\id 2CO

\h 2 CORINTIOS
\toc1 2 CORINTIOS
\mt JAꞌ TI XCHIBAL SCARTA TI QUERMANOTIC TE TI CORINTOE
\mt2 ti itsꞌibabat yuꞌun ti Pabloe
\c 1
\s Ti Pabloe hech lic scꞌopon ti carta ti quermanotic te ti Corintoe
\p
\v 1 Hoꞌon Pabloun, hoꞌon jcholcꞌopun yuꞌun ti Jesucristoe yuꞌun hech laj scꞌan yoꞌnton ti Diose. Xchiꞌuc ti quermanotic Timoteoe, chaꞌvoꞌuntutic chajcꞌoponoxuc ti carta, hoꞌoxuc ti achꞌunojbeic scꞌop ti Diose ti te oyoxuc ti Corinto te ti estado Acaya xchiꞌuc ti sjoylejal yuꞌun Acaya.
\v 2 Acꞌo yacꞌboxuc bendición ti Jtotic Diose xchiꞌuc ti Cajvaltic Jesucristoe. Acꞌo yacꞌbot jun avoꞌnton ti jujunoxuque hech mu xloꞌlaj avoꞌntonic.
\s Jaꞌ scꞌopilal ti ep laj yichꞌ ilbajinel ti Pabloe
\p
\v 3 Hocol aval, tscꞌan ti chcutic ti Diose, jaꞌ ti Stot ti Cajvaltic Jesucristoe, yuꞌun stalel chcꞌuxubinvan, stalel chismucꞌubtasbucutic coꞌntontic.
\v 4 Mi chquichꞌtic vocol jaꞌ chismucꞌubtasbucutic coꞌntontic yuꞌun hech ti jnaꞌtic cꞌu cheꞌel ti jmucꞌubtasbetic yoꞌntonic uc ti muchꞌutic chichꞌic vocol, cꞌusuc noꞌox vocol chtal ti stojolic, yuꞌun mucꞌubtasbil coꞌntontic uc yuꞌun ti Diose.
\v 5 Jchiꞌinojtic to ti vocol ti Cristoe. Hech yuꞌun mi más ep chquichꞌtic vocol, hech más chismucꞌubtasbucutic coꞌntontic ti Cristoe.
\v 6 Yuꞌun ti chquichꞌ vocol ti hoꞌone, yuꞌun hech chavilic ti chcoltavan ti Diose hech más ch-an stsatsal avoꞌntonic. Hech chmucꞌub avoꞌntonic yuꞌun chanaꞌic ti chascoltaoxuc uque. Yuꞌun ti chismucꞌubtasbun coꞌnton ti Diose, yuꞌun hech xuꞌ chajmucꞌubtasboxuc avoꞌntonic uc mi chavichꞌic vocol.
\v 7 Ti jnaꞌ ti laj avichꞌ mul cꞌalal laj avaꞌyic ti ep laj quichꞌ vocol liꞌi. Hech yuꞌun ti jnaꞌ uc ti nichim noꞌox avoꞌntonic cꞌalal chavaꞌyic ti cꞌu cheꞌel laj xa scoltaun ti Diose.
\p
\v 8 Quermanotac, ti jcꞌan chacacꞌboxuc anaꞌic ti ep laj quichꞌ ilbajinel te ti slumal Asia hoꞌoni. Tsots ti jyalel laj caꞌi, mu xcuch yaꞌyel laj caꞌi. Laj cal ti te chichame.
\v 9 Jꞌechꞌel chicham o laj caꞌi, laj jnaꞌ ti mu xuꞌ cuꞌun ti jcolta jba jtuc. Lec ti hech laj jnope yuꞌun hech jaꞌ noꞌox laj jchꞌun ti chiscoltaun ti Diose. Jaꞌ noꞌox laj jnaꞌ ti xuꞌ chchaꞌcuses ti animaetique ti Diose.
\v 10 Manchuc mi mu xcuch yaꞌyel laj caꞌi, jaꞌ laj scoltaun ti Diose yuꞌun hech muc xicham. Ti jchꞌun ti jaꞌ noꞌox hech chiscoltaun scotol ora.
\v 11 Ta me xacoltaucun uc. Jaꞌ chacꞌopombun Dios ti jtojol. Yuꞌun mi epoxuc chacꞌopombun Dios ti jtojole, hech patil más chlic apasic ti mucꞌ ti Diose cꞌalal chavilic ti cꞌu cheꞌel chiscoltaune. Hech más lec chbat scꞌopilal ti Diose cuꞌuntic jcotoltic.
\s Jaꞌ scꞌopilal ti cꞌu yuꞌun muc xꞌechꞌ ti Corinto ti Pabloe
\p
\v 12 Hoꞌoni xuꞌ chcal ti muꞌyuc bu niloꞌlavan, ti jun coꞌnton chiꞌabtej ti stojol ti Diose. Ti jnaꞌ ti hech coꞌnton. Hech yuꞌun muꞌyuc bu laj jloꞌlaoxuc uc. Maꞌuc ti sventa spꞌijil coꞌnton ti xuꞌ cuꞌune. Jaꞌ ti sventa ti yutsil yoꞌnton chiscoltaun ti Diose.
\v 13 Mi ti jcarta muꞌyuc bu chajloꞌlaoxuc ti cꞌop. Jaꞌ noꞌox laj calboxuc ti cꞌusi melele. Jun noꞌox sjam ti cꞌusi laj jtsꞌibaboxuc ti jcartae. Muꞌyuc muchꞌu xuꞌ tsloqꞌuesbe yan sjam.
\v 14 Jnaꞌ ti mu to chavojtiquinucun lec. Tscꞌan to ti toyol avoꞌntonic ti jtojol. Hoꞌone toyol coꞌnton ti atojolic. Jaꞌ noꞌox hech cꞌalal tsta yorail chtal ti Cajvaltic Jesuse toyol coꞌnton ti atojolic. Jaꞌ noꞌox hech tscꞌan uc ti toyol avoꞌntonic ti jtojol.
\p
\v 15-16 Laj jcuy ti toyol avoꞌntonic ti jtojol hech chaj cꞌu cheꞌel toyol coꞌnton ti atojolic hoꞌoni hech yuꞌun laj jnop ti cꞌalal mu to chital liꞌ ti Macedoniae ti ch-echꞌ jqꞌueloxuc tal. Jnopoj uc ti cꞌalal chlaj coꞌnton liꞌi chisut batel ch-echꞌ jqꞌueloxuc yan vuelta uc. Laj cal ti chib vuelta nichim noꞌox avoꞌntonic laj jcuy yuꞌun ti hech chajqꞌueloxuc laj jcuy. Patil nichim noꞌox avoꞌntonic chatacucun batel ti estado Judea yuꞌun chba jqꞌuel ti quermanotic te o laj jcuy.
\v 17 Jaꞌuque, mu nichimuc avoꞌntonic ti jtojol. ¿Mi yuꞌun chacuyic ti mu xcꞌot ti pasel ti jcꞌope ti cꞌusi chcale? ¿Mi chacuyic ti mu jnop lec ti cꞌusi ti jpase? ¿Mi chacuyic ti coꞌol ti jnop xchiꞌuc ti crixchanoetique ti “chital”, xchi ti mu xcꞌot ti pasel yuꞌunique? Hoꞌoni mu hechuc yuꞌun mu hechuc laj scꞌan ti Diose.
\v 18 Jaꞌ noꞌox hech chaj cꞌu cheꞌel chachꞌumbe scꞌop ti Diose jaꞌ noꞌox hech xuꞌ chachꞌumbucun jcꞌop uc. Melel ti cꞌusi chcale.
\v 19 Yuꞌun ti Jesucristoe, jaꞌ ti Snichꞌon ti Diose, jaꞌ ti laj jcholboxuc avaꞌyic scꞌopilale ti hoꞌone xchiꞌuc ti Silvanoe xchiꞌuc ti Timoteoe, mu chaꞌtos ostosuc ti smantale. Jtos noꞌox. Mi laj yal ti chcꞌot ti pasele, chcꞌot ti pasel obi. Mi laj yal ti mu xcꞌot ti pasele, mu xcꞌot ti pasel obi.
\v 20 Ti jaypꞌel yaloj ti Diose ti chcꞌot ti pasel ti sventa ti Snichꞌone, chcꞌot ti pasel. Hech yuꞌun cꞌalal ti jcꞌopontic Dios, “Hechuc, Cajvaltic Cristo”, xijchi yuꞌun ti jchꞌuntic ti chijyacꞌbucutic ti Diose ti sventa ti Cajvaltique. Hech pasbil ti mucꞌ cuꞌuntic ti Diose.
\v 21 Jaꞌ noꞌox ti Diose ti laj xa yacꞌbucutic yip coꞌntontic ti sventa ti Cristoe jcotoltic. Jaꞌ uc ti laj xa yacꞌbucutic cabteltic ti jujunucutique.
\v 22 Jaꞌ uc ti yacꞌojbucutic señail ti coꞌntontic ti yuꞌunucutic sbatel osile. Ti señaile jaꞌ ti Chꞌul Espíritu yuꞌun ti nainem ti coꞌntontic jcotoltic.
\p
\v 23 Snaꞌ ti Diose ti melel chcal ti yuꞌun laj jcꞌuxubinoxuc hech yuꞌun muc xiꞌechꞌ te ti alumalique.
\v 24 Mu yuꞌunuc mi nitale, yuꞌun chajsujoxuc yuꞌun hech chachꞌunic ti cꞌusi ti jcꞌane. Mu me xanopic hech. Jaꞌ noꞌox toyol coꞌnton jcꞌan chajcoltaoxuc yuꞌun hech nichim noꞌox avoꞌntonic. Yuꞌun oy xchꞌunojel avoꞌntonic chquil.
\c 2
\p
\v 1 Hech yuꞌun laj jnop mu xtal jqꞌueloxuc mi jaꞌ noꞌox chacacꞌboxuc avichꞌic mul yan vuelta yuꞌun ti te xtal jtaqꞌuioxuque.
\v 2 Yuꞌun mi hoꞌon chacacꞌboxuc avichꞌic mul, hech yuꞌun muꞌyuc xa muchꞌu chismucꞌubtasbun coꞌnton. Yuꞌun hoꞌoxuc ti aventaic ti nichim coꞌntone.
\v 3 Hech yuꞌun ti hech laj jcajtacboxuc jelavel tal ti cartae ti cꞌutic ti palta avuꞌunique yuꞌun hech mu xcꞌot quichꞌ mul ti cꞌalal chihul te ti atojolique. Yuꞌun jaꞌ laj jcꞌan ti chapajem xa avuꞌunique. Yuꞌun jaꞌ ti jcꞌan ti nichim noꞌox coꞌntontic jcotoltic cꞌalal te xa oyun ti atojolique.
\v 4 Cꞌalal yacꞌoj sba chajtsꞌibaboxuc ti cartae, vocol ihuꞌ cuꞌun ti hech laj cal ti cartae. Ep laj quichꞌ mul, ep niꞌocꞌ yuꞌun laj jnaꞌ ti cꞌux chavaꞌyic. Yuꞌun ti hech laj cale, mu yuꞌunuc chiꞌilin. Jaꞌ yuꞌun ti ep cꞌuxoxuc ti coꞌntone.
\s Jaꞌ scꞌopilal ti Pabloe ti chchꞌay ti yoꞌnton smul ti muchꞌu staoj smule
\p
\v 5 Ti muchꞌu laj yacꞌbun quichꞌ mule, mu hoꞌucun noꞌox ti laj yacꞌbun quichꞌ mule. Laj xa yacꞌboxuc avichꞌic mul acotolic uc. Mu yuꞌunuc echꞌem chcacꞌbe xcuch yuꞌun ti hech chcale.
\v 6 Ta yutsil ti cꞌu yepal u ti laj atenic loqꞌuele.
\v 7 Hech yuꞌun ti ora to tscꞌan ti chapasbeic perdón. Tscꞌan ti chamucꞌubtasbeic yoꞌnton naca me tupꞌuc ti xchꞌunojel yoꞌntone yuꞌun ti puru ichꞌmul chaꞌie.
\v 8 Hech yuꞌun chacalbeic vocol ti ora to. Jaꞌ lec ti chavacꞌbe snaꞌ ti cꞌux ti avoꞌntonique.
