\id 2CO Western Tzutujil [tzt] NT (Guatemala) -2009 bd. 
\h 2 CORINTIOS
\toc1 2 Corintios
\toc2 2 Co
\mt 2 CORINTIOS
\c 1
\s 
\p
\v 1 Anin ja rin Pablo, Dios ryaꞌon chwe chi inocnak apóstol rxin ja Jesucristo. Anin wachbil ja kachꞌalal Timoteo ntzꞌibaj jawaꞌ carta riꞌ in ntakel ewqꞌuin wachꞌalal ja nemol ewiꞌ pa rubiꞌ ja Dios chipan ja tinamit Corinto. In ntakel cuqꞌuin chakajaꞌ canojel ja kachꞌalal ja re xin Dios ja recꞌo chipan ja juleꞌ chic tinamit ja cꞌo chipan ja departamento Acaya.
\v 2 Ja rutzil ja nsipaj ja Dios chake rachbil ja quicotemal xin Dios ja ta riꞌ xtecochij más tre ja katataꞌ Dios in tre ja kajaw Jesucristo.
\s * * * * * * * * * *
\p
\v 3 Ni ta xtiyaꞌ wiꞌ rukꞌij ja Dios, arjaꞌ Dios in Tatixel rxin ja kajaw Jesucristo, arjaꞌ jun Tatixel ja ni rxin wiꞌ chi npokonaj kawach, arjaꞌ jun Dios ja ni rxin wiꞌ chi nyukbaꞌ kacꞌuꞌx.
\v 4 Ja tok nokqꞌuejeꞌ chipan ja rpokonal xa nak ta rpokonal, arjaꞌ ni nyukbaꞌ wiꞌ kacꞌuꞌx. Queriꞌ nuban chake utzcꞌa chi ajoj tok nekatzꞌat ja winak ja recꞌo chipan ja rpokonal xa nak ta rpokonal nokcowini nkayukbaꞌ quecꞌuꞌx ejeꞌeꞌ chakajaꞌ. Caniꞌ nuban ja Dios chake, arjaꞌ nyukbaꞌ kacꞌuꞌx ajoj queriꞌ cꞌa nkaban chique ja winak, ajoj nkayukbaꞌ chic quecꞌuꞌx ejeꞌeꞌ chakajaꞌ.
\v 5 Congana nkatij rpokonal ja caniꞌ xuban ja Cristo pro ja tok congana rpokonal nkatij xa janiꞌ nyukbaꞌ más kacꞌuꞌx ja Dios chakajaꞌ pro xa rmal ja xa jun kabanon ruqꞌuin ja Cristo tok nuban queriꞌ chake.
\v 6 Ajoj tok nkatij rpokonal jariꞌ cꞌoli rcꞌamonto chewe como nokcowini nkayukbaꞌ más ecꞌuꞌx in nixtotaj más rmal ja Dios. Ja cꞌa tok Dios nyukbaꞌ kacꞌuꞌx ajoj jariꞌ nokcowini nkayukbaꞌ chic ecꞌuꞌx ixix in nixtotaj más rmal ja Dios. Jawaꞌ ja cꞌa xinbij chewe riꞌ congana nixrutoꞌ chi rcochꞌic nojel ja rpokonal ja caniꞌ nokkꞌax ajoj chipan.
\v 7 Ajoj bien kotak chi nixcowini necochꞌ como kotak chi ja tok ixix jun netij ja rpokonal jariꞌ ixix jun chakajaꞌ nyukbax ecꞌuꞌx rmal ja Dios.
\p
\v 8 Queriꞌ nbij chewe wachꞌalal como ajoj nkajoꞌ chi newotakij nak rbanic ja nimlaj rpokonal ja katij chipan ja departamento Asia, ni katzij wiꞌ chi jun nimlaj rpokonal congana lawuloꞌ, congana capuj kacꞌuꞌx rmal: —Ni nokcam wiꞌ, xokcheꞌ kaj.
\v 9 Ja tok kachꞌob chi xa camíc cajal chic chikawach jariꞌ xucꞌut chikawach chi rjawaxic chi solo ruqꞌuin ja Dios nyukeꞌ wiꞌ kacꞌuꞌx, jun Dios ja nyico quixin ja camnakiꞌ chipan ja camíc, bien chꞌobtaj kumal chi mta noc wiꞌ ja xtiyukeꞌ kaj ta kacꞌuꞌx kuqꞌuin ajoj kayon.
\v 10 Como ja Dios arjaꞌ xokrutoꞌ chipan ja camíc pro jun camíc congana lawuloꞌ, arjaꞌ rmajon katoꞌic camic in ni yukul wiꞌ kacꞌuꞌx ruqꞌuin chi nokrutoꞌ na chwak cabij chakajaꞌ.
\v 11 In ixix chakajaꞌ wachꞌalal, koꞌetoꞌoꞌ pan oración. Ja tok e qꞌuiy chewe nqueban orar pa kacuenta in tok ncꞌaxaxi ja coración rmal ja Dios in noktotaj rmal tokocꞌariꞌ e qꞌuiy chakajaꞌ nemaltioxin tre ja Dios como arjaꞌ ntoꞌo kaxin.
\s * * * * * * * * * *
\p
\v 12 Como ajoj wachꞌalal congana nokquicoti ja mta nak ta kabanon ja xtitiꞌon ta kaconciencia rmal, chꞌajchꞌoj rij rwach ja kabanon, ni majun nak ta kawawan ta pa tak kanma. Ni quirwariꞌ ja kabanon chiquewach ja winak in pior cꞌa chewach ixix. Ma kanaꞌoj ta ajoj nkacoj pro ja rutzil ja nsipaj ja Dios chake jariꞌ nsamaji pa tak kanma chi rbanic nojel ja nkaban.
\v 13 Jawaꞌ carta riꞌ ni majun engaño rcꞌan, ni queriꞌ nbij ja carta ja caniꞌ nesiqꞌuij, bien nixcowini nechꞌob ja nbij. Ja ngana anin, kas ta xtichꞌobtaj emwal chijutij.
\v 14 Ecꞌoli chewe ja bien chꞌobtajnak chic cumal chi ajoj ok utzlaj tak ajsamajelaꞌ rxin ja Jesucristo in congana nequicot chakij, in ajoj congana nokquicot chewij ixix chakajaꞌ, in niquirwariꞌ kabanon ewqꞌuin ja tok xtipi chic jutij ja kajaw Jesús.
\p
\v 15 Ja tok xinchꞌob chi nban jun viaje, como cꞌo nconfianza ewqꞌuin chewiꞌ tok xinchꞌob chi ewqꞌuin ninkꞌax wiꞌ nabey in ninkꞌax chic jutij ewqꞌuin ja tok xquinmelojto. Ja ngana anin, nixquicot rmal ja caꞌmul ninkꞌax ewqꞌuin.
\v 16 Quewaꞌ xinchꞌob riꞌ, ninkꞌax ewqꞌuin nabey cꞌacꞌariꞌ ninbe chic chipan ja departamento Macedonia cꞌacꞌariꞌ ninkꞌax chic jutij ewqꞌuin cꞌacꞌariꞌ ninetoꞌel chi ninbe chic pa Judea. Queriꞌ xinchꞌob.
\v 17 Pro como ma xinbe ta ¿la xa ma chꞌobol ta xinban nechꞌob ixix, la xa ngana anin xinban kaj nuyon nechꞌob ixix, la xa chi nuchiꞌ cꞌo wiꞌ nechꞌob ixix ja tok xinbij chi can ninbe ewqꞌuin? Anin ma in queriꞌ ta.
\v 18 Caniꞌ tre ja Dios arjaꞌ ni nuban wiꞌ cumplir ja ntzujuj, arjaꞌ rotak chi ma chi kachiꞌ ta cꞌo wiꞌ ja kabij chewe.
\v 19 Como ja kayaꞌ rbixic chewe jariꞌ Jesucristo ja Ralcꞌwal Dios, queriꞌ xinban anin e wachbil ja Silvano in Timoteo. Ja Jesucristo arjaꞌ mta jutij xbij ta jun tzij ja xta chuchiꞌ cꞌo wiꞌ pro ni nuban wiꞌ cumplir ja ntzujuj.
\v 20 Queriꞌ nbij chewe como ruqꞌuin ja Jesucristo nkawil wiꞌ nojelal ja rtzujunto ja Dios chake in rmal ja Jesucristo tok nkabij amén como jariꞌ nkayabej rukꞌij ja Dios.
\v 21 Ja Dios arjaꞌ okrticon chi utz ruqꞌuin ja Cristo in queriꞌ rbanon chewe ixix chakajaꞌ, okrchaꞌon chi nkaban ja rsamaj.
\v 22 In chakajaꞌ cꞌo jun retal rcojon chake ja ncꞌutu kaxin chi ok xin Dios, cꞌoli ja rEspíritu Santo rtakonto pa tak kanma jariꞌ ocnak kaseguro chi nuyaꞌ na chake nojel ja herencia ja rtzujun chake.
\p
\v 23 Chwach Dios ja xtinbij chewe riꞌ, como anin mta ngana ninbe ewqꞌuin nixenbanaꞌ ta castigar xa chewiꞌ ja tok ma xinbe ta ewqꞌuin pa Corinto.
\v 24 Pro maxta techꞌob chakij chi ajoj nkajoꞌ nixkaban mandar tre ja yukulbal ecꞌuꞌx ruqꞌuin ja Jesucristo, ma queriꞌ ta, como xa rmal ja yukulbal ecꞌuꞌx ruqꞌuin chewiꞌ tok cow ixpaꞌli camic. Pro ja kamajon rbanic jariꞌ noktajini noksamaji pan ecuenta utzcꞌa chi newil más ja quicotemal xin Dios.
\c 2
\p 
\v 1 Queriꞌ rbanic wachꞌalal, anin bien xinchꞌob chi matinban chic jun ja viaje ewqꞌuin ja xta bis rcꞌamonto chewe. 
\v 2 Queriꞌ xinchꞌob wachꞌalal, como anin wi xa pa bis nixnuyaꞌ wiꞌ jariꞌ xa ninbison anin chakajaꞌ in ¿nak cꞌa nyoꞌ chic ariꞌ ja quicotemal chwe? nij ixix wiꞌ wachꞌalal. 
\v 3 Rmalcꞌariꞌ tok xintzꞌibaj ja carta chewe utzcꞌa chi ma pa bis ta nineyaꞌ wiꞌ tok xquinekaj ewqꞌuin como ja yatal chewe chi neyaꞌ quicotemal chwe. Queriꞌ nbij chewe como anin cꞌo nconfianza ewqꞌuin ewanojelal chi ja tok ninquicot anin jariꞌ ixix jun nixquicot wqꞌuin chakajaꞌ. 
\v 4 Como anin ja tok xintzꞌibaj ja carta ja xintak ewqꞌuin congana bis okꞌej nmajon triꞌ. Ja xintzꞌibaj chipan ja carta ma rmal ta chi nuyaꞌ bis chewe pro xintzꞌibaj utzcꞌa chi netzꞌat chi congana nixwajoꞌ. 
\s * * * * * * * * * * 
\p 
\v 5 Pro ja kachꞌalal ja ticowi ja bis, ma nuyon ta anin xinruyaꞌ pa bis pro xixbison ixix rmal chakajaꞌ ewanojelal. Queriꞌ nbij chewe como matinwajoꞌ congana ta xquixnchꞌolij ta rmal. 
\v 6 Pro ja camic sobre alaꞌ ja disciplina tre ja kachꞌalal. 
\v 7 Ja cꞌa neban tre camic, tecuyuꞌ in teyukbaꞌ rucꞌuꞌx. Quirtariꞌ neban jutzꞌit tre utzcꞌa chi maticapuj rucꞌuꞌx chijutij rmal ja bis. 
\v 8 Rmalcꞌariꞌ congana nban recomendar chewe, lokꞌ tenaꞌaꞌ ja kachꞌalal utzcꞌa chi nutzꞌat chi congana newajoꞌ. 
\v 9 Como anin nwajoꞌ nixncꞌambajaj wachꞌalal, nwajoꞌ nwotakij wi nenimaj nojel ja nbij chewe in rmalariꞌ chakajaꞌ ja tok xintakel ja jun chic carta ewqꞌuin. 
\v 10 Ja wi ixix necuy ja kachꞌalal can ncuy anin chakajaꞌ. Ja cꞌa wi cꞌoli ncuyun jariꞌ emwal ixix chewiꞌ tok ncuyun, in chakajaꞌ ja Cristo rotak chi ncuyun. 
\v 11 Ni rjawaxic wiꞌ chi nkacuy ja kachꞌalal utzcꞌa chi makoruchꞌec ja Satanás como ajoj bien kotak ja rnaꞌoj ja Satanás chi ni nrajoꞌ wiꞌ nokruban engañar. 
\s * * * * * * * * * * 
\p 
\v 12 Ja cꞌa xinban wachꞌalal, tok xinekaji chipan ja tinamit Troas chi rbixic ja utzlaj tzij xin Cristo cꞌo jun bey jaktaj chinwach chi nban ja samaj rxin ja kajaw Jesucristo. 
\v 13 Pro ni ma quiꞌ ta wiꞌ nucꞌuꞌx rumac ja ma xinwil ta triꞌ ja kachꞌalal Tito. Rmalcꞌariꞌ tok xinel chiquicojol ja kachꞌalal ja recꞌo pa Troas in xinbe chic chipan ja departamento Macedonia. 
\v 14 Pro nmaltioxij tre ja Dios como arjaꞌ ni nokrcꞌaj wiꞌ in nokchꞌocmaji chakajaꞌ pro xa rumac ja xa jun kabanon ruqꞌuin ja Cristo chewiꞌ tok nokchꞌocmaji. Maltiox tre ja Dios chakajaꞌ como arjaꞌ ryaꞌon chake chi nokbe nat nakaj chi nekayaꞌaꞌ rbixic ja Jesucristo chique winak, jariꞌ caniꞌ rxulaꞌ jun akꞌom nekaj cuqꞌuin pro jun akꞌom ja congana quiꞌ rxulaꞌ. 
