\id 1TI Western Tzutujil [tzt] NT (Guatemala) -2009 bd. 
\h I TIMOTEO 
\toc1 1 Timoteo 
\toc2 1 Ti
\mt 1 TIMOTEO
\c 1
\s 
\p
\v 1 Anin in Pablo ntzꞌibajel chawe ja carta riꞌ Timoteo. Anin in apóstol rxin ja Jesucristo. Jariꞌ nsamaj yaꞌon chwe rmal ja Dios ja Toꞌonel kaxin in rmal ja kajaw Jesucristo chakajaꞌ, arjaꞌ ryukulbal kacꞌuꞌx.
\v 2 Ja cꞌa ratat Timoteo at ncꞌajol chwach Dios. Ja rutzil ja nsipaj ja Dios chake rachbil ja quicotemal xin Dios ja tariꞌ xtacochij más tre ja katataꞌ Dios in tre ja kajaw Jesucristo. Ejeꞌeꞌ ta xtiquipokonaj awach.
\s * * * * * * * * * *
\p
\v 3 Atat awotak ja xinbij can chawe ja tok xinpeti waweꞌ pa Macedonia. Ja xinbij can chawe chi ecꞌo jujun ja tijonem nqueyaꞌ ma junan ta ruqꞌuin ja caniꞌ nkayaꞌ ajoj in xinbij can chic chawe chakajaꞌ chi natqꞌuejeꞌ can pa Efeso chi nachꞌaꞌ chique utzcꞌa chi ma tiqueyaꞌ ta más.
\v 4 In chakajaꞌ xinbij can chawe chi nabij chique chi ma tiqueyaꞌ ta rukꞌij juleꞌ historia in ojer tak tzij quixin ja katiꞌt kamamaꞌ, juleꞌ historia ja mta qꞌuisic trij ja xa winak ewinakarsyon. Nojel ariꞌ mta noc wiꞌ. In mta rcꞌamonto chake tre ja más na nkanimaj ja nrajoꞌ Dios chake chi nkaban in nixtacꞌa tre ta chakajaꞌ ja nqꞌuiyi ja yukulbal kacꞌuꞌx ruqꞌuin.
\p
\v 5 Ja xintzꞌibaj chawe riꞌ ja ngana anin chi canojel ja kachꞌalal ncajoꞌ ta quiꞌ. In ja nrajoꞌ chi nawajoꞌ awiꞌ quewariꞌ, cꞌo jun utzlaj anma awcꞌan, ni majun nak ta ntiꞌon pan awanma in ni katzij wiꞌ chi cꞌo yukulbal acꞌuꞌx ruqꞌuin ja Dios.
\v 6 Pro ecꞌo jujun ja queyaꞌ can ja nawajoꞌ awiꞌ in xesach rmal juleꞌ tzij ja mta noc wiꞌ.
\v 7 Congana nel quecꞌuꞌx trij chi ncajoꞌ nequitijoj ja winak tre ja ley xin Dios ja tzꞌibtal can rmal ja Moisés. Ejeꞌeꞌ riꞌ netzijoni pro xa ma cotak ta ja nquibij in nixtacꞌa chꞌobtajnak ta cumal chakajaꞌ ja tijonem ja nqueyaꞌ chique ja winak.
\p
\v 8 Bien kotak chi ni utz wiꞌ ja ley pro wi utz rcojic nkaban.
\v 9 Pro kotak chakajaꞌ chi ja ley maqueruchap ja winak ja mta quil. Ja neruchap ja ley caniꞌ chique ja winak ja mta quigana ruqꞌuin ja ley in matiquinimaj, in caniꞌ chique ja matiquixbej quiꞌ chwach ja Dios ja xa más na il mac nqueban, in chique chakajaꞌ ja winak ja mta Dios pa tak canma in mta quigana ruqꞌuin ja rsamaj in chique ja nequicamsaj quitataꞌ queteꞌ in chique canojelal ja camsanelaꞌ,
\v 10 in chique achiꞌiꞌ ja nemacun cuqꞌuin ixokiꞌ, in chique achiꞌiꞌ ja nemacun cuqꞌuin cach tak achiꞌiꞌ, in chique ja nequechap winak chi nequilakꞌaj, in chique ja nebanowi jolon tak tzij in chique canojel ja tzꞌakol tak tzij. In canojel ja winak ja xa itzel nquetzꞌat ja utzlaj tijonem xin Dios ejeꞌeꞌ necha̱p rmal ja ley chakajaꞌ.
\v 11 Jawaꞌ utzlaj tijonem xa junan ruqꞌuin ja utzlaj tzij xin Jesucristo in Dios xuyaꞌ chwe ja nsamaj chi nenyaꞌaꞌ rbixic ja utzlaj tzij. Ja utzlaj tzij jaꞌ ncꞌutu chikawach nak rbanic ja Dios chi arjaꞌ congana utz in kas nim rukꞌij. Ja Dios ruqꞌuin arjaꞌ winakarnakto wiꞌ ja quicotemal.
\s * * * * * * * * * *
\p
\v 12 Ja kajaw Cristo Jesús xuyaꞌ chwe ja wachokꞌakꞌ chi nban ja rsamaj, congana nmaltioxij tre como arjaꞌ cꞌo rconfianza wqꞌuin in xuyaꞌ chwe chi xinoc ajsamajel rxin.
