\id 1JN Western Tzutujil [tzt] NT (Guatemala) -2009 bd. 
\h 1 JUAN 
\toc1 1 Juan 
\toc2 1 Jn
\mt 1 JUAN
\c 1
\s 
\p
\v 1 Jawaꞌ jun carta ja nkatakel chewe riꞌ rcꞌamonto nak rbanic ja Ralcꞌwal Dios ja Yoꞌl utzlaj cꞌaslemal ja mta qꞌuisic trij, arjaꞌ xurkꞌalasani janiꞌ rnaꞌoj ja Dios. Ja Ralcꞌwal Dios arjaꞌ ni cꞌo wiꞌ ja tok tzꞌucarsaxto ja rwachꞌulew. Ajoj katzꞌat ruqꞌuin kawach, kacꞌaxaj ja xbij, katzꞌat janiꞌ ja rcꞌaslemal, kachap ruqꞌuin kakꞌaꞌ.
\v 2 Ja Yoꞌl cꞌaslemal xerilaꞌ ja kꞌij chi ntzꞌattaji, ajoj katzꞌat in camic kamajon rkꞌalasaxic nak rbanic in jariꞌ nkayaꞌ rbixic chewe. Nabey ni cꞌo wiꞌ ruqꞌuin ja Tatixel pro peti xurcꞌutuꞌ kaj riꞌ chikawach.
\v 3 Ja katzꞌaton in ja kacꞌaxan jariꞌ nkayaꞌ rbixic chewe utzcꞌa chi ixix jun nixquicot kuqꞌuin rmal como xa jun kabanon ruqꞌuin ja Dios ja Tatixel in chakajaꞌ xa jun kabanon ruqꞌuin ja Jesucristo ja Ralcꞌwal.
\v 4 Ja katzꞌibaj riꞌ nkatakel ewqꞌuin utzcꞌa chi nqꞌuiyi in nwachini ja quicotemal xin Dios pa tak ewanma.
\s * * * * * * * * * *
\p
\v 5 Ja xtikatzꞌibaj riꞌ jawaꞌ tijonem kacꞌaxan ja bix chake rmal ja Jesucristo quewariꞌ, ja Dios arjaꞌ ni sakil wiꞌ rcꞌan, ni utz wiꞌ ja nuban, majun kꞌekumal rcꞌan ta.
\v 6 Ja wi nkabij chi xa jun kabanon ruqꞌuin ja Dios pro wi kꞌekumal cꞌayon kaxin jariꞌ xa ok tzꞌakol tak tzij in ni kꞌalaj wiꞌ chi matikanimaj ja utzlaj tzij xin Jesucristo.
\v 7 Pro wi sakil cꞌayon kaxin caniꞌ tre ja Dios arjaꞌ ni pa sakil wiꞌ cꞌo wiꞌ, ja wi queriꞌ kabanon xcꞌa jun kabanon ariꞌ. Ja wi queriꞌ kabanon ja rquiqꞌuel ja Jesucristo ja Ralcꞌwal jariꞌ nchꞌachꞌojirsaj nojel ja kil kamac nkaban.
\p
\v 8 Ja wi nkabij chi mta ja il mac kabanon jariꞌ xa nkaban kaj engañar kiꞌ kayon in ma katzij ta ja nkabij.
\v 9 Pro wi nkachol ja kil kamac chwach ja Dios arjaꞌ ni nuban wiꞌ cumplir in ni utz wiꞌ nuban chi rcuyic in nokrchꞌachꞌojirsaj chipan nojelal ja ritzelal ja nkaban.
\v 10 Ja cꞌa wi nkabij chi mta ja il mac kabanon jariꞌ xa caniꞌ tzꞌakol tzij nkacoj wiꞌ ja Dios. Ja wi queriꞌ nkabij jariꞌ ni kꞌalaj wiꞌ chi ma kacojon ta ja rtzobal Dios pa tak kanma.
\c 2 
\s * * * * * * * * * * 
\p 
\v 1 Chakꞌlaj walcꞌwal, jawaꞌ jun carta ja ntakel ewqꞌuin riꞌ utzcꞌa chi maquixmacuni. Pro wi cꞌo jun chewe chaka jalal xuban ril bien kotak chi cꞌo jun ja nsamaj pa kacuenta chwach Dios ja Tatixel jariꞌ ja Jesucristo, arjaꞌ ni utz wiꞌ ja nuban. 
\v 2 Arjaꞌ chomarsbal rxin ja kil kamac in ma ruyon ta chake ajoj nuban wiꞌ queriꞌ, canojel winak ja nuban queriꞌ chique. 
\p 
\v 3 Ja wi nkanimaj ja mandamiento xin Jesucristo triꞌ nkatzꞌat wiꞌ chi kotak rwach. 
\v 4 Ja wi cꞌo jun nbij chi arjaꞌ rotak rwach ja Jesucristo pro wi matinimaj ja rmandamiento jariꞌ xa tzꞌakol tzij, mta rtzobal Dios pa ranma. 
