\id REV

\h SUN APOCALIPSIS
\toc1 SUN APOCALIPSIS
\mt SUN APOCALIPSIS JAꞌ SCꞌOPILAL TI CꞌUSI CHCꞌOT TI PASELE TI IꞌACꞌBAT SNAꞌ TI JUANE
\c 1
\s Jaꞌ scꞌopilal ti iꞌacꞌbat snaꞌ ti Juane yuꞌun ti Cajvaltique
\p
\v 1 Avi hun to jaꞌ scꞌopilal ti cꞌusi poꞌot xa chcꞌot ti pasele ti iꞌacꞌbat snaꞌ ti Jesucristoe yuꞌun ti Diose. Yuꞌun ti iꞌacꞌbat snaꞌ ti Jesuse, yuꞌun hech chijyacꞌbucutic jnaꞌtic ti hoꞌucutic ti chcajvalintique. Hech yuꞌun laj stac talel ti xchꞌul abate, tal scꞌoponun hoꞌon ti Juanune, hoꞌon ti chiꞌabtej yuꞌune.
\v 2 Hech yuꞌun hoꞌon Juanun chacalboxuc ti melel ti hech niꞌacꞌbat quile. Melel ti hech laj caꞌi ti scꞌop ti Diose ti laj yalbun ti Jesucristoe.
\p
\v 3 Ti muchꞌu chavta avi scꞌop Dios liꞌto, jaꞌ chichꞌ bendición. Chichꞌic bendición uc scotol ti muchꞌutic chaꞌyique mi chaqꞌuic ti yoꞌntonic ti cꞌusi tsꞌibabil liꞌto yuꞌun poꞌot xa chcꞌot ti pasel.
\s Jaꞌ scꞌopilal ti lic scꞌopon ti carta ti hucchop quermanotique ti Juane
\p
\v 4 Hoꞌon Juanun, chajcꞌoponoxuc ti carta hoꞌoxuc ti hucchopoxuc ti achꞌunojbeic scꞌop ti Diose te ti hucub jteclum te ti slumal Asiae. Acꞌo yacꞌboxuc yutsil avoꞌntonic, acꞌo yacꞌboxuc jun avoꞌntonic ti Diose ti stalel oye, jaꞌ ti oy ti voꞌonee cꞌalal mu to chmeltsaj ti balumile, jaꞌ ti oy uc ti ora to xchiꞌuc ti oy sbatel osile. Ti chaꞌacꞌbatic yutsil avoꞌntonic jun avoꞌntonic, jaꞌ ti sventa uc ti Chꞌul Espíritue jaꞌ ti huctos yichꞌoj sbae hech yuꞌun jelaven yutsil. Ti Chꞌul Espíritue te oy uc ti stojol ti Diose.
\v 5 Jaꞌ ti sventa uc ti Jesucristoe ti jun yoꞌnton cuꞌuntic hech xuꞌ ti jchꞌuntic ti cꞌusi chijyalbucutique. Jaꞌ ti primero ichaꞌcuxi loqꞌuel ti chꞌen, jaꞌ ti sventainoj scotol ajvaliletic liꞌ ti balumile. Jaꞌ ti cꞌuxucutic ti yoꞌnton, laj spocbucutic loqꞌuel jmultic ti xchꞌichꞌele.
\v 6 Jaꞌ ti laj xa stꞌujucutic yuꞌun ti jchiꞌintic ti pas mantal. Laj xa stꞌujucutic yuꞌun paleucutic nijcꞌot xa yuꞌun hech chijꞌabtej ti stojol ti Diose, jaꞌ ti Stote. Jun yutsil ti tspasat ti mucꞌ sbatel osil ti Cajvaltique. Jaꞌ tspas mantal sbatel osil. Jun yutsil ti hech chcꞌot ti pasel.
\p
\v 7 Aꞌyo me avaꞌyic, chyal tal xchiꞌuc toc ti Cajvaltique. Ta me xilic scotol crixchanoetic xchiꞌuc uc ti muchꞌutic laj smilique. Ti crixchanoetique ti mu xchꞌunojbuc scꞌope ti jaylajuntos ti liꞌoyic ti balumile, ta me xocꞌta sbaic ti stojol ti Cajvaltique ti cꞌalal ital xae yuꞌun tsnaꞌic ti ch-acꞌbatic castigo yuꞌune. Hech chcꞌot ti pasel.
\p
\v 8 Hech chal ti Cajvaltic Diose: “Hoꞌon laj jliques scotol. Hoꞌon ti huꞌtes scotol”, xchi ti Cajvaltic Diose ti stalel oye, jaꞌ ti oy ti voꞌonee cꞌalal mu to chmeltsaj ti balumile, jaꞌ ti oy uc ti ora to xchiꞌuc ti oy sbatel osile. Jaꞌ ti jelaven spꞌijile ti scotol sventainoje.
\s Jaꞌ scꞌopilal ti Juane ti laj yil ti Cajvaltique jaꞌ ti jun to crixchano xꞌelane
\p
\v 9 Hoꞌon Juanun, hoꞌon ti quermano jbatic ti sventa ti Jesuse. Hoꞌon ti coꞌol chquichꞌtic vocol ti sventa ti Jesuse, ti coꞌol chispasucutic ti mantal ti Diose, ti coꞌol chijyacꞌbucutic yip coꞌntontic yuꞌun hech chcuch cuꞌuntic ti vocole. Hoꞌon te oyun ti balumil Patmos sbi. Jaꞌ joyubtabil ti hoꞌ ti Patmose. Te chuculun ti sventa ti laj jchol ti scꞌop ti Diose, jaꞌ ti scꞌopilal ti Jesucristoe.
\v 10 Ti jun domingo, jaꞌ ti cꞌacꞌalil ti jchabitic sventa Cajvaltic, laj sventainun ti Chꞌul Espíritue, hech laj caꞌi oy muchꞌu chcꞌopoj ti jpat. Tsots chcꞌopoj hech chaj cꞌu cheꞌel tsots ch-oqꞌuesanat corneta.
\v 11 Hech laj yalbun:
\p ―Hoꞌon laj jliques scotol. Hoꞌon ti huꞌtes scotol. Tsꞌibao ti hun ti cꞌu cheꞌel yacꞌoj sba chacacꞌbot avil ti ora to yuꞌun chatacbe batel ti hucchop ti jchꞌunojeletique ti te oyic ti slumal Asiae. Jaꞌ ti te oyic ti jteclum Efesoe, xchiꞌuc ti jteclum Esmirnae, xchiꞌuc ti jteclum Pérgamoe, xchiꞌuc ti jteclum Tiatirae, xchiꞌuc ti jteclum Sardise, xchiꞌuc ti jteclum Filadelfiae, xchiꞌuc ti jteclum Laodiceae ―xiyutun.
\p
\v 12 Laj joypꞌin jba yuꞌun ti jqꞌuel ti muchꞌu laj scꞌoponune. Laj quil hucub natiquil candelero, jaꞌ yav aceite yuꞌun chtil ti aceiteetique. Jaꞌ pasbil ti cꞌanal taqꞌuin.
\v 13 Cacal ti oꞌlol yoꞌ bu oy ti hucub candeleroe oy muchꞌu jun to crixchano xꞌelan. Ti scꞌuꞌ slapoje, nat. Oy xincha xchucoj ti stiꞌ yoꞌnton. Pasbil ti cꞌanal taqꞌuin ti xinchae.
\v 14 Sac ti sjole. Sac ti jyalel hech chaj cꞌu cheꞌel saquil tsots lec chucꞌbil. Ti jujupꞌej ti sate, chpulpun noꞌox chtil hech chaj cꞌu cheꞌel yat cꞌocꞌ.
\v 15 Ti yacane chquevan hech chaj cꞌu cheꞌel chquevan cobre taqꞌuin yuꞌun ti ilecubtasat xa yuꞌun ti cꞌoqꞌue. Ti scꞌope jaꞌ hech chaj cꞌu cheꞌel xꞌiꞌet noꞌox ti ucꞌume mi inoje.
\v 16 Stsacoj ti sbatsꞌicꞌob hucub cꞌanaletic. Jaꞌ chlocꞌ ti ye uc espada. Chib ye ti espadae. Lec ti yee. Sjunul ti sate chquevan hech chaj cꞌu cheꞌel chquevan tal cꞌacꞌal hech chaj cꞌu cheꞌel staoj oꞌlol cꞌacꞌale.
\p
\v 17 Cꞌalal ti laj jqꞌuelbe ti sate, nipꞌaj ti lum te ti stojol. Hech chaj cꞌu cheꞌel anima nicꞌot. Laj stijun ti sbatsꞌicꞌob, hech laj yalbun:
\p ―Mu me xaxiꞌ. Hoꞌon laj jliques scotol. Hoꞌon ti huꞌtes scotol.
\v 18 Hoꞌon jtalel cuxulun. Hoꞌon ti nichame, nichaꞌcuxi xa. Cuxulun sbatel osil. Hoꞌon jventainoj scotolic mi ichamic xae. Hoꞌon chcal ti muchꞌutic chcolique xchiꞌuc ti muchꞌutic chꞌayel chbatique.
\v 19 Hech yuꞌun tsꞌibao ti hun ti cꞌu cheꞌel laj xa avil liꞌto xchiꞌuc ti cꞌu cheꞌel yacꞌoj sba chavaꞌi ti ora to xchiꞌuc ti ta to xavaꞌi ta to xavil ti ora to.
\v 20 Yuꞌun muc xavaꞌibe sjam ti hucub cꞌanaletic ti laj aqꞌuel ti jbatsꞌicꞌob xchiꞌuc ti hucub yav aceitee, hech yuꞌun chacalbe. Ti hucub cꞌanaletique jaꞌ señail ti muchꞌutic sventainojic ti hucchop jchꞌunojeletique te ti Asia. Ti hucub yav aceitee jaꞌ señail ti hucchop jchꞌunojeletique ―xiyutun ti Cajvaltique, jaꞌ ti crixchano xꞌelan laj quile.
\c 2
\s Jaꞌ ti scarta ti hucchop jchꞌunojeletique: Jaꞌ scarta ti jchꞌunojeletic te ti jteclum Efesoe
\p
\v 1 Hoꞌon ti Juanune, hech laj yalbun uc ti Cajvaltique:
\p ―Hech me chatsꞌibabe ti muchꞌu sventainoj ti jchꞌunojeletic ti te oyic ti jteclum Efesoe: “Jaꞌ ti Cajvaltique jaꞌ ti stsacoj ti sbatsꞌicꞌob ti hucub cꞌanaletique, jaꞌ ti chanav ti oꞌlol yoꞌ bu oy ti hucub yav aceitee laj quil, hech chayalboxuc:
\v 2 Jnaꞌ ti cꞌu xꞌelan avabtelique. Jnaꞌ ti tsots chaꞌabtejic cuꞌun. Oy yip avoꞌntonic. Mu xapasic ti mucꞌ ti muchꞌu mu xtun yoꞌntonique. Apasojbe proval yoꞌntonic ti muchꞌutic jcholcꞌopetic scuyoj sbaique. Laj xa ataic ti tsnopic cꞌope.
\v 3 Jnaꞌ ti jun avoꞌntonic atsꞌicojic ti vocole. Tsots naꞌabtejic xa ti jventa. Muꞌyuc ti bu scꞌan chchibaj avoꞌntonic.
\v 4 Pero oy amul ti jtojol yuꞌun mu xa cꞌuxucun ti avoꞌntonic hech chaj cꞌu cheꞌel ti sliqueb.
\v 5 Chachaꞌtꞌabes ti avoꞌntonic ti cꞌu cheꞌel cꞌuxun ti avoꞌntonic ti sliqueb. Suteso me avoꞌntonic yuꞌun amulic. Hech me xlic achaꞌpasic hech chaj cꞌu cheꞌel laj apasic ti sliqueb. Mi mu xasutes avoꞌntonic yuꞌun ti amulique, ti jloqꞌues ti yav aceite avuꞌunique, hech chtupꞌ ti jcꞌope te ti alumale.
\v 6 Manchuc mi mu xa cꞌuxucun ti avoꞌntonic hech chaj cꞌu cheꞌel ti sliqueb, oy to cꞌusi lec chapasic chquil. Jaꞌ chavilintaic ti yabtel ti nicolaítaetique ti chayalboxuc ti xuꞌ chasaꞌ amulique. Hoꞌoni chquilinta uc.
\v 7 Ti muchꞌu tstsal yuꞌun scotole, jaꞌ chcacꞌbe sloꞌbe sat ti teꞌ sventa cuxlejal sbatel osile, jaꞌ ti te oy ti oꞌlol ti sverta ti Diose te ti vinajel. Hoꞌoxuc ti achꞌunojbucun ti jcꞌope, aꞌyo me avaꞌyic ti cꞌalal hech chayacꞌboxuc anaꞌic ti Chꞌul Espíritu cuꞌune, xayutoxuc”, xavut me, hech me chatsꞌibabun ―xiyutun ti Cajvaltique.
\s Jaꞌ scarta ti jchꞌunojeletic te ti jteclum Esmirnae
\p
\v 8 Hech laj yalbun uc ti Cajvaltique:
\p ―Hech me chatsꞌibabe ti muchꞌutic sventainoj ti jchꞌunojeletique ti te oyic ti jteclum Esmirnae: “Jaꞌ ti Cajvaltique ti hoꞌon laj jliques scotole, ti hoꞌon ti huꞌtes scotol, ti hoꞌon ti nichame, patil nichaꞌcuxie, ti xchie, hech chayalboxuc:
\v 9 Jnaꞌ ti cꞌu xꞌelan avabtelique. Jnaꞌ ti ep laj xa avichꞌic vocol hech meꞌon nacꞌotic xa. Muꞌyuc xa cꞌusi oy avuꞌunic. Pero ti jventa hoꞌon jcꞌulejoxuc. Jnaꞌ ti ep chaslabanoxuc ti muchꞌutic yelnichꞌon ti Israele scuyoj sbaique. Muꞌyuc xchꞌunojel yoꞌntonic hech yuꞌun maꞌuc yelnichꞌon Abraham lume. Jaꞌ yol snichꞌon ti Satanase.
\v 10 Mu me xaxiꞌic yuꞌun ti chavichꞌic yan vocol. Aꞌyo me avaꞌyic, jaꞌ yabtel ti pucuje chasticꞌoxuc ochel ti chuquel yuꞌun hech chaspasboxuc proval avoꞌntonic mi oy xchꞌunojel avoꞌntonic. Pꞌisbil ti jayib cꞌacꞌal chavichꞌic vocol. Junuc me avoꞌntonic ti jtojol manchuc mi chasmilot. Hech chacacꞌbot amotonic, jaꞌ chacuxiic sbatel osil.
\v 11 Ti muchꞌu tstsal yuꞌun scotole, cꞌalal mi ichame, mu xba yichꞌ castigo. Hoꞌoxuc ti achꞌunojbucun ti jcꞌope, aꞌyo me avaꞌyic ti cꞌalal hech chayacꞌboxuc anaꞌic ti Chꞌul Espíritu cuꞌune, xayutoxuc”, xavut me, hech me chatsꞌibabun ―xiyutun ti Cajvaltique.
\s Jaꞌ scarta ti jchꞌunojeletic te ti jteclum Pérgamoe
\p
\v 12 Hech laj yalbun uc ti Jesucristoe:
\p ―Hech me chatsꞌibabe ti muchꞌutic sventainojic ti jchꞌunojeletique te ti jteclum Pérgamoe: “Ti Cajvaltique jaꞌ ti chlocꞌ ti ye ti espadae ti chib yee ti lec ti yee laj quil, hech chayalboxuc:
\v 13 Jnaꞌ ti cꞌu xꞌelan avabtelique. Jnaꞌ ti te nacaloxuc yoꞌ bu ep chchꞌumbat smantal yuꞌun ti crixchanoetique ti Satanase. Manchuc mi hech yacꞌoj sba chavichꞌic vocole, hoꞌoxuc chapasucun ti mucꞌ. Muc xchibaj avoꞌntonic ti cꞌalal imilat ti Antipase ti jun yoꞌnton laj xcholbun jcꞌopilal te ti bu ep chchꞌumbat smantal yuꞌun ti crixchanoetique ti Satanase.
\v 14 Pero oy cꞌusi chapasic ti mu xtun chquile. Te achiꞌinojic ti muchꞌutic coꞌol tspasic hech chaj cꞌu cheꞌel laj spas ti Balaame. Ti Balaame jaꞌ laj spꞌijubtas ti ajvalil Balac sbie cꞌu cheꞌel chchanubtas ti mulil ti yelnichꞌnab ti Israele ti voꞌone. Hech lic stiꞌbeic smoton santoetic, hech lic mulivajuc ti yelnichꞌnab ti Israele.
\v 15 Te achiꞌinojic uc ti muchꞌutic coꞌol chchꞌunic xchiꞌuc ti nicolaítaetique ti chquilintae, ti chayalboxuc ti xuꞌ chasaꞌ amulique.
\v 16 Hech yuꞌun suteso me avoꞌntonic yuꞌun amulic. Yuꞌun mi mu xasutes avoꞌntonique, chital ti atojolic ti ora. Chtal jcontrainoxuc xchiꞌuc ti espada ti oy ti quee.
\v 17 Ti muchꞌu stsal yuꞌun scotole, jaꞌ chcacꞌbe sveꞌ ti manavaje ti jaꞌ ti jtac yal tal ti vinajel ti muꞌyuc muchꞌu chile, hech muꞌyuc palta chaꞌi sbatel osil. Chcacꞌbe uc jun saquil ton yoꞌ bu tsꞌibabil achꞌ sbi ti stuc tsnaꞌ ti muchꞌu chichꞌe, yuꞌun hech tsnaꞌ ti cuꞌun sbatel osil. Hoꞌoxuc ti achꞌunojbucun ti jcꞌope, aꞌyo me avaꞌyic ti cꞌalal hech chayacꞌboxuc anaꞌic ti Chꞌul Espíritu cuꞌune, xayutoxuc”, xavut me, hech me chatsꞌibabun ―xiyutun ti Cajvaltique.
\s Jaꞌ scarta ti jchꞌunojeletic te ti jteclum Tiatirae
\p
\v 18 Hech laj yalbun uc ti Cajvaltique:
\p ―Hech me chatsꞌibabe ti muchꞌutic sventainoj ti jchꞌunojeletique te ti jteclum Tiatirae: “Jaꞌ ti snichꞌon ti Diose ti jaꞌ chpulpun noꞌox chtil ti jujupꞌej sate hech chaj cꞌu cheꞌel yat cꞌoqꞌue, ti jaꞌ chquevan ti yacane hech chaj cꞌu cheꞌel chquevan cobre taqꞌuin yuꞌun ti ilecubtasat xa yuꞌun ti cꞌoqꞌue laj quil, hech chayalboxuc:
\v 19 Jnaꞌ ti cꞌu xꞌelan avabtelique. Jnaꞌ ti chacꞌuxubinvanic, ti oy xchꞌunojel avoꞌntonic, ti chacoltavanic, ti oy yip avoꞌntonic, ti más ep chaꞌabtejic cuꞌun ti ora to.
\v 20 Pero oy cꞌusi chapasic ti mu xtun chquile. Lec chavaꞌi chavacꞌ chanubtasvanuc ti antse ti chchol ti jcꞌope tscuy. Jaꞌ hech chaj cꞌu cheꞌel ti Jezabel ti voꞌonee. Jaꞌ tsloꞌla ti muchꞌutic ch-abtej cuꞌune yuꞌun chalbe ti xuꞌ chmulivajic, xuꞌ tstiꞌbeic smoton ti santoetique.
\v 21 Ep cꞌacꞌal laj jmala yuꞌun acꞌo sutes yoꞌnton yuꞌun ti smule ti antse. Mu scꞌan sutes yoꞌnton. Mu scꞌan scomes ti cꞌusi chopol tspase.
\v 22 Aꞌyo me avaꞌyic, ti antse xchiꞌuc ti muchꞌutic chchꞌumbat ti scꞌope, mi mu sutes yoꞌntonic yuꞌun ti smulique, chcacꞌbe yichꞌic ep vocol.
\v 23 Ti muchꞌutic chchanic hech chaj cꞌu cheꞌel chal ti antse, jaꞌ ti jmil. Hech tsnaꞌic scotol ti jchꞌunojeletique ti buc noꞌox oyique ti hoꞌon caꞌyoj scotol ti cꞌusi chanopic ti avoꞌntonic, jqꞌueloj cꞌu xꞌelan avoꞌntonic. Ti jujunoxuque ti cꞌu cheꞌel chaꞌabtejique, hech chacacꞌboxuc atojolic. Mi lec naꞌabtejique, lec amotonic. Mi mu lecuc naꞌabtejique, jaꞌ amotonic ti castigo ti chacacꞌboxuque.
\v 24 Hoꞌoxuc ti te oyoxuc ti Tiatirae ti muꞌyuc bu achꞌunojbeic scꞌop ti antse, ti mu to bu chba achanic ti cꞌu cheꞌel stsal yuꞌunic ti Satanás ti tscuyique, hech chacalbeic. Muꞌyuc yan mantal chacalbeic.
\v 25 Jaꞌ noꞌox junuc avoꞌntonic chꞌunic ti jcꞌope jaꞌto mi nitale.
\v 26 Ti muchꞌu stsal yuꞌun scotole, ti tspas ti cꞌusi tscꞌan ti coꞌntone asta ti slajebal cꞌacꞌale, jaꞌ chcacꞌbe sventain scotol ti crixchanoetique ti mu xixchꞌumbucun ti jcꞌope.
