\id EPH

\h SUN EFESIOS
\toc1 SUN EFESIOS
\mt JAꞌ TI SCARTA TI QUERMANOTIC TE TI EFESOE
\mt2 ti itsꞌibabat yuꞌun ti Pabloe
\c 1
\s Ti Pabloe hech lic scꞌopon ti carta ti quermanotic te ti Efesoe
\p
\v 1 Hoꞌon Pabloun, hoꞌon jcholcꞌopun yuꞌun ti Jesucristoe yuꞌun hech laj scꞌan yoꞌnton ti Diose. Chajcꞌoponoxuc ti carta, hoꞌoxuc ti jun avoꞌntonic achꞌunojbeic scꞌop ti Cristo Jesuse te ti jteclum Efesoe.
\v 2 Acꞌo yacꞌboxuc bendición ti Jtotic Diose xchiꞌuc ti Cajvaltic Jesucristoe. Acꞌo yacꞌboxuc jun avoꞌntonic ti jujunoxuque hech mu xloꞌlaj avoꞌntonic.
\s Jaꞌ scꞌopilal ti laj xa yacꞌbucutic ep bendición ti sventa ti Cristoe ti Diose
\p
\v 3 Acꞌo pasatuc ti mucꞌ ti Diose, jaꞌ ti Dios yuꞌun ti Cajvaltic Jesucristoe, jaꞌ ti Stot uque, yuꞌun laj xa yacꞌbucutic ti sventa ti Cristoe scotol ti bendicione ti oy ti vinajele.
\v 4 Ti cꞌalal mu to chlic spas ti balumile ti Diose, jaꞌ hech yorail lic stꞌujucutic yuꞌun hech ti sventa ti Cristoe toj coꞌntontic muꞌyuc jmultic chijcꞌotucutic ti stojol ti Diose.
\v 5 Yuꞌun cꞌuxucutic ti yoꞌnton, hech yuꞌun voꞌone hech xchapanoj ti yol snichꞌonucutic chijcꞌotucutic ti sventa ti Jesucristoe. Yuꞌun yutsil yoꞌnton ti hech laj yicꞌucutique.
\v 6 Yuꞌun ti hech laj yicꞌucutique, yuꞌun hech tscꞌan ti chichꞌ pasel ti mucꞌ stuc. Hech yuꞌun yutsil yoꞌnton laj xcꞌuxubinucutic, hech laj stsacucutic ti venta ti sventa ti Snichꞌone, jaꞌ ti lum cꞌux ti yoꞌntone.
\v 7 Yuꞌun ti lum ep laj xcꞌuxubinucutique hech yuꞌun laj yacꞌ ti milel ti cruz ti Snichꞌone ti jventatic. Hech yuꞌun ti colemucutic xa ti ora to. Chꞌayem xa jmultic.
\v 8 Yutsil yoꞌnton ti hech laj xa xcꞌuxubinucutique.
\v 9 Yutsil yoꞌnton ti laj xa yacꞌbucutic spꞌijil coꞌntontique. Scotol laj xa yacꞌbucutic jnaꞌtic. Ti ora to laj xa yacꞌbucutic jnaꞌtic ti Diose ti cꞌusi snopoj ti voꞌone yuꞌun laj xa stac talel ti Snichꞌone. Ti voꞌone muꞌyuc muchꞌu iꞌacꞌbat snaꞌ.
\v 10 Laj xa yacꞌbucutic jnaꞌtic ti Diose ti chꞌacbil xa yuꞌun ti cꞌusi ora tsta yorail ti chistsobucutic jcotoltic buc noꞌox oyucutic, mi te xa oyucutic ti vinajel, mi liꞌ to oyucutic ti balumil, yuꞌun hech chispasucutic ti mantal jcotoltic ti Cristoe.
\p
\v 11-12 Hoꞌontutic ti jmalaojtutic ti chtal ti Jcoltavaneje, hoꞌontutic ti judiountutique, jaꞌ ti sventa ti Cristoe ti yuꞌununtutic xa ti Diose. Hech xchapanoj ti voꞌone hech yuꞌun icꞌot xa ti pasel. Yuꞌun hech tspasat ti mucꞌ ti Diose ti jventatutic.
\v 13 Jaꞌ noꞌox hech uc ti hoꞌoxuque ti yanlum crixchanooxuque, cꞌalal laj avaꞌyic ti lequil achꞌ cꞌope ti jaꞌ melele, jaꞌ ti chijcolucutic yuꞌune, laj achꞌunic ti jaꞌ Jcoltavanej avuꞌunic uc ti Cristoe hech ti sventa ti Cristoe laj avichꞌic uc ti Chꞌul Espíritue ti albilucutic ti chquichꞌtique. Jaꞌ señail ti yuꞌunucutic xa ti Diose.
\v 14 Ti Chꞌul Espíritue ti quichꞌojtique jaꞌ señail yacꞌojbucutic ti Diose ti scotol chcꞌot quichꞌtic ti cꞌutic yalojbucutic ti chquichꞌtique. Hech pasbil ti mucꞌ ti Diose chcꞌot.
\s Jaꞌ scꞌopilal ti tscꞌambe vocol ti Diose ti Pabloe yuꞌun más acꞌo yojtiquinic ti Diose ti quermanotique
\p
\v 15 Laj xa caꞌibot acꞌopilalic ti lec achꞌunojbeic scꞌop ti Cajvaltic Jesuse, ti cꞌux chavaꞌyic scotol ti quermanotic ti coꞌol jchꞌunojtic xchiꞌuque ti buc noꞌox oyique.
\v 16 Hech yuꞌun cꞌalal hech laj caꞌi, hech lic calbe ti Diose: “Hocol aval ti hech laj xa xchꞌumbot acꞌop ti yanlum crixchanoetique”, xcut ti Diose. Asta ti ora hech chcalbe ti Diose. Scotol cꞌacꞌal chajnaꞌoxuc, ti jcꞌopon Dios ti atojolic.
\v 17 Ti jcꞌambe vocol ti Diose, jaꞌ ti Stot ti Jesucristoe, ti acꞌo xayacꞌboxuc spꞌijil avoꞌntonic, ti acꞌo xayacꞌboxuc más yuꞌun chavojtiquinic stuc yuꞌun jelaven yutsil yoꞌnton ti Totile.
\v 18 Ti jcꞌambe vocol uc ti acꞌo xasjambot asatic xchiꞌuc avoꞌntonic yuꞌun hech chanaꞌic ti cꞌu cheꞌel chacꞌotic yuꞌun ti icꞌbiloxuc xa ti stojole. Hech chanaꞌic uc ti jelaven yutsil ti cꞌutic chcꞌot quichꞌtique jcotoltic ti coꞌol oyucutic ti stojol ti Diose.
