1
00:00:05,000 --> 00:00:15,640
Yesusini ungu te pea nimbendo: “Enene na konopu monjíngi liemo nanga ungu-mane silioma pilku liku tenge.

2
00:00:15,640 --> 00:01:00,640
Aku tenge kinie nane Tara enenga nimbu mawa tenjimbu kinie yuni Lipe Taponjipe Konopu Enge-sinjili te-lupe ‘Ene-kinie kamu tapú-topa molopili!’ nimbe akumu ene simbe. Yu Ungu-Sikema Lipe Ora Sili Minimu. We-yambomane yu naa kanoko yu naa pilimelemonga kanu yambomane yu yando manda naa lingí. Nakolo na lombili andolime, yu ene-kinie tapú-topa molemo-na enene yu pilku imbi silimele. Pe yu enenga konopumanga molombala.

3
00:01:00,640 --> 00:01:14,680
“Ene mundupu kelepo pupulie nimbumuni, nane ‘Ene-eneno ambolango-kolumuluma mele molangi!’ naa nimbú, mólo! Kelepo ene molongena ombó.

4
00:01:14,680 --> 00:01:29,500
Pe nondoko we-yambomane na kamu naa kanonge. Nakolo enene na kanonge. Na konde molopo mindi pulio-na ene kepe konde molko mindi pungí.

5
00:01:29,500 --> 00:01:45,200
Aku enamonga enene pilkulie, ‘Na Taranga konopuna sukundu molio mele kepe, ene nanga konopuna sukundu molemele mele kepe, na enenga konopuna sukundu molio mele kepe’ pilingí.

6
00:01:45,200 --> 00:02:18,100
Yambo te yu nane “Teai!” nilio ungu-manema pilipe molemo yambomo yuni na konopu monjilimo. Yambo tene na konopu monjilimo yambomo Tarane kanu yambomo konopu monjimbe. Nane kanu yambomo konopu monjipulie ‘Na pilipu molio mele pilipili!’ nimbu yu molombana ombo teluna kopu-tepo molopolie molio mele lipu ora simbu.” nirimu.

7
00:02:18,100 --> 00:02:46,000
Yesusini aku nirimu kinie ˻yu lombili andoli ye˼ ‘Judasi’ nili te, Judasi-Isikeriote mólo, Judasi te-lupe, yuni Yesusi yundu nimbendo: “Ailimu, nuni olio manjipu “lipu ora simbu.” nikinu, we-yamboma nambemuna “Naa lipu ora simbu.” nikinuye? Nambe-tekolie aku teniye?” nirimu.

8
00:02:46,000 --> 00:03:11,520
Kanu-kinie Yesusini pundu topa yu lombili andolimendo nimbendo: “Yambo tene na konopu monjimu liemo yuni nanga ungu-manema pilipe lipe temba. Kanu-kinie kanu yambomo nanga Tarane konopu monjipelie Tara kinie olto ‘Yu pea teluna molamili!’ nimbulu yu molombana ombolo.

9
00:03:11,520 --> 00:03:27,440
Na konopu naa monjilimo yambomone nanga ungu-manema pilipe lipe naa telemo. I nikiru pilkimili ungumu nanga mólo! Tarane na lipe mundurumu yemonga ungumu mindi.” ˻nirimu.˼

10
00:03:27,440 --> 00:03:33,420
Yesusini “Ene Konopu Pe Nipili Molangi!” Nirimu Temanemo

11
00:03:33,420 --> 00:03:38,100
“Na ene-kinie molopolie i unguma pali nilio.

12
00:03:38,100 --> 00:04:02,660
Nakolo na nondopo tembomonga Tarane Ene Lipe Taponjílimu yando lipe mundumbe. Akumu Mini Kake Telimu. Mini Kake Telimu yuni ene unguma pali mane-sipe nimbé; nane enendo nirindu unguma pali te komu singí kinie aku ungumu altopa nimbe simbe.

13
00:04:02,660 --> 00:04:59,140
“Na ˻ene nondopo mundupu kelepo pumbundu˼ “Ene konopu pe nipili molangi!” nimbu isili-ou nikiru. “Na konopu wayongo sipu molio mele ene konopu wayongo siku molangi!” nikiru. Nanga ungumu naa pilimele yamboma konopu wayongo silimele mele lupela; na konopu wayongo silio mele lupela. Nanga ungumu naa pilimele yamboma walse konopu wayongo siku walse mini wale munduku telemele. Nakolo ene na lombili andolime, “Na alieli konopu pe nipili molio mele ene alieli konopu pe nipili molangi!” nikiru kene ene walse kepe konopu umbuni tepili naa molko mini wale naa munduku konopu wayongo siku mindi molangi!

14
00:04:59,140 --> 00:05:23,700
“Nane ou nindumu ene piliengi! “Na ene mundupu kelepo pumbu. Pe altopo ene molongena yando ombó.” nindu piliengi kanumu. Tara yu olandopa na maniendopamonga enene na konopu monjilimelkanje na Tara molemona pumbumunge ene konopu silimelka.

15
00:05:23,700 --> 00:05:41,140
Nane enendo “Pupulie kelepo yando ombó.” nikiru ungumu pe wendo ombá kinie ‘ ‘Sike nirimu.’ ningu tondolo-munduku piliengi!’ nimbulie ou naa pupulie tembo mele enendo nimbu sikiru.

16
00:05:41,140 --> 00:06:13,180
“Ya ma-koleamo nokolemo ye-nomi ˻Setene˼ okomo-na nane pe ene-kinie ungu aisili altopo naa nimbú. ˻Na mana molombo walemo pora nikimu. Yuni na ‘Toko konjengi!’ nimbe okomo˼ nakolo na naa nokolemo-na uluri we manda naa temba. ˻Nane ‘Yuni na uluri tepili!’ nindu liemo na manda temba. We manda naa temba.˼

17
00:06:13,180 --> 00:06:36,660
Nakolo ‘ ‘Mana-yambomane pali na Tara konopu monjilio.’ ningu piliengi!’ nimbu Tarane nando “Tei!” nirimu ungu-manema pali pilipu lipu tembo.” ˻nimbe Yesusini nirimu.˼ ˻Aku nimbelie˼ “Manda nikiru kene kinié pamili wai!” nirimu.