\id COL

\h SUN COLOSENSES
\toc1 SUN COLOSENSES
\mt JAꞌ TI SCARTA TI QUERMANOTIC TE TI COLOSASE
\mt2 ti itsꞌibabat yuꞌun ti Pabloe
\c 1
\s Ti Pabloe hech lic scꞌopon ti carta ti quermanotic te ti Colosase
\p
\v 1 Hoꞌon Pabloun. Hoꞌon jcholcꞌopun yuꞌun ti Jesucristoe yuꞌun hech laj scꞌan yoꞌnton ti Diose. Hoꞌontutic xchiꞌuc ti quermanotic Timoteoe
\v 2 chajcꞌoponoxuc ti carta, hoꞌoxuc ti achꞌunojbeic scꞌop ti Diose te ti jteclum Colosase, hoꞌoxuc ti quermano jbatic ti sventa Cristoe, ti jun avoꞌntonic ti stojol ti Cristoe. Acꞌo yacꞌboxuc bendición ti Jtotic Diose. Acꞌo yacꞌboxuc jun avoꞌntonic ti jujunoxuque, hech mu xloꞌlaj avoꞌntonic.
\s Jaꞌ scꞌopilal ti cꞌu cheꞌel laj scꞌopombe Dios ti stojol ti jchꞌunojeletique ti Pabloe
\p
\v 3 Scotol cꞌacꞌal hocol aval chcututic ti Diose, jaꞌ ti Stot ti Cajvaltic Jesucristoe, yuꞌun achꞌunojbeic ti scꞌope.
\v 4 Yuꞌun caꞌyojtutic acꞌopilalic ti lec achꞌunojbeic scꞌop ti Cristo Jesuse, ti cꞌux chavaꞌyic scotol ti muchꞌutic coꞌol oyoxuc ti stojol ti Cristo xchiꞌuque.
\v 5 Yuꞌun cꞌalal laj avaꞌyic ti scꞌop ti Diose ti jaꞌ melele, jaꞌ ti lequil achꞌ cꞌope, asta ora to hech achꞌunojic ti chba achiꞌinic ti Diose sbatel osil te ti vinajel. Hech yuꞌun ti oy lec xchꞌunojel avoꞌntonique, ti chacꞌuxubinvane.
\v 6 Hech chaj cꞌu cheꞌel laj avaꞌyic ti lequil achꞌ cꞌope, jaꞌ noꞌox hech yacꞌoj sba chaꞌyic scotol crixchanoetic liꞌ ti balumile ti ora to yuꞌun chpuc xa ti scꞌop Diose. Ti buc noꞌox puquem ti scꞌop Diose yacꞌoj sba chichꞌic bendición ti crixchanoetique, yacꞌoj sba chlecub yoꞌntonic hech chaj cꞌu cheꞌel ti ilecub avoꞌntonic ti hoꞌoxuque. Yuꞌun laj achꞌunic ti yutsil yoꞌnton chascoltaoxuc ti Diose.
\v 7 Ti hoꞌoxuque jaꞌ laj xcholboxuc avaꞌyic ti quermanotic Epafrase ti coꞌol cacꞌoj jbatutic chiꞌabtej xchiꞌuque, jaꞌ ti cꞌux ti coꞌntontutique. Yuꞌun jun yoꞌnton ch-abtej uc yuꞌun ti Cristoe hech yuꞌun jaꞌ jqꞌuexoltutic icꞌot te ti atojolic.
\v 8 Stuc laj yalbun caꞌitutic ti Epafrase ti ep cꞌux chavaꞌi abaic ti sventa ti Chꞌul Espíritue.
\p
\v 9 Hech yuꞌun cꞌalal hech laj caꞌitutic acꞌopilalic, hoꞌontutic lic jcꞌopontutic Dios ti atojolic. Scotol cꞌacꞌal ti jcꞌambetutic vocol ti Diose yuꞌun acꞌo más xayacꞌboxuc spꞌijil avoꞌntonic yuꞌun hech más lec chanaꞌic, más lec chavaꞌibeic sjam ti cꞌusi tscꞌan ti Diose ti chapasique.
\v 10 Ti sventa ti lec ti cꞌusi chapasique, hech lec chbat scꞌopilal avuꞌunic ti Cajvaltique yuꞌun chapasic scotol ti cꞌusi lec yoꞌnton yuꞌune. Hech yacꞌoj sba ti epajel ti lequil abtel chapasique. Hech más lec chavojtiquinic ti Diose.
\v 11 Hech chasnojesboxuc ti avoꞌntonic hech chaj cꞌu cheꞌel oy yip yoꞌnton stuc. Hech yuꞌun nichim noꞌox avoꞌntonic chcuch avuꞌunic cꞌuc noꞌox yuꞌun oy yip avoꞌntonic.