\v 9 Yuꞌun ti hech laj jtsꞌibaboxuque yuꞌun chajpasboxuc proval avoꞌntonic mi chachꞌumbucun scotol jmantal.
\v 10 Yuꞌun ti chapasbeic perdón, ti jpasbe perdón uc. Manchuc mi muꞌyuc smul cuꞌun, ti jpasbe perdón yuꞌun hech mu xchaꞌbolib avoꞌntonic cuꞌun. Yuꞌun mi mu xchꞌay ti coꞌnton hoꞌoni yuꞌun ti hech laj spase, repenta hech chchaꞌbolib avoꞌntonic ti jventa. Snaꞌojbun coꞌnton ti Cristoe ti hech oy ti coꞌntone.
\v 11 Yuꞌun mi muꞌyuc perdón ti coꞌntontic, hech chisloꞌlaucutic ti Satanase. Yuꞌun ep vuelta quilojtic xa ti cꞌu cheꞌel xuꞌ chisloꞌlaucutique.
\s Jaꞌ scꞌopilal ti Pabloe ti mu junuc yoꞌnton te ti Troas
\p
\v 12 Cꞌalal nicꞌot ti jteclum Troas, hech lic jchol ti lequil achꞌ cꞌope, jaꞌ ti scꞌopilal ti Cristoe. Ep ti muchꞌutic tscꞌan chaꞌyic, hech laj jcholbe yaꞌyic.
\v 13 Pero mu junuc coꞌnton te oyun yuꞌun mu laj jta te ti quermanotic Titoe. Hech yuꞌun laj jcꞌopon comel ti quermanotic ti te oyique, hech nital liꞌ ti ora liꞌ ti slumal Macedonia.
\s Jaꞌ scꞌopilal scotol cꞌacꞌal chaqꞌuilan ti qꞌuelel ti Cristo Jesuse ti yuꞌunune, xchi ti Pabloe
\p
\v 14 Hocol yal ti Diose ti scotol cꞌacꞌal chaqꞌuilan ti qꞌuelel ti Cristo Jesuse ti yuꞌunune. Yuꞌun ti voꞌone cajcontra onoꞌox ti Diose. Hech chaj cꞌu cheꞌel ti capitan soldadoe ti ora to ti chacꞌ ti qꞌuelel ti muchꞌu yajcontra ti laj stsale hech tspasat ti mucꞌ yuꞌun hech chilic ti laj yuꞌunin xae, jaꞌ noꞌox hech ti Cajvaltique chaqꞌuilan ti qꞌuelel ti yuꞌununtutique. Chacꞌ chituntutic yuꞌun, yuꞌun hech chpuc scꞌopilal ti scotol balumil hech chaj cꞌu cheꞌel yutsil yicꞌ ti pome ti cꞌalal yacꞌoj sba chacꞌ ti qꞌuelel ti capitan soldadoe ti laj xa yuꞌunin ti yajcontrae.
\v 15 Jaꞌ hech cutsiltutic hech chaj cꞌu cheꞌel ti yutsil yicꞌ ti pome chiyaꞌyuntutic ti Diose. Ti cutsiltutique jaꞌ yuꞌun te oy ti coꞌntontutic ti Cristoe hech yuꞌun chcalilambetutic ti scꞌope. Yacꞌoj sba chaꞌibeic ti yutsil ti Cristoe ti muchꞌutic tscꞌan chcolique xchiꞌuc ti muchꞌutic mu scꞌan xchꞌunique, hech chꞌayel chbatic. Hoꞌon ti jventa ti yacꞌoj sba chaꞌyique.
\v 16 Ti muchꞌutic mu scꞌan xchꞌunique muꞌyuc smuil chaꞌyic ti scꞌop ti Cajvaltique ti yacꞌoj sba chcaltutique yuꞌun tsnaꞌic ti chꞌayel chbatique. Jaꞌuc ti muchꞌutic tscꞌan chchꞌunique oy yutsil chaꞌyic ti scꞌop ti Cajvaltique ti yacꞌoj sba chcaltutique yuꞌun tsnaꞌic ti chcuxiic sbatel osil ti sventa. Muꞌyuc muchꞌu xuꞌ yuꞌun stuc tspas avi to. Persa coltabiluntutic yuꞌun ti Diose.
\v 17 Ti hoꞌone mu coꞌoluc coꞌnton xchiꞌuc ti yantique ti muchꞌutic yacꞌoj sba chcholic ti scꞌop Dios ti scuyoj sbaique ti jaꞌ noꞌox tscꞌanic ti ep tsta svinictac yuꞌun jaꞌ noꞌox tscꞌanic uc ti tstsalvanique. Ep ti muchꞌutic hech tspasique. Jaꞌuc ti hoꞌone jun coꞌnton ti stojol ti Diose, acꞌbilun cabtel yuꞌun ti Diose, sqꞌuelojun ti Diose, liꞌoy ti jtojol. Hoꞌon yuꞌun yuꞌunun ti Cristoe, hech yuꞌun jaꞌ ti sventa ti yacꞌoj sba chicꞌopoje.
\c 3
\s Jaꞌ scꞌopilal laj xa yacꞌ huꞌuc cuꞌun ti Diose ti jchol ti achꞌ tratoe, xchi
\p
\v 1 Yuꞌun ti hech chcale, ¿mi jaꞌ noꞌox chachꞌunic ti jtoyilan jba yuꞌun ti hech chcale? ¿Mi yuꞌun mu xavojtiquinucun? ¿Mi jaꞌ chacꞌanic ti oy carta chixcholbun jcꞌopilal ti cꞌalal te chicꞌot ti atojolique hech chaj cꞌu cheꞌel tspasic ti yantique ti muchꞌu jcholcꞌopetic scuyoj sbaique? ¿O mi jaꞌ chacꞌanic ti quichꞌoj acartaic ti chixcholbun jcꞌopilal hech chaj cꞌu cheꞌel tspasic uc ti yantique?
\v 2 Mu persauc ti oy jcarta hoꞌoni. Hoꞌoxuc jcarta cꞌotemoxuc yuꞌun ti aventaic chvinaj ti lec ti cabtele. Ta yutsil ti jaꞌ noꞌox chcal acꞌopilal, mu persauc tsꞌibabil ti hun. Hech laj xa yaꞌiboxuc acꞌopilalic scotolic ti iꞌabtej xa ti avoꞌntonic ti Diose ti sventa ti laj jcholboxuc ti scꞌope.
\v 3 Hoꞌoxuc cartaoxuc yuꞌun laj xa stsꞌibaboxuc ti avoꞌntonic ti scꞌop ti Cristoe. Ti hoꞌone jaꞌ noꞌox laj calboxuc ti scꞌope. Mu laj stsꞌiba ti tinta ti snaꞌ chtupꞌe, mu laj stsꞌiba ti jpech ton. Jaꞌ laj stsꞌibaboxuc ti avoꞌntonic ti Chꞌul Espíritue jaꞌ ti stalel cuxule.
\p
\v 4 Yuꞌun ti hech chcale, mu yuꞌunuc ti jtoy jba. Yuꞌun jchꞌunoj ti chiscoltaun ti Diose ti sventa ti Cristoe, hech ihuꞌ xa cuꞌun.
\v 5 Mu yuꞌunuc chcal ti ihuꞌ cuꞌun jtuc. Jaꞌ ihuꞌ cuꞌun ti sventa ti Diose.
\v 6 Yuꞌun ti Diose laj xa yacꞌ huꞌuc cuꞌun ti jchol ti achꞌ tratoe, jaꞌ ti cꞌu cheꞌel chijcolucutic ti ora to. Maꞌuc ti sventa ti quichꞌojtic ti mantaletique hech chijcolucutic. Yuꞌun jaꞌ noꞌox stu ti mantaletique ti chijyalbucutic ti oy jmultique, jaꞌ ti chꞌayel chijbat yuꞌune. Pero ti Chꞌul Espíritue jaꞌ chijyacꞌbucutic jcuxlejaltic, jaꞌ ti chijcuxi sbatel osile.
\p
\v 7 Chanaꞌic ti cꞌalal iꞌacꞌbat ti mantaletic ti voꞌone ti Moisese, jaꞌ ti tsꞌibabil ti chaꞌpech tone, jaꞌ iquevan ti sat ti cꞌalal laj yichꞌe. Ti jtatamoltic ti voꞌone, jaꞌ ti coꞌol yelnichꞌonucutic ti Israel xchiꞌuque, muc xuꞌ sqꞌuelbe sat ti Moisese yuꞌun ti oy squevale. Pero ti squeval ti sate cꞌuncꞌun lic tupꞌuc.
\v 8 Yuꞌun laj jpastic ti mucꞌ ti mantaletique jaꞌ ti laj yacꞌbucutic ti Diose, jaꞌ ti mu xchꞌun cuꞌuntique ti jaꞌ chꞌayel chijbat yuꞌune, hech yuꞌun jaꞌ tscꞌan ti más ti jpastic ti mucꞌ ti Chꞌul Espíritue ti laj xa yacꞌbucutic ti coꞌntontique ti jaꞌ chijcuxi yuꞌun sbatel osile.
\v 9 Yuꞌun mi tsots yabtel laj yichꞌ ti Moisese ti jaꞌ laj sventaimbe xcholel ti mantaletique, jaꞌ ti chijyacꞌucutic ti castigo ti mantaletique, hech yuꞌun ti hoꞌone más tsots cabtel quichꞌoj yuꞌun hoꞌoni jventainojbe xcholel ti jaꞌ chijyacꞌbucutic toj coꞌntontic ti Diose hech chijcuxi sbatel osil.
\v 10 Yuꞌun ti mantaletique ti jaꞌ laj jpastic ti mucꞌ ti voꞌone, mu xa tsotsuc scꞌopilal ti ora to yuꞌun laj xa yacꞌbucutic jqꞌueltic ti oy yutsil yoꞌnton cuꞌuntic ti Cajvaltique.
\v 11 Lec ti mantaletic ti jayib cꞌacꞌal itun cuꞌuntique. Jaꞌ to más lec ti toj coꞌntontic ti chijyacꞌbucutic ti Diose ti chtun cuꞌuntic sbatel osile.
\p
\v 12 Yuꞌun hech jchꞌunoj ti toj coꞌnton chiyilun ti Diose ti sventa ti Cajvaltique, hech yuꞌun jamal chicꞌopoj, mu xixiꞌ.
\v 13 Hoꞌoni mu jmac jsat hech chaj cꞌu cheꞌel laj spas ti Moisese. Yuꞌun cꞌalal laj yoꞌnton laj yalbe ti jtatamoltique ti smantal ti Diose, hoꞌucutic ti coꞌol yelnichꞌonucutic ti Israel xchiꞌuque, laj smac sat ti pocꞌ yuꞌun hech mu me xqꞌuelat ti cꞌalal chtupꞌ ti squeval ti sate yuꞌun ti jtatamoltique.
\v 14 Ti jtatamoltique yuꞌun muc spasic ti mucꞌ ti hech chaj cꞌu cheꞌel iꞌalbatic yuꞌun ti Moisese hech yuꞌun itsatsub yoꞌntonic. Staoj sjam asta ti ora ti jchiꞌiltic ti ora to, hoꞌucutic ti coꞌol judioucutic xchiꞌuque. Hech chaj cꞌu cheꞌel ti laj smac sat ti Moisese jaꞌ noꞌox hech ti ora to oy cꞌusi chmacvan, hech mu xcꞌot ti yoꞌntonic ti lajem xa scꞌopilal ti mantaletique yuꞌun ti ital xa ti Cristoe. Jaꞌto mi laj xchꞌumbeic scꞌop ti Cristoe, jaꞌto chlic snaꞌic.
\v 15 Melel asta ti ora to ti cꞌalal chaꞌyic scꞌopilal ti Jesuse hech chaj cꞌu cheꞌel laj stsꞌiba ti Moisese, oy cꞌusi chmacat yaꞌyel ti yoꞌntonic ti jchiꞌiltique. Mu xuꞌ xchꞌunic.
\v 16 Jaꞌ noꞌox mi tsutes yoꞌntonic ti stojol ti Cajvaltique, jaꞌ chtupꞌ ti cꞌusi chmacat ti yoꞌntonique.
