\id 1TH

\h 1 TESALONICENSES
\toc1 1 TESALONICENSES
\mt JAꞌ TI SBA SCARTA TI QUERMANOTIC TE TI TESALONICAE
\mt2 ti itsꞌibabat yuꞌun ti Pabloe
\c 1
\s Ti Pabloe hech lic scꞌopon ti carta ti quermanotic te ti Tesalonicae
\p
\v 1 Hoꞌon Pabloun xchiꞌuc ti chaꞌvoꞌ quermanotic, jaꞌ ti Silase xchiꞌuc ti Timoteoe, oxvoꞌuntutic ti chajcꞌoponoxuc ti cartae, hoꞌoxuc ti te nacaloxuc ti jteclum Tesalonicae ti naꞌicꞌatic xa tal ti stojol ti Jtotic Diose xchiꞌuc ti Cajvaltic Jesucristoe. Acꞌo yacꞌboxuc bendición ti Jtotic Diose xchiꞌuc ti Cajvaltic Jesucristoe. Acꞌo yacꞌbot jun avoꞌntonic ti jujunoxuque.
\s Jaꞌ scꞌopilal ti quermanotic te ti Tesalonicae ti jbael laj yaqꞌuic ti qꞌuelel ti cꞌusi lec tspasic uque scotol ti jchꞌunojeletique
\p
\v 2 Ti hoꞌontutique scotol cꞌacꞌal hocol aval chcututic ti Diose yuꞌun ti achꞌunojbeic xa ti scꞌope. Scotol cꞌacꞌal chajnaꞌoxuc ti stojol ti Diose acotolic.
\v 3 Cꞌalal ti jcꞌopontutic Dios ti atojolic, jaꞌ ti Jtotic cuꞌuntique, ti jnaꞌtutic ti lec laj achꞌunique cꞌalal te oyuntutique, hech yuꞌun ti lec naꞌabtejique, laj apucbeic ti scꞌope. Ti jnaꞌtutic uc ti nacꞌuxubinvanique, hech yuꞌun ti nacoltavanique. Ti jnaꞌtutic uc ti jun avoꞌntonic chamalaic ti Cajvaltic Jesucristoe manchuc mi ep chavichꞌic vocol.
\v 4 Quermanotac, cꞌuxoxuc ti yoꞌnton ti Diose. Ti jnaꞌtutic ti tꞌujbiloxuc yuꞌun ti Diose.
\v 5 Yuꞌun cꞌalal hul calboxuc ti lequil achꞌ cꞌope, maꞌuc noꞌox ti sventa ti jcꞌoptutic ti laj achꞌunique. Jaꞌ ti sventa ti Chꞌul Espíritue, jaꞌ ti laj yacꞌboxuc anaꞌic ti melel ti scꞌop ti Diose ti hul calboxuque. Hech yuꞌun oy yip icꞌot ti avoꞌntonic ti scꞌop ti Diose. Hech yuꞌun laj asutes avoꞌntonic. Chanaꞌic ti jun coꞌntontutic ti atojolic yuꞌun laj jcꞌantutic ti chacolique.
\p
\v 6 Hech yuꞌun laj achambucun coꞌntontutic. Hech laj achambe yoꞌnton uc ti Cajvaltique. Ep laj avichꞌic ilbajinel yuꞌun laj apasic ti mucꞌ ti scꞌop ti Diose. Manchuc mi laj avichꞌic vocol, nichim noꞌox avoꞌntonic ti sventa ti Chꞌul Espíritue ti avichꞌojique.
\v 7 Cꞌalal nichim noꞌox avoꞌntonic icuch avuꞌunic ti ilbajinele, hoꞌoxuc jbael laj avacꞌ ti qꞌuelel ti cꞌusi lec tspasic uque scotol ti jchꞌunojeletique te ti estado Macedonia ti bu nacaloxuque xchiꞌuc ti estado Acaya liꞌto.
