\id 1PE Western Tzutujil [tzt] NT (Guatemala) -2009 bd. 
\h 1 PEDRO 
\toc1 1 Pedro 
\toc2 1 Pe
\mt 1 PEDRO
\c 1
\s 
\p
\v 1 Anin in Pedro in apóstol rxin ja Jesucristo. Anin ntzꞌibaj ja carta riꞌ in ntakel ewqꞌuin ja rixsalunel chipan ja retinamit jeꞌe ja rixcꞌo pa tak tinamit ja cꞌo pa rcuenta Ponto, pa rcuenta Galacia, pa rcuenta Capadocia, pa rcuenta Asia in pa rcuenta Bitinia.
\v 2 Ixix ixchaꞌon rmal ja katataꞌ Dios, ix rxin chic como queriꞌ ja rchominto ojer, xixcoj pa rukꞌaꞌ rmal ja rEspíritu Santo. Queriꞌ ban chewe utzcꞌa chi nenimaj ja Jesucristo utzcꞌa chakajaꞌ chi nixchꞌachꞌojirsax chipan ja rewil emac rmal ja rquiqꞌuel. Xtibe ta pa nim checojol ja rutzil ja nsipaj ja Dios in xtiyaꞌ ta jun nimlaj quicotemal pa tak ewanma.
\s * * * * * * * * * *
\p
\v 3 Kayaꞌaꞌ rukꞌij ja Dios, arjaꞌ Tatixel rxin ja kajaw Jesucristo, congana xpokonaj kawach, xuyaꞌ chake chi xokalax chic jutij. Ja Jesucristo arjaꞌ yataj tre rmal ja Dios chi cꞌastaj rwach chiquicojol ja camnakiꞌ chewiꞌ tok yataj chake chi xokalax chic jutij. Rmalariꞌ tok ni maticapuj wiꞌ kacꞌuꞌx chi raybexic ja rutzil xin Dios
\v 4 in rmalariꞌ chakajaꞌ tok cꞌo jun herencia ewxin chilaꞌ chicaj, jun herencia chajin rmal ja Dios. Jariꞌ herencia ni majun nak ta falta tre, matitzabukari, mta qꞌuisic trij.
\v 5 Ja herencia ewxin ixix ja yukul ecꞌuꞌx ruqꞌuin ja Jesucristo in rmal ja yukulbal ecꞌuꞌx tok Dios nixrchajij chi utz. Arjaꞌ ni matuyaꞌ can wiꞌ ja rechajixic in nerilaꞌ na jun kꞌij ja tok xquixtotaji chijutij. Ja retoꞌic chomarsan chic rmal ja Dios jariꞌ nkꞌalajin na ja tok xterilaꞌ ja qꞌuisbal kꞌij xin rwachꞌulew.
\p
\v 6 Rmalariꞌ tok ixix camic congana nixquicoti masqui nixbison na jun tiempo rmal ja rpokonal como qꞌuiy rwach ja npi chewij.
\v 7 Pro ma chaka ta nixkꞌax chipan ja rpokonal, cꞌoli rcꞌamonto chewe. Chipan ja rpokonal nixcꞌambajax wiꞌ janiꞌ ja yukulbal ecꞌuꞌx ruqꞌuin ja Jesucristo. Ja tok nixkꞌax chipan ja rpokonal quewaꞌ rbanic riꞌ caniꞌ nba̱n tre ja oro como ja oro nya̱ꞌ pa kꞌakꞌ chi ncꞌat can ja ma oro ta cꞌo trij. Ja puro oro janila nim rjil pro xa cꞌo yojtajic trij. Ja cꞌa yukulbal ecꞌuꞌx ruqꞌuin ja Jesucristo más chi na vale chwach ja oro. Queriꞌ rbanic ja rpokonal ncowirsaj ja yukulbal ecꞌuꞌx utzcꞌa tok xtipi chic jutij ja Jesucristo rmal cꞌa ja yukulbal ecꞌuꞌx nquicoti ja Dios chewij in nya̱ꞌ ekꞌij rmal chakajaꞌ.
\p
\v 8 Ixix janila newajoꞌ ja Jesucristo masqui ma etzꞌaton ta rwach in ni yukul wiꞌ ecꞌuꞌx ruqꞌuin camic. Rmalariꞌ tok janila nixquicoti camic, yatajnak chewe ja nimlaj quicotemal xin chilaꞌ chicaj.
\v 9 In rmal ja yukulbal ecꞌuꞌx ruqꞌuin ja Jesucristo chewiꞌ tok ewilon ja totajem xin Dios.
\p
\v 10 Ja totajem xin Dios ja rewilon jariꞌ ja rutzil ja rtzujunto ja Dios ojer in tzꞌibtal can cumal ja rojer tak profeta. Ejeꞌeꞌ congana quecoj quiꞌ pa chꞌaꞌoj chi rchꞌobic nak rbanic.
\v 11 Ja rEspíritu xin Cristo arjaꞌ xuchꞌob pa quewiꞌ pa tak canma chi cꞌo jun Toꞌonel ja npi na, ja cꞌa rejeꞌeꞌ congana nquetij quekꞌij chi ncotakij nak chi winakil ja npeti in nak tiempo ja npi wiꞌ. Como ja rEspíritu arjaꞌ nbij chique chi ja Cristo xturtijaꞌ na rpokonal in nya̱ꞌ chi na rukꞌij ja tok xticꞌastaj rwach. Jariꞌ chꞌobtaj chiquewach ja tok majaꞌn tipeti ja Cristo.
