\id PHP Western Tzutujil [tzt] NT (Guatemala) -2009 bd. 
\h FILIPENSES 
\toc1 Filipenses 
\toc2 Fil
\mt FILIPENSES
\c 1
\s 
\p
\v 1 Anin in Pablo wachbil ja Timoteo ajoj okbanyon awaꞌ carta riꞌ. Ajoj ok ajsamajelaꞌ rxin ja Jesucristo. Camic wachꞌalal nkatakel ja carta ewqꞌuin ewanojel ja rixcꞌo chipan ja tinamit Filipos. Ja carta, ewxin ixix ja nixchajin quixin ja kachꞌalal, ewxin ixix ja rix diácono, ewxin ewanojelal ja rix xin Dios ja xa jun ebanon ruqꞌuin ja Cristo Jesús.
\v 2 Ja rutzil ja nsipaj ja Dios chake rachbil ja quicotemal xin Dios ja tariꞌ xtecochij más tre ja katataꞌ Dios in tre ja kajaw Jesucristo.
\s * * * * * * * * * *
\p
\v 3 Wachꞌalal, anin ni nixnnataj wiꞌ pan oración in ni nmaltioxij wiꞌ tre ja katataꞌ Dios tre ja rebanon.
\v 4 Ni nban wiꞌ orar pan ecuenta pro ewanojelal in ni ninquicot wiꞌ emwal chakajaꞌ.
\v 5 Ninquicoti como ixix nij inetoꞌonto wiꞌ chi rbixic ja utzlaj tzij xin Jesucristo, nij inetoꞌon wiꞌ ja tok kas xenimajto ja Jesucristo nabey.
\v 6 Ja katataꞌ Dios arjaꞌ cꞌo jun utzlaj samaj xumajel pa tak ewanma in bien wotak chi arjaꞌ ntzꞌakatsaj na ja samaj tokoriꞌ tok xtipi chic jutij ja Jesucristo.
\v 7 Ni rubey wiꞌ chi queriꞌ nchꞌob chewij ewanojel wachꞌalal como ixix ixcꞌo pa wanma. Como ixix wachꞌalal ecꞌamon ewiꞌ wqꞌuin chi rbanic ja samaj ja yaꞌon chwe rmal ja Dios chi nban. Ja tok ninqꞌuejeꞌ pa cheꞌ ninetoꞌ in chakajaꞌ tok ecꞌoli winak ja nechꞌaꞌo rxin ja utzlaj tzij xin Jesucristo ninetoꞌ chi rchꞌaꞌic chique ja nquibij, ninetoꞌ chi rkꞌalasaxic chiquewach chi jariꞌ utzlaj tzij ruqꞌuin ja Dios penak wiꞌ.
\v 8 Dios rotak chi congana nixwajoꞌ wachꞌalal. Como nojnak ja rajoben riꞌil xin Jesucristo pa wanma xa chewiꞌ ja tok congana nixwajoꞌ.
\v 9 Anin ncꞌutuj tre ja Dios chi ni ta nqꞌuiy wiꞌ más ja rajoben riꞌil xin Dios pa tak ewanma, ncꞌutuj tre chi ni ta nwinakar wiꞌ más ja renaꞌoj in ni ta nchꞌobtaj wiꞌ emwal nak ja rutzil in nak ja ritzelal.
\v 10 Queriꞌ nwajoꞌ chewe wachꞌalal utzcꞌa chi ni nel wiꞌ ecꞌuꞌx trij ja rutzil xin Dios utzcꞌa chakajaꞌ chi kas chꞌajchꞌoj neli ja rewanma in majun nak ta nixchapbexi ja tok xtipi chic jutij ja Cristo.
\v 11 Kas ta xtinoji pa tak ewanma nojel rwach ja rutzil xin Dios ja nyataj chake rmal ja Jesucristo, kas ta xtiyaꞌ rukꞌij ja Dios cumal winak emwal.
\s * * * * * * * * * *
\p
\v 12 Kas ta xtichꞌobtaj emwal wachꞌalal chi ja banon chwe camic jariꞌ cꞌoli rcꞌamonto, más chi na benak rbixic ja utzlaj tzij xin Jesucristo rmal.
\v 13 Camic incojon pa cheꞌ pro canojel ja soldado ja nechajin rxin ja jay ja bar nqꞌuejeꞌ wiꞌ ja nimlaj rey ejeꞌeꞌ bien cotak chi xa rmal ja yukulbal nucꞌuꞌx ruqꞌuin ja Jesucristo chewiꞌ tok incojon pa cheꞌ in bien cotak canojel ja juleꞌ chic winak chakajaꞌ.
\v 14 In jun chic, como rmal ja Jesucristo tok incojon pa cheꞌ chewiꞌ tok congana e qꞌuiy chique ja kachꞌalal más chi na cowiri ja yukulbal quecꞌuꞌx ruqꞌuin ja kajaw Jesucristo in ni matiquixbej wiꞌ quiꞌ chi rbixic ja rtzobal Dios.
