\id ROM

\h SUN ROMANOS
\toc1 SUN ROMANOS
\mt JAꞌ TI SCARTA TI QUERMANOTIC TE TI ROMAE
\mt2 ti itsꞌibabat yuꞌun ti Pabloe
\c 1
\s Hech lic scꞌopon ti carta ti quermanotique ti te nacajtic ti Romae
\p
\v 1 Hoꞌon Pabloun, hoꞌon yabatun ti Jesucristoe yuꞌun mambilun yuꞌun. Hoꞌon acꞌbilun cabtel yuꞌun ti Diose yuꞌun chba jpucbe scꞌop, yuꞌun chba jchol ti lequil achꞌ cꞌop yuꞌun ti Diose. Jaꞌ cabtel o.
\p
\v 2 Ti voꞌone laj yalbe scꞌopilal ti lequil achꞌ cꞌope ti Diose. Laj yalbe ti jꞌalcꞌopetic yuꞌune, hech lic spꞌejanic ti hun. Jaꞌ ti sun ti Diose ti quichꞌojtique.
\v 3 Jaꞌ ti scꞌopilal ti Snichꞌone ti laj yichꞌ sbecꞌtal, hech yelnichꞌon ti Rey David icꞌot liꞌ ti balumile. Jaꞌ ti Cajvaltic Jesucristoe.
\v 4 Jaꞌ Snichꞌon ti Diose. Yuꞌun te oy ti yoꞌnton ti Chꞌul Espíritue, jaꞌ Snichꞌon ti Diose. Jaꞌ iꞌacꞌat ti qꞌuelel ti jaꞌ Snichꞌon ti Diose cꞌalal ichaꞌcuxi loqꞌuel ti chꞌen.
\v 5 Ti hoꞌontutique jaꞌ laj xa yacꞌbuntutic cabteltutic yuꞌun ti jpucbetutic ti scꞌope. Jun noꞌox yutsil ti hech chiyacꞌbuntutic hech chituntutic yuꞌun. Yuꞌun hech chlic xchꞌumbeic smantal ti Cajvaltique ep ti tos crixchanoetic liꞌ ti balumile. Hech chlic spasic ti mucꞌ ti Cajvaltique.
\v 6 Ti hoꞌoxuque laj xa yicꞌoxuc ti stojol ti Cajvaltique hech snichꞌonoxuc nacꞌotic xa.
\p
\v 7 Hech yuꞌun chajcꞌoponoxuc ti carta, hoꞌoxuc ti te nacaloxuc ti jteclum Romae ti cꞌuxoxuc ti yoꞌnton ti Diose. Yuꞌun laj xa yicꞌoxuc ti stojole yuꞌun chatunic yuꞌun. Acꞌo yacꞌboxuc ep bendición ti Jtotic Diose xchiꞌuc ti Cajvaltic Jesucristoe. Acꞌo yacꞌbot jun avoꞌntonic ti jujunoxuque.
\s Jaꞌ scꞌopilal ti Pabloe ti scꞌan chba sqꞌuel ti quermanotique ti te nacajtic ti Romae
\p
\v 8 Hech yuꞌun jaꞌ primero chacalbeic avi to. “Hocol aval, Dios cuꞌun, ti lec xchꞌunojbot acꞌop ti quermanotac te ti Romae”, chcut ti Diose. Jaꞌ ti sventa ti Jesucristoe ti hech chcale. Yuꞌun puquem acꞌopilalic ti scotol balumil ti oy lec xchꞌunojel avoꞌntonique.
\v 9 Scotol cꞌacꞌal ti jcꞌopon Dios ti atojolic. Yuꞌun jun coꞌnton cacꞌoj jba chiꞌabtej yuꞌun ti Diose ti jchol ti lequil achꞌ cꞌope, jaꞌ ti scꞌopilal ti Snichꞌone, hech yuꞌun snaꞌ ti Diose ti mu xachꞌay ti coꞌntone. Scotol cꞌacꞌal chajnaꞌoxuc.
\v 10 Scotol cꞌacꞌal ti jcꞌambe vocol ti Diose mi hech tscꞌan ti yoꞌntone hech xuꞌ cuꞌun chtal jqꞌueloxuc. Ep vuelta jcꞌan chtal jqꞌueloxuc. Mu hechuc laj scꞌan ti Diose.
\v 11 Yuꞌun ti jcꞌan chtal jqꞌueloxuque, yuꞌun jcꞌan chajcoltaoxuc hech más ch-an yip avoꞌntonic.
\v 12 Mi ihuꞌ cuꞌune, hech chmucꞌub coꞌnton uc yuꞌun ti jqꞌuel ti oy xchꞌunojel avoꞌntonic uc. Hech coꞌol chmucꞌub coꞌntontic.
\p
\v 13 Quermanotac, ti jcꞌan ti chanaꞌic ti ep vuelta jcꞌan chtal jqꞌueloxuc. Ti manchuc nipajesat, laj xa jcꞌopon jbatic. Yuꞌun ti jcꞌan chtal jtsꞌun ti scꞌop ti Diose ti avoꞌntonique hech chaj cꞌu cheꞌel laj xa jtsꞌun ti yoꞌntonic ti quermanotic ti liꞌ nacajtique, hoꞌoxuc ti coꞌol yanlum crixchanooxuc xchiꞌuque. Yuꞌun hech más lec chachꞌunic ti jventa.
\v 14 Hoꞌon quichꞌoj cabtel ti stojol scotol crixchanoetic. Manchuc mi lec chanubtasbilic, manchuc mi mu chanubtasbiluc, manchuc mi pꞌij yoꞌntonic, manchuc mi mu pꞌijuque, persa ti jcholbe ti scꞌop ti Diose scotolic.
\v 15 Hech yuꞌun toyol coꞌnton chtal jcholboxuc uc ti lequil achꞌ cꞌope, hoꞌoxuc ti te oyoxuc te ti Romae.
\s Jaꞌ scꞌopilal ti yuꞌun jaꞌ scꞌop ti Diose ti lequil achꞌ cꞌope hech yuꞌun oy yip
\p
\v 16 Yuꞌun ti hoꞌone mu xiqꞌuexav yuꞌun ti lequil achꞌ cꞌope. Yuꞌun jaꞌ scꞌop ti Diose hech yuꞌun oy yip yuꞌun hech chcolic scotol ti muchꞌutic chchꞌunique. Jaꞌ primero laj caꞌitic ti hoꞌucutic ti judioucutique yuꞌun jaꞌ primero laj yacꞌ ti qꞌuelel ti Diose ti hoꞌucutic laj stꞌujucutique. Patil laj avaꞌyic hoꞌoxuc ti yanlum crixchanooxuque.
\v 17 Yuꞌun te chvinaj ti scꞌop ti Diose ti jaꞌ ti sventa ti oy xchꞌunojel coꞌntontique ti toj coꞌntontic chijyilucutic ti Diose. Yuꞌun hech tsꞌibabil: “Ti muchꞌu toj yoꞌnton chquil yuꞌun ti oy xchꞌunojel yoꞌntone, jaꞌ chcuxi sbatel osil”, ti xchi ti Diose.
\s Jaꞌ scꞌopilal ti oy smulic scotol crixchanoetic. Scotol ti muchꞌutic mu yaꞌyojuc ti scꞌop ti Diose oy smulic yuꞌun snaꞌic ti oy ti Diose pero muc spasic ti mucꞌ
\p
\v 18 Ti Diose chacꞌ ti qꞌuelel ti chacꞌbe castigo ti muchꞌutic mu scꞌan xchꞌumbat scꞌope, xchiꞌuc ti muchꞌutic tsaꞌ smulique. Yuꞌun bol yoꞌntonic hech yuꞌun tscontrainic ti scꞌop ti Diose ti jaꞌ melele yuꞌun mu scꞌan chpuc ti scꞌop ti Diose.
\v 19 Mu yuꞌunuc mu snaꞌic mi jutuc cꞌu xꞌelan ti Diose. Yuꞌun scotol crixchanoetic ch-acꞌbat snaꞌic yuꞌun ti Diose.
\v 20 Manchuc mi mu xquiltic ti jsatic ti Diose, ti yabtele chvinaj. Asta cꞌalal imeltsaj ti balumile asta ti hora to chvinaj ti jelaven spꞌijil ti Diose, ti mu snaꞌ xlaj spꞌijil ti Diose. Chvinaj ti jaꞌ Dios stuc. Hech yuꞌun mu xuꞌ chalic ti mu snaꞌique.
\v 21 Laj snaꞌic bu oy ti Diose pero muc spasic ti mucꞌ hech chaj cꞌu cheꞌel tscꞌan ti jpastic ti mucꞌ ti Diose. Hocol aval, muc xchiic ti stojol. Hech yuꞌun hovil ti cꞌutic laj snopilanic ti yoꞌntonique. Jaꞌ noꞌox más ibolib ti yoꞌntonique.
\v 22 Pꞌij yoꞌntonic laj scuy sbaic. Jaꞌ bol ti jyalel icꞌotic.
\v 23 Muc scꞌan spasic ti mucꞌ ti Diose ti stalel cuxul sbatel osile. Jaꞌ laj slocꞌtaic ti muchꞌu chchame. Jaꞌ crixchano ti chchame. Jaꞌ laj spasic ti mucꞌ. Jaꞌ laj spasic ti mucꞌ uc slocꞌtombail mut xchiꞌuc slocꞌtombail ti cꞌusi xcotetic ti lume xchiꞌuc slocꞌtombail chon.
\p
\v 24 Hech yuꞌun icomesatic yuꞌun ti Diose. Yuꞌun ibolib xa ti yoꞌntonique, hech lic spasic ti cꞌusi chopol tscꞌan ti sbecꞌtalique, lic yixtanic ti sbecꞌtalique.
\v 25 Muc scꞌan xchꞌunic ti cꞌusi melele ti jaꞌ ti Diose ti te oy ti vinajele. Jaꞌ laj spasic ti mucꞌ ti cꞌutic pasbile ti mu xcoltavane. Laj yacꞌ sbaic ti abatinel yuꞌun. Maꞌuc laj spasic ti mucꞌ ti Diose ti laj spas scotol ti cꞌutic oye. Jaꞌ stuc tspasat ti mucꞌ sbatel osil. Jun yutsil ti hech chcꞌot ti pasel.
\p
\v 26 Jaꞌ yuꞌun ti icomesatic yuꞌun ti Diose yuꞌun ti hech laj spasique. Hech iꞌepaj sbolil yoꞌntonic. Hech uc ti antsetique jꞌechꞌel ibolibic ti jyalel. Maꞌuc laj xchiꞌin sbaic xa xchiꞌuc viniquetic. Stuquic laj xchiꞌin sbaic.
\v 27 Hech onoꞌox uc ti viniquetique maꞌuc laj xchiꞌin sbaic xa xchiꞌuc antsetic. Toyol yoꞌntonic ti viniquetique ti laj xchiꞌin sbaic stuquic. Hech iꞌacꞌbat stoj ti sbecꞌtalic ti smulique asta chlic xchamel sbecꞌtalic yuꞌun.
\p
\v 28 Yuꞌun muc scꞌan spasic ti mucꞌ ti Diose hech yuꞌun icomesatic yuꞌun ti Diose. Puru sbolil yoꞌntonic laj snopic. Scotol laj spasic ti cꞌusi chopol ti pasele.
\v 29 Inoj ti yoꞌntonic scotol ti cꞌusi chopole, xchiꞌuc mulivajel, xchiꞌuc bolcꞌop, xchiꞌuc sbicꞌtal yoꞌntonic, xchiꞌuc yan muliletic. Jaꞌ ibat ti yoꞌntonic tspas biqꞌuit yoꞌntonic, chmilvanic, tspasic pleito, chloꞌlavanic, chlabanvanic, chopol tspucbe scꞌopilal yan.
\v 30 Tsaꞌbeic smul yan. Scoj ti vocol ti chichꞌique chilinta ti Diose. Mu xchꞌun mantal, tstoy sbaic, tstoy sbaic xchiꞌuc scꞌop, tsnopilanic yan muliletic, tspꞌajbe smantal stot smeꞌic.
\v 31 Muꞌyuc srazonic. Ti cꞌusi chale mu xcꞌot ti pasel. Mu xcꞌuxubinvanic, muꞌyuc perdón ti yoꞌntonic, muꞌyuc muchꞌu bal ti yoꞌntonic.
\v 32 Manchuc mi tsnaꞌic ti yaloj ti Diose ti chꞌayel chbatic ti muchꞌu hech tspasique, toyol yoꞌntonic ta to spasic. Lec chilic uc mi hech tspasic yantic uc.
\c 2
\s Scotol ti muchꞌutic xchꞌunojic scuyojic ti smantal ti Diose oy smulic yuꞌun mu yuꞌunuc jꞌechꞌel chajvalinic
\p
\v 1 Mi oy muchꞌu hech chal: “Ep smul lume, ta onoꞌox xichꞌic castigo”, mi xchie, yuꞌun juez tscuy sba. Mu xil ti coꞌol oy smul xchiꞌuc yuꞌun coꞌol ti cꞌusi tspas xchiꞌuque. Hech yuꞌun mi ch-acꞌbatic castigo lume, jaꞌ noꞌox hech uc ch-acꞌbat castigo ti muchꞌu hech chale.
\v 2 Yuꞌun toj chchapanvan ti Diose hech yuꞌun ti jnaꞌtic ti persa ch-acꞌbat castigo yuꞌun smulic scotol ti muchꞌutic hech tspasique.
\v 3 Chil ti oy smul ti muchꞌutic hech tspasique. Mu xil ti hech yacꞌoj sba tspas uc. Tscuy ti stuc chcol, ti mu xꞌacꞌbat castigo yuꞌun smul yuꞌun ti Diose tscuy.
\v 4 Mi hech tsnope, mu spas ti mucꞌ ti ep iꞌacꞌbat bendición yuꞌun ti Diose, ti ep icꞌuxubinate, ti ep itsꞌicbat sbolil yoꞌntone. Mu snaꞌ ti ep laj xa yichꞌ cꞌuxubinel yuꞌun acꞌo sutes yoꞌnton yuꞌun smul.
\v 5 Scoj ti tsots yoꞌntone, scoj ti mu sutemuc yoꞌntone, hech yacꞌoj sba tscajtsob ti scastigo ti chcꞌo yichꞌe. Jaꞌ ta onoꞌox chcꞌo yichꞌ cꞌalal tsta yorail chacꞌbe castigo yuꞌun smulic scotol crixchanoetic ti Diose. Te chvinaj ti toj chchapanvan ti Diose.
\v 6 Ti cꞌu xꞌelan ti cabteltique hech chijyacꞌbucutic jtojoltic jujunucutic.
\v 7 Scotol ti muchꞌu mu xlaj yoꞌntonic tspasilanic ti cꞌusi leque, yuꞌun tscꞌan ti lec chcꞌot scꞌopilal yuꞌun ti Diose, ti ch-acꞌbat squeval hech chaj cꞌu cheꞌel squeval ti Diose, ti chcuxiic sbatel osile, jaꞌ ch-acꞌbat xcuxlejalic sventa sbatel osil.
\v 8 Scotol ti muchꞌu jaꞌ noꞌox scꞌanic ti lec scꞌopilal stuquique, ti mu xchꞌunic ti cꞌop ti jaꞌ melele, ti jaꞌ chchꞌunic spasel ti cꞌusi chopole, jaꞌ quechel yilintael yuꞌun Dios ti stojolic. Hech yuꞌun ch-acꞌbatic castigo sbatel osil.
\v 9 Ta me xichꞌic ep vocol, ta me xꞌechꞌ svocolic scotol ti muchꞌutic tspasic ti cꞌusi chopole yuꞌun xchꞌunojic tscuy. Ta onoꞌox xichꞌic ti jchiꞌiltique, hoꞌucutic ti judioucutique, yuꞌun yaꞌyojic ti scꞌop ti Diose. Chichꞌic uc ti achiꞌiltaque, xchiꞌuc scotol yan crixchanoetic.
\v 10 Scotol ti muchꞌutic laj xa spasic ti cꞌusi leque lec ch-ilat yuꞌun ti Diose. Ta me xilic utsilal. Ch-acꞌbat jun yoꞌntonic jujun sbatel osil. Ta onoꞌox xcꞌo quichꞌtic scotol, hoꞌucutic ti judioucutique, yuꞌun jaꞌ primero laj yacꞌ ti qꞌuelel ti Diose ti hoꞌucutic laj stꞌujucutique. Chayacꞌboxuc scotol uc, ti hoꞌoxuque ti yanlum crixchanooxuque.
\p
\v 11 Yuꞌun ti Diose mu yuꞌunuc tstꞌuj ti muchꞌu chcꞌuxubine; jaꞌ parejo chixchapanucutic jcotoltic.
\v 12 Yuꞌun scotol ti muchꞌutic tsaꞌilan smulique, ti mu yaꞌyojuc ti smantal ti Diose ti laj yalbucutic comel ti Moisese ti voꞌonee, maꞌuc ch-ichꞌbat scꞌop yuꞌun ti mu yaꞌyojuc ti smantal ti Diose. Jaꞌ ch-ichꞌbat scꞌop yuꞌun ti cꞌu yepal iꞌacꞌbat snaꞌic ti yoꞌntonic yuꞌun ti Diose. Yuꞌun muc xchꞌunic hech yuꞌun chꞌayel chbatic. Scotol ti muchꞌutic tsaꞌilan smulique ti yaꞌyojic ti smantal ti Diose, jaꞌ ch-ichꞌbat scꞌopic yuꞌun ti yaꞌyojic ti smantal ti Diose.
\v 13 Yuꞌun maꞌuc toj coꞌntontic chijcꞌot ti stojol ti Diose mi jaꞌ noꞌox chcaꞌibetic ti smantal ti Diose. Jaꞌ toj coꞌntontic chijcꞌot mi jchꞌunojbetic ti smantal ti Diose.
\v 14 Ti achiꞌiltaque xchiꞌuc ti yan crixchanoetique ti mu yichꞌojuc ti smantal ti Diose, oy bu coꞌol tspasic hech chaj cꞌu cheꞌel smantal ti Diose. Manchuc mi mu yichꞌojuc smantal ti Diose, oy mantal ti yoꞌntonic.
\v 15 Chvinaj ti qꞌuelel ti hech oy ti yoꞌntonique yuꞌun ti cꞌusi tspasique. Chvinaj ti tsnaꞌic ti cꞌusi lec ti pasele, ti tsnaꞌic uc ti cꞌusi mu xtune. Yuꞌun mi oy cꞌusi chopol spasoj, tscꞌan tscolta sba.
\v 16 Yuꞌun tsta yorail ch-ichꞌbat scꞌopic scotol crixchanoetic yuꞌun ti Jesucristoe, jaꞌ ti acꞌbil yabtel yuꞌun ti Stote. Jaꞌ ch-ichꞌbat scꞌopic yuꞌun ti cꞌusi laj snopique ti cꞌusi mucul ti stojol ti crixchanoetic ti mu xvinaje. Jaꞌto ch-acꞌat ti qꞌuelel ti cꞌusi smule. Hech chal ti lequil achꞌ cꞌop ti jchole.
\s Jaꞌ scꞌopilal ti judioetique ti yichꞌojic ti smantal ti Diose ti oy smulic uc
\p
\v 17 Ti jchiꞌiltique, hoꞌucutic ti judioucutic xchiꞌuque, tscuyic ti lec ch-ilatic yuꞌun ti Diose yuꞌun ti yichꞌojbeic ti smantal ti Diose. Jaꞌ tstoy sbaic yuꞌun chojtiquinic ti Diose tscuyic.
\v 18 Tscuyic ti tsnaꞌic cꞌusi tscꞌan ti Diose. Tscuyic ti tsnaꞌ tstꞌujic ti cꞌusi leque yuꞌun ipꞌijub xa yuꞌun ti mantaletique tscuyic.
\v 19 Hech yuꞌun tstojobtas scotol ti muchꞌutic maꞌsatetique tscuyic, jaꞌ ti muchꞌutic chꞌayemic ti be tscuyique. Jaꞌ luz cꞌotemic stuquic tscuyic yuꞌun ti muchꞌutic oyic ti icꞌ osile tscuyique, jaꞌ ti muchꞌutic mu pꞌijuc tscuyique.
\v 20 Chchanubtas ti muchꞌutic mu xtojob yuꞌunic tscuyic. Yuꞌun yichꞌojbeic ti smantal ti Diose, jaꞌ ti melele, jaꞌ ti chijpꞌijub yuꞌune, hech yuꞌun maestro tscuy sbaic yuꞌun ti muchꞌutic mu to chaꞌibeic sjame.
\v 21 Xuꞌ yuꞌunic chchanubtasic yantic tscuyic. ¿Cꞌu yuꞌun mu snaꞌ stuc? “Mu me xaꞌelcꞌajic, xchi ti Diose”, xchiic. Yacꞌoj sba ch-elcꞌajic stuquic.