\v 13 Queriꞌ xuban chwe masqui anin nabey xa itzel xintzijon tre, xinban pokon chique ja xeniman rxin in xintzꞌuj. Pro ja Dios arjaꞌ xpokonaj nwach como anin ma wotak ta ja xinban como jariꞌ tiempo ma nniman ta ja Jesucristo.
\v 14 In ja kajaw Jesucristo congana xinrajoꞌ masqui in ajꞌil in ajmac in xuyaꞌ chwe chi yukeꞌ nucꞌuꞌx ruqꞌuin in xwinakarsaj ja rajoben riꞌil xin Dios pa ncꞌaslemal como jariꞌ nyataj chawe ja tok nojel acꞌuꞌx nanimaj ja Cristo Jesús.
\p
\v 15 Ja Cristo Jesús arjaꞌ pi waweꞌ chwachꞌulew chi katoꞌic ja rok ajꞌil ja rok ajmaquiꞌ. Jariꞌ tzij ni katzij wiꞌ in yatal chique canojelal ja winak chi nquinimaj. In anin más na nim ja wil numac chiquewach canojelal.
\v 16 Pro ja Jesucristo arjaꞌ congana xpokonaj nwach masqui in nimlaj ajꞌil in ajmac chiquewach canojelal ja winak. Arjaꞌ xucuy ja wil numac in jariꞌ xcꞌutbej chiquewach ja winak chi cꞌo rpaciencia chi nerucuy ja rajꞌil ja rajmaquiꞌ. Queriꞌ xuban, xucuy ja wil numac jariꞌ xcꞌutbej chi ni nerucuy wiꞌ ja juleꞌ chic nak xqueniman rxin ja nquewil na ja utzlaj cꞌaslemal ja mta qꞌuisic trij.
\v 17 Rmalariꞌ tok nbij chewe, ni ta nkaban wiꞌ respetar ja Dios in ni ta nkayaꞌ wiꞌ rukꞌij camic, chwak in chijutij. Ja Dios arjaꞌ nimlaj Rey chijutij, mta camíc trij, matitzꞌattaji, ruyon arjaꞌ Dios mchita jun queriꞌ ta, mchita jun nkꞌiꞌowi ja rnaꞌoj. Amén.
\p
\v 18 Timoteo, atat at caniꞌ ncꞌajol, congana nban recomendar chawe chi queriꞌ naban ja caniꞌ nuban jun utzlaj soldado, ma ticapuj ta acꞌuꞌx chipan ja rsamaj Dios. Tiyukeꞌ acꞌuꞌx ruqꞌuin ja Jesucristo, ni tayaꞌaꞌ wiꞌ cuenta tre ja tok ntzijoni ja Dios pan awanma. Caniꞌ binto chawe ojer cumal ja kachꞌalal chi natoc jun ajsamajel rxin Dios. Ja quibij ejeꞌeꞌ Dios biyon chique. Ja cꞌa riꞌ ni turkaj wiꞌ chawe, ma ticapuj ta acꞌuꞌx.
\v 19 Como ecꞌo jujun ja matiqueyaꞌ cuenta tre ja tok ntzijoni ja Dios pa tak canma, ejeꞌeꞌ riꞌ xa qꞌuisnak chic ja yukulbal quecꞌuꞌx ruqꞌuin ja Jesucristo.
\v 20 Queriꞌ queban ja Himeneo rachbil Alejandro rmalcꞌariꞌ tok xenujach pa rukꞌaꞌ ja Satanás chi nquetij ja rpokonal. Queriꞌ xinban utzcꞌa chi ma itzel chi ta netzijon tre ja utzlaj tijonem ja rcꞌamonto ja rtzobal Dios.
\c 2 
\s * * * * * * * * * * 
\p 
\v 1 Ja más rjawaxic chi nkaban wachꞌalal in congana nban recomendar chewe, kabanaꞌ orar pa quicuenta canojel ja winak in kamaltioxij tre ja Dios cumal. 
\v 2 Kabanaꞌ orar pa quicuenta rey in pa quicuenta chakajaꞌ ja juleꞌ chic kꞌetol tak tzij utzcꞌa utz kucꞌaxic nbani utzcꞌa mta sícꞌ chꞌaꞌoj nbani pa tak tinamit utzcꞌa chi nkaban respetar ja Dios in nekaban respetar ja winak chakajaꞌ. 
\v 3 Ja Dios ja Toꞌonel kaxin ja wi queriꞌ nkaban arjaꞌ utz nokrutzꞌat in nquicot chakij. 
\v 4 Ja Dios arjaꞌ nrajoꞌ chi canojelal ja winak netotaji in ncotakij ja utzlaj tijonem xin Jesucristo. 
\v 5 Como xa jun ja Dios in xa jun chakajaꞌ ja nchomarsan kaxin chwa Dios ja rok winak, arjaꞌ Cristo Jesús ja xoc kach winak. 
\v 6 Arjaꞌ xujach riꞌ pa quekꞌaꞌ ja winak chi camsaxi jariꞌ xokrlokꞌbej kanojelal ja rok winak. Ja xuban ja Jesús, Dios ni rchominto wiꞌ ja kꞌij rxin in yaꞌon chic rbixic. 
