\id EPH Western Tzutujil [tzt] NT (Guatemala) -2009 bd. 
\h EFESIOS 
\toc1 Efesios 
\toc2 Ef
\mt EFESIOS
\c 1
\s 
\p
\v 1 Anin ja rin Pablo camic ntzꞌibajel jawaꞌ carta riꞌ chewe ixix wachꞌalal ja rixcꞌo pa Efeso. Anin incojon rmal ja Dios chi inocnak apóstol rxin ja Jesucristo. Ixix ix tinamit xin Dios, cꞌoli ja yukulbal ecꞌuꞌx ruqꞌuin ja Cristo Jesús, xa jun ebanon ruqꞌuin.
\v 2 Ja rutzil ja nsipaj ja Dios chake rachbil ja quicotemal xin Dios ja tariꞌ xtecochij más tre ja katataꞌ Dios in tre ja kajaw Jesucristo.
\s * * * * * * * * * *
\p
\v 3 Kas ta xtiyaꞌ rukꞌij ja Dios ja Tatixel rxin ja kajaw Jesucristo. Arjaꞌ jun Dios janila xuyaꞌ rutzil chake ja tok xa jun kaban ruqꞌuin ja Cristo. Xuyaꞌ chake nojel rwach ja rutzil ja rcꞌamonto ja rEspíritu Santo, xuyaꞌ chake chipan jun cꞌacꞌa cꞌaslemal ja xin chilaꞌ chicaj.
\v 4 Ja tok majaꞌn titzꞌucarsaj ja rwachꞌulew tokoriꞌ xokruchaꞌto como bien rotakpi chic chi nkaban na jun ruqꞌuin ja Jesucristo. Xokruchaꞌto utzcꞌa chi noc na chake ja mero cꞌaslemal xin Dios utzcꞌa chi ni majun nak ta nokchapbexi ja tok nokqꞌuejeꞌ chwach.
\v 5 Arjaꞌ ni nokrajoꞌ wiꞌ, ni rchominto wiꞌ chi nokoc na ok ralcꞌwal, ni rchominto wiꞌ chi rumac ja Jesucristo chewiꞌ tok nokoc ok ralcꞌwal. Como nijawariꞌ rvoluntad chewiꞌ tok xuban queriꞌ chake.
\v 6 Queriꞌ xuban chake utzcꞌa chi nkatzꞌat chi janila nim rukꞌij ja rutzil ja nsipaj chake utzcꞌa chi nkayaꞌ rukꞌij rmal. Rmal cꞌa ja rutzil ja nsipaj chake tok xokrucꞌul. Como xa jun kaban ruqꞌuin ja Jesucristo ja chakꞌlaj Ralcꞌwal chewiꞌ tok xokrucꞌul.
\v 7 Ja tok xa jun kabanon ruqꞌuin ja Jesucristo jariꞌ okwasanel chic libre pa rukꞌaꞌ ja il mac como arjaꞌ xutoj ja kil kamac tre ja rquiqꞌuel. Ja tok xa jun kabanon ruqꞌuin jariꞌ cuytajnak chic ja kil kamac. Ja Dios tok xuban queriꞌ chake jariꞌ caniꞌ jun nimlaj mebaꞌil xsipaj chake.
\v 8 Janila jun nimlaj utzil rsipan chake in rmalariꞌ tok nokcowini nkachꞌob nojel ja nimak tak naꞌoj xin Dios in nokcowini nkachꞌob nak rjawaxic chi nkaban.
\v 9 Arjaꞌ rkꞌalasan chic chikawach ja rchominto ojer ja xa wawan chikawach nabey. Como nijawariꞌ ja rvoluntad chewiꞌ tok xuban queriꞌ.
\v 10 Ni rchominto wiꞌ ja tiempo jeꞌe in tok xtitzꞌakati ja tiempo arjaꞌ nchomarsaj na nojelal ja yojtajnak jeꞌe in xa ruyon chic ja Cristo npeꞌe chic trij nojelal tanto tre ja cꞌo jeꞌe chilaꞌ chicaj in tre chakajaꞌ ja cꞌo jeꞌe chwachꞌulew.
\p
\v 11 In chakajaꞌ como xa jun kabanon ruqꞌuin ja Jesucristo chewiꞌ tok cꞌo jun herencia xin Dios ja yatajnak chake. Ja Dios ni rchominto wiꞌ ojer chi nuyaꞌ chake ja herencia, nijawariꞌ rchꞌobonto chakij. Xa nak ta ja nbantaj jeꞌe mta ariꞌ ja maquita nsamaji ja Dios chipan chi rbanic cumplir ja rvoluntad arjaꞌ.
\v 12 Quewaꞌ nrajoꞌ ja Dios riꞌ, chi ajoj ja kayben ja Cristo nabey nokoc ok yaꞌbal rukꞌij ja Dios.
\v 13 In yukeꞌ ecꞌuꞌx ixix ruqꞌuin ja Cristo chakajaꞌ tokoriꞌ tok xecꞌwaxaj ja tzij ja ni katzij wiꞌ chi tzij xin Dios, jariꞌ ja utzlaj tzij ja rcꞌamonto ja totajem xin Dios chewe. Queriꞌ xeban, yukeꞌ ecꞌuꞌx ruqꞌuin ja Cristo in xa jun xeban ruqꞌuin in rmalariꞌ tok cꞌo jun retal yataj chewe, jun retal ja ncꞌutu ewxin chi ix xin Dios. Ja cꞌa retal ja yataj chewe jariꞌ tok kajto ja rEspíritu Santo pa tak ewanma ja ni tzujunto wiꞌ ojer rmal ja Dios.
\v 14 Como cꞌo chic ja rEspíritu Santo pa tak kanma rmalcꞌariꞌ tok cꞌo kaseguro chi ja Dios nuyaꞌ na chake nojelal ja herencia ja rtzujun chake tokoriꞌ tok xkoꞌel libre chijutij ja rok tinamit xin Dios ja roklokꞌon rmal. Queriꞌ cꞌa rchominto ja Dios utzcꞌa chi nkayaꞌ rukꞌij rmal.
\s * * * * * * * * * *
\p
\v 15-16 Rmal cꞌa ja cꞌa xinbij kaj chewe riꞌ xajutij nmajon rmaltioxixic tre ja Dios emwal como xurkaj rbixic wqꞌuin chi ixix bien yukul ecꞌuꞌx ruqꞌuin ja kajaw Jesús in congana neꞌewajoꞌ canojel ja kachꞌalal ja re xin Dios. Ni nixnnataj wiꞌ pan oración.
\v 17 Nintzijon ruqꞌuin ja Dios rxin ja kajaw Jesucristo, jariꞌ Dios ja Tatixel ja ni rxin wiꞌ chi congana nim rukꞌij. Anin ncꞌutuj tre chi arjaꞌ nuyaꞌ chewe chi ja rEspíritu Santo nucoj ja naꞌoj xin Dios pa tak ewiꞌ pa tak ewanma in ncꞌutuj tre chakajaꞌ chi bien nkꞌalasaj chewach nak ja kas mero rbanic ja Dios.
\v 18 Ja nwajoꞌ anin chewe kas ta xtijaktaji chi utz ja rewiꞌ ewanma utzcꞌa chi nixcowini nechꞌob nak rbanic nojel ja rewayben ja rtzujun chewe ja Dios in ixrsiqꞌuin chi neꞌewilaꞌ na. Kas ta xtichꞌobtaj emwal nak rbanic ja herencia xin Dios ja nyataj chake ja rok tinamit xin Dios, pro jun herencia janila nim rukꞌij, caniꞌ jun nimlaj mebaꞌil ja nyataj chake.