\v 27 Hech chaj cꞌu cheꞌel yacꞌojbun jventain ti Jtote, jaꞌ noꞌox hech chcacꞌbe sventain uc. Tsots yabtel chcꞌot. Hech chaj cꞌu cheꞌel pꞌin ti xchꞌuchꞌulel icꞌot yuꞌun ivocꞌat yuꞌun taqꞌuin, jaꞌ hech chcꞌot ti crixchanoetique. Muꞌyuc xa cꞌusi xuꞌ yuꞌunic.
\v 28 Ti muchꞌu hech tsots yabtel chcacꞌbee, jaꞌ chcacꞌ ti pasel ti mucꞌ hech chaj cꞌu cheꞌel chipasat ti mucꞌ hoꞌoni.
\v 29 Hoꞌoxuc ti achꞌunojbucun ti jcꞌope, aꞌyo me avaꞌyic ti cꞌalal hech chayacꞌboxuc anaꞌic ti Chꞌul Espíritu cuꞌune, xayutoxuc”, xavut me, hech me chatsꞌibabun ―xiyutun ti Cajvaltique.
\c 3
\s Jaꞌ scarta ti jchꞌunojeletic te ti jteclum Sardise
\p
\v 1 Hech laj yalbun uc ti Cajvaltique:
\p ―Hech me chatsꞌibabe ti muchꞌutic sventainojic ti jchꞌunojeletique te ti jteclum Sardise: “Jaꞌ ti Cajvaltique ti yichꞌoj ti Chꞌul Espíritue, ti huctos yichꞌoj sbae hech yuꞌun jelaven yutsil, ti stsacoj ti scꞌob ti hucub cꞌanaletique, hech chayalboxuc: Jnaꞌ ti cꞌu xꞌelan avabtelique. Lec xchꞌunojic, xchi acꞌopilalic. Mu hechuc chaquiloxuc.
\v 2 Aꞌyo me cꞌu yaꞌyel ti avoꞌntonique. Tsots me xapas abaic naca me chibajuc avoꞌntonic o. Muꞌyuc bu lec avabtelic ti stojol ti Dios cuꞌune laj jta.
\v 3 Hech yuꞌun naꞌic me ti cꞌutic nachanubtasat ti sliquebe hech chaj cꞌu cheꞌel avaꞌyojique. Pasic me ti mucꞌ, suteso me avoꞌntonic yuꞌun amulic. Mi mu xapꞌijubique, chacacꞌboxuc castigo. Hech chaj cꞌu cheꞌel mu xanaꞌ cꞌusi ora chtal jꞌelecꞌ, hech onoꞌox uc mu xanaꞌ cꞌusi ora chtal ti castigoe.
\v 4 Oy to chaꞌvoꞌ oxvoꞌ ti te achiꞌinojic te ti Sardise ti muꞌyuc yoboquil scꞌuꞌic chquil yuꞌun mu saꞌ smulic. Yuꞌun lec ti cꞌusi tspasique, jaꞌ ch-acꞌbat sac scꞌuꞌic jaꞌ señail ti toj yoꞌntonique. Jaꞌ chixchiꞌinucun sbatel osil.
\v 5 Ti muchꞌu tstsal yuꞌun scotole, hech ch-acꞌbat slap sac scꞌuꞌ uc. Mu jtupꞌbe sbi te ti hun yoꞌ bu tsꞌibabil sbiic scotol ti muchꞌutic chcuxiic sbatel osile. Jamal chcal ti stojol ti Jtote xchiꞌuc ti stojol ti chꞌul abatetic yuꞌune ti chcojtiquine.
\v 6 Hoꞌoxuc ti achꞌunojbucun ti jcꞌope, aꞌyo me avaꞌyic ti cꞌalal hech chayacꞌboxuc anaꞌic ti Chꞌul Espíritu cuꞌune, xayutoxuc”, xavut me, hech me chatsꞌibabun ―xiyutun ti Cajvaltique.
\s Jaꞌ scarta ti jchꞌunojeletique te ti jteclum Filadelfiae
\p
\v 7 Hech laj yalbun uc ti Cajvaltique:
\p ―Hech me chatsꞌibabe ti muchꞌutic sventainoj ti jchꞌunojeletique te ti jteclum Filadelfiae: “Jaꞌ ti Cajvaltique, jaꞌ ti toj yoꞌntone, ti melel ti scꞌope, jaꞌ ti totil ajvalil ti chacꞌ ochuc ti vinajel ti muchꞌutic tꞌujbilic yuꞌune, ti mu xacꞌ ochuc ti yantique, hech chayalboxuc:
\v 8 Jnaꞌ ti cꞌu xꞌelan avabtelique. Jnaꞌ ti manchuc mi muꞌyuc avip chayiloxuc ti crixchanoetique achꞌunojbucun ti jcꞌope. Mu amucojucun ti avoꞌntonic. Hech yuꞌun chacacꞌboxuc apuquic batel ti jcꞌope ti muchꞌutic tscꞌan chaꞌyique. Muꞌyuc muchꞌu xuꞌ chaspajesoxuc.
\v 9 Oy muchꞌutic jnichꞌon scuyoj sbaique yuꞌun jaꞌ yelnichꞌon ti Israel ti sventa sbecꞌtalic. Hovil chalic ti jnichꞌon. Jaꞌ tsnopic cꞌop yuꞌun jaꞌ stotic ti Satanase. Jaꞌ chcacꞌbe xchꞌun ti jcꞌope ti chacholbee hech mu xa stoy sbaic ti atojolic yuꞌun chlic snaꞌic ti melel ti hoꞌoxuc jnichꞌonoxuc. Hech chlic snaꞌic uc ti cꞌuxoxuc ti coꞌntone.
\v 10 Yuꞌun muc xacomesic ti jcꞌope cꞌalal laj avichꞌic vocol ti jventae, hech yuꞌun chajcoltaoxuc cꞌalal tsta yorail tspasbat proval yoꞌntonic scotol ti muchꞌutic te oyic ti balumile. Yuꞌun ep ti vocol chtale.
\v 11 Poꞌot xa chiyal tal. Junuc avoꞌntonic chꞌunic ti jcꞌope, hech muꞌyuc muchꞌu chaspojboxuc amotonic.
\v 12 Ti muchꞌu tstsal yuꞌun scotole, jaꞌ chba xchiꞌin ti Diose te ti vinajel sbatel osil. Mu xlocꞌ o. Ti jtsꞌibabe ti stiba ti sbi ti Dios cuꞌune, xchiꞌuc ti sbi ti jteclum yuꞌun ti Dios cuꞌune, jaꞌ ti achꞌ Jerusalene ti chyalesat tal yuꞌun ti Dios cuꞌune. Ti jtsꞌibabe ti stiba uc ti achꞌ jbie.
\v 13 Hoꞌoxuc ti achꞌunojbucun ti jcꞌope, aꞌyo me avaꞌyic ti cꞌalal hech chayacꞌboxuc anaꞌic ti Chꞌul Espíritu cuꞌune, xayutoxuc”, xavut me, hech me chatsꞌibabun ―xiyutun ti Cajvaltique.
\s Jaꞌ scarta ti jchꞌunojeletique ti te oyic ti jteclum Laodiceae
\p
\v 14 Hech laj yalbun uc ti Cajvaltique:
\p ―Hech me chatsꞌibabe ti muchꞌutic sventainoj ti jchꞌunojeletique te ti jteclum Laodiceae: “Jaꞌ ti Cajvaltique ti melel ti scꞌope ti jun yoꞌnton ti jtojoltique, ti chcꞌot ti pasel ti cꞌutic chijyalbucutique, ti te xchiꞌuc ti Diose cꞌalal lic smeltsan scotol ti cꞌusitic oye, hech chayalboxuc:
\v 15 Jnaꞌ ti cꞌu xꞌelan avabtelique. Jnaꞌ ti mu lum cꞌuxucun ti avoꞌntonic hech chaj cꞌu cheꞌel ti muchꞌu toyol yoꞌntonic ti jtojol. Mu to chacꞌotic hech chaj cꞌu cheꞌel ti muchꞌu mu xchꞌunojbucun ti jcꞌope ti mu cꞌuxucun ti yoꞌntonic mi jutuc. Mi chanop ti chachꞌumbun ti jcꞌope, jaꞌ tscꞌan ti scotol avoꞌntonic cꞌuxucun ti avoꞌntonic. Yuꞌun mi mu scotoluc avoꞌntonic cꞌuxucun ti avoꞌntonic, más lec mu xachꞌunucun.
\v 16 Yuꞌun mi mu scotoluc avoꞌntonic cꞌuxucun ti avoꞌntonic, mu xajcꞌanoxuc. Ti jcꞌan chajtenoxuc loqꞌuel.
\v 17 Yuꞌun hech chavalic: Hoꞌoni lec jchꞌunojbe scꞌop ti Diose. Ep chquichꞌ bendición yuꞌun ti Diose. Lec ti jpasbe yabtel, xachiic pero hovil. Mu xanaꞌic ti meꞌonoxuc chaquil yuꞌun mu junuc avoꞌntonic ti jtojol. Tꞌanaloxuc chaquil yuꞌun muꞌyuc yutsil avoꞌntonic. Maꞌsatoxuc chaquil yuꞌun mu xanaꞌic cꞌu cheꞌel chaquil yuꞌun mu xachꞌumbucun ti jcꞌope.
\v 18 Hech yuꞌun chacalbeic. Laꞌic me ti jtojol. Laꞌ ichꞌo xchꞌunojel avoꞌntonic hech jcꞌulej chacꞌot ti jtojol. Chacacꞌbot toj avoꞌntonic uc yuꞌun hech mu xaqꞌuexavic yuꞌun mu xa tꞌanalucoxuc chaquil. Jun to sac acꞌuꞌ alapojic. Chajpoxtaboxuc asatic uc yuꞌun hech chavilic.
\v 19 Ti muchꞌu cꞌux ti coꞌntone, jaꞌ ti jtaqꞌui ti jtojobtas yuꞌun ti jcꞌan ti jcolta. Hech yuꞌun cꞌalal chajtaqꞌuiot, scotol avoꞌnton chꞌuno me ti ora. Suteso me avoꞌnton yuꞌun amul.
\v 20 Aꞌyo me avaꞌyic, liꞌoyun ti stiꞌ avoꞌntonic cacꞌoj jba chajcꞌoponoxuc. Ti muchꞌu chiyaꞌibun ti jcꞌope, mi chisjambun ti yoꞌntone, te chiꞌoch, te ti jchiꞌin jbatic hech nichim noꞌox coꞌntontic.
\v 21 Ti muchꞌu tstsal yuꞌun scotole, jaꞌ chquicꞌ. Ti jchiꞌin yuꞌun coꞌol ti jpas mantal xchiꞌuc hech chaj cꞌu cheꞌel jchiꞌinoj jbatutic ti pas mantal xchiꞌuc ti Jtote. Yuꞌun ti hoꞌone scotol itsal cuꞌun cꞌalal nichaꞌcuxi loqꞌuel ti chꞌen, hech jchiꞌinoj ti pas mantal ti Jtote liꞌ ti vinajele.
\v 22 Hoꞌoxuc ti achꞌunojbucun ti jcꞌope, aꞌyo me avaꞌyic ti cꞌalal hech chayacꞌboxuc anaꞌic ti Chꞌul Espíritu cuꞌune, xayutoxuc”, xavut me, hech me chatsꞌibabun ―xiyutun ti Cajvaltique.
\c 4
\s Jaꞌ scꞌopilal ti Diose ti tspasat ti mucꞌ yuꞌun scotolic te ti vinajel
\p
\v 1 Cꞌalal laj coꞌnton ti laj jtsꞌibabe scartaic ti hucchop jchꞌunojeletique, patil laj jqꞌuel jamal stiꞌ sna ti Diose te ti vinajel. Ti Cajvaltique, jaꞌ ti jbael laj scꞌoponune, ti hech scꞌop hech chaj cꞌu cheꞌel ch-oqꞌuesanat cornetae, hech laj yalbun nixtoc:
\p ―Muan tal liꞌto. Chacacꞌbot yan avil ti cꞌutic poꞌot xa chcꞌot ti pasele ―xiyutun.
\p
\v 2 Ti ora laj sventainun ti Chꞌul Espíritue hech laj yacꞌbun jqꞌuel scotol. Te vaꞌalun ti vinajel laj caꞌi. Oy mucꞌta naclebal te laj quil. Te nacal ti Diose tspas ti mantal scotol.
\v 3 Ti Diose oy squeval hech chaj cꞌu cheꞌel oy squeval jaspe-ton xchiꞌuc cornalina-ton, yox xchiꞌuc tsoj. Coꞌol xaj meꞌqꞌuinobal xꞌelan te ti sjoylejal ti smucꞌta naclebe pero puru yox hech chaj cꞌu cheꞌel squeval esmeralda-ton.
\v 4 Joyubtabil ti veinticuatro naclebaletic ti jun mucꞌta naclebale ti te oy ti oꞌlole. Ti naclebaletique jaꞌ te nacajtic veinticuatro ti voꞌ totiletic laj quil. Slapojic sac scꞌuꞌic ti totiletique. Ti sjolic oy scoronaic pasbil ti cꞌanal taqꞌuin laj quil.
\v 5 Ti bu nacal ti Diose te ti mucꞌta naclebale te chleblej tal tselov, ch-avan chauc, oy cꞌusi yan chcꞌopoj uc. Te ti stojol ti Dios uque oy hucub yat cꞌocꞌ. Jaꞌ señail ti Chꞌul Espíritue ti huctos yichꞌoj sbae hech yuꞌun jelaven yutsil.
\v 6 Te ti stojol ti Dios uque oy jun to mucꞌta nab xꞌelan xleblajet hech chaj cꞌu cheꞌel espejo.
\p Ti jujujech xocon xchiꞌuc ti spat ti mucꞌta naclebale, oy vaꞌajtic chanvoꞌic. Ti chanvoꞌique ep satic, oy sat ti spatic uc.
\v 7 Ti june jun to jtiꞌvanej bolom xꞌelan. Ti june jun to vacax xꞌelan. Ti june oy sat hech chaj cꞌu cheꞌel sat crixchano. Ti june jun to xic xꞌelan ti sjamoj ti xiqꞌue.
\v 8 Ti chanvoꞌique vaquib xicꞌ jujun. Oy satic ti scotol sbecꞌtalic. Oy sat uc ti jujujech xiqꞌue, ti yolon xicꞌ xchiꞌuc ti spat xicꞌ. Hech yuꞌun ep ti sate. Ti cꞌacꞌal ti acꞌubal mu spajes sbaic. Scotol ora chalic:
\q Toj yoꞌnton stuc ti Cajvaltic Diose.
\q Jaꞌ jelaven spꞌijil,
\q jaꞌ scotol sventainoj,
\q jaꞌ stalel oy sbatel osil.
\q Ti voꞌone oy, liꞌoy ti ora to, oy sbatel osil,
\m xchiic ti stojol ti Diose.
\p
\v 9 Ti chanvoꞌique scotol ora lec chcꞌopojic yuꞌun ti Diose ti te nacal ti mucꞌta naclebale. Tspasic ti mucꞌ, chalbeic vocol ti stojol ti Diose ti jaꞌ stalel cuxul sbatel osile.
\v 10 Cꞌalal hech chalic ti chanvoꞌique, jaꞌuc ti veinticuatro ti voꞌ totiletique tspatan sbaic ti stojol ti Diose. Chlequilcꞌopojic yuꞌun ti Diose ti jaꞌ stalel cuxul sbatel osile. Tsloqꞌuesic ti scoronaique, chaqꞌuic te ti stojol ti Diose hech tspasic ti mucꞌ. Hech chalic:
\q
\v 11 Cajvalot cuꞌuntutic, Diosot cuꞌuntutic, atuc noꞌox jelaven yutsil avoꞌnton.
\q Atuc noꞌox chapasat ti mucꞌ.
\q Atuc noꞌox jelaven apꞌijil.
\q Yuꞌun hoꞌot laj apas scotol ti cꞌutic oye.
\q Yuꞌun hech laj scꞌan avoꞌnton,
\q hech iꞌan scotol, hech imeltsaj scotol,
\m xchiic ti stojol ti Diose.
\c 5
\s Jaꞌ scꞌopilal ti balbil hune xchiꞌuc ti Cajvaltique ti jun to chꞌiom carnero xꞌelane
\p
\v 1 Ti Diose stsacoj ti sbatsꞌicꞌob hun laj quil. Balbil ti hune. Tsꞌibabil ti yut xchiꞌuc ti spat. Pacꞌbil ti hucub sello ti hune yuꞌun hech mu xtilpꞌuj.
\v 2 Laj quil te oy jun totil chꞌul abat. Tsots icꞌopoj, hech laj yal:
\p ―¿Muchꞌu xuꞌ yuꞌun tstuchꞌbe ti selloe yuꞌun hech tsjam ti hune? ―xchi.
\p
\v 3 Muꞌyuc muchꞌu xuꞌ tsjam ti hune, mi ti vinajel, mi ti balumil, o ti muchꞌutic chamenic xae, hech yuꞌun mi junuc muꞌyuc muchꞌu xuꞌ tsqꞌuel.
\v 4 Ep niꞌocꞌ yuꞌun muc xtaat ti muchꞌu xuꞌ yuꞌun tsjam ti hune yuꞌun hech tsqꞌuel.
\v 5 Hech yuꞌun hech lic yalbun jun ti totiletique:
\p ―Mu me xaꞌocꞌ. Oy muchꞌu itsal xa yuꞌun scotol, jaꞌ xuꞌ yuꞌun tstuchꞌbe ti selloe, hech chjam ti hune. Jaꞌ jun achiꞌil, hoꞌoxuc ti yelnichꞌonoxuc ti Israele, jaꞌ yuꞌun ti jchop yuꞌun ti Judae. Jaꞌ statamol ti Davide. Jaꞌ ep yip hech chaj cꞌu cheꞌel yip jtiꞌvanej bolom hech yuꞌun xuꞌ yuꞌun tsjam ti hune ―xiyutun.
\p
\v 6 Hech yuꞌun laj jqꞌuel. Te ti oꞌlol yoꞌ bu nacal ti Diose joyubtabil yuꞌun ti chanvoꞌique xchiꞌuc ti veinticuatro ti voꞌ ti totiletique laj quil oy te cotol jun to jcot chꞌiom carnero xꞌelan. Chvinaj ti imilate ichaꞌcuxi xa. Jaꞌ señail ti Cajvaltique ti chꞌiom carnero xꞌelane. Hucub ti xulube, hucpꞌej ti sate. Ti hucpꞌej sate jaꞌ señail ti Chꞌul Espíritue ti huctos yichꞌoj sbae ti jaꞌ itacat batel ti sjoylejal balumil.
\v 7 Hech yuꞌun ti Carneroe ba stsacbe ti balbil hune ti te stsacoj ti sbatsꞌicꞌob ti Diose.
\v 8 Cꞌalal laj yichꞌ ti hun ti Carneroe, ti chanvoꞌique xchiꞌuc ti veinticuatro ti voꞌ ti totiletique, lic spatan sbaic ti stojol ti Carneroe. Scotolic yichꞌojic yarpaic ti totiletique. Yichꞌojic uc stazaic pasbil ti cꞌanal taqꞌuin nojem ti pom. Ti pome jaꞌ señail ti tscꞌoponic Dios ti muchꞌutic lecubtasbil xa yoꞌntonic ti liꞌ ti balumile.
\v 9 Achꞌ qꞌuejoj laj sqꞌuejintaic. Hech ti sbie:
\q Atuc ihuꞌ xa avuꞌun laj avichꞌ ti hune.
\q Atuc xuꞌ avuꞌun chatuchꞌbe ti selloe.
\q Yuꞌun hoꞌot laj avacꞌ aba ti milel.
\q Ti achꞌichꞌel laj aman loqꞌuel ti scꞌob ti pucuje ep crixchanoetic talemic ti sjoylejal balumil ti jaylajuntos ti oyic ti balumile.
\q
\v 10 Laj xa avacꞌbe yabtelic tstojobtas ti xchiꞌiltaque ti cꞌu cheꞌel chchꞌay ti smulique.
\q Patil to chlic ochuc ti pas mantal te ti balumil avuꞌun,
\m xchiic ti stojol.
\p
\v 11 Laj jqꞌuel yan vuelta. Laj caꞌibe scꞌop ep chꞌul abatetic ti te sjoyubtaojic ti Diose xchiꞌuc ti chanvoꞌique xchiꞌuc ti totiletique. Ep ti mil ti chꞌul abatetique laj quil. Mu stacꞌ atiel.
\v 12 Scotol tsots icꞌopojic. Hech laj yalic:
\q Yuꞌun scotol itsal yuꞌun ti Chꞌiom Carneroe, jaꞌ ti imilate, ti chaꞌcuxem xae, hech yuꞌun acꞌbil yabtel.
\q Jaꞌ tspas ti mantal scotol, chuꞌunin scotol.
\q Jaꞌ jelaven spꞌijil; scotol xuꞌ yuꞌun tspas.
\q Stuc chchꞌumbat scꞌop.
\q Stuc tspasat ti mucꞌ.
\q Stuc ch-albat vocol ti stojol,
\m xchiic ti stojol ti Chꞌiom Carneroe.
