\id 2TI Western Tzutujil [tzt] NT (Guatemala) -2009 bd. 
\h 2 TIMOTEO 
\toc1 2 Timoteo 
\toc2 2 Ti
\mt 2 TIMOTEO
\c 1
\s 
\p
\v 1 Anin in Pablo ntzꞌibajel chawe ja carta riꞌ Timoteo. Anin in apóstol rxin ja Jesucristo. Jariꞌ nsamaj yaꞌon chwe rmal ja Dios. Arjaꞌ xinruchaꞌ chi nenyaꞌaꞌ rbixic ja utzlaj cꞌaslemal ja nuyaꞌ ja Cristo Jesús chique ja nyukeꞌ quecꞌuꞌx ruqꞌuin.
\v 2 Atat Timoteo at ncꞌajol chwach Dios in lokꞌ natnunaꞌ. Ja rutzil ja nsipaj ja Dios chake rachbil ja quicotemal xin Dios ja tariꞌ xtacochij más tre ja katataꞌ Dios in tre ja kajaw Jesucristo. Ejeꞌeꞌ ta xtiquipokonaj awach.
\s * * * * * * * * * *
\p
\v 3 Anin ni nban wiꞌ oración pan acuenta chi pa kꞌij chi chakꞌaꞌ, ni naturkaj wiꞌ chwe in tok naturkaj chwe ni nmaltioxij wiꞌ tre ja Dios amwal. Arjaꞌ Dios anin in ajsamajel rxin, ni nyaꞌon wiꞌ caso tre tok ntzijoni ja Dios pa wanma caniꞌ queban chakajaꞌ ja watiꞌt nmamaꞌ ojer.
\v 4 In nurkaj chwe chakajaꞌ tok xinawokꞌej tokoriꞌ tok xinelto awqꞌuin in rmalariꞌ congana ngana nutzꞌat chic jutij riꞌ kawach awqꞌuin utzcꞌa congana chi na xquinquicoti amwal.
\v 5 In chakajaꞌ nurkaj chwe chi ni katzij wiꞌ chi cꞌoli ja yukulbal acꞌuꞌx ruqꞌuin ja Dios caniꞌ tre ja rawatiꞌt Loida in tre ja rateꞌ Eunicia ejeꞌeꞌ yukeꞌ quecꞌuꞌx nabey ruqꞌuin ja Dios. In bien wotak chi yukul acꞌuꞌx atat ruqꞌuin chakajaꞌ.
\p
\v 6 Rmalariꞌ ja nwajoꞌ chawe chi ni naban wiꞌ cuenta tre ja rutzil ja yatajnak chawe rmal ja Dios tokoriꞌ tok xinyaꞌ nukꞌaꞌ pan awiꞌ in yataj chawe chi xatoc jun ajsamajel rxin ja Dios.
\v 7 Como ja rEspíritu Santo ja yatajnak chake rmal ja Dios ma ja ta xbeben riꞌil rcꞌamonto chake pro quewaꞌ rcꞌamonto chake riꞌ, nuyaꞌ kachokꞌakꞌ, nuyaꞌ ja rajoben riꞌil xin Dios pa tak kacꞌaslemal in nuyaꞌ chake chi bien nkachꞌob ja nkaban.
\v 8 Rmalariꞌ nbij chawe, maxta qꞌuixbal tanaꞌ ja nayaꞌ rbixic ja Jesucristo. Ja camic in preso rmal ja rtzobal Dios, maxta qꞌuixbal tanaꞌ mwal anin chakajaꞌ. Ma tapokonaj ta cꞌa ja npi jeꞌe chawij rmal ja ramajon rbixic ja utzlaj tzij xin Jesucristo pro ja rawachokꞌakꞌ ja yatajnak chawe rmal ja Dios xa ruqꞌuin ariꞌ nacochꞌ nojelal.
\v 9 Ja Dios arjaꞌ xokrutoꞌ, xokruchaꞌ chi nkaban ja nrajoꞌ chake chi nkaban pro ma rmal ta chi cꞌo ta kachꞌecbej tok xuban queriꞌ chake, xa rmal ja rchomarsanto ojer in rmal ja rutzil arjaꞌ tok xuyaꞌ chake. Jariꞌ nij ojer wiꞌ rchomarsanto ja tok majaꞌn titzꞌucarsaj ja rwachꞌulew tok xchomarsaj chi nutakto ja Cristo Jesús chi katoꞌic.
