lo nis räjpni:
\p ―Huenduxh najc Guejblu Dad ni najc ṉaj sigajc gujc
Guejblu galoo, dxanduxh najc Guejblu saꞌcsi cayujn Guejblu
yäḻguxhtis redzunguijdx.
\v 6 Saꞌcsi laareni baxheꞌreni rejn, baguꞌtreni rexpejṉlu
näjza renani gunii xtiidxlu, luxh ṉaj badeed Guejblu
rejn cayäꞌreni. Siꞌcpac nungäjḻ gacreni.
\p
\v 7 Dxejcti biejn diagä canii steeni lagajc lo piändxan,
räjpni:
\p ―Guliipacni Dad Dios ni rajp guiralii yäḻrnibee, xcäḻguxhtis
Guejblu najc laaca, siꞌc riäjḻ gacni.
\p
\v 8 Dxejcti ni rdajp anglga cuaꞌ xhijg ni caꞌni, baslojni
ni yuꞌ neṉ xhijgga lo gubijdx, te badeedni lo gubijdx
yäḻrnibee guzeꞌcnäjni rebejṉ guiboo.
\v 9 Guiraliireni gusloj cayejcreni, lacti nanladuxh,
dxejc gusloj caniyajreni Dios ni rajp yäḻrnibee loj
recosga. Niluxh direni nusiechlajzreni, niclaza niliäꞌpreni
xpalaꞌn Dios.
\p
\v 10 Dxejcti ni rajc rgaii anglga cuaꞌ xhijg ni caꞌni
baslojni ni yuꞌ neṉ xhijgga lo troṉ cadro rnibee manroduxh.
Bicäjy guideb cadro rnibee manduxhga, luxh rebejṉ rauyaꞌtisreni
lujdxreni saꞌcsi cayajcreni yäḻnayanduxh.
\v 11 Guniyajreni Guejb Dios ni yuꞌ xhaguibaa saꞌcsi
rajcreni yäḻnayanduxh, xcuentza rexquedxnayanreni. Luxh
direni nusiechlajzreni xcuent xtojḻreni.
\p
\v 12 Dxejcti ni rajc xhoꞌp anglga cuaꞌni xhijgni, baslojni
ni yuꞌ neṉ xhijgga loj gueuro ni laa Eufrates. Gueuga
gubidzlii nisni te guc-chee te nezyuj xten reṟeii ni
jiääd nez cadro rliejn gubijdx.
\p
\v 13 Bahuiäza birii roꞌ gutiatzro, näjza roꞌ manro, näjza
roꞌ ni najc profeꞌt ni rusguee, birii choṉ spritguijdx
ni najc siꞌc bedz,
\v 14 saꞌcsi najcreni resprit xten beṉdxab, rujnreni
milagwr, senro. Rijreni loj guiraa reṟeii loj guedxliuj
te gutieꞌreni guiraa bejṉ loj guedxliuj te gac gueṟroduxh,
te gucuanäjreni Gueb Dios ni rajp guiralii yälṟnibee
che guidzujṉni lo guedxliuj.
\v 15 “Narä siädxhigaꞌtzä siꞌc riääd te gubaan. Chicbaaza
renani cabäjz, cagutieꞌchreni bacaḻ lojni che guibiꞌä
siꞌc rujn nani najcw guiraa xhajbni, te naꞌc guigaꞌni
xhabäälni, jianxtujyni che guibiꞌä.”
\v 16 Dxejc gutieꞌreni guiraa rebejṉre te lajt ni laa
lo didx hebre “Armagedón”.
\p
\v 17 Dxejcti ni najc rgajdz anglga cuaꞌni xhijgni baslojni
ni yuꞌ neṉ xhijgni loj bej. Dxejcti biejn xseꞌ te ni
gunii dipduxh xquidooli Dios xhaguibaali cadro yuꞌ troṉ
cadro rnibee Dios, räjpni:
\p ―Agujcni, agulujxhni.
\p
\v 18 Dxejc guyuduxh yäḻrdinyaꞌ näj guziro. Gujcza te
xuroduxh lo guedxliuj, te xu saꞌ ni gajdpac gac.
\v 19 Che gujc xuroga, biräjs guedxroduxhga, gujcni choṉ
laꞌ, dxejcti gurebäꞌn guiraa reguejdx guideb guedxliujre.
Dxejc banaj lajz Dios guedxro ni laa Babilonia, bialoj
bejn Dios yäḻguxhtis guedxga.
\v 20 Li gubicaj, gunitloj reyuj ni treꞌ lo nisdoo, gunitlojza
redajn.
\v 21 Xhaguibaali biajb te guixhobro yejc rebejṉ; tejga
guixhobga naꞌ siꞌcti tiuu kiḻ. Guniyaj rebejṉ Dios xcuent
guixhobroga, saꞌcsi cuentroduxh gujcni.
\c 17
\s Gun Dios yäḻguxhtis te gunadxab
\p
\v 1 Lo regajdz anglga ni caꞌ gajdz xhijg birii tej
ni gunii loä, najni:
\p ―Gudaa ree te guluiä lojlu retrabajwduxh ni ted gunadxabre
ni sobgaꞌ cadro yu sijl nis.
\v 2 Guiraa reṟeii lo guedxliujre bennäjreni gunaaga
dojḻ, sigajcza guiraa rebeṉ guedxliuj bennäjreni gunaaga
dojḻ. Gusosnäjreni gunaaga bejnreni siꞌctis ni rlajzreni.
