\id 1CO

\h 1 CORINTIOS
\toc1 1 CORINTIOS
\mt JAꞌ TI SBA SCARTA TI QUERMANOTIC TE TI CORINTOE
\mt2 ti itsꞌibabat yuꞌun ti Pabloe
\c 1
\s Hech lic scꞌopon ti carta ti quermanotic te ti Corinto ti Pabloe
\p
\v 1 Hoꞌon Pabloun. Ochemun ti jcholcꞌop yuꞌun ti Jesucristoe yuꞌun hech laj scꞌan yoꞌnton ti Diose. Hoꞌon chajcꞌopontutic ti carta xchiꞌuc ti quermanotic Sóstenese,
\v 2 hoꞌoxuc ti achꞌunojbeic scꞌop ti Diose te ti Corinto. Ti Diose laj yicꞌoxuc ti stojol yuꞌun hech yuꞌunoxuc nacꞌotic o. Jaꞌ ti sventa ti Cristo Jesuse ti hech laj yicꞌoxuque. Hech jun nacꞌotic xa xchiꞌuc scotol ti muchꞌutic chalbeic vocol ti stojol ti Cajvaltic Jesucristoe ti buc noꞌox oyique, ti jun noꞌox Cajvaltic xchiꞌuque.
\v 3 Acꞌo yacꞌboxuc ep bendición ti Jtotic Diose xchiꞌuc ti Cajvaltic Jesucristoe. Acꞌo yacꞌboxuc jun avoꞌntonic ti jujunoxuque.
\s Jaꞌ scꞌopilal hocol aval, xut ti Diose yuꞌun ti hech ep iꞌacꞌbatic xa spꞌijilic ti quermanotique
\p
\v 4 Scotol cꞌacꞌal hocol aval, chcut ti Diose yuꞌun avichꞌojbeic xa yutsil yoꞌnton ti Diose ti hoꞌoxuque. Acꞌbiloxuc xa ti sventa ti Cristo Jesuse.
\v 5 Jaꞌ ti sventa ti Cristo Jesuse ti ep naꞌacꞌbatic xa apꞌijilique. Hech yuꞌun lec chanaꞌ chacholbe scꞌopilal ti Jesuse. Oy ti avoꞌntonic ti scꞌope ti jaꞌ melele.
\v 6 Yuꞌun cꞌotem xa ti avoꞌntonic ti cꞌutic laj jcholboxuque, jaꞌ ti scꞌopilal ti Cristoe.
\v 7 Hech yuꞌun muꞌyuc xa cꞌusi scꞌan to yan avuꞌunic. Avichꞌojic xa scotol ti cꞌusi tscꞌan yuꞌun chapasic cꞌusi scꞌan ti Diose. Jaꞌ xa noꞌox chamalaic ti cꞌusi ora tsut tal ti Cajvaltic Jesucristoe.
\v 8 Scotol ora chastsatsubtasboxuc avoꞌntonic ti Diose yuꞌun hech muꞌyuc amul chacꞌotic ti stojol cꞌalal tsut tal ti Cajvaltic Jesucristoe.
\v 9 Hech chascoltaoxuc ti Diose yuꞌun jun yoꞌnton avuꞌunic. Yicꞌojoxuc ti stojol yuꞌun hech jun chacꞌotic xchiꞌuc ti Snichꞌone, jaꞌ ti Cajvaltic Jesucristoe.
\s Jaꞌ scꞌopilal ti muc un chixchꞌaquilanucutic ti hoꞌucutique ti smacojucutic ti Cristoe
\p
\v 10 Quermanotac, chacalbeic vocol ti atojolic ti sventa ti Cajvaltic Jesucristoe. Coꞌoluc me acꞌopic acotolic. Mu me xapꞌev abaic. Jtosuc me avoꞌntonic, coꞌoluc me ti cꞌusi chanopique.
\v 11 Yuꞌun laj xa xcholbun acꞌopilalic ti yajꞌabtel ti quermanotic antse, jaꞌ ti Cloee, ti chavut abaic, quermanotac.
\v 12 Yuꞌun oy chavalic: “Hoꞌoni oyun ti sventa Pablo”, xachiic. Oy chavalic: “Hoꞌoni oyun ti sventa Apolos”, xachiic. Oy chavalic: “Hoꞌoni oyun ti sventa Pedro”, xachiic. Oy chavalic: “Hoꞌoni oyun ti sventa Cristo”, xachiic uc.
\v 13 ¿Cꞌu yuꞌun ti hech chacꞌan chachꞌac abaique? Muc un chixchꞌaquilanucutic ti hoꞌucutique ti smacojucutic ti Cristoe. Jcotoltic smacojucutic. Mu hoꞌucuntutic nicham ti cruz yuꞌun amulic. Mu hoꞌucuntutic ti jventa ti laj avichꞌic hoꞌe.
\v 14 Hocol yal ti Diose ti chaꞌvoꞌ oxvoꞌoxuc noꞌox laj cacꞌboxuc avichꞌic hoꞌ hoꞌoni. Jaꞌ noꞌox laj cacꞌbe yichꞌ hoꞌ ti Crispoe xchiꞌuc ti Gayoe.
\v 15 Ti epuc laj cacꞌboxuc avichꞌic hoꞌe, repenta chavalic ti hoꞌon ti jventa chacolic yuꞌun ti laj cacꞌboxuc avichꞌic hoꞌe.
\v 16 Oy to yan muchꞌu laj cacꞌbe yichꞌ hoꞌ uc. Jaꞌ laj cacꞌbe yichꞌ hoꞌ sjunul sna ti Estéfanase. Mu jnaꞌ mi oy yan muchꞌu laj cacꞌbe yichꞌ hoꞌ.
\v 17 Yuꞌun maꞌuc hech cabtel laj yacꞌbun ti Cristoe ti chcaqꞌuilan ichꞌhoꞌe. Jaꞌ noꞌox laj stacun talel yuꞌun ti jchol ti lequil achꞌ cꞌope. Hech yuꞌun jamal laj jcholboxuc scꞌopilal ti Cristoe cꞌalal te niꞌechꞌ ti atojolique. Hoꞌoni mu yuꞌunuc hech nicꞌopoj hech chaj cꞌu cheꞌel ti muchꞌu pꞌij scuyoj sbae. Ti hechuc nicꞌopoje hech chaj cꞌu cheꞌel ti muchꞌu pꞌij scuyoj sbae, jaꞌ mu tsotsuc scꞌopilal icꞌot ti avoꞌntonic ti icham ti cruz avuꞌunic ti Cristoe.
\s Jaꞌ scꞌopilal ti jnaꞌojtic xa ti laj xa scoltaucutic ti Diose yuꞌun ti laj xa jchꞌuntic ti icham cuꞌuntic ti cruz ti Cristoe
\p
\v 18 Yuꞌun scotol ti muchꞌutic chꞌayel chbatique mu xchꞌunic ti xuꞌ chijyacꞌbucutic jcuxlejaltic ti Cajvaltique ti jaꞌ icham cuꞌuntic ti cruze. Yuꞌun ti cꞌalal chcalbe scꞌopilal ti Cristoe ti icham ti cruz cuꞌuntique, “hovil ti hech chachꞌune”, xiyutun. Pero ti hoꞌucutique ti jcꞌopilaltic ti chijcolucutic sbatel osile, laj xa jnaꞌtic ti yuꞌun laj xa jchꞌuntic ti icham ti cruz cuꞌuntic ti Cajvaltique hech yuꞌun laj xa yacꞌbucutic achꞌ jcuxlejaltic sventa sbatel osil ti Diose.
\v 19 Yuꞌun hech tsꞌibabil comel ti scꞌop ti Diose:
\q Chcacꞌ ti qꞌuelel ti hovil ti pꞌij tscuy sbaic ti xuꞌ tscolta sbaique.
\q Yuꞌun mu xcꞌot ti pasel ti hech chaj cꞌu cheꞌel tsnopic ti muchꞌutic xuꞌ yuꞌun tscolta sbaique tscuyique,
\m ti xchie.
\p
\v 20 Hovil ti chchꞌunic hech ti chcolic yuꞌun ti ipꞌijubic xa liꞌ ti balumile. Hovil ti chchꞌunic hech ti chcolic yuꞌun lec snaꞌ chchanubtasvan ti smantal ti Diose tscuyique. Hovil ti chchꞌunic hech ti chcolic yuꞌun lec snaꞌ chal ti cꞌusi tscꞌan ti jpastic liꞌ ti balumile tscuyique. Ti Diose laj xa yacꞌ ti qꞌuelel ti hovil chchꞌunic ti xuꞌ tscolta sbaique ti muchꞌu pꞌij liꞌ ti balumile tscuy sbaique.
\v 21 Yuꞌun laj snaꞌ ti Diose ti mu xuꞌ cuꞌuntic ti jcolta jbatic ti sventa spꞌijil coꞌntontic, hech yuꞌun laj xchapan ti chijcolucutic mi laj jchꞌuntic ti jaꞌ jqꞌuexoltic icham cuꞌuntic ti cruz ti Cristoe. Hech ti jchol manchuc mi “hovil ti hech chachꞌune”, manchuc mi xiyutun.
\p
\v 22 “Hovil ti hech chachꞌune”, xiyutun ti jchiꞌiltique, hoꞌucutic ti coꞌol judioucutic xchiꞌuque, yuꞌun ti stuquique jaꞌ noꞌox laj scꞌanic mi ch-acꞌbatic tsqꞌuelic jchop o abtel yuꞌun ti Jesuse. Jaꞌto chchꞌunic tscuyic. Jaꞌ noꞌox hech uc ti achiꞌiltaque, “hovil ti hech chachꞌune”, xiyutun uc, hoꞌoxuc ti coꞌol yanlum crixchanooxuc xchiꞌuque, yuꞌun muꞌyuc stu yuꞌunic yuꞌun mu xijpꞌijub yuꞌun tscuyic.
\v 23 Hech yuꞌun cꞌalal ti jcholbe scꞌopilal ti Cristoe ti yuꞌun hech imilat ti cruz hech chijcolucutique, más chbolib yoꞌntonic yuꞌun ti jchiꞌiltique hoꞌucutic ti coꞌol judioucutic xchiꞌuque. Jaꞌ noꞌox hech uc ti achiꞌiltaque, hoꞌoxuc ti coꞌol yanlum crixchanooxuc xchiꞌuque, hovijolun chiscuyucun.
\v 24 Manchuc mi hech yoꞌntonic, ti hoꞌucutique ti laj xa yicꞌucutic ti stojol ti Diose, mi judioucutic o mi yanlum crixchanoucutic, jnaꞌojtic xa ti laj xa scoltaucutic ti Diose yuꞌun ti laj xa jchꞌuntic ti icham cuꞌuntic ti cruz ti Cristoe. Jnaꞌojtic xa ti hech xchapanoj ti Diose ti chijcolucutic yuꞌune.
\v 25 Ti muchꞌutic tscuyic ti hovil ti hech xchapanoj ti Diose yuꞌun tscuyic ti pꞌij stuquic. Muc un chilic ti mu xuꞌ tscolta sbaic stuquique. Ti icham ti cruz ti Cristoe muꞌyuc yip tscuyic. Pero mu xilic ti muꞌyuc yip stuquic ti mu xuꞌ tscolta sbaique.
\v 26 Quermanotac, naꞌic ti cꞌalal laj yicꞌoxuc ti stojol ti Diose, mu epucoxuc pꞌij avoꞌntonic ti stojol crixchanoetic. Mu epucoxuc tsots avabtelic. Mu epucoxuc ti hoꞌoxuc yol snichꞌonoxuc ti muchꞌutic yichꞌojic tsots yabtelique.
\v 27 Yuꞌun ti Diose jaꞌ hoꞌoxuc laj yicꞌoxuc ti muꞌyuc atuic ti stojol ti crixchanoetique yuꞌun hech ch-acꞌatic ti qꞌuexlal scotol ti muchꞌutic pꞌij scuyoj sbaique. Yuꞌun jaꞌ bol chcꞌotic ti stojol ti Diose yuꞌun chchꞌunic ti xuꞌ tscolta sbaique. Hoꞌoxuc ti muꞌyuc avipic ti stojol ti crixchanoetique, hoꞌoxuc laj yicꞌoxuc yuꞌun hech ch-acꞌatic ti qꞌuexlal scotol ti muchꞌutic oy yip scuyoj sbaique. Yuꞌun jaꞌ muꞌyuc xa yip chcꞌotic o yuꞌun mu xcolic.
\v 28 Hoꞌoxuc ti muꞌyuc atuic ti stojol ti crixchanoetique ti mu pasbilucoxuc ti muqꞌue, ti muꞌyuc acꞌopilal ti yoꞌntonic ti crixchanoetique, jaꞌ laj xa stꞌujoxuc ti Diose yuꞌun hech ch-acꞌat ti qꞌuelel ti muꞌyuc stu ti yabtele ti muchꞌutic tsots yabtel liꞌ ti balumile scuyoj sbaique.
\v 29 Yuꞌun hech mi junuc muꞌyuc muchꞌu xuꞌ tstoy sba ti stojol ti Diose.
\v 30 Yuꞌun hech laj scꞌan ti Diose ti hech chacuxiic sbatel osil ti sventa ti Cristo Jesuse. Ti sventa ti Cristoe ti yacꞌojbucutic spꞌijil coꞌntontic ti Diose. Jaꞌ ti sventa uc ti toj coꞌntontic chijyilucutic ti Diose. Jaꞌ ti sventa uc ti yacꞌoj sba chlecub ti coꞌntontique. Jaꞌ ti sventa uc ti nijcolucutic loqꞌuel ti scꞌob ti pucuje.
\v 31 Hech yuꞌun acꞌo cꞌotuc ti pasel avuꞌunic ti cꞌu cheꞌel tsꞌibabile: “Ti jayvoꞌoxuc ti toyol avoꞌntonique jaꞌuc noꞌox me toyol avoꞌntonic ti stojol ti Cajvaltique”, xchi ti scꞌop ti Diose.
\c 2
\s Jaꞌ scꞌopilal ti Pabloe ti cꞌu cheꞌel laj xchol ti scꞌop ti Diose
\p
\v 1 Hech yuꞌun, quermanotac, ti hoꞌone cꞌalal a jcholboxuc scꞌopilal ti Diose, mu yuꞌunuc jaꞌ laj jtoy jba xchiꞌuc ti spꞌijil coꞌntone xchiꞌuc ti jcꞌope. Jaꞌ noꞌox laj cacꞌ ti pasel ti mucꞌ ti Diose.
\v 2 Yuꞌun jaꞌ noꞌox hech jnopoj ti coꞌnton ti jaꞌ noꞌox chacalboxuc scꞌopilal ti Jesucristo, jaꞌ ti tal chamuc ti cruz ti jventatique.
\v 3 Cꞌalal te jchiꞌinojoxuque, mu xuꞌ cuꞌun laj caꞌi. Nixiꞌ mi mu lecuc ti cꞌu cheꞌel chcalbe scꞌopilal ti Cristoe.
\v 4 Cꞌalal laj jcholboxuc ti scꞌop ti Diose, muc xajmonoxuc hech chaj cꞌu cheꞌel chmonvanic ti muchꞌutic pꞌij yoꞌntonic scuyoj sbaique. Hoꞌoni jaꞌ noꞌox ti sventa ti Chꞌul Espíritue xchiꞌuc ti sventa yip ti Diose ti jamal laj jcholboxuc ti scꞌop ti Diose.
\v 5 Hech yuꞌun maꞌuc ti sventa spꞌijil yoꞌntonic crixchanoetic ti oy xchꞌunojel avoꞌntonique. Jaꞌ ti sventa spꞌijil ti Diose ti oy xchꞌunojel avoꞌntonique.
\s Jaꞌ scꞌopilal ti cꞌusi lec chacꞌ ti naꞌel ti Chꞌul Espíritue
\p
\v 6 Oy chcaltutic ti bu vocol ti aꞌibel sjame. Jaꞌ noꞌox xuꞌ chaꞌibe sjam ti muchꞌutic ventaimbil yoꞌntonic yuꞌun ti Chꞌul Espíritue. Yuꞌun ti cꞌop ti chcaltutique maꞌuc hech chaj cꞌu cheꞌel scꞌop ti muchꞌutic pꞌij scuyoj sbaique liꞌ ti balumile. Maꞌuc hech chaj cꞌu cheꞌel scꞌop ajvaliletic liꞌ ti balumile. Lume chlaj scꞌopilal.
\v 7 Ti cꞌop ti chcaltutique jaꞌ ti cꞌu cheꞌel snopoj ti Diose ti mi jutuc muꞌyuc muchꞌu laj snaꞌic ti voꞌone. Ti ora to laj xa yalbuntutic ti Diose. Jaꞌ ti oy ti yoꞌnton ti Diose cꞌalal mu to chmeltsaj ti balumile. Jaꞌ ti jun noꞌox yutsil chijcꞌotucutic hoꞌucutic ti jchꞌunojtic ti jaꞌ Jcoltavanej cuꞌuntic ti Jesuse.
\v 8 Ti ajvaliletic liꞌ ti balumile mi junuc muc snaꞌic. Yuꞌun ti lajuc snaꞌique, muc smilic ti cruz ti Cajvaltique, jaꞌ ti jelaven spꞌijile.
\v 9 Yuꞌun hech onoꞌox chal ti scꞌop ti Diose ti
\q mi junuc muꞌyuc muchꞌu sqꞌueloj,
\q muꞌyuc muchꞌu yaꞌyoj,
\q mu xuꞌ snop ti crixchanoetique ti cꞌu cheꞌel chapajem cuꞌun ti sventaic muchꞌutic cꞌuxun ti yoꞌntonique,
\m ti xchi ti Diose.
\v 10 Ti ora to ti Diose laj xa yacꞌbun jnaꞌtutic ti hoꞌontutique. Jaꞌ ti sventa ti Chꞌul Espíritu yuꞌune ti laj xa jnaꞌtutic scotol ti cꞌu cheꞌel xchapanoj ti Diose. Yuꞌun ti Chꞌul Espíritue scotol snaꞌoj. Jaꞌ snaꞌojbe cꞌu xꞌelan yoꞌnton ti Diose.
\p
\v 11 Mi junuc mu snaꞌbe sbaic cꞌu xꞌelan yoꞌntonic jujun. Jaꞌ noꞌox snaꞌ cꞌu xꞌelan yoꞌnton stuc. Jaꞌ noꞌox hech uc muꞌyuc muchꞌu snaꞌbe yoꞌnton ti Diose. Jaꞌ noꞌox snaꞌ stuc ti Chꞌul Espíritu yuꞌun ti Diose.
\v 12 Mu yuꞌunuc liꞌ liquem liꞌ ti balumile ti Chꞌul Espíritue ti quichꞌojtique. Jaꞌ talem ti vinajel. Jaꞌ yacꞌojbucutic ti Diose. Jaꞌ chijyacꞌbucutic jnaꞌtic ti Chꞌul Espíritue ti cꞌu yepal bendición yacꞌojbucutic ti Diose.
\v 13 Ti cꞌu yepal chiyalbuntutic ti Chꞌul Espíritue jaꞌ noꞌox hech chcaltutic. Muc un jtuctutic ti jnoptutic ti cꞌu cheꞌel chcaltutique. Jaꞌ chiyacꞌbun jnaꞌtutic ti Chꞌul Espíritue. Yuꞌun yichꞌojic ti Chꞌul Espíritue ti muchꞌutic chcalbetutique hech yuꞌun chaꞌibeic sjam uc.
