\id JAS

\h SUN SANTIAGO
\toc1 SUN SANTIAGO
\mt JAꞌ TI SCARTA TI SANTIAGOE TI LAJ STSꞌIBAE
\c 1
\s Hech lic scꞌopon ti quermanotique ti buc noꞌox puquemique
\p
\v 1 Hoꞌon Santiagoun, hoꞌon yabatun ti Diose xchiꞌuc ti Cajvaltic Jesucristoe. Chajcꞌoponoxuc ti carta, hoꞌoxuc ti coꞌol jchꞌunojbetic scꞌop ti Cajvaltique. Hoꞌoxuc ti buc noꞌox oyoxuque, chajcꞌoponoxuc acotolic.
\s Jaꞌ scꞌopilal chayacꞌboxuc spꞌijil avoꞌntonic ti Diose, xchi
\p
\v 2 Quermanotac, cꞌusuc noꞌox vocol chtal ti atojolique, nichimuc me avoꞌntonic yuꞌun.
\v 3 Yuꞌun chanaꞌic ti jujunoxuque, mi icuch avuꞌunic ti vocole ti sventa ti oy xchꞌunojel avoꞌntonique, hech más ch-an yip avoꞌntonic.
\v 4 Hech yuꞌun tsꞌico me ti vocole, hech ch-an lec yip ti avoꞌntonique, hech scotol xuꞌ avuꞌunic. Mi hech avoꞌntonique, muꞌyuc cꞌusi scꞌan to avuꞌunic.
\p
\v 5 Mi mu xanaꞌic cꞌusi lec chapasique, cꞌambo ti Diose, hech chayacꞌboxuc anaꞌic. Yuꞌun ti Diose yutsil yoꞌnton chijyacꞌbucutic jcotoltic ti cꞌutic chtun cuꞌuntique. Mu snaꞌ chpꞌajvan ti Diose.
\v 6 Cꞌalal chacꞌambeic ti Diose, chꞌunic ti chayacꞌboxuque. Mi jutuc mu me xloꞌlaj avoꞌntonic. Yuꞌun mi chloꞌlaj ti coꞌntontique, cꞌuc noꞌox ti jchꞌuntic. Hech chaj cꞌu cheꞌel hoꞌ cꞌalal chnicat yuꞌun ti iqꞌue, buc noꞌox chlicat yuꞌun ti iqꞌue.
\v 7 Mi hech ti coꞌntontique, mu me jcuytic ti oy cꞌusi chijyacꞌbucutic ti Cajvaltique.
\v 8 Yuꞌun mi mu junuc coꞌntontic ti jchꞌuntic ti chiscoltaucutic ti Cajvaltique, hech mu baqꞌuinticuc chtojob cuꞌuntic ti cꞌusi lec ti pasele.
\p
\v 9 Mi meꞌonoxuc, quermano, nichimuc me avoꞌntonic yuꞌun laj xa spasoxuc ti mucꞌ ti Diose.
\v 10 Mi jcꞌulejoxuc, quermano, nichimuc me avoꞌntonic yuꞌun laj xa sbicꞌtajesoxuc ti Diose. Yuꞌun ti muchꞌu jcꞌuleje jꞌocꞌ noꞌox liꞌ ti balumile xchiꞌuc ti scꞌulejale hech chaj cꞌu cheꞌel ti jobele ti jꞌocꞌ noꞌox oy xniche.
\v 11 Cꞌalal chcꞌuxub ti cꞌacꞌale, chqꞌuixnaj ti iqꞌue, chtaquij ti jobele. Chlilej ti lum ti xniche. Hech chlaj ti stꞌujumale. Jaꞌ noꞌox hech uc ti jcꞌuleje, cꞌalal yacꞌoj sba cꞌutic tsaꞌilan, chcham.
\s Jaꞌ scꞌopilal mu me xchibaj avoꞌntonic mi chtal vocol, xchi
\p
\v 12 Nichim noꞌox coꞌntontic mi icuch cuꞌuntic ti vocole. Yuꞌun mi mu xchibaj ti coꞌntontique, mi icuch cuꞌuntic scotol, hech chquichꞌtic jmotontic, jaꞌ ti jcuxlejaltic sbatel osile. Yuꞌun hech yaloj ti Diose: “Chcacꞌbe xcuxlejal sbatel osil scotol ti muchꞌutic cꞌuxun ti yoꞌntonique”, xchi.
\v 13 Hech yuꞌun mi chijsujat ti mulil scoj ti vocole, mu me xcaltic: “Dios ti chisujune”, mu me xijchi. Yuꞌun ti Diose mu xuꞌ sujat ti mulil, hech yuꞌun mu snaꞌ sujvan ti mulil.
\v 14 Ti hoꞌucutique scoj sbicꞌtal coꞌntontic ti hech chijlaj ti sujel ti mulile. Jtuctic ti chbicꞌtaj coꞌntontic yuꞌun ti mulile, hech chisloꞌlaucutic ti coꞌntontique.