\v 5 Pro ja winak ja nenimani ja rmandamiento ejeꞌeꞌ riꞌ ja qꞌuiynak chic in wachinnak chic ja rajoben riꞌil xin Dios pa tak canma. Ja wi queriꞌ kabanon triꞌ nkatzꞌat wiꞌ chi xa jun kabanon ruqꞌuin. 
\v 6 Ja wi cꞌo jun nbij chi arjaꞌ xa jun rbanon chic ruqꞌuin ja Jesucristo jariꞌ ni rjawaxic wiꞌ chi nrcꞌaj jun utzlaj cꞌaslemal ja caniꞌ rcꞌaslemal ja Jesucristo. 
\s * * * * * * * * * * 
\p 
\v 7 Wachꞌalal, ja ntzꞌibajel chewe riꞌ ma jun cꞌacꞌa mandamiento ta, jawaꞌ jun ojer mandamiento ecꞌwaxan chic ja kas yaꞌto chewe nabey, jariꞌ chi nawajoꞌ awiꞌ. 
\v 8 Pro nkabij tre chakajaꞌ chi cꞌacꞌa mandamiento como ja rcꞌaslemal ja Jesucristo nucꞌut chikawach nak rbanic ja nawajoꞌ awiꞌ in queriꞌ tre ja recꞌaslemal ixix chakajaꞌ janiꞌ chi la newajoꞌ ewiꞌ. Queriꞌ nkabij como ja rajoben riꞌil ja rcꞌamonto ja Jesucristo ni katzij wiꞌ chi ruqꞌuin Dios penak wiꞌ, okryaꞌon chic pa sakil caniꞌ nuban kꞌij tok npi rsakaric, ja cꞌa kꞌekumal xin ojer ntajini nqꞌuisi. 
\p 
\v 9 Ja wi cꞌo jun nbij chi arjaꞌ pa sakil chic cꞌo wiꞌ pro wi xa itzel nutzꞌat jun rchꞌalal jariꞌ cꞌa pa kꞌekumal na cꞌo wiꞌ. 
\v 10 Ja wi neꞌawajoꞌ ja rawachꞌalal jariꞌ ni pa sakil chi wiꞌ atcꞌo wiꞌ in majun nak chi ta xcatcꞌamoꞌel chi ta chipan jun itzelal. 
\v 11 Pro wi cꞌo jun xa itzel nutzꞌat jun rchꞌalal jariꞌ ni pa kꞌekumal wiꞌ cꞌo wiꞌ, ja kꞌekumal jariꞌ cꞌayon rxin. Arjaꞌ moyirnak rmal ja kꞌekumal rmalcꞌariꞌ ma rotak ta bar nekaj wiꞌ tre ja rcꞌaslemal. 
\p 
\v 12 Chakꞌlaj walcꞌwal, rmal ja Jesucristo Dios xucuy ja rewil emac in rmalariꞌ ntakel ja carta chewe. 
\v 13 In chewe ixix ja rix rijaꞌ, ixix ewotak rwach ja Ralcꞌwalaxel ja ni cꞌo wiꞌ ja tok tzꞌucarsaxto ja rwachꞌulew in rmalariꞌ ntakel ja carta chewe. In chewe ixix ja rix cꞌajolaꞌ, ixix xixcowin trij ja diablo xechꞌec in rmalariꞌ ntakel ja carta chewe. 
\p Chakꞌlaj walcꞌwal, ewotak rwach ja Tatixel in rmalariꞌ xintakel ja carta chewe. 
\v 14 In chewe ixix ja rix rijaꞌ, ewotak rwach ja Ralcꞌwalaxel ja ni cꞌo wiꞌ ja tok tzꞌucarsaxto ja rwachꞌulew in rmalariꞌ xintakel ja carta chewe. In chewe ixix ja rix cꞌajolaꞌ, ixix ixcowirnak chipan ja rtzobal Dios in ni cꞌo wiꞌ ja rtzobal pa tak ewanma in chakajaꞌ xixcowin trij ja diablo xechꞌec in rmalariꞌ xintakel ja carta chewe. 
\p 
\v 15 Wachꞌalal, maxta congana tel ecꞌuꞌx trij ja cꞌaslemal xin rwachꞌulew nixtacꞌa ja ta ja ntzujuj chakajaꞌ. Ja wi cꞌo jun congana nel rucꞌuꞌx trij ja cꞌaslemal xin rwachꞌulew jariꞌ matel rucꞌuꞌx trij ja katataꞌ Dios. 
\v 16 Ja ntzujuj ja rwachꞌulew ma in katataꞌ Dios ta penak wiꞌ, xa chwachꞌulew winakarnak wiꞌ caniꞌ tre ja ritzel tak yarinem ja cꞌo pa tak kanma in caniꞌ tre ja ma utz ta nkayarij jeꞌe ja nutzꞌat jeꞌe kawach in caniꞌ tre chakajaꞌ nojel ja nkayabej kaj kakꞌij ja mta noc wiꞌ. 
