\id 1PE

\h 1 PEDRO
\toc1 1 PEDRO
\mt JAꞌ TI SBA SCARTA TI PEDROE TI LAJ STSꞌIBAE
\c 1
\s Hech lic scꞌopon ti carta ti quermanotique ti Pedroe
\p
\v 1 Hoꞌon Pedroun, hoꞌon jcholcꞌopun yuꞌun ti Jesucristoe, chajcꞌoponoxuc ti carta, hoꞌoxuc ti nomtic to nacaloxuque ti ora to te ti estado Ponto xchiꞌuc ti estado Galacia xchiꞌuc ti estado Capadocia xchiꞌuc ti estado Asia xchiꞌuc ti estado Bitinia,
\v 2 hoꞌoxuc ti tꞌujbiloxuc yuꞌun ti Diose yuꞌun chalumalinic vinajel uc. Yuꞌun voꞌone hech snopoj ti yoꞌnton ti Jtotic Diose. Hech yuꞌun ti Chꞌul Espíritue laj xa stꞌujoxuc loqꞌuel te ti oꞌlol ti crixchanoetique, hech yuꞌun laj xa achꞌumbeic scꞌop ti Jesucristoe. Hech yuꞌun napocbat avoꞌntonic ti xchꞌichꞌel ti Jesucristoe, hech yuꞌun chacolic. Echꞌem to acꞌo yacꞌboxuc ep bendición ti Diose. Echꞌem to acꞌo yacꞌboxuc jun avoꞌntonic ti jujunoxuque.
\s Jaꞌ scꞌopilal ti cꞌu xꞌelan ti achꞌ jcuxlejaltic ti quichꞌojtique
\p
\v 3 Hocol yalbucutic ti Diose, jaꞌ ti Stot ti Cajvaltic Jesucristoe, yuꞌun lum ep laj xcꞌuxubinucutic, hech yuꞌun laj yacꞌbucutic achꞌ jcuxlejaltic. Hech ti jnaꞌtic ti cuxulucutic sbatel osil yuꞌun ichaꞌcuxi loqꞌuel ti chꞌen ti Jesucristoe.
\v 4 Yuꞌun snichꞌonucutic ti Diose nijcꞌot xa, hech yuꞌun ti Jtotique chijyacꞌbucutic quichꞌtic jcuxlejaltic ti mu soque, ti puru leque, ti mu snaꞌ chlaje. Jaꞌ sqꞌuejojbucutic te ti vinajel ti Jtotique.
\v 5 Yuꞌun jchꞌunojtic ti chiscoltaucutique, hech yuꞌun chixchabiucutic ti Diose asta tsta yorail ti chijcolucutique. Jelaven spꞌijil ti Diose hech yuꞌun xuꞌ chixchabiucutic. Chapajem xa ti chijcolucutique. Jaꞌto mi laj sta yorail ti slajebal cꞌacꞌale jaꞌto ti jqꞌueltic.
\p
\v 6 Hech yuꞌun nichim noꞌox avoꞌntonic manchuc mi ep ti tos ti vocole ti chavichꞌique liꞌi mi hech tscꞌan ti Diose. Yuꞌun jꞌocꞌ noꞌox liꞌ cuxulucutic ti balumile, hech yuꞌun jꞌocꞌ noꞌox chquichꞌtic ti vocole.
\v 7 Naꞌic me ti cꞌanal taqꞌuine chticꞌat ti cꞌocꞌ, te chvinaj mi melel ti jaꞌ ti cꞌanal taqꞌuine. Jaꞌ noꞌox hech uc ti hoꞌoxuque cꞌalal chavichꞌic ti vocole, te chvinaj mi oy xchꞌunojel avoꞌntonic. Ti cꞌanal taqꞌuine jaꞌ más lec liꞌ ti balumile pero snaꞌ chlaj. Ti xchꞌunojel coꞌntontique jaꞌ mu snaꞌ chlaj sbatel osil. Hech yuꞌun cꞌalal chchaꞌsut tal ti Jesucristoe, mi icuch avuꞌunic ti vocole yuꞌun oy xchꞌunojel avoꞌntonic hech lec acꞌopilalic chcꞌot, lec chayiloxuc ti Diose, chayacꞌoxuc ti pasel ti mucꞌ.
\p
\v 8 Manchuc mi mu aqꞌuelojbuc sat ti Jesucristoe, cꞌux ti avoꞌntonic. Manchuc mi mu to chaqꞌuelbeic sat ti ora to, achꞌunojbeic xa scꞌop. Hech yuꞌun jelaven nichim avoꞌntonic. Mu xa xanaꞌbe yalel yuꞌun oy yutsil ti jyalel.
\v 9 Yuꞌun chanaꞌic ti yuꞌun oy xchꞌunojel avoꞌntonique, hech chacolic sbatel osil.
\p
\v 10-11 Ti jtatamoltutique, jaꞌ ti itꞌujatic yuꞌun ti Diose ti ichꞌamumbatic yeique ti voꞌone, laj yalic ti tsta yorail ti hech chquichꞌtic cꞌuxubinel yuꞌun ti Diose. Toyol yoꞌntonic laj sjacꞌbeic ti Diose cꞌusi ora chcꞌot ti pasel ti cꞌusi iꞌalbatic ti yoꞌntonique yuꞌun ti Espíritu yuꞌun ti Cristoe. Scꞌan chaꞌyic uc cꞌu cheꞌel tsnaꞌic ti cꞌalal poꞌot xa chcꞌot ti pasele. Yuꞌun scꞌan to ep habil ti mu to chtal ti Jcoltavaneje ti cꞌalal laj yalique. Yuꞌun jaꞌ laj yalbeic scꞌopilal ti Cristoe ti cꞌu cheꞌel chtal yichꞌ vocole, ti tspasat ti mucꞌ ti patile.
