\id PHP

\h SUN FILIPENSES
\toc1 SUN FILIPENSES
\mt JAꞌ TI SCARTA TI QUERMANOTIC TE TI FILIPOSE
\mt2 ti itsꞌibabat yuꞌun ti Pabloe
\c 1
\s Hech lic scꞌopon ti quermanotique ti Pabloe
\p
\v 1 Hoꞌon Pabloun xchiꞌuc ti quermanotic Timoteoe, mambiluntutic yuꞌun ti Jesucristoe hech yuꞌun yabatuntutic nicꞌotutic xa. Chajcꞌoponoxuc ti carta hoꞌoxuc ti te nacaloxuc te ti jteclum Filipose yuꞌun coꞌol oyucutic ti stojol ti Cristo Jesuse jcotoltic. Chajcꞌoponoxuc uc ti hoꞌoxuc ti ancianooxuque, ti diáconooxuque, ti hoꞌoxuc aventainojic ti jchꞌunojeletique.
\v 2 Acꞌo yacꞌboxuc bendición ti Jtotic Diose xchiꞌuc ti Cajvaltic Jesucristoe. Acꞌo yacꞌbot jun avoꞌnton ti jujunoxuque, hech mu xloꞌlaj avoꞌntonic.
\s Jaꞌ scꞌopilal ti cꞌu cheꞌel tscꞌopombe Dios ti stojol ti jchꞌunojeletique ti Pabloe
\p
\v 3 Cꞌalal chajnaꞌoxuque, “hocol aval ti laj xa xchꞌun acꞌop ti quermanotaque”, xichi ti stojol ti Diose.
\v 4-5 Hech yuꞌun cꞌalal ti jcꞌopon Dios ti atojolic, nichim noꞌox coꞌnton yuꞌun coꞌol jun coꞌntontic chijꞌabtejucutic asta cꞌalal lic achꞌumbeic scꞌop ti Diose asta ti ora to. Hech yuꞌun ipuc xa ti lequil achꞌ cꞌope.
\v 6 Ti jnaꞌ mi laj sta yorail chtal yicꞌucutic batel ti Jesucristoe, jaꞌto chpaj ti abtel te ti avoꞌntonic ti laj xa sliques ti Diose.
\v 7 Lec ti hech chajnaꞌoxuque. Yuꞌun coꞌol chijyacꞌbucutic yip coꞌntontic ti Diose, hech yuꞌun manchuc mi liꞌ chuculuni coꞌol cacꞌoj jba ti jcolta jbatic hech chpuc cuꞌuntic ti lequil achꞌ cꞌope.
\v 8 Snaꞌ ti Diose ti ep cꞌuxoxuc ti coꞌnton acotolic hech chaj cꞌu cheꞌel cꞌuxucutic ti yoꞌnton ti Jesucristoe.
\v 9 Ti jcꞌopon Dios ti atojolic yuꞌun hech xuꞌ echꞌem chacꞌuxubinvanic. Ti jcꞌambe uc ti acꞌo avojtiquinic lec ti Diose, ti acꞌo xayacꞌboxuc más apꞌijilic.
\v 10 Hech xuꞌ avuꞌunic chanaꞌic ti más tsots scꞌopilal ti pasele. Hech yuꞌun cꞌalal tsta yorail chtal yicꞌucutic ti Cristoe hech oy yutsil avoꞌntonic chayiloxuc. Yuꞌun muꞌyuc muchꞌu ichibaj ti aventaic.
\v 11 Hech xuꞌ avuꞌunic ti sventa ti Jesucristoe ti toj scotol ti cꞌutic chapasique. Hech tspasat ti mucꞌ ti Diose ti aventaic. Hech lec scꞌopilal chcꞌot avuꞌunic ti Diose.
\s Jaꞌ scꞌopilal toyol coꞌnton ti acꞌo pasatuc ti mucꞌ ti Cristoe ti jventa, xchi
\p
\v 12 Quermanotac, ti jcꞌan ti chanaꞌic ti yuꞌun ti liꞌ chuculune, mu yuꞌunuc mu xaꞌyic ti lequil achꞌ cꞌope. Ep xa laj yaꞌyic.
\v 13 Ti sjunul scuartel ti yajsoldado ti totil ajvalile liꞌto yaꞌyojic ti sventa Cristo ti liꞌ chuculune. Ep ti muchꞌutic yan laj xa yaꞌyic uque.