\v 15 Mi chcacꞌtic stsac yip ti sbicꞌtal ti coꞌntontique, hech ti jsaꞌtic jmultic. Mi laj stsac yip ti mulile, hech chꞌayel chijbat yuꞌun.
\p
\v 16 Quermanotac, ti ep cꞌuxoxuc ti coꞌntone, mu me xalajic ti loꞌlael.
\v 17 Scotol ti cꞌusi lec chquichꞌtique xchiꞌuc scotol ti chijlecubtasat yuꞌune, jaꞌ chijyacꞌbucutic yal tal ti Jtotic Diose ti te oy ti vinajele. Jaꞌ ti laj spas ti cꞌoqꞌuetique ti te oy ti vinajele. Ti cꞌoqꞌuetique jaꞌ chjel ti squevale. Xuꞌ chmacat ti squevale. Mu hechuc ti Jtotic Diose. Ti stuque mu xjel ti yoꞌntone, hech yuꞌun mu snaꞌ cꞌusi chopol chacꞌ tal.
\v 18 Yuꞌun hech laj scꞌan ti Diose, hech yuꞌun primero laj xa jchꞌumbetic ti scꞌope ti jaꞌ melele, hech yuꞌun sba yol snichꞌonucutic nijcꞌot. Ti hoꞌucutique yuꞌun sba yol snichꞌonucutic, ¡bu cꞌamba chopoluc ba yilucutic!
\s Jaꞌ scꞌopilal ti mi melel ti jchꞌunojbetic scꞌop ti Diose, lec scotol ti cꞌutic ti jpastique
\p
\v 19 Hech yuꞌun, quermanotac, ti ep cꞌuxoxuc ti coꞌntone, aꞌibo me scꞌop ti muchꞌu chascꞌoponote. Mu me ti orauc noꞌox chacꞌopoj atuc. Mu me ti orauc noꞌox chaꞌilin.
\v 20 Mu me jcuytic ti ihuꞌ xa cuꞌuntic laj jpastic cꞌusi tscꞌan ti Diose mi nijꞌiline.
\v 21 Hech yuꞌun acꞌo comuc avuꞌunic scotol ti cꞌutic chisbolibtasucutique xchiꞌuc scotol ti cꞌutic chopole ti tspasic ti crixchanoetique ti chavilique. Yuꞌun laj xa stsꞌun ti avoꞌntonic ti scꞌop ti Diose, hech yuꞌun jaꞌ scꞌan ti biqꞌuit chavacꞌ abaic, ti chachꞌumbeic ti scꞌope. Yuꞌun ti sventa ti scꞌop ti Diose chijcolucutic.
\p
\v 22 Chꞌumbeic spasel ti cꞌutic yaloj ti Diose. Yuꞌun mu tauc yutsil mi jaꞌ noꞌox chcaꞌibetic ti scꞌop ti Diose. Yuꞌun mi hech ti jpastique, ti jloꞌla jbatic.
\v 23 Cꞌalal chcaꞌibetic ti scꞌop ti Diose, mi mu jchꞌuntique, yuꞌun mu jchꞌuntic ti oy jmultique. Jaꞌ hech chaj cꞌu cheꞌel laj jqꞌueltic jsatic ti espejo.
\v 24 Mi laj jqꞌueltique, chijbat. Ti ora chchꞌay ti coꞌntontic ti oy oboc ti jsatique.
\v 25 Lec ti smantal ti Diose. Jaꞌ chijyacꞌucutic ti libre. Yuꞌun laj xa caꞌitic, hech yuꞌun jaꞌ lec ti chcacꞌtic ti coꞌntontique. Yuꞌun mi mu xchꞌay ti coꞌntontic ti smantal ti Diose ti laj xa caꞌitique, mi scotol ti jchꞌuntique, hech chquichꞌtic ep bendición.
\p
\v 26 “Jchꞌunoj”, mi chijchie, mi mu jpajestic ti quetique, ti jloꞌla jbatic obi. Hovil ti jchꞌunojelucutic ti jcuy jbatique.
\v 27 Mi melel ti jchꞌunojbetic scꞌop ti Diose, jaꞌ ti Jtotic cuꞌuntique, ti jcꞌuxubintic ti muchꞌutic chichꞌic vocole, mi meꞌon ololetic, mi meꞌon antsetic. Mu xcacꞌtic chisbolibtasbucutic coꞌntontic ti crixchanoetique. Mi hech ti jpastique, hech lec chijyilucutic ti Jtotique.
\c 2
\s Jaꞌ scꞌopilal ti mu me jtꞌujtic ti muchꞌutic ti jpastic ti muqꞌue
\p
\v 1 Quermanotac, yuꞌun jchꞌunojbetic scꞌop ti Cajvaltic Jesucristoe, jaꞌ ti jelaven yutsil yoꞌntone, hech yuꞌun mu me jtꞌujtic ti muchꞌutic ti jpastic ti muqꞌue.
\v 2 Acꞌo me jnoptic cꞌusi ti jpastic mi ch-ochic tal ti bu ti jtsob jbatique viniquetic chaꞌvoꞌic, jun jcꞌulej, jun meꞌon. Ti muchꞌu jcꞌuleje, oy lec scꞌuꞌ spocꞌ xchiꞌuc oy chib oxib anillo ti scꞌob. Pasbil ti cꞌanal taqꞌuin ti yanilloe. Ti muchꞌu meꞌone, poco xa scꞌuꞌ spocꞌ slapoj.