\v 17 Ja cꞌaslemal xin rwachꞌulew rachbil nojelal ja ntzujuj ja nkayarij jariꞌ xa nkꞌaxi pro canojel ja nenimani ja Dios chi nqueban ja najoꞌx chique rmal chi nqueban ejeꞌeꞌ neꞌecꞌaseꞌ na chijutij ruqꞌuin. 
\s * * * * * * * * * * 
\p 
\v 18 Chakꞌlaj walcꞌwal, anin nbij chewe chi xurwilaꞌ ja qꞌuisbal tiempo. Ixix ecꞌwaxan chic chi npi na ja rcꞌulel ja Cristo in camic e qꞌuiy ja rcꞌulel epenak chic chewiꞌ tok kotak chi xurwilaꞌ ja qꞌuisbal tiempo. 
\v 19 Ejeꞌeꞌ riꞌ winak ja xeꞌelel chikacojol in xokqueyaꞌ can, bien kꞌalaj chi ma e kachbil ta. Ja wixta e kachbil maquita xokqueyaꞌ can ariꞌ. Ma chaka ta xeꞌeli, triꞌ ntzꞌa̱t wiꞌ chi ni majun chique kachbil ta. 
\p 
\v 20 Pro ja cꞌa rixix chꞌobtajnak chic emwal ewanojel nak rbanic ja utzlaj tzij xin Jesucristo. Ma chaka ta chꞌobtajnak emwal como ja Cristo arjaꞌ rtakonto ja rEspíritu Santo ewqꞌuin. 
\v 21 Anin ntzꞌibajel ja carta chewe riꞌ pro ma rmal ta chi majaꞌn tichꞌobtaj emwal nak rbanic ja utzlaj tzij pro como chꞌobtajnak chic emwal chewiꞌ tok ntzꞌibajel chewe. Ixix bien ewotak chi ja tzꞌakoj tzij ni matucꞌam wiꞌ riꞌ ruqꞌuin ja utzlaj tzij xin Jesucristo. 
\p 
\v 22 Anin nbij chewe chi xa e tzꞌakol tak tzij ja winak ja nebini chi ja Jesús ma arjaꞌ ta ja Cristo ja Ralcꞌwal Dios. Ejeꞌeꞌ cꞌariꞌ e rcꞌulel ja Cristo, nquibij chi ja Dios ma Tatixel ta in nquibij chakajaꞌ chi ja Jesús ma Alcꞌwalaxel ta. 
\v 23 Ja winak ja nebini chi ja Jesús ma Alcꞌwalaxel ta jariꞌ mta ja Dios Tatixel pa tak canma pro ja nebini chi Alcꞌwalaxel jariꞌ cꞌoli ja Dios Tatixel pa tak canma. 
\v 24 Rmalcꞌariꞌ tok nbij chewe, teyaꞌaꞌ lugar tre ja utzlaj tijonem ja kas xecꞌwaxajto nabey chi nqꞌuejeꞌ pa tak ewanma. Ja wi queriꞌ xteban jariꞌ nixqꞌuejeꞌ pa ranma ja Ralcꞌwalaxel in pa ranma ja Tatixel chakajaꞌ. 
\v 25 In quewaꞌ rtzujun can chake riꞌ, jun utzlaj cꞌaslemal ja mta qꞌuisic trij. 
\p 
\v 26 Jawaꞌ xintzꞌibaj chewe riꞌ cumal ja winak ja ncajoꞌ nqueyaꞌ jun tijonem chewe ja xa nquiyojbej ja tijonem eniman. 
\v 27 Pro ixix cꞌo chic ja rEspíritu Santo takonto ewqꞌuin rmal ja Jesucristo, arjaꞌ cꞌo chic pa tak ewanma. Rmalcꞌariꞌ ja tok ma rjawaxic ta chewe xquixtijox chi ta cumal juleꞌ winak, jaꞌ Espíritu Santo cꞌol ewqꞌuin jariꞌ nixtijoni, arjaꞌ nchꞌobo chewach nojelal. Ja tijonem nuyaꞌ arjaꞌ chewe ni katzij wiꞌ, majun tzꞌakoj tzij rcꞌamonto. In caniꞌ nuchꞌob arjaꞌ chewach ni ta queriꞌ neban, quixqꞌuejeꞌ pa ranma ja Jesucristo. 
\p 
\v 28 Chakꞌlaj walcꞌwal, camic nbij chic jutij chewe, ni quixqꞌuejeꞌ wiꞌ pa ranma ja Jesucristo. Ja wi queriꞌ xtikaban jariꞌ matikaxbej kiꞌ chwach ja tok xtipi chic jutij pro cꞌo kaconfianza ruqꞌuin triꞌ in chakajaꞌ matikawawaj kiꞌ chwach, ma qꞌuixbal ta nkanaꞌ chwach ja tok xtipeti. 
\v 29 Ixix bien ewotak chi ni utz wiꞌ rnaꞌoj ja Jesucristo in triꞌ cꞌa newotakij wiꞌ chi canojel ja winak ja ni utz wiꞌ ja nqueban ejeꞌeꞌ riꞌ e ralcꞌwal Dios. 
