\id JHN
\h Waani Iyoteria
\mt2 Riosi Kaaweruma Tuuyewari
\mt1 Waani
\mt2 Iyoteria
\c 1
\s Riosi Naera tijoe tijoetukame
\p
\v 1 Kúíra, yomatiame wehjoarichi mochikame tiꞌtijoe, ooweru kukuchi tiamé. Neeea Waani tewaniamepua, piiripi puuu Eesusi ajawaria, Riosie Weratiame weratiamenia. Ihji noꞌo iyoterichio, taamo teꞌpa kahtiame Noonochi simiyame nayewamania, aachin teereriopua iꞌka weeechi eenariao. Paikapioi nayewama neeea, ihtana yooraka oikame Eesusio, iꞌka wehjoarichi mochirachiopua.
\p Wee, iꞌwa oꞌinemania paikapioi taamo Noono teꞌpa kahtiame, noꞌo pahteteria. Ihji noꞌo iyoteri chiiaa, ihjipua:
\p Pukeri oꞌiniao keꞌchukoipua iꞌka wehjoarichio, Riosi tiiariraa ahjaka yasariai puuuapa, puuu tiiarirachi kahtiamea, Naera tewaniame enerepua. Puuu Naera tewaniamea, Riosi teꞌta tiiarirachi teerewaeme enerepua; puuu teꞌta tiiari Naeraa, Apoe teꞌta Riosikai teererepua.
\v 2 Puuu Tiiari Naeraa, waꞌapitia kahtiame enekamepua Riosichio, Riosi tiiarichi teerekao.
\v 3 Riosia pukae teꞌta tiiarichi tiiame Naeraeo, yooma ihtaoi iintuame enepaterepua; yooma ihtaoi iintuamea, piiripi ihtaoi kiꞌtiamepua, ki pukae enepatetiamea, Naerae.
\v 4 Pukachi Naera tiiarirachio, teꞌta ahjari teereniame enerepua, tiꞌtijoerichi tahjiame enerepua, puuu tiꞌtijoerichi Tahjewaria tiꞌtijoeri pahtepatiame puuua; yooma tiꞌtijoe ooweru tiame iꞌka wehjoarichi mochikameo, taamo Noono Riosichi simiyame pahtemichiopua.\fig |123-cn01886B.tiF|col|||Eesusi tiꞌtijoeri tahjepawaa, Riosichi simiyame pahtemichiopua.|1:4\fig*
\v 5 Puuu Pahtewari Tajayamea, iꞌka wehjoarichio, tiꞌtijoeri tukapachi mochitoamechi eenarepua. Puuu tukaparia kaꞌchi iika choꞌwakamekopapua puꞌka waꞌa eenakame Tahjewario, puuu Tahjewaria waꞌapi tiiamepua tiꞌtijoerichi tahjewakao.
\p
\v 6 Puꞌka taawechiami puꞌka Pahtewari Tajayame tukapachi teꞌteriamechi eenoio, piirechi Waani tewaniame ki neee, yasariaipua, Riosie uhjuratiame.
\v 7 Puuu Waani Riosie uhjuratiamea, puꞌka Pahtewari Tajayamechi simiyame nayewekamepua, aatanakoo puuu Pahtewari Tajayamea. Puuu Waania tiꞌtijoerio, puꞌka Pahtewari Tajayamechi paparanurekapua, keepuka pichikemichiopua puꞌka Pahtewari Tajayame chiiao.
\v 8 Waꞌa tiiachio Waania, ki puuukamerakai enerepua, Pahtewari Tajayamea. Puuua tiꞌtijoerio, oowera Pahtewari Tajayamechi simiyame nayewemia eenakame enerepua, aatanakoopu Pahtewari Tajayamea.
\v 9 Puuu teꞌta Pahtewari Tajayamea, iꞌwa wehjoarichi eenakamepua yooma tiꞌtijoerichi tahjepamia, Riosichi simiyame pahtetemia.
\p
\v 10 Puuu Pahtewari Tajayame iꞌwa wehjoarichi eenakamea, Riosi Naera puuua, Riosi inataka naewamia. Nape puꞌka taawechiami tiꞌtijoeria, puꞌka Riosi Naerao tewekachi oꞌinia eenakameoipua ahpo weee neteriachio, ki machika tetewarepua puꞌkao, apoe iintokamekoipua, yooma ihta weeechi iintuame netekaopua.
\v 11 Ihjia, ahpo weeechi eenakame eneriaipua, apoe ahpo neteriachi, nape weeechi mochikame tiꞌtijoeria, apoe iintokamekoipua yooma ihta itapiti iintuame netekao, kiisi nakika tetewarepua puꞌkao.
\v 12 Nape muuwaeme tiꞌtijoeria ki waꞌa erakoka tetewarepua puꞌka teꞌta Pahtewari Tajayameo iꞌka weeechi eenakameo. Nape teꞌta apoe iꞌwa wehjoarichi eenakamea, kaawe uuka ahpo tetewikameo, ahpo chiia pichikekameopua tiame, Riosia ahpo tatanara enepaterepua puꞌkao.
\v 13 Ihji Riosi tatanara enepatetiamea, ki ooweruchi naawamekapa Riosi tatanara tiiamepua, Riosie uutiamekapa Riosi tatanara puuua.
\p
\v 14 Puuu taamo Noono Riosi tiiaria ahpo Naerao, tijoe iintapamo eraparepua puꞌkao, iꞌka weeechi oimichiopua ahpo eꞌrari naewatukao. Pukaepa oowitiamechi naawaterepua puꞌkao, iꞌka wehjoari mochiwachiopua. Waꞌa iika Riosi Naeraa, tijoetusaapa tamochi yaajatokamepua, teꞌta apoeche Riosi Taanarachitia. Iꞌkao teemea, Eesusi ajawariaa, maꞌchiame tetewamepua, Riosi tisiwarichi oꞌinia eenakamekopua puꞌkao, ki nuꞌunti Riosi utewari yachatoka. Puuua iꞌka weeechi oiaio, iꞌka weeechi mochikameopua, tísia ahpo nakiya tetewiterepua, kihta wihtuki nayewaka, teꞌta Riosi pichiwarichi simiyameche nayewasika.
\v 15 Waika taawechiami Oorani akichiko oikame Waania, tiꞌtijoeri paatokao, puꞌkachi naewaka cheekame puuuai cheekao:
\p —Ihji Eesusipua, puuu tapanara noꞌo nayewaka cheeriaa noꞌo neipa enamio tuukao, puuua epeche weruma teerewi iinuemeko tuuriaa ki noochitiao, ihji tijoea keꞌchu noꞌo kiꞌtioio, ki ehpesi oꞌinia yasariamepua waꞌasi.
\p
\v 16 Ihji Eesusi Riosi Tijoetukamee, kiatiame teemea teꞌta kaaweruma teerepuamepua Riosichio, taamoo senepi taawechi piipatesipuameopua, tatakorisiwaopua taamoo.
\v 17 Puꞌka ehkoriami animari manaka kosotiamea, Moise nuurari yoorakao tatakori ahpo cheriwepuawichioo, kihta tatakori kokosarira natetekamepua. Nape Riosia tísia taamo nakiyapao, ahpo teꞌta Taana mukirae nateteterepua taamo tatakori kokosapuameopua. Waꞌa tiiachipa tatakori cheriwewaa, Eesusi iintoriawichioe, kianiame teemea Riosieo.
\v 18 Riosio, aaataai ki tetewamepua puꞌkao. Apoe Riosie Tijoe Tijoetukamechiche tetewiniamepua. Waꞌa tiiachio ihji Eesusia, apoe taamo Noono Riosi waꞌapikaitepua, tijoe weerewaeme enepakame.
\s Waani Paatoamera, Eesusi Riosie Weratiame nayewanipua
\r (Maateo 3:11-12; Marako 1:7-8; Ruuka 3:15-17)
\p
\v 19 Waaniai paatoka oiaio, maꞌchiame ahpo kaꞌitakame puuua, ki apoeko tuuka Riosie uhjurapo tuutiameo. Waꞌa cheekame Waania ahpo kaꞌitakao, piie taawechi iꞌisaeri yaꞌyawichieo iinatuketiao aatanakoopua ahpoo.\f + \fr 1.19 \ft iꞌisaeria uurio tiꞌtijoeri cheeka chaniwame tiame.\f*
\v 20 Waania puꞌkao, maꞌchiame cheeka nehjiakamepua cheekao:
\p —Kaꞌi, ki Riosie Weratiame neeea, Riosi apoe uhjuramo tuuriao, Meesia tewaniameo.
\p
\v 21 Waikao uhjuratiamea, eenechi iinatukekao, chaachapakapua:
\p —¿Aatanakamera muuua naaju? ¿Ki Eeriatarukosamua naaju, puuu eenechi ahjakame?
\p —Kaꞌi, ki puuu neeea —cheeka nehjiaka Waania.
\p —¿Ki muuukosapua naaju Eeriaa, Riosi naewatura teꞌta uhjurapo tuutiame?
\p —Kaꞌíí, piirechi neeea ki puuu —cheeka nehjiakapu Waania.
\p
\v 22 —¿Aatanakosa muuua naaju? ¿Aatanakoti muuua? Taamo tuuyepuapua, waꞌa taamo chaachapamichio taamo uhjurariao.
\p
\v 23 —Neeea aaatapua, wahka siinachaniame ihkepaka, puuua wahka ooruchi cheechaniame: “Kaaweruma pooe wahjonamitia eemea, aamo iikachio, puꞌka teꞌta taamo Paamirao amochi eenaka pakimichiopua, aamo iikachio.”
\p Waꞌa cheeka nehjiaka Waania, ahpo iinatukeka uhjuratiameopua. Puuu waꞌa cheeka nehjiatiamea, ehkoriami oꞌinia, waꞌa cheepo tuutiamepua Isaiaeo, Ehkoriami ahpo Iyoterichiopua.
\p
\v 24 Waikao paꞌpariseroe uhjuratiamea,
\v 25 chaachapakapua Waanio:
\p —¿Achinikai paatona muuua waꞌa teeresoo, ki Riosie Weratiame enesaa, Eeriaoi ki muuu enesaa, Riosie uhjuratiameopua, aaataoi Riosi nayewaturao?
\p
\v 26 Waania waikao chaaneka nehjiakapua:
\p —Neeea ki aaata werumakaitenia, oowera neeroie paatoame neeea. Nape amochio oiyaitepua aaatao, puꞌkao ki machiyame eemea pehjio, puuua ahpo Riosiwarie paatomeri puuua, ki neeroiye.
\v 27 Puꞌkaonia kakajoyaraoi ki nateyamenia noꞌo naꞌsonemiao, noꞌoo, neipa naawakamekoipua puꞌkao.
\p
\v 28 Yooma iꞌka waꞌatiame teerekame Wetania tewaniame mochiwachiopua, Waanio, Oorani akichi paonamina paatoka kahtioiopua.
\s Eesusia, Riosie Poꞌwachitia teteiwame
\p
\v 29 Puꞌka meerekachio Waani Paatoria, waꞌana ihtoame tetewapa Eesusio, cheekapua:
\p —Nee, waꞌana ihtoame puuua, Riosieo poꞌwachitia tetewiniamea, taamo tatakoriwichio pejana oowewapuame. Puuupua, teꞌta taamo pejana mukimeria, yooma taamo tatakorieka mochikao, natetekao.
\v 30 Ihji puuujupua, noꞌo tapanara cheeriao, noꞌo neipa naawakameoipua, ki nuꞌuti tiiari iinuemekai tuuriaa, puꞌkao keꞌchu noꞌo naaoio, ki kuꞌitapisi yasariameko tuuria.\fig |124-WA03813b.tif|col|||Waani Paatoria Eesusiko tuunapua, taamo tatakoria pejana mukimerio.|1:30\fig*
\v 31 Neee waꞌapiai ki naneꞌriamekainia, aatanakoopua enemerio, nape waꞌa tiiai neeea, neeroiye paatosiameainia iꞌisaerio, iꞌka enameri eenachisio.
\p
\v 32 ’Nape ehpeonia Riosi Riosiwario kooroka tiame ahjachi tekikopao Eesusichio, maꞌchiame machikamenia puꞌkao, puuukoopua.
\v 33 Neeeai ki naneꞌriamekainia aaata enamerio; nape apoe noꞌo uhjurakamea, neeroiye noꞌo paatonurekaipua tiꞌtijoerio, puuua noꞌoo, eee noꞌo chaanekamekaipua tiameo: “Aaata Riosi Riosiwari ahjachi tekikameo, puuu enemerikopua apoeo, Riosi Riosiwarie paatomerikoopua, tiꞌtijoério.”
\v 34 Neeea puꞌka waꞌa tiiameo tetewikapao, puuuko tuuyamenia weeechi uhjuremo tuutiameo, puuuo puꞌkaonia, Apoe Riosi Taanarakotinia, Apoe weeechi tijoe tijoetukame.
\s Pukeri simiyame Eesusi maꞌmasitewara
\p
\v 35 Eenechi meereo waꞌapi waꞌao, Waania ooka ahjama weeriaiopua ahpo masitia,
\v 36 ahpo weeriachiami uꞌmatoi Eesusio, cheekapua:
\p —¡Nee, waami ihtona Riosi Poꞌwa teewataniamea, taamo pejana mukimeria!
\p
\v 37 Waikao masiteraa, naꞌpa Waani ahjama ajakamea, waꞌa chiiame inamukapaopua ahpo masitari Waanio, naꞌpahka naꞌnaritokapua Eesusio, waꞌamio.
\v 38 Eesusi ahpo pukamina nokisiopao, kuꞌrika neꞌnepakao, iinatukekapua:
\p —¿Ihtana erakotona eemea noochio?
\p Waikao aapoeo chaachapakapua:
\p —Masitari, ¿akana checherepame muuua?
\p
\v 39 Waikao Eesusia chaanekapua puꞌkao:
\p —¿Naneꞌrenare eemea? Nahpeo naaju, naneꞌretai noꞌo checherepachio.
\p Ahjama siimpakapua waikao checherepachio. Nape tísia aarikopa waꞌasio, waꞌa cheꞌrepatiapua waikao Eesusi checherepachi.
\p
\v 40 Piiripi puuu ooka Eesusi naꞌnaritokamea, Anteresikapua, Siimoni Peeroo poonira, Waanio puuua chiiame inamukame, Riosi Poꞌwa teewataniameko tuuyame Eesusio.
\v 41 Waꞌa cheꞌrepasaopua puꞌka meereo, keꞌchu ihta yooraiopua pehjio, ahpo paꞌchi Siimoni Peero iꞌyamia akipakapua. Waikao Siimoni tewisaapua, chaanekapua:
\p —Tewakame teemea Riosie Weratiameo, puuu Riosi uhjuramo tuuriaa, puuua Apoe Meesia.
\p
\v 42 Waꞌa chaanesaapua, Eesusi kahtiachi upatiapua. Eesusia Siimonio, ahpo kahtiachi upatiame tetewapao:
\p —Kúíraa —cheeka teepotesaapapua, chaanekapua— Siimoni teewaeme muuua teꞌta teewarao, Waani taanara, nape neeea Seeja aamo tewamania.
\p Ihji Seeja chaniwamea, Peero chaniwamepua rieko naewaniachio.
\s Eesusia ahpo ahjama oojomichio paajutenapua Eeripeo, Natanaériopua tiameo
\p
\v 43 Eenechi meereo Eesusia, Arirea weeechiami oinarepakapua. Waꞌami nokisinioi pooechio, Eeripe natepatiapua. Waꞌa tetewikapa Eeripeo, chaanekapua:
\p —Nahpe noꞌo ahjama, noꞌo ahjama oitai.
\p
\v 44 Ihji Eeripea, Weꞌsaira mochiwachi ohjoeme eneriapua, Anteresi ohjoekachiopua Peero tiame.
\v 45 Waikao Eeripea Natanaéri iꞌyamia simikapua. Natanaéri tewisaapua, chaanekapua:
\p —Eesusi Nasare ohjoeme natepaka teemea Oose taanara. Iꞌka Eesusi nayewaka cheeriai Moiseai ahpo Iyoterichio, aaata naewakaoopua, ehkoriami Riosi nayewaturaa, waꞌachi chaachapakamepua tiameo ahpo iyoterichio.
\p
\v 46 Natanaéria waꞌa tiiame tuuyetiaapua, cheeka nehjiakapua:
\p —¡Aa Nasare? ¡Naakonakosa puuua? ¡Aaata kaaweruma machenamii teeerepua waꞌa?
\p Eeripea chaanekapua:
\p —Nahpeo naajuo, amoe waꞌapi tetewitai.
\p
\v 47 Waikao Eesusia, ahpo kahtiachiana tetewapa ihtoame Natanaério, chaanekapua puꞌkao:
\p —Néé, waꞌana ihtona isaeri tijoe, tísia kaaweruma, kihta aꞌchi tiiame wihtuniameo.
\p
\v 48 Waꞌa chaanetiao Natanaéria, chaanekapua Eesusio:
\p —¿Achini ihsika noꞌo machikamemua?
\p Eesusia chaanekapua waikao:
\p —Neeea keꞌchu Eeripe aamo noochi enanurioio, chuunatere kahtiame aamo tetewikame neeea.
\p
\v 49 Natanaéria, chaanekapua waikao:
\p —¡Aa muuua, Apoe Paamirakaitemua waꞌa teesoo, Apoe Riosi Tijoetukame! ¡Muuúa, isaeri yawichiwaramua, teꞌta enameriko tuutiamera!
\p
\v 50 Eesusia waꞌa chaanetiapao, cheekapua:
\p —¿Muuua chuunatere aamo tetewario tuuriamekopa, waꞌa eꞌramemua noochio? Muuua noꞌo ahjama oiyame enesaa, epeche tiiame tetewimamua, noꞌoo aamo tetewitemia.
\p
\v 51 Waꞌa cheesaapa Eesusia, yooma ahpo paajuteriao, chaanekapua:
\p —Pichiwa chiiamenia iꞌkao, eemea tewekachio, wahjokame tetewimiitepua, Riosi tewekachi kuꞌkuiwario, noꞌo Riosi Tijoetukamechi tetekisika, eenechi tewekachi mooenapame.
\c 2
\s Eesusi iintoria Kaanani mochiwari aaata nenewinioio
\p
\v 1 Paika taawechi simiyachi Kaanani tewaniachio, nenewiwa enekapua waꞌao, ookapi mochiwachi Arirea yeꞌkarirachi. Waꞌa ihsiapu tiame, Eesusi yeeyeraai.
\v 2 Eesusia ahpo masitera ahjama, paajuteretiapua tiame waꞌa nenewiwachi.
\v 3 Eesusi yeeyeraa, wahjipasoopa wiinoo, ehpeche nakiniamekoopa wiinoo nenewiwachio, chaanekapua Eesusio:
\p —Sooparetupa wiinoapa.
\p
\v 4 Eesusia nehjiakapua waikao:
\p —Yeꞌye, ¿ihtana noꞌo iintojeraka chiiamemua waꞌa cheekao? ¿Eenechi iintujeraka chiiamemua wiinoo? Ki asiyame neeea pehjio, waꞌa iintomiachio.
\p
\v 5 Ihji yeeyeraa waꞌa chiioio, chaanekapua waꞌa nokayameo naachutakao:
\p —Eemea oowera eꞌwemitiachepua puꞌkao chiiao.
\p
\v 6 Waꞌa ajariapua tiame puhsani sikori, tehte netetiame. Puuua neeroi ahjachi toaniame piipaniamewichio eneriapua, isaeri tiꞌtijoerio. Pipiripi puuu sikoria, piire siento ritiro ahka uuyame eneriapua.
\v 7 Nape waꞌa cheekai Eesusia, chaanekapua puꞌka naachutameo:
\p —Neeroiye pochiwamitia naaju puꞌka weeweruma tehte sikorio, eeme naachutamea.
\p Waikaopu puuu naachutamea pochiwakapua puꞌka sikorio, póóchikame. \fig |125-CN01667B.TIF|col|||Eesusia neeroiye pochinurani tehte sikotatiame.|2:7\fig*
\v 8 Waꞌa noonowisoopua puꞌkao, Eesusia chaanekapua puꞌkao:
\p —Ehpeo kuꞌwita itusao, pahko paamiratuame iꞌyetomitiapua.
\p Waikao waꞌa ikiretupua.
\v 9 Waikao puuu pahko paamiratuamea, ki naneꞌrekaopua achini teereriopua wiinoo, naachutameche naneꞌreriameopua, yenasaopua puꞌkao, chaanekapua puꞌka waꞌa neewiameo:
\p
\v 10 —Ahkaoi pahcha naachutaniame wiino epeche taꞌyameraa, neipa tehpe iijinioi nanachutaniame wiino ki teꞌta taꞌyameraa, nape muuua, neipawichio katewekamemua puꞌkao.
\p
\v 11 Waꞌasa iintoka Eesusia Kaanani tewaniachio, Arirea weeechiopua. Puuu ki maaenaria pukeri pahcha simiyame iintoriamekapua, puuu iintoriaa ahpo aatanako neꞌnetiamekapua. Pukachipa masiteraa, epeche pichiwa tewekachi oꞌinia eenameko, erapakapua waikao.
\p
\v 12 Neipao, nenewiwa uꞌmatosoopa waꞌasi Eesusia, Kapenaumi siimpatiapua waikao, Eesusi yeeyera ahjama, poponira tiame; waꞌao, ookapi taawe mochitiapua.
\s Eesusie ujumaputiame tiopachio, ki kaꞌkaruma tiꞌtijoeo
\r (Maateo 21:12-13; Marako 11:15-18; Ruuka 19:45-46)
\p
\v 13 Amori asiyachi Semejenato pahkoopa, Eesusia taamo ahjamao, Eerusarenite moꞌmoenatiapua.
\v 14 Eerusareniopa tiopachio Eesusia, waꞌa tiopachio ki ookapi tewakapao weeka itapiti nehjameo, oisi, poꞌwa, kooro, waꞌa ikisa toomi naakuriwame tiaméo tiꞌtijoe.
\v 15 Waikao Eesusia wepijoera netesapaopua, yooma weweka puuyanakapua, waꞌa mochikameo nehjakaopua, puꞌka puhkura oisio poꞌwaopua tiamé, yooma maꞌchi uhjurakapua puꞌkao, wiꞌwiyaka. Puꞌka waꞌa toomi naakuriameo, yooma ruꞌminekapua meesao, toomiopua tiameo yooma wiꞌsunekapua wehchio, chiꞌrineka.
\v 16 Puꞌka kooro nehjame naaepakao, chaanekapua:
\p —¡Yooma puuyanamitia iꞌka iꞌwao! ¡Kaꞌte weruma itapiti nehjiwachi iintamitia eemea, noꞌo Noono kariwarachio!\fig |126-LB00316.TIF|col|||Eesusi ahpo Noono kariwarachio, yooma wepaka ujumapuna.|2:16\fig*
\p
\v 17 Waikao masiteraa, inatepare puuuapu puꞌka Ehkoriami Iyoterio, chiia: “Noꞌnóo, ki tisiwa nuꞌnuti waꞌinaka tetewamenia kahtine, kariwao.”
\p
\v 18 Isaeri yaꞌyawichia, chaanekapua nekakoka:
\p —¿Aatana puuua, aamo waꞌa ihsitiamea? Yorasao naaju, ihtaoi itapiti Riosichi eename, taamoo aamo tetewimichioo, pichiwa Riosichi eenamekoo.
\p
\v 19 Eesusia nehjiakapua puꞌkao:
\p —Ruꞌmisoo iꞌka tiopao, neeea, paika taawechi weramania eenechio.
\p
\v 20 Waikao Isaeri tiꞌtijoea chaachapakapua puꞌkao:
\p —Ooka weerewa aampa puhsani paamupari ariwatiameoi iꞌka tiopa weerakao, ¿muuua, paika taawechi waꞌapiche werataremua eenechio?
\p
\v 21 Nape Eesusia, tiopa naewakao, ahpo waꞌapi weerewa naewaka cheeriapua.
\v 22 Waikao teeme Eesusi masiteraa, inatepakapua keꞌchu oijenaio waꞌa cheeriaopua Eesusia; waikao teemea, pichiwapu puuu Ehkoriami Iyoteri chiiaa, erapakapua; waikaopua tiameo, pichikeka teemea, Eesusi taamo masiteriao.
\s Eesusia yooma machiyamepua, aatia tiiamekopua iikachio
\p
\v 23 Eerusareniopa, Semejenato pahkochi Eesusio, muuwaeme pichikerepu puꞌkao aatanako, apoe ki ookapi ki maaenari yooramekopua, itapiti.
\v 24 Nape Eesusia, ki pichiwako erapakapua puꞌka chiiao, machiyapa aachin erakoamekopua puꞌkao.
\v 25 Puuua ki tuuyeniai naneꞌriamepua aatanakamera apochi paparamekopua, machiyamekapapua ihtana inatamekopua ahpo iikachio.
\c 3
\s Eesusi Nikoremo tiame
\p
\v 1 Waꞌao yasariaipua tiame piiripi tijoe, Nikoremo tewaniame, parisero tijoe enepakame.
\v 2 Ihjia, tukao eenakaopua Eesusi kahtiachio, chaanerepu:
\p —Masitari, naneꞌrena teemea, taamo masitemichio uhjuratiameko, Riosieo. Kiꞌtepu aaataaio, aamo yooraria yooramea, ki ahjachi yasisoo Riosio.
\p
\v 3 Waikao chaanerepu Eesusia:
\p —Ki waapisi noochi eename eꞌraka, aamo chaanenania iꞌkao, pichiwa kiisi sewina tiame ihjia, ki eenechi naawakamea, kaꞌchitia muimapua Riosi yeꞌkarichio.
\p
\v 4 Nikoremoa iinatukerepu waikao:
\p —Nape, ¿achini iika tijoetuta teeme eenechi, oochetiameapa? ¿Achini iika ahpo yeeyechi pakika, tijoetuta teeme eenechi?
\p
\v 5 Eesusia nehjiarepu puꞌkao:
\p —Kiisi sewina tiiamepua puꞌkao. Ki oowitiame yeeyechi tijoetukao, Riosi Riosiwarichi tijoetukamea, kaꞌchi iika machimapua Riosi yeꞌkariwao.
\v 6 Tijoechi tijoetuyamea, tijoepua; Riosi Riosiwarichi tijoetuyamea, Riosi Riosiwarichi ihchiamepua, ahpo naawariao.
\v 7 Kaꞌte kaꞌchitiachitia tetewa muuua iꞌka noꞌo chiiao: “Weemera tijoetumerimua, eenechi.”\fig |127-GR-gn24n.tif|col|||Eesusia Nikoremoo, weemera ahjarichi simiyame tuuyena.|3:7\fig*
\v 8 Eekaka tiiame puuua, ahka kahtioio ki teteiwame; ahkaminaoi simiyoi ekayo, ki tetewamemua puꞌkao, nape ki tetewaiopua eekao, amochi saayamepua ekayoo. Waꞌachi teeka saaeniamepua tamochio, Riosio taamo eenechi naawatekame enesoopua, ahpo Riosiwarieopua.
\p
\v 9 Nikoremoa, chaaneriapua eenechi:
\p —Kiisi pahtenania puꞌkao.
\p
\v 10 Eesusia chaanerepu waikao:
\p —Nee, muuua isaeri masitarikai, ¿ki pahtiamemua?
\v 11 Kiisi seꞌwi noꞌo chiiaa, pichiwarichi simiyamea. Neeea noꞌo Noono tewekachi ahjamao, teemea aamo iꞌka weeechi mochikameo, tewekachi simiyame itapiti chaachapamepua, naneꞌriamekapa teemea, teꞌta pichiwarichikamera simiyamekopua puꞌkao. Nape eemea, kiisi pichikenariamepua puꞌkao, taamo chiiao.
\v 12 Ki noꞌo pichikiame enesaamua, iꞌka weeechi iintuame aamo nayewiao, ¿achini iika pichiketa muuua, teꞌta tewekachi iintuame aamo noꞌo nayewiao?
\p
\v 13 ’Aaataai teꞌta tewekachio ki mooenamepua, naatiche puuua, teꞌta tewekachi oꞌinia eenakameche, teꞌta tewekachi Riosichi teereka yasitoameche, ehpe taawechiamio puuua, weeechi tekika tijoe tijoetukame.
\v 14 Yepowechio, waꞌachitia Moise apechunarichitia siinowe tetewipuawichioo, waꞌachitia apechunaniame tetewipuame neeeai Tijoe Tijoetukamea. Waikao yooma noochi paparakamea, saupukame itipimapua ahpo tatakoririao.
\v 15 Waꞌa iikoopua, yooma puuu noochi paparakamea, ki wahjiamesi ahjari teꞌteremeri puuua, ki wahjipaka oosa simiyame wahjiparichiopua.
\s Riosi nakika kahtia yomatiame wehjoarichi
\p
\v 16 ’Noꞌo Noono Riosia tísia nakikamepua weeechi mochikameo, ahkasi ahpo piiripikoi ahpo Taanao, puꞌkawichio nehjakamepua, aaataoi weeechi mochikame ahpo Taanachi paparakameo, ki kokosari saaemichiopua noꞌo Noonoeo, ohso kaawe ki wahjiame ahjarikamera kiapuawichiopua.
\v 17 Riosia ahpo Taanao, ki aaata tiꞌtijoeri kokosamichio uhjuratiamepua iꞌwa wehjoarichio, ohso kaawe puuua, tiꞌtijoe ooweru tiame newipatemichiokamera, uhjuratiamepua.
