\id 1TI

\h 1 TIMOTEO
\toc1 1 TIMOTEO
\mt JAꞌ TI SBA SCARTA TI TIMOTEOE
\mt2 ti itsꞌibabat yuꞌun ti Pabloe
\c 1
\s Hech lic scꞌopon ti carta ti Timoteoe ti Pabloe
\p
\v 1 Hoꞌon Pabloun, hoꞌon jcholcꞌopun yuꞌun ti Jesucristoe yuꞌun hech smantal ti Diose, jaꞌ ti Jcoltavanej cuꞌuntique. Jaꞌ smantal uc ti Cajvaltic Jesucristoe, jaꞌ ti sventa ti chijcolucutique.
\v 2 Hoꞌon chajcꞌoponot ti carta, Timoteo. Hoꞌot jnichꞌonot yuꞌun ti sventa laj jcholbot ti scꞌop ti Diose hech laj achꞌun. Acꞌo yacꞌbot bendición ti Jtotic Diose xchiꞌuc ti Cajvaltic Jesucristoe. Acꞌo xcꞌuxubinot, acꞌo yacꞌbot jun avoꞌnton.
\s Jaꞌ scꞌopilal ti mu me xchꞌunic ti hovil cꞌop ti chacꞌ ti chanel ti yantique
\p
\v 3-4 Hech laj calbot comel ti cꞌalal ta xa xibat ti Macedonia: “Liꞌ chacom liꞌ ti Efeso”, xacut. “Hoꞌot aventa chavalbe ti chaꞌvoꞌ oxvoꞌ ti tscꞌan chchanubtasvanique ti mu me scap xchiꞌuc yan cꞌop xchiꞌuc ti scꞌop Diose”, xacut comel. Yuꞌun mu lecuc mi te chbat yoꞌntonic tsnopilanic ti cꞌutic laj spasilanic ti jtatamoltique ti tscuyique, jaꞌ ti cꞌutic sbiic ti jtatamoltique ti pꞌejel sbiic ti sun ti Diose. Lume mu xlaj ti alel. Jaꞌ noꞌox chlic cꞌop yuꞌunic. Muc un ch-an xchꞌunojel yoꞌntonic ti muchꞌutic chaꞌyique. Mu hechuc ti pasel ti yabtel ti Diose. Hech yuꞌun coltao me.
\p
\v 5 Yuꞌun ti hech chapas ti mantale, yuꞌun hech acꞌo cꞌuxubinvanuc. Yuꞌun mi chijcꞌuxubinvane, hech chvinaj ti pocbil xa ti coꞌntontique, ti lec coꞌntontic ti stojol ti Diose, ti jchꞌunojtic ti mero melele.
\v 6 Muꞌyuc scꞌopilal ti yoꞌntonic ti pocbil coꞌntontic, ti lec coꞌntontic ti stojol ti Diose, ti oy lec xchꞌunojel coꞌntontique. Hech yuꞌun ichꞌayic ti be. Jaꞌ noꞌox toyol yoꞌntonic mi lec ch-ilatic yuꞌun ti ch-aꞌibat ti scꞌopique.
\v 7 Tscꞌan chchanubtasvan ti smantal ti Diose ti laj yal ti Moisese tscuyic. Hovil, mu xaꞌibeic sjam ti cꞌusi chalique. Mu xaꞌibeic sjam uc ti mantaletique ti tscꞌan chaqꞌuic ti chanele tscuyique.
\p
\v 8 Hoꞌucutic ti jnaꞌtic ti oy stu cuꞌuntic ti smantal ti Diose mi ti jnaꞌtic cꞌu yuꞌun laj yal ti mantaletique ti Diose.
\v 9 Jnaꞌojtic ti maꞌuc ti scoj ti muchꞌutic toj yoꞌntonic scuyoj sbaique ti oy ti mantaletique. Jaꞌ ti scoj ti oy ti mantaletique yuꞌun acꞌo yil ti oy smulic ti muchꞌutic mu tojuc yoꞌntonique xchiꞌuc ti muchꞌutic tscuy ti tsnaꞌic stuquique, xchiꞌuc ti muchꞌutic muꞌyuc Dios ti yoꞌntonique xchiꞌuc ti muchꞌutic tsaꞌilan smulique, xchiꞌuc ti muchꞌutic mu xtun ti yoꞌntonique xchiꞌuc ti muchꞌutic chopol chalbeic scꞌopilal ti Diose, xchiꞌuc ti muchꞌutic tsmilic, mi stot, mi smeꞌ, mi yantic.
\v 10 Xchiꞌuc ti muchꞌutic chmulivajique xchiꞌuc ti muchꞌutic viniquetic chchiꞌin sbaic xchiꞌuc viniquetique, xchiꞌuc ti muchꞌutic chelcꞌan crixchanoe, xchiꞌuc ti jnopcꞌopetique, xchiꞌuc ti muchꞌutic tsnop cꞌop ti tsvaꞌanic ti rextico ti Diose, xchiꞌuc ti muchꞌutic chopol ti cꞌusi tspasique ti mu xcoꞌolaj xchiꞌuc ti lequil cꞌope.
\v 11 Jaꞌ ti lequil achꞌ cꞌope ti niyacꞌbun jventain ti Diose, jaꞌ ti jelaven yutsil stuque. Jaꞌ avi cꞌop to ti jelaven yutsile.