\p
\v 3 Dxejcti huinäni narä siꞌc lo te bacaḻ nez lo reyubijdz.
Bahuiä loj te gunaa, bijbni dejtz te manro ni najc xniaa,
luxh guidebni caj diidx ni rniyaj Dios. Gajdz najc bitiuyejcni,
sojbza tzuu xcaꞌchni.
\v 4 Gunaaga najcw te lad moraad con xniaa, sucheduxh
gunaaga oor, näj reguisaꞌc, näj perl ni saꞌcduxh. Caꞌni
te copro ni najc ganaxduj oor ni guidxa ganax recosguijdx,
recosdxab ni bennäjni rebeṉ guedxliuj.
\v 5 Caj te diidx lo cuajni, luxh rut racbeedi xhi sälojni.
Scree rnii diidxga: “Babilonro, xnan regunadxab, xnan
recosdxab ni rajc lo guedxliuj.”
\v 6 Bahuiä agusojz gunadxabga. Agusosnäjni xtiejn rexpejṉ
Dios nani baguꞌtni, näj xtiejn renani basuleꞌ xtidx Jesucrist
ni baguꞌtzani. Che bahuiä lojni, bidxeloduxhä.
\v 7 Dxejcti gunii anglga loä, najni:
\p ―¿Xhicuent rdxelojlu, ä? Narä siniä xhi säloj gunadxabga,
näjza manroga ni sojb gajdz bitiuyejcni näj tzuu xcaꞌchni.
\v 8 Manroga ni bahuiilu gubajṉni galoo, niluxh agunitlojni
ṉaj, luxh agojl guiriini gabijl, dxejcti sinitlojni stee,
sejtni par tejpas. Rebejṉ ni nabajṉ lo guedxliuj nani
di lajreni nicaj lo guijtz xten yäḻnabajṉ xten Dios,
guijtz ni guc-chee che birixtiejli guedxliuj, rebejṉga
sidxeloduxhreni che fiireni loj manroga nani gubajṉ
galoo, ni gunitloj, niluxh naj agubaṉsacni.
\p
\v 9 ’Ree nanab gaꞌpni yäḻnajn. Gajdz rebitiuyejcni
säloj gajdz dajn cadro sobgaꞌ gunaaga,
\v 10 sälojzareni gajdz ṟeii. Agujc gaii ṟeiiga ni cayajb.
Tej reṟeiiga canibee ṉaj. Stee ṟeiiga churu jiääd. Luxh
che jiääd lult ṟeiiga, guxii dxej guinibeeni.
\v 11 Manro ni gubajṉ galoo, ni agunitloj ṉaj, niꞌc rac
xhujṉ ṟeii, najczani tej loj guigajdz reṟeii, luxh sinitlojni,
sejtni par tejpas.
\p
\v 12 ’Guidzuu rexcaꞌchni ni bahuiilu säloj tzuu ṟeii.
Gajdreni guisloj guinibee ṉaj. Laareni näjza manroga
xcaꞌreni yäḻrnibee teb oṟ, nalajznu guxii dxej.
\v 13 Tejtis xhigab gun reṟeiiga, gudeedreni xcäḻnadipreni,
xcäḻrnibeereni lo manroga.
\v 14 Laa redee ni sucuanäj Xiil xten Dios. Dxejcti
sujn Xiilga gaan lojreni saꞌcsi laani najcni Dad ni
rnibee loj guiraa redad, najcni Reii ni rnibee lo guiraa
reṟeii. Luxh renani siädnajlni najc reni agurejdxni,
reni aguleni, sisiudzuꞌtznäjrenini.
\p
\v 15 Dxejcti najza anglga loä:
\p ―Renis ni bahuiilu cadro sobgaꞌ gunadxabga säloj guiraa
guejdx, guiraa beṉ guedxliuj, guiraa bejṉ ni rnii garen-garenca
xtiidxreni, ni siääd garen-garen reguejdx.
\v 16 Guitzuu recaꞌchga näjza manroga ni bahuiilu, sidxeꞌchreni
loj gunadxabga, suroꞌnreni gunadxabga, susaꞌnreni gunadxabga
xhabäälni, sajwreni bältiejxhni, suzeꞌcreni gunadxabga
lo guiboo.
\v 17 Saꞌcsi abasniib Diosreni te gunreni tejsi xhigab,
te gudeedreni xcäḻrnibeereni lo manroga che guidzujṉli
dxej ni chaleꞌ guiraꞌti ni gunii Dios gac.
\v 18 Gunadxabga ni bahuiilu säloj guedxro ni rnibee
loj guiraa reṟeii loj guedxliuj.
\c 18
\s Xho jiajb guedx Babilonia
\p
\v 1 Dxejcti bahuiä loj stee xangl Dios ni siädyäjt
xhaguibaa. Siädnäni yäḻrnibeduxh, xcäḻrdimbichaꞌni bazanij
loj guedxliujre.
\v 2 Dxejcti dipduxh gunii anglga, guredxaꞌni:
\p ―Abiajb, abiajb guedx Babilonia, agubixhlojni, ṉaj najcni
guejdx cadro rbäjz rebeṉdxab, roꞌc rcanzaj guiralii cuaa
spritdxab, najczani xpitiääz guiraa reman xhaguibaa ni
najc mandxab, mandxuudx.