\p
\v 18 ’Riosi Taanarachi pichikeka paparakamea, ki aiwatepuamepua Riosi kokosario; nape ki ahpo Taanachi paparakameo Riosia, ahpo kokosari aiwapuachi teerepakamepua waꞌasi, ki Riosi teꞌta piiripi Taanarachi paparakopa.
\v 19 Pukachipa aiwamerapua Riosieo, naꞌarachikamera mochinarekapapua tukapachi, ki eꞌenanariapapua, Riosi Taanara tajayachio.
\v 20 Yooma ki kaaweruma nokaka mochikamea, ki uunariamepua Riosi teꞌta kaaweruma chiiaa, uutaparichi enepaniameopua, ki ahpo maꞌchitapuaichio ahpo ki kaaweruma nokayao.
\v 21 Nape kaꞌkaruma nokiwame nokaka mochitonariamea, Riosi tahjewa kaaweruma uutaparichi eenepamepua, ahpo Riosichi kaawe nokayao, maꞌchiame tetewipuawichiopua.
\s Waani Paatoamea, eenechi Eesusi nayewanipua
\p
\v 22 Neipa iꞌkaopua Eesusia, Uurea weewachi simikapua taamo ahjamaopua masiteramao, waꞌami nokisinioio paatosikapua, tiꞌtijoe ooweru tiame.
\v 23 Waania waikamio, Eenoni tewaniachi paꞌpaichi ihsirepua paatokaopua tiame, Saarimi tewaniachi waapio, weeru maaniopa neeroio.
\v 24 Yooma ihji waꞌa tiame simikapua, keꞌchu Waani pachanioiopua karichio.
\p
\v 25 Piie taaweo, Waani naꞌnaritoamea ookapi, piiripi isaeri tijoe ahjama chaachapakapua, tatakori piipaniamechi simiyame.
\v 26 Waikao waꞌa chaachapasaopua, Waani naꞌnaritoamea, Waani kahtiachi eꞌenakapua tuuyemia, puꞌkao chaanekapua:
\p —Masitari, puuu waami yasakameopua taamo ahjamaopua Oorani akichi cherayachiminao, puꞌkaopua epeche werumako tuuriaopua amochio, paatoatapua ehpeo, muuwaemea, yooma waꞌa enapatapua ahpo paatotemiao.
\p
\v 27 Waikao Waania chaanerepua ahpo masiterao:
\p —Peꞌyachipua, aawataai kihta yoratarepua, ki Riosie kiatiame enesaapua ahpo ihsimiao.
\v 28 Eeme waꞌapi inamukamepua noꞌo cheerioio, ki Riosie Weratiameko tuurio noꞌoo, aaata Riosie uhjurapo tuutiameo, neeea noꞌoo, pahcha uhjuratiameko tuurioo, keꞌchu puꞌka eenoiopua.
\v 29 Nenewiwachio, moniawá ahjama neewimeria, moꞌnera enemeripua. Moꞌnera kaawe eꞌria, neee puuua, kaawe eꞌraka yorakiamerapua ihtaoi ahpo yorajekeraopua. Waꞌa tiiachipa neeeai ki nuꞌuti kaawe eꞌraka tetewaninia puꞌkao.
\v 30 Ehpeo puuukamera, epeche weruma enetoaopua, noꞌoo epeche nuꞌuti enetoiopua, puꞌka apoeo teꞌta tewekachi eenamekopapua, noꞌoo weeechiche tijoe naawakamekopa.
\s Teꞌpa tewekachi oꞌinia eename
\p
\v 31 ’Apoe teꞌta tewekachi eenameopua, yomarika aampa tiiamepua. Teemea, weeechi ohjoemea, weeechiche simiyameche nayewamepua. Nape tewekachi ohjoemea, tewekachi tiiame nayewamepua, yomachi aampa tiiame itapitichio, tiꞌtijoechiopua tiame,
\v 32 ahpo teꞌta tetewaria nayewamepua, teꞌta ahpo Noono ahpo nayeweria inamuria tiame; nape waꞌatioi puꞌkao, ookapipupua, puꞌka chiiao uuyamea.
\v 33 Nape puꞌka chiiao uukamea, pichiwa chiiame naneꞌrekamepua puꞌkao, puꞌka chiiao, teꞌta tewekachi eenamekopua, teꞌta tewekachi Noonora oꞌinia eename.
\v 34 Puuu Taanaraa naawesaa, ahpo Noono chiia chuꞌwarachitia naewamepua, yooma apoe Noonora tiiaa, ahpo Taanachi yasitoamekapa, ahpo Riosiwari.
\v 35 Noonoraa, ki teesa nakiyamekapapua ahpo Taanao, ki nuꞌunti utewari kiꞌyarepua puꞌkao, yomachi aampa tiiame ihtao.
\v 36 Pukaepa pukachi paparakamea, tewayamepua pukachio, ki wahjiamesi ahjaniame, nape ki pukachi paparakamea, kiisi tewayamepua pukachio, ki wahjiame ahjaniameo, ohsotia puuua, Riosi kokosario, apochi petereka mochitoamepua.
\c 4
\s Eesusi oowitiame nayeweria, Saamaria weeechi ohjoeme
\p
\v 1 Waika taawechiamio paꞌparisero tiꞌtijoea, Eesusio epeche muuwaeme paatoame inamurepua ki Waanichitiao,
\v 2 ki apoe Eesusi paatoamerakamekoipua, teemekamera paatoiopua masiterara.
\v 3 Pukaepa Eesusia machenakapua waꞌa Uurea weeechio, Arirea noꞌrakapua taamo ahjamao.
\p
\v 4 Saamaria weeechiami uꞌmatosaapa,
\v 5 waꞌatumi nokisikaopua, Siikari tewaniachi ajasitiapua, maꞌchi keꞌchu muiwachi. Waꞌa keꞌchu asiwachio, ehkoriami Aakowo weewarachi eneriapua, Oose kiꞌyariachi weeeopua ahpo taana, waꞌao, neropaira neteriachi tekoritaka.
\v 6 Waꞌao, resipakamekapa Eesusia, paira tekoritatiachi yasipakapua resipumiao, oowetawe waꞌasi.
\v 7 Waikao teeme Eesusi ajawariaa, piineri toisa Eesusio, Siikari mochiwachi siimpatiapua kooame tarimia.
\v 8 Waꞌa piineri itipirioi Eesusio, waꞌa eenaria aaata oowitiame, neeroi paimia. Eesusia puꞌkao chaaneriapua:
\p —Noꞌo kiamitia kuꞌita neeroi. Paramuna neee.
\p
\v 9 Nape Saamaria oowitiamea, chaaneriapua Eesusio:
\p —¿Achini iikame muuua naaju, muuua isaeri tijoekai noꞌo itanenamua neeroio, noꞌoo Saamaria ohjoemekooi?\fig |128-NT-064n.TIF|col|||Eesusia Saamaria ohjoeme oowitiame, neeroi itanena. |4:9\fig*
\p
\v 10 Eesusia nehjiariapua puꞌkao:
\p —Muuua naneꞌriame enesaamua noꞌoo aatanako, ahka eenameoio, naneꞌriame enesaamua tiameo, Riosio aamo ihta kianareka kahtiamekoo, muuukamera noꞌo itanemiipua neeroio, nape neeroi ki wahjiame ahjaniame.
\p
\v 11 Puuu oowitiamea chaaneriapua waikao:
\p —Nape Paamira, muuua ki iinuemepua aamo ahjae maꞌchipapuameoipua neeroio, itapiti wiitarioiopua, kai waapisi teere maaniameopua neeroi maꞌchipapuameopua ahjaeo. ¿Akana uuka noꞌo kiatamua puꞌka neeroi ki wahjiamesi ahjaniameo?
\v 12 Ki ehpesi nerojiniachi ihji neeroia, taamo ehkoriami Aakowoo, taamo tooweriachisiopua iꞌka tekoritiachi pairao. Iꞌwa nerojikamepua Aakowoai apoe, waꞌapi tatanaraa tiame, yooma puhkura ahjama wakasi. Ki ehpesioi, ki teiwachi iꞌwao, neeroi ki wahjiame ahjaniameopua, aaataeoi. ¿Epechekosa iintotaremua naaju, ki teꞌta taamo ehkoriami Aakowo weruma tiiamechitia?
\p
\v 13 Eesusia nehjiariapua waikao:
\p —Aamo pairachi maꞌchipaka nerojiniamea, yooma paramumeripua eenechi,
\v 14 nape noꞌo aamo kiꞌya nerojitemiaa, ki oosa aampa paramumerimua. Ihji neeroia aamo noꞌo nerojitiaa, amochi waꞌapi pajenameka teeremeri puuua, ahkasi ki wahjiamesi, aamo ki wahjiame ahjateka.
\p
\v 15 Puuu oowitiamea waꞌa chiiopa Eesusio, chaaneriapua:
\p —Paamira, waꞌa teeresoo noꞌo kiamitia naaju muuua, puꞌka neeroi ki wahjiamesi ahjaniame, ki oosa paramumichiopua noꞌoo, ki oosa noꞌo enamichiopua iꞌwa neeroi paimiao.
\p
\v 16 Eesusia waikao chaaneriapua puꞌkao:
\p —Kaawepua, nape paaemitia naaju aamo kuunaoi, waꞌa ikisaomua, noochi eꞌenamitiapua naꞌpahka.
\p
\v 17 Nape oowitiamea nehjiariapua:
\p —Ki kuunaemekoi neeea.
\p Eesusia chaaneriapua waikao:
\p —Pichiwa chaanimua, ki kuunaeko tuukao.
\v 18 Mariki tijoe ahjama ohjoekame muuuapa, ihji ehpe aamo ahjama kahtiaoi, ki aamo kuunakopa. Waꞌa tiiachipao aamo chiia, pichiwapua.
\p
\v 19 Iꞌka inamukapa oowitiamea, chaaneriapua:
\p —Naatiko erapaninia aamoo, Riosie neꞌneteniame.
\v 20 Taamo ehkoriami Saamaria ohjoekamea iꞌwa waꞌapi paparaweriaipua Riosio, iꞌka waꞌapi kaawieka tiiachi, nape eeme iꞌisaeri tiꞌtijoeria, Eerusareni siimpapo tuunapua Riosichi paparamiao.
\p
\v 21 Eesusia chaaneriamepua:
\p —Pichikemitiamua iꞌkao, akanache Riosichi paparaniamea, ki nateyamepua Riosiwichioo, Riosichi paparaniameo ahkakoikopua. Enamitepua meere ahka taaweopua, aamoo, ki iꞌwa kaawichiche aamo Riosichi paparamericheopua, Eerusarenioicheo.
\v 22 Eemea, ki machiyamepua aamo teꞌta paparawiao. Teeme iꞌisaerikamera naneꞌriamepua aatanakamera paparawiao, Apoe teꞌta aamo Newipatiameo, waꞌakamera machenakamekopua teꞌta taamo iꞌisaeri tetejimarichi.
\v 23 Nape asikamepua waꞌasi, ki wihtuka teꞌta paparapuameopua ahpo iikachio, ahpo Noonoopua tewekachi kahtiameo, waꞌa teeka paparajeriamekopua apochio.
\v 24 Riosia, ki pusie tetewiniamekopao, iikachi eraniamee paparaniamepua, pukachio.
\p
\v 25 Waikao oowitiamea chaaneriapua:
\p —Waꞌa teeremerijoarepua tiiao, nape teemea, puꞌka enameriche puuyamepua, Riosie Uutiame, apoeo enasaapua, maꞌchiame taamo chanimichiopua aachin teeremiao, yooma itapitichi simiyameo.
\p
\v 26 —Neeekaite puuua —chaaneria Eesusia—. Puꞌka ahjama nayewaka weeriaitemua —chaaneriapua.
\p
\v 27 Waꞌa chiioio Eesusio, teeme masitewaraa eꞌenatiapua itipiriachio. Masiteraa, aꞌchi erapakaipua, puꞌka oowitiame ahjama nayewaniameo, kihta iinatukeka teemea, puꞌka ahjama nayewao.
\v 28 Waikao, puuu oowitiamea, ahpo pairiachi toisapaopua ahpo sikorio, waꞌatia uꞌmasikapua mochiwachio. Waꞌaopua yooma, paaekaopua chaaneriapua:
\p
\v 29 —Uꞌmasio pahchu. Eꞌenasao, neꞌnemia iꞌka tijoe, yooma noꞌo yoorariao, tuuria. ¿Ki Riosie Weratiame ohjoarepu?
\p
\v 30 Waikaopua, puuyaka mochiwachio, eꞌenariapua Eesusi kahtiachi.
\v 31 Keꞌchu asikoi puꞌkao, teeme masitewaraa, koꞌkonurekai teemea Eesusio.
\p
\v 32 Nape Eesusia taamo chaanekapua:
\p —Koꞌkakame neeeapa.
\p
\v 33 Teemea waikao taamo chaachapakapua:
\p —¿Uꞌyeparetiarepua naaju, koꞌkopuameo?
\p
\v 34 Eesusia waꞌa taamo chaachapopao, taamo chaanekapua:
\p —Neeea itapiti kooame koꞌkakamepua, aamoo, ki machiya pehji. Noꞌo koayaa naatipua tiameo, Noꞌnowichio tehki, kajumichio uhjuratiame.
\v 35 Eemea chaachapaniarepu, naao meecha toinapa iꞌipapuachio, nape neeea aamo chaanenapua, iꞌipapuamea asikame puuuapa. Pukaepa neeea aamo chaaniamepua, iꞌipapuameo, tiꞌtijoeri Riosichi eꞌenapupuame naewaka chiiamepua.
\v 36 Iꞌipaniachi tekipanakamea yowimeripua; puꞌka Riosiwichio iꞌipamechitia tekipaname yowiraa, Riosichi upapania weemera ahjari uumichio peenia eraniamepua; puꞌka weemera ahjari uupuawichio echakamea, iꞌipakame ahjama kaawe erakoamepua, puuu yowiraa, ahpo kaawe erakowarapua.
\v 37 Waꞌa tiiachipao, ki ahpo echariachi iꞌipaniapua.
\v 38 Waꞌa aamo uhjurakame neeea, ki aamo echariachi iꞌipamichioo, Riosi tehkirachio, wahjachi ohjoriachi pahchaopua tiameo, eemeai ehpeo iꞌipamea, kuꞌipanipua tiameo wahja ohjoriachiopua, tehkiwachio.
\p
\v 39 Puꞌka oowitiameo cheeriopao: “Yooma noꞌo tuuyekapua noꞌo ihsiriao”, Siikari ohjoemea waikao, ki ookapi ahjachi erakokapua Eesusichio.
\v 40 Siikari ohjoemea, waꞌa iikapao, ajasisaapa Eesusi kahtiachio, itipinurekapua ahpo mochiwachi cheꞌrepamichioo. Waikao Eesusia teeme tiame, waꞌa itipitiapua ooka taawe.
\v 41 Waikao waꞌa itipitioio epeche weeka Eesusichi paparakapua pehjio, aapoe inamukapapua Eesusio, apoe waꞌapi chiia.
\v 42 Puuu Saamaria weemera paparakamea, chaanekapua waikao puꞌka oowitiame:
\p —Ki aamo cheeriowichioche pichikena teemea ehpeo, tamoe inamukapa tiame, teꞌta pichikena teemea, puꞌka chiiao. Naneꞌrena teemea ehpeo, iꞌka tijoeo, pichiwa teꞌta Riosie Weratiamekopua, yooma wehjoarichi mochikameo newipatemia eenakamekopua.
\s Eesusia, yawichi seekaerewa taanara sautena
\p
\v 43 Eesusia puꞌka ooka taawe iꞌtoai Saamariao, taamo ahjama uꞌmatokapua Arireami.
\v 44 Eesusia ki Uurea weeechiche itipinarekapua tekipanakao, Apoe waꞌapio cheekapa: “Riosi naewatoamea ki peenia eꞌraka uuniamepua ahpo waꞌapi weewachiopua, teꞌta ahpo machiwachiopua.”
\v 45 Arirea weeechi asiyachiamio, kaawe eꞌraka tetewiretupu waꞌao, waꞌachi nonorakamekapapua tiame, Eerusareni pahkochi, tetewakamekapapua tiameo, itapiti yooriaopua waꞌao.
\p
\v 46 Waꞌa oꞌiniao Eesusia, Kaanani eꞌenatiapua eenechi, pukeri simiyachio ahpo machenariachi, Arirea weeechi, neeroio ahpo wiino iintapariachi. Waꞌa Kapenau yasariaipu piiripi tijoe yawichi seekaerewa, ahpo taana kokoriame iinueme.
\v 47 Waikao ihji tijoea, inamukapao Arirea eenario tuuopa Eesusio, Eesusi kahtiachi eenakapua iꞌtomia. Waꞌa enasaapua, utewa yoorakapua Eesusio, ahpo taꞌpechi enamichiopua, ahpo taanao tísia kokorio tuukaopua, amori mukuyo tuuka waꞌasi.
\v 48 Eesusia puꞌkao chaanekapua:
\p —Eeme tiꞌtijoeri iꞌwa ohjoemea, ki noochi paparanariamepua, ki tetewaa pehjio noꞌo peenia ihsiwaopua Riosieo.
\p
\v 49 Nape yawichi seekaerewa tijoea simitekapua naaracheka utewa chaanekao Eesusio:
\p —Nape Paamira, noꞌo cheriwepuapua waꞌatioi, nape yaapiti, amori mukuyamekapu noꞌo taanaa.
\p
\v 50 Waikao Eesusia chaanekapua:
\p —Aamo taana ahjanipua pehjio, saukame kahtipua waꞌasio, kaaweruma. Simika neꞌnemitiao.
\p Waikao yawichi seekarewaa, Eesusi chiia paparakapaopua, kaawe eratoka noꞌrakapua.
\v 51 Iꞌka noꞌroiopua pooechio, ihji tijoe nuurewaraa amori taꞌpechi asioi natepakao, chaaneriapua:
\p —¡Ahjame aamo taanaa, yachapakame kahtiame puuuapa!
\p
\v 52 Waikao apoeo iinatukeriapua, achini keenako oꞌineriopua yachapakao, ahpo taanao. Puuu kuꞌkuyamea nehjiariapua:
\p —Tapana taaa kayeoi, toakapua cheꞌeria —chaachaparepua.
\p
\v 53 Iꞌka noonoraa waikao, inatepariapua Eesusio, achini keenako yachapakame kahtio tuurioopua, puꞌka kokoriameo ahjakame kahtio tuuriopua. Waꞌa iikapapu kokoriame noonoraa, tísia Eesusichi paparakapua. Iꞌka noonorao taꞌpechi asisoopua, yooma puꞌka taꞌperachi mochikamea tiame, Eesusichi papararepua.
\p
\v 54 Ihji Eesusi ki maaepori iintoriaa, oosa simiyachi iintoniamekapua, Uurea oꞌinia enasapaopua, Arireao.
\c 5
\s Eesusia tuꞌikame yachapatena, Weꞌseta ohjoeme
\p
\v 1 Puꞌka neipachiami Eesusia, Eerusarenite mooenatiapua isaeri tiꞌtijoeri pahkotachi siimpaka.
\v 2 Eerusarenio, waapi Poꞌwa Yeeta tewaniachiopua, waꞌa tootoaretiaipua neeroi tekopatetiachio, eureo nayewaniachiopua Weꞌseta tewaniachi. Waꞌa neeroi maniteniachio, mariki arakokari ajarepua waꞌa norikameo, neerochi pakiniachio.
\v 3 Waꞌao, ki ookapi mochikame tetewitiapua kokoriame, puuua: ki mamachiriame, rojomi, chookopakame, tuꞌikame, petika puuyamekapua waꞌao, neeroi maaniame noonoachisi.
\v 4 Tiꞌtijoeria aaata Riosi tewekachi kuꞌiwari, eepi waꞌa eejenaka noonotiame maayame enerepua neeroio, pahcha pakikamea puꞌka neeroi noonosocheo, saukame machenaniamekopua ahpo kokoriao.
\v 5 Piiripi puuu kokoriame waꞌa poꞌyamea, piire weerewa oosa mariki aampa osanao paamuame eneriaipua kokorekao, uwanapakame.
\v 6 Eesusia waꞌa poꞌyame tetewaopua ki kuꞌitapisi kokorerioopua puꞌkao tiame, iinatukekapua:
\p —¿Yachapanariame muuuai naaju?
\p
\v 7 Kokoriamea yaapiti nehjiakapua Eesusio:
\p —Ejeꞌe, nape kiꞌtiapu noꞌo neerochi pachamerio, neeroi noonosoopua. Senepi noꞌo pakimio oꞌroio, piirechi paapakiapu pahchao, iꞌwa neerochio.\fig |129-MX-56.tif|col|||Ooka kokoreka mochikamea, ahpo iimenapua neerochi pakikao, ahpo saukame itipimichiopua.|5:7\fig*
\p
\v 8 Eesusia chaanekapua waikao:
\p —¡Werisisao naajuo! ¡Apechunasa puꞌka aamo ipetao! ¡Iꞌtoka noꞌrasa naajuu!
\p
\v 9 Puꞌka cheesochepa Eesusio saukame itipikapua tijoea. Waikao sautetiamea ahpo eꞌtapara apechunasaopua, mookeka noꞌrakapua. Nape resipuniachi taawechikopa puꞌka taawechio,
\v 10 yoorewa inatewa iꞌisaeria, chaachapariapua sautetiameo:
\p —Resipuniachi taawechikoi ehpeo; ¿achinikai mooketonamua aamo ipetao, ki reesiseniachikoi itapiti tehki yoraniameo?
\p
\v 11 Waikao sautetiamea chaaneriapua iꞌisaeri yoorewa inatiameo:
\p —Noꞌo yachapatekamea, noꞌo eꞌtaparawa apechunaka mookeka noꞌranurekapua.
\p
\v 12 Waikao yoorewa inatiamea iꞌisaeri iinatukeriapua sautetiameo:
\p —¿Aatanapu puuua, aamo eꞌtapara mookeka noꞌranurekamea?
\p
\v 13 Nape puuu tijoe sautetiamea, kaꞌchi iika nehjiame eꞌrarepua puꞌkao, ki naneꞌriapa puuua, aatana ihsiriopua ahpo sautekao, puꞌka Eesusio ki naania ikiriamekopua muuwaeme ohjoachio.
\v 14 Ehjepamio Eesusia, eenechi tiopachi natepasaopua sauteriao, chaanekapua:
\p —¡Nee, saukame muuuapa! Ehpeo kaꞌte oosa aampa tatakorimitia, ki eenechi ki kaaweruma aamo ikimichiopua, epeche tiiameopua.
\p
\v 15 Waikao saukame tijoea ahpo iinatukekamechi iyoriwa inatiamechio, aatana ihsirio tuuka ahpo sautekao, Eesusiko tuuyere puꞌkao ahpo sautekameo.
\v 16 Pukaepa isaeri yaꞌyawichia, Eesusi iꞌyasirepua aachin teeka ahpo naꞌara yoramiao, ki iyorioopapua puꞌkao, resipuniame taawechio.
\v 17 Eesusia, waꞌa tiiachipa piie resipuniame taawechio, iꞌisaeri paꞌpamiratuamee waꞌa waꞌineniaipua aaata sautemichioo, chaanekapua puꞌkao:
\p —Noꞌo tewekachi Noonoa, aꞌchitia keenakooi tekipanamepua, puꞌka ihsia ihsiame neeea, puꞌka tehkiwara yooraka. Yooma noꞌo ihsiaa itapitio, apoe Noono ihsiamepua noꞌoeo.
\p
\v 18 Pukaepa iꞌisaeri yaꞌyawichia, epeche nekamuchekapua Eesusio merinareka, ki resipuniame taawechiche tekeka tetewamekopua Eesusio ki iyorika. Ihji iꞌisaeria nenekarepua Eesusio tiameo, ahpo Noonoko tuuyopa Riosio, Riosichitia ahpo uuyamekopapua.
\s Riosi Taanara ahpo Noono utewari iinuewa, ihtaoi ahpo iintomiaopua weeechio
\p
\v 19 Waikao Eesusia, ehpeche epeche kaawe ahpo tuuwikaopua, chaanekapua:
\p —Pichiwa chaani neeea Riosi Taanaraa, ki nooe eꞌrachi yooramekopua ihtaoi. Noꞌo Noono ihsia, yorasiame neeeai.
\v 20 Riosia, nakiyamepua noꞌoo, ahpo Taanao. Pukaepa apoe waꞌapi tetewitenapua yooma ihta noꞌo yoranariao. Pukaepa ahpo Taanachi ihkepateka ahpo inatao yorasitenapua ahpo Taanao, pukaepa pukachi ihcheka inisiame Taanaraa ahpo Noono erasia yorasikaopua. Puuua epeche tiame iintomiitepua pehjio, aamo iꞌisaerio, epeche peenia erakomeri tiiame.
\v 21 Noꞌo Noono aaata tatakorichi wahjipakame ahjatenario, neee yooramepua puꞌka, weemera ahjari piipari kiꞌyakao. Waꞌa tiiachiopua noꞌo Noono ihsinariao, noꞌoe ihsiamepua.
\v 22 Apoe Noonoraa, kihta apoe chiiamepua aaataoi, aaata cheenaresaa, ahpo Taanachi chiiamepua ihta ahpo chianariaopua.
\v 23 Noonoraa, yooma ahpo Taanae ihsiamepua, apochitia weruma tetewipuawichiopua. Waꞌa tiiachipao, Noono Taanara ki iyoriamea, apoe Noonora ki iyoriamekaitepua, apoe Noonora ahpo Taanachi yasitoamekai tiiamekopua.
\p
\v 24 ’Ki wihtuki aamo chaaniamenia, aaata yooreka keepuamea noꞌo chiiao, kaawe uuka tetewameopua noꞌo uhjurakameoi, kiamania puꞌkao, weemera ahjario ki wahjiamesi; ihjia kihta seenampa iinuemeri puuua, Riosie ahpo kokosapuaopua waꞌasio ahpo tatakoriawichioo, paonakamekopa puꞌkao weemera ahjarichio, tatakorika wahjiparichio newitoriopa.
\v 25 Ihjia teꞌta pichiwapua, weeka tatakorichi wahjipakameka tiiamea, ehpe waꞌapi taawechiami inamumeripua noꞌo Riosi Taanara chiiao, yooma noꞌo chiiao yooreka inamukamea, noꞌoe kiapuamepua puꞌka weemera ahjario, ki wahjiamesi ahjapuameopua waꞌasi.
\v 26 Puꞌka ki wahjiame ahjari noꞌo Noono tiiameo, noochi teerepatiapa, noꞌo weeechi tijoetutioio naawatetiaio. Pukaepa neeea, noochi tiiamepua ki wahjiame ahjario, apoe noꞌo Noonochitia.
\v 27 Neeepua noꞌo Noonoe utewari kiatiamea, yooma weeechi tiꞌtijoerio neee katewemichiopua puꞌkao, puꞌka kiisi kaawe noonoiriaopua. Neee puuua aawata waꞌa iintomeria, tijoe weerewaeme naawatetiamekapa.
\v 28 Kaꞌte tahpitika erakomitiapua, iꞌka noꞌo aamo chaaneriao, neeea, epeche tiiame iintomiitenia pehjio, ahkasi yooma wehtere toatiameoipua wahjipakame, ahjakame werisipumiitenia,
\v 29 noꞌoche chaachasocheopua ahjapukao. Puuu noꞌo ahjateriaa, iꞌka weeechi noochi paparaka kaaweruma iintokamea, noꞌo ahjama ohjoremichio kiamania, ahkasi ki wahjiamesi. Nape puuu noꞌo ahjateriaa, ki noochi paparapa ki kaaweruma iintokamea, ki teesa kokosapuame puuua, ahkasi ki wahjiamesi.
\s Aatana nuurewachi Eesusi ihsiria
\p
\v 30 ’Neeea, noꞌo tijoe weerewachi inataria, ki seenu inataripua noꞌo Noono inatario. Pukaepa neeea, kaꞌchi iika iintomerinia itapiti ki noꞌo Noono inataria enesoo. Yooma ihta noꞌo ihsiaa, teꞌta kaaweruma puuua, noꞌo Noono inatari iintonariopua puꞌkao, Apoe noꞌo Noono uhjurakame ahpo iintonaria ihsimichiopua weeechio.
\v 31 Eeme waꞌapi noꞌo chaachapachitia oowera tijoechitia chiia enesaane, kihta nateyame enemiipua, noꞌo chiia aatanako tuuyaa, oowera tijoe oijeramechitia chiiame enemiinia waikao.
\v 32 Nape kahtiaitepua piirechi aaata, noochi ihsika pichiwatame noꞌo aatanakoo, puuu noochi ihsiwa pichiwatamepua noꞌo chiiao.
\v 33 Waani Paatori nehjiariaa, puꞌka aamo uhjuraria iinatukemichio aatanakoo, pichiwaka tuurepua eee cheeka nehjiakao: “Ki neeepua Riosie Weratiamea, puuua noꞌoo neipa enameripua”, cheekapua.
\v 34 Nape Waanio noꞌo aatanako maꞌchitariao, ki aaata weeechi tijoee pichiwataniame nakiyamenia noꞌo aatanakoo. Oowera waꞌa chiiamenia Waani cheeriao, puꞌka noꞌo maꞌchitatiamechi noochi paparakameo, tatakoriria choꞌweka cheriwenariapa.