\p
\v 13 Laj caꞌi lic cꞌopojuc scotol ti muchꞌutic te oyic ti vinajele xchiꞌuc scotol ti muchꞌutic liꞌoy ti balumile xchiꞌuc scotol ti muchꞌutic ichamic liꞌ ti balumile xchiꞌuc scotol ti muchꞌutic ichamic te ti nabe, scotolic lic yalic:
\q Lum lec yoꞌnton ti Diose ti te nacal ti mucꞌta naclebale xchiꞌuc ti Chꞌiom Carneroe.
\q Jun yutsil ti chchꞌumbat scꞌop sbatel osil.
\q Jun yutsil ti tspasat ti mucꞌ sbatel osil.
\q Jun yutsil ti tspas mantal sbatel osil,
\m xchiic.
\p
\v 14 ―Jun yutsil ti hech chcꞌot ti pasel ―xchiic ti chanvoꞌique.
\p Ti veinticuatro ti voꞌ ti totiletique laj spatan sbaic ti stojol ti Diose. Lec icꞌopojic yuꞌun.
\c 6
\s Jaꞌ scꞌopilal cꞌusi icꞌot ti pasel jujutos cꞌalal ituchꞌ ti selloetique
\p
\v 1 Ti Chꞌiom Carneroe laj xtuchꞌ jun sello yuꞌun ti balbil hune hech laj quil. Jaꞌ lic cꞌopojuc jun ti chanvoꞌique, jaꞌ ti jun to jtiꞌvanej bolom xꞌelane. Jaꞌ hech chaj cꞌu cheꞌel chavuc ti scꞌope. Hech laj yal:
\p ―Batan ―xut.
\p
\v 2 Laj jqꞌuel ti muchꞌu hech ch-albate, jaꞌ scajlebinoj jcot saquil caꞌ chlocꞌ batel. Yichꞌoj syolob. Laj quil iꞌacꞌbat scorona. Oy yip hech ba stsal scotol ti muchꞌutic liꞌoyic ti balumile.
\p
\v 3 Cꞌalal laj xtuchꞌ ti xchibal sello ti Chꞌiom Carneroe, jaꞌ lic cꞌopojuc jun ti chanvoꞌique, jaꞌ ti jun to vacax xꞌelane. Hech laj yal:
\p ―Batan ―xut.
\p
\v 4 Laj jqꞌuel ti muchꞌu hech ch-albate, jaꞌ scajlebinoj jcot tsajal caꞌ chlocꞌ batel. Jaꞌ acꞌbil yabtel yuꞌun tsoques ti crixchanoetic liꞌ ti balumile hech chlic scontrain sbaic, hech chlic smil sbaic. Jaꞌ iꞌacꞌbat batel jchꞌix mucꞌta espada laj quil.
\p
\v 5 Cꞌalal laj xtuchꞌ ti yoxibal sello ti Chꞌiom Carneroe, jaꞌ lic cꞌopojuc jun ti chanvoꞌique, jaꞌ ti oy sat hech chaj cꞌu cheꞌel sat crixchanoe. Hech laj yal:
\p ―Batan ―xut.
\p Laj jqꞌuel ti muchꞌu hech ch-albate, jaꞌ scajlebinoj jcot icꞌal caꞌ chlocꞌ batel. Ti muchꞌu scajlebinoj ti caꞌe, stsacoj libra ti scꞌob sventa tslic.
\v 6 Laj caꞌi oy chcꞌopoj te ti oꞌlol yoꞌ bu oyic ti chanvoꞌique. Hech laj yalbe ti muchꞌu scajlebinoj ti caꞌe:
\p ―Ti jun kilo trigoe jaꞌ chcꞌot ti jun cꞌacꞌal abtel. Ti oxib kilo estranjero trigoe jaꞌ chcꞌot ti jun cꞌacꞌal abtel. Ti aceitee xchiꞌuc ti yaꞌlel sat uvateꞌe mu to me xatoybe stojol ―xut.
\p
\v 7 Cꞌalal laj xtuchꞌ ti xchanibal sello ti Chꞌiom Carneroe, jaꞌ lic cꞌopojuc jun ti chanvoꞌique, jaꞌ ti jun to xic xꞌelan ti sjamoj ti xiqꞌue. Hech laj yal:
\p ―Batan ―xut.
\p
\v 8 Laj jqꞌuel ti muchꞌu hech ch-albate, jaꞌ scajlebinoj jcot cꞌanal caꞌ. Ti muchꞌu scajlebinoj ti caꞌe, jmilvanej yuꞌun ti crixchanoetique, jaꞌ sbi. Oy yan tstsꞌaclivan jaꞌ cꞌatimbac sbi. Jaꞌ señail ti jaꞌ chbatic ti cꞌatimbac ti muchꞌutic chmilatique. Ti muchꞌu scajlebinoj ti caꞌe, jaꞌ acꞌbil sventain ti crixchanoetic liꞌ ti balumile. Ti jujutos crixchanoetic mi oy chanmil chmilat jmil, chcom oxmil. Hech tspas ti sjoylejal balumil. Jaꞌ tsmil ti espada xchiꞌuc ti viꞌnal xchiꞌuc ti chamel xchiꞌuc ti tiꞌel. Jaꞌ chtiꞌvan ti jtiꞌvanej bolom liꞌ ti balumile.
\p
\v 9 Cꞌalal laj xtuchꞌ ti yoꞌobal sello ti Chꞌiom Carneroe, laj jqꞌuel te ti yolon ti scajaneb smoton ti Diose cuxajtic ti muchꞌutic imilatic ti sventa ti jamal laj yalic ti xchꞌunojbeic scꞌop ti Diose.
\v 10 Tsots icꞌopojic, hech laj yalbeic ti Diose:
\p ―Cajval, hoꞌot ti aventainoj scotole, hoꞌot ti toj avoꞌntone, ti chcꞌot ti pasel ti acꞌope, ¿mi tscꞌan to tsta yorail ti chachapan ti muchꞌutic te oyic ti balumile ti laj smiluntutique? ―xchiic.
\p
\v 11 Iꞌacꞌbatic sac scꞌuꞌic laj quil. Hech iꞌalbatic ti acꞌo smalaic jutuc.
\p ―Jaꞌto mi itsꞌaqui ti cꞌu yepal avermanotac chmilatic uc hech chaj cꞌu cheꞌel namilatic, jaꞌ ti muchꞌu coꞌol avacꞌoj abaic ti abatinel xchiꞌuque, jaꞌto ch-och ti chapanel ―xꞌutatic laj caꞌi.
\p
\v 12 Laj jqꞌuel cꞌalal laj xtuchꞌ ti svaquibal sello ti Chꞌiom Carneroe. Tsots inic ti balumile. Itupꞌ ti cꞌacꞌale. Icꞌ ti jyalel hech chaj cꞌu cheꞌel icꞌal pocꞌ icꞌot ti cꞌacꞌale. Hech chaj cꞌu cheꞌel chꞌichꞌ icꞌot ti ue.
\v 13 Ipꞌaj yal tal ti balumil ti cꞌanaletique hech chaj cꞌu cheꞌel chpꞌaj ti lum sat ti igo-teꞌe cꞌalal tsots chtal icꞌ.
\v 14 Laj sbal sba ti vinajele hech chaj cꞌu cheꞌel ti jbaltic hun. Ichꞌay batel. Scotol ti vitsetique xchiꞌuc scotol ti balumile ti joyubtabil ti hoꞌe laj sqꞌuej sbaic batel, hech ijel ti bu onoꞌox oyique.
\v 15 Ti ajvaliletic liꞌ ti balumile xchiꞌuc ti yabate xchiꞌuc ti jcꞌulejetique, xchiꞌuc ti capitán soldadoetique, xchiꞌuc ti muchꞌutic pasbilic ti muqꞌue, xchiꞌuc scotol ti crixchanoetique, manchuc mi oyic ti mozoile, manchuc mi libre oyique, scotolic laj snacꞌ sbaic laj quil te ti yut pujul chꞌen, xchiꞌuc te ti yolon tonetic te ti vits.
\v 16 Hech laj yalic:
\p ―Taca pꞌajuc tal ti jbatic ti vitsetique. Taca xisbutꞌiucutic, hech mu xa xistaucutic ti castigo ti chijyacꞌbucutic ti Diose xchiꞌuc ti Chꞌiom Carneroe yuꞌun ilinem ti jtojoltic ―xchiic―.
\v 17 Yuꞌun laj xa sta yorail ti chacꞌ castigoe. ¿Muchꞌu cꞌamba cuchuc yuꞌun? ―xchiic.
\c 7
\s Jaꞌ scꞌopilal ti iꞌacꞌbatic smarcaic ciento cuarenta cuatro mil ti voꞌ
\p
\v 1 Patil laj quil chanvoꞌ chꞌul abatetic jaꞌ vaꞌajtic ti jujun xchiquin ti balumile. Jaꞌ tspajesic ti chanib iqꞌue liꞌ ti balumil yuꞌun mu me xlic icꞌ mi ti balumil mi ti nab. Mi jpꞌejuc teꞌ mu me xnicat.
\v 2 Laj quil yan chꞌul abat uc. Ilocꞌ tal ti sloqꞌueb cꞌacꞌal yichꞌoj ti sello ti Diose ti stalel cuxule. Tsots laj scꞌopon ti chanvoꞌ xchiꞌiltaque ti acꞌbil onoꞌox yabtel yuꞌun tsoques ti balumile xchiꞌuc ti nabe, jaꞌ ti chanvoꞌic ti tspajes ti iqꞌue ti jujun xchiquin ti balumile. Hech laj yalbeic:
\p
\v 3 ―Jaꞌto mi laj cacꞌbe smarcaic ti stibaic scotol ti muchꞌutic chchꞌumbat ti scꞌop ti Dios cuꞌuntique, jaꞌto chasoquesic ti balumile xchiꞌuc ti nabe xchiꞌuc ti teꞌetique ―xꞌutatic.
\p
\v 4 Laj caꞌi ti jayvoꞌic iꞌacꞌbatic ti smarcaique. Jaꞌ puru yelnichꞌnab ti Israele. Oy ciento cuarenta cuatro mil ti voꞌ ti laj yichꞌic smarcaique.
\v 5 Ti yelnichꞌnab ti Judae oy lajchamil ti voꞌ ti laj yichꞌic smarcaique. Ti yelnichꞌnab ti Rubene oy lajchamil ti voꞌ ti laj yichꞌic smarcaique. Ti yelnichꞌnab ti Gade oy lajchamil ti voꞌ ti laj yichꞌic smarcaique.
\v 6 Ti yelnichꞌnab ti Asere oy lajchamil ti voꞌ ti laj yichꞌic smarcaique. Ti yelnichꞌnab ti Neftalie oy lajchamil ti voꞌ ti laj yichꞌic smarcaique. Ti yelnichꞌnab ti Manasese oy lajchamil ti voꞌ ti laj yichꞌic smarcaique.
\v 7 Ti yelnichꞌnab ti Simeone oy lajchamil ti voꞌ ti laj yichꞌic smarcaique. Ti yelnichꞌnab ti Levie oy lajchamil ti voꞌ ti laj yichꞌic smarcaique. Ti yelnichꞌnab ti Isacare oy lajchamil ti voꞌ ti laj yichꞌic smarcaique.
\v 8 Ti yelnichꞌnab ti Zabulone oy lajchamil ti voꞌ ti laj yichꞌic smarcaique. Ti yelnichꞌnab ti Josee oy lajchamil ti voꞌ ti laj yichꞌic smarcaique. Ti yelnichꞌnab ti Benjamine oy lajchamil ti voꞌ ti laj yichꞌic smarcaique.
\s Jaꞌ scꞌopilal ti ep ti muchꞌutic slapoj sac scꞌuꞌique
\p
\v 9 Patil laj quil te oy ep crixchanoetic. Lum ep, mu stacꞌ atiel. Jaꞌ talemic ti sjoylejal balumil ti jaylajuntos ti oyic ti balumile. Te vaꞌajtic ti stojol ti Diose xchiꞌuc ti Chꞌiom Carneroe. Sac scꞌuꞌ slapojic scotolic. Stsacoj xan ti scꞌobic.
\v 10 Tsots icꞌopojic, hech laj yalic:
\q Nijcolucutic xa ti sventa ti Dios cuꞌuntique ti liꞌ nacal ti mucꞌta naclebale xchiꞌuc ti sventa ti Chꞌiom Carneroe,
\m xchiic.
\v 11 Scotol ti chꞌul abatetique ti te sjoyubtaojic ti Diose xchiꞌuc ti totiletique xchiꞌuc ti chanvoꞌique, jaꞌ lic spatan sbaic te ti stojol ti Diose. Ilequilcꞌopojic yuꞌun ti Diose.
\q
\v 12 Jun yutsil ti hech chcꞌot ti pasel, xchiic.
\q Jꞌacꞌbendición ti Dios cuꞌuntique.
\q Jun yutsil ti tspasat ti muqꞌue.
\q Jelaven spꞌijil.
\q Jun yutsil ti ch-albat vocol ti stojol.
\q Jun yutsil ti chchꞌumbat scꞌop.
\q Scotol xuꞌ yuꞌun.
\q Jaꞌ tspas mantal sbatel osil.
\q Jun yutsil ti hech chcꞌot ti pasel,
\m xchiic.
\p
\v 13 Hech yuꞌun lic sjacꞌbun jun ti totiletique:
\p ―¿Mi xanaꞌ muchꞌutic liꞌto ti sac scꞌuꞌ slapojique? ¿Mi xanaꞌ bu talemic? ―xiyutun.
\p
\v 14 Hech laj calbe:
\p ―Tote, mu jnaꞌ. Hoꞌoti xanaꞌ ―xcut.
\p Hech laj yalbun:
\p ―Avi to jaꞌ ti muchꞌutic icuch yuꞌunic ti yorail ep vocole, laj xa xchucꞌ scꞌuꞌic. Sac icꞌot yuꞌunic ti sventa ti xchꞌichꞌel ti Chꞌiom Carneroe.
\v 15 Hech yuꞌun te vaꞌajtic ti stojol ti Diose. Ti cꞌacꞌal ti acꞌubal chacꞌ sbaic ti abatinel te ti templo yuꞌun ti Diose. Jaꞌ chiꞌimbilic o yuꞌun ti Diose sbatel osil.
\v 16 Mu xa xaꞌyic viꞌnal, mu xa xtaquij yoꞌntonic, mu xa xaꞌibeic xcꞌuxul ti cꞌacꞌale, muꞌyuc xa bu cꞌocꞌ chaꞌyic.
\v 17 Yuꞌun ti Chꞌiom Carneroe ti te oy ti oꞌlol yoꞌ bu nacal ti Diose, jaꞌ chchabiatic hech chaj cꞌu cheꞌel chchabi scarnero ti jqꞌuelcarneroe. Hech chaj cꞌu cheꞌel tspasatic ti mantal carnero ti bu chlocꞌ tal hoꞌ yuꞌun chuchꞌic, jaꞌ noꞌox hech uc tspasatic ti mantal yuꞌun ti Cajvaltique sbatel osil hech nichim noꞌox yoꞌntonic sbatel osil. Ti Diose jaꞌ tscusbe loqꞌuel scotol yaꞌlel satic hech mu xa xꞌoqꞌuic xa ―xiyutun ti totile.
\c 8
\s Jaꞌ scꞌopilal ti sucubal selloe
\p
\v 1 Cꞌalal laj xtuchꞌ ti sucubal selloe ti Chꞌiom Carneroe, oꞌlol ora ichꞌaniic scotolic te ti vinajele. Muꞌyuc muchꞌu icꞌopojic.
\v 2 Laj quil ti iꞌacꞌbatic scornetaic ti hucvoꞌ chꞌul abatetic ti scotol ora te vaꞌajtic ti stojol ti Diose.
\v 3 Hech yuꞌun ital yan chꞌul abat. Tal svaꞌan sba ti stojol ti scajaneb smoton ti Diose. Te oy ti stojol ti Diose ti scajaneb smotone. Jaꞌ pasbil ti cꞌanal taqꞌuin. Ti chꞌul abate stsacoj ti scꞌob xchicꞌbil pom pasbil ti cꞌanal taqꞌuin uc. Iꞌacꞌbat ep pom yuꞌun tscap xchiꞌuc ti scꞌop ti muchꞌutic lecubtasbil yoꞌntonic yuꞌun ti Diose ti yacꞌoj sba tscꞌoponic ti Diose liꞌ ti balumile. Hech yuꞌun te laj xvaxan te ti sba ti scajaneb smoton ti Diose.
\v 4 Ti xchꞌayilal ti pome ti laj xchicꞌ ti chꞌul abate te imu batel ti stojol ti Diose. Yuꞌun jaꞌ smoton. Capal imu batel xchiꞌuc ti scꞌop ti muchꞌutic lecubtasbil yoꞌntonic yuꞌun ti Diose ti yacꞌoj sba tscꞌoponic ti Diose liꞌ ti balumile.
\v 5 Ti chꞌul abate laj stam ti xchicꞌbil pome, laj snojes ti acꞌal. Te laj stam ti sba ti scajaneb ti smoton ti Diose ti acꞌale. Cꞌalal nojem xa ti xchicꞌbil pome, laj sten yal tal ti balumil liꞌto. Cꞌalal hech laj spas, iꞌavan chavuc, oy cꞌusi tsots icꞌopoj uc, chleblej tselov, tsots inic ti balumile.
\s Jaꞌ scꞌopilal ti hucvoꞌ chꞌul abatetic ti laj yoqꞌuesanic scornetaic
\p
\v 6 Ti hucvoꞌ chꞌul abatetique ti yichꞌojic ti scornetaique, laj xchapan sbaic yuꞌun choqꞌuesanic.
\p
\v 7 Ti primero chꞌul abate lic yoqꞌuesan ti scornetae. Hech ipꞌaj yalel ti balumil bot xchiꞌuc cꞌocꞌ xchiꞌuc chꞌichꞌ, scapoj sbaic iyal. Ti sjoylejal balumil icꞌot. Ti butic icꞌote, icꞌacꞌ ti balumile xchiꞌuc vomoletic xchiꞌuc teꞌtic. Ti scotol ti butic icꞌaqꞌue jutuc mu sta oꞌlol ti balumile.
\p
\v 8 Ti xchibal chꞌul abate lic yoqꞌuesan uc ti scornetae. Jun to mucꞌta vits yacꞌoj sba chtil itenat ochel ti yut nab. Jutuc mu sta oꞌlol ti nabe icꞌataj ti chꞌichꞌ.
\v 9 Ti cꞌu yepal icꞌataj ti chꞌichꞌ ti nabe icham scotol ti cꞌutic cuxajtic te ti yut nabe. Jaꞌ noꞌox hech ti barcoetique jutuc mu sta oꞌlol ivocꞌ uc.
\p
\v 10 Ti yoxibal chꞌul abate lic yoqꞌuesan uc ti scornetae, hech ipꞌaj yalel ti balumil jun mucꞌta cꞌanal yacꞌoj sba chtil hech chaj cꞌu cheꞌel toj. Jutuc mu sta oꞌlol ti ucꞌumetique xchiꞌuc ti sat hoꞌetique liꞌ ti balumile ti isoc scoj ti ipꞌaj ti cꞌanale.
\v 11 Chꞌail vomol sbi ti cꞌanale. Hech chꞌa icꞌot ti ucꞌumetique xchiꞌuc ti sat hoꞌetique scoj ti ipꞌaj yal tal ti cꞌanale. Hech ep icham crixchanoetic yuꞌun isoc ti hoꞌe yuꞌun lum chꞌa icꞌot.
\p
\v 12 Ti xchanibal chꞌul abate lic yoqꞌuesan uc ti scornetae. Hech jutuc mu sta oꞌlol itupꞌ squeval ti cꞌacꞌale, ti ue, ti cꞌanaletique. Hech iyam squeval ti cꞌacꞌale ti cꞌacꞌaltic. Jaꞌ noꞌox hech iyam squeval ti acꞌubaltic ti ue ti cꞌanaletique.
\p
\v 13 Laj quil te oy jcot xic chvil batel te ti oꞌlol vinajel. Tsots lic cꞌopojuc. Hech laj yal:
\p ―Uts sbaic ti muchꞌutic nacajtic te ti balumile yuꞌun más ep chlic yichꞌic vocol cꞌalal mi laj yoqꞌuesanic scornetaic ti yan oxvoꞌ ti chꞌul abatetique ―xchi.
\c 9
\p
\v 1 Ti yoꞌobal chꞌul abate lic yoqꞌuesan uc ti scornetae. Ti cꞌalal laj yoqꞌuesane, laj quil jun to jpꞌej cꞌanal pꞌajem xa tal ti balumil. Jaꞌ chꞌul abat. Jaꞌ iꞌacꞌbat ti sllaveil ti cꞌatimbaque.
\v 2 Lic sjambe stiꞌ ti cꞌatimbaque. Te ilocꞌ tal ep chꞌayil hech chaj cꞌu cheꞌel ti chꞌayil chlocꞌ ti bu mucꞌta cꞌoqꞌue. Imac ti osile yuꞌun ti ilocꞌ tal ti chꞌayil te ti cꞌatimbaque. Hech chaj cꞌu cheꞌel maquel osil icꞌot.
\v 3 Cꞌalal ilocꞌ tal ti chꞌayile, ilocꞌ tal uc ep cꞌulub. Laj spuc sbaic ti balumil. Iꞌacꞌbat yabtel yuꞌun chtiꞌvan hech chaj cꞌu cheꞌel chtiꞌvan tsec.