\v 19 Kas ta xtichꞌobtaj emwal chakajaꞌ nak rbanic ja poder xin Dios ja nsamaji pa tak kacꞌaslemal ja yukul kacꞌuꞌx ruqꞌuin ja Jesucristo, pro jun poder ja más kꞌaxnak chi na como jariꞌ poder ja samaji
\v 20 ja tok Dios xuyic ja Cristo chiquicojol camnakiꞌ in tok xjotbaꞌ chilaꞌ chicaj in triꞌ xtzꞌubaꞌ wiꞌ pa riquikꞌaꞌ.
\v 21 Queriꞌ xuban ja Dios tre ja Cristo, xuyaꞌ tre chi noc pa rukꞌaꞌ ja kꞌetbaltzij pro ni majun kꞌetbaltzij ja maquita xoc pa rukꞌaꞌ, in xuyaꞌ tre chi más na nim rukꞌij arjaꞌ chiquewach canojelal ja kꞌetol tak tzij in ma queyon ta ja kꞌetol tak tzij ja re rxin awaꞌ tiempo riꞌ in queriꞌ chique ja re rxin chic jun tiempo ja majaꞌn tekawilaꞌ chakajaꞌ.
\v 22 Ja Dios mta nak ta ja maquita rcojon xeꞌ rukꞌaꞌ rkan ja Cristo. Jawaꞌ Cristo riꞌ arjaꞌ chaꞌon rmal ja Dios chi nokruban cuenta ja rok iglesia pro jun Cristo ja paꞌl trij nojelal.
\v 23 Ajoj ja rok iglesia ok cuerpo rxin ja Cristo in ja rcꞌaslemal ja Cristo nnoji pa tak kacꞌaslemal ajoj como ok cuerpo rxin in ni majun bar ta triꞌ ja maquita cꞌo wiꞌ arjaꞌ.
\c 2 
\s * * * * * * * * * * 
\p 
\v 1 Ja cꞌa rixix nabey ixcamnak chipan ja rewil emac pro arjaꞌ xuyaꞌ jun cꞌacꞌa cꞌaslemal chewe. 
\v 2 Ja il mac ni chipan wiꞌ ixcꞌo wiꞌ nabey, xeban ja ritzelal ja caniꞌ nqueban ja winak ja xa ruqꞌuin rwachꞌulew yukul wiꞌ quecꞌuꞌx. Xa rvoluntad ja diablo xeban, jariꞌ diablo ja jefe quixin ja ritzel tak espíritu ja neqꞌuejeꞌ chicaj chipan ja aire. Jariꞌ itzel tak espíritu ja nesamaj pa tak canma ja winak ja maquenimani camic. 
\v 3 In queriꞌ kabanto ajoj nabey chakajaꞌ, xa kavoluntad ajoj kaban kaj kayon, xa nak ta xuyaꞌ gana chake chi nkaban jariꞌ kaban. Kayaꞌ rgana ja ncꞌutuj ja kacuerpo, kanimaj ja ritzel tak naꞌoj kucꞌan in ni kaxin wiꞌ chi ok yicol ryewal ja Dios, nij ok junan cuqꞌuin ja juleꞌ chic winak triꞌ. 
\v 4 Pro ja Dios arjaꞌ congana npokonaj kawach ja rok winak, janila nokrajoꞌ in quewaꞌ xuban chake riꞌ. 
\v 5 Masqui okcamnak chipan ja kil kamac nabey pro ja tok xuyic ja Cristo chipan ja camíc tokoriꞌ xuyaꞌ ajoj chake chi nkachbilaj ja Cristo chipan jun cꞌacꞌa cꞌaslemal. Pro jawaꞌ wariꞌ puro cochinem xin Dios como xa rmal ja rutzil ja xecochij tre chewiꞌ tok ewilon ja totajem xin Dios camic. 
\v 6 Ja Dios xuyaꞌ chake chi nkachbilaj ja Cristo, xuyaꞌ chake chi xokcꞌastaj ruqꞌuin, xokrtzꞌubaꞌ ruqꞌuin chilaꞌ chicaj, xa jun kabanon ruqꞌuin. 
\v 7 Queriꞌ cꞌa xuban chake utzcꞌa ja winak ja majaꞌn queqꞌuejeꞌ chipan awaꞌ tiempo ja rokcꞌo wiꞌ riꞌ ejeꞌeꞌ tok xqueqꞌuejeꞌ na chwachꞌulew jariꞌ bien nchꞌobtaj cumal ja rutzil ja xuban chake, bien nchꞌobtaj cumal chi ja Dios congana jun nimlaj utzil nsipaj chawe ja tok xa jun naban ruqꞌuin ja Cristo Jesús. 
\v 8 Queriꞌ nbij chewe como xa rmal ja rutzil ja nsipaj ja Dios chake ja tok ewilon chic ja totajem xin Dios in ja yukulbal ecꞌuꞌx ruqꞌuin ja Jesucristo jariꞌ ecꞌamben jawaꞌ totajem riꞌ. Pro jawaꞌ ni majun nak ta xeban ja xechꞌecbej ta, puro cochinem xin Dios. 
\v 9 Ni majun winak cꞌo ta nak ta xtuban ja xtichꞌecbej ta ja totajem xin Dios. Queriꞌ rbanic utzcꞌa tok xtuwil ja totajem mta moda xtuyaꞌ kaj ta rukꞌij ruyon rmal. 
\v 10 Queriꞌ nbij chewe como ja utzlaj cꞌaslemal ja kucꞌan camic Dios winakarsyon, ma ajoj ta como arjaꞌ xuyaꞌ jun cꞌacꞌa cꞌaslemal chake, tokoriꞌ xuyaꞌ chake ja tok xa jun kaban ruqꞌuin ja Cristo Jesús. Xuyaꞌ jun cꞌacꞌa cꞌaslemal chake utzcꞌa chi nkaban chic ja rutzil pro juleꞌ utzil ja ni rchominto wiꞌ ojer chi nkaban. 
\s * * * * * * * * * * 
\p 
\v 11 Rmalcꞌariꞌ nbij chewe, kas turkaj chewe chi ja nabey ma ix tinamit ta xin Dios. Ixix ma ix aj Israel ta, ma ixbanon ta circuncidar, xa xixban despreciar cumal ja raj Israel: —Ja rixix xa ma ixbanon ta circuncidar, xecheꞌ chewe. Pro ja circuncisión ja cꞌo chique ja raj Israel jariꞌ jun circuncisión ja xa winak ebanyon. 
\v 12 Kas turkaj chewe nak ja rebanon nabey. Jun, ma ewotak ta triꞌ chi cꞌo jun Cristo. In jun chic, ma ix cachbil ta ja tinamit xin Dios, mta ekꞌaꞌ tre ja xchomarsaj jeꞌe ja Dios ruqꞌuin ja rtinamit ja bar xtzujuj wiꞌ chique chi nerilaꞌ na jun kꞌij ja tok nequilaꞌ ja totajem xin Dios. Ni majun totajem ewayben ta triꞌ, ixcꞌo chipan ja rwachꞌulew in cꞌuluto ma ewotak ta rwach ja Dios triꞌ. 
\v 13 Pro ja cꞌa camic xa jun chic ebanon ruqꞌuin ja Cristo Jesús in masqui ja nabey cꞌa cꞌa nat ixcꞌo wiꞌ tre ja Dios pro ja camic xa nakaj chic ixcꞌo wiꞌ tre pro xa rmal ja rquiqꞌuel ja Cristo tok yatajnak queriꞌ chewe. 