\v 35 Waania, tajayameka teerekamepua noꞌo maꞌchiame nayewakao, noꞌoo aatanakoo; eemea, kuꞌwitapisi oowera kaawe erakokamepua waꞌa kahtiachi eꞌenapakaopua, keepumiao.
\v 36 Nape kahtiaitepua piirechi noꞌo maꞌchitamea, noꞌo Noono apoe puuua, epeche weruma tiiari tiiaeme, ki Waanichitiao; Apoeo noꞌo ihsitiae, teꞌta maꞌchitamepua noꞌo aatanakoo.
\v 37 Noꞌo Noono noꞌo uhjurasaapa, iꞌwa weeechio apoe waꞌapi pichiwataka noꞌo nayewakamepua, aamoeo ki tetewaoipua puꞌkao, ki inamuamekaipua puꞌka iiyenario.
\v 38 Ki pichikere eemea puꞌkao, apoe aamo chaanenariaopua, ki pichikekapa eemea puꞌkao, noochi chuꞌwachie aamo nayewenareriaopua.
\v 39 Eemea kaawe iyonanipua puꞌka Ehkoriami Iyoteriaopua iꞌyachikao, nape oowera iyonakache teimo orakokaopua ki wahjiame ahjariopua. Nape eemea, puuu waꞌapi iyoterio noochi simiyame nayewamekoipu, ki pahteka iyonakame eemea puꞌkao.
\v 40 Pukaepa ki noochi eꞌenakame eemea, nooe aamo kiamichioopua, puꞌka ki wahjiame ahjariopua.
\p
\v 41 ’Eeme ki uunariamea Ehkoriami Iyoterichi noochi chiiao, aamo kaaweruma nayewamekoi noꞌoo, ki uuka tetewamenia.
\v 42 Waꞌa chaachapai eemea noꞌo kaaweruma naewakao, naneꞌriame neeea aamoo, wihtuki chaachapamekopua aamoo, kiisi nakiyai waꞌa chaachapame eemea Riosio.
\v 43 Noꞌo Noono kaaweruma tuuyewari aamo iꞌyetoka eenakamenia, nape eemea, ki noꞌo kaawe eꞌraka tetewakamepua noꞌo eenariao. Nape aaata piirechi ahka enasoopua, ki naneꞌriai ahka oꞌinia ahpo eenariachio, puꞌseremii eemea puuukamera enasoo.
\v 44 Eemea ki noꞌo kaawe eꞌraka uuka tetewiniamea, aaataai waꞌa teꞌteremiipua ki noꞌo machiyapa noꞌo aatanakoo. Eemea waꞌa teꞌtiapao, aaataoi amochi asiyame kaawe eꞌriamekapao, ki noꞌo kaawe eꞌreka uukamepua noꞌo asikoio, noꞌoo teꞌta Riosikoi, ki noꞌo machikamekapapua.
\v 45 Nape waꞌatioi kaꞌte aamo noꞌo wenejimeri maaemitiapua noꞌo Noonochio, kajuyachi taawechi katewerichiopua. Ki neee iintomeripua puꞌkao, Moise waꞌapi aamo wenejimeripua ahpo nuurarieopua, Riosie ahpo kiaretiaeopua ehkoriamio, puuu waꞌapi Moise kiaretia nuurari nokisika mochitowa, aamo waꞌapi ahjachi erakoae.
\v 46 Moise chiia pichikesaa, noochi paparamera enemii eemea, Moiseo noochi simiyame nayewaka iyoteriopa.
\v 47 Nape ki pichikere eemea puꞌkao. Waikao, ¿achini teeka pichiketa eemea iꞌka noꞌo chiiao?
\c 6
\s Eesusia mariki miiri muuwaeme koꞌkotena
\r (Maateo 14:13-21; Marako 6:30-44; Ruuka 9:10-17)
\p
\v 1 Neipa iꞌkao Eesusi ahjamao, paonatiapua Arirea paꞌwechio, Tiiwerio paꞌwerachi tewaniamechiopua tiame.
\v 2 Muuwaeme tiꞌtijoe ooweru tiamea, paꞌwe suuwerachiko taamo naꞌnaritokapua taamo tetewitoka, puꞌka Eesusio ki nuꞌnuti ki maaenari yorasiamekopapua, koꞌkoame sautesikao.
\v 3 Waꞌa tetekitioopa Eesusia, teewi yasipakapua nahpuchi, teemea waikao, norikame mochipakapua Eesusio.
\v 4 Waꞌa taamo nokayoio, amori asiyachikapua Semejenato pahkoa. Pukaepa puꞌka pahkochi simiyame taamo nayewemio maaekai teemea.
\v 5 Nape Eesusia ki ookapi ahpo naꞌnaritoriopaopua, chaanekapua Eeripeo:
\p —¿Achini iika tewita teeme kooame, yooma iꞌka muuwaemewichioo?
\p
\v 6 Oowera waꞌa cheekapua Eesusia Eeripeo, aatia cheetarepua eꞌraka, ahpochi paparaopua, naneꞌriai cheere Eesusia ahpo iintomiao.
\v 7 Nape Eeripea nehjiakapua:
\p —Ooka siento taawe sotatiame taritiai kooame, ki ahsepatariaipua posaka koꞌkoniameopua.
\p
\v 8 Waikao piiripi masitera Anteresi tewaniamea, Siimoni Peeroo pooniraa, chaanekapua Eesusio:
\p
\v 9 —Piiripi kuita temari nutukarache maanipua, nape mariki paani waꞌapi, seewara tewaniame tiiriko paani, ooka soꞌchi ahjama, nape ¿ihtanapua, ki ookapiwichioo?
\p
\v 10 Eesusia taamo chaanekapua ahpo maꞌmasiterao:
\p —Mochipanuremitiapua puꞌkao, yoomahka.
\p Waikao mochipakapua paasepochi, weeru paasepochikopa waꞌao, mariki miiri ahkakapua mochipakamea, tiꞌtijoeapua ooweruapua tiame.
\v 11 Eesusia kiatiapa puꞌka mariki paanio, puꞌka ooka soꞌchiopua tiameo, cheriwema kiꞌyakapua ahpo Noono teꞌpa tewekachi kahtiameo. Waꞌa iintosaapa Eesusia, taamo kiꞌyakapua puꞌkao yooma tiꞌtijoeri naachutemichioopua. Waikao teemea yooma naachutekapua, yoomahka koꞌkotiapua ahkasi poposaka aiwaniachisi.
\v 12 Waikao Eesusia yoomahka aiwaka poposatioopa, taamo ahpo ajawariao, chaanekapua:
\p —Yooma naꞌpoamitiapua chiꞌwapame soparakameo, kihta waꞌatia wekamichiopua.
\p
\v 13 Waikao teeme naꞌpoanuraretiamea, oosa mariki aampa ooka waari weeweruma naꞌpoatiapua chiꞌwapame soparakameopua, puꞌka mariki paani tiiriko seewara tewaniamee, paanitatiame.
\v 14 Waikao yooma puuu tiꞌtijoe ooweru tiamea, iꞌka ki nuꞌuti ki maaenari Eesusi iintoriao, ki nuꞌuti peenia tiiame chaachapakapua ahpoo:
\p —¡Teꞌta pichiwa Riosie tamochi tiꞌtijoerichi enamio tuutiamera ihjía!
\p
\v 15 Nape Eesusia naneꞌrekaopua ahpoo, utewachi iꞌtopuamekoopua yawichi weramiaopua, poanachi akipakapua ki naania iika waꞌao, epeche teewiami ooruchi.
\s Eesusia nerojampa ihtoria
\r (Maateo 14:22-27; Marako 6:45-52)
\p
\v 16 Tukaoopua waꞌasi, teeme masiteraa paꞌwesuwe tetekisaapua,
\v 17 pawekakerachi moꞌmoenatiapua. Pawekakerachi moꞌmoenasaapa, waꞌa paꞌwechipo nokisiniapua, Kapenau muuwari mochiwachipoopua. Teemea Eesusio ki eenopa tukaokopaopua waꞌasio, teemeche piineri uumatokapua, Kapenaukoo.
\v 18 Waꞌa keenako Tiiwerio paꞌwechipo nokisinioio, ki muuenati eejekapua, ahkasi paꞌweoi ki nuꞌunti peꞌkoteka, teꞌpasi wewerisitiapua peꞌkonio.
\v 19 Téhpe nokisinioio paꞌwechipoo, tehki nokisikaopua pawekakerao matakakesikao, taamo pukamina ihtoame tetewitia aaatao, nerojampa weritoame. Teemea, waꞌa ihtoame tetewapao tísia majaka teemea, ki machikapa Eesusikoiopua, tukaokopa.
\v 20 Nape Eesusia taamo sisinachachapua cheeka:
\p —¡Kaꞌte majako eemea, neeekaite puuua!
\p
\v 21 Waikao teemea majayaio kaawe erapakapua. Waikao tísia kaawe eꞌraka mooenaputiapua pawekakerachio, waꞌa ikitioopua, ikanati Kapenau pawekakera chuchupachi ajasitiapua.
\s Tiꞌtijoeria Eesusi iꞌyani
\p
\v 22 Puꞌka meereopua, wanamina paꞌwechi itipikamea, ki tetewakapa puuuche pawekakera waꞌa paꞌa piari chuhkuameo, naneꞌreriapua puꞌka masiterao piineri uumatoriopua, ki Eesusi ahjama.
\v 23 Waikatakirio, piirechi pawekakerachi Tiiweria eename, chuchupakame tetewariapua, Eesusi koꞌkoteriachimina muuwaeme tiꞌtijoerio.
\v 24 Waikao ki tewakapa Eesusio puꞌka Tiiweria eename pawekakerachio, iꞌyamo oraparia puuua. Pukaepa puꞌka pawekakerachi moꞌmoenasa, Kapenau siimpariapua.
\s Eesusipua, kooame ahjatiamea
\p
\v 25 Paonasaapa puꞌka neerochio, waꞌa tewisaapa Eesusio Kapenauo, iinatukekapua Eesusio:
\p —Masitari, ¿achinitio asikamua iꞌwao?
\p
\v 26 Nape Eesusia cheeka nehjiakapua puꞌkao:
\p —¿Eemea pahtekamekosa eemea noꞌo aatanakoo, ki maaepori iintokopao, waꞌa tiachipa noochi paparanariame eemea? ¿Oowera aamo noꞌo koꞌkotemichio eꞌnakamekosajuoipua naaju, noꞌo iꞌyasikao?
\v 27 Kaꞌte resipamita eemea aamo kooameche ki tehpe eꞌrameche iꞌyakao, ohso kaawe eemea tehpe eꞌramera kooame iꞌyame enepuapua, puꞌka kooame koꞌkosaa eeme, ki wahjiamesi ahjari eneniame, puꞌkao, neee Tijoe Tijoetukamea, nooe inisia aamo kiꞌyakao. Waꞌa iintomichio noꞌo uhjurakame noꞌo Noonoa iꞌka weeechio.
\p
\v 28 Waikao aapoeo iinatukekapua:
\p —¿Ihtanakosapu taamo nokijera Riosi?
\p
\v 29 Eesusia nehjiakapua puꞌkao:
\p —Naati puuua, noꞌo ahpo uhjurariachi pichikeniame.
\p
\v 30 Waikao aapoeo chaanekapua:
\p —¿Ihtatia ki maaepori tiame yoratamu, puꞌkao tetewakapa, aamo pichikemichio? Yorasao naaju puꞌkao. Árisa, eenechi koꞌkotesao naaju.
\v 31 Moisetarua waꞌa iintokamepua, maana koiꞌra koꞌkotekao taamo ehkoriami mochiriameo, wakiwechiami nokisinioio. Waꞌa chiiame Ehkoriami Iyoterichiopua, eee cheekao: “Apoeo, tewekachi eename koiꞌwame, koꞌkotekapua.”
\p
\v 32 Waikao Eesusia chaanekapua:
\p —Nape neeea, ki Moisetaru iintorio tuunania puꞌkao, Apoe iintorio tuunania puꞌkao noꞌo Noonó, tewekachi kahtiame. Puuu Apoepua tiameo, puꞌka teꞌta pichiwari kooame kiꞌyameraa, tewekachi eenameo.
\v 33 Teꞌta pichiwari kooamea, tewekachi oꞌinia eenakamerapua, Apoepua tewekachi oꞌinia tekikame; puuu teꞌta tewekachi kooamea, tewekachi tekekamepua ahjae teꞌta weemera ahjari teerepuawichioopua.
\p
\v 34 Aapoea waikao, waꞌa chiiopa Eesusio, chaachapakapua Eesusio:
\p —¡Aa Paamiraa, naakonakosa waꞌa tiiamepua? ¡Puꞌkakamera kooame taamo kiamitiapua ohso kaawe!
\p
\v 35 Waikao waꞌa chaachapakopa puꞌkao Eesusia chaanekapua:
\p —Nape neeea, ki aamo kooame erakoa chiiamenia. Noꞌo waꞌapi naewaka chiiaitenia, noꞌoo kooamechitia nayewakaopua. Neeekaite puuua, puuu kooamea. Noochi paparaka eꞌenakamea koꞌkomiao, kiisi chorowameripua waꞌasi, noochi paparakamea, ki oosa paramumerioipua.
\v 36 Nape noꞌo aamo cheeriachitia, eemea ki pichikenapua noꞌo chiiao noꞌoo aatanakoo, tetewaiopua.
\v 37 Yooma puuu noꞌo kiapuamea noꞌo Noonoeo, noomina eꞌenameripua; waꞌa ikisoo puꞌkao, neeea uumeripua.
\v 38 Neeea ki noꞌo eꞌra yoramia eenakamenia tepoonaopua tewekatepao, naati eꞌra yoramia eenakamenia, Apoe puuu noꞌoo uhjurakame.
\v 39 Apoe noꞌo uhjurakame eꞌraa, kaawe neesetopuamepua puꞌka noꞌo kiapuameo, neeea puꞌkao, eenechi ahjatemerinia puꞌkao iꞌka weeechio mukukoi, puꞌka kajuyachi taawechi teꞌta asisoopua waꞌasi.
\v 40 Noꞌo Noono nakiyaa, ki wahjiamesi ahjaniamepua, aaata pahteka tetewikame ahpo Taanaopua aatanakoo, ahpo Taanachikamera paparakaopua. Waikao yooma aaata noochi paparameo, wahjipakameoi iꞌka weeechio, waika kajuyachi taawechiopua, eenechi ahjatemania puꞌkao.
\p
\v 41 Waikao puuu iꞌisaeri tiꞌtijoeria rurumurakao, kiisi kaawe chaachapakapua Eesusio, Eesusio chiiopao: “Neeepua tewekachi oꞌinia tekikame koiꞌra.”
\v 42 Waꞌa cheekopao tiꞌtijoeria, chaachapakapua:
\p —¿Ki ihjipu Eesusi, Oose tewaniame taanara? ¿Ki machiyame teemea puꞌka yeeyerao, puꞌka noonoraopua tiame? ¿Achinikai tewekachi oꞌinia tekikameko tuunapua?
\p
\v 43 Waikao Eesusia chaanekapua puꞌkao:
\p —Tooa puꞌka aamo rurumura chaachapao. Teꞌta pichiwamekaite neeea noꞌo chiiao, teꞌta tewekachi noꞌo eenamekoo, teꞌta pichiwari puuua; neeepua teꞌta tewekachi kooamea, noꞌo ahjae teꞌta ahjari aamo kiꞌyaa.
\v 44 Nape aaataai ki keepukame noꞌo Noono chiiao, noochi eꞌenanurawa paajutetio, kaꞌchi iika enameripua noochio, puꞌka Riosi kooame uhjuraria koꞌkomiao. Nape noꞌo Noono paajutewa eꞌwaka eꞌenakamea, koꞌkomeripua puꞌka kooameo. Waikao neeea puꞌkao, weemera ahjarichi teꞌterewa kiamania. Puꞌkaonia waꞌa iintoriaopua, kajuyachi taawechio, eenechi ahjatemania wahjipariameoipua.
\v 45 Ehkoriami Isaia Iyoteriachio chaanipua: “Yooma Riosi mochiwarichi mochimeria, Riosie masitetiame enemeripua.” Waꞌa tiiachipa, yooma noꞌo Noonoe pepenitetiamea, yoorekamea tiame, noomina eꞌenamepua.
\p
\v 46 ’Aawataai ki tetewai Riosi ahjae pepenipakamepua, Riosio ki aaata puusie tetewiniamekopua, naatiche tetewikamepua puꞌkao Riosichi waꞌapi eenakame.
\v 47 Waꞌa tiiachio teꞌta pichiwa ihjia: noochi paparakamea, weemera ahjari iinuepakamepua, teꞌta ahjari ki wahjiamesi.
\v 48 Neeekaitepu puuu kooamea, ahjaetiamea puꞌka weemera ahjario.
\v 49 Aamo ehkoriamia maana koiꞌra koꞌkakaipua wakiwechi nokisiaio, wahjipakamepua.
\v 50 Nape neeea seenu kooame naewaninia, tewekachi oꞌinia tekikame, puꞌka koꞌkakameo ki mukimapua seena aampa.
\v 51 Neeeju puuu kooame ahjatiamea, teꞌta tewekachi oꞌinia eenakamea. Puꞌka kooame koꞌkakamea, mukukai, ahjari teeremapua ki seena aampasi. Puuu kooame noꞌo weerewa puuua, iꞌkao, iꞌwa wehjoarichi mochikame kiamania puꞌkao, ki seena aampasi ahjamichiopua puꞌkao.
\p
\v 52 Iꞌisaeri tiꞌtijoea ki pahtiapa puuua, ahpo chaachapakapua:
\p —¿Achini iintoka taamo kiatapua ahpo weerewa koꞌkopuaopua?
\p
\v 53 Waikao Eesusia waꞌa chaachapopao, chaanekapua:
\p —Neeea pichiwa aamo chaanenapua, ki aamo koꞌkosoo noꞌo weerewao, iijisoo tiame noꞌo eeraraooi, ki iinuemeri eemea amochio, teꞌta pichiwari ahjario.
\v 54 Koꞌkakamea noꞌo weerewao, iijikamea tiame noꞌo eerao, iinueme puuuapa, ki wahjiamesi ahjaniameo; puꞌkao neeea kajurachi taawechio, mukukoiopua puꞌkao, eenechi ahjatema neeea.
\v 55 Noꞌo weerewaa ki oowera kooamepua, noꞌo eeraa tiame ki oowera iijiwaripua.
\v 56 Noꞌo weerewa koꞌkakamea, noꞌo eera iijikamea tiame, noochi ohjoeka kahtiame puuua, neeeai pukachi kahtiamepua.
\v 57 Noꞌo Noono ahjaria noꞌo ahjari puai, apoe noꞌo uhjurakame. Pukaepa, noochi koayamea, noochi uuka ahjamapua ahjario.
\v 58 Puuupua teꞌta kooame tepoona eenamea tewekachi, ki puuuka tiamepua maana koiꞌra taamo ehkoriamio koꞌkaria, puꞌkao koꞌkakaio wahjipatiame; nape iꞌka kooame koꞌkakamea, mukukai, ahjamapua, ki seena aampasi.
\p
\v 59 Puꞌka waꞌatiame masiteka Eesusia Kapenau napawikarichio.
\s Ki wahjiamesi ahjaniame naawesari
\p
\v 60 Muuwaemea, yooma iꞌka waꞌa tiame inamukapao, ahpo ihchio chaachapariapua:
\p —Nape ihji puꞌka chiiaa, ki teesa tehki tiiamepua. ¿Aaatatia pahteta puꞌkao?
\p
\v 61 Nape Eesusia naneꞌriapa puꞌka ahpo masitia chaachapao, chaanekapua:
\p —¿Kiisi pahtena eemea noꞌo masitiao pehjio?
\v 62 ¿Achipu erakotariamare eemea noꞌo aatanako pahtesaopa, noꞌoo Tijoe Tijoetukameo teꞌpa tewekachi tetewime teeresaapua noꞌo yasariachio, keꞌchu iꞌka weeechi noꞌo tekioiopua? Waikaope tísia pahtemerii eemea, iꞌka aamo tuuyao.
\v 63 Taamo iikarakamera ahjatiamepua taamo weerewao; ki iikaeme enesaa teeme taamo weerewachio, ki ahjamii teemea taamo weerewaraa, oowera weerewachea piineri, kihtawichio kaawekamepua. Noꞌo aamo nayeweriaa teꞌta iikachi simiyamepua, teꞌta pichiwarikamera ahjari amochi teerepame, aamo kaawe eꞌreka uꞌwisoopua.
\v 64 Nape iintuna eemea paikapi ki noꞌo pichikiame.
\p Waꞌa cheere puuuapu Eesusia naneꞌriapa pukeri oꞌinia aatanako ahpo ki pichikemerio, waꞌa ikisa aatanako tiame ahpo nehjimerio noriwi.
\v 65 Eesusi aampachi cheekapua tiameo:
\p —Pukaepa aamo chaanekamene ki aaata enamio tuuka noochio, ki noꞌo Noonoe eratetiame enesoo.
\p
\v 66 Waikao oꞌinia neipao, puuu muuwaeme Eesusi ahjama ohjoamea keepuka, toakapua Eesusio, ki ohjokapua ahjamao waꞌasi.
\v 67 Waꞌa ijikikopapua puꞌkao, Eesusia taamo iinatukekapua tiame, ahpo oosa mariki aampa ookao:
\p —¿Noꞌo toitare eemeai?
\p
\v 68 Siimoni Peeroa nehjiakapua yooma taamowichioo:
\p —Paamira, ¿aatanachi uumpata teeme? ¿Ki muuuchekosamu, taamo ki wahjiame ahjari masitekamea?
\v 69 Aamokamera pichikiame teemea, aamo naneꞌriamekapa teemea, teꞌta pichiwa tewekachi oꞌinia eenamekopua, aamoo Riosie, Teꞌta Weratiamekopua.
\p
\v 70 Eesusia waikao chaanekapua puꞌkao:
\p —Nape Peeroo, ki yooma eeme waꞌachi erakoamekopua. Piiripi eemea naꞌarame tijoepua, aamo oosa mariki aampa ookao, noꞌo poanataka uurioipua, noꞌo ahjama tekipanamichiopua.
\p
\v 71 Waꞌa cheekao Eesusia, Uurasi nayewaka cheeriapua, Siimoni Ihkarióte taanara, puuu Uurasikamera enemerikopua teꞌta naꞌaramerio, nanaaramechi ahpo nehjakaopua, noriwi. Eesusia naneꞌriame eneriapua waꞌa iintomerikopua, Uurasia waꞌapikai oosa mariki aampa ooka uutiamea.
\c 7
\s Eesusi poponiraa ki paparariaipua Eesusichio
\p
\v 1 Neipa iꞌkao Eesusi ahjama Arirea weeerachiami ohjotiapua. Eesusia ki oinarekapua Uurea weeechiopua, iꞌisaeri paꞌpamiratuameeopua merinareniapao.
\v 2 Ekapora Pahko asiyopaopua iꞌisaeri papakotao,
\v 3 Eesusi poponiraa ki nakiyapaopua ahpo paꞌchio, chaachapakapua Eesusio:
\p —¿Achini iikai ki Uurea siminamua waꞌa mochikame aamo naꞌnaritoameai, aamo tetewimichiopua pahkochi, aamo ki maaenari tísia peenia tiame ihsiaopua tiame?
\v 4 Aaataai ahpo weruma tetewijeramea ki itipiamepua noriwio, ohso kaawe ahpo tetewitiamepua, ahpo peenia ihsiao, ahpo weruma tiiaopua, machipuawichiopua. Waꞌa simika iintometiaimua aamo peenia ihsiao, yooma waꞌa pahkochi nokayameo, aamo puꞌsereka tetewimichiopua.
\p
\v 5 Aapoe waꞌapi poponiraa, oowera waꞌa chaachapamekapua, ki ahjachi paparapapua Eesusichio.
\v 6 Nape Eesusia waꞌa chaachapopao, chaanekapua puꞌkao:
\p —Kaꞌi. Ki siimania pehji waꞌao, ki asiyame neeea noochio pehji, noꞌo teꞌta maꞌchiame oimiachiopua; nape waꞌa tiiainia noochio, amochio kaꞌchi tiamepua aamo siimpamiao.
\v 7 Eemea ki seepurawaemepua waꞌao, nape neeeape, neeea noꞌo seepurawao, maꞌchitamekapapua puꞌkao, ki kaawe nokayao.
\v 8 Eemea siimpanariaa siimpapuapua. Neeea iꞌwa itipimapua pehjio, ki asiyapa pehjio, noꞌoo teꞌta maꞌchiame oimichioopua pehjio.
\p
\v 9 Waꞌa cheeka itipika Eesusia Arireao, teeme ahjama ohjoameapua tiame.
\s Eesusia ekapora pahkotaniachi ihsiwa
\p
\v 10 Neipa ahpo poponi siimpasoopua, waꞌachi siimpatiapua tiame, nape Eesusia noriwi teetoka.
\v 11 Iꞌisaeri paꞌpamiratuamea pahkochio, iꞌyaka ohjoriapua Eesusio, iinatukeka tiꞌtijoerio.
\p
\v 12 Waꞌa pahkochio, muuwaeme tiꞌtijoeri kaaweruma naewamekapua Eesusio, ooweru tiame, nape puꞌkachepao noriwi teereka. Eesusi naewamea ookapi, kaawerumako tuuyamekapua Eesusio, nape wahjachia Eesusi naꞌaraka naewamea, ki kaawerumako tuuyamekapua Eesusio, tiꞌtijoe wisikuiameko tuuyapua puꞌkao.
\p
\v 13 Nape Eesusi kaaweruma chaachapamea, wichipa nayewaka kaawe chaachapaka nayewamekapua Eesusio, majayamekapa iꞌisaeri paꞌpamiratuameo.
\p
\v 14 Naasipa simiyoipa ekapora pahkoo, Eesusia tiopachi pakikao, waꞌa napawikame masitekapua, tiꞌtijoe ooweru tiame.
\v 15 Waikao waꞌa tiopachi iꞌisaeri waꞌa eꞌenamea, peenia erakoka inamukapa Eesusi masitiao, chaachapakapua:
\p —¿Achini ihsika ki ookapi machiyame ihji tijoea, ki penitetiameaipua maꞌmasitarieo?
\p
\v 16 Eesusia inamukapa puꞌka chaachapao, chaanekapua:
\p —Noꞌo masitiaa ki nooechi simiyamepua, apoe noꞌo uhjurakamee chanitiame ihjia.
\v 17 Aaata teꞌta Riosi eꞌra eꞌweka mochikamea, machika inamumapua iꞌka noꞌo chiiao, naneꞌremapua tiameo noꞌoo Riosichi eename nayewamekoopua; machika inamumapua noꞌoo, noꞌo nayewao oowera noochi machename enesoopua.
\v 18 Aaata piire ahka apochiche machename masitiame enesaa, ahpokamera kaawe eꞌrepuawichio masitiame puuua; nape aaata ahpo uhjurakamekamera kaawe eꞌrepuawichio iꞌyamea, teꞌta pichiwari nayewamapua ahpo uhjurariao, kihta ahpowichiokamera kaawe eꞌrepuawichiopua iꞌyakao.
\p
\v 19 ’¿Ki pichiwakosapu Riosi Moisetaruo kiꞌyaria nuuraria? Pichiwa tiiame enerepua, nape eemea kiisi yooriamepua puꞌka nuurario. Eemea puꞌka Riosi nuurari teꞌta yooriame enesaa, kiisi noꞌo merinaremii eemea.
\p
\v 20 Waikaopu tiꞌtijoeria, chaachapakapua:
\p —Nawajikamepu muuua, teekupakame muuua chiia. ¿Aatanapu aamo merinariamea?
\p
\v 21 Waikao Eesusia chaanekapua puꞌkao:
\p —Nee, piiripi tijoe sautekainia, nape eemea ki nuꞌuti noꞌo nekaweka tetewakapua, resipuniame taawechi noꞌo waꞌa iintoriopa. ¿Achini tiiachipa noꞌo nekawekame eemea?
\v 22 Eemeai kiisi iyoriamepua, eemeai resipuniame taawechioi, aamo siichitepuwa nokayamekopapua, puꞌka nokiwao teꞌta iyorimichio kiatiamekaipua, Moiseeo. (Nape ki Moisekamerae oꞌinetiamekoipua ihji siichitepuwa nokiwaopua, aamo waꞌapi ehkoriami noonorikamera oꞌineriamekoipua, iꞌka siichitepuwa nokiwameopua.)
\v 23 Waikao aamoo resipuniame taawechioi, aamo tijoe kohjakoi siichitepuameaipua, Moisetaru nuurari iyorikao, ¿achini iikai nekakona eemea noꞌoo aaata sautesoo resipuniame taawechio?
\v 24 Kiisi oowera waꞌa teeremeche tiamechiche neꞌnekache chaachapamete eemea. Eemea aaataoi ki kaawe iintorio chaachapanariaa, keꞌchu aaata teꞌyaiopua, teꞌta kaawe teeremio neꞌnesapa, teripuapua terinariaa.
\s Eesusia ahpo eenariachi nayewania
\p
\v 25 Eerusareni ohjoemea, Eesusi kaawe nayewame inamukaopua, ahpo chaachapakapua:
\p —¿Ki ihji ohjoare iꞌyaniamea merinareka?
\v 26 Waꞌa ihsinapua yooma inamuachi nayewaka, aaataai ki aꞌchi chaanenapua puꞌkao. ¿Waꞌatia kaawe eꞌrenakosapua iꞌisaeri yoorewa neesetoameai, pichiwa Riosie Weratiamekopua Riosichi eenameo, iꞌka wehjoarichi mochikamechiwichio weratiamekoopua?