\v 10 In ja rchomarsanto ojer jariꞌ rkꞌalasan chic camic jariꞌ tok xutakto ja Jesucristo ja Toꞌonel kaxin. Ja Jesucristo arjaꞌ xkajsaj rchokꞌakꞌ ja camíc in ja utzlaj tzij ja rcꞌamonto jariꞌ xkꞌalasbej nak rbanic ja utzlaj cꞌaslemal ja mta qꞌuisic trij.
\p
\v 11 In rmal ja utzlaj tzij xin Jesucristo chewiꞌ tok xinchaꞌi chi xinoc apóstol rxin chi nyaꞌ rbixic in yataj chwe chi xinbe cuqꞌuin ja winak ja ma e aj Israel ta in jariꞌ utzlaj tzij xentijoj tre.
\v 12 Rmalariꞌ tok incꞌo chipan ja rpokonal camic pro ma qꞌuixbal ta nnaꞌ como anin bien wotak rwach chok qꞌuin yukul wiꞌ nucꞌuꞌx in bien wotak chakajaꞌ chi arjaꞌ ni ninruban wiꞌ cuenta tre nojelal ja njachon pa rukꞌaꞌ. Wotak chi niquirwariꞌ nuban chwe in niquirwariꞌ rbanon chwe ja tok xtipi chic jutij.
\v 13 Ja utzlaj tijonem ja xincꞌut chawach jariꞌ ocnak abase chi quitijoxic ja winak, maxta tayaꞌ can in ni ta nyukeꞌ wiꞌ acꞌuꞌx ruqꞌuin ja Jesucristo, ni ta nqꞌuejeꞌ wiꞌ ja rajoben riꞌil xin Dios pan acꞌaslemal como jariꞌ rcꞌamonto chake ja Cristo Jesús ja yukul kacꞌuꞌx ruqꞌuin.
\v 14 Tabanaꞌ cuenta nojel ja ban recomendar chawe rmal ja Dios, ja rEspíritu Santo arjaꞌ ni cꞌo wiꞌ kuqꞌuin, arjaꞌ ta xcattoꞌowi chi rbanic cuenta.
\p
\v 15 Atat awotak chi canojel ja recꞌo pa rcuenta ja departamento Asia ejeꞌeꞌ ma xinquetoꞌ chi ta pro xinqueyaꞌ can caniꞌ chique Figelo in Hermógenes.
\v 16 Pro ja Onesíforo arjaꞌ ma queriꞌ ta xuban chwe chewiꞌ tok nwajoꞌ chi ja kajaw Dios xtipokonan ta quewach ja rfamilia. Ja Onesíforo qꞌuiylaj mul xyukbaꞌ nucꞌuꞌx in ma qꞌuixbal ta xunaꞌ mwal chi inocnak preso.
\v 17 Caniꞌ xuban tok xurkaj waweꞌ pa Roma arjaꞌ congana xoclaꞌ il chi ncanoxic in xinruwil na chi puersa.
\v 18 Ja kajaw Dios xtipokon ta rwach ja tok xtipi chic jutij ja Jesucristo. Atat bien awotak chi congana xokrutoꞌ chakajaꞌ tok xokqꞌuejeꞌ pa Efeso.
\c 2 
\s * * * * * * * * * * 
\p 
\v 1 In atat ncꞌajol, tacochꞌoꞌ awach chipan ja rutzil xin Dios ja rcꞌamonto ja Jesucristo. 
\v 2 Ja tijonem ja nyaꞌon chawe e qꞌuiy ja xecꞌaxani. Ja nwajoꞌ chawe tabanaꞌ chic recomendar ja tijonem chique juleꞌ chic achiꞌiꞌ ja cꞌol aconfianza cuqꞌuin, juleꞌ achiꞌiꞌ ja bien necowini nequitijoj chic juleꞌ winak tre. 
\p 
\v 3 Tacochꞌoꞌ ja rpokonal como atchaꞌon rmal ja Jesucristo chi natoc at caniꞌ jun soldado rxin. 
\v 4 Ja soldado tok nqꞌuejeꞌ chipan ja rejército mta moda xtucoj ta jun negocio como rjawaxic chi nnimaj ja nbano mandar rxin. 
