\id HEB

\h SUN HEBREOS
\toc1 SUN HEBREOS
\mt JAꞌ TI SCARTA TI QUERMANOTIC JUDIOETIQUE TI HEBREO TI SCꞌOPIQUE
\c 1
\s Jaꞌ scꞌopilal ti laj xa scꞌoponucutic ti Diose yuꞌun tal scꞌoponucutic liꞌ ti balumile ti Snichꞌone
\p
\v 1 Ti voꞌone icꞌoponilanat ti jtatamol jmembeltique yuꞌun ti Diose hech laj scꞌoponilan ti jꞌalcꞌopetic yuꞌune. Mu coꞌoluc laj yacꞌ ti qꞌuelel ti spꞌijile ti jujun vuelta ti stojol ti jꞌalcꞌopetic yuꞌune. Oy icꞌoponat ti svaich, oy bu iloꞌlaj xchiꞌuc ti jꞌalcꞌopetic yuꞌune. Oy ep yantic uc.
\v 2 Ti ora to laj xa scꞌoponucutic ti Diose yuꞌun tal scꞌoponucutic liꞌ ti balumile ti Snichꞌone, ti yacꞌojbe sventain scotol ti cꞌutic oye. Jaꞌ ti Snichꞌone ti laj yacꞌbe spas ti balumile xchiꞌuc scotol ti cꞌutic oye.
\v 3 Ti sventa ti Snichꞌone laj jqꞌueltic ti oy yutsil yoꞌnton ti Diose. Ti sventa ti yabtele ivinaj ti jun oyic xchiꞌuc ti Diose. Yuꞌun jelaven spꞌijil ti Snichꞌon ti Diose, hech yuꞌun jaꞌ ti scꞌop noꞌox chal ti lec oy scotol ti cꞌutic oye. Jaꞌ tal smal xchꞌichꞌel yuꞌun hech ichꞌay ti jmultique, patil ba nacluc ti sbatsꞌicꞌob ti Diose, jaꞌ ti mero totil ajvalil ti te oy ti cajale. Te ba xchiꞌin o.
\s Jaꞌ scꞌopilal ti jaꞌ tsots yabtel yichꞌoj ti Snichꞌon ti Diose; jaꞌ mu tsotsuc yabtel yichꞌoj ti chꞌul abatetique
\p
\v 4 Jaꞌ tsots yabtel yichꞌoj ti Snichꞌon ti Diose; jaꞌ mu tsotsuc yabtel yichꞌoj ti chꞌul abatetique. Yuꞌun ti hech ch-albat yuꞌun ti Diose “jaꞌ Jnichꞌon” ti xchie, hech chvinaj ti tsots yabtel yichꞌoj. Yuꞌun mu hechuc ch-albat mi junuc ti chꞌul abatetique yuꞌun ti Diose.
\v 5 Ti Snichꞌon ti Diose hech iꞌalbat yuꞌun ti Stote:
\q Hoꞌot Jnichꞌonot, chcacꞌ ti qꞌuelel ti hoꞌot Jnichꞌonote,
\m xꞌutat. Mu hechuc iꞌalbatic mi junuc ti chꞌul abatetique yuꞌun ti Diose. Ti Snichꞌon ti Diose hech iꞌalbat scꞌopilal ti voꞌone yuꞌun ti Stote:
\q Hoꞌon Stotun. Jaꞌ Jnichꞌon,
\m xchi scꞌopilal. Mu hechuc iꞌalbat scꞌopilalic mi junuc ti chꞌul abatetique yuꞌun ti Diose.
\v 6 Jaꞌ sba Snichꞌon ti Diose yuꞌun ti hoꞌucutic itsꞌinalucutic. Ti Diose hech laj yalbe scꞌopilal ti sba Snichꞌone cꞌalal chtal spas mantal liꞌ ti balumile:
\q Tspasat ti mucꞌ uc yuꞌun scotol ti chꞌul abatetic cuꞌune ti Jnichꞌone,
\m xchi.
\v 7 Hech tsꞌibabil ti scꞌop ti Diose. Jaꞌ scꞌopilal ti chꞌul abatetic yuꞌune:
\q Ti abatetic yuꞌune hech chaj cꞌu cheꞌel ti iqꞌue,
\q hech chaj cꞌu cheꞌel ti cꞌocꞌ uque ti jaꞌ noꞌox chchꞌunic mantal.
\q Chba coltavanuc o chba yacꞌ castigo,
\m ti xchie.
\v 8 Hech tsꞌibabil ti scꞌop ti Diose, jaꞌ scꞌopilal ti Snichꞌone:
\q Diosot, sbatel osil chapas mantal.
\q Atalel toj chachapanvan.
\q
\v 9 Scotol ora chacꞌan ti cꞌusi leque.
\q Mi jutuc mu xacꞌan ti cꞌusi chopole.
\q Hech yuꞌun ti Diose, jaꞌ ti Dios avuꞌun uque, laj xa yacꞌbot ep bendición yuꞌun hech más nichim noꞌox avoꞌnton, hoꞌot ti Snichꞌonote.
\q Mu nichimuc yoꞌntonic ti abatetic yuꞌune,
\m xchi scꞌopilal ti Jesuse.
\v 10 Hech scꞌopilal uc ti Snichꞌone ti tsꞌibabil uc ti scꞌop ti Diose:
\q Hoꞌot, Cajval, laj ameltsan ti balumile ti voꞌone.
\q Jaꞌ avabtel uc ti vinajele xchiꞌuc scotol ti cꞌutic te oye.
\q
\v 11 Ti balumile ti vinajele chlaj.
\q Hoꞌoti mu xanaꞌ xacham.
\q Ti vinajele ti balumile chpoquib hech chaj cꞌu cheꞌel chpoquib jcꞌuꞌtutic.
\q
\v 12 Chcꞌot yorail ti chajel chabal hech chaj cꞌu cheꞌel ti jeltutic jcꞌuꞌtutic ti jbaltutic.
\q Hoꞌoti atalel te oyot; muꞌyuc bu chacham,
\m xchi scꞌopilal.
\v 13 Ti Snichꞌon ti Diose hech iꞌalbat yuꞌun ti Stote:
\q Chlic naclan liꞌi ti jbatsꞌicꞌob jaꞌto mi laj jtsalbot scotol avajcontra,
\m xꞌutat. Mu hechuc iꞌalbatic mi junuc ti chꞌul abatetique yuꞌun ti Diose.
\v 14 Yuꞌun ti chꞌul abatetique jaꞌ abatetic noꞌox ti chtacatic batel yuꞌun ti Diose yuꞌun hech acꞌo xchabiic ti muchꞌutic chcolique.
\c 2
\s Jaꞌ scꞌopilal ti bu cꞌamba colucutic mi mu jpastic ti mucꞌ ti scꞌop ti Cajvaltique
\p
\v 1 Hech yuꞌun persa ti jpastic ti mucꞌ ti scꞌop ti Cajvaltique ti caꞌyojtique yuꞌun hech mu xijchꞌay ti be.
\v 2-3 Ti jtatamol jmembeltique ti voꞌone ti laj spꞌajic ti mantaletic ti laj yal ti voꞌone ti chꞌul abatetique ti muc xchꞌunique, jaꞌ iꞌacꞌbat stojic manchuc mi mu tsotsuc yabtel yichꞌoj ti chꞌul abatetique. Hech yuꞌun ti ora to ¡bu cꞌamba colucutic ti hoꞌucutique mi mu jpastic ti mucꞌ ti scꞌop ti Cajvaltique ti jaꞌ más tsots yabtel yichꞌoje! Jaꞌ primero laj xchol ti Cajvaltique ti cꞌu cheꞌel chijcolucutique. Patil lic xcholbucutic caꞌitic ti muchꞌutic laj xchꞌumbeic scꞌope.
\v 4 Ti Diose laj yacꞌ ti qꞌuelel ti jaꞌ ti scꞌope ti chcholique yuꞌun laj yacꞌbe spas señailetic xchiꞌuc jchop o abteletic. Ep vuelta laj yacꞌ ti qꞌuelel ti jelaven spꞌijile. Ti Diose oy muchꞌu ep laj yacꞌbe spꞌijil, oy muchꞌu jutuc noꞌox laj yacꞌbe spꞌijil. Jaꞌ noꞌox ti muchꞌu junucal laj scꞌan yoꞌnton stuc ti Diose laj yacꞌbe. Ti sventa ti Chꞌul Espíritue ti te oy ti yoꞌntonique hech iꞌacꞌbatic.
\s Jaꞌ scꞌopilal ti Jesuse yuꞌun ti laj yichꞌ sbecꞌtal icham, más tsots yabtel laj yichꞌ
\p
\v 5 Ti chꞌul abatetique maꞌuc ch-acꞌbat sventainic ti achꞌ balumile ti chtale, jaꞌ ti yacꞌoj sba ti jcholbetic scꞌopilale.
\v 6 Yuꞌun hech tsꞌibabil ti scꞌop ti Diose, hech laj yalbe ti Diose ti Davide:
\q Manchuc mi biqꞌuituntutic hoꞌontutic ti crixchanountutique pero chanaꞌuntutic.
\q Chapasuntutic ti mucꞌ hoꞌontutic ti yol snichꞌonuntutic crixchano.
\q
\v 7 Jaꞌ tsots yabtel avuꞌun ti chꞌul abatetique.
\q Ti hoꞌontutique mu tsotsuc cabteltutic.
\q Pero jꞌocꞌ noꞌox ti mu tsotsuc cabtel chavacꞌbuntutique.
\q Chcꞌot yorail ti chavacꞌuntutic ti pasel ti mucꞌ yuꞌun chavacꞌbun jventaintutic scotol avabtel.
\q
\v 8 Chavacꞌbun jpastutic ti mantal scotol ti cꞌutic oye,
\m xchi ti Davide. Yuꞌun chijyacꞌbucutic jpastic ti mantal scotol ti cꞌutic oye, hech yuꞌun scotol ti jventaintic. Mu to chquiltic ti jventainojtic scotol, hoꞌucutic ti crixchanoucutique.
\v 9 Jaꞌ noꞌox laj xa quiltic ti pasbil xa ti mucꞌ ti Jesuse ti ora to yuꞌun tal chamuc ti cruz yuꞌun smul scotol crixchanoetic. Ti cꞌalal liꞌoy ti balumile jaꞌ mu tsotsuc yabtel icꞌot ti Jesuse yuꞌun laj yichꞌ sbecꞌtal. Jaꞌ más tsots yabtel icꞌot ti chꞌul abatetique. Pero ti ora to más tsots yabtel yichꞌoj ti Jesuse. Pasbil xa ti mucꞌ yuꞌun jaꞌ jqꞌuexoltic yuꞌun jaꞌ icham cuꞌuntic hech ivinaj ti cꞌuxucutic ti yoꞌnton ti Diose.
\p
\v 10 Lec ti hech icꞌot ti pasele. Yuꞌun ti Diose scotol ti cꞌutic laj spase xchiꞌuc scotol ti muchꞌu laj spase tscꞌan ti chtun yuꞌun. Yuꞌun scꞌan chicꞌ ochel ti vinajel ep yol xnichꞌnab, hech yuꞌun laj xchapan mi chichꞌ vocol ti Snichꞌone hech xuꞌ chijcolucutic. Hech xuꞌ ch-och ti totil cuꞌuntic ti Snichꞌone yuꞌun coꞌol laj xa yichꞌ vocol hech chaj cꞌu cheꞌel chquichꞌtic.
\v 11 Persa jchiꞌiltic ti muchꞌu ch-och ti pale cuꞌuntique. Hech yuꞌun ti Snichꞌon ti Diose mu xqꞌuexav ti quitsꞌin quixlel xijyutucutique yuꞌun jaꞌ jchiꞌiltic.
\v 12 Yuꞌun hech scꞌopilal ti Snichꞌon ti Diose tsꞌibabil ti scꞌop ti Diose:
\q Ti jcholbe yaꞌyic acꞌopilal ti quitsꞌinabtaque xchiꞌuc ti quixleltaque.
\q Hech jcotoltutic chacacꞌotutic ti pasel ti mucꞌ,
\m xchi tsꞌibabil scꞌopilal.
\v 13 Hech scꞌopilal uc:
\q Ti jchꞌun ti chiscoltaun ti Diose,
\m xchi tsꞌibabil scꞌopilal. Hech scꞌopilal uc:
\q Qꞌuelo avil ti jnichꞌnabe ti liꞌ jchiꞌinoje ti yacꞌojbun jventain ti Diose,
\m xchi tsꞌibabil scꞌopilal.
\p
\v 14 Yuꞌun oy jbecꞌtal jchꞌichꞌeltic ti hoꞌucutique, hech onoꞌox uc laj yichꞌ sbecꞌtal xchꞌichꞌel ti Snichꞌon ti Diose. Hech cꞌalal icham, laj sjimbe yabtel ti muchꞌu sventainoj ti chꞌayel chijbat sbatel osile, jaꞌ ti pucuje.
\v 15 Hech laj yacꞌ ti libre scotol ti muchꞌutic puru xiꞌel ti yoꞌntonic yuꞌun ti chꞌayel chbatique.
\v 16 Maꞌuc laj scoꞌoltajes sba hech chaj cꞌu cheꞌel chꞌul abat. Jaꞌ laj scoꞌoltajes sba hech chaj cꞌu cheꞌel hoꞌucutic ti yelnichꞌonucutic ti Abrahame.
\v 17 Yuꞌun persa icoꞌoltajesat yuꞌun ti Diose hech chaj cꞌu cheꞌel ti hoꞌucutique yuꞌun hech ihuꞌ yuꞌun mero jchiꞌiltic icꞌot. Hech ihuꞌ yuꞌun iꞌoch ti totil pale cuꞌuntic ti stojol ti Diose. Smantal ti Diose ti chtoj ti jmultique. Laj stoj ti Snichꞌone hech yuꞌun lec chil ti Diose ti chixcꞌuxubinucutic, ti chixchꞌaybucutic jmultic ti ora to.
\v 18 Ti cꞌalal ipasbat proval yoꞌnton ti Jesuse yuꞌun ti pucuje vocol laj yaꞌi. Yuꞌun jun yoꞌnton ti stojol ti Diose hech yuꞌun tsalbil icꞌot yuꞌun. Hech yuꞌun xuꞌ yuꞌun chiscoltaucutic ti ora to ti cꞌalal chispasbucutic proval coꞌntontic ti pucuje yuꞌun ihuꞌ yuꞌun stuc.
\c 3
\s Jaꞌ scꞌopilal ti jaꞌ tsots yabtel yichꞌoj ti Jesuse; jaꞌ mu tsotsuc yabtel yichꞌoj ti Moisese
\p
\v 1 Hech yuꞌun, quermanotac, yuꞌun coꞌol lecubtasbil coꞌntontique, yuꞌun coꞌol oy jcꞌopilaltic chijbat ti vinajele, hech yuꞌun acꞌo jnoptic cꞌu xꞌelan ti Jesuse jaꞌ ti jchꞌunojtic ti itacat talel yuꞌun ti Diose. Jaꞌ ti ochem xa ti totil pale cuꞌuntique.