\v 3 Mi jaꞌ noꞌox ti jpastic ti mucꞌ ti muchꞌu lec scꞌuꞌ spoqꞌue, hech yuꞌun hech chcalbetic stuc: “Oy lec naclebal liꞌto. Liꞌ chanaqui hoꞌoti”, chcutic. Mi mu jpastic ti mucꞌ uc ti muchꞌu meꞌone, hech yuꞌun hech chcalbetic: “Xuꞌ chavaꞌi lum toi, hoꞌoti”, chcutic. Mi mu xcalbetic hech, repenta chcalbetic: “Mi chacꞌan chanaquie, naclan liꞌ ti stsꞌel cacane”, chcutic.
\v 4 Mi hech ti jpastique, mu xtun, yuꞌun mu coꞌoluc ti jpastic ti mucꞌ. Yuꞌun chopol ti cꞌusi ti jnoptique, hech yuꞌun ti hech ti jtꞌujtique.
\p
\v 5 Quermanotac, ti cꞌuxoxuc ti coꞌntone, aꞌyo me avaꞌyic. Jaꞌ tꞌujbilic yuꞌun ti Diose ti muchꞌutic muꞌyuc scꞌulejalic liꞌ ti balumile. Jaꞌ scꞌulejalic ti oy lec xchꞌunojel yoꞌntonique. Albilic scꞌopilal yuꞌun ti Diose ti ch-ochic yoꞌ bu tspas mantal ti Diose. Yaloj ti Diose ti te ch-och scotol ti muchꞌutic cꞌux ti yoꞌntonic ti Diose.
\v 6 Ti hoꞌoxuque mu apasojuc ti mucꞌ ti meꞌonetique. Jaꞌ chapasic ti mucꞌ ti jcꞌulejetique ti jaꞌ chasmozoinoxuque, ti jaꞌ chasticꞌboxuc amulic ti stojol ti juezetique.
\v 7 Ti jcꞌulejetique jaꞌ chopol chayalboxuc acꞌopilalic yuꞌun ti achꞌunojbeic scꞌop ti Cristoe.
\p
\v 8 Hech tsꞌibabil ti sun ti Diose: “Cꞌux me xavaꞌi avecino hech chaj cꞌu cheꞌel cꞌux chavaꞌi aba”, ti xchie. Jaꞌ smantal ti ajvalil cuꞌuntique, jaꞌ ti Cajvaltique. Hech yuꞌun mi melel ti chachꞌunic ti mantal avi to ti jaꞌ tsots scꞌopilale, jaꞌ cꞌux ti avoꞌntonic scotolic, manchuc mi jcꞌulej, manchuc mi meꞌon.
\v 9 Mi chatꞌujic ti muchꞌutic chapasic ti muqꞌue, oy amulic yuꞌun chapꞌajbeic ti smantal ti Diose.
\v 10 Manchuc mi ihuꞌ avuꞌun laj achꞌumbe scotol ti yan smantal ti Diose, mi chapꞌaj junuc, laj xa apꞌaj scotol obi.
\v 11 Chacalbe cꞌu xꞌelan. Hech yalojbucutic ti Diose: “Mu me xamulivajic”, xchi. “Mu me xamilvanic”, xchi. Hech yuꞌun mi muc xijmulivaj, mi jaꞌ noꞌox nijmilvan, laj xa jpꞌajbetic smantal ti Diose obi. Yuꞌun mu yanticuc yajval, yuꞌun jun noꞌox ti muchꞌu laj yale.
\v 12 Hech yuꞌun lecuc me ti cꞌusi chcaltique, lecuc me ti cꞌusi ti jpastique yuꞌun chcꞌot yichꞌbucutic jcꞌoptic ti Diose ti sventa ti laj xa yacꞌucutic ti libre ti Diose.
\v 13 Yuꞌun mi mu xijcꞌuxubinvan ti ora to, hech mu xixcꞌuxubinucutic ti Diose ti cꞌalal chijyichꞌbucutic jcꞌoptic. Mi chijcꞌuxubinvan ti ora to, hech chcꞌot quichꞌtic cꞌuxubinel uc.
\s Jaꞌ scꞌopilal ti hovil chcaltic ti jchꞌunojtique mi mu xvinaj ti cabteltique
\p
\v 14 Quermanotac, hovil chcaltic ti jchꞌunojtique mi mu lecuc ti cꞌutic ti jpastique. “Jchꞌunoj”, mi chijchie, mi mu lecuc ti cꞌutic ti jpastique, mu xijcol.
\v 15-16 Mi muꞌyuc scꞌuꞌ spocꞌ jun quermanotic, mi muꞌyuc cꞌusi chtun yuꞌun tsveꞌ chquiltic, ¿mi lec mi chcalbetic: “Batan, mu me xavichꞌ mul. Ba saꞌo acꞌuꞌ apocꞌ, ba macꞌlino aba”, mi chcutique? Mi muꞌyuc cꞌusi chcacꞌbetic cꞌusi chtun yuꞌun ti sventa ti sbecꞌtale, hovil chcaltic ti jchꞌunojtique.
