\id PHM
\h SUN FILEMON
\toc1 SUN FILEMON
\mt JAꞌ TI SCARTA TI FILEMONE
\mt2 ti itsꞌibabat yuꞌun ti Pabloe
\c 1
\s Ti Pabloe hech lic scꞌopon ti carta ti Filemone
\p
\v 1 Filemón, ti cꞌuxot ti coꞌntontutique, ti coꞌol chijꞌabtejucutic yuꞌun ti Diose, chajcꞌoponotutic ti carta xchiꞌuc ti quermanotic Timoteoe ti liꞌ jchiꞌuque, hoꞌon ti Pabloune. Hoꞌon ti liꞌ chuculun ti sventa ti Jesucristoe.
\v 2 Chajcꞌoponoxuc acotolic xchiꞌuc ti quermanotic ants avuꞌune, jaꞌ ti Apiae, xchiꞌuc ti anichꞌone, jaꞌ ti Arquipoe, jaꞌ ti coꞌol chcuch yuꞌun ti contrainele hech chaj cꞌu cheꞌel ti hoꞌontutique. Xchiꞌuc scotol ti quermanotique ti te chatsobilan abaic xchiꞌuc te ti anae.
\v 3 Acꞌo yacꞌboxuc bendición ti Jtotic Diose xchiꞌuc ti Cajvaltic Jesucristoe. Acꞌo yacꞌbot jun avoꞌntonic ti jujunoxuque, hech mu xloꞌlaj avoꞌntonic.
\s Jaꞌ scꞌopilal ti Filemone ti chcꞌuxubinvane, ti oy lec xchꞌunojel yoꞌntone
\p
\v 4-5 Ti hoꞌone scotol cꞌacꞌal hocol aval chcut ti Diose yuꞌun ti achꞌunojbe xa ti scꞌope. Scotol cꞌacꞌal ti jcꞌopon Dios ti atojol. Caꞌyoj ti lec achꞌunojbe scꞌop ti Cajvaltique, ti cꞌux chavaꞌi scotol ti muchꞌutic coꞌol oyoxuc ti stojol ti Dios xchiꞌuque.
\v 6 Ti jcꞌambe vocol ti Diose ti yuꞌun laj xa avaqꞌuilan ti qꞌuelel ti xchꞌunojel avoꞌntone hech yuꞌun acꞌo tsatsubuc yoꞌntonic scotolic. Yuꞌun laj xa yilic ti aventa ti ep yutsil coꞌntontic chijyacꞌbucutic ti Cristo Jesuse.
\v 7 Quermano, nichim noꞌox coꞌnton avuꞌun. Mucꞌuben coꞌnton avuꞌun yuꞌun ti hech chacꞌuxubinvane. Yuꞌun hoꞌot aventa ti imucꞌub xa yoꞌntonic ti muchꞌutic oyic ti stojol ti Diose ti te chatsobilan abaic xchiꞌuque.
\s Jaꞌ scꞌopilal ti Pabloe ti laj scꞌambe vocol ti Filemone yuꞌun acꞌo xchaꞌicꞌ ochel ti sna ti Onésimoe
\p
\v 8 Hech yuꞌun oy cꞌusi ti jcꞌan ti chapasbune. Ti sventa ti Cristoe xuꞌ chacalbot persa chapas yuꞌun hech tscꞌan ti Diose.
\v 9 Pero mu jcꞌan chajpasot ti mantal. Jaꞌ noꞌox chacalbot vocol ti atojol yuꞌun ti cꞌuxun ti avoꞌnton, hoꞌon ti Pabloune ti molun xae, hoꞌon ti liꞌ chuculun ti sventa ti Jesucristoe.
\v 10 Jaꞌ chacalbot vocol yuꞌun chacꞌuxubin ti Onésimoe. Jaꞌ jnichꞌon icꞌot xa yuꞌun ti laj jcholbe scꞌop ti Diose cꞌalal liꞌ chuculune.