\s Jaꞌ scꞌopilal hocol niyalbun ti laj xcꞌuxubinun ti Diose, xchi ti Pabloe
\p
\v 12 Hocol niyalbun ti laj stsatsubtasbun coꞌnton ti Cajvaltic Jesucristoe. Jun coꞌnton ti stojol laj yilun hech yuꞌun laj yacꞌbun cabtel. Hech yuꞌun ti jcholbe scꞌope.
\v 13 Ti voꞌonee laj jtoy jba ti stojol ti Cajvaltique, chopol nicꞌopoj yuꞌun. Laj quilbajin ti muchꞌutic xchꞌunojbeic ti scꞌope. Jaꞌ laj xcꞌuxubinun ti Cajvaltique yuꞌun laj snaꞌ ti scoj ti muc jnaꞌe, scoj ti mu to ti jchꞌune, hech yuꞌun ti hech laj jpase.
\v 14 Manchuc mi chopol ti jyalel laj jpas, laj xcꞌuxubinun ti Cajvaltique. Laj yacꞌbun xchꞌunojel coꞌnton. Jaꞌ laj yacꞌbun ti chicꞌuxubinvane.
\p
\v 15 Ti Cristo Jesuse iꞌay liꞌ ti balumile yuꞌun ay scoltaucutic comel jcotoltic yuꞌun jmulavilucutic. Melel ti laj scoltaucutique hech yuꞌun acꞌo jpastic ti mucꞌ jcotoltic. Ti hoꞌone jaꞌ más echꞌem chopol laj jpas. Jaꞌ yamal laj spas ti yantique.
\v 16 Yuꞌun laj xcꞌuxubinun ti Jesucristoe, hech yuꞌun primero laj yacꞌ ti qꞌuelel ti jventa ti hal chismalaucutique. Hoꞌon señail cꞌotemun ti stojol scotol ti muchꞌutic scꞌopilal ta to xchꞌunic toe, hech chcuxiic sbatel osil.
\v 17 Hech yuꞌun tspasat ti mucꞌ sbatel osil stuc ti Diose. Yuꞌun jaꞌ Totil Ajvalil. Jaꞌ stalel cuxul sbatel osil. Mu xquiltic ti hora to. Jaꞌ noꞌox Dios stuc, muꞌyuc yan. Jaꞌ jelaven spꞌijil stuc. Jaꞌ chchꞌumbat scꞌop sbatel osil. Jun yutsil ti hech chcꞌot ti pasel.
\p
\v 18 Jnichꞌon Timoteo, jaꞌ hech ti avabtel ti laj cacꞌbote. Hech chaj cꞌu cheꞌel albilot acꞌopilal yuꞌun ti jꞌalcꞌopetique yuꞌun ti Diose cꞌalal mu to chlic abtejan, hech me chachanubtasvan ti hora to. Mu me lecuc chavil ti cꞌop ti mu meleluque.
\v 19 Jun avoꞌnton cholo me ti scꞌop ti Diose ti jaꞌ melele, hech chanaꞌ ti lec chayilot ti Diose. Oy chaꞌvoꞌ oxvoꞌ laj snaꞌic ti mu lecuc iꞌilat yuꞌun ti Diose, pero muc sutes yoꞌntonic hech itupꞌ ti xchꞌunojel yoꞌntonique.
\v 20 Hech laj spas ti Himeneoe xchiꞌuc ti Alejandroe. Hech yuꞌun laj cacꞌ ti scꞌob ti Satanase yuꞌun hech acꞌo snaꞌic ti mu xtun ti muc spasic ti mucꞌ ti Cajvaltique.
\c 2
\s Jaꞌ scꞌopilal ti muchꞌutic ti jcꞌopombetic Dios ti stojol
\p
\v 1 Oy cꞌusi chacalbeic. Jaꞌ primero chacalbe avi to. Jaꞌ tscꞌan ti jcꞌopombetic Dios ti stojol scotol crixchanoetic cꞌalal te oyucutic ti templo. Jaꞌ tscꞌan ti jcꞌambetic ti Diose ti acꞌo ojtiquinatuc. Jaꞌ tscꞌan ti hocol aval chasutesbe yoꞌntonic ti crixchanoetique chcutic ti Diose. Jaꞌ tscꞌan ti hech chcalbetique.
\v 2 Jaꞌ tscꞌan ti hech ti jcꞌopombetic Dios ti stojol uc ti totil ajvaliletique xchiꞌuc scotolic ti muchꞌutic yichꞌojic yabtel uque yuꞌun hech muꞌyuc pleito, muꞌyuc ilbajinel ti bu nacalucutic jujutose. Hech lec ti jchꞌuntic ti Diose, hech lec jcꞌopilaltic yuꞌun ti crixchanoetique.
\v 3 Yuꞌun hech tscꞌan ti Diose, jaꞌ ti Jcoltavanej cuꞌuntique. Jaꞌ lec yoꞌnton yuꞌun.
\v 4 Yuꞌun tscꞌan ti Diose ti acꞌo coluc scotol crixchanoetic. Tscꞌan ti acꞌo cꞌotuc ti yoꞌntonic ti scꞌope yuꞌun jaꞌ melel ti scꞌope.
\v 5 Yuꞌun jun noꞌox ti Dios cuꞌuntique jcotoltic. Jun noꞌox ti jꞌechꞌesejcꞌop cuꞌuntic ti stojol ti Diose, jaꞌ ti chcꞌopoj cuꞌuntic hech chlecub yoꞌnton Dios cuꞌuntic. Hech yuꞌun chijyalbucutic ti lec chijyilucutic ti Diose ti sventae. Jaꞌ ti vinique, jaꞌ ti Jesucristoe. Muꞌyuc yan jꞌechꞌesejcꞌop.