\p
\v 15-17 Pro ecꞌo juleꞌ chic ja nqueyaꞌ rbixic ja Cristo pro ejeꞌeꞌ ma nojel ta quecꞌuꞌx nqueban. Ejeꞌeꞌ xa quiakirnak ja canma chwij, xa chꞌaꞌoj ncajoꞌ chwe chewiꞌ tok nqueyaꞌ rbixic. Xa más na problema nqueyaꞌ chwe waweꞌ pa cheꞌ ja ncajoꞌ ejeꞌeꞌ. Pro ecꞌo chi cꞌa juleꞌ ja nojel quecꞌuꞌx nqueyaꞌ rbixic ja Cristo. Como ejeꞌeꞌ cꞌoli ja rajoben riꞌil xin Dios pa tak canma chewiꞌ tok nqueyaꞌ rbixic. Ejeꞌeꞌ bien chꞌobtajnak cumal chi ma chaka ta incojon pa cheꞌ camic pro rumac chi nchꞌaꞌ chique ja winak ja nebini chi ma katzij ta ja utzlaj tzij xin Jesucristo.
\v 18 Pro ja chwe anin, xa nak ta nqueban ja winak wi nojel quecꞌuꞌx nqueyaꞌ rbixic ja Cristo owi mani pro jariꞌ ni majtajnak wiꞌ rnataxic ja Cristo in congana ninquicot anin rmal camic in ninquicot na más chakajaꞌ.
\p
\v 19 Ninquicoti como bien wotak chi cꞌoli rcꞌamonto chwe ja nbanon waweꞌ camic, bien wotak chi cꞌoli ja totajem rcꞌamonto chwe como ixix emajon ntoꞌic pan oración in ja rEspíritu Santo ja takonto rmal ja Jesucristo arjaꞌ ninrutoꞌ na chakajaꞌ.
\v 20 Ja kas ngana anin maquita cꞌoli nak ta xtinban ja xtinyabej ta nuqꞌuix chwach ja Dios pro ni ta cow wiꞌ xquinpeꞌi chi ryaꞌic rukꞌij ja Jesucristo. Ja caniꞌ nbanonto jotolto ni ta quirwariꞌ xtinban chic camic chakajaꞌ. Ja wi nincꞌaseꞌ na más rmal ta ja ncꞌaslemal xtiyaꞌ ta rukꞌij ja Cristo owi nincami rmal ta ja ncamic xtiyaꞌ ta rukꞌij chakajaꞌ.
\v 21 Queriꞌ nbij chewe como ja chwe anin yaꞌon ncꞌaslemal utzcꞌa chi noc yaꞌbal rukꞌij ja Cristo. Ja cꞌa tok xquincami jariꞌ chꞌecoj rcꞌamonto chwe.
\v 22 Ja wi nincꞌaseꞌ na más jariꞌ nuyaꞌ lugar chwe chi ninsamaj más pa rcuenta ja kajaw Jesucristo chi quitoꞌic ja winak. Ja cꞌa wi queriꞌ rbanic nak la ja más utz tre ja caꞌiꞌ riꞌ, ma ja la ja nincami owi ma ja la ja nincꞌaseꞌ na más.
\v 23 Xarwariꞌ cꞌo ngana nincami in nineqꞌuejeꞌ ruqꞌuin ja Cristo jariꞌ más chi na utz ja nnaꞌ anin.
\v 24 Pro ja chewe ixix más chi na cꞌo rjawaxic chewe chi nincꞌaseꞌ na más.
\v 25 Como anin cꞌo nseguro chi queriꞌ rbanic chewiꞌ wotak chi nincꞌaseꞌ na más in ninqꞌuejeꞌ na más ewqꞌuin ewanojel utzcꞌa chi nqꞌuiy más ja yukulbal ecꞌuꞌx ruqꞌuin ja Jesucristo in nixquicot rmal.
\v 26 Queriꞌ rbanic utzcꞌa tok xquinekaj chic jutij ewqꞌuin congana nixquicot na triꞌ in congana neyaꞌ na rukꞌij ja Jesucristo mwal.
\p
\v 27 Xar nbij chewe wachꞌalal, ni ta newcꞌaj wiꞌ jun utzlaj cꞌaslemal ja caniꞌ nucꞌut chikawach ja utzlaj tzij xin Cristo. Ja wi xtitzur mwal chi ninbe ewqꞌuin owi masqui ma xtitzur ta pro xarwariꞌ nurkaj ta rbixic wqꞌuin chi xa jun ebanon. Cow ta nixpeꞌi wachꞌalal, xa jun tebanaꞌ, xta jun neban chi rbanic jun lucha utzcꞌa xtibe ta pa nim ja utzlaj tzij xin Jesucristo in xtiyukeꞌ ta quecꞌuꞌx ja winak ruqꞌuin ja Jesucristo rmal.