\v 17 Hech chvinaj ti sventa ti cꞌutic ti jpastique mi jchꞌunojtique mi mu jchꞌunojticuque.
\p
\v 18 Mi chavalbun: “Hoꞌoti, tsots scꞌopilal chavaꞌi ti lec ti avabtele. Hoꞌoni, ta yutsil ti oy xchꞌunojel coꞌntone”, mi xavutune, hech yuꞌun chajacꞌbot cꞌu cheꞌel chavacꞌbun jqꞌuel ti oy xchꞌunojel avoꞌntone mi muꞌyuc ti avabtele. Ti hoꞌone, yuꞌun lec ti cabtele, hech chaqꞌuel ti oy xchꞌunojel coꞌntone.
\v 19 “Jchꞌunoj ti jun noꞌox ti Diose”, xachi. Chacuy ti ta yutsil. Hech xchꞌunojic uc ti xchiꞌiltac ti totil pucuje. Yuꞌun ti tsnaꞌ ti jun noꞌox ti Diose ti xchiꞌiltac ti totil pucuje, mu yuꞌunuc nichim noꞌox yoꞌntonic. Chiꞌic yuꞌun ti Diose.
\v 20 Hoꞌoti, mu pꞌijucot, yuꞌun mu xavil hovil chcaltic ti jchꞌunojtique mi muꞌyuc ti cabteltique.
\v 21 Ti jtotic Abrahame yuꞌun laj yacꞌbe smoton ti Diose, jaꞌ ti snichꞌone, jaꞌ ti Isaaque, te ti bu scajaneb smoton ti Diose, hech yuꞌun toj yoꞌnton ti Abrahame laj yil ti Diose ti sventa ti yabtele.
\v 22 Avaꞌi xꞌelan. Yuꞌun oy xchꞌunojel yoꞌnton, hech yuꞌun laj spas cꞌalal hech iꞌalbat yuꞌun ti Diose. Hech ivinaj ti melel ti oy xchꞌunojel ti yoꞌntone.
\v 23 Hech ivinaj uc ti melel ti scꞌopilale ti tsꞌibabil ti scꞌop ti Diose: “Ti Abrahame laj xchꞌun scotol ti chcꞌot ti pasel ti cꞌutic iꞌalbat yuꞌun ti Diose, hech yuꞌun toj yoꞌnton iꞌilat yuꞌun ti Diose”, xchi tsꞌibabil. Hech itsꞌibabat scꞌopilal uc: “Lec laj scꞌopon sbaic xchiꞌuc ti Diose xchiꞌuc ti Abrahame”, xchi tsꞌibabil.
\p
\v 24 Avaꞌi xꞌelan. Maꞌuc noꞌox ti sventa xchꞌunojel coꞌntontic ti toj coꞌntontic chijyilucutic ti Diose. Jaꞌ tscꞌan uc ti lec ti cꞌutic ti jpastique, hech toj coꞌntontic chijyilucutic ti Diose.
\v 25 Hech onoꞌox uc ti Rahabe, jaꞌ ti jmulavil antse. Toj yoꞌnton ti Rahabe laj yil ti Diose ti sventa ti yabtele. Jaꞌ laj yicꞌ ochel ti sna ti yabat ti Josuee. Patil laj stac batel ti yan be.
\v 26 Yuꞌun ti cuxulucutic liꞌ ti balumile, yuꞌun oy jchꞌuleltic, yuꞌun oy jbecꞌtaltic. Ti manchuque mu cuxulucutic. Jaꞌ noꞌox hech uc yuꞌun chijcuxi sbatel osile, jaꞌ tscꞌan ti oy xchꞌunojel coꞌntontic. Jaꞌ tscꞌan uc ti lec scotol ti cꞌutic ti jpastique. Hech chijcuxiucutic. Mi mu hechuc ti jpastique, mu xijcuxiucutic sbatel osil.
\c 3
\s Jaꞌ scꞌopilal ti jaꞌ tsots scꞌopilal ti quetique
\p
\v 1 Quermanotac, mu me epuc chaꞌochic ti jchanubtasvanej. Naꞌic me ti hoꞌontutique ti ochemuntutic ti jchanubtasvaneje, jaꞌ más ep chcꞌot yichꞌbuntutic jcꞌoptutic ti Diose.
\v 2 Jcotoltic oy to ep chijelavucutic. Jaꞌ más ep chijelavucutic xchiꞌuc ti quetique. Mi oy muchꞌu mi jpꞌeluc mu xjelav xchiꞌuc ti scꞌope, jaꞌ toj ti viniquil obi. Xuꞌ tspas ti mantal scotol ti sbecꞌtale.