\v 6 Yuꞌun ti laj yacꞌ sba ti milele, jaꞌ laj stojbucutic jmultic hech nijlocꞌ ti scꞌob ti pucuje jcotoltic. Yuꞌun laj sta yorail ti laj yacꞌ ti qꞌuelel ti Diose ti chiscoltaucutique.
\v 7 Hech yuꞌun hoꞌoni quichꞌoj cabtel yuꞌun ti jchol ti scꞌop ti Diose. Jaꞌ laj stacun ti Cajvaltique. Melel xcal, mu yuꞌunuc ti jnop cꞌop. Jaꞌ cabtel ti jchanubtas ti yanlum crixchanoetique cꞌu xꞌelan ti jchꞌuntic ti Diose. Chcalbe ti scꞌope ti jaꞌ melele.
\p
\v 8 Hech yuꞌun ti jcꞌan ti jaꞌ noꞌox chatꞌuj viniquetic yuꞌun acꞌo scꞌopon Dios ti aventaic te ti yut temploetic. Lecuc me yoꞌntonic tscꞌoponic Dios. Mu me ilinemuc cꞌalal tscꞌoponic Dios, mu me pleitouc tscꞌoponic Dios.
\v 9 Hech uc ti antsetique, lec lec noꞌox sba acꞌo spas sbaic xchiꞌuc ti scꞌuꞌ spoqꞌuique. Mu me stoy sbaic xchiꞌuc. Tojuc me yoꞌntonic. Mu me stoy sbaic xchiꞌuc ti xpechꞌ sjolique. Lec lec noꞌox sba acꞌo spas ti sjolique. Mu me smanic ti cꞌanal taqꞌuine ti bu tꞌujume, xchiꞌuc ti snatsꞌe ti bu toyol stojole, xchiꞌuc ti scꞌuꞌe ti bu ep stojole naca me stoy sbaic yuꞌun.
\v 10 Jaꞌ tꞌujum acꞌo ilatuc yuꞌun ti lec ti yabtelique. Hech tscꞌan acꞌo spasic ti antsetique ti chalic ti xchꞌunojic ti Diose.
\v 11 Mu me xcꞌopojic ti antsetique, acꞌo yaꞌyic ti scꞌop ti Diose. Lec acꞌo xchꞌunic mantal.
\v 12 Ti antsetique mu xcacꞌ xchanubtas viniquetic. Mu xcacꞌ ti tspas mantal ti antsetique ti stojol ti viniquetique. Jaꞌ tscꞌan ti biqꞌuit acꞌo yacꞌ sbaique, mu me xcꞌopojic.
\v 13 Yuꞌun jaꞌ jbael ipasat ti Adane. Jaꞌ patil ipasat ti Evae.
\v 14 Maꞌuc ilaj ti loꞌlael ti Adane, jaꞌ ilaj ti loꞌlael ti antse. Jaꞌ jbael laj spꞌajbe smantal ti Diose ti antse.
\v 15 Hech yuꞌun ti antsetique maꞌuc yabtel chchanubtas viniquetic. Jaꞌ yabtel chchꞌites yol, chchanubtas ti cꞌusi leque. Mi jꞌechꞌel chchꞌumbeic scꞌop ti Diose ti antsetique, mi chcꞌuxubinvan, mi chacꞌ sba ti scꞌob ti Cajvaltique, mi biqꞌuit chacꞌ sbaique, chcolic.
\c 3
\s Jaꞌ scꞌopilal ti muchꞌutic ch-ochic ti ancianoe
\p
\v 1 Melel ti cꞌusi chalique: “Ti muchꞌu toyol yoꞌnton yuꞌun tscꞌan chichꞌ yabtel yuꞌun ch-och ti anciano, lequil abtel tscꞌan tspas”, ti xchiique.
\v 2 Ti muchꞌu hech ch-och ti ancianoe ti tsventain ti jchꞌunojeletique, persa ti lec scꞌopilal yuꞌun scotolic. Jun noꞌox ti yajnile. Scotol hora lec tspas sba, oy lec srazón, lec xcꞌopoj. Oy yutsil yoꞌnton chmacꞌlinvan. Lec chchanubtasvan.
\v 3 Mu xyacub, mu xmajvan. Chcꞌuxubinvan. Mu sliques cꞌop, mu xbicꞌtaj yoꞌnton yuꞌun taqꞌuin.
\v 4 Jaꞌ tscꞌan ti lec tspas ti mantal scotol te ti sna. Tspas ti mantal ti snichꞌone, chchꞌumbat smantal yuꞌun.
\v 5 Yuꞌun ti muchꞌu mu snaꞌ spas ti mantal ti snichꞌone, ¡bu cꞌamba xuꞌ spas ti mantal ti xnichꞌnab ti Diose!
\v 6 Mu me achꞌ jchꞌunojeluc ch-och naca me stoy sba, naca me coꞌol chichꞌ castigo xchiꞌuc ti pucuje.
\v 7 Ti muchꞌu chichꞌ yabtele jaꞌ tscꞌan ti lec scꞌopilal yuꞌun ti muchꞌutic muꞌyuc ti stojol ti Diose. Yuꞌun mi chopol chbat scꞌopilal, repenta chlic tsalatuc yuꞌun ti pucuje.