\v 27 Nape teemea iꞌka tijoeo, ¿naneꞌriamekosa teemea, akana naawakamekoopua? Nape teꞌta Meesia eenoiopua, puuua Riosie Weratiame tewaniameo, aaataai ki naneꞌremeripua, ahka iꞌka weeechi oꞌinia eenariachio, teemea tewekachi oꞌinia enameriko erakoapa.
\p
\v 28 Iꞌka waꞌa tiame inamukapao Eesusia, tiopachi masiteka weeru nayewakao, chaanekapua puꞌkao:
\p —Ejeꞌe noꞌo maachi eemea, maachi eemea noꞌo ohjirachiopua tiameo, nape eemea ki maachipua ki iꞌka wehjoarichiche noꞌo ohjoemekoo. Neeea aaata aamo ki machiyamee, uhjuratiamepua.
\v 29 Neeea maachipua puꞌkao, pukae uhjuratiamekapa iꞌwa wehjoarichio.
\p
\v 30 Waꞌa chiiopa Eesusio, iyoriwa inatiamea, chapisa iꞌtomo orapakaipua Eesusio, peereso yachamia. Nape waꞌa erakokameai, ki chapikapua puꞌkao, Riosieo waꞌa tiiame poꞌyopua pehjio.
\v 31 Nape Eesusio muuwaeme ki nakiyoiopua, muuwaeme ahjachi erakoriapua tiame, wahjachia chaachapariapua:
\p —¿Aatana aaata epeche tiiame iintotamarepua ki ihjichitia, iꞌka eee tiiame ki maaenari yoorakao? ¿Ki ihjijuare Riosie Weratiamea?
\s Eesusi chapimia uhjuratiame
\p
\v 32 Iyoriwa neesetoria, ihchi kaawe naewaniopa Eesusio, ki anachapariapua waikao, ikanati uhjurariapua waikao, Eesusi chapimichio.
\v 33 Waikao Eesusia ahpo chapimia eꞌenakameo, chaanekapua:
\p —Kuꞌitapi yasimeri neeea, aamo ahjamaopua pehjio. Waꞌa ikisaapa neeea, noꞌramerinia, noꞌo uhjurakame kahtiachi.
\v 34 Waꞌa noꞌo noꞌrasoopua, noꞌo iꞌyaio eemea, ki noꞌo teimeripua. Noꞌo yasimiachio kaꞌchi iika eꞌenameri eemea waꞌao, noꞌo ahjamao.
\p
\v 35-36 Iꞌisaeria ahpo chaachapakapua:
\p —¿Achini cheeka chaanipua naaju ki ahpo teipo tuukao? ¿Wahka simika chiiarepua naaju seesenu weeechi, wahkami ahka mochikame, ki isaeri tiꞌtijoerikamera masitemia? ¿Akahtia akipatapua ki teipua?
\s Aaki neeroi ahjame yeename
\p
\v 37 Eesusia kajuyachio pahkoo, epeche iyoriwa taawechiopua pahkoo, werisika chaachanekapua:
\p —Aaata piire ahka paramuamea, noochi eꞌenaka nerojimeripua.
\v 38 Noochi eenaka nerojikamea, tísia kaawe erameripua ahpo iikachio, ki kuꞌita neeroi uꞌmamechitia akichi. Waꞌa chiiame Ehkoriami Iyoterichio.
\p
\v 39 Iꞌka waꞌa tiiame cheekao Eesusia, Riosi Riosiwari kuꞌiwa naewaka cheeriapua puꞌkao, Riosie Eesusichi paparakameo kiapuameopua puꞌkao. Nape ihji Riosi Riosiwari kuꞌiwaa, ahkasi Eesusi eenechi tewekachi mooenasopa, kiapuamepua Eesusichi paparameo.
\s Ahpo piꞌpirena poanatuwari
\p
\v 40 Waꞌa cheekame inamukamea Eesusio, chaachapakapua:
\p —Pichiwa waꞌa ikitiame ihjia, ehkoriami enamo tuutiamea Riosi nayewaturaeo.
\p
\v 41 Nape wahjachia chaachapapua:
\p —Apoe ihjia, Riosie teꞌta uutiamera, Riosie Weratiame.
\p Epeche wahjachia tiame, chaachapapua ookapi:
\p —¿Nape Arirea oꞌinia enatare puuua?
\v 42 ¿Ki Weereni machenamerikai puuua, Raawitaru tetejimarichi, ehkoriami yasakame Weerenichi waꞌapi? ¿Ki waꞌakosa chaanipu Ehkoriami Iyoteri?
\p
\v 43 Waꞌa chaachapakapa puuua Eesusio, ahpo poanatukapua.
\v 44 Ookapi puuu ki waꞌachitia ahpo inatamea, chapinareriai puuua Eesusio, nape kaꞌchi yoorakapua puꞌkao, waꞌa eꞌerakoaiopua.
\s Yoorewa yaꞌyawichia ki Eesusichi paparame
\p
\v 45 Waikao iyoriwa inatiamea waꞌao, waꞌatia nonowakapua parisero mochikachio, waꞌao teꞌta neꞌneseriosi paꞌpamuratuamea, iinatukekapua puꞌkao:
\p —¿Achinikai ki chapika eemea puꞌkao?
\p
\v 46 —Seewepaka teemeapu puꞌkao, ki nuꞌuti peeneka nayewamekopa, kiisi aawatachitia —chaachapaka nehjiariapua, iyoriwa inatiamea.
\p
\v 47 Waikao teꞌta neꞌneseriosi paꞌpamuratuamea, chaachapariapua:
\p —¡Aa eemeai, sewina erapakapua naaju, ahjachi paparanarekao?
\v 48 ¿Akana inamuame eemea, aaata taamo paꞌpamiratuameo, aaataai paꞌpariseroai, pukachi paparanariamekoo?
\v 49 Kaꞌii, waꞌa nokayamepua, ki machiyamea taamo masitiao. Waꞌa teꞌteriapa puuua, kokosapuamepua Riosieo.
\p
\v 50 Nape Nikoremoa, puuu piie tukaoo Eesusi nayewemia eenakamea, chaaneriapua ahpo napawiriachio:
\p
\v 51 —Taamo nuurari yooreka mochitoniamea, iinatuteka naneꞌrenuriamepua pahcha, itapiti aaata aꞌchi iintoria katewenariaa.
\p
\v 52 Aapoeo nehjiariapua:
\p —¿Ki muuuju tiame Arirea tijoe, puuuchitia? Neꞌneo amoe, iꞌka Ehkoriami Iyoterichio ki waꞌa chiio, aawataai puuu Riosi naꞌnayewaturao, ki Arirea puuyakamekopua.
\p
\v 53 Napawikamea, yooma iꞌka chaachapasaapa, nonowariapua tiame, ahpo taꞌpechiami.
\c 8
\s Oowitiame suwepori ihsiame
\p
\v 1 Nape Eesusia, teewi ajasitiapua roomosachite, Ooriwo tewaniachi.
\v 2 Puꞌka meereo, piari yasisisaapa, eenechi waꞌa eꞌenatiapua iꞌisaeri tiopachi. Waꞌao, muuwaeme ahsekapua puꞌkao. Waikao Eesusia yasipakao, oꞌinekapua eenechi, masiteka.
\v 3 Waꞌa ihsioipa Eesusio masitekao, Moise nuurari neꞌnesetoria, paꞌpariseroa tiame waꞌa eꞌenakapua, piiripi oowitiame iꞌtoka, suwepori ihsioi chapitiame. Ihjia puꞌkao, naasipa werapakao,
\v 4 chaachapakapua Eesusio:
\p —Masitari, iꞌwa weeri ihji oowitiame, suwepori ihsioi chapitiame.
\v 5 Moisetaru nuuraria, pasaka merinuramepua waꞌa iintokameo. Nape muuua, ¿ihtana iintopuameko chiiamemua iꞌka oowitiame waꞌa iintokameo?
\p \fig |GR-tlc064n.tif |col|||Iꞌisaeri paꞌpamiratuamea, oowitiame suwepori ihsioi chapisaa Eesusi uꞌpasaopua puꞌkao, Eesusi iinatukena ihtana kokosapuamekopua puꞌkao.|8:5\fig*
\v 6 Oowera waꞌa chaachapakame puuua, Eesusio ki kaawe chaachasoo, chapinariapa. Nape puꞌkao waꞌa chaachapoio, Eesusia chukipaka wehchi iyotekapua.
\v 7 Waikao, simiteniapaopua iinatukekao, riisasipakao Eesusia, chaanekapua puꞌkao:
\p —Aaata eemea ki tatakorieme enesaa, pasipupuapua, iꞌka oowitiameo.
\p
\v 8 Waꞌa cheesapa, eenechi chukipaka simitekapua iyotekao, wehchi.
\v 9 Waikao waꞌa chaanetiapa aaata pasipumeria, aaataai ki pasipukapua, piiripi oꞌinekaopua ahpo tehte makoyao, waꞌatia ki pasipusa yooma pipiripi ahka ihpapasa nonorakapua, oꞌochetiame pahcha oꞌineka, ahkasi yooma. Waꞌa ikitoopua Eesusia, piineri toitiapua, oowitiameche ahpo chokichi weeriameche ahjama.
\v 10 Waikao Eesusia oowitiameo, nanarichi neꞌnepaka iinatukekapua:
\p —¿Akana uumparupu aamo wenejiamea? ¿Piiripiai, ki aamo pasipurupua?
\p
\v 11 Kaꞌi —cheekapu oowitiamea— aaataai, Paamira.
\p Waikao Eesusia chaanekapua puꞌka oowitiameo:
\p —Neeeai waꞌatia aamo toiyamepua, kihta terika. Neeea aamo ki kaawe iintoriao, cheriwetiame aamo itipitiamenia. Kaawe erakoka noꞌrasa naaju. Kaꞌte oosa aampa, tatakorimitia naaju.
\s Eesusia yooma wehjoarichi tajayame
\p
\v 12 Waikao Eesusia, eenechi simitekaopua masitekao, ahpo masitiao, chaanekapua:
\p —Neee puuua, iꞌka wehjoarichi mochikame tajayamenia, ki tukapachi ohjomichiopua. Noꞌo naꞌnaritoamea, ki tukapachi oimeri puuua, noꞌo tahjera uutapachi oiyapa. Noꞌo tajaya pahtewari apochi uukamea, teꞌta weemera ahjari iinuepamepua, ahkasi ki wahjiamesi.
\p
\v 13 Paꞌparisero iyoriwa inatiamea, chaanekapua Eesusio:
\p —Amoe waꞌapi, nayewanimua, aamo waꞌapi. Ahpo waꞌapi nayewaniamea, kiisi pichiwapua chiiaa.
\p
\v 14 Eesusia nehjiakapua:
\p —Nape waꞌatioi, noꞌo waꞌapi nayewainia, pichiwa chaaninia, naneꞌriapa noꞌoo, aatanako. Neeea naneꞌriamenia noꞌoo, akana oꞌinia noꞌo eenamekoo, akana noꞌo noꞌwamerikooipua tiameo; nape puꞌkao eemea noꞌoo, ki naneꞌriamepua.
\v 15 Eemea, ki noꞌo teꞌta machiyamekai aatanakoo, ki pichikiame eemea noꞌo pichiwa chiiao, noꞌo weeechiche ohjoeme maayamekapapua, oowera weeechi mochikamechitia inatamepua. Nape aamoo waꞌatia ki kaaweruma inatoiopua noochio, kihta aamo iikachio iꞌyame neeea, kaawerumakoio ki kaawerumakoio, aaatachioipua amochio.
\v 16 Nape amochi iꞌyame enesaania, ki ookapi teimiinia ki kaꞌkaruma noochi inatao. Waꞌa ikimeri neeea amochio, ki piinerikapa neeea teꞌta pichiwatamea, ookakapa teemea amochi iꞌyameria, neeepua piiripia, noꞌo Noonopua piirea, Apoe noꞌo uhjurakamera, teꞌpa tewekachi kahtiame.
\v 17 Aamo yoorewa iyoriwachio, ooka tijoe waꞌachi chaachapaka pichiwatameo, pichiwachitia uuyame eemea.
\v 18 Waꞌa teeresoo aamo yoorewa iyoriwao, waikao ooka pichiwatamea iniwae neeeai: noꞌo Noonopua piiripia, apoe noꞌo uhjurakamera, neeepua piirea. Naꞌpa teemea, waꞌachi chaachapaka pichiwatamepua, noꞌo chiiao.
\p
\v 19 Waikao aapoeo chaachapakapua:
\p —¿Nape akana kahti aamo noonoa?, ki naaniatepua iꞌwao.
\p Eesusia nehjiakapua:
\p —¡Aa, waꞌa chaachapaka nayewame eemea, teꞌta noꞌoo ki machiyapa, teꞌta noꞌo Noonooi ki machiyapa! Teꞌta noꞌo machiyame enesaa eemea, machiyame enemii eemea noꞌo Noonooi.
\p
\v 20 Iꞌka waꞌatiame cheeka masiteka Eesusia isaeri tiopachio, waapi toomi ihkokewa toaniachiopua, tiopachiwichio kuꞌiwariopua. Waꞌatiame masitioiopua, ki aaata aꞌchi yoorare Eesusio, chapinariaiopua puꞌkao. Puuu Eesusi chapinariai ki chapitiamea, apoe waꞌa teerere puuua, ki asiyapa pehji, Riosi nakiyachitia chapipuameo.
\s “Noꞌo simiyachio kaꞌchi iika siimpamete eemea”
\p
\v 21 Eesusia eenechi chaanekapua:
\p —Siimerikaite neeeapa. Waikao eemea, ahkaoi noꞌo iꞌyaio, ki noꞌo teimii eemea, waꞌa noꞌo simiyachio. Noꞌo simiyachio, kaꞌchi iika siimpameri eemea.
\p
\v 22 Iꞌisaeri yoorewa inatiamea ahpo chaachapakapua waikao:
\p —¿Ahpo merimerijoarepua naaju, kaꞌchi iika siimpo tuukaopua ahpo simiyachio?
\p
\v 23 Nape apoeo simitekapua chaaneka:
\p —Eemea iꞌwa teere tijoetukamepua weeechi; neeea, teꞌpa tewekachi oꞌinia eenakamepua; noꞌo teꞌta ahjaria, ki iꞌwa weeechi oꞌinekamepua.
\v 24 Neeea aamo tatakorichi wahjipamio tuukamenia, ki noꞌo machisaa noꞌoo, teꞌta aatanakoo, aaata teꞌta aamo tatakoriria cheriwiameraopua. Waꞌa tiachipao, ki noochi eꞌenaka aamo cheriwenuresoopua tatakoririao, aamo tatakorie wahjipameri eemea.
\p
\v 25 Aapoeo ki pahtekapao, chaachapakapua Eesusio:
\p —¿Aatana muuua naaju?
\p Eesusia chaanekapua:
\p —¿Aatia eenechi aamo chaanetania? Aamo chaanekame neeeapa aatanakoo.
\v 26 Neeea ki ookapi iinueme neeea, aamo wenejime tiiao, nape ki iintomania. Puuu ki kaawe aamo noonowiria noꞌo wenejime tiiaa, aaata noꞌo uhjurakamechi oꞌinia eenamepua, apoe teꞌta naneꞌriamerachi oꞌinia, pukaepa teꞌta pichiwari tiiamepua.
\p
\v 27 Nape aapoeo kiisi pahteriapua Eesusio, ahpo Noono tewekachi kahtiame nayewaka chiioiopua.
\v 28 Pukaepa Eesusia kiisi pahteka inamuriopao, ehpeche tuuyekao chaanekapua:
\p —Noꞌoo, Tijoe Tijoetukameo meꞌyakameo, teꞌpa apechunasapa kurusichi noꞌoo, naneꞌrema eemeapu noꞌoo, apoe tewekachi eenamekoopua, ki nooe ihsiameko tiameopua noꞌoo, noꞌo Noono naewasoche, chaachasiamekopua neeeai.
\v 29 Noꞌo uhjurakamea, noꞌo ahjama yasitoamepua, ki piineri noꞌo toaka, noꞌoo ahpo eꞌra yorasiopa, ahpo kaawe eꞌriakamera.
\p
\v 30 Iꞌka waꞌa chiiame inamukapao, muuwaeme ahjachi oowe erapakapua.
\s Riosi tatanara nayewaniame; tatakori teekoraeme nayewaniame tiame
\p
\v 31 Waikao Eesusia, puꞌka iꞌisaeri ahpo tuuya pichikekameo, chaanekapua:
\p —Waꞌapi teꞌteretosaa eemea, noꞌo masitewa penipakao, pichiwa noꞌo masitera enemapua waikao.
\v 32 Waꞌa teꞌteretoka epeche epecheche, noꞌo machipama eemea noꞌoo, aatanakoo, waꞌapi aamo teꞌteretosoo noochi paparakao, senepi aamo tatakoririoio aamo piipatesima neeea tatakoriaio. Waꞌa iintoka aamo, puhjesiame enema neeea puhkuchitia chapitiame iinueniameo.
\p
\v 33 Nape wahjachi Eesusi chiia ki pichikiamea, chaachapakapua:
\p —Nape teemea, ehpe taawechi Aurani tetejimara teemea, ki aawata puhkurachitia chapika mochitiame teemea, seenepioi. ¿Achini tiiachipa taamo puhjemio tuunamua, taamo puhku mochiniachitiao?
\p
\v 34 Eesusia chaanekapua:
\p —Pichiwa pichiwapua noꞌo aamo chaaniaa, senepi tatakorika kahtiamea, puhkuchitia kahtipua chapitiame.
\v 35 Aaata puhkuchitia yasitoame piie taꞌpechio, ki tejimarapua waꞌa taꞌpechio, nape teꞌta tejimaraa piie taꞌpechio, teꞌta taanarakamera puuua.
\v 36 Nape neee Riosi Taanarao, aamo puhjesoo tatakorio, pichiwa naꞌsoame itipima eemea, puꞌka aamo chapitiamechitia mochikao, tatakori puhkurachitiao.
\v 37 Naneꞌriamenia aamoo, Aurani tetejimari tiꞌtijoetukamekoopua, nape waꞌa teꞌteriamekai eemea, noꞌo merinarepua, ki pichikiapa eemea, noꞌoko aamo tuuyao, tewekachi oꞌinia eenamekoo.
\v 38 Noꞌo Noonochi simiyame tetewitenia nayewani neeea, nape aamo noonoa piirechipua, puꞌka aamo noono aamo chaanesia yorasina eemeai.
\p
\v 39 Aapoeo nehjiakapua waikao:
\p —Kaꞌi, Auranikamera tetejimari teemea, pukachi puuyakamekopua.
\p Eesusi chaanekapua:
\p —Aurani tetejimari enesaa eemea, Auranichitia mochimii eemea, waꞌachi nokaka, Riosi chiia pichikeka, ahjachi paparaka tiame.
\v 40 Nape eemea, sewina nookapua, noꞌo merinarepua, noꞌoo teꞌta Riosi pichiwarikamera noꞌo nayeoio, teꞌta apoe noꞌo Noonochi inamuriaopua. Apoe Aurania ki waꞌa tiiame iintomii puuua.
\v 41 Eemea, aamo piirechi noono ihsia, yoora nokayame eemea.
\p Aapoeo nehjiakapua:
\p —Kiisi noonoeme teemea piirechio, piisi noonoo; piiripi waꞌapikamera taamo paamiraa, apoe teꞌta Riosiche.
\p
\v 42 Eesusia waꞌa chaachapakopao, chaanekapua:
\p —Apoe paamira Riosio, pichiwa aamo paamira enesoo, noꞌo nakika uumii eemea waikao, ki sewina Riosichi noꞌo eenakameko tuuka, ki seenu neeea puꞌkao, apoe waꞌapikaite neeea.
\v 43 ¿Iiweta ki noꞌo pahtiame eeme? Eemea ki pahtiamepua, oowera weeechi tijoe noꞌo tetewapa, pukaepa ki pichikenariame eemea noꞌo aatanakoo chiia.
\v 44 Satanasipua, teꞌta aamo paamiraa. Pukaepa puꞌka aamo paamirae nuurenia, nokisinare eemeapu, noꞌo merinare eemea, aamo paamirao waꞌapi waꞌa eꞌropapua, merijerario. Aamo paamiraa, kihta iinuepua pichiwarichi simiyameo, pukaepa ki nakika tetewanipua ihta pichiwario. Ihji wistuaa, apoe waꞌapichi ikika machenamepua, ihjia, wistuniame apoe noonorapua.
\v 45 Pukaepa waꞌachi teꞌte eemea, ki noꞌo pichikekao, noꞌo pichiwa chiiao.
\v 46 ¿Aatana eeme noꞌo chaanetapua, akana noꞌo aꞌchi ihsiriao, naꞌara iintorio? ¿Kiisi wistuame enesoo, aatia ki noꞌo pichiketa eemea?
\v 47 Riosi ahpo paamiraemea, Riosi yoorenapua. Eemea, ki yoorenapua Riosio, seenukapa aamoo, paamirao.
\s Riosie Weratiamea keꞌchu Auranikoi yasariame puuuapa
\p
\v 48 Isaeri tijoea chaachapakapua:
\p —¿Ki Saamaria tijoe muuua, reemowari yahchame amochio?
\p
\v 49 Eesusia chaanekapua:
\p —Kaꞌi, ki reemowari yahchame neeea, noꞌo Noonoche kaawerumari yachatoame neeea; eemea waꞌa chaachapakao, ki noꞌo yooretiame eemea.
\v 50 Nape neeea, ki nooe noꞌo weruma iintani neeea, piirechipua waꞌa tiiame noꞌo iintamea, apoepua, Riosi; apoepua chanimeria, aamo chaachapao pichiwakoo.
\v 51 Ihji noꞌo chiiaa, tisiwa pichiwaripua, pichiwachitia uukamea noꞌo chiiao, ki tetewimapua apochio mukiwario.
\p
\v 52 Isaeri tiꞌtijoeria chaachapakapua waikao:
\p —Ehpeo pichiwa erakoame teemea, reemo naꞌarame yahchamekopua amochio, aamoo chiiopao: “Aaata noochi paparakamea, kiisi mukumeripua.” Nape taamo ehkoriami Aurania, yooma Riosi naꞌnayewaturaapua tiame, yooma wahjipakamepua waꞌasi.
\v 53 ¿Naakonakosa muuua epeche tiiame ohjoare muuua, ki mukimeriko tuumeriwichio? ¿Ihtanakoo aamo maayamemua?
\p
\v 54 Eesusia nehjiakapua:
\p —Nooe waꞌapi noꞌo nayewasaane noꞌoo aatanakoo, kihtawichio natemii puuua noꞌowichioo. Nape noꞌo Noonokamera waꞌa chaanipua, noꞌoo aatanakoo, aamo waꞌapi aamo Riosiwa teewa.
\v 55 Nape puꞌkao eemea, kiisioi ahjama teꞌteriai chaachapani eemea amochio. Neeekamera, ahjama teereka yasitoamepua. Ki noꞌo Noono ahjama noꞌo teerewaeme tewasaania, wihtumii neeeai, amochitia. Nape neeea, ahjama teerewaemepua, puꞌka cheesia ikisiame neeea.
\v 56 Aamo ehkoriami Aurania, tísia kaawe eꞌrakapua noꞌo machiyapao. Pichiwa noꞌo machika puuua, peenia eꞌraka noꞌo tetewakapua waikao.
\p
\v 57 Isaeri yaꞌyawichia chaachapakapua waikao:
\p —Ki weeka paamuamemua pehjio, ooka weerewa oosa marikioi paamupario, ¿achini tiiachipa tetewako tuunamua Auranio?
\p
\v 58 Eesusia chaanekapua:
\p —Teꞌta pichiwapua noꞌo chiia, ki ehpesi oꞌinia kahtiai tiiame neeea; keꞌchu Auranio ki tijoeturioi pehjio, ahjakame yasitoame neeea.
\p
\v 59 Waikao waꞌa cheesopa Eesusio yaꞌyawichia tehte uusa, papaka merimo erakoaipu. Nape Eesusia, ki tetewiniame enepakaopua weerewarao, newikapua waꞌao, waꞌa isaeri tiopachio machejenakaopua.
\c 9
\s Eesusia ki maꞌchiriame maꞌchirepateria
\p
\v 1 Eesusia isaeri topachi machenasaapa tiꞌtijoeri mochikachi uumatonioio, aaata ki maꞌchiriame tewitiapua waꞌao. Ihjia, waꞌapi teeka naawakame eneriapua.
\v 2 Waikao aaata teeme Eesusi ajawariaa, chaanekapua:
\p —Masitari, ¿aatia tiiachipa waꞌa tiiare ihjia ki maꞌchirekao, ahpo yayawa tatakoririopa waꞌa tiiamejuarepua, apoekosaoi tatakorikapa, waꞌa tiiare puuua?
\p
\v 3 Eesusia taamo nehjiakapua cheeka:
\p —Kaꞌi. Kihta puꞌka waꞌa tiiachipua, ahpo yayawa tatakoriawichiooi, apoe waꞌapioi tatakoririawichiooi; nape puuua, pukachi ikitiame neꞌnetepuawichio ikitiamepua Riosi utewarieo, kaawe ihsiamekopua ki maꞌchiriame sautekao, Riosi ahpo utewarieopua.\fig |131-DN00456b.tif|col|||Eesusia aaata ki maꞌchiriame sautena.|9:3\fig*
\v 4 Iꞌka kaaweruma yoorachitia nokisimeri teemea, noꞌo uhjuratiame teꞌta nakiyachitia, iꞌka weeechi ajatoaapua pehjio. Ki waꞌa nokisisaa teeme, ki Riosi tehkiwarakamera nokisima teemea.
\v 5 Neeea, iꞌwa wehjoarichi kahtiaa pehjio, neee inisimapua tahjetosikaopua, kaawe pahtemichiopua Riosi kaaweruma tuuyewario.
\p
\v 6 Waꞌa chiiaipua pehjio, wehchi akachupaka wesosaopua, puꞌka tijoe puichi chuhchepakapua.
\v 7 Waꞌa yorasaopua puꞌkao, chaanekapua puꞌka ki maꞌchiriameo:
\p —Ehpeo waami aamo iꞌtonurepuapua Siroe tewaniachi neeroi maaniachi pusitepuapua; waꞌao, Uhjuratiame cheeka chaniwame.
\p Waikaopu ki maꞌchiriamea waꞌa iꞌtotiapa papakosaapua ahpo puichio, maꞌchiriame eenarepua Eesusie ahpo uhjuratiachio.
\v 8 Waikao puꞌka waapi ohjoemea, wahjachi tiameopua machiyamea, ki maꞌchiriame tetewikamea, ahpo chaachaparepua puꞌkao:
\p —¿Ki ihjipu tijoe, ahkaoi ihkoriwa itaka yayasame?
\p
\v 9 Wahjachi ookapia chaachapariapua:
\p —Ejeꞌe, puuupua.
\p Nape wahjachi pehjia chaachapariapua:
\p —Kaꞌi, seenu puuua, nape waꞌachi tiamepua tijoe.
\p Nape puuu ki maꞌchiriameai maꞌchirepakamea, chaanerepua:
\p —Neee puuukaitepua.
\p
\v 10 Aapoeo waikao, chaachaparepua:
\p —¿Achini iika maꞌchiriamemua ehpeo?
\p
\v 11 Waikao ki maꞌchirekamea chaanerepua:
\p —Aaata Eesusi tewaniame iintokapua, noꞌo kawiyame maꞌchirepatekao. Puuua, ahpo aꞌkae wesosapa weꞌeo, noꞌo puichio chuhchesaopua, Siroe neeroi maaniachi noꞌo uhjurakapua, noꞌo puichi papakomichioo. Waꞌao pusitesache kawiyame maꞌchiriame itipikania.
\p
\v 12 Waikao aapoeo chaachaparepua puꞌkao:
\p —Ehpepe puuua, ¿akana kahtipua ihsisaa?
\p Sautetiamea nehjiarepua:
\p —Iiná. Ki tetewakania ahka akipariachio.
\s Parisero tijoea, utewaeme iinatukenapua, ki maꞌchiriai yachapatetiame
\p
\v 13-14 Waikao ookapi puuu iinatukiamea, resipuniame taawechikopa, Eesusi sautioiopua puꞌka ki maꞌchireriameo, kiisi kaawe erakoriapua Eesusichio. Waikaopu tijoea, parisero paꞌpamuratuamechi uꞌpariapua, teꞌta Moisetaru nuurari neꞌnesetoamechi.
\v 15 Waikao waꞌa uꞌpasaopua, iinatukeriapua tijoeo, achini iikapa maꞌchiriamekoopua puꞌkao. Waikao ki maꞌchireriai sautetiamea, chaaneriapua:
\p —Puuu Eesusi tewaniame noꞌo puichi wehsara chuhchesaopua, noꞌo pusitemichio noꞌo uhjurakapua Siroe neeroi maaniachi. Waꞌa iintosache, kawiyame maꞌchiriame oiyamenia.
\p
\v 16 Waꞌa chiiopua, ookapi pariseroa ahpo chaachapariapua:
\p —Puuu tijoe waꞌa iintokamea, kiisi Riosichi eenamepua waꞌa teesoo, kiisi iyoriamepua resipuniame taawechio.
\p Nape wahjachi puuua chaachapariapua:
\p —Nape, ki Riosichi eenamea, ¿iintotariarepua waꞌa tiiameo, itapiti ki maaepori tiiameo?