\v 12 Cꞌalal yacꞌoj sba chcholbeic scꞌopilal jcoleltic ti voꞌonee, iꞌacꞌbatic snaꞌic yuꞌun ti Diose ti mu sqꞌuelic stuquic. Jaꞌ noꞌox laj xcholbucutic jcꞌopilaltic ti hoꞌucutic ti jqꞌueltique. Ti muchꞌutic laj xcholboxuc avaꞌyic ti lequil achꞌ cꞌope ti jaꞌto noꞌoxe, yuꞌun iventaimbat yoꞌntonic yuꞌun ti Chꞌul Espíritue ti itacat yal tal ti vinajele, hech yuꞌun laj xa yalboxuc ti chacolique ti sventa ti Cristoe hech chaj cꞌu cheꞌel laj yal ti jꞌalcꞌopetique ti voꞌonee. Scꞌan chaꞌibeic sjam uc ti chꞌul abatetique ti cꞌu yuꞌun laj yichꞌ sbecꞌtal laj yichꞌ svocol ti Cajvaltique. Mu xuꞌ chaꞌibeic sjam yuꞌun muꞌyuc sbecꞌtalic.
\s Jaꞌ scꞌopilal ti tscꞌan ti Diose ti toj coꞌntontique
\p
\v 13 Hech yuꞌun tscꞌan ti jꞌechꞌel chapalucoxuc hech mu xalajic ti tsalel. Oyuc me lec arazonic. Jꞌechꞌel chꞌunic ti jun noꞌox yutsil chacꞌotic cꞌalal chchaꞌsut tal ti Jesucristoe.
\v 14 Yuꞌun snichꞌonoxuc ti Diose, jaꞌ tscꞌan ti chachꞌumbeic smantale. Mu me xachꞌun ti cꞌusi tscꞌan ti abecꞌtalique hech chaj cꞌu cheꞌel laj apasic ti voꞌone ti cꞌalal mu to xavojtiquinic ti Diose.
\v 15 Yuꞌun toj yoꞌnton ti Diose ti laj xa yicꞌoxuc ti stojole, hech yuꞌun jaꞌ tscꞌan ti toj scotol ti cꞌutic chapase, ti cꞌutic chavale.
\v 16 Yuꞌun hech tsꞌibabil comel ti scꞌop ti Diose: “Tojuc me avoꞌntonic ti jtojol yuꞌun toj coꞌnton ti hoꞌone”, xchi ti Diose.
\p
\v 17 Yuꞌun ti chatotinic ti Diose ti jaꞌ chijyichꞌbucutic jcꞌoptic ti sventa cꞌu xꞌelan cabteltic jujunucutique, jaꞌ ti muꞌyuc muchꞌu chcꞌuxubin, jaꞌ ti toj chixchapanucutic jcotoltique, hech yuꞌun pasic me ti mucꞌ yuꞌun mu to chacꞌotic ti bu mero alumalique, jaꞌ ti vinajele.
\v 18 Yuꞌun chanaꞌic ti toyol stojol laj smanoxuc ti Diose yuꞌun hech libre nacꞌotic yuꞌun ti cꞌutic laj xchanubtasoxuc comel ti atot ameꞌique, jaꞌ ti chijcolucutic yuꞌun cabteltic ti laj scuyique. Chanaꞌic ti maꞌuc laj smanoxuc ti cꞌusi chlaje. Mu ti taqꞌuinuc laj smanoxuc.
\v 19 Jaꞌ laj smanoxuc ti xchꞌichꞌel ti Cristoe. Jaꞌ imilat hech chaj cꞌu cheꞌel imilat ti carneroe ti voꞌone. Hech chaj cꞌu cheꞌel muꞌyuc xchamel ti carnero ti imilate ti voꞌone, jaꞌ noꞌox hech uc ti Cristoe toj yoꞌnton, muꞌyuc smul.
\v 20 Hech xchapanoj ti Diose cꞌalal mu to chmeltsaj ti balumile. Jaꞌto noꞌox ital liꞌ ti balumile ti Jesucristoe. Jaꞌ ti jventatic ti itale yuꞌun cꞌuxucutic ti yoꞌnton.
\v 21 Ti Diose laj xchaꞌcuses loqꞌuel ti chꞌen ti Jesucristoe. Patil laj yicꞌ ti stojol. Yuꞌun ti hech laj scolta ti Snichꞌone, hech yuꞌun chachꞌunic ti hech chascoltaoxuc uc ti Diose.
\p
\v 22 Yuꞌun ti sventa ti Chꞌul Espíritue ti achꞌunojbeic ti scꞌope ti jaꞌ melele, hech yuꞌun lecuben xa ti avoꞌntonique. Hech yuꞌun cꞌux chavaꞌyic ti quermanotique ti mero melel, maꞌuc noꞌox ti acꞌopic. Hech yuꞌun scotoluc me avoꞌntonic ti cꞌux chavaꞌi abaique. Mi jutuc mu me xavilinta abaic.
\v 23 Yuꞌun maꞌuc yol snichꞌonoxuc ti muchꞌu snaꞌ chchame, jaꞌ yol snichꞌonoxuc ti Diose ti mu snaꞌ chchame yuꞌun chaꞌanemoxuc xa ti sventa ti scꞌop ti Diose. Oy yip ti scꞌop ti Diose. Sbatel osil mu snaꞌ chlaj ti scꞌop ti Diose.
\p
\v 24 Hech tsꞌibabil ti scꞌop ti Diose:
\q Ti crixchanoetique jaꞌ hech chaj cꞌu cheꞌel jobel ti ora noꞌox chtaquije, ti mu xhaleje.
\q Altic ti tscꞌan ti tspasatic ti muqꞌue.