\c 3
\s * * * * * * * * * * 
\p 
\v 1 Janila nokrajoꞌ ja Dios ja Tatixel. Arjaꞌ nbij chake chi ok ralcꞌwal, triꞌ cꞌa nkatzꞌat wiꞌ chi congana nokrajoꞌ in ni katzij wiꞌ chi ok ralcꞌwal. Ja winak ja xa ruqꞌuin rwachꞌulew yukul wiꞌ quecꞌuꞌx ejeꞌeꞌ matichꞌobtaj cumal janiꞌ rnaꞌoj ja Dios in rmalariꞌ matichꞌobtaj cumal nak kabanic ajoj chakajaꞌ. 
\v 2 Chakꞌlaj wachꞌalal, anin nbij chewe chi ok ralcꞌwal chic ja Dios camic. Majaꞌn tikꞌalasax chikawach nak kabanic ja tok xkoqꞌuextaji pa jun kꞌij xarwariꞌ kotak chi ja tok xtipi chic jutij ja Jesucristo ajoj nij ok queriꞌ chic triꞌ ja caniꞌ arjaꞌ. Nkatzꞌat na chi utz triꞌ janiꞌ ja kas mero rbanic ja Jesucristo chewiꞌ tok nokoqui ja caniꞌ arjaꞌ. 
\v 3 Ja wi nokquicoti chi raybexic ja Jesucristo jariꞌ nkachꞌachꞌojirsbej ja kanma como ja Jesucristo arjaꞌ ni rcꞌan wiꞌ jun chꞌajchꞌojlaj anma. 
\p 
\v 4 ¿Janiꞌ cꞌa ja il mac? Ja il mac junan ruqꞌuin ja matanimaj ja ley xin Dios. Ja cꞌa tok natmacuni ley xin Dios ariꞌ ja matanimaj. 
\v 5 Ixix bien ewotak chi peti ja Jesucristo waweꞌ chwachꞌulew chi rchupic ja kil kamac in arjaꞌ ni mta wiꞌ jun ril rumac rbanon. 
\v 6 Ja wi natqꞌuejeꞌ pa ranma ja Jesucristo jariꞌ macatmacuni. Ja cꞌa wi chaka natmacuni jariꞌ ma chꞌobtajnak ta amwal janiꞌ rnaꞌoj ja Jesucristo in nixtacꞌa chꞌobtajnak ta amwal nak rbanic chakajaꞌ. 
\p 
\v 7 Chakꞌlaj walcꞌwal, maquita cꞌo jun xquixbano engañar, ja winak ja nebanowi ja rutzil xa queyon ejeꞌeꞌ ja utz netzꞌa̱t rmal ja Dios caniꞌ tre ja Jesucristo arjaꞌ banol utzil. 
\v 8 Pro ja winak ja chaka nemacuni ejeꞌeꞌ riꞌ e ralcꞌwal diablo caniꞌ tre ja diablo arjaꞌ nij ajꞌil nij ajmac wiꞌ ja tok tzꞌucarsaxto ja rwachꞌulew. Ja cꞌa Ralcꞌwal Dios peti waweꞌ chwachꞌulew chi ryojic ja samaj ja nuban ja diablo. 
\p 
\v 9 Ja wi at ralcꞌwal Dios jariꞌ awcꞌan ja cꞌaslemal xin Dios in macatmacuni. Rmal ja rat ralcꞌwal Dios chewiꞌ tok mta moda natmacuni. 
\v 10 Waweꞌ nkatzꞌat wiꞌ echinatak ja ralcꞌwal Dios in echinatak ja ralcꞌwal diablo, ja wi ma utz ta ja nqueban in wi maquecajoꞌ ja cachꞌalal ma e ralcꞌwal Dios ta cꞌariꞌ. 
\s * * * * * * * * * * 
\p 
\v 11 Ni rjawaxic wiꞌ chi nkajoꞌ kiꞌ como queriꞌ nucꞌut chikawach ja tijonem ja recꞌwaxanto nabey. 
\v 12 Maxta queriꞌ tikaban ajoj ja caniꞌ xuban ja Caín ojer, xoc pa rcuenta ja diablo ja Caín in xcamsaj ja ruchakꞌ. ¿Nak tre tok xcamsaj? Como arjaꞌ xa itzel rcꞌaslemal pro ja ruchakꞌ utz rcꞌaslemal xa chewiꞌ tok xcamsaj. 
\p 
\v 13 Wachꞌalal, maxta junwiꞌ tenaꞌ rmal ja nixtzelax cumal ja winak ja xa ruqꞌuin rwachꞌulew yukul wiꞌ quecꞌuꞌx. 
\v 14 Ja wi matawajoꞌ awiꞌ jariꞌ atcamnak chwach ja Dios. Ja cꞌa rajoj nekajoꞌ ja kachꞌalal rmalcꞌariꞌ tok kotak chi ma okcamnak chi ta chwach ja Dios, kotak chi okkꞌaxnakpi chic chipan ja camíc in kawilon chic ja utzlaj cꞌaslemal ja mta qꞌuisic trij. 