\v 7 In rmalariꞌ tok xinchaꞌi chi xinoc apóstol rxin ja Jesucristo chi nyaꞌ rbixic. In yataj chwe chi xinbe cuqꞌuin ja ma e aj Israel ta chi quitijoxic. Jariꞌ ni katzij wiꞌ, ja Jesucristo arjaꞌ rotak chi ni katzij wiꞌ, ma npayil ta. Ja tijonem ja xinyaꞌ chique jariꞌ nak rbanic chi nyukeꞌ quecꞌuꞌx ruqꞌuin ja Jesucristo in nak rbanic ja utzlaj tzij ja rcꞌamonto. 
\p 
\v 8 Ja cꞌa ngana anin canojel ja rachiꞌiꞌ nqueban ta oración xa bar ta triꞌ nquemol wiꞌ quiꞌ. Pro ja tok nqueyic quekꞌaꞌ chicaj chi rbanic ja roración rjawaxic chique chi mta ntiꞌon pa tak canma, rjawaxic chi mta ayewal in mta chꞌaꞌoj pa tak canma. 
\v 9 In chique ja rixokiꞌ chakajaꞌ maxta tiquiyabej quekꞌij tre ja quitziak ja nquecoj nixtacꞌa tre kꞌop kꞌakꞌaꞌl chakajaꞌ caniꞌ tre ja nimak rjil. In chakajaꞌ maxta xa rmal yaꞌbal quekꞌij ja tok nqueban rbanic ja rpachꞌuxic quewiꞌ. 
\v 10 Ja nqueban, tiquicꞌutuꞌ ja cutzil chiquewach winak como ja nebini chi cotak rwach ja Dios nijawariꞌ yatal chique chi nquecꞌut. 
\v 11 Ja tok majtajnak ryaꞌic mensaje ja rixokiꞌ rjawaxic chi nquicꞌaxaj, ni majun tzij nqueban in e nimanelaꞌ chakajaꞌ. 
\v 12 Ja tok nquemol quiꞌ ja kachꞌalal anin matinyaꞌ lugar chique ja rixokiꞌ chi nqueyaꞌ mensaje nixtacꞌa nequeban ta mandar ja rachiꞌiꞌ, ni majun tzij nqueban ja tok cꞌoli ja mensaje nyaꞌi. 
\v 13 Como ja Dios ojer xwinakarsaj ja rachi nabey rbinaꞌan Adán cꞌacꞌariꞌ xwinakarsaj ja rixok rbinaꞌan Eva. 
\v 14 In chakajaꞌ ma ja ta ja rAdán ja ban engañar, jaꞌ rixok ban engañar. Ja tok bantaj engañar cꞌacꞌariꞌ kaj chipan ja il mac. 
\v 15 Ja quisamaj ja rixokiꞌ quewariꞌ, nequiqꞌuittzij ja tak cal in netotaji ja wi matiqueyaꞌ can ja yukulbal quecꞌuꞌx ruqꞌuin ja Jesucristo, wi cꞌoli ja rajoben riꞌil xin Dios chique, wi chꞌajchꞌoj ja quicꞌaslemal in bien nquechꞌob ja nqueban. 
\c 3 
\s * * * * * * * * * * 
\p 
\v 1 Ja wi cꞌo jun kachꞌalal nyarij chi noc chajinel quixin ja kachꞌalal jariꞌ ni katzij wiꞌ chi utzlaj samaj ja nyarij. 
\v 2 Pro ja rjawaxic tre quewariꞌ, utz rcꞌaslemal, majun nak ta nchapbexi. In ma e caꞌiꞌ ta ja rxjayil. Rjawaxic chi bien nuchꞌob ja nuban in nba̱n respetar. In nuyaꞌ quiposada ja neꞌekaj ruqꞌuin ja cꞌo rjawaxic chique in bien ncowini nertijoj ja kachꞌalal. 
\v 3 Ma tikꞌabar ta in ma banol chꞌaꞌoj ta. Ja rjawaxic tre cꞌo rpaciencia in chakajaꞌ maxta congana tel rucꞌuꞌx trij pwok. 
\v 4 In rjawaxic chakajaꞌ chi rotak nchomij ja ncꞌatzini pa rochoch in nnimax cumal ja ralcꞌwal in nba̱n respetar cumal chakajaꞌ. 
\v 5 Como ja wi maticowini nchomij ja ncꞌatzini pa rochoch arjaꞌ ¿nak moda ncowini nerchajij ja tinamit rxin Dios? 
\v 6 Ja wi cꞌo jun cꞌa ma jaruꞌ ta tiempo tinimaj ja Jesucristo jariꞌ mta moda xquerucꞌaj ta ja kachꞌalal como chaka jalal nuyaꞌ rukꞌij in nkaji pa juicio ja caniꞌ xuban ja diablo. 
\v 7 Ja nucꞌan quixin ja kachꞌalal rjawaxic chi nba̱n respetar cumal ja winak ja ma quiniman ta ja Jesucristo utzcꞌa ma itzel ta nbix tre utzcꞌa chi matichap rmal ja diablo. 