\v 3 Saꞌcsi guiraa rebeṉ guedxliuj agusojzreni xcuent
dojḻ ni bennäjreni gunadxabga, guiraa reṟeii loj guedxliuj
bejn dojḻ guläsnäjreni gunadxabga, luxh guiraa rebeṉ
guedxliuj ni rutoꞌ abejnreni ganduxh, agujcreni riꞌcw
xcuent recosdxab ni rujn gunabdxabga.
\p
\v 4 Dxejcti biejn diagä xseꞌ stee nani canii xhaguibaa:
\p ―Coḻguirii guejdxga rexpeṉä, te di näj laꞌtu gunnäjtu
gunadxabga dojḻ, te di tedtu trabawduxh lo replaag xtenni.
\v 5 Saꞌcsi yuduxh rextojḻni, abidzujṉreni xhaguibaali,
luxh abanajza lajz Dios rextojḻni.
\v 6 Coḻgudeed loj gunaaga sigajc ni badeedni lojreni.
Coḻquijx loj gunaaga tioꞌpli huält lo ni bejnni laani.
Neṉ coꞌp cadro badeedni guꞌ bejṉ (te trabajw ni bateedni
bejṉ), lagajc neṉga coḻyejn te ni najc tioꞌp huält maazru
fuert yä gunadxabga, nalajznu tedni trabajw tioꞌp huält.
\v 7 Lacti guläꞌp gunaaga xpalaꞌnni, gubajṉni siꞌctis
ni rlajzni lo guedxliuj. N̲aj coḻguteed gunaaga trabajw,
siꞌcti mediid ni guläꞌpni xpalaꞌnni; siꞌcti mediidza
ni bibalaznäjni mood ni gubajṉni, sigajcza gac-huin lastooni
saꞌcsi bejnni xhigab neṉ lastooni: “Narä sobgaꞌä ree
siꞌc te reiṉ, te beṉroduxh, dina gacä biuud, niclaza gac-huin
lazä.”
\v 8 Niꞌcni tejsi dxej siajb yejcni guiraa replaag xten
Dios: yäḻgujt, yäḻhuin lajz, näj yäḻrliaan, luxh sejczani
lo balguiboo, saꞌcsi rnibeduxh Dad Dios ni gun xcäḻguxhtisni.
\p
\v 9 Guiraa reṟeii lo guedxliujre ni bennäj gunaadxabga
cosguijdx, reni cuansanäjnini, sonduxhreni, siaduxhreni
che fiireni gujxh ni carii cadro cayejcni.
\v 10 Zijtru sisiujreni saꞌcsi rdxejbreni replaag xten
gunadxabga, dxejc siniizareni:
\p ―Aii, aii, riaduxhnu guedxrore, Babilonia, guedxdipduxh
gujclu, luxh chela gucbeenu, ala bidzujṉ yäḻguxhtis yejclu.
\p
\v 11 Rebejṉ ni rutoꞌ loj guedxliuj sonduxhreni, siareni
guejdxga saꞌcsi rutru rsiidi xhixtenreni ni rutoꞌreni.
\v 12 Laareni rutoꞌreni oor, plaꞌt, guiraloj reguisaꞌc,
perl, ladliṉ, ladmuraad, ladseed, näjza guiraloj baräjd
yagdoo, näj guiraloj cos saru, ni nacchee läi elefant,
näj cos saru ni nacchee bronz, näj guiib, näj márm,
\v 13 näjza caneel, guiraloj laj comiid, näjza yalnejxh,
näj perfum, näjza yaal, näjza bin, näjza seꞌt oliib, näjza
arinsaꞌc, näjza triuu, näjza gon, näjza rexiil, näjza cabaii,
näjza gareꞌt, näjza bejṉ ni rutoꞌreni tiejxhreni, xaimreni.
Guiraa reniꞌc rutoꞌreni.
\v 14 Dxejc guniiza xseꞌ ni canii xhaguibaali, najni:
\p ―Ninexhsaꞌc ni rlazduxhlu, agunitloj. Guiraa recossaꞌc,
recossaruduxh agubicajreni lojtu, luxh di gacdiru guidxäl
bejṉ reniꞌc.
\p
\v 15 Reni rutoꞌ guiraloj recosga, nani gujcreni riꞌcw
xcuent guedxroga, zijtru sisiujreni saꞌcsi rdxejbreni
trabajw ni cadeed guejdxga, sonduxhreni, sac-huinduxh lajzreni,
\v 16 säjbreni:
\p ―Aii, aii, riaduxhnu guedxrore, naii gojtni ladsacduxh,
guiraa ladliṉ, ladmuraad, ladxniaa, gusucheeni con oor,
con guisaꞌc, con perl,
\v 17 teraꞌtbäztis baralii recosro ni najc xhixtenni,
guxhijṉreni.
\p Guiraa recapitán xte barcw, näjza guiraa remarineer,
näjza rebejṉ ni rij biaj lo rebarcw näjza guiraa reni
rujn dzuun lo nisdoo, gusujreni zijt,
\v 18 näjza laareni cahuiireni cayäjs gujxh guejdxga,
cabedxaꞌreni, caniireni:
\p ―¿Xhi stee guejdx najc siꞌc najc guedxrore, ä?