\v 12 Ja Dios arjaꞌ xkꞌalasaj chiquewach chi cꞌa pa katiempo ajoj nuryataj wiꞌ chijutij ja totajem ja yaꞌto rbixic cumal, ma pa quitiempo ta ejeꞌeꞌ. Jariꞌ totajem ecꞌwaxan chic nak rbanic como bin chic chewe cumal ja kachꞌalal ja xeyoꞌ rbixic chewe ja utzlaj tzij xin Jesucristo. Ja rEspíritu Santo ja takonto chilaꞌ chicaj arjaꞌ cꞌayon quixin chi rbixic. Jariꞌ totajem ja ángel congana nquiyarij nquechꞌob nak rbanic.
\s * * * * * * * * * *
\p
\v 13 Rmalcꞌariꞌ tok nbij chewe, quixcꞌascꞌoti, bien techꞌoboꞌ ja neban. Nojel ta ecꞌuꞌx nojel ta ewanma newaybej ja rutzil xin Dios ja xtiyataj na chewe ja tok xtipi chic jutij ja Jesucristo.
\v 14 Como ix alcꞌwalaxelaꞌ rxin ja Dios tenimaj ja nbix chewe rmal chi neban. Maxta teban chic ja ma utz ta jeꞌe ja xel ecꞌuꞌx trij caniꞌ xebanto ja tok majaꞌn tichꞌobtaj emwal ja utzlaj tzij xin Jesucristo.
\v 15 Ja nrajoꞌ, jun chꞌajchꞌojlaj anma newcꞌaj nojel tiempo. Como ja Dios arjaꞌ xixrsiqꞌuij chi xixoc ralcꞌwal como arjaꞌ ni rcꞌan wiꞌ jun chꞌajchꞌojlaj anma chewiꞌ tok rjawaxic chi newcꞌaj ixix chakajaꞌ jun chꞌajchꞌojlaj anma.
\v 16 Caniꞌ tzꞌibtal can chipan ja rtzobal Dios quewaꞌ nbij ja Dios riꞌ: —Como anin wcꞌan jun chꞌajchꞌojlaj anma rmalariꞌ tok nbij chewe, tewcꞌaj cꞌa ixix jun chꞌajchꞌojlaj anma chakajaꞌ, neꞌe.
\p
\v 17 Ja tok neban oración bien nnataj chewe chi ja Dios arjaꞌ Tatixel. Arjaꞌ kꞌetol tzij pa kawiꞌ chi nimlaj kanojelal, nuyaꞌ cuenta tre ja nkaban wi utz owi ma utz ta. Arjaꞌ ma jun ta utz nutzꞌat in ma jun ta itzel. Rmalcꞌariꞌ tok nbij chewe, rjawaxic chi nexbej ewiꞌ chwach ja Dios jaruꞌ pa tiempo nebanel waweꞌ chwachꞌulew.
\v 18 Ixix cꞌoli ja xixlokꞌbexi tok xixtotaj chipan ja juleꞌ costumbre ja mta noc wiꞌ ja cꞌutun can chewach cumal ja rewatiꞌt emamaꞌ. Pro bien ewotak chi ma ja ta xixlokꞌbexi ja xa cꞌo qꞌuisic trij caniꞌ tre oro caniꞌ tre plata.
\v 19 Pro ja lokꞌlaj rquiqꞌuel ja Cristo jariꞌ xixlokꞌbexi. Ja cꞌa Cristo arjaꞌ camsaxi, ban sacrificar ja caniꞌ nba̱n tre jun carnelo ja ni majun nak ta falta tre.
\v 20 Ja Dios tok majaꞌn tiwinakarsaj ja rwachꞌulew arjaꞌ rchominto chic chi nba̱n na sacrificar ja Cristo. Pro jariꞌ ma xbantaj ta chanim, cꞌa jawaꞌ xurbantaji chipan ja qꞌuisbal tiempo ja rokcꞌo wiꞌ riꞌ. Ja cꞌariꞌ xuban ja Dios pan ecuenta.
\v 21 Rmal ja Cristo chewiꞌ tok yukul chic ecꞌuꞌx ruqꞌuin ja Dios. Jariꞌ mismo Dios ja xuyaꞌ tre ja Cristo chi cꞌastaji chiquicojol ja camnakiꞌ in xuyaꞌ tre chakajaꞌ chi congana nim chic rukꞌij. Rmalcꞌariꞌ tok ruqꞌuin ja Dios yukul wiꞌ ecꞌuꞌx, rmalcꞌariꞌ chakajaꞌ tok ewotak chi ja Dios arjaꞌ nyowi ja rutzil ja rewayben.
\p
\v 22 Ja rEspíritu Santo arjaꞌ xuyaꞌ chewe chi xenimaj ja utzlaj tzij xin Jesucristo jariꞌ utzlaj tzij xechꞌachꞌojirsbej ja rewanma. Queriꞌ xeban in rmalariꞌ tok nixcowin chic neꞌewajoꞌ ja kachꞌalal in ma chi echiꞌ ta cꞌo wiꞌ tok neꞌewajoꞌ. Rmalcꞌariꞌ nbij chewe, tewajoꞌ ewiꞌ pro nojel ecꞌuꞌx nojel ewanma.