\v 4 Ipasat ti mantal ti mu me xixtanic ti vomoletique xchiꞌuc ti cꞌutic yan tsꞌumbil ti yoxique xchiꞌuc ti teꞌetique. Jaꞌ noꞌox iꞌacꞌbatic yabtel yuꞌun chilbajin ti muchꞌutic mu yichꞌojuc ti smarca ti Diose ti stibaique.
\v 5 Muc xꞌacꞌbat licensa yuꞌun tsmilic. Jaꞌ noꞌox yuꞌun acꞌo yilbajinic hoꞌob u. Jaꞌ hech xcꞌuxul laj yaꞌyic ti crixchanoetique hech chaj cꞌu cheꞌel chtiꞌvan tsec.
\v 6 Cꞌalal hech chcꞌot ti pasel, tsaꞌ cꞌu cheꞌel chchamic ti crixchanoetique. Mu staic. Tscꞌan xchamic, mu xuꞌ yuꞌunic.
\p
\v 7 Ti cꞌulube jun to jaꞌ hech chaj cꞌu cheꞌel caꞌ ti yichꞌoj smaquic yuꞌun chbat ti pleito ti yajvale. Ti sjole oy jun to scorona pasbil ti cꞌanal taqꞌuin. Ti sate jaꞌ hech chaj cꞌu cheꞌel sat vinic xꞌelan.
\v 8 Ti stsotsil sjolique hech chaj cꞌu cheꞌel sjol antsetic. Ti yee chtuchꞌ yuꞌun ti ora ti cꞌusi chtuchꞌe hech chaj cꞌu cheꞌel chtiꞌvan jtiꞌvanej bolom.
\v 9 Oy smacbil sbecꞌtalic xꞌelan jun to pasbil ti taqꞌuin xꞌelan. Xtiriret chcꞌopoj ti xiqꞌue hech chaj cꞌu cheꞌel chcꞌopoj ep carretaetic nitbil yuꞌun caꞌ ti cꞌalal chbatic ti pleito.
\v 10 Ti sneique hech chaj cꞌu cheꞌel sne tsec chtiꞌvan. Hech ti sneic chlic yilbajinic ti crixchanoetique hoꞌob u.
\v 11 Ti ajvalil yuꞌun ti cꞌulubetique jaꞌ chꞌul abat onoꞌox ti sventainoj xa ti cꞌatimbaque. Ti ajvalile jaꞌ Abadón sbi ti hebreo cꞌop, Apolión sbi ti griego cꞌop. Jmilvanej sbi cꞌalal jelavesbil.
\p
\v 12 Jaꞌ hech ti sba vuelta ti vocol ti chichꞌique. Scꞌan to yan chib vuelta chichꞌic.
\p
\v 13 Ti svaquibal chꞌul abate lic yoqꞌuesan uc ti scornetae. Ti cꞌalal laj yoqꞌuesane, laj caꞌi oy jun chcꞌopoj te ti oꞌlol ti scajaneb smoton ti Diose, jaꞌ ti pasbil ti cꞌanal taqꞌuine ti te oy ti stojol ti Diose. Ti scajaneb smoton ti Diose oy slocꞌtombail xulub vacax ti jujun esquinae. Ti oꞌlol ti bu locꞌtabil ti xulub vacaxe te ilocꞌ tal ti cꞌope.
\v 14 Hech iꞌalbat ti svaquibal chꞌul abate ti yichꞌoj ti scornetae:
\p ―Ba coltao ti chanvoꞌ achiꞌiltaque ti te chucajtic nopol ucꞌum Eufrates sbi ―xꞌutat.
\p
\v 15 Te chucajtic ti chanvoꞌ chꞌul abatetique yuꞌun tsmalaic ti tsta yorail yuꞌun chbatic, yuꞌun chba smilic ticrixchanoetique. Yuꞌun icꞌot xa yorail, hech yuꞌun icoltaatic yuꞌun hech chba smilic ti crixchanoetique. Ti jujutos crixchanoetic jutuc mu sta oꞌlol ti chmilate. Hech tspas ti sjoylejal balumil.
\v 16 Ep xchiꞌiltac ti chanvoꞌique. Cajajtic ti caꞌ ti xchiꞌiltaque. Laj caꞌi jayvoꞌ. Jaꞌ chib ciento millón. Ep ti jyalel.
\p
\v 17 Hech xꞌelan ti caꞌetique xchiꞌuc ti muchꞌutic scajlebinojique ti niꞌacꞌbat jqꞌuele. Ti muchꞌutic cajajtique oy smacbil yoꞌntonic. Ti smacbil yoꞌntonique tsoj xchiꞌuc yox xchiꞌuc cꞌon. Jaꞌ tsoj hech chaj cꞌu cheꞌel cꞌocꞌ, yox hech chaj cꞌu cheꞌel zafiro-ton, cꞌon hech chaj cꞌu cheꞌel azufre. Ti sjol ti scaꞌique jaꞌ hech chaj cꞌu cheꞌel sjol jtiꞌvanej bolom. Yacꞌoj sba chlocꞌ ti yeic cꞌocꞌ xchiꞌuc chꞌayil xchiꞌuc azufre.
\v 18 Hech yuꞌun ti cꞌu yepal ti crixchanoetique ti jujutose, jutuc mu sta oꞌlol imilat. Hech laj spasbe ti jujutos ti crixchanoetique. Jaꞌ imilatic yuꞌun ti cꞌoqꞌue xchiꞌuc ti chꞌayile xchiꞌuc ti azufree ti ilocꞌ ti ye ti caꞌetique.
\v 19 Ti caꞌetique maꞌuc noꞌox imilvan ti yee. Jaꞌ imilvan uc ti snee. Ti snee jaꞌ orachon xꞌelan, oy sjol chtiꞌvan.
\p
\v 20 Ti crixchanoetique ti muc xmilatique, manchuc mi laj yilic ti imilat ti xchiꞌiltaque, muc sutes yoꞌntonic yuꞌun ti cꞌutic chopol tspasique. Mu scꞌan spajes sbaic ti yuꞌun tspasic ti mucꞌ ti pucujetique. Mu scꞌan scomesic ti yajsantoique ti pasbil ti cꞌanal taqꞌuine, ti saquil taqꞌuine, ti cobre taqꞌuine, ti tone, ti teꞌe, jaꞌ ti mu cuxuluque, ti mu xaꞌyic cꞌope, ti mu xanavique.
\v 21 Muc sutes yoꞌntonic ti oy smulique yuꞌun ti imilvanique, ti laj spasbe yabtel ti jpicchꞌichꞌe, ti imulivajique, ti iꞌelcꞌajique.
\c 10
\s Jaꞌ scꞌopilal ti chꞌul abate ti yichꞌoj ti biqꞌuit hune
\p
\v 1 Niꞌacꞌbat jqꞌuel uc iyal ti balumil totil chꞌul abat. Pixbil ti toc iyal. Oy meꞌqꞌuinobal ti sba sjol. Oy squeval sat hech chaj cꞌu cheꞌel squeval ti cꞌacꞌale. Ti yacane chtil hech chaj cꞌu cheꞌel cꞌocꞌ.
\v 2 Stsacoj ti scꞌob biqꞌuit hun. Balbil ti hune. Mu yichꞌojuc sello ti hune. Ti sbatsꞌicꞌobꞌacane jaꞌ laj stecꞌ ti nabe. Jaꞌuc ti stsꞌete laj stecꞌ ti balumile.
\v 3 Tsots icꞌopoj hech chaj cꞌu cheꞌel ch-avan jtiꞌvanej bolom. Cꞌalal laj yoꞌnton cꞌopojuc, iꞌavan ti hucub chavuque.
\v 4 Chcꞌopoj ti chavuque. Hech yuꞌun cꞌalal laj avanuc, jcꞌan jtsꞌiba ti hun ti cꞌusi laj yal ti chavuque. Laj caꞌi oy muchꞌu chcꞌopoj ti vinajel. Hech laj yalbun:
\p ―Mu me muchꞌu chavalbe ti cꞌusi laj yalic ti hucub chavuque. Mu me xatsꞌiba ti hun ―xiyutun.
\p
\v 5 Ti chꞌul abate ti te sjamoj ti yacane stecꞌoj ti nabe xchiꞌuc ti balumile, laj stoy scꞌob, jaꞌ ti sbatsꞌicꞌobe.
\v 6 Laj svaꞌan ti rextico ti Diose, jaꞌ ti cuxul sbatel osile, jaꞌ ti laj spas ti vinajele xchiꞌuc scotol ti cꞌutic te oye, jaꞌ ti laj spas ti balumile xchiꞌuc scotol ti cꞌutic liꞌoye, jaꞌ ti laj spas ti nabe xchiꞌuc scotol ti cꞌutic te oye. Hech laj yal:
\p ―Laj xa sta yorail.
\v 7 Hech cꞌalal chlic yoqꞌuesan scorneta ti sucvaꞌal ti jchiꞌile te chvinaj ti cꞌu cheꞌel snopoj onoꞌox ti yoꞌnton ti Diose ti mu to chaꞌibeic sjam ti crixchanoetique, jaꞌ ti cꞌu cheꞌel icholbat ti jꞌalcꞌopetique ti voꞌone, jaꞌ ti laj yacꞌ sbaic ti abatinel yuꞌune ―xchi ti totil chꞌul abate.
\p
\v 8 Ti Cajvaltique ti laj scꞌoponun tal ti vinajel ti jbaele laj caꞌi, jaꞌ laj xchaꞌcꞌoponun yan vuelta. Hech laj yalbun:
\p ―Batan, ba tsaco ti biqꞌuit hune, jaꞌ ti muꞌyuc sello yichꞌoje ti stsacoj ti scꞌob ti chꞌul abate ti jaꞌ te stecꞌoj ti nabe xchiꞌuc ti balumile ―xiyutun.
\p
\v 9 Hech yuꞌun ba jcꞌopon ti chꞌul abate, laj jcꞌambe ti biqꞌuit hune. Hech laj yalbun:
\p ―Ichꞌo, bicꞌan. Chiꞌ chavaꞌi hech chaj cꞌu cheꞌel ajapom. Chꞌa chavaꞌi cꞌalal chaquebta ―xiyutun.
\p
\v 10 Hech yuꞌun laj jtsac ti biqꞌuit hune ti te oy ti scꞌob ti chꞌul abate, laj jbicꞌ. Chiꞌ laj caꞌi hech chaj cꞌu cheꞌel ajapom. Cꞌalal laj jquebta, chꞌa laj caꞌi.
\v 11 Hech niꞌalbat:
\p ―Ti hune ti laj abiqꞌue, jaꞌ señail ti ta to me xatsꞌibabe scꞌopilal yan ep vocol ti chichꞌic ti crixchanoetique ti jaylajuntos ti oyic ti balumile xchiꞌuc ti ajvaliletic yuꞌunique ―xiyutun.
\c 11
\s Jaꞌ scꞌopilal ti chaꞌvoꞌique ti chchol scꞌop Dios te ti Jerusalén
\p
\v 1 Hech yuꞌun niꞌacꞌbat jchꞌix aj hech chaj cꞌu cheꞌel metro sventa yuꞌun oy cꞌusi ti jpꞌistic. Hech niꞌalbat:
\p ―Ba pꞌiso cꞌu smucꞌul ti templo cuꞌune te ti Jerusalén xchiꞌuc ti bu ti scajaneb jmotone. Tuso me uc jayvoꞌ ti achiꞌiltaque ti te chiyalbucun vocol te ti templo yuꞌun muꞌyuc muchꞌu ep ti chiyalbucun vocol ti jtojole.
\v 2 Mu me xatsac ti venta ti amacꞌ yuꞌun ti temploe. Mu me xapꞌis yuꞌun laj xa cacꞌbe ti scꞌobic ti yanlum crixchanoetique. Yuꞌun ti jteclum Jerusalene, jaꞌ ti tsots scꞌopilal avuꞌunique, oꞌlol xchanibal habil te chnaquiic o ti yanlum crixchanoetique, te chixtanic.
\v 3 Ti jtac batel chaꞌvoꞌic. Te chcꞌotic ti Jerusalén yuꞌun chcꞌo yalbe ti achiꞌiltaque, hoꞌoxuc ti judiooxuque, ti cꞌusi jcꞌan xcalbee. Slapojic icꞌal pocꞌ chanavic batel, jaꞌ señail ti acꞌo sutes yoꞌntonic yuꞌun ti smulique ti achiꞌiltaque. Ti chaꞌvoꞌique hal chchol ti jcꞌope. Jaꞌ chchol oꞌlol xchanibal habil ―xiyutun.
\p
\v 4 Ti chaꞌvoꞌique jaꞌ hech chaj cꞌu cheꞌel chaꞌtecꞌ oliva-teꞌ, jaꞌ hech chaj cꞌu cheꞌel chib candelero ti te oyic ti stojol ti Diose, jaꞌ ti Yajval scotol ti balumile.
\v 5 Mi oy muchꞌu scꞌan chilbajin ti chaꞌvoꞌique, chlocꞌ cꞌocꞌ ti yeic. Hech tsmilic ti yajcontraique. Hech tsmilic ti muchꞌu scꞌan ch-ilbajinat yuꞌune.
\v 6 Ti chaꞌvoꞌique acꞌbil spꞌijil yuꞌun hech xuꞌ tspajes ti hoꞌe te ti vinajel hech mu xtal hoꞌ ti balumil cꞌalal yacꞌoj sba chcholic ti cꞌusi ch-albatic yuꞌun ti Diose. Acꞌbil spꞌijil uc yuꞌun xuꞌ tscꞌatajes ti chꞌichꞌ ti ucꞌumetique, xuꞌ chacꞌbe xchamel ti crixchanoetique, ti jayib vuelta tscꞌan yoꞌntonic ti chacꞌbe xchamel ti crixchanoetique.
\v 7 Cꞌalal mi laj sta yorail ti jayib cꞌacꞌal chchol ti scꞌop ti Diose ti chaꞌvoꞌique, chlocꞌ tal ti cꞌatimbac ti jtiꞌvanej bolome. Jaꞌ tspas pleito xchiꞌuc. Jaꞌ tsalbil chcꞌotic ti chaꞌvoꞌique. Jaꞌ chmilatic yuꞌun ti bolome.
\p
\v 8 Ti chaꞌvoꞌique te chcom sbecꞌtalic te ti calle te ti Jerusalén yoꞌ bu imilat ti cruz ti Cajvaltique. Ti sventa ti Chꞌul Espíritue ti jnaꞌtic ti coꞌol yoꞌntonic ti jchiꞌiltac ti te nacajtique xchiꞌuc ti muchꞌutic nacajtic ti Sodoma xchiꞌuc ti Egipto ti voꞌone chil ti Diose.
\v 9 Oꞌlol xchanibal cꞌacꞌal chqꞌuelilambat sbecꞌtalic yuꞌun ti jaylajunchop crixchanoetic ti liꞌ ti balumile. Mu xaqꞌuic licensa yuꞌun ti acꞌo mucatuc ti ora.
\v 10 Ti muchꞌutic oyic ti balumile nichim noꞌox yoꞌntonic yuꞌun ti imilatic xa ti chaꞌvoꞌique. Tspasbeic sqꞌuinal. Chacꞌbe sbaic smotonic yuꞌun ti icham xa ti chaꞌvoꞌique yuꞌun ep itijbat yoꞌntonic yuꞌunic cꞌalal cuxajtic toe.
\v 11 Cꞌalal iꞌechꞌ ti oꞌlol xchanibal cꞌacꞌale, ti chaꞌvoꞌique ichaꞌcusesat yuꞌun ti Diose, hech laj jqꞌuel. Hech iliquic, laj svaꞌan sbaic. Scotol ti muchꞌutic laj sqꞌuelique, toj xiꞌel icꞌotic.
\v 12 Ti chaꞌvoꞌique laj yaꞌi oy tsots chcꞌopoj ti vinajel. Hech iꞌalbatic:
\p ―Muanic tal liꞌi ―xꞌutatic.
\p Ti yajcontraique te vaꞌajtic laj sqꞌuelic imuic batel ti vinajel xchiꞌuc toc ti chaꞌvoꞌique.
\v 13 Ti ora tsots inic ti balumile. Jaꞌ ijin ti naetic te ti jteclum Jerusalén. Mi oy jmil ti naetique, ijin cien. Baluneb ciento lec icom. Hucmil ti voꞌ ichamic ti crixchanoetique cꞌalal inic ti balumile. Ti yantique toj xiꞌel icꞌotic. Laj yalbeic vocol ti stojol ti Diose ti te nacal ti vinajele.
\p
\v 14 Jaꞌ hech ti xchibal vuelta ti vocole. Poꞌot xa chtal ti yoxibal vuelta.
\s Jaꞌ scꞌopilal ti sucubal chꞌul abate ti laj yoqꞌuesan ti scornetae
\p
\v 15 Ti sucubal chꞌul abate lic yoqꞌuesan uc ti scornetae. Oy tsots icꞌopojic ti vinajel. Hech laj yalic:
\q Laj xa sta yorail ti ilaj xa yabtel ti totil ajvaliletic te ti balumile.
\q Lic xa spas mantal ti balumil ti Diose xchiꞌuc ti muchꞌu tꞌujbil yuꞌune, jaꞌ ti Cristoe.
\q Jaꞌ tspas mantal sbatel osil,
\m xchiic.
\v 16 Ti veinticuatro totiletique ti te nacajtic ti snaclebic te yoꞌ bu oy ti Diose, hech lic spatan sbaic ti stojol. Ilequilcꞌopojic yuꞌun ti Diose.
\v 17 Hech laj yalbeic:
\q Cajvaltic Dios, hoꞌot jelaven apꞌijil hech scotol xuꞌ avuꞌun.
\q Hoꞌot atalel cuxulot.
\q Hocol avalbuntutic ti lic xa apas mantal atuc.
\q Atuc aventainoj scotol.
\q
\v 18 Scotol ti muchꞌutic muc xchꞌunic ti acꞌope hovil ti laj stoy sbaic ti atojol.
\q Ista xa yorail ti chavacꞌbe castigo.
\q Ista xa yorail ti ch-ichꞌbat scꞌop ti muchꞌutic chamenic xae ti muc xchꞌun ti acꞌope.
\q Ista xa yorail ti chavacꞌbe smotonic ti muchꞌutic iꞌabtejic avuꞌune, jaꞌ ti jꞌalcꞌopetic avuꞌune, xchiꞌuc ti muchꞌutic chaspasot ti muqꞌue.
\q Mi tsots mi mu tsotsuc yabtel yichꞌojic, jaꞌ chavacꞌbe smotonic.
\q Ista xa yorail ti chꞌayel chbatic avuꞌun ti muchꞌutic laj sbolibtasbe yoꞌntonic ti crixchanoetique te ti balumile,
\m xchiic ti stojol.
\p
\v 19 Ti ora ijam ti templo yuꞌun ti Diose te ti vinajel laj quil. Te ivinaj ti yut templo ti arca yuꞌun ti tratoe. Chleblej tselov. Oy cꞌusi tsots chcꞌopoj. Ch-avan chavuc. Inic scotol. Ep mucꞌta bot ital.
\c 12
\s Jaꞌ scꞌopilal ti antse xchiꞌuc ti dragone
\p
\v 1 Te ivinaj ti vinajel señail ti tsots scꞌopilale. Te ivinaj jun ants. Jaꞌ scꞌuꞌ ti cꞌacꞌale, stecꞌoj ti ue. Ti scoronae ti te ti sjole jaꞌ lajcheb cꞌanaletic.
\v 2 Slicoj yol ti antse. Ilic xa ti xcꞌuxul xchꞌute. Ch-avan ti antse scoj ti cꞌux xchꞌut chaꞌie yuꞌun chcol xa ti alajel.
\v 3 Oy yan señail ivinaj uc te ti vinajel. Te oy jcot chon jun to iguana xꞌelan pero más mucꞌ. Dragón sbi ti chone. Tsoj ti dragone. Hucpꞌej ti sjole. Lajunchꞌix ti xulube. Oy scorona ti jujupꞌej sjole.
\v 4 Laj smey ti cꞌanaletic ti sne, hech laj sten yalel ti cꞌanaletique. Jutuc mu sta oꞌlol ti cꞌanaletique ti laj sten yalele. Ti dragone te cotol ti stojol ti antse ti poꞌot xa chcol ti alajele. Yuꞌun scꞌan stiꞌbe yol cꞌalal mi iꞌane.
\v 5 Iꞌan yol ti antse. Querem laj yacꞌ. Ti yole jaꞌ acꞌbil yabtel yuꞌun tspas ti mantal scotol crixchanoetic. Persa chchꞌumbat smantal. Ti yol ti antse ti ora iꞌicꞌat muel ti stojol ti Diose ti te nacal ti mucꞌta naclebale.
\v 6 Ti antse chjatav ti xocol balumil yoꞌ bu smeltsanoj ti Diose ti bu chnaquie. Te chmacꞌlinat yuꞌun ti Diose oꞌlol xchanibal habil.
\p
\v 7 Patil ilic mucꞌta pleito te ti vinajel laj jqꞌuel. Te oy ti vinajel jun totil chꞌul abat, Miguel sbi. Ti Miguele xchiꞌuc ti chꞌul abatetic ti tspasatic ti mantal yuꞌun ti Miguele, jaꞌ laj spasic pleito xchiꞌuc ti dragone. Ti dragone jaꞌ chcoltaat yuꞌun ti abatetic yuꞌune.
\v 8 Ti dragone xchiꞌuc ti abatetic yuꞌune tsalbil icꞌotic, muc xuꞌ yuꞌunic ti te chcomic te ti vinajel.