\v 19 Hech chanaꞌic uc ti jelaven spꞌijil ti Diose ti yacꞌoj sba ch-abtej ti jtojoltic, hoꞌucutic ti jchꞌunojtique.
\v 20 Hech chaj cꞌu cheꞌel ivinaj ti yabtel ti Diose ti laj xchaꞌcuses loqꞌuel ti chꞌen ti Cristoe, patil laj snacan te ti sbatsꞌicꞌob te ti vinajel, jaꞌ noꞌox hech uc ti ora to chiscoltaucutic yuꞌun mu snaꞌ chjel ti spꞌijile.
\v 21 Ti ora to pasbil ti mucꞌ ti Cristoe. Jaꞌ tsots yabtel stuc. Jaꞌ mu tsotsuc yabtel yichꞌoj ti chꞌul abatetique. Yuꞌun ti Cristoe jaꞌ tspas ti mantal scotol presidenteetic, reyetic, gobiernoetic, ajvaliletic liꞌ ti balumile. Jaꞌ totil stuc ti Cristoe. Muꞌyuc muchꞌu hech yan tspasat ti mucꞌ liꞌ ti balumile o te ti vinajel mi ti ora to, mi sbatel osil. Jaꞌ noꞌox stuc ti Cajvaltique.
\v 22 Ti Diose laj xa yacꞌbe sventain scotol ti Cristoe. Laj xa yacꞌbe sventainucutic uc jcotoltic ti hoꞌucutic ti jchꞌunojbetic ti scꞌope. Jaꞌ joltic cꞌotem yuꞌun jaꞌ chispasucutic ti mantal.
\v 23 Jaꞌ sbecꞌtalucutic cꞌotemucutic hoꞌucutic ti jchꞌunojbetic ti scꞌope. Yuꞌun ti sbecꞌtalucutic cꞌotemucutique, hech quichꞌojbetic scotol ti yutsil ti Cristoe ti jaꞌ scotol sventainoje.
\c 2
\s Jaꞌ scꞌopilal ti yutsil noꞌox yoꞌnton ti Diose ti laj xa scoltaucutique
\p
\v 1 Hoꞌoxuc laj xa yacꞌboxuc avichꞌic achꞌ cuxlejal yuꞌun chamenoxuc onoꞌox laj yil ti Diose scoj ti mulile, scoj uc ti ep sbolil avoꞌntonique laj yil ti Diose.
\v 2 Yuꞌun ti voꞌone tale jaꞌ noꞌox laj atsꞌacliic ti crixchanoetique ti cꞌuc noꞌox tspasique. Jaꞌ achꞌunojbeic smantal ti ajvalil ti sventainoj ti balumile, jaꞌ ti pucuje, ti yacꞌoj sba ch-abtej ti stojol ti muchꞌutic mu scꞌan xchꞌumbeic scꞌop ti Diose.
\v 3 Ti voꞌone tal hechucutic jcotoltic. Jaꞌ batem ti coꞌntontic ti cꞌusi tscꞌan ti jbecꞌtaltique. Jaꞌ noꞌox laj jpastic cꞌusi tscꞌan ti jbecꞌtaltique, cꞌusi tscꞌan ti coꞌntontique. Hech yuꞌun coꞌol quechel onoꞌox quilintaeltic yuꞌun ti Diose xchiꞌuc scotol crixchanoetic.
\v 4 Yuꞌun stalel chcꞌuxubinvan ti Diose, hech yuꞌun laj xcꞌuxubinucutic.
\v 5 Chamenucutic laj yilucutic ti Diose yuꞌun ti jmultique, hech yuꞌun coꞌol laj yacꞌbucutic jcuxlejaltic xchiꞌuc ti Cristoe cꞌalal laj xchaꞌcuses loqꞌuel ti chꞌen. Yutsil noꞌox yoꞌnton ti Diose ti laj xa scoltaucutique.
\v 6 Coꞌol laj xa xchaꞌcusesucutic xchiꞌuc ti Cristoe chil ti Diose. Coꞌol laj xa snacanucutic te ti vinajel xchiꞌuc ti Cristo Jesuse chil ti Diose.
\v 7 Yuꞌun ti hech laj xcꞌuxubinucutique, yuꞌun hech sbatel osil chijyacꞌbucutic jqꞌueltic ti lum ep cꞌuxucutic ti yoꞌntone ti sventa ti Cristo Jesuse.
\v 8 Yutsil noꞌox yoꞌnton ti Diose ti laj xa achꞌumbeic ti scꞌope, ti colemoxuc xae. Mu yuꞌunuc hoꞌucoxuc ti aventaic ti nacolic xae. Jaꞌ amotonic ti laj xa yacꞌboxuc ti Diose.
\v 9 Yuꞌun mu ti sventauc cabteltic ti chijcolucutique yuꞌun naca me jtoy jbatic yuꞌun.
\v 10 Hech yuꞌun stuc laj xa scoltaucutic. Laj xa yacꞌbucutic achꞌ jcuxlejaltic ti sventa ti Cristo Jesuse yuꞌun hech xuꞌ cuꞌuntic ti jpastic lequil abteletic. Voꞌone hech xchapanoj ti Diose ti ta onoꞌox jpastic ti lequil abtele.
\s Jaꞌ scꞌopilal ti jaꞌ ti sventa ti Cristoe ti mu xa jcontrain jbatique
\p
\v 11 Hech yuꞌun mu me xchꞌay ti avoꞌntonic ti chꞌayemoxuc onoꞌox ti voꞌone, hoꞌoxuc ti yanlum crixchanooxuque. Ti hoꞌontutic ti quichꞌojtutic ti circuncisione mu yol snichꞌonucoxuc ti Diose laj quiloxuc yuꞌun mu xavichꞌic circuncisión. Hech yuꞌun mu xtun laj quiloxuc. Hovil ti mu xtun laj quiloxuque yuꞌun coꞌol mu jchꞌunojticuc ti Diose. Jaꞌ noꞌox tsots scꞌopilal icꞌot cuꞌuntutic ti oy señail ti jbecꞌtaltutique.
\v 12 Mu me xchꞌay ti avoꞌntonic ti cꞌu xaꞌelanic ti cꞌalal mu to oyucoxuc ti stojol ti Cristoe ti voꞌone. Yuꞌun parte oyucutic onoꞌox. Jun to muꞌyuc acꞌopilalic yuꞌun ti Diose. Jun to jaꞌ noꞌox jcꞌopilaltutic chicoltutic ti hoꞌontutique ti yelnichꞌonuntutic ti Israele. Hech yuꞌun muꞌyuc smucꞌul avoꞌntonic yuꞌun mu onoꞌox xavojtiquinic ti Diose. Hech oyoxuc ti voꞌone.