\v 23 Ixix ixalaxnak chic jutij pro ja cꞌacꞌa cꞌaslemal ewcꞌan camic jariꞌ mta qꞌuisic trij, ma junan ta ruqꞌuin ja cꞌaslemal ja yatajnak chewe cumal ja retataꞌ eteꞌ como jariꞌ xa cꞌo camíc trij. Rmal cꞌa ja rtzobal Dios tok ixalaxnak chic jutij. Ja cꞌa rtzobal Dios jariꞌ ma camnak ta rwach, ni cꞌo wiꞌ chijutij.
\v 24 Caniꞌ tzꞌibtal can quewariꞌ: —Ja quicꞌaslemal ja winak xa caniꞌ kꞌayis nchakiji, ja nyabex jeꞌe quekꞌij xa caniꞌ rusiꞌj kꞌayis tok nocꞌo rukꞌij ntiltoꞌi.
\v 25 Pro ja rtzobal ja kajaw Dios jariꞌ mta qꞌuisic trij, neꞌe. Ja cꞌariꞌ rtzobal Dios xa junan ruqꞌuin ja utzlaj tzij xin Jesucristo ja yatajnak chic rbixic chewe.
\c 2 
\p 
\v 1 Rmalcꞌariꞌ tok nbij chewe, teyaꞌaꞌ can jutzꞌit nojel rwach ja ritzelal. Maxta teban engaño, maxta teban cacaꞌ epalaj, maxta tiquiakiri ja rewanma, maxta teban molon tak tzij. 
\v 2 Caniꞌ nuban jun ti yaquiꞌ kas nyarij rutzꞌum ja ruteꞌ quirtariꞌ chewe ixix chakajaꞌ kas tel ecꞌuꞌx trij ja chꞌajchꞌojlaj rtzobal Dios como jariꞌ majun engaño rcꞌan. Ja wi queriꞌ xteban jariꞌ nixcowir chipan ja rtzobal Dios in nixtotaji chijutij. 
\v 3 Quirtariꞌ xteban como enaꞌon chic janiꞌ rnaꞌoj ja kajaw Jesucristo chi arjaꞌ ni utz wiꞌ. 
\s * * * * * * * * * * 
\p 
\v 4 In kꞌij kꞌij tiyukeꞌ más ecꞌuꞌx ruqꞌuin ja Jesucristo ja Yoꞌl cꞌaslemal. Arjaꞌ ocnak caniꞌ jun abaj ja cojon rmal ja Dios chi rbanic jun templo espiritual. Ja winak xa mta quigana ruqꞌuin pro arjaꞌ chaꞌon rmal ja Dios in congana nim rukꞌij ntzꞌa̱t rmal. In ixix chakajaꞌ ixocnak ix caniꞌ juleꞌ abaj ixcojon rmal ja Dios chi rbanic ja templo. 
\v 5 Ix sacerdote rxin ja Dios jariꞌ samaj yatajnak chewe utzcꞌa chi cꞌoli sacrificio ja netzujuj chwach ja Dios. Ja sacrificio netzujuj chwach jariꞌ ja rewutzil ja nwinakarsax pa tak ewanma rmal ja rEspíritu Santo. Jariꞌ netzujuj chwach pa rubiꞌ ja Jesucristo in rmalariꞌ tok utz nutzꞌat ja sacrificio ja netzujuj in nucꞌam chewe. 
\v 6 Caniꞌ tzꞌibtal can chipan ja rtzobal Dios quewaꞌ nbij ja Dios ja ncꞌambex tzij riꞌ: —Anin cꞌo jun lokꞌlaj abaj ja nmajon rcojic chi rbanic ja templo wxin. Chipan ja tinamit Sión ncoj wiꞌ ja rabaj. Jariꞌ abaj anin xinchaꞌowi, congana nim rukꞌij. Ja winak ja nyukeꞌ quecꞌuꞌx ruqꞌuin ejeꞌeꞌ ma xtiqueyaꞌ ta queqꞌuix pro nquewil na ja rutzil ja cayben. Queriꞌ ja tzꞌibtal can. 
\v 7 Ja chewe ixix ja yukul ecꞌuꞌx ruqꞌuin ja Jesucristo arjaꞌ congana nim rukꞌij. Pro ja chique ja winak ja maticajoꞌ nyukeꞌ quecꞌuꞌx ruqꞌuin ejeꞌeꞌ e junan cuqꞌuin ja banol tak jay caniꞌ tzꞌibtal can chic chipan ja rtzobal Dios ja ncꞌambex tzij quewariꞌ: —Ja rabaj ja mta quigana ja banol tak jay ruqꞌuin nijawariꞌ abaj cojon rmal ja Dios chi rbanic ja jay in más na nim rukꞌij ja rabaj como arjaꞌ nchapowi ja resquinaꞌil ja jay. 
\v 8 In chakajaꞌ tzꞌibtal can ja ncꞌambex tzij quewariꞌ: —Jariꞌ abaj ja winak nquechokꞌ cakan chwach, nepaji in nekaj chipan jun nimlaj rpokonal rmal, neꞌe. Queriꞌ nqueban ja winak ja maticajoꞌ nquinimaj ja rtzobal Dios, nekaj chipan jun nimlaj rpokonal jariꞌ rchominto ja Dios. 