\p
\v 19 Bachajreni yuyoḻ yejcreni saꞌcsi rac-huin lajzreni,
binduxhreni, guredxaꞌreni:
\p ―¡Aii! ¡Aii! Riaduxhnu guedxro saꞌcsi xcuenttis guedxduxhre
gujc riꞌcwduxh guiraa rebejṉ ni rajp barcw ni rujn dzuun
loj nisdoo. Luxh ṉaj teraꞌtbäzsi aguxhijṉ guedxrore.
\p
\v 20 Guniiza xseꞌ ni yuꞌ xhaguibaa, najni:
\p ―Laꞌtu ni yuꞌ xhaguibaa, laꞌtu rexpejṉ Dios, reapost
xtenni, rebejṉ ni gunii xtidx Dios galoo, coḻbalasduxh
saꞌcsi abiajb guedxrore, abejn Dios yäḻguxhtis xcuent
ni bejnni lojtu.
\p
\v 21 Dxejcti te xangl Dios ni rajp yäḻrnibee, guläs
te guiro ni najc siꞌc te guij ni roꞌt dojb, bacuaanini
loj nisdoo, dxejc najni:
\p ―Screeza gac guedxro ni laa Babilonia siajbni lo trabajwduxh,
sinitlojni par tejpas, dirutu fii lojni.
\v 22 Diru guibiꞌ jiejn cayeḻ nez xladcaiilu reharp,
reflaut, retrompeꞌt; diru guibiꞌ chu tej ni gun xhitis
dzuun; diruza guibiꞌ chubej molin ni cayoꞌt.
\v 23 Diru guibiꞌ jieṉ xcäḻrdimbichaꞌ te bajl ni cagusanij;
diruza guibiꞌ jiejn xseꞌ biꞌn näj dxaꞌp loj te saꞌ saꞌcsi
rexpejṉlu ni rutoꞌ gujcreni beṉroduxh lo guedxliuj saꞌcsi
basgueezalu rebeṉ guedxliuj xcuent rextzundxablu.
\p
\v 24 Neṉ guejdxga bidxäjlza xtiejn renani gunii xtidx
Dios, näjza xtiejn rexpejṉ Dios, näjza xtiejn guiraa rebeṉ
guedxliuj ni baguꞌtreni.
\c 19
\p
\v 1 Che gulujx recosre, biejn diagä lascanu xseꞌ xhidalro bejṉ ni canii xhaguibaa, cayäjpreni:
\q ¡Coḻguiliäꞌp xpalaꞌn Dios!
\q Xtentis Dios, xtenni najc yäḻrusḻaa lo dojḻ,
\q näj yäḻrdimbichaꞌ, näj yäḻmilagwr.
\q
\v 2 Saꞌcsi xcäḻguxhtisni najc ganax laaca,
\q huentis najcni, saꞌcsi abejnni yäḻguxhtis gunadxabga nani caguxhiṉ rebeṉ guedxliuj xcuent xcäḻnadxabni.
\q Abejn Dios yäḻguxhtisni,
\q agudijxhni xcuent xtiejn rexpejṉ Dios ni baxheꞌ gunadxabga, che baguꞌtnireni.
\p
\v 3 Guibiꞌ guniizareni:
\p ―¡Coḻguiliäꞌp xpalaꞌn Dios! Gujxh xten gunadxabga sanuutis cayäꞌp par tejpas.
\p
\v 4 Guiraa regalbitajp rebeṉgool näjza guidap remanbajṉga bazuxhijbreni, biabrlojreni gojṉreni Dios ni rbej lo troṉ cadro rnibeeni, caniireni:
\p ―Sugacni siꞌc. ¡Coḻguiliäꞌp Xpalaꞌn Dios!
\p
\v 5 Dxejcti nez lo troṉ cadro rnibee Dios biejn xseꞌ tej ni canii:
\q Coḻgudeed xquixtios lo Dios,
\q guiraꞌtu ni rujn xtzuun Dios,
\q guiraꞌtu ni rajṉtu Dios, rebeṉro sigajc rebeṉnadolajz.
\s Saꞌ xten Xiil xten Dios
\p
\v 6 Dxejcti biejn diagä ascanu xseꞌ xhidalduxh bejṉ, riejnni siꞌc che cayäjt nisro xhidajl gueu, näjza siꞌc che caguidxaduxh guzii, caniireni:
\q ¡Coḻguiliäꞌp xpalaꞌn Dios!
\q Saꞌcsi Gueb Dios, Dad xtennu ni rajp guiralii yälṟnibee, ani acanibee.
\q
\v 7 Guibalajznu, guibalazduxhnu, guiliäꞌpnu xpalaꞌnni saꞌcsi abidzujṉ dxej guchṉaa Xiil xten Dios, aguzucheeza dxaꞌp.
\q
\v 8 Abadeedreni ladliṉ ni najc nuiduxh gacwni.
\q Ladnolni, luxh rdimbichaꞌni saꞌcsi nayadujni.
\q Ladnayare säloj redzunsaꞌc ni bejn rexpejṉ Dios.
\p
\v 9 Najza anglga loä:
\p ―Bacuaa diidxre: “Chicbaa renani bidoṉ jiääd lo xsaꞌ Xiil xten Dios.”
\p Guniizani loä, najni:
\p ―Rediidxre najc didx-guliipac xten Dios.