\v 5 In tre jun achi ja rcojon riꞌ chipan jun tzꞌanem, ja wi matuban ja caniꞌ nrajoꞌ ja tzꞌanem chi nuban jariꞌ matuchꞌec ja premio, xa nlasaxi. 
\v 6 In queriꞌ tre jun ajchonlaꞌ chakajaꞌ ni cꞌo wiꞌ rukꞌaꞌ tre ja rtijcoꞌm ja tok nwachini. 
\v 7 Tachꞌoboꞌ chi utz ja xintzꞌibaj chawe riꞌ, ja cꞌa kajaw Jesucristo xtuyaꞌ na chawe chi nchꞌobtaj amwal nojel. 
\p 
\v 8 Ni turkaj wiꞌ chawe ja Jesucristo arjaꞌ cꞌastaji chiquicojol ja camnakiꞌ, arjaꞌ riy rumam can ja rojer rey David. Jawaꞌ ja utzlaj tzij xin Jesucristo ja nmajon rbixic 
\v 9 in congana ntijon ja rpokonal rmal. In camic inbacꞌon pa cadena rmal, banon chwe in caniꞌ jun itzel achi. Pro ja rtzobal Dios ni ma tzꞌapal ta wiꞌ. 
\v 10 In cumal ja rechaꞌon rmal ja Dios anin ncochꞌ nojel ja rpokonal utzcꞌa chi ejeꞌeꞌ nquewil ja totajem ja rcꞌamonto ja Cristo Jesús chake ja yukul kacꞌuꞌx ruqꞌuin utzcꞌa chi nyataj na chique ja gloria xin chilaꞌ chicaj pro ni chijutij. 
\p 
\v 11 Jawaꞌ ja xtintzꞌibaj chawe riꞌ ni katzij wiꞌ: —Ja Jesucristo arjaꞌ cam pa kacuenta. Ja wi xa jun kabanon ruqꞌuin, wi kayaꞌon can chic ja kil kamac jariꞌ nokcꞌaseꞌ na ruqꞌuin. 
\v 12 Ja wi nkacochꞌ ja rpokonal ja xtipi chakij jariꞌ xkoꞌoc rach kꞌetol tak tzij ja Jesucristo. Ja wi nkapokonaj nkabij chi okcꞌo pa rcuenta arjaꞌ nbij na chake chakajaꞌ chi ma ok rxin ta. 
\v 13 Masqui ajoj matikaban cumplir ja katzobal nkabij pro arjaꞌ ni nuban wiꞌ cumplir ja nbij. Como arjaꞌ ni rxin wiꞌ chi ni nuban wiꞌ cumplir ja rtzobal. 
\s * * * * * * * * * * 
\p 
\v 14 Jawaꞌ ja xintzꞌibaj riꞌ ni tanataj wiꞌ chique. In quewaꞌ xtaban recomendar chique riꞌ: —Maxta teban chꞌaꞌoj xta rmal juleꞌ tijonem ja mta rcꞌamonto, Dios rotak ja nbij chewe riꞌ, xcatcheꞌ chique. Como jariꞌ tijonem mta noc wiꞌ, ja necꞌaxani xa neyojtaj rmal. 
\v 15 Tatijaꞌ akꞌij tre ja samaj xin Dios ja yatajnak chawe, utz tabanaꞌ tre utzcꞌa ja Dios utz nutzꞌat ja samaj naban. Kas rubey tabanaꞌ chi rcojic ja utzlaj tijonem ja rcꞌamonto ja Jesucristo. Ja wi queriꞌ xtaban jariꞌ matayaꞌ aqꞌuix. 
\v 16 Maxta tayaꞌ caso chique ja winak ja neyowi ja tijonem ja mta rcꞌamonto in mta noc wiꞌ como ejeꞌeꞌ xa janiꞌ nebe más chipan ja ritzelal. 
\v 17 Ja ritzel tijonem nqueyaꞌ nojel nbe wiꞌ, npaxij riꞌ caniꞌ jun itzel yobil nbe pa nim. Queriꞌ queban ja Himeneo in Fileto. 