\v 14 Queriꞌ rbanic como ja Jesucristo rmal arjaꞌ tok quiꞌil chic nokqꞌuejeꞌe ja rok aj Israel ewqꞌuin ja ma ix aj Israel ta, xa jun tinamit xuban chake. Cꞌo jun cꞌullaꞌan riꞌil chikacojol nabey caniꞌ jun nimlaj tabia kacoj chikacojol jariꞌ xuban caꞌiꞌ chake pro ja Jesucristo arjaꞌ xokrchomarsaj ewqꞌuin. 
\v 15 Arjaꞌ cam chwach cruz in rmal ja rcamic tok xocꞌo rukꞌij ja ley xin Dios ja tzꞌibtal can rmal ja Moisés ja rcꞌan juleꞌ mandamiento in juleꞌ costumbre, jariꞌ xokrchomarsbej ewqꞌuin. Queriꞌ xuban chake utzcꞌa chi jun cꞌacꞌa tinamit xuban chake, ma ok caꞌiꞌ tinamit chi ta pro xa jun kabanon ruqꞌuin utzcꞌa chi kas quiꞌil chic nokqꞌuejeꞌ ewqꞌuin. 
\v 16 Queriꞌ xuban chake utzcꞌa chi caniꞌ xa jun cuerpo nkaban ja rok caꞌiꞌ tinamit in nokchomtaj ruqꞌuin ja Dios chi ok caꞌiꞌ pro xa rmal ja rcamic chwach cruz chewiꞌ tok nokchomtaji como ja rcamic jariꞌ xlasbej ja cꞌullaꞌan riꞌil ja cꞌo chikacojol nabey. 
\p 
\v 17 Cꞌacꞌariꞌ peti, xuryaꞌaꞌ rbixic ja utzlaj tzij ja nyoꞌ chake chi quiꞌil nokqꞌuejeꞌe, xuyaꞌ rbixic chewe ixix ja cꞌa cꞌa nat ixcꞌo wiꞌ tre ja Dios in xuyaꞌ rbixic chique chakajaꞌ ja recꞌo chirnakaj. 
\v 18 Queriꞌ rbanic como xa rmal ja Jesucristo tok nokrucꞌul ja katataꞌ Dios chi ok caꞌiꞌ tinamit in xa jun mismo Espíritu Santo ucꞌayon kaxin chi nokekaj chwach. 
\v 19 Queriꞌ cꞌa rbanic, ma queriꞌ chi ta ebanon ja caniꞌ ebanon nabey como ja nabey ma ix tinamit ta xin Dios in nixtacꞌa cꞌo ta ekꞌaꞌ tre chakajaꞌ. Pro ja rebanon chic camic, ewach aj tinamit chic ewiꞌ cuqꞌuin ja re xin Dios, ixcꞌo chic chipan ja familia xin Dios. 
\v 20 Ixtiquil parwiꞌ ja rsimientoꞌil jun templo. Ja rsimientoꞌil jawaꞌ templo riꞌ jariꞌ cojon cumal ja rapóstol in cumal ja profeta in cꞌo jun abaj cojon tre ja más chi na nim rukꞌij, jariꞌ abaj ja Cristo Jesús. 
\v 21 Xa rmal ja Cristo tok bien rchapon riꞌ ja templo chi jun, xa rmal ja Cristo tok rmajon qꞌuiyem ja templo in noc na jun templo xin Dios pro jun templo ja xa jun nuban ruqꞌuin ja kajaw Jesucristo. 
\v 22 In ixix chakajaꞌ como xa jun ebanon ruqꞌuin ja Jesucristo jariꞌ majtajnak ecojic chi rbanic ja templo pro jun templo espiritual chi noc rochoch ja Dios. 
\c 3 
\s * * * * * * * * * * 
\p 
\v 1 Rmalcꞌariꞌ tok anin nmajon rbanic orar pan ecuenta. Anin ja rin Pablo incojon preso camic rumac ja samaj xin Cristo Jesús ja xinban pan ecuenta ja ma ix aj Israel ta. 
\v 2 Turkaj chewe chi ecꞌwaxan chic chi anin yaꞌon chi nukul chi nenyaꞌaꞌ rbixic chewe nak rbanic ja rutzil xin Dios ja nsipaj ja Dios chake. 
\v 3 Ecꞌwaxan chi cꞌoli ja kꞌalasax chinwach rmal ja Dios ja ma kꞌalasan ta nabey, jariꞌ ntzꞌiban chic jalal tre. 
\v 4 Ja cꞌa tok nesiqꞌuij ja ntzꞌiban chic, triꞌ netzꞌat wiꞌ chi anin bien kꞌalaj chic chinwach ja ma kꞌalasan ta nabey tre ja Cristo. 
\v 5 Pro jariꞌ ma xkꞌalasax ta chiquewach ja winak ja xeqꞌuejeꞌ chipan juleꞌ chic tiempo, ma xkꞌalasax ta chiquewach ejeꞌeꞌ ja caniꞌ kꞌalasan chic camic rmal ja rEspíritu Santo chiquewach ja santilaj tak apóstol in profeta. 
\v 6 Quewaꞌ rbanic ja kꞌalasan chic chikawach riꞌ, ja rixix ja ma ix aj Israel ta ix kachbil chic ja rok aj Israel tre ja herencia xin Dios ja nyataj na chake, xa jun cuerpo kabanon chic ewqꞌuin, ixix jun nyataj na chewe ja tzujunto ojer rmal ja Dios pro xa rmal ja xa jun ebanon ruqꞌuin ja Cristo chewiꞌ tok nyataj chewe. Jariꞌ yataj chewe ja tok xecꞌwaxaj ja utzlaj tzij xin Jesucristo. 
\p 
\v 7 Jawaꞌ utzlaj tzij riꞌ jawaꞌ yaꞌon chi nukul chi nyaꞌ rbixic, jawaꞌ jun samaj xincochij tre ja Dios, ni majun nak ta xinchꞌecbej ta in janila samaji ja Dios pa ncꞌaslemal chi rbanic jawaꞌ samaj riꞌ. 
\v 8 Chwe anin yatajnak wiꞌ jawaꞌ samaj riꞌ masqui xa ma nim ta nukꞌij nnaꞌ kaj chiquewach ja juleꞌ chic kachꞌalal ja re xin Dios, chwe anin yataj wiꞌ chi ninbe ewqꞌuin ja ma ix aj Israel ta chi nenyaꞌaꞌ rbixic chewe nojel ja nkawil ruqꞌuin ja Cristo, jariꞌ caniꞌ jun nimlaj mebaꞌil nkawil pro jun mebaꞌil ja mta qꞌuisic trij. 
\v 9 Jawaꞌ samaj yatajnak chwe utzcꞌa chi anin nchꞌob chiquewach canojel ja winak nak rbanic ja rchominto ja Dios ja ma kꞌalasan ta chipan ja juleꞌ chic tiempo ja kꞌaxnak can pro xa ruyon Dios otakyon triꞌ nak rbanic pro jariꞌ jun Dios arjaꞌ winakarsyon nojelal. 
\v 10 Queriꞌ xuban ja Dios utzcꞌa chi ja lokꞌlaj tak ángel ja recꞌo chilaꞌ chicaj ejeꞌeꞌ nkꞌalasax chic chiquewach ja nimak tak naꞌoj xin Dios ja xucoj ja Dios chi rbanic cumplir ja rchominto ojer chi nuban pro kumal ajoj ja rok iglesia tok necowini ja ángel nquechꞌob ja wariꞌ. 
