1
00:00:05,000 --> 00:00:16,060
(Pulu Yemonga ungumu. Kolomongo-kanga wane.) Yesusi aulkena pumbe purumu kinie mongo keri lerimu ye te molorumu kanorumu. Anumuni olona sukundu mongo keri lelimu merimu.

2
00:00:16,060 --> 00:00:38,240
Pe yu lombili andoli yemane yu walsikulie ningindu: “Rapai, naene ulu-pulu-keri terimumunge i yemonga anumuni yu olona sukundu mongo keri lelimu merimuye? Yemo yuyu terimu molo anumu-lapatolone teringiliye?” niringi.

3
00:00:38,240 --> 00:01:00,280
Yesusini nimbendo: “Yemo yuni kepe anumu-lapatolone kepe ulu-pulu-keri te teringimunge yu mongo keri naa lerimu. ‘Pulu Yemonga ulu-tondolo te i yemo-kinie mona wendo opili yamboma pali kanangi!’ nimbe i yemo mongo keri lerimu.

4
00:01:00,280 --> 00:01:15,120
I walemo pora naa nimbe ena ou naa pupili na lipe mundurumu yemonga kongonomo paa temolo. Ipu lemba kinie yambo tene manda kongono naa temba.

5
00:01:15,120 --> 00:01:23,240
Na i ma-koleana molopolie, na ma-koleana yambomanga pa tenjilimu molio.” nirimu.

6
00:01:23,240 --> 00:01:36,060
Aku nimbelie yu mana lkambe topa mamo-kinie ambolopa topele-mapele topalie yemonga mongotolonga kanjipelie nimbendo:

7
00:01:36,060 --> 00:01:55,940
“Nu No-Mongo Silloamo puku kumbikerena no le-pui!” nirimu. (Silloamonga ungu-pulumu ‘lipe munduli’.) Yu akuna pupe kumbi-kerena no lerimu kinie mongotolo peanga lerimu, mélema kanolipe ulkendo purumu.

8
00:01:55,940 --> 00:02:23,540
Kanu-kinie yunge kolea-yamboma kinie “Yu kou-mone siei!” nimbe ou aulkena mawa tepa molorumu kanoringi yamboma kinie yu aku-sipe orumu kanokolie enene eneno anju-yando kere-pali ningu walsikulie ningindu: “I yemo ou “Kou-mone siei!” nimbe mawa tepa molorumu kanu yemonje?” niringi.

9
00:02:23,540 --> 00:02:47,860
Marene ningindu: “Sike, yu aku yemo mindi.” niringi. Marene ningindu: “Mólo! Elte kumbi-kere telu-sipe nakolo i yemo lupe.” niringi. Nakolo yemo yuyu tondolo-mundupelie nimbendo: “Ye kanumu na mindi.” nirimu.

10
00:02:47,860 --> 00:02:57,540
Enene pundu tokolie ningindu: “Nunge mongotolo nambe-tenu kinie peanga lemuye?” niringi kinie

11
00:02:57,540 --> 00:03:23,180
yuni pundu topa nimbendo: “Ye te ‘Yesusi’ nilimele kanumuni le-olí lipe mongotolonga ape kanjipelie nimbendo: “No-Mongo Silloamo puku kumbikerena no le-pui!” nimu kinie pupu kumbi-kerena no le-pundu kinie nanga mongotolo peanga lemu-na kolea kanondu.” nirimu.

12
00:03:23,180 --> 00:03:30,100
“Aku yemo tena molemoye?” niringi kinie “Na naa kanondu.” nirimu.

13
00:03:30,100 --> 00:03:38,840
Parisi-Yemane Mongo Keri Lerimu Yemo ‘Nambepa Peanga Lemunje Piliemili!’ Niringi Temanemo

14
00:03:38,840 --> 00:03:46,920
Ye ou mongo keri lerimumu yambomane Parisi-yema moloringine mengo puringi.

15
00:03:46,920 --> 00:04:04,340
Kanu-kinie, Yesusini le-olí lipe yemonga mongotolonga ape kanjipelie yemonga mongotolo ‘altopa peanga lepili!’ nirimu kanu walemo ˻Juda-yamboma koro moloringi˼ Wale-Sambate kinie terimu,

16
00:04:04,340 --> 00:04:28,960
akumunge Parisi-yemane kepe yu walsikulie ningindu: “Nunge mongotolo nambe-tepa peanga lemuye?” niringi. Yemone pundu topa nimbendo: “Nanga mongotolonga oli ape kanjimu kinie na kumbikerena no lendu, kinié na mongone kanokoro.” nirimu.