\q Jꞌocꞌ noꞌox lec ch-ilat hech chaj cꞌu cheꞌel ti xnichimal ti jobele ti tꞌujum ch-ilate ti ora noꞌox chlileje.
\q
\v 25 Ti scꞌop ti Diose, jaꞌ sbatel osil mu snaꞌ chlaj,
\m ti xchie. Jaꞌ ti lequil achꞌ cꞌope ti nacholbat xae.
\c 2
\p
\v 1 Hech yuꞌun acꞌo me comuc avuꞌunic scotol ti cꞌusi chopole. Mu xa me xaloꞌlavan, mu xa me xanop cꞌop, mu xa me xapas biqꞌuit avoꞌntonic, mu xa me xanopbe smul yantic.
\v 2 Hech chaj cꞌu cheꞌel tscꞌanilan xchuꞌ ti olole ti jaꞌto noꞌox iꞌane, jaꞌ lec ti hech xacꞌanilanic ti scꞌop ti Diose yuꞌun jaꞌ sventa avoꞌntonic. Mu xasloꞌlaoxuc. Yuꞌun mi chaveꞌelinic ti scꞌop ti Diose, hech ch-an stsatsal avoꞌntonic, hech chacolic.
\v 3 Xanaꞌic ti oy yutsil yoꞌnton avuꞌunic ti Cajvaltique.
\s Jaꞌ scꞌopilal ti jun nijcꞌot xchiꞌuc ti Cajvaltique hech chijtun yuꞌun ti Diose
\p
\v 4 Yuꞌun naꞌicꞌatic tal ti stojol, yuꞌun chatunic ti stojol ti Diose. Hech chaj cꞌu cheꞌel ti tone ti ch-ichꞌat tal yuꞌun chtun yuꞌun ti jpasnae. Ti jpasnae jbael chacꞌ ti tone ti chiquina yuꞌun jaꞌ tsots scꞌopilal. Patil chlic yotesbe xchiꞌil hech tsmeltsaj ti snae. Jaꞌ hech ti Diose. Ti ton ti jbael laj yacꞌ ti chiquina, jaꞌ ti Cajvaltique. Manchuc mi muc xcꞌanat yuꞌun ti crixchanoetique ti Cajvaltique, jaꞌ tꞌujbil yuꞌun ti Diose. Jun noꞌox yutsil iꞌilat yuꞌun ti Diose. Jaꞌ más tsots yabtel iꞌacꞌbat ti Cajvaltique yuꞌun jaꞌ ti sventa ti chijcuxi sbatel osile.
\v 5 Ti xchiꞌil ti ch-otesate, jaꞌ hoꞌucutic obi. Yuꞌun ti laj xa yicꞌucutique, hech chvinaj ti yacꞌoj sba ti abtel ti Diose liꞌ ti balumile. Jaꞌ tscꞌan ti Diose ti chatunic yuꞌune hech chaj cꞌu cheꞌel itunic yuꞌun ti Diose ti paleetic ti voꞌonee ti jaꞌ yabtel laj sjelavesbeic smoton ti Diose ti laj yacꞌ ti xchiꞌiltaque. Ti hoꞌucutique mu xa hechuc ti jpastic hech chaj cꞌu cheꞌel laj spasic ti voꞌone. Jaꞌ chcacꞌbetic yuꞌun chisventaimbucutic coꞌntontic ti Jesucristoe hech chijtun yuꞌun ti Diose. Hech lec chijyilucutic ti Diose ti sventa ti Jesucristoe.
\v 6 Yuꞌun hech tsꞌibabil comel ti scꞌop ti Diose:
\q Te ti jteclum Sión, jaꞌ ti Jerusalene, te chcacꞌ ti muchꞌu tꞌujbil cuꞌune, jaꞌ ti muchꞌu más tsots yabtele.
\q Jun noꞌox yutsil chquil.
\q Scotol ti muchꞌutic chchꞌunic ti jaꞌ chcoltaatic yuꞌune jaꞌ lec chquil,
\m xchi ti Diose. Jaꞌ scꞌopilal ti Jesucristoe.
\v 7 Jaꞌ jun noꞌox yutsil chavilic uc hoꞌoxuque ti achꞌunojique. Mu hechuc chilic ti muchꞌutic mu xchꞌunojuque. Hech chal ti scꞌop ti Diose:
\q Jaꞌ hech chaj cꞌu cheꞌel ti yajval nae ti laj yotes ti chiquina ti tone ti mu xtun laj yilic ti yajꞌabtele,
\m ti xchie. Jaꞌ scꞌopilal ti Jesucristoe. Yuꞌun jaꞌ más tsots yabtel yichꞌoj ti muchꞌu mu scꞌanique. Jaꞌ mu xcꞌanvanic ti muchꞌutic tspasbeic yabtel Dios ti scuyojique.
\v 8 Hech chal uc ti scꞌop ti Diose:
\q Jaꞌ hech chaj cꞌu cheꞌel ti muchꞌu tspꞌosi yacan chpꞌaj ti lum,
\q chcꞌo smaj sba ti ba ton,
\m ti xchie. Yuꞌun mu spas ti mucꞌ ti jaꞌ Jcoltavanej cuꞌuntic ti Jesucristoe, hech mu xchꞌumbeic scꞌop ti Diose. Jaꞌ noꞌox tsaꞌilan smulic asta chcꞌo yichꞌic vocol. Snaꞌoj onoꞌox ti Diose ti mu xchꞌunique.