\v 14 Ep ti quermanotique ti itsatsub xa yoꞌntonic ti stojol ti Cajvaltique ti sventa ti liꞌ chuculun liꞌto. Hech yuꞌun yacꞌojic persa jamal chalic ti scꞌop ti Diose. Mu xa xiꞌic.
\p
\v 15-17 Scotolic chcholbeic scꞌopilal ti Cristoe. Oy yutsil yoꞌntonic chcholic yuꞌun cꞌuxun ti yoꞌntonic. Yuꞌun tsnaꞌic ti liꞌ chuculune oy jtu yuꞌun ti jchol ti lequil achꞌ cꞌope. Oy mu yutsiluc yoꞌntonic chcholbeic scꞌopilal ti Cristoe. Jaꞌ noꞌox tspasic yuꞌun ti chaqꞌuic ti qꞌuelel ti xuꞌ yuꞌunique. Tscuy ti hech más chquichꞌ mul yuꞌun ti hech tspasique.
\v 18 Lume mu tsotsuc scꞌopilal chcaꞌi yuꞌun ti hech tsnopique. Jaꞌ tsots scꞌopilal ti chichꞌ cholbel scꞌopilal ti Cristoe manchuc mi mu yutsiluc yoꞌntonic tspasic. Jaꞌ nichim noꞌox coꞌnton yuꞌun ti chichꞌ cholele. Mu xiyacꞌbun quichꞌ mul.
\p
\v 19 Yuꞌun chacꞌopombucun Dios ti jtojol, yuꞌun jaꞌ chiscoltaun ti Chꞌul Espíritue jaꞌ ti laj scolta ti Jesucristoe, hech yuꞌun ti jnaꞌ ti tspasat ti mucꞌ ti Cristoe ti jventa.
\v 20 Jaꞌ noꞌox toyol coꞌnton mu me xiqꞌuexav mi jutuc ti cꞌalal chicꞌot ti stojol ti Cristoe. Ti jchꞌun ti chiscoltaune. Hech chaj cꞌu cheꞌel jamal calojbe scꞌopilal ti Cristo onoꞌoxe, ti jcꞌan ti hechuc me acꞌo calilambe scꞌopilal manchuc mi chimilat o chicuxi to. Hech tspasat ti mucꞌ ti jventa.
\v 21 Cꞌalal cuxulun liꞌ ti balumile jaꞌ noꞌox toyol coꞌnton ti acꞌo pasatuc ti mucꞌ ti Cristoe ti jventa. Pero mi nichame, jun noꞌox yutsil yuꞌun chba jchiꞌin.
\v 22 Hech yuꞌun mi chicuxi to liꞌ ti balumile, oy ti muchꞌutic chlic xchꞌunic to ti jventae. Hech yuꞌun mu jnaꞌ lec bu ti jcꞌane.
\v 23 Mu jnaꞌ bu ti jtꞌuj ti chib liꞌto. Coꞌnton chicham yuꞌun chba jchiꞌin ti Cristoe. Yuꞌun jaꞌ más jelaven yutsil te o.
\v 24 Yuꞌun mu to xuꞌ avuꞌunic atuquic, hech yuꞌun tscꞌan ti ta to xajcoltaoxuque.
\v 25 Hech yuꞌun ti jnaꞌ ti ta to xicuxi yuꞌun ta to xajcoltaoxuc yuꞌun hech más ch-an yip avoꞌntonic. Yuꞌun mi iꞌan lec xchꞌunojel avoꞌntonique hech yuꞌun más nichim noꞌox avoꞌntonic.
\v 26 Hech yuꞌun cꞌalal mi te xa jchiꞌinojoxuc yan vuelta, hech yuꞌun más echꞌem chavalbeic vocol ti stojol ti Cristo Jesuse yuꞌun ti nicol xa loqꞌuel ti chuquele.
\p
\v 27 Lecuc me scotol ti cꞌutic chapasique. Hech tscꞌan yuꞌun achꞌunojic ti lequil achꞌ cꞌope, jaꞌ ti scꞌopilal ti Cristoe. Hech yuꞌun mi nicole hech chtal jqꞌueloxuc. Hech chajqꞌuelic ti cꞌu xaꞌelanique. Mi mu nicole, ti jcꞌan chcaꞌi ti acꞌopilalique ti oy yip avoꞌntonique, ti jtos avoꞌntonic acotolique, ti coꞌol chavaqꞌuic persa, hech chpuc ti lequil achꞌ cꞌope.
