\id GAL Western Tzutujil [tzt] NT (Guatemala) -2009 bd. 
\h GALATAS 
\toc1 Gálatas 
\toc2 Gá
\mt GALATAS
\c 1
\s 
\p
\v 1 Anin in Pablo, inocnak apóstol rxin ja Jesucristo. Pro ma cuqꞌuin winak ta penak wiꞌ chi inocnak apóstol in chakajaꞌ ma winak ta etakyonel wxin chi rbanic jawaꞌ samaj riꞌ. Ja Jesucristo rachbil ja katataꞌ Dios ejeꞌeꞌ etakyonel wxin chi rbanic. Jariꞌ mismo Dios ja yico rxin ja Jesucristo chipan ja camíc.
\v 2 Anin ntakel rutzil ewach ewanojelal ja rix iglesia ja rixcꞌo pa rcuenta Galacia in canojel ja kachꞌalal ja recꞌo wqꞌuin ejeꞌeꞌ nquetakel rutzil ewach chakajaꞌ.
\v 3 Ja rutzil ja nsipaj ja Dios chake rachbil ja quicotemal xin Dios ja tariꞌ xtecochij más tre ja katataꞌ Dios in tre ja kajaw Jesucristo.
\v 4 Ja Jesucristo arjaꞌ xuyaꞌ riꞌ pa camíc, camsax rmal ja kil kamac. Queriꞌ xuban jariꞌ xokrtobej pa rukꞌaꞌ ja ritzelal ja cꞌo chipan awaꞌ tiempo ja rokcꞌo wiꞌ riꞌ in tok xuban queriꞌ jariꞌ ni rvoluntad wiꞌ ja katataꞌ Dios ja xuban.
\v 5 Kas ta xtiyaꞌ rukꞌij ja katataꞌ Dios camic, chwak in chijutij. Amén.
\s * * * * * * * * * *
\p
\v 6 Kas takaꞌan junwiꞌ nnaꞌ emwal wachꞌalal como ixix nixtajini neyaꞌ can ja katataꞌ Dios pro ma cꞌa jaruꞌ ta waꞌan tiempo tenimaj pro makanaꞌ maquita arjaꞌ xixsiqꞌuini in xixrucoj chipan ja rutzil ja recochin tre ja Cristo. Pro camic emajon chic rnimaxic jun tijonem ja junwiꞌ chi na, utzlaj tzij xin Cristo neꞌxi.
\v 7 Pro jariꞌ ma katzij ta chi utzlaj tzij, xar ecꞌo juleꞌ winak ja netajini nixqueyoj como ejeꞌeꞌ ncajoꞌ nqueqꞌuex ja utzlaj tzij ja ncꞌutu chikawach nak rbanic ja Cristo.
\v 8 Pro ajoj kachꞌobon chic waꞌan chewach nak rbanic ja utzlaj tzij xin Cristo. Xa nak ta xtiqꞌuexo rbixic jawaꞌ utzlaj tzij riꞌ ja kachꞌobon chic chewach xtipi ta ryewal ja Dios trij. Quirtariꞌ xtiban tre masqui ajoj owi masqui jun ángel xin chilaꞌ chicaj chakajaꞌ.
\v 9 Caniꞌ kabin chic chewe camic nbij chic jutij chewe, xa nak ta xtiyowi jun chic tijonem chewe in wi arjaꞌ nbij chewe chi utzlaj tzij xin Cristo pro wi junwiꞌ chi na chwach ja xenimaj nabey xtipi ta ryewal ja Dios trij.
\p
\v 10 Ja cꞌa xinbij chewe riꞌ triꞌ cꞌa netzꞌat wiꞌ chi ma ja ta ninoclaꞌ il tre ja xtinchꞌec ta quigana winak pro ja nintajini nyaꞌ rgana jariꞌ ja Dios. Ja wixta cꞌa ninoclaꞌ il tre ja xtinchꞌec quigana winak jariꞌ ma in ajsamajel ta cꞌariꞌ rxin ja Cristo.
\s * * * * * * * * * *
\p
\v 11 Bien tecꞌwaxaj wachꞌalal, ja utzlaj tzij xin Cristo ja xinyaꞌ rbixic chewe jariꞌ ma jun winak ta winakarsyon
\v 12 como ma jun winak ta bin chwe in ma xintijox ta na tre chakajaꞌ, ja Jesucristo arjaꞌ kꞌalasan chinwach.
\p
\v 13 Como ixix ecꞌwaxan wachꞌalal janiꞌ ja ncꞌaslemal nabey ja tok xinqꞌuejeꞌ chipan ja religión ja quiniman ja wach tak aj Israel. Bien ecꞌwaxan ja xinban chique ja riglesia ja rtinamit Dios, más kꞌaxnak chi na ja rpokonal xinban chique, ja ta xinwajoꞌ xenuqꞌuis ta pro ni ta canojelal.
\v 14 In jun chic, congana xintijoj wiꞌ trij ja quireligión ja wach tak aj Israel, e qꞌuiy chique ja wach tak qꞌuiyic congana xinkꞌax chiquewach chi rotakixic. Queriꞌ xinban como congana xinmakꞌeꞌ chipan ja costumbre ja quiyaꞌon can ja katiꞌt kamamaꞌ.
\v 15-16 Pro ja cꞌa Dios tok xerilaꞌ ja tiempo ja rchꞌobon chwij arjaꞌ xkꞌalasaj chinwach janiꞌ rnaꞌoj ja Jesucristo ja Ralcꞌwal utzcꞌa chi anin xtinyaꞌ rbixic ja Ralcꞌwal chique ja winak ja ma e aj Israel ta. Arjaꞌ nij inrchaꞌonto wiꞌ ja tok majaꞌn quinalaxi in xa rmal ja rutzil ja xincochij tre chewiꞌ tok xinrsiqꞌuij chi nban jawaꞌ samaj riꞌ. Ja cꞌa tok kꞌalasax chinwach nak rbanic ja Ralcꞌwal Dios ni majun winak xinbe ta ruqꞌuin xincꞌwaxaj ta razón tre nak rbanic como jariꞌ kꞌalasan chic chinwach rmal ja Dios.
\v 17 Nixtacꞌa xinbe ta pa Jerusalén chakajaꞌ xencꞌwaxaj ta razón chique ja xeꞌoc apóstol nabey chinwach anin. Xar ja xinban, xinbe chipan ja tinamit Arabia cꞌacꞌariꞌ xinmeloj chic jutij pa Damasco.
\p
\v 18 Cꞌa chi oxiꞌ junaꞌ xinbe wiꞌ pa Jerusalén, triꞌ xinbe wiꞌ utzcꞌa chi nwotakij rwach ja Pedro, olajuj kꞌij xenbanaꞌ ruqꞌuin.
\v 19 Pro ma ecꞌo chi ta juleꞌ chic ja rapóstol xintzꞌat can ta quewach xarwariꞌ ja Jacobo ja rchꞌalal ja kajaw Jesucristo jariꞌ xintzꞌat can rwach.
\v 20 Ja nintajini nbij chewiꞌ riꞌ wachꞌalal chwach Dios nbij, ma npayil ta.
\p
\v 21 Cꞌacꞌariꞌ xinbe chic chipan ja tinamit jeꞌe ja cꞌo pa rcuenta Siria in ja cꞌo pa rcuenta Cilicia.
