\id 2TI

\h 2 TIMOTEO
\toc1 2 TIMOTEO
\mt JAꞌ TI XCHIBAL SCARTA TI TIMOTEOE
\mt2 ti itsꞌibabat yuꞌun ti Pabloe
\c 1
\s Hech lic scꞌopon ti carta ti Timoteoe ti Pabloe
\p
\v 1 Hoꞌon Pabloun, hoꞌon jcholcꞌopun yuꞌun ti Jesucristoe yuꞌun hech laj scꞌan yoꞌnton ti Diose. Yuꞌun yaloj ti Diose ti chijcuxiucutic sbatel osil ti sventa ti Cristo Jesuse, hech yuꞌun ti jcholbe ti scꞌope.
\v 2 Chajcꞌoponot ti carta, Timoteo, hoꞌot ti jnichꞌonote ti cꞌuxot ti coꞌntone. Hoꞌot jnichꞌonot yuꞌun ti sventa laj jcholbot ti scꞌop ti Diose hech laj achꞌun. Acꞌo yacꞌbot bendición ti Jtotic Diose xchiꞌuc ti Cajvaltic Jesucristoe. Acꞌo xcꞌuxubinot. Acꞌo yacꞌbot jun avoꞌnton.
\s Jaꞌ scꞌopilal mu me xaqꞌuexav yuꞌun chavalbe scꞌopilal ti Cristoe, xchi
\p
\v 3-4 Yuꞌun jun yoꞌntonic iꞌabtejic yuꞌun ti Diose ti jtatamoltaque hech yuꞌun jun coꞌnton chiꞌabtej yuꞌun uc. Yuꞌun avacꞌoj aba chaꞌabtej uc yuꞌun ti Diose, hech yuꞌun scotol cꞌacꞌal hocol aval chcut ti Diose. Ti cꞌacꞌal ti acꞌubal chajnaꞌot, ti jcꞌopon Dios ti atojol, yuꞌun ti jnaꞌ ti ep naꞌocꞌ cꞌalal nacom cuꞌun. Hech yuꞌun jaꞌ noꞌox batem coꞌnton ti jcꞌan ti jqꞌuel asat ti ora yuꞌun hech más nichim noꞌox coꞌnton ti jyalel mi ti jqꞌuel asate.
\v 5 Ti jnaꞌ ti achꞌunojbe scꞌop ti Diose ti mero melel yuꞌun lec laj xchꞌun ti amembele, jaꞌ ti Loidae, xchiꞌuc uc ti ameꞌe, jaꞌ ti Eunicee. Hech yuꞌun ti jnaꞌ ti hech achꞌunoj uc.
\p
\v 6 Hech yuꞌun chacalbot yan vuelta yuꞌun hech mu me xchꞌay ti avoꞌnton. Mu me xlaj avoꞌnton yuꞌun chachanubtas ti quermanotique. Yuꞌun hech naꞌacꞌbat avabtel yuꞌun ti Diose ti cꞌalal laj cacꞌ jcꞌob ti ajol xchiꞌuc ti ancianoetique, hech yuꞌun toyoluc me avoꞌnton chapas.
\v 7 Yuꞌun mi chijxiꞌucutique, maꞌuc sventa Dios. Yuꞌun chijyacꞌbucutic yip coꞌntontic. Chijyacꞌbucutic yuꞌun chijcꞌuxubinvan. Chijyacꞌbucutic spꞌijil coꞌntontic uc.
\v 8 Hech yuꞌun mu me xaqꞌuexav yuꞌun ti chavalbe scꞌopilal ti Cajvaltique. Mu me xaqꞌuexav uc yuꞌun ti chavalbun jcꞌopilale yuꞌun ti sventa ti Cajvaltique ti liꞌ tiqꞌuilun ti chuquele. Jaꞌ lec ti coꞌol ti jtsꞌictic ti vocole yuꞌun ti lequil achꞌ cꞌope. Ti sventa ti Diose chcuch cuꞌuntic ti vocole.