\v 15-16 Como ajoj tok nkayaꞌ rbixic ja Jesucristo ok caniꞌ jun nakun ja congana quiꞌ rxulaꞌ nunaꞌ ja Dios pro caꞌiꞌ quewach ja winak ja necꞌaxan kaxin. Ecꞌoli ja netajini nquewil ja totajem xin Dios in tok nkayaꞌ rbixic ja Jesucristo chique jariꞌ utzlaj cꞌaslemal rcꞌamonto chique. Pro ecꞌo chic juleꞌ ja netajini nebe chipan ja nimlaj rpokonal in tok nkayaꞌ rbixic ja Jesucristo chique jariꞌ xa camíc rcꞌamonto chique. Jawaꞌ samaj xin Dios ja cꞌa xinbij chewe riꞌ ¿nak ta cꞌa xticowin ariꞌ xtirijkalej ta ja xta ruyon kaj? 
\v 17 Pro ajoj nkaban jawaꞌ samaj riꞌ como ma ok junan ta cuqꞌuin ja juleꞌ chic winak ja xa por interés nquexol ja rtzobal Dios ruqꞌuin juleꞌ itzel tak tijonem. Pro ajoj tok nkayaꞌ rbixic ja rtzobal Dios nojel kacꞌuꞌx nojel kanma nkayaꞌ, Dios nyoꞌ chake ja nkabij, arjaꞌ nokrutzꞌat, xa jun kabanon ruqꞌuin ja Cristo chi rbixic. 
\c 3 
\s * * * * * * * * * * 
\p 
\v 1 Ja camic maxla nechꞌob chic jutij chakij chi xa kamajon rbanic recomendar kiꞌ kayon. Owi maxla nechꞌob chi ajoj ncꞌatzin juleꞌ carta de recomendación chake ja tok nokbe ewqꞌuin in tok nokel chic ewqꞌuin caniꞌ chique ja juleꞌ chic winak ja xebe ewqꞌuin. 
\v 2 Pro ixix mismo ixocnak ix caniꞌ jun carta ja nokrbanbej recomendar chique winak, jun carta ja tzꞌibtal pa tak kanma, jun carta ja nsiqꞌuix cumal canojel ja winak como bien cotak canojel janiꞌ ja utzlaj samaj xin Dios ja kabanon checojol. 
\v 3 Bien ix kꞌalaj chi ix caniꞌ jun carta pro jun carta banon rmal ja Cristo in ajoj xokjachowi ja carta chique ja winak. Pro ma tinta ta ja cojon chi rtzꞌibaxic ja carta pro ja cꞌaslic Dios arjaꞌ xucoj ja rEspíritu Santo chi rtzꞌibaxic, jun carta ja tzꞌibtal pa tak canma winak, ma chwach ta tzꞌalam tak abaj tzꞌibtal wiꞌ. 
\p 
\v 4 Ajoj bien kotak chi kaban jun utzlaj samaj xin Dios checojol pro xa rmal ja Cristo tok xokcowini kaban ja samaj, in Dios rotak chi queriꞌ kaban. 
\v 5 Pro ja wixta xa kayon jariꞌ ni ta majun nak ta nokcowini nkaban, mta moda xtikabij ta chi cꞌo jun samaj xin Dios kawinakarsaj nojoj kayon pro jariꞌ solo ruqꞌuin ja Dios npi wiꞌ nojelal ja nokcowini nkaban. 
\v 6 Como ja Dios arjaꞌ ryaꞌon chake chi nokcowini nekatijoj winak tre ja cꞌacꞌa chominem xin Dios, jun chominem ja nnataj chake ja rEspíritu Santo, ma ja ta nnataj chake jun ley xin Dios ja chaka tzꞌibtali. Queriꞌ cꞌa rbanic como ja ley xin Dios ja chaka tzꞌibtali jariꞌ xa nucꞌut chikawach chi nokcam rmal ja kil kamac pro ja rEspíritu Santo jariꞌ nuyaꞌ jun cꞌacꞌa cꞌaslemal chake. 
\p 
\v 7 Ja jun chominem xin nabey xa camíc rcꞌamonto, xa chwach tzꞌalam tak abaj tzꞌibtal wiꞌ. Pro cꞌoli ja ruchꞌaꞌ Dios rachbilanto ja chominem, ja cꞌa rpalaj ja Moisés chꞌaꞌan rmal in rmalariꞌ ma xcochꞌtaj ta cumal ja raj Israel quetzꞌat ta ja rpalaj. Pro ja ruchꞌaꞌ Dios ja rachbilanto ja nabey chominem jariꞌ xa nocꞌo rukꞌij. 
\v 8 Ja cꞌa wi congana ruchꞌaꞌ Dios rachbilajto ja jun chominem xin nabey pior cꞌa ja samaj ja ntajini nuban ja rEspíritu Santo chipan awaꞌ jun cꞌacꞌa tiempo ja rokcꞌo wiꞌ riꞌ jariꞌ más kꞌaxnak chi na ruchꞌaꞌ ja Dios nrachbilaj. 
\v 9 Queriꞌ rbanic como ja chominem ja xa natrucꞌamel chipan ja nimlaj rpokonal wi congana ruchꞌaꞌ Dios rachbilajto pior cꞌa ja cꞌacꞌa chominem ja nchomarsan awxin ruqꞌuin ja Dios in utz natrutzꞌat ja Dios rmal jariꞌ más kꞌaxnak chi na ja ruchꞌaꞌ Dios nrachbilaj. 
\v 10 Ja jun chominem ja congana ruchꞌaꞌ Dios rachbilajto nabey pro ja camic ni mta chwach ja cꞌacꞌa chominem como ja cꞌacꞌa chominem más kꞌaxnak chi na ruchꞌaꞌ Dios rachbilanto. 
\v 11 Ja chominem ja xa xocꞌo rukꞌij, wi congana ruchꞌaꞌ Dios rachbilajto pior cꞌa ja cꞌacꞌa chominem ja ni mta wiꞌ ja xtocꞌo ta rukꞌij jariꞌ janiꞌ chi la kꞌaxnak ja ruchꞌaꞌ Dios rachbilanto. 
\p 
\v 12 Como ajoj yukul kacꞌuꞌx ruqꞌuin jun chominem ja matocꞌo rukꞌij chewiꞌ tok nkakꞌalasaj chi utz ja cꞌutun chikawach. 
\v 13 Ja cꞌa Moisés ojer arjaꞌ xubotz na rpalaj tre jun tziak, xwawaj, pro ja rajoj camic ma rjawaxic ta chi cꞌo ta nkawawaj. Ja Moisés xubotz ja rpalaj utzcꞌa ja ruchꞌaꞌ Dios ja cꞌo chi rpalaj matitzꞌat cumal ja rach tak aj Israel ja tok nocꞌo rukꞌij. 
\v 14 Ja cꞌa raj Israel ejeꞌeꞌ sach quinaꞌoj, ni ma xchꞌobtaj ta wiꞌ cumal nak rbanic. Como ejeꞌeꞌ camic tok nquisiqꞌuij ja tzꞌibtal can chipan ja jun chominem xin nabey pro ni matichꞌobtaj wiꞌ cumal nak rbanic, caniꞌ cꞌa cꞌo na ja tziak ja nwawan chiquewach. Ja wi nyukeꞌ quecꞌuꞌx ruqꞌuin ja Cristo cꞌa tokocꞌariꞌ nchꞌobtaj cumal nak rbanic ja jun chominem ja xin nabey. 
\v 15 Pro ni ma chꞌobtajnak ta wiꞌ cumal camic como ja tok nsiqꞌuix pa quixquin ja ley xin Dios ja tzꞌibtal can rmal ja Moisés jariꞌ caniꞌ cꞌo jun tziak botzben ja quewiꞌ canma ja nwawan chiquewach nak rbanic. 
\v 16 Pro ja tok nyukeꞌ quecꞌuꞌx ruqꞌuin ja kajaw Jesucristo jariꞌ neli ja tziak ja botzben ja quewiꞌ canma in nchꞌobtaj chic cumal nak rbanic. 
\v 17 In camic nbij chewe, ja kajaw Jesucristo arjaꞌ xa jun quibanon ruqꞌuin ja rEspíritu, in wi cꞌol awqꞌuin ja rEspíritu rxin ja kajaw Jesucristo jariꞌ atwasanel chic libre. 
\v 18 In ajoj kanojelal ja yukul kacꞌuꞌx ruqꞌuin ja kajaw Jesucristo majun nak ta botzben ta kapalaj, kamajon rtzꞌatic camic ja kajaw Jesucristo chi más kꞌaxnak chi na ruchꞌaꞌ Dios cꞌo ruqꞌuin. In como kamajon rtzꞌatic chi congana nim rukꞌij chewiꞌ tok noktajini nokqꞌuextaji, ntajini noqui ja kanaꞌoj ajoj ja caniꞌ rnaꞌoj arjaꞌ, xa janiꞌ npi más npi más ja ruchꞌaꞌ pa tak kanma. In nojel ariꞌ ruqꞌuin ja rEspíritu rxin ja kajaw Jesucristo npi wiꞌ. 
\c 4 
\p 
\v 1 Rmalcꞌariꞌ nbij chewe, jawaꞌ samaj ja kamajon rbanic riꞌ, como jun cochinem xin Dios chewiꞌ tok ni maticapuj wiꞌ kacꞌuꞌx chi rbanic. 
\v 2 Pro ja kabanon ni kachꞌaꞌon wiꞌ chique ja juleꞌ chic winak ja nqueban tre ja quisamaj como cꞌo jeꞌe nqueban ja xa pan awatali ja xa qꞌuixbal rbanic pro ajoj ni mta wiꞌ jun engaño nkaban in tok nkayaꞌ rbixic ja rtzobal Dios ni majun nak ta nkaxol ta ruqꞌuin. Pro ja nkaban, nkakꞌalasaj chi utz ja rtzobal Dios chiquewach ja winak, ja nkajoꞌ cꞌa pa tak canma nekaj wiꞌ canojelal utzcꞌa chi ncotakij chi ni katzij wiꞌ ja nkabij in bien kotak chi Dios rotak nojel ja nkaban. 
\v 3 Pro ja utzlaj tzij xin Cristo ja nkayaꞌ rbixic wi ecꞌoli winak ja matichꞌobtaj cumal xa ni queyon wariꞌ ja netajini nebe chipan ja nimlaj rpokonal. 
\v 4 Matichꞌobtaj cumal como ja diablo ja rcojon riꞌ como dios waweꞌ chwachꞌulew arjaꞌ rmoyirsan ja quewiꞌ canma. Queriꞌ nuban ja diablo chique ja winak ja matiyukeꞌ quecꞌuꞌx ruqꞌuin ja Jesucristo utzcꞌa ja luz xin Dios matekaji pa tak canma. Jariꞌ luz jariꞌ ja utzlaj tzij xin Dios ja ncꞌutuwi chi janila nim rukꞌij ja Cristo. Ja cꞌa Cristo arjaꞌ ni junan quinaꞌoj ruqꞌuin ja Dios. 
\v 5 Como ni ja wiꞌ ja Jesucristo nkanataj tok nkayaꞌ rbixic ja utzlaj tzij, arjaꞌ Rajaw nojelal, nokcheꞌ tre, ma ajoj ta nkanataj kaj ta kiꞌ kayon. Ja cꞌa rajoj ok ilinelaꞌ ewxin pro rumac ja Jesús ja tok kabanon queriꞌ. 
\v 6 Queriꞌ kabanon como ja Dios arjaꞌ cꞌo jun luz rtakonto pa tak kanma ja caniꞌ xuban ojer tok xbij chi: —Tiwinakari ja luz, neꞌe, in winakari ja luz chipan ja kꞌekumal. Queriꞌ rbanon chake utzcꞌa chi nchꞌaꞌani ja luz xin Dios pa tak kanma in rmalariꞌ ja winak xticotakij na chi ruqꞌuin ja Jesucristo natzꞌat wiꞌ chi janila nim rukꞌij ja Dios. 
\s * * * * * * * * * * 
\p 
\v 7 Jawaꞌ luz xin Dios ja cꞌa xinbij kaj chewe riꞌ caniꞌ jun nimlaj mebaꞌil kucꞌan pro ja rajoj xa ok ulew, xa ok caniꞌ juleꞌ bojoꞌy ja cꞌolon juleꞌ nimak tak mebaꞌil chipan. Queriꞌ cꞌa rbanon chake ja Dios utzcꞌa chi ja nimlaj poder ja nsamaji pa tak kacꞌaslemal jariꞌ ni kꞌalaj wiꞌ chi ruqꞌuin Dios penak wiꞌ in ma ajoj ta kawinakarsan nojoj kayon. 
\v 8 Ja rcꞌayewal ni cꞌo wiꞌ penak chakij chikawach pro xarwariꞌ okcowinnak okelnak chipan. Ni cꞌo wiꞌ ja npi chakij: —¿Nak nkaban cꞌawaꞌ? nokcheꞌe, pro ni ma capujnak ta wiꞌ kacꞌuꞌx rmal. 
\v 9 Nij ecꞌo wiꞌ ja nquicanoj nak ja nqueban chake pro ja Dios arjaꞌ ni ma okryaꞌon can ta wiꞌ. Cꞌo jeꞌe okquichꞌakin pa tokꞌulew pro ni ma banon ta wiꞌ cowinem chakij chi okquicamsan ta. 
\v 10 Como ni pa camíc wiꞌ okcꞌo wiꞌ chewiꞌ tok noktajini kamajon rnaꞌic janiꞌ rquiꞌil ja rcamic ja Jesús. Queriꞌ kabanon utzcꞌa chi bien nkꞌalajin na janiꞌ rcꞌaslemal ja Jesús chi ntajini nsamaji chipan ja kacuerpo chakajaꞌ. 
