\id 3JN
\h 3 JUAN
\toc1 3 JUAN
\mt JAꞌ TI YOXIBAL SCARTA TI LAJ STSꞌIBA TI JUANE, JAꞌ TI JCHOLCꞌOPE
\c 1
\s Hech lic scꞌopon ti carta ti Gayoe
\p
\v 1 Gayo, hoꞌot ti cꞌuxot ti coꞌntone, chajcꞌoponot ti carta, hoꞌon ti ancianoune. Cꞌuxot ti coꞌnton yuꞌun coꞌol jchꞌunojtic ti cꞌope ti jaꞌ melele.
\p
\v 2 Hoꞌot ti cꞌuxot ti coꞌntone, ti jcꞌan ti lec acꞌo cꞌotuc avuꞌun scotol ti cꞌusi chapase. Ti jcꞌan ti lec oyot xchiꞌuc ti abecꞌtale hech chaj cꞌu cheꞌel lec ti avoꞌntone.
\v 3 Lec nichim noꞌox coꞌnton cꞌalal hul yalbun acꞌopilal ti quermanotique. Jaꞌ laj yalic ti oy ti avoꞌnton ti cꞌop ti jaꞌ melele, ti chapas ti mucꞌ ti cꞌop ti jaꞌ melele.
\v 4 Muꞌyuc cꞌusi yan lec nichim noꞌox coꞌnton yuꞌun. Jaꞌ nichim noꞌox coꞌnton yuꞌun ti chcaꞌibe scꞌopilal ti col jnichꞌnabe ti tspasic ti mucꞌ ti cꞌop ti jaꞌ melele.
\p
\v 5 Hoꞌot ti cꞌuxot ti coꞌntone, jaꞌ lec ti hech laj xa avacꞌ aba ti abatinel ti stojol ti quermanotique manchuc mi mu avojtiquinojuc onoꞌox. Mu alticuc ti avabtele.
\v 6 Lec cꞌotem ti acꞌopilale ti stojol scotol ti jchꞌunojeletic liꞌto. Yuꞌun hul xcholbot acꞌopilal ti quermanotique ti cꞌu cheꞌel laj acꞌuxubine. Jaꞌ lec ti hech chapase, hech muꞌyuc palta yuꞌunic ti cꞌusi chtun yuꞌunic cꞌalal chanavic batel ti be. Yuꞌun yabat ti Diose, jaꞌ lec ti hech chapasic ti muqꞌue.
\v 7 Yuꞌun jaꞌ ti sventa ti Diose ti hech chanavic batele. Muꞌyuc cꞌusi tscꞌambeic ti achiꞌiltaque ti mu to xojtiquinic ti Diose, hoꞌot ti coꞌol yanlum crixchanooxuc xchiꞌuque.
\v 8 Hech yuꞌun jaꞌ lec ti hoꞌucutic ti jcoltatic ti muchꞌu hech ch-abteje yuꞌun hech ti jcolta jbatic ti abtel xchiꞌuc yuꞌun hech chpuc ti cꞌop ti jaꞌ melele.
\s Jaꞌ scꞌopilal ti mu spasvan ti mucꞌ ti Diótrefese
\p
\v 9 Laj xa jtsꞌibabe scarta scotol ti jchꞌunojeletique ti te oyic ti bu oyote. Mu xispasun ti mucꞌ ti Diótrefese yuꞌun tscꞌan ti jaꞌ totil chcꞌot stuc.
\v 10 Hech yuꞌun mi nitale, chcacꞌbe snaꞌ ti chopol ti cꞌusi chispasbuntutique yuꞌun chopol chiyalbuntutic jcꞌopilaltutic. Maꞌuc noꞌox ti mu xispasun ti muqꞌue, jaꞌ mu xicꞌ ochel ti sna ti muchꞌutic ch-echꞌ qꞌuelatuc yuꞌune. Jaꞌ tspajes ti muchꞌu tscꞌan chicꞌ ochel ti sna ti quermanotique ti te oyic uque. Ti quermanotique ti laj yicꞌ ochel ti sna, hech yuꞌun jaꞌ chtenat loqꞌuel ti templo yuꞌun ti Diótrefese yuꞌun ti laj yicꞌ ochel ti snae.
\s Jaꞌ scꞌopilal ti lec scꞌopilal ti Demetrioe
\p
\v 11 Hoꞌot ti cꞌuxot ti coꞌntone, mu me xapas hech, yuꞌun chopol. Jaꞌ xapas ti cꞌusi leque. Scotol ti muchꞌutic tspas ti cꞌusi leque, jaꞌ snichꞌon Dios obi. Ti muchꞌu chopol ti cꞌusi tspase, jaꞌ mu xojtiquin ti Diose.
\p
\v 12 Ti Demetrioe lec scꞌopilal yuꞌun scotolic. Chvinaj ti tspas ti cꞌusi leque. Hoꞌontutic ti jcholbetutic lec scꞌopilal uc. Chanaꞌ ti melel ti hech chacalbetutique.
\s Hech ilaj yoꞌnton laj scꞌopon ti carta ti Gayoe
\p
\v 13 Oy to ep yan jcꞌan chacalbot. Mu stacꞌ chacalbot ti carta.
\v 14 Coꞌnton chtal jqꞌuelot ti ora yuꞌun hech xuꞌ chijloꞌlajucutic lec.
\p
\v 15 Acꞌo yacꞌbot jun avoꞌnton ti Diose. Chabanucot la xal ti quermanotic liꞌto. Chabanuc jujun ti quermanotic ti te oyic ti bu oyote.