\v 12 Hech chavalbeic vocol ti Jtotic Diose yuꞌun ti laj xa yacꞌ huꞌuc avuꞌunic uc ti lec scotol ti cꞌutic chapasique hech chaj cꞌu cheꞌel chiscoltaucutic jcotoltic hoꞌocutic ti coꞌol oyucutic ti stojole.
\v 13 Yuꞌun ti Diose laj xa scoltaucutic loqꞌuel ti scꞌob ti pucuje, jaꞌ ti sventainojucutic cꞌalal oyucutic to ti mulile. Laj xa yacꞌucutic ti Diose ti nijꞌoch ti stojol ti Snichꞌone yuꞌun hech chispasucutic ti mantal ti Snichꞌone, jaꞌ ti lum cꞌux ti yoꞌntone.
\v 14 Jaꞌ ti laj smambucutic jcoleltic ti xchꞌichꞌel. Hech yuꞌun chꞌayem xa jmultic yuꞌun.
\s Jaꞌ scꞌopilal ti laj xa yicꞌoxuc sut tal ti stojol ti Diose yuꞌun ti laj yacꞌ sba ti milel avuꞌunic ti cruz ti Cristoe, xchi
\p
\v 15 Ti Diose mu xquiltic. Yuꞌun jun noꞌox ti Diose, hech yuꞌun cꞌalal ital ti Snichꞌone laj xa quiltic ti Diose. Mu yuꞌunuc laj spas ti Snichꞌone hech chaj cꞌu cheꞌel laj spasucutic. Yuꞌun cꞌalal mu to chlic spas scotol ti cꞌutic oye ti Diose, te onoꞌox oy ti Snichꞌone.
\v 16 Yuꞌun ti Snichꞌone, jaꞌ laj spas scotol ti cꞌutic te oy ti vinajele xchiꞌuc ti cꞌutic oy liꞌ ti balumile. Maꞌuc noꞌox laj spas crixchano ti chquiltic ti jsatique. Jaꞌ laj spas chꞌul abatetic uc ti mu xquiltic ti jsatique. Jaꞌ laj spas ti bicꞌtal chꞌul abatetique xchiꞌuc ti totil chꞌul abatetique. Oy icꞌataj ti totil pucuj ti totil chꞌul abate, oy icꞌataj ti bicꞌtal pucuje ti bicꞌtal chꞌul abatetique. Jaꞌ scotol yabtel stuc ti Cristoe. Yuꞌun ti hech laj spas scotole, yuꞌun acꞌo cꞌotuc ti pasel scotol ti cꞌu cheꞌel snopoj onoꞌoxe.
\v 17 Jaꞌ totil stuc. Mu tsotsuc yabtel scotol ti cꞌutic laj spase yuꞌun jaꞌ tspas ti mantal stuc.
\v 18 Ti ora to jaꞌ joltic cꞌotem ti hoꞌocutic ti jchꞌunojtic ti jaꞌ Jcoltavanej cuꞌuntique yuꞌun jaꞌ totil cuꞌuntic. Hoꞌocutic sbecꞌtalucutic cꞌotemucutic. Jaꞌ chijcuxiucutic ti sventa. Jaꞌ primero ichaꞌcuxi loqꞌuel ti chꞌen hech yuꞌun chijchaꞌcuxi loqꞌuel ti hoꞌucutique. Hech yuꞌun jaꞌ jbaejbe icꞌot cuꞌuntic.
\v 19 Yuꞌun hech laj scꞌan ti Jtotic Diose ti xqꞌuexol chcꞌot. Hech yuꞌun coꞌol spꞌijil yoꞌnton xchiꞌuc yutsil yoꞌnton hech chaj cꞌu cheꞌel oy yuꞌun stuc ti Jtotic Diose.
\v 20 Yuꞌun ti Diose laj scꞌan ti hech chaj cꞌu cheꞌel muꞌyuc muchꞌu ipꞌajbat smantal ti sliqueb cꞌalal laj spas ti balumile, jaꞌ noꞌox hech scotolic chchꞌumbat smantal ti sventa ti Snichꞌone. Yuꞌun ti laj yacꞌ sba ti milel cuꞌuntic ti cruz ti Snichꞌone, hech ijin yabtel ti pucuje, hech yuꞌun scotol chꞌumbil smantal ti Diose te ti vinajel xchiꞌuc liꞌ ti balumil.
\p
\v 21 Ti hoꞌoxuque ti voꞌone muc xanaꞌic bu oy ti Diose. Yajcontraoxuc ti Diose yuꞌun chopol ti cꞌusi laj anopique, chopol ti cꞌusi laj apasique.