\s Jaꞌ scꞌopilal ti muchꞌutic ch-ochic ti diáconoe
\p
\v 8 Ti diáconoetique jaꞌ yabtel tsventain ti cꞌusi chaqꞌuic ti jchꞌunojeletique, mi taqꞌuin, mi veꞌelil. Hech uc ti muchꞌutic ch-ochic ti diáconoe, jaꞌ tscꞌan ti toj yoꞌntonic uc. Mu me chibuc ti cꞌusi chalique. Mu xyacubic, mu xbicꞌtaj yoꞌntonic yuꞌun taqꞌuin.
\v 9 Jun yoꞌntonic ti stojol ti Diose xchꞌunojic ti cꞌusi laj xa yacꞌbucutic jnaꞌtic ti Diose, jaꞌ ti chijcolucutic ti sventa xchꞌunojel coꞌntontique. Hech yuꞌun snaꞌic ti lec ch-ilatic yuꞌun ti Diose.
\v 10 Hech chaj cꞌu cheꞌel chqꞌuelbat yabtel jbael ti muchꞌutic ch-ochic ti ancianoe, hech onoꞌox uc acꞌo qꞌuelbatuc yabtelic jbael ti muchꞌutic ch-ochic ti diáconoe. Mi muꞌyuc smulic chtabatic, acꞌo ochuc ti diácono.
\v 11 Jaꞌ noꞌox hech uc ti antsetique ti chatꞌuj yuꞌun ch-ochic ti abtel yuꞌun ti Diose, jaꞌ tscꞌan ti toj yoꞌntonic uc. Mu snopbeic smul yan, oy lec srazonic. Jaꞌ tscꞌan ti jun yoꞌntonic ch-abtejic hech chuꞌ yuꞌunic scotol.
\v 12 Ti muchꞌutic ch-ochic ti diáconoe jun noꞌox ti yajnile. Jaꞌ tscꞌan ti lec tspasic ti mantal ti snichꞌonique xchiꞌuc scotol ti muchꞌutic te oy ti snaique.
\v 13 Yuꞌun ti diáconoetique ti lec ch-abtejique, lec scꞌopilalic, tstsatsubtasbat yoꞌntonic, más ch-an xchꞌunojel yoꞌntonic ti stojol ti Cristo Jesuse.
\s Jaꞌ scꞌopilal ti jaꞌ tsots scꞌopilal ti cꞌu cheꞌel laj xa jchꞌuntique
\p
\v 14-15 Coꞌnton jcꞌan chtal jqꞌuelot ti ora. Laj jnop ti repenta mi mu xuꞌ chital ti ora, hech yuꞌun chacalbe ti carta ti cꞌu cheꞌel chapas ti yabtel ti Diose te ti yoꞌ bu tstsob sbaic ti xnichꞌnab ti Diose yuꞌun coꞌol icꞌbilucutic ti stojol ti Diose ti stalel cuxule. Ti jnaꞌtic ti jaꞌ ti sventa ti pilale ti vaꞌal ti nae. Jaꞌ noꞌox hech uc ti hoꞌucutique ti sventa ti oy xchꞌunojel coꞌntontique ti mu xtupꞌ ti scꞌop ti Diose ti jaꞌ melele.
\v 16 Yuꞌun tsots scꞌopilal ti jchꞌunojtic xa ti jaꞌ noꞌox chijcolucutic yuꞌun ti Jesucristoe.
\q Yuꞌun jaꞌ tal yichꞌ sbecꞌtal liꞌ ti balumile.
\q Iꞌacꞌat ti naꞌel ti toj yoꞌntone ti muꞌyuc smule.
\q Jaꞌ rextico ti chꞌul abatetique ti icuxie.
\q Icholbat xa scꞌopilal ti stojol ti jaylajuntos crixchanoetic liꞌ ti balumile.
\q Pasbil ti mucꞌ ti sjoylejal balumil yuꞌun ti muchꞌutic ichꞌumbat xa ti scꞌope.
\q Pasbil ti mucꞌ uc te ti vinajel.
\c 4
\s Jaꞌ scꞌopilal ti tsta yorail ti oy chchꞌay xchꞌunojel yoꞌntonic
\p
\v 1 Jamal yaloj ti Chꞌul Espíritue ti tsta yorail ti oy chchꞌay xchꞌunojel yoꞌntonic, scoj ti chaꞌibeic scꞌop ti muchꞌutic chloꞌlavanique, scoj ti chchꞌumbeic scꞌop ti muchꞌutic chanubtasbilic yuꞌun ti xchiꞌiltac ti totil pucuje.
\v 2 Ti muchꞌutic chanubtasbilic yuꞌun ti xchiꞌiltac ti totil pucuje, jaꞌ yabtel chloꞌlavanic, hech yuꞌun tsnopic cꞌop. Hech chaj cꞌu cheꞌel ti muchꞌu chcꞌaqꞌue, ti mu xa xaꞌi mi chpicate, jaꞌ hechic. Jꞌechꞌel mu xa xaꞌyic ti chtijbat ti yoꞌntonique.
\v 3 Mu xacꞌ chicꞌ sbaic viniquetic xchiꞌuc antsetic. Tspasic mantal ti oy veꞌelil ti mu xuꞌ ti jveꞌtique. Smantal ti Diose ti chijnupune. Scotol veꞌelil jaꞌ spasoj ti Diose yuꞌun ti ti jveꞌtique. Ti hoꞌucutique ti jchꞌunojbetic ti scꞌope, ti jaꞌ melele, ti jchꞌuntic ti cꞌutic chijyalbucutique. Ti hoꞌucutique “hocol aval ti hech oy ti amantale”, chcutic ti Diose.