\v 28 Jcꞌan chcaꞌi ti mu xaxiꞌic yuꞌun ti muchꞌutic chascontrainoxuque. Yuꞌun ti mu xaxiꞌique hech tsnaꞌic ti chꞌayel chbatic ti stuquique. Ti hoꞌoxuque, yuꞌun ti mu xaxiꞌique, chanaꞌic ti chascoltaoxuc ti Diose, hech chacolic yuꞌun sbatel osil.
\v 29 Yuꞌun ti laj stꞌujoxuc ti Diose maꞌuc noꞌox yuꞌun chachꞌunic ti jaꞌ Jcoltavanej avuꞌunic ti Cristoe. Jaꞌ laj stꞌujoxuc yuꞌun acꞌo cuchuc avuꞌunic ti ilbajinele ti sventa ti Cristoe.
\v 30 Hech yuꞌun ti coꞌol chquichꞌtic ilbajinel jcotoltic. Ti jun vueltae laj avilic ti laj quichꞌ ilbajinel hoꞌoni. Ti ora to chavaꞌyic ti liꞌ chquichꞌ ilbajinel uc.
\c 2
\s Jaꞌ scꞌopilal ti tscꞌan ti biqꞌuit chcacꞌ jbatic hech chaj cꞌu cheꞌel biqꞌuit laj yacꞌ sba ti Cristoe
\p
\v 1 Yuꞌun chacꞌan chapasic ti cꞌusi tscꞌan ti Cristoe yuꞌun laj xa smucꞌubtasboxuc avoꞌntonic, yuꞌun chacꞌuxubinvanic yuꞌun avichꞌojic ti Chꞌul Espíritue,
\v 2 hech yuꞌun nichim noꞌox coꞌnton avuꞌunic. Hech yuꞌun ti jcꞌan ti más nichim noꞌox coꞌnton avuꞌunic. Hech yuꞌun chacalbeic, mu me xacontrain abaic, cꞌux me xavaꞌi abaic. Jaꞌ tscꞌan ti jtos avoꞌntonic acotolic ti coꞌol chaꞌabtejique yuꞌun hech chuꞌ avuꞌunic.
\v 3 Hech yuꞌun ti cꞌalal chaꞌabtejique, mu me xacontrain abaic. Jujunoxuc mu me xatoy abaic ti stojol ti avermanotaque. Paso me ti mucꞌ scotol ti avermanotaque. Jaꞌ lec ti biqꞌuit me chavacꞌ abaic ti jujunoxuque.
\v 4 Mu me xacꞌuxubin aba atuc noꞌox. Coltao abaic.
\p
\v 5 Hechuc me avoꞌntonic hech chaj cꞌu cheꞌel ti yoꞌnton ti Cristo Jesuse.
\v 6 Manchuc mi jun noꞌox oyic xchiꞌuc ti Jtotic Diose ti stalel oye, mu tsotsuc scꞌopilal laj yaꞌi ti coꞌol yutsil xchiꞌuc ti Jtotic Diose.
\v 7 Jaꞌ laj sbicꞌtajes sba. Hech icꞌot hech chaj cꞌu cheꞌel abat. Hech yuꞌun laj yichꞌ sbecꞌtal hech crixchano icꞌot.
\v 8 Yuꞌun ti hech crixchano icꞌot ti jtojoltique, más echꞌem laj sbicꞌtajes sba. Laj xchꞌun mantal. Laj xchꞌun milel. Jaꞌ ti cruz imilat.
\v 9 Hech yuꞌun más jelaven iꞌacꞌat ti pasel ti mucꞌ yuꞌun ti Diose. Más jelaven iꞌacꞌat ti pasel ti mucꞌ ti sbie. Muꞌyuc muchꞌu hech pasbil ti mucꞌ ti sbie.
\v 10 Jaꞌ ti jquejan jbatic ti stojol ti Jesuse jcotoltic ti liꞌoyucutic ti balumile xchiꞌuc scotolic ti te oyic ti vinajele xchiꞌuc scotolic ti te oyic ti cꞌatimbaque xchiꞌuc ti pucujetique.
\v 11 Jamal chcaltic jcotoltic, “Hoꞌot Ajvalilot cuꞌuntutic”, xijchi ti stojol ti Jesucristoe. Yuꞌun ti hech chcaltique, ti jpastic ti mucꞌ ti Jtotic Diose yuꞌun ti hech yacꞌojbe yabtel ti Snichꞌone.