\v 22 Ti ora to laj xa yicꞌoxuc sut tal ti stojol. Yuꞌun ti icham ti cruz avuꞌunic ti Snichꞌone, hech yuꞌun laj xa slecubtasboxuc avoꞌntonic ti Diose yuꞌun hech muꞌyuc xa sbolil avoꞌntonic, muꞌyuc xa amulic chacꞌotic ti stojol.
\v 23 Hech chacꞌotic mi jun noꞌox avoꞌntonic ti stojol, mi jꞌechꞌel chachꞌumbeic ti scꞌope, mi mu xatenic loqꞌuel ti smucꞌul avoꞌntonique ti laj ataic ti sventa ti lequil achꞌ cꞌope ti avaꞌyojique. Jaꞌ icholbat xa yaꞌyic uc scotol crixchanoetic liꞌ ti balumile ti ora to. Hoꞌon jventainojbe xcholel, hoꞌon ti Pabloune.
\s Jaꞌ scꞌopilal ti jaꞌ yichꞌoj yabtel ti Pabloe yuꞌun hech tscolta ti jchꞌunojeletique
\p
\v 24 Ti ora to nichim noꞌox coꞌnton chquichꞌ vocol ti aventaic. Yuꞌun hoꞌon xqꞌuexolun ti Cristoe, hech yuꞌun ti yacꞌoj sba chquichꞌ vocol ti aventaic, hoꞌoxuc ti jchꞌunojeloxuque.
\v 25 Yuꞌun laj xa yacꞌbun cabtel ti Diose yuꞌun chajcoltaoxuc, hoꞌoxuc ti achꞌunojbeic ti scꞌope. Jaꞌ sventa avutsilalic. Ti cabtel quichꞌoje, yuꞌun ti jcholbe scotol crixchanoetic.
\v 26 Chcalbe ti cꞌusi muc xaꞌyic ti crixchanoetic ti voꞌonee. Jaꞌuc ti hoꞌucutique laj xa yacꞌbucutic jnaꞌtic, hoꞌucutic ti oyucutic ti stojole.
\v 27 Yuꞌun hech laj snop ti Diose ti chijyacꞌbucutic jnaꞌtic, hoꞌucutic ti jchꞌunojbetic ti scꞌope, ti yutsil yoꞌnton chascoltaoxuc uc, hoꞌoxuc ti yanlum crixchanooxuque. Jun noꞌox yutsil ti hech chcꞌot ti pasele. Ti cꞌu cheꞌel chascoltaoxuque, jaꞌ ch-och ti avoꞌntonic ti Cristoe, hech chba achiꞌinic ti Diose te ti utsilal sbatel osil.
\p
\v 28 Hech yuꞌun ti jcholbetutic scꞌopilal ti Cristoe scotol crixchanoetic. Ti hulesbetutic xchꞌulelic scotolic. Ti cꞌu yepal xuꞌ cuꞌuntutique ti jchanubtastutic scotolic yuꞌun hech huꞌem yuꞌunic scotolic chcꞌot cuꞌuntutic ti stojol ti Cristo Jesuse.
\v 29 Jaꞌ cabtel. Yuꞌun ti xuꞌ cuꞌun ti abtele yuꞌun jaꞌ quichꞌojbe yip ti Cristoe ti te oy ti coꞌntone.
\c 2
\p
\v 1 Ti jcꞌan ti chanaꞌic ti cacꞌoj jba ti jnopilan cꞌu cheꞌel xuꞌ chajcoltaoxuque xchiꞌuc ti quermanotic te ti jteclum Laodiceae xchiꞌuc ti jayvoꞌ ti te ti atojolique ti muꞌyuc bu sqꞌuelojbun jsate.
\v 2 Yuꞌun ti jcꞌan ti chmucꞌub avoꞌntonique, yuꞌun ti más cꞌux chavaꞌi abaique. Yuꞌun hech chanaꞌic ti melel ti scꞌop ti Diose ti achꞌunojique. Yuꞌun más chavojtiquinic ti Cristoe, jaꞌ ti muc xꞌacꞌbat yojtiquinic yuꞌun ti Diose ti crixchanoetic ti voꞌonee.
\v 3 Stuc chijyacꞌbucutic scotol ti spꞌijil coꞌntontique. Jaꞌ ti sventa stuc ti hech ti jnaꞌtic ti cꞌusi lec ti pasele.
\v 4 Yuꞌun ti hech chacalbeique, yuꞌun hech mu xalajic ti loꞌlael yuꞌun ti muchꞌutic tstsalvan ti cꞌope.
