\id TIT Western Tzutujil [tzt] NT (Guatemala) -2009 bd. 
\h TITO 
\toc1 Tito 
\toc2 Tit
\mt TITO
\c 1
\s 
\p
\v 1 Anin in Pablo ntzꞌibajel chawe ja carta riꞌ Tito. Anin in ajsamajel rxin ja Dios in chakajaꞌ in apóstol rxin ja Jesucristo. Arjaꞌ xinrutak cuqꞌuin ja rechaꞌon rmal ja Dios chi quitoꞌic utzcꞌa chi nyukeꞌ más quecꞌuꞌx ruqꞌuin utzcꞌa chakajaꞌ chi ncotakij ja utzlaj tijonem xin Jesucristo ja natrucꞌaj chipan jun utzlaj cꞌaslemal ja caniꞌ nrajoꞌ ja Dios.
\v 2 In triꞌ cꞌa ncotakij wiꞌ más chi cꞌo jun utzlaj cꞌaslemal ja mta qꞌuisic trij in nequicoti chi raybexic. Jariꞌ ja utzlaj cꞌaslemal ja Dios ojer rtzujunto. Majaꞌn titzꞌucari ja rwachꞌulew tok rtzujun in ni nuyaꞌ wiꞌ como ja Dios arjaꞌ ma tzꞌakol tzij ta.
\v 3 Ja Dios tok xurwilaꞌ ja kꞌij ja rchominto xutakto rbixic ja rtzobal. Arjaꞌ Toꞌonel kaxin, arjaꞌ biyon chwe chi anin nyaꞌ rbixic ja rtzobal jariꞌ ja rsamaj xuban recomendar chwe chi nban.
\v 4 Ja cꞌa ratat Tito xa junan yukul wiꞌ kacꞌuꞌx awqꞌuin ruqꞌuin ja Jesucristo, at ncꞌajol chwach ja Dios. Ja rutzil ja nsipaj ja Dios chake rachbil ja quicotemal xin Dios ja tariꞌ xtacochij más tre ja katataꞌ Dios in tre ja Jesucristo ja Toꞌonel kaxin. Ejeꞌeꞌ ta xtiquipokonaj awach.
\s * * * * * * * * * *
\p
\v 5 Anin xatnuyaꞌ can pa Creta utzcꞌa chi nachomij ja ma chomtajnak ta tre ja samaj xin Dios ja majtajnak. In xinbij can chawe chi nojel tinamit ja recꞌo wiꞌ ja kachꞌalal chi neꞌaban nombrar anciano chiquicojol ja nebano cuenta quixin.
\v 6 Pro ja rjawaxic ja rcꞌaslemal jun anciano quewariꞌ, ni majun nak ta nchapbexi in ma e caꞌiꞌ ta ja rxjayil. In ja ralcꞌwal chakajaꞌ rjawaxic chi quiniman ja Jesucristo in e nimanelaꞌ, maxta nbix chique chi e itzel tak winak.
\v 7 Ja nebano cuenta ja kachꞌalal ejeꞌeꞌ e ajsamajelaꞌ rxin ja Dios. Rmalariꞌ tok rjawaxic chique chi utz ja quicꞌaslemal. Maxta ma tuyaꞌ ta pa cuenta ja nbix tre. Maxta ma cꞌayew ta npi ryewal in ma tikꞌabar ta in ma banol chꞌaꞌoj ta. In chakajaꞌ maxta congana tel rucꞌuꞌx trij ja pwok in utz rchꞌaquic tibanaꞌ.
\v 8 Ja rjawaxic tre chi nuban, nuyaꞌ quiposada ja neꞌekaj ruqꞌuin ja cꞌo rjawaxic chique. In ni nrajoꞌ wiꞌ ja rutzil, nuchꞌob chi utz ja nuban, ni utz wiꞌ ja nuban, Dios cꞌayon rxin in nucochꞌ chi matuban ja ritzelal.
\v 9 In rjawaxic chi nnimaj chijutij ja tijonem ja kayaꞌ chique ja kachꞌalal como ja kabij chique ni katzij wiꞌ. Ja wi queriꞌ nuban ncowini nyukbaꞌ quecꞌuꞌx ja winak tre ja utzlaj tijonem in ncowini neruchꞌec ja nechꞌaꞌo rxin.