\v 28 Maxta texbej ewiꞌ chiquewach ja winak ja neyictaj chewij pro nixtacꞌa jutzꞌit ta. Ja wi matexbej ewiꞌ chiquewach triꞌ nquetzꞌat wiꞌ chi cꞌo jun nimlaj rpokonal cajal chiquewach chipan ja nimlaj kꞌij xin juicio. Ja wi matexbej ewiꞌ chiquewach triꞌ netzꞌat wiꞌ ixix chakajaꞌ chi nixrutoꞌ na ja Dios pro ni chijutij. Queriꞌ ja rchomarsan ja Dios.
\v 29 Queriꞌ rbanic como ixix yatajnak jun privilegio chewe chi yukul ecꞌuꞌx ruqꞌuin ja Cristo in nixsamaj pa rcuenta. Pro ma ruyon tariꞌ como cꞌo chi na jun privilegio yatajnak chewe jariꞌ chi netij rpokonal rmal ja Cristo chakajaꞌ.
\v 30 Como ni queriꞌ ebanon ixix wachꞌalal ja caniꞌ nbanon anin, ixix etijon ja rpokonal rmal ja Cristo chakajaꞌ. Bien xetzꞌat ja rpokonal xintij nabey in ekajnak chic rbixic ewqꞌuin chi cꞌoli ja rpokonal nmajon rtijic camic.
\c 2 
\s * * * * * * * * * * 
\p 
\v 1 Wachꞌalal, ja tok xa jun kabanon ruqꞌuin ja Cristo ¿la matiyukbaꞌ cꞌa riꞌ kacꞌuꞌx ariꞌ rmal? ¿La matikanaꞌ cꞌariꞌ ja rajoben riꞌil xin Dios ja rcꞌamonto chake in nxucꞌuxuꞌi kanma rmal? ¿La makoquicot cꞌariꞌ rmal ja rEspíritu Santo chi arjaꞌ nokrachbilaj? ¿La ma lokꞌ ta cꞌa nkanaꞌ kiꞌ ariꞌ, la matipokonaj cꞌa riꞌ kawach ariꞌ rmal? 
\v 2 Queriꞌ rbanic wachꞌalal rmalcꞌariꞌ tok congana nban recomendar chewe chi xta jun neban, tewajoꞌ ewiꞌ chibil tak ewiꞌ, xta jun ewiꞌ xta jun ewanma neban. Quirtariꞌ neban utzcꞌa chi nnoji ja quicotemal xin Dios pa wanma emwal. 
\v 3 Maxta cꞌo chꞌaꞌoj teban, maxta teyaꞌ kaj ekꞌij eyon pro ja neban, tebanaꞌ taknoꞌy ewanojelal. Quirtawaꞌ xtechꞌob kaj pa tak ewanma riꞌ: —Ja wachbil ejeꞌeꞌ ja más na e utz canojelal chinwach anin, xquixcheꞌ kaj ta chejujunal. 
\v 4 Maxta xa jaꞌ quixoclaꞌ kaj il tre ja rewxin chejujunal pro ja rubey neban quixoclaꞌ il tre ja quixin chic juleꞌ ewachbil. 
\p 
\v 5 Ja caniꞌ rnaꞌoj ja Cristo Jesús quirtariꞌ ja renaꞌoj ixix chakajaꞌ. 
\v 6 Arjaꞌ xuban tinoꞌy pro makanaꞌ maquita Dios. Arjaꞌ masqui xa e junan ruqꞌuin ja Dios chilaꞌ chicaj pro ma xpokonaj ta xuyaꞌ can, peti waweꞌ chwachꞌulew. 
\v 7 Ja chilaꞌ chicaj congana nim rukꞌij pro jariꞌ ma xpokonaj ta xuyaꞌ can nojelal, peti waweꞌ chwachꞌulew, xoc kach winak in xoc jun ilinel. 
\v 8 Queriꞌ cꞌa xuban xoc kach winak, xuban tinoꞌy, ni xnimaj wiꞌ ja Tatixel, nixtacꞌa xpokonaj ta camsaxi pro jun camíc ja más chi na lawuloꞌ ban tre como chwach cruz camsax wiꞌ. 
\v 9 Rmalcꞌariꞌ ja Dios tok arjaꞌ rcojon chic ja Jesús chilaꞌ chicaj como jun nimlaj Rey, rcojon chic como Rajaw nojelal, mta jun nak chi ta ja más chi ta nim rukꞌij chwach ja Jesucristo. 
\v 10 Queriꞌ rbanon ja Dios utzcꞌa chi majun nak ta ja maquita nxuqueꞌ chwach ja Jesús pro puersa nexuqueꞌ na chwach canojelal tanto chique ja recꞌo chilaꞌ chicaj in chique ja recꞌo chwachꞌulew in chique ja recꞌo xeꞌ ulew chakajaꞌ. 
