\id COL Western Tzutujil [tzt] NT (Guatemala) -2009 bd. 
\h COLOSENSES 
\toc1 Colosenses 
\toc2 Col
\mt COLOSENSES
\c 1
\s 
\p
\v 1 Anin ja rin Pablo, Dios inrcojon chi inocnak apóstol rxin ja Jesucristo. Anin wachbil ja kachꞌalal Timoteo nkatzꞌibaj jawaꞌ carta riꞌ
\v 2 in ntakel ewqꞌuin wachꞌalal ja rix aj Colosas. Ixix ix tinamit xin Dios, cꞌoli ja yukulbal ecꞌuꞌx ruqꞌuin ja Cristo Jesús, xa jun ebanon ruqꞌuin. Ja rutzil ja nsipaj ja Dios chake rachbil ja quicotemal xin Dios ja tariꞌ xtecochij más tre ja katataꞌ Dios in tre ja kajaw Jesucristo.
\s * * * * * * * * * *
\p
\v 3 Ajoj ni nkaban wiꞌ oración pan ecuenta in ni nkamaltioxij wiꞌ tre ja Dios ja Tatixel rxin ja kajaw Jesucristo.
\v 4 Nkamaltioxij tre como xurkaj rbixic kuqꞌuin chi ja rixix ni yukul wiꞌ ecꞌuꞌx ruqꞌuin ja Cristo Jesús in congana neꞌewajoꞌ canojel ja kachꞌalal ja re tinamit xin Dios.
\v 5 Queriꞌ neban como cꞌo jun nimlaj herencia xin Dios ewayben ja cꞌolon chilaꞌ chicaj. Jawaꞌ herencia riꞌ ecꞌwaxan chic nak rbanic, tokoriꞌ xecꞌwaxaj ja tok bix chewe ja utzlaj tzij xin Jesucristo pro juleꞌ tzij ja ni majun tzꞌakoj tzij rcꞌan.
\v 6 Jawaꞌ utzlaj tzij riꞌ ekajnak chic rbixic ewqꞌuin in benak nat nakaj chakajaꞌ nojel rwachꞌulew, congana utzil ntajini nwinakarsaj pa tak canma ja winak in e qꞌuiy ja netajini nquinimaj. Queriꞌ rbanon ja utzlaj tzij checojol ixix chakajaꞌ, congana utzil rwinakarsanto checojol, tokoriꞌ xumajto ja tok kas xecꞌwaxaj nabey ja utzlaj tzij tok chꞌobtaj emwal chi utz ja kas mero rubey ja rutzil ja nsipax chake rmal ja Dios.
\v 7 Jariꞌ chꞌob chewach rmal ja chakꞌlaj kachꞌalal Epafras. Ja Epafras arjaꞌ kachbil chipan ja samaj como nuban ja samaj xin Cristo pro emwal ixix tok nsamaji, arjaꞌ jun achi ja ni nuban wiꞌ cumplir ja ntzujuj.
\v 8 Arjaꞌ xurbin chake chi ja rixix congana neꞌewajoꞌ ja kachꞌalal como ntajini nsamaji ja rEspíritu Santo pa tak ewanma.
\p
\v 9 Ja cꞌa tok xurkaj rbixic kuqꞌuin chi queriꞌ ebanon ni kamajto wiꞌ rbanic oración pan ecuenta, quewaꞌ ja roración nkaban riꞌ. Dios ta xtiyoꞌ chewe chi bien newotakij ja rvoluntad, ja ta rEspíritu Santo xtiyoꞌ chewe ja renaꞌoj in xtuchꞌob ta chewach nak ja rubey in nak ja ma rubey ta.
\v 10 Xtewcꞌaj ta jun utzlaj cꞌaslemal como ni yatal wiꞌ chakij chi queriꞌ nkaban ja tok kaniman chic ja kajaw Jesucristo. Xtewcꞌaj ta jun cꞌaslemal ja congana utz ntzꞌa̱t rmal ja Dios, jun cꞌaslemal ja nwinakarsaj nojel rwach ja rutzil. Kꞌij kꞌij ni ta xtewotakij wiꞌ más janiꞌ rnaꞌoj ja Dios.
\v 11 Dios ta xtiyoꞌ chewe chi congana ewachokꞌakꞌ, xtoc ta chewe ja nimlaj poder ja cꞌo ruqꞌuin pa gloria utzcꞌa chi ni matiqꞌuis wiꞌ ja repaciencia utzcꞌa chi nixcowini necochꞌ xa nak ta newil chipan ja recꞌaslemal pro ruqꞌuin ta quicotemal.
\v 12 Ni ta nemaltioxij wiꞌ tre ja katataꞌ Dios como arjaꞌ ryaꞌon chake chi ajoj jun cꞌo kakꞌaꞌ tre ja herencia ja nuyaꞌ chake ja rok rtinamit, ryaꞌon chake chi nokqꞌuejeꞌ chipan jun gobierno ja bar nchꞌaꞌan wiꞌ ja gloria xin Dios.