\p 
\v 9 Pro ja rixix ix tinamit rxin ja Dios, ixchaꞌon rmal. Arjaꞌ xixrpartiꞌij chi neban ja rsamaj. Ix sacerdote rxin ja nimlaj Rey ja cꞌo chilaꞌ chicaj. Jariꞌ samaj yatajnak chewe utzcꞌa chi neyaꞌ rbixic ja nimlaj samaj ja rbanon ja katataꞌ Dios. Kas turkaj chewe chi arjaꞌ lasan ewxin chipan ja kꞌekumal in camic ixrcojon chic pa rcuenta arjaꞌ pa jun nimlaj sakil. 
\v 10 Ja nabey ma ix rtinamit ta ja Dios pro ja camic ix rtinamit chic. Ja nabey majun nak ta xewil ja xpokonaj ta ewach pro ja camic xewil ja Dios chi arjaꞌ xpokonaj ewach. 
\s * * * * * * * * * * 
\p 
\v 11 Chakꞌlaj wachꞌalal, kas turkaj chewe chi xa ok kꞌaxel chwachꞌulew, ma waweꞌ ta ja mero katinamit. Rmalcꞌariꞌ nbij chewe, maxta teyaꞌ lugar tre ja ritzel tak yarinem chi xquixrucꞌaj ta como ja nuban ja ritzel tak yarinem xa nchꞌojin ruqꞌuin ja rewanma, nrajoꞌ nixruchꞌec. 
\v 12 Ja neban, tecꞌutuꞌ ja rewutzil chiquewach ja winak ja ma cotak ta rwach ja Dios. Ejeꞌeꞌ xa nquemol tzij chewij camic in nquibij chewe chi ix itzel tak winak pro nquetzꞌat na ja rutzil neban in rmalariꞌ ja tok nqueyaꞌ na rukꞌij ja Dios tok xturbanaꞌ jun nimlaj samaj chiquicojol. 
\p 
\v 13 Tenimaj ja kꞌetbal tak tzij nojelal como ja kajaw Dios queriꞌ nrajoꞌ chewe chi nenimaj. Caniꞌ tre ja nimlaj rey tenimaj como arjaꞌ más nim ja kꞌetbaltzij cꞌo pa rukꞌaꞌ. 
\v 14 In caniꞌ chique gobernador chakajaꞌ queꞌenimaj como ejeꞌeꞌ ecojon pa kꞌetbal tak tzij chi nequeban castigar ja winak ja nqueban ja ritzelal pro utz nqueban chique ja winak ja banol tak utzil. 
\v 15 Quewaꞌ nrajoꞌ ja Dios chewe riꞌ chi neban ja rutzil utzcꞌa chi nquekꞌil pa quechiꞌ ja winak ja ma e chꞌobolic tak winak ta tok nquijoloj jeꞌe tzij chewij. 
\p 
\v 16 Ixix ix libre pa quekꞌaꞌ ja winak pro ma ruqꞌuin ta ja rix libre chaka ta nojel ta ja ma utz ta xteban. Pro ja neban, tenimaj ja Dios como pa rukꞌaꞌ chic ixcꞌo wiꞌ camic. 
\v 17 Queꞌebanaꞌ respetar ja winak canojelal. Queꞌewajoꞌ ja kachꞌalal. Texbej ewiꞌ chwach ja Dios. Tebanaꞌ respetar ja nimlaj rey. 
\s * * * * * * * * * * 
\p 
\v 18 Ja wi cꞌol apatrón tabanaꞌ respetar xa nak ta wi utzlaj winak owi xa cꞌaꞌn. 
\v 19 Ja tok nba̱n pokon chewe wi ma pan ewil ta, wi nurkaj chewe chi cꞌoli ja Dios ewqꞌuin in necochꞌ, ja wi queriꞌ neban jariꞌ utz. 
\v 20 Ja cꞌa wi pan ewil tok nba̱n pokon chewe wi necochꞌ in wi cꞌol epaciencia pro jariꞌ ma vale ta chwach ja Dios. Pro wi rumac ja rutzil neban tok nba̱n pokon chewe ja wi necochꞌ in wi cꞌol epaciencia jariꞌ utz nixrutzꞌat ja Dios. 
\v 21 Xcꞌa rmalariꞌ tok xixsiqꞌuix rmal ja Dios chi neban ja rutzil in necochꞌ ja rpokonal como queriꞌ xuban ja Cristo chakajaꞌ, arjaꞌ xutij ja rpokonal pan ecuenta. Queriꞌ xuban, xuyaꞌ can jun ejemplo chi queriꞌ neban ixix ja caniꞌ xuban arjaꞌ. 
\v 22 Arjaꞌ ni majun ril rumac nixtacꞌa cꞌo ta jun xuban ta engañar. 
\v 23 Ja tok cꞌoli ja pokonlaj tak tzij bix tre ma xuyaꞌ ta rjil rcꞌaxel. Ja tok ban pokon tre cumal ja winak arjaꞌ ma xcꞌutuj ta chi npi rcꞌayewal chiquij. Nojel ja ban tre xujach pa rukꞌaꞌ ja Dios como bien rotak chi ja Dios arjaꞌ utzlaj kꞌetoj tzij ja nuban. 
\v 24 Ja Cristo arjaꞌ xrijkaj ja kil kamac chwach cruz. Queriꞌ xuban utzcꞌa chi nokel libre pa rukꞌaꞌ ja il mac in matikaban chic, utzil chic nrajoꞌ chake chi nkaban. Arjaꞌ soctaj pan ecuenta rmalcꞌariꞌ tok xixtzuri. 
