\id GAL

\h SUN GALATAS
\toc1 SUN GALATAS
\mt JAꞌ TI SCARTA TI QUERMANOTIC TI TE OYIC TI ESTADO GALACIA
\mt2 ti itsꞌibabat yuꞌun ti Pabloe
\c 1
\s Hech lic scꞌopon ti carta ti quermanotic ti Pabloe
\p
\v 1 Hoꞌon Pabloun, hoꞌon jcholcꞌopun. Muꞌyuc muchꞌu laj sticꞌun ti jcholcꞌop. Mu crixchanouc ti laj yacꞌbun ti cabtele. Jaꞌ laj yacꞌbun cabtel ti Jesucristoe xchiꞌuc ti Jtotic Diose ti laj xchaꞌcuses loqꞌuel tal ti chꞌen ti Jesucristoe.
\v 2 Hoꞌon xchiꞌuc ti quermanotic ti liꞌ jchiꞌinoje chajcꞌoponoxuc ti carta, hoꞌoxuc ti achꞌunojbeic scꞌop ti Diose te ti estado Galacia ti buc noꞌox jteclumal nacaloxuque.
\v 3 Acꞌo yacꞌboxuc ep bendición ti Jtotic Diose xchiꞌuc ti Cajvaltic Jesucristoe. Acꞌo yacꞌbot jun avoꞌntonic ti jujunoxuque hech mu xloꞌlaj avoꞌntonic.
\v 4 Ti Cajvaltic Jesucristoe jaꞌ laj yacꞌ sba ti milel ti jventatic yuꞌun hech libre nijcꞌotucutic. Hech mu xa xismozoinucutic ti mulile ti liꞌoy ti balumile. Yuꞌun ti hech laj scoltaucutique, yuꞌun hech laj scꞌan ti Jtotic Diose.
\v 5 Hech yuꞌun tspasat ti mucꞌ sbatel osil ti Jtotic Diose. Jun yutsil ti hech chcꞌot ti pasel.
\s Jaꞌ scꞌopilal ti muꞌyuc yan cꞌop ti xuꞌ chijcolucutic yuꞌune
\p
\v 6 Chchꞌay coꞌnton chcaꞌi yuꞌun ti ora noꞌox chacomesic ti Diose ti laj xa yicꞌoxuc ti stojol yuꞌun chacuxiic sbatel osil ti sventa ti Cristoe. Ti ora to avacꞌoj abaic chachꞌunic yan cꞌop yuꞌun hech chacolic chacuyique.
\v 7 Muꞌyuc yan cꞌop ti xuꞌ chijcolucutic yuꞌune. Jaꞌ noꞌox hech chaj cꞌu cheꞌel laj calboxuque. Yuꞌun ti hech chcꞌot ti pasele, yuꞌun oy muchꞌutic tal yacꞌ loꞌlajuc avoꞌntonic yuꞌun ti mu hechuc ti chꞌunel tscuyic. Yan sjam tsloqꞌuesic ti cꞌu cheꞌel chijcolucutique, yuꞌun jaꞌ noꞌox tscꞌan ti chchibaj avoꞌntonic ti stojol ti Cristoe.
\v 8 Muchꞌuuc noꞌox chtal, manchuc mi hoꞌontutic, manchuc mi chꞌul abat, ti chtal syanejesbe sjam ti scꞌop Diose, acꞌo acꞌbatuc castigo yuꞌun ti Diose.
\v 9 Calojboxuc xa onoꞌox pero chacalbeic yan vuelta. Muchꞌuuc noꞌox chtal syanejesbe sjam ti scꞌop Diose ti achꞌunojique, jaꞌ acꞌo acꞌbatuc castigo yuꞌun ti Diose.
\p
\v 10 Ti jaꞌuc tsots scꞌopilal chcaꞌi ti lec chiyilun ti crixchanoetique, mu hechuc chcal ti acꞌo acꞌbatuc castigo ti muchꞌutic tsyanejesbe sjam ti scꞌop ti Diose. Yuꞌun jaꞌ noꞌox tsots scꞌopilal chcaꞌi ti lec chiyilun ti Diose, hech yuꞌun hech chcal ti acꞌo acꞌbatuc castigo. Ti jaꞌuc tsots scꞌopilal chcaꞌi to ti lec chiyilun ti crixchanoetique, mu yabatucun ti Cristo ti hechuque.
\s Jaꞌ scꞌopilal ti Pabloe ti jaꞌ Dios ti iꞌacꞌbat yabtel yuꞌun
\p
\v 11 Quermanotac, chanaꞌic ti maꞌuc scꞌop crixchanoetic ti lequil achꞌ cꞌop ti laj jcholboxuque.
\v 12 Mu yuꞌunuc laj xchanubtasun crixchanoetic. Jaꞌ laj yacꞌbun jnaꞌ stuc ti scꞌop ti Jesucristoe.
\p
\v 13 Ti hoꞌoxuque avaꞌyojbucun jcꞌopilal ti cꞌusi laj jpas ti voꞌonee cꞌalal mu to ti jchꞌumbe scꞌop ti Cristoe. Coꞌol laj jchꞌun xchiꞌuc ti jchiꞌiltaque, hoꞌontutic ti judiountutique. Avaꞌyojic xa ti echꞌem laj jcontrain scotol ti muchꞌutic iꞌicꞌatic xa ti stojol ti Diose yuꞌun ti jtupꞌ scotol ti jcuy.
\v 14 Ti hoꞌone más ep laj jchan ti cꞌutic cꞌopal xchanoj ti jchiꞌiltaque, hoꞌontutic ti coꞌol judiountutic xchiꞌuque. Ti muchꞌutic coꞌol nichꞌi xchiꞌuque, mu epuc laj xchan. Yuꞌun ti hoꞌone toyol coꞌnton laj jchꞌun ti cꞌu cheꞌel xchꞌunojic ti jtot jmeꞌtutique ti voꞌone. Muꞌyuc muchꞌu hech toyol yoꞌnton hech chaj cꞌu cheꞌel ti hoꞌone.
\v 15-16 Cꞌalal hech toyol coꞌnton, ti Diose laj yacꞌbun cojtiquin ti Snichꞌone. Yuꞌun cꞌalal mu to chiꞌan, yutsil yoꞌnton laj stꞌujun ti Diose yuꞌun chiyacꞌbun cabtel yuꞌun cꞌuxun ti yoꞌnton. Hech yuꞌun cꞌalal laj sta yorail laj yicꞌun, laj yacꞌbun cabtel yuꞌun chajcholboxuc scꞌop acotolic, hoꞌoxuc ti yanlum crixchanooxuque. Chajcholboxuc avaꞌyic ti chijcolucutic jcotoltic ti sventa ti Cristoe. Ti cꞌalal laj yicꞌune, muꞌyuc muchꞌu laj jacꞌbe scꞌop.
\v 17 Muc xibat ti Jerusalén, muc xba jcꞌopon ti muchꞌutic jbael ochemic ti jcholcꞌop. Ti ora laj jqꞌuej jba batel. Nom nibat ti xocol balumil te ti slumal Arabia. Patil nisut tal ti jteclum Damasco.
\p
\v 18 Iꞌechꞌ oxib habil, patil nibat ti Jerusalén. Te ba jcꞌopon ti Pedroe. Hoꞌlajuneb cꞌacꞌal te laj jchiꞌin.
\v 19 Te laj cojtiquin uc ti Jacoboe, jaꞌ ti yitsꞌin ti Cajvaltique. Ti yan jcholcꞌopetique muꞌyuc bu laj cojtiquin.
\v 20 Yuꞌun ti hech laj jtsꞌibaboxuque, mu yuꞌunuc ta noꞌox xcal. Snaꞌ ti Diose ti melel chcal.
\p
\v 21 Patil nibat ti slumal Siria xchiꞌuc ti slumal Cilicia, jaꞌ ti jlumale.
