\id HEB Western Tzutujil [tzt] NT (Guatemala) -2009 bd. 
\h HEBREOS 
\toc1 Hebreos 
\toc2 Heb
\mt HEBREOS
\c 1
\s 
\p
\v 1 Ja rojer ja Dios xerucoj profeta chi ejeꞌeꞌ nekꞌalasan chiquewach ja katiꞌt kamamaꞌ janiꞌ ja rnaꞌoj. Jariꞌ ma jutij ta xuban pro qꞌuiylaj mul in qꞌuiy rwach xuyaꞌ chique ja nquikꞌalasbej jeꞌe chiquewach janiꞌ ja rnaꞌoj.
\v 2 Pro ja rbanon ja Dios camic chipan awaꞌ qꞌuisbal tak kꞌij rxin ja tiempo ja rokcꞌo wiꞌ riꞌ xucoj ja Ralcꞌwal chi arjaꞌ kꞌalasan chikawach ajoj janiꞌ ja rnaꞌoj. Xuyaꞌ tre ja Ralcꞌwal chi mta nak ta ja maquita noc na pa rukꞌaꞌ in xucoj ja Ralcꞌwal chakajaꞌ chi arjaꞌ winakarsani ja caj in rwachꞌulew.
\v 3 Caniꞌ tre ja ruchꞌaꞌ kꞌij ruqꞌuin nkatzꞌat wiꞌ nak rbanic ja kꞌij in queriꞌ cꞌa tre ja Ralcꞌwal Dios chakajaꞌ ruqꞌuin nkatzꞌat wiꞌ chi janila nim rukꞌij ja Dios. Ja Dios in ja Ralcꞌwal ni junan quinaꞌoj chi e caꞌiꞌ, ni majun nak ta rjalben ta riꞌ. Ja Ralcꞌwal Dios mta nak ta ja winakarsan jeꞌe ja maquita arjaꞌ chapyon rxin utzcꞌa chi matichictaji in matiyojtaji, ja cꞌa nchapbej jariꞌ ja rtzobal como ja tzij nbij congana poder rcꞌan. Ja cꞌa xuban nabey peti, xokurchꞌachꞌojirsaj chipan ja kil kamac cꞌacꞌariꞌ be chilaꞌ chicaj, xetzꞌabeꞌ pa riquikꞌaꞌ ja nimlaj katataꞌ Dios.
\s * * * * * * * * * *
\p
\v 4 Ja Ralcꞌwal Dios yataj tre chi más chi na nim rukꞌij arjaꞌ chiquewach ja ángel. In chakajaꞌ ja rubiꞌ yaꞌ tre jariꞌ más chi na nim rukꞌij chwach ja quebiꞌ ja ángel.
\v 5 Ja Dios tzijonnak can tre ja Ralcꞌwal quewariꞌ: —Atat at Walcꞌwal. Camic nyaꞌon acꞌaslemal, chenak can tre. Pro ni majutij xbij ta walcꞌwal tre jun ángel. In chakajaꞌ tzijonnak can chic jutij tre quewariꞌ: —Anin in Tatixel rxin, arjaꞌ Walcꞌwal, chenak can tre. Pro ni majutij xbij ta queriꞌ tre jun ángel.
\v 6 Ja cꞌa Ralcꞌwal ja congana nim rukꞌij tok xutakto waweꞌ chwachꞌulew quewaꞌ xbij riꞌ: —Canojelal ja ángel rxin Dios tiquiyaꞌaꞌ rukꞌij, neꞌe.
\v 7 Ja chique ja ángel quewaꞌ tzꞌibtal can chique riꞌ: —Ja ángel, Dios nuban chique e caniꞌ rmoso, e caniꞌ xcomel, e caniꞌ rxak kꞌakꞌ, neꞌe.
\v 8 Pro ja Ralcꞌwalaxel quewaꞌ tzꞌibtal can tre riꞌ: —Atat at Dios, atat at Rey in ja gobierno awxin atat jariꞌ ni mta wiꞌ qꞌuisic trij. Utz cucꞌaxic naban ja recꞌo pan akꞌaꞌ.
\v 9 Nel acꞌuꞌx trij ja rutzil pro ja ritzelal itzel natzꞌat. Rmalcꞌariꞌ tok atnchaꞌon chi atocnak Rey, anin ja rin Dios awxin. Más chi na quiꞌil ja tok xatnuchaꞌ atat chwach ja tok xenuchaꞌ juleꞌ chic awach tak rey. Queriꞌ tzꞌibtal can tre.
\v 10 Cꞌo chi na jun tzꞌibtal can tre chakajaꞌ quewaꞌ nbij riꞌ: —Wajaw, atat xatticowi ja rwachꞌulew, ruqꞌuin akꞌaꞌ xawinakarsbej ja caj.
\v 11 Ja caj in rwachꞌulew xa cꞌo qꞌuisic trij pro ja ratat nij at cꞌo wiꞌ, ni mta wiꞌ qꞌuisic chawij. Ja caj in rwachꞌulew xa cꞌo yojtajic trij caniꞌ nuban jun tziak xa ntzabukari.
\v 12 Ja xtaban tre queriꞌ caniꞌ nba̱n tre jun tzabuklaj chaqueta mchita noc wiꞌ, nqꞌuextaji chijutij. Pro ja ratat ma at queriꞌ ta, mta qꞌuextajic chawij, macatrajiꞌxi.
\v 13 Ja Dios quewaꞌ xbij tre ja Ralcꞌwal riꞌ: —Cattzꞌabeꞌe waweꞌ pa wiquikꞌaꞌ, congana nim akꞌij. Waweꞌ natqꞌuejeꞌ wiꞌ in nenucoj na ja racꞌulel xeꞌ awakan, neꞌe. Pro ni majutij xbij ta queriꞌ tre jun ángel.
\v 14 Ja quibanic ja ángel ejeꞌeꞌ xa e moso, e espíritu, ja Dios nerutak chi quichajixic ja winak ja nyataj na chique chi nquewil ja totajem xin Dios.
\c 2 
\s * * * * * * * * * * 
\p 
\v 1 Janila nim rukꞌij ja Ralcꞌwal Dios rmalcꞌariꞌ congana rjawaxic chi más na nkayaꞌ kaxquin tre ja utzlaj tzij ja rcꞌamonto chake, maquita nkayaꞌ can jutzꞌit. 
\v 2 Ja rojer ja ley xin Dios ja tzꞌibtal can rmal ja Moisés ángel ecꞌamyonto. Jariꞌ ley ni natruchap wiꞌ ja wi xaban awil, wi ma xatniman ta, nak ja rawil xaban xa nijawariꞌ natrchapbej. 
\v 3 In queriꞌ chake ajoj camic chakajaꞌ, ja lokꞌlaj totajem xin Dios ja rcꞌamonto ja Ralcꞌwal ja wi nkaban tre ni ma vale ta chikawach jariꞌ majun nkatobej kiꞌ. Jariꞌ totajem yaꞌ rbixic nabey rmal ja kajaw Jesucristo in bix chic ajoj chake cumal ja xecꞌaxan rxin, quechꞌob chikawach chi jun totajem ja ni katzij wiꞌ chi totajem. 
\v 4 Ja katataꞌ Dios cꞌoli xuban chakajaꞌ ja xcꞌutbej chi ni katzij wiꞌ ja totajem ja queyaꞌ rbixic chake caniꞌ tre milagro qꞌuiy rwach ja xuban. In caniꞌ tre chakajaꞌ ja samaj ja xecowini queban ja kachꞌalal ja yataj chique rmal ja rEspíritu Santo. Jariꞌ Dios chomini nak chi samajil yataj chique chiquijujunal. 
\p 
\v 5 Como ja Dios arjaꞌ ma pa quekꞌaꞌ ta ángel rcojon wiꞌ ja cꞌacꞌa rwachꞌulew ja penak ja kamajon rnataxic ewqꞌuin camic. 
\v 6 Caniꞌ rbin can jun achi chipan ja rtzobal Dios quewaꞌ rbin can tre ja Dios riꞌ: —Ajoj ja rok winak xok way xok yaꞌ. ¿Nak tre tok nokanataj? ¿Nak tre tok nokachajij? 
\v 7 Pro xaban takaꞌan chake chi xajalal maquekakꞌiꞌ ja ángel. Xayaꞌ takaꞌan chake chi congana nimak kakꞌij. Xayaꞌ takaꞌan chake chi xokpeꞌe trij nojel ja rawinakarsan jeꞌe. 
\v 8 Xacoj takaꞌan pa kakꞌaꞌ nojelal. Queriꞌ rbin can. Como ja Dios nojelal xucoj pa kakꞌaꞌ ja rok winak tibij cꞌa tzij ariꞌ chi majun ja maquita xucoj pa kakꞌaꞌ. Pro ja nkatzꞌat camic majaꞌn toqui pa kakꞌaꞌ nojelal. 
\v 9 Pro ja Jesús jariꞌ nkatzꞌat chi arjaꞌ takto waweꞌ chwachꞌulew, xoc kach winak in ban tre chi ma kas ta nim chic rukꞌij chiquewach ja ángel. Pro ja camic yaꞌon chic tre rmal ja Dios chi janila nim chic rukꞌij como xurtijaꞌ kaj ja rpokonal, camsaxi. Queriꞌ ban tre utzcꞌa chi xurcam kaj pa kacuenta chikajujunal. Rmal ja rutzil ja nsipaj ja Dios chake chewiꞌ tok cam pa kacuenta. 
\p 
\v 10 Ja Dios majun nak ta ja maquita arjaꞌ winakarsyon, majun nak ta ja maquita rxin. Ok qꞌuiy ja ryaꞌon chake chi xokoc ralcꞌwal, ryaꞌon chake chi nokekaj na ruqꞌuin pa gloria chilaꞌ chicaj. Ja Jesucristo arjaꞌ ncꞌamo kabey, nokrucꞌaj chipan ja totajem xin Dios. Ja cꞌa Dios ni utz wiꞌ ja xuban, xutakto ja Jesucristo waweꞌ chi nurnaꞌaꞌ kaj janiꞌ ja tijoj rpokonal. Ja cꞌa rpokonal xutij jariꞌ xchombej riꞌ chi ncowini nucꞌamel kabey in rmalariꞌ xoqui jun Toꞌonel, pro jun Toꞌonel ja ni majun ja maquita tzꞌakat tre. 
\v 11 Ja Jesús nerchꞌachꞌojirsaj ja winak chipan ja quil quemac. Ja cꞌa nechꞌachꞌojirsaxi ejeꞌeꞌ xa junan quitataꞌ ruqꞌuin, ejeꞌeꞌ e ralcꞌwal Dios chakajaꞌ. Rmalcꞌariꞌ ja Jesús ma junwiꞌ ta nunaꞌ nbij chake chi ok rchꞌalal. 
\v 12 Caniꞌ tzꞌibtal chipan ja rtzobal Dios ja Ralcꞌwalaxel quewaꞌ xbij tre ja Tatixel riꞌ: —Anin nyaꞌ na abixic chique ja wachꞌalal, nbixaj na abiꞌ chiquicojol ja nquemol quiꞌ chi anataxic. Queriꞌ nbij. 
\v 13 In jun chic xbij quewariꞌ: —Anin ni nyukeꞌ wiꞌ nucꞌuꞌx ruqꞌuin ja Dios. In jun chic xbij quewariꞌ: —Waweꞌ incꞌo wiꞌ, incꞌo cuqꞌuin ja ralcꞌwalaxelaꞌ ja reyaꞌon chwe rmal ja Dios, neꞌe. 
\p 
\v 14 Como ja rok alcꞌwalaxelaꞌ xa junan rwach ja kaquiqꞌuel, xa junan rwach ja kachꞌacul in queriꞌ cꞌa tre ja Jesús chakajaꞌ arjaꞌ xoc kach winak, kꞌax chipan ja camíc jariꞌ xkasbej ja diablo ja yoꞌl camíc. 
\v 15 Canojel ja nquixbej quiꞌ chwach ja camíc ja Jesús ntoꞌo quixin, nerlasaj pa rukꞌaꞌ ja xbeben riꞌil. 
\v 16 Ma ángel ta ja nerutoꞌ, ajoj ja rok winak ja nokrutoꞌ ja rok riy rumam can ja rAbraham. 
\v 17 Rmalcꞌariꞌ tok rjawaxic chi arjaꞌ xoc kach winak, ni junan kabanic ruqꞌuin ja rok rchꞌalal. Chewiꞌ cꞌa tok ncowini nokrucoj chwach ja Dios. Chewiꞌ tok xoc jun lokꞌlaj sacerdote, ncowini npokonaj kawach in ni nuban wiꞌ cumplir ja samaj xin Dios. Queriꞌ xuban utzcꞌa chi cowini xchomij ja kil kamac chwach ja Dios. 
\v 18 Como arjaꞌ bien xunaꞌ janiꞌ ja rpokonal in cꞌambajax chipan ja prueba chewiꞌ tok ncowini nokrutoꞌ ajoj chakajaꞌ kanojelal ja nokcꞌambajax chipan ja prueba. 
\c 3
\s * * * * * * * * * * 
\p 
\v 1 Rmalcꞌariꞌ tok nbij chewe wachꞌalal, techꞌoboꞌ jutzꞌit ja Cristo Jesús, bien techꞌoboꞌ wachꞌalal ja rix tinamit xin Dios, ja rixchaꞌon rmal ja Dios chi nixeqꞌuejeꞌ na ruqꞌuin chilaꞌ chicaj. Ja cꞌa Jesús arjaꞌ takto, xucꞌamto ja tijonem ja kaniman in camic arjaꞌ ocnak jun lokꞌlaj sacerdote ja paꞌl trij jawaꞌ tijonem riꞌ. 
\v 2 Ni xuban wiꞌ cumplir ja samaj ja yataj tre rmal ja Dios chi nuban caniꞌ tre ja Moisés ojer chakajaꞌ xuban cumplir ja samaj ja yataj tre tokoriꞌ tok xerucꞌaj ja tinamit xin Dios. 
\v 3 Pro yatal tre ja Jesús chi más chi na nya̱ꞌ rukꞌij chwach ja Moisés caniꞌ tre jun banol jay arjaꞌ más na nim rukꞌij chwach ja jay ja nuban. 
\v 4 Nojel ja jay ni cꞌo wiꞌ nak banyon rxin chijujunal pro ja Dios arjaꞌ majun nak ta ja maquita arjaꞌ winakarsyon. 
\v 5 Ja Moisés ni katzij wiꞌ chi arjaꞌ xuban cumplir ja samaj xin Dios, arjaꞌ xucꞌan quixin ja tinamit xin Dios. Arjaꞌ moso rxin Dios, ja cꞌa samaj xubanto jariꞌ jun testimonio canaj can, cꞌo jeꞌe xucꞌutto ja majaꞌn tikꞌalajini triꞌ. 
\v 6 Ja cꞌa Cristo chakajaꞌ xuban cumplir ja samaj xin Dios, arjaꞌ cꞌayon ja tinamit xin Dios pro ma moso ta, arjaꞌ Alcꞌwalaxel. In ajoj ok tinamit xin Dios ja wi cow xkopeꞌi, ja wi ni ma xtikayaꞌ can ta wiꞌ ja yukulbal kacꞌuꞌx ruqꞌuin, ja wi ni xkoquicot wiꞌ chi raybexic ja Jesús. 
\s * * * * * * * * * * 
\p 
\v 7 Rmalcꞌariꞌ nbij chewe, kayaꞌaꞌ jutzꞌit kaxquin tre ja nbix chipan ja rtzobal Dios rmal ja Espíritu Santo quewariꞌ: —Ja wi camic ntzijoni ja Dios ewqꞌuin tenimaj cꞌa chanim, 
\v 8-9 maxta ticowir ecꞌuꞌx ewanma chi rcꞌaxaxic caniꞌ queban ja rewatiꞌt emamaꞌ ojer tok queyic ja wayewal. Como queriꞌ queban chwe tokoriꞌ tok xeqꞌuejeꞌ chipan ja lugar chakijlaj ulew. Qꞌuiy rwach ja ritzelal queban, xinquicꞌambajaj ja wi katzij chi nenuban castigar. Queriꞌ queban chwe masqui quetzꞌat ruqꞌuin quewach ja nimak tak milagro xinban pa quicuenta tre ja caꞌwinak junaꞌ xeqꞌuejeꞌ triꞌ. 