\s * * * * * * * * * * 
\p 
\v 8 In queriꞌ chique ja diácono chakajaꞌ rjawaxic chi utz ja quicꞌaslemal utzcꞌa chi neba̱n respetar. Ja tok netzijoni tiquibij ja ni katzij wiꞌ, maxta junwiꞌ nquibij jutij in junwiꞌ chic nquibij chic jutij. Ma quekꞌabar ta. In chakajaꞌ maxta congana tel quecꞌuꞌx trij pwok in utz rchꞌaquic tiquibanaꞌ. 
\v 9 Rjawaxic chi nquinimaj ja rkꞌalasan ja Dios chikawach tre nojel ja rcꞌamonto Jesucristo in ni nqueyaꞌ wiꞌ caso tre tok ntzijoni ja Dios pa tak canma. 
\v 10 Rjawaxic chi utz ntzꞌati ja quicꞌaslemal, ja wi queriꞌ utz neꞌoc diácono. 
\v 11 In chique ja rixokiꞌ chakajaꞌ rjawaxic chi utz ja quicꞌaslemal utzcꞌa chi neba̱n respetar in ma e banol molon tak tzij ta in bien nquechꞌob ja nqueban in ni nqueban wiꞌ cumplir ja nbix chique. 
\v 12 Ja diácono rjawaxic chi ma e caꞌiꞌ ta ja quixjayilal in cotak nequipaxbaj ja calcꞌwal in nquichomij ja ncꞌatzini pa tak cochoch. 
\v 13 Como ja diácono wi utz nqueban tre ja quisamaj más na nya̱ꞌ quekꞌij in más na nqꞌuiyi ja yukulbal quecꞌuꞌx ruqꞌuin ja Cristo Jesús in rmalariꞌ matiquixbej quiꞌ netzijon cuqꞌuin winak. 
\s * * * * * * * * * * 
\p 
\v 14 Anin nwajoꞌ ninbe awqꞌuin chanim pro maxla cꞌamalo xquinekaji in rmalariꞌ tok ntakel ja carta awqꞌuin riꞌ. 
\v 15 Queriꞌ nban utzcꞌa chi nawotakij nak rjawaxic tre ja quicꞌaslemal ja tinamit xin Dios, ejeꞌeꞌ riꞌ ja riglesia rxin ja cꞌaslic Dios. Como ja quisamaj ejeꞌeꞌ nqueban cuenta ja utzlaj tzij xin Jesucristo in matiqueyaꞌ lugar chique ja winak ja necꞌutu chic juleꞌ tijonem ja junwiꞌ chi na. 
\v 16 Ni katzij wiꞌ chi congana nim rukꞌij ja rkꞌalasan chikawach ja Dios tre nojel ja rcꞌamonto ja Jesucristo. Quewaꞌ ja rkꞌalasan chikawach riꞌ. Ja Dios qꞌuejeꞌ waweꞌ chwachꞌulew, xoc kach winak. Kꞌalasax rmal ja rEspíritu Santo chi ni katzij wiꞌ nojel ja xbij tok qꞌuejeꞌ waweꞌ. In tzꞌat cumal ja ángel. Yaꞌ rbixic chique ja winak pa tak nación jeꞌe. In ecꞌoli chique ja winak nojel rwachꞌulew quinimaj. In joteꞌ pa gloria chilaꞌ chicaj. Queriꞌ ja rkꞌalasan chikawach ja Dios. 
\c 4 
\s * * * * * * * * * * 
\p 
\v 1 Pro ni kꞌalaj wiꞌ ja nbij ja rEspíritu Santo chi nerilaꞌ na jun tiempo ja tok ecꞌoli ja nqueyaꞌ can ja utzlaj tijonem xin Jesucristo. Ejeꞌeꞌ neba̱n na engañar cumal ja ritzel tak espíritu in nquinimaj juleꞌ itzel tak tijonem quixin demonio. 
\v 2 Jawaꞌ tijonem nyaꞌi cumal juleꞌ winak ja xa cacaꞌ quipalaj, xa e tzꞌakol tak tzij in matitiꞌon chique ja ritzelal nqueban. 
\v 3 Jawaꞌ winak nquibij chi xajan natcꞌuleꞌe in nquibij chakajaꞌ chi cꞌo jeꞌe ja xajan ntiꞌi. Queriꞌ nquibij pro ja Dios arjaꞌ tzꞌucarsyon nojel chi nkatiꞌ in nrajoꞌ chi nkamaltioxij tre. Jariꞌ nrajoꞌ chake ja yukul kacꞌuꞌx ruqꞌuin ja kotak ja utzlaj tijonem xin Jesucristo. 
\v 4 Como nojel ja nkatiꞌ arjaꞌ Dios tzꞌucarsyon in ni utz wiꞌ nojelal ja rtzꞌucarsan ja Dios. Rmalcꞌariꞌ tok ma yatal ta chakij nkabij chi xajan ntiꞌi. Ja yatal chakij katiꞌaꞌ in kamaltioxij tre ja Dios. 
\v 5 Como ja Dios arjaꞌ nuban bendecir ja nkatiꞌ rmal ja rtzobal nkanataj in rmal chakajaꞌ ja roración nkaban. 
\s * * * * * * * * * * 
\p 
\v 6 Jawaꞌ ja xintzꞌibaj riꞌ wi xqueꞌatijoj ja kachꞌalal tre jariꞌ at jun utzlaj ajsamajel rxin ja Jesucristo. In natqꞌuiy más rmal ja rtzobal Dios ja rcꞌamonto ja yukulbal kacꞌuꞌx ruqꞌuin ja Jesucristo jariꞌ ja utzlaj tijonem animan. 