\v 22 Scotol ti muchꞌutic xchꞌunojbeic scꞌop ti Cristoe ti te nacajtic ti estado Judeae, mu to xiyojtiquinucun yuꞌun muꞌyuc bu sqꞌuelojbucun jsat.
\v 23 Jaꞌ noꞌox yaꞌyojbucun jcꞌopilal. “Ti muchꞌu laj yilbajinucutic ti voꞌonee ti tscꞌan chistupꞌucutique, ti ora to yacꞌoj sba xa chcholbe scꞌop ti Cristoe ti jaꞌ chijcolucutic ti sventae”, xchi laj yaꞌyic. Jaꞌ jcꞌopilal.
\v 24 Hech yuꞌun laj yalbeic vocol ti Diose yuꞌun ti laj xa jchꞌune.
\c 2
\s Jaꞌ scꞌopilal ti lec laj yaꞌyic ti yan jcholcꞌopetique ti cꞌu cheꞌel chchol ti lequil achꞌ cꞌope ti Pabloe
\p
\v 1 Iꞌechꞌ chanlajuneb habil, patil nibat yan vuelta ti Jerusalén. Jaꞌ laj xchiꞌinun batel ti Bernabee. Laj quicꞌ yuꞌun chixchiꞌinun uc ti Titoe.
\v 2 Yuꞌun ti nibate, yuꞌun hech albilun ti coꞌnton yuꞌun ti Diose. Hech yuꞌun ti nibate. Jaꞌ ay calbe yaꞌyic ti quermanotic ti te oyic ti Jerusalene ti cꞌu cheꞌel chajchanubtasoxuc ti scꞌop ti Diose, hoꞌoxuc ti yanlum crixchanooxuque. Jaꞌ noꞌox ay jcholbe yaꞌyic ti muchꞌutic oy yabtelique. Jaꞌ noꞌox ay jacꞌbe mi hech chchanubtasvan hech chaj cꞌu cheꞌel chajchanubtasoxuc xchiꞌuc achiꞌiltac, hoꞌoxuc ti yanlum crixchanooxuque. Yuꞌun mi mu coꞌoluc chcaltutic ti smantal ti Diose, repenta chcꞌot ti altic chiꞌabtej hoꞌoni.
\v 3 Lec laj yaꞌyic ti cꞌu cheꞌel ti jchol ti lequil achꞌ cꞌope. Muc xal ti acꞌo yichꞌ circuncisión ti Titoe ti jchiꞌinoje, jaꞌ ti coꞌol yanlum crixchanooxuc xchiꞌuque.
\v 4 Yantic ti muchꞌutic laj sliquesbeic scꞌopilal ti Titoe. Jaꞌ laj sliquesic ti quermanotic scuyoj sbaique. Ti cꞌalal yorail laj jtsob jbatutique, te laj scꞌalan sbaic ochel tal. Yuꞌun ti iꞌochic tale, yuꞌun jaꞌ noꞌox tscꞌan chisaꞌbun jmultutic. Yuꞌun tscꞌan chaꞌyic cꞌu cheꞌel chijyacꞌucutic ti libre ti Cristo Jesuse, yuꞌun ti hech mu xa tsotsuc scꞌopilal chcꞌot ti circuncisión cuꞌuntique. Jaꞌ tscꞌanic mi chijꞌoch ti mozoil yuꞌun ti mantaletique yan vuelta.
\v 5 Mi jutuc muc jchꞌuntutic xchiꞌuc ti Bernabee. Muc jpasbetutic ti mucꞌ scꞌopic yuꞌun hech mu me xyanej ti lequil achꞌ cꞌope ti achꞌunojic xae. Yuꞌun melel ti cꞌop ti achꞌunojic xae.
\p
\v 6 Ti muchꞌutic oy yabtelique ti jaꞌ más pasbil ti mucꞌ avuꞌunique, muꞌyuc jpalta laj yilucun. Mu tsotsuc scꞌopilal chcaꞌi hoꞌoni ti cꞌu xꞌelan yabtel jujun. Yuꞌun ti Diose mu tsotsuc scꞌopilal chaꞌi ti cꞌu xꞌelan cabteltic jujun.
\v 7 Laj yilucun ti jaꞌ acꞌbilun jventain xcholel ti lequil achꞌ cꞌope ti atojolic, hoꞌoxuc ti yanlum crixchanooxuque, hech chaj cꞌu cheꞌel acꞌbil sventain xcholel ti stojol ti jchiꞌiltaque ti Pedroe.
\v 8 Dios ti laj yacꞌbe yabtel ti Pedroe yuꞌun acꞌo ba xcholbe scꞌop ti jchiꞌiltaque, hoꞌontutic ti coꞌol judiountutique. Dios ti laj yacꞌbun cabtel uc yuꞌun chajcholboxuc ti scꞌope, hoꞌoxuc ti yanlum crixchanooxuque.
\p
\v 9 Hech yuꞌun cꞌalal laj yilic ti acꞌbilun ep bendición yuꞌun ti Diose ti Jacoboe xchiꞌuc ti Pedroe xchiꞌuc ti Juane, jaꞌ ti sventainojic scotol ti abtele, laj stsacbucun jcꞌob xchiꞌuc ti Bernabee. Yuꞌun ti laj stsacbuntutic ti jbatsꞌicꞌobe, jaꞌ señail ti jun chiꞌabtejtutic xchiꞌuc. Hech ichapaj cuꞌuntutic ti hoꞌontutic chajventaintutique xchiꞌuc ti Bernabee, hoꞌoxuc ti yanlum crixchanooxuque. Jaꞌ noꞌox hechic uc, jaꞌ tsventainic ti jchiꞌiltaque, hoꞌontutic ti coꞌol judiountutique.
\v 10 Jaꞌ noꞌox laj stꞌabesbun ti coꞌntontutic ti quermanotic ti meꞌonetic te ti bu oyique yuꞌun acꞌo jcoltatic jcotoltic. Lec laj caꞌi yuꞌun hech onoꞌox ti jpas.
\s Jaꞌ scꞌopilal ti Pedroe ti itaqꞌuiat yuꞌun ti Pabloe yuꞌun jun to chacꞌ ti chꞌunel ti mantaletique
\p
\v 11 Oy jun vuelta cꞌalal nihul ti Antioquía, te ital uc ti Pedroe. Te xa cꞌo jta. Laj cut ti sat yuꞌun muc snop lec ti cꞌusi tspase.
\v 12 Te talemic uc quermanotic jchiꞌiltac ti itacatic talel yuꞌun ti Jacoboe. Jaꞌ ti toyol yoꞌntonic yuꞌun ti circuncisione. Ti cꞌalal mu to chulic ti quermanotique ti tacbilic talel yuꞌun ti Jacoboe, ti Pedroe laj xchꞌun batel iqꞌuel yuꞌun chba veꞌuc ti stojol quermanotic jaꞌ ti achiꞌiltaque, hoꞌoxuc ti yanlum crixchanooxuc xchiꞌuque. Pero patil cꞌalal te xa oy ti quermanotique ti tacbilic talel yuꞌun ti Jacoboe, hech yuꞌun ixiꞌ yuꞌun mi chopol ch-albat scꞌopilal. Hech yuꞌun muc xchꞌun xa batel iqꞌuel yuꞌun chba veꞌuc. Jaꞌ ba xchiꞌin ti veꞌel ti quermanotique, jaꞌ ti jchiꞌiltaque.
\v 13 Jaꞌ noꞌox hech uc oy chaꞌvoꞌ oxvoꞌ ti yan quermanotique, jaꞌ ti jchiꞌiltaque, hoꞌon ti coꞌol judioun xchiꞌuque, ti iloꞌlaatic uque. Laj stsꞌacliic batel ti Pedroe. Hech mu xa scꞌan chveꞌic uc xchiꞌuc ti achiꞌiltaque. Hech uc ti Bernabee iloꞌlaat uc. Coꞌol laj spas uc.
