\id TIT

\h SUN TITO
\toc1 SUN TITO
\mt JAꞌ TI SCARTA TI TITOE
\mt2 ti itsꞌibabat yuꞌun ti Pabloe
\c 1
\s Hech lic scꞌopon ti carta ti Titoe ti Pabloe
\p
\v 1 Hoꞌon Pabloun, hoꞌon mambilun yuꞌun ti Diose hech yuꞌun yabatun nicꞌot xa. Hoꞌon jcholcꞌopun yuꞌun ti Jesucristoe. Hech laj yacꞌbun cabtel yuꞌun ti jcholbe yaꞌyic ti scꞌope yuꞌun hech más tstsatsub yoꞌntonic ti muchꞌutic xchꞌunojbeic ti scꞌope, jaꞌ ti muchꞌutic tꞌujbilic yuꞌun ti Diose ti voꞌone. Hech más tsnaꞌic ti scꞌop ti Diose ti jaꞌ melele, jaꞌ ti chlecub coꞌntontic yuꞌune.
\v 2 Yuꞌun jchꞌunoj ti chicuxi sbatel osil. Yuꞌun cꞌalal mu to chmeltsaj ti balumile hech yaloj ti Diose ti chijcuxiucutique. Ti Diose mu snaꞌ snop cꞌop.
\v 3 Cꞌalal laj sta yorail yuꞌun ti Diose hech lic yichꞌ xcholel ti scꞌope. Ti Diose, jaꞌ ti Jcoltavanej cuꞌuntique, jaꞌ laj yacꞌbun cabtel yuꞌun ti jcholbe ti scꞌope.
\v 4 Hoꞌon chajcꞌoponot ti carta, Tito. Hoꞌot jun to jnichꞌonot xꞌelan yuꞌun coꞌol jchꞌunojtic. Acꞌo yacꞌbot ep bendición ti Jtotic Diose xchiꞌuc ti Cajvaltic Jesucristoe, jaꞌ ti Jcoltavanej cuꞌuntique. Acꞌo xcꞌuxubinot, acꞌo yacꞌbot jun avoꞌnton, hech mu xloꞌlaj avoꞌnton.
\s Jaꞌ scꞌopilal hech chatꞌujic ti muchꞌutic ch-ochic ti ancianoe, xchi
\p
\v 5 Yuꞌun ti laj jcomesot te ti balumil Cretae, yuꞌun chacolta ti quermanotique ti bu mu xtojob yuꞌunic chavil. Jaꞌ chatꞌuj uc muchꞌutic chavacꞌbe yichꞌ yabtelic ti anciano ti jujun jteclum hech chaj cꞌu cheꞌel ti laj calbot comele.
\v 6 Jaꞌ chatꞌuj ti muchꞌu lec scotol ti cꞌusi tspase ti mu xtabat smule, ti jun yoꞌnton ti stojol ti yajnile, ti xchꞌunojbeic scꞌop ti Diose xchiꞌuc ti xnichꞌnabe, ti mu chopoluc scꞌopilal ti xnichꞌnabe. Jaꞌ ti hech oy scꞌopilal ti chchꞌumbeic smantal ti stote.
\v 7 Yuꞌun ti muchꞌu tsventain ti jchꞌunojeletique yuꞌun tsventaimbe yabtel ti Diose, tscꞌan ti muchꞌu muꞌyuc smul chtabate. Mu xtun mi tstoy sba, mi ch-ilin, mi chyacub, mi ora tscꞌan chmajvan, mi chbicꞌtaj yoꞌnton yuꞌun taqꞌuin.
\v 8 Jaꞌ tscꞌan ti oy yutsil yoꞌnton chicꞌ ochel ti sna crixchanoetic. Jaꞌ tscꞌan ti toyol yoꞌnton yuꞌun ti cꞌusi leque. Jaꞌ tscꞌan ti cꞌutic tspase cꞌuncꞌun tsnop. Jaꞌ tscꞌan ti mu xjelav scꞌop. Jaꞌ tscꞌan ti toj yoꞌnton. Jaꞌ tscꞌan ti chiꞌ ti Diose. Jaꞌ tscꞌan ti tspajes sba.
\v 9 Jaꞌ tscꞌan ti jꞌechꞌel yacꞌoj ti yoꞌnton ti scꞌop ti Diose ti jaꞌ melele hech chaj cꞌu cheꞌel ichanubtasat. Hech xuꞌ tsmucꞌubtasbe yoꞌntonic ti yantique yuꞌun toj chchol ti scꞌop ti Diose. Hech xuꞌ tstojobtas ti muchꞌutic tscꞌan tstsalvan ti cꞌope.