\v 5 Yuꞌun manchuc mi mu teuc jchiꞌinojoxuc ti jbecꞌtal, te jchiꞌinojoxuc ti coꞌnton. Nichim noꞌox coꞌnton avuꞌunic yuꞌun jtos avoꞌntonic chcaꞌi, yuꞌun jun avoꞌntonic achꞌunojbeic scꞌop ti Cristoe.
\p
\v 6 Yuꞌun avajvalinojic ti Cajvaltic Jesucristoe, hech yuꞌun jꞌechꞌel teanic ti stojol.
\v 7 Jꞌechꞌel acꞌo xasventaimboxuc avoꞌntonic. Pasic me ti cꞌusi chayalboxuque. Hech chaj cꞌu cheꞌel nachanubtasatic, hech me xapasic, hech más ch-an xchꞌunojel avoꞌntonic. Tscꞌan ti acꞌo vinajuc ti hech oy avoꞌntonic hocol aval xachiic yuꞌun ti laj xa scoltaoxuque.
\s Jaꞌ scꞌopilal ti nijchaꞌcusesat xchiꞌuc ti Cristoe chil ti Diose
\p
\v 8 Pꞌijanic me, mu me xalajic ti loꞌlael yuꞌun ti muchꞌutic ti chijcol yaꞌyel yuꞌun ti scꞌopique. Yuꞌun hovil ti cꞌusi chalique. Yuꞌun jaꞌ smantal noꞌox crixchanoetic ti chalique, sventa noꞌox balumil. Maꞌuc scꞌop ti Cristoe.
\p
\v 9 Yuꞌun ti Cristoe, jaꞌ Dios.
\v 10 Yuꞌun oy ti avoꞌntonic ti Cristoe, hech yuꞌun muꞌyuc xa cꞌusi tscꞌan to yan chavichꞌic. Yuꞌun ti Cristoe jaꞌ tspas ti mantal scotol ti cꞌutic oye xchiꞌuc ti chꞌul abatetique xchiꞌuc ti pucujetique.
\v 11 Yuꞌun oyoxuc xa ti stojol, hech yuꞌun laj xa avichꞌic ti circuncisione ti mu ti scꞌobuc crixchano napasbate. Jaꞌ ti circuncisión yuꞌun ti Cristoe, jaꞌ ti icom xa cuꞌuntic ti poco cuxlejale.
\v 12 Yuꞌun cꞌalal laj avichꞌic hoꞌ ti stojol ti Diose, jaꞌ señail ti coꞌol nachamic ti cruz coꞌol namucat ti chꞌen xchiꞌuc ti Cristoe xchiꞌuc ti apoco cuxlejalique chil ti Diose, ti coꞌol nachaꞌcusesat xchiꞌuc ti Cristoe chil ti Diose. Yuꞌun ti nachaꞌcusesatique, yuꞌun achꞌunojic ti jelaven spꞌijil ti Diose ti laj xchaꞌcuses loqꞌuel ti chꞌen ti Cristoe.
\v 13 Ti hoꞌoxuque ti voꞌone chamenoxuc laj yil ti Diose ti scoj ti amulique, ti scoj ti laj achꞌunic ti cꞌusi tscꞌan ti abecꞌtalique, hech yuꞌun ti ora to coꞌol nachaꞌcusesat ti chꞌen xchiꞌuc ti Cristoe chil ti Diose. Yuꞌun chꞌayem xa jmultic jcotoltic.
\v 14 Maꞌuc noꞌox laj xchꞌaybucutic jmultic ti Diose, jaꞌ laj stupꞌ ti yuꞌun ti persa onoꞌox chba quichꞌtic castigo ti scoj ti mu xchꞌun cuꞌuntic ti mantaletique. Jaꞌ itupꞌ ti cꞌalal laj yacꞌ sba ti milel cuꞌuntic ti cruz ti Cristoe.
\v 15 Cꞌalal icham ti cruz ti Cristoe, jaꞌ yorail ti itsalat yuꞌun ti Diose ti totil pucuje xchiꞌuc ti abatetic yuꞌune. Yuꞌun cꞌalal icham ti cruz ti Cristoe, ti Diose laj yacꞌ ti qꞌuelel ti ilaj yip ti pucuje, ti tsalbil icꞌot xa yuꞌun ti Snichꞌone, hech mu xa xuꞌ chistsalucutic.
\s Jaꞌ scꞌopilal jaꞌ lec ti te batem avoꞌntonic ti cꞌutic sventa vinajele, xchi
\p
\v 16 Hech yuꞌun mu me xapasic ti mucꞌ mi mu xtun chayilot yuꞌun ti cꞌusi chaveꞌique, yuꞌun ti cꞌusi chavuchꞌique yuꞌun ti mu xachabiic ti scꞌacꞌalil ti sqꞌuinique xchiꞌuc ti yorail ti unen ti ue, xchiꞌuc ti yorail ti chcux yoꞌntonic ti jchiꞌiltaque, hoꞌontutic ti coꞌol judiountutic xchiꞌuque.