\v 8 Hoꞌoxuc ti aventaic ti lec puquem ti scꞌop ti Cajvaltique te ti estado avuꞌunique xchiꞌuc ti estado Acaya liꞌto. Maꞌuc noꞌox puquem acꞌopilalic te ti estado avuꞌunic jaꞌ ti Macedoniae xchiꞌuc ti estado Acaya liꞌto, buc noꞌox puquem acꞌopilalic ti lec achꞌunojbeic scꞌop ti Diose. Scotolic yaꞌyojic. Hech yuꞌun mu persauc chcalbetutic acꞌopilalic ti lec laj achꞌunic ti sliqueb ti cꞌalal laj avaꞌibeic scꞌop ti Cajvaltique.
\v 9 Jaꞌ stuquic chiyalbuntutic ti acꞌopilalic ti cꞌu cheꞌel laj apasbucuntutic ti mucꞌ ti jcꞌoptutique, ti cꞌu cheꞌel laj acomesic ti santoetique yuꞌun ti laj achꞌunic ti chaspasoxuc ti mantal ti mero Diose ti stalel cuxule. Hech yuꞌun chatunic yuꞌun.
\v 10 Chalic uc ti chamalaic chchaꞌsut tal ti vinajel ti Snichꞌon ti Diose, jaꞌ ti Jesuse, jaꞌ ti ichaꞌcusesat loqꞌuel ti chꞌen yuꞌun ti Diose, jaꞌ ti laj xa scoltaucutique yuꞌun mu xijyacꞌbucutic castigo ti Diose cꞌalal chchapambe smul scotol crixchanoetic.
\c 2
\s Jaꞌ scꞌopilal ti tstꞌabesbe ti yoꞌntonic ti quermanotique ti cꞌu cheꞌel iꞌabtej ti stojolic
\p
\v 1 Quermanotac, lec chanaꞌic ti mu hoviluc ti laj jcholboxuc ti lequil achꞌ cꞌope.
\v 2 Chanaꞌic ti jaꞌto noꞌox laj quichꞌtutic vocol laj quichꞌtutic labanel te ti jteclum Filipos cꞌalal hul jcholboxuc ti lequil achꞌ cꞌop yuꞌun ti Diose. Ti Dios cuꞌuntique laj yacꞌbuntutic stsatsal coꞌntontutic hech yuꞌun manchuc mi ep ti contrainele muc xixiꞌtutic. Jamal laj jcholboxuc ti scꞌope.
\v 3 Mu hoviluc ti cacꞌoj jba ti jcholtutic ti scꞌop ti Diose, mu loꞌlabilucun. Mu yuꞌunuc chopol coꞌntontutic. Mu yuꞌunuc jcꞌan chiloꞌlavantutic.
\v 4 Yuꞌun lec laj yiluntutic ti Diose hech yuꞌun laj yacꞌbun cabteltutic yuꞌun ti jcholtutic ti lequil achꞌ cꞌope hech yuꞌun ti cacꞌoj jba ti jcholtutique. Mu yuꞌunuc jaꞌ ti jcꞌantutic ti lec chiyiluntutic ti crixchanoetique. Jaꞌ ti jcꞌantutic ti lec chiyiluntutic ti Diose jaꞌ ti scotol cꞌacꞌal tsqꞌuel cꞌu xꞌelan ti coꞌntontique.
\v 5 Chanaꞌic ti muꞌyuc bu laj jlequilcꞌoponoxuc yuꞌun hech chajloꞌlaic. Muꞌyuc bu ibicꞌtaj coꞌntontutic yuꞌun taqꞌuin hech yuꞌun muꞌyuc bu laj jloꞌlaoxuc ti cꞌop. Snaꞌ ti Diose cꞌu xꞌelan coꞌntontutic cꞌalal te jchiꞌinojoxuque.
\v 6 Maꞌuc laj jcꞌantutic ti chispasucuntutic ti mucꞌ ti crixchanoetique, mi hoꞌoxuc uc. Muꞌyuc bu laj cacꞌboxuc avichꞌic vocol yuꞌun ti oy cabteltutique. Ti lajuc jcꞌantutique, xuꞌ chacacꞌboxuc avichꞌic vocol yuꞌun jcholcꞌopuntutic yuꞌun ti Cristoe.