\v 2 Jun yoꞌnton ti stojol ti Diose, jaꞌ ti iꞌacꞌbat yabtel yuꞌune. Jaꞌ hech chaj cꞌu cheꞌel ti Moisese ti jun yoꞌnton laj sventain scotol ti jtatamoltique ti voꞌonee, jaꞌ ti coꞌol tꞌujbilic yuꞌun ti Diose xchiꞌuc.
\v 3 Hech chaj cꞌu cheꞌel más tspasat ti mucꞌ ti yajval nae, yamal scꞌopilal ti snae, jaꞌ noꞌox hech más tspasat ti mucꞌ ti Jesuse, yamal scꞌopilal ti Moisese.
\v 4 Ep ti jꞌabteletique hech chaj cꞌu cheꞌel ti Moisese pero jun noꞌox yajval ti abtele, jaꞌ ti Diose.
\v 5 Ti Moisese jun yoꞌnton laj sventain ti jtatamoltic ti voꞌonee, jaꞌ ti coꞌol tꞌujbilic yuꞌun ti Diose xchiꞌuc. Yuꞌun jaꞌ jbaejbe ti Moisese ti stojol ti jchiꞌiltic ti voꞌone, hech yuꞌun jaꞌ señail ti Moisese ti chtal ti mero jbaejbe cuꞌuntique, jaꞌ ti Jesuse. Yabat Dios noꞌox ti Moisese.
\v 6 Jaꞌuc ti Cristoe, jaꞌ Snichꞌon Dios. Jun yoꞌnton ch-abtej yuꞌun ti Stote, jaꞌ ti Jtotic uque. Jaꞌ chisventainucutic, hoꞌucutic ti yitsꞌinucutique ti yixlelucutique. Yuꞌun mi jꞌechꞌel jun coꞌntontic ti stojol asta ti slajebal cꞌacꞌale, mi nichim noꞌox coꞌntontic ti jmalatic ti tsta yorail ti chijcolucutic yuꞌune, hoꞌucutic yol snichꞌonucutic uc ti Diose obi.
\s Jaꞌ scꞌopilal ti mu me xchaꞌtsatsubtas yoꞌntonic
\p
\v 7-8 Yuꞌun ti más tsots yabtel yichꞌoj ti Snichꞌon ti Diose, hech yuꞌun mu me xachaꞌtsatsubtas avoꞌntonic hech chaj cꞌu cheꞌel chal ti Chꞌul Espíritue te ti scꞌop Diose. Hech chal:
\q Ti ora to ti yacꞌoj sba chascꞌoponot ti Cajvaltique, mu me xachaꞌtsatsubtas avoꞌntonic hech chaj cꞌu cheꞌel laj spasic ti atatamol amebmeꞌelique ti voꞌone cꞌalal laj spasbe proval yoꞌntonic te ti xocol balumil.
\q Jaꞌ laj spꞌajbeic smantal.
\q
\v 9 Yuꞌun ijelavilanic ti stojol ti Diose.
\q Pero itsꞌicbat sbolil yoꞌntonic chaꞌvinic habil.
\q Hech laj spasic cꞌalal yacꞌoj sba ch-acꞌbat sqꞌuelic ti yabtele.
\q
\v 10 Hech yuꞌun ti Diose iꞌilin ti stojol ti mol meꞌeletique.
\q Hech laj yal:
\q “Scotol ora mu scꞌan chixchꞌumbun jcꞌop.
\q Mu scꞌan tstam ti be cuꞌune”, xchi.
\q
\v 11 Yuꞌun ilinem ti stojol hech yuꞌun laj yal:
\q “Jꞌechꞌel mu xcacꞌbe chcol ti libre ti yoꞌntonique”,
\m xchi, xchi ti Chꞌul Espíritue.
\p
\v 12 Hech yuꞌun, quermanotac, chabio me abaic. Mu me jaꞌuc ti oy chopol avoꞌntonic, ti oy muꞌyuc xchꞌunojel avoꞌntonic, hech chacomesic ti Diose ti stalel cuxule.
\v 13 Jaꞌ tscꞌan ti scotol cꞌacꞌal chataqꞌui abaic cꞌalal oy to ti cꞌuxubinele naca me oyuc chachaꞌtsatsubtas avoꞌntonic scoj ti chaloꞌlaat yuꞌun mulil.
\v 14 Yuꞌun mi jun coꞌntontic jchꞌunojtic ti chiscoltaucutique cꞌalal ti slajebal cꞌacꞌal hech chaj cꞌu cheꞌel ti sliqueb, hech cuxulucutic sbatel osil xchiꞌuc.
\p
\v 15 Ti hech laj yale: “Ti ora to ti yacꞌoj sba chascꞌoponot ti Cajvaltique, mu me xachaꞌtsatsubtas avoꞌntonic hech chaj cꞌu cheꞌel laj spasic, hech laj spꞌajbeic smantal”, ti xchie,
\v 16 ¿muchꞌutic scꞌopilalic ti laj spꞌajbeic ti smantale ti yaꞌyojique? ¿Mi maꞌuc scotol ti jtatamoltique ti iꞌicꞌatic loqꞌuel tal ti Egipto yuꞌun ti Moisese?
\v 17 ¿Muchꞌutic scꞌopilalic ti ilinem Dios ti stojolic chaꞌvinic habil? Jaꞌ ti jtatamoltique ti laj sta smulique, jaꞌ ti ichamic te ti xocol balumile.
\v 18 ¿Muchꞌutic ti jꞌechꞌel iꞌalbat scꞌopilal yuꞌun ti Diose ti mu xꞌacꞌbat chcol ti libre ti yoꞌntonique? Jaꞌ ti jtatamoltique ti muc xchꞌunique.
\v 19 Hech chquiltic ti yuꞌun muꞌyuc xchꞌunojel yoꞌntonic hech yuꞌun ti muc xcol ti libre ti yoꞌntonique.
\c 4
\s Jaꞌ scꞌopilal ti chcol ti libre ti yoꞌntonic ti muchꞌutic chchꞌun ti chcoltaat yuꞌun ti Diose
\p
\v 1 Hech chaj cꞌu cheꞌel laj yalbe ti jtatamoltic ti voꞌonee ti Diose, coꞌol chijyalbucutic ti ora to ti chijyacꞌbucutic chcol ti libre ti coꞌntontique. Hech yuꞌun xiꞌanic me, mu me jaꞌuc ti mu xataic ti hech chcol ti libre ti avoꞌntonique.
\v 2 Yuꞌun ti hoꞌucutic uque caꞌyojtic uc ti lequil cꞌope hech chaj cꞌu cheꞌel laj yaꞌyic ti chiscoltaucutic ti Diose. Hovil ti laj yaꞌyique yuꞌun muc xchꞌunic.
\v 3 Ti hoꞌucutique ti jun coꞌntontic jchꞌunojtic ti chiscoltaucutic ti Diose, hech yuꞌun icol xa ti libre ti coꞌntontique. Yuꞌun ti Diose hech laj yalbe scꞌopilal ti jtatamoltic ti muc xchꞌunique:
\q Yuꞌun ilinemun ti stojol hech yuꞌun laj cal:
\q “Jꞌechꞌel mu xcacꞌbe chcol ti libre ti yoꞌntonique”,
\m ti xchie. Mu yuꞌunuc mu xchapanojuc ti Diose ti tsta yorail ti chcol ti libre ti yoꞌntonique. Ti yorail laj spas ti balumile ti Diose, jaꞌ yorail laj xchapan scotol.
\v 4 Yuꞌun hech onoꞌox tsꞌibabil ti scꞌop Diose ti bu chalbe scꞌopilal ti sucubal cꞌacꞌale ti chapajem yuꞌun scotole. Hech chal:
\q Ti sucubal cꞌacꞌal laj jcux coꞌnton yuꞌun ihuꞌ xa cuꞌun scotol ti cabtele,
\m ti xchi ti Diose.
\v 5 Ti hech laj yal:
\q Mu xcacꞌbe chcol ti libre ti yoꞌntonique,
\m ti xchie,
\v 6-7 yuꞌun xchapanoj onoꞌox ti Diose ti tsta yorail ti oy muchꞌutic chcol ti libre ti yoꞌntonique. Yuꞌun muc staic ti jtatamoltic ti jbael iꞌalbat yaꞌyique scoj ti muc xchꞌunic ti hech chcoltaatic yuꞌun ti Diose, hech yuꞌun ti Diose lic stꞌuj yan. Cꞌalal iꞌechꞌ xa ep habil, ti Diose laj xchꞌamumbe ye ti Davide, coꞌol onoꞌox hech laj yal:
\q Ti ora to ti yacꞌoj sba chascꞌoponot ti Cajvaltique, mu me xachaꞌtsatsubtas avoꞌntonic,
\m xchi ti Davide, xut ti jtatamoltique.
\v 8 Ti lajuc scꞌanic ti coltaele ti hech chcol ti libre ti yoꞌntonique ti jchiꞌiltique ti iꞌicꞌatic xa ochel ti Canaán yuꞌun ti Josuee, ti hechuque muc stꞌuj xa yan ti Diose.
\v 9 Hech yuꞌun hech scꞌopilal ti chcol ti libre ti yoꞌntonique ti muchꞌutic tstꞌuj ti Diose ti ora to.
\v 10 Scotol ti muchꞌutic icol xa ti libre ti yoꞌntonique ti ora to, mu xa xꞌabtej yuꞌun hech chcol, yuꞌun xchꞌunoj ti huꞌem xa jcoleltic yuꞌun ti Jesuse. Hech chaj cꞌu cheꞌel ti Diose ti mu xa xꞌabtej yuꞌun huꞌem ti yabtele.
\v 11 Hech yuꞌun jꞌechꞌel acꞌo jchꞌuntic ti huꞌem xa jcoleltic yuꞌun ti Jesuse hech chcol ti libre ti coꞌntontique. Mu me jaꞌuc ti mu xcol ti libre ti avoꞌntonique scoj ti mu jꞌechꞌeluc chachꞌunic uque hech chaj cꞌu cheꞌel ti jtatamoltic ti voꞌonee.
\p
\v 12 Cuxul ti scꞌop ti Diose, hech yuꞌun oy yip ch-abtej. Hech chaj cꞌu cheꞌel machit ti oy lec yee, mi hech scꞌan ti muchꞌu stsacoje, tsta xchinamil jbaqueltic. Jelaven to hech chistijbucutic coꞌntontic ti scꞌop ti Diose. Jaꞌ sqꞌuelojbucutic scotol coꞌntontic. Snaꞌoj scotol ti cꞌusi ti jnoptique. Snaꞌoj scotol ti cꞌusi ti jcꞌantique.
\v 13 Scotol chil ti Diose. Muꞌyuc muchꞌu xuꞌ snacꞌ sba ti stojol. Ti Diose chil scotol ti cꞌutic pasbil yuꞌune. Mu yuꞌunuc mu xil. Manchuc mi ti jcꞌan ti jmuctic ti jmultique, jaꞌ chil scotol ti Diose ti jaꞌ chijyichꞌbucutic jcꞌoptic yuꞌun ti cabteltique.
\s Jaꞌ scꞌopilal ti jaꞌ totil pale cuꞌuntic ti Jesuse
\p
\v 14 Yuꞌun oy xa ti totil pale cuꞌuntique ti icꞌot xa ti stojol ti Diose te ti vinajel, jaꞌ ti Jesuse, jaꞌ ti Snichꞌon ti Diose, hech yuꞌun junuc me coꞌntontic ti jchꞌuntic ti chiscoltaucutique.
\v 15 Mu yuꞌunuc mu snaꞌ ti totil pale cuꞌuntique ti uts jbatique ti muꞌyuc yip ti coꞌntontique. Jaꞌ snaꞌ scotol yuꞌun coꞌol ipasbat proval yoꞌnton yuꞌun ti pucuje hech chaj cꞌu cheꞌel chispasbucutic proval coꞌntontic ti hoꞌucutique. Jaꞌ tsalbil icꞌot yuꞌun.
\v 16 Hech yuꞌun mu me jxiꞌtic, acꞌo nopejucutic tal ti stojol ti Diose ti xuꞌ yuꞌun scotole. Acꞌo jcꞌantic ti chiscoltaucutique yuꞌun cꞌuxucutic ti yoꞌnton. Hech chquichꞌtic cꞌuxubinel, chquichꞌtic coltael cꞌalal oy jvocoltic.
\c 5
\p
\v 1 Scotol ti muchꞌutic ch-och ti totil pale liꞌ ti balumile, jaꞌ chtꞌujat yuꞌun ti Diose yuꞌun hech ch-acꞌbat yabtel yuꞌun ti Diose yuꞌun jaꞌ chcꞌopoj ti stojol ti Diose yuꞌun ti xchiꞌiltaque. Chꞌamumbil scꞌob yuꞌun ti xchiꞌiltaque yuꞌun chacꞌ ti stojol ti Diose ti xchꞌichꞌel ti vacaxe, mi carneroe, yuꞌun hech chchꞌay smul ti xchiꞌiltaque.
\v 2 Yuꞌun coꞌol yoꞌnton xchiꞌuc ti xchiꞌile, hech yuꞌun xuꞌ yuꞌun chcꞌuxubin ti muchꞌu mu snaꞌ cꞌu spas xchiꞌuc ti muchꞌu chchꞌay ti bee.
\v 3 Yuꞌun coꞌol yoꞌnton xchiꞌuc ti xchiꞌiltaque, hech yuꞌun persa chacꞌ ti chꞌayel smul uc, chacꞌbe smoton Dios uc. Maꞌuc noꞌox chacꞌbe ti chꞌayel smul ti xchiꞌiltaque.
\p
\v 4 Muꞌyuc muchꞌu tsnop stuc ti ch-och ti totil pale. Jaꞌ noꞌox ch-och ti muchꞌu chtꞌujat yuꞌun ti Diose hech chaj cꞌu cheꞌel ti Aarone.
\v 5 Hech onoꞌox uc ti Cristoe, mu yuꞌunuc stuc laj sticꞌ sba ti totil pale cuꞌuntic. Jaꞌ itꞌujat yuꞌun ti Diose. Hech yuꞌun hech iꞌalbat yuꞌun ti Diose:
\q Hoꞌot Jnichꞌonot.
\q Chcacꞌ ti qꞌuelel ti hoꞌot Jnichꞌonote,
\m ti xꞌutate.
\v 6 Hech oy scꞌopilal uc ti scꞌop Dios ti yan hun ti hech onoꞌox albil yuꞌun ti Diose:
\q Hoꞌot chaꞌoch ti totil pale sventa sbatel osil.