\p
\v 14 Ti muchꞌutic mu yichꞌojuc ti Chꞌul Espíritue mu spas ti mucꞌ ti scꞌop ti Diose ti hech chcalbetutic ti sventa ti Chꞌul Espíritue. Chchꞌunic ti hovil cꞌop noꞌox. Jaꞌto mi chcoltaat ti snopel yuꞌun ti Chꞌul Espíritue, jaꞌto xuꞌ chaꞌibeic sjam.
\v 15 Jaꞌuc ti muchꞌutic yichꞌojic ti Chꞌul Espíritue snaꞌ stꞌujic ti bu leque. Mu xchꞌunic scotol. Hech mu xnaꞌbat cꞌu xꞌelan yoꞌntonic yuꞌun ti crixchanoetique.
\v 16 Yuꞌun hech onoꞌox chal ti scꞌop ti Diose ti “mi junuc muꞌyuc muchꞌu coꞌol spꞌijil xchiꞌuc ti Cajvaltique liꞌ ti balumile, hech yuꞌun muꞌyuc muchꞌu xuꞌ snaꞌbe yoꞌnton ti Cajvaltique, muꞌyuc muchꞌu xuꞌ chchanubtasat”, ti xchie. Jaꞌuc ti hoꞌucutique yuꞌun coꞌol coꞌntontic xchiꞌuc ti Cristoe hech yuꞌun ti jnaꞌbetic yoꞌnton.
\c 3
\s Jaꞌ scꞌopilal ti chchiꞌin sbaic ti abtel xchiꞌuc ti Diose ti muchꞌutic chcholbatic ti scꞌop yuꞌune
\p
\v 1 Hech yuꞌun, quermanotac, cꞌalal te jchiꞌinojoxuc, muc xajcholboxuc ti scꞌop Diose hech chaj cꞌu cheꞌel ti muchꞌutic ti ventaimbilic xa yoꞌntonic yuꞌun ti Chꞌul Espíritue. Yuꞌun laj quil ti ta to xasventainoxuc ti abecꞌtalique. Ololoxuc to ti stojol ti Cristoe laj quil yuꞌun mu xacꞌan chavacꞌbe sventain avoꞌntonic ti Chꞌul Espíritue.
\v 2 Hech chaj cꞌu cheꞌel biqꞌuit olol ti mu to xuꞌ yuꞌun stiꞌ ti tiꞌbole, puru chuꞌil noꞌox tscꞌan, jaꞌ hech laj jcholboxuc ti scꞌop ti Diose hech chaj cꞌu cheꞌel ti jcholbe ti muchꞌutic mu to xchꞌun, ti jaꞌ noꞌox xchꞌunojbe smantal ti sbecꞌtalique, yuꞌun laj quil ti ventaimbiloxuc to yuꞌun ti abecꞌtalique. Asta ora yileloxuc noꞌox.
\v 3 Yuꞌun ventaimbiloxuc to yuꞌun ti abecꞌtalique, hech yuꞌun ti ta to xbicꞌtaj avoꞌntonic, ta to xavut abaic, mu jtosuc avoꞌntonic. Ti hech chapasique, ¿mi mu yuꞌunuc sventainojoxuc to ti abecꞌtalique? ¿Mi maꞌuc coꞌol chapasic hech chaj cꞌu cheꞌel ti muchꞌutic mu xchꞌunojbuc scꞌop ti Diose?
\v 4 Yuꞌun ti hech chavalic: “Hoꞌoni lec chquil ti Pabloe”, xachiic, “hoꞌoni lec chquil ti Apolose”, xachiic, hech yuꞌun ¿mi mu coꞌoluc chapasic hech chaj cꞌu cheꞌel ti muchꞌutic mu xchꞌunojbuc scꞌop ti Diose?
\p
\v 5 ¿Cꞌu yuꞌun ti chapasucuntutic ti mucꞌ ti hoꞌone xchiꞌuc ti Apolose yuꞌun yabatuntutic noꞌox ti Diose? Jaꞌ noꞌox laj jchꞌuntutic ti cꞌu cheꞌel laj spasun ti mantal ti Cajvaltique ti jujununtutique hech laj jcholboxuc ti scꞌop ti Diose, hech lic achꞌunic.
\v 6 Hoꞌoni laj jtsꞌun comel ti scꞌop Dios ti avoꞌntonic. Ti Apolose laj smalta. Jaꞌ ti Diose laj yacꞌ chꞌiuc.
\v 7 Hech yuꞌun mu tsotsuc cabtel ti hoꞌon laj jtsꞌune, mu tsotsuc yabtel ti Apolose ti jaꞌ laj smaltae. Jaꞌ tsots yabtel ti Diose ti jaꞌ laj yacꞌ chꞌiuque.
\v 8 Coꞌolic noꞌox ti muchꞌu tstsꞌune, xchiꞌuc ti muchꞌu tsmaltae. Coꞌol abatetic. Mi lec chil ti Diose ti cꞌu cheꞌel niꞌabtejtutique, jaꞌ chquichꞌtutic jmotontutic.
\v 9 Yuꞌun ti jchiꞌin jbatutic ti abtel xchiꞌuc ti Diose.
\p Ti hoꞌoxuque sverta Dios ti avoꞌntonique, maꞌuc jvertatutic. Ti hoꞌoxuque jaꞌ sna Dios ti avoꞌntonique. Mu hoꞌucun te chinaquitutic ti avoꞌntonic.
\v 10 Yutsil yoꞌnton laj yacꞌbun cabtel ti Diose hech chaj cꞌu cheꞌel jpasna ti laj yacꞌbe cemento ti nae, yan ti muchꞌu tal svaꞌane. Ti jujununtutique jaꞌ tsots scꞌopilal ti jnoptutic lec cꞌu cheꞌel tscꞌan ti más lec chcꞌot ti nae.
\v 11 Ti cementoe jaꞌ ti scꞌopilal ti Jesucristoe ti icham cuꞌuntic ti cruze ti laj xa achꞌunique. Jaꞌ tsots scꞌopilal lume. Muꞌyuc yan.
\v 12 Jaꞌ ti cꞌutic chcacꞌbetutic ti sba ti cementoe, mi jaꞌ chcacꞌbetutic ti cꞌutic tsotse hech chaj cꞌu cheꞌel cꞌanal taqꞌuin, saquil taqꞌuin, ton ti bu toyol stojole, o mi ti jcaptutic xchiꞌuc ti cꞌutic mu tsotsuque chcacꞌbetutic teꞌ o mi chcacꞌbetutic jobel o mi chcacꞌbetutic cꞌajben,
\v 13 patil chacꞌ ti qꞌuelel ti Diose ti cꞌu xꞌelan ti cabteltutique ti jujununtutique ti laj jpastutique. Cꞌalal tsta yorail, ch-acꞌat ti naꞌel cꞌu xꞌelan cabteltutic jujununtutic. Jaꞌ ch-acꞌat ti qꞌuelel ti cꞌocꞌ, mi chcuch yuꞌun ti cꞌoqꞌue, mi mu xcuch yuꞌun ti cꞌoqꞌue.
\v 14 Ti muchꞌu mu xlaj ti cꞌocꞌ ti yabtele, yuꞌun jaꞌ itun yuꞌun ti bu tsotse ti cꞌalal laj smeltsan ti nae, jaꞌ ch-acꞌbat smoton.
\v 15 Ti muchꞌu chlaj ti cꞌocꞌ ti yabtele yuꞌun jaꞌ itun yuꞌun ti bu mu tsotsuque, hech yuꞌun meꞌon. Jaꞌ mu xꞌacꞌbat smoton. Jaꞌ noꞌox chcol hech chaj cꞌu cheꞌel ti muchꞌu chcol loqꞌuel ti cꞌoqꞌue.
\p
\v 16 Chanaꞌic ti stemplooxuc ti Diose acotolic yuꞌun jaꞌ snainoj avoꞌntonic ti Chꞌul Espíritue.
\v 17 Mi oy muchꞌu tsbolibtas avoꞌntonique ti jaꞌ stemplo ti Diose, patil chlic acꞌbatuc castigo yuꞌun ti Diose yuꞌun lec ti stemplo ti Diose. Jaꞌ me avoꞌntonic obi.
\p
\v 18 Mu me xaloꞌla abaic. Hoꞌoxuque mi oy acuyoj abaic ti pꞌijoxuc ti sventa avi balumil to, jaꞌ lec ti biqꞌuit chavacꞌ aba yuꞌun hech chapꞌijubic.
\v 19 Yuꞌun ti hech oy spꞌijil yoꞌntonic ti crixchanoetic liꞌ ti balumile ti scuyoj sbaique, jaꞌ sbolil yoꞌntonic cꞌotem ti stojol ti Diose. Yuꞌun hech onoꞌox chal ti scꞌop ti Diose: “Ti muchꞌu pꞌij scuyoj sbae, cꞌalal yacꞌoj sba tsnopilan cꞌu cheꞌel tscolta sbae, jaꞌto xaꞌi chcham xa, chꞌayel ibat”, ti xchie.
\v 20 Hech tsꞌibabil uc ti scꞌop ti Diose: “Ti Cajvaltique snaꞌ ti hovil noꞌox ti hech chaj cꞌu cheꞌel tsnopilan ti yoꞌntonique ti muchꞌutic pꞌij scuyoj sbaique”, ti xchie.
\v 21 Hech yuꞌun mu me xatoy abaic yuꞌun ti muchꞌu lec chavile.
\v 22 Yuꞌun oy stu avuꞌunic scotol. Mi hoꞌon mi Apolos mi Pedro oy jtututic jcotoltutic avuꞌunic. Jaꞌ noꞌox hech ti cꞌutic oy liꞌ ti balumile oy stu avuꞌunic. Jaꞌ noꞌox hech uc ti jayib cꞌacꞌal cuxuloxuc liꞌ ti balumile oy stu avuꞌunic. Jaꞌ noꞌox hech uc cꞌalal nacham chtun avuꞌunic yuꞌun chabat ti vinajel. Ti cꞌutic avichꞌojic xae xchiꞌuc ti cꞌutic ta to xavichꞌique, jaꞌ chtun avuꞌunic. Scotol chtun avuꞌunic.
\v 23 Ti hoꞌoxuque chatunic yuꞌun ti Cristoe. Ti Cristoe jaꞌ chtun yuꞌun ti Diose.
\c 4
\s Jaꞌ scꞌopilal cuybiluntutic ti bol yuꞌun ti jcholbetutic scꞌopilal ti Cristoe, xchi
\p
\v 1 Jaꞌ tscꞌan ti chanaꞌic ti jcotoltutique coꞌol yabatuntutic ti Cristoe. Hoꞌontutic yuꞌun jcholcꞌopuntutic oy ti jventatutic xcholel ti bu yacꞌoj sba chiyacꞌbun jnaꞌtutic ti Diose ti muc snaꞌic ti crixchanoetique ti voꞌonee.
\v 2 Ti muchꞌutic sventainojbe yabtel ti Diose, jaꞌ tscꞌan ti jun yoꞌnton ch-abteje.
\v 3 Ti hoꞌone muꞌyuc scꞌopilal mi lec jcꞌopilal avuꞌunic mi mu lecuc jcꞌopilal avuꞌunic ti cꞌu cheꞌel ti jpasbe yabtel ti Cajvaltique. Jaꞌ noꞌox hech uc muꞌyuc scꞌopilal mi lec jcꞌopilal mi mu lecuc jcꞌopilal yuꞌun ti muchꞌutic chchapanvanic liꞌ ti balumile. Mu xuꞌ chcal ti hoꞌone mi lec mi mu lecuc ti laj jpase.
\v 4 Yuꞌun manchuc mi chcal ti lec niꞌabteje, mu jnaꞌ mi laj xa jchꞌun scotol ti cꞌu cheꞌel laj yalbun ti Cajvaltique. Jaꞌ stuc chal ti Cajvaltique mi lec mi mu lecuc ti chiꞌabteje.
\v 5 Hech yuꞌun mu me chopoluc chanopic. Cꞌalal mi ista yorail chtal ti Cajvaltique, jaꞌ chtal yacꞌ ti qꞌuelel ti bu mu xcaꞌibetic sjam ti ora to xchiꞌuc ti cꞌusi oy ti coꞌntontic ti jcotoltique. Cꞌalal chtal, chacꞌ ti naꞌel ti cꞌu cheꞌel oy jcꞌopilaltic yuꞌun ti Diose ti jujunucutique.
\p
\v 6 Quermanotac, yuꞌun ti laj xa calboxuc jcꞌopilaltutic hoꞌon xchiꞌuc ti Apolose, maꞌuc noꞌox ti chaꞌvoꞌuntutique. Jaꞌ jcꞌopilaltutic jcotoltutic ti jaꞌ noꞌox yabatuntutic ti Cristoe, ti hoꞌontutic ti jchanubtasvanejuntutic ti scꞌop ti Diose. Hech yuꞌun mu me xatꞌujuntutic yuꞌun hech chapasucun ti mucꞌ ti jujununtutique. Yuꞌun jaꞌ noꞌox chatoy abaic yuꞌun ti hech chapasique.
\v 7 ¿Cꞌu yuꞌun ti hoꞌoxuc pꞌijoxuc chacuy abaic? Dios ti yacꞌojboxuc scotol ti cꞌusi avichꞌoje. Yuꞌun hech acꞌbiloxuque, mu xtun mi chatoy abaic yuꞌun. Yuꞌun mi chatoy aba, jun to atuc ataoj xꞌelan.
\p
\v 8 Muꞌyuc xa cꞌusi scꞌan to avuꞌunic chacuyic. Ataojic xa scotol chacuyic. Ochemoxuc xa ti pasmantal chacuy abaic. Hech yuꞌun mu xa xacꞌanuntutic chacuyic. Jaꞌ lec ti meleluc ti ochemucoxuc xa ti pasmantale hech xuꞌ coꞌol ti jpastic mantal ti hechuque.
\v 9 Ti hoꞌone hech ti jnop ti hech snopoj ti Diose ti chiyacꞌbun quichꞌtutic vocol hoꞌontutic ti jcholcꞌopuntutic yuꞌune, hech chaj cꞌu cheꞌel ti muchꞌutic muꞌyuc stu ch-ilat yuꞌun ti crixchanoetique hech chtenat ochel ti bu jtiꞌvanej bolom yuꞌun acꞌo tiꞌatuc. Jaꞌ noꞌox hechun uc ti hoꞌontutique chiyacꞌbuntutic ti qꞌuelel ti Diose ti stojol scotol crixchanoetic xchiꞌuc ti stojol chꞌul abatetic yuꞌun acꞌo xisqꞌueluntutic ti cꞌu cheꞌel chcuch cuꞌuntutic ti vocole.
\v 10 Ti hoꞌontutique yuꞌun ti jcholbetutic scꞌopilal ti Cristoe cuybiluntutic ti bol. Jaꞌuc ti hoꞌoxuque yuꞌun achꞌunojbeic xa scꞌop ti Cristoe, lec pꞌijoxuc xa chacuy abaic. Ti hoꞌontutique cuybiluntutic ti muꞌyuc quiptutique. Ti hoꞌoxuque tsots avipic chacuy abaic. Hoꞌoxuque pasbiloxuc ti mucꞌ yuꞌun ti crixchanoetique. Hoꞌontutique mu pasbilucuntutic ti mucꞌ yuꞌun.
\v 11 Ti hoꞌontutique oy chitsaquitutic ti viꞌnal, oy chtaquij coꞌntontutic. Oy bu mu jtatutic jcꞌuꞌtutic lec. Oy chquichꞌtutic majel. Scotol cꞌacꞌal chixanavtutic batel muꞌyuc bu chinaquitutic.
\v 12 Maꞌuc noꞌox ti jcholtutic ti scꞌop Diose, jaꞌ chiꞌabtejtutic uc. Ti jcꞌobtutic ti jsaꞌ jveꞌeltutic. Ti muchꞌutic chislabanuntutic chiyalbuntutic bolcꞌop, ti jcꞌambetutic bendición ti stojolic. Ti jtsꞌictutic ilbajinel.
\v 13 Ti muchꞌutic chopol chiyalbun jcꞌopilaltutic, lec ti jcꞌopontutic. Muꞌyuc jtututic cꞌotemuntutic hech chaj cꞌu cheꞌel ti cꞌaꞌepe chiyiluntutic ti crixchanoetique.
\p
\v 14 Mu yuꞌunuc chacacꞌ ti qꞌuexlal yuꞌun ti hech laj jtsꞌibaboxuque. Jaꞌ noꞌox yuꞌun chajtaqꞌuioxuc, hoꞌoxuc col jnichꞌonoxuc ti cꞌuxoxuc ti coꞌntone.
\v 15 Manchuc mi ep ti muchꞌu chaxchanubtasoxuc ti scꞌop ti Cristoe, mu epuc atot. Hoꞌon jnichꞌonoxuc ti sventa ti Cristo Jesuse yuꞌun hoꞌon primero laj jcholboxuc ti lequil achꞌ cꞌope.
\v 16 Hech yuꞌun chacalbeic vocol ti jaꞌ lec chachambucun coꞌnton.
\p
\v 17 Jaꞌ yuꞌun ti laj jnop ti jtac talel ti atojolic ti Timoteoe yuꞌun jaꞌ chaxcholboxuc avaꞌyic cꞌu xꞌelan ti coꞌntone ti stojol ti Cristoe hech chaj cꞌu cheꞌel chcacꞌbe xchan jchꞌunojeletic buc noꞌox oyic. Jaꞌ jnichꞌon uc ti Timoteoe. Ti sventa ti hoꞌon laj jcholbe scꞌop ti Cristoe, hech yuꞌun ti hech jnichꞌon icꞌot. Hech yuꞌun cꞌux ti coꞌnton. Jun yoꞌnton ti stojol ti Cajvaltique.
\v 18 Oy quermanotic te oy jaꞌ tstoy sbaic yuꞌun tscuyic ti mu jcꞌan chtal jqꞌueloxuc.
\v 19 Poꞌot xa chital mi hech tscꞌan ti Cajvaltique. Jaꞌ chtal jqꞌuel mi toj ti cꞌusi tspasique ti muchꞌutic tstoy sbaique, maꞌuc noꞌox chcaꞌibe scꞌopic.
\v 20 Yuꞌun jaꞌ chvinaj ti cabteltic mi jchꞌunojbetic scꞌop ti Cajvaltique ti mero melel mi mu jchꞌunojticuc.
\v 21 Cꞌalal chtal jqꞌueloxuc, ¿mi chacꞌan chacacꞌboxuc acial, mi chacꞌan chajcꞌuxubinoxuc? ¿Mi chacꞌan ti lamajem xa coꞌnton cꞌalal chihul te ti atojolique? ¿Cꞌusi chacꞌanic cheꞌe?
\c 5
\s Jaꞌ scꞌopilal ti ichapanat ti muchꞌu imulave
\p
\v 1 Oy acꞌopilalic yuꞌun chamulivajic. Jchop o ti cꞌusi chapasique. Mu snaꞌ spasic hech ti muchꞌutic mu snaꞌic bu oy ti Diose. Yuꞌun mu xicꞌbeic yajnil ti stotique. Jaꞌuque oy muchꞌu laj yicꞌbe yajnil ti stote te ti atojolic.
\v 2 Hovil ti lec chacuy abaique. Jaꞌ tscꞌan ti chavichꞌic mul yuꞌun. ¿Cꞌu yuꞌun mu xatenic loqꞌuel ti atojolic ti muchꞌu hech spasoje?