\s Jaꞌ scꞌopilal ti jun noꞌox yutsil yuꞌun ti laj yicꞌucutic ti stojol ti Diose
\p
\v 9 Ti hoꞌucutique, yuꞌun laj xa stꞌujucutic ti Diose, hech yuꞌun jun noꞌox jtsꞌumbaltic nijcꞌot xa jcotoltic. Paleucutic cꞌotemucutic jaꞌ cabteltic chcalbetic ti jchiꞌiltique ti tojbil xa smulic yuꞌun ti Cajvaltique. Jun noꞌox ti ajvalil cuꞌuntique ti smacojucutic jcotoltique ti hoꞌucutic ti jchꞌunojbetic ti scꞌope. Stuc sventainojucutic ti Diose. Yuꞌun ti hech laj xa spasbucutic ti Diose yuꞌun ti jpucbetic scꞌopilal ti jelaven yutsil ti yabtele. Jaꞌ ti laj xa sloqꞌuesucutic ti icꞌ osil, jaꞌ ti mulile, laj xa yacꞌucutic ti squeval cꞌacꞌal, jaꞌ ti nijꞌoch xa ti utsilale yuꞌun laj xa yicꞌucutic ti stojol.
\v 10 Ti voꞌone mu laj jnaꞌtic ti chixchabiucutic ti Diose. Tana to ti jnaꞌtic ti chixchabiucutique. Ti voꞌone mu laj jnaꞌtic ti chixcꞌuxubinucutic ti Diose. Tana to ti jnaꞌtic ti chixcꞌuxubinucutique.
\s Jaꞌ scꞌopilal ti acꞌo cacꞌtic ti qꞌuelel ti hoꞌucutic yabatucutic ti Diose
\p
\v 11 Hoꞌoxuc ti cꞌuxoxuc ti coꞌntone, hech chacalbeic ti ora to. Ti hoꞌucutique mu jlumalticuc ti balumil avi to. Jaꞌ jlumaltic ti vinajele. Yuꞌun hech tscꞌan ti Diose ti liꞌto oyucutique, hech yuꞌun mu me jchꞌuntic ti cꞌusi tscꞌan ti jbecꞌtaltique yuꞌun ti jbecꞌtaltique tscontrain ti coꞌntontique.
\v 12 Tojuc me scotol ti cꞌutic chapasique ti stojol ti crixchanoetique. Manchuc mi “mu xtun ti cꞌusi tspasique”, manchuc mi xchi acꞌopilalic ti ora to, patil chlic yilic ti lec avabtelique. Hech yuꞌun chlic xchꞌumbeic scꞌop ti Diose cꞌalal chtijbat yoꞌntonic yuꞌun ti Diose.
\p
\v 13 Chꞌumbeic smantal ti muchꞌutic oy yabtelic liꞌ ti balumile hech lec chbat scꞌopilal avuꞌunic ti Cajvaltique. Chꞌumbeic smantal ti totil ajvalile yuꞌun jaꞌ tsots yabtel yichꞌoj.
\v 14 Chꞌumbeic uc smantal ti yajgobernadoretique yuꞌun jaꞌ yabat ti totil ajvalile. Jaꞌ yabtelic chacꞌbe castigo ti muchꞌutic tsta smulique, chalbe lec scꞌopilal ti muchꞌutic lec yabtelique.
\v 15 Yuꞌun jaꞌ tscꞌan ti Diose ti lec scotol ti cꞌutic chapasique yuꞌun hech chmac yeic ti muchꞌutic bol yoꞌntonique ti muꞌyuc sjam ti cꞌusi chalique.
\p
\v 16 Colemoxuc xa. Yuꞌun ti nacolic xae, mu yuꞌunuc xuꞌ chba asaꞌ amulic. Jaꞌ yuꞌun chavacꞌ abaic ti abatinel yuꞌun ti Diose.
\v 17 Pasic ti mucꞌ scotol crixchanoetic, cꞌux me xavaꞌi scotol quermanotic, xiꞌic ti Diose, pasic ti mucꞌ uc ti totil ajvalile.
\s Jaꞌ scꞌopilal ti jchambetic yoꞌnton ti Cristoe
\p
\v 18 Hoꞌoxuc ti oyoxuc ti mozoile, chꞌumbeic smantal ti avajvalique liꞌ ti balumile. Pasic ti mucꞌ. Maꞌuc noꞌox chapas ti mucꞌ ti avajvale ti lec yoꞌntone ti chaxcꞌuxubinote. Manchuc mi cꞌocꞌ yoꞌnton, jaꞌ chapas ti mucꞌ uc.
\v 19 Yuꞌun mi icuch avuꞌunic ti vocole ti hovil ti chayacꞌboxuque yuꞌun oy ti avoꞌntonic ti Diose, jaꞌ lec chayiloxuc ti Diose.
\v 20 Mi ti scoj amulic chavichꞌic majel, muꞌyuc scꞌopilal ti stojol ti Diose mi lec itsꞌic avuꞌunic. Mi ti sventa lec avabtelic chavichꞌic vocol, jaꞌ lec chayiloxuc ti Diose mi lec itsꞌic avuꞌunique.
\v 21 Hech yuꞌun ti laj yicꞌoxuc ti stojol ti Diose, yuꞌun jaꞌ tscꞌan ti chachambeic yoꞌnton ti Cristoe. Yuꞌun ti ihuꞌ yuꞌun iꞌechꞌ svocol avuꞌunique, jaꞌ laj yacꞌboxuc achanic ti xuꞌ avuꞌunique.
\v 22 Muc sta smul ti Jesuse. Muc snop cꞌop.
\v 23 Cꞌalal ilabanat, muc spac sutel. Cꞌalal yacꞌoj sba chichꞌ vocol, muc xꞌutvan. Jaꞌ laj yacꞌbe xchapan ti Diose ti jaꞌ stalel toj chchapanvane.