\q Coꞌol chavichꞌ avabtel hech chaj cꞌu cheꞌel ti Melquisedeque yuꞌun smacoj xchaꞌjechel ti Melquisedeque.
\q Ochem ti totil pale, ochem ti ajvalil uc,
\m ti xꞌutate.
\v 7 Cꞌalal iꞌay liꞌ ti balumile ti Jesuse, scoꞌoltajesoj sba hech chaj cꞌu cheꞌel ti hoꞌucutique. Hech yuꞌun ep laj yalbe vocol ti Diose yuꞌun mu me xcham jaꞌto mi ihuꞌ yuꞌun ti yabtele. Cꞌalal laj scꞌopon Dios, iꞌavan, iꞌocꞌ, yuꞌun ta xa xcham laj yaꞌi. Yuꞌun laj spas ti mucꞌ ti Diose hech yuꞌun itsacbat scꞌop yuꞌun ti Diose. Hech yuꞌun icoltaat.
\v 8 Manchuc mi jaꞌ Snichꞌon ti Diose, yuꞌun ti laj yichꞌ vocole, hech laj xchan scotol ti cꞌutic chaꞌal ti chꞌunel ti Diose.
\v 9 Tsꞌacal laj xchan scotol hech yuꞌun xuꞌ yuꞌun tscolta sbatel osil scotol ti muchꞌutic tspasat ti mucꞌ yuꞌune.
\v 10 Hech iꞌacꞌbat yichꞌ yabtel yuꞌun ti Diose hech chaj cꞌu cheꞌel ti Melquisedeque. Hech iꞌoch ti totil pale cuꞌuntic jcotoltic. Iꞌoch ti ajvalil cuꞌuntic uc. Hech yuꞌun hech xuꞌ laj sventain scotol xchiꞌuc ti hoꞌucutique ti judioucutique.
\s Jaꞌ scꞌopilal ti muchꞌu jaꞌ noꞌox puru chuꞌil tscꞌanilan
\p
\v 11 Oy to ep scꞌopilal ti totil pale cuꞌuntique ti ta to xajcholboxuc avaꞌyic. Vocol ti jcꞌan chajcholboxuc yuꞌun mu xacꞌan xavaꞌibeic sjam.
\v 12 Yuꞌun voꞌone xa achꞌunojic. Ti lajuc achꞌunique, voꞌone naꞌochic xa ti jchanubtasvanej ti hechuque. Jaꞌuque muc xacꞌan xachꞌunic. Hech yuꞌun scꞌan ti chavichꞌic chanubtasel ti sliqueb yan vuelta. Chuꞌil to chacꞌanic ti ora to. Mu to xuꞌ avuꞌunic ti veꞌelile.
\v 13 Scotol ti muchꞌutic chuꞌil to tscꞌanique, mu snaꞌ cꞌusi lec ti pasel yuꞌun olol to.
\v 14 Jaꞌ tscꞌanic ti veꞌelile ti muchꞌutic oy xa yoꞌntonique, jaꞌ ti muchꞌutic laj xa xchanic ti cꞌutic lec ti pasele, laj xa xchanic uc ti cꞌutic mu xtun ti pasele.
\c 6
\s Jaꞌ scꞌopilal ti acꞌo me anuc yoꞌntonic acꞌo scꞌanic ti veꞌelile
\p
\v 1 Mu me jaꞌuc noꞌox ta yutsil ti jaypꞌel comen ti coꞌntontique. Mu me jaꞌuc noꞌox chcalilantic. Jaꞌ tscꞌan xmelmun ti jchꞌuntic ti cꞌutic chijyalbucutic ti Cristoe. Mu me jaꞌuc noꞌox chcalilambe jbatic ti acꞌo comuc cuꞌuntic ti cꞌusi laj jpastic ti voꞌone ti chijcolucutic yuꞌun laj jcuytique. Mu me jaꞌuc noꞌox chcalilambe jbatic ti acꞌo jchꞌuntic ti Diose.
\v 2 Mu me jaꞌuc noꞌox chcalilambe jbatic scꞌopilal ti ichꞌhoꞌe cꞌalal laj scajambucutic scꞌob ti joltique, xchiꞌuc ti oy cuxlejal sbatel osil, xchiꞌuc ti oy castigo yuꞌun mulil sbatel osil. Mu me jaꞌuc noꞌox xcalilantic. Mu hechuc ch-an yip coꞌntontic. Mu tauc yutsil.
\v 3 Acꞌo me anuc coꞌntontic. Acꞌo jcꞌantic ti veꞌelile. Mu me staojuc noꞌox sjam puru chuꞌil ti jcꞌantic. Hech yuꞌun jaꞌ chataic ti veꞌelil ti ora to. Chcꞌot ti pasel mi hech tscꞌan ti Diose.
\p
\v 4 Hoꞌucutic ti pꞌijubenucutic xae, ti nijchꞌaybat xa jmultic yuꞌun ti Cajvaltique, ti nijꞌacꞌbat xa quichꞌtic ti Chꞌul Espíritue,
\v 5 ti laj xa jveꞌelintic ti scꞌop ti Diose, ti quilojtic xa ti chiscoltaucutic ti Diose ti sbatel osil oye,
\v 6 mi ti jchibajes coꞌntontic ti stojol ti Diose, mu xa xuꞌ ti jsutes coꞌntontic yan vuelta. Yuꞌun chcacꞌtic ti milel ti cruz yan vuelta ti Snichꞌon ti Diose. Yuꞌun chcacꞌtic ti labanel yan vuelta.
\v 7 Jaꞌ xanop avaꞌyic ti cꞌu cheꞌel ch-abtej ti balumile. Ti balumile ti chuchꞌilan ti hoꞌ ti chtalilane, jaꞌ chchꞌi ti cꞌusi ti jtsꞌuntique hech chtun cuꞌuntic yuꞌun acꞌbil bendición yuꞌun ti Diose. Jaꞌ hech scꞌopilalic ti muchꞌutic ti tscꞌanilanic ti scꞌop ti Diose.
\v 8 Jaꞌuc ti balumile ti mu xuchꞌ ti hoꞌe ti jaꞌ noꞌox chchꞌi puru chꞌix puru tomal chꞌix, yuꞌun mu xchꞌi ti cꞌusi chtun cuꞌuntique, hech yuꞌun muꞌyuc stu cuꞌuntic. Muꞌyuc stu icom o asta tsta yorail chchicꞌat ti cꞌocꞌ. Jaꞌ hech scꞌopilalic ti muchꞌutic chchibajes yoꞌntonique.
\s Jaꞌ scꞌopilal ti cꞌu xꞌelan mi jchꞌunojtic ti chcꞌot ti pasel ti chiscoltaucutic ti Diose hech chaj cꞌu cheꞌel yalojbucutic
\p
\v 9 Yuꞌun ti hech laj calboxuc avaꞌyique, mu me hechuc acꞌopilalic hoꞌoxuc ti cꞌuxoxuc ti coꞌntone. Ti jchꞌun ti jun avoꞌntonic ti ora to hech yuꞌun ti jnaꞌ ti chacolique.
\v 10 Yuꞌun ti Diose mu hechuc yoꞌnton ti chchꞌay ti yoꞌnton ti cꞌutic lec apasojique yuꞌun cꞌux chavaꞌyic ti Diose. Laj xa avacꞌ abaic ti abatinel yuꞌun ti quermanotic ti oyoxuc ti stojol ti Diose xchiꞌuc. Hech yacꞌoj sba chapasic asta ti ora to.
\v 11 Ti hoꞌontutique ti jcꞌantutic ti hech chacꞌuxubinvanic acotolic. Hech me xapasilanic asta tsta yorail ti chacolique.
\v 12 Yuꞌun mi chanaꞌic ti chacolique hech mu sta avoꞌntonic chachꞌumbeic scꞌop asta chacolic. Mu xachꞌajubic, jaꞌ chanutsic ti muchꞌutic chichꞌic ti bendicione ti yaloj ti Diose ti chacꞌbe yuꞌun oy xchꞌunojel yoꞌntonic, yuꞌun oy yip yoꞌntonic tsmalaic ti bendicione.
\p
\v 13 Ti Diose cꞌalal laj yalbe ti Abrahame ti chacꞌbe ep bendicione yuꞌun muꞌyuc muchꞌu yan oy spꞌijil, stuc noꞌox jelaven spꞌijil ti Diose, hech yuꞌun stuc laj svaꞌan sba ti rextico ti Diose ti persa chcꞌot ti pasel ti chacꞌbe ti bendicione.
\v 14 Hech laj yalbe ti Abrahame: “Melel chcal ti chacacꞌbot ep bendición. Ep chpꞌol avelnichꞌon”, xut ti Abrahame.
\v 15 Yuꞌun jun yoꞌnton laj smala ti bendicione ti Abrahame, hech yuꞌun laj yichꞌ ti bendicione hech chaj cꞌu cheꞌel iꞌalbat ti sliqueb.
\v 16 Ti crixchanoetique tstꞌujic ti muchꞌu más ep spꞌijile yuꞌun tsvaꞌanic ti rextico yuꞌun hech chchꞌumbat ti cꞌu cheꞌel laj yale.
\v 17 Hech uc ti Diose laj scꞌan ti jꞌechꞌel ti jchꞌuntic xchiꞌuc ti Abrahame ti chcꞌot ti pasel ti cꞌu cheꞌel laj xa yalbe ti Abrahame. Jaꞌ jcꞌopilaltic ti hoꞌucutique ti yelnichꞌonucutic ti sventa xchꞌunojel yoꞌnton. Hech yuꞌun stuc tsvaꞌan sba ti rextico ti Diose.
\v 18 Primero laj yal smantal ti Diose. Jaꞌ xchibal xchiꞌuc ti cꞌalal laj svaꞌan sba ti rextico. Yuꞌun mu snaꞌ snop cꞌop ti Diose, hech yuꞌun mu xlaj scꞌopilal ti cꞌu cheꞌel laj yale. Yuꞌun ti hech chcaꞌitique, ep ch-an stsatsal coꞌntontic, hoꞌucutic ti cacꞌoj jbatic ti scꞌobe. Yuꞌun jchꞌunojtic ti chcꞌot ti pasel ti chiscoltaucutic ti Diose hech chaj cꞌu cheꞌel yalojbucutic.
\v 19-20 Yuꞌun hech jchꞌunojtic, oy stsatsal coꞌntontic, mu xijchꞌay. Hech chaj cꞌu cheꞌel ti barco ti mu xa xuꞌ buc noꞌox chbat yuꞌun pajal ti yut nab ti anclataqꞌuine, jaꞌ hech ti hoꞌucutique. Jaꞌ anclataqꞌuin ti xchꞌunojel coꞌntontique hech yuꞌun te oyucutic o ti stojol ti Diose. Yuꞌun hech oy ti xchꞌunojel coꞌntontique, hech yuꞌun ti jnaꞌtic ti xuꞌ chijꞌochucutic ti mero stojol ti Diose. Maꞌuc hech chaj cꞌu cheꞌel ti totil pale ti voꞌone ti stuc noꞌox iꞌoch ti jelaven chꞌul cuartoe ti mu xuꞌ xꞌoch ti crixchanoetique. Ti Jesuse jaꞌ ochem xa ti jelaven chꞌul cuartoe, jaꞌ ti vinajele, yuꞌun jaꞌ totil pale cuꞌuntic ti stojol ti Diose sventa sbatel osil. Jaꞌ te chijyicꞌucutic ochel uc yuꞌun jaꞌ baejem xa cuꞌuntic. Jaꞌ smacoj xchaꞌjechel hech chaj cꞌu cheꞌel ti Melquisedeque. Jaꞌ totil ajvalil cuꞌuntic uc.
\c 7
\s Jaꞌ scꞌopilal ti Jesuse ti jaꞌ smacoj xchaꞌjechel hech chaj cꞌu cheꞌel ti Melquisedeque
\p
\v 1 Ti Melquisedeque, jaꞌ ajvalil yuꞌun ti jteclum Salem sbi. Jaꞌ ticꞌbil uc ti totil pale yuꞌun ti Diose ti jaꞌ jelaven spꞌijile. Ti Melquisedeque laj snup ti be ti Abrahame cꞌalal isut xa tal yuꞌun a scolta tal ti ajvaliletique ti chucbil ibatic yuꞌun ti jꞌeleqꞌuetique. Ti Melquisedeque laj yacꞌbe bendición ti Abrahame.
\v 2 Ti Abrahame lic stus ti lajlajuneb scotol ti cꞌutic oy yuꞌun ti jꞌeleqꞌuetique ti laj spojbe tale. Jujun laj sloqꞌues ti lajlajuneb. Ti cꞌu yepal laj sloqꞌuese jaꞌ laj yacꞌbe ti totil palee, jaꞌ ti Melquisedeque. Yuꞌun ti Melquisedec xchi ti sbie, “jaꞌ totil ajvalil ti smacoj scotol ti toj oꞌntonile”, xchi sjam. Yuꞌun ti ajvalil yuꞌun Salem ti xchi scꞌopilale “jaꞌ totil ajvalil ti smacoj scotol ti jun oꞌntonile”, xchi sjam.
\v 3 Mu pꞌejeluc ti hun muchꞌu stot smeꞌ ti Melquisedeque. Mu xcaꞌitic cꞌusi ora iꞌan, cꞌusi ora icham. Jaꞌ totil pale sventa sbatel osil ti Melquisedeque chil ti Diose. Yuꞌun mu xcaꞌitic scꞌopilal bu ital bu ibat, hech yuꞌun jaꞌ señail ti Melquisedeque yuꞌun cuxul sbatel osil ti Snichꞌon ti Diose.
\p
\v 4 Nopic lec ti jaꞌ mucꞌ iꞌilat ti Melquisedeque yuꞌun ti jtatamoltic Abrahame, yuꞌun laj yacꞌbe jujun ti lajlajuneb ti Melquisedeque ti Abrahame. Jujun laj sloqꞌues ti lajlajuneb ti scotol ti cꞌutic laj spoj tal ti cꞌalal iꞌay ti pleitoe. Ti cꞌu yepal laj sloqꞌuese jaꞌ laj yacꞌbe ti Melquisedeque.
\v 5 Ti jaꞌuc jchiꞌiltic ti Melquisedeque, hech sjam ti iꞌacꞌbat ti jujun ti lajlajuneb yuꞌun ti jtatamoltic Abrahame. Yuꞌun patil cꞌalal iꞌochic ti pale ti yelnichꞌnab ti Levie, laj yalbucutic ti jaꞌ tscꞌan ti jujun ti jloqꞌuestic ti lajlajuneb ti scotol ti cꞌusi ch-an cuꞌuntique yuꞌun chcacꞌbetic. Yuꞌun jaꞌ jchiꞌiltic ch-abtej cuꞌuntic.
