\id 2PE Western Tzutujil [tzt] NT (Guatemala) -2009 bd. 
\h 2 PEDRO 
\toc1 2 Pedro 
\toc2 2 Pe
\mt 2 PEDRO
\c 1
\s 
\p
\v 1 Anin in Simón Pedro, in ajsamajel rxin ja Jesucristo in chakajaꞌ in apóstol rxin. Anin ntzꞌibaj ja carta riꞌ in ntakel ewqꞌuin ixix ja rewilon chic ja lokꞌlaj yukulbal ecꞌuꞌx ruqꞌuin ja Jesucristo. Ja yukulbal ecꞌuꞌx ruqꞌuin ja Jesús nim rukꞌij, junan ruqꞌuin ja caniꞌ kawilon ajoj. Ja Jesucristo arjaꞌ Dios, arjaꞌ Toꞌonel kaxin in rmal ja rutzil rcꞌamonto tok nokcꞌuli rmal ja Dios in rmalariꞌ tok ewilon chic ja yukulbal ecꞌuꞌx ruqꞌuin.
\v 2 Xtiqꞌuiy ta xtiwachin ta ja rutzil in quicotemal xin Dios pa tak ewanma. Ja wi kꞌij kꞌij newotakij más janiꞌ rnaꞌoj ja Dios, wi newotakij más janiꞌ rnaꞌoj ja kajaw Jesús triꞌ newil wiꞌ ja rutzil in quicotemal xin Dios.
\s * * * * * * * * * *
\p
\v 3 Ja Dios cꞌo pa rukꞌaꞌ nojelal, arjaꞌ nojel ryaꞌon chake ja ncꞌatzin chake chi nokcowini nkucꞌaj jun utzlaj cꞌaslemal ja utz ntzꞌa̱t rmal. Queriꞌ nuban ja Dios chawe ja tok nawotakij janiꞌ rnaꞌoj. Arjaꞌ xokrsiqꞌuij utzcꞌa chi nokoc rachbil chipan ja sakil utzcꞌa chakajaꞌ chi nkucꞌaj jun utzlaj anma ja caniꞌ ranma arjaꞌ.
\v 4 Queriꞌ rbanon, cꞌoli ja rtzujun jeꞌe chake caniꞌ jun nimlaj mebaꞌil in congana nimak rukꞌij. Rmal cꞌa ja rtzujunto chake rmalariꞌ tok nokcowini nkatoꞌ kiꞌ chipan ja ritzelal xin rwachꞌulew como ja rwachꞌulew xa yojtajnak rmal ja ritzel tak yarinem ja cꞌo pa tak canma winak. Queriꞌ xuban ja Dios chake utzcꞌa chi nkaqꞌuex kanaꞌoj in ni jaꞌ chic rnaꞌoj ja Dios nkucꞌaj.
\v 5 Rmalcꞌariꞌ nbij chewe, tetijaꞌ ekꞌij chi rbanic ja xtinbij chewe riꞌ utzcꞌa chi nqꞌuiyi nwachini ja rnaꞌoj Dios pa tak ewiꞌ pa tak ewanma. Ixix cꞌo yukulbal ecꞌuꞌx ruqꞌuin ja Jesucristo pro tebanaꞌ chakajaꞌ ja juleꞌ chic ja xtinbij chewe quewariꞌ. Cow quixpeꞌi chi rbanic ja rutzil. Tewotakij nak ja utz in nak ja ma utz ta.
\v 6 Techꞌoboꞌ rij rwach nak neban chi mateyaꞌ ewiꞌ tre ja ritzelal chi xquixrucꞌamel ta. Tecochꞌoꞌ xa nak ta npi chewij. Ni jaꞌ wiꞌ Dios techꞌoboꞌ.
\v 7 Lokꞌ queꞌenaꞌaꞌ ja rewachꞌalal. In tiqꞌuejeꞌe tisamaji ja rajoben riꞌil xin Dios pa tak ewanma.
\p
\v 8 Nojel ja cꞌa xintzꞌibaj chewe riꞌ ja wi nqꞌuiyi wi nwachini pa tak ewanma triꞌ cꞌa nixtzꞌat wiꞌ chi bien ewotak janiꞌ rnaꞌoj ja kajaw Jesucristo in triꞌ nkꞌalajin wiꞌ chakajaꞌ chi congana xetij ekꞌij chi rotakixic.