\v 17 Yuꞌun ti tsots scꞌopilal icꞌot cuꞌuntutic cꞌutic ti jpastutic ti voꞌone, yuꞌun jaꞌ noꞌox señail ti jmalatutic ti Cristoe. Hech yuꞌun ti ora to muꞌyuc xa scꞌopilal yuꞌun laj xa sventainucutic ti Cristoe.
\v 18 Mu me xachꞌumbeic scꞌop ti muchꞌutic chalic ti chꞌayemot tscuyique yuꞌun ti mu xachꞌunic hech chaj cꞌu cheꞌel chchꞌunic. Yuꞌun ti stuquique chaqꞌuic ti qꞌuelel ti biqꞌuit chacꞌ sbaic tscuyique ti stojol ti Diose hech yuꞌun tspas ti mucꞌ chꞌul abatetic yuꞌun acꞌo jelavesbatuc ti scꞌopic tscuyique. Manchuc mi hech chayalbot ti laj sqꞌuel ti svaiche, mu me xachꞌunic yuꞌun jaꞌ noꞌox tstoy sbaic yuꞌun ti hech tspasique.
\v 19 Jaꞌ ti quermanotic scuyoj sbaique ti muꞌyuc scꞌopilal ti yoꞌnton ti smantal ti totil cuꞌuntique, jaꞌ ti Cristoe. Yuꞌun ti hoꞌucutic ti jchꞌunojtique, jun noꞌox ti totil cuꞌuntique ti chispasucutic ti mantal jcotoltique, jaꞌ ti Cristoe. Yuꞌun jtsacoj jbatic jcotoltic xchiꞌuc ti Cristoe, hech yuꞌun xuꞌ cuꞌuntic ti yabtele. Hech más chijlecub yuꞌun chijyacꞌbucutic bendición ti Diose.
\v 20-21 Yuꞌun coꞌol nachamic xchiꞌuc ti Cristoe chil ti Diose, hech ilaj scꞌopilal ti chachꞌunic ti smantal noꞌox crixchanoetic liꞌ ti balumile. Hech yuꞌun ¿cꞌu yuꞌun ta to xatsꞌacliic ti crixchanoetique? ¿Cꞌu yuꞌun ta to xachꞌumbeic smantal ti crixchanoetique ti hech chayalboxuque: “Mu me xatsac lume, mu me xaveꞌ lume, mu me xapic lume”, ti xchiique?
\v 22 Jaꞌ smantal noꞌox stuquic, scꞌop noꞌox crixchanoetic ti chachꞌumbeique. Maꞌuc scꞌop Dios. Yuꞌun scotol veꞌelil muꞌyuc scꞌopilal. Jaꞌ stu yuꞌun ti jveꞌtic.
\v 23 Oy yip yaꞌyel ti scꞌope. Jun to chijcolucutic yuꞌun yaꞌyel. Yuꞌun chalic ti persa ti jpastic ti mucꞌ ti chꞌul abatetique, persa chcacꞌ jbatic ti qꞌuelel ti biqꞌuit chcacꞌ jbatique, persa chcacꞌbetic yichꞌ vocol ti jbecꞌtaltique. Lume muꞌyuc stu cuꞌuntic yuꞌun jaꞌ noꞌox ti jtoy jbatic yuꞌun mi hech ti jpastique.
\c 3
\p
\v 1 Yuꞌun coꞌol nachaꞌcusesat xchiꞌuc ti Cristoe chil ti Diose, jaꞌ me xasaꞌ ti cꞌutic sventa vinajele te yoꞌ bu pasbil ti mucꞌ ti Cristoe te ti sbatsꞌicꞌob ti Diose.
\v 2 Jaꞌ lec ti te batem avoꞌntonic ti cꞌutic sventa vinajele. Mu me jaꞌuc batem avoꞌntonic ti cꞌutic sventa ti balumile.
\v 3 Ti animae mu xa snaꞌ ti cꞌutic oy liꞌ ti balumile. Jaꞌ tscꞌan ti hech avoꞌntonic uc yuꞌun coꞌol nachamic xchiꞌuc ti Cristoe chil ti Diose. Mu snaꞌic ti crixchanoetique ti chacuxiic sbatel osile. Yuꞌun ti sventa ti Cristoe oy ti avoꞌntonic ti Diose, hech chacuxiic sbatel osil.