\v 6 Ti Melquisedeque ti maꞌuc jchiꞌiltique iꞌacꞌbat jujun ti lajlajuneb yuꞌun ti jtotic Abrahame. Ti Melquisedeque laj yacꞌbe bendición ti Abrahame, jaꞌ ti tꞌujbil ti ep ch-acꞌbat bendición yuꞌun ti Diose.
\v 7 Jcotoltic ti jnaꞌtic ti jaꞌ onoꞌox chichꞌ bendición ti muchꞌutic yamal yabtele. Jaꞌ onoꞌox chacꞌ bendición ti muchꞌu tsots yabtel yichꞌoje.
\v 8 Ti jtos ti paleetique, jaꞌ ti yelnichꞌnab ti Levie, jaꞌ ti iꞌacꞌbatic ti jujun ti lajlajuneb yuꞌun ti xchiꞌiltaque, jaꞌ ichamic lume. Ti jun ti palee, jaꞌ ti Melquisedeque, jaꞌ ti iꞌacꞌbat jujun ti lajlajuneb yuꞌun ti Abrahame, jaꞌ noꞌox oy scꞌopilal ti scꞌop ti Diose ti jaꞌ icuxi, muꞌyuc scꞌopilal ti ichame.
\v 9-10 Yacꞌojbe ti jujun ti lajlajuneb uc ti Melquisedeque ti Levie cꞌotem yuꞌun jaꞌ laj yacꞌ ti statamole, jaꞌ ti Abrahame, laj yacꞌbe ti Melquisedeque. Te xa oy ti Levie yaꞌyel cꞌalal laj snup ti be ti Abrahame ti Melquisedeque. Yuꞌun jaꞌ tsꞌacal to ti itꞌujat ti yelnichꞌnab ti Levie yuꞌun ch-och ti palee.
\p
\v 11 Ti jaꞌuc nijcol o yuꞌun ti mantaletique ti laj yalbucutic comel ti yelnichꞌnab ti Levie ti jaꞌ smacojic o ti yabtel ti palee, mu hechuc xa itꞌujat yan ti hechuque. Jaꞌuque itꞌujat yan yuꞌun hech coꞌol chichꞌ yabtel hech chaj cꞌu cheꞌel ti Melquisedeque.
\v 12 Yuꞌun ilaj yabtel ti yelnichꞌnab ti Levie, hech ilaj scꞌopilal uc ti mantaletique ti laj yalique.
\v 13 Ti Jesuse ti jaꞌ ochem xa ti totil pale cuꞌuntique, mu yelnichꞌonuc ti Levie. Oy ti sventa yan jchop, jaꞌ ti muꞌyuc bu albil scꞌopilal yuꞌun chba yacꞌ smoton Dios te ti scajaneb smoton ti Diose.
\v 14 Yuꞌun jcotoltic ti jnaꞌtic ti jaꞌ yelnichꞌon ti Judae ti Cajvaltique. Ti yelnichꞌon ti Judae mi junuc mu hechuc albil scꞌopilal yuꞌun ti Moisese ti ch-ochic ti palee.
\p
\v 15 Yuꞌun coꞌol laj xa yichꞌ yabtel hech chaj cꞌu cheꞌel ti Melquisedeque ti achꞌ totil pale cuꞌuntique, hech chvinaj ti ijel xa ti smantal ti Diose.
\v 16 Yuꞌun ti iꞌoch ti totil pale cuꞌuntic ti Jesuse, maꞌuc yuꞌun muchꞌu statamol yuꞌun hech iꞌoch ti pale. Jaꞌ smantal ti Diose ti iꞌoche yuꞌun cuxul sbatel osil hech sbatel osil ch-abtej cuꞌuntic ti stojol ti Diose.
\v 17 Yuꞌun hech albil scꞌopilal:
\q Hoꞌot chaꞌoch ti totil pale sventa sbatel osil.
\q Coꞌol chavichꞌ avabtel hech chaj cꞌu cheꞌel ti Melquisedeque yuꞌun smacoj xchaꞌjechel ti Melquisedeque.
\q Ochem ti totil pale, ochem ti ajvalil uc,
\m ti xꞌutate.
\v 18 Hech yuꞌun ilaj xa scꞌopilal ti oy paleetic liꞌ ti balumile yuꞌun mu xuꞌ chijꞌoch ti stojol Dios yuꞌunic.
\v 19 Yuꞌun ti Jesuse xuꞌ chijꞌoch ti stojol Dios yuꞌun, yuꞌun jaꞌ ti sventa ti mu xa quecheluc quilintaeltic ti stojol ti Diose.
\p
\v 20-21 Ti Diose laj yal mantal laj svaꞌan sba ti rextico uc ti hech tsticꞌ ti Snichꞌone. Yuꞌun hech tsꞌibabil ti scꞌop ti Diose:
\q Mu snaꞌ sutes scꞌop ti Jtotic Diose.
\q Jꞌechꞌel laj xa yalbe ti Cajvaltique:
\q “Hoꞌot chaꞌoch ti totil pale sventa sbatel osil”,
\m xchi ti Diose, ti xchie. Jaꞌuc ti yelnichꞌnab ti Levie, jaꞌ noꞌox laj yal ti hech ch-ochilanic ti pale.
\v 22 Hech yuꞌun más tsots yabtel iꞌacꞌbat ti Jesuse yuꞌun ti Diose yuꞌun laj svaꞌan sba ti rextico. Jaꞌ más lec ti achꞌ trato ti ora to ti hech laj xa xchapan xchiꞌuc ti hoꞌucutique ti Diose. Jaꞌ señail ti achꞌ trato yuꞌun te xa oy ti vinajel ti Jesuse, jaꞌ chcꞌopoj cuꞌuntic.
\v 23 Ti yelnichꞌnab ti Levie xmelmun iꞌochic ti totil pale. Hech xmelmun ichamic uc. Ep ti totil paleetique ti iꞌechꞌique liꞌ ti balumile ti voꞌone.
\v 24 Ti ora to yuꞌun jaꞌ iꞌoch ti totil pale cuꞌuntic ti Jesuse, mu xa xjel yuꞌun jaꞌ cuxul sbatel osil.
\v 25 Hech yuꞌun jꞌechꞌel chcol yuꞌun ti Jesuse scotol ti muchꞌutic chnopejic tal ti stojol ti Diose ti sventa. Yuꞌun jaꞌ cuxul sbatel osil ti Jesuse. Jaꞌ scotol cꞌacꞌal chcꞌopoj yuꞌunic ti stojol ti Diose ti Jesuse.
\p
\v 26 Yuꞌun jaꞌ tscꞌan ti hech oy ti totil pale cuꞌuntique. Jaꞌ ti lec yoꞌntone, ti mu snaꞌ spas cꞌusi chopole, ti muꞌyuc mulil ti stojole, ti mu coꞌoluc hech chaj cꞌu cheꞌel ti hoꞌucutique ti oy jmultique, ti pasbil xa ti mucꞌ ti ora to te ti sbatsꞌicꞌob ti Diose.
\v 27 Jaꞌuc ti totil paleetique scotol cꞌacꞌal laj smililambe smoton ti Diose. Jbael laj yaqꞌuic ti chꞌayel smul stuquic, patil laj yacꞌbe ti chꞌayel smul ti xchiꞌiltaque. Mu hechuc ti Cajvaltique. Jaꞌ jꞌechꞌel noꞌox laj yacꞌ sba ti milel yuꞌun jmultic stuc.
\v 28 Ti poco mantal yuꞌun ti Diose jaꞌ chal ti ch-ochic ti totil pale viniquetic ti muꞌyuc yip yoꞌntonique. Jaꞌ ti cꞌalal laj svaꞌan sba ti rextico ti Diose, jaꞌ laj yacꞌ ochuc ti Snichꞌone ti jaꞌ jꞌechꞌel noꞌox tstsal yuꞌun ti muliletique. Hech yuꞌun ilaj scꞌopilal ti poco mantal yuꞌun ti Diose.
\c 8
\s Jaꞌ scꞌopilal ti sventainoj ti achꞌ tratoe ti Jesuse
\p
\v 1 Jaꞌ hech sjam ti cꞌusi laj xa jcholboxuque. Hech oy ti totil pale ti sventainojucutique. Ti ora to te nacal ti sbatsꞌicꞌob ti Diose te ti vinajel, pasbil ti mucꞌ. Ti Diose te nacal ti smucꞌta nacleb tspas ti mantal scotol.
\v 2 Ti totil paleetic ti iꞌechꞌic liꞌ ti balumile iꞌabtej cuꞌuntic te ti templonucule, ti jaꞌ pasbil ti scꞌob crixchanoetique. Jaꞌuc ti totil pale cuꞌuntic ti ora to te ch-abtej cuꞌuntic ti mero stojol ti Diose te ti vinajel, ti jaꞌ pasbil yuꞌun ti Diose.
\v 3 Scotol ti muchꞌutic iꞌoch ti totil pale liꞌ ti balumile ti voꞌonee, jaꞌ yabtelic laj yaqꞌuilambe smoton ti Diose, laj smililambe smoton ti Diose. Jaꞌuc ti totil pale cuꞌuntic ti ora to laj xa yacꞌbe smoton ti Dios uque. Jꞌechꞌel noꞌox laj yacꞌ ti motonile, jaꞌ motonil ti stuque. Jꞌechꞌel noꞌox laj yacꞌ sba pero jaꞌ chtunilan cuꞌuntic scotol cꞌacꞌal asta sbatel osil. Jaꞌ más lec yabtel stuc.
\v 4 Ti jaꞌuc liꞌ ti balumil ch-abtej ti Jesuse, mu xticꞌat ti totil pale yuꞌun ti jchiꞌiltique yuꞌun yan ti yabtel ti Jesuse. Mu coꞌoluc yabtelic xchiꞌuc ti totil paleetic liꞌ ti balumile ti chacꞌbeic smoton Dios stuquique hech chaj cꞌu cheꞌel chal ti mantaletique. Jaꞌuc ti Jesuse, jaꞌ sventa vinajel.
\v 5 Yuꞌun ti templo liꞌ ti balumile jaꞌ señail noꞌox hech chaj cꞌu cheꞌel oy ti vinajel. Jaꞌ sjam ti hech ipasat ti mantal ti Moisese yuꞌun ti Diose cꞌalal lic smeltsan ti templonucule: “Scotol ta me xameltsan hech chaj cꞌu cheꞌel ti señaile ti laj cacꞌbot avil te ti ba vits”, ti xꞌutate.
\v 6 Ti yabtel ti yichꞌoj ti paleetic liꞌ ti balumile mu xcoꞌolaj xchiꞌuc ti yabtel ti yichꞌoj ti Jesuse. Jaꞌ más lec ti yabtel ti yichꞌoj stuc ti Jesuse. Jaꞌ más lec ti achꞌ trato ti sventainoj stuque, yuꞌun jaꞌ chijcolucutic yuꞌun sbatel osil.
\p
\v 7 Ti nijcoluc yuꞌun ti sba tratoe, mu persauc oy yan trato ti hechuque.
\v 8 Yuꞌun laj yil ti Diose ti muc xchꞌun yuꞌunic ti mantaletique ti jtatamol jmembeltique ti voꞌone, hech yuꞌun hech laj yal:
\q Ta me sta yorail ti yan to cꞌacꞌal ti jpas trato xchiꞌuc ti avelnichꞌnabique, hoꞌoxuc ti yelnichꞌonoxuc ti Israel xchiꞌuque.
\q Manchuc mi chaꞌtos avacꞌoj abaic ti ora to, jun noꞌox chaquilic asta avelnichꞌnabic.
\q
\v 9 Mu xa coꞌoluc ti trato ti jpas xchiꞌuc ti avelnichꞌnabique hech chaj cꞌu cheꞌel laj jpas xchiꞌuc ti atatamol amembelique ti voꞌone ti jaꞌ laj quicꞌ loqꞌuel tal te ti slumal Egipto.
\q Jaꞌ noꞌox laj jcoltailan hech ihuꞌ yuꞌunic ijelavic ti butic ijelavique.
\q Yuꞌun mu jꞌechꞌeluc laj spas ti mucꞌ ti trato cuꞌune,
\q hech yuꞌun ti jcomes ti poco tratoe, xchi ti Diose.
\q
\v 10 Hech yuꞌun hech oy ti trato ti jpas xchiꞌuc ti avelnichꞌnabique.
\q Ta me sta yorail chcacꞌbe ti yoꞌntonic ti mantaletic cuꞌune.
\q Ta me jtsꞌibabe ti yoꞌntonic.
\q Hoꞌon Diosun yuꞌunic chicꞌot ti mero melel.
\q Jaꞌ cuꞌun chcꞌotic ti mero melel.
\q
\v 11 Mi junuc muꞌyuc muchꞌu chalbe sbaic hech:
\q “Ojtiquino ti Cajvaltique”, mu xut sbaic hech.
\q Yuꞌun ti jujune xiyojtiquinucun manchuc mi mucꞌ mi biqꞌuitic.
\q Mu xalbe sbaic yuꞌun hech chiyojtiquinucun scotolic.
\q
\v 12 Yuꞌun jꞌechꞌel chchꞌay ti coꞌnton ti smulique,
\m xchi ti Diose.
\v 13 “Ti jpas achꞌ trato”, ti xchie, yuꞌun mu xa xtun ti poco tratoe. Yuꞌun jaꞌ ti bu muꞌyuc xa stu, jaꞌ ti jtentic comel.
\c 9
\p
\v 1 Ti primero tratoe hech ipasatic ti mantal yuꞌun ti Diose ti jtatamol jmembeltique ti voꞌone ti acꞌo spasic ti temploe. Iꞌalbat uc yuꞌun ti Diose ti cꞌu cheꞌel tscꞌan ti chacꞌ sbaic ti abatinel ti stojol ti Diose te ti templo.
\v 2 Hech lic spasic ti templonucule. Jaꞌ hech ti chib cuarto ti yute. Te ti sba cuarto, jaꞌ ti chꞌul cuarto iꞌacꞌbat sbie, oy ti yav cꞌoqꞌue, jaꞌ ti candelero sbie, xchiꞌuc ti mesa yoꞌ bu laj yaqꞌuic ti vaje te ti stojol ti Diose.
\v 3-4 Ti xchaꞌcꞌolol ti nae ti chꞌacbil ti poqꞌue, jaꞌ ti jelaven chꞌul cuarto sbie. Jaꞌ te oy ti mesa ti bu chcꞌot xvaxan ti pome ti totil palee. Jaꞌ macbil ti cꞌanal taqꞌuin ti mesae. Te oy uc ti arca ti sventa ti tratoe. Macbil ti cꞌanal taqꞌuin uc ti arcae. Te tiqꞌuil ti yut ti arcae ti jun pꞌin pasbil ti cꞌanal taqꞌuin uc yoꞌ bu qꞌuejbil ti manavaje. Te tiqꞌuil uc ti snabteꞌ ti Aarone ti laj yacꞌ xniche. Te tiqꞌuil uc ti chaꞌpech ton yoꞌ bu tsꞌibabil ti mantaletique.