\v 17 Yan xa ti cꞌutic chijyacꞌbucutic jnaꞌtic ti Chꞌul Espíritue hech yuꞌun hech ti jnaꞌtic ti mu xa xisventainucutic ti mantaletique. Yuꞌun jaꞌ ti sventa ti Cajvaltique chijcol ti libre yuꞌun.
\v 18 Hech yuꞌun ti hoꞌucutique yuꞌun mu xa cꞌusi chmacat ti coꞌntontique hech yuꞌun jun oyucutic xchiꞌuc ti Cajvaltique hech chaj cꞌu cheꞌel ti espejoe ti tstsac sbaic xchiꞌuc ti squeval ti cꞌacꞌale. Yuꞌun jun oyucutic xchiꞌuc ti Cajvaltique, hech yuꞌun chcacꞌtic ti qꞌuelel cꞌu xꞌelan ti yutsil yoꞌnton ti Diose. Hech yanyanucutic ti qꞌuelel asta coꞌol chijcꞌot o xchiꞌuc ti Cajvaltique. Hech chcꞌot ti pasel cuꞌuntic ti sventa ti Chꞌul Espíritue, jaꞌ ti yacꞌoj sba ch-abtej ti coꞌntontique.
\c 4
\p
\v 1 Yuꞌun hech laj xa yacꞌbun cabtel ti Diose, hech yuꞌun mu xchibaj coꞌnton.
\v 2 Laj xa jcomes scotol ti cꞌusi mucul ti jpas ti jaꞌ chiyacꞌun ti qꞌuexlale. Mu xa xiloꞌlavan, mu xa jyanejesbe ti sjam ti scꞌop ti Diose. Jamal chcal ti cꞌusi melele hech chcacꞌbe snaꞌic scotol crixchanoetic ti lec coꞌnton ti stojol ti Diose.
\v 3 Mi oy muchꞌu mu xaꞌibeic sjam ti lequil achꞌ cꞌope ti cacꞌoj jba ti jchole, yuꞌun jaꞌ onoꞌox ti muchꞌutic chꞌayel chbatique.
\v 4 Yuꞌun ti mu scꞌan xchꞌunique, yuꞌun jaꞌ macbilic yoꞌntonic yuꞌun ti muchꞌu sventainoj ti balumil liꞌto, jaꞌ ti pucuje. Yuꞌun naca me cꞌotuc ti yoꞌntonic ti lequil achꞌ cꞌope, jaꞌ ti tal yacꞌ sba ti milel cuꞌuntic ti Cristoe. Yuꞌun ti hech laj spas ti Cristoe hech laj yacꞌ ti qꞌuelel ti oy yutsil yoꞌnton cuꞌuntic ti Diose.
\v 5 Mu hoꞌucun jcꞌopilal ti jchol. Jaꞌ ti jcholbe scꞌopilal ti Jesucristoe ti jaꞌ Cajvaltic. Ti hoꞌone jaꞌ noꞌox avabatucun ti sventa ti Jesuse.
\v 6 Yuꞌun ti Diose laj xa spas mantal hech chaj cꞌu cheꞌel ti laj yal mantal ti voꞌone ti acꞌo oyuc sac osil, hech isacub. Jaꞌ noꞌox hech ti ora to laj xa yal mantal ti Diose mu xa oyuc ti icꞌ osil ti coꞌntone, jaꞌ puru sac osil xa oy ti coꞌnton. Hech laj xa jnaꞌ ti jelaven spꞌijil stuc ti Cajvaltique.
\s Jaꞌ scꞌopilal ti chijcuxi sbatel osil ti sventa xchꞌuno el coꞌntontic
\p
\v 7 Ti achꞌ jcuxlejaltique quichꞌojtic xchiꞌuc ti jbecꞌtaltic avi to jaꞌ ti pasbil ti lum hech chaj cꞌu cheꞌel pꞌin. Hech chvinaj ti jaꞌ ti sventa ti jelaven spꞌijil ti Diose ti quichꞌojtic ti achꞌ jcuxlejaltique. Maꞌuc ti sventa jpꞌijiltic ti hoꞌucutique.
\v 8 Hech yuꞌun manchuc mi ep ti tos ti vocol chquichꞌe, mu xuꞌ yuꞌun chispajesun. Manchuc mi mu xcaꞌibe sjam ti cꞌu yuꞌun hech chcꞌot ti pasele, mu xquichꞌ mul yuꞌun.
\v 9 Manchuc mi ep chquichꞌ ilbajinel, mu comesbilucun yuꞌun ti Diose. Manchuc mi tsalbil chicꞌot yuꞌunic tscuyic, pero mu tsalbilucun.
\v 10 Buc noꞌox chibat, ti jnaꞌ ti oy muchꞌu tscꞌan chismilun hech chaj cꞌu cheꞌel scꞌan smilic ti Jesuse cꞌalal iꞌay liꞌ ti balumile. Yuꞌun ti cuxulun toe, hech chvinaj ti cuxul ti Jesuse chixchabiun.
\v 11 Yuꞌun jaꞌ chiꞌabtej yuꞌun ti Cajvaltique hech yuꞌun scotol ora oy jcꞌopilal ti tscꞌan chismilucune. Lec ti hech chcꞌot ti pasele yuꞌun hech xuꞌ chcacꞌ ti qꞌuelel ti sventa jbecꞌtal, jaꞌ ti stalel chlaje, ti jaꞌ cuxulun to ti sventa ti Jesuse.
\v 12 Ti hoꞌone chiyalbucun jmilel yuꞌun ti jchol ti scꞌop Diose. Jaꞌuc ti hoꞌoxuque jaꞌ chacuxiic sbatel osil yuꞌun ti chajcholboxuc ti scꞌop Diose.
\p
\v 13 Yuꞌun coꞌol oy xchꞌunojel coꞌnton hech chaj cꞌu cheꞌel ti muchꞌu hech laj yal ti scꞌop Diose: “Yuꞌun jchꞌunoj, hech yuꞌun nicꞌopoj”, ti xchie, hech yuꞌun chicꞌopoj uc.
\v 14 Yuꞌun jchꞌunoj ti yuꞌun laj xchaꞌcuses ti Cajvaltic Jesuse ti Diose, jaꞌ noꞌox hech chixchaꞌcusesun uc ti sventa ti Jesuse, hech coꞌol chijyicꞌucutic ti stojol jcotoltic.
\v 15 Hoꞌoxuc ti aventaic ti cꞌutic chcꞌot ti pasel ti jventae yuꞌun mi chaꞌepajic ti sventa ti chajcholboxuc ti scꞌop Diose, hech más ch-epaj ti muchꞌutic chalbeic vocol ti Diose. Hech más tspasat ti mucꞌ ti Diose.
\p
\v 16 Hech yuꞌun mu specꞌtsaj coꞌnton. Manchuc mi yacꞌoj sba chlaj yip ti jbecꞌtale, scotol cꞌacꞌal yacꞌoj sba ch-an yip ti coꞌntone.
\v 17 Yuꞌun ti vocol ti chquichꞌ ti ora to, jꞌocꞌ noꞌox ti chquichꞌilane. Jaꞌ sventa cutsilal ti jaꞌ jelaven yutsile yuꞌun jaꞌ sventa sbatel osil.
\v 18 Maꞌuc te batem coꞌnton ti jnopilan ti cꞌutic chcꞌot ti pasele. Jaꞌ te batem coꞌnton ti jnopilan scotol ti cꞌutic mu to ti jqꞌueltique. Yuꞌun scotol ti cꞌutic yacꞌoj sba ti jqꞌueltique, jaꞌ atabil noꞌox cꞌacꞌal jaꞌ chtupꞌ. Jaꞌuc scotol ti cꞌutic mu to ti jqꞌueltique, jaꞌ sbatel osil mu xtupꞌ.
\c 5
\p
\v 1 Ti jbecꞌtaltic avi to pasbil ti tsꞌubilum noꞌox, hech yuꞌun jꞌocꞌ noꞌox chtun, ti ora chlaj yip. Pero ti jnaꞌtic ti mi ilaj yip ti jbecꞌtaltic avi to, jaꞌ chba jchiꞌintic ti Diose yoꞌ bu cajchapambil yuꞌun bu chijnaqui sbatel osile.
\v 2 Cꞌalal liꞌoyucutic liꞌ ti balumile, ti jiqꞌuilan ti coꞌntontique yuꞌun ti jcꞌantic ti te oyucutic xa te ti vinajele.
\v 3 Hech yuꞌun mu xa xijchamucutic o.
\v 4 Yuꞌun cꞌalal jnainojtic avi jbecꞌtaltic liꞌto ti chlaj yipe, ti jiqꞌuilan coꞌntontic yuꞌun mu jcꞌantic ti chijchame. Jaꞌ ti jcꞌantic ti te xa oyucutic ti vinajele yuꞌun hech jꞌechꞌel chlaj scꞌopilal ti chijchame. Jaꞌ cuxulucutic sbatel osil o.
\v 5 Yuꞌun ti laj xa scoltaucutic ti Diose, yuꞌun hech jcꞌopilaltic ti chba jchiꞌintic sbatel osile. Jaꞌ señail yacꞌojbucutic ti Chꞌul Espíritue.
\p
\v 6 Hech yuꞌun scotol cꞌacꞌal oy smucꞌul coꞌntontic. Yuꞌun ti jayib xa cꞌacꞌal cuxulucutic liꞌ ti balumile xchiꞌuc avi jbecꞌtaltic liꞌto, ti jnaꞌtic ti xchiꞌinojucutic ti Cajvaltique manchuc mi mu xquilbetic ti sate.
\v 7 Mi nijcꞌot xa ti vinajele, ti jqꞌuelbetic sat, ti jchiꞌintic ti naclej sbatel osil.
\v 8 Hech yuꞌun ti oy smucꞌul coꞌntontique. Yuꞌun jaꞌ más nichim noꞌox coꞌntontic mi nijchame yuꞌun hech chba jchiꞌintic ti ora ti Cajvaltique, hech chcom cuꞌuntic ti jbecꞌtaltic avi to.
\v 9 Hech yuꞌun mi cuxulucutic to chul staucutic, o mi chamenucutic xa chul staucutic ti Cajvaltique, jaꞌ noꞌox más tsots scꞌopilal ti jcꞌantic ti lec chijyilucutic ti Cajvaltique ti ora to. Hech yuꞌun cacꞌojtic persa yuꞌun lec chijcꞌot.
\v 10 Yuꞌun jcotoltic chcꞌo jvaꞌan jbatic ti stojol ti Cristoe yuꞌun hech chixchapanucutic ti cꞌu cheꞌel nijꞌabtej xchiꞌuc ti jbecꞌtaltique, mi lec, mi mu lecuc.
\s Jaꞌ scꞌopilal ti tscꞌan ti Diose ti acꞌo sutes yoꞌntonic yuꞌun smulic scotolic hech mu xa xcontrainat ti Diose
\p
\v 11 Yuꞌun jchꞌunoj ti hech chixchapambucutic jcꞌopilaltic jcotoltic ti Cajvaltique, hech yuꞌun ti chajcholboxuc avaꞌyic ti cꞌu xꞌelan ti coꞌntone yuꞌun hech mu xchibaj avoꞌntonic ti jtojol. Ti Diose chil cꞌu xꞌelan ti coꞌntone. Chcal ti hoꞌoxuc chanaꞌic uc ti avoꞌntonic ti cꞌu xꞌelan ti coꞌntone.
\v 12 Mu yuꞌunuc ti jtoyilan jba yuꞌun ti hech chcale. Jaꞌ noꞌox chacacꞌboxuc anaꞌic ti cꞌu xꞌelan coꞌnton yuꞌun hech toyoluc me avoꞌntonic cuꞌun. Hech chanaꞌic cꞌu cheꞌel chatacꞌbe scꞌop ti yantique ti jaꞌ noꞌox toyol yoꞌntonic mi chapasic ti mucꞌ. Maꞌuc toyol yoꞌntonic tscꞌanic ti lec yoꞌntonique.
\v 13 Mi soquem jol chiscuyucune, hechuc. Jaꞌ noꞌox yuꞌun toyol coꞌnton ti stojol ti Diose. Anaꞌojic ti hoꞌoxuque ti mu yuꞌunuc soquem jol ti cꞌalal laj jcholboxuc ti scꞌop Diose.