\v 13 Arjaꞌ xokrutoꞌ pa rukꞌaꞌ ja kꞌekumal in xokrucoj chic chipan ja gobierno xin Jesucristo ja chakꞌlaj Ralcꞌwal.
\v 14 Como xa jun chic kabanon ruqꞌuin ja Jesucristo rmalcꞌariꞌ tok okwasanel chic libre, arjaꞌ xutix ja rquiqꞌuel pa kacuenta jariꞌ xokrlasbejel libre. Ok libre chic como cuytajnak chic ja kil kamac.
\s * * * * * * * * * *
\p
\v 15 Ruqꞌuin ja Ralcꞌwal Dios nkatzꞌat wiꞌ janiꞌ ja kas mero rbanic ja Dios ja matitzꞌattaji. Mchita jun nak chi ta nim ta rukꞌij chwach ja Ralcꞌwal Dios.
\v 16 Queriꞌ nbij chewe como nojel ja tzꞌucarsanto jeꞌe mta ariꞌ ja maquita ruqꞌuin arjaꞌ tzꞌucarsanto wiꞌ. Caniꞌ tre ja cꞌo jeꞌe chicaj in chakajaꞌ ja cꞌo jeꞌe chwachꞌulew, caniꞌ tre nojel ja ntzꞌattaji in chakajaꞌ nojel ja matitzꞌattaji, caniꞌ chique ja ángel ja cꞌo kꞌetbaltzij pa quekꞌaꞌ xa nak ta chi angelil, ni majun nak ta ja maquita tzꞌucarsanto rmal ja Ralcꞌwal Dios, tzꞌucarsanto nojelal utzcꞌa chi noc yaꞌbal rukꞌij arjaꞌ.
\v 17 Ni cꞌo chi wiꞌ ja Ralcꞌwal Dios ja tok majaꞌn titzꞌucarsaxi ja caj in rwachꞌulew. Arjaꞌ cꞌayon rxin nojelal ja tzꞌucarsanto jeꞌe in xa rmal ja nimlaj poder cꞌo ruqꞌuin chewiꞌ tok matiyojtaji nojelal.
\v 18 Arjaꞌ nbano mandar kaxin ja rok iglesia caniꞌ nuban jun wiꞌaj nuban mandar ja cuerpo. Ruqꞌuin arjaꞌ winakarto wiꞌ ja cꞌacꞌa cꞌaslemal kucꞌan como arjaꞌ ja kas nabey cꞌastaji chijutij chiquicojol camnakiꞌ. Queriꞌ rbanic utzcꞌa chi nij arjaꞌ wiꞌ nnabeyaji utzcꞌa chi mchita jun nak chi ta nim ta rukꞌij chwach arjaꞌ.
\v 19 Queriꞌ rbanic como nojelal ja nojnak pa ranma ja katataꞌ Dios jariꞌ nojnak pa ranma ja Ralcꞌwal Dios chakajaꞌ como queriꞌ rvoluntad ja Dios.
\v 20 Ja Dios xutakto ja Ralcꞌwal chi rchomarsaxic nojelal tanto tre ja cꞌo jeꞌe chwachꞌulew in tre chakajaꞌ ja cꞌo jeꞌe chicaj. Peti ja Ralcꞌwalaxel, xutix ja rquiqꞌuel chwach cruz in xokchomtaj ruqꞌuin ja katataꞌ Dios rmal chi nimlaj kanojelal.
\p
\v 21 Caniꞌ chewe ixix nabey nat ixcꞌo wiꞌ tre ja Dios, ni majun egana ruqꞌuin ja nbij ja Dios pa tak ewiꞌ pa tak ewanma, xa itzelal ja xeban. Pro ja camic ixtzurnak chic ruqꞌuin ja Dios, quewaꞌ xuban ja Dios chi echomarsaxic riꞌ,
\v 22 xutakto ja Ralcꞌwal chi xoc kach winak in cam pa kacuenta. Queriꞌ xuban utzcꞌa chi congana nuban rbanic ja rewanma utzcꞌa kas rwekon riꞌ ja rewanma ja tok nixekaj chwach, mero cꞌaslemal xin Dios ewcꞌan triꞌ, ni majun falta chewe in ni majun nak ta nixchapbexi.
\v 23 Xarwariꞌ, rjawaxic chi mateyaꞌ can ja yukulbal ecꞌuꞌx ruqꞌuin ja Jesucristo, rjawaxic chi bien nixtiqueꞌe in cow nixpeꞌi, maxta ma quixquicot chi ta chi raybexic ja tzujun chake rmal ja Dios ja caniꞌ ncꞌu̱t chikawach rmal ja utzlaj tzij xin Jesucristo. Ekajnak chic rbixic ja utzlaj tzij ewqꞌuin in chakajaꞌ elnak rbixic chique canojel ja winak ja recꞌo chwachꞌulew. Anin ja rin Pablo yatajnak chwe chi nintajini nyaꞌ rbixic jawaꞌ utzlaj tzij riꞌ.