\v 14 Cꞌalal laj quil ti mu hechuc tspasic hech chaj cꞌu cheꞌel chal ti lequil achꞌ cꞌope, ti stojol scotolic hech laj calbe ti Pedroe: “Hoꞌoti cꞌalal biqꞌuitot to laj achan ti mantaletic cuꞌuntique hoꞌucutic ti judioucutique. Pero icom xa avuꞌun. Hech yuꞌun mu sjamuc ti hech chapase ti ora noꞌox mu xa xacꞌan chba achiꞌin ti veꞌel ti quermanotique, jaꞌ ti yanlum crixchanoetique. Jun to chacꞌan chavacꞌbe xchꞌun ti mantaletic ti icom xa avuꞌune ti quermanotique, jaꞌ ti yanlum crixchanoetique”, xcut.
\s Jaꞌ scꞌopilal ti muꞌyuc scꞌopilal mi judio mi mu judiouc, coꞌol chijcol jcotoltic ti sventa xchꞌunojel coꞌntontic
\p
\v 15 Hech laj calbe uc: “Yuꞌun judio ti jtot jmeꞌtique hech yuꞌun ti hoꞌucutique caꞌyojtic ti cꞌu xꞌelan ti smantal ti Diose ti laj yal ti Moisese. Ti yanlum crixchanoetique mi jutuc mu bu yaꞌyojic.
\v 16 Ti hoꞌucutique ti judioucutique ti laj xa jchꞌumbetic scꞌop ti Cajvaltique ti mero melel, ti jnaꞌtic xa ti maꞌuc lec chijcꞌot ti stojol ti Diose yuꞌun ti cꞌu xꞌelan ti jchꞌuntic ti mantaletique ti laj yal ti Moisese. Ti jnaꞌtic xa ti jaꞌ lec chijcꞌot ti stojol ti Diose mi ti jchꞌuntic ti chijcolucutic yuꞌun ti Jesucristoe. Hech yuꞌun laj xa jchꞌuntic ti jaꞌ jqꞌuexoltic ti Jesucristoe hech lec chijyilucutic ti Diose ti sventa xchꞌunojel coꞌntontic. Maꞌuc ti sventa cꞌu xꞌelan laj jchꞌuntic ti mantaletique ti laj yal ti Moisese. Yuꞌun muꞌyuc muchꞌu xuꞌ chchꞌumbe scotol smantal ti Diose, hech yuꞌun muꞌyuc muchꞌu lec ch-ilat yuꞌun ti Diose yuꞌun ti chchꞌun ti mantaletique.
\p
\v 17 Cꞌalal laj jchꞌuntic ti lec chijyilucutic ti Diose ti sventa ti Cristoe, persa laj jcomestic ti chijcolucutic yuꞌun ti mantaletique ti laj yal ti Moisese. ‘Hech coꞌol jpꞌajmantaloxuc nacꞌotic xa xchiꞌuc ti yanlum crixchanoetique yuꞌun mu xa xachꞌunic ti mantaletique,’ xchi jcꞌopilaltic yuꞌun ti jchiꞌiltique. Hech yuꞌun tscuyic ti chꞌayel chijbat yuꞌun ti laj xa jchꞌuntic ti lec chijyilucutic ti Diose ti sventa ti Cristoe. ¡Bu ba hechuc!
\v 18 Pero mi hech chlic jnoptic: ‘Mu lecuc ti hech ti jchꞌuntique,’ mi xijchie, ‘jaꞌ lec ti jchꞌuntic hech chaj cꞌu cheꞌel jchꞌunojtic onoꞌox ti voꞌonee,’ mi xijchie, jaꞌ mero jpꞌajmantalucutic chijcꞌot yuꞌun ti jcomestic ti Cristoe.
\v 19 Yuꞌun ti muc xuꞌ cuꞌuntic jchꞌuntic ti mantaletique ti laj yal ti Moisese hech yuꞌun hech laj quiltic ti mu stacꞌ hech lec chijyilucutic ti Diose. Hech yuꞌun mu xa jchꞌuntic ti chijcol yuꞌun ti mantaletique. Ti ora to ti sventa ti Cajvaltique lec chijyilucutic ti Diose.
\v 20 Coꞌol nijcham ti cruz xchiꞌuc ti Cristoe chil ti Diose cꞌalal laj jchꞌuntic ti chijcol yuꞌun ti Cristoe yuꞌun ilaj xa scꞌopilal ti jtuctic ti jcolta jbatic ti jcuytique. Hech yuꞌun mu xa jventain jbatic. Jaꞌ chisventainucutic ti Cristoe yuꞌun te oy ti coꞌntontique. Yuꞌun ti mu xa jventain jbatic ti ora to, yuꞌun jchꞌunoj ti chiscoltailanucutic ti Snichꞌon ti Diose ti cꞌuxucutic ti yoꞌntone. Jaꞌ ti laj yacꞌ sba ti milel ti jventatique.
\v 21 Hoꞌoni mu jcꞌan mi altic chcꞌot ti laj yacꞌ ti milel ti Snichꞌon ti Diose ti jventatique, ti yutsil yoꞌnton laj xa scoltaucutique. Yuꞌun taca lec chijyilucutic ti Diose yuꞌun ti jchꞌuntic ti mantaletique, hovil ti icham ti cruz ti Cristoe ti hechuque”, xcut ti Pedroe.
\c 3
\s Jaꞌ scꞌopilal ti maꞌuc ti sventa ti laj jchꞌuntic ti mantaletique ti quichꞌojtic ti Chꞌul Espíritue
\p
\v 1 Quermanotac, hoꞌoxuc ti nacaloxuc ti Galacia, mu pꞌijucoxuc. Ti sliqueb lec laj achꞌunic. Laj anaꞌic ti icham cuꞌuntic ti Jesucristoe ti jaꞌ chijcolucutic yuꞌune. Ti ora to mu xa xachꞌunic yuꞌun chachꞌunic ti loꞌlaele.
\v 2 Jaꞌ ti jcꞌan chajacꞌbeic avi to. ¿Mi ti sventa laj achꞌunic ti mantaletique ti hech laj avichꞌic ti Chꞌul Espíritue, mi jaꞌ ti sventa laj achꞌunic ti jaꞌ Jcoltavanej avuꞌunic ti Cristoe ti hech laj avichꞌic ti Chꞌul Espíritue?
\v 3 ¿Mi yuꞌun muꞌyuc spꞌijil avoꞌntonic mi jutuc? ¿Mi mu xanaꞌic ti mu xuꞌ chavacꞌbeic xqꞌuexol atuquic ti Chꞌul Espíritue ti jaꞌ laj yacꞌboxuc ti achꞌ cuxlejale? ¡Bu ba huꞌuc avuꞌunic atuquic ti chacolta abaique!
\v 4 Mu me hoviluc ti ep laj avichꞌic vocol ti cꞌalal lic achꞌunic ti lequil achꞌ cꞌope.
\v 5 Ti Diose mu pꞌisbiluc yacꞌojboxuc ti Chꞌul Espíritue. Ch-abtej ti avoꞌntonic hech ep yutsil avoꞌntonic. ¿Mi ti sventa laj achꞌunic ti mantaletique ti hech yacꞌojboxuc ti Diose, mi jaꞌ ti sventa laj achꞌumbeic scꞌop ti Cristoe ti hech yacꞌojboxuque? Nopic me.
\p
\v 6 Naꞌo me ti Abrahame. Yuꞌun ti laj xchꞌun scotol ti chcꞌot ti pasel ti cꞌutic iꞌalbat yuꞌun ti Diose hech yuꞌun toj yoꞌnton iꞌilat yuꞌun ti Diose yuꞌun ti oy xchꞌunojel yoꞌntone.