\v 14 Yuꞌun ti más toyol coꞌnton chiꞌabtej yuꞌun ti Cristoe, yuꞌun mu xchꞌay ti coꞌnton ti ep laj xcꞌuxubinun ti Cristoe. Yuꞌun jchꞌunoj ti yuꞌun jaꞌ jqꞌuexoltic icham yuꞌun jmultic jcotoltic, hech yuꞌun jcotoltic chamenucutic yuꞌun ti mulile chijyilucutic ti Diose.
\v 15 Yuꞌun ti icham cuꞌuntic jcotoltique, hech yuꞌun hoꞌucutic ti cuxulucutic ti sventae tscꞌan ti mu xa me jventain jbatic. Jaꞌ acꞌo cacꞌ jbatic ti ventainel yuꞌun ti Cajvaltique ti jaꞌ icham cuꞌuntique, ti jaꞌ ichaꞌcuxi ti jventatique.
\v 16 Hech yuꞌun ti hoꞌone mu xa ti jqꞌuel ti crixchanoetique hech chaj cꞌu cheꞌel tsqꞌuel sbaic. Yuꞌun ti stuquique jaꞌ noꞌox tsqꞌuelic ti cꞌu xꞌelan tspas sbaic. Hoꞌoni jaꞌ ti jqꞌuelbe yoꞌntonic cꞌu xꞌelan yoꞌntonic ti stojol ti Diose. Ti voꞌone hech laj jqꞌuel ti Cristoe hech chaj cꞌu cheꞌel tsqꞌuelic ti crixchanoetic ti ora to. Jaꞌuc ti ora to laj xa jnaꞌbe yoꞌnton ti Cristoe.
\v 17 Yuꞌun ti muchꞌu oy ti stojol ti Cristoe, achꞌ crixchano xa. Icom xa yuꞌun ti cꞌu cheꞌel laj snop ti voꞌone. Achꞌuben xa ti cꞌu cheꞌel tsnop ti ora to.
\p
\v 18 Yuꞌun ti achꞌuben xa scotole, jaꞌ ti sventa stuc ti Diose yuꞌun jaꞌ laj xa slecubtasucutic ti sventa ti Cristoe hech yuꞌun mu xa ti jcontraintic ti Diose. Hech laj xa yacꞌbun cabtel hoꞌoni yuꞌun hech ti jlecubtas yantic uc yuꞌun hech mu xa scontrainic ti Dios uque.
\v 19 Yuꞌun ti Diose yuꞌun ti laj stac talel ti Cristoe yuꞌun tscꞌan ti Diose ti acꞌo lecubuc scotol crixchanoetic. Yuꞌun mu scꞌan chacꞌbe castigo yuꞌun smulic. Hech yuꞌun hoꞌoni laj yacꞌbun cabtel yuꞌun ti jventaimbe xcholel ti scꞌope ti jaꞌ chlecubic yuꞌune.
\v 20 Hech yuꞌun hoꞌoni, hoꞌon xqꞌuexolun nicom yuꞌun ti Cristoe. Hech yuꞌun jaꞌ ti Diose ti chayalboxuc vocole. Yuꞌun ti xqꞌuexolun nicom yuꞌun ti Cristoe, hech yuꞌun chacalboxuc. Acꞌo me lecubuc yoꞌnton ti Diose avuꞌunic.
\v 21 Yuꞌun ti Diose laj yacꞌbe xcuch mulil ti jventatic ti Cristoe ti jaꞌ muꞌyuc smul stuque. Hech ti sventa ti Cristoe chijyacꞌbucutic toj coꞌntontic hech chaj cꞌu cheꞌel toj yoꞌnton stuc ti Diose.
\c 6
\p
\v 1 Hech yuꞌun ti hoꞌone yuꞌun coꞌol chiꞌabtej xchiꞌuc ti Diose, chajtaqꞌuioxuc uc. Mu me hoviluc ti oy yutsil yoꞌnton avuꞌunic ti Diose.
\v 2 Yuꞌun hech yaloj ti Diose:
\q Cꞌalal tsta yorail cuꞌun yutsil coꞌnton chajtsacbot acꞌop.
\q Cꞌalal tsta yorail acolelic, chajcoltaoxuc,
\m ti xchie. Ti ora to ista xa yorail ti yutsil yoꞌnton chastsacbot acꞌope. Ista xa yorail ti chacolique.
\p
\v 3 Yuꞌun coꞌol chiꞌabtej xchiꞌuc ti Diose, hech yuꞌun hoꞌoni chcacꞌ persa yuꞌun mu me oyuc jmul ti stojol yan yuꞌun hech mu chopoluc chbat jcꞌopilal yuꞌun ti quichꞌoj cabtele.
\v 4 Yuꞌun yabatun ti Diose hech yuꞌun mu lecuc mi chopol jcꞌopilal. Hech yuꞌun jun coꞌnton ti jtsꞌic vocol, mi ilbajinel, mi uts jbae,
\v 5 mi chquichꞌ acial, mi niticꞌat ti preso, mi chlic sjol ti crixchanoetique, mi mu xmac ti abtel xꞌelane, mi sjunul acꞌubal viqꞌuil jsat yuꞌun, mi muꞌyuc lugar yuꞌun chiveꞌ. Scotol stsꞌic cuꞌun.
\v 6 Yuꞌun ti hoꞌone ti jcꞌan ti lec jcꞌopilal yuꞌun ti toj coꞌntone, yuꞌun ti oy spꞌijil coꞌntone, yuꞌun ti oy perdón ti coꞌntone, yuꞌun ti oy yutsil coꞌntone, yuꞌun ti ventaimbil coꞌnton yuꞌun ti Chꞌul Espíritue, yuꞌun ti chicꞌuxubinvan ti mero melel.
\v 7 Ti jcꞌan ti lec jcꞌopilal yuꞌun ti chcal ti cꞌusi melele ti sventa ti chiyacꞌbun yip coꞌnton ti Diose. Ti jcꞌan ti lec jcꞌopilal yuꞌun ti toj ti jtacꞌbe scꞌop scotol ti muchꞌu chiscontrainune. Ti jcꞌan ti lec jcꞌopilal yuꞌun ti toj chcalbe ti muchꞌu oy palta yuꞌun chquile.
\v 8 Ti jcꞌan ti lec jcꞌopilal manchuc mi chispasucun ti mucꞌ, manchuc mi mu xispasucun ti mucꞌ. Ti jcꞌan ti lec jcꞌopilal manchuc mi chopol batem jcꞌopilal, manchuc mi lec batem jcꞌopilal. Manchuc mi chalic “jloꞌlavanej lume”, mi xchi jcꞌopilale, pero chvinaj ti toj chicꞌopoje.
\v 9 Manchuc mi chalic “mu xcojtiquintutic lume”, mi xchi jcꞌopilale, pero lec ojtiquimbilun. Manchuc mi chalic “jmiltic”, mi xchi jcꞌopilale, pero cuxulun to. Manchuc mi chalic “yacꞌoj sba ch-acꞌbat castigo yuꞌun ti Diose”, mi xchi jcꞌopilale, jaꞌ noꞌox yuꞌun chquichꞌ tojobtasel, muc un chismilun ti Diose.
\v 10 Manchuc mi tscuyic ti chquichꞌ mul, pero scotol ora nichim noꞌox coꞌnton. Manchuc mi meꞌonun chiyilucun, pero ep ti muchꞌu chcacꞌbe scꞌulejal sventa sbatel osil. Manchuc mi muꞌyuc cꞌusi oy cuꞌun liꞌ ti balumil chiyilucun, pero oy cuꞌun scotol, yuꞌun chiyacꞌbun ti Cajvaltique.
\p
\v 11 Quermanotac, hoꞌoxuc ti te oyoxuc te ti Corinto, jamal laj xa calboxuc ti cꞌu xꞌelan ti coꞌntone. Muꞌyuc cꞌusi ti jmuc ti coꞌnton.
\v 12 Yuꞌun cꞌuxoxuc ti coꞌnton. Ti hoꞌoxuque scꞌan to cꞌuxucun ti avoꞌntonic.
\v 13 Yuꞌun ti hoꞌoxuque jun to col jnichꞌonoxuc nacꞌotic. Hech yuꞌun tscꞌan ti coꞌol cꞌux chcaꞌi jbatique.
\s Jaꞌ scꞌopilal ti stemplo ti Diose cꞌotemucutique
\p
\v 14 Mu me junuc chacꞌot xchiꞌuc ti muchꞌutic mu xchꞌunojbuc scꞌop ti Diose. Yuꞌun ¡bu cꞌamba xchiꞌin sbaic ti muchꞌu toj yoꞌntone xchiꞌuc ti muchꞌu chopol yoꞌntone! ¡Bu cꞌamba xchiꞌin sbaic ti sac osile xchiꞌuc ti icꞌ osile!
\v 15 ¡Bu ba jtosuc yoꞌntonic ti Cristoe xchiꞌuc ti pucuje! ¡Bu ba jtosuc coꞌntontic hoꞌucutic ti jchꞌunojbetic scꞌop ti Diose xchiꞌuc ti muchꞌutic mu xchꞌunojbuc scꞌop ti Diose!
\v 16 Parte ti templo yuꞌun ti Diose, parte ti santoetique. Ti hoꞌucutique stemplo ti Diose ti stalel cuxule cꞌotemucutic yuꞌun hech yaloj ti Diose:
\q Ti jnaimbe yoꞌntonic.
\q Ti jchiꞌin.
\q Diosun yuꞌunic chicꞌot.
\q Jaꞌ jchiꞌil chcꞌotic,
\m ti xchie.
\v 17 Hech yuꞌun chal uc:
\q Pꞌevo abaic xchiꞌuc ti crixchanoetique.
\q Mu xa me xachiꞌinic, xchi ti Cajvaltic Diose.
\q Comeso ti cꞌusi chasbolibtasoxuque,
\q hech chaquicꞌoxuc ti jtojol.
\q
\v 18 Atotic chicꞌot.
\q Ti hoꞌoxuque col jnichꞌon chacꞌotic,
\m xchi ti Cajvaltic Diose jaꞌ ti scotol sventainoje. Jaꞌ jcꞌopilaltic jcotoltic.
\c 7
\p
\v 1 Hech yuꞌun hoꞌoxuc ti cꞌuxoxuc ti coꞌntone, yuꞌun hech albil jcꞌopilaltic ti yol snichꞌonucutic ti Diose nijcꞌotucutic xa, jaꞌ lec acꞌo jcomestic scotol ti cꞌusi chisbolibtasucutic, mi jbecꞌtaltic, mi coꞌntontic. Hech acꞌo huꞌuc cuꞌuntic ti chcacꞌ jbatic ti abatinel yuꞌun ti Diose yuꞌun ti jpastic ti mucꞌ ti Diose.
\s Jaꞌ scꞌopilal ti nichim noꞌox yoꞌnton ti Pabloe yuꞌun ti laj sutes yoꞌntonic ti quermanotic te ti Corintoe
\p
\v 2 Lecuc me avoꞌntonic cuꞌun. Mi junuc muꞌyuc muchꞌu laj jsaꞌbe smul. Muꞌyuc muchꞌu laj jbolibtas. Muꞌyuc muchꞌu laj jloꞌlabe staqꞌuin.
\v 3 Yuꞌun hech chcal, mu yuꞌunuc oy amulic cuꞌun. Calojboxuc xa ti ep cꞌuxoxuc ti coꞌntone hech yuꞌun mi chachamic, acꞌo chamucun uc. Mi cuxuloxuc to jcꞌan ti cuxulun to uc.
\v 4 Jun coꞌnton avuꞌunic. Toyol coꞌnton avuꞌunic. Manchuc mi ep chquichꞌ vocol, mucꞌuben coꞌnton, nichim noꞌox coꞌnton avuꞌunic.
\p
\v 5 Yuꞌun cꞌalal nihul liꞌ ti estado Macedoniae, mu yuꞌunuc más laj jcux coꞌnton. Yuꞌun ep liquem cꞌop hul jta. Maꞌuc noꞌox lume, oy to yan. Jaꞌ chloꞌlaj coꞌnton yuꞌun muc jta ti Titoe.
\v 6 Ti Diose tsmucꞌubtasbe yoꞌntonic ti muchꞌutic chichꞌic mule, hech yuꞌun laj smucꞌubtasbun coꞌnton yuꞌun ital ti Titoe.