\v 15 Ja wi xa itzel natzꞌat jun awachꞌalal jariꞌ at jun camsanel. Ixix bien ewotak chi majun camsanel rcꞌan ta ja utzlaj cꞌaslemal ja mta qꞌuisic trij. 
\v 16 Ja Jesucristo arjaꞌ xuyaꞌ riꞌ chi camsax pa kacuenta, triꞌ nkotakij wiꞌ janiꞌ ja rajoben riꞌil. Queriꞌ chake ajoj chakajaꞌ yatal chakij chi matikapokonaj nkayaꞌ kiꞌ pa camíc pa quicuenta ja kachꞌalal. 
\v 17 Pro ja wi cꞌo jun awachꞌalal wi cꞌoli ncꞌatzin tre ja ntzukbej riꞌ in wi cꞌol awqꞌuin ja ncꞌatzin tre, ja cꞌa wi matapokonaj rwach, wi matatoꞌ jariꞌ ni kꞌalaj wiꞌ chi mta ja rajoben riꞌil xin Dios pan awanma. 
\v 18 Chakꞌlaj walcꞌwal, maxta xa chi kachiꞌ cꞌo wiꞌ ja tok nkabij chi nkajoꞌ kiꞌ. Ja kas nrajoꞌ chi cꞌoli nkaban ja nkacꞌutbej chi ni katzij wiꞌ chi nkajoꞌ kiꞌ. 
\s * * * * * * * * * * 
\p 
\v 19-20 Ja wi ni katzij wiꞌ chi nkajoꞌ kiꞌ triꞌ nkotakij wiꞌ chi ja Dios okcꞌayon. In jun chic, masqui ntiꞌoni ja kanma rmal ja ma utz ta kabanon pro wi cꞌoli ja rajoben riꞌil xin Dios chake xa rmalariꞌ tok nquicoti ja kanma chwa Dios in matitiꞌon chic. Queriꞌ rbanic como ja Dios arjaꞌ más chi na nim rukꞌij, cꞌo rukꞌaꞌ tre ja kanma in nojel rotak. 
\v 21 Chakꞌlaj wachꞌalal, ja wi mta ntiꞌon pa tak kanma jariꞌ cꞌo kaconfianza noktzijon ruqꞌuin ja Dios 
\v 22 in arjaꞌ nuyaꞌ chake xa nak ta ja nkacꞌutuj tre. Como ajoj nkanimaj ja rmandamiento in como arjaꞌ nquicot chakij chewiꞌ tok nuban queriꞌ chake. 
\v 23 Ja rmandamiento ja Dios quewaꞌ nbij chake riꞌ, tiyukeꞌ kacꞌuꞌx ruqꞌuin ja Jesucristo ja Ralcꞌwal in tikajoꞌ kiꞌ ja caniꞌ bin can chake rmal. 
\v 24 Ja wi nanimaj ja rmandamiento ja Dios jariꞌ natqꞌuejeꞌ pa ranma ja Dios in nqꞌuejeꞌe ja Dios pan awanma atat chakajaꞌ. Rmal ja rEspíritu Santo ja ryaꞌon ja Dios chake chewiꞌ tok kotak chi arjaꞌ cꞌo pa tak kanma. 
\c 4 
\s * * * * * * * * * * 
\p 
\v 1 Chakꞌlaj wachꞌalal, teyaꞌaꞌ ewxquin tre ja xtinbij chewe riꞌ. E qꞌuiy ja winak quipaxin quiꞌ chwachꞌulew ejeꞌeꞌ nquibij chi tijonem xin Dios ja nqueyaꞌ. Pro xa quipayil ja nquibij, ma katzij ta. Rmalcꞌariꞌ tok nbij chewe, ma queꞌenimaj ta canojel ja winak ja nebini chi Espíritu xin Dios ecꞌayon. Pro ja neban, bien teyaꞌaꞌ cuenta chique janiꞌ netzijoni ja wi katzij chi Espíritu xin Dios ecꞌayon owi mani. 
\v 2 Waweꞌ newotakij wiꞌ ja wi Espíritu xin Dios ecꞌayon, ja nebini chi kajto ja Jesucristo in xoc kach winak ejeꞌeꞌ riꞌ ja katzij chi Espíritu xin Dios ecꞌayon. 
\v 3 Pro ja nebini chi ja Jesucristo ma xoc ta kach winak ejeꞌeꞌ riꞌ ja ma Espíritu xin Dios ta ecꞌayon. Junwiꞌ chi na chi espíritu cꞌayon quixin, jariꞌ espíritu xa rcꞌulel ja Cristo. Jariꞌ espíritu ecꞌwaxan chic chi npi na pro camic cꞌo chic waweꞌ chwachꞌulew. 