\v 18 Ejeꞌeꞌ sach quinaꞌoj, queyaꞌ can ja utzlaj tijonem. Ja nquibij ejeꞌeꞌ chi yatajnak chic chake chi okcꞌastajnak chic in mchita jun kꞌij xtekilaꞌ ta ja xkocꞌastaj chi ta jutij, necheꞌe. Cumal ejeꞌeꞌ ecꞌoli ja kachꞌalal yojtaji ja yukulbal quecꞌuꞌx ruqꞌuin ja Jesucristo. 
\v 19 Pro ja chake ajoj ja yukul kacꞌuꞌx ruqꞌuin ja Jesucristo, ja rbanon ja Dios chake ok caniꞌ jun jay bien tiquili ja rsimientoꞌil in mta yojtajic trij in caniꞌ tzꞌibtal chwach ja rsimientoꞌil quewariꞌ: —Ja kajaw Dios arjaꞌ rotak quewach ja winak nak chique ja katzij chi e rxin. In chakajaꞌ caniꞌ tzꞌibtali: —Canojel ja winak ja nquibij chi e xin Cristo rjawaxic chi nqueyaꞌ can ja ritzelal, neꞌe. 
\v 20 Qꞌuiy rwach ja waꞌbal ja cꞌo chipan jun nimlaj jay. Cꞌoli congana nimak rukꞌij caniꞌ tre oro ocnak owi plata. In cꞌoli ja waꞌbal chakajaꞌ ja ma kas ta nimak rukꞌij caniꞌ tre cheꞌ ocnak owi ulew. 
\v 21 Ja wi cꞌo jun npartiꞌij riꞌ chi matuban ja ritzelal arjaꞌ noc jun ajsamajel ja nim rukꞌij, junan ruqꞌuin ja waꞌbal ja nimak rukꞌij. Arjaꞌ partiꞌin chi nuban ja samaj ja congana ncꞌatzin tre ja rajaw. Arjaꞌ ncowini nuban ja rutzil xa nak ta ja najoꞌx tre chi nuban. 
\p 
\v 22 Rmalariꞌ nbij chawe, tabanaꞌ cuenta ja racꞌaslemal como ecꞌoli chique ja cꞌajolaꞌ ni cꞌo wiꞌ itzel tak naꞌoj nwinakar pa tak canma in e qꞌuiy chique nqueyaꞌ quiꞌ tre. Pro maxta queriꞌ taban atat. Ja naban quewariꞌ, nacꞌut ja rawutzil chiquewach ja winak, ni tiyukeꞌ wiꞌ acꞌuꞌx ruqꞌuin ja Jesucristo in tiqꞌuejeꞌe ja rajoben riꞌil xin Dios pan acꞌaslemal. In xa jun tabanaꞌ cuqꞌuin ja cꞌo utzlaj tak anma cucꞌan ja ni nqueyaꞌ wiꞌ rukꞌij ja Dios. 
\v 23 Maxta tayaꞌ caso tre ja tzij ja mta rcꞌamonto in mta noc wiꞌ como bien awotak chi xa chꞌaꞌoj rcꞌamonto. 
\v 24 Pro jun ajsamajel rxin ja kajaw Jesucristo arjaꞌ ma ajchꞌolaꞌ ta. Ja nuban ja rajsamajel rxin Dios ekal nerchomij canojelal. Arjaꞌ bien ncowini nertijoj ja kachꞌalal in cꞌo rpaciencia. 
\v 25 Ja tok ecꞌoli nechꞌaꞌo rxin arjaꞌ nuchꞌob chiquewach pan ekal, ma pan ayewal ta. Queriꞌ nuban como chaka jalal maxla Dios nuyaꞌ chique chi nqueqꞌuex ja quinaꞌoj in nqueyaꞌ can ja ritzelal in ncotakij ja utzlaj tzij xin Jesucristo. 
\v 26 In maqueban chic engañar rmal ja diablo in netotaj pa rukꞌaꞌ como ja diablo erchapon utzcꞌa chi nqueban xa nak ta ja cꞌo rgana chique chi nqueban. 
\c 3 
\s * * * * * * * * * * 
\p 
\v 1 In rjawaxic chi nawotakij ja xtintzꞌibaj chic riꞌ tre ja qꞌuisbal rwachꞌulew congana rcꞌayewal rcꞌamonto. 