\v 7 Pro ma tayaꞌ ta rukꞌij ja juleꞌ historia ja xa winak ewinakarsyon nixtacꞌa ja ta ja rojer tak tzij ja nquibij rijaꞌ ja mta rcꞌamonto chake. Ja naban quewariꞌ, ni tatijoj wiꞌ awiꞌ tre ja nrajoꞌ ja Dios chawe chi naban. 
\v 8 Ja chique winak ja neꞌetzꞌani tok nquitijoj pon quiꞌ cꞌoli noc wiꞌ pro jariꞌ xa nkꞌaxi. Pro ja tok natijoj awiꞌ tre ja nrajoꞌ ja Dios chawe chi naban jariꞌ cꞌoli noc wiꞌ pro matikꞌaxi como cꞌoli noc wiꞌ tre ja kacꞌaslemal waweꞌ chwachꞌulew in tre chakajaꞌ ja utzlaj cꞌaslemal ja xtekawilaꞌ na chilaꞌ chicaj. 
\v 9 Jawaꞌ ja xintzꞌibaj riꞌ ni katzij wiꞌ in yatal chique canojelal ja winak chi nquinimaj. 
\v 10 Rmalcꞌariꞌ tok nkaban ja rsamaj Dios in nkatij rpokonal rmal como bien kotak chi ja Dios arjaꞌ ni nokrutoꞌ na wiꞌ in rmalcꞌariꞌ nokquicoti in kayben. Arjaꞌ Dios cꞌaslic Dios in nerutoꞌ canojelal ja winak pro arjaꞌ más na Toꞌonel kaxin ja yukul kacꞌuꞌx ruqꞌuin ja Jesucristo. 
\p 
\v 11 Nojel awaꞌ ja xintzꞌibaj riꞌ jariꞌ rjawaxic chi neꞌatijoj ja kachꞌalal tre in nabij chique chi nquinimaj. 
\v 12 Ja winak maxta ma catquinimaj ta xa rmal ja cꞌa at cꞌajol na. Pro ja naban, tacꞌutuꞌ ja rawutzil chiquewach ja kachꞌalal in ja naban quewariꞌ, ni utz wiꞌ nojel ja nabij in nojel ja naban chiquewach ja winak. In chakajaꞌ tiqꞌuejeꞌe ja rajoben riꞌil xin Dios pan acꞌaslemal, ja rEspíritu Santo ni ta arjaꞌ wiꞌ xtucꞌan awxin, ni tiyukeꞌ wiꞌ acꞌuꞌx ruqꞌuin ja Jesucristo in ni ta chꞌajchꞌoj wiꞌ ja rawanma. 
\v 13 Anin ninbe na awqꞌuin pro ja nwajoꞌ chawe, ni tasiqꞌuij wiꞌ ja rtzobal Dios chiquewach ja kachꞌalal tok nquemol quiꞌ, tayukbaꞌ quecꞌuꞌx in neꞌatijoj. 
\v 14 Ma tatzꞌilaꞌ ta tabanaꞌ cuenta ja rutzil ja yatajnak chawe rmal ja Dios tokoriꞌ tok ja ranciano xeꞌucꞌax rmal ja Dios in queyaꞌ quekꞌaꞌ pan awiꞌ tokoriꞌ yataj chawe ja rutzil rmal ja Dios chi natoc jun ajsamajel rxin. 
\p 
\v 15 Jawaꞌ ja xintzꞌibaj riꞌ nojel awanma tabanaꞌ utzcꞌa canojel ja winak nqueyaꞌ cuenta chawe chi rmajon qꞌuiyem ja yukulbal acꞌuꞌx ruqꞌuin ja Jesucristo. 
\v 16 Tabanaꞌ cuenta ja racꞌaslemal in tabanaꞌ cuenta ja tijonem ja nayaꞌ chique ja winak chakajaꞌ. Nojel ja xintzꞌibaj chawe maxta tayaꞌ can. Ja wi queriꞌ naban nattotaji chijutij in netotaji chakajaꞌ ja necꞌaxani ja utzlaj tijonem ja nayaꞌ chique. 
\c 5
\s * * * * * * * * * * 
\p 
\v 1 Ja wi cꞌoli ja ma utz ta nqueban ja taꞌiꞌ tachꞌaꞌaꞌ chique pan ekal, ma queꞌachꞌolij ta, tabanaꞌ chique e caniꞌ atataꞌ. In chique ja cꞌajolaꞌ tabanaꞌ chique e caniꞌ awach tak alaxic. 
\v 2 In chique ja naniꞌ tabanaꞌ chique e caniꞌ ateꞌ. In chique ja xtaniꞌ chakajaꞌ tabanaꞌ chique e caniꞌ awanaꞌ, ni majun nak ta nachꞌob kaj chiquij pan awanma. 
\p 
\v 3 Queꞌatoꞌoꞌ ja malcaniꞌ ja recamnak chic cachajilal ja ni katzij wiꞌ chi mta ntoꞌo quixin. 