\v 11 Queriꞌ rbanon ja Dios utzcꞌa chi canojelal ja winak quewaꞌ xtiquibij riꞌ: —Ja Jesucristo arjaꞌ Rajaw nojelal. Queriꞌ xtiquibij na tre xa nak ta chi tzobalil netzijon wiꞌ. Ja tok queriꞌ nqueban jariꞌ noc yaꞌbal rukꞌij ja Dios ja Tatixel. 
\s * * * * * * * * * * 
\p 
\v 12 Rmalcꞌariꞌ chakꞌlaj wachꞌalal camic nbij chewe, como ni xinenimaj wiꞌ ja tok xinqꞌuejeꞌ checojol pro ja camic más chi na nixnuban animar chi ninenimaj masqui ma incꞌo chi ta checojol. Chewiꞌ tok nbij chewe camic, tetijaꞌ ekꞌij chi rilic nojel ja totajem ja rchomin ja Dios chi nuyaꞌ chewe pro xarwariꞌ texbej ewiꞌ chwach ja Dios, ni turkaj wiꞌ chewe chi ma quixcowini newil ja xta eyon. 
\v 13 Queriꞌ nbij chewe como ja katataꞌ Dios arjaꞌ nsamaji pa tak ewanma chi rbanic ja rvoluntad, arjaꞌ nyoꞌ chewe chi npit egana ruqꞌuin ja rutzil ja najoꞌx chewe rmal chi neban in nuyaꞌ ja rewachokꞌakꞌ chakajaꞌ chi nixcowini neban cumplir ja rvoluntad. 
\p 
\v 14 Tebanaꞌ nojel ja yatajnak chewe chi neban pro makanaꞌ wixwotem, makanaꞌ sícꞌ chꞌaꞌoj. 
\v 15 Queriꞌ nbij chewe utzcꞌa chi ni katzij wiꞌ chi ix ralcꞌwal Dios nixtzꞌati utzcꞌa chi majun nak ta nixchapbexi in ni chꞌajchꞌoj wiꞌ ja rewanma. Quirtariꞌ neban jutzꞌit utzcꞌa chi mta ja ritzelal pa tak ecꞌaslemal ixix masqui ixcꞌo chiquicojol juleꞌ winak ja xa yojtajnak quinaꞌoj, juleꞌ winak ja congana itzel quicꞌaslemal. Pro ja rixix ix caniꞌ jun luz ja nsakirsan quebey chiquewach chipan ja kꞌekumal 
\v 16 como emwal ixix ja tok nkꞌalajin chiquewach nak rbanic ja utzlaj tzij ja nyoꞌ jun cꞌacꞌa cꞌaslemal chake. Ja wi queriꞌ neban janila xquinquicot emwal ja tok xtipi chic jutij ja Jesucristo. Ninquicoti como triꞌ xtintzꞌat wiꞌ chi ma chaka ta queriꞌ ja tok congana ntijon nukꞌij chipan ja nimlaj samaj chi etoꞌic pro cꞌoli rcꞌamonto. 
\v 17 Pro masqui nincamsax na pro ni ninquicot wiꞌ chakajaꞌ. Como ja yukulbal ecꞌuꞌx ixix jariꞌ caniꞌ jun ofrenda ja netzujuj chwach ja Dios in wi anin nincamsaxi jariꞌ ninoc in caniꞌ jun ofrenda chakajaꞌ, jun ofrenda ja nrachbilaj riꞌ ruqꞌuin ja rofrenda ja netzujuj ixix. Jariꞌ ninquicoti wachꞌalal in ninquicot ewqꞌuin ewanojelal. 
\v 18 Quixquicot ixix chakajaꞌ wachꞌalal, quixquicot wqꞌuin. 
\s * * * * * * * * * * 
\p 
\v 19 Ja wi rvoluntad ja kajaw Jesucristo chi ntakel ja Timoteo ewqꞌuin jariꞌ ntaklaꞌel chanim utzcꞌa kas nxucꞌuxuꞌi ja wanma tok xtincꞌwaxaj nak ja rebanon. 
\v 20 Mchita jun kachꞌalal wqꞌuin camic ja junan ta quinaꞌoj ruqꞌuin ja Timoteo como arjaꞌ nojel rucꞌuꞌx nojel ranma ixryaꞌon pa cuenta nak ja ncꞌatzin chewe. 
\v 21 Pro canojel ja juleꞌ chic xa quixin kaj ejeꞌeꞌ nqueyaꞌ pa cuenta no ja xin Jesucristo jariꞌ matiqueyaꞌ pa cuenta. 
\v 22 Pro ixix bien ewotak janiꞌ rnaꞌoj ja Timoteo, bien ewotak chi arjaꞌ samajnak wqꞌuin caniꞌ jun alcꞌwalaxel nsamaj ruqꞌuin ja rtataꞌ, kachbilan kiꞌ ruqꞌuin chi rbixic ja utzlaj tzij xin Jesucristo chique ja winak. 
\v 23 Rmalcꞌariꞌ tok nwajoꞌ ntakel ewqꞌuin chanim. Ja tok xtinwotakij nak ja xtiban chwe waweꞌ ja bar incꞌo wiꞌ camic tokocꞌariꞌ ntaklaꞌel ja Timoteo ewqꞌuin. 