\v 9 Jaꞌ ti Diose ti laj scoltaucutic loqꞌuel ti scꞌob ti pucuje, laj yicꞌucutic ti stojol yuꞌun hech chijtun yuꞌun stuc noꞌox. Maꞌuc ti sventa cabteltic jtuctic ti laj yicꞌucutique. Jaꞌ yutsil yoꞌnton laj yicꞌucutic yuꞌun jaꞌ tscꞌan ti chijtun yuꞌun. Hech jcꞌopilaltic ti voꞌone yuꞌun ti Diose cꞌalal mu to chmeltsaj ti balumile ti chijyacꞌbucutic yutsil coꞌntontic ti sventa ti Cristo Jesuse.
\v 10 Jaꞌto ivinaj cꞌalal ital ti Jesucristoe, jaꞌ ti Jcoltavanej cuꞌuntique. Laj sjin yuꞌun ti chꞌayel chijbatucutique. Laj yacꞌ ti qꞌuelel ti chijcuxiucutic sbatel osile ti muc chijyanej xa sbatel osil. Jaꞌ ti lequil achꞌ cꞌop ti laj xa jchꞌuntique.
\p
\v 11 Hoꞌoni quichꞌoj cabtel yuꞌun ti jcholbe yaꞌyic ti lequil achꞌ cꞌope ti yanlum crixchanoetique. Tacbilun batel yuꞌun ti jchanubtas.
\v 12 Jaꞌ yuꞌun ti chquichꞌ vocol ti ora to. Mu xiqꞌuexav yuꞌun chcojtiquin ti Cajvaltique ti jchꞌunojbe scꞌope. Yuꞌun jchꞌunoj ti xuꞌ yuꞌun chixchabiun, hech yuꞌun cacꞌojbe sventaimbun coꞌnton asta cꞌalal tsta yorail chixchapanucutic jcotoltic ti Diose.
\p
\v 13 Mu me xlaj avoꞌnton chachol ti lequil cꞌope ti laj xa calbote yuꞌun jaꞌ melel. Jaꞌ tsots scꞌopilal ti chachꞌumbe scꞌop ti Cajvaltique. Jaꞌ tsots scꞌopilal uc ti chacꞌuxubinvan. Xuꞌ avuꞌun ti sventa ti Cristo Jesuse.
\v 14 Chabio, mu me xyanej ti scꞌop ti Diose ti naꞌacꞌbat aventaine yuꞌun jaꞌ melel. Xuꞌ avuꞌun ti sventa ti Chꞌul Espíritue ti nainem ti coꞌntontique.
\p
\v 15 Avaꞌyoj xa ti laj xa scomesun scotol ti quermanotic ti te oyic ti estado Asiae xchiꞌuc ti Figelioe xchiꞌuc ti Hermógenese.
\v 16 Acꞌo yichꞌ cꞌuxubinel yuꞌun ti Cajvaltique ti jayvoꞌic te comen ti sna ti Onesíforoe yuꞌun ep vuelta tal smucꞌubtasbun coꞌnton ti quermanotique. Muc xqꞌuexav yuꞌun ti liꞌ chuculun ti cadena-taqꞌuine. Ay sqꞌuelun.
\v 17 Cꞌalal ihul liꞌ ti Romae, toyol yoꞌnton laj saꞌun jaꞌto laj staun.
\v 18 Ti jcꞌambe ti Cajvaltique ti acꞌo yichꞌ cꞌuxubinel cꞌalal tsta yorail ti chixchapanucutique. Anaꞌoj uc ti lec laj scoltaucutic uc te ti Efesoe.
\c 2
\s Jaꞌ scꞌopilal ti yajsoldadoucutic cꞌotemucutic ti Jesucristoe
\p
\v 1 Hech yuꞌun ti hoꞌote, nichꞌon, acꞌo oyuc yip avoꞌnton yuꞌun yutsil yoꞌnton chcoltavan ti Cristo Jesuse.
\v 2 Ti cꞌu yepal laj avaꞌi ti cꞌalal laj jchanubtas ti quermanotique, jaꞌ noꞌox me hech chachanubtas uc ti muchꞌutic jun yoꞌntonic ch-abtejic yuꞌun ti Diose, ti xuꞌ yuꞌunic chchanubtas yantic uc.
\p
\v 3 Ti hoꞌote tsꞌico me uc ti vocole. Junuc me avoꞌnton tsꞌaclio ti Jesucristoe yuꞌun jaꞌ Capitan soldado cuꞌuntic. Hoꞌucutique yajsoldadoucutic nijcꞌotucutic.