\v 3 Nopo avaꞌyic ti cꞌu cheꞌel chcacꞌbetic spreno ti jcaꞌtique, hech chixchꞌumbucutic jmantaltic. Manchuc mi biqꞌuit ti preno ti chcacꞌbetique, jaꞌ tsots scꞌopilal yuꞌun hech chixchꞌumbucutic ti bu ti jcꞌan chijbate.
\v 4 Nopo avaꞌyic cꞌu xꞌelan ti barcoetique ti chanav ti ba hoꞌ. Manchuc mi biqꞌuit ti spajesbile, xuꞌ tspajes. Manchuc mi mucꞌta barcoe, manchuc mi tsots chnetꞌat batel yuꞌun ti iqꞌue, xuꞌ yuꞌun ti yajvale yuꞌun oy spajesbil. Hech yuꞌun buc noꞌox tscꞌan xuꞌ yuꞌun ti yajvale.
\v 5 Jaꞌ noꞌox hech uc ti quetique, biqꞌuit, pero tsoquesvan. Nopo avaꞌyic ti cꞌu cheꞌel ch-epaj ti biqꞌuit cꞌoqꞌue. Ti ora noꞌox ch-epaj batel. Ti cꞌalal chtupꞌ ti cꞌoqꞌue, ep xa ilaj ti teꞌetique.
\v 6 Jaꞌ noꞌox hech uc ti quetique, ep tsoquesvan. Yuꞌun jtaleltic ti cꞌutic chopol chlocꞌ ti quetique. Muꞌyuc cꞌusi yan ti jbecꞌtaltic ti hech chisbolibtasucutique, jaꞌ noꞌox ti quetique. Jaꞌ tsbolibtas scotol yantic uc ti jayib cꞌacꞌal liꞌ cuxulucutique. Jaꞌ chlocꞌ tal ti coꞌntontic ti cꞌutic chopol chcaltique. Jaꞌ xchꞌamunoj ti quetique ti pucuje yuꞌun ti hech chcaltique.
\v 7 Scotol chonetic xchiꞌuc cꞌutic xcotetic ti lum xchiꞌuc mutetic xchiꞌuc choyetic, scotol abatimbilic. Scotol crixchanoetic yabatinojic.
\v 8 Ti quetique mi junuc muꞌyuc muchꞌu xuꞌ chabatin. Mu xpaj cuꞌuntic ti sbolile. Ti orachone yuꞌun oy veneno ti ye hech yuꞌun mi chistiꞌucutique, chijcham ti ora. Jaꞌ noꞌox hech uc ti hoꞌucutique, mi chopol ti cꞌutic chlocꞌ ti quetique, jaꞌ jmilvanej nijcꞌot xa obi, yuꞌun jaꞌ tsbolibtas ti crixchanoetique.
\v 9 Ti quetic chcalbetic vocol ti Diose, jaꞌ ti Jtotique. Ti quetic chcutic ti muchꞌutic coꞌol crixchanoucutic xchiꞌuque, ti coꞌol hech chaj cꞌu cheꞌel ti Diose.
\v 10 Jun noꞌox ti quetique pero chib ti cꞌop ti chloqꞌue. Chlocꞌ lequil cꞌop xchiꞌuc bol cꞌop. Quermanotac, mu xtun mi hech ti jpastique.
\v 11 Nopo avaꞌyic mi xuꞌ chlocꞌ tal chaꞌtos ti hoꞌe ti jun noꞌox sat hoꞌ. ¿Mi xuꞌ tscap sbaic xchiꞌuc ti bu leque xchiꞌuc ti bu chiꞌe?
\v 12 Quermanotac, nopo avaꞌyic uc mi xuꞌ chacꞌ sat durazno ti manzana teꞌe, mi xuꞌ chacꞌ sat manzana ti tsits. Hech onoꞌox uc ti bu lec ti hoꞌe, mu xlocꞌ tal chiꞌ te o.
\s Jaꞌ scꞌopilal ti cꞌu xꞌelan ti spꞌijil coꞌntontique ti chijyacꞌbucutic ti Diose
\p
\v 13 Mi pꞌijoxuc, mi oy arazonic, chavaqꞌuic ti qꞌuelel ti oy spꞌijil ti avoꞌntonique. Hech lec scotol ti cꞌutic chapasique. Hech mu xatoy abaic ti xuꞌ avuꞌunique.
\v 14 Mi jaꞌ noꞌox toyol avoꞌnton yuꞌun chavacꞌ ti qꞌuelel ti xuꞌ avuꞌunic atuquique, mu me xacuy ti pꞌijote. Mu me xacuyic ti achꞌunojbeic ti scꞌop ti Diose ti jaꞌ melele.
\v 15 Mu hechuc ti spꞌijil coꞌntontique ti chijyacꞌbucutic ti Diose. Jaꞌ noꞌox ti jpastic hech chaj cꞌu cheꞌel tspas ti crixchanoetique. Jaꞌ noꞌox ti jchꞌuntic cꞌusi tscꞌan ti jbecꞌtaltique. Jaꞌ noꞌox ti jchꞌuntic uc cꞌusi tscꞌan ti pucuje.