\v 24 In ninbe anin ewqꞌuin chanim chakajaꞌ wi rvoluntad ja kajaw Jesucristo chi ninbe. 
\p 
\v 25 Pro ja xinchꞌob anin camic chi rjawaxic ntakel ja kachꞌalal Epafrodito ewqꞌuin nabey. Ja rEpafrodito arjaꞌ wachbil chipan ja samaj xin Dios, ok soldado xin Jesucristo ruqꞌuin. Ixix xixtakoto ja rEpafrodito chi arjaꞌ ninurtoꞌoꞌ chipan xa nak ta ncꞌatzin chwe. 
\v 26 Pro camic ntakel chic ewqꞌuin como arjaꞌ congana rgana nutzꞌat chic jutij riꞌ ewach ruqꞌuin ewanojelal. Arjaꞌ tok xekaj rbixic ewqꞌuin chi cꞌo jun yobil xoc tre xa janiꞌ bison más. 
\v 27 Ni katzij wiꞌ chi congana yawaji, jutzꞌit laj cami. Pro ja Dios xpokonaj rwach, ma xcam ta. In triꞌ xintzꞌat wiꞌ chi ja Dios xpokonaj nwach anin chakajaꞌ como ja wixta cami jariꞌ xta janiꞌ xinbison chic anin rmal. 
\v 28 Rmalcꞌariꞌ tok congana ngana ntakel ja rEpafrodito ewqꞌuin utzcꞌa tok xtekaj ewqꞌuin janila nixquicot trij utzcꞌa chakajaꞌ chi ma kas ta ninbison chic anin. 
\v 29 Ja cꞌa tok xtekaj ewqꞌuin tecꞌuluꞌ pa rubiꞌ ja kajaw Jesucristo, kas quiꞌil rcꞌulic tebanaꞌ. Kas lokꞌ tenaꞌaꞌ jutzꞌit in ma ruyon ta arjaꞌ ja neban queriꞌ tre pro quirtariꞌ neban chique chakajaꞌ ja juleꞌ chic ja xa junan quinaꞌoj ruqꞌuin. 
\v 30 Queriꞌ nbij chewe como arjaꞌ laj cami pro rumac ja samaj xin Cristo. Ma xpokonaj ta xuyaꞌ riꞌ pa camíc chi ntoꞌic, xurjachaꞌ chwe ja rayuda ja xetakto como ma xixcowin ta xinekꞌijlaꞌ ewanojel. 
\c 3 
\s * * * * * * * * * * 
\p 
\v 1 Camic wachꞌalal nbij chewe quixquicoti pa rubiꞌ ja kajaw Jesucristo. Cꞌoli ja ntzꞌiban chic ja recꞌwaxan chic pro ma itzel ta nnaꞌ ntzꞌibaj chic jutij camic in congana ncꞌatzin chewe. 
\v 2 Tebanaꞌ cuenta ewiꞌ chiquewach ja winak ja xa e caniꞌ tzꞌiꞌ, xa e itzel tak ajsamajelaꞌ. Ejeꞌeꞌ chaka nquikupijel jutzꞌit ja quichꞌacul jariꞌ circuncisión necheꞌ tre. 
\v 3 Pro ajoj ja kas katzij chi okbanon circuncidar, ma ejeꞌeꞌ ta. Queriꞌ nbij chewe como ajoj nkayaꞌ lugar tre ja rEspíritu Santo chi arjaꞌ nsamaji pa tak kanma in ruqꞌuin kanma nkaban ja samaj xin Dios. Ajoj nkayaꞌ rukꞌij ja Cristo Jesús in ma kuqꞌuin ta ajoj yukul kaj wiꞌ kacꞌuꞌx kayon. 
\v 4 Ja cꞌa chwe anin sobre ja razón cꞌo wqꞌuin ja wixta cꞌo ngana nyukeꞌ kaj nucꞌuꞌx wqꞌuin anin nuyon. Más chi na nrazón chwach xa nak ta chi winakil ja nuchꞌob chi cꞌo razón ruqꞌuin chi nyukeꞌ kaj rucꞌuꞌx ruqꞌuin arjaꞌ ruyon. 
\v 5 Quewaꞌ nrazón riꞌ. Ja tok xuban waxakiꞌ kꞌij quinalaxi xinba̱n circuncidar. Anin in aj Israel, in rjaꞌtzul can ja Benjamín ja rcꞌajol Israel. Anin in puro hebreo como ja nataꞌ nuteꞌ ejeꞌeꞌ e puro rjaꞌtzul can ja rAbraham. Congana xintijoj wiꞌ tre ja ley xin Dios ja tzꞌibtal can rmal ja Moisés como xinoc fariseo. 
\v 6 Janila xinyaꞌ rukꞌij ja kareligión ja rok fariseo como congana pokon xinban chique ja riglesia rmal. Ni xinban wiꞌ cumplir ja ley, ni majun nak ta ninchapbexi ja xinchꞌob anin. 