\v 4 Ti muchꞌu ochem ti soldadoe, jaꞌ te oy yoꞌnton ti muchꞌu iticꞌat ti soldado yuꞌune, hech lec ch-ilat yuꞌun. Ti hoꞌucutique jaꞌ noꞌox hech uc ti stojol ti Cajvaltique. Mu me xbat coꞌntontic ti cꞌutic oy liꞌ ti balumile.
\v 5 Ti muchꞌu tscꞌan tstsalvan ti tajimole, mi mu xchꞌun mantal, mu xꞌacꞌbat yichꞌ smoton. Ti hoꞌucutique jaꞌ noꞌox hech uc ti stojol ti Cajvaltique. Mi mu lecuc ti jcholtic ti scꞌope ti jaꞌ melele, mi mu xijcꞌuxubinvane, mu xijyacꞌbucutic jmotontic.
\v 6 Ti muchꞌu tsots ch-abtej tspas xchob, hech oy cꞌusi oy yuꞌun. Ti hoꞌucutique jaꞌ noꞌox hech uc ti stojol ti Cajvaltique. Mi tsots chijꞌabtej yuꞌun ti Cajvaltique, hech oy cꞌusi oy cuꞌuntic liꞌ ti balumile. Hech oy cꞌusi oy cuꞌuntic te ti vinajel uc.
\v 7 Hech yuꞌun nopo me ti cꞌutic laj calbote. Ti Cajvaltique chayacꞌbot yuꞌun chavaꞌibe sjam scotol.
\p
\v 8 Tscꞌan ti oy ti avoꞌnton ti ichaꞌcuxi loqꞌuel ti chꞌen ti Jesucristoe. Tscꞌan ti oy ti avoꞌnton uc ti jaꞌ yelnichꞌon ti Davide ti jaꞌ ch-och ti ajvalil sbatel osile. Jaꞌ hech ti lequil achꞌ cꞌope ti yacꞌoj sba ti jchole.
\v 9 Yuꞌun ti hech ti jchole, hech yuꞌun chquichꞌ vocol ti ora to. Hech yuꞌun tiqꞌuilun ti manyá-taqꞌuin hech chaj cꞌu cheꞌel ti muchꞌutic cꞌutic chopol tspase. Manchuc mi chuculun hoꞌoni, mu xtaat ti chuquel ti scꞌop ti Diose.
\v 10 Hech yuꞌun ti jtsꞌic scotol ti vocole yuꞌun ti jcꞌan ti chcol scotol ti yantique ti tꞌujbilic uc yuꞌun ti Diose. Hech chijcolucutic jcotoltic ti sventa ti Cristo Jesuse. Hech chba jqꞌueltic ti utsilale sbatel osil.
\q
\v 11-13 Mi coꞌol coꞌntontic xchiꞌuc ti Cajvaltique,
\q ti jpastic cꞌusi tscꞌan ti Diose manchuc mi chismilucutic,
\q hech coꞌol chijcuxiucutic xchiꞌuc.
\q Mi coꞌol ti jtsꞌictic ti vocole hech chaj cꞌu cheꞌel itsꞌic yuꞌun ti Cajvaltique,
\q hech yuꞌun coꞌol ti jchiꞌintic ti pasmantal.
\q Jaꞌuc mi ti jmuctic ti coꞌntontique,
\q hech yuꞌun “maꞌuc jnichꞌon lume”,
\q xchi ti Cajvaltique.
\q Jaꞌ jcꞌopilaltic.
\q Mi chchibaj coꞌntontic ti stojol,
\q jaꞌ mu xchibaj yoꞌnton ti jtojoltic, ti xchie.
\q Hech chal yuꞌun mu snaꞌ sutes scꞌop ti Diose.
\m Jaꞌ lec ti jpastic ti mucꞌ jcotoltic ti cꞌop avi to yuꞌun melel ti cꞌop avi to.
\s Jaꞌ scꞌopilal jaꞌ xacꞌan ti lec chayilot ti Diose, xꞌutat
\p
\v 14 Albo me ti hech chaj cꞌu cheꞌel laj calbot avi to. Paso me ti mantal ti stojol ti Cajvaltique ti mu me stsal sbaic ti cꞌop. Pajeso yuꞌun mu yuꞌunuc chlecub yoꞌntonic yuꞌun. Jaꞌ chbolib yoꞌntonic uc ti muchꞌutic chaꞌyique.