\v 7 Biqꞌuit laj cacꞌ jbatutic ti atojolic. Hech chac cꞌu cheꞌel ants ti más cꞌux chaꞌi ti yole, hech laj jcꞌuxubinoxuc.
\v 8 Yuꞌun laj jcꞌantutic ti jꞌechꞌel chachꞌunique hech yuꞌun maꞌuc noꞌox laj jcholboxuc ti lequil achꞌ cꞌop yuꞌun ti Diose, jaꞌ laj calboxuc uc ti cꞌu xꞌelan ti coꞌntontutique yuꞌun ep cꞌuxoxuc ti coꞌntontutic.
\v 9 Chanaꞌic uc, quermanotac, ti cꞌu cheꞌel niꞌabtejtutique. Oy jvocoltutic. Ti cꞌacꞌal ti acꞌubal niꞌabtejtutic hech laj jta jveꞌeltutic yuꞌun mu laj jcꞌantutic ti chacacꞌboxuc avichꞌic vocol, mi junuc. Hech ihuꞌ cuꞌuntutic laj jcholboxuc avaꞌyic ti lequil achꞌ cꞌop yuꞌun ti Diose.
\p
\v 10 Hoꞌoxuc laj avilic, jaꞌ laj yil uc ti Diose ti lec coꞌntontutic, ti toj coꞌntontutique, muꞌyuc jmultutic cꞌalal niꞌabtejtutic ti atojolic hoꞌoxuc ti achꞌunojique.
\v 11 Chanaꞌic uc ti hech chaj cꞌu cheꞌel ti muchꞌu tstaqꞌui snichꞌon, hech laj jtaqꞌuioxuc uc, laj jmucꞌubtasboxuc avoꞌntonic.
\v 12 Laj calboxuc ti tscꞌan ti toj chapas abaic yuꞌun oyoxuc xa ti stojol ti Diose. Yuꞌun laj xa yicꞌoxuc ti stojol yuꞌun chaꞌochic ti bu tspas mantal, yuꞌun chaqꞌuelbeic yutsil yoꞌnton xchiꞌuc squeval.
\p
\v 13 Hech yuꞌun scotol cꞌacꞌal hocol aval chcututic ti Diose yuꞌun ti laj apasic ti mucꞌ ti scꞌop ti Diose cꞌalal laj jcholboxuque. Laj achꞌunic ti mu scꞌopuc crixchanoetic, ti jaꞌ scꞌop ti Diose. Melel ti jaꞌ ti sventa ti scꞌop ti Diose ti toj chcꞌot ti coꞌntontique, hoꞌucutic ti jchꞌunojtique.
\v 14 Quermanotac, coꞌol laj xa avichꞌic vocol hech chaj cꞌu cheꞌel ti jchiꞌiltaque ti xchꞌunojbeic scꞌop ti Diose te ti Judea ti oyic uc ti stojol ti Cristo Jesuse. Hech chaj cꞌu cheꞌel iꞌilbajinvan ti jchiꞌiltaque te ti Judea, jaꞌ noꞌox hech uc laj xa yilbajinoxuc ti achiꞌiltaque te ti alumal.
\v 15 Jaꞌ ti jchiꞌiltaque ti laj smilic ti Cajvaltic Jesuse xchiꞌuc ti jꞌalcꞌopetic yuꞌun ti Diose. Jaꞌ laj stenuntutic loqꞌuel uc. Mu scꞌan xchꞌumbeic smantal ti Diose, hech yuꞌun mu xtun ch-ilat yuꞌun ti Diose. Chascontrainoxuc uc hoꞌoxuc ti yanlum crixchanooxuque.
\v 16 Tscꞌan chispajesuntutic yuꞌun mu me xajcholboxuc avaꞌyic ti scꞌop ti Diose yuꞌun mu scꞌan ti chacolique. Hech yuꞌun scotol cꞌacꞌal yacꞌoj sba chtoy ti smulique. Hech yuꞌun chtal tsots castigo ti stojolic.