\v 22 “Mu me xamulivajic, xchi ti Diose”, xchiic. Yacꞌoj sba chmulivajic stuquic. Chaqꞌuic ti qꞌuelel ti tspasic ti mucꞌ ti Diose yuꞌun muꞌyuc santo o yuꞌunic. Pero ta to xelcꞌanic ti Diose yuꞌun mu hechuc tspasic hech chaj cꞌu cheꞌel yaloj ti Diose.
\v 23 Hovil ti tstoy sbaic yuꞌun ti yichꞌojbeic ti smantal ti Diose. Jaꞌ noꞌox chaqꞌuic ti utel ti Diose yuꞌun mu xchꞌumbeic ti smantale.
\v 24 Yuꞌun hech tsꞌibabil comel ti scꞌop ti Diose: “Ti acojic ti chopol chbat jcꞌopilal yuꞌun ti yanlum crixchanoetique, xchi ti Diose”, ti xchie. Jaꞌ scꞌopilal ti jchiꞌiltique.
\p
\v 25 Ti circuncisione oy stu cuꞌuntic mi ti jchꞌumbetic smantal ti Diose. Mi ti jpꞌajbetic smantal ti Diose, manchuc mi quichꞌojtic circuncisión, mu quichꞌojticuc circuncisión xꞌelan.
\v 26 Hech yuꞌun mi jaꞌ tspas ti mucꞌ ti smantal ti Diose ti muchꞌu mu yichꞌojuc circumcisione, jaꞌ yichꞌoj circuncisión xꞌelan manchuc mi mu yichꞌojuc.
\v 27 Hech yuꞌun ti muchꞌu chchꞌumbe smantal ti Diose manchuc mi mu yichꞌojuc circuncisión ti sbecꞌtale, jaꞌ xuꞌ chijyalbucutic jmultic mi ti jpꞌajbetic smantal ti Diose, hoꞌucutic ti pꞌejel ti jun cuꞌuntic ti smantal ti Diose, hoꞌucutic ti quichꞌojtic circuncisione.
\v 28-29 Yuꞌun maꞌuc ti sventa ti oy señail ti jbecꞌtaltique ti judioucutic chijyilucutic ti Diose. Jaꞌ ti sventa ti oy xchꞌunojel coꞌntontique ti judioucutic chijyilucutic ti Diose. Maꞌuc ti sventa ti quichꞌojtic circuncisione ti yuꞌunucutic ti Diose chijcꞌot. Jaꞌ ti sventa ti oy xchꞌunojel coꞌntontic ti yuꞌunucutic ti Diose chijcꞌot. Mi hech ti coꞌntontique, manchuc mi mu xijyalbucutic lec jcꞌopilaltic ti crixchanoetique, jaꞌ ti Diose chijyalbucutic lec jcꞌopilaltic.
\c 3
\p
\v 1 Hovil ti hech jchꞌunojtic ti más lec chijyilucutic ti Diose hoꞌucutic ti judioucutic cheꞌe. Hovil ti chquichꞌtic ti circuncisione cheꞌe, mi xachiique, mu hechuc.
\v 2 Mu hoviluc ti jchꞌunojtic ti más lec chijyilucutic ti Diose yuꞌun primero nijyacꞌbucutic ti scꞌope, hoꞌucutic ti judioucutique.
\v 3 Manchuc mi oy muc xchꞌunic ti jchiꞌiltique, mu yuꞌunuc hech ilaj scꞌopilal o ti hech yalojbucutic ti Diose ti chijcolucutique.
\v 4 ¡Bu cꞌamba lajuc scꞌopilal yuꞌun mu snaꞌ snop cꞌop ti Diose! Ti hoꞌucutique ti jnaꞌtic ti jnoptic cꞌop. ¿Mi ichꞌay xa ti avoꞌntonic ti hech tsꞌibabil comel ti scꞌop ti Diose?
\q Ta onoꞌox chvinaj ti toj chacꞌopoje.
\q Mu xuꞌ yuꞌunic crixchanoetic ti chasticꞌbot amule,
\m ti xchie. Jaꞌ scꞌopilal ti Diose.
\p
\v 5 Oy chalic ti jchiꞌiltique ti muchꞌutic mu xchꞌunojuque: “Melel ti toj yoꞌnton ti Diose. Yuꞌun ti oy jmultique hech más lec chvinaj ti toj yoꞌnton ti Diose. Hech yuꞌun mi chijyacꞌbucutic castigo yuꞌun ti jmultique, mu tojuc chchapanvan obi”, xchiic ti jchiꞌiltique.
\v 6 Mu lecuc mi hech ti jnoptique yuꞌun mu meleluc. Ti meleluc ti hech tsnopique, ti Diose mu xuꞌ chisticꞌbucutic jmultic mi junuc ti hechuque.
\p
\v 7 Ti hechuc ti jnop hech chaj cꞌu cheꞌel tsnopique, hech xuꞌ chcal: Yuꞌun ti ti jnop cꞌope, hech más lec chvinaj ti toj yoꞌnton ti Diose, hech más lec chbat scꞌopilal. Hech yuꞌun ti Diose mu xuꞌ chisticꞌbun jmul yuꞌun ti laj jnop cꞌope, xuꞌ xichi ti hechuque.
\v 8 Ti hechuc ti jchꞌuntique, hech chlocꞌ sjam ti jaꞌ más lec chijyilucutic ti Diose mi ep ti jmultique, xchi xlocꞌ sjam. Pero mu hechuc. Oy muchꞌutic chalic uc ti hech uc ti hech chcaltutique yuꞌun jaꞌ noꞌox tscꞌan chisaꞌbuntutic jmultutic. Ta onoꞌox xꞌacꞌbatic castigo yuꞌun yan tsloqꞌuesbeic sjam ti jcꞌoptutique.
\s Jaꞌ scꞌopilal ti mi junuc muꞌyuc muchꞌu toj yoꞌntonic
\p
\v 9 Maꞌuc más lecucutic yuꞌun ti voꞌone quichꞌojtic ti scꞌop ti Diose, hoꞌucutic ti judioucutique. Yuꞌun laj xa calboxuc ti coꞌol oy jmultic jcotoltic, manchuc mi judioucutic, manchuc mi yanlum crixchanooxuc.
\v 10 Yuꞌun hech tsꞌibabil comel ti scꞌop ti Diose:
\q Mi junuc muꞌyuc muchꞌu toj yoꞌntonic.
\q
\v 11 Muꞌyuc muchꞌu pꞌij yoꞌntonic.
\q Muꞌyuc muchꞌu tsaꞌic ti Diose.
\q
\v 12 Yan be stamojic scotolic.
\q Hech coꞌol boliben yoꞌntonic scotolic.
\q Mi junuc muꞌyuc muchꞌu lec ti cꞌusi tspasique.
\q
\v 13 Ti yeique jaꞌ hech chaj cꞌu cheꞌel chꞌen ti campo santo ti bu tu ti jyalel chlocꞌ tal yicꞌ mi jamale.
\q Ti yoqꞌuique chtun yuꞌun tsnopic cꞌop.
\q Ti yut yeic oy veneno yaꞌyel hech chaj cꞌu cheꞌel oy ti yut ye veneno ti orachone.
\q Chmilvan yaꞌyel yuꞌun chbolibtasvan xchiꞌuc ti scꞌope.
\q
\v 14 Puru bolcꞌop chlocꞌ.
\q Chvinaj ti scꞌop ti xmichꞌet noꞌox yoꞌntonic.
\q
\v 15 Mi oy cꞌusi chopol chaꞌi, hech chlic sjol, hech chba milvanuc.
\q
\v 16 Scotol cꞌacꞌal buc noꞌox chbatic ch-ilbajinvanic, chacꞌbeic ep svocol ti crixchanoetique.
\q
\v 17 Mi jutuc mu xuꞌ chcꞌuxubinvanic.
\q
\v 18 Muꞌyuc Dios ti yoꞌntonic hech yuꞌun mu xiꞌic ti Diose,
\m ti xchie.
\p
\v 19 Hoꞌucutic ti judioucutique ti jnaꞌtic ti mu jchꞌunojbeticuc ti smantal ti Diose ti quichꞌojtique, hech yuꞌun muꞌyuc cꞌusi xuꞌ chcaltic ti stojol ti Diose. Hech yuꞌun scotol crixchanoetic coꞌol oy smulic ti stojol ti Diose.
\v 20 Mu onoꞌox muchꞌu xuꞌ yuꞌun chchꞌun ti mantaletique, hech yuꞌun mu yuꞌunuc xuꞌ toj coꞌntontic chijyilucutic ti Diose yuꞌun ti cabteltique. Jaꞌ noꞌox laj yacꞌbucutic ti mantaletic ti Diose yuꞌun hech ti jnaꞌtic bu ti jtatic jmultic.
\s Jaꞌ scꞌopilal ti muꞌyuc smul ch-ilatic scotol ti muchꞌutic oy xchꞌunojel yoꞌntonique
\p
\v 21-22 Ti ora to laj xa yacꞌbucutic jnaꞌtic ti Diose ti maꞌuc ti sventa ti mantaletique ti toj coꞌntontic chijyilucutique. Jaꞌ toj coꞌntontic chijyilucutic mi jchꞌunojtic ti jaꞌ jqꞌuexoltic laj yacꞌ sba ti milel cuꞌuntic ti Jesuse. Hech pꞌejel ti sun ti Moisese xchiꞌuc ti sunic ti yan jꞌalcꞌopetic yuꞌun ti Diose. Hech scꞌopilal scotol crixchanoetic.
\v 23 Yuꞌun coꞌol oy jmultic jcotoltic. Muꞌyuc muchꞌu oy yutsil yoꞌnton hech chaj cꞌu cheꞌel yutsil yoꞌnton ti Diose.
\v 24 Yuꞌun oy yutsil yoꞌnton cuꞌuntic ti Diose, hech yuꞌun jmotontic ti muꞌyuc jmultic chijyilucutic ti Diose yuꞌun ti laj smambucutic jcoleltic ti Cristo Jesuse.
\v 25 Yuꞌun xchapanoj ti Diose ti jaꞌ jtojmulil chcꞌot yuꞌun scotol crixchanoetic ti Snichꞌone cꞌalal laj yacꞌ sba ti milel ti cruz. Hech yuꞌun muꞌyuc xa jmultic chijyilucutic mi oy xchꞌunojel coꞌntontique. Hech laj yacꞌ ti qꞌuelel ti Diose ti toj chchapambe smulic scotol crixchanoetic xchiꞌuc ti muchꞌutic muꞌyuc smulic iꞌilat yuꞌun ti Diose ti voꞌonee yuꞌun laj smala ti Diose jaꞌto mi itojbat smulic yuꞌun ti Snichꞌone. Jaꞌto cꞌalal icham ti Snichꞌon ti Diose, jaꞌto ichꞌay ti smulique ti stojol ti Diose, manchuc mi cuxajtic to, manchuc mi chamenic xa.
\v 26 Ti ora to laj xa yacꞌ ti qꞌuelel ti Diose ti toj snopoj. Hech yuꞌun muꞌyuc smul ch-ilat yuꞌun ti Diose scotol ti muchꞌutic chchꞌunic ti jaꞌ jtojmulil yuꞌunic ti Jesuse.
\p
\v 27 Yuꞌun ti ti jtoy jbatique, mu xa xuꞌ. “¿Cꞌu yuꞌun mu xuꞌ ti jtoy jbatic xchiꞌuc ti cabteltique?” mi xachiique, “yuꞌun maꞌuc ti sventa cabteltic ti chijcolucutique”, chacut. Yuꞌun jaꞌ ti sventa xchꞌunojel coꞌntontic ti chijcolucutique.
\v 28 Yuꞌun hech jchꞌunojtic. Ti muchꞌu oy xchꞌunojel yoꞌntone jaꞌ muꞌyuc smul ch-ilat yuꞌun ti Diose. Muꞌyuc xa scꞌopilal mi lec ti yabtele mi laj xchꞌun ti mantaletique, mi mu laj xchꞌun ti mantaletique.
\p
\v 29 Ti Diose maꞌuc noꞌox Dios cuꞌuntic, hoꞌucutic ti judioucutique. Jaꞌ Dios yuꞌun uc ti yanlum crixchanoetique.
\v 30 Jun noꞌox ti Dios cuꞌuntic jcotoltic xchiꞌuque. Jaꞌ chacꞌ ti libre yuꞌun smul ti sventa xchꞌunojel yoꞌnton ti muchꞌu yichꞌoj circuncisione. Jaꞌ chacꞌ ti libre yuꞌun smul uc ti sventa xchꞌunojel yoꞌnton ti muchꞌu mu yichꞌojuc circuncisione.
\v 31 Yuꞌun ti hech jchꞌunojtique, ti jchꞌaybe ti smantal ti Diose, mi xachiique, mu hechuc. Jaꞌ tsꞌacal ti jchꞌuntic.
\c 4
\s Jaꞌ scꞌopilal ti Abrahame ti yuꞌun oy xchꞌunojel yoꞌntone hech toj yoꞌnton ti Abrahame laj yil ti Diose
\p
\v 1 Ti Abrahame jaꞌ ti jtatamoltic ti voꞌonee ti sventa jbecꞌtaltic, “¿mi maꞌuc ti sventa yabtel ti toj yoꞌnton iꞌilat yuꞌun ti Diose?” mi xachiique, “maꞌuc”, xichi xitacꞌav.
\v 2 Ti jaꞌuc ti sventa yabtel ti toj yoꞌnton iꞌilat yuꞌun ti Diose ti Abrahame, xuꞌ tstoy sba xchiꞌuc ti yabtele ti hechuque. Jaꞌuque ti sventa xchꞌunojel yoꞌnton ti iꞌacꞌbat ti yoꞌnton yuꞌun ti Diose, hech yuꞌun mu xuꞌ tstoy sba ti stojol ti Diose.
\v 3 Yuꞌun hech tsꞌibabil comel scꞌopilal ti sun ti Diose: “Ti Abrahame laj xchꞌun scotol ti chcꞌot ti pasel ti cꞌutic iꞌalbat yuꞌun ti Diose, hech toj yoꞌnton ti Abrahame laj yil ti Diose”, ti xchie.
\v 4 Cꞌalal mi laj xa abtejucutic chavil mu jmotonticuc ti chquichꞌtique; jaꞌ stojol cabteltic. Jmotontic ti toj coꞌntontic chijyilucutic ti Diose. Hech yuꞌun ti muchꞌu chchꞌun ti persa ch-abtej yuꞌune, jaꞌ ch-acꞌbat stojol yabtel; mu xꞌacꞌbat smoton.
\v 5 Ti muchꞌu chchꞌun ti mu xꞌabteje, ti ch-acꞌbat smoton yuꞌun ti Diose, jaꞌ chcol ti libre yuꞌun ti smule. Hech toj yoꞌnton ch-ilat yuꞌun ti Diose.
\v 6 Hech chaj cꞌu cheꞌel laj yal ti Davide ti jaꞌ jun noꞌox yutsil ti muchꞌu maꞌuc ti sventa yabtel ti toj yoꞌnton ch-ilat yuꞌun ti Diose.
\v 7 Yuꞌun hech laj yal ti Davide:
\q Nichim noꞌox yoꞌntonic ti muchꞌutic ipasbatic xa perdón yuꞌun ti smulique, ti iqꞌuejbat xa ti smulique yuꞌun ti Diose hech muꞌyuc xa ti sventa ti smulique.
\q
\v 8 Nichim noꞌox yoꞌnton ti muchꞌu mu xꞌacꞌbat xcuch smul yuꞌun ti Cajvaltique,
\m xchi ti Davide.
\p
\v 9 “¿Mi jaꞌ noꞌox jcꞌopilaltic ti hoꞌucutique ti quichꞌojtic circuncisione, mi jaꞌ scꞌopilal uc ti yanlum crixchanoetique ti mu yichꞌojuc circuncisione?” mi xachiique, hech chacalbeic. Ti sventa ti oy xchꞌunojel yoꞌnton ti Abrahame hech toj yoꞌnton iꞌilat yuꞌun ti Diose, xijchi.
\v 10 Mi laj xa yichꞌ circuncisión, o mi mu to chichꞌ circuncisión ti Abrahame cꞌalal toj yoꞌnton iꞌilat yuꞌun ti Diose, mi xijchi ti jnoptique, hech ti jnaꞌtic ti mu to chichꞌ circuncisión ti cꞌalal hech toj yoꞌnton iꞌilat yuꞌun ti Diose.
\v 11 Ti cꞌalal lic yichꞌ ti circuncisione, jaꞌ señail noꞌox ti sbecꞌtal ti toj yoꞌnton iꞌilat yuꞌun ti Diose ti sventa xchꞌunojel yoꞌntone. Hech yuꞌun ti yanlum crixchanoetique ti mu yichꞌojuc circuncisione, jaꞌ stotic chcꞌot ti Abrahame ti sventa xchꞌunojel yoꞌntonic. Hech toj yoꞌntonic ch-ilatic uc yuꞌun ti Diose.
\v 12 Ti hoꞌucutique ti quichꞌojtic circuncisione jaꞌ jtotic uc mi jchanojbetic yoꞌnton uc ti jtotic Abrahame ti oy xchꞌunojel yoꞌnton cꞌalal mu to chichꞌ circuncisione.
\s Jaꞌ scꞌopilal ti jaꞌ ti sventa ti oy xchꞌunojel yoꞌnton ti Abrahame hech ch-acꞌbat sventain ti balumile xchiꞌuc yelnichꞌon
\p
\v 13 Maꞌuc ti sventa yabtel ti iꞌalbat ti Abrahame ti chcꞌot yorail ti tsventain ti sjoylejal ti balumile xchiꞌuc ti yelnichꞌon ti sventa xchꞌunojel yoꞌntone. Muꞌyuc scꞌopilal mi laj xchꞌun mi muc xchꞌun ti mantaletique. Yuꞌun ti hech iꞌalbat ti Abrahame, yuꞌun toj yoꞌnton iꞌilat yuꞌun ti Diose yuꞌun ti oy xchꞌunojel yoꞌntone.
\v 14 Ti jaꞌuc chijyacꞌbucutic jventaintic ti balumile ti Diose ti sventa ti cabteltique, hovil ti oy xchꞌunojel coꞌntontic obi. Hovil ti hech albil comel ti jcꞌopilaltique obi.
\v 15 Mu onoꞌox muchꞌu xuꞌ yuꞌun xchꞌun ti mantaletique. Ti mantaletique jaꞌ noꞌox chacꞌ ti qꞌuelel ti jpꞌajmantalucutique. Hech yuꞌun jaꞌ noꞌox chijyacꞌucutic ti castigo. Yuꞌun ti manchuc oy ti mantaletique, muꞌyuc jmultic muꞌyuc castigo ti hechuque.
\v 16 Mu hechuc tscꞌan ti Diose ti ch-acꞌbat sventain ti balumile ti sventa yabtel stuc ti Abrahame. Jaꞌ tscꞌan ti yutsil yoꞌnton stuc ti hech chacꞌbe sventain ti balumile ti Abrahame. Hech tsventain ti Abrahame ti sventa xchꞌunojel yoꞌnton. Hech yuꞌun chcꞌot ti pasel ti jventaintic ti balumile, hoꞌucutic ti yelnichꞌonucutic ti Abrahame ti sventa xchꞌunojel yoꞌntone. Maꞌuc noꞌox ti hoꞌucutic ti quichꞌojtic ti mantaletic ti laj yal ti Moisese, hoꞌucutic ti oy xchꞌunojel coꞌntontique. Jaꞌ ch-acꞌbat sventainic uc scotol ti muchꞌutic hech oy xchꞌunojel yoꞌntonic hech chaj cꞌu cheꞌel ti Abrahame, jaꞌ ti jtotic cuꞌuntic jcotoltique.
\v 17 Yuꞌun hech tsꞌibabil comel scꞌopilal ti Abrahame: “Stotot ep ti tos crixchanoetic chacꞌot cuꞌun”, xꞌutat ti Abrahame. Hech yuꞌun hech icꞌot ti pasel ti stojol ti Diose ti jaꞌ jtotic icꞌot ti Abrahame ti sventa xchꞌunojel yoꞌnton. Jaꞌ ti chꞌumbil scꞌope, jaꞌ ti xuꞌ chchaꞌcuses ti ánimaetique, jaꞌ ti xuꞌ chacꞌ cꞌotuc ti pasel ti cꞌusi mu to chcꞌot ti pasele.
\v 18 Ti Abrahame laj xchꞌun ti totil chcꞌot yuꞌun ti ep ti tos crixchanoetique. Jun to hovil yaꞌyel ti hech iꞌalbate. Pero laj xchꞌun ti cꞌu cheꞌel albil scꞌopilale: “Ep chpꞌol cuꞌun avelnichꞌon”, ti xꞌutate.