\v 11 Ja Dios ni rchominto wiꞌ ojer chi nuban jawaꞌ ja nmajon rbixic chewe riꞌ, jawaꞌ ni rchominto wiꞌ ja tok majaꞌn titzꞌucarsaj ja rwachꞌulew. Ja cꞌa tok xutakto ja kajaw Jesucristo waweꞌ chwachꞌulew tokoriꞌ xurbantaj cumplir ja rchominto ojer. 
\v 12 Ja tok xa jun kabanon ruqꞌuin ja Jesucristo jariꞌ matikanaꞌ kiꞌ nokekaj chwach ja Dios in cꞌo kaconfianza noktzijon ruqꞌuin pro xa rmal ja yukulbal kacꞌuꞌx ruqꞌuin ja Jesucristo chewiꞌ tok nkaban queriꞌ. 
\v 13 Rmal cꞌa nojel awaꞌ ja nmajon rbixic chewe riꞌ chewiꞌ tok nbij chewe, masqui anin incꞌo chipan ja rpokonal emwal camic pro maxta ticapuj ecꞌuꞌx rmal como ja rpokonal ja nmajon rtijic pan ecuenta jariꞌ gloria xin Dios rcꞌamonto chewe. 
\s * * * * * * * * * * 
\p 
\v 14 Rmalcꞌariꞌ ja tok ninxuqueꞌ chwach ja Tatixel chi nban orar pan ecuenta, ninxuqueꞌ chwach ja Tatixel rxin ja kajaw Jesucristo. 
\v 15 Arjaꞌ jun Tatixel in rmalariꞌ tok nbix chake chi ok familia xin Dios tanto chique ja recꞌo chilaꞌ chicaj in chake ajoj chakajaꞌ ja rokcꞌo waweꞌ chwachꞌulew. 
\v 16 Ja Tatixel janila jun nimlaj gloria cꞌo ruqꞌuin, arjaꞌ ta xtiyoꞌ chewe ja rpoder, xtuyaꞌ ta chewe chi ja rEspíritu Santo ncowirsaj chi utz ja cꞌacꞌa cꞌaslemal ewcꞌan pa tak ewanma. 
\v 17 Ni ta xtiyukeꞌ wiꞌ ecꞌuꞌx ruqꞌuin ja Cristo in rmaltariꞌ ni ta xtiqꞌuejeꞌ wiꞌ ja Cristo pa tak ewanma. Ja wi queriꞌ neban jariꞌ nixtiqueꞌe chi utz chipan ja rajoben riꞌil xin Dios caniꞌ rbanic jun cheꞌ ja nat benak ja rcꞌamal pa tokꞌulew in caniꞌ rbanic jun jay ja bien tzꞌubul parwiꞌ ja rsimientoꞌil. 
\v 18 Quirtariꞌ neban utzcꞌa chi ixix ewachbil canojel ja kachꞌalal ja re xin Dios nixcowini nechꞌob nak rbanic ja rajoben riꞌil xin Cristo chi congana nim in mta bar ta triꞌ ja maquita nekaj wiꞌ in nixtacꞌa cꞌo ta jun tiempo ja maquita cꞌoli chakajaꞌ. 
\v 19 Ja nwajoꞌ chewe chi newotakij nak rbanic ja rajoben riꞌil xin Cristo, jun ajoben riꞌil ja más kꞌaxnak chi na, jun ajoben riꞌil ja xa nqꞌuisi ja rapensar chi rchꞌobic. Kas ta xtewotakij nak rbanic ja rajoben riꞌil xin Cristo utzcꞌa chi xtinoj ta pa tak ewanma ixix chakajaꞌ nojelal ja nojnak pa ranma ja Dios. 
\p 
\v 20 Ja cꞌa camic kas ta xtiyaꞌ rukꞌij ja Dios, arjaꞌ jun Dios janila nim ja poder cꞌo pa rukꞌaꞌ, jun poder ja ntajini nsamaji pa tak kacꞌaslemal camic. In rmal ja poder ja cꞌo pa rukꞌaꞌ mta nak ta ja maquita ncowini nuban. Xa nak ta nkacꞌutuj tre ncowini nuyaꞌ más chake chwach ja nkacꞌutuj tre. Xa nak ta nkachꞌob ja congana cꞌayew chi rbanic pro arjaꞌ ncowini nuban ja más na cꞌayew chwach ja nkachꞌob ajoj. 
\v 21 Kas ta xtiyaꞌ rukꞌij kumal ja rok iglesia ja xa jun kabanon ruqꞌuin ja Cristo Jesús. Ni ta xtiyaꞌ wiꞌ rukꞌij chwak, cabij in nojel tiempo. Amén. 
\c 4 
\s * * * * * * * * * * 
\p 
\v 1 Rmal cꞌa nojel awaꞌ ja nmajon rbixic chewe riꞌ congana nban recomendar chewe chi newcꞌaj jun utzlaj cꞌaslemal. Anin ja rincojon preso camic rmal ja samaj rxin ja kajaw Jesucristo congana nban recomendar chewe chi newcꞌaj jun cꞌaslemal ja bien nucꞌam riꞌ ruqꞌuin ja utzlaj cꞌaslemal ja nrajoꞌ ja Dios chewe chi newcꞌaj ja tok xixrsiqꞌuij. 
\v 2 Maxta kas ix nimak tenaꞌ kaj, xa nak ta ja newil chipan ja recꞌaslemal teyaꞌaꞌ pa rukꞌaꞌ ja Dios, tiqꞌuejeꞌe ja repaciencia in tok chaka jalal neban ofender ewiꞌ tecochꞌoꞌ pro ruqꞌuin ta ja rajoben riꞌil. 
\v 3 Bien tebanaꞌ cuenta, maxta tetzak ja yatajnak chewe rmal ja rEspíritu Santo como ja rEspíritu Santo arjaꞌ ryaꞌon chewe chi xa jun ebanon, kas ta xtiqꞌuejeꞌe ja quicotemal xin Dios checojol jariꞌ caniꞌ jun caloꞌ nixximbexi in xa jun neban rmal. 
\v 4 Xa jun cuerpo rxin ja Jesucristo, xa jun Espíritu Santo, in caniꞌ tre ja gobierno xin Dios ja kayben jariꞌ xa jun chakajaꞌ, jariꞌ Dios xokrsiqꞌuij chi nokqꞌuejeꞌ chipan. 
\v 5 Xa jun ja Kajaw, xa jun ja bar yukul wiꞌ kacꞌuꞌx, xa jun ja bautismo 
\v 6 in xa jun ja Dios chakajaꞌ, pro jun Dios arjaꞌ Tatixel kaxin kanojelal, arjaꞌ cꞌo pa kawiꞌ kanojelal, arjaꞌ mta bar ta triꞌ ja maquita nsamaj wiꞌ, arjaꞌ cꞌo pa tak kanma kanojelal. 
\p 
\v 7 Pro ma junan ta rwach ja samaj ja kacochij tre ja Cristo chi nkaban chikajujunal pro arjaꞌ xsipaj jun samaj chake chikajujunal janiꞌ kas cꞌo rgana chi nsipaj chake. 
\v 8 Caniꞌ rbin can ja Dios quewariꞌ: —Ja tok joteꞌe chilaꞌ chicaj e qꞌuiy ja winak xerucꞌamel, juleꞌ winak ja rercojon preso, in chakajaꞌ cꞌo jeꞌe ja xsipaj chique winak, queriꞌ nbij. 