\v 22 In chakajaꞌ chipan ariꞌ tiempo ja riglesia ja xa jun quibanon ruqꞌuin ja Jesucristo ja recꞌo chipan ja departamento Judea ejeꞌeꞌ majaꞌn tiquetzꞌat nwach triꞌ.
\v 23 Xarwariꞌ cꞌoli quicꞌaxan chic chwe chi: —Ja Pablo ja maxcoꞌ chi pokon xuban chake nabey pro ja camic ntajini nbij chic chique ja winak chi: —Tiyukeꞌ ecꞌuꞌx ruqꞌuin ja Jesucristo, neꞌ chic chique. Pro ja nabey rajoꞌ ta xuyoj ta ja yukulbal kacꞌuꞌx ruqꞌuin ja Jesús. Queriꞌ ja quicꞌaxan chic chwe
\v 24 in queyaꞌ rukꞌij ja Dios mwal.
\c 2
\s * * * * * * * * * * 
\p 
\v 1 Cꞌa chi catorce junaꞌ ja tok xinbe chic jutij ja pa Jerusalén wachbil ja Bernabé in kacꞌamel ja Tito chakajaꞌ. 
\v 2 Ja Dios arjaꞌ kꞌalasan chinwach chi nban jawaꞌ viaje riꞌ. Ja cꞌa tok xokekaji pa Jerusalén xinchꞌob chiquewach ja kachꞌalal nak rbanic ja utzlaj tzij xin Jesucristo ja nmajon rbixic anin chique ja winak ja ma e aj Israel ta xarwariꞌ ja más nimak quekꞌij chiquicojol ja kachꞌalal kayonaj kiꞌ cuqꞌuin ja tok xinchꞌob chiquewach. Queriꞌ xinban utzcꞌa chi nkacꞌam kiꞌ cuqꞌuin utzcꞌa maquita nyojtaji ja samaj xin Dios ja nbanon chic in chakajaꞌ ja samaj ja majaꞌn tinban. 
\v 3 Ejeꞌeꞌ chꞌobtaj cumal ja xinbij chique como ja Tito ja wachbil arjaꞌ ma aj Israel ta in tok laj ban puersa tre chi nba̱n circuncidar pro nixtacꞌa yataj ta lugar chique chi queban ta circuncidar. 
\v 4 Laj ban puersa tre cumal juleꞌ winak ja kachꞌalal necheꞌxi, pro ma katzij ta chi e kachꞌalal. Ejeꞌeꞌ pan ekal xeꞌoc chikacojol, ncajoꞌ nokquicꞌambajaj in nokqueyoj como ajoj kaniman chi okwasanel chic libre pa rukꞌaꞌ ja ley xin Dios ja tzꞌibtal can rmal ja Moisés como xa jun kabanon chic ruqꞌuin ja Jesucristo. Pro ejeꞌeꞌ cajoꞌ ta xokquecoj chi ta jutij pa rukꞌaꞌ ja ley. 
\v 5 Pro ja cꞌa rajoj nixtacꞌa kanimaj ta jutzꞌit ja ncajoꞌ chake, ma xekanimaj ta pro emwal ixix utzcꞌa chi ja utzlaj tzij xin Jesucristo matiqꞌuextaji rbixic ja tok ncꞌu̱t chewach. 
\p 
\v 6 Xoktzijon cuqꞌuin ja kachꞌalal ja más na nimak quekꞌij netzꞌa̱t cumal ja juleꞌ chic pro ja chwe anin xa junan wi nimak quekꞌij owi ma nimak ta quekꞌij como ja Dios arjaꞌ ma jun ta utz nutzꞌat in ma jun ta itzel. In tok xoktzijon cuqꞌuin ni majun nak ta quibij ta chwe ja majaꞌn tikꞌalasax chic chinwach triꞌ rmal ja Dios. 
\v 7 Pro ja queban chake congana xequicot chakij. Como ejeꞌeꞌ bien chꞌobtaj cumal chi ja Dios arjaꞌ ryaꞌon chi nukul anin chi nenyaꞌaꞌ rbixic ja utzlaj tzij xin Jesucristo chique ja ma e aj Israel ta como caniꞌ ryaꞌon chi rukul Pedro chi arjaꞌ nuyaꞌ rbixic chique ja wach tak aj Israel. 
\v 8 Bien chꞌobtaj cumal como ejeꞌeꞌ bien kꞌalaj chic chiquewach chi congana samaji ja Dios ja tok xinyaꞌ rbixic ja utzlaj tzij chique ja ma e aj Israel ta. Caniꞌ tre ja Pedro congana samaji ja Dios tok xuyaꞌ rbixic chique ja raj Israel ni cꞌa queriꞌ xuban anin chwe chakajaꞌ. 
\v 9 Ja Jacobo, ja Pedro in Juan ejeꞌeꞌ xetzꞌati chi epaꞌl chiquij ja kachꞌalal in tok chꞌobtaj cumal nak rbanic ja samaj ja xincochij tre ja Dios cꞌacꞌariꞌ quechap kakꞌaꞌ ok caꞌiꞌ ruqꞌuin ja Bernabé jariꞌ quicꞌutbej chi xa jun chic kabanon cuqꞌuin. Xa jun kachꞌob cuqꞌuin, ajoj nokesamaj chiquicojol ja ma e aj Israel ta in ejeꞌeꞌ nesamaj chiquicojol ja raj Israel. 
\v 10 Xar ja queban recomendar chake chi: —Maxta queꞌemestaj jutzꞌit ja tak mebaꞌiꞌ, xecheꞌ chake, pro jariꞌ ni cꞌo wiꞌ ngana chi nenutoꞌ ja cꞌo rjawaxic chique. 
\s * * * * * * * * * * 
\p 
\v 11 Pro ja Pedro tok xekaj pan Antioquía cꞌoli xuban ja ma rubey ta jariꞌ xinchꞌaꞌ tre pro ni chi rpalaj xinbij wiꞌ. 
\v 12 Ja ril xuban tokoriꞌ tok ecꞌo juleꞌ achiꞌiꞌ xeꞌekaji ja pan Antioquía, juleꞌ achiꞌiꞌ ja retakonel rmal ja Jacobo. Ja cꞌa tok xeꞌekaji ma xwaꞌ chi ta ja Pedro cuqꞌuin ja kachꞌalal ja ma e aj Israel ta pro ja xuban, pan ekal pan ekal xelel chiquicojol. Queriꞌ xuban como xbej riꞌ chiquewach ja rach tak aj Israel ja nquecoj pa chꞌaꞌoj chi neba̱n circuncidar ja kachꞌalal ja ma e aj Israel ta. 
\v 13 Xa caꞌiꞌ rpalaj xuban ja Pedro in queriꞌ queban chic chakajaꞌ ja juleꞌ chic kachꞌalal ja raj Israel in pior cꞌa ja Bernabé arjaꞌ xuyaꞌ riꞌ chique chakajaꞌ, caniꞌ queban ejeꞌeꞌ queriꞌ xuban arjaꞌ chakajaꞌ. 
\v 14 Ja cꞌa ranin ja tok chꞌobtaj mwal chi matucꞌam riꞌ ruqꞌuin ja utzlaj tzij xin Jesucristo ja queban cꞌacꞌariꞌ xinchꞌaꞌ tre ja Pedro pro ni chiquewach canojelal: —Ja xaban chique ja kachꞌalal riꞌ ja ma e aj Israel ta, ja nel chiquewach chi puersa noqui ja kacostumbre ajoj ja rok aj Israel. ¿Nak cꞌa tre tok xaban quelaꞌ? Pro makanaꞌ maquita xeꞌawachbilaj nabey, xatwaꞌ waꞌan cuqꞌuin masqui at aj Israel, makanaꞌ maquita xatel conforme nabey chi matiyukeꞌ chic acꞌuꞌx ruqꞌuin ja ley. 