\v 15 Jaꞌ xacꞌan ti lec chayilot ti Diose. Acꞌo persa yuꞌun hech chcꞌot ti pasel avuꞌun. Hech yuꞌun hoꞌoti mi toj chachol ti scꞌope ti jaꞌ melele, hech yuꞌun mu xaqꞌuexav ti stojol ti Cajvaltique.
\v 16 Mu me xacꞌan ti hovil cꞌop ti chalic ti muchꞌutic tscꞌan tstsal sbaic ti cꞌope. Yuꞌun jaꞌ noꞌox más chbolib yoꞌntonic ti muchꞌutic hech tspasique asta chbolib o.
\v 17 Chjinvan ti scꞌope mi chcaꞌibetique hech chaj cꞌu cheꞌel ch-epaj batel ti muchꞌu chcꞌaꞌ ti sbecꞌtale. Jaꞌ hech laj xa spasic ti Himeneoe xchiꞌuc ti Filetoe.
\v 18 Yan ti cꞌu cheꞌel stamojique. Chalic ti ichaꞌcuxiic xa scotol ti muchꞌutic chchaꞌcuxiique. Chalic ti muꞌyuc xa muchꞌu chchaꞌcuxi. Hech chchꞌaybe xchꞌunojel yoꞌntonic ti yantique.
\v 19 Manchuc mi hech yoꞌntonic ti muchꞌutic bol yoꞌntonic ti tscꞌan chchꞌaybe xchꞌunojel yoꞌntonic ti muchꞌutic xchꞌunojique, mu yuꞌunuc chtupꞌ ti muchꞌutic xchꞌunojique. Yuꞌun hech chal ti scꞌop ti Diose: “Ti Cajvaltique xojtiquin ti muchꞌutic yuꞌune”, ti xchie. Hech chal uc: “Scotol ti muchꞌutic chajvalinic ti Cristoe chcom yuꞌunic ti mulile”, ti xchie.
\p
\v 20 Ti bu mucꞌta nae oy pulato pasbil ti cꞌanal taqꞌuin, oy pasbil ti saquil taqꞌuin. Oy yan uc pasbil ti teꞌ, oy pasbil ti lum. Jaꞌ tsots scꞌopilal ti pasbil ti cꞌanal taqꞌuine xchiꞌuc ti pasbil ti saquil taqꞌuine chil ti yajvale. Ti bu pasbil ti teꞌ xchiꞌuc ti lum, jaꞌ mu tsotsuc scꞌopilal chil ti yajvale.
\v 21 Ti hoꞌucutique hech chaj cꞌu cheꞌel spulato yaꞌyel cꞌotemucutic yuꞌun ti Cajvaltique. Hech yuꞌun jaꞌ scꞌan ti chijtun yuꞌune. Hech yuꞌun mi ti jcꞌantic ti chijtun yuꞌune, mu xcacꞌtic chisbolibtasucutic ti yantique. Hech lec chijyilucutic ti Cajvaltique, hech toj coꞌntontic chijyilucutic, hech oy jtutic yuꞌun. Hech lec chapalucutic hech xuꞌ cuꞌuntic ti jpastic scotol lequil abtel.
\p
\v 22 Yuꞌun cꞌalal unen vinicucutic to, ep tscꞌan chisujucutic ti mulil ti jbecꞌtaltique. Hech chaj cꞌu cheꞌel huꞌem avuꞌun asta ti ora to, jaꞌ noꞌox me hech acꞌo huꞌuc avuꞌun batel. Jaꞌ chasaꞌ ti yutsil avoꞌntone xchiꞌuc ti xchꞌunojel avoꞌntone xchiꞌuc ti chacꞌuxubinvane, xchiꞌuc ti jun avoꞌntone hech chaj cꞌu cheꞌel tsaꞌic ti muchꞌutic toj yoꞌntonique ti chalbeic vocol ti Cajvaltique.
\v 23 Mu me xatacꞌbe scꞌop ti muchꞌu mu xtojob yuꞌun scoj ti mu snaꞌ cꞌusi tscꞌan ti Diose. Yuꞌun jaꞌ noꞌox chlic cꞌop avuꞌun xchiꞌuc.