\v 10 Rmalcꞌariꞌ ja tok congana pi wayewal chiquij. Nojel ja nquechꞌob kaj pa tak canma ni ma utz ta wiꞌ. Ja utzlaj bey ja ncꞌutun chiquewach jariꞌ ni ma cotakin ta wiꞌ, xincheꞌ kaj. 
\v 11 Rmalcꞌariꞌ ja tok congana yictaj wayewal chiquij: —Katzij nbij chi ejeꞌeꞌ matinyaꞌ lugar chique chi xqueꞌoc ta chipan ja xulaꞌnbal lugar ja nchomin, xincheꞌ kaj. Queriꞌ tzꞌibtal can. 
\p 
\v 12 Ja cꞌa rixix wachꞌalal tebanaꞌ jutzꞌit cuenta ewiꞌ, maxta ecꞌoli chewe ja xa itzel ja canma in matiyukeꞌ chic quecꞌuꞌx ruqꞌuin ja cꞌaslic Dios in nqueyaꞌ can. 
\v 13 Ja kas rubey neban, kꞌij kꞌij tepaxbaj ewiꞌ chibil tak ewiꞌ. Pro ma teyaꞌ ta tiempo tre, ni tebanaꞌ wiꞌ, ma cꞌa chwak ta. Queriꞌ nwajoꞌ chewe chi neban utzcꞌa chi maquixban engañar rmal ja il mac utzcꞌa chi maticowir ewiꞌ ewanma chipan. 
\v 14 Caniꞌ kabanonto ja kas nabey yukul kacꞌuꞌx ruqꞌuin ja Jesucristo, ja cꞌa wi ni cow wiꞌ xkopeꞌi chi ryukbaxic kacꞌuꞌx ruqꞌuin, ja wi ni matikayaꞌ can wiꞌ jariꞌ ni katzij wiꞌ chi xa jun kabanon ruqꞌuin. 
\p 
\v 15 Turkaj chake ja tzꞌibtal can, quewaꞌ nbij riꞌ: —Ja wi camic ntzijoni ja Dios ewqꞌuin tenimaj cꞌa chanim, maxta ticowir ecꞌuꞌx ewanma chi rcꞌaxaxic ja caniꞌ queban ja rewatiꞌt emamaꞌ ojer ja tok queyic ja wayewal, neꞌe. 
\v 16 ¿Nak cꞌa chi winakil ariꞌ ja xecꞌaxani tok tzijoni ja Dios cuqꞌuin pro xa queyic ja ryewal? Ja xebanowi ejeꞌeꞌ riꞌ canojel ja winak ja xetotajto pa quekꞌaꞌ ja raj Egipto ojer ja xeꞌucꞌax rmal ja Moisés. 
\v 17 Ejeꞌeꞌ riꞌ winak caꞌwinak junaꞌ yictaji ryewal ja Dios chiquij, xekaj chipan ja il mac chipan ja lugar chakijlaj ulew in triꞌ xecam wiꞌ. 
\v 18 Ejeꞌeꞌ riꞌ chakajaꞌ ja bix chique rmal ja Dios chi arjaꞌ matuyaꞌ lugar chique chi xqueꞌoc ta chipan ja xulaꞌnbal lugar ja rchomin, ejeꞌeꞌ ni ma xeniman ta wiꞌ. 
\v 19 Ni kꞌalaj wiꞌ chi rmal ja ma xyukeꞌ chi ta quecꞌuꞌx ruqꞌuin ja Dios chewiꞌ tok ma xeꞌoc ta chipan ja xulaꞌnbal lugar. 
\c 4 
\p 
\v 1 In queriꞌ cꞌa chake ajoj camic, ja Dios cꞌa rchapon na rtzujuxic chake ja xulaꞌnbal lugar ja rchomin. Kabanaꞌ cꞌa jutzꞌit cuenta kiꞌ, maxta cꞌo jun chewe xtel can maquita xtoc chipan ariꞌ lugar. 
\v 2 Caniꞌ ban chique riꞌ winak ojer yaꞌ rbixic jun utzlaj tzij xin Dios chique in queriꞌ cꞌa chake ajoj camic chakajaꞌ cꞌo jun utzlaj tzij xin Dios kacꞌaxan. Pro ejeꞌeꞌ chaka quicꞌaxaj, ni majun nak ta quiwasaj ta tre, ma xyukeꞌ ta quecꞌuꞌx ruqꞌuin ja utzlaj tzij quicꞌaxaj chewiꞌ tok queriꞌ queban. 
\v 3 Pro ja rajoj ja yukul kacꞌuꞌx ruqꞌuin nokoc cꞌariꞌ chipan ja xulaꞌnbal lugar. Como ja ni ma xeniman ta wiꞌ quewaꞌ xbij ja Dios chique riꞌ: —Ja tok yictaj wayewal chiquij: —Katzij nbij chi ejeꞌeꞌ matinyaꞌ lugar chique chi xqueꞌoc ta chipan ja xulaꞌnbal lugar ja nchomin, xincheꞌ kaj. Queriꞌ xbij ja Dios. Ja cꞌa xulaꞌnbal lugar cꞌo chic triꞌ, jariꞌ ni cꞌoto wiꞌ ja tok Dios xuqꞌuis ja rsamaj tokoriꞌ tok xuqꞌuis rwinakarsaxic ja rwachꞌulew. 
\v 4 Caniꞌ nbij ja rtzobal Dios tre ja rwukuk kꞌij quewariꞌ: —Ja Dios xuqꞌuis ja rsamaj, ja cꞌa chi wukuꞌ kꞌij xulaꞌni, neꞌe. 
\v 5 Pro caniꞌ katzꞌaton chic ewqꞌuin, ja ni ma xeniman ta wiꞌ quewaꞌ xbij ja Dios chique riꞌ: —Ejeꞌeꞌ matinyaꞌ lugar chique chi xqueꞌoc ta chipan ja xulaꞌnbal lugar ja nchomin, neꞌe. 
\v 6 Bien kꞌalaj chi ecꞌoli ja nyataj na chique chi neꞌoc chipan ja xulaꞌnbal lugar ja chomin rmal ja Dios. Pro ja xecꞌaxani ja utzlaj tzij nabey ejeꞌeꞌ ma xquinimaj ta ja Dios chewiꞌ tok ma xeꞌoc ta chipan ja xulaꞌnbal lugar. 
\v 7 Rmalcꞌariꞌ tok be tiempo tre, ja Dios xtzujuj chic ja xulaꞌnbal lugar chique ja winak ja pa rtiempo David caniꞌ katzꞌaton chic ewqꞌuin quewariꞌ: —Ja wi camic ntzijoni ja Dios ewqꞌuin tenimaj cꞌa chanim, maxta ticowir ecꞌuꞌx ewanma chi rcꞌaxaxic, neꞌe. 
\v 8 Ja Josué ojer xerucꞌaj ja tinamit xin Dios chipan ja utzlaj ulew ja tzujun chique rmal ja Dios. Pro ma ja tariꞌ ulew ja xulaꞌnbal lugar ja noktzijon tre ewqꞌuin camic riꞌ. Wixta jariꞌ mta cꞌa noc wariꞌ ja Dios ntzijon chic tre jun chic tiempo ja ntzujuj wiꞌ ja xulaꞌnbal lugar. 
\v 9 Triꞌ cꞌa nkatzꞌat wiꞌ chi cꞌa cꞌo na jun xulaꞌnem xin Dios kaxin ja rok tinamit rxin ja Dios. 
\v 10 Caniꞌ tre ja Dios tok xuqꞌuis ja rsamaj arjaꞌ xulaꞌni in queriꞌ cꞌa chique chakajaꞌ ja xqueꞌoc chipan ja xulaꞌnbal lugar, ejeꞌeꞌ mchita samaj nqueban, neꞌexulaꞌn na ruqꞌuin ja Dios. 
\v 11 Katijaꞌ cꞌa kakꞌij, xkoꞌoc ta jutzꞌit chipan ariꞌ ja xulaꞌnbal lugar. Maxta cꞌo jun chake tibano queriꞌ ja caniꞌ queban ja juleꞌ chic winak, ejeꞌeꞌ ma xquinimaj ta ja Dios in rmalariꞌ tok ma xeꞌoc ta chipan ja xulaꞌnbal lugar ja chomin rmal. 
\p 
\v 12 Ja cꞌa rtzobal Dios jariꞌ ma camnak ta rwach pro cꞌo rchokꞌakꞌ, nuban ja rsamaj. Ni ma cꞌayew ta nekaji cꞌa chipan ja rawanma chwach jun espada ja congana is rutzaꞌm in caꞌiꞌ rwarey. Ni majun ja maquita ncowini noc wiꞌ chawe, wi pan apensar, wi pan awanma, wi pan abakil, nojel noc wiꞌ. Nerkꞌalasajto nak ja nanaꞌ kaj in nak ja nachꞌob kaj pan awanma. 
\v 13 Ja Dios ni majun nak ta ja rawatal ta chwach, nojel ncaꞌy wiꞌ, ni majun ja maquita nutzꞌat, chwach cꞌa nekajachaꞌ na wiꞌ cuenta. 
\s * * * * * * * * * * 
\p 
\v 14 Wachꞌalal, ja Jesús ja Ralcꞌwal Dios como arjaꞌ ocnak jun lokꞌlaj sacerdote kaxin ja ncojo kaxin chwach ja Dios in como arjaꞌ chijutij ekajnak triꞌ ja bar cꞌo wiꞌ ja Dios rmalcꞌariꞌ nbij jutzꞌit rubiꞌ chewe, cow kopeꞌi jutzꞌit, maxta tikayaꞌ can ja utzlaj tzij ja kaniman. 
\v 15 Ja lokꞌlaj sacerdote kaxin arjaꞌ bien rotak chi xok way xok yaꞌ, rotak npokonaj kawach como arjaꞌ bien xunaꞌ janiꞌ ja natcꞌambajax chipan ja prueba. Nojel ja prueba ja rokkꞌaxnak ajoj chipan ni majun ja maquita kꞌaxnak arjaꞌ chipan chakajaꞌ xarwariꞌ ni majun ril rumac. 
\v 16 Como rotak npokonaj kawach maxta cꞌa tikanaꞌ kiꞌ ja tok nkaban oración tok nokekaj chwach ja rtzꞌulibal ja nimlaj Rey ja bar nkacochij wiꞌ ja rutzil xin Dios. Yukul ta kacꞌuꞌx ruqꞌuin tok nkaban ja roración. Ja cꞌa wi yukul kacꞌux ruqꞌuin jariꞌ nucuy ja kil kamac in tok cꞌo rjawaxic chake nsipaj na ja rutzil chake chi katoꞌic. 
\c 5 
\p 
\v 1 Ja lokꞌlaj tak sacerdote quewaꞌ quisamaj riꞌ chiquijujunal, nechaꞌi chiquicojol ja winak utzcꞌa chi nequecoj ja winak chwach ja Dios. Nquitzujuj chwach ja Dios ja rofrenda jeꞌe ja nya̱ꞌ cumal ja winak in chakajaꞌ nequitzujuj chwach ja Dios ja chicop ja necamsaxi rmal ja quil quemac ja winak. 
\v 2 Ejeꞌeꞌ como bien nquenaꞌ kaj chi xe way xe yaꞌ chewiꞌ tok bien cotak nquipokonaj quewach ja cach tak winak caniꞌ chique ja ma cotak ta chi itzelal ja nqueban in chique ja chaka jalal tok nekaj chipan ja il mac. 
\v 3 Caniꞌ nqueban, cꞌoli ja sacrificio ja nquitzujuj chwach ja Dios rmal ja quil quemac ja cach tak winak in queriꞌ chique ejeꞌeꞌ chakajaꞌ cꞌoli ja sacrificio quixin ejeꞌeꞌ ja nquitzujuj como bien nquenaꞌ kaj chi xe way xe yaꞌ. 
\v 4 Queriꞌ rbanic ja samaj nuban jun lokꞌlaj sacerdote, congana nim rukꞌij, mta moda ja chaka ta xtamin awiꞌ chipan, Dios na nchaꞌo awxin caniꞌ xuban tre ja Aarón ojer. 
\v 5 In queriꞌ xuban ja Jesucristo chakajaꞌ, arjaꞌ ma xuyaꞌ kaj ta rukꞌij ruyon, ma xumin ta riꞌ chipan ja lokꞌlaj sacerdoteꞌil pro chaꞌi rmal ja Tatixel caniꞌ tzꞌibtal can quewariꞌ: —Atat at Walcꞌwal, camic nyaꞌon acꞌaslemal, neꞌe. 
\v 6 In jun chic nbij ja rtzobal Dios quewariꞌ: —Atat at sacerdote pro chijutij atocnak sacerdote. Ja rasacerdoteꞌil atat jariꞌ ni mta wiꞌ qꞌuisic trij, xa junan ruqꞌuin ja rsacerdoteꞌil ja Melquisedec. Queriꞌ xbij ja Tatixel tre ja Ralcꞌwalaxel. 
\p 
\v 7 Ja tok cꞌoli ja Jesús waweꞌ chwachꞌulew arjaꞌ xuban ja roración, congana xcꞌutuj ja rtoꞌic tre ja Dios como bien rotak chi ncowini ja Dios nutoꞌ chipan ja camíc. Majtaj rmal ja nimak tak bis ja cꞌo pa ranma, xurak na ruchiꞌ, xokꞌ na rmal. Cꞌaxaxi ja roración como arjaꞌ congana nuban respetar ja Dios. 
\v 8 Masqui Ralcꞌwal Dios pro xutij na ja rpokonal, chipan cꞌa ja rpokonal rotakij wiꞌ janiꞌ ja nanimaj ja Dios tok natcꞌambajax chipan ja prueba. 
\v 9 Xoc jun Toꞌonel, pro jun Toꞌonel ja ni majun ja maquita tzꞌakat tre, yataj tre chi ruqꞌuin arjaꞌ nwinakarto wiꞌ ja totajem xin Dios. Jariꞌ totajem ni mta wiꞌ qꞌuisic trij in nyataj chique canojel ja winak ja neniman rxin. 
\v 10 Yataj tre rmal ja Dios chi xoqui como lokꞌlaj sacerdote in bix tre chi xa junan ja rsacerdoteꞌil arjaꞌ ruqꞌuin ja rsacerdoteꞌil ja Melquisedec. 
\s * * * * * * * * * * 
\p 
\v 11 Jariꞌ jun sacerdoteꞌil congana qꞌuiy rcꞌamonto chewe in nwajoꞌ nchꞌob chewach nak rbanic pro cꞌayew chi nchꞌob chewach como kas maril nchꞌobtaj emwal. 
\v 12 Ja rixix ojer chic eniman ja Jesucristo, ja kas yatal chewij, ixix ta nariꞌ nixtijon chic quixin juleꞌ chic winak camic. Ja takaꞌan newajoꞌ ntzꞌat anin cꞌa takaꞌan newajoꞌ na jun ja nchꞌobo chewach ja rtzobal Dios ja caniꞌ tijonem nya̱ꞌ chique ja tak acꞌalaꞌ ja ma cꞌayew ta chique. Ja ntzꞌat anin ni ix junan cuqꞌuin ja tak yaquiꞌaꞌ ja cꞌa tzꞌum na nquetij ja majaꞌn tiyataj chique chi nquemaj waꞌim. 
\v 13 Ja wi chaka benak chi tzꞌum natij jariꞌ cꞌa at ti yaquiꞌ na in ma awotak ta chi utz nak rbanic ja rutzil ja ncꞌu̱t chawach rmal ja rtzobal Dios. 