\s * * * * * * * * * *
\p
\v 24 Ja cꞌa camic incꞌo chipan ja rpokonal chi etoꞌic pro ninquicot rmal. Como anin in rachbil ja Cristo chi rtijic ja rpokonal ja majaꞌn tikꞌax trij como cꞌa ntiꞌon na tre ja Cristo nojel ja nba̱n chake ja rok cuerpo rxin ja rok iglesia.
\v 25 Ja Dios arjaꞌ ryaꞌon chwe chi inocnak jun ajsamajel rxin ja riglesia utzcꞌa chi ninbe ewqꞌuin ewanojel ja ma ix aj Israel ta utzcꞌa chi bien nenchꞌoboꞌ chewach ja rtzobal Dios.
\v 26 Como cꞌoli chipan ja rtzobal Dios ja ma kꞌalaj ta chiquewach ja winak chipan ja rojer tak tiempo ja kꞌaxnak can pro ja camic kꞌalasan chic chiquewach ja tinamit xin Dios
\v 27 como ja Dios arjaꞌ rchꞌobon chic chiquewach ja rtinamit chi cꞌo chic ja Cristo pa tak ewanma ja ma ix aj Israel ta in rmalariꞌ ewotak chic chi nixeqꞌuejeꞌ na pa gloria ruqꞌuin ja Dios. Jawaꞌ ja cꞌa xinbij chewe riꞌ xa awatali nabey pro ja Dios rkꞌalasan chic chikawach camic utzcꞌa chi triꞌ nkatzꞌat wiꞌ chi janila nim ja gloria xin Dios ja nsamaji checojol ixix ja ma ix aj Israel ta.
\v 28 Ja cꞌa rajoj xa ni ruyon wiꞌ ja Cristo ja nkayaꞌ rbixic, nekapaxbaj ja kachꞌalal chiquijujunal in nekatijoj chiquijujunal chakajaꞌ como ja Dios arjaꞌ nuyaꞌ kanaꞌoj chi quitijoxic. Queriꞌ nkaban utzcꞌa tok nekaban presentar chwach ja Dios pro bien tzꞌakat ja quicꞌaslemal triꞌ chiquijujunal rmal ja xa jun quibanon ruqꞌuin ja Cristo Jesús.
\v 29 Rmalcꞌariꞌ tok nmajon jun nimlaj lucha, congana ntij nukꞌij pro ja nyoꞌ wachokꞌakꞌ jariꞌ Jesucristo como arjaꞌ congana nsamaji pa ncꞌaslemal chi rbanic jawaꞌ samaj ja nmajon rbanic riꞌ.
\c 2 
\p 
\v 1 Como anin nwajoꞌ chi newotakij wachꞌalal, congana jun nimlaj lucha nintajini nban pan ecuenta in pa quicuenta chakajaꞌ ja kachꞌalal ja recꞌo pa Laodicea in pa quicuenta chakajaꞌ ja juleꞌ chic kachꞌalal ja mta jutij rtzꞌaton ta riꞌ kawach cuqꞌuin. 
\v 2 Nmajon rbanic jun lucha utzcꞌa chi bien nquexim quiꞌ chipan ja rajoben riꞌil xin Dios in rmaltariꞌ ncowir quewiꞌ canma chipan ja utzlaj tzij xin Jesucristo. Ja kas nwajoꞌ chique, kas ta nqꞌuejeꞌe ja quiseguro, kas ta nchꞌobtaj cumal nak rbanic ja rkꞌalasan chic ja katataꞌ Dios chikawach jariꞌ caniꞌ jun nimlaj mebaꞌil nuyaꞌ chake como arjaꞌ rkꞌalasan chic chikawach nak rbanic ja Cristo. 
\v 3 Ruqꞌuin ja Cristo nkawil wiꞌ ja naꞌoj xin Dios pro ni nojelal, ruqꞌuin arjaꞌ nkawil wiꞌ nojelal ja nrajoꞌ ja Dios chake chi nkotakij jariꞌ caniꞌ jun nimlaj mebaꞌil nkawil. Pro solo ruqꞌuin ja Cristo nkawil wiꞌ. 
\v 4 Queriꞌ nbij chewe utzcꞌa chi maquixban engañar cumal juleꞌ winak ja ncajoꞌ nixqueban puersa chi nenimaj ja tijonem ja nqueyaꞌ ejeꞌeꞌ. 
\v 5 Como anin masqui ma incꞌo ta ewqꞌuin camic pro ja respíritu wxin jariꞌ cꞌol ewqꞌuin in congana ninquicot chewij. Ninquicot chewij como wotak chi mta división ebanon in wotak chakajaꞌ chi cow ixpaꞌli tre ja yukulbal ecꞌuꞌx ruqꞌuin ja Cristo. 