\v 3-4 Ti hoꞌone manchuc mi mu te jchiꞌinojoxuc ti jbecꞌtal, te jchiꞌinojoxuc ti coꞌnton. Yuꞌun te jchiꞌinojoxuc yaꞌyel, laj xa jchapan ti sventa ti Cajvaltic Jesucristoe ti muchꞌu hech spasoje. Cꞌalal laj xa atsob abaic yuꞌun chachapanic avi to, te jchiꞌinojoxuc ti coꞌnton.
\v 5 Yuꞌun hech smantal ti Cajvaltic Jesucristoe chcacꞌtic ti scꞌob Satanás ti muchꞌu hech spasoje yuꞌun acꞌo jinuc ti yoꞌntone. Hech ta to xcol xchꞌulel cꞌalal chtal ti Cajvaltic Jesuse.
\p
\v 6 Hovil ti hech chatoy abaique, oy palta avuꞌunic. Avaꞌyojic ti hech chalic ti crixchanoetique ti “manchuc mi jutuc noꞌox chichꞌ spumesbil xchꞌut ti vaje jaꞌ chpum scotol”, ti xchiique. Jaꞌ noꞌox hech mi ti jcꞌuxubintic ti jun ti muchꞌu staoj smule, patil chlic epajuc.
\v 7 Nopic me cꞌu cheꞌel tspasic ti jchiꞌiltique ti yorail qꞌuin Pascua, hoꞌucutic ti coꞌol judioucutic xchiꞌuque. Scotol chchꞌubeic loqꞌuel ti snaic ti caxlan vaje ti pumesbil xchꞌute xchiꞌuc uc scotol ti harina ti tꞌuxubtasbile ti bu capbil xa xchiꞌuc ti spumesbile. Jaꞌ chchꞌubeic loqꞌuel scotol ti cꞌalal mu to chlic ti qꞌuine. Patil chlic smeltsanic achꞌ vaj ti mu pumesbiluc xchꞌute. Cꞌalal tsveꞌic ti vaje ti mu pumesbiluc xchꞌute, cꞌalal tstiꞌic ti carneroe, tsnaꞌic ti colemic xa ti mozoile, ti libre oyic xae. Hech chaj cꞌu cheꞌel laj xchꞌubeic loqꞌuel scotol ti bu poco pasbile, laj spasic achꞌ, jaꞌ noꞌox hech tscꞌan ti chaloqꞌuesic scotol ti mulile hech xuꞌ avuꞌunic chapasic ti cꞌusi leque. Yuꞌun yacꞌojbucutic achꞌ jcuxlejaltic ti Cristoe ti sventa ti laj yacꞌ sba ti milel cuꞌuntique, hech yuꞌun xuꞌ cuꞌuntic ti chcom cuꞌuntic ti mulile.
\v 8 Hech yuꞌun nichimuc me coꞌntontic acꞌo jnaꞌtic ti nijcol xa loqꞌuel ti mozoil yuꞌun ti mulile. Mu me xlic jchaꞌpastic yan vuelta ti cꞌutic chopole. Puru lec acꞌo jnopilantic, puru lec acꞌo jpasilantic.
\p
\v 9 Laj jtsꞌibaboxuc ti carta ti “mu me xachiꞌinic ti muchꞌutic mu xtun yoꞌntonique”, xacut.
\v 10 Mu yuꞌunuc mu xuꞌ chacꞌoponic ti muchꞌutic mu xtun ti yoꞌntonique xchiꞌuc ti muchꞌutic chloꞌlavanique xchiꞌuc ti muchꞌutic ch-elcꞌajique xchiꞌuc ti muchꞌutic xchꞌunojic ti santoetique. Ti taca mu xuꞌ chacꞌoponique, persa chaloqꞌuic batel ti balumil avi liꞌto.
\v 11 Jaꞌ hech sjam ti cꞌu cheꞌel laj jtsꞌibaboxuque ti mu me xacꞌalanilan abaic ti stojol ti muchꞌutic quermanotic scuyoj sbaique ti chmulivajique, ti muchꞌutic ep chbicꞌtaj yoꞌntonique, ti xchꞌunojic to ti santoetique, ti chopol ti cꞌusi chalique, ti chyacubique, ti ch-elcꞌajique. Mu me xachiꞌin manchuc mi ti veꞌel.
\v 12-13 Jaꞌuc ti muchꞌutic muꞌyuc ti stojol ti Diose mu jventaticuc ti jchapantic lume. Jaꞌ stuc ti Diose jaꞌ ch-ichꞌbat scꞌop yuꞌunic. Jaꞌuc ti cꞌu yepal chtalic ti temploe jaꞌ jventatic ti jchapantic. Hech yuꞌun ti hoꞌoxuque teno loqꞌuel ti muchꞌu boliben yoꞌntone ti te achiꞌinojique.
\c 6
\s Jaꞌ scꞌopilal ti mu lecuc mi chijchapanat ti stojol ti muchꞌutic mu tojuc yoꞌntonique
\p
\v 1 Ti cꞌusi chachapan xchiꞌuc yan quermanotic, ¿mi yuꞌun mu xaqꞌuexavic ti chachapanat ti stojol ti muchꞌutic mu xojtiquinic ti Diose? ¿Mi yuꞌun chacuyic ti mu xuꞌ chachapanat ti stojol ti quermanotique?
\v 2 Chanaꞌic ti hoꞌucutic ti oyucutic ti stojol ti Diose hech jcꞌopilaltic ti jchapambetic scꞌopilal yuꞌun smul scotol yan crixchanoetic. Yuꞌun hoꞌoxuc acꞌopilalic ti chachapambeic scꞌopilal yuꞌun smul scotol yan crixchanoetic, hech yuꞌun xuꞌ avuꞌunic chachapanic ti cꞌusi jutuc noꞌox liꞌ ti balumile.
\v 3 Chanaꞌic uc ti hoꞌucutic hech jcꞌopilaltic ti jchapambetic scꞌopilal ti chꞌul abatetic ti laj sta smulic ti voꞌonee. Yuꞌun hech jcꞌopilaltic, mu vocoluc ti jchapantic ti cꞌutic chcꞌot ti pasel cuꞌuntic liꞌ ti balumile.
\v 4 Hech yuꞌun cꞌalal oy chacꞌan chachapan abaic, ¿cꞌu yuꞌun chavacꞌ yuꞌun chaxchapanot ti juezetique ti chanaꞌic ti mu tojuc chchapanvanique?
\v 5 Hech chacalbeic yuꞌun chacacꞌ qꞌuexavanic. ¿Mi yuꞌun mu pꞌijuc avoꞌntonic mi junuc? ¿Mi yuꞌun muꞌyuc muchꞌu xuꞌ chchapan yermanotac?
\v 6 ¿Mi yuꞌun chacuyic ti lec ti te chba acꞌanic chapanel ti stojol ti muchꞌutic mu xchꞌunojbuc scꞌop ti Diose? ¡Bu ba lecuc!
\p
\v 7 Yuꞌun ti chavacꞌ abaic ti chapanel ti stojol ti juezetique hech chvinaj ti mu to chachꞌunic lec. ¿Cꞌu yuꞌun mu stsꞌic avuꞌun ti cꞌusi chapasbate? ¿Cꞌu yuꞌun mu stsꞌic avuꞌun ti chaloꞌlaate? Mu xtun ti persa chacꞌan chapambele.
\v 8 Yuꞌun ti mu stsꞌic avuꞌune, hech yuꞌun coꞌol oy apaltaic nacꞌotic ti stojol ti Diose. Yuꞌun mu cꞌuxuc chavaꞌi ti avermanoe. Yuꞌun muꞌyuc perdón avuꞌun.
\p
\v 9-10 Naꞌic me ti mu xba xchiꞌinic ti Diose ti muchꞌutic mu tojuc yoꞌntonique. Hech yuꞌun mu me xasloꞌlaoxuc ti avoꞌntonique ti jujunoxuque. Yuꞌun mu xba xchiꞌinic ti Diose ti muchꞌutic mu xtun ti yoꞌntonique, xchiꞌuc ti muchꞌutic chchꞌunic ti santoetique xchiꞌuc ti muchꞌutic oy yantsic oy yajmul ti antsetique, xchiꞌuc ti viniquetic ti chchiꞌin sbaique, ti antsetic ti chchiꞌin sbaique. Xchiꞌuc ti jꞌeleqꞌuetique, xchiꞌuc ti muchꞌutic chbicꞌtaj yoꞌntonique, xchiꞌuc ti jyacubeletique, xchiꞌuc ti muchꞌutic chlabanvanique, xchiꞌuc ti muchꞌutic tsloꞌlaic taqꞌuine.
\v 11 Oy hechoxuc ti voꞌone. Tana pocbiloxuc xa, lecubtasbil xa ti avoꞌntonique, muꞌyuc xa amulic chayiloxuc ti Diose ti sventa ti Cajvaltic Jesucristoe xchiꞌuc ti sventa ti Chꞌul Espíritue.
\s Jaꞌ scꞌopilal acꞌbo sventain ti abecꞌtalique ti Diose, xchi
\p
\v 12 Hech chalic ti crixchanoetique: “Libre oyun, xuꞌ jpas scotol cꞌusi ti jcꞌan ti jpase”, xchiic. Melel ti scotol xuꞌ ti jpastique, pero mu xislecubtasbucutic coꞌntontic scotol. Scotol xuꞌ jpastic, mu jcꞌan chcacꞌ jbatic ti mozoil yuꞌun.
\v 13 Hech chalic uc ti crixchanoetique: “Yuꞌun tscꞌan sveꞌel ti jchꞌutique, hech yuꞌun chcacꞌbetic”, xchiic. Melel ti hech tscꞌane, yuꞌun hech laj spasucutic ti Diose. Pero jaꞌ noꞌox oy stu liꞌ ti balumile ti veꞌelile xchiꞌuc ti jchꞌutique. Mu me jchꞌuntic ti hech chaj cꞌu cheꞌel tscꞌan chcacꞌbetic sveꞌel ti jchꞌutique jaꞌ noꞌox hech tscꞌan chcacꞌbetic spas mulil ti jbecꞌtaltique. Ti Diose mu yuꞌunuc laj yacꞌbucutic ti jbecꞌtaltique yuꞌun hech ti jsaꞌtic jmultic xchiꞌuc. Jaꞌ laj yacꞌbucutic yuꞌun acꞌo tunuc yuꞌun. Jaꞌ stuc laj spas ti jbecꞌtaltique ti Diose.
\v 14 Jaꞌ chixchaꞌcusesbucutic ti jbecꞌtaltique ti Diose hech chaj cꞌu cheꞌel ichaꞌcusesat ti Cajvaltique. Yuꞌun jelaven spꞌijil.
\p
\v 15 Chanaꞌic ti sbecꞌtal Cristo cꞌotemucutic yuꞌun chispasucutic ti mantal. Hech yuꞌun ¡bu ba lecuc mi chba cacꞌbe xchiꞌin jmulavil ants ti sbecꞌtal ti Cristoe!
\v 16 Chanaꞌic ti hech onoꞌox chal ti scꞌop ti Diose: “Ti xchaꞌvaꞌalique jun noꞌox chcꞌotic ti sbecꞌtalique”, xchi ti Diose. Jaꞌ scꞌopilal ti vinique xchiꞌuc ti yajnile. Jaꞌ noꞌox hech uc ti muchꞌu chchiꞌin sbaic xchiꞌuc jmulavil antse jun noꞌox chcꞌotic xchiꞌuc ti sbecꞌtalique.
\v 17 Hech yuꞌun ¡bu ba sjamuc ti chachiꞌin abaic xchiꞌuc ti jmulavil antse yuꞌun jun oyoxuc xa xchiꞌuc ti Cristoe!
\p
\v 18 Jꞌechꞌel comeso mulivajel. Scotol yan muliletic ti jpastique mu xijyuꞌunimbucutic jbecꞌtaltic. Jaꞌuc mi chijmulivaje jaꞌ chijyuꞌunimbucutic jbecꞌtaltic.
\v 19 Naꞌo me ti stemplo Dios cꞌotem ti abecꞌtalique yuꞌun te oy ti avoꞌntonic ti Chꞌul Espíritue. Jaꞌ acꞌbiloxuc yuꞌun ti Diose. Mu avuꞌunuc abaic.
\v 20 Toyol stojol mambiloxuc. Hech yuꞌun acꞌbo sventain ti abecꞌtalique ti Diose.
\c 7
\s Jaꞌ scꞌopilal ti muchꞌutic nupunemique
\p
\v 1 Yuꞌun chajacꞌbucun ti cartae, hech yuꞌun hech chajtacꞌboxuc. Mu persauc chicꞌ sbaic xchiꞌuc ants ti viniquetique. Xuꞌ te vaꞌaluc.
\v 2 Yuꞌun mu vocoluc chijyicꞌucutic ti mulil ti jbecꞌtaltique, jaꞌ lec mi oy yajnil jujun viniquetic, jaꞌ lec uc mi oy smalal jujun antsetic.
\v 3 Ti viniquetique acꞌo xchiꞌin sbaic xchiꞌuc ti yajnile. Hech onoꞌox uc ti antsetique acꞌo xchiꞌin sbaic xchiꞌuc ti smalale.
\v 4 Ti antse mu yuꞌunuc stuc ti sbecꞌtale. Jaꞌ yuꞌun uc ti smalale ti sbecꞌtale. Hech onoꞌox uc ti vinique mu yuꞌunuc stuc ti sbecꞌtale. Jaꞌ yuꞌun uc ti yajnile ti sbecꞌtale.
\v 5 Mu me xapajes abaic. Jaꞌ noꞌox mi coꞌol chanopic achaꞌvaꞌalic xuꞌ chapajes abaic chib oxib cꞌacꞌal yuꞌun chacꞌoponic Dios. Patil ta me xachiꞌin abaic yan vuelta naca me sujoxuc ti mulil ti Satanase yuꞌun ti mu xachiꞌin abaique.
\p
\v 6 Ti hech chcal ti lec mi oy yajnil jujun viniquetique, lec uc mi oy smalal jujun antsetic, mu yuꞌunuc ti jpas mantal. Jaꞌ noꞌox chcacꞌ licensa ti cꞌusi lec chapasique.
\v 7 Hoꞌon chcal ti jaꞌuc lec ti hech chaj cꞌu cheꞌel hoꞌon scotol ti viniquetique. Hoꞌoni muꞌyuc cajnil. Pero mu jcotolticuc chcuch cuꞌuntic. Hech laj spasucutic ti Diose. Yantic ti coꞌntontic jujunucutique.
\p
\v 8 Hech yuꞌun chcalbe ti muchꞌutic muꞌyuc yajnile xchiꞌuc ti muchꞌutic muꞌyuc smalale xchiꞌuc ti meꞌon antsetique, jaꞌ lec mi vaꞌaluc hech chaj cꞌu cheꞌel hoꞌon.
\v 9 Mi mu xuꞌ yuꞌunic ti vaꞌale, acꞌo nupunuc. Jaꞌ lec mi chnupunique. Jaꞌ vocol mi chbolib yoꞌntonic yuꞌun tsnopilanic ti tscꞌan xchiꞌile.
\p
\v 10 Hoꞌoxuc ti avicꞌoj abaique ti coꞌol achꞌunojbeic scꞌop ti Cajvaltique, hoꞌon chajpasoxuc ti mantal. Mu hoꞌucun, jaꞌ ti Cajvaltique. Ti antse mu me sten ti smalale.
\v 11 Mi mu xchꞌun, mi tsten ti smalale, acꞌo vaꞌaluc o mi mu scꞌan xchaꞌicꞌ sbaic xchiꞌuc yan vuelta ti smalale. Ti vinique mu me sutes ti yajnile.
\p
\v 12 Muc xal hech ti Cajvaltique, hoꞌon ti hech chacalboxuc ti ora to. Mi oy quermanotic ti mu xchꞌunojbuc scꞌop ti Diose ti yajnile, mi solel yoꞌnton ti antse yicꞌoj sbaic xchiꞌuc ti smalale, mu me sutes ti yajnile.
\v 13 Mi oy quermanotic ants ti mu xchꞌunojbuc scꞌop ti Diose ti smalale, mi solel yoꞌnton ti vinique yicꞌoj sbaic xchiꞌuc ti yajnile, mu me xtenvan ti quermanotic antse.
\v 14 Ti vinic ti mu xchꞌune, jutuc chichꞌ bendición yuꞌun xchꞌunoj ti yajnile. Hech onoꞌox uc ti ants ti mu xchꞌune, jutuc chichꞌ bendición yuꞌun xchꞌunoj ti smalale. Hech ch-acꞌbat bendición ti yol snichꞌonique. Ti manchuque, mu xꞌacꞌbat bendición ti yol snichꞌone.
\v 15 Mi chcomesvan ti muchꞌu mu xchꞌunojuque, acꞌo batuc. Yuꞌun icꞌbilucutic ti stojol ti Diose, hech yuꞌun mu xtun mi chlic pleito cuꞌuntic. Ti muchꞌu icomesate, mi antsuc mi vinicuc, libre chcꞌot.
\v 16 Mi tscꞌan to ti te avicꞌoj abaic xchiꞌuc, hech yuꞌun naꞌic me repenta ti chcol ti aventaic ti amalalique. Naꞌic me, viniquetic, repenta chcol ti aventaic ti avajnilique.
\p
\v 17 Manchuc mi mu sutes yoꞌnton ti aventaic, te noꞌox comanic hech chaj cꞌu cheꞌel laj staot ti Diose ti jujunoxuque. Yuꞌun hech tscꞌan ti Diose hech chcacꞌ ti chanel ti scotol temploetic.
\v 18 Mi avichꞌoj circuncisión cꞌalal naꞌicꞌat ti stojol ti Diose, avichꞌoj xa obi. Mi mu avichꞌojuc circuncisión ti cꞌalal naꞌicꞌat ti stojol ti Diose, hechuc noꞌox obi, mu me xavichꞌic circuncisión.
\v 19 Mu tsotsuc scꞌopilal mi avichꞌoj circuncisión. Mu tsotsuc scꞌopilal mi mu avichꞌojuc. Jaꞌ tsots scꞌopilal ti lec chayiloxuc ti Diose ti chachꞌunic ti cꞌutic chijyalbucutique.
\v 20 Ti jujunoxuque te noꞌox comanic hech chaj cꞌu cheꞌel laj staoxuc ti Diose.
\v 21 Mi te oyot ti sna ti avajvale cꞌalal laj staot ti Diose, mu me xavichꞌ mul, abtejan yuꞌun. Mi xuꞌ avuꞌun chalocꞌ ti mozoil, lec ti hech chapase.
\v 22 Mi chombilot ti mozoil cꞌalal laj staot ti Cajvaltique, naꞌo me ti laj xa scoltaot loqꞌuel ti mozoil yuꞌun ti mulile ti Cajvaltique. Mi libre oyot cꞌalal laj staot ti Cajvaltique, naꞌo me ti yabatot ti Cristo nacꞌot xa.
\v 23 Toyol stojol laj smanoxuc ti Cajvaltique. Hech yuꞌun jaꞌ tsots scꞌopilal ti chavajvalin ti Cajvaltique. Mu me xavajvalin crixchanoetic.
\v 24 Hech yuꞌun, quermanotac, hech chaj cꞌu cheꞌel laj staot ti Diose, te noꞌox comanic yuꞌun te xchiꞌinojoxuc ti Diose.
\p
\v 25 Tsebetic, queremetic, hech chacalboxuc. Yuꞌun ti hech chacalboxuque, mu yuꞌunuc hech laj yalbun ti Cajvaltique. Yuꞌun quichꞌoj cꞌuxubinel yuꞌun ti Cajvaltique hech yuꞌun jun coꞌnton ti stojol. Hech yuꞌun chacalbe avaꞌyic cꞌu xꞌelan oy ti coꞌnton.