\v 7 Maꞌuc noꞌox imucꞌub coꞌnton yuꞌun ti ital ti Titoe. Jaꞌ imucꞌub coꞌnton uc yuꞌun imucꞌubtasbat tal yoꞌnton avuꞌunic. Laj xcholbun caꞌi ti toyol avoꞌntonic chacꞌan chaqꞌuelucune, ti chavichꞌic mul yuꞌun ti laj avacꞌbucun quichꞌ mule, ti toyol avoꞌntonic cuꞌun ti ora to. Hech yuꞌun más nichim noꞌox coꞌnton avuꞌunic.
\p
\v 8 Yuꞌun ti laj cacꞌboxuc avichꞌic mul yuꞌun ti jcartae, ti jnaꞌ ti mu chopoluc yuꞌun ti hech laj jpase. Chib oxib cꞌacꞌal iloꞌlaj coꞌnton yuꞌun ti hech laj calboxuque yuꞌun laj caꞌi ti ep chavichꞌic mule.
\v 9 Ti ora to nichim noꞌox coꞌnton yuꞌun hech icꞌot ti pasel. Maꞌuc nichim noꞌox coꞌnton yuꞌun ti laj avichꞌic mule, jaꞌ nichim noꞌox coꞌnton yuꞌun ti laj avichꞌic mul yuꞌun ti amulique hech yuꞌun laj asutes avoꞌntonic yuꞌun amulic. Yuꞌun jaꞌ sventa ti Diose ti laj avichꞌic mule. Mu yuꞌunuc más chopol nabatic yuꞌun ti hech laj jtsꞌibaboxuque.
\v 10 Yuꞌun ti muchꞌu chichꞌ mul ti sventa ti Diose, jaꞌ sventa scolel chcꞌot yuꞌun hech tsutes yoꞌnton yuꞌun ti smule. Hech patil mu xichꞌ mul yuꞌun ti hech laj spase. Ti muchꞌu chichꞌ mul ti sventa noꞌox ti balumile, jaꞌ sventa chꞌayel chbat.
\v 11 Laj xa avilic ti yuꞌun ti hech laj avichꞌic mul ti sventa ti Diose ep iloꞌlaj avoꞌntonic yuꞌun, naqꞌuexavic, naxiꞌic, laj acꞌanic ti lec chaquil, toyol avoꞌntonic yuꞌun acꞌo chapajuc, laj avacꞌbeic castigo ti muchꞌu staoj smule. Hech muꞌyuc xa amulic ti sventa ti hech laj apasique.
\v 12 Yuꞌun ti hech laj jtsꞌibaboxuque, maꞌuc noꞌox ti sventa ti muchꞌu laj sta smule, maꞌuc noꞌox ti sventa ti muchꞌu laj sta smul ti stojole. Jaꞌ yuꞌun hech chanaꞌic ti toyol coꞌnton avuꞌunic ti stojol ti Diose.
\p
\v 13 Hech yuꞌun ti hoꞌone mucꞌuben xa coꞌnton avuꞌunic. Maꞌuc noꞌox mucꞌuben xa coꞌnton ti hoꞌone, jaꞌ más imucꞌub yoꞌnton ti Titoe, hech nichim noꞌox yoꞌnton ti ora to avuꞌunic acotolic.
\v 14 Yuꞌun nichim noꞌox coꞌnton avuꞌunic laj jcholbe yaꞌi acꞌopilalic ti Titoe hech yuꞌun mu xiqꞌuexav avuꞌunic ti ora to. Yuꞌun melel scotol ti cꞌusi laj calboxuque, hech onoꞌox uc melel scotol ti acꞌopilale ti laj calbe yaꞌi ti Titoe.
\v 15 Echꞌem to cꞌux chayaꞌyoxuc ti ora to ti Titoe yuꞌun tsnaꞌ ti lec laj achꞌumbeic smantal, ti laj apasic ti mucꞌ ti cꞌalal laj aviqꞌuic ti atojolique, ti naxiꞌic ti stojol.
\v 16 Hech lec nichim noꞌox coꞌnton ti ora to yuꞌun ijunaj coꞌnton avuꞌunic.
\c 8
\s Jaꞌ scꞌopilal ti taqꞌuin ti tstsob ti quermanotique yuꞌun tscolta ti yan quermanotique
\p
\v 1 Quermanotac, chacacꞌbe anaꞌic ti ep iꞌacꞌbat yutsil yoꞌntonic yuꞌun ti Diose ti jujuchop ti jchꞌunojeletique ti liꞌoyic ti estado Macedoniae.
\v 2 Cꞌalal yacꞌoj sba chichꞌic ep vocol, yutsil yoꞌntonic laj stsobbeic ep smoton yan quermanotic. Yuꞌun nichim noꞌox yoꞌntonic manchuc mi oy meꞌanal chaꞌyic.
\v 3 Hoꞌon laj quil ti yutsil yoꞌntonic laj yaqꞌuic ti motonil staqꞌuinic. Jujun laj yaqꞌuic cꞌu cheꞌel xuꞌ yuꞌunic. Ep laj yaqꞌuic asta mu xa xuꞌ yuꞌunic xꞌelan.
\v 4 Mu yuꞌunuc laj calbe. Jaꞌ stuc lic scꞌambun vocol ti acꞌo spasic lequil abtel uc yuꞌun tscoltaic uc ti muchꞌutic chichꞌic vocol ti coꞌol oyic ti stojol ti Diose xchiꞌuque.
\v 5 Laj jcuy ti hech noꞌox tscꞌan yoꞌntonic laj yacꞌ ti taqꞌuine. Mu laj jnaꞌ ti jaꞌ jbael laj yacꞌ sbaic ti scꞌob ti Cajvaltique. Jaꞌ laj yacꞌ sbaic ti abatinel ti jtojol uc yuꞌun hech laj scꞌan yoꞌnton ti Diose.
\v 6 Hech yuꞌun ti hoꞌone laj xa calbe mantal ti Titoe yuꞌun ti jaꞌ laj xa sliques ti yuꞌun chatsobic ti taqꞌuine asta acꞌo suꞌtes scotol. Hech xuꞌ avuꞌunic chavacꞌ ti qꞌuelel yutsil avoꞌntonic uc ti stojol ti quermanotic ti chichꞌic vocole.
\v 7 Yuꞌun scotol yan huꞌem xa avuꞌunic. Chachꞌunic ti scotol xuꞌ yuꞌun ti Diose, lec chanaꞌ chavalic scꞌop Dios, oy spꞌijil avoꞌntonic, toyol avoꞌntonic, cꞌuxun ti avoꞌntonic, hech yuꞌun acꞌo huꞌuc avuꞌunic uc ti chavaqꞌuic ti motonil ti ataqꞌuinique.
\p
\v 8 Mu yuꞌunuc chajpasoxuc ti mantal yuꞌun ti persa chatsobic ti taqꞌuine. Jaꞌ noꞌox yuꞌun chacacꞌbe anaꞌic ti toyol yoꞌntonic ti yan quermanotique. Hech yuꞌun te ti jqꞌuel ti melel ti chacꞌuxubinvanic uc ti hoꞌoxuque.
\v 9 Yuꞌun anaꞌojic xa ti ep yutsil yoꞌnton avuꞌunic ti Cajvaltic Jesucristoe. Stuc ti jcꞌuleje jaꞌ laj spas sba ti meꞌon ti aventaic. Yuꞌun ti meꞌon laj yacꞌ sbae, yuꞌun chayacꞌboxuc scotol ti cꞌusi chtun avuꞌunic sbatel osil.
\p
\v 10 Chacalbeic cꞌusi ti jnop ti ora to. Yuꞌun hoꞌoxuc ti primero laj aliquesic ti tsobel ti taqꞌuine yuꞌun ti chacoltaic ti quermanotic ti chichꞌic vocole, hech yuꞌun mu lecuc mi te chquechaj avuꞌunic.
\v 11 Hech yuꞌun tsꞌacubtaso. Yuꞌun toyol avoꞌntonic laj aliquesic, hech yuꞌun toyoluc me avoꞌntonic acꞌo huꞌuc avuꞌunic ti cꞌu cheꞌel xuꞌ avuꞌunic jujun.
\v 12 Yuꞌun mi yutsil coꞌntontic chcacꞌtic ti cꞌu yepal xuꞌ cuꞌuntique, hech lec chijyilucutic ti Diose. Mu yuꞌunuc jaꞌ chiscꞌambucutic ti mu to ti jtatique.
\p
\v 13 Mu yuꞌunuc chacacꞌboxuc avichꞌic vocol yuꞌun ti hech chacolta ti quermanotique.
\v 14 Jaꞌ tscꞌan ti hech chaj cꞌu cheꞌel oy cuꞌuntic, jaꞌ tscꞌan ti hech oy yuꞌunic ti yan quermanotique. Yuꞌun oy cꞌusi oy avuꞌunic ti ora to, hech yuꞌun chavacꞌbeic ti muchꞌutic muꞌyuc cꞌusi oy yuꞌunic ti ora to. Ti yan cꞌacꞌal mi oy cꞌusi oy yuꞌunique, hech chlic yacꞌboxuc uc mi muꞌyuc cꞌusi oy avuꞌunic. Hech coꞌol chacolta abaic acotolic.
\v 15 Hech chcꞌot ti pasel hech chaj cꞌu cheꞌel tsꞌibabil ti scꞌop Diose: “Ti muchꞌu ep laj stsob, laj sqꞌuelambe yan hech yuꞌun muꞌyuc sobril icom. Ti muchꞌu jutuc noꞌox laj stsob, yuꞌun icoltaat yuꞌun ti yantique hech yuꞌun ta yutsil inel yuꞌun”, ti xchie.
\s Jaꞌ scꞌopilal ti Titoe xchiꞌuc ti muchꞌutic chchiꞌinic batel
\p
\v 16 Hocol yal ti Diose ti hech iꞌacꞌbat ti yoꞌnton yuꞌun ti Diose ti Titoe ti coꞌol toyol coꞌntontutic xchiꞌuc ti atojolic.
\v 17 Yuꞌun ti Titoe laj yacꞌ ti yoꞌnton ti cꞌu cheꞌel laj calbee. Yuꞌun toyol yoꞌnton avuꞌunic uc, hech yuꞌun yutsil yoꞌnton chtal sqꞌueloxuc.
\p
\v 18 Jaꞌ chcacꞌbe xchiꞌin tal ti jun quermanotic ti puquem scꞌopilal ti stojol scotol ti jchꞌunojeletique ti jaꞌ lec ch-abtej yuꞌun ti lequil achꞌ cꞌope.
\v 19 Maꞌuc noꞌox hech. Jaꞌ tꞌujbil yuꞌun scotol ti jchꞌunojeletique yuꞌun ti jchiꞌin batel yuꞌun chba cacꞌ comel ti motonil ti chavaqꞌuique. Hoꞌon jventainoj yuꞌun hech lec chbat scꞌopilal ti Cajvaltique. Hech chvinaj ti hoꞌon uc ti jcolta ti quermanotique. Lec chcaꞌi ti oy jchiꞌil laj saꞌbun ti quermanotique.
\v 20 Yuꞌun mu jcꞌan mi oy muchꞌu chisticꞌbun jmul yuꞌun ti ep motonil taqꞌuin chquichꞌ batele.
\v 21 Yuꞌun ti jcꞌan ti jpas cꞌusi lec ti stojol ti Diose xchiꞌuc ti stojol uc ti crixchanoetique.
\p
\v 22 Jaꞌ chcacꞌbe xchiꞌin tal uc ti quermanotique ti quiloj ep vuelta ti toyol yoꞌntone. Más toyol yoꞌnton ti ora to yuꞌun jun yoꞌnton ti atojolic.
\v 23 Mi oy muchꞌu tsjacꞌ yuꞌun ti te chcꞌot ti Titoe, jaꞌ jchiꞌil jbatutic ti abtel te ti atojolic. Jaꞌuc ti yan quermanotic ti te chtalic uque, jaꞌ tꞌujbilic yuꞌun ti jchꞌunojeletique yuꞌun lec cꞌotem scꞌopilal yuꞌunic ti Cristoe.
\v 24 Hech yuꞌun aqꞌuic me ti qꞌuelel ti cꞌux chavaꞌyic ti quermanotique ti te chtal ti atojolique. Mu me hoviluc ti lec batem acꞌopilal cuꞌun ti stojol scotol ti buc noꞌox oy ti jchꞌunojeletique.