\v 9 Pro ja winak ja mta chique ja xintzꞌibaj riꞌ ejeꞌeꞌ e caniꞌ moyaꞌ, xa matiquetzꞌat ja rtzujunto ja Dios, xa jaꞌ nquetzꞌat ja cꞌo chiquinakaj ja xin rwachꞌulew. Matinataj chic chique chi xechꞌachꞌojirsax chipan ja rojer quil quemac.
\v 10 Rmalcꞌariꞌ wachꞌalal, más chi ta na netij ekꞌij chi rbanic ja xintzꞌibaj riꞌ utzcꞌa chi cꞌol eseguro chi xixsiqꞌuixi in xixchaꞌi chi xixoc pa rukꞌaꞌ ja Dios. Ja wi queriꞌ neban jariꞌ ma quixkaj chipan ja il mac in
\v 11 congana quiꞌil ecꞌulic xtibani chipan ja gobierno rxin ja kajaw Jesucristo, arjaꞌ Toꞌonel kaxin, jun gobierno ja ni mta wiꞌ qꞌuisic trij.
\p
\v 12 Rmalcꞌariꞌ tok ni nnataj wiꞌ chewe nojel ja xintzꞌibaj riꞌ. Queriꞌ nban masqui ewotak chic in masqui cowirnak chic ewiꞌ ewanma chipan ja utzlaj tzij eniman ja rcꞌamonto ja Jesucristo.
\v 13 Ja nchꞌob anin ni rubey wiꞌ nban chi nnataj chewe. Ja tok xquincami cꞌa tokoriꞌ ntanbaꞌ rnataxic chewe.
\v 14 Anin wotak chi xajalal majaꞌn tinyaꞌ can ja rwachꞌulew jariꞌ kꞌalasan chic chinwach rmal ja kajaw Jesucristo.
\v 15 Anin nchomij can na ja ncꞌatzin chewe chi ni nenataj wiꞌ masqui incamnak chic.
\s * * * * * * * * * *
\p
\v 16 Ajoj kachꞌob chewach nak rbanic ja tok xtipi chic jutij ja kajaw Jesucristo chi congana chic kꞌaxnak ja rchokꞌakꞌ triꞌ. Ja kacoj kabase tok kabij chewe jariꞌ tok yataj chake chi katzꞌat ruqꞌuin kawach ja Jesucristo tok rucꞌaj ja ruchꞌaꞌ Dios. Ma ja ta kacoj kabase juleꞌ ojer tak tzij ja xa winakarsan cumal winak quibanon rbanic.
\v 17 Ajoj katzꞌat ja Jesús ja tok kꞌalasax rmal ja Tatixel chi congana nim rukꞌij in tok rucꞌaj ja gloria xin Dios. Tokoriꞌ bantaji ja tok kacꞌaxaj rukul ja nimlaj Dios, quewaꞌ xbij tre ja Jesús riꞌ: —Jawaꞌ wariꞌ Walcꞌwal, congana nwajoꞌ in congana ninquicot trij, neꞌe.
\v 18 Ajoj okcꞌo ruqꞌuin ja Jesús parwiꞌ ja jayuꞌ ja chaꞌon rmal ja Dios chewiꞌ tok kacꞌaxaj ja kulaj penak chilaꞌ chicaj.
\p
\v 19 In chakajaꞌ cꞌo chic jun ja nkacoj kabase ja más chi na seguro jariꞌ ja rtzobal Dios ja quibin can in quitzꞌiban can ja profeta xin Dios. Jariꞌ ja quitzꞌiban can yatal chewe chi congana neyaꞌ pa cuenta. Ja quitzꞌiban can jariꞌ caniꞌ jun kꞌakꞌ ja nsakirsaj abey chakꞌaꞌ, natrutoꞌ chipan ja kꞌekumal. Ja cꞌa tok npi rsakaric mchita kꞌekumal in tok nelto kꞌij nsakirsaj chi utz nojel. In queriꞌ cꞌa rbanic chakajaꞌ ja tok xtipi chic jutij ja Jesucristo arjaꞌ nsakirsaj chi utz ja rewanma.
\v 20 Ja quitzꞌiban can ja profeta chipan ja rtzobal Dios congana rjawaxic chewe chi nchꞌobtaj emwal chi ma jun winak ta kꞌalasani nak rbanic, jaꞌ Espíritu Santo kꞌalasan chiquewach.
\v 21 Ma jun winak ta xucꞌan quixin ja profeta ojer chi rbixic ja tzꞌibtal can, ejeꞌeꞌ xechaꞌi rmal ja Dios in jaꞌ Espíritu Santo xucꞌan quixin chi rbixic.