\v 7 Nojel awaꞌ ja cꞌa xinbij kaj chewe riꞌ congana nim rukꞌij ja xinchꞌob anin nabey pro ja camic nbanon tre ja ni mchita pro xa rmal ja Cristo tok nbanon queriꞌ tre. 
\v 8 In ma ruyon tariꞌ, queriꞌ nbanon tre nojelal como jariꞌ ma vale ta chwach ja xinwotakij rwach ja wajaw Cristo Jesús. Ja tok xinwotakij rwach ja Cristo jariꞌ más na vale chwach nojelal. Rmal ja Cristo chewiꞌ tok nyaꞌon can nojelal in ja chwe anin nojel ja nyaꞌon can jariꞌ xa caniꞌ juleꞌ kꞌayis ja nel pa mes. Anin nyaꞌon can nojelal utzcꞌa chi nqꞌuejeꞌe ja Cristo pa wanma pro ni chijutij. 
\v 9 Anin nyaꞌon can nojelal utzcꞌa chi ni mta wiꞌ ja maquita jun kabanon ruqꞌuin ja Cristo utzcꞌa chi utz ninrutzꞌat ja Dios pro ma rmal ta ja nbanon cumplir ja tzꞌibtal chipan ja ley pro rmal ja yukulbal nucꞌuꞌx ruqꞌuin ja Jesucristo. Jariꞌ Dios nsipan chake in rmal ja yukulbal kacꞌuꞌx ruqꞌuin ja Jesucristo chewiꞌ tok nuyaꞌ chake. 
\v 10 Queriꞌ nwajoꞌ anin utzcꞌa chi bien nwotakij janiꞌ rnaꞌoj ja wajaw Jesucristo utzcꞌa chi bien nwotakij nak rbanic ja poder xin Dios pro jun poder ja cꞌaso rxin ja Jesucristo chiquicojol camnakiꞌ. Anin nwajoꞌ nwachbilaj ja Jesucristo chi rtijic ja rpokonal, nwajoꞌ nwachbilaj chipan ja rcamic 
\v 11 como ja kas ngana anin chi nuyaꞌ ja Dios chwe chi nincꞌastaj chiquicojol ja camnakiꞌ chakajaꞌ. 
\s * * * * * * * * * * 
\p 
\v 12 Pro ma ja ta nbij chi: —Wotakin chic nojelal, nincheꞌ ta, owi: —Majun ja maquita utz tre ja ncꞌaslemal, nincheꞌ ta chakajaꞌ. Pro congana nmajon rtijic nukꞌij utzcꞌa chi nchꞌec ja premio xin Cristo como queriꞌ rvoluntad ja Cristo Jesús chewiꞌ tok xinruchaꞌ. 
\v 13 Wachꞌalal, ja chwe anin cꞌa cꞌo na ja majaꞌn tinchꞌec pro caniꞌ jun cꞌamcꞌoj anim nmajon utzcꞌa chi nchꞌec ja premio ja chomin pon chic chinwach. Pro ni majun caso nyaꞌ tre ja njalon can chic 
\v 14 pro congana nmajon rtijic nukꞌij utzcꞌa chi nenwilaꞌ na ja bar xquinekaj wiꞌ ja bar xtiyaꞌ wiꞌ chwe ja premio como cꞌo jun premio nyataj chake ja tok xa jun kabanon ruqꞌuin ja Jesucristo jariꞌ nokban invitar rmal ja katataꞌ Dios chi nokeqꞌuejeꞌ na ruqꞌuin chilaꞌ chicaj. 
\p 
\v 15 Nojel awaꞌ xinbij chewe riꞌ quewaꞌ ta nkachꞌob jutzꞌit kanojelal wachꞌalal ja cowirnak chic kawiꞌ kanma chipan ja rtzobal Dios. Ja wi cꞌo jeꞌe ja ma junan ta nkachꞌob tre ewqꞌuin Dios nkꞌalasaj na chewach chakajaꞌ nak ja kas mero rubey. 
\v 16 Xarwariꞌ ja chꞌobtajnak chic kumal kacꞌamaꞌ kiꞌ chi rnimaxic, xa junan kabanaꞌ. 
\p 
\v 17 Camic wachꞌalal tecꞌamaꞌ ja rejemplo ja nyaꞌon chewach, kas teyaꞌaꞌ caso chique ja kachꞌalal ja junan quinaꞌoj wqꞌuin como okocnak ejemplo chewach. 
\v 18 Queriꞌ nbij chewe como e qꞌuiy ja xa ma utz ta quinaꞌoj. Qꞌuiylaj mul nbin chewe nak quibanic in camic pan okꞌej nbij chic jutij chewe chi ejeꞌeꞌ riꞌ winak xa quicꞌulel ja tijonem ja ncꞌutu chikawach nak rcꞌamonto ja cruz xin Cristo. 