\v 14 Pro ja rijaꞌ caniꞌ chique achiꞌiꞌ in ixokiꞌ ejeꞌeꞌ xa nak chi ta nquetiꞌ, cꞌoli cotakin chic tre ja quicꞌaslemal in chꞌobtajnak chic cumal nak ja rutzil in nak ja ritzelal. 
\c 6 
\p 
\v 1 Koqꞌuiy cꞌa wachꞌalal. Ja tok kas kanimajto ja utzlaj tijonem nabey chꞌob chikawach jeꞌe nak rbanic ja Jesucristo. Jariꞌ tijonem yaꞌ chake caniꞌ rsimientoꞌil jun jay ticon chic. Pro ma chaka ta jaꞌ tikaqꞌuis tikacꞌam rtiquic wachꞌalal, joꞌ koqꞌuiy más, ma koqꞌuejeꞌ ta chi queriꞌ. Quewaꞌ ja rsimientoꞌil, quewaꞌ ja nabey tijonem ja ticon chic riꞌ, jun, ja naqꞌuex anaꞌoj, nayaꞌ can nojel ja raniman ja ni majun rcꞌamonto in nyukeꞌ chic acꞌuꞌx ruqꞌuin ja Dios. 
\v 2 In jun chic, ja nchꞌo̱b chawach nak rbanic ja bautismo jeꞌe in chakajaꞌ ja nayaꞌ akꞌaꞌ pa quewiꞌ ja kachꞌalal. In jun chic, nak rbanic ja tok natcꞌastaj chipan ja camíc in chakajaꞌ tre ja nimlaj juicio ja mta qꞌuisic trij. 
\v 3 Maxta chaka rsimientoꞌil tikatic wachꞌalal, joꞌ koqꞌuiy más. Anin wotak chi queriꞌ xtikaban, Dios ta cꞌa xtitoꞌo kaxin chi rbanic. 
\p 
\v 4 Ja cꞌa winak ja nqueyaꞌ can ja Jesucristo mta moda xtiyataj chi ta chique chi xtiqueqꞌuex chi ta jutij ja quinaꞌoj. Ja nabey kꞌalasax chiquewach janiꞌ ja katataꞌ Dios chi ja rbanic caniꞌ jun nimlaj luz nsakirsaj ja quebey chiquewach. Quenaꞌ chakajaꞌ janiꞌ rquiꞌil ja rutzil ja quicochij tre ja Dios. Chakajaꞌ yataj chique chi qꞌuejeꞌe ja rEspíritu Santo pa tak canma. 
\v 5 Bien quenaꞌ janiꞌ rquiꞌil ja rtzobal Dios chi congana utzil rcꞌamonto in quenaꞌ chakajaꞌ janiꞌ ja nimlaj poder rcꞌan ja tiempo ja penak chikawach ja rcꞌamonto ja Cristo. 
\v 6 Ja cꞌa wi nqueyaꞌ can jariꞌ kas kꞌalawachili nquemaj chic jutij ripic ja Ralcꞌwal Dios chwach cruz in nqueyaꞌ ruqꞌuix chiquewach ja winak chakajaꞌ chewiꞌ tok matiyataj chic chique ja xtiquinimaj chi ta jutij. 
\v 7 Ejeꞌeꞌ e caniꞌ juleꞌ chenoj ja mta noc wiꞌ. Pro ja chenoj wi nutij jab in wi nwachij nakun jeꞌe ja utz nti̱j cumal ja nejoskꞌin rpan jariꞌ Dios nuyaꞌ rutzil parwiꞌ. 
\v 8 Pro ja chenoj ja wi xa qꞌuix nuyaꞌ mta cꞌa noc wariꞌ, ni majun winak cꞌo ta rgana ruqꞌuin in mta rutzil nuyaꞌ parwiꞌ, ja cꞌa rayben xa rporoxic pa kꞌakꞌ. Queriꞌ cꞌa quibanic ja winak ja nqueyaꞌ can ja Jesucristo. 
\s * * * * * * * * * * 
\p 
\v 9 Chakꞌlaj wachꞌalal, masqui cowlaj tzij ja katzꞌibanel chewe riꞌ pro kotak chi ma ix junan ta ruqꞌuin ja chenoj ja mta noc wiꞌ. Ja tok nattotaji rmal ja Jesucristo cꞌoli ja rutzil ja nwachini pan awanma, ja cꞌariꞌ kayben chewe camic. 
\v 10 Ja cꞌa Dios mta moda xtuban ta ja ma utz ta xtimestaj ta ja rutzil ja rebanonto, arjaꞌ matimestaj chi congana xetij ekꞌij chi quitoꞌic ja kachꞌalal in cꞌa emajon na quitoꞌic camic. Como congana newajoꞌ ja Dios chewiꞌ tok neꞌetoꞌ. 
\v 11 Ja cꞌa nwajoꞌ chewe camic chejujunal, tetijaꞌ ekꞌij chakajaꞌ chi rchꞌobic ja tzujun can chake rmal ja Dios ja kayben camic. Tiyukeꞌ ecꞌuꞌx chijutij ruqꞌuin ja rtzujun can chake. Ni ta quirwariꞌ ebanon ja tok xtipi chic jutij ja Jesucristo. 
\v 12 Maxta quixsakꞌorini, tetijaꞌ más ekꞌij. Tecꞌamaꞌ cꞌa ja rejemplo quixin ja winak ja ni yukul wiꞌ quecꞌuꞌx ruqꞌuin ja Dios in ni nquecochꞌ wiꞌ ja npi jeꞌe chiquij, ejeꞌeꞌ riꞌ ja nyataj chique ja tzujun can jeꞌe rmal ja Dios. 
\p 
\v 13 Ja tok cꞌoli ntzujuj ja Dios ni nuyaꞌ wiꞌ caniꞌ xuban tre ja rAbraham ojer ja tok cꞌoli xtzujuj tre cꞌo jun juramento xuban pro rubiꞌ arjaꞌ xucoj ja xbanbej ja juramento como mchita jun ja más chi ta nim rukꞌij chwach arjaꞌ in quewaꞌ xbij tre ja rAbraham riꞌ: 
\v 14 —Pa nubiꞌ anin nbij chawe camic, seguro chi nyaꞌ ja wutzil pan awiꞌ, nenuyaꞌ na ja rawalcꞌwal, nebe pa nim, congana nquesep na quiꞌ. Queriꞌ xbij tre. 
\v 15 In queriꞌ xuban ja rAbraham, ni yataj wiꞌ tre nojel ja tzujux tre rmal ja Dios pro congana xucochꞌ na rwach chi raybexic. 
\v 16 Ja cꞌa winak tok nqueban jun juramento cꞌamonnak chique chi nquecoj rubiꞌ ja Dios ja nquibanbej ja juramento como ja Dios arjaꞌ más na nim rukꞌij in tok cꞌoli ja nquichꞌabej quiꞌ pa kꞌetbaltzij in tok cꞌo jun juramento nnatax cumal, ejeꞌeꞌ nqueban respetar in nechomtaj rmal. 
\v 17 Ja cꞌa Dios ma chaka ta xuban ja juramento, rumac chi bien nchꞌobtaj kumal ja rchꞌobon chakij chi ni mta wiꞌ qꞌuextajic trij, ni nuban wiꞌ cumplir. Queriꞌ nrajoꞌ chake ja nyataj chake nojel ja rtzujun can. 
\v 18 Queriꞌ cꞌa xuban ja Dios, caꞌiꞌ ja xbij can, jun, cꞌoli ja xtzujuj in jun chic, cꞌo jun juramento xuban ja ncꞌutbej chi ni nuyaꞌ wiꞌ ja xtzujuj in ni mta wiꞌ qꞌuextajic trij awaꞌ ja caꞌiꞌ riꞌ ja xbij can como ja Dios mta moda xtutzꞌak ta juleꞌ tzij. Queriꞌ xuban pro kumal ajoj ja xokanmaj chwach ja il mac in xekatoꞌoꞌ kiꞌ ruqꞌuin. Queriꞌ xuban chi ryukbaxic kacꞌuꞌx utzcꞌa chi nyukeꞌe ja kacꞌuꞌx chijutij ruqꞌuin ja rtzujun can chake ja kayben camic. 
\v 19 Nojel ariꞌ ja kayben camic bien kotak chi nekawilaꞌ na, ni mta wiꞌ qꞌuextajic trij. Nojel ariꞌ ja kayben jariꞌ nkajunsaj ruqꞌuin jun chꞌichꞌ ja chapbal lancha. Jariꞌ chꞌichꞌ nbe cꞌa xeꞌ mar, nuchap ja lancha, matuyaꞌ chic lugar tre ja lancha ja bar ta xticꞌamarel chi wiꞌ. Ja kayben ajoj camic cꞌa chilaꞌ chicaj ekajnak wiꞌ ja bar cꞌo wiꞌ ja Dios, congana chi na nuyaꞌ kaseguro. 
\v 20 Cꞌa triꞌ ekajnak wiꞌ ja Jesús nabeyal chikawach, rjakon jun bey chikawach. Arjaꞌ ocnak lokꞌlaj sacerdote pro ni chijutij, ja cꞌa rsacerdoteꞌil arjaꞌ ni mta wiꞌ qꞌuisic trij, xa junan ruqꞌuin ja rsacerdoteꞌil ja Melquisedec. 
\c 7
\s * * * * * * * * * * 
\p 
\v 1 Caniꞌ tzꞌibtal can chipan ja rtzobal Dios ja Melquisedec arjaꞌ rey xin jun tinamit Salem rubiꞌ, chakajaꞌ arjaꞌ sacerdote, nuban ja samaj xin Dios ja katzij chi Dios. Xuban jutij tre ja rAbraham xercꞌuluꞌ pa bey tokoriꞌ tok ja rAbraham ecꞌo juleꞌ rey ercamsan in melojto pa chꞌaꞌoj. Ja cꞌa rAbraham ban bendecir rmal ja Melquisedec. 
\v 2 In chakajaꞌ nojel rwach ja mebaꞌil ja xuchꞌecto pa quekꞌaꞌ ja rey xlasaj na rdiezmo tre in ja diezmo xujach tre ja Melquisedec. Ja Melquisedec cꞌoli nbij ja rubiꞌ, jun rey utzlaj cucꞌaxic winak nuban, queriꞌ rcꞌamonto ja rubiꞌ. Arjaꞌ rey xin Salem chakajaꞌ cꞌoli nbij, jun rey yoꞌl quicotemal, queriꞌ rcꞌamonto.\f Ja tzij diezmo quewaꞌ rbanic riꞌ, ja jujun quetzal nachꞌec, ja diezmo tre jariꞌ lajuj centavo. Tacꞌa wi xachꞌec jun ciento quetzal ja diezmo tre jariꞌ lajuj quetzal.\f* 
\v 3 Ma ecꞌo ta ja rtataꞌ ruteꞌ ja Melquisedec ja nenatax ta chipan ja rtzobal Dios, ma ecꞌo ta ratiꞌt rmamaꞌ nenatax ta chipan chakajaꞌ in mta ja ralaxic nnatax ta in nixtacꞌa rcamic ta chakajaꞌ. Pro ja rbanic, chijutij ocnak sacerdote in ni mta wiꞌ qꞌuisic trij ja rsacerdoteꞌil jariꞌ junan caniꞌ tre rbanic ja Ralcꞌwal Dios. 
\p 
\v 4 Techꞌoboꞌ mpeꞌ chi utz janila nim rukꞌij ja Melquisedec. Más na nim rukꞌij chwach ja kamamaꞌ Abraham. Ja cꞌa rAbraham ojer xuyaꞌ rukꞌij ja Melquisedec, xpartiꞌij ja diezmo rxin ja mebaꞌil ja rchꞌeconto in xujach pa rukꞌaꞌ ja Melquisedec. 
\v 5 Pro ja nbij ja ley xin Dios, pa quekꞌaꞌ ja riy rumam ja Leví nja̱ch wiꞌ ja diezmo, ejeꞌeꞌ riꞌ ja neꞌoc sacerdote. In queriꞌ queban ja winak, pa quekꞌaꞌ ja riy rumam ja Leví nquejach wiꞌ ja quidiezmo, queriꞌ queban masqui xa e alaxic cuqꞌuin como ja rAbraham arjaꞌ sepyon quixin canojel. 
\v 6 Pro ja Melquisedec arjaꞌ ma riy rumam ta ja Leví pro pa rukꞌaꞌ jach wiꞌ ja diezmo rmal ja rAbraham. Arjaꞌ cꞌa bano bendecir rxin ja rAbraham. Makanaꞌ maquita cꞌa nim rukꞌij ja rAbraham como tre ja rAbraham tzujun wiꞌ ja rutzil rmal ja Dios. 
\v 7 Pro ja nbano bendecir jariꞌ ja más na nim rukꞌij chwach ja nuban bendecir jariꞌ bien kotak kanojelal. 
\v 8 Ja cꞌa riy rumam ja Leví, chique nja̱ch wiꞌ ja diezmo pro ja Melquisedec arjaꞌ más na nim rukꞌij chiquewach ejeꞌeꞌ chakajaꞌ. Ejeꞌeꞌ xa necami pro arjaꞌ mta nbij ja rtzobal Dios tre ja rcamic, caniꞌ cꞌa cꞌas na chijutij. 
\v 9 Ja riy rumam ja Leví, chique nto̱j wiꞌ ja diezmo pro ja cꞌa rAbraham pa rukꞌaꞌ ja Melquisedec xutoj wiꞌ ja diezmo, nel cꞌariꞌ caniꞌ cꞌopi chic triꞌ ja Leví, caniꞌ rtojonpi chic ja diezmo chakajaꞌ. 
\v 10 Como ja rAbraham tok xecꞌuli pa bey rmal ja Melquisedec majaꞌn talaxi triꞌ ja Leví pro masqui queriꞌ ni rjaꞌtzulpi chi wiꞌ ja rAbraham. Jariꞌ ncꞌambej tzij nbij chi ja Melquisedec más na nim rukꞌij chwach ja Leví chakajaꞌ. 
\p 
\v 11 Ja sacerdoteꞌil rxin ja Aarón in quixin ja juleꞌ chic riy rumam ja Leví jariꞌ xoc rbase ja ley xin Dios ja tok Moisés xuyaꞌ ja ley chique ja raj Israel ojer. Pro jariꞌ sacerdoteꞌil xa nkꞌaxi, xa cꞌo qꞌuisic trij. Jariꞌ ma xcowin ta xerutoꞌ ta ja winak chijutij chwach ja Dios. Ja wixta cowini xerutoꞌ chijutij maquita cꞌa rjawaxic ariꞌ peti jun chic sacerdote ja xa junan ja rsacerdoteꞌil ruqꞌuin ja rsacerdoteꞌil ja Melquisedec ja junwiꞌ chi na chwach ja rxin Aarón. 
\v 12 Ja cꞌa tok noqui jun cꞌacꞌa sacerdoteꞌil jariꞌ rjawaxic chi noc na jun ley cꞌacꞌa chakajaꞌ. 
\v 13-14 Ja cꞌa kajaw Jesucristo arjaꞌ ja sacerdote ja junwiꞌ chi na. Arjaꞌ ma riy rumam can ta ja Leví, ni kꞌalaj wiꞌ chi arjaꞌ riy rumam can ja Judá. Pro ja riy rumam can ja Judá majun nak ta chique ocnak ta sacerdote, mta tzꞌibtal can chique chipan ja ley rmal ja Moisés chi neꞌoc ta sacerdote. 
\p 
\v 15 Ja cꞌacꞌa sacerdote ja penak camic arjaꞌ xa junan ja rsacerdoteꞌil ruqꞌuin ja rsacerdoteꞌil ja Melquisedec, triꞌ cꞌa nkatzꞌat wiꞌ chi xa nqꞌuis na ja sacerdoteꞌil quixin ja riy rumam can ja Leví. 
\v 16 Ja tok xoc sacerdote ma rmal ta jun ley ja xa cꞌo qꞌuisic trij. Arjaꞌ mta camíc trij, ja rcꞌaslemal ni matiqꞌuis wiꞌ in ja cꞌariꞌ ocnak rbase ja sacerdoteꞌil rxin. 