\c 2 
\s * * * * * * * * * * 
\p 
\v 1 Pro ecꞌoli ja profeta ojer chakajaꞌ chiquicojol ja tinamit Israel ja ma Dios ta takyonto quixin in queriꞌ chewe ixix chakajaꞌ newinakar na checojol juleꞌ maestro pro ma katzij ta chi tijonem xin Dios ja nqueyaꞌ. Ejeꞌeꞌ pan awatali xtiquecoj ja ritzel tak tijonem chicojol ja rtzobal Dios, ja cꞌariꞌ tijonem xtiqueyaꞌ xa nyojtaji ja recꞌaslemal rmal. Ejeꞌeꞌ riꞌ winak matiquinimaj chic chi ja Jesucristo xutoj ja quil quemac. Jariꞌ jun nimlaj juicio nquisiqꞌuij chiquij pro mta quinaben ja tok xtikaj chiquij. 
\v 2 In chakajaꞌ e qꞌuiy ja winak ja xqueniman quixin, necachbilaj chipan ja ritzelal ja xtiqueban. Xcꞌa rmal ja ritzel cꞌaslemal cucꞌan ja maestro ja tok xa itzel xtitzꞌati ja utzlaj bey ja cꞌutun chikawach rmal ja Dios. 
\v 3 Ejeꞌeꞌ riꞌ ja ritzel tak maestro xa pwok nquiyarij in rmalariꞌ congana xquixquekꞌol, xtiquibij buen tak tzij chewe ja nquiwasbej ja pwok chewe. Pro ja Dios ojer cꞌo jun juicio rchominto quixin, ejeꞌeꞌ nequilaꞌ na jun kꞌij tok xqueꞌekaj chwach ja rpokonal. 
\p 
\v 4 Caniꞌ xuban ja Dios ojer chique ja ángel ja xemacun chwach ma xpokonaj ta quewach, xerutakel chipan ja rpokonal pa jun lugar kꞌekumal, ebacꞌon pa cadena chi raybexic ja nimlaj kꞌij xin juicio. 
\v 5 In chakajaꞌ ja pa rtiempo Noé ojer Dios xutakto jun juicio pa quewiꞌ ja ritzel tak winak, xutakto jun nimlaj kꞌekaljab pa quewiꞌ in xecami canojel. Ruyon ja Noé ja totaji. Ja tok majaꞌn tipeti ja juicio ja Noé arjaꞌ xuyaꞌ rbixic chique ja winak chi rjawaxic nqueyaꞌ can ja ritzelal in ncucꞌaj chic jun utzlaj cꞌaslemal. In ecꞌo chi na wukuꞌ rachbil chakajaꞌ ja xetotaji. 
\v 6 In chakajaꞌ ja Dios ojer xutakto jun juicio parwiꞌ ja caꞌiꞌ tinamit Sodoma in Gomorra. Congana lawuloꞌ ban tre ja caꞌiꞌ tinamit, cꞌati, ni chaj ban tre. Queriꞌ xuban ja Dios jariꞌ xucoj ejemplo chiquewach ja juleꞌ chic itzel tak winak ja majaꞌn queꞌalaxi. 
\v 7 Pro ja Dios cꞌo jun achi xutoꞌ chipan ja cꞌatic ja bantaji rbinaꞌan Lot, arjaꞌ jun utzlaj achi in congana tiꞌon tre ja ritzelal ja queban ja winak. 
\v 8 Ja Lot arjaꞌ nij utzlaj achi wiꞌ. Nojel tak kꞌij tok nutzꞌat ja ritzelal ja nqueban in tok ncꞌaxaj ja ritzel tak tzij ja nquibij como cꞌo jun utzlaj anma rcꞌan chewiꞌ tok ntiꞌon tre ja nqueban. 
\v 9 Triꞌ cꞌa nkatzꞌat wiꞌ chi ja Dios arjaꞌ bien rotak nerutoꞌ ja nebano respetar rxin in bien rotak chakajaꞌ neruyaꞌ ja ritzel tak winak chipan ja rpokonal chi raybexic ja nimlaj kꞌij xin juicio. 
\p 
\v 10 In más chi na lawuloꞌ nuban chique ja winak ja xa nqueyaꞌ quiꞌ tre ja ritzel tak yarinem ja cꞌo pa tak canma. Ejeꞌeꞌ xa itzel nquenaꞌ ja neba̱n mandar rmal ja kajaw Jesucristo. Ejeꞌeꞌ matiquixbej quiꞌ nqueban ja ritzelal, ni nqueban wiꞌ xa nak ta ja cꞌo quigana nqueban. Queriꞌ quibanic matiquixbej quiꞌ nquibij itzel tak tzij chique ja nimak quekꞌij. 