\v 24 Stuc laj xcuchbucutic jmultic ti svinquilel te ti cruz, hech yuꞌun xuꞌ cuꞌuntic ti chamenucutic yuꞌun ti mulile. Hech yuꞌun xuꞌ cuꞌuntic ti jpastic cꞌusi tscꞌan ti Diose. Hech yuꞌun cuxulucutic ti stojol. Yuꞌun ti laj yichꞌ vocol ti svinquilel ti Jesuse, hech yuꞌun colemoxuc xa.
\v 25 Yuꞌun ti voꞌone hechoxuc hech chaj cꞌu cheꞌel carneroetic ti chꞌayemique. Ti ora to nasutic xa tal ti stojol ti jpaxtol avuꞌunique, hech yuꞌun chaxchabioxuc yuꞌun hech chacuxiic sbatel osil.
\c 3
\s Jaꞌ scꞌopilal ti toj acꞌo spasbe sbaic ti muchꞌutic nupunemique
\p
\v 1 Hechoxuc uc, antsetic, chꞌumbeic smantal ti amalalique yuꞌun mi mu xchꞌunojbuc scꞌop ti Diose ti amalalique, hech chlic xchꞌunic uc yuꞌun tsqꞌuelic ti lec ti cꞌutic chapasique. Ti sventa avabtelic noꞌox chlic xchꞌunic, mu persauc chavalbe.
\v 2 Yuꞌun chilic ti toj chapasique yuꞌun chaxiꞌic ti Diose.
\v 3 Mu me jaꞌuc noꞌox lec chaꞌilatic yuꞌun ti amalalique yuꞌun ti cꞌu cheꞌel chapechꞌ ajolique, yuꞌun ti chavichꞌic anatsꞌique xchiꞌuc xoj acꞌobique ti pasbil ti cꞌanal taqꞌuine, xchiꞌuc ti acꞌuꞌ apoqꞌuique.
\v 4 Jaꞌuc me lec chayiloxuc yuꞌun ti oy yutsil avoꞌntonique. Jaꞌ sventa sbatel osil. Yuꞌun mi lamajem avoꞌntonique, mi mu xatoy abaique, jun noꞌox yutsil chayiloxuc ti Diose. Hech chaj cꞌu cheꞌel tꞌujum chavilic natsꞌil ti bu toyol stojole, jaꞌ noꞌox hech chayiloxuc ti Diose mi lamajem avoꞌntonic, mi mu xatoy abaic.
\v 5 Hech yoꞌntonic ti antsetique ti voꞌonee, jaꞌ ti muchꞌutic oyic ti stojol ti Diose. Yuꞌun laj xchꞌunic ti chcoltaatic yuꞌun ti Diose, hech ihuꞌ yuꞌunic laj xchꞌumbeic smantal ti smalalique, hech yuꞌun lec iꞌilatic.
\v 6 Hech laj spas ti Sarae, laj xchꞌumbe smantal ti Abrahame. Yuꞌun laj snaꞌ ti jaꞌ yabtel ti smalale tspas mantal te ti snaic. Hech yuꞌun ti hoꞌoxuque, mi chapasic ti cꞌusi leque, mi mu xaxiꞌ mi oy cꞌusi chcꞌot ti pasel avuꞌunic yuꞌun chachꞌunic ti chascoltaoxuc ti Diose, hech lec chayil ti Diose hech chaj cꞌu cheꞌel lec laj yil ti Sarae ti Diose.
\p
\v 7 Hoꞌoxuque, viniquetic, chacalbeic uc, naꞌic me cꞌu cheꞌel scꞌan chachiꞌin abaic ti naclej xchiꞌuc ti avajnilique. Pasic ti mucꞌ ti avajnilique yuꞌun muꞌyuc yip antsetic. Hoꞌucutic oy quiptic. Coꞌol laj xa xcꞌuxubinoxuc ti Diose, coꞌol oy acuxlejalic sbatel osil. Mi hech chapasique, mu xchꞌay ti cꞌusi chacꞌambeic ti Diose.
\s Jaꞌ scꞌopilal mi chcꞌot ti pasel ti chavichꞌic vocol ti sventa ti lec avabtelique, jun noꞌox yutsil obi, xchi
\p
\v 8 Hech yuꞌun jaꞌ slajeben xa chacalbeic acotolic, jtosuc me avoꞌntonic acotolic. Naꞌo me ti uts sba ti avermanoe. Yuꞌun jun noꞌox ti Atotique, cꞌux me xavaꞌi abaic. Cꞌuxubino me abaic, biqꞌuit acꞌo abaic.
\v 9 Mi oy muchꞌu chopol chaspasbote, mu me xapac sutel. Mi oy muchꞌu chaslabanote, mu me xapac sutel. Jaꞌ chacꞌambeic bendición ti stojol yuꞌun chanaꞌic icꞌbiloxuc ti stojol ti Diose yuꞌun chapasic ti cꞌusi leque hech yuꞌun chavichꞌic bendición.
\p
\v 10 Yuꞌun hech tsꞌibabil ti scꞌop ti Diose:
\q Ti muchꞌu tscꞌan ti nichim noꞌox yoꞌnton ch-echꞌ liꞌ ti balumile, ti tscꞌan ti chichꞌ bendicione,
\q acꞌo spajes ye,
\q mu me xal ti cꞌusi chopole,
\q mu me snop cꞌop.
\q
\v 11 Acꞌo scomes scotol ti cꞌusi chopole,
\q acꞌo spas cꞌusi lec.
\q Jaꞌ acꞌo scꞌanilan ti jun yoꞌntone, hechuc me yoꞌnton.
\q
\v 12 Yuꞌun ti Cajvaltique tsqꞌuelilan ti muchꞌutic toj ti viniquile yuꞌun chacꞌbe bendición.
\q Chaꞌibe scꞌop ti cꞌutic chcꞌambat ti stojole.