\p 
\v 4 Chakꞌlaj walcꞌwal, ixix ixcꞌo pa rcuenta ja Dios. Ja maestro ja ma Dios ta ecꞌayon ejeꞌeꞌ ma xecowin ta chewij, ixix xixchꞌeco quixin. Queriꞌ xeban como ja Dios ja cꞌo pa tak ewanma ixix más chi na kꞌaxnak rchokꞌakꞌ chwach ja diablo ja cꞌo pa tak canma ja winak ja xa ruqꞌuin rwachꞌulew yukul wiꞌ quecꞌuꞌx. 
\v 5 Como ejeꞌeꞌ xa ruqꞌuin rwachꞌulew yukul wiꞌ quecꞌuꞌx rmalariꞌ tok xa jaꞌ nquinataj ja xin rwachꞌulew. Ja cꞌa juleꞌ chic winak ja yukul quecꞌuꞌx ruqꞌuin ja rwachꞌulew ejeꞌeꞌ nel quecꞌuꞌx chi rcꞌaxaxic ja nbix chique cumal. 
\v 6 Pro ja rajoj okcꞌo pa rcuenta ja Dios. Ja winak ja cotak rwach ja Dios ejeꞌeꞌ nel quecꞌuꞌx chi rcꞌaxaxic ja nkabij pro ja ma ecꞌo ta pa rcuenta ja Dios ejeꞌeꞌ maticajoꞌ nquicꞌaxaj ja nkabij. Triꞌ cꞌa nkotakij wiꞌ echinatak ja reꞌucꞌan rmal ja rEspíritu xin Dios, jun Espíritu ja mta tzꞌakoj tzij rcꞌamonto, in echinatak ja reꞌucꞌan rmal ja respíritu xin diablo, jun espíritu ja xa tzꞌakoj tzij rcꞌamonto. 
\s * * * * * * * * * * 
\p 
\v 7 Chakꞌlaj wachꞌalal, congana rjawaxic chi nkajoꞌ kiꞌ. Ja rajoben riꞌil ruqꞌuin Dios winakarnakto wiꞌ. Ja nawajoꞌ awiꞌ jariꞌ at ralcꞌwal Dios, jariꞌ awotak rwach ja Dios. 
\v 8 Ja Dios arjaꞌ ni rcꞌan wiꞌ ja rajoben riꞌil rmalcꞌariꞌ ja tok nbij chewe, ja wi matawajoꞌ awiꞌ jariꞌ ma awotak ta rwach ja Dios. 
\v 9 Ja Dios xutakto ja Ralcꞌwal chi katoꞌic, ni xarwariꞌ jun ja Ralcꞌwal. Triꞌ nkatzꞌat wiꞌ chi nokrajoꞌ ja Dios como xutakto ja Ralcꞌwal waweꞌ chwachꞌulew. Queriꞌ xuban utzcꞌa chi rmal ja Ralcꞌwal nkawil ja utzlaj cꞌaslemal ja mta qꞌuisic trij. 
\v 10 Ja Dios ma ajoj ta xokajoꞌn rxin nabey, arjaꞌ xajoꞌn kaxin nabey como xutakto ja Jesucristo ja Ralcꞌwal chi arjaꞌ xoc chomarsbal rxin ja kil kamac chwach ja Dios. Triꞌ nkatzꞌat wiꞌ ja kas mero rbanic ja rajoben riꞌil. 
\p 
\v 11 Chakꞌlaj wachꞌalal, queriꞌ xuban ja Dios, arjaꞌ congana xokrajoꞌ rmalcꞌariꞌ nbij chewe chi yatal chakij chi nkajoꞌ kiꞌ ajoj chakajaꞌ. 
\v 12 Ja Dios majun nak ta tzꞌatyon rxin pro wi nkajoꞌ kiꞌ jariꞌ nqꞌuejeꞌ pa tak kanma ja Dios in chakajaꞌ nqꞌuiyi nwachini pa tak kanma ja rajoben riꞌil rxin. 
\p 
\v 13 Ja Dios ryaꞌonto chake ja rEspíritu rxin, triꞌ cꞌa nkatzꞌat wiꞌ chi okcꞌo pa ranma in arjaꞌ chakajaꞌ cꞌo pa tak kanma. 
\v 14 In ajoj chakajaꞌ katzꞌat rwach ja Jesucristo ja Ralcꞌwal Dios in nkayaꞌ rbixic chi arjaꞌ takto rmal ja Tatixel, xoc Toꞌonel kaxin kanojelal ja rok winak. 
\v 15 Canojel ja winak ja nebini chi Jesús arjaꞌ Ralcꞌwal Dios ejeꞌeꞌ riꞌ cꞌoli pa tak canma ja Dios in ejeꞌeꞌ chakajaꞌ ecꞌo pa ranma ja Dios. 
\v 16 Ajoj kotak chi ja Dios nokrajoꞌ, yukul kacꞌuꞌx ruqꞌuin ja rajoben riꞌil rcꞌan. Ja Dios ni rxin wiꞌ ni rcꞌan wiꞌ ja rajoben riꞌil. Kanojelal ja kucꞌan chic ja rajoben riꞌil xin Dios jariꞌ okcꞌo pa ranma ja Dios in queriꞌ chake ajoj chakajaꞌ cꞌoli ja Dios pa tak kanma. 