\v 19 Pro ejeꞌeꞌ riꞌ winak xa nebe na chipan ja nimlaj rpokonal. Ja nyarij ja quicuerpo jariꞌ ocnak quidios. Cꞌo na nqueban ja xa qꞌuixbal rbanic pro nqueyaꞌ quekꞌij rmal, xa jaꞌ nquechꞌob ja xin rwachꞌulew. 
\v 20 Pro ja rajoj okcꞌo pa rcuenta jun tinamit ja cꞌo chilaꞌ chicaj ja bar xtipi wiꞌ ja Toꞌonel jariꞌ ja kajaw Jesucristo in camic nojel kacꞌuꞌx kamajon raybexic. 
\v 21 Ajoj xok way xok yaꞌ pro ja Jesucristo nerilaꞌ na jun kꞌij tok xtuqꞌuex na ja kacuerpo. Caniꞌ xuban arjaꞌ tok qꞌuextaji ja rcuerpo congana chic ruchꞌaꞌ queriꞌ cꞌa xtuban tre ja kacuerpo ajoj chakajaꞌ. Jariꞌ bien ncowini nuban como ja rchokꞌakꞌ congana nim rmalariꞌ noc na pa rukꞌaꞌ nojelal. 
\c 4
\s * * * * * * * * * * 
\p 
\v 1 Rmalcꞌariꞌ nbij chewe wachꞌalal, cow quixpeꞌi pa rubiꞌ ja kajaw Jesucristo. Chakꞌlaj wachꞌalal janila nixwajoꞌ, congana ngana nutzꞌat riꞌ kawach ewqꞌuin. Janila jun quicotemal ecꞌamonto chwe, ixocnak ix caniꞌ jun premio ja nyataj na chwe. 
\p 
\v 2 Camic cꞌo jun paxbanem nyaꞌ chique ja kachꞌalal Evodia rachbil Síntique. Como xa jun quibanon ruqꞌuin ja kajaw Jesucristo congana nban recomendar chique chi xta jun nquechꞌob. 
\v 3 In atat chakajaꞌ ja rat utzlaj wach ajsamajel tabanaꞌ jun utzil, queꞌapaxbaj jutzꞌit ja kachꞌalal ixokiꞌ Evodia in Síntique utzcꞌa chi nquichomij quiꞌ. Como ejeꞌeꞌ congana xesamaji, kachbilaj kiꞌ cuqꞌuin chi rbixic ja utzlaj tzij xin Jesucristo in queriꞌ xuban chakajaꞌ ja Clemente e rachbil canojel ja juleꞌ chic wach tak ajsamajelaꞌ. Ejeꞌeꞌ tzꞌibtal quebiꞌ chipan ja libro xin Dios ja bar tzꞌibtal wiꞌ quebiꞌ ja winak ja nyataj chique ja utzlaj cꞌaslemal ja mta qꞌuisic trij. 
\p 
\v 4 Wachꞌalal, quixquicoti pa rubiꞌ ja kajaw Jesucristo pro ni chijutij. In nbij chic jutij chewe ni quixquicot wiꞌ. 
\v 5 Tiqꞌuejeꞌe ja repaciencia cuqꞌuin ja winak canojelal. Bien turkaj chewe chi xa nnakajinto ja kꞌij ja tok xtipi chic jutij ja kajaw Jesucristo. 
\p 
\v 6 Maxta texbej ewiꞌ chwach xa nak ta ja xtipi chewij pro ja neban, teyaꞌaꞌ pan oración nojelal, tebij tre ja Dios nojel ja cꞌo pa tak ewanma, tecꞌutuj tre xa nak ta ja ncꞌatzin chewe in temaltioxij tre chakajaꞌ. 
\v 7 Ja wi neyaꞌ pan oración nojelal jariꞌ nyataj chewe ja quicotemal xin Dios pro jun quicotemal ja más kꞌaxnak chi na, makocowini nkachꞌob janila nim, jun quicotemal ja nsamaji pa tak ewiꞌ pa tak ewanma chi echajixic pro xa rumac ja xa jun ebanon ruqꞌuin ja Cristo Jesús tok nba̱n queriꞌ chewe. 
\s * * * * * * * * * * 
\p 
\v 8 Wachꞌalal, ja camic cꞌo jun qꞌuisbal paxbanem nyaꞌ chewe riꞌ. Ja rutzil ni ta ja wiꞌ nechꞌob jutzꞌit pa tak ewiꞌ pa tak ewanma. Xa nak ta ja utz ntzꞌa̱t rmal ja Dios ja tariꞌ nechꞌob. Ja tawaꞌ nechꞌob jutzꞌit ja xtinbij chewe riꞌ, nojel ja ni katzij wiꞌ ja mta engaño rcꞌan, nojel ja nim rukꞌij ntzꞌa̱t rmal ja Dios, nojel ja ni rubey wiꞌ, nojel ja rcꞌamonto jun chꞌajchꞌojlaj cꞌaslemal, nojel ja nwinakarsani ja rajoben riꞌil xin Dios, in nojel ja utz ncꞌaxaxi, ni ta ja wariꞌ nechꞌob wachꞌalal. 