\p
\v 10 Dxejcti bazuxhibä lojni te gaṉäni, dxejc laani najni loä:
\p ―Naꞌc gunlu siꞌc, saꞌcsi narä nacä sigajc najclu, nacä te ni rujn xtzuun Dios, näjza bejtzlu ni rusuleꞌ xtidx Jesucrist. Bazuxhijb lo Diostis saꞌcsi Dios rudeed gusuleꞌ bejṉ xcuent Jesucrist, gusuleꞌzareni xtidx Dios.
\s Nani bijb te cabainol
\p
\v 11 Dxejcti bahuiä bixal xhaguibaa, biricaj te cabainol. Luxh laj nani rbijbni säloj casobsaꞌcpacni diidx, rniizani ganax didxgulii. Entis laaca rujnni yäḻguxhtis, entis laaca rucuaani che rujnni gueṟ.
\v 12 Rebalojni rbebajl, yejcni yuꞌ xhidalduxh coroṉ, luxh caj te laj lojni nani rutliidi racbee, luxh laatisni racbeeni xhi sälojni.
\v 13 Najcwni te lajd ni nadiini rejn; lajni najcza Xtidx Dios.
\v 14 Guiraa resoldaad guibaa xten Dios siädnajlni najcwreni ladnol, ladnaya, bijbzareni cabainol.
\v 15 Roꞌni carii te spaad ni caduxh guiroꞌp laad roꞌni te niꞌc tiḻnäjni guiralii reguejdx lo guedxliuj, te guinibeeni guiraa rebeṉ guedxliuj caꞌni siꞌc te barguiib. Sujnzani yäḻguxhtis loj reni rdxechlajz lo Dios, siꞌc ruläjreni yec uub che rbääreni bin, siꞌc sujnza Dios ni rajp guiralii yäḻrnibee.
\v 16 Lo xhajbni näjza cuäꞌ cujdni caj lajni: “Reii xten reṟeii, Dad xten redad.”
\p
\v 17 Bahuiä loj te angl sugaꞌni galäii gubijdx, cabedxaꞌni caniini loj guiraa reman ni rutajt xhaguibaa, räjpni:
\p ―Coḻtaa, coḻguireꞌ ree, te gautu xcheroduxh xten Dios;
\v 18 te gautu xpääl reṟeii, näjza xpääl recapitán, näjza xpääl rebeṉro, näjza xpääl recabaii, näjza xpääl renani rbijb recabaii, näjza xpääl guiraasi bejṉ, bejṉ ni rdoꞌ siꞌc rdoꞌ guidxaa sigajc rebejṉ ni di gun xtzuun bejṉ, rebeṉbäz sigajc rebeṉro.
\p
\v 19 Dxejcti bahuiä loj manro näjza loj reṟeii guedxliuj, abireꞌreni te gucuanäjreni nani rbijb cabainol näjza guiraa resoldaad xtenni.
\v 20 Bigaꞌ manroga näjza profetxhii ni bejn senro nez loj manroga te basgueeni guiraa renani cuaꞌ seen xten manroga, näjza renani bazuxhijb lo banäjb xten manroga. Guiroꞌp redee bacuaareni guideb nabajṉreni neṉ te bal guiboduxh ni recnäj sufr.
\v 21 Dxejc guiraa reni biaꞌn baguꞌt spaad ni birii roꞌ ni bijb cabainol. Guiraa reman xhaguibaa gudajw xpäälreni.
\c 20
\s Te miḻ ijz
\p
\v 1 Dxejcti bahuiä loj te xangl Dios ni siädjiäjt xhaguibaa,
siädnäni liäii ni ruxhal guedro ni laa gabijl. Caꞌzani
te cadeṉro.
\v 2 Anglre gunaaz gutiatzroga, ni gujc bäḻ galooli, ni
najcza beṉdxab, ni laaza Satanás. Bacuaduunini te miḻ
ijz.
\v 3 Basäḻnini neṉ gabijl, te roꞌc basäunini, bacuaani
liäii te naꞌcru gusgueeni rebeṉ guedxliuj laḻ ni guizaꞌ
te miḻ ijz. Che guizaꞌ reijzga, empac sibiꞌ ḻasacni baleꞌsi
dxej.
\p
\v 4 Dxejc bahuiä retroṉ cadro rbejreni rnibeereni, bahuiäza
loj renani rbej lo retroṉ, cuaꞌreni yäḻrnibee te gunreni
yäḻguxhtis. Dxejcti bahuiä xaim rebejṉ nani biruꞌ yejcni
saꞌcsi huililajzreni xtidx Jesucrist näjza saꞌcsi basuleꞌreni
xtidx Dios. Direni nuzuxhijb loj gutiatz niclaza lo
banäjb ni najc siꞌc manroga, dizareni nicaꞌ seen lo cuajreni
nicla lo ṉaareni. Gubaṉsacreni loj rebeṉgut, gurenäjreni
Jesucrist te laani gunibenäjreni te miḻ ijz.
\v 5 Dee najc yäḻrbaṉsac galoo lo rebeṉgut. Niluxh stecuaa
rebeṉgut, direni guibaṉsac che guisaꞌli te miḻ ijz.
\v 6 Chicbaa rebejṉ nani guibaṉsac ganiddoo, najcreni
beṉdxan ni agubicaj xtojḻreni. Ni rojp yäḻgujt di guidzujṉ
lojreni. Laareni sajcreni xpixhojz Dios näjza Jesucrist,
sibenäjreni Jesucrist, sinibenäjreni Jesucrist te miḻ
ijz.