\v 17 Caniꞌ nbix tre chipan ja rtzobal Dios quewariꞌ: —Atat at sacerdote pro ni chijutij atocnak sacerdote. Ja rasacerdoteꞌil atat jariꞌ ni mta wiꞌ qꞌuisic trij, xa junan ruqꞌuin ja rsacerdoteꞌil ja Melquisedec. Queriꞌ nbix tre. 
\v 18 Ja ley ja xoqui nabey jariꞌ ma xcowin ta xokrutoꞌ ta chijutij chwach ja Dios chewiꞌ tok ma xoc chi ta. 
\v 19 Ja ley ja xoqui nabey ni majun nak ta xchomij ta chwach ja Dios ja ni ta chijutij xtzursaj ta. Pro ja rocnak chic pa rqꞌuexwach camic jariꞌ ja yukulbal kacꞌuꞌx ruqꞌuin ja Jesucristo jariꞌ más chi na utz chwach ja ley ja xoqui nabey, jaktajnak chic kabey rmal in rmalariꞌ cꞌa chwach ja Dios nokekaj chi wiꞌ. 
\p 
\v 20 Nojel ariꞌ tok xchomarsaj ja Dios arjaꞌ xuban jun juramento, mta moda ja maquita nuban cumplir. 
\v 21 Pro ma queriꞌ ta ban chique ja juleꞌ chic ja xeꞌoc sacerdote, mta jun juramento bani pro ja tre ja Ralcꞌwal Dios cꞌo jun juramento bani caniꞌ tzꞌibtal can chipan ja rtzobal Dios quewariꞌ: —Ja kajaw Dios arjaꞌ rbanon jun juramento, matuqꞌuex ja rnaꞌoj, quewaꞌ xbij riꞌ: —Atat at sacerdote pro ni chijutij, ja rasacerdoteꞌil ni mta wiꞌ qꞌuisic trij, junan ruqꞌuin ja rsacerdoteꞌil ja Melquisedec, neꞌe. 
\v 22 Rmal cꞌa ja juramento banon chewiꞌ tok ja Jesús arjaꞌ ocnak chic ja rseguro jun cꞌacꞌa chominem ja más chi na utz chwach ja jun chic chominem ja cꞌoli nabey. 
\v 23 Ja sacerdote ja recꞌoli nabey ejeꞌeꞌ xa necami, tok ncam jun noc can chic jun pa rqꞌuexwach, queriꞌ queban, e qꞌuiy xeꞌocꞌo chipan ja sacerdoteꞌil. 
\v 24 Ja cꞌa tre ja Jesús jariꞌ mchita camíc trij chewiꞌ cꞌa tok ni mta wiꞌ qꞌuisic trij ja rsacerdoteꞌil arjaꞌ. 
\v 25 Rmalcꞌariꞌ tok ncowini nokrutoꞌ chijutij ja yukul kacꞌuꞌx ruqꞌuin chi arjaꞌ ncojo kaxin chwach ja Dios. Arjaꞌ ni cꞌas wiꞌ chijutij chi rbanic orar pa kacuenta chewiꞌ tok ncowini nokrutoꞌ chijutij. 
\p 
\v 26 Queriꞌ cꞌa rbanic ja Jesús, nij arjaꞌ wiꞌ ja lokꞌlaj sacerdote ja ncꞌatzin chake. Arjaꞌ ni utz wiꞌ ntzꞌa̱t rmal ja Dios. Majun nak ta itzel rbanon ta. Ni majun ril rumac. Lasaxel chiquicojol ja rajꞌil ajmaquiꞌ, cꞌamarel chilaꞌ chicaj ja bar cꞌo wiꞌ ja Dios. 
\v 27 Arjaꞌ ni junwiꞌ na wiꞌ chiquewach ja juleꞌ chic lokꞌlaj tak sacerdote. Ja sacrificio ja queban ejeꞌeꞌ kꞌij kꞌij xequicamsaj juleꞌ chicop, xequitzujuj chwach ja Dios. Ja nqueban nabey nquitzujuj na ja rxin ja quil quemac ejeꞌeꞌ cꞌacꞌariꞌ nquitzujuj chic ja rxin ja quil quemac ja winak. Pro ja Jesús ma rjawaxic ta tre xtuban ta queriꞌ caniꞌ queban ejeꞌeꞌ. Ja sacrificio ja xtzujuj ja Jesús xa jutij, maticꞌatzini xticamuluj chi ta jutij, tokoriꞌ tok xtzujuj riꞌ chipan ja camíc. 
\v 28 Ja winak ja neba̱n nombrar rmal ja ley xin Dios chi neꞌoc lokꞌlaj tak sacerdote ejeꞌeꞌ xa e winak. Pro ja ley xin Dios jariꞌ ma nim ta rukꞌij chwach ja juramento ja cꞌa xuyaꞌ na después ja Dios, in ja ban nombrar rmal ja juramento chi noc lokꞌlaj sacerdote jariꞌ ja Ralcꞌwal Dios, arjaꞌ xoc jun sacerdote pro jun sacerdote ja ni majun ja maquita tzꞌakat tre, queriꞌ rbanic ni mta wiꞌ qꞌuextajic trij. 
\c 8 
\s * * * * * * * * * * 
\p 
\v 1 Queriꞌ cꞌa rbanic ja lokꞌlaj sacerdote kaxin, jariꞌ ja más na rjawaxic chi nchꞌobtaj emwal. Arjaꞌ cꞌa chilaꞌ chicaj xekaj wiꞌ, triꞌ xetzꞌabeꞌ wiꞌ pa riquikꞌaꞌ ja bar tzꞌubul wiꞌ ja Dios. 
\v 2 Como arjaꞌ lokꞌlaj sacerdote nerucoj ja winak chwach ja Dios chipan ja lugar ja más na santo ja bar nqꞌuejeꞌ wiꞌ ja Dios, queriꞌ rbanic ja samaj nuban. Jariꞌ ja rochoch Dios ja katzij chi rochoch Dios, jariꞌ banon rmal ja kajaw Dios, ma winak ta ebanyon. 
\v 3 Ja lokꞌlaj tak sacerdote ejeꞌeꞌ cꞌo jun samaj yatajnak chique chiquijujunal quewariꞌ, nquitzujuj chwach ja Dios ja nsipax cumal ja winak in chakajaꞌ nequitzujuj chicop ja necamsaxi parwiꞌ altar. Ja cꞌa Jesucristo como arjaꞌ lokꞌlaj sacerdote rjawaxic chi cꞌoli ntzujuj arjaꞌ chakajaꞌ. 
\v 4 Arjaꞌ wixta cꞌa cꞌo ta na waweꞌ chwachꞌulew ma sacerdote ta cꞌariꞌ como cꞌa ecꞌo chi na ja sacerdote waweꞌ chwachꞌulew ja quimajon na rtzujuxic chwach ja Dios ja caniꞌ tzꞌibtal can chipan ja ley xin Dios chi nquitzujuj. 
\v 5 Pro ja samaj ja nqueban ejeꞌeꞌ xa rachbal xa cꞌutbal rxin ja majtajnak rbanic chilaꞌ chicaj, xa caniꞌ rnatuꞌ ja nqueban. Caniꞌ xuban ja Moisés tok xajalal majaꞌn tumaj rbanic ja rochoch Dios waweꞌ chwachꞌulew ja tzꞌum in tziak ocnak, quewaꞌ bix tre rmal ja Dios riꞌ: —Nojelal ja xtaban ni rjawaxic wiꞌ chi junan nel ruqꞌuin ja caniꞌ cꞌut chawach parwiꞌ ja jayuꞌ, neꞌxi. Rmalcꞌariꞌ tok kotak chi ja netajini nqueban ja sacerdote jariꞌ xa rachbal xa cꞌutbal rxin ja cꞌo jeꞌe chilaꞌ chicaj. 
\v 6 Pro ja Jesucristo ja kasacerdote ajoj arjaꞌ yaꞌon tre camic jun samaj xin Dios ja más chi na nim rukꞌij chwach ja quisamaj ja juleꞌ chic sacerdote como ja cꞌacꞌa chominem ja nokrcojbej chwach ja Dios jariꞌ más chi na nim rukꞌij chakajaꞌ chwach ja caniꞌ cꞌoli nabey in más chi na nim rukꞌij chakajaꞌ ja xtzujuj ja Dios ja tok xchomarsaj ja cꞌacꞌa chominem. 
\p 
\v 7 Ja nabey chominem ja wixta cowini xchomij chijutij ja il mac jariꞌ ma rjawaxic chi ta ja jun chic chominem. 
\v 8 Pro ja Dios ma quiꞌ ta rucꞌuꞌx cuqꞌuin ja rtinamit rumac ja ma xquinimaj ta ja nabey chominem caniꞌ tzꞌibtal can chipan ja rtzobal Dios quewariꞌ: —Quewaꞌ nbij ja kajaw Dios riꞌ: —Nerilaꞌ na jun tiempo tok anin cꞌo jun cꞌacꞌa chominem nchomarsaj chi na cuqꞌuin ja raj Israel in cuqꞌuin ja raj Judá chakajaꞌ. 
\v 9 Ja xtinchomij cuqꞌuin jariꞌ junwiꞌ chi na chwach ja xinchomij cuqꞌuin ja catiꞌt quimamaꞌ tokoriꞌ tok xenyukejel chi quekꞌaꞌ in xenlasajel pa quekꞌaꞌ ja raj Egipto. Pro ejeꞌeꞌ ma xquinimaj ta ja chominem ja xinchomij cuqꞌuin. Rmalcꞌariꞌ ja tok xenuyaꞌ can. 
\v 10 Ja tok xterilaꞌ ja tiempo anin cꞌo chi na jun ja chominem ja nchomarsaj na cuqꞌuin ja riy rumam can ja rIsrael in quewaꞌ rbanic riꞌ. Ja ley ja xquenbanbej mandar jariꞌ pa tak quewiꞌ xtincoj wiꞌ in xtintzꞌibaj pa tak canma chakajaꞌ. Anin in Dios quixin in ejeꞌeꞌ e ntinamit. 
\v 11 Chipan ariꞌ tiempo ejeꞌeꞌ xticotakij na nwach canojelal. Rmalcꞌariꞌ tok ma rjawaxic chi ta jun xtibij chi ta tre jun rach aj tinamit chi nrotakij janiꞌ rnaꞌoj ja Dios in nixtacꞌa rjawaxic chi ta xtibij chi ta tre jun rchꞌalal chakajaꞌ. Canojel chi ncotakij na e janiꞌ chi e rijaꞌ chi e acꞌalaꞌ. 
\v 12 Ja cꞌa ranin ncuy na ja quil quemac in nmestaj chijutij. Queriꞌ rbin can ja Dios. 
\v 13 Ja Dios tok ntzijon tre ja cꞌacꞌa chominem tibij cꞌa tzij ariꞌ chi xa tzabuꞌk chic ja jun chic chominem ja cꞌoli nabey. Xa nak ta ja rmajon tzabukarem in xa nak ta ja rmajon rajiꞌxem jariꞌ bien kꞌalaj chi xajalal majaꞌn tocꞌo rukꞌij. 
\c 9 
\s * * * * * * * * * * 
\p 
\v 1 Pro ja nabey chominem bien banon rbanic. Ja winak cꞌoli mandamiento ja bin chique ja nqueban jeꞌe chi nquiyabej rukꞌij ja Dios. Cꞌoli chakajaꞌ jun rochoch ja Dios pro xa xin rwachꞌulew. 
\v 2 Bani ja rochoch Dios, tzꞌum in tziak ocnak. Tzꞌapix ruchiꞌ tre jun tziak in tas chic rpan tre jun chic tziak, caꞌiꞌ cuarto xuyaꞌ. Jawaꞌ coj chipan ja nabey cuarto riꞌ, jun candelero, jun mesa in ja caxlanway ja partiꞌix chwach ja Dios. Jariꞌ nabey cuarto lugar santo neꞌxi. 
\v 3 Ja rcab cuarto ja cꞌo trij ja tziak ja tasben rpan jariꞌ santilaj lugar ja más nim rukꞌij neꞌxi. 
\v 4 In jawaꞌ coj chic chipan ja rcab cuarto riꞌ, jun cojbal pon puro oro ocnak in jun caxa cojon oro trij jariꞌ caxa xin chominem neꞌxi. Jawaꞌ cꞌol chipan ja caxa riꞌ, ja caxlanway xin chilaꞌ chicaj rbinaꞌan maná cꞌolon chipan ja rcꞌolibal oro ocnak, ja chꞌameꞌy xin Aarón ja jotayini, in ja tzꞌalam tak abaj ja tzꞌibtal chwach nak xbij ja Dios tok xchomarsaj ja chominem. 
\v 5 Ecꞌo caꞌiꞌ querubín ebanon, ja quexicꞌ quiripon quimujan ja rwiꞌ caxa. Ja querubín jariꞌ retal chi triꞌ nqꞌuejeꞌ wiꞌ ja Dios. Ja rwiꞌ caxa sachbal il mac neꞌxi. Pro camic maquintzijon más trewaꞌ wariꞌ. 
\p 
\v 6 Nojel awaꞌ ja cꞌa xinbij kaj chewe riꞌ tok chomtajnak chic ja cꞌa sacerdote ejeꞌeꞌ kꞌij kꞌij neꞌoc chipan ja nabey cuarto chi rbanic ja quisamaj chwach ja Dios. 
\v 7 Ja cꞌa rcab cuarto xa ruyon ja lokꞌlaj sacerdote noc chipan pro cꞌa chi junaꞌ noc wiꞌ chipan. Arjaꞌ tok noc chipan rcꞌan ja quiquiqꞌuel chicop, jariꞌ quicꞌ ntzujuj chwach ja Dios rumac ja ril rumac arjaꞌ in quixin ja winak chakajaꞌ. 
\v 8 Jawaꞌ ja cꞌa xinbij chewe riꞌ cꞌoli nucꞌut chikawach ja nkꞌalasax chikawach rmal ja rEspíritu Santo, quewaꞌ nucꞌut chikawach riꞌ, ja nabey cuarto tok majaꞌn tocꞌo rukꞌij cꞌa tzꞌapal na chikawach ja santilaj lugar ja bar cꞌo wiꞌ ja Dios. 
\v 9 Ja nabey cuarto xa retal jeꞌe, xa ejemplo rcꞌamonpi chake rxin ariꞌ tiempo ja rmajon qꞌuisem. Ja cꞌa rofrenda in sacrificio ja quitzujuj chwach ja Dios jariꞌ mta rpoder xtichomarsaj ta chijutij ja canma ja winak xtichꞌachꞌojirsaj ta chijutij ja quiconciencia. 
\v 10 Ja bix chique chi nqueban jariꞌ xa rxin ja quicuerpo, ma rxin ta ja canma, caniꞌ tre nak ja utz ntiji in nak ja xajan ntiji in tre chakajaꞌ nak tiempo jeꞌe ja rjawaxic chi nquechꞌaj quekꞌaꞌ in cakan. In bix chique chi cꞌa tokoriꞌ matiqueban chic ja tok cꞌoli jun chominem cꞌacꞌa ja xtichomarsaj na ja Dios pa rqꞌuexwach. 
\p 
\v 11 Pro camic penak chic ja Cristo, arjaꞌ ja lokꞌlaj sacerdote ja cꞌamyonto ja rutzil ja tzujunto ojer rmal ja Dios. Ja lugar ja bar nuban chi wiꞌ ja rsamaj jariꞌ ja mero rochoch ja Dios, más chi na nim rukꞌij chwach ja bar xesamaj wiꞌ ja rojer tak sacerdote. Ja rochoch Dios ja bar nsamaj chi wiꞌ ja Cristo nixtacꞌa banon ta in ma xin rwachꞌulew ta chakajaꞌ. 