\v 17 Ja wi matikaxbej kiꞌ chwach ja nimlaj kꞌij xin juicio ja tok xtipi chic jutij ja Jesucristo triꞌ nkatzꞌat wiꞌ chi qꞌuiynak chic in wachinnak chic ja rajoben riꞌil xin Dios pa tak kanma. Ajoj cꞌa okcꞌo na waweꞌ chwachꞌulew pro como xa junan chic kanaꞌoj ruqꞌuin ja Jesucristo chewiꞌ tok matikaxbej kiꞌ chwach. 
\v 18 Ja rajoben riꞌil xin Dios ni majun xbeben riꞌil rcꞌan. Pro ja rbanic, ja wi nwachini ja rajoben riꞌil xin Dios chipan ja rawanma ja cꞌa xbeben riꞌil nlasaxel rmal. Ja xbeben riꞌil congana lawuloꞌ nuban chawe. Ja wi xa naxbej awiꞌ jariꞌ majaꞌn tiqꞌuiyi chi utz majaꞌn tiwachini ja rajoben riꞌil xin Dios chipan ja rawanma. 
\v 19 Ja Dios arjaꞌ xokrajoꞌ ajoj nabey rmalcꞌariꞌ tok nkajoꞌ arjaꞌ chakajaꞌ. 
\v 20 Ja wi cꞌo jun nbij: —Anin nwajoꞌ ja Dios, wi neꞌe, pro wi xa itzel nutzꞌat jun rchꞌalal jariꞌ xa tzꞌakol tzij. Ja rawachꞌalal cꞌoloc chawach, natzꞌat rwach pro wi matawajoꞌ ¿nak ta cꞌa moda ariꞌ natcowini nawajoꞌ ja Dios ja matitzꞌattaji? 
\v 21 Ja mandamiento xin Dios quewaꞌ nbij chake riꞌ: —Ja wi ninewajoꞌ anin rjawaxic chi neꞌewajoꞌ ja rewachꞌalal chakajaꞌ, neꞌe ja Dios chake. 
\c 5
\s * * * * * * * * * * 
\p 
\v 1 Kanojel ja kaniman ja Jesús chi arjaꞌ ja Cristo ja chaꞌon rmal ja Dios, ja wi queriꞌ kaniman ok ralcꞌwal Dios cꞌariꞌ. Caniꞌ tre jun alcꞌwalaxel ja wi nrajoꞌ ja rtataꞌ nerajoꞌ cꞌariꞌ chakajaꞌ ja juleꞌ chic rchꞌalal. 
\v 2 Ja wi nkajoꞌ ja Dios in wi nkanimaj ja rmandamiento triꞌ nkatzꞌat wiꞌ chi nekajoꞌ ja ralcꞌwal Dios chakajaꞌ. 
\v 3 Ja wi nkanimaj ja mandamiento xin Dios jariꞌ nkacꞌutbej chi nkajoꞌ ja Dios chakajaꞌ. Ja cꞌa mandamiento xin Dios ma al ta rcꞌaxic 
\v 4 como arjaꞌ ryaꞌon kachokꞌakꞌ kanojel ja rok ralcꞌwal in rmalariꞌ ja ritzelal xin rwachꞌulew maticowin chakij, ajoj nokchꞌocmaji. Rmal ja yukulbal kacꞌuꞌx ruqꞌuin ja Jesucristo chewiꞌ tok nokchꞌocmaji. 
\v 5 ¿Echinatak cꞌariꞌ ja nechꞌocmaji? Ajoj cꞌariꞌ ja kaniman ja Jesús chi arjaꞌ ja Ralcꞌwal Dios ajoj nokchꞌocmaji. 
\s * * * * * * * * * * 
\p 
\v 6 Ja tok peti ja Jesucristo cꞌoli kꞌalasan rxin chi Ralcꞌwal Dios jariꞌ tok ban bautizar in tok camsaxi xutix ja rquiqꞌuel chwach cruz. Ma chaka ta ruyon ariꞌ ja ban bautizar pro xutix ja rquiqꞌuel chwach cruz chakajaꞌ. Ja rEspíritu Santo arjaꞌ nbini chakajaꞌ chi ja Jesucristo arjaꞌ Ralcꞌwal Dios. Ja rEspíritu Santo ni rxin wiꞌ chi katzij nojel ja nbij. 
\v 7 E oxiꞌ ja recꞌo chilaꞌ chicaj ja xa junan nquibij tre ja Jesús chi arjaꞌ Ralcꞌwal Dios, jun, Dios ja Tatixel, in jun chic, ja Ralcꞌwalaxel ja nkꞌalasani janiꞌ rnaꞌoj ja Dios, in jun chic, ja rEspíritu Santo. 
\v 8 In chakajaꞌ oxiꞌ rwach ja testigo ja cꞌo chwachꞌulew, jun, ja rEspíritu Santo, in jun chic, ja tok ban bautizar ja Jesús, in jun chic, tok xutix ja rquiqꞌuel chwach cruz, xa junan nkꞌalasaj chi oxiꞌ chi Jesús arjaꞌ Ralcꞌwal Dios. 