\p
\v 7 Che guizaꞌ te miḻ ijzga, susḻasacni Satanás neṉ
gabijl.
\v 8 Che guiriini roꞌc, gusgueeni guiraa reguejdx ni
treꞌ lo guidap laad guedxliujre. Susgueeni rebeṉ Gog
näjza rebeṉ Magog te gutieꞌnireni te gunreni gueṟ. Xhidalduxh
gacreni, pet siꞌcti yujxh ni treꞌ roꞌ nisdoo.
\v 9 Huäꞌpreni lo te camp cadro gulagduxh. Gudäjyreni
guideb gabig cadro rnibee rexpejṉ Dios neṉ guejdx nani
sanälajz Dios. Per baxhaḻ Dios bal guiboo xhaguibaali
bitejbni, te guyejc guiragajcreni.
\v 10 Dxejc bacuaareni beṉdxab nani biädgusguee rebejṉ
lo bal guiboo ni cayecnäj sufr, lagajc cadro yuꞌ manro,
näjza profetxhii nani basguee; lo bal guibooga susacsírenini
sidejdreni trabawduxh dxej-yääl par tejpas.
\s Yäḻguxhtis ni gujc nez loj troṉronol
\p
\v 11 Dxejcti bahuiä lo te troṉronol näjza lo nani sobgaꞌ
lojni te rujnni yäḻguxhtis. Nez lojni gunitlojli guedxliuj
näjza guibaa, xhetru lajtdi bidxäjl par laareni.
\v 12 Bahuiä lo rebeṉgut, beṉro sigajc beṉnadolajz, treꞌreni
nez lo Dios. Bixal rexquijtz Dios, dxejcti bixalza stee
xquijtz Dios ni najc guijtz xten xcäḻnabaṉnäj Dios par
tejpas. Dxejcti bejnni yäḻgutxhtis rebeṉgut xcuent ni
bejnreni, xcuentza rediidx nani caj loj reguijtzga.
\v 13 Guiranejz biääd rebeṉgut: nisdoo batzuug rebeṉgut
ni yuꞌ lojni, gabijl näjza yäḻgujt batzuugza rebeṉgut
ni yuꞌ lojreni. Dxejcti bejn Dios yäḻguxhtis tejgareni
xcuent ni bejnreni.
\v 14 Dxejcti bacuaani yäḻgujt näjza gabijl lo bal guiboo
ni najc siꞌc te nisdoo te roꞌc checreni par tejpas.
Dee najc yäḻgujt ni rojp.
\v 15 Guiraa bejṉ ni di lajni nidxäjl lo xlibr yäḻnabajṉ
bacuaazani reniꞌc lo bajlga.
\c 21
\s Xhaguibacoob näjza guedxliucoob
\p
\v 1 Dxejcti bahuiä te xhaguibacoob näjza te guedxliucoob,
saꞌcsi agunitloj guibabiejw, näjza guedxliubiejw, luxh
xhettiruza nisdoo.
\v 2 Narä Juan, bahuiä lo guedx Jerusaléncoob, guedxdxan,
siädjiäjtni xhaguibaali cadro rnibee Dios. Sucheduxhni
siꞌc rsiuchee te dxaꞌp nani agojl guchṉaa.
\v 3 Dxejcti biejn diagä te xseꞌ te ni canii dipduxh,
ascanu lo troṉ cadro rnibee Diosli carii seꞌga, scree
caniini:
\p ―Coḻhuii, aguzuj xquidoo Dios galäii rebejṉ, anabaṉnäj
Dios rebejṉ, sajczareni rexpejṉni. Sibaṉnäj lagajc Gueb
Diosreni.
\v 4 Sutia Dios guiraa nisbee balojreni te naꞌcru goonreni.
Sinitloj yäḻgujt, xhetru xliajsdi chu, diru bejṉ goon,
dirureni jiajn, saꞌcsi guiraa redee ni guyuꞌ galoo agunitloj.
\p
\v 5 Dxejcti ni sobgaꞌ lo troṉ cadro rnibeeni guniini,
najni loä:
\p ―Bahuii, najrä guscobä guiraꞌti.
\p Guniizani loä:
\p ―Bacuaa rediidxre, saꞌcsi guliipacreni, sajc chalilajz
bejṉ rediidxre.
\p
\v 6 Dxejcti najzani loä:
\p ―Agujcni. Narä nacä A näjza Z, ni säloj nani rbaxtiej
näjza nani ruluux. Lo chutis ni cayojl, sudedxliaꞌä nis
yäni, nalajznu yäḻnabajṉ par tejpas.
\v 7 Chutis nani gun gaan lo dojḻ, sicaꞌzani guiraa dee
siꞌc yäḻnasaꞌc, luxh narä sacä Xtiosni, laani sacni xiꞌnä.
\v 8 Niluxh renani rdxejb, renani di chalilajz xtidxä,
reni rdxeꞌch loä, reni ruguꞌt saꞌreni, reni runnäj gunaa
dojḻ, renani najc bidxaa, renani rusuxhijb lo banäjb, guiraa
renani rusguee rniireni didxxhii, guiragajc reniꞌc sij
lo nisdoo ni najc ganax bal guiboo, cadro rejc guiboo
näjza sufr par tejpas. Dee ni najc yäḻgujt ni rojp.