\v 9 Ja cꞌa tok nbij chi joteꞌe chilaꞌ chicaj ¿la matibij cꞌa tzij ariꞌ chi ja nabey xurkaj kaj waweꞌ chwachꞌulew? 
\v 10 Queriꞌ rbanic como ja Cristo ja xurkaj kaj waweꞌ chwachꞌulew arjaꞌ mismo ja joteꞌ chic chilaꞌ chicaj pro más chi na chicaj xekaj nojoj wiꞌ, ni majun bar ta triꞌ ja maquita xekaj nojoj wiꞌ. 
\v 11 Arjaꞌ sipan chake ja samaj nkaban jeꞌe quewariꞌ, juleꞌ chake xeꞌoc apóstol, juleꞌ chic chake xeꞌoc profeta, juleꞌ chic xuyaꞌ chique chi nebe pa tak lugar chi nequiyaꞌaꞌ rbixic ja utzlaj tzij xin Jesucristo, in juleꞌ chic xuyaꞌ chique chi nequiyukꞌuj ja kachꞌalal in nequitijoj. 
\v 12 Jawaꞌ samaj xsipaj chake chi nkaban utzcꞌa chi bien ntzꞌakat chake ja rok xin Dios xa nak ta ja ncꞌatzin chake chi nokcowini nkaban ja samaj xin Dios utzcꞌa chi nokqꞌuiy rmal ja rok cuerpo rxin ja Cristo. 
\v 13 Queriꞌ rbanic in nerilaꞌ na jun kꞌij ja tok mta ariꞌ ja maquita jun nkaban rmal ja yukulbal kacꞌuꞌx ruqꞌuin ja Ralcꞌwal Dios in rmal ja bien nkotakij na ja kas mero rnaꞌoj. Queriꞌ cꞌa xtikaban, congana xtitzꞌakat na chi utz ja kanaꞌoj, xtinoj na pa tak kanma ajoj nojelal ja nojnak pa ranma ja Cristo. 
\v 14 Pro bien ntzꞌakat na ja kanaꞌoj utzcꞌa chi ma ok caniꞌ chi ta juleꞌ acꞌalaꞌ utzcꞌa chi ma chaka ta nojel tijonem ta nkanimaj caniꞌ tre juleꞌ tijonem ja xa quixin juleꞌ winak ja rebanol engaño, juleꞌ winak ja congana e listo in natqueyaꞌ pa jun bey ja ma xin Dios ta. 
\v 15 Pro ja cꞌa nkaban, kas ta katzij nojel ja nkabij pro rachbil ta ja rajoben riꞌil xin Dios tok nkabij. Queriꞌ ta cꞌa nkaban utzcꞌa chi nokqꞌuiyi chi utz in nkaxim más kiꞌ ruqꞌuin ja Cristo como arjaꞌ ocnak wiꞌaj rxin ja cuerpo. 
\v 16 Arjaꞌ nqꞌuiyirsan kaxin ja rok cuerpo rxin, pro jun cuerpo ja bien banon rbanic, xa jun rbanon, rximon riꞌ chibil tak riꞌ in nutoꞌ riꞌ chibil tak riꞌ chakajaꞌ. Ja jujun miembro rxin ja cuerpo tok nuban ja samaj ja yatajnak tre chi nuban jariꞌ nqꞌuiyi chi utz ja cuerpo rmal, kas nrajoꞌ riꞌ chibil tak riꞌ. 
\s * * * * * * * * * * 
\p 
\v 17 Ja cꞌa xtinbij chic chewe riꞌ congana nban recomendar chewe pa rubiꞌ ja kajaw Jesucristo, maxta tewcꞌaj chic jun cꞌaslemal ja caniꞌ quicꞌaslemal ja juleꞌ chic winak ja ma e aj Israel ta como ja quinaꞌoj ejeꞌeꞌ mta noc wiꞌ. 
\v 18 Ja quewiꞌ canma xa kꞌekumirnak, cꞌa nat cꞌo wiꞌ chique ja cꞌaslemal xin Dios. Nat cꞌo wiꞌ como matichꞌobtaj cumal janiꞌ rnaꞌoj ja Dios pro xa rumac ja congana e cow chewiꞌ tok queriꞌ quibanon. 
\v 19 Matiquenaꞌ chic ja ritzelal ja nqueban. Ja rachiꞌiꞌ cachbil ixokiꞌ xa janiꞌ quiyaꞌon quiꞌ chi rbanic ja il mac. Ni majun rwach ja ritzelal ja maquita nqueban, xa nak ta nuyaꞌ gana chique chi nqueban jariꞌ nqueban. 
\v 20 Pro ja cꞌa rixix xewotakij rwach ja Cristo chi ma queriꞌ ta ja rcꞌaslemal arjaꞌ ja xewotakij. 
\v 21 Ja cꞌa wi xeyaꞌ ewxquin tre ja Cristo tok tzijon pa tak ewanma, wi arjaꞌ ocnak Emaestro, wi ja tijonem xewotakij nucꞌam riꞌ ruqꞌuin ja tijonem ja yaꞌon can rmal ja Cristo, ja wi queriꞌ ebanon jariꞌ bien ewotak chi ja Cristo ma queriꞌ ta ja rcꞌaslemal ja caniꞌ quicꞌaslemal ja juleꞌ chic winak ja cꞌa xinbij chewe riꞌ. 
\v 22 Pro quewaꞌ ja tijonem ja chꞌob chewach riꞌ, chi rjawaxic chi nechꞌakij can ja tzabuklaj cꞌaslemal ja rewcꞌan nabey, jun cꞌaslemal ja xa chuwirnak como xeyaꞌ ewiꞌ chi rbanic chaka nojel ta xeyarij ja xa engaño rcꞌamonto. 
\v 23 Pro ja rjawaxic chewe camic, kꞌij kꞌij neyaꞌ lugar tre ja rEspíritu Santo chi arjaꞌ nucoj cꞌacꞌa tak naꞌoj pa tak ewiꞌ pa tak ewanma. 
\v 24 Rjawaxic chi newcꞌaj ja cꞌacꞌa cꞌaslemal ja winakarsan rmal ja Dios, jun cꞌaslemal ja caniꞌ rcꞌaslemal arjaꞌ. Ja tok nawcꞌaj awaꞌ jun cꞌacꞌa cꞌaslemal riꞌ jariꞌ naban ja rutzil in nawcꞌaj jun chꞌajchꞌojlaj anma pro ni katzij wiꞌ ja naban, mta engaño rcꞌamonto. 
\p 
\v 25 Rmalcꞌariꞌ nbij chewe, ni ta xtel wiꞌ chewe chijutij ja tzꞌakoj tak tzij in ni ta katzij wiꞌ nebij chibil tak ewiꞌ. Queriꞌ nbij chewe como kaximon kiꞌ, xa jun cuerpo kabanon. 
\v 26 Ja tok xtipeti ja rewayewal maxta teyaꞌ lugar tre chi xquixrucꞌamel ta chi rbanic ja il mac. Maxta tiyeloji ja rewayewal, tecuyuꞌ chanim, 
\v 27 maxta teyaꞌ lugar tre ja diablo chi xquixrtakchiꞌij ta. 