\v 5 Ti sba ti arcae te oy ti slocꞌtombail ti totil chꞌul abatetique ti jaꞌ smacojic ti squeval ti Diose te yoꞌ bu chchꞌaybat smul crixchanoetic. Ta yutsil, mu xuꞌ chacalbot scꞌopilal scotol.
\p
\v 6 Hech laj xchapan ti Diose ti scotol cꞌacꞌal iꞌochilan ti sba cuarto te ti templonucule ti bicꞌtal paleetique yuꞌun te ch-abtejic yuꞌun ti Diose.
\v 7 Ti xchibal cuartoe jun noꞌox vuelta iꞌoch ti jun habil stuc ti totil palee. Laj yichꞌ ochel chꞌichꞌ. Te ba yacꞌ ti stojol ti Diose. Jaꞌ señail stojol smul stuc ti totil palee xchiꞌuc ti cꞌu yepal smul ti staojic uc ti xchiꞌiltaque ti mu laj snaꞌic mi oy laj sta smulique.
\v 8 Hech chijyacꞌbucutic jnaꞌtic ti Chꞌul Espíritue ti cꞌalal ti chotol to ti primero temploe, jaꞌ ti templonucule, ti cꞌalal ch-abtej to cuꞌuntic ti paleetique, chvinaj ti mu to xuꞌ chijꞌoch ti jelaven chꞌul cuartoe.
\v 9 Hech chaj cꞌu cheꞌel ti muchꞌutic laj yacꞌ ti chꞌayilanel smul ti voꞌone muc xꞌoch ti jelaven chꞌul cuarto, jaꞌ noꞌox hech uc ti ora to ti muchꞌutic hech to chchꞌunic ti hech to yacꞌoj sba chaqꞌuilambeic smoton ti Diose, tsmililambeic smoton ti Diose, hech mu xuꞌ ch-och ti stojol ti Diose, yuꞌun mu xlecubtasatic yuꞌun ti hech tspasique.
\v 10 Yuꞌun ti poco mantaletique jaꞌ noꞌox sventa jcuxlejaltic liꞌ ti balumile. Jaꞌ noꞌox scꞌopilal veꞌelil xchiꞌuc cꞌusi chuchꞌic, xchiꞌuc cꞌu cheꞌel tspoc scꞌobic, ch-atinic. Jaꞌ noꞌox sventa yuꞌun lec ch-ilatic yuꞌun ti Diose, maꞌuc sventa yuꞌun jꞌechꞌel chcolic sbatel osil. Hech oy scꞌopilal jaꞌto cꞌalal ital ti Cristoe. Yuꞌun cꞌalal ital ti Cristoe, ijel ti mantaletique.
\p
\v 11 Yuꞌun iꞌay xa liꞌ ti Cristoe, hech yuꞌun jaꞌ totil pale icꞌot cuꞌuntic. Jaꞌ ti sventainoj scotol ti cꞌutic leque jaꞌ ti yacꞌoj sba chijyacꞌbucutique. Ti templo ti bu ch-abtej ti Cristoe, te oy ti vinajel. Jaꞌ más mucꞌ. Jaꞌ jun noꞌox yutsil. Mu pasbiluc ti scꞌob crixchanoetic.
\v 12 Maꞌuc ti sventa xchꞌichꞌel totil chivo, maꞌuc ti sventa xchꞌichꞌel unen vacax ti hech iꞌoch ti stojol ti mero Diose. Jaꞌ ti sventa xchꞌichꞌel stuc ti hech iꞌoche. Jꞌechꞌel iꞌoch o, jꞌechꞌel ihuꞌ yuꞌun laj stojbucutic jmultic sventa sbatel osil.
\v 13 Yuꞌun hech tspasic liꞌ ti balumile. Chaqꞌuic ti lecubtasel sbecꞌtalic xchiꞌuc ti xchꞌichꞌel vacaxe, mi xchꞌichꞌel totil chivoe, mi stanil unen vaca ti cꞌaqꞌueme, jaꞌ noꞌox yuꞌun ti cꞌuc noꞌox chcꞌot ti pasel yuꞌunique. Yuꞌun oy smul ch-ilatic yuꞌun ti Diose.
\v 14 Mi hech chlecubtasvan ti xchꞌichꞌel vacaxe, ti xchꞌichꞌel totil chivoe, jaꞌ jꞌechꞌel nijlecub yuꞌun o ti xchꞌichꞌel ti Cristoe, jaꞌ ti mi jutuc muꞌyuc smule. Yutsil yoꞌnton laj yacꞌ sba ti milel cuꞌuntic stuc sventa smoton Dios cuꞌuntic sbatel osil. Ti sventa ti Chꞌul Espíritue ti iventaimbat yoꞌntone, hech ihuꞌ yuꞌun. Hech yuꞌun jꞌechꞌel chistupꞌbucutic ti coꞌntontic ti hech jchꞌunojtic onoꞌox ti chcacꞌtic persa ti jchꞌuntic yuꞌun hech chijcolucutic laj jcuytique. Hech yuꞌun ti ora to ti laj xa stupꞌbucutic ti coꞌntontique, xuꞌ chijtun yuꞌun ti Diose ti stalel cuxule.
\p
\v 15 Hech yuꞌun jaꞌ sventainoj ti achꞌ trato ti Cristoe. Yuꞌun jaꞌ icham yuꞌun scotol jmultic hech yuꞌun laj xa stojbucutic ti cꞌu yepal laj jta jmultique cꞌalal oyucutic to ti sventa ti primero tratoe. Hech yuꞌun hoꞌucutic ti laj xa yicꞌucutic ti stojol ti Diose, hech chquichꞌtic scotol ti cꞌutic leque ti chijyalbucutic ti chquichꞌtic sventa sbatel osil.
\v 16 Hech chaj cꞌu cheꞌel tscajpꞌejan comel ti hun ti muchꞌutic chichꞌ ti cꞌutic oy yuꞌune. Jaꞌto mi ichame, jaꞌto chcꞌot ti pasel chichꞌ chꞌacbel ti cꞌutic oy yuꞌune.
\v 17 “Jaꞌto mi nichame, jaꞌto chavichꞌic”, xchi. Hech yuꞌun jaꞌto mi ichame, jaꞌto xuꞌ chcꞌot ti pasel. Mu xuꞌ chcꞌot ti pasel cꞌalal cuxul toe. Jaꞌ noꞌox hech uc jaꞌto icham ti Cristoe, jaꞌto laj quichꞌtic ti cꞌutic leque jaꞌ ti sventa sbatel osile.
\v 18 Hech yuꞌun persa oy onoꞌox chꞌichꞌ itun ti primero trato uque. Yuꞌun ti persa itun yuꞌunic ti chꞌichꞌe ti primero tratoe, jaꞌ señail ti persa chtal chamuc ti Cristoe.
\v 19 Ti cꞌalal laj yoꞌnton laj yavta scotol ti mantaletique ti Moisese te ti stojol scotol ti jtatamoltique ti voꞌone, lic stsac xchꞌichꞌel unen vacax xchiꞌuc xchꞌichꞌel totil chivo. Laj stsac hoꞌ uc. Hech yuꞌun lic stsac hisopoteꞌ, lic stsꞌaj ti chꞌichꞌ. Oy tsots yichꞌoj ti sniꞌ ti hisopoteꞌe. Tsoj onoꞌox ti tsotse. Hech lic svits-alta ti sun yoꞌ bu tsꞌibabil ti mantaletique ti chꞌichꞌe. Hech lic svits-alta uc scotol ti crixchanoetique.
\v 20 Hech laj yalbe ti jtatamoltique: “Ti chꞌichꞌ avi to jaꞌ señail ti laj xa jpastic trato xchiꞌuc ti Diose”, xchi.
\v 21 Laj svits-alta uc ti templonucule xchiꞌuc scotol ti cꞌutic te tiqꞌuil te ti templonucul jaꞌ ti chtunilan yuꞌunic yuꞌun ch-abtejic yuꞌun ti Diose.
\v 22 Yuꞌun hech chal ti mantaletique ti ep chichꞌ lecubtasel yuꞌun chꞌichꞌ. Jutuc noꞌox ti bu mu xichꞌ lecubtasel yuꞌun ti chꞌichꞌe. Yuꞌun ti manchuc chmal chꞌichꞌ, mu xchꞌay mulil.
\s Jaꞌ scꞌopilal ti yuꞌun laj yacꞌ sba ti milel yuꞌun jmultic ti Cristoe, hech yuꞌun jꞌechꞌel ichꞌay ti jmultique
\p
\v 23 Ti cꞌu cheꞌel laj spasic liꞌ ti balumile jaꞌ señail ti hech onoꞌox chcꞌot ti pasel ti vinajel. Ti sventa xchꞌichꞌel vacax o chivo xuꞌ iꞌochic ti stojol Dios liꞌ ti balumile. Jaꞌ noꞌox hech ti hoꞌucutique ti sventa ti xchꞌichꞌel ti Cristoe xuꞌ chijꞌoch ti stojol Dios te ti vinajel. Hech yuꞌun jaꞌ tsots scꞌopilal ti xchꞌichꞌel ti Cristoe. Jaꞌ yamal scꞌopilal ti xchꞌichꞌel vacax o chivo liꞌ ti balumile.
\v 24 Yuꞌun ti Cristoe ochem xa ti vinajel, jaꞌ ti mero chꞌul cuartoe, yuꞌun jaꞌ te oy ti Diose. Mu yuꞌunuc iꞌoch ti chꞌul cuarto bu pasbil ti scꞌob crixchanoetic. Yuꞌun liꞌ ti balumile jaꞌ señail noꞌox, maꞌuc ti mero chꞌul cuartoe. Yuꞌun ochem xa ti vinajel ti Cristoe hech yuꞌun jaꞌ chcꞌopoj cuꞌuntic ti ora to ti stojol ti Diose.
\v 25 Mu yuꞌunuc ep vuelta chaqꞌuilan sba ti milel hech chaj cꞌu cheꞌel tsmililan vacax o chivo ti totil pale ti chichꞌ ochel ti jelaven chꞌul cuarto jun vuelta jujun habil liꞌ ti balumile. Mu coꞌoluc.
\v 26 Ti yuꞌunuc hech tscꞌane, ep xa vuelta iꞌechꞌilan xa svocol asta cꞌalal ilic ti balumile asta ti ora to ti hechuque. Jaꞌuque, cꞌalal iꞌechꞌ xa ep habil, laj sta yorail tspajes ti xchꞌichꞌel vacaxe o chivoe ti Diose, hech yuꞌun laj stac talel ti Snichꞌone. Jꞌechꞌel tal xchꞌaybucutic jmultic yuꞌun jaꞌ tal yacꞌ sba ti milel cuꞌuntic.
\v 27 Jun noꞌox vuelta chijchamucutic ti jujunucutique. Patil jun noꞌox vuelta ch-ichꞌbatic scꞌopic yuꞌun smulic ti muchꞌutic mu xchꞌunique.
\v 28 Jaꞌ noꞌox hech uc jun noꞌox vuelta laj yacꞌ sba ti milel ti Cristoe yuꞌun hech laj xcuchbucutic jmultic jcotoltic. Chchaꞌsut tal yan vuelta, maꞌuc yuꞌun chtal xcuchbucutic jmultic yan vuelta. Jaꞌ yuꞌun chtal yuꞌun chijyicꞌucutic batel, hoꞌucutic ti cacꞌoj jbatic ti jmalatic chtale, yuꞌun hech chijcolucutic sbatel osil ti sventa.
\c 10
\p
\v 1 Ti lec iꞌilat yuꞌun ti Diose ti muchꞌutic laj smilbeic smoton yuꞌun chacꞌbeic ti voꞌone, jaꞌ señail noꞌox ti jꞌechꞌel lec chijyilucutic ti Diose ti sventa ti Cristoe. Yuꞌun ¡bu cꞌamba huꞌuc ti jꞌechꞌel muꞌyuc xa smulic ch-ilatic yuꞌun ti Diose ti muchꞌutic chichꞌbeic tal smoton ti Diose ti tsmililambeic yuꞌun chaqꞌuilambeic jujun habil!
\v 2 Taca jꞌechꞌeluc lec ch-ilatique, mu xa xaqꞌuilanic ti smoton ti hechuque. Ti yuꞌunuc jꞌechꞌel ipocbat yoꞌntonic ti muchꞌutic hech chchꞌunic ti Diose, mu xa xloꞌlaj yoꞌntonic ti hechuque.
\v 3 Pero cꞌalal tsmilbeic smoton ti Diose yuꞌun ti smulique jujun habil, te tsnaꞌic ti oy ti smulique.
\v 4 Yuꞌun ¡bu cꞌamba huꞌuc yuꞌun ti xchꞌichꞌel vacaxe xchiꞌuc ti xchꞌichꞌel totil chivoe ti jꞌechꞌel chixchꞌaybucutic jmultique yuꞌun señail noꞌox!
\p
\v 5 Hech yuꞌun cꞌalal yorail ital liꞌ ti balumile ti Cristoe, hech laj yalbe ti Diose:
\q Mu tauc yutsil chavil ti xchꞌichꞌel vacaxe, ti xchꞌichꞌel totil chivoe ti chayacꞌbote.
\q Jaꞌ laj xa achapambun ti jbecꞌtale yuꞌun jꞌechꞌel chba jtojbe ti smulique.
\q
\v 6 Maꞌuc lec avoꞌnton yuꞌun hech chaꞌacꞌbat amoton yuꞌun hech chtoj o smulic.
\q
\v 7 Hech yuꞌun ti hech laj calbote:
\q “Liꞌoyun hoꞌoni, chba jpas ti cꞌusi tscꞌan ti avoꞌntone, Dios cuꞌun.
\q Chba cacꞌ jba ti milel hech chaj cꞌu cheꞌel tsꞌibabil comel jcꞌopilal te ti balbil hun”, ti xichie,
\m xchi ti Cristoe.
\v 8 Yuꞌun ti hech laj yal ti jbaele ti Cristoe ti “mu tauc yutsil chavil ti xchꞌichꞌel vacaxe, ti xchꞌichꞌel totil chivoe ti chayacꞌbote, maꞌuc lec avoꞌnton yuꞌun hech chaꞌacꞌbat amoton yuꞌun hech chtoj o smulic”, ti xchie, jaꞌ noꞌox yuꞌun ti hech chal ti mantaletique ti hech acꞌo cacꞌtique.
\v 9 Hech yuꞌun patil laj yal: “Liꞌoyun hoꞌoni, chba jpas ti cꞌusi tscꞌan ti avoꞌntone, chba cacꞌ jba ti milel”, ti xchie. Hech ilaj scꞌopilal ti mantaletique ti jbael laj yalbe scꞌopilale. Jaꞌ tsots scꞌopilal ti patil laj yalbe scꞌopilale, jaꞌ ti tal yacꞌ sba ti milel yuꞌun jmultic.