\v 4 Lec scotol cꞌutic spasoj ti Diose, muꞌyuc bu mu xtun. Jaꞌ tscꞌan ti hocol aval chcutic ti Diose cꞌalal chtun cuꞌuntic.
\v 5 Yuꞌun yaloj ti Diose ti lec scotole, hech yuꞌun cꞌalal ti jcꞌopontic Dios, ch-acꞌbat bendición yuꞌun ti Diose ti cꞌutic chtun cuꞌuntique.
\s Jaꞌ scꞌopilal lequil abatot chacꞌot yuꞌun ti Jesucristoe, xchi
\p
\v 6 Mi hech chapas ti mantal ti quermanotique, hech chvinaj ti lequil abatot yuꞌun ti Jesucristoe yuꞌun oy ti avoꞌnton ti smantal ti Diose ti cacꞌoj jbatic ti jchꞌuntic jcotoltique. Yuꞌun muc xchꞌay ti avoꞌnton ti scꞌop ti Diose hech chaj cꞌu cheꞌel nachanubtasat.
\v 7 Mu me xavaꞌi ti sloꞌilique ti muꞌyuc sjame ti hovil ti hech noꞌox tsnopilanic ti sjolique. Ti cꞌusi chaꞌalbat ti avoꞌntone, tscꞌan ti chachꞌumbe spasel yuꞌun hech xuꞌ avuꞌun chachꞌunilan batel o ti cꞌutic chayalbot ti Diose.
\v 8 Hech chaj cꞌu cheꞌel tsnopes sba ti muchꞌu tscꞌan ti oy yip sbecꞌtale ti yuꞌun chtajine hech oy yip chcꞌot o, jaꞌ noꞌox hech chanopes aba chachꞌun ti jpꞌel hech chaj cꞌu cheꞌel naꞌalbate asta oy yip avoꞌnton nacꞌot o. Ti yip ti jbecꞌtaltique jaꞌ noꞌox chtun jayib cꞌacꞌal liꞌoyucutic liꞌ ti balumile. Jaꞌuc ti yip ti coꞌntontique, maꞌuc noꞌox chtun cuꞌuntic jayib cꞌacꞌal liꞌoyucutic liꞌ ti balumile, jaꞌ chijcuxi sbatel osil yuꞌun.
\v 9 Jaꞌ lec ti jpastic ti mucꞌ jcotoltic ti cꞌop avi to yuꞌun melel ti cꞌop avi to.
\v 10 Yuꞌun ti chijcuxi sbatel osile, hech yuꞌun ti chijꞌabtejucutique, hech yuꞌun ti jtsꞌictic ti vocole. Yuꞌun ti jchꞌuntic ti chiscoltaucutic ti Diose ti stalel cuxule. Yuꞌun jaꞌ Jcoltavanej yuꞌun scotol crixchanoetic. Jaꞌ Jcoltavanej cuꞌuntic ti mero melel yuꞌun jchꞌunojbetic ti scꞌope.
\p
\v 11 Hech me chapas ti mantal, hech me chachanubtas.
\v 12 Mu me chopoluc acꞌopilal yuꞌun ti unen vinicote. Acꞌo ti qꞌuelel ti stojol ti jchꞌunojeletique ti lec chacꞌopoje, ti toj chapase, ti chacꞌuxubinvane, ti lec achꞌunojbe scꞌop ti Diose, ti chaxiꞌ ti Diose.
\v 13 Hoꞌot chaventain ti bu tsqꞌuelic ti scꞌop ti Diose. Hoꞌot chataqꞌuivan, chachanubtasvan jaꞌto mi nitale.
\v 14 Mu me xlaj avoꞌnton yuꞌun chachanubtas ti quermanotique. Yuꞌun hech naꞌacꞌbat avabtel yuꞌun ti Diose ti cꞌalal laj cacꞌ jcꞌob ti ajol xchiꞌuc ti ancianoetique.
\p
\v 15 Nopilano me ti avoꞌnton ti cꞌutic laj xa calbot liꞌto. Acꞌo cꞌotuc ti pasel avuꞌun, yuꞌun hech chilic scotolic ti yacꞌoj sba chalecube.
\v 16 Chabio me aba, lecuc me scotol ti cꞌutic chapase, nopo lec cꞌusi chavacꞌ ti chanel, toyoluc me avoꞌnton. Yuꞌun mi hech chapas, hech chacol hoꞌoti xchiꞌuc scotol ti muchꞌutic chayaꞌibot acꞌope.
\c 5
\s Jaꞌ scꞌopilal ti cꞌuncꞌun chacꞌopon ti quermanotique
\p
\v 1 Ti muchꞌu mol xae mu me xavut. Hech chataqꞌui hech chaj cꞌu cheꞌel ti atote. Ti muchꞌutic unen viniquetique hech chataqꞌui hech chaj cꞌu cheꞌel ti avitsꞌinabe.
\v 2 Ti muchꞌu meꞌel xae hech chataqꞌui hech chaj cꞌu cheꞌel ti ameꞌe. Ti unen antsetique hech chataqꞌui hech chaj cꞌu cheꞌel ti avixleltaque. Tojuc me avoꞌnton ti stojolic.
\s Jaꞌ scꞌopilal cꞌuxubinic me ti meꞌon antsetique, xchi
\p
\v 3 Ti meꞌon antsetique ti muꞌyuc muchꞌu oy yuꞌunique acꞌo cꞌuxubinatuc yuꞌun ti quermanotique.