17
00:04:28,960 --> 00:05:09,760
Parisi-ye marene ningindu: “I yemo Sambate-Walemo naa pilipe we andolemo, aku-sipe ulu-pulu-keri telemomonga Pulu Yemone yu naa lipe mundurumu lemo.” niringi. Nakolo marene ningindu: “Pulu Yemone lipe taponjimbe kinie mindi yambo tene i ulu-tondoloma mele manda temba aku-sipe mele ye ulu-pulu-keri telemo tene manda telkaye?” niringi. Akumunge ene anju-yando kere-pali ningu konopu teluna pupili naa moloringi.

18
00:05:09,760 --> 00:05:36,520
Akumunge, mongo ou keri lerimu yemo altoko walsikulie ningindu: “Kanu yemone nunge mongomo tepa peanga tenjimu akumunge yundu nu nambolka konopu lekenoye?” niringi. Yemone pundu topalie nimbendo: “Yu Pulu Yemone ungu-umbu tonjilimoma pilipe yamboma nimbe silimo ye te.” nirimu.

19
00:05:36,520 --> 00:06:00,300
Nakolo Juda-ye-ailimene “ ‘I yemo ou yunge mongomo paa sike keri lerimu, pe kinié peanga lemu.’ nimbu ‘sike lemo.’ we naa nimulú. Yu olione kanopo imbi naa silimolo kene anumu-lapatolo walsipu piliemili wale!” niringi.

20
00:06:00,300 --> 00:06:22,940
Kanu-kinie anumu-lapatolo oringili kinie walsikulie ningindu: “I yemo eltenga marenaye? “Anumuni merimu kinie mongomo keri lerimu.” nilimbele kanu yemo imuye? Aku liemo kinié nambe-tepa mongone kanolemoye?” niringi.

21
00:06:22,940 --> 00:06:36,260
Anumu-lapatolone pundu tokolo ningilindu: “Yu sike oltonga malo. Anumuni merimu kinie yunge mongomo keri lelimu merimu yemo olto kanokombolo.

22
00:06:36,260 --> 00:06:59,900
Nakolo kinié yunge mongotolo peanga lemumu nambe-tepa temunje olto naa kanombulu. Yu naene mongotolo tepa peanga tenjimunje akumu olto naa-la kanombulu. Yu ye-yumu molemo kene yu temu mele yuyu nimbe sipili yu walsiku piliei!” niringili.

23
00:06:59,900 --> 00:07:31,480
Anumu-lapatolo Juda-ye-ailime pipili kolkololie aku-siku niringili. Juda-ye-ailimene ou ningu panjikulie ningindu: “Yambo tene ‘Yesusi yu sike Pulu Yemone lipe mundurumu ye-nomi Kirasimu.’ nimu liemo aku yambomo ulke máku topo Pulu Yemonga ungumu pilimolo ulkemanga naa opili kamu makoromolo.” niringimunge aku-siku niringili.

24
00:07:31,480 --> 00:07:44,540
Ou ye-ailimene aku-siku ningu panjiringimu anumu-lapatolo pilkululie “Yu ye-yumu kene yuyu nipili walsiku piliei!” niringili.

25
00:07:44,540 --> 00:08:20,360
Juda-ye-ailimene kelko wale talo-siku ou mongo keri lerimu yemo “Oi!” ningulie yundu ningindu: “Nuni ‘Pulu Yemo pilipe molemo.’ ningu kolo naa toko, nu temu mele sumbi-siku olio piliemili ningu si! ˻Olio Pulu Yemonga ungumu mimi-sipu pilimolo yemane pilkimulu, ˼ ‘ ‘Nunge mongo tepa peanga tenjimu.’ nikinu yemo yu ulu-pulu-keri teli yemo.’ nimbu pilkimulu.” niringi.

26
00:08:20,360 --> 00:08:52,120
Yuni enendo pundu topa nimbendo: “Nanga mongotolo tepa peanga tenjimu yemo ulu-pulu keri teli yemo molo mólonje, na naa pilkiru. Nakolo ulu te na paa sike pilkiru. Ou nanga mongotolo paa sike keri lerimu nakolo kinié nanga mongotolo peanga lemu-na kolea kanokoro, akumu na paa pilkiru.” nirimu.

27
00:08:52,120 --> 00:09:06,080
Kanu-kinie enene yu walsiku pilkulie ningindu: “Yuni nu nambe-temuye? Nambolka uluri temu kinie nunge mongotolo peanga lemuye?” niringi.

28
00:09:06,080 --> 00:09:28,340
Yuni pundu topa nimbendo: “Nane ene ou nimbu sindu nakolo naa pilingindu ungu nindumu liku su síngi kanumu. Pe kinié nambolkare pilingindu altoko ‘ni!’ nikimiliye? Ene kepe yu lombili pungíndu walsikimilinje?” nirimu.

29
00:09:28,340 --> 00:09:42,560
Kanu-kinie enene yu-kinie mumindili kolkolie iri toko ningindu: “Nu aku ye-kerimunge lombili andolimu nakolo olio Mosisinge lombili andolime.