\p
\v 10 Como e qꞌuiy ja ma e nimanelaꞌ ta. In ecꞌoli chiquicojol ja nebini chi ni rjawaxic wiꞌ chique ja kachꞌalal chi nquinimaj ja costumbre quixin ja raj Israel. Ejeꞌeꞌ nquibij juleꞌ tzij ja mta noc wiꞌ in nequeban engañar ja winak.
\v 11 Jariꞌ winak queꞌakꞌilaꞌ como ejeꞌeꞌ ni pa tak familia nequeyoj ja winak pa tak cochoch, xa itzel tak tijonem nquecꞌut chiquewach. Jariꞌ nquichꞌecbej ja quipwok pro ma utz ta rchꞌaquic nqueban.
\v 12 Cꞌo jun achi ojer aj Creta arjaꞌ rtzꞌiban can nak quibanic ja winak ja rach tak aj Creta. Quewaꞌ rtzꞌiban can riꞌ: —Ja wach tak aj Creta ejeꞌeꞌ nij e tzꞌakol tak tzij wiꞌ, xa e junan cuqꞌuin ja ritzel tak chicop ja netijoni, xa e munaꞌ in xa e sakꞌoriꞌ, neꞌe.
\v 13 In ni katzij wiꞌ ja xbij. Ja cꞌa nwajoꞌ chawe, tachꞌaꞌaꞌ chique in cowlaj tak tzij queꞌachapbej utzcꞌa chi nyukeꞌ quecꞌuꞌx ruqꞌuin ja utzlaj tijonem ja rcꞌan ja rtzobal Dios.
\v 14 In queriꞌ nqueban, ma tiqueyaꞌ ta caso tre ja juleꞌ tzij ja mta noc wiꞌ ja nbix chique cumal ja raj Israel nixtacꞌa nqueyaꞌ ta caso tre ja nbix chique cumal ja winak ja xa itzel nquetzꞌat ja utzlaj tijonem xin Jesucristo.
\p
\v 15 Ja winak ja chꞌajchꞌoj canma ejeꞌeꞌ ni necowin wiꞌ nquetzꞌat ja rutzil. Ja winak ja xa tzꞌil canma in matiquinimaj ja Dios ejeꞌeꞌ nojel itzel nquetzꞌat. Ejeꞌeꞌ riꞌ xa itzel quinaꞌoj in matitiꞌon chique ja ritzelal nqueban.
\v 16 Nquibij chi cotak rwach ja Dios pro ni kꞌalaj wiꞌ chi ma katzij ta como xa itzelal ja nqueban. Xa itzel netzꞌati, ma e nimanelaꞌ ta in maquecowini nquecꞌut ja rutzil chiquewach ja winak.
\c 2 
\s * * * * * * * * * * 
\p 
\v 1 Pro ja nwajoꞌ chawe, ni neꞌatijoj wiꞌ ja kachꞌalal tre ja utzlaj tijonem. 
\v 2 Ja taꞌiꞌ, ja rjawaxic chi nqueban quewariꞌ, bien nquechꞌob ja nqueban in neba̱n respetar cumal ja winak in yukul quecꞌuꞌx ruqꞌuin ja utzlaj tijonem ja rcꞌan ja rtzobal Dios in nqꞌuejeꞌe ja rajoben riꞌil xin Dios pa tak quicꞌaslemal in maticapuj quecꞌuꞌx nquecochꞌ nojelal ja npi chiquij. 
\v 3 In queriꞌ chique ja naniꞌ chakajaꞌ ja rjawaxic nqueban quewariꞌ, nqueban cuenta ja quicꞌaslemal ja caniꞌ nrajoꞌ ja Dios chique chi nqueban, maxta tiqueban molon tak tzij, ma quekꞌabar ta, tiquiyaꞌaꞌ jun utzlaj ejemplo chiquewach ja rixokiꞌ ja ma e rijaꞌ ta. 
\v 4 Ja wi queriꞌ nqueban jariꞌ necowini nequitijoj ja rixokiꞌ. Ja tijonem nqueyaꞌ chique quewariꞌ, lokꞌ nequenaꞌ ja quichajilal in tak cal chakajaꞌ, 
\v 5 bien nquechꞌob ja nqueban, mchita jun achi nquechꞌob, nquichajij chi utz ja tak cochoch, nequetoꞌ ja winak ja cꞌo rjawaxic chique in nequinimaj ja quichajilal utzcꞌa chi matiqueyaꞌ lugar chique winak chi itzel netzijon tre ja rtzobal Dios. 