\s Guejdx Jerusaléncoob
\p
\v 9 Dxejcti lo guigajdz xangl Dios ni caꞌ guigajdz
xhijg ni guidxa guigajdz reyäḻguxhtis xten Dios, birii
tejni, najni loä:
\p ―Gudaa, te guluiä lojlu dxaꞌp nani guchṉaa Xiil xten
Dios.
\p
\v 10 Dxejcti bejnni gunixcaḻä, huinäni narä lo te danro
ni jiaduxh, roꞌc baluiini loä te guedxro, te guedxdxan
ni laa Jerusalén, luxh xhaguibaali siädjiäjtni nez lo
Dios.
\v 11 Guejdxga rdimbichaꞌ guideb xcäḻrdimbichaꞌ Dios.
Luxh yäḻrdimbichaꞌga najc siꞌc najc te guisacduxh ni
laa jaspe, rdimbichaꞌzani siꞌc biidr.
\v 12 Guideb gabi guejdxga dejd te paderro cadro caj
tzubitioꞌp xportoṉroni. Te angl xten Dios sugaꞌ roꞌ
tejga portoṉga. Loj tejga portoṉga, caj laj tej retzubitioꞌp
cuaa xten rexpejṉ Israel.
\v 13 Choṉ portoṉga caj nez cadro rliejn gubijdx, yuꞌza
choṉ portoṉga nez ladbee, yuꞌza choṉ portoṉga nez ladbäjw,
yuꞌza choṉ portoṉga cadro rääz gubijdx.
\v 14 Yuꞌ tzubitioꞌp guiro lo cimient xten guejdxga.
Lo tejga reguijga caj laj tej retzubitioꞌp apost xten
Xiil xten Dios.
\p
\v 15 Angl ni caninäj narä caꞌ siꞌc te biquii ni najc
ganaxduj oor te gurejxhni guejdxga, näj reportoṉga, näjza
padeerga.
\v 16 Guejdxga najc cuadraad: sigajc ni sioolni, sigajcza
ni gulajgni. Dxejcti cuaꞌni biquii barejxni guejdxga,
barejxni tioꞌp miḻ tioꞌp gayuu kilómetros tejga laad.
Sigajc sioolni, sigajcza gulajgni, sigajcza jiaani.
\v 17 Dxejcti barejxni padeerga, yuꞌni gayoṉbitajp metr
seguṉ mediid xten bejṉ, saꞌcsi niꞌc najc ni cagutiexhnäjza
anglga.
\p
\v 18 Padeerga naccheeni guij ni laa jaspe. Guejdxga
najc ganaxduj orsaꞌc, rdimbichaꞌni siꞌc guihuajn.
\v 19 Recimient xten padeerga nac-chee guisaꞌc. Guiganid
najc guijaspe; ni rojpga najc zafiro; ni riojṉga najc
ágata; ni rdajpga najc esmeralda;
\v 20 ni rgaiiga najc onix; ni rxhoꞌpga najc cornalina;
ni rgajdzga najc crisólito; ni rxhujṉga najc berilo;
ni rgaaga najc topacio; ni rtzuuga najc crisopraso;
ni rtzubiteebga najc jacinto; ni rdzubitioꞌpga najc
amatista.
\v 21 Guitzubitioꞌp portoṉga najc tzubitioꞌp perl. Tejga
portoṉga guc-chee tej perl. Nezyuro ni rdeed galäii guejdxga
najc ganaxduj oor, rieṉni siꞌc te guihuajn.
\p
\v 22 Dina nuhuiä nicla tej guidoo neṉ guejdxga, saꞌcsi
sugaꞌ Gueb Dios ni rajp guiralii yäḻrnibeduxh, näjza
Xiil xten Dios. Laani najc xquidoo guejdxga.
\v 23 Guejdxga dini guiquiin gusanij nicla gubijdx niclaza
bäii, saꞌcsi lagajc xcäḻrdimbichaꞌ Dios näjza Xiil xten
Dios ruzanij roꞌc.
\v 24 Rebejṉ guedxliuj ni rililajz xtidx Dios sajc sareni
lo bianijga, luxh reṟeii ni siääd lo guedxliujre siädnäzareni
xcäḻrnibeereni, näj xpalaꞌnreni roꞌc.
\v 25 Di roꞌ reportaṉga jiäuu rdxej, luxh roꞌc xhettiza
yääl.
\v 26 Roꞌc chanäzareni yäḻnasaꞌc näj xpalaꞌn reguejdxro
ni yuꞌ lo guedxliuj.
\v 27 Niluxh di gacdipac jiuꞌ nicla tej cosguijdx roꞌc,
niclaza te bejṉ ni rujn cosguijdx näj yäḻrusguee. Roꞌc
siuꞌ ganaxduj renani caj lajni lo libr xten yäḻnabajṉ
par tejpas nani caꞌ Xiil xten Dios.
\c 22
\p
\v 1 Dxejc baluii anglga te gueuro loä, cadro yuꞌ nisya xten yäḻnabajṉ. Rdimbichaꞌni siꞌc te guihuajn, luxh cariini lo troṉ cadro rnibee Dios näjza Xiil xten Dios,
\v 2 rdejdni loj nezyujro ni rdejd galäii guejdxga. Guiroꞌp laad gueuga sojb reyajg xten yäḻnabajṉ, lojreni rcaj tzubitioꞌp cuaa ninejxh neṉ tebijz, tejga cuaani tejga bäii; luxh rebalajg ni rcaj lo reyajgga najc te gusiajcni rebeṉ guedxliuj.