\v 25 Ja cꞌa rixix nabey ix caniꞌ juleꞌ tak carnelo ja retzaknak pro ja camic ixcꞌo chic pa rukꞌaꞌ ja Jesucristo, arjaꞌ chic nyukꞌun ewxin, arjaꞌ nixchajini. 
\c 3
\s * * * * * * * * * * 
\p 
\v 1-2 In ixix chakajaꞌ ja rix ixokiꞌ queꞌenimaj ja rewachajilal. Como ecꞌoli chewe ja rewachajilal ma quiniman ta ja rtzobal Dios pro ja tok nixquetzꞌat chi ewcꞌan jun utzlaj anma in cꞌol erespeto xa rmalariꞌ tok xtiqueqꞌuex ja quinaꞌoj in xtiquinimaj ja rtzobal Dios in ma kas ta rjawaxic chakajaꞌ chi xqueꞌepaxbaj ta. 
\v 3 Maxta congana tel ecꞌuꞌx trij ja newekbej ewiꞌ chwach ja newcꞌaj jun utzlaj anma. Maxta jaꞌ tel más ecꞌuꞌx trij ja rbanic rpachꞌuxic ewiꞌ owi trij nakun jeꞌe caniꞌ tre kꞌop kꞌakꞌaꞌl ja oro ocnak owi trij tziak ja nimak rjil, jariꞌ xa nkꞌaxi. 
\v 4 Pro ja ta neban, jun utzlaj anma newcꞌaj, jariꞌ más na buena in ni matikꞌax wiꞌ, jariꞌ más na vale nutzꞌat ja Dios. 
\v 5 Queriꞌ quicꞌaslemal ja rixokiꞌ ojer ja re xin Dios ja yukul quecꞌuꞌx ruqꞌuin, ejeꞌeꞌ cucꞌaj jun utzlaj anma, xequinimaj ja quichajilal. 
\v 6 Queriꞌ rcꞌaslemal ja Sara, arjaꞌ xnimaj ja rAbraham ja rchajil, —Wajaw, neꞌ tre, jariꞌ xbanbej respetar. Ja cꞌa rixix ix caniꞌ ral ja Sara ja wi utz ja recꞌaslemal in wi matexbej ewiꞌ chwach ja xa nak ta xtipi chewij. 
\p 
\v 7 In ixix chakajaꞌ ja rix achiꞌiꞌ lokꞌ queꞌenaꞌaꞌ ja rewixjayilal como ejeꞌeꞌ ma e junan ta ewqꞌuin. In chakajaꞌ junan xecochij cuqꞌuin ja rewixjayilal ja utzlaj cꞌaslemal ja mta qꞌuisic trij ja sipax chewe rmal ja Dios chewiꞌ tok rjawaxic chi lokꞌ neꞌenaꞌ. Quirtariꞌ neban utzcꞌa chi ja Dios ncꞌaxaj ja roración neban. 
\s * * * * * * * * * * 
\p 
\v 8 Camic ja nwajoꞌ chewe ewanojelal xta jun neban, xta jun enaꞌoj xta jun ewanma. Titiꞌon chewe wi cꞌo jun kachꞌalal nak xkajbej. Tewajoꞌ ewiꞌ como ewachꞌalal ewiꞌ, tipokonaj riꞌ ewach, maxta teyaꞌ ekꞌij. 
\v 9 Ja tok nba̱n itzel chewe owi tok cꞌoli ja pokonlaj tak tzij nbix chewe maxta teyaꞌ rjil rcꞌaxel. Ja neban, tebanaꞌ ja rutzil. Ja Dios arjaꞌ xixrsiqꞌuij chi ix banol tak utzil. Queriꞌ xuban utzcꞌa chi newilaꞌ na ja rutzil ixix chakajaꞌ rmalcꞌariꞌ tok nbij chewe, ni tebanaꞌ wiꞌ ja rutzil. 
\v 10 Caniꞌ tzꞌibtal can chipan ja rtzobal Dios quewariꞌ: —Ja winak ja cꞌo quigana chi necꞌaseꞌ na más in ncajoꞌ nquewil ja utzlaj tak tiempo rjawaxic chi matiquibij itzel tak tzij in rjawaxic chakajaꞌ chi matiquetzꞌak tzij. 
\v 11 Ja rjawaxic chi nqueban quewariꞌ, nqueyaꞌ can ja ritzelal in nqueban ja rutzil, rjawaxic chi nquechꞌob rij rwach nak nqueban utzcꞌa chi mta sícꞌ chꞌaꞌoj nqueban. 
\v 12 Ja cꞌa kajaw Dios arjaꞌ nerchajij ja nebanowi ja rutzil, arjaꞌ ncꞌaxaj ja roración ja nqueban pro xa itzel nerutzꞌat ja nebanowi ja ritzelal. Queriꞌ ja tzꞌibtal can. 
\p 
\v 13 Majun xtibano pokon chewe ja wi nij utzil wiꞌ ja xteban. 
\v 14 Owi cꞌoli ja pokon nba̱n chewe rmal ja rutzil neban pro jariꞌ cꞌoli rcꞌamonto chewe. Ma texbej ta ewiꞌ chiquewach ja winak ja ncajoꞌ nqueban pokon chewe in ma quixoclaꞌ ta il chakajaꞌ. 