\p 
\v 6 In queꞌapaxbaj ja cꞌajolaꞌ chakajaꞌ utzcꞌa chi bien nquechꞌob ja nqueban. 
\v 7 In atat chakajaꞌ rjawaxic chi ni nacꞌut wiꞌ jun utzlaj ejemplo chiquewach. Ja tok neꞌatijoj maxta rmal cꞌoli nawajoꞌ chewiꞌ tok neꞌatijoj in ni nayaꞌ wiꞌ rukꞌij ja tijonem ja nayaꞌ chique. 
\v 8 Utzlaj tijonem ja nayaꞌ chique utzcꞌa chi ni majun nak ta nchꞌaꞌowi. Ja wi queriꞌ naban ja winak ja ncajoꞌ nquechꞌaꞌ xa qꞌuixbal nquenaꞌ xtiquechꞌaꞌ ta in ni majun nak ta xtiquibij chewe. 
\p 
\v 9 In queꞌapaxbaj chakajaꞌ ja recꞌo quipatrón chi nequinimaj utzcꞌa chi utz netzꞌati in utz ntzꞌati ja quisamaj chakajaꞌ in ma quequicꞌulbaꞌ ta ja quipatrón 
\v 10 in chakajaꞌ ma quequilakꞌaj ta. Utz tiquibanaꞌ tre nojelal utzcꞌa ja quipatrón cꞌo quiconfianza cuqꞌuin. Ja wi queriꞌ nqueban cumal ejeꞌeꞌ canojel ja winak utz nquetzꞌat ja rtzobal Dios, arjaꞌ Toꞌonel kaxin. 
\p 
\v 11 Ja cꞌa Dios arjaꞌ rcꞌutun ja rutzil chikawach jariꞌ rcꞌamonto totajem chake kanojel ja rok winak. 
\v 12 Ja rutzil xin Dios quewaꞌ nucꞌut chikawach riꞌ, chi nkayaꞌ can nojelal ja matirajoꞌ ja Dios in nojelal ja quicotemal xin rwachꞌulew in bien nkachꞌob ja nkaban in nkaban ja rutzil ja caniꞌ nrajoꞌ ja Dios chake chi nkaban. 
\v 13 In chakajaꞌ ja rutzil xin Dios nucꞌut chikawach chi npi chi na jutij ja Jesucristo, arjaꞌ nimlaj Dios kaxin, arjaꞌ Toꞌonel kaxin. In kotak chic chi ja tok xtipeti congana nim chic rukꞌij triꞌ in camic nokquicoti chi raybexic. 
\v 14 Kumal ajoj tok xujach riꞌ pa quekꞌaꞌ ja winak chi camsaxi, xokrutoꞌ chipan ja kil kamac utzcꞌa chi arjaꞌ nchꞌachꞌojirsaj ja kacꞌaslemal. Queriꞌ xuban utzcꞌa chi nokoc tinamit rxin utzcꞌa chi nel kacꞌuꞌx trij ja banoj utzil. 
\p 
\v 15 Nojel cꞌawaꞌ ja xintzꞌibaj riꞌ queꞌatijoj ja winak tre. Ja tok ncapuj quecꞌuꞌx tayukbaꞌ quecꞌuꞌx. Ja cꞌa wi ecꞌoli ja ma utz ta nqueban queꞌachꞌolij. Ma taxbej ta awiꞌ naban queriꞌ como ja Dios arjaꞌ yoyon chawe chi neꞌaban cuenta. In maxta tayaꞌ awiꞌ chique ja netzelan awxin. 
\c 3
\s * * * * * * * * * * 
\p 
\v 1 Tanataj chique ja kachꞌalal chi rjawaxic chi nqueban respetar ja gobierno in nequinimaj ja kꞌetol tak tzij. Xa nak ta ja rutzil ja nbix chique cumal tiquibanaꞌ pro nojel quecꞌuꞌx. 
\v 2 Maxta tiquibij itzel tak tzij chique winak, ma tiqueban ta chꞌaꞌoj, quequibanaꞌ respetar canojel ja winak in tiquicꞌutuꞌ ja cutzil chiquewach. 
\p 
\v 3 Como ajoj chakajaꞌ nabey ma chꞌobtajnak ta kumal ja rutzil xin Dios, ma xkanimaj ta ja Dios, oktzaknak chipan ja ritzelal. Chaka nojel ta kayarij okrchapon, ok caniꞌ preso rmal. Ojer xa xekatzelaj ja winak, congana quiakir kanma chiquij, xa ok itzel tak winak in xa itzel katzꞌat kiꞌ. 