\v 11 Pro xnaꞌ ma queriꞌ ta netzijoni ángel masqui más chi na kꞌaxnak quichokꞌakꞌ in más nimak quekꞌij chiquewach winak. Ja ángel tok neꞌekaj chwach ja Dios ejeꞌeꞌ mta itzel tak tzij nquibij ja nkꞌetbex tzij chiquij ja nimak quekꞌij. 
\p 
\v 12 Pro jariꞌ winak ja nqueyaꞌ quiꞌ tre ja ritzelal ejeꞌeꞌ xa e caniꞌ chicop, xa mta quipensar. Ja chicop chaka bar ta nquemin wiꞌ quiꞌ, xa nechapi in necamsaxi como nijawariꞌ yatal chiquij. Ejeꞌeꞌ riꞌ winak tok cꞌoli nbix chique ja matichꞌobtaj cumal congana cowlaj tak tzij nquibij, xa nechaponi. Ja ritzelal nqueban jariꞌ nquisiqꞌuibej camíc chiquij 
\v 13 jariꞌ rtojbalil ja ritzelal nqueban. Ejeꞌeꞌ ma qꞌuixbal ta nquenaꞌ, congana nequicoti nquikꞌalasaj ja ritzelal masqui pa kꞌij. Ejeꞌeꞌ ja tok nixcachbilaj chi waꞌim xa ruqꞌuix ja Dios nqueyaꞌ, nequicoti nqueban ja ritzelal checojol, xa engaño rcꞌamonto ja nqueban. 
\p 
\v 14 Mta ariꞌ ja maquita nquiyarij rwach jun ixok, maquecos chi rbanic ja ritzelal. Ja winak ja ma cowirnak ta quewiꞌ canma chipan ja rtzobal Dios nequisiqꞌuij chipan ja ritzelal. Kas ntzuri nbantaj cumal chi rqꞌuiyirsaxic ja quimebaꞌil. Queriꞌ quibanic, ejeꞌeꞌ xa etzelan chic rmal ja Dios. 
\v 15 Quiyaꞌon can ja utzlaj bey, etzaknak. Ja bey cucꞌan jariꞌ xrucꞌaj ja rojer profeta rbinaꞌan Balaam ja rcꞌajol Beor, arjaꞌ congana xel rucꞌuꞌx trij ja chꞌecoj pwok masqui ma utz ta rchꞌaquic nuban. 
\v 16 Pro cꞌo jun ti bur yataj tre rmal ja Dios chi tzijoni in xuchꞌaꞌ tre ja Balaam ja ritzel naꞌoj ja rchꞌobon. In kꞌili ja Balaam rmal ja bur tre ja ritzel naꞌoj ja rchꞌobon. 
\p 
\v 17 Ejeꞌeꞌ riꞌ winak xa e junan ruqꞌuin jun tzꞌuquel yaꞌ ja chakijnak, xa mta neꞌoc wiꞌ, xa e caniꞌ juleꞌ sutzꞌ ja xa ncꞌamarel rmal ikꞌ. Ejeꞌeꞌ chomin chic jun lugar quixin ja congana kꞌekuꞌm, triꞌ neꞌeqꞌuejeꞌ wiꞌ chijutij. 
\v 18 Nquibij nimak tak tzij pro xa mta rcꞌamonto. Ja ritzel tak yarinem ja cꞌo pa tak canma jariꞌ nequisiqꞌuibej ja winak ja cꞌa ma jaruꞌ ta tiempo equiyaꞌon can ja cachbil ja xa itzelal cꞌayon quixin. 
\v 19 Quewaꞌ nquitzujuj chique riꞌ: —Ixix ix libre, majun nak ta cꞌo ta rukꞌaꞌ chewe, necheꞌ chique. Pro nixtacꞌa ejeꞌeꞌ ta e libre ta como xa echapon rmal ja ritzelal. Xa nak ta ja ritzelal ja ratchapyon ja wi macatcowin trij jariꞌ ma at libre ta, atcꞌo cꞌariꞌ pa rukꞌaꞌ ja chapyon awxin. 