\v 9 Como nekanimaj winak tok nqueyaꞌ testigoꞌil rmalcꞌariꞌ tok más na rjawaxic chi nkanimaj ja testigo xin Dios. Ja Dios rcojon ja testigo chi rkꞌalasaxic chi ja Jesús arjaꞌ ja Ralcꞌwal. Ja testigoꞌil nuyaꞌ ja Dios más na nim rukꞌij chwach ja nqueyaꞌ winak. 
\v 10 Kanojel ja yukul kacꞌuꞌx ruqꞌuin ja Ralcꞌwal Dios cꞌo chic ja testigoꞌil xin Dios pa tak kanma ja nyabex kaseguro. Ja wi matanimaj ja nbij ja Dios nel cꞌariꞌ xa caniꞌ tzꞌakol tzij nacoj wiꞌ. Queriꞌ naban ja wi matanimaj ja testigoꞌil ja ryaꞌonto ja Dios tre ja Ralcꞌwal. 
\v 11 Ja testigoꞌil xin Dios quewaꞌ nucꞌut chikawach riꞌ, chi arjaꞌ Dios ryaꞌon chake ja utzlaj cꞌaslemal ja mta qꞌuisic trij in ruqꞌuin ja Ralcꞌwal nkawil wiꞌ. 
\v 12 Ja wi awcꞌan ja Ralcꞌwal Dios chipan ja rawanma jariꞌ awcꞌan chic ja utzlaj cꞌaslemal ja mta qꞌuisic trij. Ja cꞌa wi ma awcꞌan ta ja Ralcꞌwal Dios pan awanma jariꞌ ma awcꞌan ta ja utzlaj cꞌaslemal ja mta qꞌuisic trij. 
\s * * * * * * * * * * 
\p 
\v 13 Anin xintzꞌibajel ja carta riꞌ in ntakel ewqꞌuin ixix ja yukul ecꞌuꞌx ruqꞌuin ja Jesucristo ja Ralcꞌwal Dios. Ja xintzꞌibaj chipan jariꞌ nyabej eseguro chi ixix ewcꞌan chic ja utzlaj cꞌaslemal ja mta qꞌuisic trij. 
\p 
\v 14 Yukul kacꞌuꞌx ruqꞌuin ja Dios chi arjaꞌ ncꞌulbaꞌ ja roración nkaban ja wi utz ncꞌaxaj ja nkacꞌutuj tre. 
\v 15 Como kotak chi Dios ncꞌaxaj ja koración nkaban xa nak ta nkabij tre rmalcꞌariꞌ kotak chi arjaꞌ ni nuyaꞌ wiꞌ chake ja nkacꞌutuj tre. 
\p 
\v 16 Ja tok nkatzꞌat jun kachꞌalal wi xuban jun ril kabanaꞌ orar pa rcuenta in nyataj na tre ja utzlaj cꞌaslemal rmal ja Dios. Queriꞌ rubey ja wi ma ja ta xuban ja mta cuytajic trij ja natcꞌamoꞌel chijutij chipan ja camíc. Pro cꞌoli ja il mac wi xaban natrucꞌamel chijutij chipan ja camíc jariꞌ matinbij chi nkayaꞌ pan oración. 
\v 17 Nojelal ja naban ja matirajoꞌ Dios chawe chi naban jariꞌ il mac. Pro cꞌoli ja il mac wi xaban cꞌoli cuytajic trij in macatrucꞌamel chijutij chipan ja camíc. 
\p 
\v 18 Kotak chi kanojel ja rokalaxnak chic jutij ja cꞌo rcꞌaslemal Dios pa tak kanma ajoj makomacuni pro ja Jesús ja Ralcꞌwal Dios arjaꞌ nokchajini in maticowini ja diablo nokruchap ta. 
\p 
\v 19 Kotak chakajaꞌ chi ajoj okcꞌo pa rcuenta ja Dios pro ja juleꞌ chic winak ja recꞌo chwachꞌulew xa pa rukꞌaꞌ ja diablo ecꞌo wiꞌ. 
\p 
\v 20 In kotak chakajaꞌ chi ja Jesús ja Ralcꞌwal Dios peti waweꞌ chwachꞌulew in xuyaꞌ chake chi kotakij rwach ja Dios ja katzij chi Dios. In ajoj xa jun kabanon ruqꞌuin ja Dios ja katzij chi Dios in xa jun kabanon ruqꞌuin ja Jesucristo ja Ralcꞌwal, ruyon arjaꞌ ja Dios ja katzij chi Dios, ruyon arjaꞌ nyowi ja utzlaj cꞌaslemal ja mta qꞌuisic trij. 
\v 21 Chakꞌlaj walcꞌwal, tebanaꞌ cuenta ewiꞌ, maxta tiyukeꞌ ecꞌuꞌx cuqꞌuin ja cachbal tak winak nixtacꞌa ruqꞌuin ta ja rachbal tak nakun. Amén.