\v 2 Treriꞌ tiempo quewaꞌ quibanic ja winak riꞌ, xa ejeꞌeꞌ nquilokꞌokꞌoj kaj quiꞌ queyon, congana nel quecꞌuꞌx trij ja pwok in congana nqueyaꞌ quekꞌij chakajaꞌ, kas e nimak nquenaꞌ kaj. In chakajaꞌ xa itzel netzijoni, maquequinimaj quitataꞌ queteꞌ, matiquimaltioxij ja rutzil nba̱n chique, xa e itzel tak winak chwa Dios. 
\v 3 Ejeꞌeꞌ matiquipokonaj quewach ja winak, ni maquecuyun wiꞌ, nqueban jolon tak tzij, xa jaꞌ chic ja ritzelal cꞌayon quixin, e cꞌaꞌniꞌ in nojel ja utz xa itzel necheꞌ tre. 
\v 4 Ejeꞌeꞌ nequitzujuj can ja camigo chipan ja rcꞌayewal in matiquechꞌob nquemin quiꞌ chipan ja rcꞌayewal chakajaꞌ. Congana e nimak nquenaꞌ in más na ncajoꞌ ja quicotemal xin rwachꞌulew chwach ja ncajoꞌ ja Dios. 
\v 5 Nepeti pa tak culto pro xa matiquinimaj chi ja Dios nuyaꞌ poder chake ja rok winak chi nkaqꞌuex ja kanaꞌoj. Ejeꞌeꞌ riꞌ winak maxta tacoj awiꞌ cuqꞌuin. 
\v 6 Como ecꞌoli chiquicojol ja nquicanoj nak nqueban chi nebe jeꞌe cuqꞌuin ixokiꞌ chi cochoch nequibanaꞌ engañar. Ja rixokiꞌ xa matiquechꞌob ja nqueban, congana pokon nquenaꞌ pa tak canma rmal ja quil quemac in chaka nak ta chi tijonemal nel quecꞌuꞌx trij. 
\v 7 Ejeꞌeꞌ ni nel wiꞌ quecꞌuꞌx trij ja tijonem jeꞌe pro ni maticotakij wiꞌ ja utzlaj tijonem xin Jesucristo. 
\v 8 Ja rachiꞌiꞌ ja nebe cuqꞌuin ja rixokiꞌ ejeꞌeꞌ ni nquechꞌaꞌ wiꞌ ja utzlaj tijonem ja caniꞌ queban ojer ja Janes in Jambres tok quechꞌaꞌ tre ja Moisés ja xbij chique. Xa yojtajnak quinaꞌoj rmal ja ritzelal, ni kꞌalaj wiꞌ chi mta ja yukulbal quecꞌuꞌx ruqꞌuin ja Jesucristo. 
\v 9 Pro ma chijutij ta nenimax cumal ja winak, xa neya̱ꞌ can in canojel ja winak xtiqueyaꞌ cuenta chique chi ja tijonem nqueyaꞌ mta noc wiꞌ in mta rcꞌamonto caniꞌ ban chique ja Janes in Jambres ojer. 
\s * * * * * * * * * * 
\p 
\v 10 Pro atat bien xawotakijto ja tijonem ja nmajon ryaꞌic in nak rbanic ja ncꞌaslemal chakajaꞌ. Bien awotak chi anin cꞌo ngana nban nojel ja rbanon recomendar chwe ja Dios. Awotak chi yukul nucꞌuꞌx ruqꞌuin ja Jesucristo in cꞌo npaciencia in cꞌoli ja rajoben riꞌil xin Dios pa ncꞌaslemal. 
\v 11 Xintzelaxi in xintij ja rpokonal pro nojel ncochꞌon. Nojel ariꞌ bien awotak. In chakajaꞌ awotak nojel ja ban chwe chipan ja roxiꞌ tinamit Antioquía, Iconio in Listra. Triꞌ congana rpokonal xintij pro ja kajaw Jesucristo arjaꞌ toꞌo wxin chipan nojel. 
\v 12 Katzij ja nbij chawe riꞌ, ja wi cꞌo jun nyukeꞌ rucꞌuꞌx ruqꞌuin ja Jesucristo in wi nuban ja rvoluntad ja Dios jariꞌ seguro chi ntzelaxi cumal ja winak. 