\v 24 Yuꞌun ti muchꞌu ch-abtej yuꞌun ti Cajvaltique mu sliques cꞌop. Jaꞌ oy yutsil yoꞌnton tscꞌopon scotol crixchanoetic. Xuꞌ yuꞌun chchanubtasvan. Mu xlaj yoꞌnton ti ora, chcuch yuꞌun ti vocole.
\v 25 Lamajem yoꞌnton tstaqꞌui ti muchꞌutic chcontrainat yuꞌune yuꞌun hech repenta tsutesbat yoꞌntonic yuꞌun ti Diose, hech chcꞌot ti yoꞌntonic ti scꞌope, jaꞌ ti melele.
\v 26 Ti mi isut yoꞌntonique, hech chlic snaꞌic ti ilaj ti loꞌlael yuꞌun ti pucuje, ti ichucatic hech iꞌabtejic yuꞌun ti pucuje.
\c 3
\s Jaꞌ scꞌopilal ti pꞌijucucutic me, acꞌo jnaꞌtic ti mu yuꞌunuc chlecub batel ti crixchanoetique
\p
\v 1 Naꞌo me uc ti cꞌusi chacalbe ti ora to. Cꞌalal poꞌot xa tsta yorail ti slajebal cꞌacꞌale, jaꞌ ch-epaj ti vocole.
\v 2 Ti crixchanoetique stuc noꞌox chcꞌuxubin sba. Chbicꞌtaj yoꞌntonic yuꞌun taqꞌuin, tstoy sbaic xchiꞌuc scꞌop, biqꞌuit yoꞌntonic, chopol chcꞌopojic, mu xchꞌumbeic smantal stot smeꞌic, mu scꞌanic vocol, muꞌyuc Dios ti yoꞌntonic.
\v 3 Mu xcꞌuxubinvanic, mi iꞌiline mu xlaj yoꞌntonic, tsaꞌbeic smul yan, scotol tspasic mu spajes sbaic, perroic, tslabanic ti cꞌusi leque.
\v 4 Tsloꞌla sbaic, muꞌyuc srazonic, stoyoj sbaic ti jyalel. Jaꞌ noꞌox batem ti yoꞌntonic ti cꞌusi tscꞌan ti sbecꞌtalique. Maꞌuc cꞌux ti yoꞌntonic ti Diose.
\v 5 “Jnaꞌtic bu oy ti Diose”, xchiic. Mu xchꞌumbeic smantal ti Diose.
\p Hech yuꞌun mu me xachiꞌin lume.
\v 6 Hech yoꞌntonic ti muchꞌutic chloꞌlavanic ti ora to. Ch-ochic ti nantic chalbeic ti antsetique ti cꞌusi chchꞌunique. Jaꞌ ti bol antsetique ti mu xtojob yuꞌunique, ti ep smul staojique. Yuꞌun scotol ora chchꞌunic ti cꞌutic tscꞌan ti sbecꞌtalique.
\v 7 Scotol cꞌacꞌal tscꞌan chchanubtasat cꞌuc noꞌox cꞌopal lec chaꞌyic. Hech yuꞌun mu xcꞌot ti yoꞌntonic ti scꞌop ti Diose ti jaꞌ melele.
\v 8 Hech chaj cꞌu cheꞌel laj scontrainic ti Moisese ti Janese xchiꞌuc ti Jambrese te ti stojol ti Faraone, hech onoꞌox uc tscontrainic ti scꞌop ti Diose ti muchꞌutic boliben yoꞌntonique, jaꞌ ti muchꞌutic xchꞌunojic scuyoj sbaique.
\v 9 Hech chaj cꞌu cheꞌel ivinaj ti stojol scotol crixchanoetic ti muc xuꞌ yuꞌunic ti Janese xchiꞌuc ti Jambrese, hech onoꞌox uc chvinaj ti stojol scotol crixchanoetic ti hovil ti hech chchꞌunic ti muchꞌutic chloꞌlavanique.
\s Jaꞌ scꞌopilal jꞌechꞌel acꞌo ti avoꞌnton ti scꞌop ti Diose hech chaj cꞌu cheꞌel achanoj, xꞌutat comel
\p
\v 10 Ti hoꞌote achꞌunoj xa ti cꞌusi laj cacꞌ ti chanele. Aviloj xa ti cabtele. Avilojbun xa ti coꞌntone, avilojbun xa ti oy xchꞌunojel coꞌntone, ti mu xlaj coꞌnton ti ora, ti chicꞌuxubinvane, ti jun coꞌnton ti stojol ti Diose.