\v 26 Chcal ti jaꞌ lec hech chaj cꞌu cheꞌel ti oyoxuc ti ora to ti jujunoxuque, hech noꞌox me oyucoxuc yuꞌun oy ilbajinel ti ora to.
\v 27 Ti cꞌu avepalic oy avajnilic, mu me xacomesic. Ti cꞌu avepalic muꞌyuc avajnilique, mu me xasaꞌ.
\v 28 Mi mu xcuch avuꞌun ti muꞌyuc avajnile, mi chavicꞌ abaic xchiꞌuc tsebetic, mu yuꞌunuc chata amul. Hech uc mi chanupun, tsebetic, mu yuꞌunuc chata amul. Jaꞌ noꞌox ep chavichꞌic vocol. Ti hoꞌone coꞌnton mu xacacꞌ chavichꞌic vocol.
\p
\v 29 Lec mi chanupunique, quermanotac, pero chacalbeic avi to. Atabil noꞌox cꞌacꞌal liꞌoyucutique. Hech yuꞌun ti cꞌu avepalic ti oy avajnilique, acꞌo muꞌyuc avajnil chavaꞌyic. Hech maꞌuc noꞌox chanopilan ti cꞌusi tscꞌan ti avajnile, jaꞌ chanopilan uc ti cꞌusi tscꞌan yuꞌun chapasbe yabtel ti Diose.
\v 30 Ti cꞌu avepalic ti chavichꞌic mule yuꞌun ti ep avocol liꞌ ti balumile, mu me xaventain. Ti cꞌu avepalic ti nichim avoꞌntonique, mu me muꞌyuc palta chavaꞌyic. Ti cꞌu avepalic ti chamanilajique chachonilajique acꞌo muꞌyuc cꞌusi oy avuꞌunic chavaꞌyic yuꞌun hech mu teuc chbat avoꞌntonic.
\v 31 Ti cꞌu avepalic ti ep ti cꞌusi oy avuꞌunic liꞌ ti balumile, acꞌo muꞌyucuc avuꞌunic chavaꞌyic yuꞌun hech mu xasmozoinoxuc. Yuꞌun chcꞌot yorail ti chlaj scotol ti cꞌutic oy liꞌ ti balumile.
\p
\v 32 Ti jcꞌan muꞌyuc cꞌusi chloꞌlaj avoꞌntonic yuꞌun. Ti muchꞌu muꞌyuc yajnil, libre oy hech xuꞌ tsnopilan ti cꞌusi tscꞌan ti Cajvaltique yuꞌun tspas cꞌusi lec chil ti Cajvaltique.
\v 33 Jaꞌuc ti muchꞌu oy yajnile persa tsnopilan uc ti cꞌu cheꞌel tsta ti cꞌusi chtun yuꞌunique liꞌ ti balumile yuꞌun tscꞌan ti nichim noꞌox yoꞌnton ti yajnile.
\v 34 Hech yuꞌun mu junuc ti cꞌusi tsnope. Jaꞌ noꞌox hech uc ti muchꞌu muꞌyuc smalale xuꞌ tsnopilan ti cꞌusi tscꞌan ti Cajvaltique, cꞌu cheꞌel chacꞌ sba ti abatinel yuꞌun ti Cajvaltique xchiꞌuc sbecꞌtal xchiꞌuc yoꞌnton. Jaꞌuc ti muchꞌu oy smalale jaꞌ tsnopilan ti cꞌusi sventa liꞌ ti balumile yuꞌun tspas cꞌusi lec chil ti smalale.
\p
\v 35 Jaꞌ sventa avutsilalic ti hech chacalboxuque. Mu yuꞌunuc chajpajesoxuc. Jaꞌ noꞌox yuꞌun chacacꞌboxuc anaꞌic cꞌusi lec ti pasel. Hech muꞌyuc cꞌusi xuꞌ chaspajesoxuc. Xuꞌ chavacꞌ abaic ti abatinel yuꞌun ti Cajvaltique.
\p
\v 36 Mi oy muchꞌu ti mu xcuch yuꞌun chaꞌi ti muꞌyuc yajnile mi tsnop ti tsaꞌ yajnile, lec oy. Mu muliluc ti oy yajnile.
\v 37 Ti muchꞌu lec snopoj ti yoꞌnton ti mu persauc oy yajnile, mi solel hech yoꞌnton, lec oy uc ti hech tspase.
\v 38 Hech yuꞌun lec chcꞌot ti muchꞌu chicꞌ yajnile. Ti muchꞌu mu xicꞌ yajnile, jaꞌ más lec chcꞌot.
\p
\v 39 Hech chal ti leye ti muchꞌutic nupunemique persa tsmalalinic ti jayib cꞌacꞌal ti cuxul xchiꞌuc ti smalalique. Jaꞌto mi icham ti smalalique, jaꞌto libre chcꞌotic ti antsetique. Hech yuꞌun mi oy chcham smalalic ti quermanotic antsetique xuꞌ chnupunic yan vuelta. Jaꞌ noꞌox xchiꞌuc ti muchꞌu oy ti stojol ti Cajvaltique.
\v 40 Hoꞌoni chcal ti jaꞌ más lec mi mu xa xnupunic o. Hech yoꞌnton uc ti Chꞌul Espíritue ti chcale.
\c 8
\s Jaꞌ scꞌopilal mu me xba jtiꞌtic ti smoton ti santoetique yuꞌun chbolib yoꞌnton ti quermanotique, xchi
\p
\v 1-3 Yuꞌun ti chacuyic ti mu chopoluc chbat avuꞌunic mi chatiꞌbeic smoton ti santoetique, mu hechuc. Mu xavilic ti jaꞌ xuꞌ chbolib avuꞌunic ti quermanotique ti mu to oyuc yip yoꞌntonique. Hech yuꞌun hovil ti pꞌij chacuy abaique. Yuꞌun ti pꞌij chacuy abaique, jaꞌ mu to pꞌijucoxuc obi. Jaꞌuc mi cꞌux chavaꞌyic ti Diose, cꞌux chavaꞌyic ti quermanotic uque, jaꞌ pꞌijoxuc chayiloxuc ti Diose.
\p
\v 4 “Yuꞌun jchꞌunojtutic ti mu cuxuluc ti santoetique, jnaꞌtutic ti jun noꞌox Dios oy, muꞌyuc yan, hech yuꞌun muꞌyuc scꞌopilal mi ti jtiꞌbetutic ti smoton ti santoetique”, xachiic. Melel ti jun noꞌox Dios oy, muꞌyuc yan hech chaj cꞌu cheꞌel chavalique.
\v 5 Yuꞌun manchuc mi chalic ti oy diosetic ti vinajel ti balumile, ep diosetic tscuyique, ep yajvalic tscuyique,
\v 6 ti hoꞌucutique ti jnaꞌtic ti jun noꞌox ti Dios cuꞌuntique, jaꞌ ti Jtotique. Jaꞌ spasoj scotol ti cꞌutic oye. Spasojucutic yuꞌun acꞌo xijtunucutic yuꞌun. Ti jnaꞌtic uc ti jun noꞌox ti Cajvaltique, jaꞌ ti Jesucristoe. Jaꞌ sventainoj scotol ti cꞌutic oye. Jaꞌ ti sventa ti cuxulucutique.
\p
\v 7 Pero ti quermanotique mu scotoluc snaꞌic ti mu cuxuluc ti santoetique. Ti quermanotic ti mu to oyuc yip yoꞌntonique, yuꞌun tscuyic to ti cuxul ti santoetique, chaꞌi ti yoꞌnton ti tscontrain ti Diose mi tstiꞌbeic smoton ti santoetique. Hech yuꞌun chbolibic mi tstiꞌique.
\v 8 Ti hoꞌucutique ti jnaꞌtic ti mu yuꞌunuc jaꞌ lec chijcꞌot ti stojol ti Diose yuꞌun ti jveꞌeltique. Maꞌuc lec chijyil ti Diose mi ti jtiꞌtic, maꞌuc mu xtun chijyil ti Diose mi mu jtiꞌtic.
\v 9 Pꞌijanic me. Mu me jaꞌuc yuꞌun ti libre oyoxuque ti chavacꞌ pꞌajuc ti mulil ti quermanotique ti muꞌyuc yip ti yoꞌntonique.
\v 10 Hoꞌoti ti naꞌacꞌbat spꞌijil avoꞌnton yuꞌun ti Diose hech chanaꞌ ti mu cuxuluc ti santoetique, ti mi nayilot ti quermanotique ti muꞌyuc yip yoꞌntonique, ti te nacalot ti mesa te ti sna ti santoetique, hech yuꞌun tsnop uc ti xuꞌ tstiꞌbeic smoton ti santoetique.
\v 11 Hech yuꞌun ti scoj spꞌijil avoꞌnton tsoc ti avermanoe ti jaꞌ muꞌyuc yip yoꞌntone. Jaꞌ laj yacꞌ sba ti milel ti Cristoe yuꞌun ti avermanotac lume.
\v 12 Mi hech tsoc ti aventa ti quermanotique ti muꞌyuc yip yoꞌntonique, hech chata amul ti stojol ti quermanotique, chata amul uc ti stojol ti Cristoe.
\v 13 Hech yuꞌun mi chpꞌaj ti mulil jun quermanotic cuꞌuntic yuꞌun ti scoj ti jtiꞌtic tiꞌbol, jaꞌ lec mu xa jtiꞌtic tiꞌbol o, yuꞌun hech mu xpꞌaj ti mulil ti quermanotique ti jventatic.
\c 9
\s Jaꞌ scꞌopilal ti muchꞌu jcholcꞌope ti jaꞌ tsnop lec ti lec acꞌo batuc scꞌopilal ti Cajvaltique yuꞌun
\p
\v 1 Jaꞌ noꞌox hech nixtoc uc libre oyun xuꞌ chajcꞌamboxuc scotol ti cꞌusi ti jcꞌan yuꞌun jcholcꞌopun. Hoꞌoni coꞌol jcholcꞌopun xchiꞌuc ti lajchavoꞌique ti laj xchiꞌinic ti Cajvaltique. Yuꞌun hoꞌon uqui laj jqꞌuelbe sat ti Cajvaltic Jesucristoe. Ti hoꞌoxuque cabteloxuc ti stojol ti Cajvaltique.
\v 2 Mi tscuyic ti mu jcholcꞌopucun ti yan quermanotique ti buc noꞌox oyique, ti hoꞌoxuque persa chachꞌunic yuꞌun hoꞌon laj jcholboxuc ti scꞌop ti Diose. Yuꞌun ti achꞌunojic xae, hech chvinaj ti quichꞌoj cabtel yuꞌun ti Cajvaltique.
\p
\v 3 Hech chcalbe scotol ti muchꞌutic ti mu xtun ti cꞌu cheꞌel ti jnop ti tscuyique.
\v 4 Xuꞌ chquichꞌ macꞌlinel avuꞌunic hech chaj cꞌu cheꞌel chichꞌ macꞌlinel ti yan jcholcꞌopetique.
\v 5 Xuꞌ ti jsaꞌ cajnil uc, xuꞌ chquicꞌ batel uc hech chaj cꞌu cheꞌel tspas ti yan jcholcꞌopetique xchiꞌuc ti yitsꞌinabtac ti Cajvaltique xchiꞌuc ti Pedroe.
\v 6 Ti yan jcholcꞌopetique scomesoj yabtelic hech yuꞌun chichꞌic macꞌlinel avuꞌunic. Jaꞌ noꞌox hech xuꞌ ti jcomes cabteltutic uc ti Bernabee xchiꞌuc ti hoꞌone.
\v 7 Chanaꞌic ti muchꞌu ochem ti soldadoe jaꞌ ch-acꞌbat sveꞌel xchiꞌuc scotol ti cꞌusi chtun yuꞌune. Ti muchꞌu tstsꞌun sloꞌbol jaꞌ tsloꞌbe sat. Ti muchꞌu tsqꞌuel xchivo, jaꞌ chuchꞌbe xlech.
\v 8 Jaꞌ noꞌox hechun uc ti hoꞌontutique xuꞌ chamacꞌlinuntutic yuꞌun chiꞌabtejtutic avuꞌunic. Hech chal uc ti mantaletic yuꞌun ti Diose.
\v 9 Yuꞌun hech tsꞌibabil ti mantaletique ti laj yal ti Moisese: “Ti vacaxe mu me xamacbeic ye cꞌalal tstecꞌ trigo, acꞌo sveꞌ”, ti xchie. Yuꞌun ti hech chal ti Diose, maꞌuc noꞌox cꞌuxubimbil yuꞌun ti Diose ti vacaxetique.
\v 10 Hoꞌontutic jcꞌopilaltutic uc ti hech chale. Hoꞌontutic jcꞌopilaltutic ti hech tsꞌibabile. Naꞌic me ti muchꞌu tsvocꞌ yosile, ti muchꞌu tsmaj strigoe, jun yoꞌntonic tspasic yuꞌun snaꞌic mi hech tspasique hech tstaic sveꞌelic.
\v 11 Jaꞌ noꞌox hechun uc ti hoꞌone laj jtsꞌun ti avoꞌntonic ti scꞌop ti Diose. Hech yuꞌun lec mi chavacꞌbun cꞌusi chtun cuꞌun ti sventa jbecꞌtal.
\v 12 Ti yan jcholcꞌopetique xuꞌ chichꞌic macꞌlinel avuꞌunic. Pero ti hoꞌone xuꞌ más echꞌem chquichꞌ macꞌlinel avuꞌunic ti hechuque, pero mu jcꞌan.
\p Yuꞌun ti hoꞌone scotol ora ti jpajes jba naca me xcom ti jventa ti mu xpuc ti lec ti lequil achꞌ cꞌope, jaꞌ ti scꞌopilal ti Cristoe.
\v 13 Chanaꞌic ti hech smantal ti Diose ti te tsta sveꞌelic ti templo ti paleetic ti te ch-abtejique. Te tsta stiꞌbolic yuꞌun stuc tsmilic ti smoton ti Diose.
\v 14 Jaꞌ noꞌox hech uc ti muchꞌutic chcholic ti lequil achꞌ cꞌope, smantal ti Cajvaltique ti te tsta sveꞌelic yuꞌun chcholic ti lequil achꞌ cꞌope.
\v 15 Ti hoꞌone mu jcꞌan jpas hech. Mu yuꞌunuc chajtsꞌibaboxuc yuꞌun hech acꞌo xapasbun. Yuꞌun hech coꞌnton o ti muꞌyuc cꞌusi ti jcꞌane, hech yuꞌun mi oy muchꞌu chisujune, jaꞌ lec mi chicham.
\p
\v 16 Mu yuꞌunuc ti jtoy jba yuꞌun ti hech ti jchol ti lequil achꞌ cꞌope. Persa ti jchol yuꞌun hech acꞌbilun cabtel yuꞌun ti Cajvaltique. Mi mu jcꞌan ti jchole, uts jba.
\v 17 Mi yutsil coꞌnton ti jchol, quichꞌoj jmoton chcaꞌi. Mu yuꞌunuc ti jcꞌan yan jmoton. Mi mu yutsiluc coꞌnton ti jpase, ta onoꞌox jpas yuꞌun hech acꞌbilun cabtel ti jchol.
\v 18 Jaꞌ jmoton chcaꞌi ti nichim noꞌox coꞌnton yuꞌun muꞌyuc cꞌusi ti jcꞌambe ti muchꞌutic ti jcholbe yaꞌyic ti lequil achꞌ cꞌope.
\p
\v 19 Hech yuꞌun ti hoꞌone libre oyun. Muꞌyuc muchꞌu xuꞌ chiyalbun ti acꞌo jpas ti cꞌusi tscꞌanique. Jtuc cacꞌoj jba ti abatinel yuꞌun scotolic yuꞌun hech más ep chchꞌumbeic scꞌop Dios ti jventa.
\v 20 Cꞌalal ti jchiꞌin ti jchiꞌiltaque, jaꞌ ti tsots scꞌopilal chaꞌyic ti jchꞌuntic ti antiguo mantaletique ti laj stsꞌiba ti Moisese, ti jcoꞌoltajes jba hech chaj cꞌu cheꞌel stuquique. Ti jpas ti mucꞌ ti mantaletique manchuc mi mu tsotsuc scꞌopilal chcaꞌi. Hech ti jpas yuꞌun lec acꞌo yilucun yuꞌun hech acꞌo xchꞌunic ti jventa.
\v 21 Ti cꞌalal ti jchiꞌin ti achiꞌiltaque, hoꞌoxuc ti coꞌol yanlum crixchanooxuc xchiꞌuque, ti mu yaꞌyojuc ti smantal ti Diose, coꞌolun chicꞌot xchiꞌuc. Mu yuꞌunuc ti jcomes ti Cajvaltique yuꞌun ti hech ti jpase. Jaꞌ noꞌox yuꞌun lec acꞌo yilucun yuꞌun hech acꞌo xchꞌunic ti jventa.
\v 22 Ti cꞌalal ti jchiꞌin ti quermanotique ti muꞌyuc yip yoꞌntonique coꞌol muꞌyuc yip coꞌnton xchiꞌuc chicꞌot yuꞌun hech acꞌo tsatsubuc yoꞌntonic ti jventa. Coꞌolun chicꞌot xchiꞌuc scotolic yuꞌun acꞌo oyuc muchꞌu chcolic ti jventa.
\v 23 Hech ti jpas yuꞌun acꞌo cꞌotuc ti yoꞌntonic ti lequil achꞌ cꞌope hech nichim noꞌox coꞌnton mi chlic xchꞌunique.
\p
\v 24 Chanaꞌic ti scotol ti muchꞌutic tstsal sbaic ti anile coꞌol ch-anilajic scotolic. Jun noꞌox ti muchꞌu xuꞌ yuꞌun chjelav batele. Jaꞌ chichꞌ smoton. Jaꞌuc me hechoxuc me uc. Jaꞌuc me batem avoꞌntonic yuꞌun chcꞌot ata amotonic yuꞌun ti Cajvaltique. Muꞌyuc xa me cꞌusi chanopic.
\v 25 Scotol ti muchꞌu tscꞌan tstsalvan ti tajimol liꞌ ti balumile persa mu xa xchꞌumbe smantal ti sbecꞌtale ti cꞌutic tscꞌane. Yuꞌun snaꞌoj ti mi hech tspase, hech xuꞌ yuꞌun, hech tsta smoton. Ti smoton ti chichꞌ liꞌ ti balumile jaꞌ chlaj. Jaꞌuc ti hoꞌucutique chquichꞌtic jmotontic ti mu snaꞌ chlaje.
\v 26 Jaꞌ hech chaj cꞌu cheꞌel ti muchꞌu jun yoꞌnton ch-anilaje, jaꞌ noꞌox hechun ti hoꞌone, jaꞌ te batem coꞌnton yuꞌun chcꞌot jta jmoton. Hech chaj cꞌu cheꞌel ti muchꞌu tsnop lec bu chacꞌbe majel ti yajcontrae yuꞌun hech xuꞌ yuꞌun ti tajimole, jaꞌ noꞌox hechun ti hoꞌone te oy coꞌnton yuꞌun ti cꞌu cheꞌel ti jtsal ti cꞌutic tscꞌan chisbolibtasune.
\v 27 Ti hoꞌone mi jutuc mu jcꞌuxubin ti jbecꞌtale. Mu jchꞌun ti cꞌutic chiyalbune. Yuꞌun ti hech ti jpase, yuꞌun naca me stsalun manchuc mi jcholojbe yaꞌyic ti scꞌop ti Diose yan crixchanoetic.