\q Ti muchꞌutic mu xtun ti cꞌutic tspasique, jaꞌ mu xꞌacꞌbat bendición yuꞌun ti Cajvaltique,
\m ti xchie.
\p
\v 13 ¡Muchꞌu cꞌamba yilbajinoxuc mi toyol avoꞌntonic chapasic ti cꞌusi leque!
\v 14 Repenta chcꞌot ti pasel ti chavichꞌic vocol ti sventa ti lec avabtelique. Mi hech icꞌot ti pasele, jun noꞌox yutsil obi. Mu me xaxiꞌic, mu me xavichꞌic mul yuꞌun.
\v 15 Toyoluc me avoꞌntonic chapasic ti mucꞌ ti Cajvaltic Diose. Chapalucoxuc me scotol cꞌacꞌal yuꞌun chatacꞌbe scꞌop ti muchꞌu ti jaꞌ noꞌox tscꞌan chasjacꞌbot ti cꞌusi achꞌunojique yuꞌun jaꞌ noꞌox tscꞌan tsta amul. Cꞌuncꞌun me xatacꞌavic. Pasic me ti mucꞌ.
\v 16 Manchuc mi chasaꞌbot amulique, lecuc me ti cꞌusi chapasique. Hech ch-acꞌat ti qꞌuexlal ti muchꞌutic hovil chasaꞌbot amulique yuꞌun toj ti cꞌusi chapasic ti sventa ti Cristoe.
\v 17 Jaꞌ más lec mi yuꞌun lec avabtelic chavichꞌic vocol, mi hech tscꞌan ti Diose. Jaꞌ vocol mi chavichꞌic vocol yuꞌun chopol ti avabtelique.
\p
\v 18 Yuꞌun hech onoꞌox uc ti Cristoe laj yichꞌ vocol. Stuc ti toj yoꞌntone jaꞌ laj yacꞌ sba ti milel ti jventatic hech laj xcuchbucutic jmultic, hoꞌucutic ti mu tojuc ti coꞌntontique. Hech jꞌechꞌel ihuꞌ yuꞌun ti laj yicꞌucutic ti stojol ti Diose. Yuꞌun yichꞌoj sbecꞌtal, hech yuꞌun itaat ti milel, hech yuꞌun icham. Patil ichaꞌcusesbat ti sbecꞌtale cꞌalal isut tal ti xchꞌulele, hech icuxi.
\v 19 Cꞌalal icham, imucat ti chꞌen ti sbecꞌtale. Hech yuꞌun ti xchꞌulele ba scꞌopon ti xchꞌulelic ti muchꞌutic ti muc scꞌanic coltael yuꞌun ti Diose ti te ticꞌajtic ti cꞌatimbaque. Yuꞌun ti iꞌaye, jaꞌ noꞌox ba yacꞌbe snaꞌ ti cꞌu yuꞌun ti te oyique.
\v 20 Jaꞌ ti xchꞌulelic scotol ti muchꞌutic muc scꞌan xchꞌunic ti voꞌonee. Te ticꞌajtic uc ti muchꞌutic muc scꞌan xchꞌunic cꞌalal laj smala ti Diose mi tsutes yoꞌntonic cꞌalal yacꞌoj sba tspas ti barco ti Noee. Yuꞌun mu epuc icolic loqꞌuel cꞌalal ital ti nojelal hoꞌe. Vaxacvoꞌ noꞌox icolic. Yuꞌun oy xchꞌunojel yoꞌntonic ti chcoltaatic yuꞌun ti Diose, hech iꞌochic ti barco, hech yuꞌun icolic.
\v 21 Jaꞌ noꞌox hech uc ti hoꞌucutique ti ora to yuꞌun jchꞌunojtic ti chijcol yuꞌun ti Cajvaltique, hech yuꞌun chquichꞌtic hoꞌ, hech yuꞌun chijcolucutic. Yuꞌun ti chquichꞌtic hoꞌe, mu yuꞌunuc chijꞌatin yuꞌun hech chlocꞌ yoboquil jbecꞌtaltic. Jaꞌ jamal chcalbetic ti Diose ti jchꞌunojtic ti icham ichaꞌcuxi ti jventatic ti Jesucristoe hech yuꞌun jꞌechꞌel chijcol yuꞌun.
\v 22 Ti Jesucristoe sutem xa muel ti vinajel. Te pasbil xa ti mucꞌ yuꞌun te xa oy ti sbatsꞌicꞌob ti Diose. Scotol ti chꞌul abatetique tspas ti mantal xchiꞌuc scotol ti ajvaliletic yuꞌun ti chꞌul abatetique.
\c 4
\s Jaꞌ scꞌopilal ti cꞌutic xuꞌ avuꞌunique, ta me xacolta abaic, hech lec chayiloxuc ti Diose, xchi
\p
\v 1 Yuꞌun ti laj yichꞌ vocol ti sbecꞌtal ti Cristoe, hech yuꞌun acꞌo jnaꞌtic ti hech onoꞌox chquichꞌtic vocol ti jbecꞌtaltic uc. Mi icuch cuꞌuntic ti vocole ti chijyacꞌbucutique, más ch-an yip coꞌntontic hech mu xa jcꞌan ti jsaꞌtic jmultic.
\v 2 Hech yuꞌun ti jayib xa cꞌacꞌal liꞌ cuxulucutic liꞌ ti balumile, mu jchꞌuntic ti cꞌusi tscꞌan ti jbecꞌtaltique. Jaꞌ ti jchꞌuntic ti cꞌusi tscꞌan yoꞌnton ti Diose.
\v 3 Ti voꞌone puru laj apasic hech chaj cꞌu cheꞌel tspasic ti ora to ti muchꞌutic mu snaꞌic bu oy ti Diose. Batem avoꞌntonic laj asaꞌ amulic, laj achꞌunic ti cꞌusi tscꞌan ti abecꞌtalique, nayacubic, cꞌuc noꞌox laj ahovilpasic cꞌalal nayacubic, natunic yuꞌun ti santoetique, jaꞌ ti mu xtun chil ti Diose.