\s Jaꞌ scꞌopilal hoꞌot aventaic ti chavaqꞌuic ti qꞌuelel ti avichꞌojic xa ti achꞌ cuxlejale, xchi
\p
\v 12 Hech yuꞌun hoꞌoxuc ti ep cꞌuxoxuc ti coꞌntone, cꞌalal te jchiꞌinojoxuc laj avacꞌ ti qꞌuelel ti chachꞌumbeic smantal ti Diose. Hech yuꞌun manchuc mi mu te jchiꞌinojoxuc ti ora to, chꞌumbeic me ti cꞌutic yaloj ti Diose. Acꞌo ti qꞌuelel ti avichꞌojic xa ti achꞌ cuxlejale. Pasic ti mucꞌ ti Diose. Naꞌic me ti mu xuꞌ avuꞌunic atuquic.
\v 13 Jaꞌ ch-abtej ti avoꞌntonic ti Diose, hech yuꞌun chacꞌan chapasic ti cꞌutic tscꞌan ti yoꞌntone. Chascoltaoxuc hech xuꞌ avuꞌunic chapasic ti cꞌutic scꞌan ti yoꞌntone.
\p
\v 14 Hech yuꞌun cꞌalal chaspasoxuc ti mantal ti Diose mu me chopoluc chavaꞌyic. Mu me xloꞌlaj avoꞌntonic.
\v 15 Hech mu xataic amulic ti stojol. Hech lec avoꞌntonic chacꞌotic. Hech chvinaj ti yol snichꞌonoxuc ti Diose. Hech muꞌyuc amulic chayilic ti muchꞌutic mu xtun ti yoꞌntonique. Hoꞌoxuque chaquevanic yaꞌyel ti stojolic hech chaj cꞌu cheꞌel toj ti chtil ti acꞌubaltic.
\v 16 Yuꞌun chavacꞌbeic sqꞌuel ti sbelal cuxlejale. Hech yuꞌun cꞌalal mi laj sta yorail ti chtal ti Cristoe, nichim noꞌox coꞌnton avuꞌunic yuꞌun chvinaj ti mu hoviluc ti niꞌabtej yuꞌun ti Cajvaltique.
\v 17 Hoꞌoxuque yuꞌun lec achꞌunojbeic scꞌop ti Diose, hech yuꞌun laj atacbun talel jmoton ti vocol laj ataique yuꞌun muꞌyuc cꞌusi oy avuꞌunique. Nichim noꞌox avoꞌntonic yuꞌun ti hech ihuꞌ avuꞌunique. Lec chil ti Diose ti hech laj apasique. Pero mi más lec chil ti Diose ti oy cꞌusi chcacꞌ uc, mi tscꞌan ti chimilat hoꞌoni, hech yuꞌun nichim noꞌox coꞌnton uc.
\v 18 Hech yuꞌun mi hech chcꞌot ti pasel ti chimilate, jaꞌ tscꞌan ti nichim noꞌox avoꞌntonic uc.
\s Laj yalbe scꞌopilal ti Timoteoe xchiꞌuc ti Epafroditoe
\p
\v 19 Mi hech tscꞌan ti Cajvaltic Jesuse ti chcꞌot ti pasele, poꞌot xa ti jtac talel ti atojolic ti Timoteoe. Hech yuꞌun cꞌalal mi isut talele, chcaꞌi cꞌu xaꞌelanic. Hech más chmucꞌub coꞌnton avuꞌunic.
\v 20 Muꞌyuc muchꞌu hech lec yoꞌnton hech chaj cꞌu cheꞌel ti Timoteoe. Scotol ora toyol yoꞌnton yuꞌun tscꞌan chascoltaoxuc.
\v 21 Scotol ti yantique jaꞌ batem ti yoꞌntonic ti cꞌutic tscꞌanic ti stuquique. Mu toyoluc yoꞌntonic yuꞌun ti cꞌutic tscꞌan pasel ti sventa ti Cristo Jesuse.
\v 22 Hoꞌoxuque chanaꞌic ti lec yoꞌnton ti Timoteoe. Sjeluc jnichꞌon yuꞌun jchiꞌinoj jbatutic ti xcholel ti lequil achꞌ cꞌope.
\v 23 Hech yuꞌun mi laj caꞌi ti mu to chichapaj ti ora, chajtacboxuc jelavel tal ti Timoteoe.
\v 24 Jchꞌunoj ti chiscoltaun ti Cajvaltique yuꞌun ti chichapaj ti ora hech yuꞌun chtal jqꞌueloxuc uc hoꞌoni.