\p 
\v 15-16 Ajoj chꞌobtajnak chic kumal chi xa rmal ja nyukeꞌ acꞌuꞌx ruqꞌuin ja Jesucristo chewiꞌ tok Dios natrutoꞌ, natrwasajel libre in nuban chawe caniꞌ mta awil amac abanon, ma rmal ta ja ley xin Dios ja kas ta xtaban jeꞌe cumplir tok nuban queriꞌ chawe. Ajoj masqui ok aj Israel pro ruqꞌuin ja Jesucristo yukul chi wiꞌ kacꞌuꞌx utzcꞌa chi ja Dios nokrutoꞌ nokrucꞌul pro xa rmal ja yukulbal kacꞌuꞌx ruqꞌuin ja Cristo, ma rmal ta ja ley ja kas ta xtikaban jeꞌe cumplir como ni majun winak xtitotaj ta xticꞌul ta rmal ja Dios xta rmal ja ley ja kas ta xtuban jeꞌe cumplir. Queriꞌ kabanon ja ni pa kalaxic wiꞌ chi ok aj Israel. Ajoj ok aj Israel nokcheꞌe, in xa cꞌamonnak chake chi nkabij chi ma ok junan ta cuqꞌuin ja ma e aj Israel ta como ejeꞌeꞌ mta ja ley xin Dios cuqꞌuin, xa e ajꞌil xa e ajmaquiꞌ, okchenakto chique. 
\p 
\v 17 Pro ajoj wi nkajoꞌ chi nokrutoꞌ ja Dios in nokrwasajel libre chipan ja kil kamac pro wi rmal ja xa jun nkaban ruqꞌuin ja Cristo tok nkaban queriꞌ jariꞌ matiyukeꞌ chic kacꞌuꞌx ruqꞌuin ja ley, xa ek ok junan cuqꞌuin ja ma e aj Israel ta, xa ok ajꞌil xa ok ajmaquiꞌ chakajaꞌ. Ja cꞌa wi queriꞌ rbanic ¿la tibij cꞌa tzij ariꞌ chi xa il mac xucoj can chakij ja Cristo? Mni, ma queriꞌ ta. 
\v 18 Pro anin wi ninel conforme chi matiyukeꞌ chic nucꞌuꞌx ruqꞌuin ja ley pro wi nmaj chic jutij ryaꞌic rukꞌij ja ley chiquewach ja winak jariꞌ in ajꞌil in ajmac nineli chwach ja ley. 
\v 19 Queriꞌ nbij chawe como anin, rumac ja ley chewiꞌ ja tok camsaxi ja tzabuklaj cꞌaslemal ja cꞌo chwe nabey, xinel libre pa rukꞌaꞌ ja ley utzcꞌa chi xtinmaj chic jun cꞌaslemal cꞌacꞌa pa rukꞌaꞌ ja Dios. 
\v 20 Ja chwe anin, anin jun xincamsax ruqꞌuin ja Cristo chwach ja cruz. Ja cꞌaslemal ja cꞌo chic chwe camic jariꞌ ma anin chi ta ja rincꞌasli, Cristo chic ja cꞌas pa wanma. Ja yukulbal nucꞌuꞌx ruqꞌuin ja Cristo ja Ralcꞌwal Dios jariꞌ cꞌayon chic wxin chipan awaꞌ cꞌaslemal ja cꞌo chic chwe waweꞌ chwachꞌulew. Janila ninrajoꞌ ja Cristo como arjaꞌ ma xpokonaj ta xuyaꞌ riꞌ pa camíc mwal. 
\v 21 Queriꞌ rbanic ja rutzil ja rsipan ja Dios chake in mta moda xtinban ta tre ja ni ta majun rsamaj. Queriꞌ nbij chawe como ja Dios wixta rmal ja ley tok nokrutoꞌ in nokrwasajel libre chipan ja kil kamac maquita cꞌa rjawaxic ariꞌ ja camsaxi ja Cristo chi katoꞌic. Queriꞌ xinbij tre ja Pedro. 
\c 3 
\s * * * * * * * * * * 
\p 
\v 1 Wachꞌalal ja rix aj Galacia, ixix xa ma ix chꞌobol ta. ¿Nak xixbano engañar chewiꞌ tok xeyaꞌ can ja utzlaj tzij xin Jesucristo? Pro bien chꞌobtaj chewach nak rbanic ja Jesucristo, caniꞌ waꞌan rip chwa cruz chewach. 
\v 2 Camic cꞌoli nwajoꞌ ncꞌwaxaj chewe riꞌ, ja tok kajto ja rEspíritu Santo ewqꞌuin ¿la rmal ja xeban cumplir ja ley chewiꞌ tok kajto ewqꞌuin? Mni, ma queriꞌ ta. Pro ja xeban, xecꞌwaxaj ja utzlaj tzij xin Jesucristo in yukeꞌ ecꞌuꞌx ruqꞌuin xa chewiꞌ tok kajto ja rEspíritu Santo ewqꞌuin. 
\v 3 Ja tok kas xemajto ja bey xin Jesucristo nabey jaꞌ Espíritu Santo xucꞌanto ewxin. Ja cꞌa camic chic ¿la jaꞌ chic ja ley ntoꞌo ewxin chi rqꞌuisic ja bey xin Jesucristo nechꞌob ixix? Ja wi queriꞌ nechꞌob xcꞌa ma ix chꞌobol ta ariꞌ. 
\v 4 Ja tok xenimaj ja Jesucristo congana rpokonal xetij rmal pro camic ¿la chaka queriꞌ tok xetij ja rpokonal? Maquita chaka queriꞌ wachꞌalal. 
\v 5 Ja Dios arjaꞌ takyonto ja rEspíritu Santo ewqꞌuin, cꞌoli milagro ja rbanon jeꞌe checojol ¿nak tre tok queriꞌ rbanon ja Dios checojol nechꞌob ixix? ¿La rmal chi cꞌoli ja ley ebanon jeꞌe cumplir? Mni, ma rmal ta ja ley pro como xecꞌwaxaj ja utzlaj tzij xin Jesucristo in yukeꞌ ecꞌuꞌx ruqꞌuin chewiꞌ tok queriꞌ rbanon ja Dios checojol. 
\p 
\v 6 Bien turkaj chewe ja rAbraham, arjaꞌ yukeꞌ rucꞌuꞌx ruqꞌuin ja Dios in rmal ja yukulbal rucꞌuꞌx chewiꞌ tok Dios xutoꞌ, xwasajel libre in xuban tre caniꞌ mta ril rumac rbanon. 
\v 7 Rmalcꞌariꞌ tok nbij chewe, wi cꞌo yukulbal acꞌuꞌx ruqꞌuin ja Dios jariꞌ at ralcꞌwal can ja rAbraham. 