\v 19 Muc specꞌtsaj yoꞌnton. Muc xloꞌlaj yoꞌnton yuꞌun ti muꞌyuc xa scꞌopilal sbecꞌtal xꞌelan ti Abrahame xchiꞌuc ti yajnile yuꞌun muꞌyuc yolic. Yuꞌun jutuc xa scꞌan mu xlocꞌ hoꞌvinic habil ti Abrahame. Ti Sarae mi junuc vuelta muꞌyuc bu yiloj yol.
\v 20 Mi jutuc muc xchibaj yoꞌnton ti Abrahame. Laj xchꞌun scotol ti chcꞌot ti pasel ti cꞌutic iꞌalbat yuꞌun ti Diose. Yuꞌun laj xchꞌun scotol, hech iꞌan yip ti yoꞌntone, hech laj spas ti mucꞌ ti Diose.
\v 21 Jꞌechꞌel laj xchꞌun ti Abrahame ti xuꞌ yuꞌun tspas ti Diose ti cꞌutic iꞌalbat xae.
\v 22 Hech yuꞌun toj yoꞌnton iꞌilat yuꞌun ti Diose ti Abrahame.
\v 23 Yuꞌun ti toj yoꞌnton iꞌilat ti Abrahame yuꞌun ti Diose, ti xchie, maꞌuc noꞌox stuc ti hech tsꞌibabil scꞌopilale.
\v 24 Hoꞌucutic jcꞌopilaltic uc. Yuꞌun toj coꞌntontic chijyilucutic uc ti Diose, hoꞌucutic ti jchꞌunojtic ti laj xchaꞌcuses loqꞌuel ti chꞌen ti Cajvaltic Jesuse.
\v 25 Jaꞌ ti iꞌacꞌat entrecal yuꞌun chmilat yuꞌun jmultic, jaꞌ ti ichaꞌcusesat loqꞌuel tal ti chꞌen yuꞌun hech libre nijcꞌot yuꞌun ti jmultique.
\c 5
\s Jaꞌ scꞌopilal ti muchꞌu libre icꞌot yuꞌun smul
\p
\v 1 Yuꞌun libre nijcꞌot yuꞌun jmultic ti sventa xchꞌunojel coꞌntontic, hech yuꞌun mu xa quecheluc quilintaeltic ti stojol ti Diose. Ti sventa ti Cajvaltic Jesucristoe ti hech icꞌot ti pasele.
\v 2 Jaꞌ ti sventa uc ti Cajvaltique ti libre nijcꞌot yuꞌun ti jmultique. Hech yuꞌun mu xa xispꞌajucutic ti Diose. Hech yuꞌun nichim noꞌox coꞌntontic yuꞌun jchꞌunojtic ti chba jchiꞌintic ti Diose te ti bu utsilale.
\v 3 Maꞌuc noꞌox nichim noꞌox coꞌntontic yuꞌun chba jchiꞌintic ti Diose. Nichim noꞌox coꞌntontic uc mi chquichꞌtic ilbajinel yuꞌun ti jnaꞌtic ti ch-an stsatsal coꞌntontic mi icuch cuꞌuntic ti ilbajinele.
\v 4 Yuꞌun mi iꞌan stsatsal coꞌntontic, hech oy yip coꞌntontic. Yuꞌun mi oy yip coꞌntontic, hech chmucꞌub coꞌntontic.
\v 5 Mi imucꞌub coꞌntontic, hech mu xquichꞌtic mul yuꞌun nojem ti coꞌntontic ti cꞌuxucutuc ti yoꞌnton ti Diose ti sventa ti Chꞌul Espíritue ti acꞌbilucutique.
\p
\v 6 Yuꞌun laj snaꞌ ti Diose ti mu xuꞌ cuꞌuntic ti jcolta jbatique. Hech yuꞌun laj sta yorail ti laj yacꞌ sba ti milel yuꞌun jmultic ti Cristoe, jcotoltic ti muꞌyuc Dios ti coꞌntontique.
\v 7 ¿Muchꞌu cꞌamba yacꞌ sba ti milel yuꞌun ti muchꞌu jaꞌ noꞌox toj ti viniquil ti mu xuꞌ chcꞌuxubinvane? Repenta oy muchꞌu xuꞌ yuꞌun chacꞌ sba ti milel yuꞌun ti muchꞌu icꞌuxubinat yuꞌune.
\v 8 Pero ti Diose laj yacꞌ ti qꞌuelel ti cꞌuxucutic ti yoꞌnton, hoꞌucutic ti chopol coꞌntontic ti jyalele, yuꞌun laj yacꞌ sba ti milel cuꞌuntic ti Cristoe.
\v 9 Yuꞌun ti icꞌot xa ti pasel ti toj coꞌntontic chijyilucutic ti Diose ti sventa ti laj yacꞌ sba ti milel cuꞌuntic ti Cristoe, hech yuꞌun chcꞌot ti pasel ti jꞌechꞌel chijcolucutic ti sventa, ti mu xba quichꞌtic castigoe.
\v 10 Yuꞌun ti voꞌonee contra laj quil jbatic xchiꞌuc ti Diose. Yuꞌun ti laj yacꞌ sba ti milel cuꞌuntic ti Snichꞌone, hech ilecub xa yoꞌnton cuꞌuntic ti ora to. Yuꞌun lecuben xa yoꞌnton cuꞌuntic ti ora to, hech yuꞌun jꞌechꞌel chijcolucutic yuꞌune yuꞌun cuxul.
\v 11 Maꞌuc noꞌox ti ilecub xa yoꞌnton cuꞌuntique. Nichim noꞌox coꞌntontic uc ti stojol ti Diose yuꞌun jaꞌ ti sventa ti Cajvaltic Jesucristo uque ti lec ti jcꞌopon jbatic xchiꞌuc ti Diose.
\s Jaꞌ scꞌopilal ti Adane xchiꞌuc ti Cristoe
\p
\v 12 Yuꞌun laj sta smul ti sba vinique, hech yuꞌun jmulavilucutic nijcꞌot jcotoltic. Ti scoj jmultic chijchamucutic. Yuꞌun jcotoltic oy jmultic, hech yuꞌun jcotoltic chijchamucutic.
\v 13 Ti crixchanoetic liꞌ ti balumile ti voꞌonee cꞌalal mu to oyuc ti mantaletique, jmulaviletic uc. Mi ti jcuytic ti muꞌyuc smulic yuꞌun mu to oyuc ti mantaletic ti voꞌonee, oy.
\v 14 Yuꞌun ichamic uc ti crixchanoetique ti voꞌone xchiꞌuc ti Adane, xchiꞌuc ti yol xnichꞌnabe, xchiꞌuc scotol ti muchꞌutic muc xaꞌyic ti mantaletique yuꞌun mu to chtal ti balumil ti Moisese. Coꞌol ichamic ti muchꞌutic mu coꞌoluc laj sta smulic xchiꞌuc ti Adane. Ti Adane totil icꞌot cuꞌuntic. Jaꞌ noꞌox hech uc ti Jesucristoe totil icꞌot cuꞌuntic, yuꞌun oy cꞌusi laj spas jujun.
\p
\v 15 Ti scoj ti Adane jmulavilucutic nijcꞌot jcotoltic. Ti sventa ti Jesucristoe jmotontic toj coꞌntontic chijyilucutic ti Diose. Yuꞌun ti laj sta smul ti Adane chꞌayel chijbatucutic jcotoltic. Yuꞌun ti oy yutsil yoꞌnton cuꞌuntic ti Diose, hech yuꞌun ti sventa ti Jesucristoe jmotontic toj coꞌntontic chijyilucutic ti Diose, hech jꞌechꞌel chijcuxiucutic sbatel osil.
\v 16 Ti scoj ti Adane chquichꞌtic castigo yuꞌun jmultic. Ti sventa ti Jesucristoe libre chijcꞌot yuꞌun ti jmultique. Yuꞌun ti laj spꞌaj mantal ti Adane, hech jcꞌopilaltic chijyichꞌbucutic jcꞌoptic yuꞌun ti jmultique, chijyacꞌbucutic castigo jcotoltic. Yuꞌun jmotontic ti laj xa yacꞌucutic ti libre yuꞌun ti jmultique ti Jesucristoe, hech yuꞌun toj coꞌntontic chijyilucutic ti Diose manchuc mi ep jmul jtaojtic.
\v 17 Yuꞌun ti laj sta smul ti Adane hech laj sventainucutic ti mulile hech yuꞌun jcotoltic chꞌayel chijbatucutic. Yuꞌun jmotontic toj coꞌntontic chijyilucutic ti Diose ti sventa ti Jesucristoe, hech libre nijcꞌot yuꞌun ti mulile, hech jꞌechꞌel chijcolucutic sbatel osil.
\p
\v 18 Ti scoj ti laj sta smul ti Adane, hech yuꞌun hech jcꞌopilaltic jcotoltic chquichꞌtic castigo yuꞌun jmultic. Ti sventa ti toj yoꞌnton ti Jesucristoe, hech yuꞌun hech jcꞌopilaltic ti toj coꞌntontic chijyilucutic ti Diose, hech chijcuxiucutic sbatel osil.
\v 19 Ti scoj ti laj spꞌaj mantal ti Adane, hech jmulavilucutic nijcꞌot jcotoltic. Ti sventa ti laj xchꞌun mantal ti Jesucristoe, hech libre nijcꞌot yuꞌun ti jmultique.
\p
\v 20 Yuꞌun ti laj yal ti mantaletique ti Diose, yuꞌun acꞌo vinajuc ti ep ti jmultique. Manchuc mi ep ti jmultique, laj xcꞌuxubinucutic ti Diose. Ep yutsil yoꞌnton cuꞌuntic.
\v 21 Hech yuꞌun hech chaj cꞌu cheꞌel laj sventainucutic ti mulile ti voꞌonee yuꞌun hech chꞌayel chijbatucutic, hech onoꞌox uc chisventainucutic ti Diose ti oy yutsil yoꞌnton cuꞌuntique yuꞌun hech chijcuxiucutic sbatel osil. Yuꞌun ti chisventainucutic ti Diose, yuꞌun toj coꞌntontic chijyilucutic ti Diose ti sventa ti Cajvaltic Jesucristoe.
\c 6
\s Jaꞌ scꞌopilal ti chamenucutic ti sventa mulil, jaꞌ cuxulucutic ti sventa Cristo
\p
\v 1 ¿Cꞌusi chcutic cheꞌe? ¿Mi jaꞌ lec ta to jsaꞌilan jmultic yuꞌun hech ti jcuytic ti más oy yutsil yoꞌnton cuꞌuntic ti Diose?
\v 2 ¡Bu ba lecuc! Yuꞌun mi chamenucutic ti sventa mulil, ¡bu ba jsaꞌilantic!
\v 3 ¿Mi yuꞌun mu xanaꞌic ti cꞌalal laj quichꞌtic hoꞌ ti stojol ti Cristo Jesuse, ti cꞌu quepaltic ti laj xa quichꞌtique, jaꞌ señail ti coꞌol nijcham xchiꞌuc ti Cajvaltique chil ti Diose?
\v 4 Yuꞌun coꞌol nijcham xchiꞌuc ti Cajvaltique chil ti Diose, hech coꞌol nijmucat xchiꞌuc ti Cajvaltique chil ti Diose cꞌalal laj quichꞌtic hoꞌ, yuꞌun hech chac cꞌu cheꞌel ichaꞌcuxi ti Cristoe ti sventa jelaven spꞌijil ti Jtotic Diose, hech onoꞌox uc ti hoꞌucutique nijchaꞌcuxi xchiꞌuc ti Cajvaltique chil ti Diose hech yuꞌun achꞌ crixchanoucutic xa.
\p
\v 5 Yuꞌun ti coꞌol nijcham xchiꞌuc ti Cristoe chil ti Diose, hech onoꞌox uc coꞌol nijchaꞌcuxi xchiꞌuc.
\v 6 Yuꞌun jchꞌunojtic ti coꞌol nijmilat ti cruz xchiꞌuc ti Cristoe xchiꞌuc ti jbecꞌtaltique yuꞌun hech ijinat ti mu xa xijyicꞌucutic ti mulil ti jbecꞌtaltique, hech yuꞌun nijlocꞌ xa ti mozoil yuꞌun ti mulile.
\v 7 Yuꞌun ti coꞌol nijcham xchiꞌuc ti Cristoe chil ti Diose, hech yuꞌun mu xa xisventainucutic ti mulile.
\v 8 Yuꞌun ti hech jchꞌunojtic ti coꞌol nijcham xchiꞌuc ti Cristoe chil ti Diose, hech yuꞌun jchꞌunojtic uc ti coꞌol nijchaꞌcuxi xchiꞌuc.
\v 9 Ti jnaꞌtic ti yuꞌun ichaꞌcusesat loqꞌuel tal ti chꞌen ti Cristoe, hech yuꞌun mu xa xcham yan vuelta. Mu xa ventaimbiluc yuꞌun ti chchame.
\v 10 Yuꞌun ti Cajvaltique jꞌechꞌel noꞌox icham yuꞌun ti jmultique. Yuꞌun ti ichaꞌcuxie, hech yuꞌun cuxul ti stojol ti Diose, ch-abtej yuꞌun.
\v 11 Jaꞌ noꞌox hechucutic, chamenucutic yuꞌun ti mulile chijyilucutic ti Diose. Cuxulucutic ti stojol chijyilucutic ti Diose ti sventa ti Cajvaltic Cristo Jesuse. Hech yuꞌun chijꞌabtej yuꞌun. Chꞌunic hech o.
\p
\v 12 Hech yuꞌun mu me xavacꞌ sventaimboxuc mulil ti abecꞌtalique. Yuꞌun jaꞌ stalel chlaj ti jbecꞌtaltique hech yuꞌun mu me xachꞌun ti cꞌusi tscꞌan ti abecꞌtalique.
\v 13 Mu me xavacꞌ yabatimboxuc mulil ti abecꞌtalique yuꞌun chapasic ti cꞌusi mu xtune. Ta me xavacꞌ abaic ti abatinel yuꞌun ti Diose. Naꞌic me ti nachaꞌcusesat xa, hoꞌoxuc ti chamenoxuc onoꞌoxe. Hech yuꞌun acꞌo yabatimboxuc abecꞌtalic ti Diose yuꞌun hech chapasic ti cꞌusi leque.
\v 14 Hech mu xa xayabatinoxuc ti mulile. Yuꞌun mu xa ti jchꞌuntic ti jaꞌ lec chijyilucutic ti Diose ti sventa cabteltic. Jaꞌ jchꞌunojtic ti yutsil yoꞌnton lec chijyilucutic ti Diose ti sventa ti Cajvaltic Jesucristoe.
\s Laj xcholbe scꞌopilal ti mero mozoile yuꞌun hech chaꞌibeic sjam ti cꞌu cheꞌel chacꞌ sbaic ti abatinel yuꞌun ti Diose
\p
\v 15 ¿Cꞌusi chcaltic cheꞌe? ¿Mi jaꞌ lec ta to jsaꞌilan jmultic yuꞌun mu xa ti jchꞌuntic ti jaꞌ lec chijyilucutic ti Diose ti sventa cabteltic, jaꞌ jchꞌunojtic ti yutsil yoꞌnton lec chijyilucutic ti Diose? ¡Bu ba lecuc mi ti jsaꞌ jmultique!
\v 16 Chanaꞌic ti mi chcacꞌ jbatic ti mozoil yuꞌun jun crixchano yuꞌun ti ti jchꞌumbetic smantale, jaꞌ smozoucutic nijcꞌot o. Jaꞌ noꞌox hech uc mi chcacꞌ jbatic ti mozoil yuꞌun ti mulile, jaꞌ smozoucutic nijcꞌot o asta chꞌayel chijbat. Pero mi chcacꞌ jbatic ti abatinel yuꞌun ti Diose, jaꞌ yabatucutic nijcꞌot o asta chijcuxi sbatel osil.
\v 17 Ti voꞌone mozooxuc yuꞌun ti mulile. Ti ora to, hocol yal ti Diose, scotol avoꞌntonic achꞌunojic xa ti scꞌop ti Diose ti nachanubtasatique.
\v 18 Hech naloqꞌuic xa ti mozoil yuꞌun ti mulile. Laj xa avacꞌ abaic ti abatinel yuꞌun ti cꞌusi leque.
\v 19 Hech yuꞌun hech yacꞌoj sba chajcholboxuc avaꞌyic yuꞌun hech chavaꞌibeic sjam. Yuꞌun mu to chanaꞌic lec ti cꞌu cheꞌel ti aꞌibel sjam ti scꞌop ti Diose. Hech chaj cꞌu cheꞌel laj avacꞌ yabatimboxuc abecꞌtalic ti cꞌusi chopole xchiꞌuc ti cꞌusi mu xtune jaꞌ noꞌox más nabolibic, jaꞌ noꞌox hech uc acꞌo yabatimboxuc abecꞌtalic ti ora to ti cꞌusi leque yuꞌun hech más chalecubic.
\p
\v 20 Cꞌalal ochemoxuc ti mozoil yuꞌun ti mulile, muc xanop mi toj mi mu tojuc ti cꞌusi chapase.
\v 21 ¿Mi lec ti cꞌusi laj ata ti sventa avabtel ti voꞌonee? Mu lecuc. Ti ora to chaqꞌuexavic yuꞌun. Yuꞌun ti cꞌutic laj apasique, puru yuꞌun chꞌayel.
\v 22 Ti ora to nacolic xa loqꞌuel ti mozoil yuꞌun ti mulile. Yabatoxuc Dios nacꞌotic xa. Ti ora to oy cꞌusi lec laj ataic, jaꞌ ti toj avoꞌntonique, hech chacuxiic sbatel osil.
\v 23 Yuꞌun ti muchꞌu ch-abtej yuꞌun ti mulile, persa ch-acꞌbat stojol yabtel. Jaꞌ stojol yabtel ti chꞌayel chbate. Jaꞌuc ti muchꞌu chacꞌ sba ti abatinel yuꞌun ti Diose, jaꞌ chichꞌ smoton ti sventa ti Cajvaltic Cristo Jesuse. Jaꞌ smoton ti chcuxi sbatel osile. Yutsil yoꞌnton chacꞌ ti Diose.
\c 7
\s Jaꞌ scꞌopilal ti libre nijcꞌot xa yuꞌun ti mantaletique yuꞌun ti coꞌol nijcham xchiꞌuc ti Cristoe
\p
\v 1 Quermanotac, chacalboxuc scꞌopilal ti nupunele yuꞌun hech chavaꞌibeic sjam ti libre nijcꞌot xa yuꞌun ti mantaletique. Hoꞌoxuc ti chanaꞌic ti leye, chanaꞌic ti jcotoltic oyucutic ti sventa ley jaꞌ noꞌox ti jayib cꞌacꞌal liꞌoyucutique.
\v 2 Chanaꞌic ti scotol ants ti nupunem xchiꞌuc smalal ti sventa ley, persa chicꞌ sbaic xchiꞌuc jayib cꞌacꞌal cuxajtic liꞌ ti balumile. Mi icham ti smalale, muꞌyuc xa ti sventa ley xchiꞌuc ti smalale. Jaꞌto libre chcꞌot obi.
\v 3 Hech yuꞌun mi yan vinic tsmalalin cꞌalal cuxul to ti smalale, yajmul chcꞌot. Mi icham ti smalale, libre chcꞌot yuꞌun ti leye, hech mu muliluc mi tsta yan smalal.
\p
\v 4 Cꞌalal icham ti smalale, libre icꞌot ti antse, muꞌyuc xa muchꞌu chchꞌumbe smantal. Jaꞌ noꞌox hech ti hoꞌucutique, yuꞌun ti coꞌol nijcham xchiꞌuc ti Cristoe chil ti Diose hech yuꞌun libre nijcꞌot yuꞌun scotol ti cꞌutic laj jchꞌuntic ti voꞌone, jaꞌ ti chijcolucutic ti sventa cabteltic ti laj jcuytique. Yuꞌun jaꞌ tsots scꞌopilal ti muchꞌu ichaꞌcuxi loqꞌuel ti chꞌene, jaꞌ ti Cristoe. Yuꞌun ti jun nijcꞌot xa xchiꞌuc ti Cristoe, yuꞌun hech xuꞌ cuꞌuntic ti jpasbe yabtel ti Diose.
\v 5 Cꞌalal mu to achꞌubenuc ti coꞌntontique, cꞌalal laj caꞌitic ti mantaletique, más laj stijucutic batel yuꞌun ba jpastic ti cꞌusi tscꞌan ti jbecꞌtaltique. Jaꞌ sventa chꞌayel.
\v 6 Ti voꞌonee chuculucutic onoꞌox yuꞌun ti mantaletique. Ti ora to libre nijcꞌot xa yuꞌun coꞌol nijcham xchiꞌuc ti Cristoe chil ti Diose. Hech yuꞌun muꞌyuc xa scꞌopilal ti chispasucutic ti mantal ti mantaletique. Ti ora to libre oyucutic hech xuꞌ chcacꞌ jbatic ti abatinel yuꞌun ti Diose yuꞌun achꞌuben xa ti coꞌntontique ti sventa ti Chꞌul Espíritue ti quichꞌojtique. Mu hechuc coꞌntontic ti cꞌalal jchꞌunojtic to ti chijcolucutic ti sventa ti mantaletique ti laj stsꞌiba ti Moisese.