\v 16 Yuꞌun mi jaꞌ noꞌox toyol coꞌntontic yuꞌun chcacꞌtic ti qꞌuelel ti xuꞌ cuꞌuntic jtuctique, hech mu xtojob cuꞌuntic ti cꞌusi lec ti jpastique. Jaꞌ noꞌox chcꞌot ti pasel cuꞌuntic ti cꞌusi chopole.
\v 17 Ti spꞌijil coꞌntontique ti chijyacꞌbucutic ti Diose, jaꞌ puru lec ti cꞌusi ti jpastique. Mu jcꞌantic pleito. Biqꞌuit chcacꞌ jbatic. Jaꞌ ti jchꞌuntic mantal. Chijcꞌuxubinvan. Chijcoltavan. Toj ti jnoptic. Mu xijloꞌlavan.
\v 18 Yuꞌun mi mu jcꞌantic pleitoe, jaꞌ chcacꞌbetic xchan ti yantique ti cꞌusi lec tspasic uque.
\c 4
\s Jaꞌ scꞌopilal ti mu me xchanic ti cꞌusitic chopol tspasic ti crixchanoetique
\p
\v 1 Yuꞌun ti chlic pleito avuꞌunique, yuꞌun ti chlic cꞌop avuꞌunique, ¿mi maꞌuc yuꞌun ti mu xapajesic ti sbicꞌtal avoꞌntonique?
\v 2 Oy cꞌusi chacꞌanic. Mu xꞌan avuꞌunic. Hech yuꞌun chavilinta ti yane. Más chbicꞌtaj avoꞌntonic. Muꞌyuc cꞌusi chavichꞌic. Chaliquesic cꞌop, chacontrain abaic. Mu xataic ti cꞌusi tscꞌan ti avoꞌntonique yuꞌun mu xacꞌambeic ti Diose.
\v 3 Cꞌalal chacꞌambeic ti Diose, mu xayacꞌboxuc yuꞌun chopol avoꞌntonic, yuꞌun jaꞌ chachꞌumbeic smantal ti abecꞌtalique.
\v 4 Hech chaj cꞌu cheꞌel mu junuc yoꞌnton ti stojol ti smalale ti antse ti chmulave, jaꞌ noꞌox hechoxuc uc ti hoꞌoxuque, mu junuc avoꞌntonic ti stojol ti Diose. ¿Mi muc ti jcontraintic uc ti Diose mi ti jchꞌuntic ti cꞌusi tscꞌan ti jbecꞌtaltique hech chaj cꞌu cheꞌel tspasic ti crixchanoetique? Hech yuꞌun mi jaꞌ noꞌox ti jcꞌantic ti jchꞌuntic ti cꞌusi tscꞌan ti jbecꞌtaltique hech chaj cꞌu cheꞌel tspasic ti crixchanoetique, jaꞌ yajcontra Dios chijcꞌot uc.
\v 5 Mu me jcuytic ti hovil noꞌox hech chal ti sun ti Diose: “Mu jcꞌan ti chavajvalin yan. Jtuc noꞌox chavajvalinun”, ti xchi ti Diose.
\v 6 Yuꞌun hech tscꞌan ti Diose ti chcajvalintique, hech yuꞌun ti Diose chijyacꞌbucutic yutsil coꞌntontic yuꞌun hech xuꞌ cuꞌuntic chcajvalintic stuc noꞌox. Hech yuꞌun ti hech chale: “Hoꞌon Diosun, ti jcontrain ti muchꞌutic tstoy sbaique. Jaꞌ chcaqꞌuilambe yutsil yoꞌntonic ti muchꞌutic mu stoy sbaic ti jtojole”, ti xchie.
\v 7 Hech yuꞌun acꞌo sventaimboxuc avoꞌntonic ti Diose. Contraino ti pucuje, hech chjatav batel ti atojolic.
\v 8 Nopejanic tal ti stojol ti Diose hech chnopej uc ti atojolic ti Diose. Hoꞌoxuc ti chopol ti cꞌusi laj xa apasique, comesic, pasic me ti cꞌusi leque. Hoꞌoxuc ti mu junuc avoꞌntonic ti stojol ti Diose, acꞌo ti poquel avoꞌntonic, jaꞌ xavajvalinic stuc noꞌox ti Cajvaltique.
\v 9 Naꞌic me ti chopol ti hech laj apasique, ichꞌic mul, ocꞌtao abaic. Hoꞌoxuc ti chatseꞌinic ti ora to, ocꞌanic me. Hoꞌoxuc ti nichim noꞌox avoꞌntonic ti ora to, ichꞌic me mul.
\v 10 Bicꞌtajanic me ti stojol ti Diose, hech lec chayiloxuc.
\s Jaꞌ scꞌopilal mu me xanopbe smul avermano, xchi
\p
\v 11 Quermanotac, mu me xanopbe abaic amulic. Ti muchꞌu chopol chcꞌopoj yuꞌun ti yermanoe yuꞌun tsaꞌbe smul ti yermanoe, jaꞌ mu tsotsuc scꞌopilal chaꞌi ti hech yaloj ti Diose ti “cꞌux me xavaꞌi abaic”, ti xchie. Yacꞌoj sba tstꞌuj ti bu tsots ti mantale xchiꞌuc ti bu mu tsotsuc ti mantale tscuy. Mi hech ti jtꞌujtique, yuꞌun mu jchꞌunojticuc ti mantaletic obi. Hoꞌucutic juezucutic ti jcuy jbatic.