\v 8 Tzꞌibtal can ojer chipan ja rtzobal Dios chi ja winak ja ma e aj Israel ta ejeꞌeꞌ nerilaꞌ na jun kꞌij ja tok nyukeꞌ na quecꞌuꞌx ruqꞌuin ja Dios in rmal ja yukulbal quecꞌuꞌx chewiꞌ tok nerutoꞌ ja Dios, nerwasajel libre in nuban chique caniꞌ mta quil quemac quibanon. Rmalcꞌariꞌ tok cꞌoli ja utzlaj tzij xin totajem ja bix tre ja rAbraham ojer rmal ja Dios, quewaꞌ bix tre riꞌ: —Abraham, amwal atat tok cꞌoli ja rutzil ja nyataj na chique ja winak ja recꞌo nojel tinamit waweꞌ chwachꞌulew, neꞌxi ja Abraham. Queriꞌ tzꞌibtal can. 
\v 9 Queriꞌ cꞌa rbanic, ja winak ja cꞌo yukulbal quecꞌuꞌx ruqꞌuin ja Dios ejeꞌeꞌ riꞌ ja nyataj chique ja rutzil xin Dios ja caniꞌ yataj tre ja rAbraham ojer como ja rAbraham arjaꞌ ni yukul wiꞌ rucꞌuꞌx ruqꞌuin ja Dios. 
\p 
\v 10 Pro canojel ja winak ja yukul quecꞌuꞌx ruqꞌuin ja nqueban kaj ejeꞌeꞌ queyon chi rbanic cumplir ja ley ejeꞌeꞌ cꞌo maldición cꞌo ryewal ja Dios chiquij. Caniꞌ tzꞌibtal can chipan ja rtzobal Dios quewaꞌ nbij riꞌ: —Rjawaxic chi ni naban wiꞌ cumplir nojelal ja tzꞌibtal chipan ja libro xin ley. Ja winak xa nak ta chi winakil wi matiqueban cumplir nojelal ja nbij ja ley chi nqueban jariꞌ cꞌo maldición cꞌo ryewal ja Dios chiquij. 
\v 11 Ja rtzobal Dios bien nkꞌalasaj chikawach chi majun nak ta xtitotaj ta xtiwasaxel ta libre rmal ja Dios ja xta rmal nuban jeꞌe cumplir ja tzꞌibtal chipan ja ley. Bien kꞌalaj chi queriꞌ rbanic como ja rtzobal Dios quewaꞌ nbij chake riꞌ: —Ja winak ja netotaji in newasaxel libre rmal ja Dios ejeꞌeꞌ xa rmal ja yukulbal quecꞌuꞌx ruqꞌuin ja Dios tok nquewil ja utzlaj cꞌaslemal ja mta qꞌuisic trij, neꞌe. 
\v 12 Junwiꞌ na ja ley in junwiꞌ chi na ja yukulbal kacꞌuꞌx ruqꞌuin ja Dios. Como ja ley quewaꞌ tzꞌibtal can tre riꞌ: —Ja wi naban cumplir nojelal ja nbij ja ley chi naban jariꞌ nawil ja utzlaj cꞌaslemal ja mta qꞌuisic trij. Queriꞌ ja tzꞌibtal can. 
\p 
\v 13 Ja nabey cꞌoli ja maldición kajnak chakij rmal ja ma xkaban ta cumplir nojelal ja nbij ja ley chi nkaban pro ja Cristo arjaꞌ xutoj ja kil kamac, xlasaj chakij ja maldición, arjaꞌ xoc chuxeꞌ ja maldición pa kaqꞌuexwach. Ja tok camsaxi ja Cristo chwach cruz cꞌoli ja maldición qꞌuejeꞌ trij caniꞌ tzꞌibtal can chipan ja rtzobal Dios quewariꞌ: —Jun winak xa nak ta chi winakil ja wi njecbax chwach jun cheꞌ chi ncamsaxi jariꞌ retal chi cꞌo maldición trij, neꞌe. 
\v 14 Queriꞌ xuban ja Jesús utzcꞌa chi ixix ja ma ix aj Israel ta nyataj na chewe ja rutzil ja tzujun can tre ja rAbraham ojer rmal ja Dios. Queriꞌ xuban utzcꞌa chi xa rmal ja yukulbal kacꞌuꞌx ruqꞌuin ja Dios chewiꞌ tok nkacochij ja rEspíritu Santo ja tzujun can ojer. 
\s * * * * * * * * * * 
\p 
\v 15 Camic wachꞌalal cꞌo jun cꞌambal tzij nyaꞌ chewach riꞌ. Ja tok cꞌo jun chominem nbani masqui xa winak nebanowi pro wi nba̱n rwujal in tok nba̱n firmar jariꞌ ni majun xtiyojo ta xtiqꞌuexo ta. 
\v 16 Ja Dios arjaꞌ cꞌo jun chominem xuban ruqꞌuin ja rAbraham ojer, cꞌoli ja rutzil xin Dios xtzujuj tre ja rAbraham in tre rjaꞌtzul chakajaꞌ. Xa jun rjaꞌtzul ja rAbraham ja xtzujuj wiꞌ, ma xtzujuj ta chique canojel: —Tre ja rawijaꞌtzul ntzujuj wiꞌ, neꞌxi ja rAbraham rmal ja Dios. Ja cꞌa rjaꞌtzul ja rAbraham jariꞌ ja Cristo. 
\v 17 Camic nchꞌob chewach nak rcꞌamonto ja cꞌa xinbij kaj chewe riꞌ. Ja Dios arjaꞌ cꞌo jun chominem xuban ruqꞌuin ja rAbraham in xuyaꞌ rseguro chi ni nuban wiꞌ cumplir ja xtzujuj tre. Pro ja ley jariꞌ cꞌa chi cuatrocientos treinta junaꞌ winakar chi wiꞌ. Rmalcꞌariꞌ tok nbij chewe, ja ley mta moda xtuyoj ta ja chominem ja xuban ja Dios ruqꞌuin ja rAbraham, mta moda xtuyoj ta ja xtzujuj can tre. 
\v 18 Wixta jaꞌ ley cꞌamoto ja herencia xin Dios maquita cꞌa jaꞌ ririꞌ cꞌamoto ja xtzujuj can ja Dios tre ja rAbraham. Pro ja Dios como arjaꞌ rtzujun ja herencia tre ja rAbraham xa rmalariꞌ tok xuyaꞌ tre. 
\p 
\v 19 Ja wi queriꞌ rubey ¿nak cꞌa noc wiꞌ ja ley? Jariꞌ ni cꞌo wiꞌ rsamaj pro ja Dios cꞌa después na xwinakarsaj ja ley utzcꞌa chi nkotakij nak rbanic ja il mac ja nkaban ja rok winak. Pro ja ley xa pajtali ja tiempo rxin, tokoriꞌ xurqꞌuisaꞌ ja tok peti ja Cristo ja rjaꞌtzul can ja rAbraham como tre arjaꞌ tzujun can wiꞌ ja rutzil xin Dios. In jun chic chakajaꞌ, ja Dios tok xuyaꞌto ja ley ma ni ta arjaꞌ tzijon cuqꞌuin ja winak, ángel xecꞌamoto, xurquiyaꞌaꞌ tre ja Moisés in jaꞌ Moisés xuyaꞌ chic chique ja winak. 
\v 20 Pro ja xuban ja Dios tok xtzujuj ja rutzil tre ja rAbraham nij arjaꞌ tzijon ruqꞌuin. 
\s * * * * * * * * * * 
\p 
\v 21 ¿La tibij cꞌa tzij ariꞌ chi xa nchꞌojij riꞌ ja ley ruqꞌuin ja rutzil ja tzujun can rmal ja Dios? Mni, ma queriꞌ ta. Wixta cꞌo jun ley ja cowin ta xuqꞌuex ta ja kanaꞌoj in xuyaꞌ ta chake ja utzlaj cꞌaslemal ja mta qꞌuisic trij rmal ta cꞌariꞌ ley tok xoktotaji in xokwasaxel libre rmal ja Dios. 