\v 12 Arjaꞌ xajutij xoc chipan ja santilaj lugar chilaꞌ chicaj, rcꞌan ja quicꞌ ja ntzujuj chwach ja Dios pa kacuenta pro ja quicꞌ ma quiquiqꞌuel ta qꞌuisicꞌ, ma quixin ta wacax ja tak ternero, puro rquiqꞌuel arjaꞌ. Queriꞌ xuban chake, xajutij xokrutoꞌ pa rukꞌaꞌ ja il mac, nixtacꞌa cꞌo ta qꞌuisic trij ja totajem nuyaꞌ. 
\v 13 Cꞌo nacꞌa rsamaj ja quicꞌ quixin qꞌuisicꞌ quixin wacax in cꞌo rsamaj chakajaꞌ ja rchajul jun ti vaca. Jariꞌ nya̱ꞌ chiquij ja winak tok cꞌoli quibanon ja xajan in nbix chique chi ma e chꞌajchꞌojiꞌ ta. Ja cꞌa wi nya̱ꞌ chiquij jariꞌ nechꞌachꞌojiri, e chꞌajchꞌojiꞌ chic. 
\v 14 Pior cꞌa ja rquiqꞌuel ja Cristo jariꞌ más chi na nim rsamaj. Ja Cristo arjaꞌ xtzujuj riꞌ chwach ja Dios, camsaxi, xoc jun sacrificio pro jun sacrificio ja ni majun ja maquita tzꞌakat tre in ja toꞌo rxin chi rbanic ja wariꞌ jariꞌ ja rEspíritu Santo ja ni mta wiꞌ qꞌuisic trij. Ja rquiqꞌuel ja Cristo janila nsamaji, nchꞌachꞌojirsaj chi utz ja kanma chi matitiꞌon chic ja kaconciencia in rmalariꞌ nokcowini nkayaꞌ can ja kabanon jeꞌe ja xa camíc rcꞌamonto in noksamaj chic pa rcuenta ja cꞌaslic Dios. 
\p 
\v 15 Rmalcꞌariꞌ tok yatajnak tre ja Cristo chi arjaꞌ cꞌamyonto ja cꞌacꞌa chominem ja nercojbej ja winak chwach ja Dios. Rmal cꞌa ja rcamic ja Cristo tok cuytajnak chic ja il mac ja bantaji chipan ja chominem ja cꞌoli nabey. In camic ja roksiqꞌuin rmal ja Dios nokcowini nkawil ja rutzil ja tzujunto ojer rmal, jariꞌ ja herencia xin Dios ja ni mta wiꞌ qꞌuisic trij. 
\v 16 Tacꞌa jun achi tok ncami ja wi rbanon can jun wuj rxin ja rmebaꞌil, wi rbin can chipan chok chique nja̱ch wiꞌ ja rmebaꞌil, ja cꞌa tok ncami cꞌa tokoriꞌ njachi ja rmebaꞌil. 
\v 17 Ja rachi ja wi cꞌa cꞌas na mta moda noqui ja wuj chi rjachic ja mebaꞌil, ja tok ncami cꞌa tokoriꞌ noqui ja wuj. 
\v 18 Queriꞌ cꞌa tre chakajaꞌ ja nabey chominem ja chomarsax rmal ja Dios, cꞌa tokoriꞌ xoqui ja chominem ja tok cꞌoli quicꞌ coji. 
\v 19 Queriꞌ xuban ja Moisés chakajaꞌ, nabey xuyaꞌ na rbixic nojelal ja ley chique ja winak ja bin tre rmal ja Dios chi nbij cꞌacꞌariꞌ xchicaj quicꞌ trij ja bar tzꞌibtal wiꞌ ja ley in chiquij canojel ja winak chakajaꞌ. Ja quicꞌ xucoj jariꞌ quixin wacax ja tak ternero in quixin qꞌuisicꞌ, xuyuj ruqꞌuin yaꞌ. Ja xchicbej ja quicꞌ cꞌo jun ti rkꞌaꞌ cheꞌ xucoj rbinaꞌan hisopo rachbil juleꞌ lana quiak. 
\v 20 Ja cꞌa tok chictaj rmal cꞌacꞌariꞌ xbij chique ja winak: —Ja quicꞌ ja xinchicaj leꞌ jalaꞌ nuyaꞌ rseguro ja chominem ja bin chewe rmal ja Dios chi rjawaxic nenimaj, neꞌ chique. 
\v 21 In queriꞌ xuban tre ja rochoch Dios in tre nojel ja nquecoj jeꞌe ja nquiyabej rukꞌij ja Dios, xchicaj quicꞌ trij chakajaꞌ. 
\v 22 In queriꞌ tzꞌibtal chipan ja ley chakajaꞌ, ni quicꞌ wiꞌ noqui ja tok cꞌoli nchꞌachꞌojirsaxi, xa jujun ja ma quicꞌ ta noqui chi rchꞌachꞌojirsbexic. Ja wi mta quicꞌ ntixi mta cꞌariꞌ ja cuybal il mac. 
\s * * * * * * * * * * 
\p 
\v 23 Chewiꞌ cꞌa tok rjawaxic chi noqui ja quiquiqꞌuel chicop chi rchꞌachꞌojirsbexic ja nakun jeꞌe ja xa rachbal ja cꞌo jeꞌe chilaꞌ chicaj. Pro ja tre ja mero cꞌo jeꞌe chilaꞌ chicaj ja xa ma rachbal ta rjawaxic jun sacrificio ja más chi na utz chwach ja quiquiqꞌuel chicop. 
\v 24 Ja rocnak wiꞌ ja Cristo camic ma chipan ta jun rochoch Dios ja xa banon ja xa rachbal ja mero rochoch Dios. Pro mero chilaꞌ chicaj ja rocnak wiꞌ, ni chwach ja Dios xekaj wiꞌ in triꞌ cꞌa cꞌo wiꞌ camic, ntajini nokrucoj chwach ja Dios. 
\v 25 Ja juleꞌ chic lokꞌlaj tak sacerdote ejeꞌeꞌ junaꞌ junaꞌ ni xeꞌoc wiꞌ chipan ja santilaj lugar chi rtzujuxic ja quicꞌ pro ma quiquiqꞌuel ta ejeꞌeꞌ. Pro ja Cristo ma queriꞌ ta rbanon, arjaꞌ matitzujuj riꞌ chi ncamsax ta caꞌmul oxmul. 
\v 26 Ja wixta queriꞌ jaruꞌ pa tiempo winakarnakto ja rwachꞌulew qꞌuiylaj mul ta cꞌariꞌ camsanto. Pro ja xuban arjaꞌ, xa jutij peti, xtzujuj riꞌ chi camsax pa kacuenta, ja cꞌa rcamic jariꞌ xchupbej ja kil kamac kanojel. Ja tiempo ja pi wiꞌ jariꞌ qꞌuisbal rxin ja tiempo jeꞌe ja rchominto ja Dios ojer. 
\v 27 Caniꞌ chique ja winak ejeꞌeꞌ cayben ja camíc pro xa jutij necami, ma caꞌmul ma oxmul ta. Ja cꞌa cajal chic chiquewach xa kꞌetoj tzij chic ja majaꞌn tiban chiquij. 
\v 28 Queriꞌ cꞌa tre ja Cristo chakajaꞌ ma qꞌuiylaj mul ta cami ja tok camsax pa kacuenta. Xa jutij cami pro ok qꞌuiy ja xokrutoꞌ, ma jun ta, xrijkaj ja kil kamac chwach ja Dios in xuchup. Arjaꞌ npi chi na jutij pro ma rmal chi ta chi nrijkaj chic jutij ja kil kamac, npi chi na utzcꞌa chi nokrutoꞌ chijutij kanojel ja nokquicoti chi raybexic. 
\c 10 
\p 
\v 1 Ja rcꞌamonto ja ley xa caniꞌ rnatuꞌ ja rutzil ja tzujunto ojer rmal ja Dios pro ma rcꞌamonpi ta ja mero utzil. Rmalcꞌariꞌ maticowini ja ley xquerutoꞌ ta chijutij ja winak ja junaꞌ junaꞌ neꞌekaj chwach ja Dios in neꞌequitzujuj ja chicop chwach rumac ja quil quemac. 
\v 2 Ja wixta cowini xerutoꞌ chijutij maquita cꞌa xequitzujuj chic más ariꞌ ja chicop. Tibij cꞌa tzij ariꞌ ja wixta chꞌachꞌojirsaxi chijutij ja canma quenaꞌ kaj ta cꞌariꞌ chi ja quil quemac chuptaji. 
\v 3 Pro ja queban, junaꞌ junaꞌ ni cꞌo wiꞌ ja nquinatbej chi ma chuptajnak ta, jariꞌ tok xequicamsaj ja chicop chi nequitzujuj chwach ja Dios rmal ja quil quemac. 
\v 4 Ma chuptajnak ta como ja quicꞌ quixin wacax quixin qꞌuisicꞌ ni mta wiꞌ moda xtuchup ta ja il mac. 
\p 
\v 5 Rmalcꞌariꞌ ja Cristo tok pi waweꞌ chwachꞌulew quewaꞌ xbij tre ja Tatixel riꞌ: —Ja ratat, ma ja tariꞌ nawajoꞌ ja necamsaxi juleꞌ chicop chawach nixtacꞌa ja ta ja juleꞌ chic ja ntzujux jeꞌe chawach. Pro ja ncuerpo anin jariꞌ achomarsan, ja cꞌariꞌ ntzujux na chawach. 
\v 6 Ma ja tariꞌ nel acꞌuꞌx trij ja neporoxi juleꞌ chicop chawach nixtacꞌa ja ta juleꞌ chic ja ntzujux chawach rmal ja quil quemac ja winak. 
\v 7 Rmalcꞌariꞌ tok quewaꞌ xinbij chawe riꞌ: —Dios, anin inpenak caniꞌ tzꞌibtal can chwe chipan ja libro, nunbanaꞌ xa nak ta ja nawajoꞌ chwe chi nban, xincheꞌ chawe. Queriꞌ xbij ja Cristo. 
\v 8 Jun ja xbij, chi ja Dios ma ja tariꞌ nrajoꞌ ja necamsaxi juleꞌ chicop chwach in nixtacꞌa ja ta ja juleꞌ chic ja ntzujux jeꞌe chwach, ma ja tariꞌ nel rucꞌuꞌx trij, neꞌe. Ja ley nbij chi rjawaxic ntzujux awaꞌ sacrificio riꞌ pro ma ja tariꞌ ja kas mero nrajoꞌ ja Dios, neꞌe ja Cristo. 
\v 9 In jun chic xbij quewariꞌ: —Nataꞌ Dios, anin inpenak chi nunbanaꞌ ja nawajoꞌ chwe chi nban, neꞌe. Queriꞌ xuban ja Cristo, xlasaj ja sacrificio jeꞌe ja tzujuxi nabey in xtzujuj riꞌ arjaꞌ, xoc pa rqꞌuexwach, xuban ja caniꞌ xajoꞌx tre rmal ja Dios chi nuban. 
\v 10 Como ma xnimar ta chi rbanic ja xajoꞌx tre rmal ja Dios rmalcꞌariꞌ tok chꞌachꞌojirsaxi ja kanma chipan ja kil kamac, ja cꞌa xchꞌachꞌojirsbej jariꞌ tok chijutij xtzujuj ja rcuerpo chi camsax kumal. 
\p 
\v 11 Ja juleꞌ chic sacerdote ejeꞌeꞌ kꞌij kꞌij nepeꞌe chwach ja Dios, nquitzujuj ja sacrificio jeꞌe chwach in nijawariꞌ sacrificio nquitzujuj nojel tak kꞌij. Pro jariꞌ ja nquitzujuj ni mta wiꞌ moda xtilasaj ta ja kil kamac. 
\v 12 Ja cꞌa Jesucristo arjaꞌ xa jun ja sacrificio ja xtzujuj chwach ja Dios, ma qꞌuiy ta, in ma kꞌij kꞌij ta xtzujuj pro xa jutij. Ja cꞌa tok tzujtaj can rmal cꞌacꞌariꞌ be, xetzꞌabeꞌe pa riquikꞌaꞌ ja Dios 
\v 13 in triꞌ cꞌa neraybej wiꞌ ja rcꞌulel chi nekajsax na, neco̱j na pa rkan rmal ja Dios. 
\v 14 Ja sacrificio ja xtzujuj xa jun rwach jariꞌ xcuybej chijutij ja kil kamac kanojel ja chꞌachꞌojirsan chic ja kanma rmal, mchita nak chi ta kayben tre ja kil kamac. 
\v 15 In queriꞌ binto chake chakajaꞌ rmal ja rEspíritu Santo ja nabey, quewaꞌ xbij riꞌ: 
\v 16 —Quewaꞌ nbij riꞌ ja kajaw Dios: —Ja tok xterilaꞌ ja tiempo anin nchomarsaj chi na jun ja chominem cuqꞌuin in quewaꞌ rbanic riꞌ, ja ley ja xquenbanbej mandar jariꞌ pa tak canma xtincoj wiꞌ in xtintzꞌibaj pa tak quewiꞌ chakajaꞌ, neꞌe. 
\v 17 Cꞌacꞌariꞌ nbij chic quewariꞌ: —Matinataj chic mwal ja quil quemac, matinataj chic mwal ja ritzelal quibanon. Queriꞌ rbinto. 
\v 18 Como cuytajnak chic ja kil kamac rmal ja Dios xcꞌa rmalariꞌ mchita jun chic sacrificio ja xtikatzujuj chi ta ja xticuy chi ta jutij ja kil kamac. 
\s * * * * * * * * * * 
\p 
\v 19 Rmalcꞌariꞌ wachꞌalal ja santilaj lugar ja bar cꞌo wiꞌ ja Dios jariꞌ jakal chic chikawach in matikanaꞌ chic kiꞌ nokoc chipan, matikanaꞌ chic kiꞌ nokekaji cꞌa chwach ja Dios. Pro xa rmal ja rquiqꞌuel ja Jesús tok queriꞌ nkaban, xa rmal ja cam pa kacuenta tok yatajnak chake chi nokekaj chwach. 
\v 20 Arjaꞌ rjakon chikawach jun cꞌacꞌa bey, jun bey ja rcꞌamonto cꞌaslemal. Caniꞌ tre ja tziak ja tasben rpan ja rochoch Dios raktaji in jakeꞌe ja ruchiꞌ ja santilaj lugar in queriꞌ cꞌa tre ja Jesús chakajaꞌ tok cam pa kacuenta jariꞌ xjakbej jun bey chikawach ja nokeryaꞌaꞌ cꞌa chwach ja Dios. 
\v 21 Ja Jesús arjaꞌ lokꞌlaj sacerdote kaxin paꞌl chakij ja rok tinamit xin Dios. 
\v 22 Koꞌekaj cꞌa chwach ja Dios, maxta tikanaꞌ kiꞌ pro nojel ta kanma, ni ta yukul wiꞌ kacꞌuꞌx ruqꞌuin. Quirtariꞌ nkaban jutzꞌit como kotak chi chꞌachꞌojirsan chic ja kanma chipan ja kil kamac in matitiꞌon chic ja kaconciencia rmal. Kotak chakajaꞌ chi chꞌachꞌojirsan chic ja kacuerpo tre jun chꞌajchꞌojlaj yaꞌ ja ni majun tzꞌil nak ta rcꞌan. 
\v 23 Ja Dios arjaꞌ ni nuyaꞌ wiꞌ ja rtzujunto rmalcꞌariꞌ wachꞌalal cow kopeꞌe jutzꞌit chi raybexic, maxta ticapuj kacꞌuꞌx. 
\v 24 Kachꞌoboꞌ rij rwach nak nkaban ja xtikabanbej ta animar kiꞌ chi nkajobej más kiꞌ in nkacꞌutbej más ja rutzil. 
\v 25 Ecꞌoli ja maqueꞌurkaj chic ja tok nkamol kiꞌ, maxta cꞌa queriꞌ tikaban ajoj. Ja kas takal chakij chi nkaban, kapaxbaj kiꞌ, kabanaꞌ animar kiꞌ. Jariꞌ más chi na rjawaxic chi nkaban como ixix netzꞌat chi xa nnakajinto ja nimlaj kꞌij ja tok xtipi chic jutij ja kajaw Jesucristo. 