\c 9
\p
\v 1 Mu persauc chacalboxuc ti chacoltaic ti quermanotique ti chichꞌic vocole.
\v 2 Yuꞌun anaꞌojic xa atuquic. Yuꞌun calojbe xa acꞌopilalic ti quermanotique ti liꞌoyic ti estado Macedoniae ti jun habi xa laj aliquesic stsobel ti taqꞌuine hoꞌoxuc ti te oyoxuc ti estado Acayae. Hech yuꞌun uc ti ora to ep ti quermanotic yacꞌojic persa tstsobic staqꞌuinic liꞌ ti Macedonia yuꞌun yaꞌyoj acꞌopilalic.
\v 3 Hech yuꞌun ti jcajtac talel ti atojolic ti quermanotique yuꞌun chascoltaoxuc yuꞌun hech chapaloxuc chul jtaoxuc hech chaj cꞌu cheꞌel yaꞌyojic. Hech mu hoviluc chcꞌot ti lec batem acꞌopilalic cuꞌun.
\v 4 Yuꞌun repenta mi ti jchiꞌin talel quermanotic ti liꞌ chliquic ti Macedoniae, mi mu chapalucoxuc chul jtaoxuc, chiqꞌuexav avuꞌunic. Hoꞌoxuc chaqꞌuexavic uc yuꞌun toyol coꞌnton avuꞌunic laj xa jcholboxuc acꞌopilalic.
\v 5 Hech yuꞌun laj jnop ti jcajtac talel ti quermanotic ti laj calbote yuꞌun chbaejic talel cuꞌun ti yoꞌ bu oyoxuque hech chcꞌot xchapanic jbael ti motonil ti avalojic ti chavaqꞌuique. Hech chvinaj ti yutsil avoꞌntonic laj avaqꞌuic. Maꞌuc ti hoꞌon laj jsujoxuc.
\p
\v 6 Naꞌic me ti muchꞌu jutuc noꞌox chacꞌ, jutuc noꞌox tsta ti bendicione. Ti muchꞌu ep chacꞌ, ep tsta ti bendicione.
\v 7 Jujun acꞌo yacꞌ ti cꞌu yepal snopoj ti yoꞌnton. Mu me vocoluc ti chaqꞌue. Mu me ti sujeluc chacꞌ. Yuꞌun jaꞌ cꞌux ti yoꞌnton ti Diose ti muchꞌu nichim noꞌox yoꞌnton chacꞌ ti motonil cꞌusi oy yuꞌun.
\v 8 Jelaven spꞌijil ti Diose. Xuꞌ chayacꞌboxuc avichꞌic ep bendición yuꞌun hech scotol cꞌacꞌal oy avuꞌunic scotol ti cꞌusi chtun avuꞌunique hech xuꞌ avuꞌunic chapasic scotol lequil abtel.
\v 9 Yuꞌun hech tsꞌibabil ti scꞌop Diose:
\q Ti muchꞌu laj spuc ti cꞌusi oy yuꞌune, ti oy cꞌusi laj sqꞌuelambe ti meꞌonetique, jaꞌ ch-acꞌbat yan yuꞌun hech xuꞌ tsqꞌuelanilan batel, ti xchie.
\m
\v 10 Hech chaj cꞌu cheꞌel ti chpꞌolilan ti jtsꞌunubtic ti yacꞌojbucutic ti Diose yuꞌun hech ti jtatic jveꞌeltic, jaꞌ noꞌox hech uc chayaqꞌuilamboxuc scotol ti cꞌutic avuꞌunique. Tspꞌolesilan yuꞌun hech xuꞌ chacoltailan scotol cꞌacꞌal ti quermanotic ti chichꞌic vocole. Mi más ep chatailanic, hech yuꞌun más ep chavacꞌbe ti quermanotique yuꞌun chacoltaic.
\v 11 Ti Diose chayacꞌboxuc ep bendición yuꞌun hech más ep xuꞌ chavacꞌ ti motonil ti ataqꞌuinique. Hech yuꞌun cꞌalal chquichꞌ batel ti smoton avuꞌunique yuꞌun chcacꞌbe ti quermanotic ti chichꞌic vocole, jaꞌ hocol aval chutic ti Diose yuꞌun ti hech laj acoltaique.
\v 12 Yuꞌun ti hech chacoltaic ti quermanotique, chib ti cꞌusi lec chcꞌot ti pasele. Jaꞌ chichꞌic coltael ti muchꞌutic uts sbaique. Jaꞌ tspasat ti mucꞌ uc ti Diose.
\v 13 Yuꞌun ti quermanotic ti chichꞌic coltael avuꞌunique hech chilic ti chachꞌumbeic smantal ti Cristoe ti “cꞌux me xavaꞌi abaic”, ti xchie. Yuꞌun ti hech laj yichꞌic coltael avuꞌunique, hech chalic: “Hocol yal ti Diose ti ep laj scoltauntutic ti quermanotic te ti Corinto”, xchiic. Hech nichim noꞌox yoꞌnton ti jchꞌunojeletique avuꞌunic ti buc noꞌox oyique.
\v 14 Ti quermanotic ti hech chichꞌic coltael avuꞌunique, tscꞌopon Dios ti atojolic. Más toyol yoꞌntonic ti atojolic yuꞌun ti ep yacꞌojboxuc yutsil avoꞌntonic ti Diose.
\v 15 Hocol yalbucutic ti Diose ti hech yacꞌojbucutic yutsil coꞌntontic ti sventa ti Jesucristoe. Mu jnaꞌtic xa cꞌusi chcaltic yuꞌun jun yutsil ti jyalel.
\c 10
\s Jaꞌ scꞌopilal ti Pabloe ti cꞌu xꞌelan ti yabtele
\p
\v 1 Chacalbeic vocol ti ora to, hoꞌon ti Pabloune, hoꞌon ti hech jcꞌopilal avuꞌunique: “Lec chcꞌopoj cꞌalal liꞌ jchiꞌinojtique. Cꞌalal nom oy, tsots chal mantal”, ti xachiique. Hech chaj cꞌu cheꞌel chiscꞌoponucutic ti Cristoe, jaꞌ noꞌox hech chajcꞌoponoxuc ti hoꞌoxuque. Mu tsotsuc chajcꞌoponoxuc.
\v 2 Hech yuꞌun avocoluc mu me tsotsuc chcꞌot jpasoxuc ti mantal. Ti muchꞌutic chiyalbun jcꞌopilal ti jaꞌ noꞌox ti jpas hech chaj cꞌu cheꞌel tspas crixchanoetic, ta me xcꞌo jchapan.
\v 3 Melel ti crixchanoun onoꞌox, pero mu hechuc chitsalvan hech chaj cꞌu cheꞌel tstsalvan ti crixchanoetique.
\v 4 Yuꞌun ti hoꞌone maꞌuc sventa jpꞌijil jtuc ti chitsalvane. Jaꞌ ti sventa ti spꞌijil ti Diose ti xuꞌ cuꞌun ti jtsal scotol ti cꞌutic chopole.
\v 5 Hech yuꞌun ti jtupꞌbe scꞌop ti muchꞌutic pꞌij scuyoj sbaique xchiꞌuc ti muchꞌutic tstoy sbaic ti Diose, ti tscontraimbe spꞌijil ti Diose. Ti jtsac scotol ti cꞌusi tsnopique yuꞌun acꞌo xchꞌumbe smantal ti Cristoe.
\v 6 Ti hoꞌoxuque mi chquil ti chacꞌanic tojobtasel, hech yuꞌun chapalun yuꞌun chcacꞌbe castigo mi oy muchꞌu mu scꞌan xchꞌun mantal.
\p
\v 7 Jaꞌ noꞌox chapasic ti mucꞌ ti muchꞌu pꞌij chavilique, jaꞌ ti yol snichꞌonun Cristo, ti xchie. Muc un chaqꞌuelic mi jelbil yoꞌnton. Hoꞌoni yol snichꞌonun Cristo ti mero melel. Hech yuꞌun nopo lec avaꞌyic.
\v 8 Manchuc mi ti jtoy jba chacuyic yuꞌun ti hech cacꞌoj jba chajpasoxuc ti mantal, mu xiꞌacꞌat ti qꞌuexlal yuꞌun. Yuꞌun jaꞌ cabtel laj yacꞌbun ti Cajvaltique yuꞌun chajpꞌijubtasoxuc, maꞌuc cabtel yuꞌun chajbolibtasoxuc.
\v 9 Yuꞌun chajtacboxuc tal ti acartaique, mu yuꞌunuc chajsibtasoxuc.
\v 10 Yuꞌun oy chalic: “Oy yip ti scꞌop ti scartae. Tsots scꞌopilal ti scartae. Cꞌalal liꞌoy ti jtojoltic, muꞌyuc yip. Mu tsotsuc scꞌopilal ti cꞌutic chale”, xchiic.
\v 11 Ti muchꞌu hech chale, acꞌo snaꞌic ti jaꞌ noꞌox hech chaj cꞌu cheꞌel laj cal ti carta cꞌalal nom oyun, jaꞌ noꞌox hech chcꞌo jpas.
\p
\v 12 Yuꞌun ti hech chcale, mu yuꞌunuc hech ti jtoy jba hech chaj cꞌu cheꞌel tspas ti muchꞌutic más lec scꞌopilal chal sbaique. Mu yuꞌunuc ti jcoꞌoltajes jba xchiꞌuc. Yuꞌun stuc noꞌox tsnopic ti cꞌu cheꞌel más lec chcꞌotic tscuyic. Jaꞌ noꞌox tsqꞌuel cꞌu cheꞌel tspas xchiꞌil uc. Hech yuꞌun muꞌyuc srazonic chcꞌotic.
\v 13 Ti hoꞌone mu yuꞌunuc chba jticꞌ jba ti bu mu cabteluque. Dios chistojobtasun ti butic chba abtejucune. Jaꞌ laj stojobtasun ti te xa niꞌay tal ti alumalic uc, hech yuꞌun jventainojoxuc uc.
\v 14 Mu yuꞌunuc jaꞌ noꞌox ti jtoy jba yuꞌun ti hech chcal ti jventainojoxuque. Yuꞌun hoꞌon nom nixanav hech primero cꞌot jcholboxuc scꞌopilal ti Cristoe.
\v 15 Ti hoꞌone mu yuꞌunuc chcal ti jaꞌ cabtel ti bu mu cabteluque hech chaj cꞌu cheꞌel tspasic stuquique. Ti jchꞌun ti más ch-an xchꞌunojel avoꞌntonic hech xuꞌ chajcomesoxuc.
\v 16 Hech xuꞌ chba jchol ti lequil achꞌ cꞌope ti bu yan balumile ti sjelavel batel ti yoꞌ bu oyoxuque ti bu muꞌyuc to muchꞌu ch-abteje. Hech yuꞌun muc un ti jpojbe yabtel yan.
\p
\v 17 Ti muchꞌutic toyol yoꞌnton te ti atojolic tscuyique, mu me jaꞌuc toyol yoꞌnton chacꞌ sbaic ti pasel ti mucꞌ stuquic. Jaꞌuc me toyol yoꞌntonic chaqꞌuic ti pasel ti mucꞌ ti Cajvaltique.
\v 18 Yuꞌun maꞌuc lec cꞌotem ti muchꞌu lec scꞌopilal chal sba stuque. Jaꞌ lec cꞌotem ti muchꞌu lec scꞌopilal ch-albat yuꞌun ti Cajvaltique.
\c 11
\s Jaꞌ scꞌopilal ti muchꞌutic jcholcꞌopetic scuyoj sbaique
\p
\v 1 Taca xatsꞌiquic ti hech chcal hech chaj cꞌu cheꞌel ti muchꞌutic bolique, aꞌyo me avaꞌyic avocoluc.
\v 2 Yuꞌun toyol coꞌnton ti jventainojoxuque ti sventa ti Diose, hech yuꞌun ti hoꞌone jaꞌ hech chaj cꞌu cheꞌel stot smeꞌ soltera tseb. Yuꞌun jacꞌbil xa yuꞌun jun vinic ti stsebe hech yuꞌun chchabi mu scꞌan mi tsta smul ti stsebe yuꞌun mu me chopoluc ch-ilat yuꞌun ti smalale. Jaꞌ noꞌox hech ti hoꞌone jaꞌ hech coꞌnton chajchabioxuc, yuꞌun hech mu me chopoluc chaꞌilatic yuꞌun ti Cristoe.