\v 20 Ejeꞌeꞌ riꞌ winak nabey quetoꞌ quiꞌ chipan ja ritzelal xin rwachꞌulew tokoriꞌ tok cotakij nak rbanic ja kajaw Jesucristo ja Toꞌonel kaxin. Pro wi nquitzꞌapij chic jutij quiꞌ chipan ja ritzelal in necha̱p chic jutij rmal xcꞌa rmalariꞌ ja tok más chi na lawuloꞌ ja quicꞌaslemal chwach ja caniꞌ quibanon nabey. 
\v 21 Más ta utz ja maquita cotakij nak rbanic ja utzlaj bey xin Dios chwach ja queban como ejeꞌeꞌ cotakij nak rbanic ja utzlaj bey in quicꞌaxaj ja rutzil ja ban mandar chique rmal ja Dios chi nqueban pro jariꞌ xa queyaꞌ can. 
\v 22 Ja queban caniꞌ nbij jun cꞌambal tzij ja tzꞌibtal can quewariꞌ: —Ja tzꞌiꞌ nmeloji chi nertijaꞌ chic jutij ja rxaꞌab, neꞌe. In jun chic: —Ja ak tok chaka maril nchꞌajtajel rij nbe chic jutij chipan ja chꞌabak. Queriꞌ nbij. 
\c 3
\s * * * * * * * * * * 
\p 
\v 1 Chakꞌlaj wachꞌalal, jawaꞌ rcab carta ntakel ewqꞌuin riꞌ junan rsamaj ruqꞌuin ja nabey carta ja ntakon chic ewqꞌuin. Quewaꞌ rsamaj riꞌ chi nnataj jeꞌe chewe ja chꞌobtajnak chic emwal como anin wotak chi ma eniman ta ja ritzel tak tijonem. 
\v 2 Rmalariꞌ nbij chewe, tinataj jutzꞌit chewe ja quibin can ja rojer tak profeta xin Dios. In tinataj chewe chakajaꞌ ja mandamiento ja yaꞌon can rmal ja kajaw Jesucristo ja Toꞌonel kaxin jariꞌ kabin chic chewe ja rok apóstol. 
\p 
\v 3 Congana rjawaxic chi nchꞌobtaj emwal chi ja pa rqꞌuisbal tak kꞌij ecꞌoli winak ja nepi na xa e yokꞌonelaꞌ, xa nqueyaꞌ quiꞌ tre ja ritzel tak yarinem ja cꞌo pa tak canma. 
\v 4 Ejeꞌeꞌ quewaꞌ xtiquibij chique ja juleꞌ chic winak riꞌ: —Bin can chi npeti ja Cristo ¿la npi laꞌan nechꞌob ixix? Pro ja rwachꞌulew ni matiqꞌuextaj wiꞌ in matiqꞌuisi. Caniꞌ pa quitiempo ja katiꞌt kamamaꞌ in chakajaꞌ tok tzꞌucarto ja rwachꞌulew niquirwariꞌ rbanon camic, xquecheꞌe. 
\v 5 Pro ejeꞌeꞌ maticajoꞌ nquinataj chi ja caj in rwachꞌulew ma chaka ta cꞌoli pro ja Dios ja tzij xuban jariꞌ xwinakarsbej. Ja rwachꞌulew pa yaꞌ winakar wiꞌ in xelto parwiꞌ ja yaꞌ. 
\v 6 In yaꞌ chakajaꞌ yojowi ja rwachꞌulew ojer tokoriꞌ tok xuban ja nimlaj kꞌekaljab, be chic jutij chipan ja yaꞌ in qꞌuisi. 
\v 7 In rmal chakajaꞌ ja rbin can ja Dios ja caj in rwachꞌulew ja cꞌoli camic xa cꞌatic xa poroxic rayben. Tokoriꞌ xticꞌati ja tok xterilaꞌ ja nimlaj kꞌij xin juicio in canojel ja ritzel tak winak nebe chipan ja nimlaj rpokonal. 
\p 
\v 8 Chakꞌlaj wachꞌalal, ni ma temestaj ta wiꞌ ja xtinbij chewe riꞌ, jun mil junaꞌ masqui congana nim nkacꞌaxaj pro ja chwach Dios xa junan ruqꞌuin jun kꞌij. 
\v 9 Queriꞌ nbij chewe como ecꞌoli winak ja nebini chi ja kajaw Dios cꞌamalo nuban cumplir ja rbin can pro jariꞌ ma queriꞌ ta. Xar congana rpaciencia ja Dios kuqꞌuin ja rok winak como arjaꞌ matirajoꞌ chi cꞌo ta jun xtibe ta chipan ja nimlaj rpokonal. Ja nrajoꞌ chake kanojelal chi nkaqꞌuex kanaꞌoj in nkayaꞌ can ja ritzelal. 