\v 10 Hech laj scꞌan yoꞌnton ti Diose ti jaꞌ ti sventa ti jꞌechꞌel laj yacꞌ sba ti milel cuꞌuntic ti Jesucristoe ti hech ichꞌay ti jmultique, hech ilecubtasat ti coꞌntontique.
\p
\v 11 Scotol ti paleetique te vaꞌajtic ch-abtejic ti stojol ti Diose scotol cꞌacꞌal. Jaꞌ noꞌox puru abtel tspasilanic yuꞌun tsmililambeic smoton ti Diose ti chaqꞌuilambeique, ti mu xchꞌay mulil mi jutuc.
\v 12 Ti Cristoe laj yacꞌbe ti Diose jun noꞌox smoton ti milbile, jaꞌ ti stuque. Jaꞌ sventa stojol mulil asta sbatel osil. Patil ba nacluc te ti sbatsꞌicꞌob ti Diose.
\v 13 Te tsmala jaꞌto mi itsalbat scotol ti yajcontrae.
\v 14 Yuꞌun ti sventa ti jun noꞌox smoton ti milbile ti laj yacꞌbe ti Diose, hech jꞌechꞌel muꞌyuc xa smulic ch-ilat yuꞌun ti Diose scotol ti muchꞌutic hech lecubtasbil yoꞌntonic yuꞌune.
\v 15 Ti Chꞌul Espíritue chijyacꞌbucutic jnaꞌtic ti melel. Yuꞌun maꞌuc noꞌox hech laj yal ti Diose:
\q
\v 16 Hech oy ti trato ti jpastic xchiꞌuc ti hoꞌoxuque, xchi ti Diose.
\q Ta me sta yorail chacacꞌbot ti avoꞌntonic ti mantaletic cuꞌune.
\q Ta me xajtsꞌibaboxuc comel ti avoꞌntonic,
\m xchi ti Diose.
\v 17 Hech laj yal yan:
\q Jꞌechꞌel chchꞌay ti coꞌnton ti amulique,
\m xchi ti Diose.
\v 18 Yuꞌun ti chꞌayem xa jmultic yuꞌun ti Diose, hech yuꞌun mu xa oyuc yan motonil chcacꞌtic.
\s Jaꞌ scꞌopilal ti jun coꞌntontic acꞌo nopejucutic tal ti stojol ti Diose
\p
\v 19 Hech yuꞌun, quermanotac, yuꞌun nijcolucutic xa ti libre yuꞌun ti jmultique, hech yuꞌun mu xijxiꞌ, nichim noꞌox coꞌntontic xuꞌ ti jcꞌopontic Dios ti jujunucutique ti sventa ti xchꞌichꞌel ti Jesucristoe.
\v 20 Yuꞌun ti laj yichꞌ sbecꞌtal ti Cristoe, yuꞌun ti hech imilate, hech yuꞌun laj xa sjambucutic ti bee hech yuꞌun xuꞌ ti jcꞌopontic ti Diose jtuctic ti jujunucutique. Ti voꞌone mu stacꞌ onoꞌox ti jcꞌopontic ti Diose jtuctic. Yuꞌun te chcꞌopoj cuꞌuntic ti stojol ti Diose ti ora to ti Cristoe, hech yuꞌun chijyaꞌibucutic jcꞌoptic ti Diose.
\v 21 Hech yuꞌun jaꞌ totil pale cuꞌuntic ti Jesucristoe. Jaꞌ sventainojucutic jcotoltic hoꞌucutic ti yol snichꞌonucutic ti Diose.
\v 22 Hech yuꞌun jun coꞌntontic acꞌo nopejucutic tal ti stojol ti Diose. Acꞌo jchꞌuntic ti lec chijyilucutique yuꞌun pocbil xa coꞌntontic ti xchꞌichꞌel ti Cristoe, pocbil xa jbecꞌtaltic yaꞌyel yuꞌun laj xa quichꞌtic hoꞌ. Hech yuꞌun muꞌyuc xa jmultic chijyilucutic.
\v 23 Acꞌo me caltic ti jchꞌunojtic ti chijcolucutic yuꞌun ti Cristoe. Mu me specꞌtsaj scꞌopilal cuꞌuntic. Yuꞌun persa chcꞌot ti pasel ti hech yalojbucutique.
\v 24 Acꞌo jnoptic ti cꞌu cheꞌel tscꞌan ti jmucꞌubtasbe jbatic coꞌntontic yuꞌun hech chijcꞌuxubinvan, yuꞌun hech xuꞌ cuꞌuntic ti jpastic lequil abteletic.
\v 25 Mu me xijpaj yuꞌun ti chba jtsobilan jbatique yuꞌun chcaꞌitic ti scꞌop ti Diose. Yuꞌun oy muchꞌu hech laj xa spas. Mu me jpastic hech uc, acꞌo quicꞌ jbatic batel. Jaꞌ tscꞌan ti hech chacolta abaique yuꞌun chanaꞌic ti poꞌot xa tsta yorail chtal ti Cajvaltique.
\p
\v 26 Mi caꞌyojtic xa ti scꞌop ti Diose ti jaꞌ melele, mi yutsil coꞌntontic ta to jsaꞌilan jmultic, muꞌyuc xa yan smoton Dios ti xuꞌ ti jmiltic yuꞌun ti jmultique.
\v 27 Jaꞌ noꞌox puru xiꞌel chcaꞌilantic yuꞌun ti jnaꞌtic ti chcꞌo yichꞌbucutic jcꞌoptic yuꞌun jmultic. Ti jnaꞌtic ti chijꞌoch ti cꞌocꞌ ti yan sba chtile, yoꞌ bu chmilat scotol ti muchꞌutic scontrainoj ti Diose.
\v 28 Ti muchꞌutic laj spꞌajic ti mantaletique ti laj yal ti voꞌone ti Moisese, ti sventa scꞌop chaꞌvoꞌ oxvoꞌ noꞌox rextico hech imilatic. Mi jutuc muc xichꞌic cꞌuxubinel.
\v 29 Mi muc xichꞌic cꞌuxubinel ti muchꞌutic laj spꞌajic ti mantaletic ti voꞌone, ¡bu ba yichꞌic cꞌuxubinel ti muchꞌutic mu xa xtun chilic ti Snichꞌon ti Diose, ti muꞌyuc xa stu ti yoꞌntonic ti xchꞌichꞌel ti Cristoe ti jaꞌ onoꞌox ipocbatic yoꞌntonic yuꞌune, ti tscontrainic ti Chꞌul Espíritu yuꞌun ti Diose ti jaꞌ iꞌacꞌbatic onoꞌox yutsil yoꞌntonic yuꞌune! Jaꞌ echꞌem chichꞌic castigo.
\v 30 Yuꞌun ti jnaꞌbetic yoꞌnton ti Diose ti hech yaloj: “Hoꞌon jventa chcacꞌ castigo. Hoꞌon jventa chcacꞌbe stoj”, ti xchie. Hech yaloj uc: “Hoꞌon Diosun. Hoꞌon chquichꞌbe scꞌop yuꞌun smulic ti muchꞌutic cuꞌune”, ti xchie.
\v 31 ¡Ep me jvocoltic mi nijꞌacꞌat entrecal ti scꞌob ti Diose ti stalel cuxule!
\p
\v 32 Naꞌic me ti voꞌone cꞌalal jaꞌto noꞌox napꞌijub yuꞌun ti Diose lec acꞌopilalic yuꞌun lec laj atsꞌiquic vocol.
\v 33 Ti stojol scotol crixchanoetic oy bu laj avichꞌic labanel, oy bu laj avichꞌic ilbajinel. Oy bu ay acoltaic ti muchꞌu chichꞌic ilbajinele.
\v 34 Laj acꞌuxubinic ti muchꞌutic iticꞌatic ti presoe. Nichim noꞌox avoꞌntonic laj atsꞌiquic ti napojbat ti cꞌutic oy avuꞌunique yuꞌun laj anaꞌic ti jelaven yutsil ti cꞌutic chcꞌo avichꞌic ti vinajel ti mu xbat ti pojele. Hech yuꞌun mu tsotsuc scꞌopilal laj avaꞌi ti chapojbatic ti cꞌusi oy avuꞌunic liꞌ ti balumile.
\v 35 Hech yuꞌun ti ora to mu me xaten ti xchꞌunojel avoꞌntonique. Yuꞌun lec chaꞌacꞌbatic atojolic yuꞌun.
\v 36 Tsots me xapas abaic yuꞌun hech xuꞌ avuꞌunic chapasic ti cꞌusi scꞌan yoꞌnton ti Diose. Hech chaꞌacꞌbatic ti cꞌutic yaloj onoꞌox ti chavichꞌique.
\v 37 Yuꞌun hech chal ti scꞌop Diose:
\q Jutuc xa scꞌan tsta yorail chchaꞌsut tal ti muchꞌu scꞌopilal chchaꞌsut tale; mu xa epuc cꞌacꞌal tscꞌan, ti xchie.
\q
\v 38 Ti cabate ti toj yoꞌnton chquile, jaꞌ ti sventa xchꞌunojel yoꞌnton chcuxi.
\q Mi chchaꞌsut batel, mu lecuc coꞌnton yuꞌun obi,
\m ti xchie.
\v 39 Ti hoꞌucutique mu hechuc coꞌntontic hech chaj cꞌu cheꞌel ti muchꞌutic chchaꞌsut batele, ti chꞌayel chbatique. Jꞌechꞌel jchꞌunojtic hoꞌucutic yuꞌun hech chijcuxiucutic sbatel osil.
\c 11
\s Jaꞌ scꞌopilalic ti muchꞌutic oy lec xchꞌunojel yoꞌntonique
\p
\v 1 Jaꞌ hech yabtel ti xchꞌunojel coꞌntontique. Ti jchꞌuntic ti chcꞌot ti pasel ti cꞌutic ta to jmalatique. Ti jchꞌuntic ti chquichꞌtic ti cꞌutic mu to chquiltique.
\v 2 Ti jchꞌunojeletic ti voꞌonee ti sventa xchꞌunojel yoꞌntonic ti lec scꞌopilalique.
\p
\v 3 Yuꞌun oy xchꞌunojel coꞌntontic, ti jnaꞌtic ti jaꞌ smantal Dios ti imeltsaj scotol ti cꞌutic oye. Jaꞌ noꞌox ti jnaꞌtic ti jqꞌueltic. Mu jnaꞌtic bu ital.
\p
\v 4 Yuꞌun oy xchꞌunojel yoꞌnton ti Abele, hech yuꞌun más lec ti smoton Diose ti laj yacꞌbee. Jaꞌuc ti Caine mu lecuc ti motonile ti laj yacꞌbe ti Diose. Hech toj yoꞌnton iꞌilat yuꞌun ti Diose ti Abele, hech itsacbat yuꞌun ti Diose ti smoton ti laj yacꞌbee. Jaꞌuc ti Caine muc stsacbat. Hech yuꞌun manchuc mi chamen xa ti Abele, ta to xcꞌopoj yaꞌyel yuꞌun oy xchꞌunojel yoꞌnton.
\p
\v 5 Yuꞌun oy xchꞌunojel yoꞌnton ti Enoque, muc xvay ti sbecꞌtale. Cuxul iꞌicꞌat batel ti vinajel. Muc xtaat ti saꞌel yuꞌun iꞌicꞌat batel yuꞌun ti Diose. Cꞌalal mu to ch-icꞌate, hech scꞌopilal ti lec onoꞌox yoꞌnton Dios yuꞌun.
\v 6 Yuꞌun ti muchꞌu muꞌyuc xchꞌunojel yoꞌntone, mu lecuc ch-ilat yuꞌun ti Diose. Yuꞌun scotol ti muchꞌu chnopejic tal ti stojol ti Diose, persa xchꞌunoj ti cuxul ti Diose. Persa xchꞌunoj uc ti tsta ti Diose yuꞌun ti yacꞌoj sba tsaꞌe.
\p
\v 7 Yuꞌun oy xchꞌunojel yoꞌnton ti Noee, laj smeltsan jun barco yoꞌ bu icol xchiꞌuc sjunul sna. Yuꞌun iꞌacꞌbat snaꞌ yuꞌun ti Diose ti chtal ti castigoe. Mu to tsqꞌuel stuc. Yuꞌun ti laj xchꞌun ti cꞌu cheꞌel iꞌalbat yuꞌun ti Diose hech itabat smulic scotol ti xchiꞌiltaque. Hech toj yoꞌnton iꞌilat yuꞌun ti Diose yuꞌun ti oy xchꞌunojel yoꞌntone.
\p
\v 8 Yuꞌun oy xchꞌunojel yoꞌnton ti Abrahame, laj xchꞌun ti iꞌicꞌat loqꞌuel ti slumal. Ilocꞌ batel ti slumal, ibat ti yan balumil ti iꞌalbat ti ch-acꞌbat sventain xchiꞌuc snichꞌon xchiꞌuc yelnichꞌnabtac. Ti cꞌalal ilocꞌ batele, mu laj snaꞌ bu to oy.
\v 9 Yuꞌun oy xchꞌunojel yoꞌnton ti Abrahame, hech yuꞌun cꞌalal inaqui ti balumil ti iꞌacꞌbat sventaine, muc xchꞌun ti jaꞌ mero slumal o. Jaꞌ noꞌox nailnucul laj snain ti Abrahame. Hech laj spas uc ti snichꞌone, jaꞌ ti Isaaque, xchiꞌuc ti yelnichꞌone, jaꞌ ti Jacobe, cꞌalal hech laj yichꞌic comel ti balumile.
\v 10 Yuꞌun ti Abrahame laj xchꞌun ti te chcꞌo nacluc o ti mucꞌta jteclum ti mu xlaje te ti vinajel ti stuc smeltsanoj ti Diose.
\p
\v 11 Ti Sarae mi junuc vuelta muc xꞌalaj. Yuꞌun oy xchꞌunojel yoꞌnton, hech laj sta yol manchuc mi echꞌem xa yorail ti ch-alaje. Yuꞌun laj xchꞌun ti chcꞌot ti pasel ti scꞌop ti Diose hech chaj cꞌu cheꞌel iꞌalbat ti jbaele.
\v 12 Hech yuꞌun ti sventa ti jun vinic ti chamen xa sbecꞌtal yaꞌyel yuꞌun mu xa xnichꞌnaj, hech yepal yelnichꞌnab iꞌan hech chaj cꞌu cheꞌel ti cꞌanaletique, hech chaj cꞌu cheꞌel ti hiꞌtic ti tiꞌnab ti mu stacꞌ atele.