\v 11 Xanaꞌ ti itsꞌic cuꞌun labanel. Xanaꞌ ti laj quichꞌ vocol te ti Antioquía xchiꞌuc ti Iconio xchiꞌuc ti Listra. Xanaꞌ ti ep laj quichꞌ ilbajinel. Scotol icuch cuꞌun ti sventa ti Cajvaltique.
\v 12 Yuꞌun scotol ti muchꞌutic toyol yoꞌntonic ch-abtejic yuꞌun ti Jesucristoe, jaꞌ chichꞌic vocol.
\v 13 Jaꞌuc ti muchꞌutic chopol yoꞌntonique xchiꞌuc ti muchꞌutic chloꞌlavanique, jaꞌ más chbolib yoꞌntonic yuꞌun cꞌalal yacꞌoj sba chloꞌlavanic, chloꞌlaatic uc.
\p
\v 14 Ti hoꞌote jꞌechꞌel acꞌo ti avoꞌnton ti cꞌusi achanoje yuꞌun xanaꞌ ti jaꞌ melele yuꞌun laj anaꞌbe yoꞌntonic ti muchꞌutic laj xchanubtasote.
\v 15 Yuꞌun biqꞌuitot to laj avaꞌi ti scꞌop ti Diose, hech yuꞌun napꞌijub. Hech lic achꞌumbe scꞌop ti Cristo Jesuse, hech chacol sbatel osil.
\v 16 Stuc laj yal ti Diose ti cꞌu yepal pꞌejel ti sun ti Diose yuꞌun chixchanubtasucutic cꞌusi ti jchꞌuntic, yuꞌun chisutesbucutic coꞌntontic, yuꞌun chistaqꞌuiucutic, yuꞌun chistojobtasucutic ti sbelal utsilal.
\v 17 Hech chapal chijcꞌot, hoꞌucutic ti oyucutic ti stojol ti Diose. Lec pꞌijubenucutic cꞌu cheꞌel scꞌan ti jpastic scotol lequil abtel.
\c 4
\s Jaꞌ scꞌopilal junuc me avoꞌnton cholo me ti scꞌop ti Diose, xꞌutat
\p
\v 1 Chajpasot ti mantal ti stojol ti Diose xchiꞌuc ti stojol ti Cajvaltic Jesucristoe. Jaꞌ ti Cajvaltique chichꞌbe scꞌop yuꞌun smulic ti muchꞌutic cuxajtique xchiꞌuc ti muchꞌutic chamenique. Yuꞌun chanaꞌ ti chchaꞌsut tale, yuꞌun chanaꞌ ti tsta yorail ti tspas mantal stuc ti Cajvaltique,
\v 2 hech yuꞌun cholo me ti scꞌop ti Diose, toyoluc me avoꞌnton scotol cꞌacꞌal. Manchuc mi mu scꞌan chaꞌyic, tijbo yoꞌntonic, taqꞌuio, tsatsubtasbo yoꞌntonic. Mu me xlaj avoꞌnton yuꞌun chachanubtas.
\v 3 Yuꞌun tsta yorail ti mu xa scꞌan chaꞌyic ti scꞌop ti Diose. Tsaꞌic ep jchanubtasvanejetic yuꞌunic ti ch-albatic ti cꞌusuc noꞌox cꞌopal ti lec chaꞌyique.
\v 4 Mu xa scꞌan chaꞌyic ti scꞌop ti Diose ti jaꞌ melele. Puru hovil cꞌop, puru loꞌil tscꞌan chaꞌyic.
\v 5 Ti hoꞌote, chabio me aba, oyuc me arazón, tsꞌico me ti vocole, abtelino xcholel ti scꞌop ti Diose. Acꞌo huꞌuc avuꞌun ti avabtele ti laj xa yacꞌbot ti Diose.
\p
\v 6 Yuꞌun ti hoꞌone poꞌot xa chicham. Lec oy mi chismilucun ti sventa ti scꞌop ti Cajvaltique yuꞌun chibat ti vinajel.