\v 4 Pro wi cꞌo jun malcaꞌn ecꞌo ral owi ecꞌo riy rumam ejeꞌeꞌ riꞌ quetoꞌoꞌ rxin, tiquilij ticꞌuxlaꞌaj. Rjawaxic chi nurkaj chique chi eqꞌuittzinto in rmalariꞌ tiquiyaꞌaꞌ rjil rcꞌaxel chique ja quitataꞌ queteꞌ jariꞌ nquicꞌutbej chi cꞌoli ja Dios pa tak canma. Ja wi queriꞌ nqueban utz nerutzꞌat ja Dios in nquicot chiquij. 
\v 5 Ja malcaꞌn ja ni katzij wiꞌ chi mta ntoꞌo rxin quewaꞌ nuban riꞌ, nyukeꞌ rucꞌuꞌx ruqꞌuin ja Dios in ni nuban wiꞌ oración chi pa kꞌij chi chakꞌaꞌ. 
\v 6 Pro ja malcaꞌn ja wi xa nuchꞌob ja quicotemal xin rwachꞌulew arjaꞌ camnak chwa Dios. 
\v 7 Tabij chique ja malcaniꞌ chi nquinimaj ja xintzꞌibaj riꞌ utzcꞌa ni majun nak ta nechapbexi. 
\v 8 Rjawaxic chi neꞌatoꞌ ja rawachꞌalal in más chi na rjawaxic chi neꞌatoꞌ ja recꞌo pan awochoch. Ja wi cꞌo jun maquerutoꞌ ja rchꞌalal jariꞌ ncꞌutbej chi mta ja yukulbal rucꞌuꞌx ruqꞌuin ja Jesucristo, arjaꞌ más na lawuloꞌ chiquewach ja winak ja ma quiniman ta ja Jesucristo. 
\p 
\v 9 In chique ja juleꞌ chic malcaniꞌ ja nechaꞌi chi xajutij neꞌoqui chi nesamaj pa quicuenta ja kachꞌalal rjawaxic chi cꞌo chic sesenta quijunaꞌ in xa e jujun ja quichajilal ecamnak. 
\v 10 In rjawaxic chi nbix chique chi e utzlaj tak ixokiꞌ in utz quiqꞌuittzixic ja cal quibanon, in quiyaꞌon quiposada ja cꞌo rjawaxic chique, in ma quipokonan ta quilixic ja kachꞌalal caniꞌ tre ja chꞌajoj cakan, in equitoꞌon ja quitijon rpokonal in congana quicꞌutun ja cutzil chiquewach ja winak. 
\p 
\v 11-12 Pro maxta queꞌachaꞌ ja malcaniꞌ ja ma e rijaꞌ ta como ejeꞌeꞌ nquibij chi xajutij neꞌoqui chi nesamaj pa quicuenta ja kachꞌalal in nquibij chi maquecꞌuleꞌ chic pro chaka jalal tok nquechꞌob chi nqueyaꞌ can ja samaj in necꞌuleꞌ chic jutij. Jariꞌ il mac nqueban como quibij chi nesamaji in quibij chi maquecꞌuleꞌ chic. 
\v 13 In chakajaꞌ xa neyojtaji, xa nebin chi tak jay. In ma ruyon tariꞌ nqueban pro nqueban molon tak tzij in chakajaꞌ nquemin quiꞌ cuqꞌuin winak pa tak jay ja tok cꞌoli nbantaji, neꞌeli nquibij juleꞌ tzij ja ma yatal ta chique chi nquibij. Ja tzij nqueban xa chꞌaꞌoj rcꞌamonto. 
\v 14 Rmalariꞌ tok nbij chawe, ja ngana anin quecꞌuleꞌe ja malcaniꞌ ja ma e rijaꞌ ta in queqꞌuittzini in tiquichajij chi utz ja cochoch in maxta tiqueyaꞌ lugar chique ja winak ja netzelan kaxin chi nokquitzijoj. 
\v 15 Como ecꞌoli ja malcaniꞌ ejeꞌeꞌ quiyaꞌon can ja utzlaj cꞌaslemal, xa eꞌucꞌan chic rmal ja Satanás. 
\p 
\v 16 Wi cꞌo jun kachꞌalal achi owi ixok ecꞌo rchꞌalal ixokiꞌ malcaniꞌ jariꞌ yatal trij chi nerutoꞌ, mta moda xqueruyaꞌ ta chi rukul ja riglesia utzcꞌa ja riglesia ncowini nerutoꞌ ja malcaniꞌ ja mta ntoꞌo quixin. 
\p 
\v 17 Ja ranciano ja nechajini chi utz ja kachꞌalal ejeꞌeꞌ yatal chique chi congana lokꞌ nenaꞌi. In más chi na rjawaxic chi queriꞌ nba̱n chique ja xajutij quimajon samaj tre ja rbixic ja utzlaj tzij xin Jesucristo in tre ja nequitijoj ja kachꞌalal. 
\v 18 Como caniꞌ nbij ja rtzobal Dios quewariꞌ: —Mta moda xticoj ta quibozal ja wacax tok quimajon rchꞌayic ja trigo, neꞌe. In nbij chic jutij quewariꞌ: —Ja rajsamajel ni yatal wiꞌ tre chi ntoji. Queriꞌ nbij. 