\v 11 Queriꞌ nbij chewe como ja rokcꞌasli ni ncanox wiꞌ kij kawach nak nba̱n chake chi nokcamsaxi pro rumac ja Jesús ja tok nba̱n queriꞌ chake. Queriꞌ nba̱n chake utzcꞌa chi bien nkꞌalajin na janiꞌ rcꞌaslemal ja Jesús chi ntajini nsamaji chipan ja kacꞌaslemal masqui xa ok ulew. 
\v 12 Queriꞌ rbanic, ja rajoj ni pa camíc wiꞌ okcꞌo wiꞌ pro ja chewe ixix jariꞌ utzlaj cꞌaslemal rcꞌamonpi chewe. 
\p 
\v 13 Pro ja rajoj cꞌoli ja rEspíritu Santo kuqꞌuin, arjaꞌ ryaꞌon chake chi cꞌo yukulbal kacꞌuꞌx ruqꞌuin ja Dios. Jariꞌ ja mismo Espíritu Santo ja cꞌo ruqꞌuin ja rajsamajel xin Dios ojer ja tok xtzꞌibaj can juleꞌ tzij chipan ja rtzobal Dios quewariꞌ: —Anin yukul nucꞌuꞌx ruqꞌuin ja Dios in ma xinpokonaj ta xinyaꞌ rbixic, neꞌe. In como jariꞌ mismo Espíritu Santo cꞌo kuqꞌuin camic chewiꞌ tok yukul kacꞌuꞌx ruqꞌuin ja Dios in matikapokonaj nkayaꞌ rbixic chakajaꞌ. 
\v 14 Queriꞌ nbij chewe como bien kotak chi ja Dios arjaꞌ nokruyic na chipan ja camíc. Como ja Dios arjaꞌ yico rxin ja kajaw Jesús chipan ja camíc in nokruyic na ajoj chipan chakajaꞌ rumac ja xa jun kabanon ruqꞌuin ja Jesús in nuyaꞌ na chake chi nokekaj na chwach pro ix kachbil chic triꞌ chakajaꞌ. 
\v 15 Queriꞌ nbij chewe como nojel ja noktajini nokkꞌax chipan camic utzcꞌa chi cꞌoli rcꞌamonpi ixix chewe. Queriꞌ nkaban utzcꞌa ja rutzil ja nsipaj ja Dios jariꞌ nbe más nbe más cuqꞌuin ja winak in tok nbe más cuqꞌuin jariꞌ más chi na e qꞌuiy nemaltioxin tre ja Dios in nojel ariꞌ noqui como yaꞌbal rukꞌij ja Dios. 
\p 
\v 16 Rmalcꞌariꞌ ja tok ni maticapuj wiꞌ kacꞌuꞌx. Ja kacuerpo jariꞌ ni katzij wiꞌ chi xa rmajon rajiꞌxem, xa ntajini nqꞌuis rchokꞌakꞌ pro cꞌo jun cꞌacꞌa cꞌaslemal ja cꞌo pa tak kanma jariꞌ kꞌij kꞌij xa janiꞌ nba̱n más cꞌacꞌa tre. 
\v 17 Queriꞌ nbij chewe como ja rpokonal ja kamajon rtijic waweꞌ chwachꞌulew jariꞌ ma al ta, xa jurata nocꞌowi como ja rpokonal ja nkatij quewaꞌ rcꞌamonto chake riꞌ, nyataj na chake chi noqui ja gloria xin Dios chake pro jun gloria janila nim rukꞌij, ni mta wiꞌ qꞌuisic trij in mta bar ta triꞌ xtikajunsaj chi ta wiꞌ. 
\v 18 Queriꞌ cꞌa xtikaban ja wi ma ruqꞌuin ta ja xin rwachꞌulew tzꞌel wiꞌ kawach ja xa cꞌo tzꞌattajic trij, queriꞌ cꞌa xtikaban ja wi kas tzꞌel kawach trij ja mta tzꞌattajic trij. Queriꞌ rbanic como ja ntzꞌattaji ruqꞌuin kawach jariꞌ xa nocꞌowi pro ja matitzꞌattaji ruqꞌuin kawach jariꞌ ni mta wiꞌ qꞌuisic trij. 
\c 5 
\p 
\v 1 Ja cꞌa kacuerpo jariꞌ ocnak caniꞌ rochoch ja kanma waweꞌ chwachꞌulew in wi xa nyojtaji jariꞌ bien kotak chi cꞌo chi na jun rochoch ja kanma chilaꞌ chicaj ja nyataj chi na chake rmal ja Dios pro jun jay ja ma winak ta ebanyon in ni mta wiꞌ qꞌuisic trij. 
\v 2 Como ja cuerpo ja kucꞌan waweꞌ chwachꞌulew janila noktiꞌon rmal in congana kas tzꞌel pon kawach trij ja jun chic rochoch ja kanma ja xin chilaꞌ chicaj chi nyataj chake. 
\v 3 Ja cꞌa tok xtiyataj ariꞌ chake jariꞌ caniꞌ jun tziak ja xticoj tre ja kanma utzcꞌa chi ma chꞌanal ta ja kanma triꞌ. 
\v 4 Ja cꞌa cuerpo ja kucꞌan waweꞌ chwachꞌulew jariꞌ ni noktiꞌon wiꞌ rmal, congana lawuloꞌ nkaban rmal pro ajoj ma ja ta nkajoꞌ ja ni ta majun cuerpo kucꞌan pro ja kas kagana ajoj chi nyataj chake ja jun chic cuerpo ja xin chilaꞌ chicaj utzcꞌa chi ja cuerpo ja kucꞌan camic ja xa cꞌo camíc trij jariꞌ nqꞌuisi in nyataj chic chake ja jun chic ja ni mta wiꞌ camíc trij. 
\v 5 Pro jariꞌ Dios nbanowi, arjaꞌ chomarsyon kaxin utzcꞌa chi nuyaꞌ na chake ja jun chic cuerpo ja ni mta wiꞌ camíc trij in cꞌo jun seguro ryaꞌon chake chi ni nuban wiꞌ cumplir ja wariꞌ como ja rEspíritu Santo ja rtakonto pa tak kanma jariꞌ ocnak kaseguro. 
\p 
\v 6 Rmalcꞌariꞌ ja tok ni yukul wiꞌ kacꞌuꞌx ruqꞌuin ja Dios chi arjaꞌ nuyaꞌ na chake ja jun chic cuerpo ja xin chilaꞌ chicaj. Jaruꞌ pa tiempo xkoqꞌuejeꞌ chipan ja cuerpo ja kucꞌan waweꞌ chwachꞌulew jariꞌ ni matutzꞌat wiꞌ riꞌ kawach ruqꞌuin ja kajaw Jesucristo rmal. 
\v 7 Queriꞌ rbanic como ja chipan ja kacꞌaslemal waweꞌ chwachꞌulew ja yukulbal kacꞌuꞌx ruqꞌuin ja Dios jariꞌ nucꞌan kaxin, ma ja ta nucꞌan kaxin ja nkatzꞌat ruqꞌuin kawach. 
\v 8 Pro ni yukul wiꞌ kacꞌuꞌx ruqꞌuin ja Dios in como kotak chi matutzꞌat riꞌ kawach ruqꞌuin ja kajaw Jesucristo chipan awaꞌ jun cuerpo ja kucꞌan camic xa chewiꞌ tok más na kagana ja nkayaꞌ can awaꞌ jun cuerpo ja kucꞌan riꞌ in nokbe ruqꞌuin ja kajaw Jesucristo ja bar cꞌo wiꞌ ja mero kochoch. 
\v 9 Queriꞌ rbanic, wi nokqꞌuejeꞌ na waweꞌ owi nokbe ruqꞌuin xarwariꞌ chijutij kamajon rtijic kakꞌij chi rbanic ja rvoluntad utzcꞌa chi nquicot chakij. 
\v 10 Queriꞌ nbij chewe como rjawaxic chi nokekaj na chwach ja kꞌetbaltzij rxin ja Cristo kanojelal utzcꞌa chi triꞌ nokkꞌalajin wiꞌ nak ja kabanon chipan ja cuerpo ja kucꞌan waweꞌ chwachꞌulew utzcꞌa chi nyataj chake chikajujunal ja rtojbalil ja kabanon wi utzil ja kabanon owi xa itzelal. 
\s * * * * * * * * * * 
\p 
\v 11 Rmalcꞌariꞌ nbij chewe, como ajoj nkaxbej kiꞌ chwach ja kajaw Jesucristo chewiꞌ tok nekacoj ja winak pa chꞌaꞌoj chi nquixbej quiꞌ chwach chakajaꞌ pro ja Dios arjaꞌ bien kꞌalaj chwach nak rbanic ja samaj ja noktajini nkaban in cꞌo nseguro chi bien kꞌalaj chewach ixix chakajaꞌ. 
\v 12 Maxta techꞌob chic jutij chakij chi xa kamajon rbanic recomendar kiꞌ chewe kayon. Mni, ma queriꞌ ta, pro nojel awaꞌ ja nmajon rbixic chewe riꞌ utzcꞌa chi nixquicot trij ja samaj xin Dios ja noktajini nkaban utzcꞌa chi cꞌoli nechꞌaꞌ chique ja winak ja congana nquikꞌalasaj quiꞌ chi e ajsamajelaꞌ xin Dios pro jariꞌ xa chiquij cꞌo wiꞌ, ma ocnak ta pa tak canma. 
\v 13 Ja cꞌa rajoj wi okchꞌujarnak noktzꞌati owi ma okchꞌujarnak ta pro xarwariꞌ nkaban ja samaj utzcꞌa chi cꞌo ta yaꞌbal rukꞌij ja Dios rcꞌamonto utzcꞌa chi cꞌo ta rcꞌamonto chewe ixix chakajaꞌ. 
\v 14 Queriꞌ nkaban como ja rajoben riꞌil xin Cristo jariꞌ nbano mandar kaxin. Como bien kotak chi ja Cristo cam pa kacuenta kanojelal tibij cꞌa tzij ariꞌ chi ajoj jun xokcam ruqꞌuin kanojelal. 
\v 15 Queriꞌ cꞌa xuban, cam pa kacuenta kanojelal utzcꞌa chi ja rokcꞌastajnak chic chipan jun cꞌacꞌa cꞌaslemal ma ja chi ta nkaban ja xa kavoluntad kaj ajoj kayon pro nkamajel chic rbanic ja rvoluntad arjaꞌ como cam pa kacuenta in kumal chakajaꞌ tok cꞌastaji chiquicojol ja camnakiꞌ. 
\v 16 Rmalcꞌariꞌ nbij chewe, ja camic chic tok nkamaj rchꞌobic janiꞌ rcꞌaslemal jun winak, xa nak ta chi winakil, ma queriꞌ chi ta nkachꞌob trij ja caniꞌ nquechꞌob ja winak ja cꞌa eꞌucꞌan na rmal ja tzabuklaj tak naꞌoj xin rwachꞌulew. Masqui queriꞌ kachꞌob trij ja Cristo nabey ja caniꞌ nquechꞌob ja winak ja reꞌucꞌan rmal ja tzabuklaj tak naꞌoj pro ma queriꞌ chi ta nkachꞌob ajoj trij camic. 
\v 17 Queriꞌ cꞌa rbanic, ja wi xa jun abanon ruqꞌuin ja Cristo jariꞌ at cꞌacꞌa winak chic, ja tzabuklaj tak naꞌoj awcꞌan nabey jariꞌ kꞌaxnak can chic, cꞌacꞌa chic nojelal. 
\p 
\v 18 Nojel awaꞌ ja cꞌa xinbij kaj chewe riꞌ ruqꞌuin Dios penak wiꞌ in camic ja Dios arjaꞌ ryaꞌon chake chi okchomtajnak chic ruqꞌuin rmal ja Cristo in cꞌo jun samaj ryaꞌon chi kakul ajoj jariꞌ chi nkachꞌob chiquewach ja winak nak rbanic ja tok nechomtaj ruqꞌuin. 
\v 19 Queriꞌ cꞌa rbanic, ja Dios arjaꞌ xa jun quibanon ruqꞌuin ja Cristo, xa jun quibanon ruqꞌuin chwach cruz rmalariꞌ tok nokchomtaj ruqꞌuin ja rok winak in rmalariꞌ chakajaꞌ tok ncuyi ja kil kamac in camic chi kakul ajoj ryaꞌon wiꞌ chi nkayaꞌ rbixic nak rbanic ja tok natchomtaj ruqꞌuin. 
\v 20 Ja cꞌa rajoj camic oktakonel rmal ja Cristo chi pa rubiꞌ arjaꞌ nkaban ja samaj como ja Dios arjaꞌ nucoj kachiꞌ chi rbixic chique ja winak nak ja nrajoꞌ chique chi nqueban. Pa rubiꞌ cꞌa ja Cristo congana nkaban recomendar chewe chi quixchomtaj jutzꞌit ruqꞌuin ja Dios. 
\v 21 Quirtariꞌ neban jutzꞌit como ja Dios arjaꞌ trij ja Cristo xuyaꞌ wiꞌ ja kil kamac ja rok winak pro kumal ajoj tok xuban queriꞌ tre como ja Cristo ni majun ril rumac arjaꞌ. Queriꞌ xuban utzcꞌa tok xa jun kabanon ruqꞌuin ja Cristo jariꞌ utz chic nokrutzꞌat in nuban chic chake caniꞌ mta kil kamac kabanon. 
\c 6 
\p 
\v 1 Ja cꞌa rajoj como xa jun kabanon ruqꞌuin ja Dios chi rbanic ja samaj xa chewiꞌ tok congana nkaban recomendar chewe, maxta tetzꞌilaꞌ ja rutzil ja nsipaj ja Dios chewe. 