\s Jaꞌ scꞌopilal ti jaꞌ tscꞌan mulil ti jbecꞌtaltique; ti coꞌntontique mu scꞌan
\p
\v 7 ¿Cꞌusi chcaltic cheꞌe? Jaꞌ ch-icꞌvan ti mulil ti smantal ti Diose, mi chijchiucutique, ¡bu ba icꞌvanuc ti mulil ti smantal ti Diose! Ti manchuc laj caꞌitic ti smantal ti Diose, mu hechuc laj jnaꞌtic ti bu ti jtatic jmultic ti hechuque. Ti manchuc chal ti mantaletique: “Mu me xbicꞌtaj avoꞌntonic”, ti xchie, mu laj jnaꞌtic ti jaꞌ mulil mi chbicꞌtaj ti coꞌntontique.
\v 8 Ti cꞌalal laj caꞌitic ti smantal ti Diose ti “mu me xbicꞌtaj avoꞌntonic”, ti xchie, más laj stijucutic batel, más ibicꞌtaj ti coꞌntontique. Ti manchuc laj caꞌitic ti mantaletique, muꞌyuc scꞌopilal ti jmultique ti hechuque.
\v 9 Ti voꞌonee cꞌalal mu to chcaꞌitic ti mantaletique lec oyucutic laj jcuytic. Cꞌalal laj caꞌitic ti mantaletique, ep ti jmultique laj quiltic. Laj quiltic ti mu lecucutique, ti chꞌayel chijbate.
\v 10 Ti mantaletique ti jaꞌ laj jchꞌuntic ti chijcol yuꞌune, jaꞌ sventa chꞌayel icꞌot cuꞌuntic.
\v 11 Laj jcuytic ti xuꞌ ti jchꞌuntic scotol ti mantaletique pero mu xuꞌ cuꞌuntic. Hech laj sloꞌlabucutic ti coꞌntontique ti mulile. Yuꞌun laj jcuytic ti chchꞌun cuꞌuntic scotol ti mantaletique. Patil laj jnaꞌtic ti jaꞌ chꞌayel chijbat yuꞌun ti laj jchꞌuntic ti chchꞌun cuꞌuntique.
\p
\v 12 Hech yuꞌun lec ti mantaletique, mu snaꞌ ch-icꞌvan ti mulil. Mu chopoluc ti mu me xbicꞌtaj avoꞌntonic, mu me xaꞌelcꞌajic, mu me xamilvanic, ti xchie. Oy sjam ti jujupꞌele ti hech chale. Lec ti hech chijyalbucutique.
\v 13 Hech yuꞌun chꞌayel chijbat yuꞌun ti cꞌusi leque, mi chijchie, ¡bu ba sjamuc mi hech chcaltique! Ti mulile tscap sba xchiꞌuc ti cꞌusi leque hech chijlaj ti loꞌlael. Hech yuꞌun hech laj sloꞌlaucutic asta chꞌayel chijbat yuꞌun. Hech yuꞌun más chopol icꞌot scꞌopilal ti mulile ti sventa ti mantaletique.
\p
\v 14 Ti jnaꞌtic ti jaꞌ yuꞌun Dios ti mantaletique. Ti hoꞌucutique chisventainucutic ti cꞌusi tscꞌan ti jbecꞌtaltique. Oyucutic ti mozoil yuꞌun ti mulile.
\v 15 Ti lec ti jcꞌantic ti jpastique mu xcꞌot ti pasel cuꞌuntic. Jaꞌ ti jpastic ti cꞌusi mu xtun chcaꞌitique. Hech yuꞌun ti mu xcaꞌibetic sjam ti cꞌu yuꞌun ti mu xcꞌot ti pasel cuꞌuntic.
\v 16 Yuꞌun jaꞌ ti jpastic ti bu mu jcꞌantic ti jpastique, hech yuꞌun ti jnaꞌtic ti lec ti mantaletique.
\v 17 Hech yuꞌun mu hoꞌucutic ti jpastic. Jaꞌ chisventainucutic ti mulile ti oy ti coꞌntontique.
\v 18 Ti jnaꞌtic mi jutuc muꞌyuc jtutic ti hoꞌucutique. Mi jutuc muꞌyuc ti yutsil coꞌntontic ti jtuctique. Yuꞌun ti jcꞌantic ti jpastic ti cꞌusi leque pero mu xuꞌ cuꞌuntic spasel.
\v 19 Maꞌuc ti jpastic ti cꞌusi leque ti jaꞌ ti jcꞌantic ti jpastique. Jaꞌ ti jpastic ti cꞌusi chopole ti jaꞌ mu jcꞌantic ti jpastique.
\v 20 Yuꞌun jaꞌ ti jpastic ti bu mu jcꞌantic ti jpastique, hech yuꞌun mu hoꞌucutic ti hech ti jpastique. Jaꞌ chisventainucutic ti mulile ti oy ti coꞌntontique.
\p
\v 21 Hech yuꞌun hech oyucutic. Ti jcꞌantic ti jpastic ti cꞌusi leque. Mu xuꞌ, yuꞌun oy mulil ti coꞌntontic chcaꞌitic.
\v 22 Yuꞌun ti coꞌntontic lec chcaꞌitic ti hech oy ti smantal ti Diose.
\v 23 Pero yan mantal xchꞌunoj ti jbecꞌtaltique chquiltic yuꞌun tscontrain ti mantale ti jaꞌ jun coꞌntontic ti jcꞌantic ti jchꞌuntique. Hech yuꞌun chucbilucutic yuꞌun ti mulile yuꞌun jaꞌ tscꞌan mulil ti jbecꞌtaltique.
\v 24-25 Uts jbatic yuꞌun mu xuꞌ cuꞌuntic chquiltic, yuꞌun oyucutic to ti sventa chꞌayel chijbat xchiꞌuc avi jbecꞌtaltic liꞌto. Ti coꞌntontic jchꞌunojbetic smantal ti Diose. Ti sventa ti jbecꞌtaltique jchꞌunojtic mulil. ¿Cꞌu cheꞌel xuꞌ chijcol loqꞌuel yuꞌun hech mu chꞌayeluc chijbat xchiꞌuc avi jbecꞌtaltic liꞌto? Hocol yal ti Diose ti chijcol loqꞌuel ti sventa ti Cajvaltic Jesucristoe.
\c 8
\s Jaꞌ scꞌopilal ti cuxulucutic sbatel osil ti sventa ti Chꞌul Espíritue
\p
\v 1 Yuꞌun ti oyucutic xa ti stojol ti Cristo Jesuse, hech yuꞌun mu xa xijyacꞌbucutic quichꞌtic castigo yuꞌun jmultic ti Diose.
\v 2 Yuꞌun ti sventa ti Cristo Jesuse chijcuxiucutic sbatel osil. Hech yuꞌun nijcol xa loqꞌuel ti sventa mulil xchiꞌuc ti sventa ti chꞌayel chijbate.
\v 3 Scoj ti muꞌyuc yip ti jbecꞌtaltique hech yuꞌun muc xuꞌ yuꞌun ti mantaletique ti hech toj coꞌntontic chijcꞌot ti stojol ti Diose. Hech yuꞌun ti Diose laj stac talel ti Snichꞌone. Ti sbecꞌtale ti laj yichꞌe, jaꞌ hech chaj cꞌu cheꞌel jbecꞌtaltic ti ch-icꞌvan ti mulile. Scoj jmultic ti itale. Ti cꞌalal laj yichꞌ castigo cuꞌuntic ti Cajvaltique, jaꞌto ilaj yip ti mulile ti ch-icꞌvan ti jbecꞌtaltique.
\v 4 Hech laj spas, yuꞌun hech toj coꞌntontic chijcꞌot hech chaj cꞌu cheꞌel tscꞌan ti mantaletique. Yuꞌun mu xa xcacꞌ jbatic ti abatinel yuꞌun ti jbecꞌtaltique. Jaꞌ chcacꞌ jbatic ti abatinel yuꞌun ti Chꞌul Espíritue.
\p
\v 5 Yuꞌun scotol ti muchꞌu chchꞌumbeic smantal ti sbecꞌtalique, jaꞌ noꞌox batem ti yoꞌntonic ti cꞌusi tscꞌan ti sbecꞌtalique. Scotol ti muchꞌu tspasic ti mucꞌ ti Chꞌul Espíritue, jaꞌ batem ti yoꞌntonic ti cꞌu cheꞌel tscꞌan ti Chꞌul Espíritue.
\v 6 Mi jaꞌ batem ti coꞌntontic ti cꞌusi tscꞌan ti jbecꞌtaltique, jaꞌ sventa chꞌayel chijbat obi. Mi jaꞌ batem ti coꞌntontic ti cꞌu cheꞌel tscꞌan ti Chꞌul Espíritue, jaꞌ sventa jcuxlejaltic sbatel osil obi. Jaꞌ sventa jun coꞌntontic obi.
\v 7 Yuꞌun ti muchꞌu jaꞌ noꞌox batem ti yoꞌntonic ti cꞌusi tscꞌan ti sbecꞌtalique, jaꞌ tscontrainic ti Diose. Jaꞌ mu xchꞌumbeic smantal ti Diose. Mu xuꞌ yuꞌunic chchꞌunic.
\v 8 Hech yuꞌun scotol ti muchꞌutic chchꞌumbeic smantal ti sbecꞌtalique, mu lecuc yoꞌnton ti Diose yuꞌunic.
\p
\v 9 Ti hoꞌoxuque yuꞌun ti nainem ti avoꞌntonic ti Chꞌul Espíritu yuꞌun ti Diose hech yuꞌun maꞌuc sventainojoxuc ti abecꞌtalique, jaꞌ sventainojoxuc ti Chꞌul Espíritue. Ti muchꞌu mu yichꞌojuc ti Chꞌul Espíritu yuꞌun ti Cristoe, muꞌyuc ti stojol ti Cristoe.
\v 10 Ti hoꞌoxuque yuꞌun oy ti avoꞌntonic ti Cristoe, hech yuꞌun chacuxiic sbatel osil. Manchuc mi chcham ti abecꞌtale scoj ti mulile, chacuxiic yuꞌun ti toj avoꞌntonic chayiloxuc ti Diose.
\v 11 Ti Diose laj xchaꞌcuses loqꞌuel tal ti chꞌen ti Jesuse. Hech yuꞌun yuꞌun ti nainem ti avoꞌntonic ti Chꞌul Espíritu yuꞌun ti Diose, ti Diose ti laj xchaꞌcuses loqꞌuel tal ti chꞌen ti Jesuse, jaꞌ ta onoꞌox chaxchaꞌcusesbot uc abecꞌtalic ti scꞌopilal chchame. Ti sventa ti Chꞌul Espíritu yuꞌune ti nainem ti avoꞌntonique hech yuꞌun chaxchaꞌcusesbot ti abecꞌtalique.
\p
\v 12 Hech yuꞌun, quermanotac, mu persauc ti chisventainucutic ti jbecꞌtaltique. Mu xtun mi ti jchꞌumbetic smantal ti jbecꞌtaltique.
\v 13 Yuꞌun mi jaꞌ chcacꞌ chisventainucutic ti jbecꞌtaltique, jaꞌ chꞌayel chijbat yuꞌun. Mi mu jchꞌumbetic smantal ti jbecꞌtaltique, jaꞌ chijcuxi sbatel osil. Jaꞌ ti sventa ti Chꞌul Espíritue ti xuꞌ cuꞌuntic ti mu jchꞌumbetic smantal ti jbecꞌtaltique.
\p
\v 14 Yuꞌun scotol ti muchꞌutic chventainat yuꞌun ti Chꞌul Espíritu yuꞌun ti Diose, jaꞌ me yol snichꞌon ti Diose.
\v 15 Yuꞌun quichꞌojtic ti Chꞌul Espíritue, maꞌuc yuꞌun nijchaꞌoch yan vuelta ti mozoil yuꞌun ti xiꞌele. Yuꞌun jaꞌ yol snichꞌon Dios nijcꞌotucutic, hech Tote, xijchi ti stojol.
\v 16 Ti jnaꞌtic ti coꞌntontic ti yol snichꞌonucutic ti Diose yuꞌun jaꞌ chijyacꞌbucutic jnaꞌtic ti Chꞌul Espíritue.
\v 17 Yuꞌun yol snichꞌonucutic ti Diose, hech yuꞌun chijyacꞌbucutic jventaintic scotol ti cꞌutic oy yuꞌune. Scotol hech chaj cꞌu cheꞌel iꞌacꞌbat xa ti Cristoe, jaꞌ noꞌox hech chijyacꞌbucutic uc. Yuꞌun mi coꞌol chquichꞌtic vocol hech chaj cꞌu cheꞌel laj yichꞌ ti Cajvaltique, hech coꞌol chijꞌacꞌat ti pasel ti mucꞌ xchiꞌuc.
\p
\v 18 Hech jchꞌunoj. Ti cꞌu yepal chquichꞌtic vocol ti ora to, mu xcoꞌolaj xchiꞌuc ti cꞌu yepal utsilal ti jtatic ti yan cꞌacꞌal. Jaꞌ más jelaven chquichꞌtic ti utsilale.
\v 19 Yuꞌun scotol ti cꞌutic pasbil yuꞌun ti Diose, jaꞌ noꞌox tsmalaic yaꞌyel ti cꞌusi ora chcꞌot yorail ti ch-acꞌat ti qꞌuelel ti muchꞌutic yol snichꞌon ti Diose yuꞌun jaꞌ yorail chchaꞌlecub uc.
\v 20 Yuꞌun scotol ti cꞌutic pasbil yuꞌun ti Diose, jaꞌ isoc scotol. Mu stucuc laj soques sba. Jaꞌ smantal ti Diose ti hech isoque. Pero chapal xa scꞌopilal ti chchaꞌlecub yan vueltae.
\v 21 Yuꞌun scotol ti cꞌutic pasbil yuꞌun ti Diose chchaꞌlecub yan vuelta hech yuꞌun mu xa xcꞌaꞌ. Hech chcom yuꞌun ti chcꞌaꞌe. Hech yuꞌun jaꞌ noꞌox hech uc ti yol snichꞌon ti Diose chcom yuꞌunic ti chcꞌaꞌique. Coꞌol chcolic loqꞌuel ti libre xchiꞌuc ti yol snichꞌon ti Diose xchiꞌuc ti cꞌutic oy liꞌ ti balumile. Hech yuꞌun jelaven yutsil ti ta xa xcom yuꞌunic ti chcꞌaꞌique.
\v 22 Yuꞌun ti jnaꞌtic ti cꞌalal ti sliqueb asta ti ora to scotol ti cꞌutic pasbil yuꞌun ti Diose oy svocol yaꞌyel yuꞌun mu to chcom yuꞌun ti chcuxib, o chcꞌaꞌ. Hech chaj cꞌu cheꞌel ti ants ti poꞌot xa chcol ti alajele ti oy to svocole.
\v 23 Mu stucuc noꞌox oy svocol ti cꞌutic pasbile. Hoꞌucutic uc, manchuc mi quichꞌojtic ti Chꞌul Espíritue, ti jaꞌ señail ti utsilale ti cꞌu xꞌelan chcꞌot quichꞌtique, oy jvocoltic uc. Yuꞌun cacꞌoj jbatic ti jmalatic ti chquichꞌtic ti achꞌ jbecꞌtaltique ti mu xcꞌaꞌe, yuꞌun hech chvinaj ti yol snichꞌonucutic ti Diose.
\v 24 Chijcolucutic, hech jchꞌunojtic. Ti cꞌusi ti jmalatique yuꞌun mu to chvinaj ti jsatic hech yuꞌun ti jmalatic. Yuꞌun ti cꞌusi quilojtic xa ti jsatique, mu xa jmalatic.
\v 25 Yuꞌun mu to chvinaj ti jsatic ti cꞌusi ti jmalatique, hech mu xlaj coꞌntontic ti jmalatic.
\p
\v 26 Chiscoltaucutic uc ti Chꞌul Espíritue yuꞌun muꞌyuc yip coꞌntontic jtuctic. Ti hoꞌucutique mu jnaꞌtic cꞌusi lec ti jcꞌambetic ti Diose ti cꞌalal muꞌyuc yip ti coꞌntontique. Yuꞌun ti jiqꞌuilan coꞌntontique jaꞌ ti sventa ti Chꞌul Espíritue, yuꞌun jaꞌ tscꞌopon Dios ti jtojoltic.
\v 27 Ti Diose snaꞌojbucutic coꞌntontic ti cꞌusi ti jcꞌantique, hech yuꞌun chaꞌibe sjam ti cꞌalal ch-albat yuꞌun ti Chꞌul Espíritue. Yuꞌun ti Chꞌul Espíritue snaꞌojbe yoꞌnton ti Diose hech yuꞌun chiscꞌopombucutic Dios ti jtojoltic, hoꞌucutic ti oyucutic ti stojol ti Diose.
\s Jaꞌ scꞌopilal ti jaꞌ sventa cutsilaltic chcꞌot scotol jvocoltic ti chquichꞌtique
\p
\v 28 Ti jnaꞌtic ti jaꞌ sventa cutsilaltic chcꞌot scotol, xchiꞌuc ti vocol ti chquichꞌtic ti ora to, hoꞌucutic ti cꞌux ti coꞌntontic ti Diose, hoꞌucutic ti icꞌbilucutic ti stojol yuꞌun hech snopoj ti yoꞌnton.
\v 29 Yuꞌun jcotoltic ti tꞌujbilucutic yuꞌun ti Diose, voꞌone tꞌujbilucutic. Maꞌuc to noꞌox laj stꞌujucutic ti Diose. Chapambil jcꞌopilaltic voꞌone yuꞌun ti coꞌol coꞌntontic chijcꞌot xchiꞌuc ti Snichꞌone. Jaꞌ ba banquilal icꞌot xa cuꞌuntic. Manchuc mi epucutic, jaꞌ yitsꞌinucutic jcotoltic.
\v 30 Hech jcꞌopilaltic yuꞌun ti Diose ti voꞌonee, hech yuꞌun nijyicꞌucutic ti stojol. Cꞌalal ti nijyicꞌucutic xa ti stojole, laj yacꞌucutic ti libre yuꞌun jmultic. Cꞌalal ti laj xa yacꞌucutic ti libre yuꞌun ti jmultique, hech jun noꞌox yutsil nijcꞌotucutic yuꞌun jaꞌ snichꞌon Dios nijcꞌotucutic o.
\p
\v 31 Muꞌyuc xa cꞌusi yan chcaltic yuꞌun snichꞌonucutic xa ti Diose. Yuꞌun lec chijyilucutic ti Diose, hech yuꞌun manchuc mi oy muchꞌu chiscontrainucutique, muc un chijxiꞌ.
\v 32 Ti Diose muc xcꞌuxubin ti mero Snichꞌone. Jaꞌ laj yacꞌ ti milel cuꞌuntic jcotoltic. Yuꞌun ti hech laj spase, hech yuꞌun chijyacꞌbucutic scotol yan uc.
\v 33 Dios ti laj xa yacꞌucutic ti libre yuꞌun ti jmultique, hech yuꞌun muꞌyuc xa muchꞌu yan chisaꞌbucutic jmultic, hoꞌucutic ti tꞌujbilucutic yuꞌun ti Diose.
\v 34 Cristo ti icham yuꞌun ti jmultique, hech yuꞌun muꞌyuc xa muchꞌu yan xuꞌ chal ti oy ti jmultique ti hoꞌucutique. Yuꞌun ti Cristoe ichaꞌcuxi loqꞌuel ti chꞌen. Te pasbil xa ti mucꞌ te ti sbatsꞌicꞌob ti Diose. Te chcꞌopoj cuꞌuntic te ti stojol ti Diose.
\v 35 Muꞌyuc xa yan cꞌusi xuꞌ chcꞌot ti pasel yuꞌun ti hech mu xixcꞌuxubinucutic ti Cristoe. Manchuc mi chquichꞌtic vocol, manchuc mi chquichꞌtic ilbajinel, manchuc mi chquichꞌtic contrainel, manchuc mi chcaꞌitic viꞌnal, manchuc mi muꞌyuc jcꞌuꞌtic, manchuc mi chapal jcꞌopilaltic, manchuc mi jcꞌopilaltic chquichꞌtic machit, cꞌux chijyaꞌyucutic ti Cristoe, mu xiscomesucutic.
\v 36 Hech tsꞌibabil ti scꞌop ti Diose:
\q Hoꞌot ti aventa ti scotol ora quechel jcꞌopilaltutic chilajtutic ti milel.