\p 
\v 10 Pro cꞌa jaꞌ xtinaꞌi ja tok xterilaꞌ ja nimlaj kꞌij ja rchomin ja kajaw Dios caniꞌ tre jun alakꞌom mta nnabexi ja tok nerbanaꞌ alakꞌ. Jariꞌ kꞌij ncꞌati nojelal. Ja caj congana npakꞌloji xtuyaꞌ riꞌ in nqꞌuisi. Nojel ja rocnak ja rwachꞌulew nqꞌuis na rmal ja nimlaj cꞌatic, ncꞌat na ja rwachꞌulew in ncꞌat na nojelal ja cꞌo chwach ja rwachꞌulew chakajaꞌ, majun nak ta nutoꞌ ta riꞌ. 
\p 
\v 11 Como ja caj in rwachꞌulew xa ncꞌati xa nqꞌuisi rmalcꞌariꞌ tok nbij chewe, congana rjawaxic chi nkucꞌaj jun utzlaj anma, rjawaxic chi ni ja wiꞌ ja Dios nkachꞌob. 
\v 12 Koquicoti chi raybexic ja nimlaj kꞌij ja chomarsan rmal ja Dios, kabanaꞌ ja nrajoꞌ chake chi nkaban utzcꞌa chi xtipi ta jutzꞌit chanim. Masqui jariꞌ kꞌij xticꞌati ja caj in nqꞌuisi in masqui nojelal ja rocnak ja rwachꞌulew nqꞌuisi rmal ja cꞌatic 
\v 13 pro ja rajoj nokquicoti chi raybexic jun chic cꞌacꞌa caj in jun chic cꞌacꞌa rwachꞌulew caniꞌ rtzujun can ja Dios, jariꞌ majun itzelal chipan, nojel utz. 
\p 
\v 14 Rmalcꞌariꞌ nbij chewe chakꞌlaj wachꞌalal, como ajoj kayben jun cꞌacꞌa caj in cꞌacꞌa rwachꞌulew katijaꞌ cꞌa kakꞌij chi rbanic ja nrajoꞌ ja Dios chake chi nkaban utzcꞌa chi xa jun kabanon ruqꞌuin tok xkoꞌekaj chwach in chꞌajchꞌoj ja kanma in majun nak ta nokchapbexi. 
\v 15 Kas bien tichꞌobtaj emwal chi ja kajaw Dios ma chaka ta cꞌoli ja rpaciencia kuqꞌuin ja rok winak, ja nrajoꞌ chake chi noktotaji kanojelal. In queriꞌ bin chewe rmal ja chakꞌlaj kachꞌalal Pablo. Jariꞌ xbij chewe ja tok xutak ja carta ewqꞌuin in Dios yoyon tre ja rnaꞌoj chi rbixic. 
\v 16 Arjaꞌ xbij chewe ja nmajon rbixic anin chewe camic. Nijawariꞌ ntzꞌibaj arjaꞌ chipan nojelal ja carta ja nuban. Cꞌo jeꞌe ntzꞌibaj ja Pablo chipan ja carta ja cꞌayew rchꞌobic in ecꞌoli ja ma quitijon ta quiꞌ chi utz ja ma cowirnak ta quecꞌuꞌx chipan ja rtzobal Dios, ejeꞌeꞌ xa nqueqꞌuex rbixic ja rtzꞌiban ja Pablo caniꞌ nqueban tre ja juleꞌ chic rtzobal Dios. Jariꞌ nquisiqꞌuibej ja nimlaj rpokonal chiquij. 
\p 
\v 17 Rmalcꞌariꞌ chakꞌlaj wachꞌalal, como ixix ewotak chic tebanaꞌ cuenta, maxta quixkaj chipan ja ritzel tak tijonem ja nqueyaꞌ ja ritzel tak winak. Ixix cowirnak ecꞌuꞌx chipan ja rtzobal Dios, maxta quixyojtaji. 
\v 18 Pro ja neban, ni ta xtiqꞌuiy wiꞌ más ja rutzil xin Dios pa tak ewanma, ni ta xtewotakij wiꞌ más janiꞌ rnaꞌoj ja kajaw Jesucristo ja Toꞌonel kaxin. Arjaꞌ ni ta xtiyaꞌ wiꞌ rukꞌij camic, chwak in chijutij. Amén.