\v 2 Caniꞌ rbin can ja Dios chipan ja rtzobal quewariꞌ: —Ja tok xurwilaꞌ ja tiempo rxin chi nsipaj ja wutzil xincꞌwaxaj ja roración ja xaban. In chakajaꞌ tok xurwilaꞌ ja tiempo xin totajem xatnutoꞌ. Queriꞌ rbin can ja Dios. Bien cꞌa tecꞌwaxaj ja xtinbij chewe riꞌ, ja Dios arjaꞌ ntajini nsipaj ja rutzil chipan awaꞌ tiempo ja rokcꞌo wiꞌ riꞌ, ja camic okcꞌo chic chipan ja tiempo xin totajem. 
\v 3 Ajoj ni kabanon wiꞌ cuenta ja kacꞌaslemal chiquewach ja winak como mta kagana ja xta kumal ajoj tok matiquinimaj ja rtzobal Dios. Kabanon cuenta kiꞌ utzcꞌa chi ma itzel ta xquetzijon tre ja samaj xin Dios ja noktajini nkaban. 
\v 4 Pro nojel ja kamajon rbanic jariꞌ nkꞌalasan kaxin chi ni katzij wiꞌ chi ok ajsamajelaꞌ rxin ja Dios. Congana kacochꞌon kawach chipan ja penak jeꞌe chakij, okqꞌuejenak chipan ja rpokonal, okqꞌuejenak chipan ja rcꞌayewal in cꞌo jeꞌe ni matichꞌobtaj wiꞌ kumal ba la nokel wiꞌ. 
\v 5 Cꞌo jeꞌe okrapan cumal winak, cꞌo jeꞌe okqꞌuejenak pa tak cheꞌ, cꞌo jeꞌe eyictajnak winak chakij, cꞌo jeꞌe congana oktujkarnak chipan ja samaj, kacochꞌon ja waram in katijon waꞌal. 
\v 6 Ni kucꞌan wiꞌ jun chꞌajchꞌojlaj anma, bien nchꞌobtaj kumal ja rtzobal Dios, cꞌo kapaciencia, kacꞌutun ja kutzil chiquewach ja winak, okucꞌan rmal ja rEspíritu Santo in cꞌo jun ajoben riꞌil xin Dios chake ja ni katzij wiꞌ, ma chaka ta chi kachiꞌ cꞌo wiꞌ. 
\v 7 Kayaꞌon rbixic ja rtzobal Dios in cꞌoli ja poder xin Dios kuqꞌuin. Ja Dios como arjaꞌ utz nokrutzꞌat jariꞌ caniꞌ jun banbal chꞌaꞌoj ryaꞌon chake ja nkatobej kiꞌ chwach xa nak ta npi chakij. 
\v 8 Cꞌoli nkaban kas lokꞌ nokquenaꞌ ja winak pro cꞌo cꞌa jeꞌe xa ma lokꞌ ta nokquenaꞌ. Cꞌoli utz katzijoxic nbani pro cꞌo cꞌa jeꞌe nbix chake chi xa ok itzel tak winak. Cꞌoli nbix chake chi xa okbanol tak engaño pro ajoj ni katzij wiꞌ ja nkabij chique ja winak. 
\v 9 Cꞌoli nba̱n chake cumal ja winak caniꞌ xa ma cotak ta kawach pro ecꞌoli ja matiquipokonaj nquibij chi bien cotak kawach. Ni pa camíc wiꞌ okcꞌo wiꞌ pro okcꞌas waꞌan riꞌ. Okyaꞌon chipan ja rpokonal chi katijoxic pro ma okcamsan ta. 
\v 10 Cꞌoli nokbisoni pro ja quicotemal xin Dios mta ariꞌ ja maquita cꞌo kuqꞌuin. Xa ok tak mebaꞌiꞌ pro e qꞌuiy ja reꞌocnak e biyomaꞌ rmal ja mebaꞌil xin Dios ja nkapaxij chiquewach. Xa kakꞌeten ti kakꞌaꞌ pro ni majun nak ta ja maquita kaxin. Nojel awaꞌ ja xinbij chewe riꞌ jariꞌ nkꞌalasan kaxin chi ni katzij wiꞌ chi ok ajsamajelaꞌ rxin ja Dios. 
\p 
\v 11 Mta ja nkawawaj ta chewach wachꞌalal ja rix aj Corinto, mta ja maquita nkabij chewe, congana kayaꞌon ja kanma chewe. 
\v 12 Ajoj bien kajakon ja kanma chewach utzcꞌa chi nixkacꞌul chipan pro ja chewe ixix ma kas ta okecꞌulun ja pa tak ewanma. 
\v 13 Ja camic nintzijon ewqꞌuin caniꞌ nuban jun tatixel tok ntzijon cuqꞌuin tak ralcꞌwal, ja caniꞌ kabanon ajoj chewe queriꞌ ta neban ixix chake chakajaꞌ, ta tejak más ja rewanma chikawach. 
\s * * * * * * * * * * 
\p 
\v 14 Maxta xa jun teban cuqꞌuin ja winak ja ma yukul ta quecꞌuꞌx ruqꞌuin ja Jesucristo, ja queriꞌ ni matucꞌam wiꞌ riꞌ. Queriꞌ nbij chewe como ja utzlaj cꞌaslemal xin Dios ewcꞌan jariꞌ ni matucꞌam wiꞌ riꞌ ruqꞌuin jun cꞌaslemal ja xa itzel ntzꞌa̱t rmal ja Dios. In jun chic, ja luz ni matucꞌam wiꞌ riꞌ ruqꞌuin ja kꞌekumal. 
\v 15 In jun chic, ja rnaꞌoj ja Cristo ni matucꞌam wiꞌ riꞌ ruqꞌuin ja rnaꞌoj ja diablo. In jun chic, ja yukul kacꞌuꞌx ruqꞌuin ja Jesucristo mta moda ja xta jun nkaban cuqꞌuin ja ma yukul ta quecꞌuꞌx ruqꞌuin. 
\v 16 In jun chic, ja cachbal tak winak owi rachbal tak nakun ja nexuqueꞌ winak chiquewach ni ma rubey ta wiꞌ ja xqueco̱j ta chipan ja rochoch Dios. Queriꞌ nbij chewe como ix rochoch ja cꞌaslic Dios ja caniꞌ bitajnak can rmal ja Dios quewariꞌ: —Noc na wochoch ja canma in ninqꞌuejeꞌ na chiquicojol. Ja tok xterilaꞌ riꞌ tiempo anin in Dios chic quixin, ja cꞌa rejeꞌeꞌ e ntinamit chic triꞌ, neꞌe. 
\v 17 Rmalcꞌariꞌ tok cꞌo chic jun ja rbin can ja Dios quewariꞌ: —Quixelto chiquicojol ja winak ja ma e ntinamit ta, tepartiꞌij ewiꞌ. Ma teban ta ja xa ntzꞌilor ecꞌaslemal rmal. Ja cꞌa wi xtenimaj ja xinbij chewe riꞌ nixnucꞌul, 
\v 18 ninoc Tatixel ewxin in nixoc tak ncꞌajol, nixoc tak nmeꞌal. Queriꞌ ja bitajnak can rmal ja kajaw Dios ja ni majun poder ja maquita cꞌo pa rukꞌaꞌ. 
\c 7 
\p 
\v 1 Chakꞌlaj wachꞌalal, nojel awaꞌ ja cꞌa xinbij kaj chewe riꞌ como tzujun chic chake rmal ja Dios rmalcꞌariꞌ tok nbij chewe, kayaꞌaꞌ can xa nak ta ja ntzꞌilorsaj ja kacꞌaslemal tanto tre ja ntzꞌilorsaj ja kacuerpo in tre ja ntzꞌilorsaj ja kanma chakajaꞌ. Kaxbej kiꞌ chwach ja Dios, tiqꞌuiyi tiwachini jun chꞌajchꞌojlaj cꞌaslemal chake. 
\s * * * * * * * * * * 
\p 
\v 2 Wachꞌalal, ta tejak más jutzꞌit ja rewanma chikawach. Ajoj mta jun winak kabanon ta jun itzel tre, mta jun winak kayojon ta rcꞌaslemal in nixtacꞌa cꞌo ta jun winak kabanon ta engañar chakajaꞌ. 
\v 3 Pro ja tok nbij queriꞌ chewe ma rmal ta chi nixnuban ta condenar como anin nbin chic chewe chi nij ixcꞌo wiꞌ pa tak kanma. Ja wi nokcami owi nokcꞌaseꞌ na más xarwariꞌ nij ixcꞌo wiꞌ pa tak kanma. 
\v 4 Ja nintajini nbij chewe congana nyaꞌon wanma chewe chi rbixic. Ja camic congana ninquicot chewij wachꞌalal. Ja wanma camic nixtacꞌa nbison chi ta jutzꞌit in masqui congana okcꞌo chipan ja rpokonal pro ja wanma camic más kꞌaxnak chi na ja quicotemal xin Dios cꞌo chipan. 
\p 
\v 5 Nij okcꞌo wiꞌ chipan ja rpokonal wachꞌalal como ja tok xokurkaj waweꞌ chipan ja departamento Macedonia nixtacꞌa jutzꞌit ta xokxulaꞌni, ni cꞌo wiꞌ jeꞌe ja problema kawil. Cꞌo jeꞌe chꞌaꞌoj kaban cuqꞌuin ja winak ja ma quiniman ta ja Dios in cꞌo jeꞌe kaxbej kiꞌ emwal matzij quixtzꞌiloxi. 
\v 6 Pro ja cꞌa Dios arjaꞌ nyukbaꞌ quecꞌuꞌx ja winak ja capujnak quecꞌuꞌx in queriꞌ xuban chake ajoj chakajaꞌ xyukbaꞌ kacꞌuꞌx tokoriꞌ tok xurkaji ja Tito kuqꞌuin. 
\v 7 Ja cꞌa Tito congana xokquicoti ja tok xutzꞌat chic jutij riꞌ kawach ruqꞌuin in ma ruyon tariꞌ pro como ixix congana xeyukbaꞌto rucꞌuꞌx jariꞌ xuyaꞌ jun quicotemal chake ajoj chakajaꞌ. Como arjaꞌ xurbij chake chi congana egana nutzꞌat chic jutij riꞌ kawach ewqꞌuin. In jun chic xbij chi congana nixbison chic rmal ja ma utz ta xeban. In jun chic xbij chi congana egana nenimaj chic ja nbin chewe. Queriꞌ ja xurbij chake in más chi na xinquicot rmal. 
\p 
\v 8 Xinquicoti como ja pokonlaj carta ja xintakel ewqꞌuin xintzꞌat chi xuban rsamaj. Masqui xuyaꞌ bis chewe pro ja camic ma itzel ta nnaꞌ ja xintakel ewqꞌuin. Pro ja tok xintakel ja carta quewaꞌ xinmaj chic rchꞌobic riꞌ: —Maxla utz ja maquita xintakel ja carta cuqꞌuin, xincheꞌ kaj. Como ntzꞌat camic chi ja carta xuyaꞌ bis chewe pro jariꞌ bis xa jurata xocꞌowi. 
\v 9 Ja cꞌa camic congana ninquicoti pro ma rmal ta ja xixyaꞌ pa bis xa chewiꞌ ja tok ninquicoti. Pro como ja bis xuban rsamaj in qꞌuextaji ja renaꞌoj rmal xa chewiꞌ tok ninquicoti. Queriꞌ rbanic como Dios yowi ja bis chewe utzcꞌa chi cꞌol utzil rcꞌamonto chewe ja carta ja katakel ewqꞌuin. 
\v 10 Queriꞌ nbij chewe como ja bis tok Dios nyoꞌ chawe rmal ja rawil amac abanon jariꞌ jun bis ja ncowini nuqꞌuex ja ranaꞌoj in natrucꞌamel chipan ja totajem xin Dios in natquicot rmal. Pro ja tok nebisoni ja winak ja xa ruqꞌuin rwachꞌulew yukul wiꞌ quecꞌuꞌx jariꞌ jun bis maticowini nuqꞌuex ja ranaꞌoj in xa pa camíc natrucꞌamel wiꞌ. 
\v 11 Pro bien techꞌoboꞌ wachꞌalal, ja bis ja xuyaꞌ ja Dios chewe cꞌo jun nimlaj samaj xuban pa tak ecꞌaslemal quewariꞌ. Jun, bien xechomarsaj ja problema ja bantaj checojol. In jun chic, congana xixoclaꞌ il chi rbixic chwe chi xechomij ja problema. In jun chic, congana tiꞌon chewe ja bantaji in janila xexbej ewiꞌ rmal. In jun chic, congana chic egana chi nutzꞌat chic jutij riꞌ kawach ewqꞌuin. In jun chic, congana xixmakꞌeꞌe chi rbanic ja rvoluntad Dios in chanim xeyaꞌ pa disciplina ja banowi ja ritzelal. Ni majun nak ta ja maquita xechomij tre ja problema, mchita nak chi ta xquixchapbex rmal. 
\v 12 Queriꞌ rbanic, xintakel ja carta ewqꞌuin pro ma kas ta rmal ja banowi ja ritzelal ja tok xintakel ewqꞌuin in ma kas ta rmal ja ban wiꞌ ja ritzelal chakajaꞌ. Xintakel ja carta ewqꞌuin utzcꞌa chi chwach Dios nkacꞌut wiꞌ chewach chi janila nokoclaꞌ il chi rbanic cuenta ewxin. 
\v 13 Rmalcꞌariꞌ tok congana yukyuꞌi ja kacꞌuꞌx como yukyuꞌi ja recꞌuꞌx ixix chakajaꞌ. 
\p In ma ruyon tariꞌ pro más chi na xokquicoti rmal ja Tito como arjaꞌ congana nquicot chic ja ranma rmal ja xebanto tre ewanojel. 