\v 13 Pro ja ritzel tak winak in ja banol tak engaño ejeꞌeꞌ xa janiꞌ neyojtaj más, nequeban engañar ja winak in queriꞌ chique ejeꞌeꞌ chakajaꞌ neba̱n engañar. 
\v 14 Pro atat utzlaj tijonem ja yaꞌ chawe in xanimaj jariꞌ maxta tayaꞌ can. Atat bien awotak nak xetijon awxin 
\v 15 in cꞌa at tinoꞌy na ja tok xawotakijto nojel ja tzꞌibtal can chipan ja santilaj rtzobal Dios. Ja rtzobal Dios nuyaꞌ chawe chi npi más anaꞌoj in nawil ja totajem rmal ja tok nyukeꞌ acꞌuꞌx ruqꞌuin ja Jesucristo. 
\v 16 Nojel ja tzꞌibtal chipan ja rtzobal Dios, ja xetzꞌibani Dios cꞌayon quixin chi rtzꞌibaxic in qꞌuiy rcꞌamonto chake quewariꞌ, noqui chi quitijoxic ja winak tre ja utzlaj tijonem in chi rchꞌaꞌic ja ritzel tak tijonem, noqui chi quichomixic ja winak ja nqueban quil in chi rcꞌutic nojelal ja rutzil. 
\v 17 Queriꞌ rcojic ja rtzobal Dios utzcꞌa ja rajsamajel xin Dios nojel nyataj tre utzcꞌa chi ncowini nuban ja rutzil xa nak ta ja najoꞌx tre chi nuban. 
\c 4
\p 
\v 1-2 Congana nban recomendar chawe chi ni nayaꞌ wiꞌ rbixic ja rtzobal Dios nojel tiempo. Tachꞌaꞌaꞌ ja tijonem ja ma katzij ta, tachꞌaꞌaꞌ chique ja nqueban quil in tayukbaꞌ quecꞌuꞌx. Tiqꞌuejeꞌ apaciencia in tachꞌoboꞌ chiquewach nak rjawaxic chi nqueban. Jawaꞌ xinban recomendar chawe riꞌ Dios nutzꞌat in nutzꞌat chakajaꞌ ja kajaw Jesucristo ja xtipi chi na jutij, arjaꞌ nimlaj Rey in nukꞌet tzij chiquij chi ecꞌasli chi e camnakiꞌ. 
\v 3 Como nerilaꞌ na jun tiempo ja tok matiqueyaꞌ chic quixquin ja winak tre ja utzlaj tijonem, xa jaꞌ chic nel quecꞌuꞌx chi rcꞌaxaxic ja mta rcꞌamonto tre ja quicꞌaslemal. Rmalariꞌ tok e qꞌuiy ja winak nequicanoj na juleꞌ maestro ja netijon quixin pro juleꞌ maestro ja xa nqueyaꞌ quigana. 
\v 4 Ejeꞌeꞌ riꞌ xa nqueyaꞌ can ja utzlaj tijonem xin Jesucristo in nqueyaꞌ caso tre juleꞌ tzij ja mta noc wiꞌ. 
\v 5 Pro atat tabanaꞌ cuenta awiꞌ, tachꞌoboꞌ chi utz ja naban. Tacochꞌoꞌ ja rpokonal ja npi chawij, maxta tatanbaꞌ rbixic ja utzlaj tzij xin Jesucristo, tabanaꞌ nojel ja samaj ja banon recomendar chawe rmal ja Dios. 
\p 
\v 6 Anin xajalal majaꞌn quincamsaxi, xajalal majaꞌn tinyaꞌ can ja rwachꞌulew. 
\v 7 Congana xintij nukꞌij chi rbixic ja utzlaj tzij xin Jesucristo, xinban nojel ja samaj ja banon recomendar chwe rmal ja Dios, ma xinqꞌuex ta rbixic ja utzlaj tijonem ja kaniman. 
\v 8 Cꞌo jun rtojbalil ja rcꞌamonto ja utzlaj cꞌaslemal in camic wotak chi nyataj na chwe. Ja kajaw Jesucristo arjaꞌ utzlaj kꞌetol tzij, arjaꞌ xtiyoꞌ chwe ja rtojbalil tokoriꞌ tok xtipi chic jutij. Pro ja rtojbalil ma nuyon ta anin xtiyataj chwe in xtiyataj chique chakajaꞌ canojelal ja nel quecꞌuꞌx chi raybexic ja Jesucristo ja tok xtipi chic jutij. 