\v 4 Pro ja Dios ja Toꞌonel kaxin arjaꞌ xucꞌut ja rutzil chikawach, xokrajoꞌ kanojel ja rok winak. 
\v 5 In tok xuban queriꞌ tokocꞌariꞌ xokrutoꞌ kanojelal pro ma rmal ta chi cꞌoli kachꞌecbej tok xuban queriꞌ chake, xa rmal xpokonaj kawach. Ja tok xokchꞌachꞌojirsaxi rmal ja xokalax chic jutij tokoriꞌ xoktotaji in rmal ja rEspíritu Santo kawil ja cꞌacꞌa cꞌaslemal. 
\v 6 Dios xuyaꞌ tre ja Jesucristo ja Toꞌonel kaxin chi arjaꞌ xutakto ja rEspíritu Santo kuqꞌuin in ni matiqꞌuis wiꞌ ja rchokꞌakꞌ. 
\v 7 In rmalariꞌ tok utz chic noktzꞌat rmal ja Dios como arjaꞌ xsipaj ja rutzil chake in cꞌo jun herencia nyataj na chake. Jariꞌ herencia ja cꞌacꞌa cꞌaslemal ja mta qꞌuisic trij in jariꞌ kotak chi nyataj na chake in nokquicoti chi raybexic. 
\p 
\v 8 Jawaꞌ ja xintzꞌibaj riꞌ ni katzij wiꞌ in congana rjawaxic tre ja quicꞌaslemal ja winak. Rmalcꞌariꞌ ja ngana anin ni ta nabij wiꞌ chique utzcꞌa chi ja kachꞌalal ni nquicanoj wiꞌ ja rutzil. 
\v 9 Pro ecꞌoli ja nquibij juleꞌ tzij chique winak ja ni majun rcꞌamonto caniꞌ tre juleꞌ ojer tak tzij ja nquibij chique ja katiꞌt kamamaꞌ ja xa ejeꞌeꞌ ewinakarsyon. In tre chakajaꞌ ja costumbre ja rcꞌan ja ley xin Dios ja tzꞌibtal can rmal ja Moisés. Jariꞌ xa nquechap quiꞌ ja winak rmal. Maxta tacoj awiꞌ cuqꞌuin como mta noc wiꞌ ja nquibij. 
\p 
\v 10 Ja wi cꞌo jun ja wi xa banol división tachꞌaꞌaꞌ tre. Ja wi xachꞌaꞌ tre nabey ja wi macatrnimaj tachꞌaꞌaꞌ chic jutij tre. Ja wi ni macatrnimaj wiꞌ cꞌacꞌariꞌ tabanaꞌ tre chaka nqꞌuejeꞌ chic checojol. 
\v 11 Ja nbano queriꞌ ni kꞌalaj wiꞌ chi il mac ja nuban, xa itzel rnaꞌoj, arjaꞌ rotak chi ma utz ta ja nuban. 
\s * * * * * * * * * * 
\p 
\v 12 Ja ranin ntakel na ja rArtemas awqꞌuin owi Tíquico. Ja tok xtekaj awqꞌuin xa nak ta xtekaj chique tachomlaꞌ cꞌa awiꞌ chanim natbe Nicópolis. Triꞌ nekawilaꞌ wiꞌ kiꞌ awqꞌuin como anin nchꞌobon chi triꞌ nineqꞌuejeꞌ wiꞌ pa rtiempo tew. 
\v 13 In chique ja Zenas ja licenciado in Apolos lokꞌ queꞌanaꞌaꞌ, tayaꞌaꞌ chique ja ncꞌatzin tre ja quiviaje ja xtiquemaj chic utzcꞌa chi ni majun nak ta xtuban ta falta chique pa bey. 
\v 14 In chique ja kachꞌalal chakajaꞌ rjawaxic chi ncotakij chi nquecꞌut ja cutzil chiquewach ja winak in nequetoꞌ ja tok cꞌo rjawaxic chique. Ja wi queriꞌ nqueban jariꞌ cꞌoli neꞌoc wiꞌ. 
\p 
\v 15 Canojel ja kachꞌalal ja recꞌo wqꞌuin nquetakel rutzil awach. Tayaꞌaꞌ cꞌa rutzil quewach ja kachꞌalal ja recꞌol awqꞌuin. Kas ta xtiqꞌuejeꞌe ja rutzil xin Dios ewqꞌuin ewanojelal. Amén.