\p 
\v 19 In chique ja ranciano wi cꞌo quil nbixi ja wi xa jun nbini chi cꞌo quil jariꞌ ma tanimaj ta. Rjawaxic chi e caꞌiꞌ owi e oxiꞌ nebini chi cꞌo quil. 
\v 20 Pro jun anciano wi katzij chi cꞌo ril nuban in wi ni nuban wiꞌ tachꞌaꞌaꞌ tre pro chiquewach canojel ja kachꞌalal. Queriꞌ naban utzcꞌa ja juleꞌ chic nquixbej quiꞌ. 
\v 21 Jawaꞌ ja xintzꞌibaj riꞌ tayaꞌaꞌ pa cuenta in congana nban recomendar chawe maxta jun utz in jun itzel ta natzꞌat. In jawaꞌ ja xinban recomendar chawe riꞌ Dios nutzꞌat in nutzꞌat chakajaꞌ ja kajaw Jesucristo e rachbil ja ángel ja rechaꞌon rmal. 
\v 22 Ma queꞌaban ta nombrar ja kachꞌalal tre ja obra xin Dios ja wi ma awotak ta nak rbanic ja quicꞌaslemal como chaka jalal cꞌo jun quil nqueban in atat jun natijkalen cuqꞌuin. Tabanaꞌ cuenta ja racꞌaslemal tre nojel ja naban. 
\p 
\v 23 Como ja ratat triꞌ triꞌ natyawaji rmalariꞌ ja tok nbij chawe, maxta xa ruyon raxyaꞌ ja natij pro tatijaꞌ jutzꞌit vino chakajaꞌ xin apan. 
\p 
\v 24 Ecꞌoli winak ja ni kꞌalaj wiꞌ ja quil nqueban in jariꞌ nekꞌalasani chi nekaj chipan ja juicio. Pro ecꞌo juleꞌ chic ja ma kꞌalaj ta ja tok nqueban ja quil, cꞌamalo nechꞌobtaji. 
\v 25 In queriꞌ chique chakajaꞌ ja utzlaj tak winak, ecꞌoli chique ja ni kꞌalaj wiꞌ ja rutzil nqueban in ecꞌo juleꞌ chakajaꞌ ja ni majun nnabexi tok nqueban ja rutzil pro nerilaꞌ na jun kꞌij tok xquekꞌalajini. 
\c 6
\p 
\v 1 Ja kachꞌalal ja recꞌo quipatrón rjawaxic chi nequeban respetar utzcꞌa chi ma itzel ta ntzꞌati ja Dios cumal in ma itzel ta nbix tre ja utzlaj tijonem xin Jesucristo. 
\v 2 In masqui quiniman chic ja Jesucristo ja quipatrón pro maxta tiquechꞌob chi ma rjawaxic ta chi nequeban respetar xa rmal chi e kachꞌalal chic. Pro ja ta nqueban, más chi ta na utz nqueban tre ja samaj como e kachꞌalal chic ja quipatrón in neꞌajoꞌx rmal ja Dios. Jawaꞌ ja xintzꞌibaj riꞌ queꞌatijoj ja kachꞌalal tre in queꞌabanaꞌ animar chi nquinimaj. 
\s * * * * * * * * * * 
\p 
\v 3 Wi cꞌo jun ja junwiꞌ chi na tijonem nuyaꞌ chique ja kachꞌalal in mta rgana ruqꞌuin ja utzlaj tijonem xin Jesucristo ja rcꞌamonto ja utzlaj cꞌaslemal 
\v 4 jariꞌ xa nuyaꞌ kaj rukꞌij ruyon pro ni majun rotak. Arjaꞌ xa yojtajnak ja rnaꞌoj in tok ntzijoni cuqꞌuin ja winak ma nojel ta rucꞌuꞌx ntzijoni, xa chꞌaꞌonem nrajoꞌ. In jariꞌ nuban rcꞌamonto chꞌaꞌoj, quiakarem, tzꞌujunem in tzelan tak riꞌil. 
\v 5 Ja nbano queriꞌ ni chꞌaꞌoj wiꞌ nrajoꞌ, xa yojtajnak rnaꞌoj rmal ja ritzelal. Arjaꞌ ma rotak ta ja utzlaj tijonem xin Jesucristo, xa por interés nnimaj ja rtzobal Dios, ja nuchꞌob arjaꞌ chꞌecbal pwok. Ja nbano queriꞌ ma tawachbilaj ta. 
\v 6 Ni katzij wiꞌ chi congana nim ja nkachꞌec ja tok nkanimaj ja rtzobal Dios pro ja wi ok conforme ruqꞌuin ja cꞌo kuqꞌuin. 
\v 7 Como ja tok xokalaxi ni majun kacꞌamonto in tok xkocami ni majun nkacꞌamel chakajaꞌ. 
\v 8 Ja wi cꞌoli nkatij in wi cꞌo katziak xa ruqꞌuin ariꞌ koquicoti. 
\v 9 Pro ja winak ja cꞌo quigana chi nebiyomiri ejeꞌeꞌ ma cꞌayew ta nekaj pa il mac rmal ja congana nquiyarij ja pwok caniꞌ nuban jun chicop tok nbe pa trampa. Congana qꞌuiy rwach ja nquiyarij ja mta rcꞌamonto in rmalariꞌ tok congana rpokonal nquetij rmal. Ja nquiyarij xajutij nyojtaji ja quicꞌaslemal rmal. 