\v 4 Yuꞌun chacuxiic sbatel osil ti sventa ti Cristoe, hech yuꞌun cꞌalal chchaꞌsut tal ti Cristoe, hoꞌoxuc uc coꞌol chaꞌacꞌat ti qꞌuelel xchiꞌuc. Chavichꞌic aquevalic uc hech chaj cꞌu cheꞌel ti Cristoe.
\s Jaꞌ scꞌopilal ti poco cuxlejale xchiꞌuc ti achꞌ cuxlejale
\p
\v 5 Hech yuꞌun jꞌechꞌel chamenuc me ti abecꞌtalique yuꞌun ti muliletic liꞌ ti balumile. Hech mu xa xamulivajic, mu xa xapas ti cꞌusi chopole, mu xa xanaꞌ ti cꞌusi tscꞌan ti abecꞌtalique, mu xa xacꞌupin ti cꞌusi chopole, mu xa xbicꞌtaj avoꞌntonic. Yuꞌun mi chbicꞌtaj coꞌntontique, coꞌolucutic hech chaj cꞌu cheꞌel ti muchꞌu oy to yajsanto, yuꞌun mu junuc coꞌntontic ti stojol ti Diose.
\v 6 Yuꞌun quechel yilintaelic yuꞌun ti Diose ti stojolic scotol ti muchꞌutic batem ti yoꞌntonic hech tspasique.
\v 7 Ti voꞌone tale hech laj apasic uc. Jaꞌ batem ti avoꞌntonic uc.
\v 8 Ti ora to jꞌechꞌel acꞌo comuc avuꞌunic scotol avi to, jaꞌ ti chaꞌilinique, ti chaliques scꞌacꞌal avoꞌntonique, ti mu xtun chavil ti avermanotaque, ti chalabanvanique, ti chavalic bolcꞌope.
\v 9 Mu xa me xanopic cꞌop yuꞌun laj xa acomesic ti poco cuxlejale xchiꞌuc scotol ti cꞌutic nopen chavaꞌi chapasilanique.
\v 10 Avichꞌojic xa ti achꞌ cuxlejale, hech yacꞌoj sba ch-epaj ti spꞌijil avoꞌntonique yuꞌun hech jtos avoꞌntonic chacꞌotic xchiꞌuc ti Diose ti jaꞌ laj spasoxuque.
\v 11 Hech chlaj scꞌopilal mi yanlum vinicucutic, mi judiovinicucutic, mi quichꞌojtic circuncisión, mi mu quichꞌojticuc circuncisión, mi chanubtasbilucutic, mi mu chanubtasbilucutic, mi oyucutic ti mozoil yuꞌun mambilucutic, mi libre oyucutic. Jaꞌ tsots scꞌopilal ti jun nijcꞌotucutic xchiꞌuc ti Cristoe yuꞌun oy ti coꞌntontic jcotoltic.
\p
\v 12 Ti hoꞌoxuque laj xa stꞌujoxuc ti Diose, laj xa slecubtasboxuc avoꞌntonic. Cꞌuxoxuc ti yoꞌnton. Hech yuꞌun tscꞌan ti chacꞌuxubinvanique, ti chavaqꞌuic ti qꞌuelel ti lec avoꞌntonique. Mu me xatoy abaic. Biqꞌuit me xavacꞌ abaic. Oyuc me yip avoꞌntonic.
\v 13 Tsꞌicbo me abaic. Mi oy muchꞌu oy smul ti atojol, pasbo me perdón. Hech chaj cꞌu cheꞌel laj spasboxuc perdón ti Cristoe, hech onoꞌox uc chapasbe abaic perdón uc ti hoꞌoxuque.
\v 14 Jaꞌ tsots scꞌopilal ti cꞌux chavaꞌi abaique hech jtos avoꞌntonic chacꞌotic ti mero melel.
\v 15 Yuꞌun ti laj yicꞌoxuc ti stojol ti Cristoe, yuꞌun jun avoꞌntonic chacꞌotic xchiꞌuc. Hech yuꞌun cꞌano me ti jun avoꞌntonic scotol cꞌacꞌal ti jujunoxuque, hech chtojob avuꞌunic mi lec mi mu lecuc ti cꞌusi chapasique. Yuꞌun ti hech chascoltaoxuque, tscꞌan ti scotol cꞌacꞌal hocol aval xavutic.
\p
\v 16 Acꞌo nojuc ti avoꞌntonic ti scꞌop ti Cristoe. Hech oy spꞌijil avoꞌntonic chachanubtas abaic, chataqꞌui abaic. Hech oy yutsil avoꞌntonic chaqꞌuejintaic ti scꞌop ti Diose xchiꞌuc ti sqꞌuejoj ti Diose. Yuꞌun ti chaqꞌuejinique, hocol aval xavutic ti Diose ti avoꞌntonic.