\p 
\v 6 Rmalcꞌariꞌ nbij chewe, caniꞌ xeban ja kas nabey xa jun xeban ruqꞌuin ja kajaw Jesucristo ni ta quirwariꞌ neban, ni ta jun wiꞌ neban ruqꞌuin chijutij xa nak ta neban chipan ja recꞌaslemal. 
\v 7 Quixtiqueꞌe chi utz ruqꞌuin caniꞌ rbanic jun cheꞌ ja nat benak rcꞌamal pa tokꞌulew in caniꞌ rbanic jun jay ja bien tzꞌubul parwiꞌ ja rsimientoꞌil. Ticowiri chi utz ja recꞌuꞌx ruqꞌuin ja tijonem xin Jesucristo ja caniꞌ cꞌutun chic chewach in ni ta nemaltioxij wiꞌ tre ja Dios nojelal. 
\s * * * * * * * * * * 
\p 
\v 8 Maxta cꞌo jun achi xquixruchꞌec ta tre juleꞌ tijonem ja junwiꞌ chi na como cꞌoli ja tijonem ja utzlaj tijonem neꞌxi, pro ni majun rsamaj, xa engaño rcꞌamonto, juleꞌ tijonem ja xa winakarsan cumal achiꞌiꞌ, xa juleꞌ costumbre ja nocꞌo rukꞌij in ma ruqꞌuin ta Cristo penak wiꞌ. 
\v 9 Maxta quixban engañar como xa ruqꞌuin Cristo nkatzꞌat wiꞌ nak ja kas mero rbanic ja Dios como arjaꞌ ocnak kach winak in nojel ja cꞌo pa ranma ja Dios ni majun ja maquita cꞌo pa ranma ja Cristo chakajaꞌ. 
\v 10 Ja cꞌa rixix como xa jun ebanon chic ruqꞌuin ja Cristo chewiꞌ tok ewilon chic nojel xa nak ta ncꞌatzin tre ja recꞌaslemal como arjaꞌ ni majun kꞌetbaltzij ja maquita cꞌo pa rukꞌaꞌ. 
\v 11 In jun chic como xa jun ebanon chic ruqꞌuin chewiꞌ tok xixba̱n circuncidar pro jun circuncisión ja ma winak ta ebanyon, jun circuncisión xin Cristo, jariꞌ tok lasaxel chewe nojelal ja ritzelal ja rewcꞌan. 
\v 12 Queriꞌ cꞌa rbanic como xixban bautizar in tok xixban bautizar jariꞌ caniꞌ ixix jun xixmuk ruqꞌuin ja Cristo, caniꞌ ixix jun xixcꞌastaj ruqꞌuin chakajaꞌ. Queriꞌ xeban como cꞌoli ja yukulbal ecꞌuꞌx ruqꞌuin ja nimlaj poder ja xucoj ja Dios ja tok xucꞌas ja Cristo chiquicojol camnakiꞌ. 
\v 13 Ja cꞌa rixix ixcamnak nabey chipan ja rewil emac, ma ixbanon ta circuncidar triꞌ pro cꞌa ewcꞌan na ja ritzelal, pro ja Dios arjaꞌ xuyaꞌ jun cꞌacꞌa cꞌaslemal chewe tokoriꞌ tok xucꞌas ja Cristo chiquicojol camnakiꞌ in xucuy ja rewil emac ewanojelal. 
\v 14 Quewaꞌ xuban ja Dios riꞌ, arjaꞌ xokrutoꞌ pa rukꞌaꞌ ja juleꞌ costumbre ja tzꞌibtal can chipan ja ley xin Dios ja tzꞌibtal can rmal ja Moisés como ja nuban ja ley xa nnataj chake chi ok ajꞌil ok ajmaquiꞌ, xa nokruban condenar pro ja Dios xchomarsaj nojelal utzcꞌa chi mchita rukꞌaꞌ ja costumbre chake pro xa rumac ja rcamic ja Cristo chwach cruz chewiꞌ tok xuban queriꞌ chake. 
\v 15 Arjaꞌ xkajsaj quichokꞌakꞌ ja cꞌo kꞌetbaltzij pa quekꞌaꞌ, bien xkꞌalasaj chiquewach winak chi arjaꞌ chꞌocmaji tokoriꞌ tok camsaxi ja Cristo chwach cruz. 
\p 
\v 16 Rmalcꞌariꞌ nbij chewe maxta teyaꞌ caso chique ja winak ja tok nquechꞌaꞌ chewe nak ja netij jeꞌe owi nquechꞌaꞌ chewe chi matecꞌul juleꞌ nmakꞌij ja ncꞌuli chi junaꞌ owi chi icꞌ owi chi semana. 
\v 17 Jawaꞌ xa juleꞌ costumbre quiniman, xa caniꞌ rnatuꞌ cꞌopi chic ja rutzil ja tzujunto rmal ja Dios pro ja tok peti ja Cristo arjaꞌ xucꞌamto ja mero utzil ja tzujunto rmal ja Dios. 