\q Hech chaj cꞌu cheꞌel ti carneroe ti chapambil xa scꞌopilal mi chmilate, jaꞌ hech jcꞌopilaltutic,
\m ti xchie.
\v 37 Ti vocol ti liꞌ chquichꞌtic ti balumile, lec chcuch cuꞌuntic scotol ti sventa ti Cristoe ti cꞌuxucutic ti yoꞌntone.
\v 38 Hech yuꞌun hech jchꞌunoj ti cꞌuxucutic o ti yoꞌnton ti Diose. Manchuc mi chijcham, manchuc mi cuxulucutic to jayib cꞌacꞌal liꞌ ti balumile, cꞌuxucutic ti yoꞌnton. Mi chꞌul abat, mi pucuj, mi yan, mu xuꞌ tspajes ti cꞌuxucutic ti yoꞌnton ti Diose. Manchuc mi oy cꞌutic chcꞌot ti pasel ti ora to, mi yan to cꞌacꞌal, cꞌuxucutic ti yoꞌnton.
\v 39 Buc noꞌox oyucutic mu xuꞌ tspajesat ti cꞌuxucutic ti yoꞌnton ti Diose. Yuꞌun cꞌuxucutic o ti yoꞌnton ti Diose ti sventa ti Cajvaltic Cristo Jesuse.
\c 9
\s Jaꞌ scꞌopilal ti chichꞌ mul ti Pabloe yuꞌun mu xchꞌun ti xchiꞌiltaque
\p
\v 1-3 Yuꞌun jchꞌunojbe scꞌop ti Cristoe hech yuꞌun melel chcal ti ep chquichꞌ mul yuꞌun mu xchꞌunojuc ti jchiꞌiltique, jaꞌ ti jchiꞌil jbatic ti sventa jbecꞌtaltique. Scotol cꞌacꞌal oyun ti ichꞌmul ti sventaic. Mu yuꞌunuc ti jnop cꞌop. Jaꞌ snaꞌ ti Chꞌul Espíritue ti oy ti coꞌntone ti taca xuꞌ ti jel jbatutic xchiꞌuc ti jchiꞌiltique, hoꞌon chilocꞌ ti stojol Cristo, jaꞌ acꞌo ochuc ti stojol ti Cristoe ti jchiꞌiltique, hech ti jcꞌan.
\v 4 Coꞌol yelnichꞌonucutic Israel xchiꞌuc. Coꞌol tꞌujbilucutic xchiꞌuc yuꞌun coꞌol jtotinojtic ti Diose xchiꞌuc. Ti Diose iꞌacꞌbat tal squeval ti stojolic ti antiguo jtatamoltic xchiꞌuque ti cꞌalal yacꞌoj sba chanavic ti voꞌone. Ti Diose laj spas trato xchiꞌuc ti jtatamoltique. Iꞌacꞌbatic ti mantaletique. Iꞌalbatic cꞌu cheꞌel tspasic ti templonucule yoꞌ bu tscꞌoponic ti Diose. Hech iꞌalbatic yuꞌun ti Diose: “Te ti atojolic chlocꞌ tal jun ajvalil, jaꞌ ti chaspasoxuc ti mantal, hoꞌoxuc ti yelnichꞌonoxuc ti Israele”, xꞌutatic yuꞌun ti Diose.
\v 5 Jaꞌ totil cuꞌuntic xchiꞌuc ti antiguo jtatamoltique ti itꞌujatic yuꞌun ti Diose ti voꞌonee. Jaꞌ ihul ti jventatic, ti hoꞌucutique ti yelnichꞌonucutic ti Israele, ti Jcoltavaneje ti sventa jbecꞌtaltic. Ti Jcoltavaneje jaꞌ Dios ti scotol sventainoje, ti tspasat ti mucꞌ sbatel osile. Jun yutsil ti hech chcꞌot ti pasel.
\s Jaꞌ scꞌopilal ti jaꞌ noꞌox ti muchꞌu chcꞌuxubinat yuꞌun ti Diose chtꞌujat yuꞌun chcolic
\p
\v 6 Yuꞌun ti mu jcotolticuc jchꞌunojtique, mu yuꞌunuc muc xcꞌot ti pasel ti scꞌop ti Diose. Jaꞌ noꞌox yuꞌun ti mu jcotolticuc yelnichꞌonucutic ti Israele ti sventa xchꞌunojel yoꞌnton. Jaꞌ noꞌox yelnichꞌonucutic ti sventa sbecꞌtal.
\v 7 Hech uc mu jcotolticuc yelnichꞌonucutic ti Abrahame ti sventa xchꞌunojel yoꞌnton. Jaꞌ noꞌox yelnichꞌonucutic ti sventa sbecꞌtal. Yuꞌun hech iꞌalbat yuꞌun ti Diose ti Abrahame: “Jaꞌ avelnichꞌon chquil ti yol xnichꞌnab ti Isaaque”, ti xꞌutate.
\v 8 Hech sjam. Yuꞌun stuc noꞌox smantal ti Abrahame ti inichꞌnaje, hech itaat ti Ismaele, hech yuꞌun maꞌuc yol xnichꞌnab ti Diose ch-ilat yuꞌun ti Diose ti yol xnichꞌnab ti Ismaele. Pero yuꞌun hech albil ti Abrahame yuꞌun ti Diose, hech yuꞌun iꞌacꞌbat ti Isaaque, hech yuꞌun yol xnichꞌnab ti Diose ch-ilat yuꞌun ti Diose ti yol xnichꞌnab ti Isaaque.
\v 9 Yuꞌun hech iꞌalbat ti Abrahame yuꞌun ti Diose: “Hech chaj cꞌu cheꞌel to jaꞌ hech chisut tal cꞌalal ti habil. Oy xa yol ti Sarae. Querem ti yole”, xꞌutat.
\p
\v 10-13 Maꞌuc noꞌox Isaac ti hech iꞌalbat scꞌopilal yuꞌun ti Diose. Patil cꞌalal vinic xa ti Isaaque, cꞌalal yicꞌoj xa Rebeca yuꞌun yajnil, laj slic yol ti Rebecae. Vats ti yole. Cꞌalal mu to ch-an ti vatse, hech iꞌalbat ti Rebecae yuꞌun ti Diose: “Ti banquilale jaꞌ ch-abatinat yuꞌun ti yitsꞌine. Jaꞌ ch-abatinvan ti itsꞌinale”, xꞌutat. Yuꞌun hech tsꞌibabil ti scꞌop ti Diose: “Cꞌux ti coꞌnton ti Jacobe. Mu cꞌuxuc ti coꞌnton ti Esaue”, ti xchie. Hech laj yal ti Diose cꞌalal mu to ch-an ti ololetique, cꞌalal mu to chvinaj mi lec ti cꞌusi tspasique, mi mu lecuc ti cꞌusi tspasique. Jaꞌ noꞌox hech laj spas ti Diose hech chaj cꞌu cheꞌel ti snopoj onoꞌox ti yoꞌntone ti cꞌalal laj stꞌuje. Maꞌuc ti sventa yabtel ti itꞌujat yuꞌun ti Diose ti june, muc xtꞌujat ti yane. Jaꞌ noꞌox yuꞌun hech laj scꞌan yoꞌnton ti Diose.
\p
\v 14 ¿Mi chcaltic ti mu tojuc yoꞌnton ti Diose yuꞌun ti hech tspase? ¡Bu ba hechuc!
\v 15 Yuꞌun ti Diose hech laj yalbe ti Moisese: “Ti jcꞌuxubin ti muchꞌu ti jcꞌan ti jcꞌuxubine. Mi tscꞌan coꞌnton ti cꞌux chcaꞌie, hech cꞌux chcaꞌi”, xchi.
\v 16 Hech yuꞌun maꞌuc ti cꞌu xꞌelan yoꞌnton jujun, maꞌuc ti cꞌu xꞌelan yabtel jujun. Jaꞌ noꞌox ti muchꞌu chcꞌuxubinat yuꞌun ti Diose chtꞌujat.
\v 17 Yuꞌun tsꞌibabil ti sun ti Diose ti hech iꞌalbat ti Faraone ti voꞌone: “Laj xa cacꞌbot avabtel yuꞌun chcacꞌ ti qꞌuelel ti aventa ti jelaven jpꞌijile. Hech chpuc jcꞌopilal ti sjoylejal balumil”, xchi ti Diose.
\v 18 Hech yuꞌun ti Diose chcꞌuxubin ti muchꞌu tscꞌan chcꞌuxubine. Mi tscꞌan yoꞌnton tstsatsubtasbe yoꞌnton jun crixchano, tstsatsub ti yoꞌntone.
\p
\v 19 “Mu xuꞌ chisticꞌbucutic jmultic ti hoꞌucutique yuꞌun snopoj ti Diose ti tstꞌuj stuc ti muchꞌu tscꞌan tscolta”, mi xachiique, hech chacalbot.
\v 20 “¿Muchꞌuot chacuy aba ti hech chatacꞌbe scꞌop ti Diose?” chacut. Taca cꞌopojuc ti pꞌine ti pasbil ti achꞌele “¿cꞌu yuꞌun hech laj ameltsanun?” taca xuꞌ chut ti muchꞌu imeltsanat yuꞌune, ¡bu ba sjamuc yuꞌun jaꞌ imeltsanat yuꞌun!
\v 21 Yuꞌun ti jmeltsanejpꞌine mi hech tscꞌan ti yoꞌntone, ti jopꞌ noꞌox achꞌel xuꞌ tsmeltsan jun pꞌin ti chcꞌuxubine o xuꞌ tsmeltsan jun pꞌin ti mu scꞌuxubine. Ti cꞌusi tscꞌan ti yoꞌntone, xuꞌ tspas.
\p
\v 22-23 Jaꞌ noꞌox hech uc ti Diose ti cꞌusi tscꞌan ti yoꞌntone xuꞌ tspas xchiꞌuc ti muchꞌu pasbil yuꞌune. Mi tscꞌan to tstsꞌicbe sbolil yoꞌntonic ti muchꞌutic quechel yilintael yuꞌun, jaꞌ ti scꞌopilal chꞌayel chbatique, yuꞌun ta to xcꞌuxubin ti muchꞌutic ti tꞌujbilic yuꞌun ti voꞌone yuꞌun chba chiꞌinatuc te ti utsilal, xuꞌ tspas. Xuꞌ tslecubtas ti muchꞌutic tꞌujbilic yuꞌun, xuꞌ chacꞌbe yutsil yoꞌntonic. Hech scotolic tsqꞌuelic ti jun noꞌox yutsil chcꞌotic ti muchꞌutic scꞌopilal chcolique. Pero ta onoꞌox sta yorail ti chacꞌ ti qꞌuelel ti chacꞌ batel yuꞌun chꞌayel chbatic ti muchꞌutic hech onoꞌox scꞌopilalique.
\p
\v 24 Ti hech scꞌopilal ti chichꞌic cꞌuxubinele, jaꞌ hoꞌucutic obi yuꞌun laj xa yicꞌucutic ti stojol. Maꞌuc noꞌox jcꞌopilaltic jtuctic ti hoꞌucutic ti judioucutique. Jaꞌ acꞌopilalic uc ti hoꞌoxuc ti yanlum crixchanooxuque.
\v 25 Yuꞌun hech tsꞌibabil ti sun ti Osease, jaꞌ ti jꞌalcꞌop yuꞌun ti Diose:
\q Ti muchꞌutic ti muc xiyojtiquinucun ti voꞌonee, jaꞌ cuꞌun chcꞌot.
\q Ti muchꞌutic mu cꞌuxubimbiluc cuꞌun ti voꞌonee, jaꞌ ti jcꞌuxubin.
\q
\v 26 Jaꞌ ti hech albil scꞌopilalic:
\q “Ti hoꞌoxuque mu tꞌujbilucoxuc yuꞌun ti Diose, ti xꞌutatic ti voꞌonee, jaꞌ col jnichꞌnab chcꞌotic, hoꞌon ti Diosune, hoꞌon ti jtalel cuxulune”,
\m xchi ti Diose, xchi ti Osease.
\p
\v 27 Ti Isaíase hech laj yalbucutic jcꞌopilaltic, hoꞌucutic ti yelnichꞌonucutic ti Israel xchiꞌuque: “Hoꞌucutic ti yelnichꞌonucutic ti Israele, jaꞌ hech quepaltic chijcꞌot hech chaj cꞌu cheꞌel hiꞌ te ti nab ti mu stacꞌ atiele, pero mu jcotolticuc chijcolucutic. Atabil noꞌox chijcolucutic.
\v 28 Cꞌalal mi laj sta yorail chchapan ti Cajvaltic Diose, jpꞌel noꞌox mantal chal. Ti ora chchapaj yuꞌun. Ti ora chtal castigo ti sjoylejal ti balumile. Jaꞌ noꞌox chcol ti muchꞌu chcol yuꞌun ti castigoe”, xchi ti Isaíase.
\v 29 Hech laj yal uc ti Isaíase ti voꞌonee:
\q Ti manchuc ta to xiscoltaucutic comel junchaꞌvoꞌucutic ti Cajvaltic Diose ti jaꞌ sventainoj scotole, jꞌechꞌel chijtupꞌ ti hechuque hech chaj cꞌu cheꞌel ti muchꞌutic te nacajtic ti voꞌonee ti Sodoma xchiꞌuc ti Gomorrae ti jꞌechꞌel itupꞌique,
\m ti xchi ti Isaíase.
\s Jaꞌ scꞌopilal ti muc xchꞌunic ti jaꞌ Jcoltavanej cuꞌuntic ti Cajvaltique ti judioetique
\p
\v 30 “¿Muchꞌutic toj yoꞌntonic ch-ilatic yuꞌun ti Diose cheꞌe?” mi xachiique, hech chacalbot. Ti yanlum crixchanoetique ti muc saꞌic ti toj yoꞌntonic ch-ilatic yuꞌun ti Diose, jaꞌ toj yoꞌntonic chil ti Diose ti ora to ti sventa xchꞌunojel yoꞌntonic.
\v 31 Ti jchiꞌiltique, hoꞌucutic ti yelnichꞌonucutic ti Israele xchiꞌuque, yuꞌun ti chchꞌunic ti mantaletic tscuyique, hech toj yoꞌntonic ch-ilatic yuꞌun ti Diose tscuyic. Pero mu hechuc toj yoꞌntonic ch-ilatic yuꞌun ti Diose.
\v 32-33 “¿Cꞌu yuꞌun?” mi xachiique, yuꞌun mu xchꞌunic ti toj yoꞌntonic ch-ilatic yuꞌun ti Diose ti sventa xchꞌunojel yoꞌntonic. Jaꞌ tscuyic ti toj yoꞌntonic ch-ilatic yuꞌun ti Diose ti sventa yabtelic. Jaꞌ hech chaj cꞌu cheꞌel ti muchꞌu laj spꞌosi yacan ipꞌaj ti lum, jaꞌ hechic yuꞌun mu xchꞌunic ti acꞌbil yabtel yuꞌun ti Diose ti Jesucristoe. Hech onoꞌox tsꞌibabil scꞌopilalic ti voꞌone:
\q Ti jteclum Sión, jaꞌ ti Jerusalene, te chcacꞌ ti muchꞌu tꞌujbil cuꞌune.
\q Ti muchꞌu mu spas ti mucꞌ ti muchꞌu tꞌujbil cuꞌune, jaꞌ hech chaj cꞌu cheꞌel ti muchꞌu tspꞌosi yacan chpꞌaj ti lum, chcꞌot smaj sba ti ba ton.
\q Scotol ti muchꞌutic chchꞌunic ti jaꞌ chcoltaatic yuꞌune, jaꞌ lec chquil,
\m xchi ti Diose.
\c 10
\p
\v 1 Quermanotac, taca coluc ti jchiꞌiltique, nichim noꞌox coꞌnton. Hech yuꞌun scotol cꞌacꞌal ti jcꞌopombe Dios ti stojolic yuꞌun acꞌo coluc.
\v 2 Lec ti toyol yoꞌntonic ti stojol ti Diose, pero hovil. Mu hechuc ti chꞌunel ti Diose hech chaj cꞌu cheꞌel chchꞌunic.
\v 3 Yuꞌun mu xchꞌunic ti chijyacꞌbucutic toj coꞌntontic ti Diose. Yuꞌun tscuyic ti hech toj yoꞌntonic chcꞌotic ti sventa yabtelic, hech yuꞌun mu scꞌan ti ch-acꞌbatic toj yoꞌntonic yuꞌun ti Diose.
\v 4 Yuꞌun iꞌay xa ti Cristoe hech yuꞌun ilaj scꞌopilal ti mantaletique. Yuꞌun hech xuꞌ ti toj yoꞌnton ch-ilat yuꞌun ti Diose scotol ti muchꞌutic chchꞌunic ti icham yuꞌunic ti Cristoe.
\p
\v 5 Yuꞌun ti Moisese laj stsꞌiba ti cꞌu cheꞌel toj coꞌntontic chijyil yuꞌun ti jchꞌuntic ti mantaletique. Hech laj yal: “Ti muchꞌu chchꞌun scotol ti jmantale, jaꞌ chcuxi sbatel osil”, xchi ti Diose, xchi ti Moisese. Pero muꞌyuc muchꞌu ihuꞌ yuꞌun laj xchꞌun scotol.
\v 6-9 Ti hoꞌucutique ti toj coꞌntontic chijyilucutic ti Diose ti sventa xchꞌunojel coꞌntontique, mu yuꞌunuc ta to xba quicꞌtic tal ti vinajel ti Jcoltavanej cuꞌuntique. Mu yuꞌunuc ta to xba jsaꞌtic yoꞌ bu ti muchꞌutic mucajtic ti chꞌene. Yuꞌun iꞌay xa liꞌ ti balumile ti Cristoe, icham, ichaꞌcuxi loqꞌuel ti chꞌen, patil isut batel ti vinajel, te xa oy ti ora to. Hech yuꞌun mu nomuc ti jcoleltique, liꞌ xa oy ti jtojoltiqui. Yuꞌun mi jamal chcaltic ti jaꞌ Cajvaltic cuꞌuntic ti Jesuse, mi jchꞌunojtic ti ichaꞌcusesat loqꞌuel tal ti chꞌen yuꞌun ti Diose, hech chijcolucutic sbatel osil. Hech cacꞌoj jba ti jcholtutic.
\v 10 Yuꞌun mi oy xchꞌunojel coꞌntontic, jaꞌ toj coꞌntontic chijyilucutic ti Diose. Mi jamal chcaltic ti jaꞌ Cajvaltic cuꞌuntique, hech yuꞌun chijcolucutic o.
\p
\v 11 Yuꞌun hech tsꞌibabil comel ti sun ti Diose ti voꞌone: “Scotol ti muchꞌu chchꞌunic ti chcoltaat yuꞌun ti Jnichꞌone, mi jutuc mu xlaj ti loꞌlael”, xchi ti Diose.
\v 12 Ti Diose muꞌyuc scꞌopilal mi judioucutic, mi yanlum crixchanooxuc. Ti Diose jaꞌ ajvalil cuꞌuntic jcotoltic. Coꞌol chcꞌuxubin scotol ti muchꞌutic chalbeic vocol ti stojole. Ep chijyacꞌbucutic bendición jcotoltic.
\v 13 Yuꞌun scotol ti muchꞌu chalbeic vocol ti stojol ti Cajvaltique, jaꞌ chcolic sbatel osil.
\v 14 ¡Bu ba yalbeic vocol ti stojol ti Cajvaltique mi mu xchꞌunic ti chcoltaatic yuꞌun! ¿Cꞌu chut xchꞌunic mi mu yaꞌyojbuc scꞌopilale? ¿Cꞌu cheꞌel chaꞌibeic scꞌopilal mi muꞌyuc muchꞌu chba xcholbe yaꞌyique?
\v 15 ¡Bu ba xcholic ti scꞌop ti Diose mi mu tacbiluc batel yuꞌun ti Diose! Hech tsꞌibabil comel: “Lec ch-aꞌibat scꞌop ti muchꞌutic chba xcholic ti lequil achꞌ cꞌope”, ti xchie.
\p
\v 16 Tscꞌan ti Diose ti chcol scotolic pero mu scotoluc xchꞌunojic ti lequil achꞌ cꞌope. Jaꞌ noꞌox hech laj yal uc ti Isaíase ti voꞌonee. Hech laj yal: “Cajval, jun to muꞌyuc muchꞌu chchꞌun ti acꞌop ti calojbetutique”, xchi ti Isaíase, xut ti Diose.
\v 17 Yuꞌun jaꞌto mi laj yaꞌyique, jaꞌto xuꞌ chchꞌunic. Ti cꞌusi tscꞌan ti chaꞌyique, jaꞌ tscꞌan ti acꞌo yaꞌibe scꞌopilal ti Cristoe.
\p
\v 18 “¿Mi yuꞌun mu to yaꞌyojbuc ti scꞌopilal ti Cristoe?” mi xachie, yaꞌyoj xa hech chaj cꞌu cheꞌel chal ti scꞌop ti Diose:
\q Chpuc scꞌopilal ti sjoylejal balumil.