\v 14 Como ja Tito tok majaꞌn tintakel ewqꞌuin xinyaꞌ jutzꞌit ekꞌij chwach in ja camic ma qꞌuixbal ta nnaꞌ ja xinban queriꞌ como nojel ja kayabej ekꞌij chwach bien kꞌalaj camic chi ni katzij wiꞌ. Caniꞌ tre nojel ja kabij chewe ixix jariꞌ ni katzij wiꞌ chakajaꞌ.
\v 15 Ja cꞌa Tito arjaꞌ más chi na nel rucꞌuꞌx chewij camic como bien nurkaj tre chi nixnimani ewanojelal, bien nurkaj tre janiꞌ rcꞌulic xeban chi cꞌo respeto ewqꞌuin in nexbej ewiꞌ chwach ja Dios. 
\v 16 Janila ninquicot emwal camic wachꞌalal, cꞌo chic nconfianza ewqꞌuin tre nojelal. 
\c 8
\s * * * * * * * * * * 
\p 
\v 1 Ja cꞌa camic wachꞌalal, nkajoꞌ nkachꞌob chewach nak rbanic ja rutzil xin Dios ja samajnak pa tak canma ja riglesia jeꞌe ja recꞌo waweꞌ chipan ja departamento Macedonia. 
\v 2 Como ejeꞌeꞌ cꞌo jun nimlaj ayuda quemol ja nquetakel cuqꞌuin ja kachꞌalal ja cꞌo rjawaxic chique. Quemol ja rayuda masqui cꞌo jun nimlaj rpokonal cꞌo jun nimlaj prueba netajini nekꞌax chipan. Pro como cꞌo jun nimlaj quicotemal xin Dios pa tak canma in como congana e tak mebaꞌiꞌ in bien cotak nquipokonaj quewach ja winak ja cꞌo rjawaxic chique chewiꞌ tok congana jun ayuda quemol. 
\v 3 Como ejeꞌeꞌ congana jun lucha queban, queyaꞌ janiꞌ ja necowini nqueyaꞌ. Anin in testigo chiquij chi queriꞌ queban. Cꞌo nariꞌ xuban jeꞌe falta chique rumac ja más na xocꞌo rwiꞌ queyaꞌ. Pro jariꞌ ma xekabochiꞌij ta, quigana queyaꞌ. 
\v 4 Congana xokquecoj pa chꞌaꞌoj, quewaꞌ quibij chake riꞌ: —Tebanaꞌ jun utzil, teyaꞌaꞌ chake ja privilegio chi ajoj jun nkatakel jun ayuda chique ja kachꞌalal ja re xin Dios, xecheꞌ chake. 
\v 5 Más chi na queyaꞌ chwach ja caniꞌ kachꞌobon chiquij chi nqueyaꞌ como ja queban, nabey queyaꞌ quiꞌ pa rukꞌaꞌ ja kajaw Dios chi rbanic xa nak ta ja najoꞌx chique rmal chi nqueban in queyaꞌ quiꞌ pa kakꞌaꞌ ajoj chakajaꞌ in xa rmal ja rvoluntad Dios ja tok queban queriꞌ. 
\v 6 Queriꞌ quibanon ja kachꞌalal in rmalariꞌ congana kaban animar ja Tito chi arjaꞌ nbe chic jutij ewqꞌuin. Como ja Tito cꞌo jun moloj ayuda xumaj checojol chewiꞌ tok kabijel tre chi nbe chic jutij ewqꞌuin chi nerqꞌuisaꞌ rmolic como ja rayuda neyaꞌ jariꞌ ncꞌutuwi ja rutzil xin Dios ja nsamaji pa tak ewanma. 
\v 7 Ixix congana benak pa nim nojel rwach ja rutzil xin Dios ja yatajnak chewe. Caniꞌ tre ja yukulbal ecꞌuꞌx ruqꞌuin ja Jesucristo congana nim. In jun chic, congana neyaꞌ rbixic ja rtzobal Dios in bien nchꞌobtaj emwal chakajaꞌ. In jun chic, congana netij ekꞌij chi rbanic ja rvoluntad Dios. In jun chic, congana nokewajoꞌ. Ja cꞌa camic nbij chewe, como congana benak pa nim checojol nojel awaꞌ ja rutzil xin Dios ja cꞌa xinbij kaj chewe riꞌ tibe cꞌa pa nim checojol chakajaꞌ ja rutzil xin Dios tre ja moloj ayuda. 
\v 8 Pro maquixnuban mandar wachꞌalal. Ja kas nwajoꞌ chewe chi queriꞌ neban tre ja moloj ayuda ja caniꞌ queban ja juleꞌ chic kachꞌalal utzcꞌa chi triꞌ ntzꞌa̱t wiꞌ chi ni katzij wiꞌ chi nsamaji ja rajoben riꞌil xin Dios pa tak ewanma. 
\v 9 Como ixix bien ewotak chi ja kajaw Jesucristo congana samaji ja rutzil xin Dios pa ranma. Como arjaꞌ masqui congana biyom nabey pro ma xpokonaj ta xuyaꞌ can ja rbiyomal, ma xpokonaj ta xoc mebaꞌ pro emwal ixix tok xuban queriꞌ. Arjaꞌ xoc mebaꞌ utzcꞌa chi xa rmal ja rpobreꞌil tok nyataj ixix chewe ja biyomal xin Dios. 
\p 
\v 10-11 In camic nwajoꞌ nyaꞌ jun paxbanem chewe tre ja rayuda como ja xtinbij chewe riꞌ cꞌoli rcꞌamonto chewe. Teqꞌuisaꞌ rmolic ja rayuda ja xetij rmolic junabir. Como ixix xemaj rmolic in ma ruyon tariꞌ pro nojel ecꞌuꞌx nojel ewanma xeban. Ja cꞌa camic nbij chewe, como congana egana nabey tok xechꞌob chi nemol ja rayuda queriꞌ ta cꞌa neban camic chakajaꞌ chi rqꞌuisic xarwariꞌ janiꞌ nixcowini neyaꞌ xa xarariꞌ ja neyaꞌ. 
\v 12 Queriꞌ nbij chewe como ja Dios tok nojel acꞌuꞌx nojel awanma nayaꞌ jun ayuda arjaꞌ utz nutzꞌat in nucꞌam chawe in janiꞌ natcowini nayaꞌ jariꞌ ncꞌutuj chawe, ma ja ta ncꞌutuj chawe ja macatcowini nayaꞌ. 
\v 13 Como anin ma ja ta nbij chewe chi xqueꞌetoꞌ ta juleꞌ chic chipan ja quipobreꞌil in xquixoc can chi ta cꞌa ix pobre ixix rmal. 
\v 14 Ja kas ngana anin xta junan nkaban nkatoꞌ ta kiꞌ chibil tak kiꞌ. Caniꞌ chewe ixix camic como cꞌoli sobre ja cꞌol ewqꞌuin xcꞌa chewiꞌ tok congana buena wi neꞌetoꞌ ja kachꞌalal chipan ja quipobreꞌil utzcꞌa chi ejeꞌeꞌ chic netoꞌo ewxin chwak cabij ja tok cꞌo chic rjawaxic chewe ixix in tok cꞌo chic sobre cuqꞌuin ejeꞌeꞌ triꞌ ja nixquitobej. Queriꞌ rubey utzcꞌa chi xa junan nkaban nkatoꞌ kiꞌ chibil tak kiꞌ. 
\v 15 Caniꞌ tzꞌibtal can ojer chipan ja rtzobal Dios tre ja maná ja takto chilaꞌ chicaj cuqꞌuin ja raj Israel chi nquetij, quewaꞌ nbij riꞌ: —Ja winak ja qꞌuiy maná quemol mta quetoꞌ. Ja cꞌa winak ja xa ti ma nim ta quemol xeruban. Queriꞌ ja tzꞌibtal can. 
\s * * * * * * * * * * 
\p 
\v 16 Pro anin congana nmaltioxij tre ja Dios como arjaꞌ ryaꞌon pa ranma ja Tito chi congana noclaꞌ il chi rbanic cuenta ewxin, ni queriꞌ nuban ja Tito chi echajixic ja caniꞌ nintajini nban anin. 
\v 17 Queriꞌ nbij chewe como arjaꞌ tok kabij tre chi nbe chic jutij ewqꞌuin ma xnimar ta pro congana rgana nbe, ni rvoluntad wiꞌ chi nbe chic jutij ewqꞌuin. 
\v 18 Cꞌo chic jun kachꞌalal nkatakel trij chi nrachbilajel. Jariꞌ kachꞌalal ja congana utz rtzijoxic nba̱n cumal canojel ja juleꞌ chic kachꞌalal xa nak ta iglesia ecꞌo wiꞌ como arjaꞌ congana jun samaj rbanon chi rbixic ja utzlaj tzij xin Jesucristo. 
\v 19 In jun chic, arjaꞌ chaꞌon cumal ja kachꞌalal ja recꞌo pa tak iglesia jeꞌe chi nkachbilaj tre ja moloj ayuda ja noktajini kamajon rmolic camic. Ajoj kamajon rmolic ja rayuda utzcꞌa chi jariꞌ noc yaꞌbal rukꞌij ja kajaw Jesucristo utzcꞌa chakajaꞌ chi bien nkꞌalajin na chi ixix cꞌol egana neꞌetoꞌ ja kachꞌalal ja cꞌo rjawaxic chique. 
\v 20 Pro bien kabanon cuenta ja wariꞌ utzcꞌa chi majun tzij npi chakij rmal ja nimlaj ayuda ja kamajon rmolic. 
\v 21 Congana kabanon cuenta ja samaj ja nkaban jeꞌe utzcꞌa chi bien kꞌalaj chiquewach ja winak chakajaꞌ chi majun engaño nkaban in ma ruyon ta chwach ja Dios. 
\p 
\v 22 Cꞌo chi na jun kachꞌalal ja nkatakel chiquij ja Tito, jun kachꞌalal ja qꞌuiylaj mul katzꞌaton chi congana nutij rukꞌij chi rbanic ja samaj jeꞌe xin Dios in pior cꞌa camic congana rgana nbe ewqꞌuin como congana rconfianza ewqꞌuin. 
\v 23 Ja cꞌa Tito kacꞌamon kiꞌ ruqꞌuin chi noksamaj pan ecuenta, arjaꞌ wach ajsamajel xin Dios. Ja cꞌa re caꞌiꞌ chic kachꞌalal ejeꞌeꞌ echaꞌonel cumal ja juleꞌ chic kachꞌalal ja recꞌo pa tak iglesia jeꞌe in ja quicꞌaslemal jariꞌ ocnak yaꞌbal rukꞌij ja Cristo. 
\v 24 Rmalcꞌariꞌ nbij chewe, ja tok xqueꞌekaj ewqꞌuin kas ta quiꞌil quicꞌulic neban utzcꞌa chi ejeꞌeꞌ e cachbil ja juleꞌ chic kachꞌalal ja recꞌo pa tak iglesia bien nkꞌalajin na chiquewach chi ixix ni katzij wiꞌ chi cꞌoli ja rajoben riꞌil xin Dios pa tak ecꞌaslemal utzcꞌa chakajaꞌ chi bien nquetzꞌat chi ni katzij wiꞌ nojel ja kabin chique ja kachꞌalal ja kayaben ekꞌij. 
\c 9 
\s * * * * * * * * * * 
\p 
\v 1 Como anin wachꞌalal, bien wotak chi ma rjawaxic ta nbij chewe chi neyaꞌ jun ayuda chique ja kachꞌalal ja re xin Dios. 
\v 2 Queriꞌ nbij chewe como wotak chi cꞌol egana neyaꞌ in rmalariꞌ tok nintajini nyaꞌ ekꞌij chiquewach ja kachꞌalal ja recꞌo waweꞌ chipan ja departamento Macedonia como anin nbij chique chi ixix ja rixcꞌo chilaꞌ chipan ja departamento Acaya ix listo chic junabir chi neyaꞌ ja rayuda. In jun chic, como ixix congana egana neyaꞌ xa rmalariꞌ tok congana e qꞌuiy xuyaꞌ gana chique chi nqueyaꞌ ejeꞌeꞌ chakajaꞌ. 
\v 3 Pro ecꞌoli ja kachꞌalal ja nenutakel ewqꞌuin utzcꞌa chi bien nechomij pon ja moloj ayuda como nbin chic chique ja kachꞌalal chi ix listo chic chi neyaꞌ. Como anin nyaꞌon chic ekꞌij chiquewach ja kachꞌalal pro congana lawuloꞌ ariꞌ ja wi mta noc wiꞌ ja xinyabej ekꞌij chiquewach. 
\v 4 Ja cꞌa tok xquinekaj anin ewqꞌuin, ja wi ecꞌo juleꞌ kachꞌalal aj Macedonia etran chwij congana lawuloꞌ ariꞌ ja wi majaꞌn techomij ewiꞌ triꞌ chi rmolic ruchiꞌ ja rayuda. Ja queriꞌ congana qꞌuixbal chake ajoj in chewe ixix chakajaꞌ como kayaꞌon chic ekꞌij chiquewach chi ix listo chic chi neyaꞌ ja rayuda. 
\v 5 Rmalcꞌariꞌ ja tok xinchꞌob chi rjawaxic nenuban animar ja kachꞌalal chi ejeꞌeꞌ nebe ewqꞌuin nabey utzcꞌa chi nquichomij pon ewqꞌuin nak neban tre ja rayuda ja retzujun chi neqꞌuis rmolic utzcꞌa chi molon pon chic ruchiꞌ nojelal ja tok xquinekaj anin. Pro nojel ta ecꞌuꞌx nojel ta ewanma neyaꞌ, maxta chaka ix puersa. 