\v 3 Jaꞌ chixiꞌ mi oy chasbolibtasboxuc avoꞌntonic hech chaj cꞌu cheꞌel ibolibtasbat yoꞌnton ti Evae hech ilaj ti loꞌlael yuꞌun ti pꞌij icꞌopoj xꞌelan ti chone. Repenta hech chcꞌot ti pasel avuꞌunic uc hech chlic chibajuc avoꞌntonic ti stojol ti Cristoe.
\v 4 Yuꞌun cꞌuc noꞌox cꞌop chachꞌunic chcaꞌi. Mi oy muchꞌu yan chtal xcholboxuc scꞌopilal ti Jesuse ti mu xcoꞌolaj xchiꞌuc hech chaj cꞌu cheꞌel laj jcholboxuque, o mi chaxcholboxuc scꞌopilal ti Chꞌul Espíritue ti avichꞌojic xae ti mu xcoꞌolaj sjam hech chaj cꞌu cheꞌel laj jcholboxuque, o mi chaxcholboxuc yan achꞌ cꞌop ti maꞌuc ti laj xa apasic ti muqꞌue, jaꞌ scotol chachꞌunic.
\v 5 Jun to jaꞌ más tsots yabtel yichꞌojic ti jcholcꞌopetic scuyoj sbaique. Hoꞌoni jun to muꞌyuc tsots cabtel chcꞌot.
\v 6 Manchuc mi mu jnaꞌ lec chicꞌopoj, mu yuꞌunuc muꞌyuc spꞌijil coꞌnton. Scotol cacꞌojboxuc anaꞌic acotolic.
\p
\v 7 ¿Mi jaꞌ jmul cꞌotem avuꞌunic ti laj jbicꞌtajes jba yuꞌun hech mucꞌ chacꞌotic ti hoꞌoxuque? Yuꞌun muꞌyuc bu laj jcꞌamboxuc ataqꞌuinic yuꞌun ti laj jcholboxuc avaꞌyic ti lequil achꞌ cꞌope, jaꞌ ti scꞌop ti Diose.
\v 8 Laj jpojbe yaꞌyel staqꞌuin ti yan jchꞌunojeletique yuꞌun jaꞌ laj yacꞌbucun ti cꞌutic itun cuꞌun ti cꞌalal yacꞌoj sba chiꞌabtej ti atojolic ti hoꞌoxuque.
\v 9 Cꞌalal jchiꞌinojoxuc to, cꞌalal ilaj ti jtaqꞌuine, muꞌyuc bu laj jcꞌamboxuc. Yuꞌun ti cꞌusi itun cuꞌune jaꞌ laj yacꞌbucun ti quermanotic ti italic ti Macedoniae. Hech niveꞌ, hech muc xacacꞌboxuc avichꞌic vocol. Hech ti jpasilan o.
\v 10 Yuꞌun toyol coꞌnton ti acꞌo pucuc ti scꞌop ti Cristoe ti jaꞌ melele, hech yuꞌun toyol coꞌnton mu xcacꞌbe svocol ti muchꞌu tscꞌan chchꞌumbe scꞌop ti Cristoe. Yuꞌun ti hech oy ti coꞌntone, hech yuꞌun muꞌyuc muchꞌu te ti estado Acaya xuꞌ chispajesun.
\v 11 Yuꞌun ti mu jcꞌan chajcꞌamboxuc ataqꞌuinic, mu yuꞌunuc mu cꞌuxoxuc ti coꞌnton. Jaꞌ snaꞌ ti Diose ti cꞌuxoxuc ti coꞌntone.
\p
\v 12 Ti cꞌusi cacꞌoj jba ti jpase, ta onoꞌox jpasilan yuꞌun hech muꞌyuc cꞌusi xuꞌ chalic ti muchꞌutic scꞌan ti hech chquichꞌ coltael avuꞌunic hech chaj cꞌu cheꞌel tscꞌanic coltael stuquic, jaꞌ ti muchꞌutic chacꞌ sbaic ti pasel ti mucꞌ yuꞌun ti yabtele.
\v 13 Yuꞌun lume jaꞌ nopbilal jcholcꞌopetic, jꞌabteletic ti chloꞌlavanique, scuyoj sbaic ti jcholcꞌopetic yuꞌun ti Cristoe.
\v 14 Mu me xchꞌay avoꞌntonic yuꞌun ti hech tspasique. Stalel hech tspasic yuꞌun hech tspas uc ti Satanase. Xchꞌul abat Dios xꞌelan ti chcꞌopoj ti Satanase.
\v 15 Hech yuꞌun stalelic onoꞌox ti chloꞌlavan ti yabate. Sventainoj ti cꞌusi leque xꞌelan. Ti cꞌu cheꞌel iꞌabtejic, jaꞌ hech ch-acꞌbat stojic.
\s Jaꞌ scꞌopilal ti ep laj yichꞌ vocol ti Pabloe yuꞌun ti laj xchol ti scꞌop Diose
\p
\v 16 Chacalbeic yan vuelta, mu me xacuyic ti nibolib xae. Mi hech chacuyucune, hech xuꞌ chacalboxuc bol cꞌop uc yuꞌun xuꞌ ti jtoy jba uc.
\v 17 Yuꞌun hech chcale, maꞌuc laj yalbun ti Cajvaltique. Jaꞌ noꞌox ti jtoy jba hech chaj cꞌu cheꞌel ti muchꞌu bole.
\v 18 Yuꞌun ep ti muchꞌutic tstoy sbaic yuꞌun ti cꞌutic xuꞌ yuꞌun tspasic jaꞌ noꞌox hechun uc xuꞌ cuꞌun ti jtoy jba uc.
\v 19 Manchuc mi pꞌijoxuc chacuy abaic, yacꞌoj sba chalajic ti loꞌlael yuꞌun jun avoꞌntonic chachꞌunic ti cꞌutic chaxcholboxuc ti muchꞌutic bolique.
\v 20 Yuꞌun stsꞌic avuꞌunic mi oy muchꞌu chayacꞌoxuc ti mozoil, mi oy muchꞌu chasloꞌlabot ataqꞌuinic, mi oy muchꞌu chaspojboxuc cꞌusi oy avuꞌunic, mi oy muchꞌu tstoy sba ti atojolic, mi oy muchꞌu chasmajoxuc asat. Yuꞌun scotol chatsꞌiquic.
\v 21 Mi hech tscꞌan ti jpase, hoꞌon ti jcholcꞌopune, muꞌyuc quip obi yuꞌun mu hechuc laj jpas hoꞌoni.
\p Ti cꞌutic chaꞌal xuꞌ tstoy sbaic yuꞌune, jaꞌ noꞌox hechun uc. Xuꞌ chicꞌopoj hech chaj cꞌu cheꞌel ti muchꞌutic bole.
\v 22 Lume hebreoetic. Hoꞌon hebreoun uc. Lume yelnichꞌon ti Israele. Hoꞌon yelnichꞌonun ti Israel uque. Lume yelnichꞌon ti Abrahame. Hoꞌon yelnichꞌonun uc ti Abrahame.
\v 23 Lume yabat Cristo scuyoj sbaic. Hoꞌone yabatun Cristo ti mero melel. Hech chcal yuꞌun chanaꞌic ti xuꞌ chicꞌopoj hech chaj cꞌu cheꞌel ti muchꞌutic bolique. Más echꞌem abtejemun hoꞌoni. Mu pꞌisbiluc laj quichꞌ acial. Ep vuelta niticꞌat ti chuquel. Ep vuelta cꞌan lajucun ti milel.
\v 24 Hoꞌob vuelta niꞌacꞌbat quichꞌ acial yuꞌun ti jchiꞌiltaque, hoꞌontutic ti coꞌol judiountutic xchiꞌuque. Nucul ti aciale. Jun muc sta chaꞌvinic ti bitsꞌ laj yacꞌbucun jujun vuelta.
\v 25 Oxib vuelta laj quichꞌ majel ti teꞌ. Jun vuelta laj yacꞌbucun ton. Oxib vuelta laj quil ivocꞌ ti barco yoꞌ bu tiqꞌuilune. Jun acꞌubal xchiꞌuc jun cꞌacꞌal te nicajet ti oꞌlol nab.
\v 26 Ep vuelta cꞌalal nixanav batel ti be oy jvocol yuꞌun inoj ti ucꞌumetique. Oy jvocol yuꞌun chtal jꞌelecꞌ. Laj yilbajinucun ti jchiꞌiltique, hoꞌucutic ti coꞌol judioucutic xchiꞌuque. Laj yilbajinucun ti achiꞌiltaque, hoꞌoxuc ti coꞌol yanlum crixchanooxuc xchiꞌuque. Laj quichꞌ vocol ti yut jteclumetic. Laj quichꞌ vocol uc te oyun ti xocol balumil. Oy jvocol uc te oyun ti nab. Laj yilbajinucun uc ti muchꞌutic quermanotic scuyoj sbaique.
\v 27 Tsots niꞌabtej, nilub. Ep acꞌubal muc xivay. Niviꞌnaj, itaquij coꞌnton. Ep vuelta laj quipan jba yuꞌun muꞌyuc jveꞌel. Oy laj caꞌi sic yuꞌun muꞌyuc jcꞌuꞌ jpocꞌ.
\p
\v 28 Ep to muc jta ti alel. Scotol cꞌacꞌal uc batem coꞌnton cꞌu cheꞌel xuꞌ ti jcolta scotol ti jchꞌunojeletique.
\v 29 Ti muchꞌu muꞌyuc yip yoꞌntone, jaꞌ chquichꞌ mul yuꞌun. Ti muchꞌu tsbolibtasbat yoꞌntone, jaꞌ mu xtun chcaꞌi.
\v 30 Mi yuꞌun ti jtoy jbae, jaꞌ noꞌox chcacꞌ ti qꞌuelel jtuc ti muꞌyuc quipe. Yuꞌun jaꞌ noꞌox ti sventa ti Cajvaltique ti ihuꞌ cuꞌun scotole.
\v 31 Ti Diose, jaꞌ ti Dios yuꞌun ti Cajvaltic Jesucristoe, jaꞌ ti Stot uque, jaꞌ ti tspasat ti mucꞌ sbatel osile, jaꞌ snaꞌ ti mu jnop cꞌop yuꞌun ti hech chcale.
\v 32 Cꞌalal te oyun ti jteclum Damasco, ti gobernadore ti jaꞌ pasbil ti mantal yuꞌun ti totil ajvalil Aretas sbie, laj yal mantal yuꞌun lec acꞌo chabibatuc ti jteclume yuꞌun hech mu me xicol batel yuꞌun tscꞌan chistsacucun.
\v 33 Nilocꞌ batel ti ventana ti te oy ti macteꞌton yuꞌun ti jteclume. Ti mucꞌta moch licbilun niyal tal, hech nicol loqꞌuel ti scꞌobic.
\c 12
\s Jaꞌ scꞌopilal ti cꞌutic iꞌacꞌbat snaꞌ ti Pabloe yuꞌun ti Cajvaltique
\p
\v 1 Hoꞌoxuc ti aventaic ti hech ti jtoy jbae. Mu van oyuc stu avuꞌunic yuꞌun ti chacalboxuc ti cꞌusi laj yacꞌbun jqꞌuel ti cꞌusi laj yacꞌbun jnaꞌ ti Cajvaltique.
\v 2 Oy xa chanlajuneb habil ti niyicꞌun muel ti vinajel ti Diose. Mu jnaꞌ mi xchiꞌuc jbecꞌtal mi maꞌuc xchiꞌuc jbecꞌtal ti niꞌicꞌat muele. Jaꞌ snaꞌ stuc ti Diose.
\v 3-4 Jnaꞌ ti niꞌicꞌat muel cꞌalal ti utsilal. Yan vuelta chcal ti mu jnaꞌ mi xchiꞌuc jbecꞌtal ti niꞌicꞌat muele. Jaꞌ snaꞌ stuc ti Diose. Te laj caꞌi cꞌusi lum lec ti mu xa jnaꞌbetic yalel yuꞌun jun yutsil ti jyalel. Mu stacꞌ chcal uc cꞌusi laj caꞌi.