\p
\v 25-26 Laj xa jnop ti jaꞌ lec chajtacboxuc sut tal ti atojolic ti quermanotic Epafroditoe yuꞌun toyol yoꞌnton tscꞌan te chtal sqꞌueloxuc acotolic yuꞌun chichꞌ mul yuꞌun ti laj avaꞌyic ti itsacat ti chamele. Lec niꞌabtej xchiꞌuc liꞌto yuꞌun coꞌol coꞌnton xchiꞌuc yuꞌun coꞌol chcuch yuꞌun ti contrainele hech chaj cꞌu cheꞌel ti hoꞌone. Hoꞌoxuc laj atacbucun tal yuꞌun chiscoltaun. Laj yichꞌbun tal ti jmoton avuꞌunique.
\v 27 Melel ti tsots itsacat ti chamele asta cꞌan chamuc. Ti Diose laj xcꞌuxubin. Mu stucuc noꞌox icꞌuxubinat yuꞌun ti Diose. Hoꞌon laj xcꞌuxubinun uc yuꞌun mi ichame más ep chquichꞌ mul.
\v 28 Hech yuꞌun chajtacboxuc sut tal ti ora to yuꞌun hech acꞌo nichimajuc avoꞌntonic yuꞌun ti chaqꞌuelbeic sat yan vuelta. Hech yuꞌun chnichimaj coꞌnton uc cꞌalal liꞌ chuculune.
\v 29 Nichimuc me avoꞌntonic albo vocol ti stojol ti Cajvaltique yuꞌun ti lec isut batel yuꞌun ichaꞌcꞌot xa te ti atojolique. Scotol ti muchꞌutic hech yoꞌntonique hech chaj cꞌu cheꞌel yoꞌnton ti Epafroditoe jaꞌ scꞌan ti chapasic ti muqꞌue.
\v 30 Melel ti cꞌan chamuc ti sventa ti yabtel ti Cristoe. Mi jutuc muc xcꞌuxubin sba. Yuꞌun laj snaꞌ ti toyol avoꞌntonic chacꞌan chacoltaucun hech yuꞌun jelaven laj yacꞌ sba ti abatinel cuꞌun.
\c 3
\s Jaꞌ scꞌopilal ti jaꞌ ti sventa xchꞌunojel coꞌntontic toj coꞌntontic chijyilucutic ti Diose
\p
\v 1 Hech yuꞌun, quermanotac, chacalbeic jaꞌ slajeben xa ti jtsꞌiba avi to. Nichimuc me avoꞌntonic ti stojol ti Cajvaltique. Manchuc mi ep xa vuelta laj xa jtsꞌibaboxuc avi to chajtsꞌibaboxuc yan vuelta yuꞌun hech mu xalajic ti loꞌlael.
\v 2 Hech yuꞌun chacalbeic, pꞌijanic me yuꞌun ti muchꞌutic tscꞌan chasoquesoxuque. Yuꞌun tscꞌan chayacꞌboxuc circuncisión yuꞌun jaꞌ noꞌox tscꞌan chasyajesboxuc abecꞌtalic. Hech yuꞌun pꞌijanic me.
\v 3 Ti hoꞌucutique quichꞌojtic xa ti mero circuncisione chil ti Diose yuꞌun mu xa jchꞌunojticuc ti chijcolucutic ti sventa cabteltic jtuctique, jaꞌ ti mantaletic ti jchꞌunojtic laj jcuytique. Ti hoꞌucutique jpasojtic ti mucꞌ ti Diose ti coꞌntontic. Jchꞌunojtic ti jaꞌ Jcoltavanej cuꞌuntic ti Cristo Jesuse.
\v 4 Taca xijcol yuꞌun ti jchꞌunojtic ti mantaletique, voꞌone nicol xa hoꞌoni yuꞌun laj jpas hech chaj cꞌu cheꞌel chal ti mantaletique. Jutuc noꞌox spasojic ti yan jchiꞌiltaque.
\v 5 Yuꞌun hoꞌoni ilocꞌ vaxaquib cꞌacꞌal laj quichꞌ circuncisión yuꞌun hoꞌon yelnichꞌonun ti Israele. Oyun ti sventa ti jchop yuꞌun ti Benjamine ti pasbil ti muqꞌue. Yaloj sba puru judio ti jtatamol jmembeltaque ti voꞌone, muꞌyuc bu laj scap sba xchiꞌuc ti achiꞌiltaque, hoꞌoxuc ti coꞌol yanlum crixchanooxuc xchiꞌuque. Hoꞌon fariseoun, lec jchꞌunojbe smantal ti Diose ti jcuyoj jbae.