\v 7 Ihuꞌ xa cuꞌun laj jcontrain scotol ti cꞌutic chopole. Ilocꞌ xa cuꞌun ti cabtele. Jun coꞌnton ti stojol ti Cajvaltique ti sliqueb asta ti ora to.
\v 8 Hech yuꞌun qꞌuejbil xa ti jmotone chiyacꞌbun jaꞌ ti toj coꞌnton sbatel osile. Jaꞌ chiyacꞌbun ti Cajvaltique cꞌalal tsta yorail ti chixchapanucutic jcotoltic. Yuꞌun toj chchapanvan ti Cajvaltique, hech mu jtucuc noꞌox chiyacꞌbun. Jaꞌ chacꞌbe uc scotol ti muchꞌutic toyol yoꞌntonic tsmalaic ti chtale.
\s Jaꞌ scꞌopilal ti tscꞌan ti acꞌo tal qꞌuelatuc ti Pabloe yuꞌun ti Timoteoe
\p
\v 9 Nopo mi xuꞌ chtal aqꞌuelun ti ora.
\v 10 Yuꞌun ti Demase laj xa scomesun, yuꞌun batem ti yoꞌnton cꞌusi sventa avi balumil liꞌto. Ibat xa ti jteclum Tesalónica. Ti Crescentee te ba abtejuc yuꞌun Dios ti balumil Galacia. Jaꞌ noꞌox hech ti Titoe te ba abtejuc yuꞌun Dios ti balumil Dalmacia.
\v 11 Jaꞌ xa noꞌox jchiꞌinoj stuc ti Lucase. Hech yuꞌun icꞌbun me tal ti Marcose, chiꞌimbun talel yuꞌun chtun cuꞌun yuꞌun chiscoltaun.
\v 12 Ti Tíquicoe ti jtac talel ti bu oyote te ti Efeso.
\v 13 Cꞌalal chatal, ichꞌbun me tal ti jchije ti laj jcomes te ti Troas te ti sna Carpo. Ichꞌbun me tal uc ti hunetique. Jaꞌ tsots scꞌopilal ti balbil hunetique.
\p
\v 14 Ep laj xa scontrainun ti Alejandroe, jaꞌ ti muchꞌu ch-abtej ti cobre taqꞌuine. Yuꞌun ti laj xa scontrainune, jaꞌ ch-acꞌbat stoj yuꞌun ti Cajvaltique.
\v 15 Pꞌijan me uc, yuꞌun chiscontraimbucutic jcꞌoptic.
\p
\v 16 Ti cꞌalal laj yichꞌbun jcꞌop ti sba vueltae ti totil ajvalile, muꞌyuc muchꞌu laj scoltaun ti cꞌop. Scotolic laj scomesucun. Mu me xꞌacꞌbat stojic yuꞌun ti Diose.
\v 17 Stuc laj scoltaun ti Cajvaltique. Laj stsatsubtasbun coꞌnton hech lec laj jcholbe ti scꞌope, hech laj yaꞌyic ep ti yanlum crixchanoetique. Hech nicol, hech muc chismilucun.
\v 18 Ti Cajvaltique jaꞌ chiscoltaun loqꞌuel ti scꞌob scotol ti muchꞌutic tscꞌan chispasbun ti cꞌusi chopole. Chixchabiun, hech chiꞌoch ti bu tspas mantal te ti vinajel. Stuc tspasat ti mucꞌ sbatel osil. Jun yutsil ti hech chcꞌot ti pasel.
\s Jaꞌ scꞌopilal chabanuc ti quermanotique, xchi
\p
\v 19 Chabanuc ti Priscilae xchiꞌuc ti smalale, jaꞌ ti Aquilae, xchiꞌuc ti Onesíforoe, xchiꞌuc ti muchꞌutic te oy ti snae.
\v 20 Ti Erastoe icom ti Corinto. Ti Trófimoe itsaqui ti chamel, icom cuꞌun ti Mileto.
\v 21 Nopo mi xuꞌ chatal cꞌalal mu to sta yorail sic. Chabanucot la xal ti Eubuloe, ti Pudentee, ti Linoe, ti Claudiae, xchiꞌuc scotol ti yan quermanotique ti liꞌoyique.
\p
\v 22 Acꞌo sventaimbot avoꞌnton ti Cajvaltique. Acotolic acꞌo yacꞌboxuc bendición ti Diose.