\p
\v 10 Hech me chatꞌujic ti ancianoetique yuꞌun ep ti jpꞌajmantaletique, puru hovil cꞌop chalic, hech tsloꞌlabe yoꞌntonic ti yantique. Jaꞌ ep hech tspasic ti jchiꞌiltaque, jaꞌ ti toyol yoꞌntonic yuꞌun ti circuncisione, hoꞌontutic ti coꞌol judiountutic xchiꞌuque.
\v 11 Persa chpajic lume yuꞌun chchibajesbe yoꞌntonic ti quermanotique ti jujuchop na yuꞌun mu xtun ti cꞌusi chchanubtasvanique. Jaꞌ noꞌox tsloꞌlabe staqꞌuinic ti muchꞌutic chchꞌumbat scꞌope.
\p
\v 12 Hech laj yal jun ti muchꞌu pꞌij yuꞌunic te ti Creta ti voꞌone: “Ti hoꞌucutic ti liꞌ nacalucutic ti Cretae, puru jnopcꞌopucutic. Ti hoꞌucutique hech chaj cꞌu cheꞌel jtiꞌvanejbolomucutic yuꞌun ti jtiꞌtic yaꞌyel ti muchꞌutic ti jloꞌlatique. Jaꞌ noꞌox ti jcꞌantic ti hoꞌucutique ti ep chijveꞌucutic pero mu jcꞌantic chijꞌabtej”, xchi.
\v 13 Melel ti hech to tspasique. Hech yuꞌun tsots me chataqꞌui yuꞌun acꞌo xchꞌunic lec.
\v 14 Mu me spasic ti mucꞌ ti hovil loꞌil ti chal ti jchiꞌiltaque, hoꞌontutic ti coꞌol judiountutic xchiꞌuque. Mu me xchꞌumbeic smantal ti muchꞌutic mu scꞌan xchꞌunic ti scꞌop Diose ti jaꞌ melele.
\p
\v 15 Ti hoꞌucutique yuꞌun lecuben xa ti coꞌntontique hech yuꞌun lec scotol chquiltic ti cꞌutic veꞌlilal spasojbucutic ti Diose. Mi jtosuc ti jveꞌeltique mu xijbolib yuꞌun. Yuꞌun chopol ti yoꞌntonique scoj ti mu scꞌan xchꞌunic ti ital xa ti Cristoe hech yuꞌun chopol chil scotol. Yuꞌun boliben ti yoꞌntonique, hech yuꞌun mu xa xilic ti chopol ti cꞌutic chalique xchiꞌuc ti cꞌutic tspasique.
\v 16 Tscuyic ti chojtiquinic ti Diose. Ti sventa yabtelic chvinaj ti muꞌyuc Dios ti yoꞌntonic. Mu xtun ti yoꞌntonique. Mu scꞌan xchꞌumbeic smantal ti Diose. Hech yuꞌun mi jutuc mu xuꞌ tspasic lequil abtel.
\c 2
\s Jaꞌ scꞌopilal ta me xachol ti cꞌutic lec ti pasele ti chcoꞌolaj xchiꞌuc ti scꞌop Diose, xchi
\p
\v 1 Ti hoꞌote ta me xachol ti cꞌutic lec ti pasele ti chcoꞌolaj xchiꞌuc ti scꞌop Diose.
\v 2 Chavalbe ti moletique mu me xyacubic, acꞌo yaqꞌuic ti qꞌuelel ti cꞌusi lec ti pasel, oyuc me lec srazonic. Acꞌo xchꞌunic ti scꞌop ti Diose ti jaꞌ melele, acꞌo cꞌuxubinvanuc, acꞌo oyuc yip yoꞌntonic.
\v 3 Hech onoꞌox uc ti meꞌeletique, acꞌo oyuc srazonic, acꞌo spasic cꞌusi lec. Mu me snopbeic smul yan, mu me xyacubic. Acꞌo me yaqꞌuic ti qꞌuelel cꞌusi lec ti pasel.
\v 4 Acꞌo xchanubtasic ti unen antsetique ti cꞌux acꞌo yaꞌyic ti smalalique xchiꞌuc ti yolique.
\v 5 Acꞌo xchanubtasic ti unen antsetique ti mu xtun mi chjelavique, mi tsnopilanic ti cꞌutic chopole. Acꞌo yacꞌbe yil cꞌutic tspasic te ti snaic yuꞌun hech chpꞌijub. Acꞌo yalbeic ti lecuc me yoꞌntonic, ti acꞌo xchꞌumbeic smantal ti smalalique yuꞌun hech mu chopoluc chbat scꞌopilal ti scꞌop ti Diose ti xchꞌunojique.