\v 13 Ti ora to yuꞌun oyoxuc xa ti stojol ti Cristo Jesuse, naꞌicꞌatic xa tal ti stojol ti Diose yuꞌun ti laj yacꞌ sba ti milel avuꞌunic ti Cristoe.
\v 14 Yuꞌun jaꞌ ti sventa ti Cristoe ti jtos coꞌntontic ti ora to. Laj xa spasucutic ti jtos noꞌox, hoꞌucutic ti chaꞌtos cꞌotemucutic onoꞌox ti voꞌone. Hech yuꞌun jaꞌ ti sventa ti Cristoe ti mu xa jcontrain jbatique hech chaj cꞌu cheꞌel ti voꞌone.
\v 15 Yuꞌun cꞌalal icham ti cruz ti Cristoe, laj stupꞌbe scꞌopilal ti mantaletique xchiꞌuc ti bu tsots scꞌopilale xchiꞌuc ti bu yamal scꞌopilale. Laj yacꞌ cꞌotuc ti jtos noꞌox chijcꞌotucutique, hoꞌucutic ti chaꞌtos cꞌotemucutic onoꞌoxe. Hech yuꞌun ti coꞌol achꞌ crixchanoucutic nijcꞌotucutic ti ora to. Hech yuꞌun mu xa jcontrain jbatic.
\v 16 Yuꞌun ti icham ti cruz cuꞌuntic ti Cristoe, hech laj yicꞌucutic sut tal ti stojol ti Diose. Hech yuꞌun ti jtos noꞌox nijcꞌotucutique, hoꞌucutic ti chaꞌtos cꞌotemucutic onoꞌoxe. Hech ilaj scꞌopilal ti chquilinta jbatique.
\p
\v 17 Yuꞌun ti Cristoe tal xcholbucutic ti coꞌol chijcolucutic ti sventa, hoꞌoxuc ti mu onoꞌox xavojtiquinic ti Diose ti voꞌone xchiꞌuc ti hoꞌontutique ti laj cojtiquintutic onoꞌox ti Diose.
\v 18 Hech yuꞌun jaꞌ ti sventa stuc ti Cristoe ti coꞌol ti jcꞌopontic ti Totile, hoꞌucutic ti chaꞌtos cꞌotemucutic onoꞌoxe. Yuꞌun jun noꞌox ti Chꞌul Espíritue ti sventainojucutique.
\v 19 Hech yuꞌun ti ora to mu xa parteucutic. Mu xa yanlum crixchanooxuc. Coꞌol jlumaltic xa, hoꞌucutic ti coꞌol oyucutic ti stojol ti Diose, yuꞌun coꞌol yol snichꞌonucutic xa.
\v 20 Yuꞌun ti hoꞌucutique snaucutic cꞌotemucutic ti Diose. Jaꞌ ti primero ton ti ch-och ti chiquina, jaꞌ tsots scꞌopilal. Jaꞌ ti Jesucristoe. Ti yan xchiꞌil ti yuꞌun hech tstsac yip batele, hoꞌontutic ti jcholcꞌopuntutique xchiꞌuc ti quermanotic ti chchꞌamumbat yeic yuꞌun ti Diose.
\v 21 Jaꞌ ti sventa ti Jesucristoe ti hech xmelmun tstsac sba batel ti nae. Jaꞌ noꞌox hech uc xmelmun ch-otesatic tal ti jchiꞌiltique jaꞌto asta templo chijcꞌot jcotoltic yuꞌun ti Cajvaltique.
\v 22 Ti hoꞌoxuque, yuꞌun achꞌunojbeic scꞌop ti Cajvaltique, hech yuꞌun te xa tiqꞌuiloxuc uc. Hech yuꞌun snaucutic Dios cꞌotemucutic jcotoltic yuꞌun oy ti coꞌntontic ti Chꞌul Espíritu yuꞌun ti Diose.
\c 3
\s Jaꞌ scꞌopilal ti Pabloe ti iꞌacꞌbat yabtel yuꞌun ti Diose ti chcholbe scꞌop Dios ti yanlum crixchanoetique
\p
\v 1 Yuꞌun oy acꞌopilalic ti chayicꞌoxuc ti Diose, hoꞌoxuc ti yanlum crixchanooxuque, hech yuꞌun hoꞌon Pabloun, hoꞌon ti liꞌ tiqꞌuilun ti chuquele yuꞌun ti hech chajcholboxuque, ti jcꞌopon Dios ti atojolic. Yuꞌun ti liꞌ tiqꞌuilun ti chuquele yuꞌun hech laj scꞌan ti Cristo Jesuse.
\v 2 Chcal ti avaꞌyojbun jcꞌopilal ti yutsil yoꞌnton laj yacꞌbun cabtel ti Diose yuꞌun chajcholboxuc ti scꞌope.
\v 3 Ti Diose laj yacꞌbun jnaꞌ ti coꞌnton ti cꞌusi muc xꞌacꞌbat snaꞌic ti crixchanoetic ti voꞌone, jaꞌ ti acꞌopilalic ti chaxcꞌuxubinoxuc uc ti Diose. Hech yuꞌun ti laj xa jtsꞌibaboxuc jutuc ti carta jaꞌ avi to.
\v 4 Hech yuꞌun ti cꞌalal chaqꞌuelic avi to, hech chanaꞌic ti jaꞌ laj yacꞌbun jnaꞌ ti Diose ti coꞌnton jaꞌ ti muꞌyuc muchꞌu iꞌacꞌbat snaꞌic ti voꞌonee, jaꞌ ti acꞌopilalic ti chascoltaoxuc uc ti Cristoe.
\v 5 Ti voꞌone muꞌyuc muchꞌu iꞌacꞌbat snaꞌic. Ti ora to niꞌacꞌbatutic xa jnaꞌtutic, hoꞌontutic ti jcholcꞌopuntutique, xchiꞌuc ti quermanotic ti chchꞌamumbat yeic yuꞌun ti Diose. Ti sventa ti Chꞌul Espíritue ti niꞌacꞌbatutic xa jnaꞌtutique.
\v 6 Jaꞌ niꞌacꞌbat xa jnaꞌtutic ti coꞌol jcꞌopilaltic ti chcꞌo quichꞌtic bendicione, hoꞌoxuc ti yanlum crixchanooxuque xchiꞌuc ti hoꞌontutique ti yelnichꞌonuntutic ti Israele. Yuꞌun jun noꞌox cꞌotemucutic xa ti sventa ti Cristoe. Coꞌol albilucutic jcꞌopilaltic ti chijcolucutic sbatel osil ti sventa ti Cristoe mi jchꞌunojtic ti lequil achꞌ cꞌope.
