1
00:00:05,000 --> 00:00:43,460
(Pulu Yemonga ungumu. Kolomongo-kanga wane-tutolo.) Yesusini yu lombili andolimendo aku unguma nimbe pora sipelie nirimumuni, mulú-koleana olando-sipe kanopalie nimbendo: “Tara, nane tembo ningu panjirinu walemo wendo okomo. Nuni yambo sirinu yamboma enendo pali nane ‘ ‘Konde molko mindi pangi!’ nipili!’ ningu, nane mana yamboma pali ‘Nokopili!’ ningu, nunge Marena namba sirinu kene nunge imbi ‘Ola molopili!’ ningu nunge Marenanga imbi ambolko ola linjiyo!

2
00:00:43,460 --> 00:01:09,540
“Konde molko mindi pungí mele i-sipe: ‘Nu telumu mindi sike Pulu Yemo.’ ningu pilku, ‘Na nuni ‘yamboma nokopa konjimbe ye te lipu mundumbu.’ ningu mako tokolie na liku mundurunu ye-nomi-Kirasimu.’ ningu pilku, olto pea tapú-toko molemele molonge yamboma konde molko mindi pungí.

3
00:01:09,540 --> 00:01:18,140
Nuni kongono na sirinu kanumu tepo pora sindumuni nunge imbi ambolopo ola linjindu.

4
00:01:18,140 --> 00:01:42,520
Tara, ma-koleamo wendo naa opili nu pea molambili na imbi ola molopa tondolo pupili molorundu kanu-mele ‘Kinié na pea kelepo molambili!’ ningu ou molorundu mele ‘Kelepo na aku-sipe imbi ola molopa tondolo pupili pea molambili!’ ningu tei!” ˻nirimu.˼

5
00:01:42,520 --> 00:02:04,520
“Mana-yambomanga nuni sirinu yema enendo nu tondolo pulino mele kinie, paa olandopa moleno mele kinie, nimbu para sirindu. Ou ene nungema moloringi, pe na sirinu. Ene nunge ungumu pilku liku teko moloringi mele molemele.

6
00:02:04,520 --> 00:02:35,660
Nuni nando nirinu unguma nane enendo nimbu sirindu kinie, enene kanu unguma pilku likulie nu molorununa wendo orundu pilku konjikulie ‘Nuni na sike mana liku mundurunu.’ ningu tondolo-munduku pilkulie aku-siku teko moloringi-ne kinié mélema nuni na sirinu mélema pali nu molenona wendo olemo enene pilimele.

7
00:02:35,660 --> 00:02:55,820
“Enenga nimbu nu-kinie ungu nimbu mawa tenjikiru. We-mana-yambomanga nu-kinie ungu naa nimbú, mólo! Nuni sirinu yema nunge yema molemele-na na enenga manjipu nu-kinie ungu nimbu mawa tenjikiru.

8
00:02:55,820 --> 00:03:08,780
Nanga mélema pali nungemo, nunge mélema pali nangamo. Nuni sirinu yema ene molko konjilimelemone na imbi ola molemo.

9
00:03:08,780 --> 00:03:56,120
Kinié na nu molenona okoromonga na mana-yamboma-kinie pea naa molemolo none tekemo. Nakolo yema ene mana-yamboma-kinie molemele mele molonge. “Tara Kake Telimu, na nu molonine ombó kinie na sirinu lombili andolime ene-eneno mana yamboma pea molonge kinie ‘Olto yambo telumu mele molopo konopu teluna pupili molembolo kanu-mele na sirinu lombili andolime ene aku-siku yambo telumu-mele molko konopu teluna pupili molangi!’ ningu nunge tondolo na sirinu akumuni ene nokoyo!

10
00:03:56,120 --> 00:04:31,300
Na ene pea molorumulu kinie nunge tondolo na sirinu akumuni nane ene ‘ulu te naa tepili!’ nimbu nokorundu. Nane ene tápu terindu kinie te ulsu pupe yamboma mindili nonge koleana pulimo aulkena naa purumu. Ye telumu mindi, nunge boku tonjiringi ungu te wendo ombándo yamboma mindili nonge koleana pumbe telemo yemo mindi ulsu molopa mindili nombá koleana pulimo.

11
00:04:31,300 --> 00:04:50,540
“Kinié nu molenona okoromonga na konopu sipu kamele akopo molio ‘Aku-mele ene aku-siku konopu peanga panjiku molangi!’ nimbu ou na olando naa ombolie ya ma-koleana molopo i unguma nikiru.