\c 10
\s Jaꞌ scꞌopilal mu me hechuc avoꞌntonic hech chaj cꞌu cheꞌel ti jtatamoltique ti voꞌone ti mu junuc yoꞌntonic ti stojol ti Diose, xchi
\p
\v 1 Quermanotac, ti jcꞌan ti chanaꞌic ti cꞌutic icꞌot ti pasel ti voꞌone ti stojol ti jtatamol jmembeltique hoꞌucutic ti coꞌol yelnichꞌonucutic ti Israel xchiꞌuque. Cꞌuxubimbilic yuꞌun ti Diose hech yuꞌun jaꞌ ibaej yuꞌunic ti toque yuꞌun chtojobtasatic batel ti bu tscꞌan ti Diose ti chcꞌotique. Hech lec ijelavic ti nab scotolic.
\v 2 Scotolic ti iloqꞌuic ti mozoile jaꞌ totil yuꞌunic ti Moisese icꞌot yuꞌun jaꞌ jbaejbe yuꞌunic te ti yolon toc xchiꞌuc te ti nab.
\v 3 Te ti xocol balumil scotolic coꞌol imacꞌlinatic yuꞌun ti Diose.
\v 4 Scotolic coꞌol iꞌacꞌbatic yuchꞌic hoꞌ yuꞌun ti Diose ti ilocꞌ tal ti chꞌen ti laj smaj ti Moisese. Maꞌuc ti sventa noꞌox ti Moisese yuꞌun te oy ti Cristoe. Yuꞌun ti hech iꞌacꞌbatique jaꞌ ti sventa ti Cristoe. Yuꞌun ti iꞌacꞌbatic hoꞌ yuchꞌique, hech yuꞌun jaꞌ noꞌox hech uc ch-acꞌbatic xcuxlejalic sbatel osil mi tspasic ti mucꞌ ti Diose.
\v 5 Manchuc mi hech icoltaatique, muc onoꞌox tspasic ti mucꞌ ti Diose. Jaꞌ más ep ti mu xtun iꞌilatic yuꞌun ti Diose. Hech yuꞌun ep ichamic te ti xocol balumil.
\p
\v 6 Yuꞌun ti hech icꞌot ti pasele, acꞌo jnaꞌtic ti jaꞌ noꞌox hech chijyacꞌbucutic castigo ti Diose mi coꞌol chbicꞌtaj coꞌntontic yuꞌun ti cꞌusi chopole hech chaj cꞌu cheꞌel ibicꞌtaj ti yoꞌntonique.
\v 7 Mu me hechuc avoꞌntonic hech chaj cꞌu cheꞌel ti jtatamoltique ti voꞌone ti mu junuc yoꞌntonic ti stojol ti Diose. Yuꞌun hech onoꞌox tsꞌibabil scꞌopilalic ti scꞌop ti Diose: “Ti jchiꞌiltaque ti coꞌol tꞌujbilun xchiꞌuc yuꞌun ti Diose, laj spasic yajsanto. Laj yacꞌbeic smoton, iveꞌic, laj yuchꞌic, hech lic acꞌotajucuc ti stojol ti yajsantoe”, ti xchi ti Moisese.
\v 8 Mu me xijmulivajucutic hech chaj cꞌu cheꞌel laj spasic. Yuꞌun ti jun noꞌox cꞌacꞌal imilatic veintitrés mil.
\v 9 Mu me xijelavucutic ti stojol ti Cajvaltique hech chaj cꞌu cheꞌel oy ijelavic ti stojol. Hech yuꞌun itiꞌat yuꞌun chon, hech ichamic.
\v 10 Mu me jtoy jbatic ti stojol ti Cajvaltique hech chaj cꞌu cheꞌel oy laj spasic. Hech yuꞌun iꞌacꞌbatic xchamel, hech itupꞌic ti muchꞌutic laj stoy sbaique.
\p
\v 11 Yuꞌun ti hech ipasbatique, yuꞌun hech acꞌo mu me jpastic hech ti hoꞌucutique. Hech tsꞌibabil comel scꞌopilalic yuꞌun hech chijpꞌijubucutic. Yuꞌun slajebal xa cꞌacꞌal ti liꞌoyucutique.
\v 12 Hech yuꞌun ti muchꞌu tscuy ti oy lec yip ti yoꞌntone acꞌo me pꞌijubuc, naca me pꞌajuc ti mulil.
\v 13 Ti cꞌu cheꞌel chaspasbot proval avoꞌntonic ti pucuje, jaꞌ noꞌox hech tspasbeic proval yoꞌntonic scotol crixchanoetic. Ti Diose jun yoꞌnton avuꞌunic. Mu xacꞌ ti jelaven chaspasbot proval avoꞌntonic ti pucuje naca me mu xcuch avuꞌunic. Ti cꞌalal chaspasbot proval ti avoꞌntonique ti pucuje ti Diose chastojobtasot cꞌu cheꞌel chacol batel, hech chuꞌ avuꞌunic.
\p
\v 14 Hech yuꞌun, hoꞌoxuc ti cꞌuxoxuc ti coꞌntone, jꞌechꞌel comeso ti santoetique.
\v 15 Hech chacalboxuc acotolic yuꞌun oy xa spꞌijil avoꞌntonic. Nopo avaꞌyic ti cꞌusi chacalboxuque.
\v 16 Cꞌalal chijnaqui ti smesa ti Cajvaltique chcuchꞌtic ti yaꞌlel sat uvateꞌe ti chcalbetic vocol Dios yuꞌune, ti jveꞌtic ti caxlan vaje hech chaj cꞌu cheꞌel laj yal comel smantal ti Cajvaltique. Hech chvinaj ti jun coꞌntontic ti stojol ti Cajvaltique ti jaꞌ laj yacꞌ sba ti milel cuꞌuntique.
\v 17 Jun noꞌox ti caxlan vaje. Hech yuꞌun manchuc mi epucutic, jun noꞌox cꞌotemucutic yuꞌun jun noꞌox ti caxlan vaj ti jveꞌtic jcotoltique.
\p
\v 18 Nopo avaꞌyic ti cꞌu cheꞌel laj spasic ti jtatamoltique ti voꞌone, jaꞌ ti coꞌol yelnichꞌonucutic ti Israel xchiꞌuque. Cꞌalal laj stiꞌbeic ti smoton ti Diose, hech ivinaj ti jun yoꞌntonic ti stojol ti Diose.
\v 19 Mu yuꞌunuc ti jloqꞌuesbe sjam ti jun yoꞌntonic xchiꞌuc ti santoetique ti muchꞌutic chacꞌbeic smotone. Yuꞌun ti jnaꞌtic ti mu cuxuluc ti santoetique, hech yuꞌun hovil ti ch-acꞌbat ti smotone. Muꞌyuc stu.
\v 20 Jaꞌ hech sjam. Ti muchꞌutic ti chacꞌbeic smoton ti santoetique mu yuꞌunuc jaꞌ chacꞌbeic ti Diose. Yuꞌun mu xojtiquinic ti Diose. Jaꞌ chacꞌbeic ti pucujetique. Hech yuꞌun mu jcꞌan ti jun avoꞌntonic chacꞌotic xchiꞌuc ti pucujetique.
\v 21 Hoꞌoxuque ti chanaquiic ti smesa ti Cajvaltique, ti chavuchꞌic ti yaꞌlel sat uvateꞌe chaveꞌic ti caxlan vaje hech chaj cꞌu cheꞌel laj yal comel smantal ti Cajvaltique, mu sjamuc ti coꞌol chba naclanic ti smesa ti muchꞌutic tspasic ti mucꞌ ti pucujetique.
\v 22 Mu lecuc mi chcacꞌtic ch-ilin ti jtojoltic ti Cajvaltique. Jaꞌ oy yip ti Cajvaltique. Hoꞌucutic muꞌyuc quiptic.
\s Jaꞌ scꞌopilal ti libre oyun xijchi pero mu me xbolib yoꞌnton cuꞌuntic yantic
\p
\v 23 “Libre oyucutic, scotol xuꞌ jpastic”, xachiic. Hech; pero mu scotoluc lec ti pasel. “Libre oyucutic scotol xuꞌ jpastic”, xachiic. Hech; pero maꞌuc sventa chijlecub scotol.
\v 24 Ti cꞌusi ti jpastique, maꞌuc noꞌox yuꞌun ti lec chcaꞌitic jtuctic. Jaꞌ acꞌo jpastic yuꞌun chlecub yoꞌnton yantic uc.
\p
\v 25 Ti tiꞌbole ti chchonic te ti plazae, manic, tiꞌanic. Mi chloꞌlaj avoꞌntonic yuꞌun, mu me xajaqꞌuic, manic, tiꞌanic.
\v 26 Yuꞌun jaꞌ yuꞌun ti Cajvaltique ti balumile xchiꞌuc scotol ti cꞌutic chchꞌi liꞌi.
\p
\v 27 Pero mi chayicꞌot ti veꞌel ti muchꞌu mu xchꞌunojuc ti Diose, mi chacꞌan chachꞌun batel, scotol ti cꞌusi chayacꞌbot atiꞌ, tiꞌan. Mi chloꞌlaj avoꞌntonic yuꞌun, mu me xajaqꞌuic.
\v 28-29 Repenta mi oy muchꞌu tsnaꞌ ti jaꞌ smoton ti santoe ti chayacꞌboxuc atiꞌique, jaꞌ ti coꞌol naꞌicꞌatic ti veꞌel xchiꞌuc. Hech chayalbot: “Avi tiꞌbol liꞌto, jaꞌ smoton ti yajsantoe”, mi xchie, hech yuꞌun mu me xatiꞌ. Moꞌoj, chloꞌlaj yoꞌnton yuꞌun ti laj xa yalbot ti jaꞌ smoton ti santoe. Mu yuꞌunuc mu xuꞌ chatiꞌ. Jaꞌ sventail ti mu me xloꞌlaj yoꞌnton yuꞌun ti laj yalbote.
\p “Libre oyucutic, mu persauc ti jchꞌuntic ti mu stacꞌ ti jtiꞌtutic ti tiꞌbole”, xachiic.
\v 30 “Yuꞌun chcalbetutic vocol ti Diose cꞌalal chiveꞌtutic, hech yuꞌun muꞌyuc jmultutic yuꞌun laj calbetutic vocol ti Diose”, xachiic.
\v 31 Hech. Pero manchuc mi chijveꞌ, manchuc mi oy cꞌusi chcuchꞌtic, scotol ti cꞌusi ti jpastique lecuc me chcꞌot scꞌopilal ti Diose cuꞌuntic.
\v 32 Yuꞌun hech mu me muchꞌu chbolib yoꞌnton cuꞌuntic, manchuc mi jchiꞌiltic, hoꞌucutic ti coꞌol judioucutic xchiꞌuque, manchuc mi achiꞌiltac, hoꞌoxuc ti coꞌol yanlum crixchanooxuc xchiꞌuque, manchuc mi yan quermanotic.
\v 33 Ti hoꞌone ti jcꞌan ti acꞌo lecubuc yoꞌntonic yantic ti jventa. Maꞌuc jnopoj ti jaꞌ noꞌox chlecub coꞌnton jtuc. Jaꞌ jnopoj ti acꞌo lecubuc yoꞌntonic yantic ti jventa, hech chcolic.
\c 11
\p
\v 1 Chambucun coꞌnton hech chaj cꞌu cheꞌel jchanojbe yoꞌnton uc ti Cristoe.
\s Jaꞌ scꞌopilal ti acꞌo smac sjol antsetic cꞌalal tscꞌoponic Dios
\p
\v 2 Quermanotac, nichim noꞌox coꞌnton avuꞌunic yuꞌun scotol ora chanaꞌucun yuꞌun avacꞌoj ti avoꞌntonic ti jcꞌope hech chaj cꞌu cheꞌel laj jchanubtasoxuc.
\v 3 Ti jcꞌan ti hech chanaꞌic. Ti viniquetique jaꞌ tspasat ti mantal yuꞌun ti Cristoe. Ti antsetique jaꞌ tspasat ti mantal yuꞌun ti smalale. Ti Cristoe jaꞌ tspasat ti mantal yuꞌun ti Diose.
\v 4 Hech yuꞌun ti viniquetique mi mu sloqꞌuesojuc xpixjol tscꞌoponic Dios, mi mu sloqꞌuesojuc xpixjol cꞌalal chcholbeic scꞌopilal ti Diose, jaꞌ mu spas ti mucꞌ ti Cristoe.
\v 5 Yuꞌun jaꞌ stalelic ti antsetique ti tsmac sjolic ti cꞌalal chloqꞌuic batel ti sna yuꞌun hech chvinaj ti oy smalale, hech yuꞌun mi mu smacojuc sjol tscꞌoponic Dios, mi mu smacojuc sjol cꞌalal chcholbeic scꞌopilal ti Diose, jaꞌ mu spas ti mucꞌ ti oy smalale. Yuꞌun ti muchꞌu hech tspase, coꞌol cꞌotem hech chaj cꞌu cheꞌel ti jmulavil antse ti itulbat sjol hech chaj cꞌu cheꞌel viniquetic.
\v 6 Mi mu scꞌan smac sjol ti antse, jaꞌ lec acꞌo ba yacꞌ ti tulel scotol stsotsil sjol. Mi yuꞌun chqꞌuexav yuꞌun ti chacꞌ ti tulel scotol stsotsil ti sjole, acꞌo smac sjol cheꞌe.
\v 7 Jaꞌuc ti viniquetique mu lecuc mi tsmac sjolic stuquic yuꞌun coꞌol ipasatic hech chaj cꞌu cheꞌel ti Diose. Jaꞌ acꞌbil yabtel yuꞌun tspasvan ti mantal liꞌ ti balumile. Jaꞌuc ti antsetique jaꞌ ipasatic yuꞌun chchꞌumbe smantal ti viniquetique.
\v 8 Maꞌuc ti sventa ti antse ti hech ipasat ti sba vinique. Jaꞌ ti sventa ti vinique ti hech ipasat ti sba antse.
\v 9 Mu yuꞌunuc laj spas ti sba vinique ti Diose yuꞌun tsaꞌbe xchiꞌil ti antse. Jaꞌ laj spas ti sba antse yuꞌun tsaꞌbe xchiꞌil ti vinique.
\v 10 Hech yuꞌun jaꞌ tscꞌan ti oy señail ti tspas ti mucꞌ ti smalalique ti antsetique ti tsmac sjolique yuꞌun hech lec ch-ilatic uc yuꞌun ti chꞌul abatetique.
\v 11 Mu yuꞌunuc parte ti viniquetique, parte ti antsetique ti stojol ti Cajvaltique. Coꞌol ti stojol ti Cajvaltique scotolic.
\v 12 Ti sliqueb yuꞌun ti ipasat ti antse, yuꞌun chchiꞌin sbaic yuꞌun hech tscolta sbaic xchiꞌuc ti vinique. Ti patil asta ti ora to ti sventa ants ch-an scotol viniquetic. Lec ti cꞌu cheꞌel laj spas scotol ti Diose.
\p
\v 13 Hoꞌoxuque chanaꞌic ti mu lecuc mi mu smacojuc sjol tscꞌoponic Dios ti antsetique.
\v 14 Chanaꞌic uc ti mu xtun ch-ilat ti viniquetique mi nat ti sjole.
\v 15 Jaꞌuc ti antsetique mi nat ti sjole, jaꞌ más lec chcꞌot. Jaꞌ sventa smacobil sjol yuꞌun ti nat stsotsil sjolique.
\v 16 Jaꞌ scꞌopilal mi oy muchꞌu mu xtun chaꞌyic yuꞌun ti hech chacalboxuque, acꞌo snaꞌic ti hech tsnopic uc ti yan jchꞌunojeletique ti buc noꞌox oyique.
\s Jaꞌ scꞌopilal maꞌuc sventa ti Cajvaltique ti cꞌu cheꞌel chaveꞌique, xchi
\p
\v 17 Ti cꞌusi chacalbeic ti ora to, mu yuꞌunuc lec chcaꞌi ti hech chapasique yuꞌun mu sventauc yutsil avoꞌntonic ti yuꞌun ti chatsob abaique. Jaꞌ noꞌox yuꞌun sventa sbolil avoꞌntonic.
\v 18 Jbael hech chacalbeic. Yuꞌun caꞌyoj ti cꞌalal chatsob abaique ti chaveꞌic ti caxlan vaje, chavuchꞌic ti yaꞌlel sat uvateꞌe hech chaj cꞌu cheꞌel laj yal comel ti Cajvaltique, chatꞌujic ti muchꞌu chachiꞌinic ti naclej te ti mesa. Laj jchꞌun jutuc ti hech chapasique.
\v 19 Mu chopoluc ti mi mu coꞌoluc ti acꞌopique yuꞌun hech chvinaj ti muchꞌu más lec xchꞌunojique. Jaꞌ chopol ti chatꞌujic ti muchꞌu chachiꞌinic ti nacleje.
\v 20 Ti cꞌalal atsoboj abaic te ti mesa, maꞌuc sventa ti Cajvaltique ti hech chaveꞌique.
\v 21 Mu yuꞌunuc coꞌol chaveꞌic ti cꞌutic laj avichꞌic talele. Jujunoxuc chalajesic ti aveꞌelique. Oy yan chviꞌnaj, oy yan chyacub.
\v 22 ¿Cꞌu yuꞌun hech chapasic? Oy anaic stacꞌ te chaveꞌic, stacꞌ te chavuchꞌic. Muꞌyuc scꞌopilal ti avoꞌntonic yuꞌun ti te atsoboj abaic ti sna ti Diose. Jaꞌ noꞌox chavaqꞌuic ti qꞌuexlal ti quermanotic ti muꞌyuc cꞌusi oy yuꞌunique. ¿Cꞌusi chacalbeic? Lec coꞌnton avuꞌunic, ¿mi chacute? ¡Bu ba lecuc coꞌnton avuꞌunic yuꞌun ti hech chapasique!
\s Jaꞌ scꞌopilal ti smesa ti Cajvaltique
\r (Mt. 26:26‑29; Mr. 14:22‑25; Lc. 22:14‑20)
\p
\v 23 Yuꞌun calojboxuc xa ti cꞌu cheꞌel laj yalbun ti Cajvaltique ti jaꞌ ti yorail ti iꞌacꞌat entrecal ti Cajvaltique, cꞌalal mu to stsacat, jaꞌ laj stsac jun caxlan vaj ti Cajvaltique.
\v 24 Laj yalbe vocol ti Diose, laj xetꞌ ti caxlan vaje. Hech laj yalbe ti yajchancꞌopetique: “Ilo, veꞌanic. Jaꞌ jbecꞌtal liꞌto yuꞌun chcacꞌ jba ti milel avuꞌunic. Hech me xapasilanic yuꞌun chanaꞌucun”, xchi.
\v 25 Hech onoꞌox uc, cꞌalal laj yoꞌntonic iveꞌic, lic stsac ti tazae, hech laj yalbe: “Jaꞌ ti yaꞌlel sat uvateꞌ liꞌ ti taza liꞌto, jaꞌ señail ti achꞌ cꞌop ti yaloj ti Jtote ti cꞌu cheꞌel chacolique. Cꞌalal chavuchꞌic, hech me chanaꞌucun ti laj cacꞌ jba ti milel avuꞌunic”, xchi ti Cajvaltique.
\v 26 Yuꞌun cꞌalal ti jveꞌtic ti caxlan vaje, chcuchꞌtic ti yaꞌlel sat uvateꞌe hech chaj cꞌu cheꞌel laj yal comel, chcacꞌtic ti naꞌel ti icham scoj jmultic ti Cajvaltique. Jaꞌto cꞌalal chchaꞌsut tal nixtoc, jaꞌto chlaj coꞌntontic ti jpastic.