\v 12 Jun noꞌox ti muchꞌu laj yal ti mantaletique, jun noꞌox ti jueze, jaꞌ ti Diose. Jaꞌ xuꞌ yuꞌun chiscoltaucutic, jaꞌ xuꞌ yuꞌun chacꞌ ti chꞌayel chijbatucutique. Ti hoꞌucutique ¡muchꞌucutic ti jcuy jbatic yuꞌun ti ti jsaꞌbetic smul yane!
\s Jaꞌ scꞌopilal ti mu jnaꞌtic mi cuxulucutic to ocꞌom
\p
\v 13 Aꞌyo avaꞌyic ti hoꞌoxuque ti hech chavalique: “Batic ti ora to o mi ocꞌom ti jteclum ti laj caltique. Te chijalejucutic junuc habil. Te chba chonilajucutic, te chba manilajucutic, hech ti jpastic ep canal”, xavut abaic.
\v 14 Mu xanaꞌic mi cuxuloxuc to ocꞌom. Yuꞌun ti hoꞌucutique jaꞌ hech chaj cꞌu cheꞌel lumal toc ti ora noꞌox chchꞌaye. Jaꞌ noꞌox hech uc ti hoꞌucutique, jꞌocꞌ noꞌox liꞌoyucutique, ti ora noꞌox chijchꞌay.
\v 15 Hech yuꞌun jaꞌ tscꞌan ti hech chavalique: “Mi tscꞌan ti Diose ti cuxulucutic toe, hech ti jpastic”, xachiic. Jaꞌ lec obi.
\v 16 Ti hoꞌoxuque chatoy abaic ti stojol ti Diose yuꞌun ti hech chachapanique. Yuꞌun ti hech chatoy abaique, jaꞌ mulil.
\v 17 Jaꞌ jmultic cꞌotem yuꞌun ti jnaꞌtic cꞌusi lec ti pasel, mu hechuc ti jpastic.
\c 5
\s Jaꞌ scꞌopilal ti jcꞌulejetique ti mu xcolic yuꞌun ti staqꞌuinique
\p
\v 1 Ti jcꞌulejetique acꞌo ocꞌuc xa, acꞌo avanuc xa yuꞌun ta onoꞌox xichꞌic ep vocol.
\v 2 Hovil ti oy scꞌulejalique, cꞌaꞌem xa chil ti Diose. Hovil ti oy scꞌuꞌ spoqꞌuique, coꞌol chil ti Diose ti bu sepbil xa yuꞌun chon.
\v 3 Hovil ti te busul ti staqꞌuinique, coꞌol chil ti Diose xchiꞌuc ti bu cuxiben xae yuꞌun mu xtunic yuꞌun ti Diose xchiꞌuc ti staqꞌuinique. Mu xilic ti muꞌyuc stuic xchiꞌuc ti staqꞌuinique ti ch-ilatic yuꞌun ti Diose. Hovil ti batem ti yoꞌntonic tstsob scꞌulejalic ti ora to. Jaꞌ noꞌox tscajtsobic ti svocolique ti chcꞌot yichꞌique cꞌalal mi laj sta yorail chchapanvan ti Diose. Yuꞌun ch-ochic ti cꞌocꞌ sbatel osil.
\v 4 Taca xuꞌ chcꞌopoj ti staqꞌuine, “hoꞌonun staqꞌuinun ti yajꞌabtel ti cajvale ti jaꞌ icꞌajovaj yuꞌune. Yuꞌun mu tsꞌacaluc laj stoj ti yajꞌabtele”, xchi ti hechuque. Ti Cajvaltic Diose, ti smacojucutic jcotoltique, yaꞌyoj ti hech laj yalbe ti yajvale ti jꞌabteletique ti “mu tsꞌacaluc laj atojun”, xutic.
\v 5 Jaꞌ batem ti yoꞌntonic ti lec ch-echꞌic stuquic liꞌ ti balumile. Jaꞌ batem ti yoꞌntonic tspasic ti cꞌusi tscꞌan ti sbecꞌtalique. Jaꞌ hech chaj cꞌu cheꞌel ti chitome. Ti chitome batem yoꞌnton tsnojes xchꞌut. Hovil, mu yuꞌunuc hech chcuxi o. Mi ijupꞌ leque, jaꞌ chlic milatuc. Jaꞌ noꞌox hechic uc, hovil ti batem ti yoꞌntonic ti chchꞌunic ti cꞌusi tscꞌan ti sbecꞌtalique. Mu yuꞌunuc hech chcuxiic sbatel osil. Jaꞌ chlic milatuc uc. Sbatel osil ibatic o.
\v 6 Tsticꞌbeic smul ti muchꞌu muꞌyuc smule. Chlic smilic. Mi jutuc muꞌyuc cꞌusi chopol chal ti muchꞌu chmilate.