\v 4 Ti ora to mu xaꞌibeic sjam ti cꞌu yuꞌun mu xa xacꞌan chachiꞌinic, ti cꞌu yuꞌun mu xa coꞌoluc chasaꞌ amulic xchiꞌuc. Hech yuꞌun chaslabanoxuc.
\v 5 Mu me xchibaj avoꞌntonic yuꞌun. Naꞌo me ti jaꞌ chcꞌot ichꞌbatuc scꞌop yuꞌun ti Cajvaltique ti chapal xa yuꞌun chichꞌbe scꞌop yuꞌun smulic scotol ti muchꞌutic cuxajtic toe xchiꞌuc ti muchꞌutic chamenic xae.
\v 6 Jaꞌ yuꞌun ti icholbat yaꞌyic ti lequil achꞌ cꞌope ti quermanotic ti ichamic xae yuꞌun hech manchuc mi ivay ti sbecꞌtalique, jaꞌ ti sventa xchꞌunojel yoꞌntonic chcuxiic sbatel osil xchiꞌuc ti Diose.
\p
\v 7 Poꞌot xa tsta yorail ti chlaj scotole. Hech yuꞌun mu me xaxiꞌic, mu me xloꞌlaj avoꞌntonic. Jaꞌuc me te oy avoꞌntonic yuꞌun chacꞌoponic Dios.
\v 8 Jaꞌ tsots scꞌopilal ti scotol cꞌacꞌal cꞌux chavaꞌi abaique. Yuꞌun mi cꞌux chcaꞌitic ti quermanotique, chchꞌay ti coꞌntontic ti cꞌusi chopol tspasique.
\v 9 Macꞌlino me abaic, mu me xloꞌlaj avoꞌntonic yuꞌun.
\v 10 Yacꞌojboxuc apꞌijilic ti Diose. Mu coꞌoluc ti apꞌijilic ti yacꞌojboxuc ti Diose ti jujunoxuque. Oy lec snaꞌ chcꞌopoj, oy lec snaꞌ chcoltavan. Ep ti tos yacꞌoj ti Diose. Hech yuꞌun ti cꞌutic xuꞌ avuꞌunique ta me xacolta abaic. Hech lec chayiloxuc ti Diose.
\v 11 Ti muchꞌu snaꞌ chchol ti scꞌop ti Diose acꞌo chꞌamumbatuc ye yuꞌun ti Diose. Ti muchꞌu snaꞌ ch-abtej yuꞌun ti Diose acꞌo snaꞌ ti jaꞌ chcoltaat yuꞌun ti Diose hech yuꞌun chuꞌ yuꞌun. Scotol ti cꞌusi chapasique lecuc me scꞌopilal chcꞌot avuꞌunic ti Diose. Chuꞌ avuꞌunic ti sventa ti Jesucristoe. Ti Diose jaꞌ tspasat ti mucꞌ sbatel osil. Jaꞌ tspas mantal sbatel osil. Jun yutsil ti hech chcꞌot ti pasel.
\s Jaꞌ scꞌopilal cꞌalal chavichꞌic vocol, lecuc me chcꞌot scꞌopilal ti Diose avuꞌunic, xchi
\p
\v 12 Hoꞌoxuc ti cꞌuxoxuc ti coꞌntone, mu me xchꞌay avoꞌntonic yuꞌun ti ch-epaj ti vocol ti ora to. Mu me xacuyic ti mu hechuc chichꞌic vocol ti yan quermanotique. Yuꞌun ti ital ti vocole, te chvinaj mi oy xchꞌunojel avoꞌntonic.
\v 13 Hech yuꞌun nichimuc me avoꞌntonic chcuch avuꞌunic yuꞌun chanaꞌic ti coꞌol chavichꞌic vocol hech chaj cꞌu cheꞌel laj yichꞌ ti Cristoe. Yuꞌun mi nichim noꞌox avoꞌntonic chcuch avuꞌunic ti ora to, hech más echꞌem nichim noꞌox avoꞌntonic ti cꞌalal chchaꞌsut tal xchiꞌuc squeval.
\v 14 Mi ti sventa ti Cristoe chavichꞌic labanel, jun noꞌox yutsil obi, yuꞌun chvinaj ti oy ti avoꞌntonic ti Chꞌul Espíritu yuꞌun ti Diose, ti jaꞌ jelaven yutsile. Ti muchꞌutic chlabanvanique jaꞌ chopol chcꞌot scꞌopilal ti Diose yuꞌunic. Ti hoꞌoxuque jaꞌ lec chcꞌot scꞌopilal ti Diose avuꞌunic.
\v 15 Ti chavichꞌic vocole mu me scojuc chamilvan, chaꞌelcꞌaj, chasaꞌ amul yan, chaliques cꞌop. Mu me jaꞌuc.
\v 16 Mi ti sventa ti Cristoe ti chavichꞌic vocole, mu me xaqꞌuexavic. Jamal me chaval ti laj xa scoltaoxuc ti Cristoe, hech lec chbat scꞌopilal ti Diose avuꞌunic.
\p
\v 17 Yuꞌun ista xa yorail yuꞌun ti chijyacꞌbucutic acial ti Diose yuꞌun hech chijpꞌijub yuꞌun, ti hoꞌucutic ti snichꞌonucutic ti Diose. Yuꞌun ti chijyacꞌbucutic acial, hoꞌucutic ti jchꞌunojbetic ti scꞌope, ¡buc xa ti muchꞌutic mu scꞌan xchꞌunic ti lequil achꞌ cꞌope ti yalojbucutic ti Diose!