\q Buc noꞌox oy crixchanoetic chpucbat ti scꞌopilale,
\m ti xchie.
\v 19 “¿Mi yuꞌun mu yaꞌyojuc ti jchiꞌiltique ti oy yanlum crixchanoetic tstꞌuj ti Diose mi mu jchꞌuntic ti hoꞌucutique ti yelnichꞌonucutic ti Israele?” mi xachie, yaꞌyojic. Yuꞌun primero hech laj yal ti Moisese:
\q Chquicꞌ ti jtojol ep ti tos yanlum crixchanoetic yuꞌun hech chcacꞌ bicꞌtajuc avoꞌntonic.
\q Jaꞌ ti muchꞌutic jꞌechꞌel mu xisnaꞌucune, yuꞌun hech acꞌo xaꞌilinic,
\m xchi ti Diose, hech xꞌutat ti Moisese.
\v 20 Ti Isaíase más jamal laj yal:
\q Chistaucun ti muchꞌutic mu xisaꞌucune.
\q Jtuc chcacꞌ jba ti ojtiquinel ti stojolic ti muchꞌutic muꞌyuc jtu ti yoꞌntonique,
\m xchi ti Diose, hech xꞌutat ti Isaíase. Jaꞌ acꞌopilalic hoꞌoxuc ti yanlum crixchanooxuque.
\v 21 Hoꞌucutic ti yelnichꞌonucutic ti Israele, jaꞌ hech chijyalbucutic jcꞌopilaltic ti Isaíase: “Sjunul cꞌacꞌal laj xa quiqꞌuilan tal ti jtojol ti achiꞌiltaque. Mu scꞌan xchꞌunic tal. Jaꞌ noꞌox tstoy sbaic ti jtojol”, xchi ti Diose, hech xꞌutat ti Isaíase.
\c 11
\s Jaꞌ scꞌopilal ti oy to tꞌujbilic yuꞌun ti Diose ti judioetique
\p
\v 1 “¿Mi yuꞌun jꞌechꞌel laj xa stenucutic comel ti Diose ti hoꞌucutique ti tꞌujbilucutic yuꞌune, hoꞌucutic ti yelnichꞌonucutic ti Israele?” mi xachiique, ¡bu ba stenojucutic comel! Yuꞌun hoꞌoni yelnichꞌonun ti Israel uque. Hoꞌoni yelnichꞌonun ti Abraham uque. Hoꞌoni jaꞌ jtatamol ti Benjamine.
\v 2 Ti Diose scotol tꞌujbilic yuꞌun. Jaꞌ noꞌox hech uc snaꞌoj ti Diose ti ep ti chpꞌajbat scꞌope. Snaꞌoj uc ti Diose ti cꞌu yepal ti tꞌujbilic yuꞌune ti chchꞌunic ti sventa xchꞌunojel yoꞌntonic chcolique. ¿Mi yuꞌun mu xa xanaꞌic ti hech tsꞌibabil ti sun ti Diose ti hech laj scuy ti Elíase ti stuc xa noꞌox xchꞌunojbe scꞌop ti Diose? Hech yuꞌun lic yalbe ti Diose ti cꞌutic smulic ti xchiꞌiltaque. Hech laj yal:
\v 3 “Cajval, ti jchiꞌiltaque laj xa smilic ti jꞌalcꞌopetic avuꞌune. Laj xa sjinic ti scajaneb amotone. Jtuc xa noꞌox jꞌalcꞌopun avuꞌun. Ti ora to tscꞌan chismilucun uc”, xchi ti Elíase, xut ti Diose.
\v 4 ¿Mi yuꞌun mu xanaꞌic ti hech itacꞌav ti Diose? Hech laj yal: “Mu hechuc. Oy to hucmil ti achiꞌiltaque ti tꞌujbilic cuꞌune ti chcolique ti mu squejanojuc sbaic ti stojol ti santo Baale”, ti xꞌutat ti Elíase.
\v 5 Jaꞌ noꞌox hech uc ti ora to oy to tꞌujbilic yuꞌun ti Diose ti chcolique ti jchiꞌiltique ti sventa yutsil yoꞌnton ti Diose.
\v 6 Stuc yutsil yoꞌnton iꞌicꞌvan ti Diose ti hech itꞌujatique, hech yuꞌun maꞌuc ti sventa yabtelic ti hech itꞌujatique. Ti jaꞌuc ti sventa yabtelic itꞌujatique, muꞌyuc scꞌopilal ti oy yutsil yoꞌnton ti Diose ti hechuque.
\p
\v 7 ¿Cꞌusi chcaltic cheꞌe yuꞌun ti mu jcotolticuc toj coꞌntontic chijyil ti Diose, hoꞌucutic ti yelnichꞌonucutic ti Israele, manchuc mi toyol coꞌntontic laj jcꞌantic jcotoltic? Jaꞌ noꞌox toj coꞌntontic chijyil ti Diose mi oy jcꞌopilaltic chijcol yuꞌun onoꞌoxe, jaꞌ noꞌox ti cꞌu quepaltic ti oy xchꞌunojel coꞌntontique. Ti cꞌu yepal ti chchꞌunic ti sventa yabtelic chcolique jaꞌ noꞌox más ipimub yoꞌntonic hech yuꞌun mu xa xaꞌyic tijel.
\v 8 Hech chaj cꞌu cheꞌel tsꞌibabil comel: “Ti Diose laj xchꞌaybe yoꞌntonic. Hech yuꞌun mu xa xuꞌ tsqꞌuelic ti satic. Mu xa xꞌoch cꞌop ti xchiquinic. Chamenic icꞌot yaꞌyel. Hech oyic asta ti ora to”, ti xchie.
\v 9 Hech laj yal ti Davide:
\q Hech chaj cꞌu cheꞌel ti tsꞌiꞌ ti chbicꞌtaj yoꞌnton yuꞌun ti tiꞌbole pero jaꞌ noꞌox chlic milatuc yuꞌun, jaꞌ noꞌox hech uc ti jchiꞌiltique ti pimuben yoꞌntonique.
\q Manchuc mi staojic ep bendición ti ora to, jaꞌ tsta yorail ti chcꞌataj ti castigo yuꞌunic.
\q Jaꞌ stojol yabtelic chcꞌot ti castigoe.
\q
\v 10 Chchꞌaybat yoꞌntonic hech yuꞌun mu xa xuꞌ tsqꞌuelic ti satic.
\q Mu xa xuꞌ tstoy sbaic o yuꞌun tsots ti castigoe,
\m xchi ti Davide.
\s Jaꞌ scꞌopilal ti iꞌotesatic ti yanlum crixchanoetique
\p
\v 11 “¿Mi yuꞌun jꞌechꞌel ilaj scꞌopilal ti chcolic ti achiꞌiltaque yuꞌun ti muc xchꞌunic ti totiletic avuꞌunique xchiꞌuc ti achiꞌiltaque ti jaꞌ acꞌbil yabtel yuꞌun ti Diose ti Cristoe?” mi xachiic hoꞌoxuc ti yanlum crixchanooxuque, mu hechuc. Yuꞌun ti sventa ti muc xchꞌunic ti jchiꞌiltaque, jaꞌ yorail ti icꞌot colel ti aventaic, hoꞌoxuc ti yanlum crixchanooxuque. Yuꞌun hoꞌot icꞌot ti aventa ti colele, yuꞌun acꞌo bicꞌtajuc yoꞌntonic ti jchiꞌiltaque, hoꞌontutic ti yelnichꞌonuntutic ti Israel xchiꞌuque.
\v 12 Yuꞌun ti muc xchꞌunic ti jchiꞌiltaque hech yuꞌun iꞌacꞌbat ep bendición scotol crixchanoetic ti sjoylejal balumil. Yuꞌun ti oy palta yuꞌun ti jchiꞌiltaque, hech yuꞌun naꞌacꞌbatic ep bendición, hoꞌoxuc ti yanlum crixchanooxuque. Hech yuꞌun cꞌalal chlic xchꞌunic ti yan to cꞌacꞌal ep ti jchiꞌiltaque, jun noꞌox yutsil chijcꞌot jcotoltic.
\p
\v 13 Hoꞌoxuc ti yanlum vinicoxuque hech chacalbe. Yuꞌun laj xa yacꞌbun cabtel ti Diose yuꞌun chajcholboxuc ti scꞌope, hech yuꞌun chcacꞌ persa ti cabtele.
\v 14 Yuꞌun ti hech chcacꞌ persa ti cabtele, yuꞌun hech acꞌo bicꞌtajuc yoꞌntonic ti jchiꞌiltaque, yuꞌun me hech oy chcolic uc ti jventa.
\v 15 Yuꞌun ti icomesat ti jchiꞌiltaque, oy cꞌusi lec icꞌot ti pasel, jaꞌ ti iꞌicꞌat scotol crixchanoetic ti sjoylejal balumile. Hech yuꞌun ti tsta yorail chcolic scotolic ti cꞌu yepalic ti jchiꞌiltaque ti yan to cꞌacꞌal, jun noꞌox yutsil chcꞌot obi.
\v 16 Hoꞌontutic ti tꞌujbiluntutic yuꞌun ti Diose ti hoꞌontutic ti yelnichꞌonuntutic ti Israele, jaꞌ ti cꞌu yepal hech jcꞌopilaltutic ti chicoltutique, jaꞌ hech chac cꞌu cheꞌel jpꞌej chamen ixim scotol ti cꞌu yepal tꞌujbilique. Ti jtuchꞌ ti chacꞌbeic ti Diose, jaꞌ señail ti yuꞌun Dios scotol ti cꞌu smucꞌule. Jaꞌ ti jtuchꞌe, jaꞌ ti jtatamoltutique asta tstsꞌaqui ti jpꞌeje jaꞌto mi laj xa yicꞌ scotol ti cꞌu yepal tꞌujbilic onoꞌox yuꞌun ti Diose. Ti jtatamoltutique jun to teꞌ. Jaꞌ quibiltutic yuꞌun jaꞌ sba itꞌujatic. Hoꞌontutic xchiꞌuc ti jchiꞌiltaque jaꞌ scꞌobuntutic ti jtatamoltutique. Hech yuꞌun yuꞌununtutic ti Diose ti cꞌu yepal tꞌujbiluntutic yuꞌun onoꞌox ti Diose. Yuꞌun hech ti jchꞌuntutic ti sventa xchꞌunojel coꞌntontutic hech chaj cꞌu cheꞌel laj xchꞌun ti jtatamoltutique.
\p
\v 17 Ti jchiꞌiltaque ti muꞌyuc xchꞌunojel yoꞌntonique jaꞌ hech chaj cꞌu cheꞌel scꞌob olivateꞌ ti ijecat loqꞌuele yuꞌun muc xtun. Ti hoꞌoxuque jaꞌ hech chaj cꞌu cheꞌel haꞌmaltical olivateꞌ, hoꞌot naticꞌatic ochel. Hech yuꞌun jun noꞌox quibiltic nijcꞌot xa hech yuꞌun laj xa avaꞌibeic yutsilal.
\v 18 Hoꞌoxuc ti yanlum crixchanooxuque mu me xatoy abaic yuꞌun ti ijecatic xa loqꞌuel ti jchiꞌiltaque yuꞌun ti hoꞌoxuc naꞌicꞌatic ochele. Mi yuꞌun chacꞌan chatoy abaic, naꞌo me ti maꞌuc ti aventaic ti laj yichꞌic bendición ti jtatamoltutique. Pero jaꞌ ti sventa ti jtatamoltutique ti yacꞌoj sba chavichꞌic bendición ti ora to yuꞌun jaꞌ avibilic icꞌot xa uc.
\p
\v 19 Yuꞌun ti ijecatic loqꞌuel ti cꞌobteꞌe, yuꞌun hoꞌucutic onoꞌox te chisticꞌucutic ochel, mi xachie, hech chacalbe.
\v 20 Melel ti hech icꞌot ti pasel. Yuꞌun ti ijecatic loqꞌuel ti stuquique, yuꞌun muc xchꞌunic. Ti hoꞌoxuque ti sventa noꞌox xchꞌunojel avoꞌntonic ti tsacbiloxuc ti venta ti ora to. Hech yuꞌun mu me xatoy abaic, xiꞌanic me.
\v 21 Muc spasbat perdón yuꞌun ti Diose ti jchiꞌiltaque ti tꞌujbilic onoꞌox yuꞌun, ti laj stoy sbaique ti voꞌone. Hech yuꞌun buc xa ti hoꞌoxuque, mu xaspasboxuc perdón uc mi coꞌol chapasic hech chaj cꞌu cheꞌel laj spasique.
\v 22 Avaꞌi cꞌu xꞌelan yutsil yoꞌnton ti Diose. Avaꞌi cꞌu xꞌelan chacꞌ castigo uc. Laj yichꞌic castigo ti muchꞌutic ti mu scꞌan chacꞌ sbaic ti stojole. Ti hoꞌoxuque ep yutsil yoꞌnton avuꞌunic mi jꞌechꞌel chavacꞌ abaic ti stojole. Mi mu hechuc chapasic, chajecatic loqꞌuel uc.
\v 23 Ti jchiꞌiltaque ti tscomesic ti cꞌutic chbolibtasat yuꞌune, ti chlic xchꞌunic ti yan to cꞌacꞌale jaꞌ ch-otesatic. Yuꞌun jelaven spꞌijil ti Diose, hech yuꞌun xuꞌ yuꞌun chotes.
\v 24 Ti hoꞌoxuque napꞌasatic ochel tal, hoꞌoxuc ti haꞌmaltical olivateꞌoxuque, hech naꞌotesatic tal ti bu tsꞌumbil olivateꞌ ti mu coꞌoluc atsꞌumbalic xchiꞌuque. Yuꞌun ti hech xuꞌ naꞌotesatic tal, hech yuꞌun más xuꞌ ch-otesatic tal ti mero scꞌob ti teꞌe.
\s Jaꞌ scꞌopilal ti ta onoꞌox chcol scotol ti yelnichꞌnab ti Israele ti tꞌujbilic ti sventa xchꞌunojel yoꞌntonic
\p
\v 25 Quermanotac, ti jcꞌan ti chavaꞌibeic sjam ti cꞌusi chcꞌot ti pasele yuꞌun hech mu xatoy abaic. Ti ora to ep ti tsatsuben yoꞌntonic ti jchiꞌiltaque, hoꞌon ti yelnichꞌonuntutic ti Israel xchiꞌuque. Jaꞌto mi itsꞌaqui ti cꞌu yepal chaꞌochic, hoꞌoxuc ti yanlum crixchanooxuque,
\v 26 jaꞌto chlic yichꞌ tsꞌacubtasel ti cꞌu yepal ti scꞌopilal ti chiꞌochtutic onoꞌox xchiꞌuque ti jchiꞌiltaque, hoꞌontutic ti yelnichꞌonuntutic ti Israel xchiꞌuque. Yuꞌun hech tsꞌibabil ti scꞌop ti Diose:
\q Hoꞌon ti Jcoltavanejune, chital ti Jerusalén yuꞌun chtal jelbe yoꞌntonic ti yelnichꞌnab ti Jacobe, yuꞌun hech mu xa saꞌic smulic.
\q
\v 27 Yuꞌun hech oy ti trato jpasoj xchiꞌuque, chtal jchꞌaybe smulic,
\m ti xchie.
\p
\v 28 Ep ti jchiꞌiltaque mu scꞌan xchꞌunic ti jaꞌ Jcoltavanej yuꞌunic ti Jesuse, hech yuꞌun contraimbilic yuꞌun ti Diose mu xuꞌ xchꞌunic. Yuꞌun ti mu xuꞌ xchꞌunique, yuꞌun acꞌo xachꞌunic ti hoꞌoxuque. Ti yan to jchiꞌiltac ti yan to cꞌacꞌal chlic cꞌuxubinatuc yuꞌun ticꞌajtic ti trato ti laj spas ti Diose xchiꞌuc ti jtatamoltutique.
\v 29 Yuꞌun ti hech yaloj ti oy ti jventatutic ti bendicione ta onoꞌox chcꞌot ti pasel. Yuꞌun ti “cuꞌunoxuc” ti xchi jcꞌopilaltutique yuꞌun ti Diose, ta onoꞌox chcꞌot ti pasel.
\v 30 Ti achiꞌiltaque muc xchꞌunic ti voꞌonee. Ti ora to laj xa avichꞌic cꞌuxubinel scoj ti muc xchꞌunic stuquic ti jchiꞌiltaque.
\v 31 Yuꞌun ti mu xchꞌunic ti ora to yuꞌun hech chlic yichꞌic cꞌuxubinel ti yan jchiꞌiltaque ti yan to cꞌacꞌal hech chaj cꞌu cheꞌel yacꞌoj sba chavichꞌic cꞌuxubinel ti ora to ti hoꞌoxuque.
\v 32 Hech yuꞌun coꞌol muꞌyuc xchꞌunojel coꞌntontic chijyilucutic ti Diose yuꞌun coꞌol yacꞌoj sba chixcꞌuxubinucutic jcotoltic. Yuꞌun hech onoꞌox snopoj ti Diose ti jaꞌ chixcꞌuxubinucutic stuc.
\p
\v 33 Ti Diose jelaven yutsil ti jyalel ti yoꞌntone. Muꞌyuc muchꞌu yan hech spꞌijil. Snaꞌ scotol. Muꞌyuc muchꞌu chaꞌibe sjam ti cꞌusi snopoje. Muꞌyuc muchꞌu snaꞌ ti cꞌu cheꞌel tspase.
\v 34 Hech chaj cꞌu cheꞌel laj yal ti jꞌalcꞌop ti voꞌone: “Mu stacꞌ ti naꞌel ti cꞌu xꞌelan yoꞌnton ti Cajvaltic Diose hech yuꞌun muc un scꞌan chanubtasel.
\v 35 Mu yuꞌunuc jbael iꞌacꞌbat smoton ti Cajvaltic Diose yuꞌun hech lic yacꞌbe sut tal xqꞌuexol”, ti xchie.
\v 36 Yuꞌun stuc spasoj scotol ti cꞌutic oye. Stuc sventainoj scotol ti cꞌutic oye. Jaꞌ yuꞌun scotol ti cꞌutic oye. Jaꞌ tspasat ti mucꞌ sbatel osil. Jun yutsil ti hech chcꞌot ti pasel.
\c 12
\s Jaꞌ scꞌopilal jꞌechꞌel acꞌo abaic ti scꞌob ti Diose xchiꞌuc abecꞌtalic, xchi
\p
\v 1 Hech yuꞌun, quermanotac, chacalbeic vocol ti atojolic. Yuꞌun yutsil yoꞌnton chaxcꞌuxubinoxuc ti Diose, hech yuꞌun jꞌechꞌel acꞌo abaic ti scꞌob ti Diose xchiꞌuc abecꞌtalic. Hech yuꞌun ti jayib xa cꞌacꞌal liꞌ cuxuloxuque yuꞌunoxuc Dios nacꞌotic o. Hech lec yoꞌnton Dios avuꞌunic. Jaꞌ hech sjam ti chavacꞌ abaic entrecal.
\v 2 Mu me xanopic ti cꞌusi tspasic xchiꞌuc ti cꞌusi tsnopic ti crixchanoetic liꞌ ti balumile. Yan me chanopic ti hoꞌoxuque yuꞌun hech chanaꞌic ti cꞌutic tscꞌan ti Diose, jaꞌ ti cꞌusi lec ti pasele, xchiꞌuc ti cꞌusi lec chil ti Diose, xchiꞌuc ti cꞌusi sventa yutsil avoꞌntonique.
\p
\v 3 Yuꞌun laj xa yacꞌbun cabtel ti Diose yuꞌun ti jchol ti scꞌope, hech yuꞌun hech chajtaqꞌuioxuc. Ti jujunoxuque mu me xacuyic ti atuc noꞌox xuꞌ avuꞌun ti abtele. Ti jujunoxuque tscꞌan ti toj chanopic ti cꞌusi xuꞌ avuꞌunic ti sventa ti Diose yuꞌun hech chapasbeic yabtel ti Diose.
\v 4 Naꞌo me cꞌu xꞌelan tscolta sbaic ti abtel ti jbecꞌtalique. Yuꞌun ep ti tos yichꞌoj sba hech xuꞌ yuꞌun ti abtele mi scotolic lec ch-abtej.
\v 5 Jaꞌ noꞌox hechucutic uc, manchuc mi epucutic jun noꞌox cꞌotemucutic ti stojol ti Cristoe. Hech yuꞌun jaꞌ tscꞌan ti jcotoltic hech ti jcolta jbatic ti abtel yuꞌun hech xuꞌ cuꞌuntic ti yabtel ti Diose.