\v 9 Hech yuꞌun jꞌechꞌel itenatic loqꞌuel yal tal ti vinajel ti dragone laj quil. Mu xa xuꞌ ch-ochic o. Jaꞌ ti chon onoꞌoxe ti yacꞌoj sba tsloꞌla scotol crixchanoetic ti balumile, jaꞌ ti totil pucuje, jaꞌ ti Satanás sbie. Hech jꞌechꞌel itenatic yal tal ti balumil xchiꞌuc ti abatetic yuꞌune.
\p
\v 10 Hech yuꞌun laj caꞌi oy tsots chcꞌopojic te ti vinajel. Hech laj yalic:
\p ―Laj xa sta yorail chcoltavan ti Dios cuꞌuntique. Chvinaj ti jelaven spꞌijile, chlic spas mantal stuc. Ch-och ti pas mantal ti muchꞌu tꞌujbil yuꞌune, jaꞌ ti Cristoe, yuꞌun itenat xa loqꞌuel ti Satanase ti jaꞌ tsaꞌilambe smul ti quermanotique ti te oyic ti balumile. Ti cꞌacꞌal ti acꞌubal laj saꞌbe smulic ti stojol ti Dios cuꞌuntique.
\v 11 Jaꞌ tsalbil icꞌot xa yuꞌunic ti sventa ti icham yuꞌunic ti Cajvaltique, ti sventa uc ti jamal laj yalic ti xchꞌunojique. Yuꞌun mu xcꞌuxubin sbaic. Mu xiꞌic mi chmilatique.
\v 12 Hech yuꞌun nichim noꞌox coꞌntontic, hoꞌucutic ti liꞌoyucutic ti vinajele. Jaꞌ uts sbaic ti te nacajtic ti balumile xchiꞌuc ti mare, yuꞌun jꞌechꞌel iyal xa batel ti totil pucuje. Liquem sjol ti ora to yuꞌun tsnaꞌ ti mu xa epuc cꞌacꞌal xuꞌ ch-abteje ―xchi.
\p
\v 13 Ti cꞌalal laj yil ti dragone ti jꞌechꞌel itenat yal tal liꞌ ti balumile, hech lic yilbajin ti antse, jaꞌ ti querem laj yaqꞌue.
\v 14 Ti Diose laj yacꞌbe chib xicꞌ ti antse hech chaj cꞌu cheꞌel xicꞌ mucꞌta xique yuꞌun hech acꞌo viluc loqꞌuel te ti stojol ti dragone. Hech chbat ti antse ti xocol balumil yoꞌ bu chmacꞌlinat yuꞌun ti Diose oꞌlol xchanibal habil.
\v 15 Cꞌalal laj yil ti dragone ti chjatav xa ti antse, hech ilocꞌ tal ep hoꞌ ti ye ti dragone, ucꞌum xꞌelan, yuꞌun acꞌo batuc ti ucꞌum ti antse.
\v 16 Ti Diose laj scolta ti antse. Laj sjav ti balumile, hech iꞌoch batel ti yut balumil ti hoꞌe ti ilocꞌ ti ye ti dragone. Hech icol batel ti antse ti scꞌopilal onoꞌox chbate.
\v 17 Hech yuꞌun iꞌilin ti dragone yuꞌun ti tsalbil icꞌote, hech ba spas pleito xchiꞌuc ti yalabtac ti antse ti tꞌujbilic ti ta to xcolique. Jaꞌ ti muchꞌutic xchꞌunojbeic smantal ti Diose liꞌ ti balumile, ti yacꞌoj sba xcholbeic scꞌopilal ti Jesucristoe.
\c 13
\s Jaꞌ scꞌopilal ti chaꞌcot jtiꞌvanej bolome
\p
\v 1-2 Ti dragone laj scotan sba ti hiꞌ te ti tiꞌnab. Laj jqꞌuel ilocꞌ tal ti nab jun to jcot jtiꞌvanej bolom xꞌelan. Chopol ti qꞌuelel chijxiꞌ yuꞌun. Hucpꞌej ti sjole. Lajunchꞌix ti xulube. Oy lajuneb scorona, jujun scorona jujuchꞌix xulub. Te tsꞌibabil ti jujupꞌej sjole sbi stuc. Ti cꞌu cheꞌel tsꞌibabile jaꞌ tstoy sba ti stojol ti Diose. Ti scꞌob yacane jaꞌ hech chaj cꞌu cheꞌel scꞌob yacan ti osoe. Ti yee jaꞌ hech chaj cꞌu cheꞌel ye jtiꞌvanej bolom. Ti dragone laj yacꞌbe spꞌijil hech chaj cꞌu cheꞌel spꞌijil stuc. Laj yacꞌbe spas mantal hech chaj cꞌu cheꞌel tspas mantal stuc. Tsots yabtel laj yichꞌ ti jun to bolom xꞌelane.
\v 3 Laj jqꞌuel ti yajem jpꞌej sjol. Ta yutsil chcham ti hechuque. Pero ichop xa ti bu yajeme. Scotol crixchanoetic ichꞌay yoꞌntonic yuꞌun ti ichope, hech yuꞌun laj stsꞌacliic batel.
\v 4 Ti crixchanoetique ilequilcꞌopojic yuꞌun ti dragone yuꞌun ti laj yacꞌbe yabtel yuꞌun tspas mantal ti jun to bolom xꞌelane. Ilequilcꞌopojic uc yuꞌun ti jun to bolom xꞌelane. Hech laj yalic:
\p ―Muꞌyuc muchꞌu hech tsots yabtel yichꞌoj hech chaj cꞌu cheꞌel ti bolome. Muꞌyuc muchꞌu stsalat yuꞌun ―xchiic.
\p
\v 5 Ti Diose laj yacꞌ cꞌopojuc ti jun to bolom xꞌelane. Ep lic stoy sba. Ep ichopolcꞌopoj yuꞌun ti Diose. Ti Diose laj yacꞌ licensa yuꞌun tspas mantal oꞌlol xchanibal habil.
\v 6 Ep ichopolcꞌopoj yuꞌun ti Diose. Laj yixtambe sbi ti Diose. Chopol icꞌopoj yuꞌun ti stemplo ti Diose xchiꞌuc ti muchꞌutic batemic xa te ti vinajele.
\v 7 Ti Diose laj yacꞌ licensa ti acꞌo spas pleito ti bolome xchiꞌuc ti muchꞌutic chꞌumbil ti scꞌope liꞌ ti balumile. Laj yacꞌ licensa ti Diose ti acꞌo tsalatuc ti xnichꞌnabe yuꞌun ti bolome. Ti bolome ti Diose laj yacꞌbe licensa yuꞌun tsventain ti jaylajuntos crixchanoetic ti liꞌoyic ti balumile.
\v 8 Scotol ti muchꞌutic liꞌoyic ti balumile, jaꞌ ti mu pꞌejambiluc sbiic ti cꞌalal mu to chlic ti balumile te ti hun sventa cuxlejal sbatel osile, jaꞌ laj squejan sbaic ti stojol ti bolome. Jaꞌuc ti muchꞌu pꞌejajtic ti hun sbiic ti sventa chcuxiic sbatel osile, ti jaꞌ yichꞌoj ti Chꞌiom Carneroe, jaꞌ ti imilate, jaꞌ ti ichaꞌcuxi xae, jaꞌ muc squejan sbaic ti stojol laj quil.
\p
\v 9 Aꞌyo me avaꞌyic acotolic.
\v 10 Ti muchꞌu chchucvane ta onoꞌox yichꞌ chuquel stuc. Ti muchꞌu chmilvane ta onoꞌox xmilat stuc. Hech yuꞌun ti muchꞌutic tspasic ti mucꞌ ti Diose ti liꞌoyic ti balumile ti cꞌalal ti yorail ti hech vocole, tscꞌan ti oy stsatsal yoꞌntonic, tscꞌan ti chchꞌunic ti ta onoꞌox xcolic sbatel osile.
\p
\v 11 Patil laj jqꞌuel ilocꞌ tal ti balumil yan jcot jtiꞌvanej bolom. Chijxiꞌ yuꞌun uc. Chib ti xulube jaꞌ hech chaj cꞌu cheꞌel xulub carnero. Ti cꞌalal icꞌopoje, jaꞌ hech chaj cꞌu cheꞌel scꞌop ti dragone.
\v 12 Coꞌol tsots yabtel yichꞌoj hech chaj cꞌu cheꞌel ti primero jtiꞌvanej bolome. Jaꞌ lic pasvanuc ti mantal. Tspas ti mantal ti muchꞌutic liꞌ nacajtic ti balumile yuꞌun acꞌo ba xchꞌumbeic smantal ti primero jtiꞌvanej bolome, jaꞌ ti chopen xa ti sjole ti bu yajeme.
\v 13 Jaꞌ ti bolom ti patil ivinaje tspas ep jchop o abteletic. Ihuꞌ yuꞌun laj sten yalel ti balumil cꞌocꞌ. Ti crixchanoetique laj sqꞌuelic ti hech iyal ti cꞌoqꞌue.
\v 14 Hech yuꞌun ti xchaꞌcotol bolome ti Diose laj yacꞌbe spas ep jchop o abteletic te ti stojol ti primero jtiꞌvanej bolome. Iꞌacꞌbat licensa uc yuꞌun tspas ti mantal ti crixchanoetique ti acꞌo spasbeic slocꞌtombail ti primero jtiꞌvanej bolome, jaꞌ ti laj yichꞌ milel ti espadae muc xcham.
\v 15 Ti Diose laj yacꞌ licensa ti acꞌo cuxiuc ti slocꞌtombail ti primero jtiꞌvanej bolome, hech lic cꞌopojuc ti slocꞌtombaile. Hech lic yal mantal:
\p ―Acꞌo milatuc scotol ti muchꞌutic mu squejan sbaic ti jtojol ―xchi―.
\v 16 Acꞌo yichꞌbe smarca ti totil cuꞌune ti jaꞌ slocꞌtombailune scotol crixchanoetic, mi mucꞌ, mi biqꞌuit, mi jcꞌulej, mi meꞌon, mi libre oyic, mi oyic ti mozoil. Jaꞌ noꞌox chichꞌ ti sbatsꞌicꞌob o ti stiba ―xchi―.
\v 17 Jaꞌ noꞌox xuꞌ chmanolaj xuꞌ chchonolaj ti muchꞌutic yichꞌojic ti smarcaique ―xchi.
\p Ti smarcaique jaꞌ ti sbi ti primero jtiꞌvanej bolome o ti snúmero ti primero jtiꞌvanej bolome.
\v 18 Jaꞌ noꞌox ti muchꞌutic pꞌijuben ti sventa Dios jaꞌ noꞌox xuꞌ chaꞌibe sjam ti oy snúmero ti primero jtiꞌvanej bolome. Snúmero noꞌox crixchano. Jaꞌ seiscientos sesenta y seis ti snúmeroe.
\c 14
\s Jaꞌ scꞌopilal ti iqꞌuejinic ciento cuarenta y cuatro ti mil ti voꞌ
\p
\v 1 Patil laj quil te vaꞌal ti ba vits ti Chꞌiom Carneroe. Jaꞌ Sión sbi ti vitse. Te xchiꞌinoj ciento cuarenta y cuatro ti mil ti voꞌ, jaꞌ ti tsꞌibabil ti stibaic ti sbi ti Chꞌiom Carneroe xchiꞌuc ti sbi ti Stote, jaꞌ ti Diose.
\v 2 Laj caꞌi oy chcꞌopoj ti vinajel hech chaj cꞌu cheꞌel chcꞌopoj nojelal ucꞌum, hech chaj cꞌu cheꞌel tsots ch-avan chavuc, hech chaj cꞌu cheꞌel mi tstijic yarpaic ep crixchanoetic.
\v 3 Jaꞌ ti ciento cuarenta y cuatro ti mil ti voꞌe ti tsqꞌuejintaic achꞌ qꞌuejoj te ti stojol ti Diose xchiꞌuc ti stojol ti chanvoꞌique, xchiꞌuc ti stojol ti totiletique. Muꞌyuc muchꞌu yan snaꞌ ti qꞌuejoje, jaꞌ noꞌox ti ciento cuarenta y cuatro ti mil ti voꞌ ti icoltaatic xa loqꞌuel liꞌ ti balumile.
\v 4 Jaꞌ ti muchꞌutic muc sta smulic ti stojol yan antsetic yuꞌun jun yoꞌntonic ti stojol ti Diose. Yuꞌun jaꞌ noꞌox laj stsꞌacliic ti Chꞌiom Carneroe. Hech yuꞌun itꞌujatic loqꞌuel ti oꞌlol ti crixchanoetique yuꞌun hech sba snichꞌon Dios icꞌotic. Jaꞌ sba snichꞌon ti Chꞌiom Carneroe icꞌotic uc.
\v 5 Ti cꞌutic laj yalique puru melel. Mi jutuc muꞌyuc bu itabatic smulic.
\s Jaꞌ ti cꞌusi laj yal ti oxvoꞌ chꞌul abatetique
\p
\v 6 Laj quil ivil batel ti oꞌlol vinajel jun chꞌul abat. Jaꞌ chba xchol ti lequil achꞌ cꞌope ti mu xlaj scꞌopilal sbatel osile. Jaꞌ chba xcholbe yaꞌyic ti jaylajuntos crixchanoetic ti te oyic ti sjoylejal balumile.
\v 7 Tsots icꞌopoj, hech laj yalbe:
\p ―Xiꞌic ti Diose. Pasic me ti mucꞌ yuꞌun ista xa yorail ti ch-ichꞌbat scꞌop scotol crixchanoetic yuꞌun smulic. Quejano me abaic ti stojol yuꞌun jaꞌ laj spas ti vinajele ti balumile ti nabe xchiꞌuc ti butic chlocꞌ tal ti hoꞌe ―xchi.
\p
\v 8 Ital yan chꞌul abat laj quil. Jaꞌ xchibal xa. Hech laj yal:
\p ―Ta xa xjin scotol ti muchꞌutic te nacajtic ti jteclum Babiloniae, jaꞌ ti mucꞌ scuyoj sbaique, jaꞌ ti laj xchibajesbe yoꞌntonic scotol crixchanoetic ti stojol ti Diose, ti hech ba xchꞌunic santoetic yuꞌunic, ti hech ibicꞌtaj yoꞌntonic yuꞌun taqꞌuin yuꞌunic ―xchi.
\p
\v 9 Ital yan xchꞌul abat. Jaꞌ yoxibal xa. Tsots icꞌopoj uc, hech laj yal:
\p ―Scotol ti muchꞌutic tspasic ti mucꞌ ti jtiꞌvanej bolome xchiꞌuc ti slocꞌtombaile, mi chichꞌ ti stiba mi ti scꞌob ti smarca ti jtiꞌvanej bolome,
\v 10 jaꞌ ch-acꞌbat castigo uc yuꞌun ti Diose yuꞌun ilinem ti stojol. Tsots ti jyalel ti castigo ti ch-acꞌbate. Jaꞌ ep chichꞌ vocol ti cꞌocꞌ yoꞌ bu chtil azufre. Te ti jqꞌuelbetutic svocol hoꞌontutic ti yabatuntutic ti Diose. Te tsqꞌuel uc ti Chꞌiom Carneroe.
\v 11 Sbatel osil chloqꞌuilan xchꞌayilal ti cꞌoqꞌue yoꞌ bu chichꞌic ti vocole. Ti cꞌacꞌal ti acꞌubal mi jutuc mu xcux yoꞌntonic ti muchꞌutic laj spasic ti mucꞌ ti jtiꞌvanej bolome xchiꞌuc ti slocꞌtombaile, jaꞌ ti muchꞌutic yichꞌojbeic sbi ti bolome ti scꞌob mi stiba.
\v 12 Hech yuꞌun ti muchꞌutic lecubtasbil yoꞌntonic yuꞌun ti Diose ti te oyic ti balumile tscꞌan ti oy stsatsal yoꞌntonic. Acꞌo xchꞌumbeic smantal ti Diose, jamal acꞌo yalic ti xchꞌunojbeic scꞌop ti Jesuse ―xchi ti chꞌul abate.
\p
\v 13 Laj caꞌi oy chcꞌopoj te ti vinajel. Hech laj yalbun:
\p ―Hech me chatsꞌiba ti hun: “Nichim noꞌox yoꞌntonic sbatel osil ti muchꞌutic oyic ti stojol ti Diose ti cꞌalal chchamique”―xiyutun―. “Melel ti nichim yoꞌntonique yuꞌun chcux yoꞌntonic. Mu xa xꞌabtejic yuꞌun tsacbil ti venta ti cꞌu cheꞌel iꞌabtejique” xchi ti Chꞌul Espíritue ―xiyutun ti muchꞌu laj scꞌoponun te ti vinajele.
\s Jaꞌ scꞌopilal ti jun to jaꞌ yorail cꞌajoj yaꞌyel ti balumil
\p
\v 14 Laj quil te oy jun toc. Sac ti toque. Oy muchꞌu te nacal ti toc, jun to crixchano xꞌelan. Oy scorona ti sjol. Pasbil ti cꞌanal taqꞌuin ti scoronae. Stsacoj ti scꞌob hoz. Oy ye ti hoze.
\v 15 Oy chꞌul abat ilocꞌ tal ti templo te ti vinajel laj quil. Tsots lic cꞌopojuc, hech laj yalbe ti muchꞌu te nacal ti toque:
\p ―Cupo xchiꞌuc ahoze ti atrigoe yuꞌun ista xa yorail scupel. Yuꞌun itaquij xa ti atrigoe ―xchi.
\p
\v 16 Hech yuꞌun ti muchꞌu te nacal ti ba toque lic scup ti strigoe ti sjoylejal balumil. Ti trigoe jaꞌ señail ti muchꞌutic ti xchꞌunojbeic scꞌop ti Diose ti te oyic ti balumile.
\p
\v 17 Oy yan chꞌul abat ilocꞌ tal ti templo te ti vinajel laj quil. Yichꞌoj soz uc. Oy lec ye uc ti soze.
\v 18 Te yoꞌ bu ti scajaneb smoton ti Diose te ti vinajel ilocꞌ tal yan chꞌul abat, jaꞌ ti sventainoj ti cꞌocꞌ te ti scajaneb smoton ti Diose. Tsots lic cꞌopojuc, hech laj yalbe ti muchꞌu yichꞌoj ti hoz ti oy lec yee:
\p ―Tuchꞌo xchiꞌuc ti ahoze ti sat ti uvateꞌe te ti balumile, tsobo tal yuꞌun itocꞌonaj xa ti sate ―xut. Ti sat ti uvateꞌe, jaꞌ señail ti muchꞌutic mu spasic ti mucꞌ ti Diose ti te oyic ti balumile.
\p
\v 19-20 Hech yuꞌun ti chꞌul abate lic xtuchꞌ xchiꞌuc soz ti sat ti uvateꞌe liꞌ ti balumile. Laj stsob tal ti sat uvateꞌe. Laj sten ochel ti yut ti jombil tone yoꞌ bu tsloqꞌuesbeic yaꞌlel sat ti uvateꞌe te ti spat macteꞌton yuꞌun ti jteclum Jerusalene. Hech lic steqꞌuic yuꞌun tstꞌusic yuꞌun acꞌo locꞌuc ti yaꞌlele. Maꞌuc yaꞌlel sat uvateꞌ ilocꞌ. Jaꞌ puru chꞌichꞌ ti iloqꞌue. Jaꞌ yuꞌun oy ti pleitoe. Ti chꞌichꞌe asta itaat ti sfreno ti scaꞌique. Oxib ciento kilómetro ixanav batel ti chꞌichꞌe.
\c 15
\s Jaꞌ scꞌopilal ti hucvoꞌ chꞌul abatetic ti yichꞌojic ti hucub castigoe
\p
\v 1 Laj quil yan señail te ti vinajel. Yan xꞌelan, chchꞌay coꞌntontic yuꞌun. Te oy hucvoꞌ chꞌul abatetic ti ch-acꞌbatic yichꞌic jujun castigo. Jaꞌ slajeb ti castigoe yuꞌun te tstsꞌaqui scotol ti yilintael ti crixchanoetique yuꞌun ti Diose.
\p
\v 2 Laj quil uc jun to nab xꞌelan pasbil ti espejo xꞌelan. Oy cꞌocꞌ te chtil uc. Te vaꞌajtic nopol tiꞌnab scotol ti muchꞌutic ihuꞌ yuꞌunic muc spasic ti mucꞌ ti jtiꞌvanej bolome xchiꞌuc ti slocꞌtombaile, ti muc xichꞌbeic ti smarcaique, jaꞌ ti snúmero o ti sbi ti bolome. Te vaꞌajtic yichꞌojic yarpaic ti iꞌacꞌbatic yuꞌun ti Diose.
\v 3 Te chqꞌuejinic. Chqꞌuejinic hech chaj cꞌu cheꞌel iqꞌuejin ti Moisese ti cꞌalal icoltaatic loqꞌuel ti mozoil te ti Egipto xchiꞌuc ti jtatamoltique ti voꞌone, hoꞌucutic ti coꞌol judioucutic xchiꞌuque. Ti qꞌuejoje jaꞌ ti laj yalbeic scꞌopilal ti jelaven spꞌijil ti Diose. Jaꞌ noꞌox hech ti muchꞌutic ti yichꞌojic yarpaic ti laj jqꞌuele, jaꞌ laj yalbeic scꞌopilal ti jelaven spꞌijil ti Chꞌiom Carneroe. Hech iqꞌuejinic:
\q Cajvaltic Dios, jelaven apꞌijil atuc.