\s Jaꞌ scꞌopilal toyol coꞌntontutic jcꞌantutic chtal jqꞌueloxuc yan vuelta, xchi
\p
\v 17 Quermanotac, cꞌalal ti muc xiscꞌanuntutic ti crixchanoetique ti cꞌalal nilocꞌtutic ti atojolique, muc xachꞌay ti coꞌntontutic. Ti jayib cꞌacꞌal muc jta jbatic ti cꞌoponel, te oy coꞌntontutic ti atojolic. Hech yuꞌun toyol coꞌntontutic jcꞌantutic chtal jqꞌueloxuc yan vuelta.
\v 18 Ti manchuc laj spajesuntutic ti Satanase, laj xa jcꞌopon jbatic. Yuꞌun mu junuc to noꞌox vuelta jcꞌan chtal jqꞌueloxuc, hoꞌon ti Pabloune.
\v 19 Yuꞌun cꞌalal chtal ti Cajvaltic Jesucristoe, hoꞌoxuc ti aventaic chmucꞌub coꞌntontutic ti stojol. Nichim noꞌox coꞌntontutic chcꞌot jvaꞌanoxuc ti stojol. Hoꞌoxuc ti aventaic chvinaj ti ihuꞌ cuꞌuntutic laj jpasbetutic yabtel ti Diose.
\v 20 Yuꞌun ti ora to hoꞌoxuc ti aventaic ti lec chbat jcꞌopilaltutique. Hoꞌoxuc ti aventaic ti nichim noꞌox coꞌntontutic ti ora to.
\c 3
\p
\v 1 Hech yuꞌun laj jchapantutic ti te to chicomtutic ti Atenase, hoꞌon xchiꞌuc ti Silase. Yuꞌun mu jcꞌan jmalatutic más ep cꞌacꞌal yuꞌun mu xcaꞌitutic cꞌu xaꞌelanic,
\v 2 hech yuꞌun laj jchaꞌtac sut tal ti atojolic ti quermanotic Timoteoe, jaꞌ ti acꞌbil yabtel uc yuꞌun ti Diose. Jaꞌ ti jchiꞌin jbatutic xchiꞌuc ti xcholel ti lequil achꞌ cꞌop yuꞌun ti Cristoe. Hech yuꞌun laj jchaꞌtac sut tal yuꞌun acꞌo stsatsubtasboxuc avoꞌntonic, hech ch-an yip avoꞌntonic.
\v 3 Hech mu xchibaj avoꞌntonic yuꞌun ti vocol ti chavichꞌique. Hoꞌoxuc chanaꞌic ti hech jcꞌopilaltic ti chquichꞌtic ti vocole.
\v 4 Cꞌalal te to jchiꞌinojoxuque, laj calboxuc ti ta onoꞌox xquichꞌtic ti vocole. Chanaꞌic xa yuꞌun hech icꞌot ti pasel xa.
\v 5 Hech yuꞌun mu laj jcꞌan laj jmala más ep cꞌacꞌal, hech yuꞌun laj jchaꞌtacboxuc sut tal ti Timoteoe yuꞌun jcꞌan chcaꞌi mi achꞌunojic to. Nixiꞌ mi nalajic xa ti loꞌlael yuꞌun ti pucuje, jaꞌ ti stalel tspasilan proval ti coꞌntontique. Yuꞌun mi nalajic xa ti loꞌlaele, hovil ti cabteltutique.
\p
\v 6 Ti ora to laj xa caꞌitutic ti cꞌu xaꞌelanique yuꞌun isut xa tal ti Timoteoe. Hul yalbuntutic scotol ti cꞌu xaꞌelanique. Nichim noꞌox coꞌntontutic ti ora to yuꞌun laj xa caꞌitutic ti achꞌunojique, ti chacꞌuxubinvanique. Laj yalbuntutic uc ti scotol cꞌacꞌal chanaꞌilanuntutique, yuꞌun chacꞌan chaqꞌuelbuntutic jsatutic yan vuelta. Hech chaj cꞌu cheꞌel chacꞌanic chaqꞌuelbuntutic jsatutic ti hoꞌoxuque, jaꞌ noꞌox hechun uc ti hoꞌontutique ti jcꞌan ti jqꞌueltutic asatic uc.