30
00:09:42,560 --> 00:10:01,240
‘Pulu Yemone sike Mosisi-kinie ungu nirimu.’ nimbu pilipulie ˻‘Mosisi Pulu Yemonga ye-ailimu.’ nimbu pilipu molemolo˼ nakolo i ye-kerimu yu terenga molopa orumunje, olio naa pilkimulu.” niringi.

31
00:10:01,240 --> 00:10:20,260
Yemone pundu topa nimbendo: “I yemone nanga mongotolo tepa peanga tenjimu nakolo yu tena molopa orumunje ene Pulu Yemonga ungumu mimi-siku pilimele yemane naa pilimele akumu paa ulu te-lupe.

32
00:10:20,260 --> 00:10:51,220
Olio pilimolo, ‘Ulu-pulu-keri telemele yamboma Pulu Yemo mawa teko “Liku taponji!” nilimele unguma Pulu Yemo yuni naa pilimo. Yambo te ‘Pulu Yemonga imbimu olandopa molopili!’ nimbe uluma tepa molopa, yuni “Tei!” nilimo mele pilipe telemo yambomo Pulu Yemo mawa tepa “Liku taponji!” nilimo unguma yuni pilimo.’ akumu olio pilimolo.

33
00:10:51,220 --> 00:11:13,020
Ou Pulu Yemone mulú-matolo terimu kinie kepe yandopa kepe yambo te anumuni merimu kinie olona sukundu mongo keri lerimu yambomonga mongomo yambo tene tepa peanga tenjirimu ningu temane telu kepe ou tene naa toringi pilirimulu kanumu.

34
00:11:13,020 --> 00:11:22,460
Pulu Yemone i yemo lipe naa mundulkenje yuni aku-sipe ulu-tondolo te manda naa telka.” nirimu.

35
00:11:22,460 --> 00:11:49,220
Yuni aku nirimu-na pilkulie enene pundu toko ningindu: “Nu aminiene merimu kinie ulu-pulu-keri aisili pepili merimu. Pe kinié nuni ‘olio mane siembo!’ konopu lelkolie nikinuye?” niringi. Aku ningulie yu ˻Pulu Yemonga ungumu piliringi ulkena kamu˼ makororingi.

36
00:11:49,220 --> 00:11:58,720
“Yambomanga Konopuna Sukundu Mongoma Keri Lemo, Yambo Naa Kanolemele.” Nirimu Temanemo

37
00:11:58,720 --> 00:12:26,100
Juda-ye-ailimene Yesusini mongo tepa peanga tenjirimu yemo ˻Pulu Yemonga ungumu piliringi ulkena˼ kamu makororingi kinie pilipelie Yesusi yu pupe kanopalie nimbendo: “Nu Manie Omba Mana-Ye Au Lerimu Yemo ˻‘Yu sike Pulu Yemone lipe mundurumu˼.’ ningu tondolo-munduku pilkinu molo móloye?” nirimu.

38
00:12:26,100 --> 00:12:43,000
Yemone walsipelie nimbendo: “Ye Ailimu, i ye nikinumu yu naeye? Nane ‘yu sike aku yemo molemo.’ nimbu tondolo-mundupu piliembo kene ningu si!” nirimu.

39
00:12:43,000 --> 00:12:54,900
Yesusini nimbendo: “Kanu yemo nu kinié kanoko moleno. Kinié nu-kinie ungu ningu molkombele akumu.” nirimu.

40
00:12:54,900 --> 00:13:12,480
Kanu-kinie ye kanumuni nimbendo: “Ailimu, kinié ‘Nu aku yemo sike lepamo.’ nimbu tondolo-mundupu pilkiru.” nimbelie Yesusinge imbi ambolopa ola linjipe yu kapi nirimu.

41
00:13:12,480 --> 00:13:37,600
Yesusini nimbendo: “Na ‘yamboma ulu-pulu-keri teko molemele mele mona lepili piliengi!’ nimbu ma-koleana orundu. ‘Yambo mongo keri lemoma mongone mélema kanoko, mongo peanga lemoma mongone mélema naa kanangi!’ nimbu ma-koleana orundu.” nirimu.

42
00:13:37,600 --> 00:13:58,500
Parisi-ye yu pea moloringi marene yuni aku nirimu pilkulie ‘Yu ungu-iku te topa oliondo nikimunje?’ ningu yu walsikulie ningindu: “Nu nambolka ningu nikinuye? Olionga mongoma keri lemolaye?” niringi.

43
00:13:58,500 --> 00:14:28,700
Yesusini nimbendo: “Enenga mongoma keri lelkanje enenga ‘konopuna ulu-pulu kerime pelemo.’ ningu pilkulie, ˻Pulu Yemondo˼ “ ‘Ulu-pulu-kerime manie pupe konopu peanga lepili!’ ni!” nilimelka. Nakolo “Mongone mélema kanolemolo.” nilimelemonga enenga ulu-pulu kerime konopuna we pepili molemele.” ˻nirimu.˼