\v 17 Scotol ti cꞌusi chapasique, mi chacꞌopojique, mi chaꞌabtejique, jaꞌuc me ti sventa ti Cajvaltic Jesuse ti chapasic scotole. Hocol aval xavutic me ti Diose yuꞌun ti hech xuꞌ avuꞌunic ti sventa ti Cajvaltic Jesuse.
\s Jaꞌ scꞌopilal ti cꞌusi tscꞌan yuꞌun quichꞌojtic xa ti achꞌ cuxlejale
\p
\v 18 Antsetic, chꞌumbeic smantal ti amalalique yuꞌun hech tscꞌan yuꞌun oyoxuc xa ti stojol ti Cajvaltique.
\v 19 Viniquetic, cꞌux me xavaꞌyic ti avajnilique. Mu me tsotsuc chacꞌoponic.
\v 20 Queremetic, tsebetic, chꞌumbeic scotol smantal ti atot ameꞌique yuꞌun hech nichim noꞌox yoꞌnton ti Cajvaltique avuꞌunic.
\v 21 Hoꞌoxuc ti stot smeꞌoxuque, mu me xabolibtasbe yoꞌntonic ti avol anichꞌonique naca me chibajuc yoꞌntonic avuꞌunic, yuꞌun hech mu xa scꞌan tspas ti abtel ti chavalbee.
\v 22 Hoꞌoxuc ti namanatique hech naꞌochic ti mozoil, chꞌumbeic scotol smantal ti avajvalique ti liꞌ ti balumile. Maꞌuc noꞌox lec chaꞌabtejic cꞌalal yacꞌoj sba chasqꞌueloxuc ti avajvale yuꞌun chacꞌan ti lec chayiloxuque. Yuꞌun chapasic ti mucꞌ ti Diose, hech yuꞌun abtejanic ti lec manchuc mi mu teuc avajval chasqꞌueloxuc.
\v 23 Scotol ti cꞌusi chapasique yutsiluc me avoꞌntonic chapasic yuꞌun jaꞌ chaꞌabtejic yuꞌun ti Cajvaltique, maꞌuc noꞌox chaꞌabtejic yuꞌun crixchanoetic.
\v 24 Naꞌic me ti chayacꞌboxuc atojolic ti Cajvaltique yuꞌun ti hech chapasique, jaꞌ ti chaꞌochic ti utsilale. Yuꞌun jaꞌ yuꞌun Cristo ti chaꞌabtejique, jaꞌ Cajvaltic sventa sbatel osil.
\v 25 Mi chopol ti cꞌusi chapasique, jaꞌ chaꞌacꞌbat atojic yuꞌun ti hech laj apasique. Yuꞌun mi junuc muꞌyuc muchꞌu chcꞌuxubinat ti muchꞌutic chopol cꞌu tspasique.
\c 4
\p
\v 1 Hoꞌoxuc ti yajvaloxuque, tojuc me chavalbeic mantal ti amozotaque. Razonuc me ti cꞌusi chavalbeique yuꞌun chanaꞌic ti oy Avajvalic uc te ti vinajel.
\v 2 Acotolic acꞌo me persa, cꞌoponic Dios. Mu me peqꞌueluc avoꞌntonic cꞌalal chacꞌoponic Dios. Hocol aval xavutic me ti Diose.
\v 3 Cꞌopombun Dios ti jtojol uc yuꞌun acꞌo sta yorail tspas mantal ti Cajvaltique yuꞌun hech acꞌo yaꞌyic ep achiꞌiltac ti jventa ti scꞌopilal ti Cajvaltique ti muc bu yaꞌyoj mi jutuc crixchanoetic ti voꞌone. Jaꞌ ti chascoltaoxuc uc ti Cristoe, hoꞌoxuc ti yanlum crixchanooxuque. Jaꞌ yuꞌun ti liꞌ chuculun ti ora to yuꞌun ti jcholbe yaꞌyic ti achiꞌiltaque.
\v 4 Cꞌambeic vocol ti Diose yuꞌun acꞌo huꞌuc cuꞌun ti jamal chcalbe ti scꞌope yuꞌun hech tscꞌan ti jpas.
\p
\v 5 Tscꞌan ti pꞌijoxuc yuꞌun ti cꞌutic chapasique ti stojolic ti muchꞌutic mu xchꞌunojbuc scꞌop ti Diose. Cꞌalal chaloꞌlaj xchiꞌuc ti muchꞌutic mu xchꞌunojbuc scꞌop ti Diose tscꞌan ti pꞌijoxuc, mu me puru loꞌiluc chavalic xchiꞌuc. Mu me hoviluc ti cꞌacꞌal ti chchꞌay avuꞌunique. Albeic me ti scꞌop ti Diose.