\v 15 Ja neban, teyaꞌaꞌ rukꞌij ja kajaw Dios pa tak ewanma. Techꞌoboꞌ rij rwach nak rbanic nojel ja rcꞌamonto chewe ja Jesucristo ja bar yukul wiꞌ ecꞌuꞌx. Quirtariꞌ neban utzcꞌa chi nixcowini nechꞌob chiquewach chakajaꞌ ja winak xa nak ta necꞌaxan razón chewe. Pro pan utzil techꞌoboꞌ chiquewach, maxta xa teyabej ekꞌij. 
\v 16 Maxta cꞌoli teban ja ma utz ta ja xa ntiꞌon ewanma rmal. Como ecꞌoli winak ja nquibij chewe chi: —Xa itzel quicꞌaslemal ja winak ja neniman rxin ja Cristo, necheꞌe, pro ja wi mta ja ma utz ta ebanon ejeꞌeꞌ nqueyaꞌ na queqꞌuix ja tok xtikꞌalajini chi ma katzij ta ja quibij chewe. 
\v 17 Ja tok nba̱n pokon chewe xa rmal ja rutzil ja neban pro wi queriꞌ rvoluntad ja Dios chewe jariꞌ cꞌoli noc wiꞌ ja netij ja rpokonal pro wi xa pan ewil jariꞌ mta noc wiꞌ. 
\p 
\v 18 Ja Cristo arjaꞌ ban pokon tre chakajaꞌ, camsax rmal ja kil kamac, xa jutij cami, mchita ja camíc trij. Arjaꞌ ni majun ril rumac pro cam pa kacuenta ja rok ajꞌil ok ajmaquiꞌ. Ja tok queriꞌ xuban jariꞌ xjakbej kabey chikawach chi nokekaj na ruqꞌuin ja Dios. Arjaꞌ camsaxi como winak pro cꞌastaji como espíritu. 
\v 19 In queriꞌ xuban como espíritu be cuqꞌuin ja juleꞌ espíritu ja reꞌocnak preso, xeryaꞌaꞌ rbixic ja utzlaj tzij chique. 
\v 20 Ejeꞌeꞌ riꞌ espíritu quixin ja winak ja ma xquinimaj ta ja Dios ojer pa rtiempo ja Noé. Treriꞌ tiempo ja Dios congana xeraybej na chi nnimax cumal tokoriꞌ tok majtajnak rbanic ja nimlaj lancha rmal ja Noé. Xa ma e jaruꞌ ta ja xeꞌoc chipan ja lancha, xa e waxakiꞌ ja xeꞌoc chipan, ejeꞌeꞌ riꞌ xekꞌax parwiꞌ ja yaꞌ xetotaji. 
\v 21 In queriꞌ cꞌa chake ajoj camic chakajaꞌ como pa yaꞌ nokban wiꞌ bautizar in noktotaji. Ja bautismo ma acuerpo ta nuchꞌaj pro ja rubey tok natban bautizar jariꞌ nacꞌutbej jun chꞌajchꞌojlaj anma tre ja Dios. Queriꞌ nkaban noktotaji in xa rmal ja rcꞌastajic ja Jesucristo chewiꞌ tok noktotaji. 
\v 22 Arjaꞌ cꞌastaji, joteꞌ chilaꞌ chicaj in camic cꞌo pa riquikꞌaꞌ ja Dios. Arjaꞌ cꞌo rukꞌaꞌ chique ja ángel, cꞌo rukꞌaꞌ chique espíritu, majun kꞌetbaltzij ja maquita cꞌo rukꞌaꞌ tre. 
\c 4 
\s * * * * * * * * * * 
\p 
\v 1 Ja Cristo arjaꞌ como winak xutij ja rpokonal kumal. In queriꞌ ta cꞌa neban ixix chakajaꞌ ja caniꞌ xuban ja Jesucristo, techomij ewiꞌ utzcꞌa chi nixcowini necochꞌ ja rpokonal ja npi chewij. Ja wi atijon ja rpokonal waweꞌ chwachꞌulew ja npi chawij rmal ja Jesucristo jariꞌ matayaꞌ chic awiꞌ tre ja il mac chi xcatrumel chi ta. 
\v 2 Ma ja chi ta nbe acꞌuꞌx trij ja chaka nojel ta nayarij pro ja nrajoꞌ ja Dios chawe chi naban nijawariꞌ naban jaruꞌ pa tiempo xcatqꞌuejeꞌ chwachꞌulew. 
\v 3 Ja winak ja ma cotak ta rwach ja Dios ejeꞌeꞌ qꞌuiy rwach ja ritzelal nel quecꞌuꞌx trij in queriꞌ xebanto ixix chakajaꞌ. Congana qꞌuixbal xebanto in tok xeban nimak tak waꞌim xixchꞌujar rmal ja tijoj yaꞌ, xerak echiꞌ, xeban sícꞌ chꞌaꞌoj in chakajaꞌ más na lawuloꞌ xeban xixxuqueꞌ chiquewach cachbal tak winak in chwach rachbal tak nakun. Pro jariꞌ matel chic ecꞌuꞌx trij camic, itzel chic netzꞌat. 
\v 4 Pro ja camic junwiꞌ chic nixtzꞌati cumal ja winak como ma ix cachbil chi ta chi rbanic ja ritzelal rmalcꞌariꞌ tok nquemol tzij chewij. 
\v 5 Pro nerilaꞌ na jun kꞌij ja tok xtiquejach na cuenta chwach ja Dios, arjaꞌ rchomin chic riꞌ chi nukꞌet tzij chiquij ja winak chi ecꞌasli chi e camnakiꞌ. 
