1
00:00:05,000 --> 00:00:18,280
Yesusini ene koro moloringi Wale-Sambatemonga aku-sipe uluma terimu-na Juda-ye-ailimene Yesusi yu pulu monjiku teko kenjiku umbuni siringi.

2
00:00:18,280 --> 00:00:35,000
Yesusini enendo nimbendo: “Tarane ou yamboma walemanga pali lipe taponjirimu mele kinié kepe aku-sipe tepa molemo. Na aku-sipu Sambate-Walemanga kongono teliola.” nirimu.

3
00:00:35,000 --> 00:01:07,180
Yuni aku nirimu-na pilku Juda-ye-ailimene ‘Yesusi yu paa kamu topo konjímulu.’ konopu lelko aulke te koroko moloringi. Ou Sambate-Walemonga ungu-manemo pulue torumumunge pilku yu mumindili kolkolie; pe “Pulu Yemo yunge lapa.” nirimumunge yu ‘Pulu Yemo-kinie kapola-kapola molembolo.’ nimbe nirimumunge yu kamu mumindili kolko yu toko konjingí teringi.

4
00:01:07,180 --> 00:01:28,820
Yesusini enendo pundu topa nimbendo: “Nane ene paa sike nimbu sikirumu: “Malone yuyu uluma manda naa telemo temba. Yunge Lapane telemo mele kanopalie manda lepa telemo. Lapane telemo uluma mindi Malone telemo.” nikiru.

5
00:01:28,820 --> 00:01:52,100
Nambemu-na, Lapane Malo konopu monjipelie yuni telemo mele pali Malo lipe ora silimo. Ye tepa konde limu akumu maniendopa. Paa sike pe ene paa kanoko konopu aisili liku mundungí ulu-tondolo olandopama Lapane Malo lipe ora simbe.

6
00:01:52,100 --> 00:02:09,480
Akumu nambe-tepa wendo ombáye? Lapane yambo kololime topa makinjipelie ‘Konde molangi!’ nilimo mele aku-sipe Malone yambo kololime ‘Konde pangi!’ konopu lemo yamboma tepa konde limo.

7
00:02:09,480 --> 00:02:44,920
Ungu te pea i-sipe: ‘Yambomane Lapamonga imbimu ambolko ola linjilimele mele Malomonga imbimu aku-siku ambolko ola linjengi!’ nimbe Lapane kote pilipe yamboma naa apurupe kote pilili kongono akumu Malomo sirimu. Akumunge, yambomane Malomonga imbimu ambolko ola naa linjilimele yambomane aku-siku Malomo yando lipe mundurumu Lapamonga imbimu kepe ambolko ola naa linjilimelela.

8
00:02:44,920 --> 00:02:51,180
Pulu Yemonga Malomone Konde Molopa Mindi Puli Ulu-Pulumu Silimo Temanemo

9
00:02:51,180 --> 00:03:24,160
“Nane enendo paa sike nimbu sikirumu: “Nanga ungumu pilku, na lipe mundurumuna orundu yemo ‘Yu sike Pulu Yemo.’ ningu tondolo-munduku pilimele yamboma konde molopa mindi puli ulu-pulumu ene-kinie pelemo. Pe kote-walemo wendo ombá kinie ene kotena naa angilingíla. Kanu yamboma kololi ulu-pulumu pelemo aulkemo munduku kelko konde molopa mindi puli aulkena pulimele.” nikiru.

10
00:03:24,160 --> 00:03:46,940
Nane enendo paa sike nimbu sikirumu: “Wale wendo ombámo kinié koronga wendo omu. Kanu walemonga Pulu Yemonga Malonga ungumu kololi yamboma pilingí. Kanu-kinie yunge ungumu ‘Sike’ ningu pilku liku molonge yamboma konde molonge.” nikiru.

11
00:03:46,940 --> 00:03:58,820
Mélema konde mololi ulu-pulumu Lapa-kinie pelemo mele aku-sipe Lapane ‘Mélema konde mololi ulu-pulumu Malo-kinie pepili!’ nirimula.

12
00:03:58,820 --> 00:04:11,520
Malo yu Manie Omba Mana-Ye Au Lerimu Yemo molemomonga Lapane ‘Malo yambomanga kote pilipili!’ nimbe nambamo sirimu.

13
00:04:11,520 --> 00:04:28,600
“Nakolo akumunge mindi ene konopu aisili liku naa mundengi! Nambemu-na, wale te wendo ombá, kanu walemonga yambo óno-koleana pelemelemane Malonga ungumu pilkulie ningímuni,

14
00:04:28,600 --> 00:04:50,160
óno-koleamo munduku kelko wendo onge. Kanu-kinie lomboroko ola molonge yambomanga ou mana konde molkolie teko konjiku moloringi yamboma konde molonge; ou mana teko kenjiku moloringi yamboma pe kotena angilkulie pe mindili nonge.