\p
\v 6 Yuꞌun ti Diose yutsil yoꞌnton yacꞌojbucutic jpꞌijiltic jujunucutic. Mu coꞌoluc ti jpꞌijiltic ti yacꞌojbucutic ti Diose ti jujunucutique. Hech yuꞌun acꞌo me tunucutic yuꞌun ti Diose. Mi jaꞌ acꞌbilot apꞌijil yuꞌun chaval ti scꞌop ti Diose, jaꞌ me xapas ti cꞌu yepal oy ti avoꞌnton ti scꞌope.
\v 7 Mi jaꞌ acꞌbilot apꞌijil yuꞌun chamacꞌlinvan, jaꞌ me xapas. Mi jaꞌ acꞌbilot apꞌijil yuꞌun chachanubtasvan, jaꞌ me xapas.
\v 8 Mi jaꞌ acꞌbilot apꞌijil yuꞌun chataqꞌuivan, jaꞌ me xapas. Mi jaꞌ acꞌbilot apꞌijil yuꞌun chaqꞌuelan ti cꞌusi oy avuꞌune, junuc me avoꞌnton chapas. Mi jaꞌ acꞌbilot apꞌijil yuꞌun chaventain ti quermanotique, toyoluc me avoꞌnton chapas. Mi jaꞌ acꞌbilot apꞌijil yuꞌun chacolta ti muchꞌu chichꞌ vocole, yutsiluc me avoꞌnton chapas.
\s Jaꞌ scꞌopilal ti cꞌusi tscꞌan ti jpastique yuꞌun jchꞌunojbetic scꞌop ti Diose
\p
\v 9 Cꞌux me xavaꞌi abaic ti mero melel, mu me hechuc noꞌox chaval. Ilintao ti cꞌusi chopole, jaꞌuc me toyol avoꞌnton chapas ti cꞌusi leque.
\v 10 Cꞌux me xavaꞌi abaic yuꞌun avermano abaic xa ti sventa Cristo. Biqꞌuit me chavacꞌ abaic ti stojol ti avermanotaque yuꞌun chapas ti mucꞌ.
\p
\v 11 Mu me chꞌajucoxuc. Toyoluc me avoꞌntonic chaꞌabtejic yuꞌun ti Cajvaltique.
\p
\v 12 Nichimuc me avoꞌntonic yuꞌun chanaꞌic ti chacolique. Mi chavichꞌic ilbajinel, oyuc me stsatsal avoꞌntonic. Scotol cꞌacꞌal cꞌoponic Dios.
\p
\v 13 Mi oy chavil chichꞌ vocol quermanotic, coltao ti cꞌusi scꞌane cꞌuc noꞌox. Icꞌo ochel ti ana, macꞌlino.
\p
\v 14 Ti muchꞌutic chayilbajinoxuque mu me xavixtalcꞌopta. Cꞌambo bendición ti stojol. Puru bendición chacꞌambe.
\p
\v 15 Mi oy nichim noꞌox yoꞌntonic yuꞌun lec ti cꞌusi chcꞌot ti pasel yuꞌun, nichimuc me avoꞌntonic xchiꞌuc. Mi oy ch-oqꞌuic, ocꞌanic xchiꞌuc.
\p
\v 16 Jtosuc me avoꞌntonic. Mu me xatoy abaic. Biqꞌuit me chavacꞌ abaic acotolic. Hoꞌoni pꞌijun, mu me xachiic, mu me xanopic hech.
\p
\v 17 Ti muchꞌu chopol ti cꞌusi chaspasbote, mu me xapacbe sutel. Acꞌo ti qꞌuelel yutsil avoꞌntonic ti stojol scotol crixchanoetic.
\v 18 Mi xuꞌ avuꞌunic ti muꞌyuc pleito te ti alumalique, lec. O mi mu xuꞌe, ti hoꞌoxuque jaꞌ noꞌox aventaic ti lamajem avoꞌntonic ti stojol scotol crixchanoetic ti hoꞌoxuque.
\v 19 Hoꞌoxuc ti cꞌuxoxuc ti coꞌntone, mu aventauc ti chavaqꞌuic castigo ti hoꞌoxuque. Malao avilic cꞌu cheꞌel chacꞌ castigo stuc ti Diose yuꞌun hech tsꞌibabil ti scꞌop ti Diose: “Hoꞌon jventa chcacꞌ castigo. Hoꞌon jventa chcacꞌbe stoj”, xchi ti Cajvaltic Diose.
\v 20 Hech tsꞌibabil uc ti scꞌop ti Diose: “Mi chviꞌnaj ti avajcontrae, acꞌbo sveꞌel. Mi taquin yoꞌnton, acꞌbo hoꞌ yuꞌun chuchꞌ. Yuꞌun mi hech chapase, hech chlic tijbatuc yoꞌnton. Hech lic snaꞌ ti mu xtun yoꞌnton stuc”, ti xchie.
\v 21 Mu me xastsalot ti cꞌusi chopole. Jaꞌ stsal avuꞌun ti cꞌusi chopole ti sventa ti cꞌusi lec chapase.
\c 13
\p
\v 1 Jaꞌ tscꞌan ti scotol crixchanoetic chchꞌumbeic smantal ti ajvaliletic ti liꞌoyic ti balumile yuꞌun smantal Dios ti oy ti ajvaliletique. Ti Diose jaꞌ yacꞌojbe yabtel ti ajvaliletique.
\v 2 Hech yuꞌun scotol ti muchꞌutic tscontrainic ti ajvalil yuꞌunique, jaꞌ tscontrainic uc ti Diose. Yuꞌun ti tscontrainic ti ajvalil yuꞌunique, jaꞌ ch-acꞌbatic castigo yuꞌun ti ajvalile.
\v 3 Yuꞌun ti oy ajvaliletique, mu yuꞌunuc jaꞌ acꞌo xiꞌuc ti muchꞌutic lec ti cꞌusi tspasique, yuꞌun jaꞌ acꞌo xiꞌuc ti muchꞌutic chopol ti cꞌusi tspasique. Mi chacꞌan ti mu xaxiꞌ ti stojol ti ajvaliletic avuꞌunique, paso me ti cꞌusi leque hech muꞌyuc amul chayilot.
\v 4 Jaꞌ yabat ti Diose cꞌotem, jaꞌ sventa avutsilalic. Mi chapas ti cꞌusi chopole, xiꞌan me yuꞌun jaꞌ acꞌbil yabtel yuꞌun ti Diose ti xuꞌ chacꞌ castigoe. Yabat ti Diose cꞌotem yuꞌun chacꞌbe castigo ti muchꞌutic chopol ti cꞌusi tspasique.
\v 5 Hech yuꞌun tscꞌan ti chachꞌumbeic smantale. Maꞌuc noꞌox chaxiꞌic yuꞌun ti castigo ti chaqꞌue yuꞌun jaꞌ yabat ti Diose. Chanaꞌic ti jaꞌ hech tscꞌan ti Diose ti chapasique.
\v 6 Yuꞌun jaꞌ sventa cutsilaltic ti oy ti ajvaliletique, hech yuꞌun tscꞌan ti jtojtic ti jpatantique yuꞌun hech xuꞌ yuꞌunic ti yabtelique ti acꞌbilic yuꞌun ti Diose.
\p
\v 7 Chꞌumbeic smantal scotol ti muchꞌutic oy yabtelique. Acꞌbo ti muchꞌutic tscꞌanic patane. Mi oy sjam yuꞌun ti hech chascꞌamboxuque, tojbo ti ajvaliletique ti cꞌu yepal taqꞌuin chascꞌamboxuque. Xiꞌo me, paso me ti mucꞌ yuꞌun jaꞌ acꞌbil yabtelic yuꞌun ti Diose.
\v 8 Mu me oyuc quechel chcom ti aventaic, jaꞌ chatoj scotol. Jaꞌ noꞌox mu xuꞌ ti tojel ti chijcꞌuxubinvane. Mu xlaj scꞌopilal. Jaꞌ tscꞌan scotol cꞌacꞌal chijcꞌuxubinvan. Yuꞌun mi cꞌux chcaꞌitic ti jvecinotique, ihuꞌ xa cuꞌuntic laj jchꞌumbetic scotol smantal ti Diose obi.
\v 9 Yuꞌun mi cꞌux chcaꞌitic ti jvecinotique hech chaj cꞌu cheꞌel cꞌux chcaꞌi jbatic, hech yuꞌun mu jcꞌan chcacꞌbetic yichꞌ vocol. Hech yuꞌun mu xijmulivaj xchiꞌuc yajnil, muc ti jmil, mu xquelcꞌan cꞌusi oy yuꞌun, muc ti jnopbetic smul, mu xbicꞌtaj coꞌntontic yuꞌun ti cꞌusi oy yuꞌune, muꞌyuc cꞌusi yan chopol ti jpasbe. Hech yuꞌun ti hech chijyalbucutic ti Diose: “Cꞌux me xavaꞌi avecino hech chaj cꞌu cheꞌel cꞌux chavaꞌi aba”, ti xchie.
\v 10 Yuꞌun ti muchꞌu cꞌux chaꞌi ti svecinoe, mu xilbajin ti svecinoe. Yuꞌun ti hech chcꞌuxubinvane, hech yuꞌun tsꞌacal chchꞌun ti mantaletique.
\p
\v 11 Chanaꞌic uc ti maꞌuc xa yorail yuꞌun chijvay. Jaꞌ yorail ti viqꞌuil jsatique yuꞌun chcacꞌtic persa. Yuꞌun ti cꞌalal laj jchꞌuntique nat to tscꞌan tsta yorail laj caꞌitic ti chijcolucutique. Ti ora to inopej xa batel ti yorail ti chijcolucutic oe.
\v 12 Hech chaj cꞌu cheꞌel mi ch-echꞌ xa ti acꞌubale, poꞌot xa tsacub ti osile, jaꞌ noꞌox hech uc ti vocole, poꞌot xa chcom cuꞌuntic yuꞌun chijcol o. Hech chaj cꞌu cheꞌel ti jeltic ti oboc jcꞌuꞌtique ti jlaptic ti bu leque, jaꞌ noꞌox hech uc acꞌo me jtentic comel ti chopol abteletic ti mucul ti jpastique, jaꞌ ti muliletique. Jaꞌ acꞌo yuꞌuninucutic ti abteletic ti mu xijqꞌuexav ti stojol crixchanoetic yuꞌun ti jpastique, jaꞌ ti lequil abtele, yuꞌun hech stsal cuꞌuntic ti cꞌusi chopole.
\v 13 Lecuc me ti cꞌusi ti jpastique hech chaj cꞌu cheꞌel ti muchꞌutic ch-abtej ti satilal ti mu xqꞌuexavique yuꞌun lec ti yabtelique. Hech yuꞌun mu me xayacubic yuꞌun cꞌuc noꞌox chapasic mi chayacubique. Mu me xamulivajic, mu me xatsaquic ants, mu me xapasic pleito, mu me xbicꞌtaj avoꞌntonic. Jaꞌ tscꞌan.
\v 14 Jaꞌ acꞌo yuꞌuninoxuc ti Cajvaltic Jesucristoe hech xuꞌ avuꞌunic hech chaj cꞌu cheꞌel laj spas. Hech maꞌuc chapasic ti cꞌusi tscꞌan ti abecꞌtalique.
\c 14
\s Jaꞌ scꞌopilal mu me xasaꞌbe smul ti avermanoe, xchi
\p
\v 1 Cꞌanic me ti muchꞌutic mu to oyuc yip yoꞌntonic ti stojol ti Diose. Mu me xalabanic.
\v 2 Oy quermanotic chchꞌunic ti scotol xuꞌ ti jveꞌtic cꞌuc noꞌox. Ti quermanotic ti mu to oyuc yip yoꞌntone, jaꞌ noꞌox tsveꞌ ti cꞌusi chchꞌi ti svertae.
\v 3 Ti muchꞌu scotol tsveꞌe mu me slaban ti muchꞌu mu scotoluc tsveꞌe. Ti muchꞌu mu scotoluc tsveꞌe mu me saꞌbe smul ti muchꞌu scotol tsveꞌe. Mu me hechuc chapasic yuꞌun coꞌol icꞌbiloxuc ti stojol ti Diose.
\v 4 ¿Muchꞌuot chacuy aba yuꞌun chasaꞌbe smul yabat yan? Jaꞌ stuc sventa stuc ti yajvale ti chchapane. Ti yajvale, jaꞌ ti Diose, jaꞌ chcoltaat yuꞌun, yuꞌun lec chcꞌot yuꞌun.
\p
\v 5 Oy quermanotic chchabiic ep cꞌacꞌal hech chaj cꞌu cheꞌel laj xchabiic ti jtatamoltic ti voꞌonee. Oy yan quermanotic muꞌyuc scꞌopilal chchabiic ti cꞌacꞌale. Coꞌol noꞌox scꞌopilal chaꞌyic, muꞌyuc bu tsots scꞌopilal ti cꞌacꞌal chaꞌyic yuꞌun chchabiic. Jujun acꞌo snop ti yoꞌnton cꞌusi tscꞌan ti chchabiique.
\v 6 Ti quermanotic ti oy scꞌopilal ti yoꞌntonic chchabiic ep cꞌacꞌale, jaꞌ chchꞌunic ti hech tscꞌan ti Cajvaltique. Ti quermanotic ti muꞌyuc scꞌopilal chaꞌyic ti chchabiic ti cꞌacꞌale, jaꞌ chchꞌunic ti hech tscꞌan ti Cajvaltique. Ti quermanotic ti scotol tsveꞌique jaꞌ chchꞌunic ti hech tscꞌan ti Cajvaltique. Ti quermanotic ti mu scotoluc tsveꞌique, jaꞌ chchꞌunic ti hech tscꞌan ti Cajvaltique. Yuꞌun coꞌol chalbeic vocol ti Diose ti sveꞌelique.
\p
\v 7 Ti hoꞌucutique mu jmantalticuc ti liꞌ cuxulucutic jayib cꞌacꞌal liꞌto. Jaꞌ noꞌox hech uc mu jmantalticuc ti cꞌusi ora chijchamucutique.
\v 8 Jaꞌ smantal stuc ti Cajvaltique ti cuxulucutique yuꞌun jaꞌ stuc sventainojucutic. Jaꞌ smantal stuc uc ti cꞌusi ora chijchamucutique. Hech yuꞌun mi cuxulucutic liꞌ ti balumile, mi chijcham uc, jaꞌ stuc oyucutic ti sventa ti Cajvaltique.
\v 9 Hech yuꞌun ti icham ti Cristoe, ti ichaꞌcuxie, yuꞌun jaꞌ ajvalil cuꞌuntic icꞌot manchuc mi chijcham, manchuc mi cuxulucutic to liꞌ ti balumile.
\p
\v 10 Hech yuꞌun muꞌyuc stu avuꞌunic chaticꞌbe smul ti yan quermanotique. Muꞌyuc stu avuꞌunic chalaban. Yuꞌun jujunucutic chcꞌot jvaꞌan jbatic ti stojol ti Cristoe yuꞌun chijyichꞌbucutic jcꞌoptic.
\v 11 Yuꞌun hech tsꞌibabil ti scꞌop ti Diose:
\q Hoꞌon ti Diosune, hoꞌon ti jtalel oyune, hech chcal.
\q Scotol crixchanoetic tsquejan sbaic ti jtojol.
\q Scotol crixchanoetic chalic ti jtojol ti hoꞌon Diosun jtuc,
\m xchi ti Cajvaltic Diose, ti xchie.
\v 12 Hech yuꞌun jujunucutic chcꞌot yichꞌbucutic entrecal ti cꞌu cheꞌel nijꞌabtejucutic jujunucutique ti Diose.
\s Jaꞌ scꞌopilal ti mu me hoꞌucutic ti jventatic chpꞌajic ti mulil ti quermanotique
\p
\v 13 Hech yuꞌun mu xa me jsaꞌbe jbatic jmultic. Jaꞌ noꞌox jventatic chcacꞌtic persa ti hoꞌucutique yuꞌun mu me xchꞌay ti be ti quermanotique yuꞌun ti cꞌusi ti jpastique. Mu me hoꞌucutic ti jventatic chpꞌajic ti mulil ti quermanotique.
\v 14 Laj xa yacꞌbun jnaꞌ ti Cajvaltic Jesuse mi jutuc veꞌelil muc bu chopol. Hech jchꞌunoj. Ti muchꞌu chchꞌun ti oy bu chopol ti veꞌelile, jaꞌ lec mu me sveꞌ. Mi hech oy ti yoꞌnton ti chopol chaꞌie, chopol onoꞌox chcꞌot yuꞌun.
\v 15 Hoꞌoxuque ti lec avoꞌntonic mi chaveꞌ scotole, mi chavil ti te chchꞌay ti be ti yan quermanotique, te chbolib yoꞌntonic yuꞌun ti hech chaveꞌique, jaꞌ tscꞌan ti chapajes abaique. Yuꞌun mi mu xapajes abaic, yuꞌun mu cꞌuxuc ti avoꞌntonic ti quermanotique obi. Ti Cristoe jaꞌ laj xcꞌuxubin, laj yacꞌ sba ti milel yuꞌunic.
\v 16 Lec ti libre nacꞌotic xae pero mu me chopoluc chbat acꞌopilalic yuꞌun.
\v 17 Yuꞌun chispasucutic xa ti mantal ti Diose mu me jaꞌuc tsots noꞌox scꞌopilal ti coꞌntontic ti jveꞌeltique yuꞌun mu jpajes jbatic. Jaꞌ me tsots scꞌopilal ti toj coꞌntontic chijyilucutic ti Diose, ti jun coꞌntontic, ti nichim noꞌox coꞌntontic ti sventa ti Chꞌul Espíritue.
\v 18 Ti muchꞌu hech chacꞌ sba ti abatinel yuꞌun ti Cristoe, jaꞌ lec chil ti Diose. Lec ch-ilat yuꞌun crixchanoetic uc.
\p
\v 19 Hech yuꞌun jaꞌ acꞌo jcꞌantic ti jtos coꞌntontique, acꞌo jcꞌantic ti coꞌol chlecub coꞌntontic jcotoltic.
\v 20 Mu me scojuc noꞌox aveꞌelic ti hech chjin ti yabtel ti Diose avuꞌunic. Yuꞌun scotol veꞌelil lec pero jaꞌ chopol chcꞌot mi ti scoj aveꞌelic ti chbolib yoꞌntonic avuꞌunic ti yan quermanotique.
\v 21 Jaꞌ lec mu xatiꞌ tiꞌbol, jaꞌ lec mu xavuchꞌbe yaꞌlel sat uvateꞌ mi hech chbolib yoꞌnton avuꞌunic ti yan quermanotique. Jaꞌ lec mu xapas ti bu chbolib yoꞌnton avuꞌunic ti yan quermanotique, ti bu chchibaj yoꞌnton avuꞌunic, ti bu tspecꞌtsaj yoꞌnton avuꞌunic.
\v 22 Mi achꞌunoj ti lec scotol ti veꞌelile, lec oy. Mu yuꞌunuc chcal ti mu me xachꞌun hech. Lec mi chaveꞌ scotol. Jaꞌ tscꞌan chanaꞌ uc mi hech tscꞌan ti Diose ti chaveꞌ scotole, mi mu hechuc chbolib yoꞌnton ti yan quermanotique. Nichim noꞌox coꞌntontic mi mu xloꞌlaj coꞌntontic yuꞌun ti cacꞌoj jba ti jpastic ti cꞌutic ti jpastique.
\v 23 Ti muchꞌu chchꞌun ti mu scꞌan ti Diose ti tstiꞌ ti tiꞌbole, mi tsuj sba yuꞌun tstiꞌ, jaꞌ noꞌox tsaꞌ smul ti stojol ti Diose yuꞌun maꞌuc noꞌox tspas ti cꞌusi xchꞌunoje. Yuꞌun mi maꞌuc noꞌox ti jpastic ti cꞌusi jchꞌunojtique, mi ti jsuj jbatic chba jpastic yan, jaꞌ mulil obi.
\c 15
\s Jaꞌ scꞌopilal ti acꞌo jcꞌuxubintic ti quermano jbatic xchiꞌuque yuꞌun hech tstsatsub yoꞌnton ti quermanotique cuꞌuntic
\p
\v 1 Hech yuꞌun ti hoꞌucutique ti oy yip coꞌntontic ti stojol ti Diose, jaꞌ lec ti jcꞌuxubintic ti muchꞌutic mu to oyuc yip yoꞌntonique. Mu me jtuctic noꞌox ti jcꞌuxubin jbatic ti jujunucutique.
\v 2 Ti jujunucutique hech acꞌo jcꞌuxubintic ti quermano jbatic xchiꞌuque. Acꞌo jnoptic cꞌusi tscꞌan ti jpastic yuꞌun hech tstsatsub yoꞌnton ti quermanotique cuꞌuntic.