\v 7 Oy ichꞌ mul, oy vocol chcaꞌitutic ti ora to. Hech yuꞌun, quermanotac, cꞌalal laj caꞌitutic ti lec chachꞌunique, laj jtoj coꞌntontutic.
\v 8 Yuꞌun laj caꞌitutic ti jun avoꞌntonic ti stojol ti Cajvaltique, hech yuꞌun imucꞌub coꞌntontutic.
\v 9 Yuꞌun jelaven nichim noꞌox coꞌntontutic avuꞌunic ti stojol ti Dios cuꞌuntique, mu xa jnaꞌtutic cꞌusi chcalbetutic ti Diose yuꞌun ti más lec achꞌunojique.
\v 10 Ti cꞌacꞌal ti acꞌubal toyol coꞌntontutic ti jcꞌopontutic Dios yuꞌun acꞌo huꞌuc cuꞌuntutic chtal jqꞌueltutic asatic yan vuelta yuꞌun ti jcꞌantutic chacalboxuc ti bu mu xtojob avuꞌunique.
\p
\v 11 Ti jcꞌambetutic vocol ti Jtotic Dios cuꞌuntique xchiꞌuc ti Cajvaltic Jesucristoe acꞌo xistojobtasuntutic yuꞌun hech chtal jqꞌueloxuc yan vuelta.
\v 12 Ti jcꞌambetutic vocol uc ti Cajvaltique acꞌo xascoltaoxuc yuꞌun hech más chacꞌuxubin abaic, yuꞌun hech más cꞌux chavaꞌyic scotol crixchanoetic hech chaj cꞌu cheꞌel cꞌux chacaꞌyoxuque.
\v 13 Hech chastsatsubtasboxuc avoꞌntonic yuꞌun hech muꞌyuc amulic chacꞌotic ti stojol ti Jtotic Dios cuꞌuntique cꞌalal chtal ti Cajvaltic Jesucristoe. Chchiꞌin tal ti chꞌul abatetic yuꞌune.
\c 4
\s Jaꞌ scꞌopilal ti jaꞌ tscꞌan ti Diose ti lec ti coꞌntontique
\p
\v 1 Hech yuꞌun jaꞌ slajeben xa chacalbeic avi to, quermanotac, hech chajtaqꞌuioxuc ti sventa ti Cajvaltic Jesuse. Ti cꞌalal te to oyuntutic, laj calboxuc avaꞌyic ti cꞌu cheꞌel tscꞌan ti chapasique yuꞌun hech lec chayiloxuc ti Diose, hech lic achꞌunic. Hech yuꞌun chajcꞌambeic vocol ti ora to ti sventa ti Cajvaltique. Chꞌunic me ti mero melel scotol.
\p
\v 2 Chanaꞌic ti cꞌutic laj calboxuc comel ti sventa ti Cajvaltic Jesuse.
\v 3 Jaꞌ tscꞌan ti Diose ti lec coꞌntontique, ti mu jsaꞌ jmultique. Hech yuꞌun mu stacꞌ chijmulivaj.
\v 4 Ti jujunoxuque ti cꞌalal chata avajnil, junuc me avoꞌnton ti stojol, hech lec acꞌopilal chbat.
\v 5 Mu me jaꞌuc noꞌox batem avoꞌntonic chachꞌunic ti cꞌusi tscꞌan ti abecꞌtalique hech chaj cꞌu cheꞌel tspasic ti muchꞌutic mu snaꞌic bu oy ti Diose.
\v 6 Mu me xba asaꞌ amulic ti stojol yan. Mu me xaloꞌla yan. Yuꞌun ti Cajvaltique ta me xacꞌbe castigo ti muchꞌu hech tspasique. Ta me xcꞌot ti pasel, xacututic.
\v 7 Yuꞌun ti laj xa yicꞌucutic ti stojol ti Diose, maꞌuc yuꞌun ti jnopilantic ti cꞌusi chopole. Jaꞌ yuꞌun ti jnopilantic ti cꞌusi leque hech mu jta jmultic.