\v 6 Toyol coꞌnton ti jyalel yuꞌun ti smantal ti Diose ti laj jcuye, hech yuꞌun ep laj quilbajin ti jchꞌunojeletique. Jchꞌunojbe scotol smantal ti Diose laj jcuy. Hech yuꞌun laj jcuy ti toj coꞌnton chiyilun ti Diose.
\v 7 Ti cꞌu yepal ihuꞌ cuꞌun ti voꞌonee ti jaꞌ hech chicol laj jcuye, ti cꞌalal laj jnaꞌ ti jaꞌ noꞌox chicol yuꞌun ti Cristoe, hech laj jnaꞌ ti muꞌyuc xa stu cuꞌun.
\v 8 Ti ora to laj xa jnaꞌ scotol yan muꞌyuc xa stu cuꞌun, jaꞌ noꞌox tsots scꞌopilal ti jchambe yoꞌnton ti Cristo Jesuse, jaꞌ ti Cajvale. Jaꞌ jelaven yutsil. Scotol ti cꞌutic ti hech chicol laj jcuye, laj xa quil ti muꞌyuc stu hech chaj cꞌu cheꞌel ti cꞌaꞌepe. Hech yuꞌun laj xa jten comel. Jaꞌ xa noꞌox ti jchambe yoꞌnton ti Cristoe.
\v 9 Yuꞌun jchꞌunoj ti chicol yuꞌune. Mu xa ti jchꞌun ti xuꞌ chicol yuꞌun ti mantaletique. Jaꞌ jchꞌunoj ti chicol yuꞌun ti Cristoe. Yuꞌun jaꞌ toj coꞌntontic chijyilucutic ti Diose ti sventa xchꞌunojel coꞌntontic, maꞌuc ti sventa cabteltic jtuctic.
\v 10 Hech yuꞌun ti jcꞌan ti jchambe yoꞌnton ti Cristoe yuꞌun hech tsalbil chcꞌot cuꞌun scotol ti cꞌutic oy liꞌ ti balumile hech chaj cꞌu cheꞌel tsalbil icꞌot yuꞌun scotol ti Cristoe cꞌalal ichaꞌcuxi loqꞌuel ti chꞌen. Ti jcꞌan ti coꞌol chcuch cuꞌun ti contrainele ti labanele hech chaj cꞌu cheꞌel icuch yuꞌun ti Cristoe, ti mu jcꞌuxubin jba hech chaj cꞌu cheꞌel muc xcꞌuxubin sba ti Cristoe cꞌalal icham ti cruz cuꞌuntique.
\v 11 Yuꞌun ti jcꞌan ti acꞌo huꞌuc cuꞌun ti puru achꞌ cuxlejal chcacꞌ ti qꞌuelel hech chaj cꞌu cheꞌel ti Cajvaltique cꞌalal chaꞌcuxem loqꞌuel ti chꞌene.
\s Jaꞌ scꞌopilal cacꞌoj jba ti jnop yuꞌun ti chicꞌote, xchi
\p
\v 12 Mu yuꞌunuc huꞌem xa cuꞌun. Mu yuꞌunuc lec xa oyun. Jaꞌ noꞌox chcacꞌ persa yuꞌun acꞌo cꞌotuc ti pasel cuꞌun yuꞌun laj xa staun ti Cristo Jesuse.
\v 13 Quermanotac, mu xcal ti huꞌem xa cuꞌun. Hech ti jpas hoꞌoni. Ti jchꞌay ti coꞌnton ti cꞌutic cꞌotem xa ti pasele. Jaꞌ cacꞌoj jba ti jnop yuꞌun ti chicꞌote.
\v 14 Jaꞌ toyol coꞌnton ti chiyicꞌun ti Diose ti sventa ti Cristo Jesuse. Jaꞌ stojol cabtel ti te chicꞌot ti stojole.
\p
\v 15 Hech yuꞌun hoꞌucutic ti oy xa yip coꞌntontique, hechuc me coꞌntontic jcotoltic. Mi oy mu hechuc avoꞌntonic, jaꞌ chayacꞌbot anaꞌic ti Diose.
\v 16 Ti cꞌutic laj xa yacꞌboxuc anaꞌic ti Diose, pasilanic me.
\p
\v 17 Quermanotac, chambucun coꞌnton. Qꞌuelilanic avil scotol ti muchꞌutic hech xchanojbucun ti coꞌntontutique.