\v 28 Ja re banol tak alakꞌ chewe nabey maxta tiqueban chic ja ralakꞌ. Ja nqueban, quesamaji ruqꞌuin quekꞌaꞌ pro utzlaj samaj tiquibanaꞌ utzcꞌa chi cꞌoli nquechꞌec ja nequitobej ja winak ja cꞌo rjawaxic chique. 
\v 29 Ni ta majun itzel tak tzij nelto pan echiꞌ, ni ta buen tak tzij wiꞌ nebij, juleꞌ tzij ja cꞌo qꞌuiyem rcꞌamonto, juleꞌ tzij ja cꞌoli noc wiꞌ. Quirtariꞌ neban jutzꞌit utzcꞌa chi cꞌol utzil xin Dios rcꞌamonto chique ja necꞌaxan ewxin. 
\v 30 In maxta cꞌoli teban ja xa nuyaꞌ bis tre ja rEspíritu Santo xin Dios como ja rEspíritu Santo arjaꞌ kajto pa tak ewanma in rmalariꞌ tok yatajnak chewe ja retal chi ix rxin chic ja Dios in cꞌol eseguro chi newilaꞌ na ja kꞌij ja tok xtitzꞌakat na chake chijutij ja totajem xin Dios. 
\v 31 Techupuꞌ nojelal ja ntiꞌon chewe chibil tak ewiꞌ, teyaꞌaꞌ can ja kulujem, ja rayewal, ja banoj sícꞌ, ja neꞌatzijoj winak, teyaꞌaꞌ can nojel rwach ja ritzelal. 
\v 32 Ja neban, kas lokꞌ tenaꞌaꞌ ewiꞌ, tipokonaj riꞌ ewach, tecuyuꞌ ewiꞌ caniꞌ xuban ja Dios chewe xixrucuy pro xa rmal ja xa jun ebanon ruqꞌuin ja Cristo chewiꞌ tok xixrucuy. 
\c 5 
\s * * * * * * * * * * 
\p 
\v 1 Como ja Dios xixrucuy chewiꞌ tok nbij chewe, tecꞌamaꞌ ja rejemplo rxin ja Dios como ixix ix chakꞌlaj ralcꞌwal ja Dios. 
\v 2 In tewajoꞌ ewiꞌ caniꞌ xuban ja Cristo chake como arjaꞌ xokrajoꞌ, xuyaꞌ riꞌ pa camíc kumal. Ja tok cam pa kacuenta ja Cristo jariꞌ jun ofrenda, jun sacrificio chwach ja Dios in xel rucꞌuꞌx ja Dios trij. 
\p 
\v 3 Ja cꞌa tok nekꞌijlaꞌ ewiꞌ maxta tetzijoj juleꞌ il mac ja nqueban achiꞌiꞌ cuqꞌuin ixokiꞌ in nixtacꞌa juleꞌ chic chakajaꞌ ja xa ntzꞌilorsaj ja ranaꞌoj in nixtacꞌa ja ta chakajaꞌ ja ritzelal ja nquiyarij winak pa tak canma. Nojel awaꞌ ja cꞌa xinbij chewe riꞌ nixtacꞌa xtetzijoj ta jutzꞌit. Ja tok at xin Dios ma yatal chi ta chawij chi natzijoj ja wariꞌ. 
\v 4 Maxta tzꞌilalaj tak tzij tetzijoj nixtacꞌa chꞌujlaj tak tzij ta in nixtacꞌa juleꞌ tzij ta ja solo tzeb rcꞌamonto como jariꞌ ma yatal chi ta chewij chi neban pro mejor ja neban, temaltioxij tre ja Dios nojelal ja rbanon pan ecuenta. 
\v 5 Como ixix bien ewotak chi ja herencia xin Dios matiyataj chique ja rachiꞌiꞌ in ixokiꞌ ja xa nemacuni nixtacꞌa chique ta ja winak ja nqueban jeꞌe ja xa ntzꞌilor anaꞌoj rmal in nixtacꞌa chique ta ja winak ja chaka benak chi nquiyarij quinakun cach tak winak. Ja cꞌa wi chaka benak chi nayarij quinakun winak jariꞌ xa nakun jeꞌe nayaꞌ rukꞌij, xa jariꞌ ocnak adios. Bien ewotak chi ja winak ja re quitakariꞌ ejeꞌeꞌ matiyataj chique ja herencia chi xqueꞌoc ta chipan ja gobierno rxin ja Cristo rachbil Dios ja Tatixel. 
\p 
\v 6 Maxta quixban engañar cumal juleꞌ winak ja nquibij chi mta nuban chawe wi queriꞌ naban ja caniꞌ nqueban ja winak ja re quitakariꞌ caniꞌ cꞌa xinbij kaj chewe. Queriꞌ nbij chewe como xa rmal ja juleꞌ itzelal ja cꞌa xinbij kaj chewe riꞌ chewiꞌ tok npi ryewal ja Dios chiquij ja winak ja ni maqueniman wiꞌ. 
\v 7 Maxta cꞌa queꞌewachbilaj ixix. 
\v 8 Como ja recꞌaslemal ixix ma queriꞌ chi ta ja caniꞌ nabey como ja nabey solo kꞌekumal ixcꞌayon pro ja camic luz xin Dios ixcꞌayon pro xa rmal ja xa jun ebanon ruqꞌuin ja kajaw Jesucristo chewiꞌ tok queriꞌ chic ebanon. Tebanaꞌ cꞌa ja bien nucꞌam riꞌ ruqꞌuin ja luz xin Dios como ix ralcꞌwal chic ja Dios ja sakirsyon ebey chewach. 
\v 9 Queriꞌ nbij chewe como ja luz ja cojon pa tak kanma rmal ja rEspíritu Santo quewaꞌ rcꞌamonto riꞌ, nojel rwach ja rutzil nkaban rmal, ni rubey wiꞌ ja nkaban in ni katzij wiꞌ ja nkabij. 
\v 10 Tetijoj ewiꞌ chi rotakixic nak ja neban jeꞌe ja nquicoti ja Dios rmal in ni ta ja wariꞌ neban. 
\v 11 Maxta teban ixix ja caniꞌ nqueban ja winak ja xa kꞌekumal ecꞌayon in ni majun utzil rcꞌamonto ja nqueban pro ja neban, tesakirsaj chiquewach chi ma utz ta ja nqueban. 
\v 12 Como congana itzel ja nqueban jeꞌe pan awatali, nixtacꞌa cꞌo ta ngana nintzijon tre, xa qꞌuixbal nnaꞌ rmal. 
\v 13 Pro ja cꞌa tok nesakirsaj chiquewach ja ritzelal ja nqueban jariꞌ ni kꞌalaj chi wiꞌ chiquewach chi ma utz ta ja nqueban in nsakar canma rmal. 
\v 14 Xa chewiꞌ tok quewaꞌ rbin can ja Dios riꞌ: —Atat ja ratwarnak chipan ja kꞌekumal catcꞌasoji, catyictaj chipan ja camíc in ja Cristo arjaꞌ nsakirsaj ja rawanma, neꞌe. 
\p 
\v 15 Tebanaꞌ cꞌa cuenta, kas ta xtichꞌobtaj emwal janiꞌ ja recꞌaslemal, maxta queriꞌ teban ixix ja caniꞌ nqueban ja winak ja ma cotak ta janiꞌ rnaꞌoj ja Dios pro ja neban, tebanaꞌ ja rutzil como ixix ewotak chic janiꞌ rnaꞌoj ja Dios. 