\v 13 Scotol ti jayvoꞌic ti oy scꞌopilal liꞌto oy xchꞌunojel yoꞌntonic cꞌalal ichamic. Cꞌalal ichamique, mu to ch-acꞌbatic ti cꞌusi albil scꞌopilale. Poꞌot xa chcꞌo yichꞌic laj yaꞌyic. Nichim noꞌox yoꞌntonic yuꞌun. Jamal laj yalic ti maꞌuc mero slumalic liꞌ ti balumile.
\v 14 Ti muchꞌutic hech chalique, jamal chaqꞌuic ti naꞌel ti chbatic ti bu mero slumalique.
\v 15 Ti jaꞌuc scꞌopilal ti balumil ti bu iloqꞌuic talele, xuꞌ isutic batel ti hechuque.
\v 16 Jaꞌ laj scꞌanic ti balumil ti jelaven yutsile, jaꞌ ti vinajele. Hech yuꞌun mu xqꞌuexav ti Diose yuꞌun hech sbi: “Dios yuꞌun Abraham, yuꞌun Isaac, yuꞌun Jacob”, xchi scꞌopilal. Yuꞌun smeltsanoj xa ti Diose ti mucꞌta jteclum ti bu chnaquiic yuꞌune.
\p
\v 17-18 Yuꞌun oy xchꞌunojel yoꞌnton ti Abrahame, hech yuꞌun cꞌalal ipasbat proval yoꞌnton yuꞌun ti Diose, laj yacꞌbe sventa smoton Dios ti snichꞌone, jaꞌ ti Isaaque. Ti Abrahame hech albil onoꞌox yuꞌun ti Diose: “Ti sventa ti Isaaque hech chlic pꞌoluc avelnichꞌon”, ti xꞌutate. Manchuc mi hech albil, laj yacꞌbe sventa smoton Dios ti jun noꞌox snichꞌone.
\v 19 Xchꞌunoj ti Abrahame ti jelaven spꞌijil ti Diose, ti xuꞌ chchaꞌcuses ti ánimaetique. Hech icꞌot ti pasel yaꞌyel. Icham yaꞌyel ti snichꞌone. Ichaꞌcusesbat sut tal yaꞌyel.
\p
\v 20 Yuꞌun oy xchꞌunojel yoꞌnton ti Isaaque hech laj yacꞌbe bendición ti Jacobe xchiꞌuc ti Esaue. Laj yalbe scꞌopilalic ti cꞌu cheꞌel chbatic jujun.
\v 21 Yuꞌun oy xchꞌunojel yoꞌnton ti Jacobe, hech cꞌalal poꞌot xa chcham, laj yacꞌbe bendición ti chaꞌvoꞌ xnichꞌnab ti Josee. Te vaꞌal yicoj sjol snabteꞌ ilequilcꞌopoj yuꞌun ti Diose.
\v 22 Yuꞌun oy xchꞌunojel yoꞌnton ti Josee hech cꞌalal poꞌot xa chcham, laj yal ti cꞌu xꞌelan chloqꞌuic batel ti slumal Egipto ti xchiꞌiltaque, jaꞌ ti coꞌol yelnichꞌnab ti Israel xchiꞌuque. Jaꞌ laj yal comel mantal ti acꞌo cuchbatuc batel ti sbaquele ti cꞌalal chloqꞌuic batel scotol ti xchiꞌiltaque.
\p
\v 23 Yuꞌun oy xchꞌunojel yoꞌntonic ti stot smeꞌ ti Moisese, hech cꞌalal iꞌan ti Moisese, muc xiꞌic, muc spasbeic ti mucꞌ ti smantal ti totil ajvalile. Laj snaqꞌuic oxib u ti olole yuꞌun laj yilic ti tꞌujum ti olole.
\v 24 Cꞌalal laj sta xchꞌiel ti Moisese, yuꞌun oy xchꞌunojel yoꞌnton, hech muc scꞌan ti jaꞌ smeꞌ chcꞌot o ti stseb ti Faraone.
\v 25 Yutsil yoꞌnton ba xchiꞌin ti ilbajinel ti xchiꞌiltaque, yuꞌun jaꞌ coꞌol tꞌujbilic yuꞌun ti Diose xchiꞌuc ti xchiꞌiltaque. Muc scꞌan scꞌupin cꞌutic sventa mulil ti jꞌocꞌ noꞌox lec chcaꞌitique.
\v 26 Laj xchꞌun ti jaꞌ scꞌulejal chcꞌot mi chcuch yuꞌun vocol hech chaj cꞌu cheꞌel chcuch yuꞌun ti Cristoe. Hech yuꞌun muc scꞌupimbe scꞌulejal ti egiptoetique yuꞌun laj snaꞌ ti chcꞌo acꞌbatuc stojol yabtel yuꞌun ti Diose ti yan cꞌacꞌal.
\v 27 Yuꞌun oy xchꞌunojel yoꞌnton hech ilocꞌ batel ti slumal Egipto. Mu yuꞌunuc jaꞌ ixiꞌ yuꞌun ti totil ajvalile yuꞌun ti ch-ilintaate. Jaꞌ oy stsatsal yoꞌnton yuꞌun sqꞌuelojbe sat ti Diose laj yaꞌi, jaꞌ ti mu xquilbetic sate.
\p
\v 28 Yuꞌun oy xchꞌunojel yoꞌnton ti Moisese, hech laj yalbe ti xchiꞌiltaque ti cꞌalal chtal xa ti chꞌul abate: “Milic acarneroic. Ti xchꞌichꞌele jaꞌ chabon ti stiꞌ ti anaique yuꞌun hech mu xismilbucutic ti sba col jnichꞌontique”, xut. Jaꞌ qꞌuin Pascua sbi icꞌot cuꞌuntic.
\v 29 Yuꞌun oy xchꞌunojel yoꞌntonic ti Moisese xchiꞌuc ti xchiꞌiltaque hech yuꞌun ijelavic batel ti oꞌlol nab, jaꞌ ti Tsajal Nab sbie. Coꞌol chaj cꞌu cheꞌel taqui balumil laj yaꞌyic cꞌalal ixanavic echꞌel ti oꞌlol nab. Cꞌalal scꞌan ch-echꞌic uc ti egiptoetique, te ichamic ti yut hoꞌ.
\p
\v 30 Yuꞌun oy xchꞌunojel yoꞌntonic ti jchiꞌiltic ti voꞌone hech yuꞌun ijin yal tal ti macteꞌton yuꞌun ti Jericoe cꞌalal itsꞌaqui yuꞌunic laj sjoyobtaic hucub cꞌacꞌal.
\v 31 Yuꞌun oy xchꞌunojel yoꞌnton ti jmulavil antse, jaꞌ ti Raabe, hech muc xmilat ti cꞌalal imilat scotol ti xchiꞌiltaque ti mu xchꞌunojuque. Yuꞌun cꞌux ti yoꞌnton ti jtatamoltic ti a sqꞌuelic ti balumile ti jbaele, jaꞌ laj yicꞌ ochel ti sna.
\p
\v 32 Ta yutsil chcal ti hech yepal laj calboxuque. Oy to yan ti muc xacalbeique. Jaꞌ scꞌopilal ti Gedeone, ti Baraque, ti Sansone, ti Jeftee, ti Davide, ti Samuele, xchiꞌuc ti yan jꞌalcꞌopetic yuꞌun ti Diose.
\v 33 Yuꞌun oy xchꞌunojel yoꞌntonic hech ihuꞌ yuꞌunic laj stsal totil ajvaliletic, toj laj spasic mantal, laj yilic ti icꞌot ti pasel ti cꞌusi iꞌalbatic yuꞌun ti Diose. Oy imac ye jtiꞌvanej bolometic muc xtiꞌat.
\v 34 Oy iticꞌatic ti mucꞌta cꞌocꞌ, muc xcꞌaqꞌuic yuꞌun. Oy icolic loqꞌuel muc yichꞌ espada. Ti muchꞌu muꞌyuc yip xꞌelan iꞌacꞌbat yip. Itsalvanic ti pleito. Laj snutsbeic batel ti yajsoldado ti yajcontraique.
\v 35 Oy antsetic ichaꞌcusesbat yol ti chamen xae.
\p Oy iꞌechꞌ svocolic iꞌilbajinat xchiꞌuc ti sbecꞌtalique asta ichamic. Muc scꞌanic mi chcoltaatic yuꞌun jaꞌ tscꞌan chchaꞌcusesat sventa sbatel osil.
\v 36 Oy yantic uc laj stsꞌiquic labanel, laj yichꞌic acial, ichucat, iꞌochic ti chuquel.
\v 37 Oy iꞌacꞌbatic ton hech ichamic, oy oꞌlol ituchꞌatic ti sierra. Oy ipasbatic proval yoꞌntonic mi jamal chal ti xchꞌunoje, patil imilat ti espada. Oy muꞌyuc scꞌuꞌic hech yuꞌun laj slapic snuculel carnero mi snuculel chivo. Meꞌonic icꞌotic yuꞌun scoj ti ilbajinele, iꞌechꞌ svocolic, uts sbaic.
\v 38 Jaꞌ mu xtun yoꞌntonic ti yan crixchanoetique. Jaꞌ lum lec yoꞌntonic lume. Muc xnaquiic lec. Ixanavic batel ti xocol balumil, ti vitsetic. Laj snacꞌ sbaic ti pujul chꞌenetic.
\v 39 Lec scꞌopilalic scotolic yuꞌun oy xchꞌunojel yoꞌntonic. Muc to xichꞌic scotol ti cꞌutic albil scꞌopilal ti ch-acꞌbatic yuꞌun ti Diose.
\v 40 Yuꞌun voꞌone xchapanoj ti Diose ti jelaven yutsil ti coꞌol chcꞌo quichꞌtic jcotoltic xchiꞌuc. Yuꞌun maꞌuc noꞌox scꞌopilal stuquic. Yuꞌun tsta yorail tstsꞌaqui ti coꞌol chquichꞌtic jcotoltic xchiꞌuc.
\c 12
\s Jaꞌ scꞌopilal ti scꞌan ti te oy jsatic ti stojol ti Jesuse
\p
\v 1 Yuꞌun caꞌyojbetic scꞌopilal ti ep ti muchꞌutic jun yoꞌntonic ti stojol ti Diose iꞌechꞌic liꞌ ti balumile, hech yuꞌun acꞌo jtsꞌaclitic. Jaꞌ lec ti jcomestic scotol ti cꞌutic chispajesucutique xchiꞌuc ti mulile ti bu chispajesucutic chcaꞌitic ti jujunucutique. Jun coꞌntontic acꞌo anilajucutic hech chaj cꞌu cheꞌel ti muchꞌutic tstsal sbaic ti anile.
\v 2 Scꞌan ti te oy jsatic ti stojol ti Jesuse. Yuꞌun jaꞌ laj yacꞌbucutic ti xchꞌunojel coꞌntontique asta chcꞌo yacꞌbucutic scotol ti slajeb. Jaꞌ laj stsꞌic svocol ti cruz. Mu tsotsuc scꞌopilal laj yaꞌi ti iꞌacꞌat ti qꞌuexlal yuꞌun laj snaꞌ ti más nichim noꞌox yoꞌnton patil. Ti ora to te xa nacal ti sbatsꞌicꞌob ti Diose yoꞌ bu tspas mantal ti Diose. Te pasbil xa ti mucꞌ ti Jesuse.
\p
\v 3 Mu me xchꞌay ti avoꞌntonic ti ep itsꞌic yuꞌun contrainel yuꞌun icontrainat yuꞌun jmulaviletic ti scoj jmultic, hech mu xlaj yip avoꞌntonic, hech mu xchibaj avoꞌntonic mi hech chacontrainat.
\v 4 Ti hoꞌoxuque mu to chalajic ti milel yuꞌun ti chacontrainic ti mulile.
\v 5 ¿Mi ichꞌay xa ti avoꞌntonic ti taqꞌuibilucutic hech chaj cꞌu cheꞌel chichꞌic taqꞌuiel ti col jnichꞌontique? Yuꞌun hech albilucutic:
\q Nichꞌon, paso me ti mucꞌ mi chayacꞌbot acial ti Cajvaltique yuꞌun chapꞌijub.
\q Mu me xchibaj avoꞌnton yuꞌun ti chayacꞌbot aciale.
\q
\v 6 Yuꞌun ti Cajvaltique chacꞌbe acial scotol ti muchꞌutic cꞌux ti yoꞌntone yuꞌun acꞌo pꞌijubuc.
\q Chijyacꞌbucutic acial jcotoltic, hoꞌucutic ti yol snichꞌonucutique ti laj xa yicꞌucutic ti stojole yuꞌun acꞌo tojobucutic,
\m ti xchie.
\v 7 Yuꞌun mi laj xa yacꞌboxuc acial ti Diose yuꞌun chapꞌijubique, yuꞌun yol snichꞌonoxuc ti Diose obi. ¡Bu xavil ti nichꞌonile ti mu xichꞌ acial yuꞌun stot ti muchꞌu mu xpꞌijube!
\v 8 Mi mu xayacꞌboxuc acial yuꞌun ti hech chapꞌijubique hech chaj cꞌu cheꞌel chacꞌbe scotol xnichꞌnab, yuꞌun maꞌuc atot obi. Hoꞌoxuque yuꞌun mu yol snichꞌonucot cheꞌe.
\v 9 Ti jtotic liꞌ ti balumile yuꞌun ti laj xa yacꞌbucutic acial yuꞌun ti hech chijpꞌijubucutique, hech laj jpastic ti mucꞌ. ¿Mi maꞌuc lec ti echꞌem ti jchꞌuntic ti cꞌutic chijyalbucutic ti Jtotic ti laj yacꞌbucutic jchꞌuleltique yuꞌun hech chijcuxiucutic sbatel osil?
\v 10 Ti jtotic liꞌ ti balumile atabil noꞌox cꞌacꞌal laj yacꞌbucutic acial, jaꞌ noꞌox ti cꞌu yepal laj snaꞌique, laj yilique. Jaꞌuc ti Jtotic ti vinajele scotol snaꞌ ti cꞌu yepal chijyacꞌbucutique. Hech yuꞌun ti hech chijyacꞌbucutic aciale, jaꞌ sventa cutsilaltic sbatel osil. Yuꞌun hech toj coꞌntontic chijcꞌot hech chaj cꞌu cheꞌel toj yoꞌnton.
\v 11 Cꞌux chcaꞌitic ti aciale hech yuꞌun mu jcꞌantic. Scotol ti muchꞌu lec tstsꞌic yuꞌune, jaꞌ chlamantasbat ti yoꞌntone, hech chtojob ti yoꞌntone.
\s Jaꞌ tsots scꞌopilal ti jchꞌuntic ti cꞌutic chijyalbucutic ti Diose ti jaꞌ yacꞌoj sba chiscꞌoponucutic ti ora to
\p
\v 12 Hech yuꞌun mi muꞌyuc avip chavaꞌi, más tsots me xapas abaic.