\v 5 Taca jcꞌan jtoy jbae, xuꞌ ti jtoy jba ti hech niꞌacꞌbat jqꞌuel scotole. Mi jcꞌopilal noꞌox chcal jtuc mu xuꞌ ti jtoy jba yuꞌun muꞌyuc cꞌusi ihuꞌ cuꞌun jtuc. Jaꞌ noꞌox xuꞌ chcal ti muꞌyuc quipe.
\v 6 Taca jcꞌan jtoy jbae, más xuꞌ cuꞌun yuꞌun ep ti cꞌusi jpasoj. Mu yuꞌunuc hovil chcal hech chaj cꞌu cheꞌel ti muchꞌu hovil tstoy sbaique. Pero ti jpajes jba naca me echꞌemuc chispasucun ti mucꞌ. Jaꞌ noꞌox hech ti cꞌu cheꞌel ti cabtele, jaꞌ noꞌox cꞌu xꞌelan chicꞌopoje, jaꞌ noꞌox hech acꞌo spasucun ti mucꞌ.
\p
\v 7 Ti Diose mu laj scꞌan ti ti jtoy jba yuꞌun ti hech laj yacꞌbun quil scotole, hech yuꞌun laj yacꞌbun jchamel. Jaꞌ yabtel ti Satanase ti hech chquichꞌilan vocole yuꞌun hech mu me jtoy jba.
\v 8 Oxib vuelta laj calbe vocol ti Cajvaltique ti acꞌo chopucune.
\v 9 Hech laj yalbun: “Acꞌo comuc hech. Chuꞌ avuꞌun ti sventa yutsil avoꞌnton, jaꞌ ti cacꞌojbote. Hech más lec chvinaj ti jaꞌ ti sventa jpꞌijil jtuc ti xuꞌ avuꞌun scotol ti avabtele”, xiyutun. Hech yuꞌun toyol coꞌnton yuꞌun ti muꞌyuc quipe yuꞌun jaꞌ noꞌox quipanojbe spꞌijil ti Cristoe.
\v 10 Hech yuꞌun nichim noꞌox coꞌnton manchuc mi muꞌyuc ti quipe, manchuc mi chquichꞌ labanele, manchuc mi chquichꞌ vocole, manchuc mi chquichꞌ ilbajinele, manchuc mi uts jba ti sventa ti Cristoe. Yuꞌun ti muꞌyuc quip jtuque, hech yuꞌun más chquichꞌbe yip ti Cristoe.
\p
\v 11 Laj xa jcoꞌoltajes jba hech chaj cꞌu cheꞌel ti muchꞌutic bolique. Scoj ti muc xavalbucun jcꞌopilal ti hoꞌoxuque, hech yuꞌun hoꞌon jtuc laj xa cal yuꞌun acꞌo vinajuc ti mu lecuc ti yabtel ti nopbilal jcholcꞌopetic ti pasbil ti mucꞌ avuꞌunique. Chacuyic ti más ep yip lume, jaꞌuc hoꞌoni muꞌyuc más ep quip chacuyic. Hech onoꞌox cꞌu cheꞌel chavalique, muꞌyuc quip jtuc.
\v 12 Laj xa avilic ti cꞌu cheꞌel tspas ti muchꞌu jcholcꞌop ti mero melel. Tspas ep jchop o abtel hech chvinaj ti ch-abtej Dios ti sventa. Tsots abtel tspas. Laj avilic ti scotol ihuꞌ cuꞌun te ti atojolic manchuc mi oy vocol.
\v 13 ¿Mi oy cꞌusi muc xataic cuꞌun hech chaj cꞌu cheꞌel laj yichꞌic ti jchꞌunojeletic ti yan temploetique? Jaꞌ noꞌox ti muc xacacꞌboxuc avichꞌic vocol hech chaj cꞌu cheꞌel ti yan temploetic. Mi jaꞌ jmul chavilucun yuꞌun ti muc xacacꞌboxuc avichꞌic vocole, jaꞌ chapasbucun perdón obi.
\p
\v 14 Aꞌyo me avaꞌyic, chapalun xa yuꞌun chtal jqꞌueloxuc yan vuelta. Jaꞌ yoxibal xa vuelta ti chtal jqꞌueloxuque. Mu xacacꞌboxuc avichꞌic vocol yuꞌun maꞌuc ti jcꞌan ti cꞌusi oy avuꞌunique. Jaꞌ noꞌox chajcꞌanoxuc ti hoꞌoxuque. Yuꞌun ti nichꞌonile mu yuꞌunuc tsmacꞌlin ti stot smeꞌe; jaꞌ chmacꞌlinvan ti totil meꞌile.
\v 15 Ti hoꞌone nichim noꞌox coꞌnton chcacꞌ jvocol avuꞌunic. Nichim noꞌox coꞌnton chquichꞌ vocol yuꞌun acꞌo colanic. Yuꞌun ep cꞌuxoxuc ti coꞌnton ti hoꞌone, ¿mi lec mi jutuc noꞌox cꞌuxun ti avoꞌntonic ti hoꞌoxuque?
\p
\v 16 Yuꞌun ti muc xacacꞌboxuc avichꞌic vocol pero oy cꞌusi jnopoj tscuyic ti nopbilal jcholcꞌopetique. Cacꞌoj jba chajloꞌlaboxuc ataqꞌuinic ti mucul tscuyic.
\v 17 ¿Mi yuꞌun chachꞌunic ti laj sloꞌlaoxuc ti quermanotic ti laj jtac talel ti atojolique ti laj yichꞌ ti ataqꞌuinique? ¿Mi yuꞌun chachꞌunic ti hoꞌon laj yacꞌbun ti ataqꞌuinique?
\v 18 Laj calbe vocol ti Titoe yuꞌun ti acꞌo ba scoltaoxuc. Oy xchiꞌil cuꞌun laj avilic uc. ¿Mi yuꞌun chachꞌunic ti laj sloꞌlaoxuc ti Titoe? Nopo me avaꞌyic ¿mi mu coꞌoluc coꞌnton xchiꞌuc ti Titoe? ¿Mi maꞌuc jun noꞌox jbe jtamoj xchiꞌuc?
\p
\v 19 ¿Mi yuꞌun chacuyic ti jcolta jba yuꞌun ti hech chcale? Ti stojol ti Diose chicꞌopoj yuꞌun oyun ti stojol ti Cristoe. Jaꞌ sventa chapꞌijubic hoꞌoxuc ti cꞌuxoxuc ti coꞌntone.
\v 20 Mu me xavacꞌbucun quichꞌ mul cꞌalal te chicꞌot ti atojolique yuꞌun mu hechuc tscꞌan coꞌnton mi hech chcꞌo jtaoxuque. Yuꞌun mi oy palta chcꞌo jtaoxuc chavichꞌic mul mi chajtaqꞌuioxuc. Yuꞌun chquichꞌ mul mi yacꞌoj sba chavut abaic chcꞌo jtaoxuc, mi yacꞌoj sba chapas biqꞌuit avoꞌntonic, mi chavilinta abaic, mi chapasic pleito, mi chasaꞌbe abaic amulic, mi chanopbe abaic amulic, mi chatoy abaic, mi chavochetic noꞌox chcꞌo jtaoxuc.
\v 21 Yuꞌun cꞌalal chihul te ti atojolique mu jcꞌan ti más chquichꞌ mul ti stojol ti Diose yuꞌun chcocꞌta ti muchꞌutic ep staoj smul yuꞌun ti mu sutes yoꞌntonique. Jaꞌ ti chopol ti cꞌusi spasojique ti imulivajique, ti laj xchꞌunic ti cꞌusi laj scꞌan ti sbecꞌtalique.
\c 13
\s Hech ilaj yoꞌnton laj scꞌopon ti carta ti quermanotique
\p
\v 1 Ti ora to yoxibal xa vuelta ti chtal jqꞌueloxuque. Jaꞌ noꞌox mi oy chaꞌvoꞌ oxvoꞌ rextico jaꞌ xuꞌ chichꞌ chapanel ti muchꞌu oy smule.
\v 2 Ti muchꞌutic staoj smulic ti cꞌalal niꞌay ti xchibal vuelta xchiꞌuc acotolic jaꞌ chajtꞌabesboxuc ti avoꞌntonic ti cꞌusi laj calboxuque cꞌalal te jchiꞌinojoxuque. “Mi jaꞌ noꞌox hech coꞌol chasaꞌilan amul ti cꞌalal chihul yan vuelta, muꞌyuc bu chajcꞌuxubinoxuc. Persa chavichꞌic chapanel”, xacutoxuc onoꞌox.
\v 3 Chacꞌan chaqꞌuelic mi melel ti yacꞌojbun cabtel ti Cristoe. Te chavilic mi cꞌot jchapanoxuque. Mu me xacuyic ti jutuc noꞌox yip te ti atojolic ti Cristoe. Te chcꞌo cacꞌ avilic ti oy yip.
\v 4 Hech chaj cꞌu cheꞌel ti Cristo ti muꞌyuc yip xꞌelan cꞌalal icham ti cruz pero patil ivinaj ti oy yip ti cꞌalal icusesat loqꞌuel yuꞌun ti Diose, jaꞌ noꞌox hechun uc ti hoꞌone muꞌyuc quip chacuyic. Yuꞌun asta ti ora to muꞌyuc bu tsots laj jcꞌoponoxuc. Te chavilic mi nicꞌot ti atojolic ti acꞌbilun quip yuꞌun ti Diose. Te me chavilic ti chcꞌo jchapan ti muchꞌutic muꞌyuc quip tscuyique.
\p
\v 5 Nopo me avaꞌyic ti jujunoxuque ti mi achꞌunojbeic ti mero melel ti scꞌop ti Diose. Nopo lec cꞌu xꞌelan avoꞌntonic. Naꞌic ti te oy ti avoꞌntonic ti Jesucristoe hech chanaꞌic ti oy cabtel. ¿O mi hovil chaval ti achꞌunojique?
\v 6 Ti jcꞌan ti chanaꞌic ti mu hoviluc chcal ti yacꞌojbun cabtel ti Jesucristoe ti hoꞌone.
\v 7 Ti jcꞌopon Dios ti atojolic yuꞌun mu me xapasic ti cꞌutic chopole. Mu yuꞌunuc jaꞌ noꞌox ti jcꞌan chacacꞌboxuc avilic ti xuꞌ cuꞌun chajchapanoxuque. Jaꞌ ti jcꞌan ti jaꞌ noꞌox chapasilanic ti cꞌusi leque ti hoꞌoxuque.
\v 8 Yuꞌun mi muꞌyuc palta chcꞌo jtaoxuc hech muꞌyuc cꞌusi ti jpas. Jaꞌ noꞌox mi oy apaltaic, persa chajcoltaoxuc.
\v 9 Yuꞌun más nichim noꞌox coꞌnton mi muꞌyuc quip ti atojolic, yuꞌun ti hoꞌoxuque oy yip avoꞌntonic. Hech ti jcꞌanilambe vocol ti Diose ti hech acꞌo xachꞌunic ti lec.
\v 10 Hech yuꞌun laj jtsꞌibaboxuc avi to yuꞌun mu teucun ti atojolic yuꞌun hech mu me persauc tsots chicꞌopoj cꞌalal mi te nicꞌot xa ti atojolic. Yuꞌun jaꞌ quichꞌoj cabtel yuꞌun ti Cajvaltique yuꞌun ti chajcoltaoxuque, maꞌuc yuꞌun chajbolibtasoxuc.
\p
\v 11 Jaꞌ noꞌox chacalbeic obi, quermanotac. Acꞌo huꞌuc avuꞌunic chachꞌunic ti lec, taqꞌuio me abaic, jtosuc me avoꞌntonic, lamajemuc me avoꞌntonic acotolic. Hech chachiꞌinic ti Diose ti chijyacꞌbucutic jun coꞌntontique, ti cꞌuxucutic ti yoꞌntone.
\v 12 Yuꞌun jaꞌ señail ti cꞌuxoxuc ti coꞌntone tsacbo me abaic acꞌobic ti hoꞌoxuque.
\v 13 Chabanucot la xal scotol ti muchꞌutic oyic ti stojol ti Diose liꞌto.
\p
\v 14 Ti jcꞌan ti acꞌo xayacꞌboxuc ep yutsil avoꞌntonic acotolic ti Cajvaltic Jesucristoe, ti acꞌo xaxcꞌuxubinoxuc ti Diose, ti acꞌo xachiꞌinic ti Chꞌul Espíritue.