\v 7 Hoꞌon cabtel ti jchol ti lequil achꞌ cꞌope. Yutsil yoꞌnton hech laj yacꞌbun cabtel ti Diose. Yutsil yoꞌnton laj yacꞌbun yip coꞌnton yuꞌun hech xuꞌ cuꞌun ti cabtele.
\v 8 Ti hoꞌone más biqꞌuitun. Scotol yantic ti oyic ti stojol ti Diose jaꞌ más mucꞌ. Manchuc mi más biqꞌuitun, yutsil yoꞌnton laj yacꞌbun cabtel ti Diose yuꞌun chajcholboxuc avaꞌyic ti lequil achꞌ cꞌope, hoꞌoxuc ti yanlum crixchanooxuque. Jaꞌ ti jchol ti jelaven yutsil yoꞌnton ti Cristoe ti mu xlaj ti naꞌel cꞌu xꞌelane.
\v 9 Chcacꞌbe snaꞌic scotol crixchanoetic ti coꞌol chijcolucutic yuꞌun ti Diose. Mi yanlum crixchanooxuc, mi hoꞌontutic, coꞌol chijcolucutic. Hech xchapanoj onoꞌox ti Diose cꞌalal lic spas scotol ti cꞌutic oye. Ti crixchanoetic ti voꞌonee mu laj snaꞌic ti hech xchapanoj ti Diose ti chacolic uque.
\v 10 Hech yuꞌun ti ora to yuꞌun ti jun noꞌox nijcꞌotucutic xa, hoꞌucutic ti jchꞌunojtic ti jaꞌ Jcoltavanej cuꞌuntique, hech yuꞌun hoꞌucutic ti jventatic ti hech laj xa yilic ti totil chꞌul abatetique, jaꞌ ti te tspasic mantal te ti vinajele, ti jelaven spꞌijil ti Diose. Hech laj snaꞌic ti mu jtostosuc ti cꞌusi snopoj ti Diose.
\v 11 Yuꞌun ti Diose hech snopoj onoꞌox ti yoꞌnton ti jun noꞌox chijcꞌotucutic ti sventa ti Cajvaltic Cristo Jesuse.
\v 12 Jaꞌ ti sventa ti Cajvaltique ti oy stsatsal coꞌntontic ti stojol ti Diose. Jun coꞌntontic ti jcꞌopontic, mu xijxiꞌ yuꞌun jchꞌunojtic ti laj xa scoltaucutic ti Snichꞌone.
\v 13 Hech yuꞌun chacalbeic, mu me xavichꞌic mul ti hoꞌoxuque yuꞌun ti liꞌ chquichꞌ vocol ti aventaique. Jaꞌ sventa avutsilalic ti liꞌ chuculune.
\s Jaꞌ scꞌopilal ti lum ep cꞌuxucutic ti yoꞌnton ti Cristoe
\p
\v 14 Hech yuꞌun ti jquejan jba ti stojol ti Jtotic Diose, ti jcꞌopon Dios ti atojolic.
\v 15 Yuꞌun jaꞌ Jtotic jcotoltic xchiꞌuc ti chꞌul abatetic te ti vinajele xchiꞌuc hoꞌucutic liꞌ ti balumile.
\v 16 Yuꞌun ti jelaven yutsil yoꞌntone, hech yuꞌun ti jcꞌambe vocol yuꞌun acꞌo yacꞌboxuc stsatsal avoꞌntonic xchiꞌuc spꞌijil avoꞌntonic ti sventa ti Chꞌul Espíritu yuꞌune.
\v 17 Ti jcꞌambe vocol uc ti jꞌechꞌel acꞌo xasventaimboxuc avoꞌntonic ti Cristoe yuꞌun ti oy xchꞌunojel avoꞌntonique. Yuꞌun ti chaxcꞌuxubinoxuque, hech yuꞌun acꞌo cꞌuxuc ti avoꞌntonic acotolic. Hech ch-an yip avoꞌntonic, hech mu xchibaj avoꞌntonic.
\v 18-19 Hech coꞌol chcꞌot ti coꞌntontic jcotoltic ti lum ep cꞌuxucutic ti yoꞌnton ti Cristoe, ti mu pꞌisbiluc chixcꞌuxubinucutique, ti hoꞌucutique ti oyucutic ti stojol ti Diose. Yuꞌun ti jcꞌan ti chanaꞌic ti mero melel ti ep cꞌuxoxuc ti yoꞌntone, jaꞌ ti mu stacꞌ naꞌel yuꞌun lum ep. Yuꞌun mi hech chachꞌunique, hech chnoj ti avoꞌntonic ti yutsil yoꞌnton ti Diose.
\p
\v 20 Ti Diose ti yacꞌoj sba ch-abtej ti coꞌntontique, más jelaven xuꞌ tspas. Jutuc noꞌox ti cꞌutic ti jcꞌambetique, ti cꞌutic ti jnoptic ti jcꞌambetique.
\v 21 Hech yuꞌun acꞌo jpastic ti mucꞌ scotol ora asta sbatel osil jcotoltic ti jcꞌopilaltic chijcolucutic ti sventa ti Cristo Jesuse. Jun yutsil ti hech chcꞌot ti pasel.
\c 4
\s Jaꞌ scꞌopilal ti jun noꞌox nijcꞌotucutic ti sventa ti Chꞌul Espíritue
\p
\v 1 Hoꞌon ti liꞌ tiqꞌuilun ti chuquele yuꞌun chiꞌabtej yuꞌun ti Cajvaltique, hech chacalbeic. Yuꞌun ti laj xa yicꞌoxuc ti stojol ti Diose hech yuꞌun tscꞌan ti toj me chapas abaic liꞌ ti balumile.
\v 2 Biqꞌuit me chavacꞌ abaic. Mu me xatoy abaic. Acꞌo oyuc yip avoꞌntonic, hech chapasbe abaic perdón. Hech chvinaj ti cꞌux chavaꞌi abaique.
\v 3 Yuꞌun jun noꞌox nacꞌotic ti sventa ti Chꞌul Espíritue hech yuꞌun mu me xapꞌev abaic. Tsotsuc me scꞌopilal ti avoꞌntonic ti mu xapꞌev abaique.
\v 4 Yuꞌun jun noꞌox nijcꞌotucutic jcotoltic ti hoꞌucutic ti jchꞌunojtique. Jun ti Chꞌul Espíritu ti quichꞌojtique. Hech onoꞌox uc jun noꞌox ti jcuxlejaltic ti chcꞌot quichꞌtique yuꞌun coꞌol icꞌbilucutic ti stojol.