\p 
\v 26 Queriꞌ nbij chewe como ajoj wi kaniman chic ja tijonem ja rcꞌamonto ja Jesucristo in wi kas kꞌalawachili nokmacun chic jariꞌ mchita jun sacrificio xkotobex chi ta tre ja il mac nkaban. 
\v 27 Ja winak ja nebano queriꞌ xa cꞌo jun nimlaj juicio cajal chiquewach congana xbeben riꞌil, ja cꞌa ryewal Dios npi na chiquij caniꞌ jun nimlaj kꞌakꞌ ja nerporobej canojel ja rcꞌulel. 
\v 28 Ja ley xin Dios ja tzꞌibtal can rmal ja Moisés wi cꞌo jun winak ma xnimaj ta, wi xuban tre ni ma vale ta in wi ecꞌo caꞌiꞌ owi e oxiꞌ ja xeꞌoc testigo trij chi queriꞌ xuban tre jariꞌ ni majun npokonan rwach, ncamsaxi. 
\v 29 Pior cꞌa ja Jesucristo ja Ralcꞌwal Dios, wi cꞌo jun nuban tre ni ma vale ta ¿la ma yatal ta cꞌa trij ariꞌ nechꞌob ixix chi nutij na jun rpokonal ja más chi na lawuloꞌ? Janila nutij na rpokonal ja wi nuban tre ja rquiqꞌuel ja Jesucristo caniꞌ rquiqꞌuel xa nak ta chi winakil pro makanaꞌ maquita jariꞌ quicꞌ chꞌachꞌojirsan rxin chipan ja ril rumac, makanaꞌ maquita jariꞌ quicꞌ nyowi rseguro ja cꞌacꞌa chominem ja chomarsan rmal ja Dios chi katoꞌic. Janila nutij na rpokonal ja wi nuban tre ja rEspíritu Santo ni ma vale ta pro makanaꞌ maquita ja rEspíritu Santo ja cꞌamyonto ja rutzil ja nsipaj ja Dios chake. 
\v 30 Queriꞌ nbij chewe como kotak chic janiꞌ rnaꞌoj ja kajaw Dios caniꞌ rbin can quewariꞌ: —Ja ritzelal ja nqueban ja winak anin cꞌa ninyoꞌ rjil rcꞌaxel chique, anin cꞌa ninyoꞌ chique ja rtojbalil ja ritzelal nqueban, neꞌe. In jun chic ja tzꞌibtal can quewariꞌ: —Ja kajaw Dios arjaꞌ ni nukꞌet na wiꞌ tzij chiquij ja rtinamit, neꞌe. 
\v 31 Janila kas xbeben riꞌil rcꞌamonto ja natkaj pa rkan ja cꞌaslic Dios. 
\p 
\v 32 Pro ixix wachꞌalal turkaj cꞌa chewe chi ja kas nabey ja tok sakirsaxto ja rebey rmal ja Jesucristo xixcowini xecochꞌ nojel ja pi chewij, janila jun lucha janila jun rpokonal xetij pro xecochꞌ nojelal. 
\v 33 Ixix xecochꞌ ewach chipan ja tok cꞌo jeꞌe yaꞌ eqꞌuix chiquewach ja winak, tok xixyokꞌi xixtzꞌuji in tok cꞌo jeꞌe ban pokon chewe. In jun chic, ma xepokonaj ta xeꞌewachbilaj ja juleꞌ chic ja ban queriꞌ chique. 
\v 34 Como ja xeqꞌuejeꞌ pa tak cheꞌ rumac ja Jesucristo xepokonaj quewach. In tok majtaj chewe ja mebaꞌil ma xepokonaj ta, xixquicoti. Como bien ewotak chi cꞌol emebaꞌil chilaꞌ chicaj ja más chi na utz ja ni mta wiꞌ qꞌuisic trij chewiꞌ tok xixquicoti. 
\v 35 Rmalcꞌariꞌ nbij jutzꞌit rubiꞌ chewe, maxta teyaꞌ can ja yukulbal ecꞌuꞌx ruqꞌuin ja Jesucristo como cꞌo jun nimlaj rtojbalil ja rcꞌamonto chewe ja tok nyukeꞌ ecꞌuꞌx ruqꞌuin. 
\v 36 Maxta teyaꞌ can jutzꞌit como ni rjawaxic wiꞌ chewe chi necochꞌ ja rpokonal utzcꞌa chi rvoluntad Dios ja neban in newil ja rtzujunto chake. 
\v 37 Caniꞌ tzꞌibtal can chipan ja rtzobal Dios quewaꞌ nbij riꞌ: —Cꞌo jun ja npi na in ma jaruꞌ chi ta tiempo nrajoꞌ chi nurkaji, arjaꞌ npeti, matuyaꞌ tiempo tre. 
\v 38 Ja cꞌa winak ja rencꞌulun ni rjawaxic wiꞌ tre ja quicꞌaslemal chi ni nyukeꞌ wiꞌ quecꞌuꞌx wqꞌuin. Pro wi ecꞌoli chique ja xquemeloj can chic jutij chiquij ejeꞌeꞌ riꞌ ni majun ngana cuqꞌuin. Queriꞌ rbin can ja Dios. 
\v 39 Ja cꞌa rajoj wachꞌalal ma ok cachbil ta ja xa nemeloj can chiquij ja matiyataj chique chi nequiwilaꞌ ja totajem rxin ja Dios. Ajoj ok cachbil ja cꞌo yukulbal quecꞌuꞌx ruqꞌuin ja Dios in noktotaji chijutij rmal. 
\c 11 
\s * * * * * * * * * * 
\p 
\v 1 Ja yukulbal cꞌuxlal quewaꞌ rbanic riꞌ, ja wi cꞌo jeꞌe ja yukul kacꞌuꞌx ruqꞌuin jariꞌ ni nkaybej na wiꞌ in bien kotak chi nekawilaꞌ na, owi tre ja matitzꞌattaji ruqꞌuin kawach ja wi yukul kacꞌuꞌx ruqꞌuin jariꞌ bien kotak chi cꞌoli masqui matikatzꞌat. 
\v 2 Ja katiꞌt kamamaꞌ ojer, rmal ja yukulbal quecꞌuꞌx ruqꞌuin ja Dios chewiꞌ tok utz xetzꞌa̱t rmal. 
\p 
\v 3 Ja rajoj chakajaꞌ, rmal ja yukulbal kacꞌuꞌx ruqꞌuin ja Dios chewiꞌ tok chꞌobtajnak kumal chi ja tok tzꞌucarsaxi ja caj in rwachꞌulew, ja tzij ja bix pon rmal ja Dios jariꞌ tzꞌucarsbexi. Queriꞌ cꞌa rbanic, ja Dios xa xbij pon ja tzij in jariꞌ tzij xoqui chi rtzꞌucarsaxic, ma ja tariꞌ xoqui chi rtzꞌucarsbexic ja ntzꞌattaji ruqꞌuin kawach. 
\p 
\v 4 Ja rAbel chakajaꞌ, rmal ja yukulbal rucꞌuꞌx ruqꞌuin ja Dios chewiꞌ tok más na utz ja sacrificio ja xtzujuj tre ja Dios chwach ja tzujux rmal ja Caín. Ja cꞌa Dios arjaꞌ utz xutzꞌat ja sacrificio rxin ja rAbel in xucꞌam tre, triꞌ cꞌa nkatzꞌat wiꞌ chi ja rAbel utz tzꞌati rmal ja Dios. Ma chaka ta ban queriꞌ tre, rumac ja yukulbal rucꞌuꞌx. In masqui camnak chic ja rAbel pro rmal ja yukulbal rucꞌuꞌx ruqꞌuin ja Dios tok caniꞌ cꞌa ntzijon na kuqꞌuin camic. 
\p 
\v 5 Ja rEnoc chakajaꞌ, rmal ja yukulbal rucꞌuꞌx ruqꞌuin ja Dios chewiꞌ tok yataj tre chi ma xkꞌax ta chipan ja camíc pro chaka jalal ja tok ma xcanoy chi ta waweꞌ chwachꞌulew como Dios cꞌamoꞌel rxin chilaꞌ chicaj. Como ja Dios congana quicot trij ja rEnoc waweꞌ chwachꞌulew chewiꞌ tok xuban queriꞌ tre, caniꞌ tzꞌibtal can. 
\v 6 Ja Dios wi mta yukulbal acꞌuꞌx ruqꞌuin jariꞌ mta moda utz ta xtutzꞌat ja racꞌaslemal. Ja wi cꞌol agana nattiloc ruqꞌuin ja Dios rjawaxic chawe ja caꞌiꞌ riꞌ, jun, nanimaj chi cꞌoli ja Dios, in jun chic, nanimaj chi ja Dios, wi natij akꞌij chi rilic arjaꞌ nyoꞌ chawe ja rtojbalil. 
\p 
\v 7 Ja Noé chakajaꞌ, rmal ja yukulbal rucꞌuꞌx ruqꞌuin ja Dios arjaꞌ xnimaj ja Dios ja tok bix tre chi cꞌo jun juicio penak. Arjaꞌ bien xnimaj masqui majaꞌn tutzꞌat ja juicio penak. Rmal cꞌa ja yukulbal rucꞌuꞌx tok xuban jun nimlaj lancha, xeꞌoc chipan e rachbil canojel ja recꞌo pa rochoch, queriꞌ queban xetotaji chipan ja juicio. Triꞌ cꞌa nkatzꞌat wiꞌ chi ja ma xeniman ta ni pa quil wiꞌ ban chique xecamsaxi. Ja Noé yukeꞌ rucꞌuꞌx ruqꞌuin ja Dios xa chewiꞌ tok cꞌul rmal como queriꞌ nuban ja Dios chawe natrucꞌul ja tok nyukeꞌ acꞌuꞌx ruqꞌuin. 
\p 
\v 8 Ja rAbraham chakajaꞌ, rmal ja yukulbal rucꞌuꞌx ruqꞌuin ja Dios chewiꞌ tok xnimaj ja Dios. Tokoriꞌ xnimaj ja tok bix tre chi neli in nbe chipan jun chic nación ja xtiyaꞌ na tre como herencia. Arjaꞌ nimani in be masqui ma rotak ta nak chi lugaril ja nbe wiꞌ. 
\v 9 Tok xekaj chipan ja nación ja tzujux tre triꞌ qꞌuejeꞌ wiꞌ masqui ma rtinamit ta pro rmal ja yukulbal rucꞌuꞌx ruqꞌuin ja Dios ja tok xuban queriꞌ. Qꞌuejeꞌ na pa tak jay jeꞌe ja tzꞌum ocnak e rachbil Isaac in Jacob, ejeꞌeꞌ chakajaꞌ junan tzujux chique ja caniꞌ tzujux tre ja rAbraham. 
\v 10 Ja tinamit ja kas rayben ja rAbraham jariꞌ ja tinamit ja xin chilaꞌ chicaj ja cꞌo jun rsimientoꞌil ja ni mta wiꞌ qꞌuisic trij, jariꞌ tinamit Dios chomarsani in Dios banowi. 
\p 
\v 11 Ja cꞌa Sara ja rxjayil Abraham cꞌo yukulbal rucꞌuꞌx ruqꞌuin ja Dios chakajaꞌ chewiꞌ tok yataj tre rmal ja Dios chi xoc na jun teꞌej masqui congana ti riꞌj chic in mta alanem trij pro xalax na jun ti ral. Yukeꞌ rucꞌuꞌx ruqꞌuin ja Dios, rotak chi ja ntzujuj ni nuyaꞌ wiꞌ chewiꞌ tok yataj tre ja ti ral. 
\v 12 Queriꞌ cꞌa xuban ja rAbraham masqui congana ti riꞌj chic pro yataj na tre chi qꞌuejeꞌ jun ti ralcꞌwal, xeqꞌuejeꞌ na riy rumam chakajaꞌ in congana quesep quiꞌ, cꞌayew chi neꞌaltaji caniꞌ chique chꞌumil ja recꞌo chicaj in caniꞌ tre ja raxasnayiꞌ ja cꞌo chi tak mar. 
\p 
\v 13 Ejeꞌeꞌ riꞌ winak ja tok xecami majaꞌn tiquewil ja tzujun chique rmal ja Dios pro masqui majaꞌn tiquewil pro ni yukul na wiꞌ quecꞌuꞌx ruqꞌuin ja Dios chi ja xtzujuj chique ni nuyaꞌ na wiꞌ. Ja quenaꞌ kaj pa tak canma caniꞌ ecꞌo pon chic ruqꞌuin ja tzujux chique in congana nequicot pon trij. Quewaꞌ quibij riꞌ: —Mta jun katinamit waweꞌ chwachꞌulew, xa ok kꞌaxel chwach, necheꞌe. 
\v 14 Ja tok queriꞌ nabij triꞌ cꞌa ncꞌaxax wiꞌ chi cꞌa amajon na rcanoxic jun tinamit ja mero tinamit awxin. 
\v 15 Ja tinamit ja bar eꞌelnakto wiꞌ nabey wixta quichꞌobon chi triꞌ nemeloj wiꞌ xecowin ta cꞌariꞌ xemeloji pro ma queriꞌ ta quichꞌobon. 
\v 16 Pro ja mero quitinamit ja kas nel quecꞌuꞌx trij jariꞌ más utz chi na, jariꞌ ja tinamit ja xin chilaꞌ chicaj. Ja cꞌa Dios ma junwiꞌ ta nunaꞌ nbij chi arjaꞌ Dios quixin como cꞌo jun quitinamit ja rchomarsan ja mero tinamit quixin. 
\p 
\v 17 Ja rAbraham, rmal ja yukulbal rucꞌuꞌx ruqꞌuin ja Dios chewiꞌ tok nimani ja tok cꞌambajaxi rmal ja Dios tokoriꞌ tok xtzujuj chwach Dios ja rIsaac ja ti rcꞌajol in jutzꞌit laj xcamsaj. Ja rAbraham arjaꞌ conforme chi ntzujuj ja ti rcꞌajol chipan ja camíc masqui xarariꞌ ti jun. Pro makanaꞌ maquita tzujun chic tre rmal ja Dios chi congana nquesep na quiꞌ ja riy rumam, 
\v 18 makanaꞌ maquita bin chic tre chi ja rIsaac nsepo quixin ja riy rumam. 
\v 19 Pro quewaꞌ xuchꞌob kaj ja rAbraham riꞌ, ja Dios masqui xcamsaj ta ja ti rcꞌajol pro cowin ta cꞌariꞌ xcꞌasbaꞌ chi ta jutij chipan ja camíc. Queriꞌ xuban ja ti rcꞌajol yataj chic jutij tre, caniꞌ kꞌax chipan ja camíc in caniꞌ cꞌastaji. 
\p 
\v 20 Ja rIsaac chakajaꞌ, rmal ja yukulbal rucꞌuꞌx ruqꞌuin ja Dios chewiꞌ tok xeruban can bendecir ja Jacob in Esaú tokoriꞌ tok xkꞌalasaj can chiquewach nak ja majaꞌn tibantaji. 
\v 21 Ja tok xajalal majaꞌn ticami ja Jacob arjaꞌ chakajaꞌ rmal ja yukulbal rucꞌuꞌx ruqꞌuin ja Dios chewiꞌ tok xeruban can bendecir ja re caꞌiꞌ rcꞌajol ja José. Arjaꞌ rcꞌan ti rchꞌameꞌy, xtokꞌaj riꞌ tre, tiqueꞌe in xuyaꞌ rukꞌij ja Dios. 
\v 22 Ja tok xajalal majaꞌn ticami ja José arjaꞌ chakajaꞌ rmal ja yukulbal rucꞌuꞌx ruqꞌuin ja Dios chewiꞌ tok xbij can chique ja rchꞌalal chi nerilaꞌ na jun kꞌij tok xqueꞌeli ja raj Israel pan Egipto: —Jariꞌ kꞌij tok xqueꞌelel ncꞌamarel na ja nbakil anin chakajaꞌ. Queriꞌ xbij can chique. 