\v 8 Hech yuꞌun ti muchꞌutic mu spas ti mucꞌ avi mantal liꞌto, maꞌuc smantal crixchanoetic ti tspꞌajbe. Jaꞌ tspꞌajbe smantal ti Diose, jaꞌ ti laj xa yacꞌbucutic quichꞌtic ti Chꞌul Espíritue.
\p
\v 9 Mu persauc chacalboxuc yuꞌun ti chacꞌuxubin abaique, hoꞌoxuc ti avermano abaique, yuꞌun laj xa xchanubtasoxuc ti Diose hech yuꞌun ti cꞌux chavaꞌi abaic xae.
\v 10 Maꞌuc noꞌox laj acꞌuxubin abaic atuquic ti cꞌu avepalic ti te nacaloxuc ti Tesalonicae, jaꞌ laj xa acꞌuxubinic uc scotol ti quermanotique ti te oyic uc ti estado avuꞌunique, jaꞌ ti Macedoniae. Lec ti hech laj xa apasique, quermanotac. Pero chajcꞌambeic vocol. Ti jcꞌantutic ti chavaqꞌuic persa yuꞌun hech más chacꞌuxubinvanic.
\v 11 Toyoluc me avoꞌntonic chacꞌanic yuꞌun chlamaj ti avoꞌntonique. Mu me xaticꞌ abaic ti cꞌop ti bu mu aventauc chachapanique. Ti bu avabtele te chaꞌabtejic hech chaj cꞌu cheꞌel laj calboxuc.
\v 12 Yuꞌun mi hech chapasique, hech lec chbat acꞌopilalic yuꞌun ti muchꞌutic mu xchꞌunojuque. Hech ch-an avuꞌunic ti cꞌusi chtun avuꞌunique. Mu xtun mi oy muchꞌu chavacꞌbe yichꞌ vocol yuꞌun scoj ti mu xaꞌabtejique.
\s Jaꞌ scꞌopilal cꞌalal chtal ti Cajvaltique
\p
\v 13 Quermanotac, ti jcꞌan ti chanaꞌbeic scꞌopilal ti muchꞌutic ivay xa ti sbecꞌtalique yuꞌun hech mu xavichꞌic mul hech chaj cꞌu cheꞌel ti crixchanoetique ti muꞌyuc smucꞌul yoꞌntonique.
\v 14 Ti jnaꞌtic ti icham ti Jesuse. Ti jnaꞌtic ti patil ichaꞌcusesat loqꞌuel ti chꞌen yuꞌun ti Diose. Hech onoꞌox uc cꞌalal chtal ti Jesuse, ti jnaꞌtic ti chchaꞌcusesat loqꞌuel ti chꞌen yuꞌun ti Diose scotol ti muchꞌutic xchꞌunojbeic scꞌop ti Jesuse ti cꞌalal ivay ti sbecꞌtalique.
\p
\v 15 Hech laj yalbuntutic ti Cajvaltique hech yuꞌun chacalbeic. Ti hoꞌucutique mi cuxulucutic to chul staucutic ti Cajvaltique, coꞌol chijmu batel xchiꞌuc ti quermanotique ti muchꞌutic ivay xa ti sbecꞌtalique. Muꞌyuc muchꞌu chbaej batel.
\v 16 Ti Cajvaltique tsots chal mantal, chyal tal ti vinajel. Tsots chcꞌopoj tal uc ti totil chꞌul abat yuꞌun ti Diose. Tsots ch-oqꞌuesanat tal scorneta ti Diose. Ti muchꞌutic xchꞌunojbeic scꞌop ti Cristoe ti cꞌalal ivay ti sbecꞌtalique, jaꞌ jbael chchaꞌcuxiic.
\v 17 Ti hoꞌucutique, mi cuxulucutic to chul staucutic, coꞌol chijyicꞌucutic muel xchiꞌuc. Hech chijmac ti toc. Te ti oꞌlol vinajel chcꞌot jtatic ti Cajvaltique. Ba jchiꞌintic o sbatel osil ti Cajvaltique.
\v 18 Hech yuꞌun mucꞌubtasbo abaic avoꞌntonic ti sventa ti cꞌop avi to.