\p
\v 6 Chataqꞌui uc ti unen viniquetique ti mu me xjelavique.
\v 7 Ti hoꞌote acꞌo ti qꞌuelel ti sventa avabtel ti xuꞌ cuꞌuntic ti jpastic lequil abtel. Toj me chachanubtasvan. Oyuc me lec sjam ti cꞌusi chavale.
\v 8 Puru lequil cꞌop chaval hech muꞌyuc muchꞌu xuꞌ chasaꞌbot amul. Yuꞌun mi hech ti jpastique, hech yuꞌun chqꞌuexavic scotol ti muchꞌutic chiscontrainucutique yuꞌun muꞌyuc jmultic chistabucutic.
\p
\v 9 Taqꞌuio ti quermanotic ti mozoetique ti mambilique ti acꞌo xchꞌumbeic smantal ti yajvalique. Lecuc me acꞌo spasbeic ti yabtel ti yajvale. Mu me vocoluc chchꞌumbeic smantal ti yajvalique.
\v 10 Mu me xelcꞌanic ti cꞌutic oy yuꞌun ti yajvalique. Acꞌo yaqꞌuic ti qꞌuelel ti jun yoꞌntonic ti stojol yuꞌun hech lec scꞌopilal chcꞌot yuꞌunic ti scꞌop ti Diose ti xchꞌunojique. Jaꞌ ti scꞌop ti Jcoltavanej cuꞌuntique.
\p
\v 11 Hech tscꞌan ti jpastic yuꞌun laj xa yacꞌ ti qꞌuelel ti Diose ti cꞌuxucutic ti yoꞌnton yuꞌun chcol yuꞌun scotol crixchanoetic.
\v 12 Yuꞌun cꞌuxucutic ti yoꞌnton ti Diose hech yuꞌun tscꞌan ti jcomestic ti cꞌusi chopole xchiꞌuc ti cꞌusi tscꞌan ti jbecꞌtaltique hech mu xijelavucutic ti stojol ti Diose. Ti jxiꞌtic ti Diose, hech toj coꞌntontic ti jayib cꞌacꞌal ti liꞌ cuxulucutic liꞌ ti balumile.
\v 13 Yuꞌun cacꞌoj jba ti jmalatic chtal ti Jcoltavanej cuꞌuntique, jaꞌ ti Jesucristoe. Oy squeval tsut tal. Nichim noꞌox coꞌntontic ti jqꞌuelbetic sat ti Dios cuꞌuntique ti laj xa scoltaucutique.
\v 14 Jaꞌ ti laj yacꞌ sba ti milel cuꞌuntic yuꞌun hech laj scoltaucutic loqꞌuel ti sventa mulil. Laj spocbucutic coꞌntontic yuꞌun hech yuꞌunucutic nijcꞌot o. Hech toyol coꞌntontic ti jpastic lequil abteletic.
\p
\v 15 Hech me chachanubtas, hech me chataqꞌui. Yuꞌun avichꞌoj avabtel ti stojol ti Diose, paso me ti mantal. Acꞌo spasic ti mucꞌ acꞌop scotolic.
\c 3
\s Jaꞌ scꞌopilal yutsiluc me yoꞌntonic acꞌo xchꞌunic spasel scotol lequil abtel, xchi
\p
\v 1 Paso me ti mantal ti quermanotique ti acꞌo spasic ti mucꞌ ti ajvaliletique xchiꞌuc ti muchꞌutic oy yabtelic ti cabildo. Acꞌo xchꞌumbeic smantalic. Yutsiluc me yoꞌntonic acꞌo xchꞌunic spasel scotol lequil abtel.
\v 2 Jaꞌ noꞌox hech uc mu me snopbeic smul yan, mu me sliquesic cꞌop. Lamajemuc me yoꞌntonic. Biqꞌuit acꞌo yacꞌ sbaic ti stojol scotol crixchanoetic.
\p
\v 3 Yuꞌun ti voꞌone coꞌolucutic xchiꞌuc ti muchꞌutic mu xojtiquinic ti Diose ti ora to. Bolucutic uc ti hoꞌucutique, jpꞌajmantalucutic onoꞌox uc, chꞌayemucutic uc. Oyucutic uc ti mozoil yuꞌun ti sbicꞌtal coꞌntontique xchiꞌuc ti sbolil coꞌntontique. Chopol ti coꞌntontique, ibicꞌtaj coꞌntontic. Mu xtun nijꞌilat scoj ti cꞌusi chopol laj jpastique. Coꞌol laj quilinta jbatic.