\v 7 Hech yuꞌun mi mu xavil, jaꞌ yelnichꞌonucutic Abraham chijcꞌot mi oy xchꞌunojel coꞌntontic.
\v 8 Voꞌone tsꞌibabil ti sun ti Diose ti jaꞌ ti sventa xchꞌunojel avoꞌntonic ti lec chayiloxuc uc ti Diose, hoꞌoxuc ti yanlum crixchanooxuque. Yuꞌun ti Diose hech laj yalbe ti Abrahame ti voꞌone: “Hoꞌot ti aventa chichꞌic bendición ti jaylajuntos crixchanoetic ti balumile”, xꞌutat ti Abrahame yuꞌun ti Diose.
\v 9 Hech yuꞌun coꞌol chichꞌic bendición hech chaj cꞌu cheꞌel ti Abrahame ti muchꞌutic coꞌol oy xchꞌunojel yoꞌntonic xchiꞌuque.
\p
\v 10 Scotol ti muchꞌutic chcolic yuꞌun ti chchꞌunic ti mantaletique ti laj yal ti Moisese tscuyique, tscuyic ti lec ch-ilatic yuꞌun ti Diose. Mu snaꞌic ti quechel ti sventaic ti chichꞌic castigo yuꞌun mu tsꞌacaluc chchꞌunic ti mantaletique. Yuꞌun hech tsꞌibabil ti scꞌop ti Diose: “Jaꞌ chichꞌic castigo scotol ti muchꞌutic mu tsꞌacaluc chchꞌunic spasel scotol ti mantaletique ti tsꞌibabil comel ti sun ti Diose”, ti xchie.
\v 11 Hech chvinaj ti maꞌuc lec chijyilucutic ti Diose yuꞌun ti jchꞌuntic ti mantaletique. Yuꞌun yaloj onoꞌox ti Diose: “Ti muchꞌu oy xchꞌunojel yoꞌntone, jaꞌ toj yoꞌnton chquil. Hech yuꞌun chcuxi sbatel osil”, ti xchie.
\v 12 Yuꞌun mi jaꞌ ti jchꞌuntic ti chijcol yuꞌun ti mantaletique, jaꞌ tsots scꞌopilal chbat cuꞌuntic ti cabteltique. Hech yuꞌun jaꞌ muꞌyuc scꞌopilal chbat cuꞌuntic ti xchꞌunojel coꞌntontique. Yuꞌun hech chal ti scꞌop ti Diose: “Ti muchꞌu chuꞌ yuꞌun chchꞌun scotol ti mantaletique, jaꞌ chcuxi sbatel osil”, ti xchie.
\p
\v 13 Yuꞌun mu xuꞌ cuꞌuntic xchꞌunel ti mantaletique, hech yuꞌun ti hech jcꞌopilaltic chba quichꞌtic castigo. Jaꞌ laj jqꞌuexolintic stuc ti Cristoe. Jaꞌ stuc laj xcuchbucutic ti jcastigotique. Hech libre nijcꞌot, mu xa jtojtic jtuctic. Yuꞌun hech tsꞌibabil ti scꞌop ti Diose: “Jaꞌ acꞌbil castigo yuꞌun ti Diose”, xchi scꞌopilal scotol ti muchꞌutic chjocꞌanat ti teꞌe yuꞌun smulic, ti xchie. Jaꞌ noꞌox hech scꞌopilal ti Cajvaltique yuꞌun laj xcuchbucutic ti jcastigotique yuꞌun mu xchꞌun cuꞌuntic ti mantaletique.
\v 14 Hech yuꞌun ti sventa ti Cristo Jesuse hoꞌoxuc ti yanlum crixchanooxuque laj xa avichꞌic uc ti bendicione ti iꞌalbat ti Abrahame ti chquichꞌtic jcotoltique. Jaꞌ ti Chꞌul Espíritue ti quichꞌojtic jcotoltique yuꞌun ti laj xa jchꞌuntic ti chijcol yuꞌun ti Cajvaltique.
\s Jaꞌ scꞌopilal ti jbael laj xchapan xchiꞌuc ti Abrahame ti tratoe ti Diose, patil laj yal ti mantaletique
\p
\v 15 Quermanotac, chacalbe avaꞌyic cꞌu cheꞌel tspasic crixchanoetic liꞌ ti balumile. Ti muchꞌu tspasic trato ti lec chchapanic, tstiqꞌuic ti hun. Jaꞌ jꞌechꞌel ichapaj yuꞌunic obi. Mu xa soc o yuꞌun lec chapambil yuꞌunic.
\v 16 Hech yuꞌun más mi jutuc mu xchꞌay trato stuc ti Diose hech chaj cꞌu cheꞌel laj yalbe ti Abrahame. Yuꞌun ti hech iꞌalbat ti Abrahame, jaꞌ scꞌopilal stuc xchiꞌuc yelnichꞌon. “Jaꞌ ti avelnichꞌnabe”, muc xchi ti Diose. “Jaꞌ ti avelnichꞌone”, xchi noꞌox. Hech yuꞌun maꞌuc jcꞌopilaltutic jcotoltutic, hoꞌontutic ti yelnichꞌonuntutic ti Abrahame. Jaꞌ scꞌopilal jun noꞌox, jaꞌ ti Cristoe.
\v 17 Chacalbe avaꞌyic cꞌu xꞌelan. Jaꞌ jbael laj xchapan xchiꞌuc ti Abrahame ti Diose ti jaꞌ chijcolucutic ti sventa xchꞌunojel coꞌntontic. Iꞌechꞌ chanib ciento habil xchiꞌuc lajuneb xchaꞌvinic habil, patil laj yal ti mantaletique ti Diose. Yuꞌun ti hech laj yal ti mantaletique, mu yuꞌunuc chchꞌay ti trato ti laj xchapan xchiꞌuc ti Abrahame.
\v 18 Taca colucutic ti sventa ti mantaletique, hech yuꞌun mu persauc ti oy xchꞌunojel coꞌntontique. Pero ti Abrahame icol ti sventa xchꞌunojel yoꞌnton hech yuꞌun persa oy xchꞌunojel coꞌntontic uc.
\p
\v 19 Yuꞌun ti nijꞌacꞌbat ti mantaletique, yuꞌun mu xquiltic bu ti jtatic jmultic hech yuꞌun laj yal ti mantaletique ti Diose. Yuꞌun ti laj yal ti mantaletique ti Diose, jaꞌ chtun jaꞌto mi ital ti Jesucristoe, jaꞌ ti yelnichꞌon ti Abrahame ti albil scꞌopilal ti tratoe. Jaꞌto chlaj scꞌopilal ti mantaletique. Cꞌalal laj yal ti mantaletique ti Diose, jaꞌ primero laj yalbe ti chꞌul abatetique. Patil ti chꞌul abatetique lic yalbe ti Moisese ti mantaletique. Ti Moisese lic yalbe ti jchiꞌiltaque, hoꞌontutic ti coꞌol judiountutic xchiꞌuque.
\v 20 Pero cꞌalal laj spas ti tratoe xchiꞌuc ti Abrahame ti Diose, muꞌyuc muchꞌu iꞌechꞌesbat scꞌop. Stuc laj yal ti Diose, laj yalbe ti Abrahame.
\s Jaꞌ scꞌopilal ti jaꞌ yabtel ti mantaletique ti jaꞌ noꞌox chijyacꞌbucutic jnaꞌtic bu ti jtatic jmultic
\p
\v 21 Ti mantaletique mu scontrain sbaic xchiꞌuc ti tratoe, mu hechuc. Ti hechuc acꞌbil yabtel yuꞌun ti Diose ti mantaletique ti chijyacꞌbucutic jcuxlejaltique, ti jtatic toj coꞌntontic ti hechuque. Ti hechuc acꞌbil yabtele, coꞌol chcꞌot xchiꞌuc ti tratoe ti laj spasic ti Diose xchiꞌuc ti Abrahame. Mu hechuc acꞌbil yabtel ti mantaletique yuꞌun ti Diose. Jaꞌ noꞌox chijyacꞌbucutic jnaꞌtic bu ti jtatic jmultic.
