\id JUD
\h SUN JUDAS
\toc1 SUN JUDAS
\mt JAꞌ TI SCARTA TI JUDASE TI LAJ STSꞌIBAE
\c 1
\s Hech lic scꞌopon ti carta ti quermanotique
\p
\v 1 Hoꞌon Judasun, hoꞌon yabatun ti Jesucristoe. Hoꞌon yitsꞌinun ti Santiagoe. Chajcꞌoponoxuc ti carta, hoꞌoxuc ti laj xa yicꞌoxuc ti stojol ti Jtotic Diose yuꞌun cꞌux chayaꞌyoxuc. Hoꞌoxuc ti chabibiloxuc yuꞌun ti Jesucristoe yuꞌun hech mu xyanej avoꞌntonic.
\v 2 Ti jcꞌan ti más chanaꞌic ti laj xa avichꞌic cꞌuxubinel yuꞌun ti Diose. Ti jcꞌan ti más chanaꞌic ti jaꞌ chayacꞌboxuc jun avoꞌntonic. Ti jcꞌan ti más chanaꞌic ti cꞌux chayaꞌyoxuc ti Diose.
\s Jaꞌ scꞌopilal ti nopbilal jchanubtasvanejetique
\r (2 Pedro 2:1‑17)
\p
\v 3 Hoꞌoxuc ti cꞌuxoxuc ti coꞌntone, toyol coꞌnton jcꞌan jtsꞌibaboxuc scꞌopilal ti jcoleltique. Cꞌalal laj caꞌi ti oy nopbilal jchanubtasvanejetic te o, hech yuꞌun jaꞌ más tsots scꞌopilal laj caꞌi. Hech yuꞌun jaꞌ laj jtsꞌibaboxuc ti ora yuꞌun hech chapꞌijubic. Mu me xavaqꞌuic ti jaꞌ peqꞌuel chcom scꞌopilal ti scꞌop ti Diose ti jchꞌunojtique. Yuꞌun hoꞌucutic ti laj xa yicꞌucutic ti stojole, laj xa yacꞌbucutic jventaintic ti scꞌope hech yuꞌun mu me xjel cuꞌuntic. Hech yuꞌun tsaco me abaic ti cꞌop xchiꞌuc ti muchꞌutic chalic scꞌop Dios scuyojique, alic me ti scꞌop Diose.
\v 4 Yuꞌun oy nopbilal jchanubtasvanejetic te achiꞌinojic, quermanotic scuyoj sbaic. Mucul chchanubtas ti quermanotique. Muꞌyuc Dios ti yoꞌntonic. Tsyanejesbeic sjam ti scꞌop ti Diose. Chalic ti yuꞌun oy yutsil yoꞌnton cuꞌuntic ti Diose hech yuꞌun xuꞌ ti jpastic cꞌusi tscꞌan ti jbecꞌtaltique. Mu spasic ti mucꞌ ti Cajvaltic Jesucristoe, jaꞌ ti cajvalinojtic jcotoltic. Ti Diose voꞌone snaꞌoj ti hech chlic chanubtasvanuc, hech yuꞌun chapal scꞌopilalic yuꞌun chba yichꞌic castigo yuꞌun ti hech chloꞌlavanique.
\p
\v 5 Yuꞌun lec chanaꞌic ti cꞌutic icꞌot ti pasel ti voꞌone, hech yuꞌun jaꞌ chajtꞌabesboxuc ti avoꞌntonic ti ora to. Ti Diose laj xcꞌuxubin ti antiguo jtotique hech laj scolta loqꞌuel ti Egipto. Pero patil cꞌalal te oyic ti xocol balumil laj smil ti muchꞌutic muc xchꞌumbat scꞌope. Hech chaj cꞌu cheꞌel laj yacꞌbe castigo ti antiguo jtotique ti Diose, jaꞌ noꞌox hech chacꞌbe castigo ti muchꞌutic chyanejesbat sjam ti scꞌope.
\v 6 Hech chaj cꞌu cheꞌel laj yacꞌbe castigo ti chꞌul abatetic ti muc spasic ti mucꞌ ti yabtelique, jaꞌ noꞌox hech ch-acꞌbatic uc ti nopbilal jchanubtasvanejetique. Yuꞌun ti chꞌul abatetique laj stoy sbaic ti stojol ti Diose. Laj spꞌaj ti yabtelique hech yuꞌun itenatic loqꞌuel tal ti bu utsilal. Hech te oyic ti icꞌ osil asta ti ora to. Chapal xa scꞌopilal ti chba yichꞌic castigo sbatel osil. Jaꞌ ti yorail ti ch-ichꞌbatic scꞌop yuꞌun smulic scotol crixchanoetic, jaꞌ yorail chba yichꞌic castigo.