\v 4-5 Yuꞌun ti hech oyucutique, laj yacꞌ ti qꞌuelel ti Diose ti lec yoꞌntone, jaꞌ ti Jcoltavanej cuꞌuntique. Ivinaj ti cꞌuxucutic ti yoꞌnton jcotoltique yuꞌun laj scoltaucutic. Mu yuꞌunuc lec ti cabteltique ti hoꞌucutique. Yutsil yoꞌnton laj xcꞌuxubinucutic. Laj spocbucutic coꞌntontic, hech nijchaꞌanucutic ti stojol. Hech iꞌachꞌub coꞌntontic ti sventa ti Chꞌul Espíritue.
\v 6 Mu pꞌisbiluc noꞌox laj yacꞌbucutic ti Chꞌul Espíritue ti Diose. Ti sventa ti Jesucristoe, jaꞌ ti Jcoltavanej cuꞌuntique, hech laj snojesbucutic ti coꞌntontic ti Chꞌul Espíritue ti Diose.
\v 7 Hech libre nijcꞌot yuꞌun ti jmultique ti sventa ti cꞌuxucutic ti yoꞌnton ti Diose. Yuꞌun ti yacꞌojbucutic ti Chꞌul Espíritue yuꞌun stsacojucutic ti venta yuꞌun chijcuxiucutic sbatel osil. Hech yuꞌun jmalaojtic ti tsta yoraile.
\p
\v 8 Jaꞌ lec ti jpastic ti mucꞌ jcotoltic ti cꞌu cheꞌel laj calboxuque yuꞌun melel. Hech yuꞌun ti jcꞌan ti scotol ora hech chavacꞌ ti chanel yuꞌun hech acꞌo yaqꞌuic persa scotol ti muchꞌutic xchꞌunojbeic scꞌop ti Diose, hech tspasic ti cꞌusi leque. Lec ti chanel lume. Jaꞌ chijlecub yuꞌun.
\v 9 Ti jchiꞌiltaque hoꞌontutic ti coꞌol judiountutic xchiꞌuque, ti jaꞌ noꞌox hovil tsjaqꞌuilanique, ti te chbat yoꞌntonic tsnopilanic ti cꞌutic laj spasilanic ti jtatamoltutic ti tscuyique, ti jaꞌ noꞌox tscꞌan tstsal sbaic ti cꞌope, ti jaꞌ noꞌox tsliquesic cꞌop yuꞌun ti smantal ti Diose, mu me xavaꞌi yuꞌun muꞌyuc stu. Yuꞌun hovil.
\p
\v 10 Ti muchꞌu hech yoꞌntonic tsliquesilan yan cꞌop, mi laj xa ataqꞌui jun chib vuelta, mu xa me xacꞌopon.
\v 11 Naꞌo me ti muchꞌu hech yoꞌntone, yuꞌun chopol onoꞌox yoꞌnton. Oy mulil ti yoꞌnton. Yuꞌun ti mu scꞌan tojobtasele hech chvinaj ti chopol ti yoꞌntone.
\s Jaꞌ scꞌopilal ti cꞌu cheꞌel tscꞌan coltael ti Pabloe
\p
\v 12 Jaꞌ tsquitic mi jaꞌ ti jtac talel ti Artemase, mi jaꞌ ti jtac talel ti Tíquicoe. Ti mi icꞌote te ti atojole chtal me achiꞌinun ti ora te ti jteclum Nicópolis yuꞌun hech jnopoj ti te chicom ti cꞌalal yorail sique.
\v 13 Coltao ti Zenase, jaꞌ ti lec snaꞌ cꞌusi sjam ti smantal ti Diose, xchiꞌuc ti Apolose. Qꞌuelo me mi oy cꞌusi chtun yuꞌunic ti cꞌalal chanavic batel ti bee.
\v 14 Hech uc ti muchꞌutic oyic ti jventatique, jaꞌ acꞌo spasilanic ti cꞌutic lec ti pasele, acꞌo scolta ti muchꞌutic muꞌyuc cꞌusi oy yuꞌunique. Yuꞌun mu yuꞌunuc lec chbatic mi mu xcoltavanique.
\s Hech ilaj yoꞌnton laj scꞌopon ti carta ti Titoe
\p
\v 15 Chabanucot la xal scotol ti muchꞌutic liꞌ jchiꞌinoje. Chabanuc scotol ti quermanotic ti te achiꞌinoje ti cꞌuxuntutic ti yoꞌntonique yuꞌun coꞌol jchꞌunojtic xchiꞌuc. Acotolic acꞌo yacꞌboxuc ep bendición ti Diose.