\c 5
\p
\v 1 Quermanotac, mu xuꞌ chacalboxuc ti jayib habil tscꞌan chtal ti Cajvaltique. Mu xuꞌ chacalboxuc cꞌusi cꞌacꞌalil chtal yuꞌun mu jnaꞌtic cꞌusi ora chtal.
\v 2 Chanaꞌic xa ti cꞌalal tsta yorail chtal ti Cajvaltique, ti ora noꞌox chtal hech chaj cꞌu cheꞌel mu jnaꞌtic cꞌusi ora chtal jꞌelecꞌ ti acꞌubaltic.
\v 3 Ti cꞌalal yacꞌoj sba chalic ti crixchanoetique: “Nichim noꞌox coꞌntontic, muꞌyuc pleito, lec oyucutic”, xchiic, ti ora noꞌox chtal ti vocole. Jaꞌ hech chaj cꞌu cheꞌel ti ora noꞌox chlic xcꞌuxul xchꞌut ti antse cꞌalal chcol ti alajel, jaꞌ hech ti vocole. Mi junuc muꞌyuc muchꞌu chcol loqꞌuel. Persa chichꞌic scotolic.
\v 4 Ti hoꞌoxuque, quermanotac, mu xa oyucoxuc ti icꞌ osil yuꞌun ti mu xa xasaꞌ amulique. Pꞌijubenoxuc xa. Hech yuꞌun cꞌalal chtal ti Cajvaltique, mu chꞌayemuc avoꞌntonic chul staoxuc. Ti muchꞌu oyic ti icꞌ osile ti tsaꞌilan ti smulique, chꞌayem yoꞌntonic chul taatuc yuꞌun ti Cajvaltique hech chaj cꞌu cheꞌel ti jꞌeleqꞌue ti mu xaꞌi ch-echꞌ acꞌubal. Jaꞌto cꞌalal tsqꞌuel, tsacub xa ti osile.
\v 5 Acotolic oyoxuc xa ti sac osil, oyoxuc xa ti cꞌacꞌaltic yuꞌun mu xa xasaꞌ amulique. Jcotoltic mu xa sventaucutic ti acꞌubaltique, mu xa sventaucutic ti icꞌ osile yuꞌun lecuben xa coꞌntontic.
\v 6 Hech yuꞌun mu me vayalucutic hech chaj cꞌu cheꞌel ti muchꞌutic mu snaꞌique. Mu me chꞌayemuc coꞌntontic cacꞌoj jbatic ti jpastic mulil hech chaj cꞌu cheꞌel ti tspasique. Qꞌueleluc me jsatic, oyuc me lec jrazontic.
\v 7 Yuꞌun oyic ti mulil hech yuꞌun chꞌayem yoꞌntonic hech chaj cꞌu cheꞌel chijvay ti acꞌubaltic. Mu snaꞌic cꞌusi tspasic hech chaj cꞌu cheꞌel ti jyacubeletique.
\v 8 Ti hoꞌucutique oyucutic xa ti cꞌacꞌaltic yuꞌun jchꞌunojbetic scꞌop ti Cajvaltique. Hech yuꞌun oyuc me lec jrazontic. Ti muchꞌu ochem ti soldadoe oy smac yoꞌnton, oy smac sjol chichꞌ batel, hech chuꞌ yuꞌun ti pleitoe. Hech yuꞌun jaꞌ tscꞌan ti hechucutic ti hoꞌucutique. Jaꞌ smac coꞌntontic mi oy ti xchꞌunojel coꞌntontique xchiꞌuc mi chijcꞌuxubinvane. Jaꞌ smac joltic mi ti jchꞌuntic ti chijcolucutique, hech mu xistsalucutic ti mulile.
\v 9 Yuꞌun laj yicꞌucutic ti stojol ti Diose, mu yuꞌunuc chquichꞌtic castigo. Jaꞌ chijcolucutic sbatel osil ti sventa ti Cajvaltic Jesucristoe.
\v 10 Yuꞌun jaꞌ icham yuꞌun jmultic, hech yuꞌun coꞌol chijcuxiucutic sbatel osil xchiꞌuc. Hech yuꞌun mi cuxulucutic to, mi chamenucutic xa chul staucutic, jaꞌ chijyicꞌucutic batel.