12
00:04:50,540 --> 00:05:17,400
Nunge ungumu ene sipu pora sirindu. Na ya ma-koleamonga ye te mólo, aku-siku ene ma-koleamonga yema mólola! Oltonga yema molko oltonga ungu-manema pilku liku telemele-na mana-uluma manjiku pilku telemele yambomane ene konopu keri panjiku ene-kinie opa-touma molemele.

13
00:05:17,400 --> 00:05:41,700
‘Ene ma-koleana wendo li!’ nimbu mawa naa tekero. Nakolo ‘ ‘˻Ya mana oltonga kongono tenjiku molonge kinie˼ ulu-kerimenga pali ulu-pulumu pelemo ˻kuru˼muni ene kondi topa tepa naa kenjipili!’ ningu nokoi!’ nimbu i enenga nimbu mawa tenjikiru.

14
00:05:41,700 --> 00:05:49,200
Na ma-koleamonga yemo naa molio mele ene ma-koleamonga yema naa-la molemele.

15
00:05:49,200 --> 00:06:00,140
“ ‘Ungu-sikemone ene nunge manjiku molko ye kake telime molangi!’ ningu teyo! Nunge ungumu ungu-sikemo.

16
00:06:00,140 --> 00:06:08,040
Nuni na ma-koleana liku mundurunu mele nane ene ma-koleana lipu mundurundula.

17
00:06:08,040 --> 00:06:22,000
‘Ene konopu kake tepili molko nunge ningu manjiku molangi!’ nimbu na ‘konopu kake tepili nunge nimbu manjipu molambo!’ nimbu molio.” ˻nirimu.˼

18
00:06:22,000 --> 00:07:16,580
“Tara, nane nanga lombili andolimenga manjipu mawa naa tenjikiru. Pe enene ungu ningu singíme ‘Na sike nunge Malo ya mana liku mundurunu.’ ningu tondolo-munduku pilingí yambomanga kepe mawa tenjikiru. ‘Nu nanga konopuna moleno, na nunge konopuna molio mele aku-siku kanu yamboma pali yambo telumu mele konopu teluna pupili molangi!’ nimbu aku-sipu enenga mawa tenjikiru. ‘Ma-koleamanga yambomane pali ‘Nuni na liku mundurunu-na orumu.’ ningu tondolo-munduku piliengi!’ nimbu ‘kanu yamboma olto-kinie yambo telumu mele konopu teluna pupili molamili!’ nimbu aku-sipu mawa tenjikiru.

19
00:07:16,580 --> 00:07:34,600
Nuni na ‘Imbi ola molopili!’ ningu sirinu ulumu nane ene sirindu. Akumu ‘Olto konopu teluna pupili molembolo mele ene aku-siku konopu teluna pupili molangi!’ nimbu ene sirindu.

20
00:07:34,600 --> 00:08:15,740
‘Ene paa kamu konopu teluna pupili molangi!’ nimbu aku-sipu “Nu nanga konopuna moleno mele na enenga konopumanga molambo!” nimbu mawa tenjikiru. Na konopu monjilino mele nanga ungumu ‘Sike.’ ningu tondolo-munduku pilimele yamboma aku-siku konopu monjilino mele kepe ‘nuni na liku mundurunu mele kepe, ma-koleamanga pali yambomane piliengi!’ nimbu nane aku-sipu nu mawa tepo ‘Ene paa kamu konopu teluna pupili molangi!’ nikiru.

21
00:08:15,740 --> 00:08:34,880
“Tara, ‘nuni na yambo sirinuma na molombona pea molopo, mamo ou naa teambili na konopu monjikulie ‘nanga imbi ola molopa pa tepa tondolo pupili!’ ningu sirinu akumu kanangi!’ konopu lekero.

22
00:08:34,880 --> 00:08:51,900
“Tara Sumbi Nilimu, sike we-mana-yambomane nu naa kanolemele nakolo nane nu kanolio, yambo nanga ungumu pilku limelemane ‘Nuni na liku mundurunu-na orundu.’ ningu pilimele.

23
00:08:51,900 --> 00:09:38,860
Nane nu moleno mele ene nimbu sirindu. Pe nimbu sipu molombola. ‘Nuni na konopu monjilino mele ene-eneno aku-siku anju-yando konopu monjengila! Na enenga konopuna molambola!’ nimbu aku-sipu nimbu sílie-sílie tepo molombo.” nimbe Yesusini Pulu Yemo-kinie aku-sipe nirimu. Yesusi aku-sipe Pulu Yemo-kinie nimbe pora sipelie nirimumuni, ipu lepili yu kinie yu lombili andolime kinie aku koleamo munduku kelko No-Kirone nekendo unju-ollipi ponie lerimuna suku puringi.