\v 6 Como ja utzlaj tzij xin Jesucristo yataj rbixic chique chakajaꞌ ja re camnakiꞌ. Queriꞌ bantaji utzcꞌa chi jariꞌ nkꞌetbex tzij chiquij como winak pro nyataj lugar chique chakajaꞌ chi necꞌaseꞌ na ruqꞌuin ja Dios rmal ja rEspíritu. 
\p 
\v 7 Nnakajinto ja qꞌuisbal rwachꞌulew rmalariꞌ tok nbij chewe, techꞌoboꞌ chi utz ja neban, quixcꞌascꞌoti, ni ta neban wiꞌ ja roración. 
\v 8 Ja más rjawaxic congana tewajoꞌ ewiꞌ. Ja tok newajoꞌ ewiꞌ qꞌuiy ja nixcowini necuy rmal. 
\v 9 Ja tok cꞌo jun chewe tok ncꞌutuj rposada nojel ecꞌuꞌx teyaꞌaꞌ. 
\v 10 Cꞌoli ja yatajnak chewe chejujunal chi nixcowini neban ja recochin tre ja Dios. Ja yatajnak chewe ja tariꞌ netobej ewiꞌ chibil tak ewiꞌ. Qꞌuiy rwach ja yatajnak chewe ja recochin tre ja Dios, ja cꞌa wi ma quixnimari chi rbanic jariꞌ ix utzlaj tak ajsamajelaꞌ rxin ja Dios. 
\v 11 Ecꞌoli chewe quicochin tre ja Dios chi necowini nqueyaꞌ mensaje, kas turkaj chique chi rtzobal Dios ja nquecoj, ma quinaꞌoj ta winak ja nquecoj. In chakajaꞌ ecꞌoli ja yatajnak chique chi necowini nequetoꞌ winak, kas turkaj chique chi ja Dios arjaꞌ yoyon chique chi necowini nequetoꞌ. Rmal ja Jesucristo chewiꞌ tok qꞌuiy rwach ja yatajnak chewe ja recochin tre ja Dios, tebanaꞌ cꞌa nojelal chi nyabex rukꞌij. Ni ta xtiyaꞌ wiꞌ rukꞌij, ni ta xtinatax wiꞌ chi pa rukꞌaꞌ cꞌo wiꞌ nojelal camic, chwak in chijutij. Amén. 
\s * * * * * * * * * * 
\p 
\v 12 Chakꞌlaj wachꞌalal, ixcꞌo chipan ja nimlaj rpokonal utzcꞌa chi ncꞌambajaxi janiꞌ ja yukulbal ecꞌuꞌx ruqꞌuin ja Jesucristo. Maxta quewaꞌ techꞌob kaj pa tak ewanma riꞌ: —¿Nak tre cꞌawaꞌ ja tok nba̱n pokon chake? maxta quixcheꞌe. Jariꞌ ni kaxin wiꞌ. 
\v 13 Ja neban, quixquicoti rmal ja yatajnak chewe chi xa jun neban ruqꞌuin ja Cristo chi rtijic ja rpokonal. Ja wi queriꞌ neban jariꞌ más chi na nixquicoti chakajaꞌ ja tok xtipi chic jutij ja Jesucristo tokoriꞌ tok nkꞌalajin na chi congana nim rukꞌij. 
\v 14 Ja wi rmal ja yukulbal ecꞌuꞌx ruqꞌuin ja Cristo tok nixtzꞌuji in tok nixyokꞌi jariꞌ cꞌoli rcꞌamonto chewe. Ja wi queriꞌ nba̱n chewe jariꞌ ni kꞌalaj wiꞌ chi cꞌol ewqꞌuin ja lokꞌlaj Espíritu Santo xin Dios. Ja nebano pokon chewe ejeꞌeꞌ xa itzel netzijon tre ja rEspíritu Santo pro ja rixix neyaꞌ rukꞌij. 
\v 15 Pro maxta xa rmal banoj camíc maxta rmal banoj alakꞌ tetij pokon owi rmal juleꞌ chic itzelal owi rmal ja chaka nemin ewiꞌ cuqꞌuin winak ja mta ekꞌaꞌ chique. 
\v 16 Ja cꞌa wi netij pokon rmal ja yukulbal ecꞌuꞌx ruqꞌuin ja Jesucristo maxta qꞌuixbal tenaꞌ pro ja neban, teyaꞌaꞌ rukꞌij ja Dios rmal ja yatajnak chewe chi netij ja rpokonal pa rubiꞌ ja Jesucristo. 
\p 
\v 17 Camic numajel ja tiempo rxin ja rpokonal. Kuqꞌuin ajoj numajel wiꞌ nabey ja rok ralcꞌwal Dios. Ja wi ajoj nkatij ja rpokonal pior cꞌa ja winak ja maticajoꞌ nquinimaj ja utzlaj tzij xin Jesucristo ja rtakonto ja Dios. 
\v 18 Ajoj ja yukul kacꞌuꞌx ruqꞌuin ja Dios noktotaji pro kas maril. Ja wi kas maril noktotaj ajoj ¿la netotaj cꞌariꞌ ja rajꞌil ajmaquiꞌ ja mta Dios pa tak canma? 
\v 19 Pro wi cꞌoli ja rpokonal netij rmal ja rvoluntad Dios maxta teyaꞌ can ja banoj utzil, ni tebanaꞌ wiꞌ in chakajaꞌ ni tiyukeꞌ wiꞌ ecꞌuꞌx ruqꞌuin ja Dios, arjaꞌ winakarsyon ewxin in ni nuyaꞌ wiꞌ ja rtzujun. 