15
00:04:50,160 --> 00:05:15,460
“Na-nanu ulu te manda naa tembo. Tarane nilimo mele pilipulie yambomanga kotema apurupu pilio. ‘Na-nanu konopu siembo!’ nimbu uluma naa tepo, ‘Na lipe mundurumu yemo konopu sipili!’ nimbu uluma teliomonga kote sumbi-sipu pilipu apurupu konjilio.” ˻nirimu.˼

16
00:05:15,460 --> 00:05:21,460
Yambo Marene Yesusi Molopa Terimu Kanoringi Mele Ningu Siringi Temanemo

17
00:05:21,460 --> 00:05:30,860
“Sike na molio mele na-nanu nimbu sindu liemo ‘Kolo tokomonje.’ ningu pilíngi liemo papu.

18
00:05:30,860 --> 00:05:44,240
Ye tene-lupe na molio mele nimbe silimo, akumu na pilkiru nando nilimo mele paa sike nilimo, ‘Kolo tokomonje.’ manda naa ningí.

19
00:05:44,240 --> 00:05:55,360
“Enene ye mare ˻No-Linjili˼ Jono molorumuna “Pai!” ningu liku munduringi kinie yuni na sike molio mele nimbe sirimu.

20
00:05:55,360 --> 00:06:24,020
Mana-yambo tene na molio mele yamboma nimbe sipe “Sike nikimu. Sike aku-sipe molemo.” nimu liemo na konopu aisili lipu naa mundupu, ‘Uluri mólo!’ konopu lelio, nakolo ‘Pulu Yemone ene lipe taponjipe mindili nolemelka aulkena wendo lipili!’ nimbu Jonone nando nirimu mele ene nimbu sikiru.

21
00:06:24,020 --> 00:06:37,720
Jonone kongono terimumunge yu kiye-mele nomba yamboma pa tenjirimu. Kanu-kinie laye-kolo ene konopu siku kanu pa tenjirimuna moloringi.

22
00:06:37,720 --> 00:07:09,080
“Nakolo Jonone na lipe taponjipe na molio mele ene nimbe sirimu mele maniendopa. Ulu te na molio mele lipe taponjipe lipe ora silimo mele olandopa. Tarane “Ulu-tondolo teko pora sieni!” nimbe na sirimu ulu-tondolo telio kanumane na lipe taponjipe, Tarane na “Pui!” nimbe lipe mundurumu mele ene lipe ora silimo.

23
00:07:09,080 --> 00:07:30,400
Tarane na “Pui!” nimbe lipe mundurumu-na orundumuni kepe nanga nimbe para sinjílimu molopa na molio mele nimbe sirimu. Enene yunge kerena ungu nirimuma walsikale kepe komumuni naa pilku, yunge kumbi-keremo mongone naa kanoringi.

24
00:07:30,400 --> 00:07:44,440
Ungu te pea kepe. Tarane lipe mundurumu yemonga ungumu “Kolo tokomo.” ningu pilimelemonga yu lipe mundurumu Lapanga ungumu enenga konopumanga naa pelemo.

25
00:07:44,440 --> 00:08:00,640
‘Pulu Yemonga bokuna ungu molemomane olio alieli konde molopo mindi pumulú ulu-pulumu simbe.’ ningu mimi-siku kanolemele. Aku mimi-siku kanolemele bokumuni na molio mele nimbe silimo

26
00:08:00,640 --> 00:08:11,680
nakolo ‘Konde molopo mindi pumulú ulu-pulumu liemili!’ naa ningu, na moliona ‘naa omolo.’ ningu karaye telemele.

27
00:08:11,680 --> 00:08:22,560
“ ‘Yambomane na kapi ningu nanga imbi ambolko ola linjingí kinie na ailimu molambo!’ nimbu aku naa telio.

28
00:08:22,560 --> 00:08:32,580
Ene molemele mele nane pilio. Pulu Yemo konopu monjili ulu-pulumu ene-kinie naa pelemo pilio.

29
00:08:32,580 --> 00:08:56,200
Nanga Tarane na namba sipe yunge kongonomo ‘tenji-pui!’ nimbe na lipe mundurumu-na orundu nakolo nanga ungumu ene naa pilku limele. Nakolo yambo tene yuyu namba lipe omba kongono telkanje aku yambomonga ungumu pilku limelka.

30
00:08:56,200 --> 00:09:16,600
Ene-eneno anju-yando ‘imbi molopili!’ ningu, Pulu Ye telumu mindi molemo akumuni enenga imbi ‘ambolopa ola linjipili!’ naa nilimele liemo na molio mele nimbu silio ungumu ‘Sike nikimu.’ ningu nambe-teko pilingíye?

31
00:09:16,600 --> 00:09:37,740
“Nakolo ˻na-kinie˼ teko kenjilimelemonga ‘Pulu Yemonga kote-walemo wendo ombá kinie Tarane kote pilipe molopili nane nanu kote tenjimbe.’ ningu naa piliengi! ‘Mosisini ene lipe taponjimbe.’ konopu lemele yemone enenga kote tenjimbe.

32
00:09:37,740 --> 00:09:53,620
Mosisini na ombo molombo mele boku torumu-na enene ‘Mosisini nirimu unguma sike nirimu.’ ningu pilimelkanje nanga ungumu kepe ‘Sike nikimu.’ ningu pilimelka-la.

33
00:09:53,620 --> 00:10:11,260
Nakolo yuni nanga temane bokuna torumumu ‘Sike nikimu.’ ningu naa pilimelemonga nanga ungu nikirumu ‘Sike nikimu.’ ningu nambe-teko pilingíye?” nimbe Yesusini nirimu.