\v 6 Oyuc me yutsil ti acꞌope. Oyuc me sjam ti cꞌusi chavalique. Tscꞌan ti chanaꞌic cꞌusi tscꞌan yuꞌun chatacꞌbe scꞌop jujun.
\s Jaꞌ scꞌopilal chabanucot la xal scotol ti quermanotique, xchi
\p
\v 7 Scotol chcꞌot yalboxuc avaꞌyic jcꞌopilal ti Tíquicoe, jaꞌ ti quermanotic ti cꞌux ti coꞌntontique, ti jun yoꞌnton yacꞌoj sba ch-abtej yuꞌun ti Cajvaltique. Coꞌol cacꞌoj jbatutic ti abatinel xchiꞌuc ti stojol ti Cajvaltique.
\v 8 Ti jtac talel ti atojolic yuꞌun hech chavaꞌyic ti lec oyune, hech chmucꞌub avoꞌntonic.
\v 9 Jaꞌ chchiꞌin talel ti Onésimoe, jaꞌ ti achiꞌilique ti te loqꞌuem tal ti atojolique, yuꞌun laj xa xchꞌumbe scꞌop ti Cajvaltique. Cꞌux ti coꞌntontutic. Jun noꞌox yoꞌnton ch-abtej uc yuꞌun ti Cajvaltique. Scotol chcꞌot yalboxuc avaꞌyic xchaꞌvaꞌalic cꞌusi cꞌotem xa ti pasel liꞌto.
\p
\v 10 Chabanucot la xal ti Aristarcoe ti liꞌ tal xchiꞌinun liꞌ ti yut chuquele. Chabanucot la xal uc ti Marcose, jaꞌ ti yuts yalal ti Bernabee. Laj xa calboxuc ti chapasic ti mucꞌ ti mi oy cꞌu cheꞌel te tal sqꞌueloxuque.
\v 11 Chabanucot la xal uc ti Jesuse, jaꞌ ti Justo yan sbie. Muꞌyuc ep ti jchiꞌiltac ti tscꞌan chiscoltaucune. Jaꞌ noꞌox oxvoꞌic ti mero jchiꞌile ti chiscoltaune, hech chmucꞌub coꞌnton ti sventaic yuꞌun coꞌol ti jpasbetutic yabtel ti Diose yuꞌun acꞌo chꞌumbatuc scꞌop yuꞌun ti crixchanoetique.
\v 12 Chabanucot la xal uc ti Epafrase, jaꞌ ti te loqꞌuem tal ti atojolic uque. Jaꞌ ch-abtej uc yuꞌun ti Cristoe. Scotol cꞌacꞌal tscꞌopon Dios ti atojolic yuꞌun hech junuc me avoꞌntonic chachꞌumbeic scꞌop ti Diose, yuꞌun acꞌo huꞌuc avuꞌunic ti chapasic scotol ti cꞌusi tscꞌan ti Diose.
\v 13 Quiloj ti toyol yoꞌnton tscꞌopon Dios ti atojolic. Toyol yoꞌnton tscꞌopombe Dios uc ti stojol ti quermanotic ti te oyic ti jteclum Laodicea xchiꞌuc ti jteclum Hierápolis.
\v 14 Chabanucot la xal uc ti Lucase, jaꞌ ti doctore, ti cꞌux ti coꞌntontique. Chabanucot la xal uc ti Demase.
\p
\v 15 Avocoluc chabanuc ti quermanotic te ti jteclum Laodiceae. Chabanuc uc ti quermanotic antse, jaꞌ ti Ninfas sbie, xchiꞌuc uc ti quermanotic ti te tstsob sbaic xchiꞌuc te ti snae.
\v 16 Cꞌalal mi laj xa aqꞌuelic avi carta liꞌto acotolic, acꞌbo ti quermanotic te ti jteclum Laodiceae, acꞌo me sqꞌuelic scotolic. Ti carta yuꞌunic ti quermanotic te ti Laodiceae, qꞌuelic me uc, hoꞌoxuque.
\v 17 Avocoluc me albo ti quermanotic Arquipoe, “acꞌo me persa, huꞌteso avabtel ti naꞌacꞌbat yuꞌun ti Cajvaltique”, xavutic me.
\p
\v 18 Hoꞌon laj jtsꞌiba ti chaꞌchol oxchol avi to, hoꞌon ti Pabloune. Mu me xchꞌay ti avoꞌntonic ti liꞌ chuculune. Acꞌo yacꞌboxuc ep bendición ti Diose.