\v 10 Como ja tok congana nel acꞌuꞌx trij ja pwok triꞌ npi wiꞌ nojel rwach ja ritzelal. In ecꞌoli queriꞌ queban, quiyarij ja pwok in rmalariꞌ tok queyaꞌ can ja utzlaj tijonem xin Jesucristo in queyon queyaꞌ quiꞌ chipan ja rpokonal. 
\s * * * * * * * * * * 
\p 
\v 11 Pro atat Timoteo at ajsamajel rxin ja Dios, maxta queriꞌ taban atat. Ja naban quewariꞌ, nacꞌut ja rawutzil chiquewach ja winak, tayaꞌaꞌ rukꞌij ja Dios in tiyukeꞌ acꞌuꞌx ruqꞌuin ja Jesucristo, tiqꞌuejeꞌe ja rajoben riꞌil xin Dios pan acꞌaslemal, tiqꞌuejeꞌ apaciencia in maxta tayaꞌ akꞌij. 
\v 12 Tatijaꞌ akꞌij chi rbixic ja utzlaj tijonem xin Jesucristo. Maxta tayaꞌ can ja utzlaj cꞌaslemal ja mta qꞌuisic trij como ja Dios arjaꞌ xuyaꞌ chawe chi nawil ja utzlaj cꞌaslemal in e qꞌuiy ja winak xakꞌalasaj chiquewach chi cꞌo yukulbal acꞌuꞌx ruqꞌuin, jariꞌ buena xaban tok xaban queriꞌ. 
\v 13-14 Jawaꞌ ja xintzꞌibaj chawe riꞌ tanimaj, ma taqꞌuex ta ja utzlaj tijonem, maxta tichꞌaꞌi. Jawaꞌ ja xinban recomendar chawe riꞌ Dios nutzꞌat, arjaꞌ Yoꞌl cꞌaslemal in nutzꞌat ja Jesucristo chakajaꞌ, arjaꞌ bien xkꞌalasaj chwach ja Poncio Pilato chi cꞌoli ja yukulbal rucꞌuꞌx ruqꞌuin ja Dios. Quirtariꞌ naban ja caniꞌ xinban recomendar chawe in ni ta quirwariꞌ amajon rbanic ja tok xtipi chic jutij ja kajaw Jesucristo. 
\v 15 Ja Dios arjaꞌ nutakto na ja Jesucristo ja tok xterilaꞌ ja kꞌij rxin. Arjaꞌ Dios ruqꞌuin winakarnakto wiꞌ ja quicotemal, mchita jun queriꞌ ta ja caniꞌ arjaꞌ, congana nim rukꞌij, arjaꞌ Rey quixin nimak tak rey, Jefe quixin nimak tak jefe. 
\v 16 Ruyon arjaꞌ mta camíc trij, ni pa sakil wiꞌ cꞌo wiꞌ, majun nak ta ncowini ntiloc ruqꞌuin. Ni majun nak ta tzꞌatyon ta rxin in ni mta wiꞌ ntzꞌato rxin. Ni ta xtiyaꞌ wiꞌ rukꞌij in ni ta xtinatax wiꞌ ja nimlaj poder ja cꞌo pa rukꞌaꞌ. Ni ta quirwariꞌ xtiban tre camic, chwak in chijutij. Amén. 
\p 
\v 17 Tabij chique ja biyomaꞌ chi ma tiqueyaꞌ ta quekꞌij, maxta tiyukeꞌ quecꞌuꞌx ruqꞌuin ja quibiyomal como ja biyomal mta yukulbal cꞌuxlal rcꞌamonto. Mejor tiyukeꞌ quecꞌuꞌx ruqꞌuin ja cꞌaslic Dios. Nojel ja cꞌo chwachꞌulew Dios tzꞌucarsyon, congana qꞌuiy rwach utzcꞌa chi nokquicot rmal. 
\v 18 Tabij chique chakajaꞌ chi ni tiquicꞌutuꞌ wiꞌ ja cutzil chiquewach winak. Tiquipokonaj quewach ja cꞌo rjawaxic chique, quequitoꞌoꞌ. 
\v 19 Ja wi queriꞌ nqueban jariꞌ noc rqꞌuexwach ja quibiyomal caniꞌ rsimientoꞌil jun jay nquetic ja cꞌo rseguro in nequilaꞌ na chijutij ja utzlaj cꞌaslemal ja mta qꞌuisic trij. 
\s * * * * * * * * * * 
\p 
\v 20 Timoteo, ja nwajoꞌ anin chawe chi congana naban cuenta ja utzlaj tijonem ja ban recomendar chawe. Maxta tayaꞌ caso chique ja winak ja nqueyaꞌ jun tijonem ja mta rcꞌamonto in mta noc wiꞌ, ejeꞌeꞌ xa nquechꞌaꞌ ja utzlaj tijonem. Ejeꞌeꞌ nquibij chi congana cotak pro ja cotak mta noc wiꞌ. 
\v 21 Ecꞌoli ja queyaꞌ caso chique xesa̱ch rmal in queyaꞌ can ja utzlaj tijonem xin Jesucristo. 
\p Kas ta xtiqꞌuejeꞌe ja rutzil xin Dios awqꞌuin. Amén.