\v 7 Ti Diose chacꞌbe castigo ti muchꞌutic nopbilal jchanubtasvanejetique hech chaj cꞌu cheꞌel laj yacꞌbe castigo ti crixchanoetic ti voꞌone te ti jteclum Sodoma xchiꞌuc ti jteclum Gomorra xchiꞌuc ti yan jteclumetic te nopajtic. Scoj ti laj spꞌajbeic smantal ti Diose, imulivajic, laj xchiꞌin sbaic viniquetic, hech iꞌacꞌbatic castigo. Ti Diose jaꞌ laj stembe yal tal cꞌocꞌ ti sbaic hech icꞌaqꞌuic o, itupꞌic o. Jaꞌ noꞌox hech tsta yorail chtupꞌic uc ti nopbilal jchanubtasvanejetique. Chticꞌatic ti cꞌocꞌ sbatel osil.
\p
\v 8 Ti nopbilal jchanubtasvanejetique coꞌol chopol tspasic hech chaj cꞌu cheꞌel laj spasic ti muchꞌutic chopol yoꞌntonic ti voꞌone. Yuꞌun ch-albatic ti svaichic tscuyic ti xuꞌ chixtan sbecꞌtalic, ti mu persauc chchꞌunic mantal, ti xuꞌ chopol chcꞌopojic yuꞌun ti chꞌul abatetique, hech yuꞌun hech chchanubtasvanic.
\v 9 Mu hechuc yoꞌntonic hech chaj cꞌu cheꞌel ti totil chꞌul abat, jaꞌ ti Miguele, jaꞌ ti tspas ti mantal scotol ti xchiꞌiltaque ti te oyic ti vinajele. Yuꞌun ti laj stsac sbaic ti cꞌop xchiꞌuc ti totil pucuje ti Miguele, jaꞌ ti scꞌopilal ti sbecꞌtal ti Moisese, ti “jaꞌ cuꞌun ti sbecꞌtal ti Moisese”, xchi ti pucuje, ti Miguele muc stoy sba ti stojol ti pucuje. Jaꞌ noꞌox hech laj yalbe ti pucuje: “Jaꞌ stuc chchapan ti Diose”, xchi noꞌox ti Miguele yuꞌun laj spas ti mucꞌ yuꞌun jaꞌ chꞌul abat onoꞌox ti pucuje.
\v 10 Ti muchꞌu nopbilal jchanubtasvanejetique chopol chcꞌopojic yuꞌun ti cꞌusi mu xojtiquinique, jaꞌ ti Diose xchiꞌuc ti chꞌul abatetique. Jaꞌuc ti sbecꞌtalique jaꞌ noꞌox chchꞌumbeic smantal jaꞌ ti yojtiquinojique. Jaꞌ hech chaj cꞌu cheꞌel ti cꞌutic xcotetic ti lume. Lume muꞌyuc srazón. Jaꞌ hech chcꞌotic. Jꞌechꞌel chbolib o yuꞌun ti hech tspasilanique.
\p
\v 11 Ta onoꞌox xichꞌic ep castigo yuꞌun coꞌol yoꞌntonic hech chaj cꞌu cheꞌel ti Caine ti voꞌone ti jaꞌ laj xchꞌun ti cꞌusi chopol laj scꞌan ti yoꞌntone. Ta onoꞌox xichꞌic ep castigo yuꞌun batem ti yoꞌntonic tspasic canal hech chaj cꞌu cheꞌel ti Balaame ti jaꞌ mu scꞌan xchꞌun hech chaj cꞌu cheꞌel tscꞌan ti Diose yuꞌun scoj ti ibicꞌtaj yoꞌnton yuꞌun taqꞌuin. Coꞌol ch-acꞌbatic castigo hech chaj cꞌu cheꞌel ti Coree ti jaꞌ laj stoy sba ti stojol ti Moisese, jaꞌ ti acꞌbil yabtel yuꞌun ti Diose.
\v 12 Ti yorail ti chapasic ti Santa Cenae yuꞌun ti chavacꞌbe abaic aveꞌelic yuꞌun hech chavacꞌ ti qꞌuelel ti cꞌux chavaꞌi abaic, jaꞌ chasoquesboxuc acꞌopilal yuꞌun jaꞌ noꞌox italic yuꞌun ep tal veꞌuc. Mu xqꞌuexavic. Muꞌyuc tsots scꞌopilal ti yoꞌntonic ti qꞌuin avuꞌunique. Hech chaj cꞌu cheꞌel ti toque ti mu yuꞌunuc jaꞌ chacꞌ tal hoꞌ, jaꞌ noꞌox chnetꞌat batel yuꞌun ti iqꞌue, hech yuꞌun muꞌyuc stu cuꞌuntic, mu yuꞌunuc chijyacꞌbucutic tal hoꞌ. Jaꞌ hech chaj cꞌu cheꞌel ti duraznoe ti cꞌalal yorail chacꞌ sat chba jqꞌueltic muꞌyuc jpꞌejuc sat. Bulbil xa yuꞌun muꞌyuc sat yuꞌun muꞌyuc stu. Jaꞌ hechic ti nopbilal jchanubtasvanejetique mi jutuc muꞌyuc cꞌusi lec chalic.