\v 22 Pro quewaꞌ rubey riꞌ, ja ley chaka nbij chake kanojelal ja rok winak chi ok preso pa rukꞌaꞌ ja il mac. Queriꞌ nbij chake ja ley utzcꞌa chi kanojel ja nyukeꞌ kacꞌuꞌx ruqꞌuin ja Jesucristo nokquirtaj chipan ja kil kamac in nkacochij ja rutzil ja tzujun can rmal ja Dios in xa rmal ja yukulbal kacꞌuꞌx tok nba̱n queriꞌ chake. 
\p 
\v 23 Pro ja tok majaꞌn tipeti ja Jesucristo okrchapon ja ley triꞌ in okrchajin. Pro ja tok peti ja Jesucristo, tok bix chake chi ruqꞌuin arjaꞌ nyukeꞌ chi wiꞌ kacꞌuꞌx tokoriꞌ xokjach can pa rukꞌaꞌ rmal ja ley. 
\v 24 Queriꞌ cꞌa rbanic ja ley caniꞌ jun ajyukꞌ okrbanonto cuenta, xokrujach can pa rukꞌaꞌ ja Cristo chi nyukeꞌ chic kacꞌuꞌx ruqꞌuin in xa rmal ja yukulbal kacꞌuꞌx ruqꞌuin ja Cristo chewiꞌ tok Dios nokrutoꞌ, nokrwasajel libre in nuban chake caniꞌ mta kil kamac kabanon. 
\v 25 Pro camic penak chic ja Cristo, yukul chic kacꞌuꞌx ruqꞌuin, ma ja chi ta ja rajyukꞌ okbanyon cuenta. 
\p 
\v 26 Como xa jun ebanon chic ruqꞌuin ja Cristo Jesús tibij cꞌa tzij ariꞌ chi ix ralcꞌwal Dios ewanojel pro xa rmal ja yukulbal ecꞌuꞌx ruqꞌuin tok banon queriꞌ chewe. 
\v 27 Ja tok xixban bautizar jariꞌ xa jun xeban ruqꞌuin ja Cristo, tibij cꞌa tzij ariꞌ chi Cristo ewekben chic ewiꞌ. 
\v 28 Xa ix jun chic chi ix aj Israel chi ma ix aj Israel ta, chi ix esclavo chi ix libre, chi ix achiꞌiꞌ chi ix ixokiꞌ, xa ix jun chic ewanojelal como xa jun chic ebanon ruqꞌuin ja Cristo Jesús. 
\v 29 Ja cꞌa wi ix rxin chic ja Cristo jariꞌ ix rjaꞌtzul can ja rAbraham in cꞌol ekꞌaꞌ tre ja herencia ja tzujun can tre ja rAbraham ojer rmal ja Dios. 
\c 4
\p 
\v 1 Quewaꞌ rbanic riꞌ wachꞌalal. Jun alcꞌwalaxel tok cꞌa tinoꞌy na jariꞌ mta herencia nja̱ch tre chanim pro arja xa caniꞌ jun ti moso. Ma jun nak ta nja̱ch tre chanim masqui rxin nojelal pro cꞌa nerilaꞌ na jun tiempo ja nja̱ch wiꞌ tre. 
\v 2 Pro ecꞌoli ja repaꞌl trij ja ralcꞌwalaxel chi rchajixic in nqueban cuenta ja herencia. Ja herencia cꞌa tokoriꞌ nja̱ch tre ja ralcꞌwalaxel ja tok nerilaꞌ ja tiempo ja chomarsan rmal ja tatixel ja nba̱n wiꞌ ja jachonem. 
\v 3 In queriꞌ cꞌa chake ajoj chakajaꞌ nabey ok caniꞌ tak acꞌalaꞌ, xokqꞌuejeꞌ na pa rukꞌaꞌ juleꞌ costumbre ja xa xocꞌo rukꞌij. 
\v 4 Pro ja Dios tok tzꞌakati ja tiempo ja chomarsanto rmal tokocꞌariꞌ xutakto ja Cristo ja Ralcꞌwal. Xalaxi ja Ralcꞌwal Dios chwirukꞌaꞌ jun ixok in qꞌuejeꞌ na pa rukꞌaꞌ ja ley ja yaꞌon can tre ja Moisés ojer rmal ja Dios. 
\v 5 Queriꞌ xuban ja Dios utzcꞌa chi xokrwasajel libre ja xokqꞌuejeꞌ pa rukꞌaꞌ ja ley in rmalariꞌ tok nuban chic chake ok caniꞌ chakꞌlaj ralcꞌwal. 
\p 
\v 6 Como ix alcꞌwalaxelaꞌ chic chewiꞌ tok Dios rtakonto ja rEspíritu Santo rxin ja Ralcꞌwal pa tak ewanma: —Nataꞌ, Padre, neꞌ kaj ja rEspíritu Santo pa tak ewanma. 
\v 7 Rmalcꞌariꞌ tok ma ix caniꞌ chi ta moso, ix alcꞌwalaxelaꞌ chic chewiꞌ tok cꞌo chic ekꞌaꞌ tre ja herencia xin Dios pro rmal ja Cristo tok banon queriꞌ chewe. 
\s * * * * * * * * * * 
\p 
\v 8 Pro ja nabey tok majaꞌn tewotakij rwach ja Dios xixqꞌuejeꞌ na pa quekꞌaꞌ cachbal tak winak in rachbal tak nakun, xeꞌecoj como e dios pro ma katzij ta chi e dios. 
\v 9 Ja cꞌa camic chic ewotak chic rwach ja Dios, o ja más rubey, arjaꞌ xurotakij kaj ewach nabey pro ¿nak cꞌa nechꞌob ja tok nixmeloj chic jutij chewij como nixtajini nenimaj chic juleꞌ costumbre ja rocꞌowinak chic rtiempo pro jariꞌ majun totajem majun utzil rcꞌamonpi ta chewe? Pro cꞌo takaꞌan egana nixoc chic jutij pa rukꞌaꞌ. 
\v 10 Takaꞌan ruqꞌuin juleꞌ nmakꞌij yukul chi wiꞌ ecꞌuꞌx. 
\v 11 Anin nxbej wiꞌ emwal, matzij xa mta noc wiꞌ ja congana xintij nukꞌij chi etijoxic. 
\p 
\v 12 Wachꞌalal, tebanaꞌ jun utzil, tebanaꞌ ixix ja caniꞌ nbanon anin como anin inocnak in caniꞌ ewach aj tinamit ja ma ix aj Israel ta. Ja cꞌa tok xinqꞌuejeꞌ checojol ni majun itzel nak ta xeban ta chwe. 
\v 13 Ixix bien ewotak chi rmal jun yobil xinkajbej chewiꞌ tok xinqꞌuejeꞌ na checojol, xa rmalariꞌ yobil ja tok kas xinyaꞌ rbixic ja utzlaj tzij xin Jesucristo chewe nabey. 
\v 14 Jariꞌ yobil congana lawuloꞌ xuban chwe pro ixix ma itzel ta xinetzꞌat, ma xinesalujel ta. Ja xeban chwe, nojel ecꞌuꞌx nojel ewanma xinecꞌul, xeban chwe in caniꞌ jun ángel rxin Dios, xeban chwe in caniꞌ Jesucristo. 