\s Jaꞌ scꞌopilal ti mi mu jsutesojuc coꞌntontic ti jveꞌtic ti caxlan vaje ti chcuchꞌtic ti yaꞌlel sat uvateꞌe
\p
\v 27 Hech yuꞌun mi mu jsutesojuc coꞌntontic ti jveꞌtic ti caxlan vaje, chcuchꞌtic ti yaꞌlel sat uvateꞌe hech chaj cꞌu cheꞌel laj yal comel ti Cajvaltique, mu jpastic ti mucꞌ ti laj yacꞌ sba ti milel cuꞌuntique.
\v 28 Hech yuꞌun ti jujunucutique acꞌo jnaꞌtic ti coꞌntontic mi jsutesoj coꞌntontic ti bu palta chcaꞌitique. Hech yuꞌun mi sutem xa coꞌntontic yuꞌun ti jmultique, hech acꞌo jveꞌtic ti caxlan vaje acꞌo cuchꞌtic ti yaꞌlel sat uvateꞌe.
\v 29 Yuꞌun mi mu jsutesojuc coꞌntontic ti jveꞌtic ti caxlan vaje chcuchꞌtic ti yaꞌlel sat uvateꞌe, jaꞌ mu jpastic ti mucꞌ ti jaꞌ señail yuꞌun ti jnaꞌtic ti laj yacꞌ sba ti milel cuꞌuntic ti Cajvaltique. Mi hech ti jpastique, jaꞌ chijyacꞌbucutic castigo ti Diose.
\v 30 Scoj ti hech chapasique ti epoxuc muꞌyuc avipic. Epoxuc jchameloxuc. Hech yuꞌun ti ep ivay xa ti sbecꞌtalique yoꞌ bu oyoxuque.
\v 31 Yuꞌun ti jsutesoj coꞌntontic ti stojol ti Diose ti jveꞌtic ti caxlan vaje chcuchꞌtic ti yaꞌlel sat uvateꞌe, hech mu xijyacꞌbucutic castigo ti Diose.
\v 32 Yuꞌun ti chijyacꞌbucutic castigo ti Cajvaltique yuꞌun hech acꞌo pꞌijubucutic. Hech mu coꞌoluc chba quichꞌtic castigo sbatel osil xchiꞌuc scotol ti yan crixchanoetique.
\v 33-34 Hech yuꞌun, quermanotac, cꞌalal chatsob abaic yuꞌun chaveꞌic ti caxlan vaje, chavuchꞌic ti yaꞌlel sat uvateꞌe hech chaj cꞌu cheꞌel laj yal comel ti Cajvaltique, malo me abaic naca me xaꞌacꞌbatic castigo yuꞌun ti Diose yuꞌun ti chopol chapasic cꞌalal chatsob abaique. Mi oy muchꞌu chviꞌnaj acꞌo veꞌuc tal te ti sna. Ti cꞌusi yan tscꞌan ta to xacalboxuque, chul calboxuc cꞌalal chital.
\c 12
\s Jaꞌ scꞌopilal ti jpꞌijiltic ti chijyacꞌbucutic ti Chꞌul Espíritue
\p
\v 1 Yuꞌun ti laj ajacꞌbun ti cꞌu cheꞌel chijyacꞌbucutic jpꞌijiltic ti Chꞌul Espíritue, hech yuꞌun chacalboxuc ti ora to, quermanotac.
\v 2 Chanaꞌic ti cꞌalal mu to achꞌunojbuc scꞌop ti Cajvaltique, hoꞌoxuc ti yanlum crixchanooxuque, hech nalajic ti loꞌlael yuꞌun laj achꞌunic ti cꞌuc noꞌox chapasic ti muqꞌue, jaꞌ ti mu cuxuluque.
\v 3 Hech yuꞌun chacacꞌboxuc anaꞌic ti cꞌu cheꞌel chcꞌopoj ti muchꞌu ventaimbil yoꞌnton yuꞌun ti Chꞌul Espíritu yuꞌun ti Diose yuꞌun hech mu xalajic ti loꞌlael ti ora to. Scotol ti muchꞌu ventaimbil yoꞌnton yuꞌun ti Espíritu yuꞌun ti Diose mu chopoluc chcꞌopoj yuꞌun ti Jesuse. Spasoj ti mucꞌ yuꞌun jaꞌ yajval.
\p
\v 4 Jeltos ti jpꞌijiltique ti chquichꞌtique pero jun noꞌox ti muchꞌu chijyacꞌbucutique, jaꞌ ti Chꞌul Espíritue.
\v 5 Jeltos ti cabteltique pero jun noꞌox ti muchꞌu chijyacꞌbucutique, jaꞌ ti Cajvaltique.
\v 6 Jeltos ti cꞌu cheꞌel xuꞌ ti jpastic ti abtele ti jujunucutique pero jun noꞌox ti muchꞌu chijyacꞌbucutic jnaꞌtic cꞌu cheꞌel ti jpastic ti jujunucutique, jaꞌ ti Diose.
\v 7 Jaꞌ sventa chijlecub jcotoltic ti cꞌutic chijyaqꞌuilambucutic ti Chꞌul Espíritue ti jujunucutique.
\v 8 Oy ch-acꞌbatic spꞌijil yoꞌntonic yuꞌun ti Chꞌul Espíritue yuꞌun chchanubtasvanic. Oy ch-acꞌbatic spꞌijil yoꞌntonic yuꞌun chcholic ti scꞌop ti Diose. Jaꞌ ti sventa uc ti Chꞌul Espíritue.
\v 9 Oy ch-acꞌbatic ep xchꞌunojel yoꞌntonic yuꞌun ti Chꞌul Espíritue. Oy ch-acꞌbatic spꞌijil yoꞌntonic yuꞌun tscoltaic jchameletic. Jaꞌ ti sventa uc ti Chꞌul Espíritue.
\v 10 Oy ch-acꞌbat spasic jchop o abteletic. Oy ch-albatic yuꞌun ti Diose ti cꞌu cheꞌel chalbeic scꞌopilal ti Diose. Oy ch-acꞌbat snaꞌic mi jaꞌ yabtel ti Chꞌul Espíritue, mi jaꞌ yabtel pucujetic. Oy ch-acꞌbat yalic scꞌop Dios ti yan cꞌopetic ti ora noꞌox. Oy ch-acꞌbat snaꞌic tsjelavesic ti scꞌop Dios ti yan cꞌopetique. Jaꞌ ti sventa uc ti Chꞌul Espíritue.
\v 11 Jun noꞌox ti Chꞌul Espíritue ti yacꞌoj sba ch-abteje. Jaꞌ scotol sventainoj. Ti cꞌusi scꞌan yoꞌnton ti Chꞌul Espíritue, hech chijyacꞌbucutic ti jujunucutique.
\s Jaꞌ scꞌopilal ti jun noꞌox cꞌotemucutic xchiꞌuc ti Cristoe manchuc mi epucutic
\p
\v 12 Nopo avaꞌyic cꞌu xꞌelan ti jbecꞌtaltique. Manchuc mi ep ti tos yichꞌoj sbae, jun noꞌox cꞌotem. Jaꞌ noꞌox hech uc manchuc mi epucutic jun noꞌox cꞌotemucutic xchiꞌuc ti Cristoe, hoꞌucutic ti jchꞌunojbetic ti scꞌope.
\v 13 Manchuc mi judioucutic, manchuc mi yanlum crixchanoucutic, manchuc mi chombilucutic ti mozoil, manchuc mi libre oyucutic, jun noꞌox cꞌotemucutic yuꞌun jun noꞌox ti Chꞌul Espíritue ti quichꞌojtic jcotoltique. Hech chac cꞌu cheꞌel ti jun noꞌox sat hoꞌ chcuchꞌtic jcotoltic.
\p
\v 14 Ti jbecꞌtaltique mu jtosuc noꞌox yichꞌoj sba. Jaꞌ ep ti tos yichꞌoj sba hech tscolta sbaic ti abtel.
\v 15 Ti taca hech chal ti cacantique: “Yuꞌun mu hoꞌucun cꞌobilun, hech yuꞌun muꞌyuc jtu yuꞌun ti jbecꞌtal cheꞌe”, ti taca chiuque, manchuc mi hech chal, oy stu yuꞌun jaꞌ cacantic. Te onoꞌox oy xchiꞌuc jbecꞌtaltic.
\v 16 Ti taca hech chal ti jchiquintique: “Yuꞌun mu hoꞌucun satilun, hech yuꞌun muꞌyuc jtu yuꞌun ti jbecꞌtal cheꞌe”, ti taca chiuque, manchuc mi hech chal, oy stu yuꞌun jaꞌ jchiquintic. Te onoꞌox oy xchiꞌuc jbecꞌtaltic.
\v 17 Ti scotol satiluc ti jbecꞌtaltique, ¡bu cꞌamba caꞌitic cꞌop! Ti scotol chiquiniluc ti jbecꞌtaltique, ¡bu cꞌamba quichꞌtic icꞌ!
\v 18 Yuꞌun hech laj scꞌan ti Diose, hech yuꞌun ti oy yabtel jujutos icꞌot scotol.
\v 19 Ti jtosuc noꞌoxe, mu xuꞌ cꞌu tspas.
\v 20 Pero yuꞌun ep ti tos yichꞌoj sba, hech yuꞌun xuꞌ yuꞌun ti abtele.
\p
\v 21 Ti taca hech chal ti jsatique: “¿Cꞌu stu cuꞌunot?” mu xuꞌ hech chalbe ti jcꞌobtique yuꞌun oy stu uc. Ti taca hech chal ti joltique: “¿Cꞌu stu cuꞌunot?” mu xuꞌ hech chalbe ti cacantique yuꞌun oy stu uc.
\v 22 Manchuc mi mu tsotsuc yabtelic yichꞌojic xꞌelan, mu xuꞌ tspꞌaj sbaic yuꞌun oy stuic scotolic.
\v 23 Ti bu muꞌyuc lec scꞌopilal ti jbecꞌtaltique ti jcuytique, jaꞌ chcacꞌbetic scꞌuꞌ. Ti bu mu tꞌujumuc chquiltic ti jbecꞌtaltique, jaꞌ ti jmactic.
\v 24 Ti bu tꞌujum chquiltic ti jbecꞌtaltique, mu jmactic. Cꞌalal laj spas ti jbecꞌtaltique ti Diose, laj yacꞌbe tsots yabtel ti bu mu tꞌujumuque.
\v 25 Hech lec chaꞌi sbaic, muꞌyuc pleito ti jbecꞌtaltic yuꞌun tscolta sbaic ti abtel ti jujutose.
\v 26 Hech yuꞌun mi oy bu cꞌux jtosuc, oy spalta scotol chcaꞌitic. Mi ti jcꞌuxubintic jtosuc, yichꞌoj xa cꞌuxubinel chaꞌi scotol.
\p
\v 27 Ti hoꞌucutique sbecꞌtalucutic ti Cristoe. Hech yuꞌun oy jtutic yuꞌun ti jujunucutique.
\v 28 Ti stojol ti jchꞌunojeletique oy muchꞌutic yichꞌoj tsots yabtelic yuꞌun ti Diose. Ti jtose jcholcꞌopetic, ti jtose jaꞌ chalic cꞌusi chcꞌot ti pasel, ti jtose jchanubtasvanejetic. Oy yan yamal yabtel yichꞌojic. Oy tspasic jchop o abteletic, oy tscoltaic jchameletic, oy chcoltavanic, oy jchapanvanejetic, oy ch-acꞌbat yalic scꞌop Dios ti ora noꞌox ti yan cꞌopetic.
\v 29 Mu scotoluc jcholcꞌopetic, mu scotoluc chalic cꞌusi chcꞌot ti pasel, mu scotoluc jchanubtasvanejetic, mu scotoluc tspasic jchop o abteletic.
\v 30 Mu scotoluc tscoltaic jchameletic. Mu scotoluc ch-acꞌbat yal scꞌop Dios ti ora noꞌox ti yan cꞌopetic, mu scotoluc ch-acꞌbat snaꞌ ti ora noꞌox tsjelaves ti scꞌop Dios ti yan cꞌopetique. Ti coꞌoluc yabtelic scotolic, ¡muchꞌu cꞌamba spas ti yan abtele!
\v 31 Hech yuꞌun ti hoꞌoxuque acotolic laj xa acꞌanic ti chavalic scꞌop Dios ti ora noꞌox ti yan cꞌopetic. Jaꞌ yamal scꞌopilal. Hech yuꞌun jaꞌ tscꞌan ti chacꞌanic ti avabtelique ti bu más tsots scꞌopilale. Chacalbe avaꞌyic ti bu más to lec jelaven yutsil scꞌopilale ti tscꞌan ti chacꞌanique.
\c 13
\s Jaꞌ scꞌopilal ti jelaven yutsil mi chijcꞌuxubinvane
\p
\v 1 Manchuc mi xuꞌ chijcꞌopoj ti ora noꞌox ti ep ti tos scꞌop crixchanoetic xchiꞌuc scꞌop chꞌul abatetic, mi mu xijcꞌuxubinvanucutique, hech cꞌotemucutic hech chaj cꞌu cheꞌel campana ti hech noꞌox stsantsune. Hech cꞌotemucutic uc hech chaj cꞌu cheꞌel sepsep taqꞌuin ti hech noꞌox stsantsune. Yuꞌun muc un oy sjam ti chaꞌi ti jcꞌoptic ti Diose.
\v 2 Manchuc mi nijꞌacꞌbat jnaꞌtic yuꞌun ti Diose ti cꞌusi chcꞌot ti pasele, manchuc mi nijꞌacꞌbat jnaꞌtic ti cꞌutic muc snaꞌic ti antiguoetic ti voꞌone, manchuc mi scotol oy ti coꞌntontique, manchuc mi oy lec xchꞌunojel coꞌntontic yuꞌun xuꞌ cuꞌuntic ti jpastic jchop o abteletique, mi mu xijcꞌuxubinvanucutique, hovil ti liꞌoyucutic liꞌ ti balumile.
\v 3 Manchuc mi laj jqꞌuelantic batel scotol ti cꞌutic oy cuꞌuntique yuꞌun hech ti jmacꞌlintic ti meꞌonetique, manchuc mi laj jchicꞌ jbatic o yuꞌun ti jcuytic ti hech más lec chijyilucutic ti Diose, mi mu xijcꞌuxubinvanucutique, hovil ti hech laj jpastique.
\p
\v 4 Ti muchꞌu chcꞌuxubinvane jaꞌ mu xlaj yoꞌnton ti ora. Jaꞌ lec yoꞌnton. Mu spas biqꞌuit yoꞌnton. Mu xacꞌ sba ti pasel ti mucꞌ.
\v 5 Mu stoy sba. Mu xjelav ti stojol yantic. Mu sliques cꞌop, mu xꞌilin, mu xbolib yoꞌnton.
\v 6 Maꞌuc nichim noꞌox yoꞌnton mi tsta smul ti yermanoe. Jaꞌ nichim noꞌox yoꞌnton mi lec chbat ti yermanoe.
\v 7 Scotol cꞌacꞌal jun yoꞌnton ti stojol ti yermanoe. Mu xchibaj yoꞌnton ti stojol. Mi oy palta ti yermanoe chcuch yuꞌun.
\v 8 Ti chijcꞌuxubinvane jaꞌ sventa sbatel osil. Jaꞌuc ti spꞌijil coꞌntontic noꞌox ti xuꞌ chcaltic cꞌusi chcꞌot ti pasele, jaꞌ chlaj scꞌopilal. Jaꞌ noꞌox hech uc ti chijcꞌopoj ti yan cꞌopetique, jaꞌ noꞌox hech chlaj scꞌopilal. Jaꞌ noꞌox hech uc scotol ti yan jpꞌijiltique jaꞌ noꞌox hech chlaj scꞌopilal.
\v 9 Yuꞌun cꞌalal liꞌoyucutic liꞌ ti balumile scꞌan to ti tsꞌacal ti jnaꞌtic scotol. Hech yuꞌun mu tsꞌacaluc chichꞌ cholel ti scꞌop ti Diose.
\v 10 Cꞌalal tsta yorail ti tsꞌacal chijꞌacꞌbat jnaꞌtic scotol te ti vinajel, hech yuꞌun chlaj scꞌopilal ti bu mu jnaꞌtique.
\p
\v 11 Cꞌalal ololucutic to hech chaj cꞌu cheꞌel ololetic nijcꞌopojucutic. Ti coꞌntontique hech chaj cꞌu cheꞌel yoꞌntonic ololetic. Ti cꞌusi laj jnop ti coꞌntontique, jaꞌ hech chaj cꞌu cheꞌel tsnopic ololetic. Cꞌalal nijchꞌi xa, icom cuꞌuntic hech chaj cꞌu cheꞌel tsnopic ti ololetique. Jaꞌ noꞌox hech uc cꞌalal nijcꞌot xa ti vinajele, icom cuꞌuntic hech chaj cꞌu cheꞌel laj jnoptic liꞌ ti balumile.
\v 12 Jaꞌ noꞌox hech chaj cꞌu cheꞌel mu xquiltic lec jsatic mi oy spalta ti espejoe, jaꞌ noꞌox hech uc ti ora to oꞌlol noꞌox quilojtic. Jaꞌto mi nijcꞌot ti vinajele jaꞌto chcꞌo jqꞌueltic scotol. Yuꞌun ti Cajvaltique chijyojtiquinucutic ti mero melel. Jaꞌ noꞌox hech cꞌalal chijcꞌot, chcꞌot cojtiquintic ti mero melel.
\v 13 Hech yuꞌun oxib ti mu xlaj sbatel osile, jaꞌ ti xchꞌunojel coꞌntontique xchiꞌuc ti smucꞌul coꞌntontique xchiꞌuc ti chijcꞌuxubinvane. Jaꞌ jelaven yutsil ti chijcꞌuxubinvane.
\c 14
\s Jaꞌ scꞌopilal ti muchꞌutic xuꞌ chcꞌopojic ti ora noꞌox ti yan cꞌopetique ti sventa ti Chꞌul Espíritue
\p
\v 1 Toyoluc me avoꞌntonic cꞌanilanic me ti chacꞌuxubinvanique. Cꞌanic uc apꞌijilic ti jaꞌ chayacꞌboxuc ti Chꞌul Espíritue. Jaꞌ me xacꞌanic chacholic ti cꞌu cheꞌel chayalboxuc ti Diose. Jaꞌ más tsots scꞌopilal, jaꞌ mu tsotsuc scꞌopilal ti mi chacꞌopojic ti ora noꞌox ti yan cꞌop.
\v 2 Yuꞌun ti muchꞌutic ch-acꞌbat spꞌijilic yuꞌun ti Chꞌul Espíritue yuꞌun hech ti ora noꞌox chcꞌopojic ti yan cꞌop, maꞌuc tscꞌopon crixchanoetic. Jaꞌ noꞌox Dios ti tscꞌopon sba xchiꞌuque. Muꞌyuc muchꞌu ch-aꞌibat sjam ti scꞌopique.
\v 3 Jaꞌuc ti muchꞌu chal ti scꞌop ti Diose, jaꞌ chchanubtas crixchanoetic, jaꞌ chtaqꞌuivan, jaꞌ tsmucꞌubtasbe yoꞌntonic.