\p Waꞌa chaachapaapua ki napati waꞌachitia inatame eneriapua, paꞌpamuratuamea.
\v 17 Waikao eenchi iinatukeriapua sauteriameo:
\p —¿Aachin chaani muuua puꞌka tijoe aamo sauteriao?
\p Waikao sautetiamea, nehjiariapua puꞌkao:
\p —Neeea, aaata Riosichi eenamekotinia puꞌkao.
\p
\v 18 Waikaopu isaeri paꞌpamuratuamea, ki pichikeriaipua puꞌka tijoeo ki maꞌchirerio tuuyao, aaata sautetiameoi, ahkasi yayawara paaesapa pichikeriapua.
\v 19 Ihjia yayawara paaesaopua iinatukeriapua:
\p —¿Pichiwa ki maꞌchiriame naawakame ihjipu aamo taanaa? Waꞌa teerekame enesoo, ¿ihtana ikirepua?, maꞌchiamepua ehpeo.
\p
\v 20 Waikao yayawaraa nehjiariapua:
\p —Ejeꞌe, teꞌta naneꞌriame teemea, ki maꞌchiriame naawakamekopua,
\v 21 nape ki naneꞌrena teemea aaata sauterioo, aatia tiiachipaoi maꞌchiriamekopua puꞌkao. Apoekamera iinatukepuapua, puichi sautetiamera, apoe naneꞌreme tiiamepua waꞌasi, ki temarikapa waꞌasi. Apoe waꞌapi aamo kaawe nehjiamapua, puꞌka aamo iinatukeriao.
\p
\v 22 Yayawaraa waꞌa cheeka nehjiare puuua, parisero paꞌpamuratuameo majayapa, naneꞌriamekapa puꞌkao, Eesusi Riosichi eename sauterio tuusoo, maꞌchipapuameko tuutiamekopua, napawikarichiopua waꞌasi.
\v 23 Pukaepa yayawaraa, ahpo taanakamera iinatukenureriapua ohso kaawe.
\p
\v 24 Waikao parisero paꞌpamuratuamea, eenechi paaesao sautetiameo, chaaneriapua:
\p —Iꞌka aamo ikiriao, Riosikamera kiapuapua cheriwemao, ihji tijoe aamo sautekamea kiisi Riosi nuurari iyoriamekopua, ki nuꞌuti tatakoriame.
\p
\v 25 Waikao sautekamea chaanerepua puꞌkao:
\p —Pichiwa tatakorikame enesoo aamo chaachapachitiao, neeea ki naneꞌriamepua puꞌkao. Nape iꞌkache teꞌta naneꞌriamenia, pukerio neeea, kiisi maꞌchiriamekainia, ehpeo neeea kawiyame maꞌchiriamenia.
\p
\v 26 Aapoeo eenechi iinatukeriapua pehji:
\p —Nape, ¿ihtana aamo yoorarupua? ¿Achini iintorupua aamo tetewitepuawichioo?
\p
\v 27 Waikaopu sautetiamea, chaaneriapua puꞌkao:
\p —Aamo chaanekasai neeeapa. ¿Ki noꞌo inamukamekosa eeme? ¿Eenechi aamo chaanejerani eemea naaju? ¿Epeche kaawe naneꞌrenariamea naaju, ahjachi paparanariapa eemeai naaju?
\p
\v 28 Waꞌa chiiopao sautetiameo, paꞌpamuratuamea waikao, teꞌyariapua chaachapaka:
\p —Ihchiasamua puꞌkao. Muuukamerapu ahjachi paparamea. Teemea, Moisetarukamera chiia oowe eꞌriamepua.
\v 29 Puꞌkakamera naneꞌriame teemea, Riosie nayewetiamekopapua, nape iꞌka tijoeo, kiisikoi kihta naneꞌriame teemea, ahka machenakameo.
\p
\v 30 Waikao tijoe sautetiamea chaaneriapua puꞌkao:
\p —¡Naakonakosa! ¡Ki pahtiame eemea akana oꞌinia eenamekoopua Eesusio, noꞌo puichio sautékame?
\v 31 Aaataai tatakoriamea, kaꞌchi iika waꞌa iintomeriipua, ki Riosi utewarieme enesaa. Waꞌa teesoo puuu noꞌo sautekamea, kiisi ihta tatakoriemera puuua. Apoekamera puuu Eesusia waꞌa teesoo, Riosi utewarae noꞌo sautekamea, puuua teꞌta tewekachi Noꞌno utewarira iinuemepua, Riosio teꞌta ahpo utewario, ki oowe aaata tijoe kiꞌyamekoopua.
\v 32 Aaata oowera tijoea, iꞌka weee yasipariachisi oꞌinia, seenepioi ki inamuamepua, aaata sautiameopua, ki maꞌchiriameo.
\v 33 Waꞌa tiachipao, ihji tijoea ki Riosichi eenakame enesaa, kaꞌchi iika iintomii puuuapu, ihtaoi iꞌkaka tiiame iintowao. Waꞌa teesoo maꞌchiame apoepua, Riosichi eename.
\p
\v 34 Waikao chaachapariapua paꞌpamuratuamea:
\p —¿Waꞌa taamo chaaniame muuua? ¿Taamo masitiame muuua, tísia tatakorie pochikame naawakameai?
\p Waikao ki maꞌchiriame sautetiamea, waika oꞌinia uꞌyeretupua reesiserio, iꞌisaeri napawikarichi pakiniameopua.
\s Ki apochi iinuekapa Riosi Riosiwario, ki maꞌchiriameka teꞌteriame
\p
\v 35 Waikao Eesusia, puꞌka ahpo sauteria waꞌa napawikarichi waꞌa iꞌisaeri napawikarichio, ki reesiseniame inamukapaopua pakimichioo, iꞌyasitiapua puꞌkao. Tewisaopua iinatuketiapua Eesusieo:
\p —¿Paparame muuuapa, Riosi Tijoetukamechio?
\p
\v 36 Sautetiamea cheekapua:
\p —¿Pukachi paparatare neeea, ki machiyameaipua pehjio? Noꞌo tetewitepuapua puꞌkao, noꞌo ahjachi paparamichioo.
\p
\v 37 Eesusia chaanekapua waikao:
\p —Tetewani muuuapa puꞌkao, neee puuua apoea aamo ahjama nayewame.
\p
\v 38 Waikao sautetiame ki maꞌchiriamea, chaanekapua Eesusio:
\p —¡Naakona! ¡Muuupua? ¡Ejeꞌe, waꞌa teesoo, amochi paparame neeea!
\p
\v 39 Eesusia waikao, yooma ahjama ajaka inamumichioo, cheeka nayewekapua puꞌkao:
\p —Neeea iꞌka wehjoarichi eenakamenia, tiꞌtijoe ooweru tiame ahpo iikachi pahtetemia, aachin teꞌtereka mochikamekopua ahpo iikachio, Riosichi ahpo teꞌterewa, pukachi kaawe teꞌterewao ki kaawe teꞌterewaoi. Puuu ki kaꞌkarumachi nokayamea, ki maꞌchiriameka teꞌteriame puuua, puuua ki kaawe teꞌteriamepua Riosichio. Puꞌkawichio eenakame neeea, tiꞌtijoe ooweru tiame ki maꞌchiriameka teꞌteriameopua apochio, puhjemia puꞌka ki maꞌchiriameka teꞌteriao, noochi eꞌenasoo ahpo tatakoriria, cheriwejerakao. Nape puuu ki maꞌchiriameka teꞌteriameopua apochio, ki tetewamekapa puuua, ahpo ki kaawe teꞌteriaopua Riosichio, waꞌapi teeka itipimeriipua ahpo ki maꞌchiriachitia.
\p
\v 40 Waꞌa chiiopa Eesusio, ookapi paꞌparisero waꞌa waapi ajaka inamukamea, chaachapakapua Eesusio:
\p —¡Naakona, ki mamachiriamekosa teemea?
\p
\v 41 Eesusia waꞌa chaachapopao, chaanekapua puꞌkao:
\p —Pichiwa ki mamachiriame maaeria enesaa eemea, aamo Riosichi ki kaawe teꞌterewa erakokao, noochi eꞌenamiipua aamo cheriwepuawichioo. Neeea waikao aamo cheriwemiipua aamo tatakoriwao. Nape eeme aamo mamachiriame erakoamea ki kaꞌkarumachi teꞌteriaai, waꞌapi teereka itipimeri eemea ki mamachiriamechitia, aamo kiisi kaawe noonowiriachitia Riosichio, apoe Riosi tetewachio.
\c 10
\s Poꞌwa koꞌrerachi ichikoamea
\p
\v 1 Waꞌa cheeka kajusaapua Eesusia, ahpo simitewa masitewachiopua, iꞌka masitekapua:
\p —Pichiwari chaaninia, ki yeetapuwachiami pakiyamea poꞌwa koꞌrechio, ichikoameche puuua;
\v 2 nape yeetapuwachiami pakiyamea, apoe tepuyakamerapua poꞌwao.
\v 3 Iꞌka tepuyameo, wahjonenapua yeetapukiamea waikao pakisaapao tepuyamea, nayewenapua poꞌwao maꞌchi puuyanamia, yooma pipiripichi teewaka, poꞌwaai iꞌka iiyenao, machika inamuamepua.
\v 4 Yooma puuyanasaapa ahpo tepuyao, pahcha weritoamepua ahpo naꞌnaritopuawichioo, tepuyamea. Waikao poꞌwaa, naꞌnaritoamepua puꞌkao, machika inamuamekapapua ahpo yeetotoameopua.
\v 5 Aaata seenu enesoo, ki naꞌnaritomapua puꞌkao, ohsotia ujumamapua pukachio, ki machiyapa puꞌka seenu tijoeopua, iiyenao.
\p
\v 6 Iꞌka waꞌa tiame nayewekai Eesusia puꞌka paꞌparisero paꞌpamiratuameo, nape puuu paꞌpariseroa, kiisi pahteka inamukapua Eesusio, ahpo apochi paparapuame nayeweka chiioiopua puꞌkao.
\s Eesusi poꞌwa tepuyamechitiao, kaawerumara tepuyame
\p
\v 7 Waikao waꞌa cheesaapa Eesusia, simitekaopua pehjio, cheekapua yooma inamuachio:
\p —Weruma inataka inamumitiamua iꞌkao. Neeepua yeetapuraa, poꞌwa koꞌrerachi muiniachio.
\v 8 Yooma noꞌo keꞌchu eenoi eꞌenakamea, ahpokamera naꞌnaritomichio tiꞌtijoeri yeetokamea, wiꞌwisikuame puuua, ichikoamepua tiame. Nape aaata noꞌo naꞌnaritokamea, noꞌo puhku poꞌwakameka teꞌteriamepua, puuua, ki eꞌwaka inamukamepua puꞌka wiꞌwisikuame chaachapao.
\v 9 Neeepua puꞌka koꞌrerachi muiniamea, waꞌa pakikamea noꞌoe tepupuame puuua, tísia kaawe neesetopuamepua noꞌoeo, newipuatepuame puuua tiaméo.\fig |132-GR-tlc066n.tif|col|||Powakorechi mochikameo poꞌwa, muirachi yasaka inatena tepuyameraa, waꞌa pukamina chuhkopa sapoorio konareka.|10:9\fig* Ahkaoi noꞌo ohjotioioopua tepuka, kihta tooremumeri puuua.
\p
\v 10 ’Ichikowaria, naꞌara iintoka ichikoemia eꞌenamepua, merimia, kajuka naꞌatamia; nape neeea, ahjamichio eenakamepua, noꞌo korewachi enepameopua, teꞌta ahjario, paarasateka kiamania.
\v 11 Neeea, kaaweruma tepuyamerania. Kaaweruma tepuyamea, ahpo mukiwachisi nehpupamepua ahpo poꞌwa tepuyao.
\v 12 Oowera natetewachi tepuyamea, ki ahpo iinuwakopa poꞌwao, ki kaawe tepuyamepua puꞌkao, itapiti oorie naaepatioopua ahpo tepuyao, piineri toisa uꞌmamepua poꞌwa tepuyao. Waikao ooria, waꞌa eenaka koꞌkoniamepua poꞌwao, chiꞌchiripatiamepua puꞌkao.
\v 13 Oowera tekipanaka tepuyamea, toisa uujumamepua puꞌka poꞌwa ahpo tepuyao, kaꞌchi eꞌrakapua wewekatekai, ki ahpo puhkukopua puꞌkao.
\p
\v 14 ’Neeea, kaaweruma tepuyamerakamerania, noꞌo ijinuwakopa puꞌkao, ahjama tiiame neeea, aapoeai waꞌachitia tiiamepua noochio.
\v 15 Neeea teꞌta noꞌo Noonoo, waꞌachitia noꞌo machiyao, neeeai waꞌachitia machiyamepua. Neeea, noꞌo poꞌwa tepuyao, waꞌachitia noꞌoe machiyachitia puꞌkao, noꞌo poꞌwa tepuyaai waꞌachitia noꞌo machiyamepua tiame.
\v 16 Neeea pirenachiamio, iinuenia tiame poꞌwa noꞌo tepuyao, ki iꞌka koꞌrechi mochikame. Iꞌnoramerinia puꞌkaoi, pirenapi koꞌrechi iintapamiapa, piiripi waꞌapi enepuawichiopua tepuyameo. Aapoeopua noꞌo eꞌwekao, noꞌo naꞌnaritomapua teetoachio. Waꞌatiao, piiripi waꞌapi enemapu tepuyameraa, neeeche, ki aaata piirechi tepuyame.
\p
\v 17 ’Apoe noꞌo Noonoa noꞌo nakiyamepua. Noꞌo Noonoa iꞌkawichio noꞌo nakiyamepua: noꞌo ahjario noꞌo poꞌwachitia tepuyawichio pejana nehjimichiopua, waꞌa iintosaapua noochio, eenechi noꞌo ahjatemiapa.
\v 18 Noꞌo ahjario aaataai ki noꞌo uꞌyemepua, nooe waꞌapi noꞌo kaawe eꞌrachi kiꞌyamepua puꞌkao. Neeea iinuemenia utewario noochio, noꞌo ahjario wahjiparichi uhjurakaio, eenechi noochi enatemia noꞌo ahjario. Waꞌa tiiameo, noꞌo Noonoe yahchetiamenia puꞌkao.
\p
\v 19 Waikao eenechi ki napati waꞌachitia erakoka inamukapa Eesusi chiiao, oꞌinekapua ahpo poanatukao.
\v 20 Muuwaemea chaachapakapua:
\p —Rooroikamepu ihjia chiia, itapiti naꞌarari yahchamepua. Nape rooroikame enesaa ihjia, ¿aatia keepuna eemea puꞌkao?
\p
\v 21 Wahjachia chaachapakapua:
\p —Nape ihjia, kiisi naꞌarari yahchameka chiiamepua. ¿Naakonakosa naꞌarari yahchameai sautetapua ki maꞌchiriameo?
\s Iꞌisaeri paꞌpamuratuamea, ki nakika tetewamepua Eesusio
\p
\v 22 Seenepi simikameo Eerusarenio tuuroi taawechiamio, iꞌisaeri tiꞌtijoeria pahkotakapua, ahpo weemera tiopawichio pahkotewa.
\v 23 Waikao Eesusio waꞌa Saromoni Arakokari teeriami oiyoiopua,
\v 24 iꞌisaeri tiꞌtijoeri paꞌpamuratuamea, taamo noorepakao Eesusi iinatukekapua:
\p —¿Achinatiosi waꞌa taamo teeremamua, ki aamo aatanako taamo naneꞌretekao? Amoe enesaa Riosie Weratiameo, maꞌchiame taamo chaanepuapua.
\p
\v 25 Eesusia nehjiakapua:
\p —Aamosa chaanekasai neeeapa, ki pichikena eemea. Yooma puuu noꞌo Noono utewarie noꞌo yoora, noꞌo nayewanipua, aatanakoo;
\v 26 Nape eemea, ki noꞌo pichikenapua, waꞌa teꞌte eemeapu, ki noꞌo tepuyakapa.
\v 27 Noꞌo ijinuwa noꞌo puhku poꞌwachitiaa, noꞌo machika inamuame puuua. Neeeaio, teꞌta machiyamepua puꞌkao, waꞌa teꞌteriamekapaopua, aapoeo kihta seeweka noꞌo naꞌnaritoamepua.
\v 28 Neeea kiꞌyamepua puꞌkao, ahjari ki wahjiameo, ki seena aampasi wahjipaniameo, ki seenampasi wahjipameripua, puuua teꞌta wahjiparichio, kiisi wahjipameripua; aaataai noꞌo seepurawaa, kiisi noꞌo uꞌyemeripua puꞌkao.
\v 29 Noꞌo Noonoa, yooma noꞌo naꞌnaritoame kiꞌyakamepua. Puuu apoeo, epeche weruma tiiamepua ki aaatachitia. Pukaepa aaataai kaꞌchi iika uꞌyemetepua ahpo sekachio, noꞌo kiꞌyaopua puꞌkao.
\v 30 Noꞌo Noonoa, neeea tiameo, piiripikaitepua.
\p
\v 31 Waikao, paꞌpariseo paꞌpamuratuamea, eenechi pasipumo oꞌrariaipua Eesusio,
\v 32 nape Eesusia chaanekapua:
\p —Ki ookapi itapiti kaꞌkaruma aamo tetewitekame neeea, noꞌo Noonoepua. ¿Aachin tiiamera puꞌka kaaweruma itapiti aamo teteweteriawichio, noꞌo pasipunariame eemea?
\p
\v 33 Waikao iꞌisaeri paꞌpamuratuamea, chaanekapua Eesusio:
\p —Kaꞌkaruma yoratiamewichioopua kaꞌii, aamoo, Riosi aamo teewamekopapua, taamochitia tijoekaio, puꞌkawichio aamo pasipunariame teemea.
\p
\v 34 Waikao paꞌpamuratuame waꞌa chaachapakopao, Eesusia chaanekapua puꞌkao:
\p —¡Naakonakosa! ¡Naakonakosa ki pahtiame eemea, waꞌa chiiamekopua Riosio Ehkoriami Iyoterichio? Puuua, eee cheeriaipua ahpo naꞌnayewatura nayewakao: “Eemea, riosipua, noꞌo Riosio, tatanarapakapa.”
\v 35 Naneꞌriame teemea Ehkoriami Iyoterichi Riosi cheeriaa, pichiwakopua puꞌkao, Riosio ahpo chiiao kiisi wihtuamekopa, teemea puꞌkao kihta kaꞌitame tiiamekopua puꞌkao. Puꞌka ahpo naꞌnayewaturao riosi teewariaopua Riosia, teꞌta pichiwapua, puꞌka naꞌnayewaturao ahpo chiia chuꞌwaremichiopua tiꞌtijoerichi tuꞌtuyesikao.
\v 36 Weh, Riosi iintorioo, noꞌo ahpo chiia tiꞌtijoeri nayewatumichio weerakamekoipua, ¿achini iikai nekakoame eemea noochio, noꞌoo Riosie Tijoe Tijoetukameko tuuyoo?
\v 37 Noꞌo yoorao, ki Riosi ihsia yoorame enesoo, ki noꞌo pichikepuapua noꞌoo, noꞌo Riosichi eenameko tuuyao.
\v 38 Nape noꞌo yoorao, Riosiche yorame tiiameche enesoo, puꞌkakamera pichikepuapua, puuukopua noꞌo maꞌchitameo, teꞌta noꞌoo aatanakoo.
\p
\v 39 Nape isaeri paꞌpamuratuamea, ki waꞌa teeka pahtekapa puuua, eenechi pasipumo orapakapua Eesusio, nape Eesusia newikapua waꞌao.
\p
\v 40 Waꞌa oꞌiniaopua waikao, paonamina Oorani akichi eꞌenatiapua, Waani Paatori yaajatoriachi, tiꞌtijoe paatoka ooweru tiame. Waꞌa mochitiapua waikao paikapi taawechi.
\v 41 Waꞌa mochinioio ki ookapi tiꞌtijoe ooweru tiame, noꞌo Paamira Eesusi machimia. Ihji waꞌa eꞌenakamea, Eesusi masitia keepusaapua, ahpoo chaachapakapua:
\p —Aa, waꞌa teeso Waani Paatori nayewariaa iꞌka tijoechi simiyameo, Waania kiisi yoorakaipua itapiti peenia ihsiwao, teꞌta pichiwa cheeriamepua.
\p
\v 42 Waꞌa erapakaopua, muuwaeme Eesusichi paparakapua, Eesusi ihsiachi masiteka.
\c 11
\s Rasaro mukuria nayewaniame
\p
\v 1 Waꞌa mochioiopua pehjio, waꞌa asikapua aaata kooria Wetania mochiwachi oꞌinia eename. Puuua Eesusio chaanekapua Wetania mochiwachio, tísia kokorepariata aaata Rasaro tewaniame. Ihji Rasaroa, ooka pipiniemekapua, piiripia Maaria tewaniame, piirea Marata tewaniame.
\v 2 Ihji Maariaa, Eesusi tarachi sewajuya toꞌwepakamekapua, ahpo kupae piꞌweka, wakipatekame.
\v 3 Ihji ahpo pipiniemea, Eesusi paaenurekapua, ahpo paꞌchi Rasaroo kokoriopa. Puuua ahpo uhjurawao, chaanenureriapua Eesusio:
\p —Paamira, aamo kaawe eꞌriaa, kokoriapua.
\p
\v 4 Eesusia, waꞌa tiiame inamukapao, cheekapua:
\p —Ihji tijoe kokorewaa, kaawerumachi kajumiitepua. Ohso kaawe, Riosi ihsiwa tetewipuawichio iikamepua, aatanakoopu ahpo Tijoetuteriao, pukachi yasitoamekopua Riosia, apoeo.
\p
\v 5 Naatiopua, tísia nakiyame enerepua tiame, Maariao, Maratao, Rasaroopua tiame.
\v 6 Waꞌa tiiooi Eesusia, ooka taawe itipikapua pehjio, ahpo kahtiachio.
\v 7 Neipa iꞌkaopua, ooka taawe puuyesaopua, chaanekapua taamoo ahpo masiterao:
\p —Ajasika. Siimpapuapu Uurea weeechi eenechi.
\p
\v 8 Waikao teeme Eesusi masitewaraa, chaanekapua Eesusio:
\p —Nape isaeri yaꞌyawichieo, iiweta aamo merinarioi waꞌao, ¿waꞌa siminaremua eenechi?
\p
\v 9 Nape Eesusia taamo nehjiakapua:
\p —Peꞌyachi waꞌa teeremapua noochio. Waꞌatioi neeea tekipanamerichepua. ¿Tepekumanapu taawea? Neeea tiꞌtijoeri tukapachi ohjoameo, Riosi kaaweruma tuuyewarie, tahjepamerichenia. Puꞌka tahjewarichi oiyamea, kihtae motochimapua.
\v 10 Nape ki apochi iꞌtoamea Riosi kaaweruma tuuyewari tahjerao, tukapachi oiyamepua, pukaepa motochimapua.
\p
\v 11 Waꞌa cheesapa Eesusia taamo chaanekapua:
\p —Taamo kaawe uuya tijoea, kohchiamepua, nape ehjepa waꞌa ajasitioopua, pusatemania puꞌkao.
\p
\v 12 Waikao teeme masiteraa, chaachapakapua Eesusio:
\p —Waꞌa teesoo, kohchiame enesaa, apoe waꞌapi pusamiitepua.
\p
\v 13 Nape Eesusia Rasaroo, mukukameko tuuka cheeriapua, ki oowera kohchiamekopua resipuka. Nape teemea ki pahtiamekapao, oowera kohchiame maaekapua.
\v 14 Waikao Eesusia, eenechi taamo chaanekao, maꞌchiame taamo tuuyekapua:
\p —Rasaroa mukukame puuua.
\v 15 Kaawechupena ki waꞌa yasarenia waꞌa ikinioio, puꞌka waꞌa noꞌo iintomeri tetewakao, epeche kaawe teeremerikopua aamowichioo, aamo noꞌo teꞌta pichiwataopua, noꞌoo teꞌta aatanakoo. Nahpe naaju, siimpaka neꞌnetaria Rasaro ikiriao.
\p
\v 16 Waikao Toomasia, taamo wahjachi masiterao, chaanekapua:
\p —Nahpesa naaju teemeai. Peꞌyachi Eesusi ahjama koꞌitaria teemeai.
\s Eesusi Rasaro tewaniame oijenatewa
\p
\v 17 Eesusi ahjama Wetania ajasitioiopua, Eesusia tuuyetiapua, naao taawe iꞌtoamekopua Rasaro mukukame katewetiachio.
\v 18 Wetaníao, waapikopa Eerusarenio, piie keenako kuꞌitapi simiwachi,
\v 19 muuwaeme eꞌenariapua waꞌao, Maratao, Maariaopua tiameo, kaawe erapatemia yuuwesiao, ahpo paꞌchi mukuria yuuwesiwaopua.
\v 20 Marataa Eesusio, wahka ihto tuuwame inamukapao, machenariapua natepamia. Maaria ahpo kariwachi itipiriapua pehjio.
\v 21 Marataa natepasao, chaanekapua Eesusio:
\p —Paamira, iꞌwa aamo yasisoo, noꞌo paꞌchia ki kiterepamiipua.
\v 22 Nape waꞌatioipua aamoo, naneꞌriamenia aamoo, ihtaoi itaka aamo Noono Riosi nayewasoo, aamo inamumerikopua, ahkasioi ki maaepuame tiiameoi.
\p
\v 23 Eesusi chaanekapua:
\p —Aamo paꞌchia eenechio, ahjamitepua.
\p
\v 24 Marata chaanekapua:
\p —Naneꞌrenania ahjamioo, nape kiteremiachioopua waꞌasi taaweo, yooma wahjipakame ahjapuniachiopua.
\p
\v 25 Eesusia chaanekapua waikao:
\p —Neee apoe puuua, eenechi ahjaniame ikitiamea. Neeepua tiameo, ahjari aaata yahchiameraa; noochi paparakamea, mukukaio, eenechi ahjamapua.
\v 26 Noochi paparamea, ki mukuyai pehji noꞌo eenoi kiteremiachi waꞌasi taaweo, ki mukimapua seenepioi. ¿Waꞌa tiiame pichikiamemua Marata?
\p
\v 27 Marata chaanekapua:
\p —Ejeꞌe, waꞌa tiiame eꞌramenia Paamira. Neeea aamoo, Riosie weratiameko eꞌriamenia aamoo, apoe Riosie Weratiame, apoe Riosi Taanarakopua tiame, ehkoriami oꞌiniao, enameriko tuutiame.
\s Eesusia naarani, Rasaro mukukatewetiachi
\p
\v 28 Waꞌa cheesapa Marataa, peꞌku eenakapua taꞌpechi, ahpo piini Maaria tuuyemia. Marataa, nakachi chukipakao chaaneriapua:
\p —Eenariapu Paamiraapa, aamo paayapu waami.
\p
\v 29 Iꞌka inamukaopua, ikanati werisika eenariapua natepamia.
\v 30 Eesusia, ki pakiriai pehji mochiwachiopu. Maꞌchi yasariai puuuapu Marata natepariachi.
\v 31 Ahjama mochika kaawe eratiamea, waꞌami akipakopa naꞌnaritoriapu, mukukatewetiachi simiyame maaeka, naarachemia.
\p
\v 32 Maariaa, Eesusi kahtiachi asisaopua, chopokorieka weripakao chaanekapua:
\p —Paamira, iꞌwa aamo yasisoo, ki kiterepamii noꞌo paꞌchia.
\p
\v 33 Eesusia, Maaria naarame tetewapaopua, ahjama eꞌenakametiameo, Marata tiame, tahpitika erapaka puaipu, yuuwesipaka.
\v 34 Waikao cheekapua:
\p —¿Akana kateweka eeme?
\p Aapoeo chaachapakapua:
\p —Nahpeo Paamira, neꞌnepuapu.
\p
\v 35 Ajasitioopa Eesusia, nanarakapua.
\v 36 Waikao nanarakame tetewakapao, chaachapakapua:
\p —¡Ki teesa nakiyai teeeriai, puuuai!
\p
\v 37 Wahjachia chaachaparepu:
\p —Ihji ki maꞌchiriame sautekamea, ¿ki itapiti iintome teeeriamarepua, ki mukimichioo?
\s Rasaro eenechi ahjatewa
\p
\v 38 Waikao Eesusia ajasitioopua Rasaro mukukatewetiachio, eenechi tahpitika erapakapua apochio. Rasaro tekiriatiachio, nuꞌuti teesotatiachikapua, tehte rahpename chihturamee toꞌpetiame.
\v 39 Eesusia waikao aaata cheekapua:
\p —Ikichanaopua puꞌka tehte, seꞌwi weerao.
\p Waikao Marata kiterepakame piiniraa, chaanekapua Eesusio:
\p —Nape Paamira, iiyanakame ujuremapu puuua, naao taawe iꞌtoamekapa waꞌasi, iꞌka ikiriachiopua.
\p
\v 40 Waikao Eesusia chaanekapua Maratao:
\p —¿Ki aamo chaanekosane, aamoo noochi ahjachi erasoo, Riosio ki nuꞌunti iintomerikopua, itapiti aamo tetewimerio?
\p
\v 41 Waikao, ikicha werapatiapu tehtea. Waꞌa ikitioopa Eesusia, teꞌpa tewekachi neꞌnepakao chaachakapua:
\p —Cheriwema Noꞌnoo, aamoo noꞌo inamuriawichioo.