\p
\v 11 Jaꞌ amozo, mambil avuꞌun, ti muc xtun avuꞌun lec. Ti ora to chtun cuꞌuntic jchaꞌvaꞌaltic.
\v 12 Chajtacbot tal ti atojol. Hech yuꞌun icꞌbun me yuꞌun lum cꞌux ti coꞌnton.
\v 13 Ti manchuc jaꞌ amozoe ti jcꞌan ti jchiꞌin comel liꞌto yuꞌun chiscoltaun. Taca xuꞌ chavacꞌbun jchiꞌin liꞌto, sjeluc chacoltaun yuꞌun liꞌ chuculun ti sventa ti lequil achꞌ cꞌope.
\v 14 Mu jcꞌan jpas hech jaꞌto mi laj aval amantal atuc. Yuꞌun mu jcꞌan ti sujbilot chacoltaun. Jaꞌ lec mi yutsil avoꞌnton chapas.
\v 15 Yuꞌun hech ti jnop hoꞌoni. Yuꞌun ti hech ilocꞌ ti atojol ep cꞌacꞌale, yuꞌun hech chavicꞌ yan vuelta maꞌuc noꞌox ti jayib cꞌacꞌal liꞌ ti balumile. Jaꞌ chachiꞌin abaic sbatel osil.
\v 16 Maꞌuc noꞌox amozo ti chaviqꞌue. Jaꞌ quermanotic sbatel osil. Jaꞌ cꞌux ti coꞌntontic. Jelaven cꞌux ti coꞌnton jtuc. Echꞌem to cꞌux ti avoꞌnton uc yuꞌun jaꞌ amozo, jaꞌ avermano xa uc ti stojol ti Cristoe.
\p
\v 17 Hech yuꞌun mi yuꞌun jchiꞌil jbatic ti avoꞌnton chavaꞌi, icꞌbun me ti atojol hech chaj cꞌu cheꞌel lec chavilun.
\v 18 Mi oy smul staoj ti atojole, mi oy yil ti atojole, hoꞌon me chavacꞌbun jtoj jtuc.
\v 19 Hoꞌon Pabloun jtuc laj jtsꞌiba ti jcꞌob ti chajtojbote. Hoꞌoni mu hechuc coꞌnton ti oy avil ti jtojol yuꞌun ti laj jcholbot ti scꞌop Diose hech lic achꞌun.
\v 20 Lec oy cheꞌe, quermano. Nichimuc me coꞌnton avuꞌun ti stojol ti Cajvaltique. Acꞌo mucꞌubuc coꞌnton avuꞌun ti stojol ti Cajvaltique.
\p
\v 21 Yuꞌun ti jnaꞌ ti chachꞌumbun ti jcꞌope hech yuꞌun ti hech laj jtsꞌibabote. Ti jnaꞌ uc ti echꞌem chapas hech chaj cꞌu cheꞌel laj calbote.
\v 22 Meltsambun jcuarto uc yuꞌun ti jchꞌun ti mi hech tscꞌan ti Diose chtal jchiꞌinoxuc yuꞌun ti hech avacꞌoj aba chacꞌopombun Dios ti jtojol.
\s Hech ilaj yoꞌnton laj scꞌopon ti carta ti Filemone
\p
\v 23 Chabanucot la xal ti Epafrase, jaꞌ ti liꞌ chixchiꞌinun ti yut chuquel ti sventa ti Cristo Jesuse.
\v 24 Chabanucot la xal uc ti Marcose, ti Aristarcoe, ti Demase, ti Lucase, jaꞌ ti jchiꞌil jbatutic ti abtel xchiꞌuc liꞌto.
\p
\v 25 Acꞌo yacꞌboxuc ep bendición ti Cajvaltic Jesucristoe.
\m (Cꞌalal te oy ti Roma ti Pabloe, jaꞌ laj stsꞌibabe scarta ti Filemone. Jaꞌ laj xchꞌamumbe scꞌob ti Onésimoe, jaꞌ ti mozoe, hech laj spas.)