\p 
\v 6 Pro bien cꞌa tewasaj enaꞌoj trij ja rejemplo ja nyaꞌ chewach riꞌ. Ja tok natbe pa ticoj tijcoꞌm wi xa naxuyaj ja rijaꞌtz natic xcꞌa ma nim ta cosecha nuyaꞌ ariꞌ. Ja cꞌa wi mataxuyaj jariꞌ congana cosecha nuyaꞌ. 
\v 7 Ja neyaꞌ chejujunal xa ni xarwariꞌ ja nalax pa tak ewanma chi neyaꞌ. Maxta tebisoj ja neyaꞌ, maxta chaka ix puersa. Queriꞌ nbij chewe como ja Dios arjaꞌ nerajoꞌ ja winak ja nequicoti nqueyaꞌ ja rayuda. 
\v 8 Ja cꞌa Dios arjaꞌ bien ncowini nuyaꞌ chewe nojel rwach ja mebaꞌil ja neꞌetobej ja cꞌo rjawaxic chique. Más na nocꞌo rwiꞌ ja ncowini nuyaꞌ chewe utzcꞌa chi ni cꞌo wiꞌ ewqꞌuin xa nak ta ja ncꞌatzin chewe utzcꞌa chakajaꞌ chi sobre ja cꞌol ewqꞌuin ja neꞌetobej ja winak xa nak ta ncꞌatzin chique. 
\v 9 Caniꞌ tzꞌibtal can chipan ja rtzobal Dios tre jun utzlaj achi, quewaꞌ nbij riꞌ: —Congana ayuda ryaꞌon, ertoꞌon ja tak mebaꞌiꞌ. Ja rutzil nuban jariꞌ ni mta wiꞌ qꞌuisic trij. Queriꞌ ja tzꞌibtal can. 
\v 10 Ja Dios arjaꞌ nyowi ja rijaꞌtz chique ja re ticol tak tijcoꞌm, arjaꞌ nyowi kaway. Ja mismo Dios arjaꞌ xtiyoꞌ chewe ja mebaꞌil ja neꞌetobej ja cꞌo rjawaxic chique in nqꞌuiyirsaj na más chewach. Arjaꞌ nsamaj na chipan ja rutzil ja neban ixix in tok xtiqꞌuiswani más chi na nwachini ja rutzil rmal. 
\v 11 Ja Dios arjaꞌ mta nak ta ja maquita xtuyaꞌ chewe, nixoc na ix caniꞌ biyomaꞌ rmal utzcꞌa chi ni cꞌo wiꞌ ewqꞌuin ja neꞌetobej ja kachꞌalal. Ja cꞌa kachꞌalal tok xtekajachaꞌ ja rayuda pa quekꞌaꞌ janila xtiquimaltioxij tre ja Dios emwal. 
\v 12 Queriꞌ nbij chewe como ja rayuda neyaꞌ ma jun ta rsamaj. Ma ruyon ta nerutoꞌ ja kachꞌalal chipan ja cꞌo rjawaxic chique pro janila chi maltioxinem nya̱ꞌ tre ja Dios rmal chakajaꞌ. 
\v 13 Ja cꞌa tok xteyaꞌ chique ja rayuda jariꞌ nucꞌut chiquewach janiꞌ enaꞌoj in nqueyaꞌ na rukꞌij ja Dios emwal. Nqueyaꞌ na rukꞌij ja tok xtiquetzꞌat chi ni katzij wiꞌ ja nebij chi eniman ja utzlaj tzij xin Cristo in nqueyaꞌ na rukꞌij chakajaꞌ ja tok xtiquetzꞌat chi nim ja rayuda ja neyaꞌ chique ejeꞌeꞌ in chique canojelal. 
\v 14 Ja cꞌa rejeꞌeꞌ nqueban na orar pan ecuenta in congana lokꞌ nixquenaꞌ como nquetzꞌat na chi ja rutzil ja recochin tre ja Dios más kꞌaxnak chi na nsamaji ja pa tak ewanma. 
\v 15 Congana nmaltioxij tre ja Dios como arjaꞌ cꞌo jun sipanem kacochin tre ja ni maticanoy wiꞌ tzij kumal chi rbixic como janila nim rukꞌij. 
\c 10 
\s * * * * * * * * * * 
\p 
\v 1 Camic nwajoꞌ nintzijon ewqꞌuin chique ja winak ja xa netajini nquilasaj ntzijoxic, quewaꞌ nquibij chwe riꞌ: —Ja Pablo tok cꞌoli chikacojol congana nuban tinoꞌy pro ja cꞌa tok mchita chikacojol cꞌa tokoriꞌ nucoj cowlaj tak tzij chakij, necheꞌe. Pro anin ja rin Pablo congana nban recomendar chewe, kas tinataj jutzꞌit emwal ja rejemplo ja xuyaꞌ can ja Cristo como arjaꞌ xuban tinoꞌy, nojel xujach pa rukꞌaꞌ ja Dios in congana rpaciencia cuqꞌuin ja winak. 
\v 2 Pro ja camic congana nban recomendar chewe, kas techomarsaj jutzꞌit ewiꞌ utzcꞌa tok xquinekaj ewqꞌuin ma rjawaxic ta chi ncoj chewij ja poder xin Dios ja cꞌo pa nukꞌaꞌ. Como jariꞌ poder ja cꞌo pa nukꞌaꞌ nchꞌobon chic chi ncoj chiquij ja winak ja xa netajini nquilasaj ntzijoxic ja nebin chake chi ajoj xa quinaꞌoj winak ja nkacoj. 
\v 3 Como ajoj masqui xa ok winak pro ma kanaꞌoj ta ajoj nkacoj kaj kayon ja tok nkaban chꞌaꞌoj ruqꞌuin ja ritzelal. 
\v 4 Queriꞌ nbij chewe como ajoj tok nokchꞌojin ruqꞌuin ja ritzelal ma ja ta nkacoj juleꞌ banbal chꞌaꞌoj ja xa quixin winak pro nkacoj juleꞌ banbal chꞌaꞌoj janila nimak rchokꞌakꞌ chwach ja Dios. Queriꞌ cꞌa nkaban utzcꞌa chi nokcowini nkayoj ja ritzelal masqui congana rchokꞌakꞌ. 
\v 5 Ajoj nkayoj ja tijonem ja nqueyaꞌ ja winak ja kas e nimak nquenaꞌ kaj, nkayoj ja nimak tak naꞌoj ja nquecoj chi rwawaxic ja kas mero rnaꞌoj ja Dios. Nokchꞌojin ruqꞌuin ja quinaꞌoj winak xa nak ta nquechꞌob in nkachꞌec utzcꞌa chi mta jun naꞌoj ja maquita nucꞌam riꞌ ruqꞌuin ja rvoluntad ja Cristo. 
\v 6 In jun chic, kachomin chic kiꞌ chi nekaban castigar xa nak ta chique ja ni maqueniman wiꞌ pro cꞌa tokoriꞌ xqueꞌekabanaꞌ castigar ja tok echomarsan chic ewiꞌ tre ja ma tzꞌakatnak ta chewe tre ja nimanem. 
\p 
\v 7 Ixix xa jariꞌ neyaꞌ cuenta tre ja cꞌo chewach pro mateyaꞌ cuenta tre ja cꞌo pa tak canma ja winak. Ja cꞌa wi cꞌo jun winak nbij chewe chi bien rotak chi arjaꞌ ocnak jun apóstol rxin ja Cristo kas bien tichꞌoboꞌ chi ajoj ok apóstol rxin ja kajaw Jesucristo chakajaꞌ. 
\v 8 Ok apóstol rxin como arjaꞌ ryaꞌon chake chi cꞌo kakꞌaꞌ chewe in ma qꞌuixbal ta nnaꞌ ja congana nnataj chewe nojel ja rcojon pa kakꞌaꞌ como ni katzij wiꞌ. Pro jariꞌ ixrcojon pa kakꞌaꞌ chi nixkatoꞌ utzcꞌa chi nixqꞌuiyi, ma rmal ta chi nixkayoj. 
\v 9 Queriꞌ nbij chewe utzcꞌa chi bien nchꞌobtaj emwal chi ja carta ja ntakel jeꞌe ewqꞌuin ma ja ta rsamaj ja chaka ta nixnxibej. 
\v 10 Como ja winak ja xa netajini nquilasaj ntzijoxic ejeꞌeꞌ quewaꞌ nquibij chewe riꞌ: —Ja Pablo tok nubanto jun carta congana cow nchaponi in congana cowlaj tak tzij nbij chipan chakajaꞌ pro ja tok cꞌo chikacojol xa jun achi débil in tok ntzijoni ni majun noc wiꞌ ja nbij, necheꞌe. 
\v 11 Ja cꞌa winak ja nebin queriꞌ chwe kas bien tiquichꞌoboꞌ, ja caniꞌ nkabij chipan ja carta tok ma okcꞌo ta checojol ni queriꞌ ja nekabanaꞌ cumplir ja tok xkoꞌekaj ewqꞌuin. 
\p 
\v 12 Ja cꞌa rajoj ni katzij wiꞌ chi majun kagana xtikaban ta ja caniꞌ nqueban ja juleꞌ winak ja xa nqueyaꞌ kaj quekꞌij queyon. Ejeꞌeꞌ xa e nacnak tak winak como ja rocnak yaꞌbal quekꞌij xa quinaꞌoj kaj ejeꞌeꞌ queyon. 
\v 13 Pro ja rajoj mta moda xtikaban ta ja caniꞌ nqueban ejeꞌeꞌ xtikayaꞌ ta kakꞌij rmal jun samaj ja mta kakꞌaꞌ tre ja ma yatajnak ta chake rmal ja Dios chi nkaban. Pro ja samaj ja yatajnak chake rmal ja Dios chi nkaban solo jariꞌ nkanataj in arjaꞌ ryaꞌon chake chi noksamaj checojol. 
\v 14 Queriꞌ nbij chewe como ajoj ma kaminon ta kiꞌ chipan jun samaj ja ma yatajnak ta chake rmal ja Dios chi nkaban como arjaꞌ yoyon chake chi noksamaj checojol. Como ajoj xokekaj ewqꞌuin nabey chi rbixic chewe ja utzlaj tzij xin Jesucristo. 
\v 15 Ajoj mta moda xtikaban ta ja caniꞌ nqueban ja juleꞌ xtikayaꞌ ta kakꞌij rmal jun samaj ja ma kaxin ta ja ma ajoj ta okbanyon. Pro ja kas kayben chi nqꞌuiy más ja yukulbal ecꞌuꞌx ruqꞌuin ja Jesucristo in noketoꞌ utzcꞌa chi nokbe nojel nat nakaj chi nkayaꞌ más rbixic ja Jesucristo pro xarwariꞌ nokbe pa tak lugar ja bar nokrutakel wiꞌ ja Dios chi nokbe. 
\v 16 Nkajoꞌ nokbe nekayaꞌaꞌ rbixic ja utzlaj tzij xin Jesucristo chipan juleꞌ chic tinamit ja más na nat cꞌo wiꞌ chwach ja bar rixcꞌo wiꞌ ixix. Matikajoꞌ xkoꞌoc ta chipan jun samaj ja junwiꞌ banyon in xtikayaꞌ ta kakꞌij rmal. 
\v 17 Maxta cꞌo jun tuyaꞌ kaj rukꞌij ruyon, mejor rukꞌij ja kajaw Dios tiyaꞌaꞌ. 
\v 18 Queriꞌ nbij chewe como jun achi wi xa nuyaꞌ kaj rukꞌij ruyon pro jariꞌ matibij tzij chi nim rukꞌij ntzꞌa̱t rmal ja kajaw Dios. Pro ja na Dios tibini ja wi nim rukꞌij owi mani. 
\c 11 
\s * * * * * * * * * * 
\p 
\v 1 Ja cꞌa nwajoꞌ chewe camic, tiqꞌuejeꞌ jutzꞌit epaciencia chi rcꞌaxaxic ja jun caꞌiꞌ tzij ja xtinbij chewe riꞌ. Masqui xa ma chꞌobolic tak tzij ta pro kas quinecochꞌoꞌ ja xtinbij chewe. 
\v 2 Pro ja tzij ja xtinbij chewe riꞌ ma chaka ta ngana nbij chewe, rumac ja yatajnak chwe rmal ja Dios chi congana nixtiꞌon chwe, matinwajoꞌ ja junwiꞌ chi ta xtiyukeꞌ wiꞌ ecꞌuꞌx. Queriꞌ nbij chewe como anin solo tre ja Cristo xixnujach wiꞌ chi solo ruqꞌuin arjaꞌ nyukeꞌ wiꞌ ecꞌuꞌx utzcꞌa ja tok xtipi chic jutij arjaꞌ bien chꞌajchꞌoj ja rewanma nixnuban presentar chwach como caniꞌ nba̱n presentar jun kꞌapoj xtan chwach ja rchajil. 
\v 3 Pro ja ranin nxbej wiꞌ, nurkaj chwe ja ban tre ja Eva ojer tok ban engañar rmal ja cumatz como ja cumatz congana listo, matzij xa queriꞌ xtiban chic chewe ixix in junwiꞌ chic xtechꞌob in ma ruyon chi ta ruqꞌuin ja Cristo xtiyukeꞌ wiꞌ ecꞌuꞌx. 
\v 4 Queriꞌ nbij chewe como ixix chaka quiꞌ chewe ja tok ecꞌoli winak neꞌekaj ewqꞌuin, nqueyaꞌ rbixic jun Jesús chewe ja junwiꞌ chi na chwach ja kayaꞌ rbixic ajoj chewe. In jun chic, chaka quiꞌ chewe wi noc jun chic espíritu chewe ja junwiꞌ chi na chwach ja rEspíritu Santo ja xoc chewe nabey. In jun chic, chaka quiꞌ chewe chakajaꞌ wi nenimaj jun chic tijonem ja utzlaj tzij xin Jesucristo neꞌxi, pro xa junwiꞌ chi na chwach ja xenimaj nabey. 