\v 13 Toj me chanopic hech mu xajoviic. Hech ch-an yipic uc ti muchꞌu más muꞌyuc yipique. Hech chalecubic acotolic.
\p
\v 14 Jaꞌ me xacꞌan ti jun avoꞌntonic ti stojol scotol crixchanoetic. Jaꞌ me xacꞌan uc ti toj avoꞌntonic scotol ora. Yuꞌun mi muꞌyuc yutsil coꞌntontique, mu stacꞌ chba jqꞌuelbetic sat ti Cajvaltique.
\v 15 Qꞌuelic lec mi oy muchꞌu tscꞌan chchibaj yoꞌnton hech mu sta ti yutsil yoꞌnton ti chijyacꞌbucutic ti Diose. Coltaic me. Yuꞌun mi mu xchꞌay ti coꞌntontic ti cꞌutic cꞌotem ti pasel hech chbolib ti coꞌntontique. Hech chbolib yoꞌntonic yan quermanotic uc.
\v 16 Junuc me avoꞌntonic ti stojol ti Diose acotolic. Mu me hechuc avoꞌntonic ti muꞌyuc Dios ti avoꞌnton hech chaj cꞌu cheꞌel ti Esaue. Jaꞌ ti scoj jutuc noꞌox veꞌelil laj sjel ti bendicione ti scꞌopilal jaꞌ chichꞌ stuque yuꞌun jaꞌ banichꞌonil.
\v 17 Caꞌyojtic ti patil ti scꞌan ti acꞌo sutesbatuc tal ti bendicione, mu xa xꞌacꞌbat. Muc xuꞌ yuꞌun laj sutes xa yoꞌnton. Hovil ti laj yocꞌta sba yuꞌun.
\p
\v 18 Naꞌic me ti maꞌuc nanopejic tal ti stojol ti bu puru xiꞌel chavaꞌyique. Naꞌic ti jaꞌ nanopejic tal ti stojol ti bu jun noꞌox yutsil scotol yuꞌun te chcꞌo avichꞌic. Yuꞌun maꞌuc nanopejic tal ti stojol ti vits ti muc stacꞌ ti inopejic batel ti stojol ti jtatamoltique ti voꞌone yoꞌ bu itil ti cꞌoqꞌue, yoꞌ bu iꞌicꞌub ti osile ti sjoylejale, yoꞌ bu oy tselov xchiꞌuc icꞌ xchiꞌuc chavuc,
\v 19 yoꞌ bu iꞌocꞌ corneta, yoꞌ bu icꞌopoj ti Diose. Scotol ti jtatamoltique ti laj yaꞌibeic ti scꞌope laj scꞌambeic vocol ti mu xa me xcꞌoponat hech yan vuelta.
\v 20 Yuꞌun muc xcuch yuꞌunic ti hech ipasatic ti mantale: “Mu me xanopejic tal ti stojol ti vits liꞌto. Manchuc mi acaꞌ, mi avacax, mi acarnero, ti chnopej talel ti stojol ti vits liꞌto, ta me xꞌacꞌbat ton, ta me xmilat”, ti xꞌutatic yuꞌun ti Diose.
\v 21 Puru ixiꞌic cꞌalal laj sqꞌuelique. Hech laj yal uc ti Moisese: “Chixiꞌ ti jyalel yuꞌun”, xchi.
\p
\v 22 Naꞌic me ti jaꞌ nanopejic tal ti stojol ti vits Sión xchiꞌuc ti mucꞌta jteclum smeltsanoj ti Diose ti stalel cuxule, jaꞌ ti achꞌ Jerusalene, jaꞌ ti te oy ti vinajele, jaꞌ ti te yacꞌoj sba chismalaucutic ep ti mil ti chꞌul abatetique.
\v 23 Te pꞌejambil sbi scotol ti jaylajunvoꞌ snichꞌonucutic ti Diose yuꞌun te onoꞌox chijcꞌotucutic. Te oy ti Diose ti jaꞌ toj chchapanvane. Te oy uc ti xchꞌulelic ti muchꞌutic icolic xae, jaꞌ ti toj yoꞌntonic xae.
\v 24 Te oy uc ti Jesuse jaꞌ ti sventa ti oy ti achꞌ tratoe. Te oy uc ti xchꞌichꞌel ti Jesuse jaꞌ ti nijpocbat jmultic yuꞌune. Ti imal xchꞌichꞌel ti Abele acꞌo acꞌbatuc castigo ti muchꞌu hech laj spase. Ti imal xchꞌichꞌel ti Jesuse acꞌo pasbatuc perdón ti muchꞌu hech laj spase.
\p
\v 25 Pꞌijanic me, mu me xapꞌajic ti cꞌutic cheꞌel chijyalbucutic ti ora to ti Diose. Mi muc xcolic ti jtatamoltique yuꞌun ti muc spasbeic ti mucꞌ ti scꞌop ti totil yuꞌunique liꞌ ti balumile, jaꞌ ti Moisese, ¡bu cꞌamba colucutic ti hoꞌucutique mi mu jpasbetic ti mucꞌ ti scꞌop ti Jtotic cuꞌuntique ti yacꞌoj sba chistaqꞌuiucutic tal cꞌalal ti vinajel ti ora to!
\v 26 Cꞌalal icꞌopoj ti voꞌonee, inic ti balumile. Ti ora to hech yaloj, jpꞌel scꞌopilal chcꞌot ti pasel: “Jun xa vuelta chnic cuꞌun ti balumile. Maꞌuc noꞌox ti balumile, jaꞌ chnic uc ti vinajele”, xchi.
\v 27 Yuꞌun “jun xa vuelta”, ti xchie, yuꞌun jaꞌ chal ti chjinat scotol ti cꞌutic stacꞌ chjinat ti pasbil yuꞌune. Hech yuꞌun jaꞌ noꞌox chcom ti cꞌutic mu stacꞌ chjinat yuꞌune.
\v 28 Yuꞌun hoꞌucutic jcꞌopilaltic jaꞌ chijyacꞌbucutic te ti jpastic mantal ti bu mu xjinate, jaꞌ lec ti yutsil coꞌntontic acꞌo tunucutic yuꞌun ti Diose, acꞌo calbetic vocol ti Diose, acꞌo jpastic ti mucꞌ.
\v 29 Yuꞌun ti Dios cuꞌuntique jaꞌ hech chaj cꞌu cheꞌel cꞌocꞌ ti xuꞌ chchicꞌ scotol.
\c 13
\s Jaꞌ scꞌopilal ti jaꞌ lec yoꞌnton ti Diose mi cꞌux chcaꞌi jbatique
\p
\v 1 Scotol cꞌacꞌal cꞌux me xavaꞌi abaic hoꞌoxuc ti avermano abaique ti sventa Cristo.
\v 2 Mu me xchꞌay ti avoꞌntonic ti tscꞌan ti chacꞌuxubin ti muchꞌutic ti mu xavojtiquinique. Yuꞌun oy muchꞌu hech laj spas, oy bu jaꞌ chꞌul abat laj yicꞌ ochel ti snaic. Jaꞌto patil laj snaꞌic.
\p
\v 3 Naꞌic me ti muchꞌutic ochemic ti chuquele. Yuꞌun mi cꞌux chavaꞌyique, coꞌol achiꞌinoj abaic ti vocol xchiꞌuc. Oyuc me ti avoꞌntonic ti muchꞌutic chichꞌic ilbajinele yuꞌun chanaꞌic ti vocol chcuch avuꞌunic uc.
\p
\v 4 Yuꞌun ti nanupunique, paso me ti mucꞌ. Jun vinic chicꞌ sbaic xchiꞌuc jun ants mu muliluc. Maꞌuc mulil ti chchiꞌin sbaique. Ti muchꞌutic chmulivajique manchuc mi yiloj smalal, mi mu yilojuc smalal, coꞌol mulil. Ta onoꞌox xꞌichꞌbatic scꞌopic yuꞌun smulic yuꞌun ti Diose ti muchꞌutic hech tspasique.
\p
\v 5 Mu me xbicꞌtaj avoꞌntonic yuꞌun taqꞌuin. Nichimuc me avoꞌntonic yuꞌun ti cꞌutic oy avuꞌune yuꞌun hech yalojbucutic ti Diose: “Mu xajcomesot. Scotol cꞌacꞌal chajchiꞌinot”, xijyutucutic.
\v 6 Hech yuꞌun xuꞌ jamal xuꞌ chcaltic:
\q Jaꞌ Jcoltavanej cuꞌun ti Cajvaltique, muc un chixiꞌ. Mu stacꞌ xiyutun ti crixchanoetique, xijchi.
\p
\v 7 Naꞌic me ti muchꞌutic sventainojoxuque, jaꞌ ti laj xcholboxuc avaꞌyic ti scꞌop Diose. Yuꞌun chavilic ti lec chloqꞌuic stuquic yuꞌun oy xchꞌunojel yoꞌntonic, hech yuꞌun chambo yoꞌntonic.
\p
\v 8 Yuꞌun ti Jesucristoe mu xjel ti yoꞌntone. Hech chac cꞌu cheꞌel yoꞌnton volje, jaꞌ noꞌox hech ti ora to, jaꞌ noꞌox hech sbatel osil.
\v 9 Mu me xachꞌayic ti be yuꞌun yan cꞌop chavaꞌyic. Yutsil yoꞌnton chijyacꞌbucutic yip coꞌntontic ti Diose. Maꞌuc ti jtatic yip coꞌntontic yuꞌun ti cꞌutic ti jlajestic ti jujunucutique. Yuꞌun mi jutuc mu xlecubtasbat yoꞌntonic ti muchꞌutic tsots scꞌopilal chaꞌyic ti cꞌutic ti jveꞌtic ti jujunucutique.
\p
\v 10 Ti voꞌone muꞌyuc muchꞌu laj stiꞌbe sbecꞌtal ti carneroetic ti vacaxetique ti imilat yuꞌun sventa chchꞌaybat smulic scotol ti jtatamoltique xchiꞌuc ti paleetic yuꞌunique. Jaꞌ noꞌox hech ti ora to muꞌyuc scꞌopilal ti cꞌutic ti jveꞌtique. Jaꞌ noꞌox mi jchꞌunojtic ti laj yacꞌ sba ti milel cuꞌuntique ti Cajvaltique, jaꞌ chijcolucutic.
\v 11 Ti xchꞌichꞌel ti carneroetic ti vacaxetic ti imilate, jaꞌ laj yichꞌ ochel ti jelaven chꞌul cuarto ti totil palee sventa stojol smulic. Ti sbecꞌtalic ti carneroetic ti vacaxetique laj yichꞌic batel nom to. Ba xchiqꞌuic. Mu teuc noꞌox laj xchiqꞌuic ti bu inaquiique.
\v 12 Jaꞌ noꞌox hech uc mu teuc icham ti yut jteclum ti Jesuse. Jaꞌ te ba yichꞌ vocol yechꞌel jteclum. Jaꞌ hech itoj ti jmultique ti sventa xchꞌichꞌel stuc.
\v 13 Hech yuꞌun ti hoꞌucutique jaꞌ acꞌo ba jtatic ti Jesuse. Acꞌo jcomestic ti poco mantal ti jchꞌunojtique ti chijcolucutic yuꞌun laj jcuytique. Acꞌo jtsꞌictic labanel hech chaj cꞌu cheꞌel laj stsꞌic labanel ti Jesuse.
\v 14 Yuꞌun mu jꞌechꞌeluc chijnaqui liꞌ ti balumil liꞌto. Hech yuꞌun ti jmalatic chtal ti mucꞌta jteclum yuꞌun te chijnaqui o.
\v 15 Hech yuꞌun scotol cꞌacꞌal jaꞌ smoton Dios acꞌo cꞌotuc cuꞌuntic ti lec chcalbetic scꞌopilal. Jamal acꞌo caltic ti jpasojtic ti muqꞌue.
\v 16 Mu me xchꞌay ti avoꞌntonic ti tscꞌan ti chacꞌuxubinvanique. Tscꞌan ti chacolta yan xchiꞌuc ti cꞌutic oy avuꞌunique. Yuꞌun jaꞌ hech smoton tscꞌan ti Diose. Jaꞌ lec yoꞌnton yuꞌun.
\p
\v 17 Chꞌumbeic smantal ti muchꞌutic sventainojoxuque ti stojol ti Diose. Pasbo ti mucꞌ scꞌopic. Yuꞌun yacꞌoj sba chaxchabibot achꞌulelic yuꞌun tsnaꞌic ti ta onoꞌox chcꞌo jacꞌbatuc. Nichimuc me yoꞌntonic avuꞌunic acꞌo spasic hech. Mu me xavacꞌbe yichꞌ mul avuꞌunic. Mu yuꞌunuc hech más chlecub avoꞌntonic mi hech chavacꞌbe yichꞌ mul.
\p
\v 18 Cꞌopombun Dios ti jtojoltutic. Jchꞌunojtutic ti lec coꞌntontutic ti stojol ti Diose yuꞌun scotol ora ti jcꞌan ti jpastutic lequil abtel.
\v 19 Hech chacalbe vocol yuꞌun ti chacꞌoponic Dios ti jtojol yuꞌun hech ti ora chichaꞌsut tal yan vuelta ti yoꞌ bu oyoxuque.
\s Hech laj yoꞌnton laj scꞌopon ti carta ti quermanotique
\p
\v 20-21 Ti Diose ti chijyacꞌbucutic jun coꞌntontique, ti laj xchaꞌcuses loqꞌuel ti chꞌen ti Cajvaltic Jesucristoe, jaꞌ ti lequil jqꞌuelcarnero cuꞌuntique, ti sventa ti xchꞌichꞌel yuꞌun ti tratoe ti chcom sbatel osile, chascoltaoxuc yuꞌun hech chapasic scotol lequil abtel. Hech chapasic cꞌusi tscꞌan ti yoꞌntone. Jaꞌ chayacꞌboxuc ti avoꞌntonic ti Diose ti sventa ti Jesucristoe ti cꞌusi lec yoꞌnton yuꞌun. Hech yuꞌun tspasat ti mucꞌ sbatel osil. Jun yutsil ti hech chcꞌot ti pasel.
\p
\v 22 Quermanotac, avocoluc pasic me ti mucꞌ ti hech chajtaqꞌuioxuque yuꞌun mu epuc laj jtsꞌibaboxuc.
\v 23 Chacalbeic uc ti icol xa loqꞌuel tal ti chuquel ti quermanotic Timoteoe. Mi ital ti ora, te chtal jqꞌueloxuc jchaꞌvaꞌaltutic.
\p
\v 24 Chabanuc scotol ti muchꞌutic sventainojoxuque ti stojol ti Diose xchiꞌuc scotol ti muchꞌutic coꞌol oyucutic ti stojol ti Diose xchiꞌuque. Chabanucot la xal uc ti quermanotic ti liquemic tal ti Italiae.
\p
\v 25 Acꞌo yacꞌboxuc bendición ti Diose acotolic.