\v 3 Dxejcti roꞌc xhettiru yäḻrdzubde, saꞌcsi roꞌc yuꞌ troṉ cadro rnibee Dios näjza Xiil xten Dios, ruzuxhijbza rexpejṉni, rajṉreni laareni.
\v 4 Suhuiireni lojpacni siꞌcpac ni najcni, sicajza laj Dios lo cuajreni.
\v 5 Roꞌc diru yääl chu. Luxh reni rbäjz roꞌc di guiquiin nicla bajl, niclaza xhanij xten gubijdx, saꞌcsi Gueb Dios susanij lojreni. Luxh sinibenäjrenini par tejpas.
\s Siäddzuṉgajxh dxej ni guibisac Jesucrist
\p
\v 6 Dxejc naj anglga loä:
\p ―Guliipac najc rediidxga, sajcpac chalilajzlureni. Dad Dios lagajc nani basniib lastoo rebejṉ ni gunii xtiidxni agujc xchero, lagajc laani baxhaḻni xanglni te baluilojni loj rexpejṉni guiraꞌti nani agojl gac.
\p
\v 7 ―Sajngalu gan, siojb jiäḻa. ¡Chicbaa nani riu rediidx ni caj lo librre!
\p
\v 8 Luxh narä, Juan, biejn diagä rediidxre, bahuiäza recosre. Luxh che bahuiä, che biejn diagä bazuxhibä te gaṉä xangl Dios nani baluii loä guiraa redee.
\v 9 Luxh laani najni loä:
\p ―Naꞌc gunlu siꞌc, saꞌcsi narä runä xtzuunni sigajc rujnluni, sigajc rujn rebejṉ ni gunii xtidx Dios agujc xchero, sigajc rujn rebejṉ ni rusoob rediidx ni caj lo librre. Bazuxhijb loj Diostis.
\p
\v 10 Dxejc najni loä:
\p ―Naꞌc gusäuulu guijtz cadro caj rediidxre xcuent nani churu gac, saꞌcsi asiäddzuṉgajxh redxej ni chaleꞌreni.
\v 11 Luxh laḻ ni guidzujṉ dxejga, basaan suchanuu gun dojḻ renani cayungajc dojḻ; basaan suchanuu gun dzunguijdx renani cayungajc dzunguijdx. Per renani cayujn dzunsaꞌc, chanuu gunreni dzunsaꞌc, nani najcza beṉnaya, siꞌcza chanuu gacni beṉnaya.
\p
\v 12 Gunajtiro:
\p ―Siojb jiäḻä, luxh siädnää́ xhi gunidxä loj tejgatu siꞌc ni riäjl xcaꞌtu xcuent dzuun ni bejntu.
\v 13 Narä Jesucrist nacä siꞌc najcza A näjza Z, ni säloj nani rbäxtiej näjza nani ruluux.
\p
\v 14 ’Chicbaa renani riu xtidx Dios, najcreni siꞌc ni rguiib xhajbreni te sajc jiuꞌreni nez portoṉ xten guejdxga, sajcza gauni ninejxh ni caj lo yajg xten yäḻnabajṉ par tejpas.
\v 15 Per dejtz guejdxga chajiaꞌn reni najc siꞌc bäꞌcw, nalajznu rebidxaa, renani rusguee chälbejṉ, renani ruguꞌt saꞌreni, renani ruzuxhijb lo rebanäjb, näjza ni rchaglajz rnii didx-xhii te gusgueeni.
\p
\v 16 ’Narä Jesucrist, abaxhaḻä xanglä lojlu te gusuleꞌni lojtu diidx xcuent guiraa redee, te gusuleꞌzalu rextidxä neṉ reguidoo loj rexpeṉä. Narä nacä te xajg toṟeii David, nacäza siꞌc balxhaguibaa nani rdimbidxaꞌ cäjysi che gajd jianij lo guedxliuj.
\p
\v 17 Sprit Dxan xten Dios näjza chääl Xiil canii, najreni:
\p ―Coḻtaa.
\p Suguiniiza nani riejn diajgreni diidxre, gäbreni:
\p ―Coḻtaa.
\p Sujiäädza chutis ni cayojḻ, sujiädyäxliaꞌni nis yäḻnabajṉ par tejpas.
\p
\v 18 Saꞌcsi narä rniliäꞌppac lojtu, guiraatu ni riejn diajgtu rediidx ni caj lo guijtzre xcuent recos ni churu gac, palga yuꞌ chu tejtu gutajlru diidx ni caj guijtzre, suteedru Dios bejṉga replaag yejcni loj ni caj lo guijtzre.
\v 19 Palga yuꞌ chu gudzucaj loj rediidx ni caj lo guijtzre, sudzucajza Dios nani nicaꞌni lo yajg xten yäḻnabajṉ par tejpas, näjza lo guedx Dxan, ni caj xcuentreni lo guijtzre.
\p
\v 20 Nani cagusuleꞌ diidx xcuent guiraa redee guniini, najni:
\p ―Guliipacni siojb jiäḻä.
\p Sugacni siꞌc. Gudaa Dad Jesucrist.
\p
\v 21 Sujiääd xcäḻracnäj Dad Jesucrist lo guiraatu. Sugacni siꞌc.