\v 42 Naneꞌriameai neeea aamoo, senepi aamo noꞌo nayewesoo noꞌo inamuamekoo. Nape ehpeo neeea aamoo, yooma inamumichioo, weeru nayewaka aamo chaaniamenia, puꞌka aapoeopua tiameo, naneꞌremichiopua noꞌoo, teꞌta amoe noꞌo uhjuratiamekopua.
\p
\v 43 \fig |133-CN01768B.TIF|col|||Rasaroa Eesusie oijenatetiapao, machenani mukutesochi tekitiachio. |11:43\fig*Waꞌa cheesapa weeru sisinakaopua, cheeka teꞌta Rasaro tekitiachi neꞌnepakao:
\p —¡Rasaróoo, machenasa waꞌáaa!
\p
\v 44 Waikao mukuriamea machenakapua, yooma weerewa wisasopurae wipirika puritiame tarachisi oꞌinia naꞌpa toonorama, naꞌpa seekarama ahkasi moochisi nanarima. Eesusi chaanekapua waikao, waꞌa ajakameo:
\p —¡Puhjeke wipipuriráo, oisimichioo!
\s Achini teeka iꞌyaniame Eesusi chapipuame
\r (Maateo 26:1-5; Marako 14:1-2; Ruuka 22:1-2)
\p
\v 45 Muuwaeme isaeri tiꞌtijoeri, Maaria ahjama eꞌenakamea, tetewakapua waꞌa iintokopao, Eesusichi paparakapua.
\v 46 Nape ookapi puuu iꞌisaeria ki Eesusichi paparakamea, pariserochi eꞌenakao, yooma tuuyeriapua puꞌkao, Eesusi iintoriao.
\v 47 Waikao neeseriosi paꞌpamiratuamea, yooma ahpo naꞌpoasaopua parisero ahjamao, chaachapariapua:
\p —¿Achini yorata teeme iꞌka tijoeo? Ki ookapi ihsina puuuapa, itapiti ki maaenari yoorakaopua,
\v 48 waꞌatia taamo toisoopua, yooma tiꞌtijoeria ahjachi pichikemerapua. Waꞌa ijikisoo, tamochi eꞌenaka kajuka pihtunamerapua rooma tijoea, taamo iyoriachioi tiopao, wehchi yachamerapua, pihtunaka.
\p
\v 49 Nape piiripi waꞌapi puuua, Kaija tewaniamea puꞌka taawechiamio, teꞌta neꞌneseriosi paamiratuameraa, cheeriapua:
\p
\v 50 —¿Kiisiki pahtena eemea? ¿Ki naneꞌrenakosa eemea, ehpeche kaaweko, piiripi waꞌapi mukisaa yoomawichio, ki yooma mochiwari wahjipamichioopua?
\p
\v 51 Nape ki ahpo eꞌrachi waꞌa cheekapua, Riosie eratetiapa waꞌa cheekamepua, puꞌka paaumparichio teꞌta neeseriosi paamiratuaio. Pukaepa waꞌa tiame cheeriai Kaija. Riosia waꞌa chaniteriapua Kaipao, taamoo pahtemichiopua, Eesusio, tiꞌtijoeri pejanaka mukimerikopua, puꞌka tatakoriria kokosapuamewichioo,
\v 52 ki iꞌisaeriwichioche mukimerikopua, yooma wehjoarichiami mochikamewichioopua tiamé, yooma Riosi tatanarachitia teꞌteriameo, pirenapi waꞌapi pirenaturichi, pirenatupuaichio.
\v 53 Nape ki waꞌa tiame pahteriai puuu paꞌpariseo napawikame waꞌao, puꞌka taawechi oꞌinia waꞌana, nanapawiriapua aꞌchi teeka ahpo merimiao, chaachapamia.
\p
\v 54 Pukaepa Eesusia, ki teꞌta maꞌchiame oiyapua, isaeri mochikachiamiopua, mehka waꞌa oꞌinia siimpasao Raaini mochiwachi eꞌenatiapua, waapi wakiwechiamio. Waꞌa itipika Eesusia waikaopua, taamo ahjamaopua masiterao.
\p
\v 55 Asiyachikapua isaeri pahkotaopua, Semejenato pahkoo, muuwaeme tiꞌtijoeri poꞌpoanami mochikamea, eꞌenariamekaipua Eerusarenio, keꞌchu pahkokoikopua, ahpo Riosichi piipatepuawichioopua, waꞌa nokiwamechikopua waꞌao.
\v 56 Waikao pahkochi eꞌenakamea, ahkachiami tiopachiami aajatoka chaachapariapua ahpoo:
\p —Ihtana erakona eemea, ¿enameriare Eesusia iꞌwa pahkochio, ki enatarekosaoipua?
\p
\v 57 Waꞌa nooka ahpo chaachaparia tiꞌtijoeria, teꞌta neeseriosi paꞌpamiratuamea, parisero paꞌpamiratuame tiamea, nuurarioipa puuuapu, ahpo tuutiamichio aaataeo Eesusio tetewisoo, chapimichiopua puꞌkao.
\c 12
\s Piiripi oowitiamea, Eesusi peeniajuwari toꞌweria
\r (Maateo 26:6-13; Marako 14:3-9)
\p
\v 1 Puhsani taawechi toioio pahko asimioio, Eesusia Wetania eenakapua eenechi, Rasaro ohjirachi, ahpoo, ahjateria taꞌperachi.
\v 2 Waꞌao kooame neteketiapua, aari koiꞌwame Eesusi kaawe eꞌrewawichioo. Marataa, oiyapua ajawaka kooame, Rasaroa kahtiapua koaka Eesusi ahjama meesachi.
\v 3 Maariaa Eesusio, naasipa kiiro tísia nateyame uusapa peeniajurao, apoche narato sewajuyamee netetiame, tarachi toꞌwekaopua, ahpo kupae piꞌwekapua wakipateka.\fig |134-CN01778B.TIF|col|||Maaria Rasaro piiniraa, Eesusi tarachi sewajua chuhcheriaapua, yooma yooreko karichi pochiriachipua, sewajuyawaa.|12:3\fig* Ihji peeniakame eꞌoniraa, yoomachi karichi muꞌikapua.
\v 4 Nape Uurasi Ihkariótea, piiripi Eesusi waꞌapi masiteraa, noriwi iintomeria puꞌkao, cheekapua:
\p
\v 5 —¿Achini iikai ki nehjiretupua ohso kaawe, paika siento taawechi yowiwamechi, ahjae kuꞌipuaichioo, kihta iinuwaeme koꞌkometiwichio?
\p
\v 6 Uurasia, ki tesiwa teꞌtiame cheriwiai cheeriapuapu, ichikoapa cheeriapua toomi, ahpo neesetoaopua, katewetenia.
\v 7 Eesusia chiiapua:
\p —Kaꞌte aꞌchi chaane puꞌkao. Tooa puꞌkao, enemapu noꞌo kiterepamichio, kateweriai iꞌka peeniajurao.
\v 8 Tesiwa erakoamea, waꞌapi iintumerapua, nape noꞌoo, ki yooma taawechi amochi iinuemera eemea.
\s Rasaro meripua ahpo katewewa
\p
\v 9 Isaeri tiꞌtijoeri muuwaemea, naneꞌrekapao Eesusio, Rasaro taꞌperachi kahtiameko, muuwaeme eꞌenakapua waꞌao, nape ki Eesusiche neꞌnemia, Rasaro neꞌnemia tiame, Eesusio puꞌkao, ahjateria eenechi.
\v 10 Puꞌka ahjateretiawichio, neeseriosi paꞌpamiratuamea, iꞌyasikapua tiame aꞌchi teeka ahpo merimiaopua Rasaroo,
\v 11 Rasaro ikitiamewichioopua, muuwaeme Eesusikamera naꞌnaritokopa, ahpo neeseriosi paꞌpamuratuame masitiaopua, toaka.
\s Eesusi Eerusareni pakiniame
\r (Maateo 21:1-11; Marako 11:1-11; Ruuka 19:28-40)
\p
\v 12 Puꞌka meereo, Eesusi Rasaro oijenateria chaachapaniamea, ahkasi Eerusareni yooma mochiwachi naneꞌreretiapua, mehtakao. Pukaepa muuwaeme Eerusareni pahkochi eꞌenakamea, Eesusi Eerusareni asiyame inamukapaopua,
\v 13 tahku saawara tehpunasaopua, kuhsi saawaeme tiame, maꞌchi muirachi puuyeriapua Eesusi natepamia. Eesusi natepasaapua, ahjama nokisikaopua, weeru siinakosiapua chaachapakao:
\p —¡Taamo Riosiii! ¡Taamo Riosiii! ¡Taamo newipatesaaa! ¡Taamo newipatesaaa! ¡Kaawechupena Riosichi oꞌinia eenamemua! ¡Kaawechupena yawichi enemerimua iꞌisaerichio tiꞌtijoechi!
\p
\v 14 Eesusia uuru taamo iꞌyakeriachi yasitoaa, Ehkoriami Iyoterichi chiia ikiriapua, pichiwa waꞌa tiiame ikipua, machenariapua. Ehkoriami Riosi Iyoteria, eee cheeriaipua:
\q
\v 15 Kaꞌte majawemua, Siioni Riosi mochiwaria.
\q Nee, waꞌa ihtonapa aamo teꞌta yawichia,
\q uuru taanarachi yasitoka.
\p
\v 16 Iꞌka waꞌa tiame uuruchi ihtotiameo, pukeri simiyachio, ki pahteriai teemea, nape neipa taamo Paamira Eesusi noꞌrasoopua tewekachio, waikapa inatepatiapua, Ehkoriami Iyoterio puꞌka naewaka cheerioopua.
\p
\v 17 Puuu muuwaeme tiꞌtijoe ooweru tiamea, Eesusie Rasaro oijenatetiame tetewikamea, Eerusareni nonorasaapua, yooma tuuyeriaipua Eesusi iintoria ahpo tetewariapua, Rasaro oijenatekaopua.
\v 18 Waꞌa tiame inamukapaopua Eesusi iintoriao, pahteriapua waikao Eesusio teꞌta weruma tiiamekopapua puꞌkao. Pukaepa muuwaeme natepamia puuyakamepua.
\v 19 Paꞌparisero paꞌpamiratuamea, waꞌa Wetania nonorakame inamukapaopua, Eesusi Rasaro oijenateriao, chaachapariapua ahpoo:
\p —Nee, yoomahka tiꞌtijoea, ooweruapua tiameo, Eesusikamera puꞌsereka tetewamepua. Kihta yorame teꞌteriame teemeapa, tiꞌtijoeri teewetepuameopua, iꞌka Eesusichi paparaniameo.
\s Eesusi iꞌyaniame nayewemia, riꞌrieko tiꞌtijoee
\p
\v 20 Eerusareni pahkochi eꞌenakamechio, riꞌrieko tiꞌtijoeri tiame eꞌenariapua ookapi.
\v 21 Ihjia, Eeripe piiripi Eesusi ajawaria naaepariapua, Weꞌsaira ohjoeme Arirea weeechi. Puuu riꞌriekoa chaanekapua Eeripeo:
\p —Paamira, machinariai teemea, Eesusio.
\p
\v 22 Waikao Eeripea, Anteresi tuuyesaopua, pirena eꞌenaka tuuyekapua Eesusio.
\v 23 Waikao Eesusia chaanekapua:
\p —Kaawepua, eꞌenanuremitiapua puꞌkao, keepumichiopua noꞌo tiꞌtijoeri nayewiao.
\p Waikao Eesusia yooma tiꞌtijoeri nayewekao, oꞌinekapua cheekao:
\p —Asikame neeeapa, tetewipuawichioo noꞌo teꞌta weruma iintomiao. Pukaepa ehpeo neeea yooma aamoo, noꞌo ikimiachi simiyame nayewemania, yooma noꞌo kuꞌwe ikimeria, noꞌo teꞌta aatanakooko maꞌchitameripua.
\v 24 Ihji noꞌo ikimia chiia, kiisi wehchi wichimeripua. Neeea noꞌo ikimiaa, piiripi tiiriko pahchiraka teeremeripua. Ki mukusaa puuu tiiriko pahchiraa, piiripi waꞌapi teereka itipimeripua, ki muuweka; nape echitia mukisaapua wehtereo, ki ookapi muuwemeripua, taakekao.
\v 25 Aaata iꞌka weeechi ahjari epeche teꞌta nateyamechitia tetewamea, ki Riosikamera ahjari ahpo kianariachitiao, wekatemeripua puꞌka teꞌta ahjari Riosie ahpo kianarewaopua. Nape ki epeche nateyame tetewamea iꞌka wehjoari ahjario, ki puꞌka ahjarichitia ahpo kianareniao Riosie, kiapuamepua puꞌka teꞌta ahjario Riosie ahpo kianarewaopua, puꞌka teꞌta ahjari ki wahjiamesi ahjaniameopua.
\v 26 Aaata piire noꞌo yorakeka yasinariamea, noochi enamitiapua; ahkaoi noꞌo kahtioi noꞌo yorakeka yasitoameo, noꞌo Noonoa, kaawe noꞌo ihsikiame tetewimapua puꞌkao.
\s Eesusia ahpo mukimia chaanipua
\p
\v 27 ’Ehpe neeea iꞌka noꞌo ikimiao, ki nuꞌuti tahpitika erapaninia. Nape ¿ihtana chanitania iꞌkao noꞌo ikimiao: “Noꞌo Noonoo, noꞌo apechunamitia iꞌka noꞌo ikimiao”, cheetarenia naaju? Kaꞌinia puꞌkao, puꞌkawichio eenakamenia iꞌka wehjoarichio, iꞌka tiꞌtijoechio.
\p
\v 28 —Ohso kaawe noꞌo Noonoa, aamo iintonariakamera iintopuapua noꞌoeo —waꞌa tiiame inatamenia.
\p Waikao tepoona oꞌiniao cheechaniapua:
\p —Neeea noꞌo amoe iintonariao, oꞌinekame neeeapa amoe iintokao; iiweta simitiame neeea pehjio, amochi iintokao.
\p
\v 29 Waikao ki ookapi waꞌami ajakame tiꞌtijoe ooweru tiamea, teꞌteoko tuꞌtuikapua. Wahjachia, Riosi kuꞌiwari Eesusi nayewerio chaachapapua.
\p
\v 30 Nape Eesusia chaanekapua waꞌa chaachapameo:
\p —Aamo tewekachi inamuriaa, ki noꞌowichiokamera simiyamepua, aamowichiokamera simiyamepua, aamoo tetewimichiopua, Apoe noꞌo Noonoo, noꞌo ahjama nayewamekopua.
\v 31 Tísia waapi teetoamepua naatia, puuu naꞌarari noonorao, newitopuachiopua. Puuu naꞌarari nokinarepuawichio paꞌpasuame tiꞌtijoerio yomachi wehjoarichio, maꞌchi ipapuameopua Riosi tetewachio.
\v 32 Waikao yooma noꞌo Noono iintonareria iintosoopa noochio, noꞌo apechunatioopua noꞌo Noonoeo, yooma aaata teꞌta pichiwa noꞌo ijinuwaa, yooma teꞌta ahsieme natetetiame waꞌasi, itipimeripua yooma ihta tatakoritiamea.
\p
\v 33 Puꞌka waꞌa cheeka nayewaria Eesusia, ahpo aꞌchi teeka meripuame nayewaka cheerepua, ahpoo kurusichi chuchaka apechunaka meripuame.
\v 34 Waikao keepuameraa chaachapakapua Eesusio:
\p —Nee, ¿nape ki senepi waꞌapitia ahjamerikaipua Riosie Weratiamea, Ehkoriami Iyoteri chiiachitiao? ¿Achini waꞌa chaanimua puꞌkao, apechunaka meripuameko tuukao meripuaichio, puꞌka Tijoe Tijoetukameoopua? ¿Aatanakosapu puuu Tijoe Tijoetukamea, ki muuu enesaa?
\p
\v 35 Eesusia chaanekapua:
\p —Neee Apoepua, nape iꞌwa noꞌo kahtioiopua pehjio aamo tahjewachitiao, ohso kaawe noꞌo chiiakamera pichikepuapua, ki aamo chapipuaichiopua tukaparieo. Puuu tukaparie chapitiamea, ki maꞌchiriame puuua Riosi tahjewachi teerepuameo.
\v 36 Tahjewarikamera pichikeka mochitopuapua, iiweta amochi tiioipua pehji Riosi teꞌta pichiwari tahjewao. Waꞌa tiiame enepasaa eemea, Riosi tahjewarachi mochitoame enemapua.
\p Iꞌka cheesapa Eesusia, waꞌami akipakapua noriwi, puꞌka tiꞌtijoerio, toisa.
\s Aatia tiiachipa ki Eesusichi paparakame tiꞌtijoeria
\p
\v 37 Puuu tiꞌtijoeria Eesusio, ki ookapi ki maaenari yoorakameoipua ahpo tetewachio, waꞌatia itipikapua, ki ahjachi paparaka.
\v 38 Ihji waꞌa ikitiamea ki Eesusichi paparakao, puꞌka cheeka cheeriai Isaiatarua, Ehkoriami ahpo Iyoterichio:
\q Paamira, ¿nape aatana pichikekamepua,
\q2 amochi simiyame taamo nayewariao?
\q ¿Aatana amochi eenakamepua,
\q2 ahpo tatakoriria cheriwepuawichioo?
\m
\v 39 Waꞌa teꞌtiapapua, ki machika Eesusio aatanakoo, ki eenarepua puꞌkao ahjachi paparaka. Ehkoriami Isaiaa puꞌkao, waꞌachi cheeriamepua tiame ahpo iyoterichio, eee cheekao:
\q
\v 40 Riosia ki apochi eꞌenanarekameopua ahpo tatakoriria cheriwepuawichioo,
\q2 waꞌapitia toare Riosia,
\q2 ahpo ki mamachiriamechitia
\q2 peewaeme teꞌteriamechiopua iikachio;
\q2 iꞌka iikarachiopua peewame enemichiopua.
\q1 Waꞌa teꞌteriamekapa puuua,
\q2 kiisi eꞌwakapa puuua,
\q2 Riosi apochi paaewao,
\q2 kiisi machika tetewamepua apochi kiisi kaꞌkaruma teꞌteriao,
\q2 pukaepa ki noochi eꞌename puuua,
\q2 noꞌo cheriwekemichiopua ahpo tatakoririao.
\p
\v 41 Ehkoriami Isaiaa, waika oꞌinia tetewikaopua Riosio ki nuꞌuti tísia peenia tiiame iintomiaopua ahpo Taanachi Eesusiopua, tiꞌtijoeri tatakoriria teꞌta choꞌwepuawichiopua, waꞌa cheeka iyotere puuua ahpo Ehkoriami Iyoterichio.
\p
\v 42 Nape waꞌa teꞌtererioi iꞌkao, wahjachia, muuwaeme pichikeriapua waꞌao, waꞌapi waꞌao iꞌisaeri paꞌpamurakaipua tiameo. Nape ki chaachariapua, seewiapaopua pariseroo, ahpo maꞌchipapuameopua napawikarichio;
\v 43 Waꞌatia ahpo iintare puuuapu, ohso kaawe tijoekameraa ahpo kaawe eꞌrewa nakire puuuapu, ki Riosi.
\s Eesusi naawesaria tiꞌtijoeri wenejiwa
\p
\v 44 Eesusia weeru nayewakao cheekapua:
\p —Noochi paparamea, noꞌo uhjurakamechi paparamepua tiame, waꞌapichi.
\v 45 Noꞌo tetewamea, noꞌo Noono tetewamepua waꞌapi, apoe teꞌta noꞌo uhjurakamera.
\v 46 Tahjewarichitia eenakame neeea weeechio, noochi pichikekameo ki tatakorira tukapachi oimichiopua waꞌasi.
\v 47 Noꞌo keepukai ki yoorekameo, kaꞌchi yoramania puꞌkao; ki puꞌkachi eenakame neeea, newipatenia eenakamenia ohso kaawe.
\v 48 Noꞌo ehpeo ki nakika tetewikamea, noꞌo chiiaoi tiameo, puꞌka wahjipachi taawechi waꞌasi, enemera noꞌo chiia aamo wenejiao, aamo teꞌtia kateweniachio.
\v 49 Noꞌo nayewaa, ki nooe chiia puuua, apoe noꞌo Noono noꞌo uhjurakame, noꞌo kiꞌyaria puuua, noꞌoo aamo chaanemichioo.
\v 50 Naneꞌrenania, puꞌka noꞌo Noono noꞌo kiꞌyaria aamo chaanemichioo, aamo ki wahjiame ahjariwawichiokopua puꞌkao. Pukaepa waꞌatiame naawesari aamoo, tuuyesina neeea, teꞌta waꞌachi chiiame, noꞌoo kiasinia, noꞌo Noonoeo.
\c 13
\s Eesusia ahpo maꞌmasitia tarachi papakona
\p
\v 1 Keꞌchu pahkokoi Semejenato pahkoo, naneꞌriame enere Eesusia, asiriamekopua ahpo Noonochi siimerikoopua, iꞌka weee toakaopua. Eesusia taamo ahpo ajawariao, tísia taamo nakika yasitoamekaipua, ahkasi waꞌa teereka mukukamepua.
\p
\v 2 Keꞌchu taamo koaka mochipanioio, Uurasi Ihkarióte Siimoni taanaraa, riaorósie usuwetiapa ahpo iikachio, noriwi nehjimo orapariapua Eesusio.
\v 3 Eesusia, yooma naneꞌriamekapaopua, ahpo Noonoe yooma ihta ahpo iintomia kiatiamekoopua reesiseri, naneꞌriamekapua tiameo, ahpo Noonochi noꞌramerikopaopua tiame, ahpo maꞌmasitia neesetorichi tooemo eraparepua, yooma ahpo Noonoe weeechi tehkiwaopua.
\v 4 Waꞌa erapakapaopua Eesusia, werisika koiꞌrachio, ahpo ampawakira pujisaopua,
\v 5 neeroi neropetorichi toasaopua, wisasori ahjae wakipateniame kaichi chuchakapua. Waꞌa ikisaopua yasipakaopua, taamo ahpo ajawaria maꞌmasitia tarachi taamo oꞌinekapua papakokao, yooma taamo pipiripio.
\p \fig |135-cn01800B.tif|col|||Eesusia ahpo ajawaria taarara papakokena.|13:5\fig*
\v 6 Nape Peerochi asitioiopua ahpo tarachi papakopuameo, chaanekapua Eesusio:
\p —¿Neeekosa tiame, noꞌo Paamira?
\p
\v 7 Eesusi nehjiakapua:
\p —Ejeꞌe. Ehpeo ki pahtiame eemea iꞌka aamo noꞌo papakoao, nape ehjepa neipatakirio pahtemeri eemea.
\p
\v 8 Peeroa ahpo waꞌinekaipua chaaneka:
\p —Kaꞌi neeea noꞌo Paamira, Kiisi noꞌo toima neeea noꞌo Paamira.
\p Nape Eesusi chaanekapua:
\p —Ki noꞌo aamo papakosoo, kihta teeremapua noochio.
\p
\v 9 Waikao Siimoni Peeroa, chaanekapua:
\p —Aa, waꞌa teresoo Paamira, yooma noꞌo uupepapua sekachiami tiame, nanarisichiami tiame.
\p
\v 10 Waꞌa chiiopa Peeroo, Eesusia chaanekapua:
\p —Pukeri uupakameapa, tarachiche papakonia nahkipua. Piipakame eemeapa waꞌasi, nape ki yoomahka.
\p
\v 11 Eesusia naneꞌriapa waꞌa cheekapua, aatanakoopua ahpo noriwi naꞌara yorameriopua.
\p
\v 12 Neipa yooma kajusaapua papakokao, eenechi chuchasapa ahpo ampawakirao, eenechi yasipakapua ahpo yasariachi. Waꞌa ikisaopua chaanekapua taamoo ahpo maꞌmasiterao:
\p —¿Pahtena eemea ihtanakoopua iꞌka noꞌo iintoriao?
\v 13 Eemea noꞌoo, aamo Masitariwa teewamepua, aamo Paamirawa tiame. Pichiwa chaachapame eemea puꞌkao, pichiwa puuu neeea aamowichioo.
\v 14 Weh, neeea teꞌta aamo Masitarikaipua teꞌta aamo Paamirawa, neeea ki weruma noꞌo uukaopua aamo tarachi papakokame enesoopua, eemea noochitiao, waꞌachitia aamo ki weruma uuniame teꞌterepuapua.
\v 15 Neeea aamo tarachi papakokamepua, aamoo noꞌoo ki weruma noꞌo uuya, aamo tetewimichiopua, aamoo waꞌachi teꞌteretomichiopua, ki weruma aamo uuka.
\v 16 Eemea inataka inamumitiapua iꞌkao: aaataai ki epeche weruma tiiamepua ahpo teekochio; aaata uhjuratiameai, ki epeche weruma tiiamepua ahpo uhjurakamechioi.
\v 17 Iꞌka pahtekame enesaa eemea, tísia taꞌiria mochitomeri eemea, aamoo ki aamo weruma uuka mochitoame enesoo.
\p
\v 18 ’Neeea aamoo, ki yoomahka teꞌta piipakameko tuuriao, pichiwa waꞌa tiiamepua, tetewamekapa neeea noꞌo ajawaria iikachio. Naneꞌriamenia piiripi eeme noꞌo ajawariao, kiisi kaawe iintomerikopua noochio. Nape ihji waꞌa tiiame iintomeria, waꞌa tiiame tetewitiapa ehkoriami oꞌiniao, waꞌa tiiame iintomeripua. Ehkoriami Riosi nayewaturao, waꞌa tiiame iintopuame tetewika chaachapariopua, Ehkoriami Iyoterichiopua, eee chaachapaka iyoteriaopua: “Piiripi puuu noꞌo ahjama oiyamea, noꞌo pukamina naꞌara iintokamepua.”
\v 19 Iꞌka waꞌa tiiame aamo chaanenania, keꞌchu waꞌa tiiame noꞌo ikiyoiopua, aamo naneꞌremichiopua noꞌoo, yomatiame noꞌo ikimiao, tetewamekopua. Neeea Apoepua teꞌta neeea, teꞌta ihtaoi tetewameopua keꞌchu ikiniameoipua pehji.
\v 20 Eemea iꞌka pichiwari noꞌo cheemiao, inataka keepupuapua: Noꞌo uhjurakame kaawe uuka tetewamea, noꞌo kaawe uuka tetewamepua tiame; noꞌo kaawe uuka tetewamea, noꞌo uhjurakame kaawe tetewamepua tiame.
\s Eesusia Uurasi ahpo noriwi ihsimio tuuna
\r (Maateo 26:20-25; Marako 14:17-21; Ruuka 22:21-23)
\p
\v 21 Waꞌa cheesaopua Eesusia, iiyana erapaka apochiopua, taamo chaanekapua:
\p —Pichiwa simiyame ihjia, piiripi eemea, nanaaramechi noꞌo nehjimerapua noriwi.
\p
\v 22 Waikao teemea, tahpitika erakokao, nenekuti taamo neꞌnepakapua: “¿Aatanakamera ohjoare teemea?”, taamo erakoka.
\v 23 Waikao noꞌoo, Eesusie epeche nakiwa eraniameo, chokichi kahtiamekopa puꞌkao,
\v 24 Siimoni Peero tewaniamea, sekae noꞌo naewakapua, ihchi noꞌo iinatukenurakapua puꞌkao, aatanakamerakopua.
\v 25 Waikaonia waapi chukipakao:
\p —¿Aatanakameraju noꞌo Paamira? —chaaneka iinatukekania.
\p
\v 26 Waikao Eesusia, ihchi noꞌo cheekapua:
\p —Ihji paani ichuka saampatesa noꞌoo kiꞌya, puuu enemapua.
\p Waꞌa cheesapa, Uurasi kiꞌyakapua paani ichuka saampatesa, Siimoni Ihkarióte taanarakapua.
\v 27 Neipa puꞌka paani iintotioiopua, Uurasia apochi pakiteriapua Satanasio, ahpo naꞌara iintomichioopua. Waꞌa iikopa Uurasio Eesusia chaanekapua:
\p —Uurasi, yaapi werisika siinka, iintomitiapua puꞌka aamo iintonareka kahtiao.
\p
\v 28 Nape piiripiai wahjachi teemea, Eesusi ahjama koayamea, kiisi pahtekapua aatia tiiachipa Eesusio, waꞌa chaaneriamekopua Uurasio. Neeeche pahtekamepua puꞌkao.
\v 29 Puuu wahjachia, poanachi tarimia siinkameko erakoapua, itapiti taripua pahkowichioo, aaata tesiwewa teꞌtiamewichiooi, ihkokepuamekoiopua. Waꞌa erakokamekapua Uurasio, puuu iintotoamekopapua, taamo toomi naꞌpoasika kiasiriaopua.
\v 30 Waikao Uurasia, ikanati ahpo paani chiꞌwanetiame ichuka koꞌkosaapua, simikapua waikao waꞌasi ahpo iintomia yoramiaopua.\fig |136-CN01831B.TIF|col|||Uurasia nateteretupua waꞌasi, Eesusi ahpo noriwi nehjariaopua.|13:30\fig* Iꞌka Uurasi simioiopua, tukaokapua waꞌasio.
\s Weemera nuurari
\p
\v 31 Neipa Uurasi simisoopua Eesusia taamoo chaanekapua:
\p —Ehpe tetewipua neeea, teꞌta peenia tiiame noꞌo iintomerio; teꞌta peeniatiame tetewipuameopua tiame, teꞌta noꞌo Noono inatariaopua noꞌo iintomiaopua.