\v 22 Hech tsꞌibabil ti sun ti Diose ti mi junuc muꞌyuc muchꞌu xuꞌ yuꞌun chchꞌun ti mantaletique. Hech yuꞌun jcotoltic oy jmultic. Hech yuꞌun mu xuꞌ chijcolucutic yuꞌun ti mantaletique. Hech yuꞌun jaꞌ noꞌox mi ti jchꞌuntic ti chijyacꞌbucutic jcuxlejaltic ti Jesucristoe chijcol hech chaj cꞌu cheꞌel laj spasic ti trato ti Diose xchiꞌuc ti Abrahame ti voꞌone.
\p
\v 23 Hoꞌontutic ti judiountutique, voꞌone quichꞌojtutic ti smantal ti Diose. Jaꞌ noꞌox laj yalbuntutic ti oyuntutic ti mozoil ti mu xuꞌ chicoltutic ti libre. Cꞌalal ital ti Cristoe hech ivinaj ti xuꞌ chiscoltauntutic yuꞌun chicoltutic ti libre o.
\v 24 Yuꞌun jaꞌ noꞌox laj yalbuntutic ti mantaletique ti oyuntutic ti mozoile ti mu spas ti jcolta jbatutique, hech yuꞌun laj jcꞌantutic ti oy muchꞌu chiscoltauntutique. Hech yuꞌun ti nitaltutic ti stojol ti Cristoe. Hech yuꞌun lecuntutic xa chiyiluntutic ti Diose ti sventa xchꞌunojel coꞌntontutic, hoꞌontutic ti jchꞌunojtutic onoꞌox ti chicoltutic yuꞌun ti mantaletique.
\v 25 Yuꞌun jchꞌunojtutic xa ti nicoltutic xa yuꞌun ti Cristoe, hech yuꞌun muꞌyuc xa scꞌopilal ti mantaletique ti jaꞌ chicoltutic yuꞌune laj jcuytutique.
\p
\v 26 Hoꞌoxuc achꞌunojic xa uc ti nacolic xa yuꞌun ti Cristo Jesuse xchiꞌuc ti jchiꞌiltaque, hech yuꞌun yol snichꞌonoxuc xa ti Diose acotolic.
\v 27 Yuꞌun avichꞌojic xa hoꞌ ti sventa ti Cristoe, hech jun nacꞌotic xa xchiꞌuc ti Cristoe.
\v 28 Hech yuꞌun muꞌyuc xa scꞌopilal mi judiooxuc, mi yanlum crixchanooxuc, mi oyoxuc ti mozoil yuꞌun mambiloxuc, mi oyoxuc ti libre, mi vinicoxuc, mi antsoxuc, yuꞌun jun nacꞌotic xa acotolic ti stojol ti Cristo Jesuse.
\v 29 Yuꞌun ti yuꞌunoxuc xa ti Cristoe, hech yuꞌun yelnichꞌonoxuc ti Abrahame chayiloxuc ti Diose yuꞌun oy xa xchꞌunojel avoꞌntonic hech chaj cꞌu cheꞌel ti Abrahame. Hech yuꞌun coꞌol chaꞌacꞌbatic bendición hech chaj cꞌu cheꞌel iꞌacꞌbat ti Abrahame. Yuꞌun hech onoꞌox chapambil acꞌopilal yuꞌun ti Diose ti cꞌalal laj spasic trato xchiꞌuc ti Diose xchiꞌuc ti Abrahame.
\c 4
\p
\v 1-2 Chacalboxuc scꞌopilal jun querem hech chavaꞌibeic sjam. Cꞌalal cuxul to ti stot ti quereme, hech laj xchapan comel ti jaꞌ tsventain scotol ti cꞌutic oy yuꞌune cꞌalal mi ichame. Pero mu to xuꞌ tsventain ti ora ti quereme yuꞌun biqꞌuit to. Hech yuꞌun laj saꞌbe yajval yuꞌun hech chchabibat. Hech yuꞌun jaꞌto mi itsꞌaqui ti jayib habil ti chꞌacbil comel yuꞌun ti stote, hech chlic acꞌbatuc sventain scotol yuꞌun ti muchꞌu sventainoj comele. Yuꞌun pasbil to ti mantal hech chaj cꞌu cheꞌel mozo ti quereme.
\v 3-5 Jaꞌ noꞌox hech uc ti Diose. Xchapanoj onoꞌox ti chijyacꞌbucutic jventaintic scotol cꞌusi oy yuꞌun ti sventa ti Snichꞌone. Hech yuꞌun chꞌacbil yuꞌun ti Diose cꞌusi ora chtal ti Snichꞌone. Hech yuꞌun laj sta yorail ti itale. Yuꞌun ti cꞌalal mu to chtal ti Snichꞌone, hechucutic hech chaj cꞌu cheꞌel mozo yuꞌun pasbilucutic ti mantal yuꞌun ti cꞌutic laj jchꞌuntic ti coꞌntontic ti hech chijcolucutic laj jcuytique. Hech chaj cꞌu cheꞌel hoꞌucutic icꞌot ti Snichꞌone yuꞌun iꞌalintaat yuꞌun ants. Jaꞌ hech chaj cꞌu cheꞌel hoꞌucutic ti jchꞌuntic mantal jaꞌ hech icꞌot. Tal scoltaucutic yuꞌun hech yol snichꞌon Dios chijcꞌotucutic ti sventa, hoꞌucutic ti oyucutic ti mozoil yuꞌun ti cꞌutic laj jchꞌuntic ti coꞌntontique ti chijcolucutic laj jcuytique.
\p
\v 6 Yuꞌun yol snichꞌonucutic xa ti Diose, hech yuꞌun ti Diose laj stac talel yuꞌun chnain ti coꞌntontic ti Chꞌul Espíritue, jaꞌ ti nainem ti yoꞌnton ti Snichꞌone. Jaꞌ chcꞌopoj ti coꞌntontic hech yuꞌun “Tote”, xcutic ti Diose.
\v 7 Hech yuꞌun mu xa oyucoxuc ti mozoil. Yol snichꞌonoxuc xa ti Diose. Yuꞌun yol snichꞌonoxuc xa, hech yuꞌun coꞌol chaꞌacꞌbat aventainic hech chaj cꞌu cheꞌel yacꞌojbe sventain ti Snichꞌone.
\s Jaꞌ scꞌopilal mu me xavacꞌ abaic ti mozoil yan vuelta, xut
\p
\v 8 Ti voꞌone tal yuꞌun muc xavojtiquinic ti Diose, jaꞌ laj avacꞌ abaic ti abatinel ti stojol ti cꞌutic mu diosuque.
\v 9 Ti ora to yuꞌun xanaꞌic xa bu oy ti Diose, y xayojtiquinic ti Diose, mu xcaꞌibe sjam cꞌu yuꞌun chacꞌan chachaꞌchꞌun ti cꞌutic mu xcoltavane, ti muꞌyuc stue. ¿Mi yuꞌun chacꞌan chavacꞌ abaic ti mozoil yan vuelta?
\v 10 Yuꞌun caꞌyoj ti chachabiic xa cꞌutic cꞌacꞌalil, cꞌutic ual, cꞌutic yorail, cꞌutic habilal hech chaj cꞌu cheꞌel tspasic ti jchiꞌiltaque.
\v 11 Chquichꞌ mul avuꞌunic mi repenta hovil chcꞌot ti laj calboxuc ti scꞌop Diose.