\c 5
\s * * * * * * * * * * 
\p 
\v 1 Camic nwajoꞌ nintzijon cuqꞌuin ja recꞌayon quixin ja kachꞌalal ja recꞌo checojol como anin jun in cachbil. Anin xintzꞌat nojel ja rpokonal ja xutij ja Cristo. In anin jun chakajaꞌ xquintzꞌatowi ja Jesucristo ja tok xtipi chic jutij tokoriꞌ tok nkꞌalajin na chi congana nim rukꞌij. 
\v 2 Queꞌeyukꞌuj chi utz ja rtinamit Dios. Nojel ecꞌuꞌx nojel ewanma queꞌewcꞌaj, maxta chaka ix puersa. Maxta xa rmal pwok teyarij más ja tok neꞌewcꞌaj pro kas tel ecꞌuꞌx chi cucꞌaxic. 
\v 3 Maxta chaka egana ixix queꞌeban mandar pro ja neban, teyaꞌaꞌ jun utzlaj ejemplo chiquewach. 
\v 4 Ja Jesucristo arjaꞌ jun Pastor arjaꞌ jun ajyukꞌ ja más nim rukꞌij in tok xtipi chic jutij tokoriꞌ xtiyataj chewe ja rtojbalil ja xtiyabex ekꞌij, jun rtojbalil ja mta qꞌuisic trij. 
\p 
\v 5 In ixix chakajaꞌ ja rix jóvenes, queꞌebanaꞌ respetar ja kachꞌalal ja recꞌayon ewxin. Xta jun neban ewanojel, tebanaꞌ respetar ewiꞌ, maxta teyaꞌ ekꞌij. Ja cꞌa Dios arjaꞌ itzel nerutzꞌat ja nqueyaꞌ quekꞌij pro nuyaꞌ rutzil chique ja matiqueyaꞌ quekꞌij. 
\v 6 Rmalcꞌariꞌ tok nbij chewe, tebanaꞌ taknoꞌy chwach ja nimlaj katataꞌ Dios utzcꞌa chi arjaꞌ nuyaꞌ ekꞌij ja tok xterilaꞌ ja tiempo. 
\v 7 Arjaꞌ ixrchajin chi utz rmalcꞌariꞌ tok nbij chewe, tejachaꞌ pa rukꞌaꞌ xa nak ta ja remajon rbisoxic, arjaꞌ nchomarsan chewach. 
\p 
\v 8 Ja cꞌa diablo ja recꞌulel arjaꞌ ntajini ncanoj nak nuban chewe caniꞌ nuban jun cój nurak ruchiꞌ tok nercanoj ja nerutij. Rmalcꞌariꞌ tok nbij chewe, kas bien techꞌoboꞌ na ja neban in quixcꞌascꞌoti. 
\v 9 Maxta teyaꞌ ewiꞌ tre ja diablo, ni tiyukeꞌ wiꞌ ecꞌuꞌx ruqꞌuin ja Jesucristo. Turkaj chewe chi ma eyon ta ixix ja nba̱n pokon chewe como queriꞌ nba̱n chique chakajaꞌ ja kachꞌalal ja recꞌo nojel rwachꞌulew. 
\v 10 Pro xa ma nim ta ja tiempo rxin ja rpokonal cꞌacꞌariꞌ ja Dios arjaꞌ xtuyaꞌ chewe xa nak ta ja ma tzꞌakat ta chewe, arjaꞌ ncowirsaj ja rewanma in nuyaꞌ ja rewachokꞌakꞌ in nuyaꞌ chewe chi cow nixpeꞌi, majun nak ta xquixcꞌamoꞌel ta. Arjaꞌ nojel rwach ja rutzil cꞌo ruqꞌuin in rmal ja Jesucristo tok xokrsiqꞌuij chi nokeqꞌuejeꞌ na pa gloria pro jun gloria ja mta qꞌuisic trij. 
\v 11 Ni ta xtiyaꞌ wiꞌ rukꞌij, ni ta xtinatax wiꞌ chi pa rukꞌaꞌ cꞌo wiꞌ nojelal camic, chwak in chijutij. Amén. 
\s * * * * * * * * * * 
\p 
\v 12 Ja kachꞌalal Silvano cꞌo nconfianza ruqꞌuin rmalariꞌ tok nyaꞌel tre ja ti carta riꞌ chi nerjachaꞌ chewe. Ja xintzꞌibaj chipan ja carta chi ncowirsaj más ja rewanma, nucꞌut chewach ja rutzil ja nsipaj ja Dios ja katzij chi utzil, ni tiyukeꞌ wiꞌ ecꞌuꞌx ruqꞌuin. 
\p 
\v 13 Ja kachꞌalal ja recꞌo waweꞌ pa Babilonia ejeꞌeꞌ ewachbil ja rixchaꞌon rmal ja Dios in nquetakel rutzil ewach. Ja Marcos arjaꞌ ncꞌajol chwach Dios, arjaꞌ nutakel rutzil ewach chakajaꞌ. 
\v 14 Ja tok nemol ewiꞌ teyaꞌaꞌ rutzil ewach chibil tak ewiꞌ ja necꞌutbej chi newajoꞌ ewiꞌ. 
\p Kas ta xtiyataj chewe ja quicotemal xin Dios ewanojel ja xa jun ebanon ruqꞌuin ja Jesucristo. Amén.