\v 4 Ti muchꞌutic ch-acꞌbat spꞌijilic yuꞌun ti Chꞌul Espíritue yuꞌun hech ti ora noꞌox chcꞌopojic ti yan cꞌop, stuquic noꞌox chmucꞌub yoꞌntonic yuꞌun. Jaꞌuc ti muchꞌu chal ti scꞌop ti Diose, jaꞌ scotol ti jchꞌunojeletique chmucꞌub yoꞌntonic yuꞌun.
\p
\v 5 Lec mi naꞌacꞌbat apꞌijilic acotolic yuꞌun ti Chꞌul Espíritue yuꞌun hech xuꞌ ti ora noꞌox chacꞌopojic ti cꞌuc noꞌox cꞌopal. Pero jaꞌ más to lec mi chavalic ti scꞌop ti Diose ti acꞌopique. Yuꞌun ti muchꞌu chal ti scꞌop ti Diose, jaꞌ más tsots yabtel yichꞌoj. Ti muchꞌu xuꞌ chcꞌopojic ti ora noꞌox ti ep ti tos cꞌopetique, jaꞌ mu tsotsuc yabtel yichꞌoj. Jaꞌto mi oy muchꞌu chjelavesbat ti scꞌope, jaꞌto xuꞌ chpꞌijub scotol ti jchꞌunojeletique.
\v 6 Hech yuꞌun, quermanotac, mi chtal jcꞌoponoxuc ti yan cꞌop, muꞌyuc cꞌu stu avuꞌunic. Mi ti acꞌop chacalboxuc cꞌusi albilun yuꞌun ti Diose, mi chacalbeic cꞌusi sventa chapꞌijubic, mi chacalbeic cꞌusi chcꞌot ti pasel, mi chajchanubtasoxuc, jaꞌ chtun avuꞌunic.
\p
\v 7 Nopo avaꞌyic cꞌu xꞌelan chtijat ti arpae, ti ch-oqꞌuesanat ti aje. Mi mu lecuc chtijat ti arpae, mi mu lecuc ch-oqꞌuesanat ti aje, ¡bu cꞌamba jnaꞌtic ti cꞌusi qꞌuejojale!
\v 8 Jaꞌ noꞌox hech uc mi mu jamaluc ch-oqꞌuesanat ti cornetae, ¡bu cꞌamba snaꞌic ti soldadoetique ti yuꞌun chchapan sbaic yuꞌun chbatic ti pleitoe!
\v 9 Jaꞌ noꞌox hech uc ti hoꞌoxuque yuꞌun muꞌyuc muchꞌu chaꞌibeic sjam ti acꞌopique ti cꞌalal chacꞌopojic ti ora noꞌox ti yan cꞌope, hech yuꞌun ¡bu cꞌamba snaꞌic ti cꞌusi laj avale! Hovil ti chacꞌopojique.
\v 10 Ep ti tos cꞌopetic liꞌ ti balumile. Pero jaꞌ noꞌox chcaꞌibe jbatic ti jcꞌoptique mi coꞌol ti jcꞌoptique.
\v 11 Hovil ti jcꞌopontic ti jcꞌoptic ti muchꞌu mu xijyaꞌibucutic jcꞌoptique. Jaꞌ noꞌox hech hovil chiscꞌoponucutic ti scꞌopic mi mu xcaꞌibetic ti scꞌopique.
\v 12 Jaꞌ noꞌox hech ti hoꞌoxuque hovil ti chacꞌopojic ti yan cꞌopetic mi muꞌyuc muchꞌu chaꞌibe sjam ti acꞌope. Lec ti toyol avoꞌntonic chacꞌan chavichꞌic ti apꞌijilique ti chayacꞌboxuc ti Chꞌul Espíritue, pero jaꞌ me xacꞌanic ti jaꞌ chpꞌijub ti aventaic scotol ti jchꞌunojeletique.
\p
\v 13 Hech yuꞌun ti jayvoꞌoxuc ti chaꞌacꞌbatic apꞌijilic yuꞌun hech xuꞌ chacꞌopojic ti ora noꞌox ti yan cꞌope, albo vocol ti Diose yuꞌun hech chanaꞌic chavalbe sjam ti cꞌusi laj avale.
\v 14 Yuꞌun mi ti jcꞌopontic Dios ti yan cꞌop, jaꞌ ventaimbil coꞌntontic yuꞌun ti Chꞌul Espíritue hech yuꞌun ti hech chijcꞌopoj. Ti hoꞌucutique jaꞌ mu xcꞌot ti coꞌntontic ti cꞌu cheꞌel chcalbetique.
\v 15 Hech yuꞌun hech ti jpas hoꞌoni. Ventaimbil coꞌnton yuꞌun ti Chꞌul Espíritue ti jcꞌopon Dios ti yan cꞌop, ti jcꞌopon Dios ti jcꞌop uc yuꞌun hech ti jnaꞌ ti cꞌusi lec chcalbe ti Diose. Ventaimbil coꞌnton yuꞌun ti Chꞌul Espíritue chiqꞌuejin yuꞌun ti Diose ti yan cꞌop, chiqꞌuejin ti jcꞌop uc yuꞌun hech ti jnaꞌ ti cꞌusi chiqꞌuejin yuꞌun ti Diose.
\v 16 Jaꞌuc mi hocol aval chavutic ti Diose ti yan cꞌop noꞌox, yuꞌun ti mu xaꞌibeic sjam ti cusi chavalique ti quermanotique ti te achiꞌinojique, “hechuc”, mu xchi cꞌalal laj avoꞌnton laj acꞌopon ti Diose yuꞌun mu xaꞌyic ti cꞌusi laj avale.
\v 17 Lec ti laj avalbe vocol ti Diose hoꞌoti. Pero muc xmucꞌub yoꞌntonic yantic avuꞌun.
\v 18 Hocol yalbun ti Diose más ep chicꞌopoj ti ora noꞌox ti yan cꞌopetic hoꞌoni cꞌalal jtuc oyun. Jutuc noꞌox chacꞌopojic ti ora noꞌox ti yan cꞌopetic ti hoꞌoxuque.
\v 19 Manchuc mi hech acꞌbilun jpꞌijile, mu jcꞌan ti hech ti jpas ti stojol scotol ti jchꞌunojeletique. Persa chicꞌopoj ti scꞌopique yuꞌun hech ti jchanubtas. Manchuc mi hoꞌpꞌel noꞌox chcalbe, jaꞌ chmucꞌub yoꞌntonic cuꞌun. Hovil mi chicꞌopoj ti stojolic ti yan cꞌop. Yuꞌun manchuc mi lajunmil ti pꞌel chcalbe ti yan cꞌop, muc un chmucꞌub yoꞌntonic cuꞌun.
\p
\v 20 Quermanotac, mu me hechuc chanopic hech chaj cꞌu cheꞌel ololetic. Taca mu xanaꞌic ti cꞌusi chopole hech chaj cꞌu cheꞌel ololetic lec. Pero ti cꞌu cheꞌel chanopique jaꞌ tscꞌan ti chanopic hech chaj cꞌu cheꞌel mucꞌtic crixchano. Tscꞌan ti chanopic mi lec ti cꞌu cheꞌel chapasique.
\v 21 Hech onoꞌox tsꞌibabil ti sun ti Diose: “Ti jtac talel yanlum crixchanoetic ti yan ti scꞌopique yuꞌun tsalbil chcꞌotic ti achiꞌiltaque. Jaꞌto hech chlic snaꞌic ti cꞌusi castigoal ti chcacꞌbee yuꞌun acꞌo snaꞌic ti hoꞌon Diosun yuꞌunique. Hovil; mu yuꞌunuc hech tsutes yoꞌntonic ti jtojol”, xꞌutat ti Isaíase, xchi ti Diose.
\v 22 Jaꞌ noꞌox hech uc ti ora to mi jaꞌ noꞌox chacꞌopojic ti yantic cꞌopetique muꞌyuc muchꞌu tsutes yoꞌntonic avuꞌunic. Jaꞌuc mi jamal chachol ti scꞌop ti Diose ti stojol ti achiꞌiltaque, jaꞌ chcꞌot ti yoꞌnton avuꞌunic yuꞌun ti jamal chacholique.
\v 23 Hech yuꞌun cꞌalal atsoboj abaic acotolic hoꞌoxuc ti jchꞌunojeloxuque, mi acotolic chacꞌopojic ti ora noꞌox ti yan cꞌopetique, hech yuꞌun mi ch-ochic tal te ti atojolique ti muchꞌutic mu xchꞌunojuque ti mu chanubtasbiluc mi jutuc ti scꞌop Diose, “chujuben sjolic”, xchiic avuꞌunic yuꞌun chavochetic noꞌox.
\v 24 Jaꞌuc mi acotolic chavalic ti scꞌop ti Diose ti acꞌopic, hech yuꞌun mi ch-ochic tal te ti atojolique ti muchꞌutic mu xchꞌunojuque ti mu chanubtasbiluc mi jutuc ti scꞌop ti Diose, jaꞌ chtijbat yoꞌntonic yuꞌun chaꞌibeic sjam ti cꞌusi chavalic acotolique. Jaꞌ chloꞌlaj yoꞌntonic yuꞌun smulic ti sventa acꞌopic acotolique.
\v 25 Hech chlic snaꞌic ti mu xtun ti yoꞌntonique. Hech tsbicꞌtajes sbaic ti stojol ti Diose, hech tsutes yoꞌntonic ti stojol ti Diose. “Melel ti xchiꞌinojic ti Diose ti mero melel”, xchiic.
\s Jaꞌ scꞌopilal lecuc me chapasic scotol, oyuc me sjam ti cꞌusi chavalique, xchi
\p
\v 26 Hech yuꞌun ti cꞌalal chatsob abaique, quermanotac, ti cꞌu cheꞌel chayacꞌboxuc anaꞌic ti Chꞌul Espíritue jun acꞌo qꞌuejinuc yuꞌun Dios, yan acꞌo xcholbe sjam ti scꞌop Diose, yan acꞌo yal ti cꞌusi achꞌ iꞌacꞌbat snaꞌ yuꞌun ti Diose, yan acꞌo cꞌopojuc ti yan cꞌop, yan acꞌo sjelavesbe ti scꞌope. Sventauc me chmucꞌub avoꞌntonic acotolic ti cꞌusi chapasique.
\v 27 Mi oy muchꞌu tscꞌan chcꞌopoj ti yan cꞌop, ta yutsil ti chaꞌvoꞌ noꞌox chcꞌopoj. Mi lum ep, oxvoꞌ. Jujuntic acꞌo cꞌopojuc. Acꞌo jelavesbatuc scꞌop yuꞌun junuc quermanotic.
\v 28 Mi muꞌyuc muchꞌu tsnaꞌ chjelavesbat scꞌopic, mu me xcꞌopojic ti stojol scotol ti jchꞌunojeletique. Stuc acꞌo scꞌopon Dios ti yoꞌnton, hech chaꞌi ti Diose.
\v 29 Jaꞌ noꞌox hech uc chaꞌvoꞌ oxvoꞌ noꞌox me acꞌo xchol ti cꞌu cheꞌel iꞌalbat ti yoꞌnton yuꞌun ti Diose. Hech yuꞌun ti yan quermanotique acꞌo snopic mi scꞌop Dios ti yacꞌoj sba chcholique.
\v 30 Ti muchꞌutic te nacajtique mi oy muchꞌu oy cꞌusi ch-albat ti ora ti yoꞌnton yuꞌun ti Diose, acꞌo chꞌaniuc ti muchꞌu yacꞌoj sba chcꞌopoje yuꞌun acꞌo yal ti cꞌusi ch-albat ti yoꞌnton yuꞌun ti Diose ti yan uque.
\v 31 Yuꞌun mu xtun mi oy chacꞌopojic chaꞌvoꞌ oxvoꞌ. Jaꞌ noꞌox chavochetic noꞌox chcꞌot. Ti hoꞌoxuc ti chavalic ti scꞌop ti Diose, jaꞌ hech tscꞌan ti jujuntic chlic cꞌopojanic. Hech chapꞌijub acotolic. Hech chmucꞌub avoꞌnton acotolic.
\v 32 Mi oy chaꞌalbatic ti avoꞌntonic ti ora yuꞌun ti Diose, hech yuꞌun mu persauc ti chacꞌopoj ti ora. Xuꞌ chamala. Patil xuꞌ chlic aval yuꞌun hech chaꞌyic scotolic.
\v 33-34 Yuꞌun maꞌuc sventa Dios mi xijvochetucutic noꞌox. Jaꞌ yuꞌun Dios chcꞌot yuꞌun ti jmala jbatique, hech lec chbat.
\p Ti antsetique mu me xcꞌopojic ti stojol ti jchꞌunojeletique hech chaj cꞌu cheꞌel ti mu xcꞌopojic ti antsetique ti jujun templo ti buc noꞌox tstsob sbaic ti jchꞌunojeletique. Yuꞌun ti antsetique mu yichꞌojuc yabtelic yuꞌun chcꞌopojic ti stojol scotolic. Biqꞌuit acꞌo yacꞌ sbaic hech chaj cꞌu cheꞌel chal ti smantal ti Diose.
\v 35 Mi oy cꞌusi scꞌan snaꞌic jaꞌ acꞌo sjacꞌbeic ti smalalique te ti snaic yuꞌun mu lecuc mi chcꞌopoj antsetic ti stojol scotol ti jchꞌunojeletique.
\p
\v 36 Hoꞌoxuc ti achꞌunojbeic scꞌop ti Diose te ti Corintoe, naꞌic me ti mu hoꞌucoxuc jbael laj aliquesic ti scꞌop ti Diose. Mu atucuc noꞌox ti ihul xa ti aventaic ti scꞌop ti Diose. Hech yuꞌun jaꞌ tscꞌan ti chapasic hech chaj cꞌu cheꞌel tspasic ti yan jchꞌunojeletique ti cꞌu cheꞌel ichanubtasatic yuꞌun ti Diose.
\v 37 Yuꞌun ti hoꞌoxuc ti acꞌbiloxuc apꞌijilic yuꞌun chavalic ti scꞌop ti Diose, xchiꞌuc ti hoꞌoxuc ti acꞌbiloxuc apꞌijilic hech xuꞌ chacꞌopojic ti ep ti tos cꞌopetique, chanaꞌic ti jaꞌ smantal ti Cajvaltique ti cꞌu cheꞌel laj jtsꞌibaboxuc avi to.
\v 38 Mi oy muchꞌu mu spas ti mucꞌ avi to, hech mu me xapasbeic ti mucꞌ ti scꞌop uque.
\p
\v 39 Hech yuꞌun, quermanotac, cꞌanic me ti jamal chavalic ti scꞌop ti Diose ti acꞌopique. Jaꞌ noꞌox hech uc mu me xapajesic ti muchꞌutic chcꞌopojic ti ep ti tos cꞌopetique.
\v 40 Lecuc me chapasic scotol. Oyuc me sjam ti cꞌusi chavalique.
\c 15
\s Jaꞌ scꞌopilal ti yuꞌun ti ichaꞌcuxi loqꞌuel ti chꞌen ti Cajvaltique, jaꞌ noꞌox hech chijchaꞌcuxiucutic uc
\p
\v 1 Quermanotac, más chacacꞌboxuc anaꞌic ti lequil achꞌ cꞌope ti laj jcholboxuc avaꞌyique. Yuꞌun laj apasic ti mucꞌ, hech yuꞌun oy xchꞌunojel avoꞌntonic asta ti ora to.
\v 2 Mi jꞌechꞌel avacꞌoj ti avoꞌntonic ti cꞌope ti laj jcholboxuc avaꞌyique, jaꞌ chacolic. Mi hovil laj avalic ti chachꞌunique, mu xacolic.
\p
\v 3 Jaꞌ tsots scꞌopilal ti cꞌu cheꞌel laj jcholboxuque yuꞌun hech quichꞌoj mantal ti jaꞌ icham ti cruz yuꞌun jmultic ti Cristoe hech chaj cꞌu cheꞌel tsꞌibabil ti sun ti Diose,
\v 4 ti imucat ti chꞌene, ti yoxibal cꞌacꞌal ichaꞌcuxi loqꞌuel ti chꞌen hech chaj cꞌu cheꞌel tsꞌibabil ti sun ti Diose.
\v 5 Laj jcholboxuc avaꞌyic ti jaꞌ jbael laj yacꞌ sba ti qꞌuelel ti stojol ti Pedroe. Patil laj yacꞌ sba ti qꞌuelel ti stojol scotol ti yajchancꞌopetique, jaꞌ ti lajchavoꞌique.
\v 6 Patil laj yacꞌ sba ti qꞌuelel ti stojol ep quermanotic. Echꞌem ti hoꞌob ciento te stsoboj sbaic coꞌol laj yilic ti jaꞌ ti Cristoe. Ti muchꞌu laj yilique oy to ep cuxajtic ti ora to, oy yantic uc ivay xa ti sbecꞌtalique.
\v 7 Patil laj yacꞌ sba ti qꞌuelel ti stojol ti Jacoboe. Patil laj yacꞌ sba ti qꞌuelel ti stojol scotol ti jcholcꞌopetic yuꞌune.
\p
\v 8 Hoꞌoni jaꞌ slajebun xa laj yacꞌ sba ti qꞌuelel ti jtojol uc. Hoꞌoni hech chaj cꞌu cheꞌel olol ti mu tsꞌaquiemuc yual ti ch-ane, ti ora noꞌox ch-an. Jaꞌ noꞌox hechun ti hoꞌone ti ora noꞌox laj sjelbun coꞌnton ti Cajvaltique.
\v 9 Hoꞌoni biqꞌuitun, jaꞌ mucꞌ ti yan jcholcꞌopetique. Mu lecuc xꞌelan ti ochemun ti jcholcꞌope yuꞌun ep laj quilbajin scotol ti muchꞌutic xchꞌunojbeic scꞌop ti Diose.
\v 10 Ti sventa noꞌox yutsil yoꞌnton ti Diose ti hech nicꞌot xa ti jcholcꞌope. Mu hoviluc ti oy yutsil yoꞌnton cuꞌune. Tsots niꞌabtej hoꞌoni, jutuc noꞌox iꞌabtej scotol ti yantique. Mu hoꞌucun jtuc. Jaꞌ ti sventa noꞌox ti Diose ti hech yacꞌojbun yutsil ti coꞌntone.
\v 11 Manchuc mi hoꞌon, manchuc mi jaꞌ ti yantique, hech cacꞌoj jbatutic ti jcholbetutic scꞌopilal ti Cristoe. Hech yuꞌun ti achꞌunojic xae.
\p
\v 12 Yuꞌun nacholbat avaꞌyic scꞌopilal ti Cristoe ti ichaꞌcuxi loqꞌuel ti chꞌene, hech yuꞌun ¿cꞌu yuꞌun oy hech chavalic: “Muꞌyuc muchꞌu chchaꞌcuxi loqꞌuel ti chꞌen”, xachiic?
\v 13 Ti meleluc ti muꞌyuc muchꞌu chchaꞌcuxi loqꞌuel ti chꞌene, hech chlocꞌ sjam ti muc xchaꞌcuxi loqꞌuel ti chꞌen ti Cristo uque ti hechuque.
\v 14 Ti meleluc ti muc xchaꞌcuxi loqꞌuel ti chꞌen ti Cristoe, hovil ti jcholbetutic scꞌop ti hechuque. Hovil achꞌunojic uc ti hechuque.
\v 15 Jloꞌlavanejuntutic cꞌotemuntutic ti hechuque yuꞌun jcholojbetutic xa scꞌopilal ti Diose ti laj xchaꞌcuses loqꞌuel ti chꞌen ti Cristoe. Ti muꞌyucuc muchꞌu chchaꞌcuxi loqꞌuel ti chꞌen ti animaetique, yuꞌun muc xchaꞌcusesat loqꞌuel ti chꞌen yuꞌun ti Diose ti Cristoe obi.