\p
\v 12 Quermanotac, chacalbeic vocol ti atojolic, yuꞌun ti jcꞌan ti mu xasventainoxuc ti mantaletique ti hoꞌoxuque hech chaj cꞌu cheꞌel mu sventainojucun xa ti mantaletique ti hoꞌone. Yuꞌun laj xa caꞌi ti cꞌu yaꞌyel ti nicol xa ti libre hech chaj cꞌu cheꞌel colemoxuc ti voꞌone ti muꞌyuc cꞌusi tscꞌan to laj avaꞌyique cꞌalal mu to chachꞌunique. Mu yuꞌunuc oy amul ti jtojol yuꞌun ti hech chacalboxuque.
\v 13 Chanaꞌic ti scoj ti jchamelune ti hech nicom te ti alumalique, hech laj jcholboxuc avaꞌyic ti lequil achꞌ cꞌope ti sba vueltae.
\v 14 Laj avilic ti uts jba scoj ti chamele, pero ti hoꞌoxuque muc xalabanucun, muc xapꞌajucun. Laj apasucun ti mucꞌ. Hech chaj cꞌu cheꞌel xchꞌul abat ti Diose laj avilucun. Hech chaj cꞌu cheꞌel Jesucristo laj avilucun yuꞌun laj apasucun ti mucꞌ.
\v 15 ¿Cꞌu yuꞌun hech chapasic ti ora to yuꞌun mu xa hechuc avoꞌntonic ti jtojol? Hoꞌon rexticoun avuꞌunic ti cꞌan aloqꞌues asatic yuꞌun chavacꞌbun taca huꞌuc avuꞌunique.
\v 16 Ti ora to ¿mi yuꞌun jaꞌ avajcontraun chicꞌot avuꞌunic yuꞌun ti laj calboxuc ti cꞌusi melele?
\p
\v 17 Ti muchꞌutic tal yalboxuc yan cꞌope, mu yuꞌunuc chaxcꞌuxubinoxuc yuꞌun ti hech chaslequilcꞌoponoxuque. Jaꞌ scꞌanic ti chanamajic batel ti jtojoltutic yuꞌun hech chapasic ti mucꞌ stuquic.
\v 18 Lec mi oy muchꞌu chascoltaoxuc scotol ora yuꞌun mu teucun scotol cꞌacꞌal. Mu yuꞌunuc mu xtun chcaꞌi yuꞌun ti oy yan chascoltaoxuque. Taca yuꞌunuc chalecubique, muꞌyuc cꞌusi chcal.
\v 19 Col jnichꞌnab, ep chavacꞌbun quichꞌ vocol yan vuelta. Mu xnichimaj coꞌnton jaꞌto mi laj quil ti lec chachꞌumbeic scꞌop ti Cajvaltique. Hech chaj cꞌu cheꞌel ti ants ti cꞌalal mu to chcol ti alajel, jaꞌto mi icole, mi icuxi ti yole, jaꞌto nichim noꞌox yoꞌnton. Jaꞌ hech coꞌnton uc ti hoꞌone. Coloxuc cꞌotem ti coꞌnton.
\v 20 Taca te oyucun ti atojolic ti ora to, mu hechuc stsatsal chacalboxuc yuꞌun más lec ti jnaꞌ cꞌu xꞌelan avoꞌntonic. Yuꞌun ep chloꞌlaj coꞌnton avuꞌunic ti ora to.
\s Jaꞌ scꞌopilal ti jaꞌ yolucutic ti muchꞌu oy ti libree
\p
\v 21 Hoꞌoxuc ti chacꞌan ti jaꞌ chasventainoxuc ti mantaletique, albun chcaꞌi mi avaꞌyojbeic sjam ti cꞌusi ti jpastic yuꞌune mi ti jchꞌuntic ti mantaletique.
\v 22 Hech tsꞌibabil comel scꞌopilal ti Abrahame ti oy laj yacꞌ chaꞌvoꞌ snichꞌon. Ti jun quereme, jaꞌ yol ti Agare ti oy ti quiaraile. Ti jun quereme jaꞌ yol ti Sarae ti oy ti libree.
\v 23 Yuꞌun ti laj sta yol ti Agare, jaꞌ ti sventa sbecꞌtalic noꞌox. Yuꞌun ti laj sta yol ti Sarae, yuꞌun hech spasoj trato xchiꞌuc ti Abrahame ti Diose.
\v 24-25 Ti chaꞌvoꞌ antsetique, jaꞌ señail ti chib vuelta laj spas trato ti Diose ti laj spas xchiꞌuc ti Moisese xchiꞌuc ti Abrahame. Ti Moisese jaꞌ ti lajuneb mantaletique ti iꞌalbat te ti vits Sinaí, jaꞌ ti chijꞌoch ti mozoil yuꞌune. Jaꞌ señail ti Agare ti ochem ti quiaraile. Ti yalabtac ti Agare laj yacꞌbe sbi Agar sbi ti vitse, jaꞌ ti Sinaie. Ti Agare jaꞌ yol icꞌot yaꞌyel ti jchiꞌiltaque ti te nacajtic ti Jerusalén ti ora to. Yuꞌun ti yol icꞌote, jaꞌ yuꞌun ti oyic ti mozoil yuꞌun ti mantaletique xchiꞌuc ti yol snichꞌonique ti ora to.
\v 26 Ti hoꞌucutique yuꞌun mu xa sventainojucutic ti mantaletique, hech yuꞌun jaꞌ jmeꞌtic icꞌot yaꞌyel ti Sarae ti oy ti libree. Mu xa oyucutic ti sventa ti Jerusalene ti liꞌ oy ti balumile. Oyucutic xa ti sventa ti achꞌ Jerusalene ti te oy ti vinajele.
\v 27 Yuꞌun jaꞌ hech tsꞌibabil comel jcꞌopilaltic ti voꞌone:
\q Manchuc mi comesbil cuꞌun ti Jerusalene ti ora to, pero ti patil más echꞌem ti jpas ti mucꞌ yuꞌun ti jchaꞌtsobbe tal más ep yajval ti achꞌ Jerusalene yuꞌun hoꞌon ti jpas hech ti chquicꞌbe tal yajvale.
\q Jaꞌuc ti poco Jerusalene mu xa oyuc ep yajval chcom,
\m ti xchi ti Diose.
\p
\v 28 Hech yuꞌun, quermanotac, hoꞌucutic yelnichꞌonucutic uc ti Abrahame xchiꞌuc ti Isaaque yuꞌun jaꞌ jcꞌopilaltic uc ti hech iꞌalbat ti Abrahame ti “chpꞌol avelnichꞌon”, ti xꞌutate.
\v 29 Ti voꞌone ti Ismaele ti iꞌan ti sventa noꞌox sbecꞌtalic ti stot smeꞌe, jaꞌ laj yilbajin ti Isaaque, jaꞌ ti iꞌan ti sventa ti Chꞌul Espíritue. Jaꞌ noꞌox hech chcꞌot ti pasel ti ora to uc. Chijyilbajinucutic ti muchꞌutic chchꞌun ti chcolic yuꞌun ti yabtelique.
\v 30 Hech tsꞌibabil ti sun ti Diose: “Teno loqꞌuel xchiꞌuc yol ti muchꞌu oy ti quiaraile. Yuꞌun ti yol ti muchꞌu oy ti quiaraile mu xichꞌbe comel sbendición ti stote. Jaꞌ chichꞌ comel ti yol ti muchꞌu oy ti libree”, ti xchie.
\v 31 Hech yuꞌun, quermanotac, ti hoꞌucutique maꞌuc yolucutic ti muchꞌu oy ti quiaraile. Jaꞌ yolucutic ti muchꞌu oy ti libree, hech yuꞌun mu me xacuyic ti chijcol yuꞌun ti mantaletique. Yuꞌun jaꞌ noꞌox chijꞌoch ti mozoil.