\v 18 Ecꞌoli winak quewaꞌ nquibij chewe riꞌ: —Ja wi mateban ixix ja caniꞌ nkaban ajoj jariꞌ matiyataj chewe ja premio xin Cristo, necheꞌe, pro maxta teyaꞌ caso chique. Jawaꞌ winak riꞌ congana nquikꞌalasaj quiꞌ chi xa taknoꞌy quibanon in nexuqueꞌ chiquewach ángel. In jun chic ja nqueban, xa nqueyaꞌ kaj quekꞌij queyon rmal ja kꞌalasan jeꞌe chiquewach pro ma Dios ta ja kꞌalasyon chiquewach. Congana e nimak nquenaꞌ kaj pro ni majun quibase tok queriꞌ nqueban. Como xa yojtajnak ja quinaꞌoj rmal il mac chewiꞌ tok kas e nimak nquenaꞌ kaj. 
\v 19 Queriꞌ nqueban como ma bien ta jun quibanon ruqꞌuin ja Cristo. Ja Cristo arjaꞌ wiꞌaj kaxin kanojelal ja rok cuerpo rxin in rmal arjaꞌ tok nokqꞌuiyi. Caniꞌ rbanic jun cuerpo xa jun rbanon, rximon riꞌ chibil tak riꞌ in nnimaj ja nbix tre rmal ja wiꞌaj chi nuban utzcꞌa chi nqꞌuiyi. In queriꞌ cꞌa chake ajoj chakajaꞌ, ja tok nkanimaj ja nbix chake rmal ja Cristo chi nkaban jariꞌ nokqꞌuiy rmal pro jun qꞌuiyem ja utz ntzꞌa̱t rmal ja Dios. 
\p 
\v 20 Ja cꞌa wi katzij chi ixix jun xixcam ruqꞌuin ja Cristo, wi katzij chi ma ixcꞌo chi ta pa rukꞌaꞌ juleꞌ costumbre ja xa nocꞌo rukꞌij ¿nak cꞌa tre tok cꞌa cꞌo na jeꞌe neban caniꞌ cꞌa yukul na ecꞌuꞌx ruqꞌuin ja rwachꞌulew? ¿Nak tre tok nenimaj ja juleꞌ costumbre ja nbix chewe cumal winak? como quewaꞌ nquibij chewe riꞌ: 
\v 21 —Ma tecꞌam ta ja laleꞌ, in ma tetij ta ja laleꞌ in nixtacꞌa jutzꞌit ta nechap ja laleꞌ, xajan, necheꞌe. 
\v 22 Pro ma queꞌenimaj ta como jawaꞌ nakun riꞌ xa nqꞌuisi ja tok natij, mta nuban chawe. Jawaꞌ winak riꞌ xa quinaꞌoj ejeꞌeꞌ ja nquecoj, xa tijonem quixin winak ja nqueyaꞌ. 
\v 23 Cꞌo jeꞌe nquiwinakarsaj nojoj queyon ja nquecoj como quireligión, congana nquikꞌalasaj quiꞌ chi xa taknoꞌy quibanon in cꞌo jeꞌe nqueban kaj pokon tre ja quicuerpo queyon. Jawaꞌ tijonem riꞌ utzlaj tijonem necheꞌe winak, pro ni maticowin wiꞌ xcatrutoꞌ ta chi xcatrukꞌil ta chi rbanic ja ritzelal. 
\c 3 
\p 
\v 1 Ja cꞌa wi ixix jun ixcꞌastajnak ruqꞌuin ja Cristo kas ta cꞌa nel ecꞌuꞌx ariꞌ trij ja xin chilaꞌ chicaj ja bar tzꞌubul chi wiꞌ ja Cristo pa riquikꞌaꞌ ja Dios. 
\v 2 Ruqꞌuin ta ja xin chilaꞌ chicaj nqꞌuejeꞌ wiꞌ ja repensar in maquita ruqꞌuin ja xin rwachꞌulew. 
\v 3 Queriꞌ nbij chewe como ixix jun xixcam ruqꞌuin ja Cristo, cꞌacꞌa chic ja recꞌaslemal, pro jun cꞌaslemal ja bien banon cuenta rmal ja Cristo como xa jun ebanon ruqꞌuin in como arjaꞌ xa jun quibanon ruqꞌuin ja Dios. 
\v 4 Ja Cristo arjaꞌ mismo ocnak kacꞌaslemal camic in tok xtipi chic jutij congana nchꞌaꞌani ntzꞌati, janila nim rukꞌij in queriꞌ chewe ixix chakajaꞌ, newachbilajto in queriꞌ nixtzꞌati ja caniꞌ ntzꞌa̱t arjaꞌ. 