\v 4 Mi oy meꞌon ants mi oy yol, jaꞌ acꞌo cꞌuxubinatuc yuꞌun. Mi muꞌyuc xa yol, mi jaꞌ xa noꞌox yelꞌalab, jaꞌ acꞌo cꞌuxubinatuc yuꞌun. Acꞌo sutesbeic xqꞌuexol svocol ti stot smeꞌique ti smembelique yuꞌun hech tscꞌan ti Diose. Jaꞌ lec yoꞌnton ti Diose ti hech tspasique.
\v 5 Jaꞌuc ti antsetique ti mero meꞌone ti stuc oye, ti muꞌyuc xa yermanotaque, ti jaꞌ chchꞌunic ti chcoltaatic yuꞌun ti Diose, ja ti cꞌacꞌal ti acꞌubal toyol yoꞌntonic chalbeic vocol ti stojol ti Diose, tscꞌoponic ti Diose, jaꞌ me acꞌo yacꞌbeic cꞌutic chtun yuꞌunic lume.
\v 6 Ti meꞌon antsetique ti jaꞌ noꞌox batem ti yoꞌntonic tspasic ti cꞌusi tscꞌan ti sbecꞌtalique, mu me xatsac ti venta yuꞌun mu onoꞌox spasojuc ti mucꞌ ti Diose.
\v 7 Hech chapas ti mantal ti quermanotique yuꞌun hech mu me sta smulic. Hech lec scꞌopilalic chbat.
\v 8 Yuꞌun jaꞌ tscꞌan ti jcꞌuxubintic ti jtot jmeꞌtique xchiꞌuc ti cuts calaltique. Jaꞌ tsots scꞌopilal ti jcꞌuxubintic ti jayvoꞌ te jchiꞌinojtic ti jnatique. Yuꞌun mi mu jcꞌuxubintic, jtuctic chcacꞌtic ti qꞌuelel ti muꞌyuc xchꞌunojel coꞌntontic. Jaꞌ echꞌem to ti jtoy jbatic ti stojol ti Diose. Jaꞌ jutuc noꞌox ch-echꞌ ti stojol ti Diose ti muchꞌutic mu xchꞌunojbuc scꞌop ti Diose.
\s Jaꞌ scꞌopilal ti meꞌon antsetique ti tscꞌan ch-abtejic yuꞌun ti Diose
\p
\v 9 Jaꞌuc ti meꞌon antsetique ti tscꞌan ch-abtejic yuꞌun ti Diose jaꞌ noꞌox chatsac ti hun sbiic ti muchꞌutic yichꞌojic xa oxvinic habil, ti jun yoꞌnton ti stojol ti anima smalale.
\v 10 Jaꞌ ti bu lec scꞌopilal yuꞌun lec ti yabtele, mi oy yol laj xchꞌitese, mi oy yutsil yoꞌnton laj yicꞌ ochel ti sna ti muchꞌutic mu xojtiquine. Jaꞌ ti muchꞌu muꞌyuc scꞌopilal laj yaꞌi mi tsots mi mu tsotsuc scꞌopilal ti yabtele, jaꞌ noꞌox mi laj scolta ti quermanotique, mi oy laj scolta ti muchꞌutic uts sbaique, mi jaꞌ toyol yoꞌnton laj spas ti cꞌusi leque. Jaꞌ noꞌox xuꞌ ch-abtejic lume.
\p
\v 11 Ti muchꞌu meꞌon ants ti unen toe, mu me xaticꞌ ti hun. Yuꞌun chalic ti tscꞌan ch-abtejic yuꞌun ti Cajvaltique pero patil chlic sutesic scꞌopic yuꞌun tscꞌan chnupunic.
\v 12 Hech yuꞌun oy smul chcꞌotic yuꞌun tsutes scꞌopique.
\v 13 Puro xambal tspasic chbatic ti nantic. Chꞌaj chcꞌotic. Maꞌuc noꞌox ti chꞌaj chcꞌotique, jaꞌ tspucbeic scꞌopilal ti yan quermanotique, tsticꞌ sbaic ti cꞌop. Jaꞌ tspuquic ti cꞌusi mu xtune.
\v 14 Hech yuꞌun ti jcꞌan ti acꞌo nupunuc ti muchꞌu meꞌon ants ti unen toe. Acꞌo xchꞌites yol, acꞌo sventain ti snae. Mu me jaꞌuc ti sventaic ti chquichꞌtic labanel yuꞌun ti cajcontratique, jaꞌ ti Satanase.
\v 15 Yuꞌun oy sutemic xa ti spatic. Jaꞌ laj xa xchaꞌtsꞌacliic ti Satanase.
\p
\v 16 Ti muchꞌu xchꞌunojbe scꞌop ti Diose, mi vinic, mi ants, mi oy meꞌon ants ti yermanoe, acꞌo xcꞌuxubin. Mu me jaꞌuc chacꞌ svocolic scotol ti jchꞌunojeletique. Hech oy cꞌusi xuꞌ chacꞌbeic ti muchꞌutic meꞌon antsetic ti jyalele.
\s Jaꞌ scꞌopilal ti acꞌo cꞌuxubinatuc ti ancianoetique ti lec ch-abtejique
\p
\v 17 Ti ancianoetique ti lec tspasic mantale, echꞌem acꞌo spasic ti mucꞌ. Jaꞌ tsots scꞌopilal ti tspasic ti mucꞌ ti ancianoetique ti chcholic ti scꞌop ti Diose, ti chchanubtasvanique.