\v 16 Maxta chaka queriꞌ tikꞌax jun kꞌij chewach pro kꞌij kꞌij ni tebanaꞌ wiꞌ ja rutzil. Queriꞌ nbij chewe como congana itzelal nbantaj chipan awaꞌ tiempo ja rokcꞌo wiꞌ riꞌ. 
\v 17 Rmalcꞌariꞌ tok nbij chewe, maxta xa ma chꞌobol ta ja neban pro kas ta xtichꞌobtaj emwal chi utz nak rvoluntad ja Dios. 
\v 18 Maxta quixnoj tre ja vino chi nixkꞌabar rmal como jariꞌ congana itzelal rcꞌamonto. Pro ja neban, ni ta xtinoj wiꞌ ja rEspíritu Santo pa tak ewanma. 
\v 19 Ja tok nekꞌijlaꞌ ewiꞌ quewaꞌ neban chibil tak ewiꞌ riꞌ, tebanaꞌ salmo, tebanaꞌ himno, tebixaj ja bix ja nwinakarsax pa tak ewanma rmal ja rEspíritu Santo. Quixbixani pro ruqꞌuin ta ewanma nebixaj rubiꞌ ja kajaw Jesucristo. 
\v 20 Xa nak ta nbantaji pro ni temaltioxij wiꞌ tre ja Dios Tatixel pa rubiꞌ ja kajaw Jesucristo. 
\s * * * * * * * * * * 
\p 
\v 21 Como neban respetar ja Dios chewiꞌ tok nbij chewe, tebanaꞌ respetar ewiꞌ chibil tak ewiꞌ chakajaꞌ. 
\p 
\v 22 Ixix ja rix ixokiꞌ, queꞌebanaꞌ respetar ja rewachajilal como ja kajaw Jesucristo queriꞌ nrajoꞌ chewe chi neban. 
\v 23 Queriꞌ nbij chewe como ja rachi arjaꞌ ocnak wiꞌaj rxin ja rxjayil caniꞌ rbanon ja Cristo arjaꞌ ocnak wiꞌaj rxin ja riglesia como ja riglesia jariꞌ cuerpo rxin ja Cristo in ja Cristo arjaꞌ Toꞌonel rxin ja riglesia. 
\v 24 Como ja riglesia nuban respetar ja Cristo quirtacꞌariꞌ nqueban ja rixokiꞌ chique ja cachajilal chakajaꞌ, rjawaxic chi nequeban respetar tre nojelal. 
\p 
\v 25 Ja cꞌa rixix ja rix achiꞌiꞌ queꞌewajoꞌ ja rewixjayilal caniꞌ xuban ja Cristo chake ja rok iglesia congana xokrajoꞌ in xuyaꞌ riꞌ pa camíc kumal. 
\v 26 Queriꞌ xuban utzcꞌa chi xokoc ok tinamit xin Dios como arjaꞌ xchꞌachꞌojirsaj ja kanma. Queriꞌ kaban, kanimaj ja utzlaj tzij in xokban bautizar jariꞌ xchꞌachꞌojirsbej ja kanma. 
\v 27 Queriꞌ xuban chake utzcꞌa chi congana nuban rbanic ja kanma utzcꞌa chi kas rwekon riꞌ ja kanma ja tok xkoꞌekaj chwach pro ni bien chꞌajchꞌoj in ni majun itzelal rcꞌan. Queriꞌ nuban ja Cristo chake ja rok iglesia utzcꞌa chi ajoj nkucꞌaj ja cꞌaslemal xin Dios utzcꞌa chi ni majun nak ta nokchapbexi. 
\v 28 In queriꞌ cꞌa chewe ixix ja rix achiꞌiꞌ chakajaꞌ, rjawaxic chi lokꞌ neꞌenaꞌ ja rewixjayilal, queriꞌ ta neban chique caniꞌ neban tre ja recuerpo ixix como lokꞌ nenaꞌ ja recuerpo. Ja tok wi lokꞌ nanaꞌ ja rawixjayil awiꞌ cꞌa atat ariꞌ lokꞌ nanaꞌ chakajaꞌ. 
\v 29 Queriꞌ nbij chewe como ni majun achi itzel ta nutzꞌat ja rcuerpo pro jariꞌ bien nutzuk in bien nuban cuenta. In queriꞌ nuban ja Cristo chake chakajaꞌ ja rok iglesia 
\v 30 como ok miembro rxin ja rcuerpo, kaximon kiꞌ ruqꞌuin. 
\v 31 Rmalcꞌariꞌ tok cꞌo jun achi wi ncꞌuleꞌe neruyaꞌ can ja rtataꞌ ruteꞌ, nquexim quiꞌ ruqꞌuin ja rxjayil, xa jun cuerpo nqueban. 
\v 32 Jawaꞌ ja nmajon rbixic chewe riꞌ congana nim rukꞌij, xa awatali nabey pro kꞌalasan chic chikawach camic. Pro jawaꞌ wariꞌ tre Cristo nintzijon wiꞌ in tre ja riglesia. 
\v 33 Pro ja camic nbij chic chewe ja rix achiꞌiꞌ chejujunal, caniꞌ newajoꞌ kaj ewiꞌ eyon quirtacꞌariꞌ neban chique ja rewixjayilal queꞌewajoꞌ chakajaꞌ, in ixix ja rix ixokiꞌ queꞌebanaꞌ respetar ja rewachajilal. 
\c 6
\p 
\v 1 Ja cꞌa rixix ja rix alcꞌwalaxelaꞌ como xa jun ebanon ruqꞌuin ja kajaw Jesucristo rmalcꞌariꞌ nbij chewe, queꞌenimaj ja retataꞌ eteꞌ. Queriꞌ nbij chewe como jariꞌ ni rubey wiꞌ chi neꞌenimaj. 
\v 2-3 Cꞌo jun mandamiento xin Dios quewaꞌ nbij chake riꞌ: —Queꞌenimaj ja retataꞌ eteꞌ, neꞌ chake. Pro jawaꞌ jun mandamiento wi nkanimaj cꞌoli ntzujuj chake in quewaꞌ ntzujuj chake riꞌ: —Nixquicot na in qꞌuiylaj tiempo nixcꞌaseꞌ na waweꞌ chwachꞌulew, queriꞌ nbij chake. 
\p 
\v 4 Ja cꞌa rixix ja rix tatixelaꞌ maxta queꞌechꞌujarsaj ja rewalcꞌwal, maxta teyic quiyewal. Pro ja neban, utz quiqꞌuittzixic tebanaꞌ, queꞌebanaꞌ corregir in queꞌepaxbaj xarwariꞌ tecojoꞌ ja rnaꞌoj ja kajaw Jesucristo chi quiqꞌuittzixic. 
\p 
\v 5 Ja cꞌa rixix ja rix moso queꞌenimaj ja repatrón ja recꞌo waweꞌ chwachꞌulew. Pro congana ta neꞌeban respetar, nojel ta ecꞌuꞌx nojel ta ewanma neꞌenimaj. Ja tok nqueyaꞌ samaj chewe ja ta neban tre caniꞌ ta samaj xin Cristo ja neban. 
\v 6 Ecꞌoli ja moso congana nesamaji tok cꞌoloc ja quipatrón cuqꞌuin utzcꞌa chi utz netzꞌa̱t rmal pro tok nbe ja quipatrón ma kas ta nesamaj can chic pro maxta queriꞌ teban ixix. Tebanaꞌ como caniꞌ Cristo ja repatrón, rvoluntad ta Dios ja neban in chakajaꞌ maxta xa caꞌiꞌ ecꞌuꞌx. 