\v 15 Congana xixquicot chwij triꞌ. Ja wixta xixcowini xecꞌotpi ta ja rewach triꞌ wotak chi ix conforme xeyaꞌpi ta chwe. ¿Pro ja camic bar cꞌa xoc wariꞌ ja quicotemal? 
\v 16 Pro ja xinbij chewe chipan awaꞌ jun carta riꞌ ni rubey wiꞌ, maxta techꞌob chwij chi in ecꞌulel chic, maquirtariꞌ. 
\p 
\v 17 Pro ja cꞌa winak ja neyojo ewxin ejeꞌeꞌ ni katzij wiꞌ chi congana nel quecꞌuꞌx chewij pro xa quewach nquecꞌam chewe. Ja ncajoꞌ chewe chi neyaꞌ can ja tijonem ja xinyaꞌ anin chewe in ejeꞌeꞌ chic nel ecꞌuꞌx chiquij. 
\v 18 Ni rubey wiꞌ ja tok wi cꞌo jun ja nel rucꞌuꞌx chewij pro xarwariꞌ wi utzil ja nrajoꞌ chewe pro tibanaꞌ cꞌa nojel tiempo in ma ruyon tariꞌ ja tok incꞌol anin ewqꞌuin. 
\v 19 Chakꞌlaj tak walcꞌwal, jutij chic inmajtajnak rmal ja rpokonal emwal ixix. Caniꞌ tre jun ixok tok majaꞌn talaxi ti ral arjaꞌ nmajtaj rmal ja rpokonal in queriꞌ cꞌa chwe anin chakajaꞌ congana ntiꞌon chwe chi raybexic nak kꞌij xtiqꞌuiyi chi utz ja Cristo pa tak ewanma. 
\v 20 Kas ta incꞌo pon chic ewqꞌuin camic riꞌ, kas ta pan ekal nchꞌob chewach nojelal nak rbanic. Pro ja camic maticanoy mwal nak la nbij chic chewe. 
\s * * * * * * * * * * 
\p 
\v 21 Camic cꞌoli nwajoꞌ ncꞌwaxaj chewe ixix ja cꞌol egana nixqꞌuejeꞌ pa rukꞌaꞌ ja ley ¿la ma ewotak ta cꞌa nak rbanic ja ley? 
\v 22 Anin nchꞌob na chewach nak rbanic. Caniꞌ tzꞌibtal can chipan ja rtzobal Dios ecꞌo caꞌiꞌ rcꞌajol ja rAbraham, jun qꞌuejeꞌ chwirukꞌaꞌ ja rajꞌicꞌ in jun chic qꞌuejeꞌ chwirukꞌaꞌ ja rxjayil. Ja rajꞌicꞌ jariꞌ xa esclava pa rukꞌaꞌ pro ja rxjayil arjaꞌ libre. 
\v 23 Ja ral ja rixok esclava arjaꞌ chaka xalaxi pro ma chaka ta xalaxi ja ral ja rixok libre como arjaꞌ tzujun can tre ja rAbraham rmal ja Dios. 
\v 24-26 Jariꞌ nkacꞌambej tzij tre caꞌiꞌ chominem. Jun chominem cꞌo jun jayuꞌ rbinaꞌan Sinaí ja bar chomarsax wiꞌ pro jariꞌ chominem nerwinakarsaj juleꞌ winak ja xa neꞌoc esclavo. Ja jun chic chominem triꞌ chomarsax wiꞌ chipan jun tinamit rbinaꞌan Jerusalén pro jun tinamit ja cꞌo chilaꞌ chicaj. Ja jayuꞌ rbinaꞌan Sinaí pa rcuenta Arabia cꞌo wiꞌ in triꞌ chomarsax wiꞌ ja ley, jariꞌ nkacꞌambej tzij tre ja rixok esclava rbinaꞌan Agar. Jariꞌ nkacꞌambej tzij tre chakajaꞌ ja tinamit Jerusalén pro jun tinamit ja cꞌo chwachꞌulew camic como ja winak ja raj Jerusalén camic xa e caniꞌ esclavo. Pro ja jun chic Jerusalén ja cꞌo chilaꞌ chicaj jariꞌ ma esclava ta, libre. Jariꞌ kateꞌ chi nimlaj kanojelal ja yukul kacꞌuꞌx ruqꞌuin ja Jesucristo. 
\v 27 Caniꞌ tzꞌibtal can chipan ja rtzobal Dios quewariꞌ: —Atat ja majun tawal, catquicoti. Catquicoti masqui ni mta wiꞌ alanem chawij. Como ja rixok ja yaꞌon can rmal ja rchajil nerilaꞌ na jun kꞌij tok más chi na ja ral xqueqꞌuejeꞌ chwirukꞌaꞌ chwach ja rixok ja cꞌo rchajil ruqꞌuin, queriꞌ nbij. 
\p 
\v 28 Wachꞌalal, ajoj ok ralcꞌwal chic ja Dios rmal ja rtzujun can ojer, xa ok junan ruqꞌuin chic ja rIsaac como arjaꞌ ma chaka ta xalaxi pro tzujun can tre ja rAbraham rmal ja Dios. 
\v 29 Pro ja ralcꞌwalaxel ja chaka xalaxi arjaꞌ itzel xuban tre ja ralcꞌwalaxel ja tzujun can ja xalax rmal ja rEspíritu Santo. In queriꞌ nba̱n ajoj chake camic chakajaꞌ. 
\v 30 Pro bien tecꞌwaxaj ja nbij ja rtzobal Dios quewariꞌ: —Tasalujel ja rixok esclava e caꞌiꞌ in ral. Como ja ral ja rixok libre cꞌo jun herencia nyataj na tre pro ja ral ja rixok esclava arjaꞌ mta herencia xtiyataj ta tre. Queriꞌ nbij. 
\v 31 Queriꞌ rbanic wachꞌalal, ajoj ma ok ral ta ja rixok esclava, ok ral ja rixok libre. 
\c 5 
\s * * * * * * * * * * 
\p 
\v 1 Rmalcꞌariꞌ nbij chewe, como ja Cristo arjaꞌ yoyon chake chi xokel libre pa rukꞌaꞌ ja ley cow cꞌa quixpeꞌe jutzꞌit, maxta quixmeloj chic jutij chewij, maxta cꞌoli nak ta xquixruchap chic jutij xquixrucoj chi ta jutij esclavo. 
\p 
\v 2 Teyaꞌaꞌ ewxquin tre ja xtinbij chewe riꞌ, ja wi xquixban circuncidar in wi nyukeꞌ chic ecꞌuꞌx ruqꞌuin ja circuncisión jariꞌ majun nak ta rcꞌamonpi ta ja Cristo chewe. 
\v 3 Camic nbij chic jutij chewe, jun achi xa nak ta chi achiꞌal wi xtiban circuncidar in wi nyukeꞌ chic rucꞌuꞌx ruqꞌuin ja circuncisión jariꞌ puersa nuban na cumplir nojel ja tzꞌibtal can chipan ja ley. 
\v 4 Ja wi nyukeꞌ chic ecꞌuꞌx ruqꞌuin ja ley in wi rmalariꞌ tok nechꞌob chi nixrutoꞌ ja Dios in nixrwasajel libre chipan ja rewil emac jariꞌ xeyaꞌ can ariꞌ ja Cristo, xeyaꞌ can ariꞌ ja rutzil ja xecochij tre ja Dios. 