\s * * * * * * * * * * 
\p 
\v 9 Tatijlaꞌto akꞌij chi natpi wqꞌuin chanim 
\v 10 como ja Demas arjaꞌ be chipan ja tinamit Tesalónica, xinruyaꞌ can xa rmal ja congana nel rucꞌuꞌx trij ja quicotemal xin rwachꞌulew. Ja Crescente jariꞌ xintak pa tak tinamit ja cꞌo pa rcuenta Galacia in xintak ja Tito chakajaꞌ pa tak tinamit ja cꞌo pa rcuenta Dalmacia. 
\v 11 Ja cꞌa camic xa ruyon Lucas ja cꞌo wqꞌuin. Tacꞌamaꞌto ja Marcos, tawachbilajto tok xcatpeti como arjaꞌ utzlaj ajsamajel in ncowini ninrutoꞌ tre ja samaj. 
\v 12 Ja Tíquico chakajaꞌ xintak chipan ja tinamit Efeso. 
\v 13 Ja tok xcatpeti nacꞌamto ja nchaqueta ja nyaꞌon can pa Troas chi rochoch ja Carpo in nacꞌamto ja juleꞌ libro chakajaꞌ in ja más rjawaxic chwe nacꞌamto chic ja juleꞌ ja tzꞌibtal chwach tzꞌum. 
\p 
\v 14 Ja rAlejandro ja chꞌayol chꞌichꞌ arjaꞌ congana itzel xuban chwe, ja kajaw Dios arjaꞌ xtiyoꞌ rjil rcꞌaxel tre 
\v 15 in atat tabanaꞌ cuenta awiꞌ chwach como arjaꞌ congana rcꞌulel ja utzlaj tijonem nkayaꞌ. 
\p 
\v 16 Ja tok xinsiqꞌuixi nabey mul chiquewach ja kꞌetol tak tzij ni majun toꞌo wxin, xebe canojelal, xinqueyaꞌ can. Pro matinwajoꞌ chi Dios xtuyaꞌ ta rcꞌaxel chique. 
\v 17 Pro ja kajaw Jesucristo arjaꞌ toꞌo wxin in xuyaꞌ wachokꞌakꞌ in rmalariꞌ xincowini xinqꞌuis nojel ja samaj ja xuban recomendar chwe chi rbixic ja utzlaj tzij ja rcꞌamonto. Queriꞌ xuban chwe utzcꞌa chi canojel ja winak ja ma e aj Israel ta nquicꞌaxaj ja utzlaj tzij. Queriꞌ xinban, ja kajaw Jesucristo arjaꞌ toꞌo wxin chipan ja nimlaj rcꞌayewal. 
\v 18 In bien wotak chi nij arjaꞌ wiꞌ nintoꞌowi pa quekꞌaꞌ xa nak ta xquetzelan wxin. Bien wotak chi nij arjaꞌ wiꞌ nbano cuenta wxin utzcꞌa chi nineqꞌuejeꞌ na chipan ja rgobierno ja xin chilaꞌ chicaj. Kas ta xtiyaꞌ rukꞌij camic, chwak in chijutij. Amén. 
\s * * * * * * * * * * 
\p 
\v 19 Tayaꞌaꞌ rutzil quewach ja Prisca in Aquila in tayaꞌaꞌ rutzil quewach chakajaꞌ canojel ja recꞌo pa rochoch ja Onesíforo. 
\v 20 Ja Erasto arjaꞌ qꞌuejeꞌ can chipan ja tinamit Corinto. Ja cꞌa Trófimo arjaꞌ yawaꞌ in xinyaꞌ can chipan ja tinamit Mileto. 
\v 21 Tatijlaꞌto akꞌij chi natpeti chanim ja tok majaꞌn tumaj rtiempo tew. Ja Eubulo, Pudente, Lino in Claudia in canojel ja kachꞌalal waweꞌ ejeꞌeꞌ nquetakel rutzil awach. 
\p 
\v 22 Kas ta xtiqꞌuejeꞌe pan awanma ja kajaw Jesucristo. Kas ta xtiqꞌuejeꞌe ja rutzil xin Dios awqꞌuin. Amén.