\v 16 Ti meleluc ti muꞌyuc muchꞌu chchaꞌcuxi loqꞌuel ti chꞌen ti animaetique, yuꞌun muc xchaꞌcuxi ti Cristo uque ti hechuque.
\v 17 Ti meleluc ti muc xchaꞌcuxi ti Cristoe, hovil ti achꞌunojbeic scop ti hechuque. Oyoxuc to ti mozoil yuꞌun ti mulile ti hechuque.
\v 18 Hech ti muchꞌutic oyic ti stojol ti Cristoe ti ivayic xa ti sbecꞌtalique, jaꞌ chꞌayel ibatic ti hechuque.
\v 19 Ti meleluc ti jaꞌ noꞌox jayib cꞌacꞌal cuxulucutic liꞌ ti balumile ti oyucutic ti stojol ti Cristoe, más uts jbatic hoꞌucutic ti hechuque. Mu utsuc sbaic ti yan crixchanoetique ti hechuque.
\p
\v 20 Ti hoꞌucutique ti jnaꞌtic ti melel ti ichaꞌcuxi loqꞌuel ti chꞌen ti Cristoe. Yuꞌun ti ichaꞌcuxi primeroe, hech yuꞌun chchaꞌcuxiic scotolic ti quermanotique ti ivay xa ti sbecꞌtalique.
\v 21 Ti scoj jun vinic chijchamucutic. Ti sventa jun vinic chijchaꞌcuxiucutic.
\v 22 Yuꞌun ti scoj ti Adane jcotoltic chijchamucutic. Ti sventa ti Cristoe jcotoltic chijchaꞌcuxiucutic.
\v 23 Hech xmelmun batel. Jaꞌ jbael ichaꞌcusesat ti Cristoe. Cꞌalal tsut tal ti Cristoe, chchaꞌcusesat ti muchꞌutic oyic ti stojole.
\v 24 Patil cꞌalal tsta yorail ti slajebal cꞌacꞌale, tsalbil chcꞌot yuꞌun ti Cristoe scotol ti yajcontrae ti oy yipe, ti oy spꞌijile, ti oy yip tspas mantale. Cꞌalal tsalbil xa yuꞌun scotole, hech yuꞌun chacꞌbe entrecal ti scꞌob ti Jtotic Diose scotol ti muchꞌutic ichꞌumbat scꞌop yuꞌune. Yuꞌun jaꞌ iꞌacꞌbat yabtel yuꞌun.
\v 25 Jaꞌto cꞌalal tsalbil chcꞌot scotol ti yajcontrae, jaꞌto chlaj yoꞌnton chispasucutic ti mantal ti Cristoe.
\v 26 Jaꞌ ti slajeb ti yajcontrae ti tstsale, jaꞌ ti chijchamucutic yuꞌune.
\v 27 Yuꞌun hech onoꞌox tsꞌibabil ti sun ti Diose ti “jaꞌ chacꞌbe sventain scotol ti Snichꞌone”, ti xchie. Ti “scotol chacꞌbe sventain” ti xchie, mu yuꞌunuc tsventain ti Stote. Yuꞌun jaꞌ ti sventa ti Stote ti tsalbil chcꞌot yuꞌun scotol.
\v 28 Cꞌalal tsalbil icꞌot xa yuꞌun scotole, hech chlic yacꞌ sba ti ventainel yuꞌun ti Stote yuꞌun jaꞌ ti sventa ti Stote ti tsalbil icꞌot yuꞌun scotol. Hech patil mu xa sventain ti Snichꞌon ti Diose. Jaꞌ tsventain scotol ti Jtotic Diose.
\p
\v 29 Ti meleluc ti mu xchaꞌcuxiic ti animaetique, mu hechuc chichꞌic hoꞌ ti crixchanoetique yuꞌun ti sventa ti yermanotac ti icham xae. Taca mu xchꞌunic ti chchaꞌcuxiic ti animaetique, mu hechuc tspasic ti hechuque.
\p
\v 30 Ti meleluc ti mu xijchaꞌcuxiucutique, ¿cꞌu stu cuꞌuntutic ti scotol cꞌacꞌal cꞌan lajucuntutic ti milel?
\v 31 Scotol cꞌacꞌal ta xa xicham yaꞌyel yuꞌun ti toyol coꞌnton avuꞌunic ti stojol ti Cajvaltic Cristo Jesuse.
\v 32 Ti liꞌ ti jteclum Efesoe jun to puru jtiꞌvanej bolom liꞌ jchiꞌinoji yuꞌun puru laj scontrainucun. Ti jaꞌuc mu meleluc ti chijchaꞌcuxiucutique, ¿cꞌu stu cuꞌun itsꞌic cuꞌun? “Más lec veꞌucun, jlajes cꞌusi oy cuꞌun ti jayib cꞌacꞌal cuxulun liꞌ ti balumile, laj cꞌop o”, xichi hech chaj cꞌu cheꞌel xchꞌunoj crixchanoetic.
\p
\v 33 Mu me xalajic ti loꞌlael. Yuꞌun mi chachiꞌinic ti muchꞌu chopol yoꞌntonique jaꞌ noꞌox chbolib avoꞌntonic.
\v 34 Viqꞌuiluc me asatic, mu xa me xasaꞌilan yan amul. Oy to te achiꞌinojic ti mu to xojtiquinic ti Diose yuꞌun mu xchꞌunic ti chixchaꞌcusesucutique. Hech chacalbeic yuꞌun acꞌo xaqꞌuexavic.
\s Jaꞌ scꞌopilal ti cꞌu cheꞌel chchaꞌcusesat ti muchꞌutic chamenique
\p
\v 35 Repenta oy chajaqꞌuic: “¿Cꞌu cheꞌel chchaꞌcusesat ti muchꞌutic chamenic? ¿Cꞌu xꞌelan sbecꞌtalic cꞌalal chchaꞌcuxiic?” xachiic.
\v 36 ¿Mi yuꞌun muꞌyuc apꞌijilic? ¿Mi mu xanaꞌic ti jaꞌto mi icꞌaꞌ ti cꞌusi chatsꞌunique, jaꞌto chchꞌi tal?
\v 37 Ti cꞌusi chatsꞌune, mu xa xcoꞌolaj cꞌalal chchꞌi tal. Sbecꞌ noꞌox chatsꞌun, mi trigo, mi yan tsꞌunubiletic.
\v 38 Ti Diose chacꞌbe sbecꞌtal hech chaj cꞌu cheꞌel tscꞌan yoꞌnton stuc. Mu coꞌoluc ch-acꞌbat sbecꞌtal jujutos.
\v 39 Mu coꞌoluc sbecꞌtalic scotolic. Yan sbecꞌtalic crixchanoetic, yan sbecꞌtalic cꞌusi xcotetic ti lum, yan sbecꞌtalic mutetic, yan sbecꞌtalic choyetic.
\v 40 Yan o ti cꞌutic chquiltic te ti vinajele, yan o ti cꞌutic oy liꞌ ti balumile. Mu coꞌoluc yutsil ti cꞌutic chquiltic te ti vinajele xchiꞌuc ti cꞌutic oy liꞌ ti balumile.
\v 41 Yan squeval ti cꞌacꞌale, yan squeval ti ue, yan squeval ti cꞌanaletique. Yantic squeval ti jujupꞌej ti cꞌanaletique.
\v 42 Jaꞌ noꞌox hech uc ti muchꞌutic chamenique ti chchaꞌcuxiique, chmucat ti lum, chcꞌaꞌ. Cꞌalal chlocꞌ tal, jaꞌ mu snaꞌ chlaj.
\v 43 Chmucat ti lum yuꞌun mu xa xtun. Cꞌalal chlocꞌ tal, oy xa yutsil. Cꞌalal chmucat ti lum, muꞌyuc xa yip. Cꞌalal chlocꞌ tal, oy xa yip.
\v 44 Jaꞌ jbecꞌtaltic sventa balumil ti chmucat ti lume. Jaꞌ achꞌ jbecꞌtaltic sventa sbatel osil ti chijchaꞌcuxiucutic xchiꞌuque. Oy jbecꞌtaltic sventa noꞌox balumil. Oy achꞌ jbecꞌtalic sventa sbatel osil.
\p
\v 45 Hech onoꞌox tsꞌibabil comel: “Jaꞌ ti primero totil cuꞌuntique, jaꞌ ti Adane, iꞌacꞌbat xchꞌulel hech icuxi”, ti xchie. Jaꞌ ti slajeb totil cuꞌuntique, jaꞌ ti Cristoe, jaꞌ jꞌacꞌcuxlejal.
\v 46 Maꞌuc jbael chijcuxi sbatel osil. Jaꞌ jbael chijcuxi liꞌ ti balumile. Patil chijcuxi sbatel osil.
\v 47 Ti primero totil cuꞌuntique jaꞌ sventa noꞌox balumil yuꞌun pasbil ti tsꞌubilum. Ti xchaꞌvaꞌal totil cuꞌuntique jaꞌ sventa vinajel.
\v 48 Yuꞌun liꞌoyucutic liꞌ ti balumile, coꞌol pasbilucutic ti tsꞌubilum xchiꞌuc ti Adane ti primero ipasat ti tsꞌubilume. Ti chijcꞌot ti vinajele, coꞌol achꞌ jbecꞌtaltic chijcꞌot xchiꞌuc ti Cristoe ti jaꞌ sventa ti vinajele.
\v 49 Hech chaj cꞌu cheꞌel coꞌol jbecꞌtaltic xchiꞌuc ti Adane ti pasbil ti tsꞌubilume, jaꞌ noꞌox hech uc coꞌol achꞌ jbecꞌtaltic chijcꞌot xchiꞌuc ti Cristoe ti jaꞌ sventa ti vinajele.
\p
\v 50 Quermanotac, chacalbe avaꞌyic. Xchiꞌuc avi jbecꞌtaltic liꞌto mu xuꞌ chba jchiꞌintic ti Diose yoꞌ bu tspas mantal sbatel osil. Maꞌuc sventa sbatel osil yuꞌun chcꞌaꞌ.
\v 51 Aꞌyo me avaꞌyic, chacalbeic ti cꞌusi jaꞌto noꞌox laj yacꞌbun jnaꞌ ti Diose. Mu jcotolticuc chvay ti jbecꞌtaltique. Pero jcotoltic coꞌol chijcꞌatpꞌujucutic ti achꞌ.
\v 52 Hech chaj cꞌu cheꞌel ti jmutsꞌtic jsatic, jaꞌ noꞌox hech ti ora noꞌox chijcꞌatpꞌujucutic ti achꞌ ti slajeb vuelta ch-oqꞌuesanat ti cornetae. Cꞌalal ch-oqꞌuesanat ti cornetae, jaꞌ chchaꞌcuxiic ti quermanotic ti chamenique. Mu xa snaꞌ xcꞌaꞌ ti achꞌ sbecꞌtal ti chichꞌique. Jaꞌ noꞌox hechucutic uc chijcꞌatpꞌujucutic ti achꞌ.
\v 53 Ti jbecꞌtaltic ti snaꞌ chcꞌaꞌe, ta me xcꞌataj ti achꞌ jbecꞌtaltic. Jaꞌ mu xa snaꞌ chlaj. Ti jbecꞌtaltic ti snaꞌ chchame, ta me xcꞌataj ti achꞌ jbecꞌtaltic sventa chijcuxiucutic sbatel osil.
\v 54 Mi laj xa quichꞌtic ti achꞌ jbecꞌtaltique ti mu snaꞌ chlaje, jaꞌ ti sventa chijcuxiucutic sbatel osile, hech chcꞌot ti pasel hech chaj cꞌu cheꞌel tsꞌibabil comel ti sun ti Diose ti mu xa xijchamucutique.
\v 55 Yuꞌun tsalbil xa icꞌot cuꞌuntic ti mu xa chꞌayeluc chijbat, hech mu xba quichꞌtic castigo, ti xchie.
\v 56 Jaꞌ ti scoj jmultic jcotoltic ti hech onoꞌox oy jcꞌopilaltic ti chba quichꞌtic castigo, jaꞌ ti chꞌayel chijbate. Yuꞌun ti oy jmultique yuꞌun muc xchꞌun cuꞌuntic ti mantaletic yuꞌun ti Diose.
\v 57 Hocol yalbucutic ti Diose tsalbil chcꞌot cuꞌuntic scotol ti sventa ti Cajvaltic Jesucristoe, ti hoꞌucutic ti laj xa jchꞌumbetic ti scꞌope.
\p
\v 58 Hech yuꞌun, quermanotac, ti cꞌuxoxuc ti coꞌntone, junuc me avoꞌntonic, mi jutuc mu me xchibaj avoꞌntonic. Scotol cꞌacꞌal toyoluc me avoꞌntonic chapasbeic yabtel ti Cajvaltique yuꞌun chanaꞌic ti mu hoviluc chaꞌabtejic yuꞌun ti Cajvaltique.
\c 16
\s Jaꞌ scꞌopilal ti taqꞌuine ti tstaquic batel yuꞌun tscoltaic ti quermanotic te ti Jerusalén
\p
\v 1 Laj ajacꞌbucun ti carta ti cꞌu cheꞌel chatsobic ataqꞌuinic yuꞌun chatacbeic batel ti quermanotic te ti Jerusalén, jaꞌ ti coꞌol oyucutic ti stojol ti Diose xchiꞌuque. Hech chaj cꞌu cheꞌel laj xa jpas ti mantal scotol ti jchꞌunojeletique ti te oyic ti balumil Galaciae jaꞌ hech me chapasic.
\v 2 Ti jujun domingo chaqꞌuej ti ataqꞌuinique te ti anaique yuꞌun hech tstsob avuꞌunic ti cꞌalal chihul te ti atojolique. Jaꞌ ti cꞌu cheꞌel chayacꞌboxuc bendición ti Diose, hech yuꞌun te chanopic cꞌu cheꞌel chavaqꞌuic. Mu me jaꞌuc chba asaꞌic ti anil ti taqꞌuine cꞌalal chihule.
\v 3 Cꞌalal chihul te ti atojolique, jcꞌan ti tꞌujbil xa avuꞌunic ti muchꞌutic chba yaqꞌuic comel ti taqꞌuine te ti Jerusalén, jaꞌ ti motonil ti chavacꞌbeic ti quermanotique. Hoꞌoni ti jpasbe scarta yuꞌun hech tsnaꞌic ti quermanotique ti hoꞌoxuc chacoltaique. Hech ti jtac batel.
\v 4 Mi chvinaj ti hech tscꞌan ti chibate, hech xuꞌ chixchiꞌinucun batel.
\s Jaꞌ scꞌopilal ti Pabloe ti chacꞌbe snaꞌ ti te ch-echꞌ onoꞌox ti Corinto
\p
\v 5 Cꞌalal mi laj coꞌnton te ti balumil Macedonia, te chital, chtal jqꞌueloxuc uc yuꞌun jnopoj xa ti te chibat ti Macedoniae.
\v 6 Te van chihalej yoꞌ bu oyoxuque. Te van ch-echꞌ cuꞌun ti yorail sique. Patil chachiꞌinucun batel ti bu chibate.
\v 7 Mu jcꞌan ti jꞌechꞌel noꞌox ch-echꞌ jqꞌueloxuque. Coꞌnton ti jcꞌan ti te chihalej yuꞌun chajchiꞌinoxuc mi hech tscꞌan ti Cajvaltique.
\v 8 Liꞌto chihalej ti Efeso jaꞌto mi iꞌechꞌ ti qꞌuin Pentecostés.
\v 9 Liꞌi jaꞌto noꞌox ivinaj ti oy bu xuꞌ lec chiꞌabtej yuꞌun ti Cajvaltique. Pero ep ti muchꞌutic chiscontrainun uc.
\p
\v 10 Mi ihul te ti atojolic ti Timoteoe, acꞌo nichimuc yoꞌnton avuꞌunic yuꞌun jaꞌ tspasbe yabtel ti Cajvaltic uque hech chaj cꞌu cheꞌel hoꞌoni.
\v 11 Hech yuꞌun mu me biqꞌuituc chavilic ti Timoteoe. Jaꞌ lec ti chapasic ti mucꞌ acotolic. Cꞌalal mi ilaj yoꞌntone, hech yuꞌun nichimuc noꞌox me avoꞌntonic acꞌbo cꞌusi chtun yuꞌun hech chul liꞌto. Yuꞌun liꞌ ti jmalatutic xchiꞌuc ti quermanotic liꞌto.
\p
\v 12 Ti quermanotic Apolose laj calbe vocol yuꞌun acꞌo ba sqꞌueloxuc uc xchiꞌuc ti yan quermanotique. Mu to scꞌan chtal ti ora te ti atojolic. Ta to snop cꞌusi ora xuꞌ yuꞌun chtal.
\s Jaꞌ scꞌopilal chabanucot la xalic, xchi
\p
\v 13 Viqꞌuiluc me asatic, oyuc me lec xchꞌunojel avoꞌntonic. Tsotsuc me avoꞌntonic, mu me xaxiꞌic. Tsots me xapas abaic.
\v 14 Scotol ti avabtel chapase, jaꞌuc me yuꞌun ti chacꞌuxubinvane.
\p
\v 15 Quermanotac, chanaꞌic ti jaꞌ primero laj xchꞌumbe scꞌop Dios te ti Acayae, jaꞌ ti estado avuꞌunique, ti Estéfanase xchiꞌuc sjunul sna. Chanaꞌic uc ti scotol ora yacꞌoj sba tscoltaic ti muchꞌutic oyic ti stojol ti Diose.
\v 16 Hech yuꞌun chacalbeic, paso me ti mucꞌ ti muchꞌutic hech yoꞌntonic chiscoltauntutic ti abtele.
\v 17 Nichim noꞌox coꞌnton yuꞌun ti laj ataquic talel ti Estéfanase xchiꞌuc ti Fortunatoe xchiꞌuc ti Acaicoe. Jaꞌ aqꞌuexolic icꞌotic yuꞌun mu hoꞌucoxuc natalic.
\v 18 Imucꞌub coꞌnton yuꞌun italic. Hech imucꞌub avoꞌntonic uc. Paso me ti mucꞌ ti muchꞌutic hech yoꞌntonique.
\p
\v 19 Chabanucot chal scotol ti jchꞌunojeletique liꞌ ti slumal Asia. Chabanucot chal ti sventa ti Cajvaltique ti Aquilae xchiꞌuc ti Priscilae xchiꞌuc scotol ti jchꞌunojeletique ti tstsob sbaic te ti sna.
\v 20 Chabanucot la xal scotol ti quermanotique. Yuꞌun jaꞌ señail ti cꞌuxoxuc ti coꞌntone tsacbo me abaic acꞌobic ti hoꞌoxuque.
\p
\v 21 Hoꞌon Pabloun, ti jtojbot avoꞌntonic uc. Hech yuꞌun hoꞌon jtuc ti jcꞌob laj jtsꞌiba ti jchol chaꞌchol avi liꞌto.
\p
\v 22 Taca tal yicꞌucutic batel ti ora ti Cajvaltique, jaꞌ ti jcꞌan. Scotol ti muchꞌutic mu cꞌuxuc ti yoꞌntonic ti Cajvaltique ti mero melel ta me xꞌacꞌbatic castigo yuꞌun ti Cajvaltique.
\p
\v 23 Acꞌo yacꞌboxuc ep bendición ti Cajvaltic Jesuse.
\v 24 Acotolic cꞌuxoxuc ti coꞌnton ti sventa ti Cristo Jesuse.