\v 5 Pro jariꞌ winak ja nquenaꞌ kaj chi congana e nimak tak apóstol pro jariꞌ ma nimak ta quekꞌij chinwach anin. 
\v 6 Anin ja tok nintzijoni masqui maquincowini nban rbanic ja tzij pro ja rtzobal Dios jariꞌ bien chꞌobtajnak mwal in mta ariꞌ ja maquita kakꞌalasan chi utz chewach ja rtzobal Dios. 
\p 
\v 7 Owi maxta xajan xinban nechꞌob ixix ja ma xincꞌutuj ta chewe ja ntzukbej wiꞌ tokoriꞌ tok xinyaꞌ rbixic chewe ja utzlaj tzij xin Dios. Como anin ruqꞌuin nukꞌaꞌ xinsamaji utzcꞌa chi ixix newil ja totajem xin Dios. 
\v 8 Cꞌo jeꞌe xincꞌam pwok chique ja kachꞌalal ja recꞌo chipan juleꞌ chic iglesia utzcꞌa chi nixntijoj ixix tre ja rtzobal Dios. Ejeꞌeꞌ xeyoꞌ chwe ja xintzukbej wiꞌ. 
\v 9 Ja cꞌa tok xinqꞌuejeꞌ checojol ixix in tok cꞌo rjawaxic chwe ni majun chewe cꞌo ta xincꞌutuj ta tre como ja kachꞌalal ja recꞌo waweꞌ chipan ja departamento Macedonia ejeꞌeꞌ xebe wqꞌuin xequiyaꞌaꞌ chwe nak ja cꞌo rjawaxic chwe. Queriꞌ xinban, ni majun nak ta xinyaꞌ ta chi ekul ja xintzukbej wiꞌ in niquirwariꞌ xtinban chwak cabij chakajaꞌ. 
\v 10 Ni katzij wiꞌ ja xtinbij chewe riꞌ como ja Cristo arjaꞌ cꞌo wqꞌuin chi rbixic. Ixix ja rixcꞌo chipan ja departamento Acaya mta jun chewe xtikꞌilo ta wxin chi rbixic chi majun nak ta nyaꞌon ta chi ekul ja ntzukben wiꞌ. 
\v 11 Pro ¿nak tre ja tok nbanon queriꞌ chewe nechꞌob ixix? ¿La xa rmal chi maquixwajoꞌ? Ma queriꞌ ta wachꞌalal, ja Dios arjaꞌ bien rotak chi nixwajoꞌ. 
\p 
\v 12 Pro caniꞌ nbanonto tre ja ntzukbej wiꞌ niquirwariꞌ xtinban chwak cabij utzcꞌa chi mta quibase ja juleꞌ chic winak ja ncajoꞌ nquibij chi junan rbanic ja samaj ja nqueban ejeꞌeꞌ ruqꞌuin ja caniꞌ nkaban ajoj como ejeꞌeꞌ congana nqueyaꞌ rukꞌij ja samaj ja nqueban. 
\v 13 Como ejeꞌeꞌ riꞌ winak e apóstol necheꞌxi, pro ma e apóstol ta xin Cristo, ejeꞌeꞌ e juleꞌ ajsamajelaꞌ ja xa e banol tak engaño, xa nquecoj quiꞌ como apóstol rxin ja Cristo pro ma katzij ta. 
\v 14 Pro maxta kas ncꞌascꞌoꞌi tecꞌwaxaj ja cꞌa xinbij chewe riꞌ como ja Satanás arjaꞌ xa banol engaño chakajaꞌ, nucoj riꞌ como jun ángel ja nsakirsan kabey chikawach. 
\v 15 Rmalcꞌariꞌ tok nbij chewe, maxta kas ncꞌascꞌoꞌi tecꞌwaxaj ja tok ja rajsamajelaꞌ rxin ja Satanás nquecoj quiꞌ como juleꞌ ajsamajelaꞌ ja re banol tak utzil pro xarwariꞌ nerilaꞌ na jun kꞌij ja tok xtiyataj na jun rtojbalil chique janiꞌ ja ritzelal quibanon. 
\s * * * * * * * * * * 
\p 
\v 16 Camic nbij chic jutij chewe, kas quinecochꞌoꞌ ja jun caꞌiꞌ tzij ja xtinbij chewe riꞌ. Maxta cꞌo jun chewe tuchꞌob chwij chi xa ma in chꞌobol ta. Nowi nechꞌob chwij chi xa ma in chꞌobol ta pro teyaꞌaꞌ jutzꞌit ewxquin tre ja xtinbij chewe como caniꞌ xeyaꞌ ewxquin tre ja quibij chewe ja juleꞌ chic winak ja xa ma e chꞌobol ta. Como anin nwajoꞌ nyaꞌ jutzꞌit nukꞌij chewach chakajaꞌ. 
\v 17 Pro ma queriꞌ ta tzijoni ja kajaw Jesucristo ja caniꞌ nintajini nintzijoni camic como ja nmajon rbanic camic xa nintajini nmajon ryaꞌic nukꞌij ja caniꞌ nuban jun achi ja xa ma chꞌobol ta nuban. 
\v 18 Como e qꞌuiy ja winak ja xa nqueyaꞌ quekꞌij rmal ja reꞌocnak wiꞌ waweꞌ chwachꞌulew chewiꞌ cꞌa tok anin chakajaꞌ nyaꞌ na jutzꞌit nukꞌij camic. 
\v 19 Can nyaꞌ na jutzꞌit nukꞌij como ixix kas nixquicoti neyaꞌ caso chique winak ja tok xa ma e chꞌobolic tak winak ta como kas jakal ewiꞌ chi rcꞌaxaxic ja nquibij chewe. 
\v 20 Como ixix chaka quiꞌ chewe ja tok wi cꞌo jun winak ja chaka nixruban mandar in nuban chewe ix caniꞌ esclavo pa rukꞌaꞌ, owi nuqꞌuis chewach nojel ja cꞌol ewqꞌuin, owi nlakꞌaj ja renakun, owi nucoj riꞌ ruyon chi congana nim rukꞌij arjaꞌ chewach ixix, owi nuyaꞌ kꞌaꞌ xeꞌ tak ewey. 
\v 21 Ja cꞌa rajoj kas qꞌuixbal nnaꞌ nbij chewe chi xa ok débil como ma xokcowin ta kaban ta queriꞌ chewe. 
\p Pro ja camic nbij chewe, ejeꞌeꞌ riꞌ winak xa nak ta ja nquibij chewe ja nquiyabej quekꞌij chewach jariꞌ nincowini nbij anin chewe chakajaꞌ ja nyabej nukꞌij chewach xarwariꞌ ja nintajini nbij chewe camic xa caniꞌ ma in chꞌobol ta. 
\v 22 Ejeꞌeꞌ kas nqueyaꞌ quekꞌij chi e Hebreo pro anin chakajaꞌ in Hebreo. Ejeꞌeꞌ kas nqueyaꞌ quekꞌij chi e aj Israel pro anin chakajaꞌ in aj Israel. Ejeꞌeꞌ kas nqueyaꞌ quekꞌij chi e riy rumam can ja rAbraham pro anin chakajaꞌ in riy rumam can ja rAbraham. 
\v 23 Ejeꞌeꞌ kas nqueyaꞌ quekꞌij chi e ajsamajelaꞌ rxin ja Cristo pro anin más chi na in ajsamajel chiquewach ejeꞌeꞌ rxin ja Cristo. Pro ja nintajini nbij chewe camic riꞌ caniꞌ xa ma in chꞌobol ta. Anin más chi na samaj xin Cristo nbanon, qꞌuiylaj mul inrapan rmal ja rtzobal Dios, qꞌuiylaj mul inqꞌuejenak pa cheꞌ in qꞌuiylaj mul jutzꞌit laj xincamsaxi. 
\v 24 Ja wach tak aj Israel ejeꞌeꞌ xinquirapaj tzaꞌn asial, ja jutaktij treintinueve rab asial queyaꞌ chwe in joꞌoꞌ mul ja queban queriꞌ chwe. 
\v 25 Oxmul banon chwe xcꞌaꞌy xinrapbexi in xinban jutij xinqꞌuia̱k tzaꞌn abaj. Oxmul xinbe pa yaꞌ rmal ja lancha jokꞌtaji parwiꞌ yaꞌ. In xinban jutij jun kꞌij in jun akꞌaꞌ xinqꞌuejeꞌ pa ncꞌaj mar. 
\v 26 Qꞌuiy ja viaje nbanon in ni cꞌo wiꞌ rcꞌayewal xinwil chipan. Cꞌo rkan tak yaꞌ xinruyaꞌ pa rcꞌayewal, ecꞌoli ja ralakꞌomaꞌ xinqueyaꞌ pa rcꞌayewal, ecꞌoli ja wach tak aj Israel xinqueyaꞌ pa rcꞌayewal, ecꞌoli ja ma e aj Israel ta xinqueyaꞌ pa rcꞌayewal. Cꞌo jeꞌe xinwil ja rcꞌayewal pa tak tinamit, cꞌo jeꞌe xinwil ja rcꞌayewal pa tak lugar ja bar ma ecꞌo ta wiꞌ winak, cꞌo jeꞌe xinwil ja rcꞌayewal parwiꞌ mar. Cꞌo jeꞌe chakajaꞌ xinqueyaꞌ pa rcꞌayewal ja winak ja nebini chi e kachꞌalal pro ma katzij ta ja nquibij. 
\v 27 Congana jun samaj nbanon in congana xinrcosaj chakajaꞌ. Qꞌuiylaj mul ja ma xinwar ta chakꞌaꞌ, xintij waꞌal chakichiꞌ. Qꞌuiylaj mul ja ma xinwaꞌ ta, xintij pokon rmal tew in ja ntziak kas tak lawuloꞌ chwij. 
\p 
\v 28 Cꞌa cꞌo na más ja rinkꞌaxnak chipan pro ma ruyon tariꞌ como kꞌij kꞌij ni cꞌo wiꞌ chi nukul chi nenuban cuenta nojel ja riglesia. 
\v 29 Ja wi cꞌo jun kachꞌalal yawaꞌ jariꞌ nnaꞌ kaj chi caniꞌ anin jun in yawaꞌ chakajaꞌ. Ja cꞌa wi cꞌo jun kachꞌalal ntakchiꞌixi in wi nkaji pa il mac rmal jariꞌ congana ntiꞌon chwe anin chakajaꞌ. 
\p 
\v 30 Ja wi kas puersa na chi nyaꞌ nukꞌij chewach mejor quewaꞌ nban riꞌ, nojel ja nbanon ja ncꞌutuwi chi xa in jun achi in débil jariꞌ nyabej nukꞌij. 
\v 31 Ja Dios ja Tatixel rxin ja kajaw Jesucristo arjaꞌ bien rotak chi ni katzij wiꞌ ja nmajon rbixic chewe, arjaꞌ janila nim rukꞌij chijutij. 
\v 32 Ja tok xinqꞌuejeꞌ pa Damasco cꞌo jun gobernador ja samaji chipan ja gobierno rxin ja rey Aretas. Ja cꞌa gobernador arjaꞌ xuyaꞌ orden chi nchajixi ja tinamit utzcꞌa chi ninchapi. 
\v 33 Pro xintoꞌel wiꞌ pa rukꞌaꞌ como xinya̱ꞌ pa jun chacach in xinkajsaxto pa jun wantana trij ja tabia ja rsutin riꞌ trij ja tinamit. 
\c 12
\s * * * * * * * * * * 
\p 
\v 1 Ja tok xa nukꞌij anin nyaꞌ jariꞌ bien kꞌalaj chi majun rcꞌamonto chwe. Pro ja cꞌa camic riꞌ nintzijon chic tre ja yatajnak chwe rmal ja kajaw Jesucristo caniꞌ tre ja ntzꞌaton jeꞌe caniꞌ pan achicꞌ in caniꞌ tre ja kꞌalasan jeꞌe chinwach rmal ja Dios.
\v 2 Anin cꞌo jun achi wotak rwach, arjaꞌ xa jun quibanon ruqꞌuin ja Cristo. Ja cꞌa rachi arjaꞌ tuban catorce junaꞌ ja cꞌoli xuban, chaka jalal tok cꞌamarel chilaꞌ chicaj in cꞌa chi rox caj xekaj wiꞌ. Ja wi ni rachbil rcuerpo tok cꞌamarel owi ma rachbil ta jariꞌ ma wotak ta, solo Dios otakyon. 
\v 3-4 Xarwariꞌ bien wotak chi ja rachi cꞌa chipan ja paraíso cꞌamarel wiꞌ ja bar cꞌo wiꞌ quicotemal pro ma wotak ta wi rachbil rcuerpo owi ma rachbil ta, solo Dios otakyon. Ja cꞌa tok xekaji cꞌo juleꞌ tzij xcꞌaxaj triꞌ pro juleꞌ tzij ja macatcowini nabij chipan jun tzobal waweꞌ chwachꞌulew, juleꞌ tzij ja ma yatajnak ta chake ja rok winak chi xtikatzijoj ta. 
\v 5 Ja rachi ja xinbij chewe jariꞌ nyaꞌ rukꞌij pro ja xtinyaꞌ kaj ta nukꞌij anin nuyon jariꞌ ma can ta. Xarwariꞌ nojel ja nbanon ja ncꞌutuwi chi xa in jun achi in débil jariꞌ nyabej nukꞌij. 
\v 6 Ja cꞌa wi xtuyaꞌ gana chwe chi nyaꞌ nukꞌij chewach jariꞌ ni katzij wiꞌ chi cꞌoli nbase ja nyabej nukꞌij. Pro ja camic matinyaꞌ nukꞌij chewach como anin ni majun ngana chi cꞌo ta jun winak xtuban ta más nim chwe pro xarwariꞌ, titzꞌattaji janiꞌ ja ncꞌaslemal in ticꞌaxaxi janiꞌ nintzijoni. 