\c 5
\s Jaꞌ scꞌopilal jꞌechꞌeluc me teanic ti libre, xchi
\p
\v 1 Yuꞌun yacꞌojucutic ti libre ti Cristoe, hech yuꞌun jꞌechꞌeluc me teanic ti libre. Mu me xachaꞌticꞌ abaic yan vuelta ti mozoil. Jaꞌ chachaꞌochic ti mozoil yuꞌun mi chachꞌunic ti chacolic yuꞌun ti mantaletique ti hech chaj cꞌu cheꞌel xchꞌunojic ti jchiꞌiltaque.
\v 2 Aꞌyo me avaꞌyic, hoꞌon Pabloun chacalbeic avi to. Mi chachꞌunic ti lec chayiloxuc ti Diose yuꞌun ti chavichꞌic ti circuncisione, hech yuꞌun muꞌyuc stu chcꞌot avuꞌunic ti Cristoe.
\v 3 Yan vuelta chacalbeic. Scotol ti muchꞌutic chchꞌun ti lec ch-ilat yuꞌun ti Diose yuꞌun ti chichꞌic ti circuncisione, persa me chchꞌun scotol ti mantaletique.
\v 4 Ti hoꞌoxuque mi chachꞌunic ti lec chayiloxuc ti Diose yuꞌun ti chachꞌunic ti mantaletique chacuyique, mu hechuc. Mi chachꞌune, mu xa oyucoxuc ti stojol ti Cristo obi. Yuꞌun mu xa xachꞌunic ti chacolic yuꞌun ti Cristoe.
\v 5 Yuꞌun ti hoꞌucutique ti sventa ti Chꞌul Espíritue ti jchꞌuntic ti lec chijyilucutic ti Diose yuꞌun ti oy xchꞌunojel coꞌntontique.
\v 6 Yuꞌun ti stojol ti Cristo Jesuse mu tsotsuc scꞌopilal mi quichꞌojtic circuncisión, mi muc bu quichꞌojtic circuncisión. Jaꞌ tsots scꞌopilal ti oy xchꞌunojel coꞌntontique, ti chijcꞌuxubinvane.
\p
\v 7 Ti sliqueb lec laj achꞌunic. Ti ora to ¿cꞌu yuꞌun chachꞌumbeic scꞌop ti muchꞌutic jaꞌ noꞌox chaspajesoxuque? Yuꞌun ti scoj ti chachꞌumbeic ti scꞌope, hech yuꞌun chachꞌayic ti be.
\v 8 Yuꞌun ti chachꞌayic ti be yuꞌune, hech chvinaj ti maꞌuc sventa Dios ti ch-abtejique.
\v 9 Naꞌic me, manchuc mi jun noꞌox ti muchꞌu tsliques ti cꞌope, ta yutsil chabolib acotolic hech chaj cꞌu cheꞌel ti vaje ti ta yutsil mi jutuc noꞌox chichꞌ spumesbil xchꞌut pero chpum scotol xchꞌut ti vaje.
\v 10 Hoꞌoni hech coꞌnton ti stojol ti Cajvaltique ti jchꞌun ti mu xjel avoꞌntonic yuꞌun hech coꞌol ti jchꞌuntic. Ti muchꞌu chaxchibajesboxuc avoꞌntonique, ta me xꞌichꞌbat scꞌop yuꞌun ti Diose manchuc mi tsots yabtel yichꞌoj.
\p
\v 11 Quermanotac, oy chiyalbucun jcꞌopilal ti hoꞌon ta to jchol ti persa chquichꞌtic circuncisión, ti persa ti jchꞌuntic ti mantaletique yuꞌun hech chijcol. Hech chiyalbucun jcꞌopilal. Ti hechuc ti jpase, muꞌyuc contrainel ti hechuque, yuꞌun lec chaꞌyic scotolic. Yuꞌun oy to ti contrainele hech chvinaj ti cacꞌoj jba ti jchol ti jaꞌ noꞌox chijcolucutic ti sventa ti Cristoe ti jaꞌ icham cuꞌuntic ti cruze.
\p
\v 12 Taca xuꞌ ti hech acꞌo tupꞌuque ti muchꞌutic chalic ti persa chatuchꞌ jutuc ti abecꞌtalique yuꞌun hech chacolic tscuyic, jaꞌ lec ti hechuque yuꞌun hech mu xasbolibtasoxuc.
\p
\v 13 Yuꞌun ti naꞌicꞌatic xa tal ti stojol ti Diose, hoꞌoxuc quermanotac, yuꞌun libre chacꞌotic. Yuꞌun ti nacol ti libree, maꞌuc yuꞌun ti xuꞌ chachꞌunic cꞌuc noꞌox tscꞌan ti abecꞌtalique. Jaꞌ yuꞌun chacolta abaic, yuꞌun chacꞌuxubin abaic.
\v 14 Yuꞌun mi chachꞌunic ti “cꞌux me xavaꞌi avecino hech chaj cꞌu cheꞌel cꞌux xavaꞌi aba”, ti xchie, chachꞌunic scotol ti mantaletique obi.
\v 15 Jaꞌuc mi chapasic pleito, mi mu xtun chavil abaic, pꞌijanic me yuꞌun jaꞌ noꞌox chasoques abaic.
\s Jaꞌ scꞌopilal ti contra chil sbaic xchiꞌuc ti Chꞌul Espíritue ti jbecꞌtaltique
\p
\v 16 Hech yuꞌun chacalbeic, acꞌo sventainoxuc ti Chꞌul Espíritue yuꞌun hech mu xachꞌunic ti cꞌusi tscꞌan ti abecꞌtalique.
\v 17 Yuꞌun ti jbecꞌtaltique contra chil sbaic xchiꞌuc ti Chꞌul Espíritue. Yuꞌun ti jbecꞌtaltique tscꞌan mulil. Ti Chꞌul Espíritue mu scꞌan mulil. Hech yuꞌun ti contra chil sbaic xchiꞌuc ti jbecꞌtaltique, hech mu xuꞌ ti jpastic ti cꞌusi ti jcꞌan ti jpastique.
\v 18 Mi jaꞌ chastojobtasoxuc ti Chꞌul Espíritue muꞌyuc amul ti stojol ti mantaletique yuꞌun Dios ti chastojobtasoxuque.
\p
\v 19 Mi ti jchꞌuntic ti cꞌusi tscꞌan ti jbecꞌtaltique, hech ti jpastic. Chijmulivaj, ti jpastic scotol ti cꞌutic chopole, asta muꞌyuc xa qꞌuexlal o.
\v 20 Ti jpastic ti mucꞌ santoetic, ti jpastic picchꞌichꞌ. Chquilinta jbatic, mu xtun chquil jbatic, ti jpas biqꞌuit coꞌntontic, ti jliques scꞌacꞌal coꞌntontic, jaꞌ noꞌox ti jcꞌantic mi lec chijbat jtuctic, jaꞌ ti jcꞌantic ti chaꞌtos acꞌo cꞌotuc ti quermanotique. Jaꞌ noꞌox ti jcꞌantic ti acꞌo jpꞌev jbatic xchiꞌuc.
\v 21 Chbicꞌtaj coꞌntontic, chijmilvan, chijyacub, cꞌuc noꞌox ti jovilpastic cꞌalal chijyacub. Calojboxuc xa pero chacalbeic yan vuelta. Scotol ti muchꞌutic hech tspasique, mu xuꞌ chba xchiꞌinic ti Diose.
\p
\v 22 Yuꞌun ch-abtej ti coꞌntontic ti Chꞌul Espíritue, hech yuꞌun hech ti jpastic. Cꞌux chcaꞌi jbatic, nichim noꞌox coꞌntontic, jun coꞌntontic, scotol chcuch cuꞌuntic, oy yutsil coꞌntontic, lec coꞌntontic, chcꞌot ti pasel scotol ti cꞌutic chcaltique.