\s * * * * * * * * * * 
\p 
\v 5 Como ixcamnak chic chwach ja il mac ma teban chi ta ixix ja ritzelal ja caniꞌ nqueban winak waweꞌ chwachꞌulew. Quewaꞌ nqueban riꞌ, xa il mac nqueban achiꞌiꞌ cuqꞌuin ixokiꞌ, xa nquitzꞌilorsaj ja quinaꞌoj, chaka benak chi nquiyarij quiꞌ, solo itzelal ja ncajoꞌ. In jun chic nqueban, chaka benak chi nquiyarij quinakun winak. Ja tok chaka benak chi nquiyarij quinakun winak jariꞌ xa nakun jeꞌe nqueyaꞌ rukꞌij, xa jariꞌ ocnak quidios. 
\v 6 Queriꞌ cꞌa rbanic ja ritzelal ja nqueban ja winak ja maqueniman rxin ja Dios in xa rmalariꞌ tok penak ryewal ja Dios chiquij. 
\v 7 In queriꞌ xeban ixix nabey chakajaꞌ ja tok cꞌa ewcꞌan na jun itzel cꞌaslemal como xeban ja juleꞌ itzelal ja cꞌa xinbij kaj chewe riꞌ. 
\v 8 Pro ja camic teyaꞌaꞌ can ixix chakajaꞌ nojel awaꞌ wariꞌ. Ma teban ta ja rewayewal, ma quixkuluj ta, maxta kas kꞌalawachili teban itzel chique winak, ma queꞌetzijoj ta in ma tebij ta ja ritzel tak tzij. 
\v 9 Ma tetzꞌak ta tzij chibil tak ewiꞌ como eyaꞌon can chic ja tzabuklaj cꞌaslemal, eyaꞌon can chic ja banoj itzelal ja caniꞌ xeban nabey 
\v 10 in camic ewcꞌan chic jun cꞌaslemal cꞌacꞌa. Kꞌij kꞌij nba̱n más cꞌacꞌa tre ja cꞌaslemal ja rewcꞌan camic in tok nqꞌuiswani queriꞌ neli ja caniꞌ rcꞌaslemal ja Dios. Queriꞌ rbanic utzcꞌa chi newotakij janiꞌ ja kas mero rbanic ja Dios. 
\v 11 Xa ok jun kanojelal ja kucꞌan jawaꞌ cꞌacꞌa cꞌaslemal ja cꞌa xinbij kaj chewe riꞌ wi ok aj Israel owi ma ok aj Israel ta, wi okbanon circuncidar owi ma okbanon ta circuncidar, wi makocowini noktzijon pa griego, wi congana lawuloꞌ ja tinamit ja rokpenak wiꞌ, wi ok libre owi ok esclavo, pro xa ok jun kanojelal ja kucꞌan ja cꞌacꞌa cꞌaslemal como ja Cristo arjaꞌ nqꞌuejeꞌ pa tak kanma kanojelal in nuban jun chake, solo Cristo ja nim rukꞌij. 
\p 
\v 12 Rmalcꞌariꞌ nbij chewe, como ixchaꞌon rmal ja Dios, como ix rxin chic ja Dios in congana nixrajoꞌ tepokonaj quewach ja winak, tebanaꞌ ja rutzil chique, maxta teyaꞌ ekꞌij chiquewach, xa nak ta ja newil chipan ja recꞌaslemal teyaꞌaꞌ pa rukꞌaꞌ ja Dios, tiqꞌuejeꞌe ja repaciencia 
\v 13 in tok chaka jalal neban ofender ewiꞌ tecochꞌoꞌ in tecuyuꞌ ewiꞌ. Quirtariꞌ neban ja caniꞌ xuban ja Cristo, como arjaꞌ xixrucuy chewiꞌ tok nbij chewe, tecuyuꞌ ewiꞌ ixix chakajaꞌ. 
\v 14 Pro cꞌo jun ja más chi na ncꞌatzini chwach nojelal jariꞌ ja rajoben riꞌil como ja tok newajoꞌ ewiꞌ jariꞌ nuban jun chewe in nojel rwach ja rutzil neban rmal. 
\v 15 Xtiqꞌuejeꞌ ta ja quicotemal xin Dios pa tak ewanma, ja tariꞌ xtucꞌan ewxin. Como ja Dios arjaꞌ xixruchaꞌ utzcꞌa chi nqꞌuejeꞌe ja quicotemal xin Dios checojol como arjaꞌ xa jun rbanon chewe, xa jun cuerpo ebanon. Maxta maquita nemaltioxij tre ja Dios ja rbanon chewe. 
\v 16 Kas ta xtinoji chi utz ja utzlaj tzij xin Cristo pa tak ewiꞌ pa tak ewanma. Tetijoj ewiꞌ in tepaxbaj ewiꞌ pro ruqꞌuin ta ja naꞌoj xin Dios. Tebanaꞌ salmo, tebanaꞌ himno, tebixaj ja bix ja nwinakarsax pa tak ewanma rmal ja rEspíritu Santo pro ruqꞌuin ta ewanma nebixaj rubiꞌ ja kajaw Jesucristo in nemaltioxij tre ja Dios. 