\v 18 Mi ta to xquichꞌtic tojobtasel yuꞌun hech chijcolucutic ti hoꞌucutique ti toj coꞌntontique, ¡buc xa ti muchꞌutic mu xchꞌunojuc ti Diose, jaꞌ ti muchꞌutic mu xtun ti yoꞌntonique! Jꞌechꞌel mu xcolic o.
\v 19 Hech yuꞌun mi chquichꞌtic vocol yuꞌun hech tscꞌan yoꞌnton ti Diose, mu me xchibaj coꞌntontic, acꞌo me jpastic ti cꞌusi leque. Acꞌo me jchꞌuntic ti chixchabiucutic ti Diose yuꞌun jun yoꞌnton cuꞌuntic ti Jtotique ti laj spasucutique.
\c 5
\s Jaꞌ scꞌopilal ti laj staqꞌui ti ancianoetique xchiꞌuc ti quermanotique
\p
\v 1 Ti jtaqꞌui ti ancianoetique ti te sventainojoxuque yuꞌun coꞌol ancianoun xchiꞌuc. Yuꞌun hoꞌon laj jqꞌuel ti laj yichꞌ vocol ti Cristoe. Chba jqꞌuel ti tspasat ti muqꞌue. Poꞌot xa chcꞌot ti pasel.
\v 2 Hech yuꞌun chacalbeic, chamacꞌlinic ti carnero yuꞌun ti Diose ti aventainojique, chachabiic. Mu me ti sujeluc chapasic. Yutsiluc me avoꞌntonic chapasic yuꞌun hech tscꞌan ti Diose. Mu me xanaꞌ atojolic. Toyoluc me avoꞌntonic chapasic.
\v 3 Mu me xatoy abaic ti stojol ti muchꞌutic aventainojique. Hoꞌoxuque ta me xavacꞌbeic sqꞌuel ti cꞌusi tscꞌan ti Diose scotol ti quermanotique ti te aventainojique.
\v 4 Hech yuꞌun cꞌalal tsut tal ti mero totil jpaxtol cuꞌuntique, jaꞌ chayacꞌoxuc ti pasel ti mucꞌ mu jꞌocꞌuc noꞌox sbatel osil.
\p
\v 5 Jaꞌ noꞌox hechoxuc uc, unen viniquetic, chꞌumbeic smantal ti ancianoetique. Acotolic chꞌumbo abaic amantalic. Biqꞌuit chavacꞌ abaic.
\q Yuꞌun ti Diose tscontrain ti muchꞌutic tstoy sbaique.
\q Tscolta ti muchꞌutic biqꞌuit chacꞌ sbaique,
\m ti xchie.
\v 6 Hech yuꞌun bicꞌtajanic me ti stojol ti Diose ti jaꞌ jelaven spꞌijile yuꞌun hech chayacꞌot ti pasel ti mucꞌ cꞌalal tsta yorail.
\v 7 Cꞌalal chloꞌlaj avoꞌntonic, acꞌbo sventaimboxuc avoꞌntonic ti Diose yuꞌun tscꞌan chascoltaoxuc.
\p
\v 8 Oyuc me lec arazonic. Qꞌueleluc me asatic yuꞌun ti avajcontraique, jaꞌ ti pucuje, hech chanav batel hech chaj cꞌu cheꞌel jtiꞌvanej bolom ti ch-avan batele yuꞌun tsaꞌ muchꞌu tstiꞌ.
\v 9 Jꞌechꞌel chꞌuno ti chascoltaot ti Diose hech chuꞌ avuꞌun chacontrain ti pucuje. Naꞌic me ti coꞌol onoꞌox chquichꞌtic vocol jcotoltic liꞌ ti balumile ti hoꞌucutique ti quermano jbatique.
\v 10 Ep yutsil yoꞌnton cuꞌuntic ti Diose hech yuꞌun laj yicꞌucutic ti stojol yuꞌun ti sventa ti Jesucristoe chba jqꞌuelbetic yutsil yoꞌnton sbatel osil. Hech yuꞌun mi itsꞌic avuꞌunic ti vocole yuꞌun jꞌocꞌ noꞌox chquichꞌtique, patil chasmucꞌubtasbot avoꞌntonic ti Diose, chastsatsubtasbot avoꞌntonic hech más ep ch-an yip avoꞌntonic, hech jun avoꞌntonic chaꞌabtejic yuꞌun.
\v 11 Jaꞌ tspasat ti mucꞌ sbatel osil. Jaꞌ tspas mantal sbatel osil. Jun yutsil ti hech chcꞌot ti pasel.
\s Hech ilaj yoꞌnton laj scꞌopon ti carta ti quermanotique
\p
\v 12 Ti quermanotic Silase, ti jun yoꞌnton ch-abtej yuꞌun ti Diose, laj xa stsꞌibabun ti chaꞌpꞌel oxpꞌel liꞌto. Hech laj calboxuc ti oy yutsil yoꞌnton avuꞌunic ti Diose. Jnaꞌ ti chascoltaoxuque yuꞌun achꞌunojbeic ti scꞌope. Hech yuꞌun mu me xchibaj avoꞌntonic.
\p
\v 13 Oy quermanotic uc liꞌ ti Romae ti coꞌol tꞌujbilucutic xchiꞌuque. Chabanucot la xal ti quermanotique. Chabanucot la xal uc ti Marcose. Jaꞌ jun to jnichꞌon ti Marcose.
\v 14 Yuꞌun jaꞌ señail ti cꞌuxoxuc ti coꞌntone, tsacbo me abaic acꞌobic.
\p Mu me xloꞌlaj avoꞌntonic, junuc me avoꞌntonic jujunoxuc yuꞌun oyoxuc ti stojol ti Jesucristoe.