\v 5 Jun ti Cajvaltique, jtos ti cꞌop ti jchꞌunojtique, jun noꞌox ti ichꞌ hoꞌe.
\v 6 Jun ti Dios cuꞌuntique, jaꞌ ti Jtotic cuꞌuntic jcotoltique. Jaꞌ chispasucutic ti mantal jcotoltic, chisventainucutic jcotoltic yuꞌun hech chijtun yuꞌun, oy ti coꞌntontic jcotoltic.
\p
\v 7 Jujunucutic yutsil yoꞌnton laj xa yacꞌbucutic jpꞌijiltic ti Cristoe. Yantic ti jpꞌijiltic ti yacꞌojbucutic xa ti jujunucutique, jaꞌ ti cꞌu cheꞌel tscꞌan ti yoꞌntone.
\v 8 Yuꞌun hech albil scꞌopilal ti Cristoe ti scꞌop ti Diose:
\q Tsjimbe yabtel ti pucuje yuꞌun hech tscolta locꞌ tal ti snichꞌone.
\q Patil tsut batel ti vinajel.
\q Cꞌalal te xa oy ti vinajel chlic yacꞌbe yal tal spꞌijilic ti xnichꞌnabe,
\m ti xchie.
\p
\v 9 Yuꞌun ti “tsut batel ti vinajel”, ti xchie, yuꞌun te onoꞌox yalem tal ti vinajel. Maꞌuc noꞌox liꞌ ti balumil ihul, iyal batel cꞌalal ti cꞌatimbac uc.
\v 10 Jaꞌ Cristo ti iyal tale. Jaꞌ onoꞌox ti ichaꞌsut muel ti vinajele yuꞌun hech laj sventain scotol, balumil, cꞌatimbac, vinajel.
\v 11 Jaꞌ hech laj yacꞌbuntutic jpꞌijiltutic. Oy laj yacꞌbun jpꞌijiltutic yuꞌun chcaltutic ti cꞌu yepal laj quiltutic ti iꞌay ti Cristoe. Oy laj yacꞌbun jpꞌijiltutic yuꞌun chixchꞌamumbuntutic quetutic ti Diose ti ora noꞌox chcaltutic ti cꞌu cheꞌel chiyacꞌbuntutic jnaꞌtutic ti Diose. Oy laj yacꞌbun jpꞌijiltutic yuꞌun chba calbetutic ti scꞌop ti Diose ti muchꞌutic mu yaꞌyojuque. Oy laj yacꞌbun jpꞌijiltutic yuꞌun ti jventaintutic ti jchꞌunojeletique ti jujutsop. Oy laj yacꞌbun jpꞌijiltutic yuꞌun ti jchanubtastutic ti scꞌop ti Diose ti quermanotique.
\v 12 Hech laj spas ti Diose yuꞌun hech chichꞌ coltael ti muchꞌutic tꞌujbil yuꞌune yuꞌun hech chacꞌ sbaic ti abatinel yuꞌun ti Diose. Hech stsac yip ti scꞌop ti Cristoe.
\v 13 Hech xmelmun batel asta coꞌol oy xchꞌunojel coꞌntontic jcotoltic, asta coꞌol chcojtiquintic ti Snichꞌon ti Diose. Hech ibat o. Hech oy yip coꞌntontic. Hech oy yutsil coꞌntontic hech chaj cꞌu cheꞌel yutsil yoꞌnton ti Cristoe.
\v 14 Yuꞌun mu xtun mi hech chaj cꞌu cheꞌel ololetic jꞌocꞌ toyol coꞌntontic jꞌocꞌ tspecꞌtsaj coꞌntontic. Yuꞌun mi hech ti coꞌntontique, cꞌuc noꞌox cꞌop ti jchꞌuntic hech chislicucutic batel hech chaj cꞌu cheꞌel oy cꞌusi tslic batel ti iqꞌue. Mu hechuc chcꞌot ti pasel mi oy yip coꞌntontic. Mu xijlaj ti loꞌlael yuꞌun ti muchꞌutic pꞌij yoꞌntonic scuyoj sbaique. Mu xbolib coꞌntontic yuꞌun ti cꞌusi mu meleluque ti chijyalbucutique.
\v 15 Ti hoꞌucutique ti jchꞌumbetic ti scꞌop ti Diose ti jaꞌ melele. Chijcꞌuxubinvanucutic. Ti jchambetic yoꞌnton ti Cristoe yuꞌun jaꞌ joltic cꞌotem.
\v 16 Jaꞌ sventainojucutic jcotoltic yuꞌun jaꞌ sbecꞌtalucutic cꞌotemucutic. Hech yuꞌun lec ti jchiꞌin jbatic ti abtel xchiꞌuc ti Cristoe. Hech yuꞌun coꞌol ti jcolta jbatic yuꞌun hech xuꞌ ti yabtel ti Diose. Hech coꞌol oy yip coꞌntontic yuꞌun cꞌux chcaꞌi jbatic jcotoltic hech ch-epaj ti muchꞌutic chchꞌumbeic scꞌop ti Cristoe.
\s Jaꞌ scꞌopilal ti jaꞌ ti cꞌu cheꞌel tscꞌan lec ti jpastic yuꞌun ti quichꞌojtic ti achꞌ cuxlejale ti sventa ti Cristoe
\p
\v 17 Hech yuꞌun chacalbeic avi to. Chajpasoxuc ti mantal ti stojol ti Cajvaltique. Mu xa me xanopic hech chaj cꞌu cheꞌel tsnopic ti achiꞌiltaque ti mu snaꞌic bu oy ti Diose yuꞌun hovil ti cꞌusi tsnopic ti yoꞌntonique.
\v 18 Oy ti icꞌ osil ti yoꞌntonique. Muꞌyuc bu yichꞌojic xcuxlejalic yuꞌun ti Diose yuꞌun bol yoꞌntonic, mu scꞌan xchꞌunic.
\v 19 Jꞌechꞌel boliben yoꞌntonic, puru mulivajel batem ti yoꞌntonic, mu spajes sbaic mi jutuc, toyol yoꞌntonic yuꞌun tspasic scotol ti cꞌusi chopole.
\v 20 Ti hoꞌoxuque mu hechuc chachanubtasat yuꞌun ti Cristoe.
\v 21 Yuꞌun avaꞌyojbeic scꞌopilal ti Jesuse, yuꞌun nachanubtasatic ti scꞌope ti jaꞌ melele,
\v 22 hech yuꞌun jꞌechꞌel comesic ti poco cuxlejale, jaꞌ ti cꞌusi laj apasic ti voꞌonee. Yuꞌun chisloꞌlaucutic ti jbecꞌtaltique asta chꞌayel chijbat yuꞌun.