\v 3 Yuꞌun hech laj spas ti Cristoe. Stuc muc xcꞌuxubin sba, laj stsꞌic ti vocole hech lec ibat scꞌopilal yuꞌun ti Diose hech chaj cꞌu cheꞌel tsꞌibabil comel scꞌopilal: “Yuꞌun ti chascontrainot, hoꞌon chquichꞌ scotol, Tote”, xchi ti Jesuse, xut ti Stote.
\v 4 Ti cꞌutic tsꞌibabil comel ti scꞌop ti Diose ti voꞌone jaꞌ yuꞌun chijpꞌijub, hech yuꞌun ti hech tsꞌibabile. Hech ch-an yip coꞌntontic, mu xchibaj coꞌntontic mi chquichꞌtic vocol yuꞌun ti jnaꞌtic ti chijcolucutique.
\v 5 Dios ti chijyacꞌbucutic yip coꞌntontique, ti chismucꞌubtasbucutic coꞌntontique. Hech yuꞌun ti jcꞌambe vocol yuꞌun jtosuc me avoꞌntonic xchiꞌuc ti Cristo Jesuse. Mi jtos avoꞌntonic xchiꞌuc ti Cristo Jesuse hech yuꞌun chacꞌuxubin abaic acotolic.
\v 6 Yuꞌun jun noꞌox chacꞌotic, hech lec chbat scꞌopilal avuꞌunic ti Diose, jaꞌ ti Dios yuꞌun ti Cajvaltic Jesucristoe, jaꞌ ti Stot uque.
\s Jaꞌ scꞌopilal ti Pabloe ti yichꞌoj yabtel yuꞌun chcholbe scꞌopilal ti Cristoe ti yanlum crixchanoetique
\p
\v 7 Hech yuꞌun lec me chavil abaic hech chaj cꞌu cheꞌel lec chayiloxuc ti Cristoe. Hech lec chbat scꞌopilal avuꞌunic ti Diose.
\v 8 Yuꞌun ti Jesucristoe tal yacꞌ sba ti abatinel ti jtojoltic, hoꞌucutic ti judioucutique, yuꞌun tal yacꞌbucutic jqꞌueltic ti hoꞌucutique ti melel ti scꞌop ti Diose. Yuꞌun ti itale, hech itsꞌaqui ti cꞌusi iꞌalbatic ti voꞌone yuꞌun ti Diose ti jtatamoltique ti voꞌone.
\v 9 Jaꞌ ti aventaic uc ti tal yacꞌ sba ti abatinele, hoꞌoxuc ti yanlum crixchanooxuque. Yuꞌun hech chavalbeic scꞌopilal ti Diose ti laj xa xcꞌuxubinoxuque. Yuꞌun hech tsꞌibabil comel ti scꞌop ti Diose:
\q Lec chbat acꞌopilal cuꞌun ti stojol ti yanlum crixchanoetique.
\q Nichim noꞌox coꞌnton chcalbe acꞌopilal,
\m xchi ti Cajvaltique, xut ti Stote.
\v 10 Hech tsꞌibabil uc:
\q Hoꞌoxuc ti yanlum crixchanooxuque, laꞌic me, laꞌ coꞌol calbetic vocol ti Diose hech chaj cꞌu cheꞌel ti hoꞌontutique ti tꞌujbiluntutic yuꞌun ti Diose,
\m ti xchi onoꞌoxe.
\v 11 Hech tsꞌibabil uc:
\q Lec chavalbeic scꞌopilal ti Cajvaltique acotolic, hoꞌoxuc ti yanlum crixchanooxuque.
\q Jaꞌ tscꞌan ti scotol crixchanoetic ti sjoylejal balumil lec chalbeic scꞌopilal ti Cajvaltique,
\m ti xchi onoꞌoxe.
\v 12 Hech laj yal uc ti Isaíase:
\q Chlic jun yelnichꞌon ti Isaíe.
\q Jaꞌ ch-acꞌbat yabtel tspas ti mantal uc ti yanlum crixchanoetique.
\q Ti yanlum crixchanoetique chchꞌunic ti chcolic ti sventa uc,
\m ti xchie.
\p
\v 13 Yuꞌun achꞌunojic ti chascoltaoxuc o ti Diose, hech yuꞌun ti jcꞌambe vocol ti Diose yuꞌun acꞌo más nichim noꞌox avoꞌntonic, acꞌo más jun avoꞌntonic yuꞌun ti hech achꞌunojique. Hech yuꞌun ti sventa ti Chꞌul Espíritue ti ch-abtej ti avoꞌntonique xuꞌ avuꞌunic chavaqꞌuic ti qꞌuelel ti achꞌunojic ti chacolique.
\p
\v 14 Quermanotac, ti jnaꞌ uc hoꞌoni ti ep yutsil avoꞌntonique, ti oy ep spꞌijil avoꞌntonique hech yuꞌun xuꞌ avuꞌun chataqꞌui abaic.
\v 15 Yuꞌun ti hech laj jtsꞌibaboxuc ti cartae, laj jcꞌan ti chajtꞌabesboxuc ti avoꞌntonic ti cꞌusi avaꞌyojic xae yuꞌun hech mu xchꞌay ti avoꞌntonic. Yuꞌun yacꞌojbun cabtel ti Diose, hech yuꞌun oy bu tsots jutuc laj calboxuc.
\v 16 Yuꞌun hoꞌon quichꞌoj cabtel yuꞌun chajcholboxuc scꞌopilal ti Cristoe, ti hoꞌoxuc ti yanlum crixchanooxuque. Hoꞌon jventainoj xcholel ti lequil achꞌ cꞌope ti atojolic. Jun to coꞌolun hech chaj cꞌu cheꞌel pale ti voꞌone ti chacꞌbe smoton ti Diose. Ti motonil ti chcacꞌbe ti Diose hoꞌoni, hoꞌoxuc motoniloxuc hoꞌoxuc ti yanlum crixchanooxuque. Yuꞌun nalecubtasbat xa avoꞌntonic yuꞌun ti Chꞌul Espíritue, hech yuꞌun lec chayiloxuc ti Diose.
\p
\v 17 Ti hoꞌone xuꞌ ti jtoy jba xchiꞌuc ti cabtele yuꞌun lec ihuꞌ cuꞌun nitun yuꞌun ti Diose. Pero mu hechuc sjam ti jtoy jbae yuꞌun ti manchuc laj scoltaun ti Cristo Jesuse, muc xuꞌ cuꞌun ti hechuque.
\v 18 Mu yuꞌunuc chacalbot scꞌopilal yabtel yan. Jaꞌ noꞌox chacalbot ti cabtele ti cꞌu yepal laj xa scoltaun ti Cristoe ti ihuꞌ cuꞌun ti sventae. Yuꞌun ti laj calbe ti scꞌop ti Diose, yuꞌun ti niꞌabtej ti stojolique, hech yuꞌun oy laj xa xchꞌunic ti achiꞌiltaque, hoꞌoxuc ti yanlum crixchanooxuque.
\v 19 Oy laj xa xchꞌunic yuꞌun ti laj sqꞌuelic ti señailetique xchiꞌuc ti jchop o abteletique ti laj jpas ti stojolique. Jaꞌ iꞌabtej ti yoꞌntonic ti Chꞌul Espíritu yuꞌun ti Diose, hech yuꞌun laj xchꞌunic. Xmelmun laj jpuc ti lequil achꞌ cꞌope, jaꞌ ti scꞌopilal ti Cristoe. Nilic ti Jerusalén xijoyet batel asta nicꞌot ti balumil Ilírico sbi.
\v 20 Jaꞌ toyol coꞌnton ti jcholbe ti lequil achꞌ cꞌope ti bu muꞌyuc muchꞌu chcholbate. Mu yuꞌunuc chibat ti bu oy quermanotic. Jaꞌ chba jcholbe ti muchꞌu mu yaꞌyojbuc scꞌopilal ti Cristoe.
\v 21 Hech yuꞌun icꞌot xa ti pasel hech chaj cꞌu cheꞌel tsꞌibabil comel ti scꞌop ti Diose:
\q Jaꞌ ch-acꞌbat yojtiquinic ti muchꞌutic mu yaꞌyojbuc scꞌopilale.
\q Jaꞌ chcꞌot ti yoꞌntonic ti muchꞌutic mu yaꞌyojuc mi jutuque,
\m ti xchi onoꞌoxe.
\s Jaꞌ scꞌopilal ti scꞌan chbat ti Roma ti Pabloe
\p
\v 22 Hech yuꞌun ep vuelta nipaj, hech yuꞌun muc xtal jqꞌueloxuc.
\v 23 Ti ora to yuꞌun ilaj xa cabtel liꞌto, yuꞌun ep xa habil jcꞌan chtal jqꞌueloxuc,
\v 24 hech yuꞌun cꞌalal chibat ti Españae, te ch-echꞌ jqꞌueloxuc. Chib oxib noꞌox cꞌacꞌal chajchiꞌinoxuc. Ti jcꞌan uc ti jun avoꞌntonic chatacucun batel ti patil.
\v 25 Ti ora to chibat ti Jerusalén yuꞌun chba cacꞌbe comel jutuc ti cꞌusi chtun yuꞌunic ti quermanotic ti te oyic ti Jerusalene, jaꞌ ti coꞌol oyucutic ti stojol ti Diose xchiꞌuque.
\v 26 Yuꞌun ti quermanotique ti te oyic ti estado Macedoniae xchiꞌuc liꞌ ti estado Acayae nichim noꞌox yoꞌntonic laj xa stsobic staqꞌuinic yuꞌun chacꞌbeic ti quermanotic ti uts sbaique ti te oyic ti Jerusalene.
\v 27 Yuꞌun hech yoꞌntonic ti tscoltaique yuꞌun oy yilic ti stojol. Jaꞌ ti sventaic ti quermanotic ti te oyic ti Jerusalene, jaꞌ ti jchiꞌiltaque, hoꞌontutic ti judiountutic xchiꞌuque, ti naꞌacꞌbatic xa bendición yuꞌun ti Diose, hoꞌoxuc ti yanlum crixchanooxuque, hech yuꞌun lec ti chacoltaique, ti chavacꞌbeic cꞌusi chtun yuꞌunic liꞌ ti balumile.
\v 28 Hech yuꞌun mi ilaj coꞌnton laj cacꞌbe ti scꞌobic ti motonil ti chcale, hech yuꞌun patil chital te o yuꞌun chibat ti España. Jaꞌ te ch-echꞌ jqꞌueloxuc obi.
\v 29 Ti mi nihul xa te oy yoꞌ bu oyoxuque, ti jnaꞌ ti ep chiyacꞌbun bendición ti Cristoe yuꞌun hech ep bendición chavichꞌic ti jventa uc.
\p
\v 30 Hech yuꞌun, quermanotac, chacalbeic vocol. Yuꞌun coꞌol jchꞌunojbetic scꞌop ti Cajvaltic Jesucristoe, yuꞌun cꞌux chcaꞌi jbatic ti sventa ti Chꞌul Espíritue, hech yuꞌun naꞌun me, cꞌopombun Dios ti jtojol.
\v 31 Jaꞌ chacꞌopombun Dios ti jtojol yuꞌun mu me xistsacucun ti jchiꞌile ti te oyic ti Judeae ti mu xchꞌunojuque. Chacꞌopombun Dios ti jtojol uc yuꞌun lec acꞌo cꞌotuc ti yoꞌntonic ti quermanotic ti te oyic ti Jerusalene ti hech ti jcoltatutique. Hech cacꞌoj jba ti jcꞌopon Dios uc hoꞌoni.
\v 32 Mi hech tscꞌan ti Diose ti muꞌyuc cꞌusi chcꞌot ti pasele, hech nichim noꞌox coꞌnton chital te ti atojolic. Hech te chajchiꞌinic, ti jcux coꞌnton jutuc mi hech tscꞌan ti Diose.
\v 33 Chaxchiꞌinoxuc ti Diose ti jaꞌ chayacꞌboxuc jun avoꞌntonic ti jujunoxuque. Jun yutsil ti hech chcꞌot ti pasel.
\c 16
\s Jaꞌ scꞌopilal chabanuc ti quermanotique, xchi
\p
\v 1 Chacalbe avaꞌyic ti lec scꞌopilal ti quermanotic antse, jaꞌ ti Febee, jaꞌ chichꞌ talel avi carta to. Jaꞌ ch-abtej yuꞌun ti Cajvaltique ti stojol ti quermanotic liꞌ ti Cencreae.
\v 2 Yuꞌun coꞌol jchꞌunojbetic scꞌop ti Cajvaltique xchiꞌuc, hech yuꞌun iqꞌuic me ti atojolic hech chaj cꞌu cheꞌel tscꞌan ti Diose ti chquicꞌtic ti jtojoltic ti muchꞌutic oyucutic ti stojol ti Dios xchiꞌuque. Yuꞌun ep ti muchꞌutic laj xa scoltae, hech yuꞌun ta me xacolta cꞌusuc noꞌox tscꞌan. Hoꞌon laj xa scoltaun uc.
\p
\v 3 Chabanuc ti Priscilae xchiꞌuc ti smalal, jaꞌ ti Aquilae, ti coꞌol cabtel xchiꞌuc ti stojol ti Cristo Jesuse.
\v 4 Jaꞌ cꞌan yacꞌ sbaic ti milel yuꞌun hech chicuxi hoꞌoni. Hocol niyalbun ti hech laj spas ti xchaꞌvaꞌalique. Ti jnaꞌ uc ti nichim noꞌox avoꞌntonic hoꞌoxuc ti yanlum crixchanooxuque ti achꞌunojic xae, yuꞌun ti hech laj scoltaucun ti Priscilae xchiꞌuc ti Aquilae.
\v 5 Chabanuc uc ti yan quermanotique ti chatsob abaic xchiꞌuc ti sna ti Aquilae. Chabanuc uc ti Epenetoe ti cꞌux ti coꞌntone. Ti Epenetoe jaꞌ primero laj xchꞌumbe scꞌop ti Cristoe liꞌto ti estado Acaya.
\v 6 Chabanuc uc ti Maríae ti ep iꞌabtej xa te ti atojolique.
\v 7 Chabanuc uc ti jchiꞌile, jaꞌ ti Andrónicoe xchiꞌuc ti Juniase ti coꞌol nichucat xchiꞌuque. Lec ojtiquimbil uc yuꞌun ti yan jcholcꞌopetique yuꞌun chcholic scꞌop Dios uc. Jaꞌ jbael laj xchꞌumbeic scꞌop ti Cajvaltique, patil laj jchꞌun hoꞌoni.
\p
\v 8 Chabanuc uc ti Ampliase ti cꞌux ti coꞌnton ti stojol ti Cajvaltique.
\v 9 Chabanuc uc ti Urbanoe ti laj jchiꞌintutic ti abtel ti stojol ti Cristo Jesuse. Xchiꞌuc ti Estáquise, ti cꞌux ti coꞌntone.
\v 10 Chabanuc uc ti Apelese ti jun yoꞌnton ti stojol ti Cristoe. Chabanuc uc ti jayvoꞌ te oy ti sna ti Aristóbuloe.
\v 11 Chabanuc uc ti jchiꞌile jaꞌ ti Herodione. Chabanuc uc ti jayvoꞌ te oy ti sna ti Narcisoe ti xchꞌunojbeic scꞌop ti Cajvaltique.
\v 12 Chabanuc ti quermanotic antse, jaꞌ ti Trifenae xchiꞌuc ti Trifosae ti yacꞌoj sba ch-abtejic yuꞌun ti Cajvaltique. Chabanuc uc ti quermanotic antse, jaꞌ ti Pérsidae, ti cꞌux ti coꞌntontique, ti ep iꞌabtej xa yuꞌun ti Cajvaltique.
\v 13 Chabanuc uc ti Rufoe ti lec xchꞌunojbe scꞌop ti Cajvaltique xchiꞌuc uc ti smeꞌe. Jaꞌ jmeꞌ uc yaꞌyel yuꞌun laj scoltaun.
\v 14 Chabanuc uc ti Asíncritoe xchiꞌuc ti Flegontee xchiꞌuc ti Hermase, xchiꞌuc ti Patrobase xchiꞌuc ti Hermese xchiꞌuc ti yan quermanotique ti te xchiꞌinojique.
\v 15 Chabanuc uc ti Filólogoe xchiꞌuc ti quermanotic ants Juliae xchiꞌuc ti Nereoe xchiꞌuc ti xvixe, xchiꞌuc ti Olimpase xchiꞌuc scotol ti quermanotique ti te xchiꞌinojique.
\p
\v 16 Yuꞌun jaꞌ señail ti cꞌuxoxuc ti coꞌntone, tsacbo me abaic acꞌobic. Chabanucot la xal scotol ti quermanotique ti buc noꞌox oyic ti jujun temploe.
\p
\v 17 Quermanotac, chacalbeic vocol. Pꞌijanic me mi oy muchꞌutic te achiꞌinojic ti tsliquesic cꞌope yuꞌun jaꞌ noꞌox tscꞌan chasjinoxuc. Yuꞌun mu hechuc nachanubtasatic, hech yuꞌun mu me xachiꞌinic, acꞌo locꞌuc batel te ti atojolic.
\v 18 Yuꞌun ti muchꞌutic hech yoꞌntonic mu yuꞌunuc tspasbeic yabtel ti Cajvaltic Jesucristoe. Jaꞌ noꞌox tscꞌanic tspasatic ti mucꞌ stuquic. Yuꞌun jun noꞌox yutsil xꞌelan ti scꞌopique, lec chcꞌopojic xꞌelan hech tsloꞌlaic ti muchꞌutic mu to chpꞌijubique.
\v 19 Ti hoꞌoxuque puquem acꞌopilalic ti stojol scotol crixchanoetic ti lec chachꞌunic mantal. Nichim noꞌox coꞌnton avuꞌunic ti hech avoꞌntonique. Yuꞌun ti lec chachꞌunic mantale, tscꞌan ti pꞌij chavacꞌ abaic mu me cꞌuc noꞌox chachꞌunic. Jaꞌ me xachꞌun ti ora ti cꞌusi leque, mu me xachꞌun ti cꞌusi mu xtune.
\v 20 Mi oy hech te ti atojolic ti tsliquesic cꞌope, ti Diose chastsalbot ti ora ti svinictac ti Satanase ti hech tsliquesic cꞌope yuꞌun hech jun avoꞌntonic o hech chaj cꞌu cheꞌel nachanubtasatic. Acꞌo yacꞌboxuc ep bendición ti Cajvaltic Jesucristoe.
\p
\v 21 Chabanucot la xal ti Timoteoe ti jchiꞌinoj jbatutic ti abtel xchiꞌuque. Chabanucot la xal uc ti quermanotique ti coꞌol judioucutic xchiꞌuque, jaꞌ ti Lucioe xchiꞌuc ti Jasone xchiꞌuc ti Sosípatere.
\p
\v 22 Hoꞌon ti Tercioune, hoꞌon ti jtsꞌibabe scarta ti quermanotic Pabloe. Hech yuꞌun hech chajtojboxuc avoꞌntonic uc ti stojol ti Cajvaltique.
\p
\v 23 Chabanucot la xal ti Gayoe ti liꞌoyun ti snae, jaꞌ ti yacꞌoj sna yuꞌun ti jtsob jbatutic xchiꞌuc scotol ti quermanotique. Chabanucot la xal uc ti Erastoe, jaꞌ ti yichꞌoj yabtel tesorero yuꞌun ti jteclume xchiꞌuc ti quermanotic Cuartoe.
\p
\v 24 Chayacꞌboxuc ep bendición acotolic ti Cajvaltic Jesucristoe. Jun yutsil ti hech chcꞌot ti pasel.
\s Jaꞌ scꞌopilal ti jelaven yutsil ti cꞌu cheꞌel ch-abtej ti Diose
\p
\v 25 Jelaven spꞌijil ti Diose hech yuꞌun xuꞌ yuꞌun chastsatsubtasboxuc avoꞌntonic hech chaj cꞌu cheꞌel chal ti lequil achꞌ cꞌope ti cacꞌoj jba ti jchole, jaꞌ ti scꞌopilal ti Jesucristoe. Oy acꞌopilal ti chacolic onoꞌoxe, hoꞌoxuc ti yanlum crixchanooxuque. Hech laj yal ti jꞌalcꞌopetic ti voꞌone. Pero muc xvinaj ti cꞌu cheꞌel chacolique.
\v 26 Ti ora to ivinaj xa. Yuꞌun hech smantal ti Diose ti stalel cuxule, hech yuꞌun ti ora to chichꞌ cholel ti sjoylejal balumil ti stojol scotol crixchanoetic ti scꞌop ti Diose ti laj yal ti jꞌalcꞌopetic ti voꞌone. Hech yuꞌun ti sjoylejal balumil oy chlic xchꞌunic ti jaꞌ Jcoltavanej yuꞌunic ti Cajvaltique.
\v 27 Hech yuꞌun ti Diose ti stuc jelaven spꞌijile tspasat ti mucꞌ sbatel osil ti sventa ti Jesucristoe. Jun yutsil ti hech chcꞌot ti pasel.