\p 
\v 9 Ja tok xinqꞌuejeꞌ checojol xewotakij ja tijonem ja xinyaꞌ chewe, xenimaj, xecꞌwaxaj janiꞌ nintzijoni, xetzꞌat janiꞌ ja ncꞌaslemal. Camic tecꞌamaꞌ ja rejemplo ja nyaꞌon chewach. Ja wi queriꞌ neban jariꞌ nqꞌuejeꞌ ewqꞌuin ja Dios ja nyowi ja nimlaj quicotemal. 
\s * * * * * * * * * * 
\p 
\v 10 Ja camic wachꞌalal congana ninquicoti pa rubiꞌ ja kajaw Jesucristo rumac ja xetakpi chic jun ti ayuda chwe. Cꞌo chic tiempo ja mchita ayuda etakonto pro bien wotak chi cꞌol egana netakto pro como mta ncꞌamoto chewiꞌ tok ma etakonpi ta. 
\v 11 Pro ja tok nbij queriꞌ chewe ma rmal ta chi cꞌol ayuda nwajoꞌ chewe como anin ni ninquicot wiꞌ nojel tiempo chi cꞌoli owi mta cꞌo wqꞌuin jariꞌ bien cꞌamonnak chic chwe. 
\v 12 Anin cꞌamonnak chwe chi in mebaꞌ in chakajaꞌ cꞌamonnak chwe chi in biyom. Nojel inkꞌaxnak chipan in ni ninquicot wiꞌ xa bar ta triꞌ incꞌo wiꞌ, xa nak ta nbanon, wi innojnak owi inmajtajnak ma waꞌal, wi sobre pwok wqꞌuin owi maril ncanoyi jun ti ncentavo. 
\v 13 Ja Cristo arjaꞌ nyowi wachokꞌakꞌ in rmalariꞌ nojel nincowini ncochꞌ xa nak ta npi chwij. 
\v 14 Pro congana buena xeban chwe chi xetakto ja ti ayuda jariꞌ caniꞌ ixix jun ixcꞌo wqꞌuin chipan ja rcꞌayewal ja rincꞌo wiꞌ camic riꞌ. 
\p 
\v 15 Ja tok kas nabey xenyaꞌaꞌ rbixic ja utzlaj tzij xin Jesucristo in tok xinel chipan ja departamento Macedonia bien ewotak wachꞌalal chi eyon ixix ja rixcꞌo pa Filipos xeyaꞌ jun ayuda chwe no juleꞌ chic kachꞌalal ja recꞌo chipan ja juleꞌ chic iglesia ma queriꞌ ta queban chwe. 
\v 16 Pior ja tok xinqꞌuejeꞌ chipan ja tinamit Tesalónica caꞌmul oxmul xetak ti wayuda. 
\v 17 Pro ma ayuda ta tzꞌel nwach trij pro ja kas ngana anin Dios ta xtiyoꞌ chewe jun nimlaj rtojbalil rmal ja rutzil xeban chwe. 
\v 18 Nojel ja xetakto jariꞌ xurjach pa nukꞌaꞌ rmal ja kachꞌalal Epafrodito rmalariꞌ tok majun nak chi ta rjawaxic chwe camic, in caniꞌ biyom chic nnaꞌ kaj. Ja rayuda xeyaꞌ chwe jariꞌ caniꞌ jun ofrenda xetzujuj tre ja Dios pro jun ofrenda ja congana quiꞌ rxulaꞌ nunaꞌ ja Dios, utz nutzꞌat in kas nel rucꞌuꞌx trij. 
\v 19 Ja nataꞌ Dios arjaꞌ nuyaꞌ na chewe ixix chakajaꞌ xa nak ta ja ncꞌatzin chewe como más kꞌaxnak chi na ja rmebaꞌil ja nuyaꞌ chawe tok xa jun abanon ruqꞌuin ja Cristo Jesús. 
\v 20 Kas ta xtiyaꞌ rukꞌij ja katataꞌ Dios camic, chwak in chijutij. Amén. 
\s * * * * * * * * * * 
\p 
\v 21 Teyaꞌaꞌ rutzil quewach ja kachꞌalal chiquijujunal ja re xin Dios ja xa jun quibanon ruqꞌuin ja Cristo Jesús. Ja kachꞌalal ja recꞌo wqꞌuin ejeꞌeꞌ nquetakel rutzil ewach ixix chakajaꞌ. 
\v 22 Ja kachꞌalal ja re xin Dios ja nesamaji pa rochoch ja César ja lokꞌlaj rey aj Roma ejeꞌeꞌ nquetakel rutzil ewach chakajaꞌ in queriꞌ nqueban canojel ja kachꞌalal. 
\p 
\v 23 Kas ta xtiqꞌuejeꞌe ja rutzil rxin ja kajaw Jesucristo pa tak ewanma ewanojelal. Amén.