\v 23 Jaꞌ me xanopic ti achꞌe.
\v 24 Cꞌanic me ti achꞌ cuxlejale, jaꞌ ti toj avoꞌntonique ti lec avoꞌntonique ti mero melel hech chaj cꞌu cheꞌel yoꞌnton ti Diose.
\p
\v 25 Hech yuꞌun jꞌechꞌel chacomesic ti nopcꞌope. Meleluc me ti cꞌusi chavalbe abaique, yuꞌun coꞌol achiꞌinoj abaic ti stojol ti Cristoe.
\p
\v 26 Mi chaꞌiline, mu me teuc chata amul yuꞌun. Acꞌo lajuc avoꞌnton ti ora, mu me sjunuluc cꞌacꞌal chaꞌilin.
\v 27 Yuꞌun ti cꞌalal ilinemote, mu vocoluc chasujot ti mulil ti pucuje.
\p
\v 28 Hoꞌoxuc ti jꞌelecꞌoxuc onoꞌoxe, mu xa me xaꞌelcꞌajic. Jaꞌ tscꞌan ti Diose ti acꞌo tunuc ti acꞌobique yuꞌun chapasic lequil abtel, yuꞌun chacoltaic ti muchꞌutic meꞌonetique.
\p
\v 29 Mu me xlocꞌ bolcꞌop ti ave. Jaꞌ noꞌox chaval ti lequil cꞌope yuꞌun hech chacolta ti muchꞌu chacꞌopone, hech chichꞌ bendición ti aventa.
\v 30 Mu me xavacꞌbe yichꞌ mul ti Chꞌul Espíritu yuꞌun ti Diose yuꞌun jaꞌ señail yacꞌojboxuc ti Diose ti chacolique cꞌalal tsta yorail ti chijcolucutic jcotoltique.
\p
\v 31 Acꞌo comuc avuꞌunic ti scꞌacꞌal avoꞌntonique xchiꞌuc ti chaꞌilinique xchiꞌuc cꞌacꞌal cꞌop, xchiꞌuc labanvanej, xchiꞌuc scotol ti cꞌusi chopole.
\v 32 Cꞌux me xavaꞌi abaic. Acꞌo ti qꞌuelel yutsil avoꞌntonic. Pasbo abaic perdón hech chaj cꞌu cheꞌel laj xa spasbot perdón ti Diose ti sventa ti Cristoe.
\c 5
\s Jaꞌ scꞌopilal acꞌo ti qꞌuelel ti yol snichꞌonoxuc ti Diose, xchi
\p
\v 1 Yuꞌun yol snichꞌonoxuc ti Diose, hech yuꞌun cꞌuxoxuc ti yoꞌntone. Hech yuꞌun tscꞌan ti chachambeic yoꞌnton ti Jtotique.
\v 2 Tscꞌan ti chacꞌuxubinvanic hech chaj cꞌu cheꞌel chcꞌuxubinvan ti Cristoe. Yuꞌun ti Cristoe muc xcꞌuxubin sba. Jaꞌ laj xcꞌuxubinucutic hech laj yacꞌ sba ti milel cuꞌuntic. Hech lec yoꞌnton ti Diose yuꞌun ti laj xcꞌuxubinucutic ti Cristoe.
\p
\v 3 “Chmulivajic, chopol ti cꞌusi tspasique, chbicꞌtaj yoꞌntonic”, mu me xchiuc acꞌopilalic, hoꞌoxuc ti oyoxuc xa ti stojol ti Diose.
\v 4 Yuꞌun yol snichꞌonoxuc ti Diose, hech yuꞌun mu snupin mi chlocꞌ ti ave bolcꞌop xchiꞌuc hovilcꞌop xchiꞌuc loquil loꞌil. Jaꞌ tsnupin mi chavalilambeic vocol ti Diose.
\v 5 Naꞌic me ti muchꞌu tspasilanic mulivajel xchiꞌuc ti muchꞌu tspasilanic ti cꞌusi chopole xchiꞌuc ti muchꞌutic scotol cꞌacꞌal chbicꞌtaj yoꞌntonic yuꞌun taqꞌuin yuꞌun jaꞌ dios cꞌotem yuꞌunic ti staqꞌuinique, mu xuꞌ chba xchiꞌinic ti Cristoe, jaꞌ ti Dios cuꞌuntique.
\v 6 Mu me xalajic ti loꞌlael yuꞌun ti scꞌop ti muchꞌutic mu hechuc chchꞌunique. Yuꞌun ti muchꞌutic hech tspꞌajilambeic smantal ti Diose, quechel yilintael yuꞌun ti Diose ti stojolic.
\v 7 Hech yuꞌun mu me xba achiꞌinic ti muchꞌutic hech tsaꞌilan smulique.
\p
\v 8 Ti voꞌone jun to puru icꞌ osil ti avoꞌntonic yuꞌun puru mulil te oy. Ti ora to puru squeval cꞌacꞌal xa oy ti avoꞌntonic yuꞌun lecuben xa ti avoꞌntonique ti sventa ti Cajvaltique. Hech yuꞌun acꞌo ti qꞌuelel ti lecuben xa ti avoꞌntonique.
\v 9 Yuꞌun mi lecuben ti coꞌntontique, jaꞌ chlocꞌ tal puru lec, puru toj, puru melel.
\v 10 Jaꞌ me xanopilanic ti cꞌusi lec chil ti Cajvaltique.
\v 11 Mu me xachiꞌinic ti muchꞌu chopol ti cꞌusi tspasique yuꞌun oyic ti icꞌ osil. Jaꞌ lec ti chavalbe ti scꞌop Diose ti mu xtun ti hech tspase.
\v 12 Yuꞌun chopol ti jyalel ti cꞌusi tspasique, hech yuꞌun chijqꞌuexavucutic ti yalel.
\v 13 Yuꞌun mi chcalbetic ti scꞌop Diose, hech chilic ti chopol ti cꞌusi tspasique. Mi chchꞌunic ti oy smulique, hech oy chlic sutes yoꞌntonic, hech chlic lecubuc yoꞌntonic uc.
\v 14 Jaꞌ yuꞌun ti hech chal:
\q Chchaꞌcuxi ti muchꞌu chamen chil ti Diose yuꞌun ti mulile.
\q Ch-acꞌbat achꞌ cuxlejal yuꞌun ti Cristoe,
\m ti xchie.
\p
\v 15 Pꞌijanic me, lecuc me ti cꞌusi chapasique. Mu me bolucoxuc. Pꞌijucoxuc me.