\v 11 Hech yuꞌun mucꞌubtasbo me abaic avoꞌntonic, tsatsubtasbo me abaic avoꞌntonic hech chaj cꞌu cheꞌel apasojic.
\s Jaꞌ scꞌopilal ti laj staqꞌui ti quermanotique ti Pabloe
\p
\v 12 Quermanotac, chacalbeic vocol ti ora to. Pasic me ti mucꞌ ti muchꞌutic yacꞌoj sba ch-abtejic te ti atojolique, ti chaspasoxuc ti mantal ti stojol ti Cajvaltique, ti chastaqꞌuioxuque.
\v 13 Yuꞌun ti chascoltaoxuque, pasic me ti mucꞌ ti mero melel, cꞌux me xavaꞌyic. Ti hoꞌoxuque mu me xacontrain abaic.
\p
\v 14 Chacalbeic vocol uc, quermanotac. Taqꞌuiic me uc ti muchꞌutic chꞌajic ti mu scꞌan ch-abtejique. Tsatsubtasbo yoꞌntonic uc ti muchꞌutic tscꞌan chchibaj yoꞌntonique. Coltaic uc ti muchꞌutic muꞌyuc yip yoꞌntonique. Cꞌuxubinic scotolic, mu me xlaj avoꞌntonic.
\p
\v 15 Acotolic chabio me abaic, mu me xapacbeic sutel ti muchꞌutic chopol yoꞌntonique. Scotol cꞌacꞌal acꞌbo abaic aqꞌuelic ti oy yutsil avoꞌntonique, hoꞌoxuc ti avermano abaique, xchiꞌuc ti stojol yan crixchanoetic.
\p
\v 16 Nichimuc me avoꞌntonic scotol cꞌacꞌal.
\v 17 Mu me xapajes abaic, cꞌoponic Dios scotol ora ti avoꞌntonic.
\v 18 Scotol ti cꞌusuc noꞌox chul ti atojolique, mi vocol, mi bendición, hocol aval xavutic ti Diose. Jaꞌ tscꞌan ti Diose ti hech chapasique. Chascoltaoxuc ti Cristo Jesuse hech chuꞌ avuꞌunic.
\p
\v 19 Mu me xapajes ti Chꞌul Espíritue ti yacꞌoj sba ch-abtej ti avoꞌntonique.
\v 20 Pasic me ti mucꞌ ti scꞌop ti muchꞌutic jꞌalvanejetic yuꞌun ti Diose.
\v 21 Aꞌyic me mi chcoꞌolaj xchiꞌuc ti scꞌop ti Diose. Jaꞌ me xachꞌun ti bu melele, jaꞌ chavacꞌ ti avoꞌntonic.
\v 22 Comesic me scotol ti cꞌusi chopole.
\p
\v 23 Ti Diose yacꞌojbucutic jun coꞌntontic ti jujunucutique. Ti jcꞌambetutic vocol ti acꞌo xasventaimboxuc avoꞌntonic xchiꞌuc abecꞌtalic, hech muꞌyuc amulic chul staoxuc ti Cajvaltic Jesucristoe.
\v 24 Yuꞌun laj xa yicꞌoxuc ti stojol ti Diose, hech yuꞌun jun yoꞌnton ti atojolic mu xascomesoxuc. Jaꞌ chaxchabioxuc.
\s Hech ilaj yoꞌnton laj scꞌopon ti carta ti quermanotique
\p
\v 25 Quermanotac, cꞌopombun me Dios ti jtojoltutic uc.
\p
\v 26 Chabanuc scotol ti quermanotique. Yuꞌun jaꞌ señail ti cꞌuxoxuc ti coꞌntone, tsacbo me abaic acꞌobic.
\p
\v 27 Chacalbeic ti stojol ti Cajvaltique, chavalbe yaꞌyic ti carta avi to scotol ti quermanotique.
\p
\v 28 Acꞌo yacꞌboxuc bendición ti Cajvaltic Jesucristoe.