\p 
\v 23 Ja rtataꞌ ruteꞌ ja Moisés chakajaꞌ cꞌo yukulbal quecꞌuꞌx ruqꞌuin ja Dios in rmalariꞌ ja Moisés tok xalaxi totaji pa rukꞌaꞌ ja rey. Como ja rey cꞌo jun orden ryaꞌon pro ejeꞌeꞌ ma xquixbej ta quiꞌ chwach. Quetzꞌat ja ti calcꞌwal chi congana ti buena chewiꞌ oxiꞌ icꞌ quiwawaj chwach ja rey. 
\v 24 Ja Moisés banon tre rmal ja rmeꞌal ja rey Faraón caniꞌ jun chakꞌlaj ral congana nim rukꞌij. Pro tok xoc achi ma xpokonaj ta xuyaꞌ can. Rmal ja yukulbal rucꞌuꞌx ruqꞌuin ja Dios tok ma xpokonaj ta xuyaꞌ can. 
\v 25 Xerachbilaj ja tinamit xin Dios chipan ja rpokonal. Quewaꞌ xuchꞌob kaj ja Moisés riꞌ: —Más na utz nenwachbilaj ja tinamit xin Dios chipan ja rpokonal chwach ja xquenwachbilaj ta ja raj Egipto chipan ja quicotemal ja xa il mac rcꞌamonto in xa nocꞌowi chakajaꞌ. 
\v 26 Más na vale ja ntij rpokonal rumac ja Cristo chwach ja xtinchꞌec ta nojelal ja mebaꞌil ja cꞌo pan Egipto, neꞌ kaj. Arjaꞌ kas tzꞌel pon rwach trij ja rtojbalil ja nya̱ꞌ na tre rmal ja Dios chewiꞌ tok queriꞌ xuchꞌob. 
\v 27 Rmal ja yukulbal rucꞌuꞌx ruqꞌuin ja Dios chewiꞌ tok xeli ja pan Egipto, ma xbej ta riꞌ chwach ja rey masqui ja rey congana yictaj ryewal. Cow peꞌi, rotak chi ja Dios cꞌo ruqꞌuin, xuban ja caniꞌ xutzꞌat rwach ja Dios masqui ja Dios matitzꞌattaji. 
\v 28 Ja Moisés, rmal ja yukulbal rucꞌuꞌx ruqꞌuin ja Dios chewiꞌ tok xucꞌul ja nmakꞌij rbinaꞌan pascua. Rmal ja yukulbal rucꞌuꞌx chakajaꞌ tok quewaꞌ xbij chique ja winak riꞌ: —Techicaj rquiqꞌuel jun carnelo chiꞌ tak puerta rxin ewochoch. Quirtariꞌ neban utzcꞌa ja tok xtipeti ja ángel chi quicamsaxic ja ralaꞌiꞌ ja nabey tak winak maquercamsaj ja rewalcꞌwal ixix, neꞌ chique. 
\v 29 Ja raj Israel chakajaꞌ, rmal ja yukulbal quecꞌuꞌx ruqꞌuin ja Dios chewiꞌ tok xecowini xekꞌax chipan ja nimlaj yaꞌ rbinaꞌan Quiakamar pro nixtacꞌa xechꞌakeꞌ ta jutzꞌit, caniꞌ xa nak ta chi beyal xekꞌax wiꞌ. Pro ja raj Egipto laj xekꞌax ejeꞌeꞌ chakajaꞌ pro xejikꞌ chipan ja yaꞌ. 
\p 
\v 30 Ja raj Israel, rmal ja yukulbal quecꞌuꞌx ruqꞌuin ja Dios chewiꞌ tok be chi tokꞌulew ja nimlaj tabia ja sutin trij ja tinamit rbinaꞌan Jericó. Ja tre wukuꞌ kꞌij ni queyaꞌ wiꞌ jeꞌe vuelta trij ja tabia in tok tzꞌakati ja yaꞌoj vuelta cumal be ja tabia chi tokꞌulew. 
\v 31 Ja rixok ja raj Jericó rbinaꞌan Rahab ja ritzel rcꞌaslemal nabey arjaꞌ cꞌo yukulbal rucꞌuꞌx ruqꞌuin ja Dios chakajaꞌ. Arjaꞌ xerutoꞌ ja soldado ja raj Israel ja xeꞌekaji ja pa Jericó chi rcꞌambajaxic ja tinamit pro xa pan awatali xeꞌekaji. Ja cꞌa Rahab quiꞌil quicꞌulic xuban, xerucoj pa rochoch in rmal ja yukulbal rucꞌuꞌx chewiꞌ tok ma xcamsax ta pro xecamsaxi ja rach tak aj Jericó como ejeꞌeꞌ ma xquinimaj ta ja Dios. 
\p 
\v 32 In ecꞌo na más ja winak ja quiyaꞌon can jun utzlaj ejemplo chikawach tre ja yukulbal quecꞌuꞌx ruqꞌuin ja Dios pro matuyaꞌ tiempo chwe xquintzijon ta chique juleꞌ chic caniꞌ chique Gedeón, Barac, Sansón, Jefté, David, Samuel in chique juleꞌ chic profeta. 
\v 33 Ejeꞌeꞌ chakajaꞌ rmal ja yukulbal quecꞌuꞌx ruqꞌuin ja Dios chewiꞌ tok yataj chique chi quechꞌec ja gobierno jeꞌe ja rocnak quicꞌulel, chewiꞌ tok utz queban chi cucꞌaxic ja winak in chewiꞌ chakajaꞌ tok quewil jeꞌe ja tzujunto ojer rmal ja Dios. Rmal ja yukulbal quecꞌuꞌx chakajaꞌ tok xecowini quitzꞌapij quechiꞌ ja cój. 
\v 34 Chewiꞌ chakajaꞌ tok mta xoc chique tok xeya̱ꞌ pa kꞌakꞌ, ma xecꞌat ta. Chewiꞌ chakajaꞌ tok xecowini quetoꞌ quiꞌ pa quekꞌaꞌ ja winak ja xcajoꞌ ta xequicamsaj tzaꞌn tak espada. Ja cꞌa tok ni majun ja quichokꞌakꞌ yataj chique quichokꞌakꞌ, cow xepeꞌi chipan ja chꞌaꞌoj in xecowini xequisalujel ja quicꞌulel ja neꞌurchꞌojin jeꞌe cuqꞌuin chipan ja quitinamit. 
\v 35 Ecꞌo jeꞌe ixokiꞌ chakajaꞌ, rmal ja yukulbal quecꞌuꞌx ruqꞌuin ja Dios tok yataj jeꞌe chique chi xecꞌastaji camnakiꞌ cuqꞌuin. Ecꞌo juleꞌ chic ja winak, rmal ja yukulbal quecꞌuꞌx tok xechapi, más kꞌaxnak chi na ja rpokonal ban chique in bix chique chi nesokpixel pro wi nqueyaꞌ can ja Dios. Pro ejeꞌeꞌ ma xeniman ta: —Mejor nokcamsaxi, xecheꞌe. Queriꞌ queban utzcꞌa chi nquewil ja cꞌaslemal ja más utz chi na. 
\v 36 Ecꞌoli ja congana xetzꞌuji, xeyokꞌi, xechꞌa̱y tzaꞌn tak asial in chakajaꞌ xeba̱cꞌ pa tak cadena, xeco̱j pa tak cheꞌ. 
\v 37 Ecꞌoli xecamsax tzaꞌn tak abaj. Ecꞌoli xekꞌe̱t tzaꞌn tak sierra. Janila chi xeba̱n puersa chi nqueyaꞌ can ja yukulbal quecꞌuꞌx ruqꞌuin ja Dios. Ecꞌoli xecamsax tzaꞌn tak espada. Ecꞌoli xebinyaj na pa tak lugar jeꞌe, xa quitzꞌumal carnelo xa quitzꞌumal qꞌuisicꞌ quicojon chic, mchita nak chi ta nquitzukbej quiꞌ, congana lawuloꞌ ban chique, congana cꞌayew ja quicꞌaslemal. 
\v 38 Ja cꞌa winak ja xa mta quigana ruqꞌuin ja Dios ejeꞌeꞌ ma yatal ta chique ja xeqꞌuejeꞌ ta awaꞌ winak riꞌ chiquicojol. Congana cꞌayew ja queban, xebinyaj na pa tak chakijlaj ulew, xebinyaj na chwitakjayuꞌ, xeqꞌuejeꞌ na pa tak jul. 
\v 39 Ejeꞌeꞌ canojel, rmal ja yukulbal quecꞌuꞌx ruqꞌuin ja Dios chewiꞌ tok congana utz xetzꞌa̱t rmal. Pro jariꞌ tiempo masqui utz xetzꞌati pro majaꞌn tiquewil triꞌ ja tzujunto ojer rmal ja Dios. 
\v 40 Ejeꞌeꞌ caybej na chi nquewil como ja Dios arjaꞌ rchꞌobonto chi cꞌa pa katiempo ajoj nwinakarsaj wiꞌ ja cꞌacꞌa chominem ja más chi na utz. Queriꞌ xuban utzcꞌa chi junan nyataj chake kanojel ja totajem pro jun totajem ja ni majun ja maquita tzꞌakat tre, ma ejeꞌeꞌ ta xewilowi chikawach nabey. 
\c 12 
\s * * * * * * * * * * 
\p 
\v 1 Bien kachꞌoboꞌ wachꞌalal, congana jun nimlaj ejemplo yaꞌon can chikawach cumal awaꞌ winak riꞌ, ejeꞌeꞌ caniꞌ quisutinto quiꞌ chakij camic. Rmalcꞌariꞌ nbij chewe, katijaꞌ cꞌa kakꞌij ajoj tre ja cꞌamcꞌoj anim ja yaꞌon chikawach rmal ja Dios, cow kopeꞌi maxta ma tikaqꞌuis ta. Xa nak ta ja nokruban molestar trewaꞌ jun cꞌamcꞌoj anim riꞌ mejor kachꞌakij can in kayaꞌaꞌ can ja il mac ja xa nokruchap chipan ja kabey. 
\v 2 Katzꞌelwachij cꞌa ja Jesús, arjaꞌ nwinakarsani ja yukulbal kacꞌuꞌx ruqꞌuin ja Dios in arjaꞌ ntzꞌakatsan na chakajaꞌ. Arjaꞌ cꞌo jun nimlaj quicotemal rayben chewiꞌ tok ma xpokonaj ta camsax chwa cruz, jariꞌ congana qꞌuixbal pro xucochꞌ nojel ja ban tre. Ja cꞌa camic janiꞌ chi la kas nim rukꞌij, ja bar tzꞌubul wiꞌ ja katataꞌ Dios triꞌ tzꞌubul wiꞌ ja Jesús chakajaꞌ pa riquikꞌaꞌ. 
\p 
\v 3 Techꞌoboꞌ rij rwach ja xuban ja Jesús, janila ja rpokonal xutij pa quekꞌaꞌ ja rajꞌil ajmaquiꞌ pro xucochꞌ nojelal. Bien techꞌoboꞌ utzcꞌa chi ixix maquixcosi chi rtijic ja rpokonal utzcꞌa chi maticapuj ecꞌuꞌx. 
\v 4 Ja cꞌa rixix masqui emajon jun nimlaj lucha ruqꞌuin ja il mac pro majaꞌn tekꞌiꞌ ja caniꞌ ban tre ja Jesús como majaꞌn tetix ja requiqꞌuel. 
\v 5 ¿La matinataj cꞌa chewe ja rix alcꞌwalaxelaꞌ chi cꞌo jun paxbanem ewxin tzꞌibtal can? Quewaꞌ nbij ja paxbanem riꞌ: —Walcꞌwal, maxta itzel tanaꞌ ja tok kajaw Dios natruyaꞌ chipan jun rpokonal chi atijoxic. Ja tok cꞌoli nuchꞌaꞌ chawe maxta ticapuj acꞌuꞌx rmal. 
\v 6 Como ja kajaw Dios wi natruyaꞌ chipan ja rpokonal chi atijoxic jariꞌ retal chi natrajoꞌ. Ja wi natrapaj triꞌ cꞌa nkatzꞌat wiꞌ chi atcꞌulun rmal in at ralcꞌwal, queriꞌ cꞌa rbanic, maxta itzel tanaꞌ. Queriꞌ nbij. 
\v 7 Ja cꞌa rixix wi netij ja rpokonal turkaj chewe chi etijoxic nbani. Ja nuban ja Dios chewe queriꞌ caniꞌ nuban jun tatixel chique tak ralcꞌwal. ¿La cꞌo cꞌa jun alcꞌwalaxel nechꞌob ixix ja matirapax rmal ja rtataꞌ chi rtijoxic? Ma queriꞌ ta, canojel neba̱n corregir. 
\v 8 Ja cꞌa wi maquixban corregir xcꞌa neꞌel ariꞌ ix alakꞌan tak acꞌalaꞌ ja ma kꞌalaj ta nak la etataꞌ. 
\v 9 Ja tok xokqꞌuiyto ojer xokrapaxto cumal ja katataꞌ, okcꞌo pa katijoxic in xekaban respetar. Pior cꞌa ja katataꞌ Dios más chi na rjawaxic chi nkaban respetar. Ja wi nkaban respetar nkawil cꞌariꞌ ja utzlaj cꞌaslemal. 
\v 10 Ja katataꞌ ejeꞌeꞌ xokqueban corregir jun tiempo waweꞌ chwachꞌulew pro xa quinaꞌoj ejeꞌeꞌ queyon quecoj chakij. Pro ja katataꞌ Dios arjaꞌ ma chaka ta queriꞌ ja tok nokruban corregir pro ni cꞌo wiꞌ rcꞌamonto chake. Queriꞌ nuban chake utzcꞌa chi junan neli ja kanma ajoj ja caniꞌ ranma arjaꞌ, jun utzlaj anma in chꞌajchꞌoj. 
\v 11 Ni katzij wiꞌ chi ma quiꞌil ta ja tok natban corregir, nattiꞌoni. Cꞌamalo nanaꞌ ja rutzil ja rcꞌamonto chawe, ma chanim ta. Pro tok nbe tiempo tre cꞌoli rcꞌamonto chawe ja wi xawotakij nak rbanic. Quewaꞌ rcꞌamonto chawe riꞌ, nawcꞌaj na jun utzlaj anma rmal in natruyaꞌ chipan ja quicotemal xin Dios. 
\s * * * * * * * * * * 
\p 
\v 12 Rmalcꞌariꞌ nbij jutzꞌit rubiꞌ chewe wachꞌalal, cow quixpeꞌi chwach ja rpokonal, maxta ticapuj ecꞌuꞌx rmal. 
\v 13 Ja tre ja utzlaj bey ja cꞌutun chewach rmal ja Dios jic tecꞌamaꞌel. Ja wi queriꞌ xteban ja cꞌa majaꞌn ticowiri ja canma chipan ja bey ejeꞌeꞌ maticapuj quecꞌuꞌx emwal, npi más ja quichokꞌakꞌ. 
\p 
\v 14 Techꞌoboꞌ rij rwach nak neban chi matecꞌam rkan jeꞌe chꞌaꞌoj cuqꞌuin ja winak xa nak ta chi winakil pro ja quicotemal ja tariꞌ nqꞌuejeꞌ checojol cuqꞌuin. Techꞌoboꞌ rij rwach nak neban chi nixcowini newcꞌaj jun chꞌajchꞌojlaj anma. Mta jun nak ta ja xtertzꞌataꞌ ta rwach ja kajaw Dios ja wi ma rcꞌan ta jun chꞌajchꞌojlaj anma. 
\v 15 Tebanaꞌ jutzꞌit cuenta ewiꞌ, maxta cꞌo jun chewe tuyaꞌ can ja rutzil ja nsipaj ja Dios chake. Maxta cꞌo jun chewe tiyictaji checojol xqueruyoj ta ja juleꞌ chic caniꞌ nuban ja ritzel kꞌayis tok npeti ncamsaj ja tijcoꞌm. 