\q Scotol xuꞌ avuꞌun chapas.
\q Jun noꞌox yutsil scotol avabtel.
\q Toj ti cꞌusi chapase.
\q Melel ti acꞌope.
\q Hoꞌot ajvalilot atuc sbatel osil.
\q
\v 4 Scotolic chlic xiꞌuc ti atojol, Cajval.
\q Scotolic chlic yal ti hoꞌot atuc ajvalilot yuꞌunic.
\q Yuꞌun atuc noꞌox toj avoꞌnton.
\q Yuꞌun hech avaloj onoꞌox ti acꞌop, hech yuꞌun scotol crixchanoetic chlic yalic ti toj chachapanvane,
\m xchiic.
\p
\v 5 Patil laj quil te ti vinajel laj sjamic ti yut temploe, jaꞌ ti jelaven chꞌul cuarto sbie yoꞌ bu chcꞌoponatic yuꞌun ti Diose.
\v 6 Iloqꞌuic ti yut templo ti hucvoꞌ chꞌul abatetique jaꞌ ti ch-acꞌbatic yichꞌic ti hucub castigoe. Sac scꞌuꞌ slapojic. Puru pino pocꞌ ti scꞌuꞌique. Chquevan ti scꞌuꞌique. Oy xincha xchucoj ti stiꞌ yoꞌntonique. Pasbil ti cꞌanal taqꞌuin ti xinchaique.
\v 7 Hech yuꞌun jun, jaꞌ ti chanvoꞌic xchiꞌuque, lic yacꞌ hucub taza. Pasbil ti cꞌanal taqꞌuin ti tazaetique. Jaꞌ iꞌacꞌbat ti hucvoꞌ chꞌul abatetique. Jujun taza laj yichꞌ jujun. Ti tazaetique jaꞌ te nojem ti yilintael ti crixchanoetique yuꞌun ti Diose, jaꞌ ti stalel cuxul sbatel osile.
\v 8 Inoj ti chꞌayil ti temploe. Jaꞌ señail ti mucꞌ ti Diose ti jelaven spꞌijile. Muꞌyuc muchꞌu xuꞌ ch-och xa ti templo. Jaꞌto mi ilaj scꞌopilal ti hucub castigoe ti yichꞌojic ti hucvoꞌ chꞌul abatetique, jaꞌto xuꞌ ch-ochic.
\c 16
\s Jaꞌ scꞌopilal ba malic ti balumil ti castigo ti chcacꞌbe ti crixchanoetique ti te ticꞌajtic ti hucub taza ti avichꞌojique, xꞌutatic
\p
\v 1 Laj caꞌi tsots chcꞌopoj ti Diose te ti templo te ti vinajel. Hech laj yalbe ti hucvoꞌ chꞌul abatetique:
\p ―Batanic, ba malic ti balumil ti castigo ti chcacꞌbe ti crixchanoetique ti te ticꞌajtic ti hucub taza ti avichꞌojique ―xut.
\p
\v 2 Hech iyal tal ti jun chꞌul abate, tal smal ti balumil ti castigo ti te tiqꞌuil ti stazae. Hech ilic ep chin ti sbecꞌtalic ti muchꞌutic ti yichꞌojbeic ti smarca ti jtiꞌvanej bolome, jaꞌ ti laj squejan sbaic ti stojol ti slocꞌtombaile. Tu ti jyalel ti sbecꞌtalique scoj ti chine. Ep cꞌux laj yaꞌyic.
\p
\v 3 Iyal tal ti xchibal chꞌul abate, tal smal ti nab ti castigo ti te tiqꞌuil ti stazae. Hech icꞌataj ti chꞌichꞌ ti nabe. Jun to xchꞌichꞌel anima xꞌelan. Hech icham scotol ti cꞌutic cuxajtic te ti nab.
\p
\v 4 Iyal tal ti yoxibal chꞌul abate, tal smal ti ucꞌumetic xchiꞌuc ti butic chlocꞌ tal ti hoꞌe ti castigo ti te tiqꞌuil ti stazae. Hech icꞌataj ti chꞌichꞌ.
\v 5 Laj caꞌi chcꞌopoj ti chꞌul abate, jaꞌ ti sventainoj ti hoꞌe. Hech laj yal:
\p ―Toj avoꞌnton, Cajval, toj chachapanvan, hoꞌot ti atalel cuxulote, hoꞌot ti liꞌoyot ti ora to, ti te oyot ti voꞌone uc.
\v 6 Yuꞌun laj smilic ti muchꞌutic oyic ti atojole xchiꞌuc ti muchꞌutic jꞌalvanej avuꞌune, hech yuꞌun laj xa avacꞌbe chꞌichꞌ yuꞌun acꞌo yuchꞌic. Jaꞌ hech tscꞌan ti ch-acꞌbatique ―xchi ti chꞌul abate.
\p
\v 7 Laj caꞌi oy chcꞌopoj te ti scajaneb smoton ti Diose. Hech laj yal:
\p ―Melel ti toj chachapanvan, Cajvaltic Dios, hoꞌot ti jelaven apꞌijile ti scotol xuꞌ avuꞌune. Chcꞌot ti pasel ti cꞌu cheꞌel laj avale ―xchi.
\p
\v 8 Ti xchanibal chꞌul abate laj smal ti sba ti cꞌacꞌale ti castigo ti te tiqꞌuil ti stazae. Hech lic chicꞌatuc ti crixchanoetique yuꞌun ti cꞌacꞌale.
\v 9 Ti cꞌalal chcꞌacꞌ chaꞌyic ti crixchanoetique, chopol lic yalbeic scꞌopilal ti Diose, jaꞌ ti sventainoj scotol avi castigo liꞌto. Muc sutes yoꞌntonic yuꞌun ti smulique, muc spasic ti mucꞌ ti Diose.
\p
\v 10-11 Ti yoꞌobal chꞌul abate ba smalbe ti bu ti mero scotleb ti jtiꞌvanej bolome ti castigo ti te tiqꞌuil ti stazae. Hech puru icꞌ osil icꞌot ti sjoylejal balumil yuꞌun liꞌ ti balumile yacꞌoj sba tspas mantal ti jtiꞌvanej bolome. Ti crixchanoetique yuꞌun ti ep cꞌux chaꞌyic ti jyalel ti xchinique, hech lic stiꞌilanic yoqꞌuic, hech lic yut ti Diose ti te oy ti vinajele. Muc sutes yoꞌntonic yuꞌun ti cꞌusi chopol spasojique.
\p
\v 12 Ti svaquibal chꞌul abate tal smal ti ba mucꞌta ucꞌum Eufrates sbi ti castigo ti te tiqꞌuil ti stazae. Hech iꞌul ti ucꞌume. Hech ijam sbe ti ajvaliletique ti chtalic ti sloqꞌueb cꞌacꞌale yuꞌun chtal spasic pleito.
\p
\v 13 Laj quil iloqꞌuic tal ti yeic ti dragone xchiꞌuc ti primero jtiꞌvanej bolome xchiꞌuc ti xchibal jtiꞌvanej bolome oxvoꞌ pucuj. Ilocꞌ tal jujun pucuj ti yeic. Jun to chꞌuchꞌ xꞌelan ti pucujetique. Ti xchibal jtiꞌvanej bolome, oy sbi uc nopbilal jꞌalcꞌop.
\v 14 Jaꞌ ti pucujetic ti ilocꞌ ti yeique jaꞌ tspasic jchop o abteletic. Chba stsobic tal scotol ti totil ajvaliletic ti sjoylejal balumil xchiꞌuc ti yajsoldadoe yuꞌun acꞌo tal spasic pleito xchiꞌuc ti Diose, jaꞌ ti jelaven spꞌijile. Yuꞌun ista xa yorail hech chaj cꞌu cheꞌel yaloj ti Diose.
\v 15 Yuꞌun hech yaloj onoꞌox ti Diose: “Aꞌyo me avaꞌyic. Hech chaj cꞌu cheꞌel mu xanaꞌic cꞌusi ora chtal jꞌelecꞌ, hech onoꞌox uc mu xanaꞌic cꞌusi ora chital hoꞌoni. Jun noꞌox yutsil ti muchꞌu qꞌuelel sate, ti slapoj scꞌuꞌ spoqꞌue yuꞌun hech mu tꞌanaluc chquil, hech mu xqꞌuexav cꞌalal chitale”, ti xchie.
\v 16 Hech yuꞌun ti pucujetique laj stsobic tal ti ajvaliletique te ti bu balumil Armagedón sbi ti hebreo cꞌop.
\p
\v 17 Ti sucubal chꞌul abate laj smal te ti icꞌ ti castigo ti te tiqꞌuil ti stazae. Ti Diose ti te nacal ti mucꞌta naclebale te ti yut templo te ti vinajel, hech laj yal:
\p ―Jaꞌ slajeben castigo o to ―xchi.
\p
\v 18 Hech yuꞌun chleblej tselov, oy tsots chcꞌopoj, ch-avan chavuc. Tsots ti jyalel inic ti balumile. Muꞌyuc bu xnic hech stsatsal ti balumil mi junuc vuelta. Tsots ti jyalel.
\v 19 Ijav ti balumile te ti mucꞌta jteclume, jaꞌ ti Jerusalene. Oxtuchꞌ ilocꞌ ti jteclume. Ijin scotol ti yan jteclumetic ti sjoylejal balumil. Muc xchꞌay ti yoꞌnton ti Diose ti cꞌusi chopol spasojic ti crixchanoetic te ti mucꞌta jteclum Babiloniae. Más ep iꞌacꞌbatic castigo yuꞌun ilinem ti Diose ti stojolic.
\v 20 Scotol ti biqꞌuit balumil ti joyubtabil ti hoꞌe iꞌexpꞌuj, hech itupꞌ o. Ijem yal tal scotol ti vitsetique liꞌ ti balumile, hech pamal icꞌot.
\v 21 Ipꞌaj yal tal ti balumil mucꞌtic bot. Chaꞌvinic kilo yalal jujupꞌej ti bote. Ti crixchanoetique chopol laj yalbeic scꞌopilal ti Diose yuꞌun ital ti bote. Yuꞌun tsots castigo ti jyalel.
\c 17
\s Jaꞌ scꞌopilal ti iꞌacꞌbat stoj smul ti jmulavil antse
\p
\v 1 Hech yuꞌun ital jun chꞌul abat jaꞌ ti coꞌol yichꞌojic stazaic xchiꞌuc ti hucvoꞌique. Hech tal yalbun:
\p ―Laꞌ me, chacacꞌbot avil ti cꞌu cheꞌel ch-acꞌbat stoj smul ti jmulavil antse ti ep smule ti te nacal ti ba nab.
\v 2 Ti totil ajvaliletic te ti balumile imulivajic xchiꞌuc ti antse chil ti Diose yuꞌun jaꞌ spasojic ti mucꞌ ti antse, mu laj spasic ti mucꞌ ti Diose. Jaꞌuc ti crixchanoetique jyacubeletic yaꞌyel yuꞌun lec laj yilic ti hech icꞌot ti pasele. Hech coꞌol lic spasic uc ―xiyutun.
\p
\v 3 Hech yuꞌun laj sventainun ti Chꞌul Espíritue laj yicꞌun batel ti xocol balumil laj caꞌi. Te laj quil jun ants scajlebinoj jtiꞌvanej bolom. Tsoj ti bolome. Oy ep sbi ti sbecꞌtal. Ti cꞌu cheꞌel tsꞌibabil ti sbie jaꞌ tstoy sba ti stojol ti Diose. Hucpꞌej ti sjol ti bolome. Lajunchꞌix ti xulube.
\v 4 Ti scꞌuꞌ ti slapoj ti antse icꞌicꞌtic xchiꞌuc tsoj. Tꞌujum ch-ilat yuꞌun oy snatsꞌ pasbil ti cꞌanal taqꞌuin xchiꞌuc ton ti toyol stojole xchiꞌuc perlaetic. Stsacoj ti scꞌob jun taza pasbil ti cꞌanal taqꞌuin. Chacꞌbe yil yuꞌun hech acꞌo scꞌupin tal ti crixchanoetique. Muꞌyuc scꞌopilal ti yoꞌntonic ti jaꞌ nojem te ti yut taza ti cꞌusi mu xtun chil ti Diose ti tspas ti antse xchiꞌuc ti sbolil yoꞌnton ti antse yuꞌun ti mu spas ti mucꞌ ti Diose.
\v 5 Ti stiba ti jmulavil antse te tsꞌibabil sbi. Mu xcaꞌibetic sjam ti ora. Hech tsꞌibabil: Hoꞌon hech chaj cꞌu cheꞌel ti muchꞌutic te nacajtic ti jteclum Babilonia ti pasbil ti muqꞌue. Hoꞌon smeꞌun scotol jmulaviletic xchiꞌuc scotol ti muchꞌutic chopol ti cꞌusi tspasic liꞌ ti balumile, xchi tsꞌibabil te ti stiba.
\v 6 Jyacubel ti antse laj quil yuꞌun scoj ti yuchꞌojbe xchꞌichꞌel yaꞌyel ti muchꞌutic tꞌujbilic yuꞌun ti Diose ti voꞌone xchiꞌuc ti muchꞌutic ti imilatic ti sventa ti Jesuse. Cꞌalal hech laj jqꞌuel, ichꞌay coꞌnton yuꞌun.
\v 7 Hech lic sjacꞌbun ti chꞌul abate:
\p ―¿Cꞌu yuꞌun ichꞌay avoꞌnton yuꞌun? Chacalbe scꞌopilal ti antse ti mu to avaꞌyojuque xchiꞌuc ti scꞌopilal ti jtiꞌvanej bolome ti scajlebinoje, jaꞌ ti hucpꞌej ti sjole, ti lajunchꞌix ti xulube.
\v 8 Ti jtiꞌvanej bolome ti cajlebimbil yuꞌun ti antse, jaꞌ ti oy yip ti voꞌone, ti muꞌyuc xa yip ti ora to, patil chlic chaꞌanuc yip yan vuelta hech chlic locꞌuc tal ti xab, patil chba yichꞌ castigo sbatel osil. Ti crixchanoetique ti mu pꞌejeluc sbiic ti jun sventa cuxlejal sbatel osil ti cꞌalal mu to chlic ti balumile, jaꞌ chchꞌay yoꞌntonic ti cꞌalal tsqꞌuelic ti chchaꞌan yip yan vuelta ti jtiꞌvanej bolome.
\p
\v 9 ’Jaꞌ noꞌox mi pꞌijubenoxuc xuꞌ chavaꞌibeic ti sjame. Ti hucpꞌej sjol ti bolome, jaꞌ señail ti hucub vits yoꞌ bu tspas mantal ti antse.
\v 10 Jaꞌ señail uc hucvoꞌ ajvaliletic. Hoꞌvoꞌic iꞌechꞌic xa, jun te ch-abtej ti ora to, jun mu to chtal. Cꞌalal mi itale, ch-abtej jꞌocꞌ noꞌox.
\v 11 Ti jtiꞌvanej bolome jaꞌ ti oy yip ti voꞌone, jaꞌ ti muꞌyuc xa yip ti ora to, jaꞌ ti xvaxaquibale. Jaꞌ xchiꞌiltac ti hucvoꞌique. Chꞌayel chbat uc.
\p
\v 12 ’Ti lajunchꞌix xulub ti laj aqꞌuele, jaꞌ señail lajunvoꞌ ajvaliletic ti mu to ch-och ti abtele. Chlic to ochuc ti pas mantal jun chib cꞌacꞌal xchiꞌuc ti jtiꞌvanej bolome.
\v 13 Ti ajvaliletique jtos yoꞌntonic xchiꞌuc ti jtiꞌvanej bolome. Chacꞌ sbaic ti abatinel yuꞌun ti bolome. Muꞌyuc cꞌusi tsnopic stuquic.
\v 14 Jaꞌ tspasic pleito xchiꞌuc ti Chꞌiom Carneroe. Jaꞌ tstsalatic yuꞌun ti Chꞌiom Carneroe yuꞌun mero totil ajvalil stuc. Jaꞌ tspas ti mantal scotol ti yan ajvaliletic xchiꞌuc reyetic. Ti xchiꞌiltac ti Chꞌiom Carneroe, jaꞌ ti icꞌbilic ti stojol, ti tꞌujbilic yuꞌune, ti jun yoꞌntonic ti stojole, jaꞌ coꞌol tstsalvanic xchiꞌuc ―xiyutun ti chꞌul abate.
\p
\v 15 Hech laj yalbun uc ti chꞌul abate:
\p ―Ti nab ti laj aqꞌuele, jaꞌ ti bu nacal ti jmulavil antse, jaꞌ señail ti jaylajuntos crixchanoetic ti jaꞌ tspasatic ti mantal yuꞌun ti jmulavil antse.
\v 16 Ti lajunvoꞌ ajvaliletique xchiꞌuc ti jtiꞌvanej bolome, jaꞌ ti lajunchꞌix xulube, jaꞌ chlic yilintaic ti jmulavil antse. Meꞌon chcꞌot yuꞌunic. Tstꞌananic yaꞌyel ti antse, patil chlic stiꞌbeic sbecꞌtal yaꞌyel, patil chlic xchiqꞌuic ti cꞌocꞌ.
\v 17 Yuꞌun ti jtos yoꞌntonic chcꞌotic ti ajvaliletique xchiꞌuc ti jtiꞌvanej bolome, yuꞌun ti chacꞌ sbaic ti abatinel ti stojol ti bolome, yuꞌun hech onoꞌox xchapanoj ti Diose hech yuꞌun hech chcꞌot ti pasel. Yuꞌun hech itsꞌaqui o scotol ti cꞌutic yaloj ti Diose.
\v 18 Ti jmulavil antse ti laj aqꞌuele jaꞌ señail ti crixchanoetic te ti mucꞌta jteclum ti jaꞌ chabatin scotol ajvaliletic te ti balumil ―xiyutun ti chꞌul abate.
\c 18
\s Jaꞌ scꞌopilal ti jꞌechꞌel chtupꞌ o ti babiloniaetique
\p
\v 1 Patil laj quil iyal tal ti balumil totil chꞌul abat. Tsots yabtel yichꞌoj. Yuꞌun oy squeval ti chꞌul abate, hech yuꞌun más isacub liꞌ ti balumile yuꞌun.
\v 2 Tsots icꞌopoj, hech laj yal:
\p ―Chjin xa ti jteclum Babiloniae. Chcham xa ti babiloniaetique ti mucꞌ scuyoj sbaique. Jaꞌ sna pucujetic chcꞌot ti jteclum yuꞌunique. Te chlic stsob sbaic scotol ti pucujetic ti lum chopole. Jaꞌ xluchleb chcꞌot ti ichine xchiꞌuc ti potslome xchiꞌuc ti sotsꞌe ti jteclum yuꞌunique.
\v 3 Yuꞌun ti babiloniaetique laj xchanubtas scotol crixchanoetic ti balumil ti cꞌutic mu xtun chil ti Diose, hech yuꞌun chjin. Jaꞌ laj xchanubtas uc ti ajvaliletique ti scotol balumil ti acꞌo spas cꞌusi tscꞌan ti yoꞌnton stuquique. Ti jchonolajeletic liꞌ ti balumile laj xa spasic ep canal yuꞌun jaꞌ ichanubtasatic yuꞌun ti babiloniaetique ti cꞌutic chopol tspasique ―xchi.
\p
\v 4 Hech laj caꞌi chcꞌopoj ti Cajvaltique te ti vinajele. Hech laj yal:
\p ―Jun to jmulavil ants chquil ti babiloniaetique hech yuꞌun hoꞌoxuc ti te oyoxuc ti balumile, hoꞌoxuc ti tꞌujbiloxuc cuꞌune, pꞌevo aba, mu me xacꞌalan aba ti stojol naca me coꞌol lic apasic hech chaj cꞌu cheꞌel tspasique, naca me coꞌol chavichꞌic castigo xchiꞌuc.
\v 5 Ep ti jyalel ti smulique, mu jutucuc noꞌox. Mi jutuc mu chꞌayemuc ti yoꞌnton ti Diose ti smulique.
\v 6 Maꞌuc noꞌox hech chaj cꞌu cheꞌel chacꞌ, jaꞌ más xtoy to oꞌlol ti castigo chichꞌe.
\v 7 Ti jayib vuelta laj stoy sbae, ti jayib vuelta laj spas cꞌutic chopole, jaꞌ hech yepal chichꞌ ti vocole, ch-ocꞌ. Yuꞌun hech chal ti yoꞌntonic: “Ti hoꞌucutique mu hechucutic hech chaj cꞌu cheꞌel meꞌon ants. Ti hoꞌucutique lec pasbilucutic ti mucꞌ yuꞌun scotol crixchanoetic, hech yuꞌun mu xquichꞌtic vocol”, xchiic.
\v 8 Yuꞌun ti hech tstoy sbaique, hech yuꞌun ti jun noꞌox cꞌacꞌal ep castigo chtal ti stojolic. Oy chchamic, oy ch-oqꞌuic yuꞌun ti icham ti yermanoe, oy chviꞌnajic, Yuꞌun chcꞌacꞌ ti jteclume. Hech chcꞌot ti pasel yuꞌun jelaven spꞌijil ti Diose, jaꞌ ti juez yuꞌunique.