\v 7 Como anin congana kꞌalasax jeꞌe chinwach rmal ja Jesucristo rmalcꞌariꞌ tok cꞌoli xuban ja Dios chwe utzcꞌa chi maquita kas in nim nnaꞌ kaj rmal. Ja xuban, xuyaꞌ lugar tre ja Satanás chi cꞌoli caniꞌ jun qꞌuix xutakto chi nurbanaꞌ pokon tre ja ncuerpo. Queriꞌ xuban chwe utzcꞌa chi maquita kas in nim nnaꞌ kaj. 
\v 8 Ja cꞌa ranin oxmul xincꞌutuj tre ja kajaw Jesucristo chi arjaꞌ nwasaj chwe ja banyon pokon tre ja ncuerpo. 
\v 9 Pro arjaꞌ quewaꞌ xbij chwe riꞌ: —Matinwasaj chawe como anin nsipaj ja wutzil chawe in ni majun nak chi ta ncꞌatzin chawe. Queriꞌ nbij chawe como ja poder ja cꞌo wqꞌuin más chi na nsamaji chipan ja racꞌaslemal ja tok bien nchꞌobtaj amwal chi xa at jun achi at débil, neꞌ chwe. Rmalcꞌariꞌ ja tok congana ninquicoti nyaꞌ nukꞌij rmal ja debilidad ja cꞌo jeꞌe chwe utzcꞌa chi ni nsamaj wiꞌ ja poder xin Cristo chipan ja ncꞌaslemal. 
\v 10 Rmalcꞌariꞌ ja tok ninquicot rmal ja bien nchꞌobtaj mwal chi anin in jun achi ja xa in débil, caniꞌ tre tok nintzꞌuji in ninyokꞌi rmal ja samaj xin Dios in caniꞌ tre tok cꞌo jeꞌe nuban falta chwe rmal ja samaj, in caniꞌ tre tok nba̱n pokon chwe in tok ninqꞌuejeꞌ pa rcꞌayewal rmal ja Cristo. Ninquicoti como ja tok bien nchꞌobtaj mwal chi xa in débil jariꞌ congana nsamaji ja poder xin Cristo chipan ja ncꞌaslemal. 
\s * * * * * * * * * * 
\p 
\v 11 Ja nbanon chewach camic caniꞌ nuban jun achi ja xa ma chꞌobol ta nuban como xinyaꞌ nukꞌij chewach. Pro emac ixix ja tok puersa xinban queriꞌ. Queriꞌ nbij chewe como ja kas rubey, ixix ta nariꞌ xeyaꞌ ta nukꞌij chiquewach ja juleꞌ chic winak ja nquenaꞌ kaj chi congana e nimak tak apóstol. Ja ranin masqui nnaꞌ kaj chi ni ma incꞌo ta pro ejeꞌeꞌ ni ma nimak ta wiꞌ quekꞌij chinwach. 
\v 12 Cꞌoli nojel rwach ja nimak tak milagro ja xinban checojol jariꞌ ncꞌutuwi chi in jun apóstol in congana qꞌuejeꞌe ja npaciencia chi rbanic ja samaj. 
\v 13 ¿La cꞌo ta cꞌa jun samaj ja xinban chiquicojol ja juleꞌ chic iglesia ja ma xinban ta checojol ixix chakajaꞌ? Pro xarwariꞌ, ni majun nak ta xinyaꞌ ta chi ekul ja xintzukbej wiꞌ. ¿La xajan cꞌariꞌ ja xinban queriꞌ chewe nechꞌob ixix? Chanumac. 
\p 
\v 14 Roxmul awaꞌ ja xquinbe ewqꞌuin riꞌ wachꞌalal in ni mta wiꞌ ja xtinyaꞌ ta chi ekul ja ntzukbej wiꞌ. Queriꞌ nbij chewe como ma emebaꞌil ta ja nintajini ncanoj, ixix ja nixwajoꞌ. Como ixix ix caniꞌ tak walcꞌwal in ja ralcꞌwalaxelaꞌ ma rubey ta ja xtiquemol ta ruchiꞌ ja quimebaꞌil in xtiqueyaꞌ chi ta cꞌa chique ja tatixelaꞌ pro ja kas rubey, ja tatixelaꞌ ejeꞌeꞌ nquemol ruchiꞌ ja quimebaꞌil ja nqueyaꞌ can chique ja tak calcꞌwal. 
\v 15 Ja cꞌa ranin xa nak ta ja cꞌo wqꞌuin in conforme nsach pan ecuenta chi etoꞌic, hasta ninquicoti nyaꞌ wiꞌ pan ecuenta chakajaꞌ. Ja wi anin más na nixwajoꞌ in wi ma kas ta ninewajoꞌ ixix pro masqui queriꞌ neban chwe pro nij in conforme wiꞌ nyaꞌ wiꞌ pan ecuenta chi etoꞌic. 
\p 
\v 16 Pro maxla quewaꞌ nebij chic chwe riꞌ: —Ja Pablo masqui mta xuyaꞌ chi kakul ja xtzukbej riꞌ pro como congana listo xa engaño nuban chake, xa cꞌo jun trampa rchomin chi rlasaxic ja pwok chake, maxla nixcheꞌe. 
\v 17 Ja rajsamajelaꞌ ja xenutakel ewqꞌuin ¿la cꞌo ta cꞌa jun chique ja xixerbanaꞌ ta engañar, la cꞌo ta cꞌa pwok kawasaj ta chewe? 
\v 18 Anin xincꞌutuj jun utzil tre ja Tito chi arjaꞌ nbe ewqꞌuin in cꞌo jun kachꞌalal xintakel trij chakajaꞌ. Ja cꞌa Tito ¿la cꞌo ta cꞌa jun engaño xuban chewe? ¿La ma ja ta cꞌa mismo Espíritu Santo ucꞌayon kaxin chi ok caꞌiꞌ xetzꞌat? ¿La ma jun ta laꞌan ja bey ja kucꞌaj ruqꞌuin chi ok caꞌiꞌ nechꞌob ixix? 
\p 
\v 19 Ja noktajini nkabij chewe maxla ja nechꞌob ixix chi jariꞌ nkatobej kiꞌ chewach pro ma queriꞌ ta. Nojel ja kamajon rbixic chewe, chwach Dios nkabij in xa jun kabanon ruqꞌuin ja Cristo chi rbixic. Chakꞌlaj wachꞌalal, nojel ja nkabij chewe utzcꞌa chi nqꞌuiy más ja yukulbal ecꞌuꞌx ruqꞌuin ja Jesucristo rmal. 
\v 20 Queriꞌ nbij chewe como anin nxbej wiꞌ emwal como ja tok xquinekaj ewqꞌuin maxla ma queriꞌ ta emajon rbanic ja caniꞌ nwajoꞌ chewe chi neban in maxla xa ma quiꞌil ta ja nenbanaꞌ ewqꞌuin ja caniꞌ newajoꞌ chwe chi nenbanaꞌ. Maxla xa chꞌaꞌoj ja remajon rbanic triꞌ owi aquiakarem owi ayewal owi banoj tak división owi xa ewiꞌ ja remajon rtzijoxic owi xa wixwotem owi xa ekꞌij ixix ja remajon ryaꞌic. Maxla xa ixyojtajnak ja tok xquinekaji. 
\v 21 Anin nxbej wiꞌ emwal como ja tok xquinekaj chic jutij ewqꞌuin maxla quewaꞌ xtuban chwe ja Dios riꞌ, maxla xa qꞌuixbal nnaꞌ chic chewach rmal ja rebanon. Maxla rjawaxic chi ninokꞌ cumal ja recꞌoli chewe ja ni cꞌo wiꞌ ja il mac queban ojer in ni cꞌa cꞌo na wiꞌ ja ritzelal ja quimajon rbanic camic caniꞌ chique ja winak ja nqueban xa nak ta ja ntzꞌilorsaj ja racꞌaslemal in chique ja rachiꞌiꞌ ja nemacun cuqꞌuin ixokiꞌ in chique ja winak ja ni majun queqꞌuix nqueban ja ritzelal chiquewach ja winak. 
\c 13
\s * * * * * * * * * * 
\p 
\v 1 Roxmul awaꞌ ja xquinbe ewqꞌuin riꞌ. Ja cꞌa tok xquinekaj ewqꞌuin quewaꞌ nkaban riꞌ, ja wi cꞌo jun kachꞌalal ja cꞌo ril xuban in wi ecꞌo caꞌiꞌ owi e oxiꞌ testigo ja xetzꞌatowi ja ma utz ta xuban jariꞌ ncꞌutu chikawach chi ni katzij wiꞌ chi cꞌo ril. 
\v 2 Ja tok xinqꞌuejeꞌ checojol ja pa rcab viaje xinbij chique ja quimajon rbanic ja ritzelal chi cow nenuchap na in queriꞌ nbij chic chique chakajaꞌ ja juleꞌ chic ja quimajon rbanic ja ritzelal camic, masqui ma incꞌo ta ewqꞌuin pro mta moda ja maquita cow xquenuchap ja tok xquinekaj chic ewqꞌuin. 
\v 3 Como ixix newajoꞌ ninecꞌambajaj, como newajoꞌ newotakij ja wi ni katzij wiꞌ chi ja Cristo nbin chwe ja nbij chic chewe ixix pro jariꞌ bien netzꞌat na. Ja cꞌa Cristo arjaꞌ ma débil ta, sobre poder ja cꞌo ruqꞌuin chi quibanic castigar ja recꞌo checojol ja nebanowi ja ritzelal. 
\v 4 Queriꞌ nbij chewe como arjaꞌ masqui xa débil ja tok camsax chwach cruz pro ja camic cꞌasli rmal ja poder xin Dios ja rocnak chic tre. In queriꞌ cꞌa chake ajoj chakajaꞌ, xa ok débil rmal ja xa jun kabanon ruqꞌuin pro ja tok xkobe ewqꞌuin chi echomixic jariꞌ ma ok débil chi ta, okcꞌas chic ruqꞌuin rmal ja poder xin Dios ja rocnak chic chake triꞌ. 
\p 
\v 5 Bien cꞌa tecꞌambajaj kaj ewiꞌ eyon, ixix cꞌa quixtzꞌatowi ja wi ni katzij wiꞌ chi cꞌoli ja yukulbal ecꞌuꞌx ruqꞌuin ja Jesucristo. ¿La ma ewotak ta cꞌa chi cꞌoli ja Jesucristo pa tak ewanma? Queriꞌ rbanic ja wi ni katzij wiꞌ chi ix xin Cristo. 
\v 6 Pro ja tok xkoꞌekaj ewqꞌuin cꞌo nseguro chi bien netzꞌat na chi ajoj ni katzij wiꞌ chi ok apóstol xin Cristo. 
\v 7 Pro ja cꞌa camic kamajon rcꞌutuxic tre ja Dios chi nixrutoꞌ utzcꞌa chi mateban ja ritzelal. Pro ma ja ta ja kas nkajoꞌ chewe chi nkacoj chewij ja poder ja ncꞌutu chewach chi ni katzij wiꞌ chi ok apóstol xin Cristo. Ja kas nkajoꞌ chewe chi neban ja rutzil. Queriꞌ nkajoꞌ chewe masqui ja rajoj xkotzꞌati caniꞌ mta ja poder xin Cristo pa kakꞌaꞌ. 
\v 8 Queriꞌ nbij chewe como ajoj mta moda ja cꞌo ta xtikaban ja matucꞌam riꞌ ruqꞌuin ja utzlaj tzij xin Jesucristo pro solo ja nucꞌam riꞌ ruqꞌuin jariꞌ nkaban. 
\v 9 Como ajoj congana nokquicoti ja tok ma rjawaxic ta nkacoj chewij ja poder xin Cristo ja cꞌo pa kakꞌaꞌ in tok cꞌo poder ewqꞌuin chi rbanic ja rutzil. Congana kamajon rbanic orar pan ecuenta utzcꞌa chi nqꞌuiyi in nwachini ja rutzil xin Dios pa tak ewanma. 
\v 10 Rmalcꞌariꞌ ja tok cow xixnuchap jutzꞌit chipan awaꞌ jun carta ja ntakel ewqꞌuin riꞌ como ja tok xquinekaj ewqꞌuin xa ma quiꞌil ta ja wi cow nixnuchap na in ncoj na chewij ja poder ja yaꞌon pa nukꞌaꞌ rmal ja kajaw Jesucristo. Como jariꞌ poder yatajnak chwe chi ncoj chi etoꞌic utzcꞌa chi nixqꞌuiyi, ma rmal ta chi nixnuyoj. 
\p 
\v 11 Camic nbij chewe wachꞌalal, quixquicoti. Techomarsaj cꞌa ja ma utz ta jeꞌe ja remajon rbanic, Dios ta xtiyukban ecꞌuꞌx, xta jun neban, maxta sícꞌ chꞌaꞌoj teban. Ja wi nenimaj ja cꞌa xinbij kaj chewe riꞌ jariꞌ nqꞌuejeꞌe ja Dios ewqꞌuin, arjaꞌ nyowi ja rajoben riꞌil pa tak kanma, arjaꞌ nyowi ja quicotemal. 
\v 12 Teyaꞌaꞌ rutzil ewach chibil tak ewiꞌ pro ruqꞌuin ta ja rajoben riꞌil xin Dios. 
\v 13 Canojel ja re xin Dios ja recꞌo wqꞌuin ejeꞌeꞌ nquetakel rutzil ewach. 
\p 
\v 14 Ja rutzil ja nsipaj ja kajaw Jesucristo rachbil ja rajoben riꞌil xin Dios jariꞌ xtiqꞌuejeꞌ ta ewqꞌuin ewanojelal in xtiqꞌuejeꞌ ta ja rEspíritu Santo ewqꞌuin chakajaꞌ, xta jun xtuban chewe ewanojelal. Amén.