\v 7 Quixquicoti chi rbanic ja samaj quixin ja repatrón, tebanaꞌ tre caniꞌ samaj rxin ja kajaw Jesucristo in ma quixin winak ta. 
\v 8 Queriꞌ nbij chewe como bien ewotak chi jun achi tok cꞌo jun utzil nuban xa nak ta chi utzilal jariꞌ cꞌo rtojbalil nyataj na tre rmal ja kajaw Jesucristo. Jariꞌ nyataj na tre wi libre ja rachi in nyataj na tre chakajaꞌ masqui xa esclavo. 
\v 9 Ja cꞌa rixix ja rix patroniꞌ queriꞌ tebanaꞌ chique ja remoso chakajaꞌ, maxta xa cowlaj tak tzij nebij chique como ixix bien ewotak chi cꞌo chi na jun ja Patrón ja cꞌo chilaꞌ chicaj, jariꞌ Quipatrón ja remoso in chakajaꞌ Epatrón ixix, pro jun Patrón ja ma jun ta utz nutzꞌat in ma jun ta itzel. 
\s * * * * * * * * * * 
\p 
\v 10 Wachꞌalal, jawaꞌ qꞌuisbal paxbanem nyaꞌ chewe riꞌ, cow quixpeꞌi pa rubiꞌ ja kajaw Jesucristo, tecojoꞌ ja nimlaj poder ja nuyaꞌ. 
\v 11 Tecojoꞌ nojel rwach ja banbal chꞌaꞌoj ja ryaꞌon ja Dios chake utzcꞌa chi cow nixpeꞌe chwach ja diablo xa nak ta nucoj jeꞌe chewij chi nixrtakchibej. 
\v 12 Queriꞌ nbij chewe como ja kas mero kacꞌulel ja kamajon chꞌaꞌoj cuqꞌuin ma ejeꞌeꞌ tariꞌ ja kach tak winak. Pro ja kas mero kacꞌulel ejeꞌeꞌ riꞌ canojelal ja ritzel tak ángel, juleꞌ itzel ángel ja nebano mandar waweꞌ chwachꞌulew pa tak quewiꞌ pa tak canma ja winak ja xa kꞌekumal ecꞌayon, juleꞌ itzel tak espíritu ja neqꞌuejeꞌ chicaj chipan ja aire. 
\v 13 Rmalcꞌariꞌ nbij chewe, tecojoꞌ nojel rwach ja banbal chꞌaꞌoj ja ryaꞌon ja Dios chake utzcꞌa tok congana lawuloꞌ nuban ja diablo chewe nij ixix wiꞌ nixchꞌocmaji in cow ixpaꞌli ja tok ntzuri ja chꞌaꞌoj nojelal. 
\v 14-17 Caniꞌ nuban jun soldado qꞌuiy rwach nucoj ja ntobej riꞌ chipan jun chꞌaꞌoj, cꞌo rcincha, cꞌoli ja ntobej rwarucꞌuꞌx, cꞌoli ja ntobej rkan, cꞌo jun chꞌichꞌ ja ncꞌulbej ja flecha ja rcꞌan kꞌakꞌ tok nqꞌuia̱k trij, cꞌoli ja ntobej rwiꞌ in cꞌo jun espada rcꞌan. In queriꞌ cꞌa chewe ixix chakajaꞌ, cꞌoli ja banbal chꞌaꞌoj ja nebanbej chꞌaꞌoj ruqꞌuin ja diablo, quewaꞌ rbanic ja banbal chꞌaꞌoj riꞌ, ni ta katzij wiꞌ ja nebij, ni ta rubey wiꞌ ja neban, ni ta nenataj wiꞌ ja utzlaj tzij xin Jesucristo ja nuyaꞌ quicotemal chake utzcꞌa chi ix listo chi rbanic ja chꞌaꞌoj ruqꞌuin ja diablo. In jun chic chakajaꞌ, congana rjawaxic chi nyukeꞌ ecꞌuꞌx ruqꞌuin ja Jesucristo utzcꞌa tok cꞌoli nqꞌuia̱k chewij rmal ja diablo pro maquixmajtaj rmal. Tecꞌamaꞌ ja totajem ja nsipaj ja Dios chewe in tecojoꞌ ja rtzobal Dios ja yatajnak chake rmal ja rEspíritu Santo. Tecojoꞌ nojel rwach ja banbal chꞌaꞌoj ja cꞌa xinbij kaj chewe riꞌ in cow quixpeꞌi. 
\v 18 In chakajaꞌ, ni tebanaꞌ wiꞌ ja roración nojel tiempo, xa nak ta ja nemaltioxij tre ja Dios owi xa nak ta ja necꞌutuj tre pro ja ta Espíritu Santo xtucꞌan ewxin chi rbanic ja roración. Ja nwajoꞌ chewe chi ni nixcꞌascꞌot wiꞌ in ni ma tetanbaꞌ ta wiꞌ ja roración, nwajoꞌ chewe chi neban orar pa quicuenta canojel ja kachꞌalal ja re xin Dios. 
\v 19 In tebanaꞌ orar pa ncuenta anin chakajaꞌ, tecꞌutuj tre ja Dios chi arjaꞌ ninrutoꞌ chi rbixic ja utzlaj tzij xin Jesucristo, jariꞌ ja utzlaj tzij ja rawatali nabey pro kꞌalasan chic camic. Ja tok xtinyaꞌ rbixic, Dios ta xtiyoꞌ chwe ja tzij ja nbij in xtuyaꞌ ta chwe chakajaꞌ chi matinxbej wiꞌ chi rbixic. 
\v 20 Rmal ja utzlaj tzij xin Jesucristo chewiꞌ tok inocnak jun ajsamajel rxin ja Jesucristo pro jun ajsamajel ja bacꞌon pa cadena como incojon pa cheꞌ camic. Tebanaꞌ orar pa ncuenta utzcꞌa chi ni matinxbej wiꞌ wiꞌ chi nyaꞌ más rbixic ja utzlaj tzij como nijawariꞌ ja yatal chwe chi nban. 
\p 
\v 21 Camic nwajoꞌ chi newotakij nak ja nbanon waweꞌ, nwajoꞌ chi newotakij nak ja nintajini nban in rmalcꞌariꞌ tok ntakonel ja Tíquico ewqꞌuin chi nerchꞌoboꞌ chewach nojelal. Ja Tíquico arjaꞌ jun chakꞌlaj kachꞌalal, jun ajsamajel ja xa jun rbanon ruqꞌuin ja kajaw Jesucristo, jun ajsamajel ja ni nuban wiꞌ cumplir ja ntzujuj. 
\v 22 Rmalcꞌariꞌ tok ntakonel ewqꞌuin utzcꞌa chi newotakij nak kabanon waweꞌ utzcꞌa chakajaꞌ chi neryukbaꞌ ecꞌuꞌx. 
\p 
\v 23 Tiqꞌuejeꞌ más ja quicotemal chiquicojol ja kachꞌalal, tiqꞌuejeꞌ más ja yukulbal quecꞌuꞌx ruqꞌuin ja Jesucristo pro jun yukulbal cꞌuxlal rachbil ta ja rajoben riꞌil xin Dios. Ja tariꞌ xtiquicochij más tre ja katataꞌ Dios in tre ja kajaw Jesucristo. 
\v 24 Ja rutzil xin Dios xtiqꞌuejeꞌ ta cuqꞌuin canojel ja neꞌajoꞌn rxin ja kajaw Jesucristo pro jun ajoben riꞌil ja ni mta wiꞌ qꞌuextajic trij. Amén.