\v 16 Jaꞌ tscꞌan ti jujun cꞌacꞌale pasic me ti cꞌusi leque yuꞌun yacꞌoj sba ch-epaj ti mulil ti ora to.
\v 17 Hech yuꞌun mu me xapasic ti cꞌusi mu xtune. Cꞌambo vocol ti Diose yuꞌun acꞌo xayacꞌbot anaꞌic ti cꞌusi chapasique.
\v 18 Mu me xayacubic yuꞌun jaꞌ chasbolibtasot. Jaꞌ acꞌo xasventaimboxuc avoꞌntonic ti Chꞌul Espíritue.
\v 19 Jaꞌ lec cꞌopono abaic ti scꞌop ti Diose xchiꞌuc ti sqꞌuejoj ti Diose. Qꞌuejinanic ti avoꞌntonic yuꞌun ti Cajvaltique. Albeic ep vocol ti stojol.
\v 20 Ti cꞌusi chayacꞌbot ti Diose mi bendición mi vocol, tscꞌan ti hocol aval xavutic ti Jtotic Diose. Jaꞌ ti sventa ti Cajvaltic Jesucristoe yuꞌun ti hech chavalique.
\s Jaꞌ scꞌopilal chꞌumbo abaic amantalic, xchi
\p
\v 21 Chꞌumbo abaic amantalic hech chapasic ti mucꞌ ti Cristoe.
\p
\v 22 Antsetic, chꞌumbeic smantal ti amalalique hech chachꞌumbeic smantal ti Cajvaltique.
\v 23 Yuꞌun ti vinique tsventain ti yajnile hech chaj cꞌu cheꞌel chisventainucutic ti Cristoe hoꞌucutic ti jchꞌunojbetic ti scꞌope. Ti antse ch-uꞌuninat yuꞌun ti smalale yuꞌun chcoltaat yuꞌun, hech chaj cꞌu cheꞌel chijyuꞌuninucutic ti Cristoe yuꞌun laj yacꞌ sba ti milel cuꞌuntic.
\v 24 Hech yuꞌun hech chaj cꞌu cheꞌel ti jchꞌumbetic smantal ti Cristoe, hoꞌucutic ti jchꞌunojelucutique, jaꞌ noꞌox hech uc acꞌo xchꞌumbeic scotol smantal smalalic ti antsetique.
\p
\v 25 Viniquetic, cꞌux me xavaꞌyic ti avajnilique hech chaj cꞌu cheꞌel cꞌux laj yaꞌyucutic ti Cristoe yuꞌun laj yacꞌ sba ti milel cuꞌuntic, hoꞌucutic ti jchꞌunojtic ti jaꞌ Jcoltavanej cuꞌuntique.
\v 26 Nispocbucutic coꞌntontic. Ti ichꞌhoꞌe jaꞌ yuꞌun ti pocbil xa ti coꞌntontique. Lecuben xa ti coꞌntontique ti sventa ti scꞌope.
\v 27 Yuꞌun hech chijyicꞌucutic ti stojol jcotoltic ti jchꞌunojtic ti jaꞌ Jcoltavanej cuꞌuntique yuꞌun oy yutsil coꞌntontic, mi jutuc mu chopolucutic, mi jutuc mu bolibenucutic, mi jutuc muꞌyuc cꞌusi yan. Lecubtasbil coꞌntontic chijcꞌot, muꞌyuc jmultic chijcꞌot ti stojol.
\v 28 Jaꞌ noꞌox hech uc ti viniquetique cꞌux acꞌo yaꞌyic ti yajnilique hech chaj cꞌu cheꞌel cꞌux chaꞌyic ti sbecꞌtalique. Ti muchꞌu cꞌux chaꞌi ti yajnile, cꞌux chaꞌi sba uc yuꞌun jun noꞌox icꞌotic xa.
\v 29 Yuꞌun muꞌyuc muchꞌu chilinta ti sbecꞌtale. Jaꞌ tsmacꞌlin, chcꞌuxubin hech chaj cꞌu cheꞌel chismacꞌlinucutic, chixcꞌuxubinucutic ti Cristoe, hoꞌucutic ti jchꞌunojtic ti jaꞌ Jcoltavanej cuꞌuntique.
\v 30 Jaꞌ svinquilel Cristo cꞌotemucutic. Sbecꞌtal xchiꞌuc sbaquel cꞌotemucutic yuꞌun chixcꞌuxubinucutic.
\v 31 Yuꞌun hech tsꞌibabil ti scꞌop ti Diose: “Hech yuꞌun ti viniquetique tscomes stot smeꞌ, chicꞌ yajnil. Jun noꞌox chcꞌot xchiꞌuc yajnil”, ti xchie.
\v 32 Jaꞌ noꞌox hech jun oyucutic xchiꞌuc ti Cristoe, hoꞌucutic ti jchꞌunojtic ti jaꞌ Jcoltavanej cuꞌuntique. Jun noꞌox yutsil, mu stacꞌ jnaꞌtic cꞌu xꞌelan.
\v 33 Hech yuꞌun jujunoxuc cꞌux me xavaꞌyic avajnilic hech chaj cꞌu cheꞌel cꞌux chavaꞌi aba atuquic. Ti antsetique acꞌo spasic ti mucꞌ ti smalalique.
\c 6
\p
\v 1 Queremetic, tsebetic, chꞌumbeic smantal ti atot ameꞌique. Yuꞌun chanaꞌic ti hech tscꞌan ti Cajvaltique, hech chapasic.
\v 2 “Pasic me ti mucꞌ ti atot ameꞌique”, ti xchie. Jaꞌ ti jun mantal ti chal ti oy bendición chavichꞌique mi laj achꞌunique.
\v 3 Jaꞌ ti bendicione jaꞌ ti chnatej avorailic liꞌ ti balumile.
\p
\v 4 Hoꞌoxuc ti stot smeꞌoxuque, mu me xavilbajinic ti avol anichꞌonique yuꞌun hech asta chlic scꞌacꞌal yoꞌntonic avuꞌunic. Mu me hechuc chapasic. Jaꞌ tscꞌan ti oy ti avoꞌntonic ti Cajvaltique yuꞌun hech lec chapasic ti mantal, lec chataqꞌuiic ti stojol ti Cajvaltique. Yuꞌun ti lec chapasic ti mantale, persa chchꞌun ti amantalique.
\v 5 Hoꞌoxuc ti mambiloxuc, hech oyoxuc ti mozoile, chꞌumbeic smantal ti avajvalique liꞌ ti balumile, xiꞌic me, pasic me ti mucꞌ. Junuc me avoꞌntonic ti stojol hech chaj cꞌu cheꞌel jun avoꞌntonic ti stojol ti Cristoe.