\v 18 Acꞌo yacꞌbeic cꞌusi chtun yuꞌunic. Yuꞌun hech chal ti scꞌop ti Diose: “Ti vacaxe mu me xasutꞌbe sniꞌ cꞌalal tstecꞌ trigoe”, ti xchie. Chal uc: “Acꞌo yichꞌ stojol yabtel ti muchꞌu ch-abteje”, ti xchie.
\p
\v 19 Mu me xapasbe ti mucꞌ scꞌop ti muchꞌu tsaꞌbe smul ti ancianoe. Jaꞌto chachꞌun mi oy chaꞌvoꞌ oxvoꞌ rextico.
\v 20 Mi melel ti oy smule, te chataqꞌui ti stojol scotol ti jchꞌunojeletique yuꞌun hech acꞌo xiꞌuc ti yantique.
\v 21 Chajpas ti mantal yuꞌun hech chapas. Hech chcal ti stojol ti Diose xchiꞌuc ti stojol ti Cajvaltic Jesucristoe xchiꞌuc ti stojol ti chꞌul abatetic ti tꞌujbil yuꞌune. Mu me xatꞌuj ti muchꞌu chataqꞌuie. Coꞌol chataqꞌui scotolic.
\v 22 Ti muchꞌu ch-och ti ancianoe, mu me hoviluc noꞌox chavacꞌ acꞌob ti sjol. Nopo lec mi xuꞌ yuꞌun. Yuꞌun mi tsta smule, chcom ti aventa hoꞌoti. Pꞌijan me.
\p
\v 23 Mu me xanop chata amul yuꞌun chavuchꞌ vino. Jaꞌ lec chavuchꞌ jutuc hech chchop achꞌut yuꞌun jnaꞌ ti ep vuelta chastsaquilanot chamel. Mu me puru hoꞌ chavuchꞌ.
\p
\v 24 Oy bu ti jnaꞌtic ti muchꞌu oy smulique, oy bu mu xvinaj. Hech yuꞌun mi ti jnaꞌtique mu me jticꞌtic. O mi mu jnaꞌtique, mi patil chlic vinajuc, hech yuꞌun mu me jticꞌtic.
\v 25 Hech chaj cꞌu cheꞌel chvinaj ti qꞌuelel ti muchꞌutic ti lec ti yabtelique. Oy yan lec ti yabtele pero mu jnaꞌtic. Pero ta onoꞌox lic vinajuc ti lec ti yabtele.
\c 6
\s Jaꞌ scꞌopilal ti acꞌo me xchꞌumbe smantal ti yajvale ti muchꞌutic oy ti mozoile
\p
\v 1 Scotol ti muchꞌutic chombilic ti mozoile, acꞌo spasic ti mucꞌ ti yajvalique yuꞌun hech mu chopoluc chcꞌot scꞌopilal ti Diose. Yuꞌun hech mu chopoluc chbat ti cꞌu cheꞌel chijchanubtasvan ti sventa ti Diose.
\v 2 Ti muchꞌutic coꞌol xchꞌunojic ti Diose xchiꞌuc ti yajvalique, mu me scuyic ti xuꞌ tstoy sbaic ti stojolic yuꞌun ti yermano xa sbaic xchiꞌuc ti stojol ti Diose. Echꞌem to acꞌo yacꞌ sbaic ti abatinel yuꞌun coꞌol xchꞌunojbeic scꞌop ti Diose, yuꞌun cꞌux ti yoꞌntonic ti yajvalique. Hech chachanubtas, hech chataqꞌui.
\s Jaꞌ scꞌopilal ti jaꞌ jcanaltic ti lecuben xa ti coꞌntontique, hech mu xa xbicꞌtaj coꞌntontic
\p
\v 3 Ti muchꞌutic mu xchanubtasvan hech chaj cꞌu cheꞌel laj calbot, yuꞌun mu scꞌan xchꞌunic ti lequil cꞌope, jaꞌ ti scꞌop ti Cajvaltic Jesucristoe, jaꞌ ti lequil cꞌope yuꞌun ti chijlecubucutique.
\v 4-5 Jaꞌ noꞌox tstoy sbaic. Tscuy ti snaꞌique. Jaꞌ noꞌox batem ti yoꞌnton tsjaqꞌuilambe sbaic. Jaꞌ noꞌox yuꞌun tscꞌan tstsal sbaic ti cꞌop. Hech tstsaquilan sbaic ti cꞌop ti muchꞌutic boliben xa yoꞌntonique yuꞌun muꞌyuc ti yoꞌntonic ti cꞌusi melele. Hech chlic sbicꞌtal yoꞌntonic, chlic pleito yuꞌunic. Hech chlic slaban sbaic, hech chlic snopbe sba smulic. Hech yuꞌun scotol cꞌacꞌal chutilan sbaic. Jaꞌ noꞌox oy ti yoꞌntonic mi ch-ochic ti jchanubtasvanej hech tspasic ep canal. Tscuyic ti lec ch-ilatic yuꞌun ti Diose. Mu me xachiꞌin ti muchꞌutic hech yoꞌntonique.
\v 6 Melel ti hoꞌucutique oy jcanaltic. Jaꞌ jcanaltic ti lecuben xa ti coꞌntontique, hech mu xa xbicꞌtaj coꞌntontic.