\p
\v 9 Ti ajvaliletic te ti balumile, jaꞌ ti laj xchꞌumbeic smantal ti babiloniaetique, jaꞌ ti muc xchꞌumbeic smantal ti Diose, ch-oqꞌuic ti cꞌalal chilic ti chcꞌacꞌ ti jteclum yuꞌun ti babiloniaetique yuꞌun tsnaꞌic ti babiloniaetique. Chichꞌic mul yuꞌun ti chcꞌaqꞌuique.
\v 10 Nom chlic svaꞌan sbaic yuꞌun chiꞌic mi coꞌol ch-acꞌbatic castigo hech chaj cꞌu cheꞌel ti iꞌacꞌbatic xa ti babiloniaetique. Hech chlic yalic:
\p ―Lástima ti ichamic scotol ti babiloniaetique. Ti jꞌocꞌ noꞌox itupꞌic yuꞌun ti castigo ti iꞌacꞌbatique ―xchiic. Jaꞌ scꞌopilal ti babiloniaetique.
\p
\v 11 Ti jchonolajeletique te ti balumile chlic yichꞌic mul, chlic ocꞌuc yuꞌun ti itupꞌ ti babiloniaetique, yuꞌun muꞌyuc xa muchꞌu chmambat ti cꞌutic chchonique.
\v 12 Ti cꞌutic chchonique jaꞌ ti puru pasbil ti cꞌanal taqꞌuin xchiꞌuc ti saquil taqꞌuin. Chchonic ton ti toyol stojole xchiꞌuc perlaetic xchiꞌuc pino pocꞌ ti toyol stojole, xchiꞌuc icꞌal pocꞌtic, xchiꞌuc xela pocꞌ, xchiꞌuc tsajal pocꞌ. Chchonic uc scotol teꞌ ti oy lec yiqꞌue, xchiꞌuc scotol cꞌutic pasbil mi ti sbaquel ye elefante, mi ti teꞌ ti toyol stojole, mi ti cobre taqꞌuin, mi ti tembil taqꞌuin, mi ti marmol-ton.
\v 13 Chchonic uc canela, xchiꞌuc pimiento, xchiꞌuc pom, xchiꞌuc mirra-perfume, xchiꞌuc vino, xchiꞌuc aceite, xchiꞌuc harina, xchiꞌuc trigo, xchiꞌuc vacax, xchiꞌuc carnero, xchiꞌuc caꞌ, xchiꞌuc carreta. Chchonic crixchanoetic uc, jaꞌ ti muchꞌu iꞌoch ti mero mozoil o.
\v 14 Hech chlic yalic ti crixchanoetique:
\p ―Scotol ti cꞌutic toyol yoꞌntonic onoꞌoxe, jaꞌ ti scꞌulejalique xchiꞌuc scotol ti cꞌutic yuꞌun lec ch-ilatique, mu xa sqꞌuelic xa yuꞌun coꞌol itupꞌic xchiꞌuc ―xchiic. Jaꞌ scꞌopilal ti babiloniaetique.
\p
\v 15 Ti muchꞌu chchonolajique, jaꞌ ti ep imambat yuꞌun ti babiloniaetique, nom tsvaꞌan sbaic yuꞌun chiꞌic mi coꞌol ch-acꞌbatic castigo hech chaj cꞌu cheꞌel ti iꞌacꞌbatic xa ti babiloniaetique. Ch-oqꞌuic, chichꞌic mul yuꞌun ti itupꞌ ti babiloniaetique.
\v 16 Hech chalic:
\p ―Lástima ti itupꞌ xa ti babiloniaetique. Yuꞌun ti voꞌone ti jteclume jaꞌ hech chaj cꞌu cheꞌel jun ants ti slapoj lino pocꞌ ti toyol stojole, xchiꞌuc icꞌal pocꞌ xchiꞌuc tsajal pocꞌ. Jaꞌ ti oy snatsꞌ pasbil ti cꞌanal taqꞌuin xchiꞌuc ton ti toyol stojole xchiꞌuc perlaetic. Jaꞌ hech ti jteclume yuꞌun te oy scotol ti cꞌutic ti jcꞌantique.
\v 17 Ti jun noꞌox ora itupꞌ scotolic xchiꞌuc scꞌulejalic ―xchiic. Jaꞌ scꞌopilal ti babiloniaetique.
\p Nom tsvaꞌan sbaic uc scotol yajval barcoetic xchiꞌuc muchꞌutic chanavic ti barco, xchiꞌuc muchꞌutic tstijic barco, xchiꞌuc muchꞌutic ch-abtejic te ti nab.
\v 18 Cꞌalal chilic ti chcꞌacꞌ ti jteclum Babiloniae ti chlocꞌ ti xchꞌayilale, tsots chlic avanuc. Hech chlic yalic:
\p ―Lástima ti icꞌacꞌ ti jteclum lume yuꞌun muꞌyuc bu hech yan jteclum hech chaj cꞌu cheꞌel lume ―xchiic.
\p
\v 19 Yuꞌun ep chichꞌic mul hech yuꞌun chaqꞌuic tsꞌubilum ti sjolic, ch-oqꞌuic, ch-avanic. Hech chalic:
\p ―Lástima ti itupꞌ ti Babiloniae yuꞌun hoꞌucutic ti oy jbarcotique ti nab jaꞌ te ep laj jpastic canal ti sventaic. Qꞌuelo avil, ti jun noꞌox ora itupꞌ scotolic ―xchiic. Jaꞌ scꞌopilal ti babiloniaetique.
\p
\v 20 Nichim noꞌox avoꞌntonic acotolic ti liꞌ xa oyoxuc liꞌ ti vinajele, hoꞌoxuc ti oyoxuc ti stojol ti Diose xchiꞌuc hoꞌoxuc ti jcholcꞌopoxuque xchiꞌuc hoꞌoxuc ti jꞌalcꞌopoxuc yuꞌun ti Diose. Yuꞌun ti Diose chacꞌbe stoj yuꞌun ti laj yilbajinoxuque ―xchi ti Cajvaltique.
\p
\v 21 Oy yan totil chꞌul abat laj stam jpꞌej ton laj quil. Coꞌol smucꞌul ti tone hech chaj cꞌu cheꞌel choꞌ. Lic sten ochel ti yut nab. Hech laj yal:
\p ―Hech chaj cꞌu cheꞌel laj jten ochel ti yut nab ti tone, ti ichꞌay ochel oe, jaꞌ noꞌox hech uc ti babiloniaetique jꞌechꞌel chtupꞌic o xchiꞌuc ti jteclum yuꞌunique.
\v 22 Muꞌyuc xa muchꞌu tstij arpa te o, muꞌyuc xa muchꞌu choqꞌuesan musco te o, muꞌyuc xa muchꞌu choqꞌuesan aj, muꞌyuc xa muchꞌu choqꞌuesan scorneta. Muꞌyuc xa carpintero ch-abtejic te o, muꞌyuc xa jtentaqꞌuin te o, xchiꞌuc ti muchꞌutic cꞌutic yan abtel xchanojique. Muꞌyuc xa muchꞌu chjuchꞌun antsetic te o.
\v 23 Muꞌyuc xa bu chtil candil te o, muꞌyuc xa qꞌuin yuꞌun nupunel te o. Yuꞌun jaꞌ noꞌox más pasbil ti mucꞌ yuꞌunic ti jmanolajeletique ti jchonolajeletique te o. Scotol crixchanoetic laj sloꞌla ―xchi ti chꞌul abate.
\p
\v 24 Yuꞌun ti ep iꞌacꞌbatic castigo ti babiloniaetique, yuꞌun jaꞌ laj smilic ti jꞌalcꞌopetic yuꞌun ti Diose xchiꞌuc ti muchꞌutic oyic ti stojol ti Diose. Jaꞌ ti sventaic ti babiloniaetique ti hech imilatic scotol ti muchꞌutic imilatic buc noꞌox ti sventa ti xchꞌunojbeic scꞌop ti Cajvaltique.
\c 19
\s Jaꞌ scꞌopilal ti tspasic ti mucꞌ ti Diose te ti vinajel
\p
\v 1 Hoꞌon ti Juanune patil laj caꞌibe scꞌop ep crixchanoetic te ti vinajel. Ep ti jyalel. Tsots chcꞌopojic, hech laj yalic:
\q Hocol yalbucutic ti Diose, nijcolucutic xa ti sventa ti Cajvaltic Dios cuꞌuntique.
\q Stuc chchꞌumbat scꞌop sbatel osil.
\q Stuc tspas mantal sbatel osil.
\q
\v 2 Toj chchapanvan.
\q Chcꞌot ti pasel ti cꞌutic chale.
\q Laj xa yacꞌbe castigo yuꞌun smul ti babiloniaetique, jaꞌ ti pasbil ti mucꞌ onoꞌoxe.
\q Jaꞌ hech chaj cꞌu cheꞌel jmulavil ants laj sbolibtas scotol crixchanoetic ti babiloniaetique.
\q Ti Diose laj xa yacꞌbe stojic yuꞌun ti imilbat ti abatetic yuꞌune,
\m xchiic.
\p
\v 3 Yan vuelta laj yalic:
\p ―Hocol yalbucutic ti Diose sbatel osil te chichꞌic castigo o ―xchiic.
\p
\v 4 Ti veinticuatro ti voꞌ totiletique xchiꞌuc ti chanvoꞌique laj spatan sbaic ti lum, ilequilcꞌopojic yuꞌun ti Diose ti te nacal ti mucꞌta naclebale. Hech laj yalic:
\p ―Jun yutsil ti hech chcꞌot ti pasel. Hocol yalbucutic ti Diose ―xchiic.
\p
\v 5 Oy muchꞌu chcꞌopoj te yoꞌ bu ti mucꞌta naclebale. Hech laj yal:
\q Hocol yalbucutic ti Diose, xachiic me, hoꞌoxuc ti yabatoxuque, hoꞌoxuc ti laj xa axiꞌic ti Diose, manchuc mi tsots avabtelic onoꞌoxe, manchuc mi mu tsotsuc avabtelic onoꞌoxe,
\m xchi.
\p
\v 6 Laj caꞌi hech chaj cꞌu cheꞌel chcꞌopoj ep crixchanoetic. Tsots chcꞌopoj hech chaj cꞌu cheꞌel nojelal ucꞌum, o hech chaj cꞌu cheꞌel chauc ti tsots ch-avane. Hech laj yal:
\q Hocol yalbucutic ti Diose.
\q Stuc tspas mantal ti Cajvaltic Diose, jaꞌ ti stuc jelaven spꞌijile.
\q
\v 7 Nichim noꞌox coꞌntontic ti jpastic ti mucꞌ yuꞌun laj xa sta yorail ti chnupun ti Cajvaltique.
\q Chapal xa ti yajnile.
\q
\v 8 Ti acꞌbil ti scꞌuꞌe pasbil ti lino pocꞌ ti toyol stojole.
\q Lum sac ti jyalel; chquevan ti scꞌuꞌe,
\m xchi xcꞌopoj. Ti lino poqꞌue jaꞌ señail ti toj yoꞌntonic ti iꞌacꞌbatic ti muchꞌutic oyic ti stojol ti Diose.
\s Jaꞌ scꞌopilal ti qꞌuin yuꞌun chnupun ti Cajvaltique
\p
\v 9 Ti chꞌul abate hech laj yalbun:
\p ―Tsꞌibao ti hun avi to: “Jun noꞌox yutsil ti muchꞌutic chꞌamumbil yuꞌun ti Cajvaltique yuꞌun chba sqꞌuelic ti chnupune”―xiyutun.
\p Hech laj yalbun uc:
\p ―Jaꞌ scꞌop ti Diose, jaꞌ melel ―xiyutun.
\p
\v 10 Hoꞌoni laj jpatan jba ti stojol yuꞌun jcꞌan ti jpas ti mucꞌ. Hech laj yalbun:
\p ―Mu me xapas hech. Jaꞌ chapas ti mucꞌ ti Diose. Yuꞌun hoꞌoni coꞌol cacꞌoj jbatic ti abatinel yuꞌun ti Diose xchiꞌuc scotol avermanotac uc ti jamal chalbeic scꞌopilal ti Jesuse. Yuꞌun coꞌol chcalbetic scꞌopilal ti Jesuse, hech yuꞌun coꞌol yabatucutic ti Diose xchiꞌuc ti jꞌalcꞌopetic ti voꞌone ―xiyutun.
\s Jaꞌ scꞌopilal ti muchꞌu scajlebinoj ti saquil caꞌe
\p
\v 11 Laj quil más ijam ti vinajele. Te oy saquil caꞌ laj quil. Ti muchꞌu scajlebinoje toj yoꞌnton mu snaꞌ xloꞌlavan, xchi scꞌopilal. Toj chchapanvan. Toj ti castigo chaqꞌue.
\v 12 Ti jujupꞌej ti sate xpulpun noꞌox chtil hech chaj cꞌu cheꞌel yat cꞌocꞌ. Ep scorona ti sjol. Tsꞌibabil sbi pero muꞌyuc muchꞌu laj snaꞌ. Stuc noꞌox laj snaꞌ.
\v 13 Tsꞌajbil ti chꞌichꞌ ti scꞌuꞌ ti slapoje. Jaꞌ ti Cꞌop sbie, jaꞌ ti tal yalbucutic cꞌu xꞌelan yoꞌnton ti Jtotic Diose.
\v 14 Chiꞌimbil yuꞌun scotol yabat ti te oyic ti vinajele. Jun noꞌox yutsil ti scꞌuꞌic ti slapojique. Pasbil ti lino pocꞌ xꞌelan. Sac ti jyalel. Puru saquil caꞌ scajlebinojic scotolic.
\v 15 Ti Cꞌope yacꞌoj sba chlocꞌ ti ye espada. Oy lec ye ti espadae yuꞌun hech chacꞌbe castigo scotol ti muchꞌutic mu xchꞌumbat scꞌope. Tsots tspas ti mantal scotol. Persa chchꞌumbat smantal yuꞌun. Hech ch-acꞌbat castigo ti muchꞌutic tscontrainic ti Diose yuꞌun ilinem ti Diose ti stojolic.
\v 16 Ti scꞌuꞌ xchiꞌuc ti scub hech tsꞌibabil sbi: Jaꞌ ti reye ti tspas ti mantal scotol yan reyetic. Jaꞌ ti totil ajvalile ti tspas ti mantal scotol yan ajvaliletic, xchi.
\p
\v 17 Laj quil oy jun chꞌul abat te vaꞌal ti sba ti cꞌacꞌale. Tsots icꞌopoj. Laj spas ti mantal ti xuleme ti tanjole. Hech laj yalbe:
\p ―Laꞌic me, tsobo abaic tal yuꞌun chacꞌ ep veꞌelil ti Diose.
\v 18 Chatiꞌbeic sbecꞌtal reyetic xchiꞌuc capitán soldadoetic, xchiꞌuc muchꞌutic yan tsots yabtel yichꞌojic. Chatiꞌbeic sbecꞌtalic caꞌetic xchiꞌuc ti muchꞌutic scajlebinojique, xchiꞌuc sbecꞌtalic scotol ti muchꞌutic tscontrainic ti Diose manchuc mi oyic ti libre, manchuc mi oyic ti mozoil, manchuc mi tsots yabtel yichꞌojic, manchuc mi mu tsotsuc yabtel yichꞌojic ―xut.
\p
\v 19 Laj quil te stsoboj sbaic ti primero jtiꞌvanej bolome xchiꞌuc ti reyetic te ti balumil, scotol xchiꞌuc ti yajsoldadoetique, yuꞌun tspasic pleito xchiꞌuc ti Cꞌope ti te cajal ti caꞌe, xchiꞌuc ti abatetic yuꞌune.
\v 20 Itsacat ti primero jtiꞌvanej bolome xchiꞌuc ti nopbilal jꞌalcꞌop yuꞌune. Ti nopbilal jꞌalcꞌope jaꞌ ti laj spas jchop o abteletic ti stojol ti primero jtiꞌvanej bolome hech iloꞌlaat scotol ti muchꞌutic yichꞌojbeic smarca ti primero jtiꞌvanej bolome. Jaꞌ ti muchꞌu laj squejan sbaic ti stojol ti slocꞌtombail ti primero jtiꞌvanej bolome. Ti xchaꞌvaꞌalique, jaꞌ ti primero jtiꞌvanej bolome xchiꞌuc ti nopbilal jꞌalcꞌop yuꞌune, cuxul itenatic ochel ti mucꞌta cꞌocꞌ yoꞌ bu chtil azufre.
\v 21 Jaꞌuc ti muchꞌutic laj stsꞌacliic onoꞌox ti primero jtiꞌvanej bolome xchiꞌuc ti nopbilal jꞌalcꞌop yuꞌune, jaꞌ scotolic imilatic ti espada ti yacꞌoj sba chlocꞌ ti ye ti Cꞌope ti te cajal ti caꞌe. Tal tiꞌbatuc sbecꞌtalic yuꞌun ti xuleme ti tanjole. Inoj xchꞌutic ti xuleme ti tanjole.
\c 20
\s Jaꞌ scꞌopilal ti jmil habil chchucat ti Satanase
\p
\v 1 Laj quil ti ilocꞌ ti vinajel iyal tal jun chꞌul abat. Stsacoj ti scꞌob syaveil ti xabe. Stsacoj ti scꞌob uc mucꞌta cadena taqꞌuin.
\v 2 Ba stsac ti dragone, jaꞌ ti antiguo chone, jaꞌ ti totil pucuje, jaꞌ ti Satanase. Laj stsac, laj xchuc yuꞌun hech chucbil chcom jmil habil.
\v 3 Laj sten ochel ti yut xab. Patil laj smacbe stiꞌ ti xabe. Te laj yacꞌbe comel sello ti smac stiꞌ ti xabe yuꞌun jaꞌ jmil habil mu xuꞌ sloꞌla ti crixchanoetique. Jaꞌto mi itsꞌaqui ti jmil habile jaꞌto chcoltaat jꞌocꞌuc ti pucuje.
\p
\v 4 Laj quil ep mucꞌtic naclebaletic. Te nacajtic ti muchꞌutic acꞌbil yabtelic ti chchapanvanique. Te laj quilbe xchꞌulelic ti muchꞌutic imilatic ti sventa ti scꞌop ti Diose, ti sventa uc ti jamal laj xcholbe scꞌopilal ti Jesuse. Jaꞌ ti muchꞌutic muc squejan sbaic ti stojol ti primero jtiꞌvanej bolome xchiꞌuc ti slocꞌtombaile, ti muc xichꞌbeic ti scꞌob mi ti stiba ti smarcae. Laj quil uc ichaꞌcuxiic xchiꞌuc sbecꞌtalic. Jaꞌ achꞌ sbecꞌtalic xa yichꞌojic. Jmil habil coꞌol tspasic mantal xchiꞌuc ti Cristoe.
\s Jaꞌ scꞌopilal ti muchꞌutic primero chchaꞌcuxiic
\p
\v 5 Yuꞌun jaꞌ primero chchaꞌcuxiic xchiꞌuc sbecꞌtalic ti muchꞌutic laj xchꞌumbeic scꞌop ti Cajvaltique. Ti yan crixchanoetique, jaꞌ ti muchꞌutic mu xchꞌunojbuc scꞌop ti Cajvaltique, jaꞌto mi itsꞌaqui ti jmil habile, jaꞌto chchaꞌcuxiic xchiꞌuc sbecꞌtalic.
\v 6 Jun noꞌox yutsil scotol ti muchꞌutic primero chchaꞌcuxiique. Muꞌyuc xa smulic. Mu xa xchaꞌcham yan vuelta, jaꞌ ti mu xꞌacꞌbatic castigo. Chtunic yuꞌun ti Diose xchiꞌuc ti Cristoe hech chaj cꞌu cheꞌel laj yacꞌ sbaic ti abatinel yuꞌun ti Diose ti jchiꞌiltac ti voꞌone ti iꞌochic ti palee. Jmil habil coꞌol tspasic mantal xchiꞌuc ti Cajvaltique.
\p
\v 7 Cꞌalal mi itsꞌaqui xa ti jmil habile, chjambat ti xabe hech chcol loqꞌuel ti Satanase.
\v 8 Chba sloꞌla yan vuelta ti crixchanoetique ti sjoylejal balumil. Jaꞌ Gog xchiꞌuc Magog sbiic ti crixchanoetique. Chba stsob tal yuꞌun tspasic pleito. Ep ti jyalel chtalic. Mu stacꞌ atel hech chaj cꞌu cheꞌel hiꞌ ti tiꞌnab.
\v 9 Ti sjoylejal balumil italic ti crixchanoetique. Yuꞌun tscꞌan tstupꞌic tscuyic ti yol snichꞌnab ti Diose, hech yuꞌun tal sjoyubtaic yoꞌ bu nacajtic ti muchꞌutic oyic ti stojol ti Diose xchiꞌuc ti jteclum Jerusalene, jaꞌ ti cꞌuxubimbil yuꞌun ti Diose. Ti Diose laj sten yalel ti balumil cꞌocꞌ. Hech icham scotolic ti muchꞌutic laj scontrainic ti Diose.
\v 10 Ti totil pucuje ti iloꞌlaatic yuꞌune, jaꞌ laj quil itenat ochel ti mucꞌta cꞌocꞌ yoꞌ bu chtil azufre, yoꞌ bu tiqꞌuil xa ti primero jtiꞌvanej bolome xchiꞌuc ti nopbilal jꞌalcꞌop yuꞌune. Ti cꞌacꞌal ti acꞌubal te chichꞌic castigo sbatel osil o.
