1
00:00:05,000 --> 00:00:15,040
(Pulu Yemonga ungumu. Kolomongo-kanga wane.) ˻Yesusini yu lombili andolimendo nimbendo:˼ “Na unjo-waene sikemo. Tata yu unjo-waene ponie nokolemo yemo.

2
00:00:15,040 --> 00:00:36,780
Tatane nanga unjo-kola mongo naa tolemoma pali langopa wendo limo. Kola mongo tolemoma pali ‘Peanga tepa angilipe kamu mongo awisili topili!’ nimbe yuni aku kolamanga méle kerime langopa wendo lipe tepa mimi telemo.

3
00:00:36,780 --> 00:00:50,100
“Na lombili andolime, eno ungu nimbu silio kanumuni ˻enonga konopune kalaro molorumume kulumiye tondomu-ne˼ eno ˻konopu˼ kake tepili molemele.

4
00:00:50,100 --> 00:01:33,720
Unjo-kolama paka kapola telemo kinie unjona kapola angilipe mongo tolemo, aku-siku eno na-kinie tapu toko molko, na eno-kinie tapú-topo molombo kinie eno kapola molko ulu-pulu peangama tenge. Kola te kerepa manie omba lemomo altopa mongo naa tolemo. Kola-unjona ola paka tepa angilimomo yu mongo tolemo. Aku-siku eno na pea ‘Tapú-topo molamili!’ naa ningi liemo eno “Teaa!” nilio mele manda naa teko nanga kongono manda naa tendenge.

5
00:01:33,720 --> 00:02:05,600
“Na unjomo, eno kolama. Kola paka tepalie unjona angilipe mongo tolemo mele eno na-kinie tapú-toko molko na eno-kinie tapú-topo molopo aku temulu liemo nane “Teaa!” nilio mele eno manda teko nanga kongono kapola tendenge. Eno na munduku siye kolko eno na-kinie tapú-toko naa molongi liemo nanga ulume eno manda naa tenge.

6
00:02:05,600 --> 00:02:29,380
Unjo-kola langoko wendo liku ltekolie, kolemo kinie aku kolama liku máku toko tepena kalemele kinie nolemo. Aku-sipela, yembo te na-kinie tapú-topa naa molopalie ulu-peangama naa temu liemo unjo-kola kololime telemele mele yu aku-siku tenge.

7
00:02:29,380 --> 00:02:55,440
“Eno na-kinie tapú-toko molko nanga ungume enonga konopumenga pepili pilku liku molongi liemo ulu te ‘Teamboa!’ ningu, ungu te ‘Piliemboa!’ konopu leko, mélte mólo tombamo ‘Liemboa!’ ningu, aku-siku pilkulie Tata-kinie ungu ningu mawa tenge mele yuni tendembamo.

8
00:02:55,440 --> 00:03:20,620
Eno nane “Teaa!” nilio mele paa teko kondoko, nanga kongono paa teko kondonge kinie aku-siku tengemone Tatanga imbi liku ola mundundunge ola molomba. Tenge mele yembomane kanokolie ‘Eno paa sike Yesusinge lombili andolime molemele.’ konopu lengela.” ˻nirimu.˼

9
00:03:20,620 --> 00:03:32,020
“Tatane na konopu mondolemo mele nane eno konopu mondolio. Nane eno ‘Kamu konopu mondambo!’ ningu molayo!

10
00:03:32,020 --> 00:03:54,920
Tatane nando “Tei!” nilimo ungu-manema na tepo moliomonga yuni na kamu konopu mondolemo mele enone aku-siku nane “Teaa!” nilio ungu-manema pilku liku tengi liemo aku-siku tengemonga nane eno ‘Kamu konopu mondambo!’ ninge.

11
00:03:54,920 --> 00:04:05,780
‘Na konopu sipu molio mele eno aku-siku konopu siku konopu kapola pepili molangi!’ nimbu i ungume nimbu sikiru.

12
00:04:05,780 --> 00:04:19,100
“Nane “Teaa!” nilio ungu-manemo i-sipe: ‘Nane eno konopu mondolio mele enone enono anjo-yando aku-siku konopu mondangi!’ nimbu nikiru.

13
00:04:19,100 --> 00:04:35,120
Yembo tene yunge pulu lemo yemboma konopu mondopalie enonga nimbe kolo wangopa kolondomu liemo yuni konopu mondolemo mele olandopa, we-yembomane konopu mondolemele mele maniendopa.

14
00:04:35,120 --> 00:04:43,420
“Nane enondo “Teaa!” nilio ungu-manema tengi liemo eno nanga pulu lemo yemboma molonge.

15
00:04:43,420 --> 00:05:35,740
Kinié nane enondo altopo “Nanga kendemandema.” naa nimbu, “Nanga pulu lemoma.” nilio. Kendemandema enonga nokoli yemone ulume tepa konopu lepa andopa molemo mele eno naa nimbe silimo naa kanoko naa pilimelemonga kinié enondo aku-sipu “Nanga kendemandema.” ni naa nilio. ˻Ye tenga pulu lemoma mindi yemo yu andopa molemo mele nimbe silimo pilimele. Akumu pilipulie˼ nane enondo “Nanga kendemandema.” ni naa nimbu, Tatane nando nimbe sirimu pilierindume pali eno nimbu sirindu kulu nane eno “Nanga pulu lemoma.” nilio.

16
00:05:35,740 --> 00:06:24,760
“Eno-enono na ‘Olionga Awilimu.’ ningu mako naa toringi. Nane nanu eno ‘Nanga yema molangi!’ nimbu mako torundu. ‘Eno puku, “Teaa!” nimbo mele teko, nanga kongono tendangi! Aku ulu-peanga tengema pora naa nimbe we pepa mindi pupili!’ nimbu nane enondo “Nangama.” nimbu eno mako topo “Na lombili waa!” nirindu. Akumunge, Tata-kinie ungu ningu “Olio Awili Yesusinge yemboma molemolo.” ningu méle te mawa tenge kinie yuni pilipelie mawa tenge mélema eno sipe enonga tendemba.

17
00:06:24,760 --> 00:06:34,760
Nane eno ungu-mane sipulie “Enono anjo-yando konopu mondaa!” nilio mele nikiru.” nirimu.