\v 5 Queriꞌ nbij chewe como ajoj ma ja chi ta ja ley okucꞌayon pro jaꞌ Espíritu Santo cꞌayon chic kaxin chi raybexic ja kꞌij ja tok Dios xkorutoꞌ chijutij tokoriꞌ tok ni majun chic kil kamac in rmal ja yukulbal kacꞌuꞌx ruqꞌuin ja Jesucristo tok nba̱n queriꞌ chake, jariꞌ kas nokquicoti chi raybexic. 
\v 6 Ja tok xa jun naban ruqꞌuin ja Cristo Jesús jariꞌ macatrutoꞌ ja natban circuncidar in macatrutoꞌ chakajaꞌ ja macatban circuncidar. Pro ja ntoꞌo awxin jariꞌ tok nyukeꞌ acꞌuꞌx ruqꞌuin ja Jesucristo, tok nsamaji ja yukulbal acꞌuꞌx chi rwinakarsaxic ja rajoben riꞌil xin Dios pan acꞌaslemal. 
\p 
\v 7 Ixix kas waꞌan jic ixbenak nabey pro ¿nak cꞌa xixyojowi chi matenimaj chic ja utzlaj tijonem xin Jesucristo? 
\v 8 Ja cꞌa ritzel tijonem ja xixtakchibexi jariꞌ ma ruqꞌuin ta ja Dios penak wiꞌ como ja Dios arjaꞌ rmajon esiqꞌuixic chi nenimaj ja utzlaj tijonem xin Jesucristo. 
\v 9 Tebanaꞌ cuenta ewiꞌ como ja ritzel tijonem jariꞌ xa nbe pa nim ja caniꞌ nuban jutzꞌit levadura npaxij riꞌ nbe chipan ja kꞌor nojelal. 
\v 10 Anin cꞌo nseguro chi ja kajaw Dios arjaꞌ nuyaꞌ chi na chewe chi nenimaj ja nmajon rchꞌobic chewach. Pro ja winak ja nyojo ewxin xa nak ta chi winakil puersa nkꞌe̱t na tzij trij, xa kꞌetoj tzij chic cajal chwach. 
\p 
\v 11 Wachꞌalal, ecꞌoli ja nebin chwe chi anin cꞌa nmajon na rbixic chique winak chi rjawaxic chi neba̱n circuncidar. Ja wi queriꞌ nbij chique winak ¿nak cꞌa tre tok cꞌa cꞌo na pokon nba̱n chwe cumal ja wach tak aj Israel? Ja wixta nbij chique winak chi neba̱n circuncidar maquita cꞌa npi quiyewal ariꞌ ja wach tak aj Israel ja tok nnataj chique ja rcamic ja Jesucristo chwach cruz. 
\v 12 Pro ja kas ngana anin camic xtiquilasajel ta quiꞌ checojol ja winak ja netakchiꞌin ewxin. 
\p 
\v 13 Queriꞌ nbij chewe wachꞌalal como ja Dios xixrsiqꞌuij chi nixqꞌuejeꞌ libre. Pro ma ruqꞌuin ta ja rix libre ja chaka ta nojel ta xteban ja cꞌol egana neban. Pro ja cꞌa neban, tetoꞌoꞌ ewiꞌ chibil tak ewiꞌ pro ruqꞌuin ta ja rajoben riꞌil xin Dios. 
\v 14 —Caniꞌ chawe atat nawajoꞌ kaj awiꞌ ayon queriꞌ cꞌa tabanaꞌ chique ja juleꞌ chic winak queꞌawajoꞌ chakajaꞌ, queriꞌ nbij ja rtzobal Dios. Ja wi xenimaj awaꞌ jun mandamiento ja cꞌa xinbij kaj chewe riꞌ xa ruqꞌuin ariꞌ xeban cumplir nojel ja nbij ja ley chewe chi neban. 
\v 15 Pro wi xa sícꞌ chꞌaꞌoj ja neban jariꞌ maxcoꞌ matetij ewiꞌ. Ma teban ta queriꞌ, tebanaꞌ cuenta, maxta teyoj kaj ewiꞌ eyon. 
\s * * * * * * * * * * 
\p 
\v 16 Quewaꞌ nwajoꞌ chewe riꞌ wachꞌalal, teyaꞌaꞌ lugar tre ja rEspíritu Santo chi arjaꞌ nucꞌan ewxin chipan ja recꞌaslemal. Ja wi queriꞌ neban jariꞌ maticowin chewij ja ritzel tak yarinem ja cꞌo chipan ja tzabuklaj cꞌaslemal ja kucꞌan ja rok winak, maticowini xquixruban ta mandar. 
\v 17 Ja tzabuklaj cꞌaslemal ja kucꞌan ja rok winak jariꞌ xa rcꞌulel ja rEspíritu Santo. Ja tok cꞌol agana naban ja rutzil ja cꞌa tzabuklaj cꞌaslemal awcꞌan nrajoꞌ natruyoj chi mataban ja rutzil. Ja tok cꞌol agana naban ja ritzelal ja cꞌa rEspíritu Santo nukꞌil ja tzabuklaj cꞌaslemal awcꞌan chi mataban ja ritzelal. Rmalcꞌariꞌ tok nbij chewe, ja neban jeꞌe chipan ja recꞌaslemal ma chaka ta egana tok neban. 
\v 18 Pro ja wi neyaꞌ lugar tre ja rEspíritu Santo chi arjaꞌ nucꞌan ewxin tibij cꞌa tzij ariꞌ chi ix libre pa rukꞌaꞌ ja ley. 
\p 
\v 19 Bien kꞌalaj nak rbanic ja tzabuklaj cꞌaslemal ja cucꞌan ja winak, quewaꞌ rbanic riꞌ. Achiꞌiꞌ neꞌoc cuqꞌuin ixokiꞌ ja ma e quixjayilal ta in cꞌa cꞌo na más nqueban ja rachiꞌiꞌ in ixokiꞌ ja xa ntzꞌilorsaj ja canma. 
\v 20 In jun chic, nexuqueꞌe ja winak chiquewach cachbal tak winak in chwach rachbal tak nakun in nequinimaj ja rajꞌitzaꞌ. In juleꞌ chic rwach ja ritzelal nqueban caniꞌ tre cꞌullaꞌan tak riꞌil, chꞌaꞌoj, aquiakarem, ayewal. In cꞌoli nqueban xa por interés. Cꞌoli nquejach quiꞌ como junwiꞌ nquechꞌob juleꞌ in junwiꞌ chi na nquechꞌob juleꞌ chic. 
\v 21 E camsanelaꞌ. In cꞌoli nqueban nimak tak waꞌim, nechꞌujar rmal tijoj yaꞌ, nquerak quechiꞌ, nqueban sícꞌ chꞌaꞌoj. In cꞌa cꞌo na más nqueban ja winak ja nij itzel wiꞌ. Anin nbij chic jutij chewe como nbin chic chewe, ja winak ja nebanowi ja ritzelal ja caniꞌ cꞌa xintzꞌibaj riꞌ ejeꞌeꞌ matiyataj chique chi xqueꞌoc ta chipan ja gobierno xin Dios. 