\s Jaꞌ scꞌopilal ti muchꞌutic mu xchꞌunojbuc scꞌop ti Diose ti jaꞌ te ch-ichꞌbatic scꞌop ti bu sac naclebale
\p
\v 11 Laj quil oy mucꞌta naclebal te o, sac ti naclebale. Jaꞌ te nacal ti Diose. Ti ora noꞌox itupꞌ ti balumile ti vinajele te ti stojol ti Diose.
\v 12-13 Laj quil te vaꞌajtic ti stojol ti Diose scotol ti muchꞌutic mu xchꞌunojbuc scꞌop ti Diose cꞌalal ichamique, mi tsots yabtel yichꞌojic, mi mu tsotsuc yabtel yichꞌojic. Ti muchꞌutic ichamic ti nab, ichaꞌcuxi locꞌ tal ti nab ti sbecꞌtalique. Ti muchꞌutic ichamic ti balumil ichaꞌcuxi locꞌ tal ti chꞌen ti campo santo ti sbecꞌtalique. Iloqꞌuic tal ti cꞌatimbac ti xchꞌulelique, hech laj snup sbaic xchiꞌuc ti sbecꞌtalique, hech te hul svaꞌan sbaic ti stojol ti Diose scotolic. Ti Diose lic sjam ti hunetique. Oy yan hun laj sjam uc, jaꞌ ti hun yoꞌ bu tsꞌibabil sbiic ti muchꞌutic chcuxiic sbatel osile. Hech scotolic iꞌichꞌbat scꞌop yuꞌun smulic ti sventa ti cꞌu cheꞌel tsꞌibabil ti hune, ti cꞌu xꞌelan ti yabtelic ti laj spasique ti jujune.
\v 14 Scotolic itenatic ochel ti mucꞌta cꞌocꞌ. Hech muꞌyuc xa muchꞌu chcham. Muꞌyuc xa cꞌatimbac yuꞌun scotolic itenatic xa ochel ti mucꞌta cꞌocꞌ. Jaꞌ xchibal velta chchamic. Ti primero velta ichamique, jaꞌ noꞌox ba yichꞌ vocol xchꞌulel. Jaꞌuc ti xchibal veltae, cuxul xchiꞌuc sbecꞌtal ba yichꞌ vocol sbatel osil te ti mucꞌta cꞌocꞌ.
\v 15 Ti muchꞌutic itenatic ochel ti mucꞌta cꞌoqꞌue, jaꞌ ti muchꞌutic mu pꞌejeluc sbi ti hun yoꞌ bu pꞌejambil sbiic ti muchꞌutic chcuxiic sbatel osile.
\c 21
\s Jaꞌ scꞌopilal ti achꞌ vinajele xchiꞌuc ti achꞌ balumile
\p
\v 1 Patil laj quil achꞌ vinajel xchiꞌuc achꞌ balumil. Yuꞌun itupꞌ xa ti poco vinajele xchiꞌuc ti poco balumile. Muꞌyuc xa ti nabe.
\v 2 Hoꞌon Juanun laj quil ilocꞌ tal ti stojol ti Diose te ti vinajel jun mucꞌta jteclum. Jaꞌ ti achꞌ Jerusalene. Jaꞌ puru lec, muꞌyuc mulil te o. Iyal tal. Lec meltsambil hech chaj cꞌu cheꞌel jun ants ti lec xchapanoj sba yuꞌun chicꞌ sba xchiꞌuc smalal.
\v 3 Laj caꞌi oy muchꞌu tsots chcꞌopoj te yoꞌ bu ti mucꞌta naclebale te ti vinajele. Hech laj yal:
\p ―Aꞌyo me avaꞌyic. Ti Diose chchiꞌin ti naclej ti crixchanoetique. Yuꞌun Dios chcꞌotic. Jaꞌ Dios yuꞌunic sbatel osil.
\v 4 Ti Diose tscusbe loqꞌuel scotol yaꞌlel satic. Te muꞌyuc muchꞌu chcham, muꞌyuc muchꞌu chichꞌ mul, muꞌyuc muchꞌu ch-ocꞌ, muꞌyuc muchꞌu cꞌux chaꞌi. Yuꞌun ilaj xa scꞌopilal ti hech onoꞌox oye ―xchi.
\p
\v 5 Hech lic yal ti Diose ti te nacal ti mucꞌta naclebale:
\p ―Aꞌyo me avaꞌi, achꞌ ti jpas scotol ―xchi.
\p Hech lic yalbun:
\p ―Tsꞌibao ti hun avi to yuꞌun melel ti jcꞌope. Chcꞌot ti pasel ―xiyutun.
\p
\v 6 Hech laj yalbun uc:
\p ―Ihuꞌ xa cuꞌun. Hoꞌon laj jliques scotol, hoꞌon laj xa juꞌtes scotol. Hoꞌon jtalel oyun. Hech chaj cꞌu cheꞌel smoton chavacꞌbeic hoꞌ ti muchꞌu taquin yoꞌntone, jaꞌ noꞌox hech ti muchꞌu tscꞌan ti chcole, jaꞌ smoton ti jcolta sbatel osil.
\v 7 Ti muchꞌu stsal yuꞌun scotole, hoꞌon Diosun yuꞌun chicꞌot o. Jaꞌ col jnichꞌon chcꞌot o.
\v 8 Jaꞌuc ti muchꞌutic chiꞌique xchiꞌuc ti muchꞌutic mu xixchꞌumbucun ti jcꞌope, xchiꞌuc ti muchꞌutic tspas loquil loꞌile, xchiꞌuc ti jmilvanejetique, xchiꞌuc ti jmulaviletique, xchiꞌuc ti jpicchꞌichꞌetique, xchiꞌuc ti muchꞌutic xchꞌunojic ti santoetique, xchiꞌuc ti muchꞌutic tsnopic cꞌope, scotolic ti jten ochel xchiꞌuc sbecꞌtalic ti mucꞌta cꞌocꞌ yoꞌ bu chtil azufre. Jaꞌ xchibal velta chchamic ―xiyutun ti Diose.
\s Jaꞌ scꞌopilal ti achꞌ Jerusalene
\p
\v 9 Ti hucvoꞌ chꞌul abatetic ti yichꞌojic onoꞌox ti hucub tazaetic yoꞌ bu ticꞌajtic ti slajeb castigoe, oy jun tal scꞌoponun. Hech tal yalbun:
\p ―Laꞌ me, chacacꞌbot avil ti bu chnaqui xchiꞌuc ti yajnile ti Cajvaltique ―xiyutun.
\p
\v 10 Laj yicꞌun batel ti bu mucꞌta vits laj caꞌi. Toyol ti vitse. Te laj yacꞌbun jqꞌuel ti mucꞌta jteclume, jaꞌ ti puru leque, jaꞌ ti muꞌyuc xa mulil te oe. Jaꞌ ti achꞌ Jerusalene. Ti cꞌalal laj quile, yacꞌoj sba chyal tal ti stojol ti Diose.
\v 11 Yichꞌojbe squeval ti Diose. Chquevan noꞌox hech chaj cꞌu cheꞌel ton ti toyol stojole. Jaꞌ hech chaj cꞌu cheꞌel chleblej jaspe-ton. Sac hech chaj cꞌu cheꞌel espejo.
\v 12 Oy mucꞌta macteꞌ ti sjoylejal ti jteclume. Toyol ti macteꞌe. Oy lajcheb stiꞌ. Ti jujun stiꞌ te vaꞌal jujun chꞌul abat. Ti jujun stiꞌ te pꞌejel jujutos jbitic, hoꞌucutic ti yelnichꞌonucutic ti Israele, ti lajchachopucutique.
\v 13 Ti stojol sloqꞌueb cꞌacꞌal oy oxib stiꞌ ti macteꞌe. Ti stojol norte oy oxib stiꞌ, ti stojol sur oy oxib stiꞌ, ti stojol smaleb cꞌacꞌal oy oxib stiꞌ.
\v 14 Lajchacoj cimiento yichꞌoj ti macteꞌe. Ti jujucoj ti cimientoe te pꞌejel jbitutic jujun, hoꞌontutic ti yajchancꞌopuntutic ti Cajvaltique ti lajchavoꞌuntutique.
\p
\v 15 Ti chꞌul abat ti laj scꞌoponune yichꞌoj smetro pasbil ti cꞌanal taqꞌuin yuꞌun jaꞌ tspꞌis ti jteclume xchiꞌuc ti smac stiꞌe xchiꞌuc ti macteꞌ yuꞌun ti jteclume.
\v 16 Cuadrado ti jteclume, coꞌol sjamalil xchiꞌuc snatil. Lic spꞌis ti smetro ti jteclume. Chaꞌmil oxib ciento kilómetro ilocꞌ. Coꞌol snatil xchiꞌuc stoylejal xchiꞌuc sjamalil. Mucꞌ ti jteclume.
\v 17 Laj spꞌis ti macteꞌ yuꞌun ti jteclume, sesenta y seis metro ilocꞌ. Hech chaj cꞌu cheꞌel ti jpꞌistic ti hoꞌucutique, jaꞌ hech laj spꞌis ti chꞌul abate.
\p
\v 18 Ti macteꞌ yuꞌun ti jteclume, pasbil ti jaspe-ton, sac. Jaꞌuc ti naetique puru cꞌanal taqꞌuin pasbil, xleblun hech chaj cꞌu cheꞌel espejo.
\v 19 Ti cimiento yuꞌun ti macteꞌ yuꞌun ti jteclume, jaꞌ ti puru ton ti toyol stojole ti yichꞌoje. Ti primero cimientoe jaꞌ jaspe-ton sbi, sac. Ti xchibal cimientoe jaꞌ zafiro-ton sbi, yox. Ti yoxibal cimientoe jaꞌ agata-ton sbi, yoxyoxtic. Ti xchanibal cimientoe jaꞌ esmeralda-ton sbi, yox.
\v 20 Ti yoꞌobal cimientoe jaꞌ onice-ton sbi, sac xchiꞌuc tsoj. Ti svaquibal cimientoe jaꞌ cornalina-ton sbi, tsoj. Ti sucubal cimientoe jaꞌ crisólito-ton sbi, cꞌon. Ti xvaxaquibal cimientoe jaꞌ berilo-ton sbi, yox. Ti sbalunebal cimientoe jaꞌ topacio-ton sbi, cꞌoncꞌontic. Ti slajunebal cimientoe jaꞌ crisopraso-ton sbi, cꞌon xchiꞌuc yox. Ti sbuluchibal cimientoe jaꞌ jacinto-ton sbi, icꞌicꞌtic. Ti slajchebal cimientoe jaꞌ amatista-ton sbi, tsojtsojtic.
\v 21 Ti lajcheb smac stiꞌ jaꞌ jujupꞌej perla yichꞌoj. Sac ti perlae. Pasbil ti puru cꞌanal taqꞌuin ti calletique. Xleblajet noꞌox hech chaj cꞌu cheꞌel espejo.
\p
\v 22 Ti jteclume muꞌyuc xa templo te o laj quil. Muꞌyuc xa stu yuꞌunic templo te o yuꞌun te xa xchiꞌinojic ti Diose, jaꞌ ti jelaven spꞌijile, xchiꞌuc ti Cajvaltique ti icham cuꞌuntique.
\v 23 Te ti jteclum muꞌyuc xa stu ti cꞌacꞌale ti ue yuꞌun te oy ti Diose xchiꞌuc ti Cajvaltique, oy squeval.
\v 24 Scotol ti muchꞌutic icolic xae, jaꞌ ti talemic ti jujupam balumile, te xa chanavic ti squeval ti Diose. Oy talemic uc ajvaliletic yuꞌunic, jaꞌ ti coꞌol laj xchꞌumbeic scꞌop ti Diose hech lec itunic yuꞌun ti Diose cꞌalal liꞌoyic ti balumile.
\v 25 Muꞌyuc bu chmacbat stiꞌ ti jteclume yuꞌun puru cꞌacꞌaltic te o. Yuꞌun muꞌyuc xa acꞌubal.
\v 26 Ti jaylajuntos ti crixchanoetique chvinaj scotol ti cꞌutic xꞌelan ti iꞌacꞌbatic spꞌijilic yuꞌun ti Cajvaltique, jaꞌ ti cꞌutic lec laj spasique.
\v 27 Te mu xꞌochic mi junuc ti muchꞌutic bolibenique, xchiꞌuc ti muchꞌutic chopol cꞌutic tspasique, xchiꞌuc ti muchꞌutic tsnopic cꞌope. Jaꞌ noꞌox ch-ochic ti muchꞌutic pꞌejajtic sbiic ti hun yuꞌun ti Cajvaltique ti laj yacꞌ sba ti milel cuꞌuntique. Jaꞌ ti hech chal ti hun muchꞌutic chcuxiic sbatel osile.
\c 22
\p
\v 1 Patil laj yacꞌbun jqꞌuel ti ucꞌum ti jun noꞌox yutsile, jaꞌ ti hoꞌ sventa cuxlejal sbatel osile. Te chlocꞌ tal te ti bu snacleb ti Diose xchiꞌuc ti Cajvaltique. Ti ucꞌume chleblun hech chaj cꞌu cheꞌel espejo.
\v 2 Ti mucꞌta jteclum oy jun mucꞌta calle. Te ti oꞌlol ti calle te chanav ti ucꞌume. Ti jujujech ti ucꞌume te oy ti teꞌetic sventa cuxlejal sbatel osil. Ti teꞌe jaꞌ tsjelilan ti sate ti chaqꞌue jujun u. Lajchatos chacꞌ. Ti yanal ti teꞌe jaꞌ sventa scolel ti ep ti tos ti crixchanoetique ti te nacajtique.
\v 3 Mi jutuc muꞌyuc cꞌusi chopol te o. Te tspas mantal ti Diose xchiꞌuc ti Cajvaltique. Scotol ti yajꞌabtele ti icol yuꞌune te chacꞌ sbaic ti abatinel ti stojol.
\v 4 Tsqꞌuelbeic xa sat ti Diose. Te tsꞌibabil ti stibaic ti sbi ti Diose.
\v 5 Te mu xꞌicꞌub osil. Mu scꞌanic luz, mu scꞌanic cꞌacꞌal, yuꞌun chacꞌ squeval stuc ti Cajvaltic Diose. Jaꞌ tspasic mantal xchiꞌuc sbatel osil.
\s Jaꞌ scꞌopilal chital ti ora, xchi ti Jesuse
\p
\v 6 Hech laj yalbun ti chꞌul abate:
\p ―Melel ti chcꞌot ti pasel ti cꞌu cheꞌel laj xa calbote. Ti Diose jaꞌ ti laj sventaimbe yoꞌntonic ti jꞌalcꞌopetic yuꞌune ti voꞌone, laj stacun talel, hoꞌon ti xchꞌulꞌabatune, yuꞌun chacacꞌboxuc anaꞌic hoꞌoxuc ti yajꞌabteloxuque ti cꞌusi poꞌot xa chcꞌot ti pasele.
\p
\v 7 Aꞌyo me avaꞌi, chtal la ti ora ti Cajvaltique. Jun noꞌox yutsil scotol ti muchꞌutic chacꞌ ti yoꞌntonic ti cꞌusi tsꞌibabil ti hun liꞌto, jaꞌ ti poꞌot xa chcꞌot ti pasele ―xiyutun ti chꞌul abate.
\p
\v 8 Hoꞌon Juanun, hoꞌon laj caꞌi scotol, hoꞌon laj quil scotol liꞌto. Cꞌalal laj coꞌnton laj caꞌi scotol laj quil scotol, laj jpatan jba ti lum ti stojol ti chꞌul abate ti laj yacꞌbun jqꞌuel scotol avi to yuꞌun jcꞌan ti jpas ti mucꞌ.
\v 9 Hech laj yalbun:
\p ―Mu xapasun ti mucꞌ hoꞌoni. Yuꞌun coꞌol cacꞌoj jbatic ti abatinel yuꞌun ti Diose xchiꞌuc ti avermanotaque, jaꞌ ti jꞌalcꞌopetic yuꞌun ti Diose ti voꞌone xchiꞌuc scotol ti muchꞌutic chacꞌ ti yoꞌntonic ti cꞌop liꞌ ti hun liꞌto. Jaꞌ stuc tscꞌan ti jpastic ti mucꞌ ti Diose jcotoltic ―xiyutun ti chꞌul abate.
\p
\v 10 Hech laj yalbun uc:
\p ―Mu me xapacꞌbe sello yuꞌun hech mu macaluc chcom ti hun avi to, jaꞌ ti scꞌopilal ti cꞌusi chcꞌot ti pasele. Acꞌo sqꞌuelic scotolic yuꞌun poꞌot xa chcꞌot ti pasel.
\v 11 Ti muchꞌu mu tojuc yoꞌntone, mi mu scꞌan xchꞌun ti cꞌu cheꞌel tsꞌibabile, tspasilan o ti cꞌusi chopole. Ti muchꞌu boliben yoꞌntone, mi mu scꞌan xchꞌun ti cꞌu cheꞌel tsꞌibabile, tspasilan o ti cꞌutic tscꞌan ti sbecꞌtale. Jaꞌuc ti muchꞌu toj yoꞌntone, toj tspasilan scotol. Ti muchꞌu lecuben xa yoꞌntone, jaꞌ tspasilan ti cꞌusi leque, mu xa xchꞌumbe smantal ti sbecꞌtale ―xiyutun ti chꞌul abate.
\p
\v 12 Hech chal ti Jesuse:
\p ―Chital ti ora, chtal jchapan scotol. Ti cꞌutic xꞌelan laj spase jaꞌ hech chichꞌic.
\v 13 Hoꞌon laj jliques scotol, hoꞌon ti huꞌtes scotol. Hoꞌon jtalel oyun ―xchi ti Jesuse.
\p
\v 14 Jun noꞌox yutsil scotol ti muchꞌutic ipocbatic loqꞌuel smulique ti xchꞌichꞌel ti Cajvaltique. Yuꞌun hech xuꞌ chba sloꞌbe sat ti teꞌ sventa cuxlejal sbatel osile. Xuꞌ ch-ochic te ti yut ti mucꞌta jteclume.
\v 15 Yuꞌun mu xuꞌ ch-ochic ti mucꞌta jteclum ti muchꞌutic mu xtun yoꞌntonique, xchiꞌuc ti jpicchꞌichꞌetique, xchiꞌuc ti jmulivajeletique, xchiꞌuc ti jmilvanejetique, xchiꞌuc ti muchꞌutic chchꞌunic ti santoetique, xchiꞌuc scotol ti muchꞌutic lec chaꞌyic tsnopic cꞌop ti chloꞌlavanique.
\p
\v 16 Hoꞌon Jesusun laj xa jtac talel ti chꞌul abat cuꞌune hech laj xa yalboxuc ti cꞌusi chcꞌot ti pasele, hoꞌoxuc ti achꞌunojbucun ti jcꞌope. Hoꞌon yelnichꞌonun ti Davide. Hoꞌon ti jtsacbe comel yabtel, hoꞌon ti jpas mantal sbatel osil. Hech chaj cꞌu cheꞌel ti mucꞌta cꞌanale cꞌalal chaqꞌuelic, chanaꞌic ti tsta xa yorail tsacub, jaꞌ noꞌox hechun uc ti hoꞌoni ti cꞌalal chavil ti chitale, hech chanaꞌic ti iꞌechꞌ xa scotol ti vocol avuꞌunique ―xiyutun ti Jesuse.
\p
\v 17 Ti hoꞌucutique ti yajnilucutic ti Cajvaltique xchiꞌuc ti Chꞌul Espíritue, “Laꞌ me”, chcutic ti Cajvaltique. Ti muchꞌutic chaꞌyic ti cꞌop tsꞌibabil avi to, “laꞌ me”, acꞌo chiuc uc.
\p Scotol ti muchꞌu taquin yoꞌntone, jaꞌ ti muꞌyuc smucꞌul yoꞌntone, acꞌo taluc. Yuꞌun scotol ti muchꞌu tscꞌane, smoton ch-acꞌbat yuchꞌ ti hoꞌ sventa cuxlejal sbatel osile, hech chcuxiic sbatel osil.
\p
\v 18 Hech laj yal uc ti Jesuse:
\p ―Hoꞌon ti jtaqꞌui scotol ti muchꞌutic chaꞌyic ti cꞌop ti liꞌ ti hun liꞌto ti chal ti cꞌusi chcꞌot ti pasele. Scotol ti muchꞌu chacꞌbe xchiꞌil avi cꞌop liꞌto, jaꞌ hech yepal ch-acꞌbatic castigo yuꞌun ti Diose hech chaj cꞌu cheꞌel liꞌ tsꞌibabil ti hun liꞌto.
\v 19 Scotol ti muchꞌu mu spas ti mucꞌ scotol ti cꞌop avi to ti chal ti cꞌusi chcꞌot ti pasele, hech mu xuꞌ ch-och ti mucꞌta jteclume yoꞌ bu muꞌyuc xa mulil. Hech mu xba sloꞌbe sat ti teꞌe sventa cuxlejal sbatel osil hech chaj cꞌu cheꞌel tsꞌibabil ti hun liꞌto ―xchi ti Jesuse.
\p
\v 20 Hech chal ti Cajvaltique jaꞌ ti laj yalbun scotol avi to:
\p ―Melel chcal, poꞌot xa chiyal tal ―xchi.
\p Jun yutsil ti hech chcꞌot ti pasel. “Laꞌ me, Cajval Jesús”, xichi.
\p
\v 21 Acꞌo yacꞌbe bendición ti Cajvaltic Jesucristoe scotol ti cꞌu yepal lecubtasbil xa yoꞌntonic yuꞌun.