\v 32 Neeea noꞌo iintomiaeo, Noꞌo Noono tísia peeniatiame inataria tetewitesoo, Apoe noꞌo Noono tísia peeniatiame inatariao, noꞌo iintoriae tetewitemapua puꞌkao, tiꞌtijoe ooweru tiame tatakoririao, ahsieme natetetiame itipiniame tetewitekao. Ehpe waꞌapi tukawarichi iintopuamepua waꞌasi.
\v 33 Eeme noꞌo kukuchiwa, kihta itipina neeeapa aamo ahjama yasimiaopa. Noꞌo iꞌyama eemea iꞌyao, nape ki noꞌo teimapua. Noꞌo simiyachio eemea, kaꞌchi iika siimpamete eemea, isaeri yaꞌyawichioi waꞌachi chaanekamenia noꞌo iinatukekoopua.
\v 34 Ehpeo neeea, tísia aamo nakiyao, tísia kaawe aamo nakika mochitojeraninia.
\v 35 Waꞌa teꞌteretoka aamo mochitosoo, yooma tiꞌtijoea ooweru tiamea, amochi tetewimeri eemea noꞌo masiteriao, noꞌo aamo kaawe nakika mochitoniameo.
\s Eesusia ahpo kaꞌitapoti Peeroe
\r (Maateo 26:31-35; Marako 14:27-31; Ruuka 22:31-34)
\p
\v 36 Siimoni Peero teewaemea, kaꞌchi iika ahjama siimpuame inatakaopua pehjio, chaaneka iinatukekapua Eesusio:
\p —¿Akana akipatamua Paamira, kaꞌchi aamo ahjama siimenia?
\p Eesusia chaaneka nehjiakapua:
\p —Noꞌo simiyachio ehpeo, kaꞌchi iika noꞌo naꞌnaritomerimua pehjio, nape piie taawechiope.
\p
\v 37 Peeroa waikao utewa cheeka iinatukekapua eenechi:
\p —Nape Paamira, ¿aatia tiiachipa ki siimetenia? Nape Paamira, kiisi kaꞌchi eꞌramenia ahkasi mukukainia, aamo nehpupawachio.
\p
\v 38 Peero waꞌa chiiopa chaaneka Eesusia:
\p —Waꞌa chiiamemua chiiao, nape neeea aamo chaanenapua, keꞌchu kusuyoi totori oowirao paꞌa piario, paisa simiyame noꞌo kaꞌitameri muuua, kiisi noꞌo machiyo tuuka. ¿Pichiwa waꞌa eꞌramemua aamo chiia?
\c 14
\s Eesusia Noonochi pooe
\p
\v 1 Eesusia waꞌa chaanesa Peeroo, yooma taamo ahpo maꞌmasiterao chaanekapua:
\p —Kaꞌte yuuwesi, noꞌo siimo tuuyoio, noochi ahjachi eꞌrakache mochipuapua ohso kaawe, Apoe noꞌo Noono Riosichi tiame.
\v 2 Noꞌo Noono tewekachi kahtiachio, ki ookapi iintunapua ahka mochipuachio. Ki waꞌa teeresoo, ki cheemiinia waꞌa simika aamowichio katewemio tuuyao, yooma pipiripi ahka aamo mochimiachiopua.
\v 3 Ehpe ki tehpe simisao, ahkasi aamowichio katewesapa enamania eenechi, waꞌa aamo iꞌtomaniapua noꞌo ahjama, noꞌo ahjama mochimichiopua waikao, ahka noꞌo teꞌta kahtiachi;
\v 4 Naneꞌriame eemeapa, achini teeka asipuameo waꞌao.
\p
\v 5 Toomasia chaanekapua waikao:
\p —Nape Paamira, ¿achini nokaka asita teemea waꞌao, kiisi naneꞌrenaoi teemea waꞌa pooeoi, ahka aamo simiyachiopua?
\p
\v 6 Eesusia chaanekapua:
\p —Neeekamerapua puuu pooea, noꞌo yasimiachi asitemeria; neeechepua teꞌta pichiwari aamo tuuyekamea; neeechepua tiameo, teꞌta ahjari kiꞌyameraa, ahkasi ki wahjiamesio. Aawataai ki asima noꞌo Noꞌnochio, ki noꞌoeo.
\v 7 Noꞌoo teꞌta machiyame enesaa eemea, noꞌo Noono tiame, teꞌta machimii eemea. Machikamekai eemeapa noꞌo Noonoo, noochi tetewaka ohjoamekai eemeapa noꞌo Noonoo.
\p
\v 8 Eeripea waikao chaanekapua:
\p —Nape Paamira, ahjama ohjoamekai teeresaa teeme, ¿achinikai ki tetewame teemea? Taamo tetewitesao naaju. Tetewisaa teemea puꞌkao, tisiwa kaawe erakomii teemea waikao.
\p
\v 9 Eesusia waikao chaanekapua:
\p —¿Kiisikosa noꞌo machika tetewame muuua Eeripe, ki ehpesi noꞌo aamo ahjama oiyoi? ¿Aatia tiiachipa aamo tetewitejerata eemea noꞌo Noꞌnoo? Neeekamera puuua, Apoe noꞌo Noonoa; noꞌo tetewamea, apoe noꞌo Noono tetewamepua.
\v 10 ¿Ki pichikiamekosa eemea noꞌo tiiario noꞌo Noonochi tiiamekopua, apoe noꞌo Noono tiiario noochi tiiamekoopua? Noꞌo nayewao ki nooe chiiamepua, weeechi tijoechitiao, noꞌo Noonoa noochi tiiamekapao, apoekaitepua noochi chiiao.
\p
\v 11 Waikao Eesusia yooma taamoo, chaanekapua:
\p —Noꞌo pichikepuapua noꞌo chiiao, noꞌoo noꞌo Noonochi kahtiamekopua, apoe noꞌo Noonoo, noochi kahtiamekopua waꞌachitia. Ki noꞌo chiia pichikesaa, noꞌo ihsiaoi pichikepuapua, apoe noꞌo Noono noochi ihsia.
\v 12 Pichiwa chaaninia, aaataai noochi paparamea, noꞌo Noono tehkiwa noꞌo inisia teetomeripua, apoepechi noꞌo Noonochi paparamichio tiꞌtijoe paajuteka, ooweru waꞌachitia. Nape puuu apoepechia, epeche muuwaeme paajutemeri ki noochitia noꞌo Noonochio, noꞌoo noꞌo noꞌramerikopa noꞌo Noonochio.
\v 13 Eemea aaata noꞌo Noonochi enatekamea aaata tatakoriria cheriwepuawichioo, ihtaoi tatakoriria noꞌo Noonoe cheriwepo tuuka masitemeripua, nape noꞌo ahpowichio noꞌo kurusichi mukuriae natetewachi itaka. Noꞌo kurusichi mukuria ki ookapiwichio tatakoriria natetekao, noꞌo Noono tísia peenia tiiame inataria puuua, yooma wehjoarichi mochikamewichio, tetewimichiopua.
\v 14 Ihtaoi ahpo cheriwepuawichio noochi eenakameo, cheriwemachenia puꞌkao, nape ahpowichio noꞌo iintoriae natetewachitia, noochi itasoopua.
\s Eesusia Riosi Riosiwari Teꞌta Piipari uhjuramo tuuya
\p
\v 15 ’Noꞌo nakiyame enesaa eemea, noꞌo eꞌweka mochitopuapua, noꞌo aamo nuuria.
\v 16 Waꞌa aamo teꞌtereka mochitopao, noꞌo Noono nayewemania aamo uhjuremichioopua ahpo Riosiwarioopua, aamo ahjama teetomichiopua ki wahjiamesio, aamo kuꞌisimichiopua aamo teetowachio, yooma ihta aamo nakiyachisio, aamo oisa erapatesimichiopua tiamé.
\v 17 Puuu iintomeripua amochio, teꞌta pichiwari tiiamera pahtetekao. Iꞌwache weeechi nokiwame puꞌseriamea, ki kaawerumachiche mochitonariamea, kaꞌchi iika uumeripua puꞌka noꞌo Noono Riosiwari kuꞌiwarao, ki uuka tetewamekopa puuua, noꞌo Noonoe ahpo kiamiao. Eemekamera kiatiamepa puꞌka Riosiwario, puuua epeche kuꞌiwa yasitomeripua yooma pipiripichi amochio, ki wahjiame aamo kuꞌisimeripua noꞌoo noꞌrasoopua.
\v 18 Kaꞌchitia taawechi aamo piineri toayai neeea neesetokao; eenechi enamerikaite neeea, puꞌka waꞌapi Riosiwarichi amochi yahchamechi, nooe amochi yasitomiaopua, ki wahjiame amochi teꞌta kuꞌisimia.
\v 19 Ki mehka toiaitepua, iꞌka weeechi mochikame ki kaꞌkarumao, ki oosa noꞌo tetewimiachiopua iꞌka weeechio, nape eemea noochi teꞌteretokamea, eenechi noꞌo tetewimiitepua noꞌoo oijenasocheo pehjio. Neeea wahjipaniame newitosaapua, kajuyachi taawechio, aamoo wahjipakamekoipua, eenechi aamo ahjatemania.
\v 20 Nape eenechi noꞌo ahjakame tetewapaopua keꞌchu noꞌo noꞌroipua tewekachio, pahtemeri eemea waikao, pichiwa Noꞌnochi eenamekopua, noꞌo Noonoo neeeopua tiameo, piiripi waꞌapikai tiiopua. Waika waanamio, eemea noꞌo ahjamao piiripi waꞌapika teeremeripua, noꞌoo amochi teetoamekopua noꞌo Riosiwarieo.
\v 21 Noꞌo nuuraria kaawe neesetoka iꞌtoamea, pichiwa noꞌo nakiyame puuua. Waꞌa teeka noꞌo nakiyameo, noꞌo Noonoai tísia nakiyamepua puꞌkao. Puꞌka waꞌa teꞌteriamechi, noꞌo Noonoa neeea tiameo, pukachi taamo tetewitemapua, piiripichitia, Riosi Riosiwarichi.
\p
\v 22 Waikao Uurasia, nape ki Ihkarióte Uurasia, iinatukekapua:
\p —Paamira, ¿aatia taamoche taamo tetewitetamua, ki aamo paparameopua kaꞌi?
\p
\v 23 Eesusia, nehjiakao chaanekapua:
\p —Aamoo noochi paparasoopua, noꞌo Noonoa neeea tiameo, piiripichitia yasitomeripua amochio.
\v 24 Nape ki noꞌo nakiyamechiopua kihta yasitomeri teeme pukachio, ki noꞌo eꞌweka yasitoamekopua puꞌkao, noꞌoo, noꞌo Noonoche chiia nayewerioipua. Ihji noꞌo chiia aamo inamuaa, apoe noꞌo Noono naawesa puuua, apoe waꞌapi iꞌka weeechi noꞌo uhjurakame, ahpo noochi nayewa inamupuawichiopua.
\p
\v 25 ’Neeea iiweta aamo ahjama kahtiaapua pehjio, iꞌka yooma aamo tuuyamepua.
\v 26 Nape noꞌo Noonochi noꞌrasoopua, noꞌo Riosiwarie ihsimania aamo kuꞌikao, noꞌo Noonoo aamochi uhjuramia. Noꞌo Riosiwari ihsimapua aamo tuuyekao, yooma itapiti aamo masitiachio, yooma noꞌo aamo masiteria, inatepatesika.
\p
\v 27 ’Neeea teꞌta kaawe erapari aamo kiꞌyamepua, ki weeechi mochikame kaawe erapari kiꞌyamechitia. Noꞌo aamo kaawe erapari kiꞌyaa, noꞌo waꞌapi kaawe erapari iinuekapua. Pukaepa noꞌo kaawe erapari iinuemea, kihta yuuwesipuapua noꞌo simiyawichioo, itapiti seewekaoipua aꞌchi teeremiaopua, noꞌo ikimiaoipua kuꞌwe.
\v 28 Eemea, noꞌo inamukame eemeapa noꞌo siimio tuuriamekoo, nape eenechi amochio yasimia enameriko tuuriao. Noochi paparamea, noꞌo teꞌta nakiyame enesaa, kaawe erakomete puuua kihta yuuwesika noꞌowichioo, noꞌo Noonochi simiyaa, amochi enamiapa eenechi waꞌa noꞌo simiyopa, nape Riosi Riosiwarichi, yomachi amochi yasitome teereniamechi Riosiwarichi. Noꞌo Noono Riosiwarichi yasipasaapa neeea, ahkaoi teeremeri neeea noꞌo Noono Riosiwarie yasitoaeo, ki weeechi noꞌo weerewae yasitoriachitia.
\v 29 Keꞌchu ikiyoi iꞌka, yooma aamoo chaanenania, iꞌka waꞌa tiame ikisoopua, pichiwa noꞌo cheerio erakomichiopua aamoo, waꞌa erakoapa eemea, kihta seeweka noochi paparaka mochitomichiopua iꞌka weeechio, noochiche ahjachi erakoka.
\p
\v 30 ’Ki tehpe toina neeeapa ki noꞌo aamo nayeweka yasimiaopua waꞌasi, waapi ihtona tukaparichi yeꞌkameapa, puuu teꞌta noꞌo naꞌara yorameria, apoe teꞌta Satanasi tewaniamea, puuua teꞌta ki kaꞌkaruma nokayakamera, noonora. Puuua kiisi iinuekaitepua apochio, noꞌochi newitomiaopua,
\v 31 nape yooma tiꞌtijoeri naneꞌremichio noꞌoo, tísia nakiyamekopua noꞌo Noonoo, puꞌka iintomo eꞌraria iintomania ehpeo, noꞌo Noonoo tísia eꞌweka. Werisisa, nahpe.
\c 15
\s Eesusi teꞌta pichiwari panijuwari
\p
\v 1 Waꞌa oꞌinia puuyatioiopua, pooechi nokisinioio Eesusia, eee cheesika taamo masitesikapua, ahjama nokisinioio:
\p —Neeea, uuwa echitiamepua, noꞌo echakamea, apoe noꞌo Noonopua.
\v 2 Yooma noꞌo paanira ki taakiameo, tehpuchenapua puꞌkao; nape kaawe taakiameo, katewekenapua puꞌkao, charewa ki kaꞌkarumao puhjeneka, epeche taakemichioopua.
\v 3 Eemea, cheriwetiame eemeapa tatakorio, piipaka itipikame, amochi uukapa muuua noꞌo cheeriao, pichikeka.
\v 4 Waꞌa aamo teꞌteresoopua noochio, waꞌachi teerema neeeai amochio, amochi yasimania. Yooma uuwa paaniraa, ki ihchiame enesaa, kihta taakemapua. Waꞌachi teꞌterena eemeai noochioi, ki noochi ihcheka teꞌteriame enesaa, kihta muuwemii eemeai, aamo taakiamechitiaopua.
\p
\v 5 ’Neeepu uuwa echitiamea, eemea paanirapua. Noochi ihchiapa eemea, neeea amochi taakiamepua, nape ki noꞌoeo eemea, kihta muuwemiipua taakekao.
\v 6 Ki noochi ihchiame yasinariamea, ki uuka tetewipuamepua, paanira ikicha ipatiamechitia, wakipasoopua kosopuaichio.
\p
\v 7 ’Eemea noochi ihcheka teꞌteretonariamea, noꞌo chiiao, iyorika uuka yasitonariamea, ihtaoi ahpo nakiya noꞌo itanemeri puuua, aamo muuwewari taakemichioopua.
\v 8 Aamo nokisiamechi kaꞌkaruma taakesoo, noꞌo Noono amochi ihsiwarao, ahpo kaawerumari amochi teteiwa ihsimeripua. Pukachi naania teeremeri eemea, noꞌoe masitetiamekoopua.
\v 9 Waꞌachitia noꞌo Noono aamo nakika yasitoachitia, waꞌachitia aamo nakika yasitoame neeeai. Waꞌachitia mochitopuapua eemeai iꞌka noꞌo aamo nakiyaopua, kaꞌte waꞌatia wekate eemea.
\v 10 Waꞌapi teetosaa eemea noꞌo masiteria teetokao, waꞌapi amochi tetewika uupuamepua, aamo noꞌo nakirao.
\p
\v 11 ’Peenia erakosa naaju, ihji noꞌo aamo chaaniaa, puꞌkawichiopua, ki teesa aamo peenia erakomichio, amochi yasitoniamekoo inataka.
\v 12 Iꞌkache aamo nuurenania, aamo kaawe tetewaka mochipuame, ahpo nakika, noꞌo aamoo teꞌta kaawe nakiriachitia.
\v 13 Kiꞌte teꞌta epeche nakiwamea, kiꞌte mukiwachisi nakiwamea aaatao, ahpo kaawe eꞌrawichioopua.
\v 14 Eꞌwakame eemeapa, iꞌka aamo noꞌo nuureriao, pukaepa aamo, aamokamera kaawe eꞌriame neeea.
\v 15 Neeea aamoo, ki noꞌo tekipanatewa teewaninia waꞌasi, tekipanamea ki yooma naneꞌreteka yasitoame puuua ahpo teekochio, itaoi ahpo yoranareka kahtiaopua puꞌkao. Nape neeea aamoo, noꞌo kaawe eꞌrewachitia tetewamenia aamoo, yooma noꞌo Noono eꞌra aamo naneꞌretesiapa.
\v 16 Ki eemekamera noꞌo uukamepua, aamo ahjama oimichioopua; neeekamerapua aamo uukamea, noꞌo masitia masitesimichiopua tiꞌtijoeo ooweruopua tiame, noochi paparamichiopua puꞌkao. Aaata aamo kuꞌyao noochi paparariame enesoo, noꞌo iintoria ahpowichio kurusichi inatakao, noꞌo Noonochi cheriwewa itasoo, cheriwemeri noꞌo Noono teꞌpa tewekachi kahtiamea, ihtaoi itapiti ahpo cheriwejera itakoiopua.
\v 17 Nape kaꞌte ahpo newitome erakomitia eemea, Riosichi paparamichio eꞌenatewa nokayaiopua tiꞌtijoeo, ooweruopua tiame. Ohsotia aamo chaanenania waꞌa aamo nokisiachi puꞌka yooraka: Kaawe aamo nakika mochitowa, masitepuapua, napati aamo waꞌachitia uuka tetewika.
\s Iꞌka weeechi nanaarame tiꞌtijoeri Eesusi naꞌareniame, ijinuwarama
\p
\v 18 Eesusia simiteka pehji taamo masitekao, eee cheekapu:
\p —Ki noochi paparameo aamo nekumesoo, naneꞌrepuapua noꞌooi waꞌachi teeretiopua pahcha ki aamochitia, nekamuchekao.
\v 19 Eemea, iꞌka wehjoari ki kaꞌkaruma yooraka nokisiame enesaa, kaawe eꞌraka tetewi puai eemea, ki kaꞌkaruma yoorameeo. Nape eemea, noꞌo paajutekopa noochi eꞌenariopa, noꞌo ijinuwa iintapame neeea, ki waꞌachi nokaka mochitomichiopua, ki kaꞌkaruma yooraka mochitoamechitiao. Ehpeo aamoo noochi teꞌteriapakoopa, nekamucheniame eemea pukaeo.
\v 20 Naneꞌrepapuapua noꞌo cheeria: “Yoorewa naewakao, ki epeche yooreka tetewiniame tekipanameraa, ahpo teekorachitiaopua.” Kaawe uuka tetewipuame enesaa noꞌo masiteriao, kaawe uuka tetewipuame aamo masitiaai, noꞌo nuurarikapa. Noꞌo naꞌaretiame enesoo, naꞌarepuame eemeai.
\v 21 Yooma aamo naꞌara yoraniamea, noochi teꞌteriapa waꞌa aamo yorapuamepua. Ki noꞌo Noono uhjurariachi ahjama teꞌteriapa, waꞌa aamo yorameripua, nanaaramea.
\p
\v 22 ’Ki noꞌo eenakame enasoo kihta teeremii puuua ki noꞌo nakika mochikapa kokosapuameo, ki tetewikame enesaapua tísia peenia tiame noꞌo ihsiriao, ki aaata iintome tiiaopua. Nape ehpeo noꞌo eenakoio ki noꞌo uuka tetewikamea tiꞌtijoe ooweru tiamea, noꞌo Noonoe kokosapuametere mochitomeripua.
\v 23 Aaata ki noꞌo uuka tetewamea, noꞌo Noonoi ki uuka tetewamepua.
\v 24 Noꞌoo, ki yooma tetewachi ki maaenari yoorakame enesoo, itapiti ki aaata yorame tiameo, kihta aꞌchi teeremii puuua, ki noꞌo uuka tetewaiopua. Nape ehpeo yooma noꞌo ihsia tetewakaio, naꞌpa taamo ki nakika tetewikamepua, noꞌooi noꞌo Noonoi.
\v 25 Nape yooma ihji ikiniamea, ehkoriami Riosi nayewatura noꞌo ikimio chaachapatiamepua. Puuu ehkoriami nayewatuaa, ehpe taawechiami ki noꞌo nakiyo tuuwa, chaachapakame puuua iyotekao: “Kihta iintokai ki nakiniame neeea.”
\p
\v 26 ’Noꞌoo, noꞌo Noonochi noꞌrasoo eemea, kaaweruma nayewameri eemea noꞌo iintoriao, noꞌo Riosiwari aamo kuꞌimichio noꞌo uhjurariae. Puuu noꞌo Riosiwari yomatiame ihta noꞌo iintoria aamo inatepatesikaopua, yooma noꞌo iintoriao, kaaweruma nayewesimichioopua tiꞌtijoerichio, pichiwa teꞌta waꞌa teeeriopua noꞌoo.
\v 27 Eemea noꞌo ajawariaa, pukerisi oꞌinia noꞌo ahjama ohjokamekapao, waꞌa chaachapameripua.
\c 16
\p
\v 1 ’Yooma iꞌka aamo chaanesika yasitokame neeea, aamoopua, ki noꞌo toaka mochitomichiopua, anachaka puꞌka ki teesa tiame aiwari enameriopua.
\v 2 Maꞌchi ihpapapuame eemea napawikarichio, ahkasi aamo meꞌyakameai, ahpo kaawe eꞌrepuame maaemerapua Riosieo ahpo waꞌa iintoriawichioopua.
\v 3 Waꞌa nokimera puuua, ki teꞌta noꞌo Noonochi teꞌtereka mochitoapa, noꞌochioi.
\s Riosi Riosiwarie taamo piipatewao
\p
\v 4 ’Waꞌa aamo chaanena neeea, naneꞌreka mochimichiopua iꞌka waꞌa tiame ikinioiopua, noꞌo aamo chaaneriao. Pukeri simiyachio, ki aamo chaanekania iꞌkao, aamo ahjama oiyapaopua pehjio, nape ehpe aamo chaaniamenia, simiyapa waꞌasi.
\v 5 Nape eemea, aaataai ki noꞌo iinatuketiamepua akana noꞌo simiyao, maꞌchiame aamo noꞌo tuuyekamekopua, akana noꞌo simiyachio.
\v 6 Oowera noꞌo simiyache, yuuwesina eemea.
\v 7 Nape pichiwa chaani neeea, kaaweruma simiyamekopua aamowichioo noꞌo simiyaa. Ki noꞌo simisoopua, kaꞌchi iika enameri amochio aamo Kuꞌitomeria, nape nooe simisaapania noꞌo Noono kahtiachio, nooe waꞌapi iintomania aamo Kuꞌitomeri uhjurekao, puuu aamo Kuꞌimeria, nooe waꞌapi Riosiwari enemeri puuua, amochi enameria.
\v 8 Ihji noꞌo Riosiwari iꞌka weeechi enasaapa, puuu iintomapua tetewitekao, yooma tiꞌtijoe ooweru tiameo ahpo iikachio, kiisi kaꞌkarumakopua, tísia tatakorikamekapaopua. Nape puuu Riosiwaria tiameo, puꞌka ki kaꞌkaruma nokaka mochikameo, tetewitemapua tiameo aachin nokaka ahpo kaꞌkarumachi enepamiaopua tiame. Noꞌo Riosiwaria ihsimapua tiameo, yooma noochi paparakameo naneꞌretekaopua, puꞌka naꞌarari noonorao, noꞌo Noono kokosaritere teereniakopua waꞌasi, puꞌkao teꞌta kokosapuawichiopua teꞌta kajuyachiopua taawechio.
\v 9 Ihji kiisi kaawe nokiwamea tatakorika mochitoame tewaniame puuua, ki noochi paparaka mochitoamekopua puꞌkao.
\v 10 Noꞌo Riosiwaria, apoe ihsimapua ki ookapi paajutekaopua aachin teeka kaawerumachi enepameriopu, noꞌo Noonochi eꞌenamichio paajutekao. Iꞌwa weeechiche itipisaane, noꞌo chiia inamukameche eꞌenatemiinia noꞌo Noonochio. Nape simisaane noꞌo Noonochio, ahkaoi yomachi tiiame enamania noꞌo yasitoao, noꞌo Riosiwari tiiarirao aaatachioi, noꞌo Noonochi paajutenariaopua.
\v 11 Teꞌta naꞌarari Noonoraa, noꞌo Noonoe kokosaripuache chanitiamekopaopua, noꞌo Noono ki kaꞌkaruma katewemiao, teꞌta pichiwa enamerichepua, kiisi waꞌatia itipimeripua puꞌkao.
\p
\v 12 ’Ki ookapi iinuenia pehji aamo chaanemiao, nape ehpeo eemea, ki pahtemapua pehjio.
\v 13 Nape apoe Riosi Riosiwari teꞌta pichiwariemea, amochi enasaapa, yooma aamo masitemapua, noochi simiyame pichiwarichiopua. Apoe Riosiwaria ki seenu Riosiwarie ihsimeripua masitekao, apoe noꞌo Noonoe ahpo chaanesiwa masitesimapua. Puuu noꞌo Riosiwaria tiameo, puuu teetosimeripua aamo masitekao, ahkasi wahka ihtoriachisiopua, itapiti ikipuamechi simiyameopua.
\v 14 Noꞌoo, puuu ihsimapua noꞌo kaawe chaniwa tetewipakaopua, akatiasi noꞌo soparamekoopua, noꞌo ihta aamo kiamiaopua kuꞌiwario, noꞌo iinuwachi uuyapapua aamo kiamiaopua.
\v 15 Yooma noꞌo Noono iinuekao, noꞌo iinuwapua tiame. Pukaepa noꞌo iinuachi uumio tuuna neeea, aamo kiamiawichioo.
\s Yuuwesiria kaawe erapari enepameripua
\p
\v 16 ’Kuꞌitapi toiyachio, kiteremania iꞌwao, nape eenechi kuꞌitapichio, noꞌo tetewimeri eemea.
\p
\v 17 Ookapi teeme Eesusi ajawariaa, taamo ahpo chaachapai teemea:
\p —¿Ihtana kuꞌitapi naewaka cheeriamare Eesusia, ki ahpo tetewipo tuukao, waꞌa ikisao eenechi kuꞌitapi ahpo tetewipo tuuriao? ¿Ihtana chanika cheeriamarepua, neipao ahpo Noonochi simimio tuukaopua tiameo?
\v 18 ¿Aatia waꞌa cheeka nayewariare Eesusia, “kuꞌitapi”, cheekao?
\p
\v 19 Eesusia naneꞌriapa ahpo iinatukepuameo, chaanekapua:
\p —Noꞌo kuꞌitapi ki tetewisaa, eenechi tetewipo tuuriao, ¿puꞌka naneꞌrenariame eemea?
\v 20 Kaawe keepumitia naaju iꞌkao: Aamo naarakoio yuuwesikao, ki nuꞌuti siimera kaawe erakoniamea, wahja tijoechiopua ki kaꞌkarumachio. Nape neipa yuuwesisaapa, kaawe erakomeri eemea eenechio.
\v 21 Aaata oowitiame saumeria, iiyana eꞌrame puuua ahpo saumiachi asiyoopua, kokosa aiwamiapa puuua, nape puꞌka sauniame aiwari uꞌmatosoopa, yooma natekepamepua puꞌkao, waꞌa ikisaapa kaawe ejeramepua eenechio.
\v 22 Eemea, waꞌachi teꞌteremapua ehpeo, ehpeo yuuwesina eemea, nape eenechi noꞌo amochi tetewitemia machejenesoopua, eenechi peenia erakomeri eemea aamo iikachio, nape teꞌta peenia erakorie ki aaata uꞌyeme tiameee.
\p
\v 23 ’Puꞌka taawechiami noꞌo Noonochi simikoio, eemea kihta noꞌokamera itanemeripua waikao, ihtaoi aamo itayaopua Riosichi taꞌiria mochitopuaopua. Puꞌka aamo kiapuao, Apoe teꞌta Noonokamera itanemeri eemea puꞌkao, Apoe iintomeripua yooma aamo itaya kiꞌyakao, yooma ihta apochi taꞌiria mochitoniameopua. Waꞌa iintomeri puuua aamoo, noꞌo ijinuwarakopa.
\v 24 Ahkasi ehpeo, kihta waꞌa tiiame itayame eemea noꞌo Noonochio, noꞌo ijinuwako tuukao. Nape noꞌo Noonochi simisoopua, noꞌo Noono itanepuapua, yooma ihta aamo nakiyaopua, noꞌo Noonochi taꞌiria mochitopuaopua. Waꞌa teꞌteretosaa eemea noꞌo Noonochio, tísia taꞌiria tiiame mochitomeripua, tísia kaawe erapuame tiiaeme.