\v 16 Maxta cꞌo jun chewe toc ruqꞌuin jun chic ja wi ma rxjayil ta owi ma rchajil ta. Ja ntzujuj ja Dios chake maxta cꞌo jun chewe tuban tre ni ma vale ta chwach. Caniꞌ tre ja rEsaú ojer, ja nabey rwinakil xuban tre ni ma vale ta chwach, xa xcꞌayij pon, xa jutzꞌit ti rway xcꞌutuj pa rqꞌuexwach. 
\v 17 In bien ewotak chi ja tok be tiempo tre ja herencia ja rcꞌayin cꞌacꞌariꞌ xcꞌutuj chic jutij tre ja rtataꞌ pro ma xyaꞌ chi ta tre. Masqui congana xokꞌ rmal pro ni ma xcanoy chi ta wiꞌ rmal nak nuban chi nyataj chic jutij tre. 
\p 
\v 18 Ja bey ewcꞌan ixix junwiꞌ chi na xixeryaꞌaꞌ wiꞌ chwach ja xeꞌeya̱ꞌ wiꞌ ja rtinamit Dios ojer. Ja xeya̱ꞌ wiꞌ ejeꞌeꞌ chwach jun jayuꞌ ja natcowini natzꞌat ruqꞌuin awach rbinaꞌan Sinaí. Jariꞌ jayuꞌ cꞌati chiquewach in quewaꞌ bantaji riꞌ, congana kꞌekuꞌm xoqui in jaktajto jun nimlaj ikꞌ. 
\v 19 In chakajaꞌ cꞌo jun trompeta quicꞌaxaj in cꞌo jun kulaj quicꞌaxaj chakajaꞌ. Ja cꞌa kulaj, ja xecꞌaxan rxin congana quetij quekꞌij chi rcꞌutuxic chi ma titzijon chi ta más cuqꞌuin. 
\v 20 Queriꞌ queban como congana quixbej quiꞌ rmal ja bix chique chi: —Ja wi cꞌo jun npalbeni ja jayuꞌ riꞌ masqui xa jun chicop jariꞌ ncamsax tzaꞌn abaj owi tzaꞌn lanza, xecheꞌxi. 
\v 21 Ja quetzꞌat janila jun xbeben riꞌil rcꞌamonto chique chewiꞌ tok ja Moisés xbej riꞌ chakajaꞌ: —Anin congana ninbirbot rmal ja xbeben riꞌil, neꞌe. 
\p 
\v 22 Pro ja xixekaj wiꞌ ixix jariꞌ chwach jun jayuꞌ ja macatcowini natzꞌat ruqꞌuin awach rbinaꞌan Sión. In chakajaꞌ ixcꞌo chwach ja mero tinamit rxin ja cꞌaslic Dios rbinaꞌan Jerusalén ja cꞌo chilaꞌ chicaj. Ixcꞌo cꞌa chiquewach ja ángel pro congana e qꞌuiy, cꞌayew chi neꞌaltaji, 
\v 23 e janila quimolon quiꞌ chwach ja Dios chi rbixaxic rubiꞌ, janila quicotemal nbani. In chakajaꞌ ixcꞌo cꞌa chiquewach ja ralcꞌwalaxelaꞌ rxin Dios ja bar quimolon wiꞌ quiꞌ, ejeꞌeꞌ tzꞌibtal chic quebiꞌ chilaꞌ chicaj. Ixcꞌo cꞌa chwach ja Dios arjaꞌ kꞌetol tzij pa kawiꞌ chi nimlaj kanojelal. Cꞌa triꞌ ixcꞌo wiꞌ chiquewach ja respíritu quixin ja winak ja utz netzꞌa̱t rmal ja Dios ja quiwilon chic ja totajem pro jun totajem ja ni majun ja maquita tzꞌakat tre. 
\v 24 Cꞌa chwach ja Jesús ixcꞌo wiꞌ, arjaꞌ cꞌo jun cꞌacꞌa chominem pa rukꞌaꞌ ja nokrcojbej chwach ja Dios. Cꞌa triꞌ ixcꞌo wiꞌ chwach rquiqꞌuel ja Jesús ja chicaxi utzcꞌa chi ncuytaji ja kil kamac. Jariꞌ quicꞌ totajem nsiqꞌuij chakij, ma caniꞌ ta rquiqꞌuel ja rAbel ojer ja xa rjil rcꞌaxel xsiqꞌuij trij ja Caín. 
\p 
\v 25 Rmalcꞌawaꞌ nojel ja xintzꞌibaj chewe riꞌ camic nbij chewe, tebanaꞌ cꞌa cuenta ewiꞌ, maxta ticowir ewiꞌ ewanma ixix chi matecꞌwaxaj ja rmajon rbixic ja Dios chewe camic. Ja raj Israel ojer ma xcajoꞌ ta quicꞌaxaj ja bix chique rmal ja tzijon cuqꞌuin waweꞌ chwachꞌulew in lawuloꞌ ban chique rmal, majun quitobej quiꞌ. Pior cꞌa ajoj wi matikajoꞌ nkacꞌaxaj ja nbix chake rmal ja ntzijonto kuqꞌuin chilaꞌ chicaj tewotakij chi más chi na lawuloꞌ ja xtiban na chake, majun nkatobej kiꞌ. 
\v 26 Ja tok tzijoni ja Dios chipan ariꞌ tiempo ojer ja rukul xusil ja rwachꞌulew. Pro ja camic quewaꞌ nbij chic riꞌ: —Jutij chi na nsil chi na jutij ja rwachꞌulew in ma ruyon ta rwachꞌulew pro nsil na ja caj chakajaꞌ, neꞌe. 
\v 27 —Jutij chic, neꞌe ja Dios, tibij cꞌa tzij ariꞌ chi xa nak ta ja cꞌo siltajic trij ja xa winakarsan jariꞌ xa nocꞌowi pro ja mta siltajic trij jariꞌ matocꞌowi. 
\v 28 Ja Dios arjaꞌ okrcojon pa rcuenta jun gobierno pro jun gobierno ja ni mta wiꞌ siltajic trij. Rmalcꞌariꞌ nbij chewe, kayaꞌaꞌ rukꞌij ja Dios in kamaltioxij tre chakajaꞌ pro kas rubey kabanaꞌ, caniꞌ nrajoꞌ chake chi nkaban ni ta quirwariꞌ nkaban, kabanaꞌ respetar in kaxbej kiꞌ chwach 
\v 29 como ja ryewal ja katataꞌ Dios caniꞌ jun nimlaj kꞌakꞌ ja congana camíc nuban. 
\c 13
\s * * * * * * * * * * 
\p 
\v 1 Wachꞌalal, ni tewajoꞌ wiꞌ ewiꞌ, maxta temestaj jutzꞌit. 
\v 2 Kas queꞌurkaj chewe ja quimajon rcanoxic ja bar newar wiꞌ, queꞌecꞌuluꞌ pon pa tak ewochoch. Queriꞌ nbij chewe como ecꞌoli ja quiyaꞌon posada chique ángel pro ni majun nak ta quinaben ja wi ángel ja queyaꞌ quiposada. 
\p 
\v 3 Quenataj jutzꞌit emwal ja kachꞌalal ja rumac Jesucristo ecꞌo pa tak cheꞌ. Ja cꞌa neban, tenaꞌaꞌ kaj ixix como caniꞌ ixix jun ixcꞌo cuqꞌuin chipan ja cheꞌ. Quenataj emwal chakajaꞌ ja majtajnak rbanic pokon chique. Ja neban, tenaꞌaꞌ kaj caniꞌ ixix jun ixcꞌo cuqꞌuin chipan ja rpokonal. 
\p 
\v 4 Canojel ta xtiqueban ta respetar jutzꞌit ja cꞌulbic. Maxta teban rij tak quewiꞌ ja rewixjayilal owi ewachajilal. Queriꞌ nbij chewe como ja Dios arjaꞌ nukꞌet na tzij chiquij ja rachiꞌiꞌ in ixokiꞌ ja nemacuni, nukꞌet na tzij chawij wi natoc ruqꞌuin jun wi ma awixjayil ta owi ma awachajil ta. 
\p 
\v 5 Maxta congana tel ecꞌuꞌx trij ja pwok, ni quixquicot wiꞌ nojel tiempo chi cꞌoli owi mta cꞌol ewqꞌuin como ja Dios arjaꞌ nchajin awxin caniꞌ rbin can chipan ja rtzobal quewariꞌ: —Nij incꞌo wiꞌ awqꞌuin chijutij, ni macatnuyaꞌ can wiꞌ, neꞌe. 
\v 6 Rmalcꞌariꞌ tok ajoj quewaꞌ nkabij riꞌ: —Ja kajaw Dios arjaꞌ ntoꞌo wxin, ja winak xa nak ta ncajoꞌ nqueban chwe jariꞌ matinxbej wiꞌ chiquewach. Queriꞌ nkabij in nixtacꞌa jutzꞌit ta nkanaꞌ kiꞌ chi rbixic. 
\p 
\v 7 Quenataj emwal ja kachꞌalal ja xeꞌucꞌan ewxin, ejeꞌeꞌ quechꞌob chewach ja rtzobal Dios. Techꞌoboꞌ chi utz janiꞌ ja quicꞌaslemal tok xeqꞌuejeꞌ waweꞌ chwachꞌulew in caniꞌ queban congana yukeꞌ quecꞌuꞌx ruqꞌuin ja Dios ni ta quirwariꞌ neban ixix chakajaꞌ. 
\v 8 Ja Jesucristo arjaꞌ ni mta wiꞌ qꞌuextajic trij. Ja rnaꞌoj iwir niquirwariꞌ camic in niquirwariꞌ chwak cabij, ni mta wiꞌ qꞌuextajic trij. 
\v 9 Maxta chaka nojel ta tenimaj, maxta quixcꞌamarel rmal juleꞌ chic tijonem ja junwiꞌ chi na. Nojel ja nkatij jeꞌe ni majun nak ta rcꞌamonpi tre ja kanma ajoj nixtacꞌa cꞌo ta rcꞌamonto chique chakajaꞌ ja winak ja nquinimaj jariꞌ costumbre chi cꞌoli rcꞌamonto. Ma rmal ta cꞌa ja natij tok nqꞌuiyi ja rutzil pan awanma pro rumac ja rutzil ja nkacochij tre ja Dios. 
\p 
\v 10 Cꞌo jun altar kaxin pro ja sacerdote ja nesamaj chipan ja templo quixin ja raj Israel ejeꞌeꞌ mta quekꞌaꞌ tre chi nquetij ja sacrificio ja ntzujux chwach awaꞌ ja raltar riꞌ. 
\v 11 Ejeꞌeꞌ cꞌoli nqueban nquitzujuj jun chicop chwach ja Dios, nquecꞌol can ja rquiqꞌuel pro ja rcuerpo nlasaxel chipan ja tinamit, junwiꞌ nporox wiꞌ. Ja cꞌa rquiqꞌuel jariꞌ ncꞌamarel chipan ja santilaj lugar rmal ja lokꞌlaj sacerdote, triꞌ ntzujux wiꞌ chwach ja Dios rmal ja quil quemac ja winak. 
\v 12 Queriꞌ cꞌa ban tre ja Jesús chakajaꞌ lasaxel chipan ja tinamit, junwiꞌ xecamsax wiꞌ. Ja cꞌa rquiqꞌuel jariꞌ xchꞌachꞌojirsbej ja kanma ja rok winak chipan ja kil kamac. 
\v 13 Camic koꞌel cꞌa ajoj chakajaꞌ chipan ja tinamit, joꞌ ruqꞌuin ja Jesús, xa jun kabanaꞌ ruqꞌuin chipan ja rpokonal ja xutij tokoriꞌ tok yaꞌ ruqꞌuix chiquewach ja winak. 
\v 14 Ja cꞌa waweꞌ chwachꞌulew mta jun katinamit ja maquita nkꞌaxi pro cꞌo jun ja katinamit ja majaꞌn tiyaꞌ chake jariꞌ kayben camic. 
\v 15 Como jakon chic kabey rmal ja Jesucristo koꞌekaji cꞌa chwach ja Dios: —Nataꞌ Dios congana nmaltioxij chawe nojelal, xkocheꞌ ta tre, ja tariꞌ xtikabij tre nojel tiempo chi ryabexic rukꞌij. Jariꞌ junan neli ruqꞌuin jun sacrificio nkatzujuj tre. 
\v 16 Pro ni tecꞌutuꞌ wiꞌ ja rewutzil chakajaꞌ in queꞌetoꞌoꞌ ja cꞌo rjawaxic chique, maxta temestaj chi rbanic ja wariꞌ. Ja cꞌa tok neban ja wariꞌ junan neli ruqꞌuin jun sacrificio chakajaꞌ pro jun sacrificio ja congana nel rucꞌuꞌx ja Dios trij. 
\p 
\v 17 Queꞌenimaj ja kachꞌalal ja recꞌayon ewxin, teyaꞌaꞌ ewiꞌ pa quekꞌaꞌ. Ejeꞌeꞌ echajyon rxin ja rewanma in emwal nequijachaꞌ na cuenta chwach ja Dios. Queꞌenimaj utzcꞌa chi nequicoti chi ewucꞌaxic, maxta quebison emwal. Ni majun rcꞌamonto chewe ja wi xa pa bis neꞌeyaꞌ wiꞌ. 
\p 
\v 18 Wachꞌalal, ni tebanaꞌ wiꞌ jutzꞌit orar pa kacuenta. Chwach Dios nbij chewe chi ni majun nak ta ntiꞌon ta pa tak kanma, ja cꞌa nkajoꞌ ni ta ja wiꞌ xtikaban ja utz ntzꞌa̱t rmal ja Dios. 
\v 19 Congana nban recomendar chewe chi neban orar pa ncuenta utzcꞌa chi nintak chic jutij ewqꞌuin chanim. 
\s * * * * * * * * * * 
\p 
\v 20 Ja Dios arjaꞌ Yoꞌl quicotemal, arjaꞌ yico rxin ja kajaw Jesús chipan ja camíc. Ja Jesús arjaꞌ lokꞌlaj Pastor, arjaꞌ yukꞌul kaxin ja rok caniꞌ tak rcarnelo. Rmal ja rquiqꞌuel ja xutix chwach cruz chewiꞌ tok queriꞌ rbanon. Jariꞌ quicꞌ yaꞌbal rseguro ja chominem ja ni mta wiꞌ qꞌuisic trij ja chomarsax rmal ja Dios. 
\v 21 Dios ta cꞌa xtiyoꞌ chewe chi nnoji nojel rwach ja rutzil pa tak ewanma utzcꞌa chi nixcowini neban ja rvoluntad, xtuyaꞌ ta chewe chi nsamaji ja Jesucristo pa tak ewanma chi rwinakarsaxic jeꞌe nak ja nel rucꞌuꞌx trij. Ni ta xtiyaꞌ wiꞌ rukꞌij camic, chwak in chijutij. Amén. 
\p 
\v 22 Wachꞌalal, anin nban recomendar chewe, kas tiqꞌuejeꞌe ja repaciencia chi rcꞌaxaxic ja paxbanem ja ntzꞌiban chipan awaꞌ carta riꞌ como xa ma nim ta. 
\v 23 In jun chic nbij chewe, ja kachꞌalal Timoteo arjaꞌ elnakpi chic libre camic. Ja cꞌa wi xturkaji chanim can ncꞌamel ja tok xquinbe ewqꞌuin. 
\p 
\v 24 Teyaꞌaꞌ cꞌa rutzil quewach canojel ja recꞌayon ewxin. Teyaꞌaꞌ rutzil quewach canojel ja juleꞌ chic ja re tinamit xin Dios. Ja kachꞌalal ja recꞌo pa tak tinamit ja cꞌo pa rcuenta Italia ejeꞌeꞌ nquetakel rutzil ewach ixix chakajaꞌ. 
\p 
\v 25 Dios ta cꞌa xtuyaꞌ rutzil pan ewiꞌ ewanojelal. Amén.