\p 
\v 22 Pro ja rEspíritu Santo quewaꞌ nwachij pa tak kacꞌaslemal riꞌ, nkajoꞌ kiꞌ, cꞌoli ja quicotemal xin Dios pa tak kanma, mta chꞌaꞌoj nkaban, cꞌo kapaciencia, cꞌo jun quiꞌlaj anma kucꞌan, nkatoꞌ kiꞌ chibil tak kiꞌ, nkaban cumplir ja nkatzujuj, 
\v 23 nkayaꞌ nojel pa rukꞌaꞌ ja Dios in nkakꞌil kiꞌ chakij chi rbanic ja ritzelal. Majun ley xtuchꞌaꞌ ta chake ja wi queriꞌ nkaban. 
\v 24 In kanojel ja rok xin Jesucristo kayaꞌon can ja tzabuklaj cꞌaslemal ja kucꞌan nabey rachbil nojelal ja ritzelal ja kayarij jariꞌ caniꞌ karipon chic chwach cruz. 
\v 25 Ja rEspíritu Santo como arjaꞌ ryaꞌon jun cꞌacꞌa cꞌaslemal chake kayaꞌaꞌ cꞌa lugar tre chakajaꞌ chi arjaꞌ nucꞌan kaxin chipan ja kacꞌaslemal. 
\v 26 Maxta congana ok nimak tikanaꞌ kaj como tok queriꞌ nkaban jariꞌ xa nkaminbej kiꞌ pa sícꞌ pa chꞌaꞌoj rmal. Maxta tiquiakir kanma chibil tak kiꞌ. 
\c 6
\s * * * * * * * * * * 
\p 
\v 1 Wachꞌalal, wi cꞌo jun chewe chaka jalal tok kaj pa ril quirtawaꞌ neban tre riꞌ, ixix ja rixucꞌan rmal ja rEspíritu Santo jix ruqꞌuin, jeyukbaꞌ rucꞌuꞌx utzcꞌa chi nyictaji. Techꞌoboꞌ chwach pan ekal, kas turkaj chewe chi matzij chaka jalal tok xquixkaj chic ixix chakajaꞌ. 
\v 2 Cꞌoli ja nkakajbej jeꞌe chipan ja kacꞌaslemal caniꞌ ralal jun nimlaj ijkaꞌm nkaj chakij nkanaꞌ kaj pro tetoꞌoꞌ ewiꞌ chibil tak ewiꞌ chi rchꞌijic ja rijkaꞌm. Ja wi queriꞌ neban jariꞌ nebanbej cumplir ja ley xin Cristo. 
\p 
\v 3 Pro wi cꞌo jun nuchꞌob kaj chi mta ril in wi kas nim nunaꞌ kaj pro como xcꞌa winak jariꞌ xa nuban kaj engañar riꞌ ruyon. 
\v 4 Ja rjawaxic chi nkaban, kanaꞌaꞌ kaj janiꞌ elnak ja kacꞌaslemal chikajujunal. Ja wi kas katzij chi utz elnak ja racꞌaslemal xcꞌa rmalariꞌ catquicoti, ma rjawaxic ta chawe chi najunsaj awiꞌ cuqꞌuin juleꞌ chic la más na utz ja racꞌaslemal chiquewach ejeꞌeꞌ. 
\v 5 Queriꞌ nbij chewe como kanojel nkajach na cuenta chwach ja Dios chikajujunal. 
\p 
\v 6 Canojel ja winak ja netijox tre ja rtzobal Dios xa nak ta cꞌo cuqꞌuin tiquiyaꞌaꞌ quixin ja netijon quixin. 
\p 
\v 7 Maxta teban kaj engañar ewiꞌ eyon, xa nak ta netic chipan ja recꞌaslemal nijawariꞌ neban cosechar. Ja Dios maquixcowini xteban ta engañar. 
\v 8 Queriꞌ nbij chewe como ja wi nayaꞌ rgana ja tzabuklaj cꞌaslemal awcꞌan itzel cꞌaslemal nawachij ariꞌ, jariꞌ xa cꞌayiric xa chuwiric cajal chawach. Pro wi nayaꞌ rgana ja rEspíritu Santo utzlaj cꞌaslemal nawachij ariꞌ pro jun cꞌaslemal ja mta qꞌuisic trij. 
\v 9 Wachꞌalal, ma kocos ta chi rbanic ja rutzil. Queriꞌ nbij chewe como ja wi ma xticapuj ta kacꞌuꞌx chi rbanic ja rutzil jariꞌ cꞌo jun rtojbalil nkawachij na ja tok xterilaꞌ ja tiempo. 
\v 10 Como cꞌo tiempo chake chi nkaban ja rutzil chique ja winak rmalcꞌariꞌ nbij chewe, kabanaꞌ ja rutzil chique canojelal in más na kabanaꞌ utzil chique ja yukul quecꞌuꞌx ruqꞌuin ja Jesucristo como ejeꞌeꞌ e familia xin Dios. 
\s * * * * * * * * * * 
\p 
\v 11 Tetzꞌataꞌ ja nimak tak letra ja nmajon rtzꞌibaxic chipan awaꞌ carta riꞌ, jawaꞌ retal chi anin xintzꞌibani. 
\v 12 Ja winak ja cꞌo quigana nquikꞌalasaj quiꞌ chi congana nqueban cumplir ja costumbre rxin ja ley ejeꞌeꞌ riꞌ ja nebin chewe chi puersa nixban circuncidar. Ejeꞌeꞌ xa nquixbej quiꞌ xtiquetij ta rpokonal rmal ja Cristo xtiquibij ta chi solo rcamic ja Cristo chwach cruz nattoꞌowi chipan ja rawil amac. 
\v 13 Queriꞌ nbij chewe como ejeꞌeꞌ masqui ebanon circuncidar pro nixtacꞌa ejeꞌeꞌ ta nqueban ta cumplir ja ley. Xar ja ncajoꞌ chewe chi nixban circuncidar utzcꞌa chi ejeꞌeꞌ nqueyaꞌ kaj quekꞌij queyon ja tok nixquechꞌec in necoj chic ewiꞌ cuqꞌuin. 
\v 14 Pro anin nat cꞌo wariꞌ chwe ja xtinban ta queriꞌ. Pro ja rcamic ja kajaw Jesucristo chwach cruz solo jariꞌ ja nyaꞌ rukꞌij anin. Ja chwe anin caniꞌ ripon chic chwach cruz ja ritzelal xin rwachꞌulew in queriꞌ chwe anin chakajaꞌ in caniꞌ inripon chic chwach cruz, caniꞌ incamnak chic chwach ja ritzelal, mchita ngana ruqꞌuin. 
\v 15 Ja tok xa jun naban ruqꞌuin ja Cristo Jesús jariꞌ macatrutoꞌ ja natban circuncidar in macatrutoꞌ chakajaꞌ ja macatban circuncidar. Pro ja ntoꞌo awxin jariꞌ jun cꞌacꞌa cꞌaslemal ja nacochij tre ja Dios. 
\v 16 Jariꞌ ja kas mero rubey in canojel ja winak ja cucꞌan awaꞌ jun bey riꞌ xtiyataj ta chique ja nimlaj quicotemal xin Dios in Dios ta xtipokonan quewach chakajaꞌ. Ejeꞌeꞌ riꞌ winak e tinamit xin Dios ja katzij chi e rtinamit Dios. 
\p 
\v 17 Camic maxta cꞌo chic jun ja xquinruban ta molestar como ja ncuerpo congana yuc rcꞌan jariꞌ ncꞌutbej chi in ajsamajel rxin ja kajaw Jesús. 
\p 
\v 18 Wachꞌalal, kas ta xtiqꞌuejeꞌe ja rutzil rxin ja kajaw Jesucristo pa tak ewanma. Amén.