\v 17 Xa nak ta nebij jeꞌe in xa nak ta neban jeꞌe chakajaꞌ pro tebanaꞌ nojel pa rubiꞌ ja kajaw Jesucristo in rmal ta ja Jesucristo chakajaꞌ nemaltioxij tre ja katataꞌ Dios nojel ja rbanon chewe. 
\s * * * * * * * * * * 
\p 
\v 18 Ixix ja rix ixokiꞌ queꞌebanaꞌ respetar ja rewachajilal como ja kajaw Jesucristo queriꞌ nrajoꞌ chewe chi neban. 
\v 19 Ja cꞌa rixix ja rix achiꞌiꞌ queꞌewajoꞌ ja rewixjayilal, maxta xa pokonlaj tak tzij tebij chique. 
\v 20 Ja cꞌa rixix ja rix alcꞌwalaxelaꞌ ni queꞌenimaj wiꞌ ja retataꞌ eteꞌ como ja kajaw Jesucristo arjaꞌ congana nquicot chewij ja tok neꞌenimaj. 
\v 21 Ja cꞌa rixix ja rix tatixelaꞌ maxta queꞌechꞌujarsaj ja rewalcꞌwal matzij xa necapujsaj quecꞌuꞌx chijutij. 
\v 22 Ja cꞌa rixix ja rix moso ni queꞌenimaj wiꞌ ja repatrón ja recꞌo waweꞌ chwachꞌulew. Ecꞌoli moso congana nesamaji tok cꞌoloc ja quipatrón cuqꞌuin utzcꞌa chi utz netzꞌa̱t rmal pro tok nbe ja quipatrón ma kas ta nesamaj can chic pro maxta queriꞌ teban ixix. Pro ja neban, nojel ecꞌuꞌx nojel ewanma tebanaꞌ ja samaj in chwach Dios texbej wiꞌ ewiꞌ. 
\v 23 Ja samaj neban xa nak ta chi samajil tetijaꞌ ekꞌij chi rbanic, tebanaꞌ tre caniꞌ rxin ja kajaw Jesucristo in ma quixin winak ta. 
\v 24 Queriꞌ nbij chewe como ixix bien ewotak chi ruqꞌuin ja kajaw Jesucristo npi wiꞌ ja kas mero rtojbalil jariꞌ ja herencia ja rtzujun chake como ja Cristo ja kajaw jariꞌ ja kas mero Epatrón. 
\v 25 Ja cꞌa winak ja nebanowi ja ritzelal Dios nyowi ja rjil rcꞌaxel chique ja nqueban, ma jun ta utz nutzꞌat in ma jun ta itzel. 
\c 4
\p 
\v 1 Ja cꞌa rixix ja rix patroniꞌ tebanaꞌ chique ja remoso ja caniꞌ nrajoꞌ Dios chewe chi neban chique, utzil ta neban chique. Queriꞌ nbij chewe como ixix bien ewotak chi cꞌo jun Epatrón ixix chakajaꞌ chilaꞌ chicaj. 
\s * * * * * * * * * * 
\p 
\v 2 Camic wachꞌalal ni ma tetanbaꞌ ta wiꞌ rbanic ja roración, quixcꞌascꞌoti chi rbanic in ni temaltioxij wiꞌ tre ja Dios ja rbanon chewe. 
\v 3 In tebanaꞌ orar pa kacuenta ajoj chakajaꞌ, tecꞌutuj tre ja Dios chi arjaꞌ nujak jun bey chikawach utzcꞌa chi nkayaꞌ más rbixic ja rtzobal. Ajoj nkajoꞌ nkayaꞌ más rbixic ja kꞌalasan chic tre ja Cristo ja ma kꞌalasan ta nabey. Rmalariꞌ tok incꞌol anin pa cheꞌ camic. 
\v 4 Tebanaꞌ orar pa ncuenta utzcꞌa chi nincowini nkꞌalasaj chi utz nak rbanic ja Cristo como nijawariꞌ ja yatal chwe chi nban. 
\p 
\v 5 Tecojoꞌ ja naꞌoj xin Dios ja tok nixtzijon cuqꞌuin ja winak ja ma quiniman ta ja Jesucristo. Maxta chaka queriꞌ tikꞌax jun kꞌij chewach pro kꞌij kꞌij ni tebanaꞌ wiꞌ ja rutzil. 
\v 6 Ja tok nixtzijoni ni ta utz wiꞌ ja tzij nebij, cꞌo ta rcꞌamonto chique ja necꞌaxani. Ni ta quirwariꞌ neban utzcꞌa tok cꞌoli ncꞌaxax chewe cumal winak xa nak ta chi winakil pro bien ewotak nak nrajoꞌ ja Dios chewe chi nebij chique. 