\v 13 Ti nopbilal jchanubtasvanejetique jaꞌ hech chaj cꞌu cheꞌel ti nabe ti cꞌalal tsots chtal icꞌ, tsots tsyuques sba ti jyalel jaꞌ chlocꞌ scotol ti scꞌaꞌepale. Jaꞌ hechic uc ti nopbilal jchanubtasvanejetique tsots ch-abtejic jaꞌ noꞌox chaqꞌuic ti qꞌuelel scotol ti sbolil ti yoꞌntonique. Ti nopbilal jchanubtasvanejetique jaꞌ hech chaj cꞌu cheꞌel tsoc cꞌanal ti jꞌocꞌ noꞌox chvinaj chtupꞌ. Jaꞌ hechic uc ti nopbilal jchanubtasvanejetique, sbatel osil chbatic ti icꞌ osil o.
\p
\v 14 Jaꞌ iꞌalbatic comel scꞌopilalic uc yuꞌun ti Enoque ti voꞌone. Hoꞌvoꞌ iꞌechꞌ ox ti balumil ti totiletique, jaꞌ ti yol snichꞌon ti Adane, cꞌalal ihul ti Enoque. Jaꞌ noꞌox tsacbil ti venta jujun snichꞌon jujun totil. Hech laj yal ti Enoque: “Chtal ti Cajvaltique, chchiꞌin tal ep ti mil ti chꞌul abatetic yuꞌune.
\v 15 Chtal xchapambe scꞌopilal scotol crixchanoetic. Chacꞌbe castigo scotol ti muchꞌutic muꞌyuc Dios ti yoꞌntonique, jaꞌ ti chopol yabtel spasojique, jaꞌ ti chopol icꞌopojic yuꞌun ti Diose”, xchi ti Enoque.
\v 16 Ti nopbilal jchanubtasvanejetique muꞌyuc muchꞌu lec liꞌ ti balumile chil. Jaꞌ noꞌox batem ti yoꞌntonic ti cꞌusi tscꞌan ti sbecꞌtalique. Ep tstoy sbaic. Tslequilcꞌoponic yantic yuꞌun hech lec acꞌo ilatuc acꞌo pasatuc ti mucꞌ yuꞌunic.
\s Jaꞌ scꞌopilal ti laj staqꞌuiic ti quermanotique ti cꞌusi lec tscꞌan tspasique
\p
\v 17 Ti hoꞌoxuque ti cꞌuxoxuc ti coꞌntone, naꞌic me ti cꞌu cheꞌel laj yalic ti jcholcꞌopetic yuꞌun ti Cajvaltic Jesucristoe.
\v 18 Hech laj yalic: “Cꞌalal poꞌot xa tsta yorail slajebal cꞌacꞌal hech chlic licucuc ti muchꞌutic mu spasic ti mucꞌ ti scꞌop ti Diose ti jaꞌ batem ti yoꞌntonic tspasic ti cꞌusi chopol tscꞌan ti sbecꞌtalique”, xchiic.
\v 19 Jaꞌ ti muchꞌutic yacꞌoj sbaic ti parte, jaꞌ ti spasojic ti mucꞌ ti sbecꞌtalique, muꞌyuc bu yichꞌojic ti Chꞌul Espíritue.
\p
\v 20 Ti hoꞌoxuque ti cꞌuxoxuc ti coꞌntone, tsatsubtasbo abaic avoꞌntonic ti sventa ti scꞌop ti Diose ti jaꞌ jelaven yutsile. Jaꞌuc me ti sventa ti Chꞌul Espíritue chacꞌoponic Dios.
\v 21 Teanic ti stojol ti Diose hech cꞌux chayaꞌyot ti Diose. Malaic ti chavichꞌic cꞌuxubinel yuꞌun ti Cajvaltic Jesucristoe yuꞌun chacuxiic sbatel osil.
\p
\v 22 Tsatsubtasbo yoꞌntonic ti muchꞌutic yacꞌoj sba tsnopic mi chchꞌunic hech chaj cꞌu cheꞌel chchꞌunic ti nopbilal jchanubtasvanejetique.
\v 23 Coltao ti muchꞌutic tscꞌan xa spasic cꞌusi tscꞌan ti sbecꞌtalique. Repenta ta to xcol avuꞌunic. Cꞌuxubino ti muchꞌutic laj xa spasic ti cꞌusi tscꞌan ti sbecꞌtalique. Pero ti hoꞌoxuque pꞌijanic me, mu me xayicꞌoxuc batel uc. Chabio me aba, contraino ti muliletic ti yacꞌoj sba tspasique.
\s Jaꞌ scꞌopilal ti chabibilic yuꞌun ti Diose
\p
\v 24 Jaꞌ chaxchabioxuc ti Diose ti jelaven spꞌijile, hech mu xapꞌajic ti mulil. Hech nichim noꞌox avoꞌntonic muꞌyuc amulic ti cꞌalal chasvaꞌanoxuc ti stojol te ti bu chquevane.
\v 25 Hech acꞌo pasatuc ti mucꞌ ti Dios cuꞌuntique ti laj xa scoltaucutic ti sventa ti Cajvaltic Jesucristoe. Jaꞌ jelaven yutsil yoꞌnton. Jaꞌ jelaven spꞌijil tspas mantal sbatel osil. Scotol smacoj cꞌalal ilic ti balumile, scotol smacoj ti ora to asta sbatel osil.