\s Jaꞌ scꞌopilal junuc me avoꞌntonic malaic ti cꞌusi ora chtal ti Cajvaltique, xchi
\p
\v 7 Hech yuꞌun, quermanotac, junuc me avoꞌnton malaic ti cꞌusi ora chtal ti Cajvaltique. Nopo avaꞌyic ti cꞌu cheꞌel tsmala tsatin yovol stsꞌunub ti muchꞌu ch-avolaje. Jun yoꞌnton tsmala yuꞌun snaꞌ mi iꞌechꞌ ti yorail ti hoꞌe, iyijub xa ti xchobe, hech yuꞌun chlic scꞌaj.
\v 8 Jaꞌ noꞌox hechoxuc uc, junuc me avoꞌntonic malaic. Acꞌo oyuc yip avoꞌntonic yuꞌun poꞌot xa chchaꞌsut tal ti Cajvaltique.
\v 9 Quermanotac, mu me xaticꞌbe abaic amulic yuꞌun ti chavichꞌic vocole, yuꞌun hech mu xcꞌot yichꞌbot acꞌop. Naꞌo me ti chtal xa ti jchapanvanej cuꞌuntic jcotoltique.
\v 10 Quermanotac, naꞌic me cꞌu xꞌelan yoꞌntonic ti jꞌalcꞌopetic yuꞌun ti Diose, jaꞌ ti muchꞌutic chꞌamumbil yeic ti voꞌone yuꞌun chalbeic scꞌopilal ti Cajvaltique. Lec icuch yuꞌunic ti vocole yuꞌun oy lec stsatsal yoꞌntonic. Hech yuꞌun jaꞌ lec ti hech ti jpastic uc.
\v 11 Ti muchꞌutic icuch yuꞌunic ti vocole, “nichim noꞌox yoꞌntonic obi”, xijchi. Avaꞌyojbeic scꞌopilal ti Jobe ti yuꞌun oy stsatsal yoꞌnton hech yuꞌun icuch yuꞌun ti vocole. Chanaꞌic ti yuꞌun icuch yuꞌun ti vocole, hech yuꞌun patil ep iꞌacꞌbat bendición yuꞌun ti Diose. Yuꞌun ti Diose stalel chcꞌuxubinvan, hech yuꞌun laj xcꞌuxubin ti snichꞌone, jaꞌ ti Jobe.
\p
\v 12 Quermanotac, jaꞌ primero tscꞌan chapasic avi to. Mu me muchꞌu tsvaꞌan rextico. Mu me xavaꞌan ti rextico ti vinajele xchiꞌuc ti balumile. Tojuc me ti acꞌopique. “Cuy”, mi xachie, acꞌo cꞌotuc ti pasel avuꞌun. “Mu xuꞌ”, mi xachie, meleluc me ti cꞌusi chavale. Yuꞌun hech mu xata amul ti stojol ti Diose.
\p
\v 13 Mi oy chavichꞌic vocol, cꞌoponic ti Diose. Mi nichim noꞌox avoꞌntonic, qꞌuejinanic yuꞌun ti Diose.
\v 14 Mi jchameloxuc, iqꞌuic tal ti ancianoetique te ti templo avuꞌunique. Acꞌo sjaxboxuc aceite ti sventa ti Cajvaltique, acꞌo scꞌoponic Dios ti atojolic.
\v 15 Ti sventa ti xchꞌunojel yoꞌnton ti muchꞌu tscꞌopombe Dios ti stojol ti jchamele, hech chcol. Chcol yuꞌun ti Cajvaltique. Mi staoj smul ti muchꞌu icole, jaꞌ chchꞌaybat smul uc.
\v 16 Hech yuꞌun jamal albo abaic amulic, ti mulil ti tscꞌan chastsalot chavaꞌie. Cꞌopombo abaic Dios ti atojolic, hech chlamaj achamelic uc. Ti muchꞌu toj ti yoꞌntone oy yip ti scꞌope cꞌalal jun yoꞌnton tscꞌopon ti Diose. Scotol xuꞌ yuꞌun.
\v 17 Ti jtotic Elías ti voꞌone coꞌol crixchanoucutic xchiꞌuc. Jaꞌ jun yoꞌnton laj scꞌopon Dios yuꞌun mu me xtal hoꞌ. Hech yuꞌun oꞌlol xchanibal habil muc xacꞌ hoꞌ liꞌ ti jlumaltique.
\v 18 Lic scꞌopon Dios yan vuelta hech ital yan vuelta ti hoꞌe ti vinajel. Hech lic yacꞌ sat ti yovol stsꞌunubique.
\p
\v 19 Quermanotac, mi oy muchꞌu ichibaj yoꞌnton ti te achiꞌinojique, ti muchꞌu chba sutesbe yoꞌntone
\v 20 acꞌo snaꞌ ti yuꞌun laj sutesbe yoꞌnton yuꞌun smul ti muchꞌu oy smule, laj yacꞌbe scomes ti be ti bu stamoje. Hech laj scolta yuꞌun mu chꞌayeluc chbat. Hech ep ichꞌay mulil ti sventa.