\v 6 Maꞌuc noꞌox lec chaꞌabtejic cꞌalal yacꞌoj sba chasqꞌueloxuc yuꞌun chacꞌan ti lec chayilote. Scotoluc ora nichimuc noꞌox avoꞌntonic chapasic. Toyoluc me avoꞌntonic chapasic cꞌusi tscꞌan ti Diose yuꞌun chanaꞌic ti yabatoxuc ti Cristoe.
\v 7 Yutsiluc me avoꞌntonic chavacꞌ abaic ti abatinel. Yuꞌun chanaꞌic ti oyoxuc ti abatinel yuꞌun ti Cajvaltique, maꞌuc noꞌox oyoxuc ti abatinel yuꞌun crixchanoetic.
\v 8 Chanaꞌic ti chijyacꞌbucutic jmotontic ti Cajvaltique jujunucutic yuꞌun ti cꞌutic lec laj jpastique manchuc mi oyucutic ti mozoil, manchuc mi oyucutic ti libre.
\p
\v 9 Hoꞌoxuc uc ti yajvaloxuque lecuc me chapasbeic uc. Mu me xaꞌutvan yuꞌun chanaꞌic ti te oy vinajel ti Avajval uque. Yuꞌun ti Cajvaltique mu yuꞌunuc tstꞌuj ti muchꞌu chcꞌuxubine. Jaꞌ coꞌol chixchapanucutic jcotoltic.
\s Jaꞌ scꞌopilal ti cꞌutic yacꞌojbucutic ti Diose yuꞌun hech tstsal cuꞌuntic ti pucuje
\p
\v 10 Jaꞌ slajeben xa chacalbeic avi to. Quermanotac, yuꞌun muꞌyuc yip avoꞌntonic atuquic, hech yuꞌun jaꞌ xavichꞌbeic yip yoꞌnton ti Cajvaltique, yuꞌun jun noꞌox oyoxuc xchiꞌuc.
\v 11 Ichꞌic me ti amaquique ti chijyacꞌbucutic ti Diose yuꞌun hech xuꞌ tstsal avuꞌunic ti pucuje ti stalel chloꞌlavane.
\v 12 Yuꞌun maꞌuc ti jtsal jbatic xchiꞌuc ti muchꞌutic coꞌol jbecꞌtaltic jchꞌichꞌeltic xchiꞌuque. Jaꞌ ti jtsal jbatic xchiꞌuc ti mu xquiltic ti jsatique ti muꞌyuc sbecꞌtalique. Jaꞌ ti totil pucuje xchiꞌuc ti bicꞌtal pucujetique ti sventainojic ti muliletic liꞌ ti balumile, jaꞌ ti ep spꞌijilique, ti ep yabtelique, ti ep chchꞌumbat smantalique.
\v 13 Hech yuꞌun ichꞌic me ti amaquique ti chijyacꞌbucutic ti Diose yuꞌun hech mu xastsalot ti pucuje ti yorail chaspasbot proval ti avoꞌntone. Mi chapaloxuc ti lec, hech xuꞌ avuꞌunic.
\v 14 Jaꞌ hech chachapan abaic. Ti chachꞌunic ti scꞌop ti Diose ti jaꞌ melele, jaꞌ smac achꞌutic. Ti chachꞌunic ti toj avoꞌntonic chayiloxuc ti Diose, jaꞌ smac avoꞌntonic.
\v 15 Ti nichim noꞌox avoꞌntonic chacꞌan chapasic cꞌusi tscꞌan ti Diose yuꞌun chanaꞌic ti lec yoꞌnton ti Diose avuꞌunic ti sventa ti Jesucristoe, jaꞌ smac avacanic yuꞌun hech mu xajachꞌ, yuꞌun hech mu xapꞌaj ti mulil.
\v 16 Ti chachꞌunic ti chascoltaot ti Jesucristoe, jaꞌ smac scotol abecꞌtalic yuꞌun hech chlaj yip ti mulile hech mu xastsaloxuc. Jaꞌ sbolil yoꞌnton ti pucuj lume.
\v 17 Ti chachꞌunic ti chacolique, jaꞌ smac ajolic. Ti scꞌop ti Diose ti chayalboxuc ti Chꞌul Espíritue, jaꞌ avespadaic.
\v 18 Scotol ora cꞌoponic Dios. Alic vocol ti stojol ti Diose yuꞌun hech chascoltaoxuc. Yuꞌun ti hech chavalbeic vocole, jaꞌ ti sventa ti Chꞌul Espíritue. Viqꞌuiluc me asatic, pasic me tsots. Scotol ora cꞌopombeic Dios ti stojol ti coꞌol oyoxuc ti stojol ti Diose xchiꞌuque.
\v 19 Cꞌopombucun Dios ti jtojol uc, acꞌo xiyalbun ti Diose ti cꞌusi chcale yuꞌun hech mu xixiꞌ. Hech jamaluc me acꞌo cal ti acꞌopilalic ti chacolic uque.
\v 20 Jaꞌ yuꞌun ti chuculun ti cadena-taqꞌuin ti ora to yuꞌun hech ti jchol. Cꞌopombucun Dios ti jtojol yuꞌun acꞌo xiyacꞌbun stsatsal coꞌnton hech jamal ti jcholbe ti scꞌope. Yuꞌun hech tscꞌan ti jpas.
\s Hech ilaj yoꞌnton laj scꞌopon ti carta ti quermanotique
\p
\v 21 Yuꞌun ta xa xavaꞌibucun jcꞌopilal ti cꞌusi icꞌot xa ti pasel ti jtojole, scotol chcꞌot yalboxuc avaꞌyic ti Tíquicoe. Jaꞌ ti quermanotique ti cꞌux ti coꞌntontique, ti jun yoꞌnton yacꞌoj sba ch-abtej yuꞌun ti Cajvaltique.
\v 22 Hech yuꞌun ti jtac talel ti atojolic yuꞌun hech chavaꞌyic ti lec oyune, hech chmucꞌub avoꞌntonic.
\p
\v 23 Ti jcꞌambe vocol ti Jtotic Diose xchiꞌuc ti Cajvaltic Jesucristoe ti acꞌo xayacꞌboxuc jun avoꞌntonic ti jujunoxuque. Ti jcꞌambe vocol uc ti más lec acꞌo xachꞌunique hech más cꞌux chavaꞌi abaic.
\v 24 Acꞌo acꞌbatuc bendición yuꞌun ti Diose scotol ti muchꞌutic scotol yoꞌntonic cꞌux chaꞌyic ti Cajvaltic Jesucristoe.