\v 18 Ep xa vuelta calojboxuc scꞌopilalic ti jchiꞌiltaque ti mu scꞌan xchꞌunic ti jaꞌ jmotontic chijcolucutic yuꞌun ti icham ti cruz cuꞌuntic ti Cristoe. Cacꞌoj jba chiꞌocꞌ ti ora to cꞌalal chacalboxuc scꞌopilal
\v 19 yuꞌun chꞌayel chbatic. Yuꞌun jaꞌ noꞌox chchꞌunic ti cꞌutic tscꞌan ti sbecꞌtalique. Tstoy sbaic yuꞌun, mu xqꞌuexavic yuꞌun. Jaꞌ noꞌox batem ti yoꞌntonic ti cꞌutic sventa noꞌox ti balumile.
\v 20 Jaꞌuc ti hoꞌucutique jaꞌ jlumaltic ti vinajele. Ti jmalatic chyal tal ti vinajel ti Jcoltavanej cuꞌuntique, jaꞌ ti Cajvaltic Jesucristoe.
\v 21 Yuꞌun muꞌyuc yip avi jbecꞌtaltic quichꞌojtic avi to, hech yuꞌun chiscꞌatpꞌumbucutic ti achꞌ. Hech coꞌol chijcꞌot hech chaj cꞌu cheꞌel stuc. Yuꞌun jelaven yutsil stuc ti sbecꞌtale. Yuꞌun jelaven spꞌijil hech yuꞌun sventainoj scotol, hech yuꞌun xuꞌ yuꞌun tspas.
\c 4
\s Jaꞌ scꞌopilal scotol cꞌacꞌal nichimuc me avoꞌntonic ti stojol ti Cajvaltique, xchi
\p
\v 1 Hech yuꞌun, quermanotac, ti cꞌuxoxuc ti coꞌntone, coꞌnton chtal jqꞌueloxuc. Nichim noꞌox coꞌnton avuꞌunic. Hoꞌoxuc señailoxuc ti oy ti cabtele. Hech yuꞌun mu me xyanej avoꞌntonic. Scotol ora junuc me avoꞌntonic ti stojol ti Cajvaltique, hoꞌoxuc ti cꞌuxoxuc ti coꞌntone.
\p
\v 2 Hoꞌot quermano ants Evodia, hoꞌot quermano ants Síntique, chajcꞌambot vocol yuꞌun mu me xacontrain abaic. Jtosuc me avoꞌntonic ti stojol ti Cajvaltique.
\v 3 Jaꞌ noꞌox hech chacalbe vocol uc, quermano, yuꞌun coꞌol chijꞌabtejucutic yuꞌun ti Cajvaltique, coltao me ti antsetique ti chcale ti laj jchiꞌin ti xcholel ti lequil achꞌ cꞌope. Jaꞌ laj xchiꞌinun ti abtel uc ti quermanotic Clementee. Oy yantic laj xchiꞌinun uc. Jaꞌ pꞌejambil sbiic ti sun ti Diose yoꞌ bu tsꞌibabil yuꞌun chijcuxiucutic sbatel osil.
\p
\v 4 Scotol cꞌacꞌal nichimuc me avoꞌntonic ti stojol ti Cajvaltique. Yan vuelta chacalbeic, nichimuc me avoꞌntonic.
\v 5 Acꞌo snaꞌic scotol crixchanoetic ti oy yutsil avoꞌntonique, ti chcuch avuꞌunic ti cꞌutic chapasbate. Yuꞌun poꞌot xa chchaꞌsut tal ti Cajvaltique.
\p
\v 6 Mi jutuc mu me xloꞌlaj avoꞌntonic ti cꞌutic palta chavaꞌique. Scotol ora cꞌambeic ti Diose ti bu palta chavaꞌique. “Hocol aval ti chacoltaune”, xavutic ti Diose.
\v 7 Hech chayacꞌboxuc jun avoꞌntonic ti Diose. Jaꞌ jelaven yutsil. Jaꞌ mu xtun mi oy cꞌusi chanopilanique. Hech mi laj yacꞌboxuc jun avoꞌntonic ti sventa ti Cristo Jesuse hech mu xa xloꞌlaj avoꞌntonic. Hech muꞌyuc xa cꞌusi chanopilanic.