\v 23 Biqꞌuit chcacꞌ jbatic, ti jpajes jbatic mu jpastic cꞌu tscꞌan ti coꞌntontique. Mi hech ti coꞌntontique, muꞌyuc jmultic ti stojol ti mantaletique.
\v 24 Hoꞌucutic ti yuꞌunucutic ti Cristoe, yuꞌun ti mu xa jchꞌumbetic smantal ti jbecꞌtaltique, laj xa cacꞌtic ti milel ti cruz xchiꞌuc sbicꞌtal coꞌntontic chcꞌot.
\v 25 Yuꞌun jaꞌ chijcuxi yuꞌun sbatel osil ti Chꞌul Espíritue, hech yuꞌun acꞌo cacꞌbetic sventaimbucutic coꞌntontic.
\p
\v 26 Mu me jtoy jbatic, mu me jsujtic yan yuꞌun acꞌo spas hech chaj cꞌu cheꞌel ti jcꞌan ti jpastic, mu me jpas biqꞌuit coꞌntontic.
\c 6
\s Jaꞌ scꞌopilal coltao abaic ti ichꞌ vocol, xchi
\p
\v 1 Quermanotac, mi oy muchꞌu laj sta smul avilic, ti hoꞌote yuꞌun ti ventaimbilot yuꞌun ti Chꞌul Espíritue, sutesbo yoꞌnton yuꞌun. Lamajemuc me avoꞌnton cꞌalal chataqꞌui. Naꞌo me ti coꞌol tscꞌan chijyicꞌucutic ti mulil ti jbecꞌtaltique jcotoltic.
\v 2 Yuꞌun ti hech chacolta abaique, hech coꞌol chachꞌumbeic smantal ti Cristoe ti cꞌux me xavaꞌi abaique, ti xchie.
\v 3 Mi oy muchꞌu chal: “Hoꞌoni xuꞌ cuꞌun jtuc. Mu persauc chiscoltaun ti quermanotique”, mi xchie, tsloꞌla sba. Tscuy ti oy lec yip yoꞌnton stuc.
\v 4 Hech yuꞌun ti jujunucutique mi ti jcꞌan ti jnaꞌ mi lec ti cꞌutic laj jpastique, jaꞌ tscꞌan ti jqꞌueltic mi lec ti cꞌutic laj jpastic jtuctique. Hech xuꞌ chquiltic mi lec mi mu lecuc ti cabteltique ti laj xa jpastique. Mi ti jqꞌuelbetic yabtel yan, jaꞌ noꞌox ti jloꞌla jbatic. Yuꞌun hech ti jchꞌuntic ti más lecucutic jtuctic. Mu xquiltic mi coꞌol yacꞌoj sba ti jpastic xchiꞌuc.
\v 5 Yuꞌun jujunucutic chcꞌot ti jventatic ti cꞌu xꞌelan laj jpastic ti cabteltique.
\p
\v 6 Ti muchꞌu chchanubtasat ti scꞌop Diose acꞌo yacꞌbe scotol ti cꞌusi chtun yuꞌun ti jchanubtasvanej yuꞌune.
\p
\v 7 Mu me xalajic ti loꞌlael. Mu stacꞌ chlabanat ti Diose. Persa chcꞌot ti pasel ti scꞌope. Ti cꞌusi laj jtsꞌuntique jaꞌ noꞌox chcꞌot jcꞌajtic.
\v 8 Mi jaꞌ ti jpasilantic ti cꞌusi tscꞌan ti jbecꞌtaltique, jaꞌ noꞌox yacꞌoj sba chijbolib batel, asta chꞌayel chijbat xchiꞌuc ti jbecꞌtaltique. Mi jaꞌ ti jpasilantic ti cꞌusi tscꞌan ti Chꞌul Espíritue, hech yacꞌoj sba chijlecub batel asta chcꞌo jtatic ti chijcuxiucutic sbatel osil ti sventa.
\v 9 Hech yuꞌun mu me specꞌtsaj ti coꞌntontique yuꞌun ti jpastic ti cꞌusi leque. Yuꞌun mi mu xchibaj coꞌntontic ta me sta yorail chcꞌot jtatic ti cꞌusi leque.
\v 10 Hech yuꞌun ti jayib vuelta chquiltic ti oy svocol ti crixchanoetique, acꞌo jcꞌuxubintic scotol. Jaꞌ tsots scꞌopilal ti jcꞌuxubintic scotol ti quermanotique ti oy svocol chquiltique yuꞌun coꞌol oy xchꞌunojel coꞌntontic xchiꞌuc.
\s Jaꞌ scꞌopilal ti jaꞌ noꞌox toyol yoꞌnton ti Pabloe yuꞌun ti icham ti cruz cuꞌuntic ti Cajvaltic Jesucristoe
\p
\v 11 Qꞌuelo avil cꞌu smucꞌul ti letra liꞌto, hech chanaꞌ ti hoꞌon laj jtsꞌibaboxuc ti jtuchꞌ liꞌto.
\v 12 Ti quermanotique ti tscꞌan chasujoxuc yuꞌun chavichꞌic circuncisione, jaꞌ noꞌox tspasic yuꞌun tscꞌan ti lec ch-ilatic yuꞌun ti jchiꞌiltaque ti mu xchꞌunojbuc scꞌop ti Cristoe. Ti hoꞌucutique ti jchꞌunojtic ti jaꞌ noꞌox chijcolucutic yuꞌun ti icham cuꞌuntic ti cruz ti Cristoe, persa chquichꞌtic labanel. Yuꞌun mu scꞌanic labanel ti quermanotique yuꞌun ti jchiꞌiltaque, hech yuꞌun ti hech chalic ti jaꞌ lec ti chavichꞌic circuncisione.
\v 13 Ti muchꞌutic tsots scꞌopilal chaꞌyic ti circuncisione, mu xa tsotsuc scꞌopilal chaꞌyic ti yan mantaletique. Jaꞌ noꞌox tscꞌanic ti chavichꞌic circuncisión uc ti hoꞌoxuque yuꞌun hech lec chbat scꞌopilalic ti sventa noꞌox abecꞌtalic.
\v 14 Ti hoꞌone jaꞌ noꞌox toyol coꞌnton yuꞌun ti icham ti cruz cuꞌuntic ti Cajvaltic Jesucristoe. Yuꞌun ti laj scoltaun ti Cajvaltique, hech yuꞌun mu xa tsotsuc scꞌopilal chcaꞌi ti cꞌusi oy liꞌ ti balumile. Hech yuꞌun uc muꞌyuc xa jtu chiꞌilat liꞌ ti balumile yuꞌun ti hech jchꞌunoje.
\v 15 Yuꞌun ti stojol ti Cristo Jesuse mu tsotsuc scꞌopilal mi quichꞌojtic circuncisión mi muc bu quichꞌojtic circuncisión. Jaꞌ tsots scꞌopilal ti jelbil coꞌntontic hech achꞌ crixchanoucutic.
\v 16 Jcotoltic ti hech jchꞌunojtique, junuc me coꞌntontic, mu me xloꞌlaj coꞌntontic. Acꞌo jnaꞌtic ti chixcꞌuxubinucutic ti Diose yuꞌun yol snichꞌonucutic ti mero melel.
\p
\v 17 Mu stacꞌ chiscontraimbun jcꞌop, yuꞌun hoꞌoni oy señail yajemal ti jbecꞌtal cꞌalal laj quichꞌ nucul, cꞌalal laj quichꞌ ton, yuꞌun chiꞌabtej yuꞌun ti Cajvaltic Jesuse.
\p
\v 18 Quermanotac, acꞌo yacꞌboxuc ep bendición ti Cajvaltic Jesucristoe.