\v 7 Muꞌyuc cꞌusi oy cuꞌuntic cꞌalal nijꞌan liꞌ ti balumile. Muꞌyuc cꞌusi xuꞌ chquichꞌtic batel uc.
\v 8 Hech yuꞌun ta yutsil mi oy jveꞌeltic xchiꞌuc jcꞌuꞌtic.
\v 9 Ti muchꞌutic tscꞌan ti oy scꞌulejale, jaꞌ tsujat yuꞌun ti cꞌusi tscꞌan ti yoꞌntonique. Chlaj ti loꞌlael yuꞌun. Ep ti cꞌutic chbicꞌtaj yoꞌntone. Hech muꞌyuc srazon chcꞌot. Tscꞌan scotol ti cꞌusi chopole. Hech chbolibtasat o asta chꞌayel chbat yuꞌun.
\v 10 Yuꞌun mi chbicꞌtaj coꞌntontic yuꞌun ti taqꞌuine, ep cꞌutic chopol chlic jpastic uc. Oy muchꞌutic ibicꞌtaj xa yoꞌntonic yuꞌun ti taqꞌuine, hech itupꞌ xchꞌunojel yoꞌntonic. Hech yuꞌun yacꞌoj sba chichꞌic vocol ti ora to.
\s Jaꞌ scꞌopilal jaꞌ me xacꞌan ti chacuxi sbatel osil, xchi
\p
\v 11 Ti hoꞌote ti oyot ti stojol ti Diose, comeso scotol avi to. Jaꞌ me xacꞌan ti toj avoꞌntone. Jaꞌ me xacꞌan ti oy yutsil avoꞌntone, ti oy lec xchꞌunojel avoꞌntone, ti chacꞌuxubinvane, ti oy yip avoꞌntone, ti mu xatoy abae.
\v 12 Mu me lecuc chavil ti cꞌop ti mu meleluque. Cholo me ti scꞌop ti Diose ti jaꞌ melele. Jaꞌ me xacꞌan ti chacuxi sbatel osil yuꞌun hech tꞌujbilot yuꞌun ti Diose. Yuꞌun jamal avaloj ti stojol ep quermanotic ti chachꞌumbe scꞌope.
\v 13 Chajpas ti mantal ti stojol ti Diose ti jaꞌ yacꞌojbe xcuxlejal scotol ti cꞌutic oye, xchiꞌuc ti stojol uc ti Jesucristoe, ti jamal itacꞌav ti stojol ti Poncio Pilatoe.
\v 14 Paso me ti avabtel ti yacꞌojbot ti Diose. Mi jutuc mu me xaticꞌ mulil ti avoꞌnton. Mu me chopoluc chbat scꞌopilal avuꞌun ti Cajvaltique. Asta cꞌalal chtal yan vuelta ti Cajvaltic Jesucristoe, hech me xapasilan.
\v 15 Ti cꞌusi hora snopoj ti Diose, hech hora chtal ti Cajvaltique. Yuꞌun ti Diose jelaven yutsil, jelaven spꞌijil stuc. Stuc yabatinoj scotol ajvaliletic liꞌ ti balumile. Jaꞌ totil yuꞌunic scotol ti muchꞌutic tspasic mantal liꞌ ti balumile.
\v 16 Stuc stalel cuxul sbatel osil. Stalel chquevan stuc. Lum ep ti squevale mu stacꞌ chijnopejucutic. Hech yuꞌun muꞌyuc muchꞌu sqꞌuelojbe sat, muꞌyuc muchꞌu xuꞌ tsqꞌuelbe sat liꞌ ti balumile. Stuc chichꞌ pasel ti mucꞌ sbatel osil. Stuc tspas mantal sbatel osil. Jun yutsil ti hech chcꞌot ti pasel.
\p
\v 17 Paso me ti mantal ti quermanotique, jaꞌ ti jcꞌulejetique, mu me stoy sbaic xchiꞌuc ti scꞌulejalique. Mu me scuyic ti xuꞌ yuꞌunic stuquic noꞌox ti jcꞌulejetique. Yuꞌun ti jcꞌulejaltique ti liꞌ ti balumile, mu jnaꞌtic cꞌusi ora chlaj. Jaꞌ acꞌo spasic ti mucꞌ ti Diose ti stalel cuxule. Yuꞌun ti Diose yutsil yoꞌnton chijyacꞌbucutic cꞌutic chtun cuꞌuntique yuꞌun hech nichim noꞌox coꞌntontic.
\v 18 Acꞌo spasic cꞌusi lec. Jaꞌuc me scꞌulejalic ti lequil abtel tspasique. Acꞌo xcꞌuxubinic ti meꞌonetique, acꞌo yacꞌ ti motonil ti staqꞌuinique.
\v 19 Hech chtunic yuꞌun ti Diose ti ora. Hech tsnaꞌic ti oy xcuxlejalic sbatel osil.
\s Jaꞌ scꞌopilal ti ipasat comel ti mantal ti Timoteoe
\p
\v 20 Timoteo, chabio, mu me xyanej ti lequil achꞌ cꞌope ti naꞌacꞌbat aventaine. Mu me xacꞌan ti hovil cꞌop ti chalic ti muchꞌutic pꞌij scuyoj sbaique. Muꞌyuc cꞌusi chchꞌunic, jaꞌ noꞌox tscontrain sbaic.
\v 21 Yuꞌun ichꞌayic ti be, hech yuꞌun muc xchꞌunic ti scꞌop ti Diose ti jaꞌ melele.
\p Acꞌo yacꞌbot bendición ti Diose.