\s Jaꞌ scꞌopilal jaꞌ noꞌox me chanopic ti cꞌutic leque, xchi
\p
\v 8 Quermanotac, chacalbeic, jaꞌ slajeben xa ti jtsꞌiba avi to. Jaꞌ noꞌox me chanopic ti cꞌutic melele, ti stacꞌ ti jpastic ti muqꞌue, ti toje, ti sventa utsilale, ti jelaven yutsile, ti lec scꞌopilale. Scotol ti cꞌutic lec ti pasele, jaꞌ noꞌox me chanopic.
\p
\v 9 Ta me xapasic ti cꞌutic laj cacꞌboxuc achanique, scotol ti laj calboxuc avaꞌyique, ti laj aqꞌuelic cꞌalal laj jpase. Hech chaxchiꞌinoxuc ti Diose jaꞌ ti chijyacꞌbucutic jun coꞌntontique.
\s Jaꞌ scꞌopilal nichim noꞌox coꞌnton yuꞌun laj achaꞌnaꞌucun yan vuelta, xchi
\p
\v 10 Lec nichim noꞌox coꞌnton ti stojol ti Cajvaltique ti ora to yuꞌun jaꞌto noꞌox laj achaꞌnaꞌucun yan vuelta. Jnaꞌ ti scotol ora chanaꞌucun ti avoꞌntonique, jaꞌ noꞌox mu xuꞌ chataucun ti chacoltaune.
\v 11 Mu yuꞌunuc uts jba yuꞌun ti hech chcale. Mi oy cꞌutic oy cuꞌun, mi muꞌyuc, mu xquichꞌ mul. Nichim noꞌox coꞌnton. Hech jchanoj.
\v 12 Mi muꞌyuc jveꞌel, xuꞌ cuꞌun chquipan jba. Mi oy ep jveꞌel, xuꞌ cuꞌun ti jpajes jba.
\v 13 Scotol xuꞌ cuꞌun ti sventa ti Cristoe. Jaꞌ chistsatsubtasbun coꞌnton.
\v 14 Manchuc mi hech jchanoje, lec ti laj anaꞌucune ti uts jbae, ti oyun ti vocole.
\p
\v 15 Hoꞌoxuque ti te nacaloxuc ti Filipose, chanaꞌic ti hoꞌon jbael laj jchol ti lequil achꞌ cꞌope te ti alumalique. Chanaꞌic uc ti cꞌalal nilocꞌ batele te ti Macedoniae, jaꞌ ti estado avuꞌunique, muꞌyuc bu hech laj scoltaucun ti yan jchꞌunojeletique. Muꞌyuc cꞌusi laj yacꞌbucun. Atuquic noꞌox laj acoltaucun.
\v 16 Cꞌalal te oyun to ti jteclum Tesalonicae, jun chib vuelta laj atacbucun tal jmoton taqꞌuin avuꞌunic.
\v 17 Mu yuꞌunuc ti jcꞌan jmoton. Jaꞌ ti jcꞌan ti ep chavichꞌic bendición ti hoꞌoxuque.
\v 18 Ta yutsil ti cꞌu yepal laj avacꞌbune, oy to sobril. Lec xa oyun yuꞌun laj xa quichꞌ ti laj yichꞌ tal ti Epafrodito avuꞌunique. Lec chil ti Diose ti hech laj avacꞌbucune. Lec yoꞌnton ti Diose yuꞌun ti hech laj apasique.
\v 19 Hech yuꞌun ti Dios cuꞌuntique scotol chayacꞌboxuc ti cꞌutic chtun avuꞌunique. Jun noꞌox yutsil ti cꞌutic chayacꞌboxuque ti sventa ti Cristo Jesuse.
\v 20 Hech yuꞌun acꞌo pasatuc ti mucꞌ sbatel osil ti Dios cuꞌuntique, jaꞌ ti Jtotic cuꞌuntique. Jun yutsil ti hech chcꞌot ti pasel.
\s Jaꞌ scꞌopilal ti tstojbe yoꞌntonic
\p
\v 21 Chabanuc scotolic ti cꞌu yepalic ti oyic xa ti stojol ti Cristo Jesuse. Chabanucot la xal scotol ti quermanotic ti liꞌ jchiꞌuque.
\v 22 Chabanucot la xal uc scotolic ti oyic xa ti stojol ti Cristoe liꞌto, jaꞌ ti yajꞌabtel ti Césare, jaꞌ ti quermanotic xae, xchiꞌuc ti yan quermanotique.
\p
\v 23 Acꞌo yacꞌboxuc ep bendición ti Cajvaltic Jesucristoe acotolic.