\s * * * * * * * * * * 
\p 
\v 7 Ja cꞌa tok xtekaji ja kachꞌalal Tíquico ewqꞌuin arjaꞌ nbij chewe nak ja nbanon waweꞌ. Arjaꞌ jun chakꞌlaj kachꞌalal, jun wach ajsamajel ja xa jun rbanon ruqꞌuin ja kajaw Jesucristo, jun ajsamajel ja ni nuban wiꞌ cumplir ja ntzujuj. 
\v 8 Rmalcꞌariꞌ tok ntakonel ewqꞌuin utzcꞌa chi nerotakij nak ja rebanon utzcꞌa chakajaꞌ chi neryukbaꞌ ecꞌuꞌx. 
\v 9 In ja Onésimo ntakonel chakajaꞌ rachbilanel ja Tíquico. Ja Onésimo arjaꞌ ewach aj tinamit, arjaꞌ jun chakꞌlaj kachꞌalal chakajaꞌ ja ni nuban wiꞌ cumplir ja ntzujuj. Ja tok xqueꞌekaj ewqꞌuin ejeꞌeꞌ nquibij chewe nojel ja majtajnak rbanic waweꞌ. 
\p 
\v 10 Ja kachꞌalal Aristarco arjaꞌ wachbil waweꞌ pa cheꞌ, arjaꞌ nutakel rutzil ewach. Ja kachꞌalal Marcos ja rchꞌalal Bernabé arjaꞌ nutakel rutzil ewach chakajaꞌ. Caniꞌ nbin chic chewe, ja wi xtekaji ja Marcos ewqꞌuin kas quiꞌil rcꞌulic tebanaꞌ. 
\v 11 Ja Jesús ja cꞌo chic jun rubiꞌ Justo neꞌxi, arjaꞌ nutakel rutzil ewach chakajaꞌ. Jawaꞌ roxiꞌ kachꞌalal ja cꞌa xenbij kaj chewe riꞌ ejeꞌeꞌ ninquetoꞌ chipan ja samaj waweꞌ utzcꞌa chi nkayaꞌ rbixic ja gobierno xin Dios pro ma ecꞌo chi ta ja wach tak aj Israel ja rinquitoꞌon ta waweꞌ, xa queyon ejeꞌeꞌ, congana quiyukban nucꞌuꞌx. 
\v 12 Ja kachꞌalal Epafras arjaꞌ ewach aj tinamit, arjaꞌ jun ajsamajel rxin ja Cristo in nutakel rutzil ewach chakajaꞌ. Arjaꞌ congana nutij rukꞌij chi rbanic orar pan ecuenta, ni nixrnataj wiꞌ pan oración. Queriꞌ nuban utzcꞌa chi cow nixpeꞌi utzcꞌa chi nixqꞌuiyi chi utz in nixwachini chipan ja rtzobal Dios utzcꞌa chi ni ta ja wiꞌ neban ja xa nak ta nrajoꞌ ja Dios chewe chi neban. 
\v 13 Anin bien wotak in nbij chewe chi ja kachꞌalal Epafras arjaꞌ congana jun nimlaj lucha ntajini nuban pan ecuenta ixix in pa quicuenta ja recꞌo pa Laodicea in pa quicuenta chakajaꞌ ja recꞌo pa Hierápolis. 
\v 14 Ja chakꞌlaj kachꞌalal Lucas ja doctor arjaꞌ nutakel rutzil ewach in queriꞌ nuban ja kachꞌalal Demas chakajaꞌ. 
\v 15 Teyaꞌaꞌ rutzil quewach ja kachꞌalal ja recꞌo pa Laodicea in queriꞌ ta neban tre ja kachꞌalal Ninfas chakajaꞌ in chique ja riglesia ja nquemol quiꞌ pa rochoch. 
\v 16 Jawaꞌ carta ja ntakel ewqꞌuin riꞌ tok xtisiqꞌuitaj emwal cꞌacꞌariꞌ netakel chic ruqꞌuin ja riglesia ja cꞌo pa Laodicea utzcꞌa chi ejeꞌeꞌ nquisiqꞌuij chakajaꞌ. In cꞌo chic jun ja carta ntakonel cuqꞌuin ja kachꞌalal ja recꞌo pa Laodicea in nwajoꞌ chi ixix nesiqꞌuij chakajaꞌ. 
\v 17 In tebij tre ja kachꞌalal Arquipo: —Catcꞌascꞌoti, tabanaꞌ cumplir ja samaj ja yatajnak chawe pa rubiꞌ ja kajaw Jesucristo, quixcheꞌ tre. 
\p 
\v 18 In camic anin ja rin Pablo ntakel rutzil ewach pro jariꞌ anin nintzꞌibanel ruqꞌuin nukꞌaꞌ. Maxta temestaj chi anin inbacꞌon pa cadena waweꞌ pa cheꞌ. Ja rutzil xin Dios xtiqꞌuejeꞌ ta ewqꞌuin. Amén.