\s Riosie Weratiamea newitomeri iꞌka wehjoarichi naꞌarameo
\p
\v 25 ’Ahkasi ehpeo, itapiti waꞌachitarichi aamo nayewekame neeea, nape asinapa noꞌoo, ki waꞌachitarichi aamo nayewemiaopua, maꞌchiame aamo neꞌnetemania waikao, noꞌo Noꞌnoo.
\v 26 Noꞌoo noꞌo Noonochi noꞌrasoopa, aamoe waꞌapi itameripua noꞌo Noonoo, tewekachi kahtiameo. Noꞌo Noonochi noꞌrasaapa, ki neee ihsimeripua, noꞌo Noonochi aamowichio itanekaopua. Waꞌa teꞌterewa iinuemeri eemea noꞌo Noonochio, noꞌo ijinuwarakapa.
\v 27 Apoe noꞌo Noꞌnoa aamo inamumapua, tísia aamo nakiyamekapa. Waꞌa tiiame puuua tísia aamo nakikao, aamoo tísia noꞌo nakika mochikamekopapua, aamoo noꞌo pichikeriopua tiameo, noꞌoo teꞌta noꞌo Noonochi eenamekopa.
\v 28 Neeea noꞌo Noono tiiarirachi machenakame neeéa, weeechi enamiaapa, pukaepa neeea ehpeo, iꞌka weeechi mochikame toisaopua, noꞌo Noonochi noꞌrameripua, noꞌo Noono Riosi tiiarichi yasimia.
\p
\v 29 Waikao teemea Eesusi ajawariaa, chaachapakapua:
\p —¡Aa, ehpeo maꞌchiame nayewakame muuua, kihta itapitichi waꞌachitarichi naewaka!
\v 30 Waꞌatiao, ehpeo naneꞌrekame teemea aamoo, yooma ihta yomatiame machikamekopua, keꞌchu ihta aamo iinatukioio, yooma naneꞌriamekopua.
\p
\v 31 Eesusia nehjiakapua:
\p —¿Ehpeope, pichiwa pichikiame eemea, noꞌoo aatanakotiao?
\v 32 Nape waꞌa erakoai eemea, ki tehpe simiyachi ujumamiite eemea, piineri toakaoopua noꞌoo —chaaneka Eesusia—. Nape aamo ujumakoi, ki piineri kahtiai teerema neeea, noꞌo Noonoa noꞌo ahjama kahtiai teeremapua, Apoeo noochi yasitoamekapa Riosiwarirao.
\v 33 Yooma iꞌka aamo chaanekame neeea, kihta aꞌchi eꞌraka aamo mochitomichiopua. Iꞌka weeechi mochikaopua pehjio, itapiti aꞌchi tiame naꞌarari aiwameri eemea. Nape eeme noochi ahjachi erakoamea kaawe erakomitiapua, noꞌoo newitoriopa iꞌka wehjoarichi teꞌta naꞌarari noonoraopua, iꞌka weeechi ki kaꞌkaruma yooraka mochiniameo yeꞌkaka yasitoameo.
\c 17
\s Eesusia ahpo Noono, ahpo ajawariawichio itani neesetori
\p
\v 1 Eesusia waꞌa cheesika taamo masitekoiopua mochipatiapua kuꞌitapi. Eesusia waikao, teꞌpa neꞌnepakao, eee cheeka nayewekapua ahpo Noonoo:
\p —Noꞌo Noonoo, asikame neeeapa aamo yahchariachio, aamo teꞌta inataria iintomiachio yomatiame iꞌka wehjoarichi mochikamewichioo. Kaawe noꞌo iintomia tetewijeraninia puꞌkawichioo, neeeai aamoo tísia kaawe aamo teꞌta inatatoriaopua kiisi ki kuꞌitapisi ehkoriami oꞌiniaopua, ehpe iꞌka taawechi noꞌo iintomeriopua.
\v 2 Muuua Noꞌno, reesiseri noꞌo kiꞌyakamemua, ki wahjiame ahjari kiamichiopua, yooma aaata amochi paparaka eꞌenakameo, iꞌka weeechi mochikameo. Yooma puꞌkao amochi eꞌenakame ahpo tatakori cheriwepuawichioo, noꞌo kiꞌyakame muuua puꞌka piipatemichio. Waꞌa iintokame muuua, amoe noꞌo uhjurakamekopamua iꞌka weeechio, noꞌoo, puꞌka tatakorikameo, pejana natetemichiopua tatakoririao, amoe waꞌapi kokosapuameo, teꞌta weemera ahjari kiapuawichiopua ki wahjiamesi.
\v 3 Neeea puꞌkao, weemera ahjari kiꞌyamepua, noochi paparaka amochi paparaka tiame eꞌenakamekopapua puꞌkao, aamoo teꞌta pichiwari Riosikamerakopua. Neeea waꞌa iintokamepua puꞌkao, puꞌka iintomichio amoe uutiamekapa, puꞌka iintomichio weeechi noꞌo naawatekamekopua.
\p
\v 4 ’Iꞌka weeechio neeea, aamo teꞌta kaaweruma tiiao yomatiame weeechi aamo nayewakamenia; neeea tiameo, aamo noꞌo nuureria iꞌka weeechi noꞌo iintomichioo, yooma iintokamenia waꞌasio.
\v 5 Ehpeo, noochi aamo tetewitepuapua, puꞌka amochio puꞌka ki nuꞌuti tísiwari aamo tiiaopua, keꞌchu iꞌka weeechi naayachisiopua, taamo pirena teꞌtereniameopua taamo tiiarichio.
\p
\v 6 ’Neeea iꞌka noꞌo ahjama ohjokameo, yooma aamo tiia maꞌchitekame neeeapa puꞌkao, aachin tiiamekopua aamoo. Ihjia aamo ijinuwakapao, noꞌo ijinuwapua tiame, amoeo waꞌa tiame noochi tetewiniamekopua. Iꞌka aapoeo, noꞌo eꞌwekapao, aamo eꞌwekamekopapua tiameo.
\v 7 Ehpeo ihjia, naneꞌreka mochitoamepua, yomatiame noꞌo tiia, amochi oꞌinia eenamekopua.
\v 8 Waꞌa tiame pahtekamepua, yooma noꞌo masiteriaopua noꞌo chuwaeo, amoe inatarichi eꞌrario noochi eenamekopua nayewamichioo. Waꞌa tiame pahtekamekapaopua, amochi paparamepua.
\p
\v 9 ’Puꞌka waꞌa teeremichio aamo uuriaopua, aamo itaniamenia puꞌkawichioo, kaawe inateka neesetomichiopua puꞌkao. Wahjachi ki aamo ijinuwaopua, kihta aamo itaniamenia puꞌkawichioo, aamoche ijinuwawichio noochi iintapariawichio itaniamenia neesetojerakao.
\v 10 Yooma noꞌo ijinuwaa, aamo ijinuwapua tiameo; yooma aamo ijinuwaai, noꞌo ijinuwapua tiame. Puꞌka waꞌa teereniachi ijinuwakao, maꞌchiame piiripi tiiame teemea.
\p
\v 11 ’Neeea ki itipimapua iꞌwao, nape aapoeo iꞌwa itipimerapua. Pukachipa muuua teꞌta kaaweruma Noonoa, kaawe neesetopuapua puꞌkao, aamo mochiwarikopua, puꞌkao, apochi kaawe erakoka mochitomichiopua, taamoo pirena teꞌteriachitia.
\v 12 Neee iꞌka weeechi kahtiaopua pehjio, kaawe inatekame neeea puꞌkao, amochi eename inatewarie. Aamo noꞌo uukeria ajawariopua, yomarika noochi paparaka mochitoamepua, nape piiripia kaꞌi, Ehkoriami Iyoterichio chiiachitia.
\p
\v 13 ’Ehpeo aamo kahtiachi noꞌramerinia. Nape noꞌo ahjama ohjokameopua, weeka itapiti kaawe eꞌrari tuuyekamenia puꞌkao, kaawe erakomichiopua noochitia.
\v 14 Tuuyekame neeeapa puꞌkao, yooma aamo iintomia inatarichi eenameopua. Puuu aamo inatarichi eename uukamekaapua, amochi ijinuwa eenepakame puuuapa. Waꞌa iikapa puuua, ki iꞌka wehjoarichi ahpo ohjorewa iinuekaite puuuapa, noochitia waꞌachitia ki iꞌwa wehjoarichi ohjoekai tiiamepua. Puꞌka iꞌwa ohjoeraemea, kiisi taamo nakika tetewamepua.
\v 15 Neeea noꞌo ahjariao, ki aamo puuyanamichio itaninia iꞌka wehjoarichio, ohso kaawe aamo inatejeraninia, iꞌka weeechi ki kaꞌkaruma noonoraopua, kaꞌchi yoramichiopua puꞌkao.
\v 16 Neeea ki iꞌwa weeechi ohjoerewaemekapao, waꞌachi teꞌtiame noꞌo ajawariai. Pukaepa aamo neesetojeraninia puꞌkao, ki apochi panisumichiopua Satanasio, apochi erapatekao.
\v 17 Kuꞌimitia puꞌkao, ahpo piipakameche mochitonaretekapua puꞌkao, aamo teꞌta kaaweruma eꞌrarie iikachi naawesika, amochiche paparaka ohjoremichiopua puꞌkao, kiisi sewina erapaka.
\v 18 Neeea aamoo, teꞌta noꞌo uhjuraretiachitia weeechi tiꞌtijoeri nayewemichioo, waꞌachitia uhjurakame neeeai puꞌkao, yomachi mochiwachiami nayewemichioopua, amochi eename tuuyewario.
\v 19 Neeea, yomatiame noꞌo ihsiwachio, aamoche kaaweruma tuuyewari tiꞌtijoeri tuuyeka ihsikamenia, puꞌka tiꞌtijoerio teꞌta aamo ijinuwara enemichiopua, aamo pichiwariwachi teꞌta paparakamekopa.
\p
\v 20 ’Ki iꞌkache ajawariawichioche aamo itanenania, yoomawichiopua tiameo, wahjachi amochi paparameriopua pehjíi. Puuupechi nokisimeripua amochi paparatekao, aamo tuuyewari nayeweka tuuyesikao.
\v 21 Neeea aamo itanenapua tiame kuꞌimichioo, yooma amochi paparaka mochikameo, teꞌta kaawe ahpo nakika mochitomichiopua, teꞌta pirena teꞌtereka, teꞌta taamoo, pirena teꞌteriachitia. Puꞌkaonia teꞌta tamochitia pirena teꞌtereka mochitojeraninia, puꞌka aaata ki taamochi teꞌteriameopua, pichiwako erapamichiopua noꞌoo, amoe noꞌo Noono uhjuratiamekoopua.
\v 22 Neeea yooma noochi paparakameo, piiripi waꞌapi pirenaturi iintapakamenia, piiripi waꞌapi pirenaturi teereka ohjoremichiopua, noꞌoo aamo noꞌo Noonochiopua tiameo, piiripichitia pirena teꞌteriachitia.
\v 23 Neeea puꞌka noochi paparamechio, yasitoamenia noꞌo Riosiwarieo; muuu noꞌo Noonoa, noochio yasitoamemua tiameo, piiripi waꞌapi Riosiwarikapa teemea taamo teꞌterewachio. Waꞌa teereka piiripi Riosiwarichi teemea, yooma aaata pipiripi tamochi paparamechi, yasitoame teemea piiripi teeka taamo Riosiwariwao. Waꞌa teekao, aaata ki tamochi paparamea, tamochi paparameo kaꞌkaweruma itapiti yoorame tetewapaopua, kaawe ahpo nakika mochitoameopua tiameo, naneꞌrema puuua puꞌka tamochi paparame iikachio, itapiti tísia kaaweruma iinuemekoopua. Waikaopu ki tamochi paparamea, noochi paparapa kaꞌkaruma yoorameko erapamapua, itapiti kaaweruma ijinuemekoopua iikachio. Waꞌa erapakaopua, pichiwa noꞌo tewekachi amochi oꞌinia eenameko erapamapua, ki oowera tijoeko maaeka. Aapoeoipua waikao, naneꞌremapua tiameo, waꞌachitia ahpo nakiwamekopua amoeo, muuu noꞌo Noꞌnoo, noꞌno nakiyamechitia.
\p
\v 24 ’Noꞌnoo, yooma tamochi paparakameopua, noꞌo ahjama mochitejeraninia puꞌkao, puꞌka aamo noꞌo kiꞌyariaopua newipatemichio. Neeea tetewijeraninia noꞌo kahtiachi mochikaapa, tetewimichiopua neeea muuukopua, ki ehpesioi waꞌapitia ahjaka yasitoame, piiripi tiiarichi waꞌapi, keꞌchu iꞌka weee naayachikoipua pehjio.
\v 25 Muuu noꞌo Noonoa, Teꞌta Kaawerumara muuua, nape iꞌka weeechi ki amochi inataka mochitoamea, teꞌta kiisi aamo machiyamepua, aamoo teꞌta kaawerumarakoipua. Nape neeea, teꞌta aamo machiyamerapua, ahkasi aamo teꞌta tiiarirachi, aamo waꞌapi tiiarichi machenakamekapa. Yooma noochi paparakamea, naneꞌriamepua noꞌoo, amochi oꞌinia eenakamekopua.
\v 26 Puꞌkao neeea aamo tiiao, maꞌchiame tuuyekamenia, waꞌapi teetomeri neeea amochi simiyame masitekao, aamo kahtiachi noꞌrakaio. Waꞌa yasaka kuꞌisimania noꞌo Riosiwarieo, kaawe ahpo pirena mochitomichiopua puꞌkao, kaawe ahpo nakika waꞌachitia, taamo ahpo nakiyachitia.
\c 18
\s Chapinia Eesusi
\r (Maateo 26:47-56; Marako 14:43-50; Ruuka 22:47-53)
\p
\v 1 Waikao Eesusi teewesoopua ahpo Noono ahjama nayewakao, ajasika uumatotiapua Seeroni kohjochioopua, paonamina. Paao ajasisaapua waikao, itapiti taakiame echitiachi yeepo muitiápua.
\v 2 Uurasia Eesusi noriwi naꞌarekamea, machiyamekapua tiame waꞌasi waꞌao, weesa eenakamekapapua waꞌao, taamo Eesusi ahjamao.
\v 3 Ihji Uurasia, neꞌneseriosi paꞌpamiratuameo paꞌparisero paꞌpamiratuameopua tiameo, ahjama ahpo kateweriai puuua, muuwaeme soontaro ahpo kiapuaichiopua Eesusi chapipuamewichio. Ehjepamio Uurasia, muuwaeme soontaro yeeka waꞌatikia ihtoame tetewetiapua Eesusi chapisa iꞌtomia waꞌasi. Puuu soontaroa, yoomahka tahjetoka nokisiamekapua, ahpo merimacheta makotoka tiame.
\v 4 Waikao Eesusia naneꞌriamekapua ahpo ikimiao, pahcha weripaka pejanao, iinatukekapua, waꞌa eꞌnakameo:
\p —¿Aatana iꞌyame eemea?
\p
\v 5 Aapoeo chaachapakapua:
\p —Eesusi, Nasare tijoe.
\p Eesusia waikao chaanekapua ahpo iꞌyasiameo:
\p —Neeeju puuua.
\p Puuu Uurasi Eesusi noriwi nehjamea, waꞌachi weeriapua tiame, Eesusi iꞌyasiame ahjama.
\v 6 Puuu Eesusi iꞌtomia eꞌenakamea: “Neeepua”, cheekopa Eesusio, ukana ruhjikapua majaka.
\v 7 Waikao Eesusia eenechi iinatukekapua:
\p —¿Aatana?
\p Aapoeo eenechi nehjiakapua:
\p —Eesusi, Nasare ohjoeme.
\p
\v 8 Eenechi chaaneka Eesusia:
\p —Neeesakotine. Noꞌo iꞌyame enesaa, toipuapua noꞌo ahjama nokisiao, nonoramichioopua.
\p
\v 9 Waꞌa tiiame ikitiamea waꞌao, Eesusi eee cheeria enerepua ahpo Noono ahjama nayewaio: “Aamoe noꞌo kiatiao, piiripioi ki wekatekamenia.”
\v 10 Waikao Siimoni Peeroa, ahpo merimachetaeka maꞌchipaka, nakachi meteka tehpunekapua ahjamina, puꞌka Marakoo tewaniameopua, teꞌta neꞌneseriosi weripateriaopua.
\v 11 Nape Eesusia chaanekapua Peeroo:
\p —Yaapi katewesamua puꞌkao. ¿Ki iijimerikosa neeea puꞌka tísia chihpuame iijipasochi, noꞌo iijimichio noꞌo Noonoe kiatiame, noꞌo Noonoe eꞌrariaeopua? ¿Ki kajuka simitemerine puꞌka, noꞌo Noonoopua yorajera?
\s Eesusi iinatukeretiapua Aanasie
\r (Maateo 26:57-58; Marako 14:53-54; Ruuka 22:54)
\p
\v 12 Waikao isaeri yaꞌyawichi soontarowaraa kapitaiwaraa tiame, chapisa purakapua Eesusio.
\v 13 Pahchao Aanasi iꞌyetotiapua, Kaija siꞌyarao, puuua teꞌta neꞌneseriosikopua puꞌka taawechiamio.
\v 14 Puuu Kaijakapua, piie taawechio cheekamekaa: “Epeche kaawe enema piiripi waꞌapi mukisaa, yoomawichioopua, ki muuwaeme wahjipamichiopua.”
\s Peeroa ki machiyoti Eesusio
\r (Maateo 26:69-70; Marako 14:66-68; Ruuka 22:55-57)
\p
\v 15 Siimoni Peeroa, neee Waania tiame, mekapi ajatoka naꞌnaritokapua Eesusi iꞌtoniachio. Neeea, machiwamekapapua puꞌka teꞌta neeseriosi paamiraeopua, neeea yooremina pakikapua Eesusi iꞌtoniachio, teꞌta neeseriosi kaarira taꞌperachiopua.
\v 16 Nape Peeroo, maꞌchi itipikapua muiwachio. Ehjepamio neeea, eenechi machenakaonia, waꞌa muirachi inatiame oowitiame nayewekania, Peero reesisemichiopua pakimichioopua taꞌpechio.
\v 17 Waikaopu puuu oowitiame iinatukekapua Peeroo:
\p —¿Ki muuupu tiame, iꞌwa upatiame masitewara?
\p —Kaꞌi —nehjiakapua.
\p
\v 18 Tuuroikopao waꞌa nuꞌnurewaa, ihsawi choatiame kosoriapua. Waꞌa ikisaopua waꞌa ajakapua tatapaka, Peeroai waꞌachi kahtiapua waikao naꞌisue, tatapaka.
\s Teꞌta tiopa neesetoamea, utewaeme iinatukewa Eesusi
\r (Maateo 26:59-66; Marako 14:55-64; Ruuka 22:66-71)
\p
\v 19 Teꞌta neeseriosia, iinatukiapua Eesusio ihtana masitia, masiterachi simiyameopua tiameo.
\v 20 Eesusia nehjiakapua puꞌkao:
\p —Yooma tetewachi masitekame neeea tiꞌtijoeo ooweruopua tiameo. Ki seenepiche simiyame masitekame neeea napawikarichiamiopua, iꞌisaeri tiꞌtiopachiamiopua tiame, yooma iꞌisaeri nanapawiriachiamiopua. Kihta masitekame neeea noriwio.
\v 21 ¿Achinikai noꞌo iinatukenamua? Aapoe iinatukepuapua ohso kaawe, noꞌo masiteria. Puuu naneꞌrenapua noꞌo cheeriao.
\p
\v 22 Waꞌa chiiopa Eesusio, chokichi weeriameraa, wewekapua chaaneka:
\p —¿Waꞌa cheeka nehjianimua teꞌta neeseriosi paamiratuameo?
\p
\v 23 Waikao Eesusia chaanekapua:
\p —Ki kaawe noꞌo cheekame enesoo noꞌo chaanepapua ihtanachi ki kaawe noꞌo cheerio, nape kaawe noꞌo cheekame enesoo, ¿kihtanawichio noꞌo wewemetemua?
\p
\v 24 Aanasia waikao purinurasaopua, Kaija iꞌyetonurakapua, piirechi teꞌta paamiratuame neeseriosi.
\s Peeroa eenechi kaꞌitani Eesusi
\r (Maateo 26:71-75; Marako 14:69-72; Ruuka 22:58-62)
\p
\v 25 Kaija taꞌperachio Peeroo tatapoiopua wahjachi ahjamao, aaataa iinatukekapua puꞌkao:
\p —¿Ki muuupu tiame puuu tijoe chapitiame masiterawa?
\p Peeroa ahpo noriwitakao, cheekapua:
\p —Kaꞌiii.
\p
\v 26 Waikao piirechi tiame Kaija seekaerachi kahtiamea, Peero tehpuneria nahkara tejimaraa, chaanekapua tiame:
\p —¿Ki paꞌa aamo tetewikane puꞌka chapitiame ahjama, teewi itapiti taakeri echichi?
\p
\v 27 Peeroa, eenchi kaꞌitakapua ahpoo. Iꞌka ahpo kaꞌitoiopua, puꞌka waꞌapichi kusuchacha totori oowiraai.\fig |137-BK00062B.TIF|col|||Totori oowiraa kusunapa.|18:27\fig*
\s Eesusi Piiratochi iinatukewa
\r (Maateo 27:1-2, 11-14; Marako 15:1-5; Ruuka 23:1-5)
\p
\v 28 Kaija petechi oꞌiniao, Rooma yawichi taꞌperachi iꞌtotiapua waikao, waꞌao peereitaniachi. Waꞌa mochioio, maꞌchirepapua waꞌasi. Nape wenejiameraa iꞌisaeri ki muikapua waꞌao, ki naꞌarame teerenariapapua ahpo piipariwachio. Waꞌa pakisaapua, ki koꞌkome teeremerikapapua Semejenato pahko koiꞌniameo.
\v 29 Iꞌisaerio ki muikopao, Piiratoa machenaka chaanekapua puꞌka Eesusi uꞌpakameo:
\p —Tiꞌtijoeee, ¿ihtana wenejina eeme iꞌka tijoeo?
\p
\v 30 Aapoeo chaachakapua:
\p —Kihta iintokame enesoo, ¿aamo uꞌyepatariamare teeme?
\p
\v 31 Piiratoa nehjiakapua:
\p —Aamoe iꞌtopapua puꞌkao, aamo yooreka mochikae katewepuapua puꞌkao.
\p Iꞌisaeri paꞌpamiratuamea chaachapakapua waikao:
\p —Merinare teemea puꞌkao, nape Rooma yoorewaa, ki taamo toayamepua merimichioo.
\p
\v 32 Waꞌa chaachapariachio, maꞌchiame naania tiiamekapua achini yooraka meripuameopua Eesusio, kurusichi chuhchaka.
\v 33 Piiratoa eenechi pakika peereiniachiopua, Eesusio paaesa iinatukeriapua:
\p —¿Isaeri tiꞌtijoeri yawichijuarekosa muuua?
\p
\v 34 Eesusia nehjiariapua:
\p —¿Noꞌo yawichiko eꞌranimua amoe, oowerakoi waꞌa chaanikosamua, inamukapa?
\p
\v 35 Piiratoa nehjiariapua:
\p —¿Isaeri tijoekosane naneꞌremetiao? Ki naneꞌriame neeea naneꞌriao, nape aamo tetejimari waꞌapi, iꞌwa noꞌo aamo uꞌyepakamepua. ¿Ihtana iintokamemu naaju waꞌa yorapua?
\p
\v 36 Eesusia cheerepua waikao:
\p —Noꞌo yawichitumiaa, ki iꞌka weeechi enemeri puuua. Iꞌka weeechi yawichi enesaane yeꞌkario, iinuemiinia noꞌo waꞌinamerio, ki noꞌo chapisa kiapuaichioopua iꞌisaeri tiꞌtijoerichiopua; nape noꞌo yawichiwamiachio, ki iꞌwa weeechipua.\fig |138-WA03921b.tif|col|||Piiratoa iinatukena Eesusio, pichiwakosoopua yawichiko tuuwameo.|18:36\fig*
\p
\v 37 Waikao Piiratoa chaaneriapua:
\p —Waꞌa teesoo, ¿pichiwa yawichimua?
\p Waikao Eesusi nehjiakapua:
\p —Ejeꞌe waꞌatepua, aamo chiiachitia. Puꞌkawichio naawakamenia iꞌka weeechi eenakao, yooma tiꞌtijoerio, teꞌta pichiwarichi simiyameo, machitemia. Yooma puuu teꞌta pichiwarichi teꞌterenariamea, noꞌo teꞌta pichiwari chiia, eꞌwiamerapua.
\p
\v 38 Piiratoa cheeriapua:
\p —¿Ihtanajuarepu pichiwaria?
\s Eesusi peerierae merinurawa
\r (Maateo 27:15-31; Marako 15:6-20; Ruuka 23:13-25)
\p Waꞌa cheesaapua machenakapua eenechi, isaeri tiꞌtijoeri nayewemia. Chaanekapua puꞌkao:
\p —Kihta ki kaaweruma iintokame ihji tijoea, kihta tewakekamenia pukachio ihta ki kaaweruma iintoriao.
\v 39 Nape eemea senepi Semejenato pahkoio, piiripi peereso maamachipamekopaopua, ¿ki iꞌkakamera puhjesa toijerani eemea, iꞌisaeri Yawichikamera Eesusi tewaniame?
\p
\v 40 Waikao aapoeo weeru chaachapakaopua eenechio:
\p —¡Kaꞌii! ¡Puꞌkao kaꞌiii! ¡Warawasikamera puhjepuapuaaa! —chaachapakapua.
\p Nape puuu Warawasia, ichikoamekapua.
\c 19
\p
\v 1 Waikao Piiratoa nuurakapua, Eesusi wepipuaichio wepirae.
\v 2 Eesusi wepisapa soontaroa, yawichi moꞌkori netesaopua wehcha apoche, mosokiratekapua naꞌaraka. Waꞌa yorasaopua, yawichi wisasori chuhchekapua. Puuu wisasoria, sehtanamekapua teesa.
\v 3 Waikao soontaroa Eesusi naaepakao, chaaniapua:
\p —¡Née, neꞌneopu, isaeri yawichia! —chaachapaka wepayapua sekae.
\p
\v 4 Waꞌa noonowiretioopua Piiratoa, eenechi machenakaopua Eesusi iꞌtokao, chaanekapua muuwari napawikameo:
\p —Née, maꞌchipakania puꞌkao tetewimichio, kihta tewakapa puꞌkachio, aꞌchi tiame iintoriaopua ki kaawerumao.
\p
\v 5 Eesusia waꞌa weeriapa waikao, yawichi moꞌkori apoche wehcha netetiamee moꞌkoritetiame. Puuu Eesusia, yawichi wakirata wakiratetiamekapua tiame, tepekuma wakira sehtamurame. Waikao Piiratoa chaanekapua waꞌa muuwaeme napawikameopua, tiꞌtijoeo ooweru tiame:
\p —Waꞌa weeriamepu tijoea. ¿Ihtana iintotaria puꞌkao?
\p
\v 6 Waikao puuu teꞌta neꞌneseriosi paꞌpamiratuamea, wahjachi tiameopua yoorewa inatiameapua, Eesusi neꞌneka siinakokapua chaachapaka:
\p —¡Kurusichi meꞌyaaa! ¡Kurusichi meꞌyaaa!
\p Piiratoa chaanekapua waikao:
\p —Kaꞌi neeea, ki merinariamenia puꞌkao. Teꞌta merinaresaa, aamoe waꞌapi iꞌtoka meripuapua, kurusichi chuhchakao. Neeea utewaeme iinatukeka iꞌyekai ki kaawe iintorio, kihta tewakamenia pukachio.
\p
\v 7 Waikao iꞌisaeri paꞌpamiratuamea chaachapakapua:
\p —Ihji tijoe meripuamechepua, waꞌa chiiame taamo nuurari yoorewewa mochikaa. Waꞌa yorapuamepua, ahpoo Riosichi eenameko tuuyopa, oowera tamochitia tijoekai.
\p
\v 8 Piiratoa waikao, waꞌa tiame inamukapao, tísia seewepakapua puꞌkao.
\v 9 Eenechi yooremina pakikaopua, eenechi iinatukeriapu Eesusio:
\p —¿Akana eename muuua naaju? ¿Ihtana tijoe muuua naaju?
\p Nape Eesusia ki nehjiariapua puꞌkao.
\p
\v 10 Waikao Piiratoa chaaneriapua:
\p —¿Kiisi noꞌo nehjiamemua? ¿Ki naneꞌrenamua noꞌoo, aamo merime tiiariemeko kurusichi chuhchakao, noꞌooio aamo toime tiiameko?
\p
\v 11 Eesusia chaanekapua:
\p —Kihta iintomii muuua, ki waꞌa tiame teeketiame enesaapua noꞌo Noonoeo, tepoona oꞌiniaopua. Nape pukachipa, puuu noꞌo amochi uꞌpakameraa, epeche naꞌara noonoikamepua.
\p
\v 12 Waꞌa tiame inamukapa Piiratoa, achini teeka toipuaichio iꞌyakao, Eesusi pejanao taꞌomamo oꞌraipua tiꞌtijoerio. Nape iꞌisaeri tiꞌtijoeria, simitekapua sisinakao, chaachapakapua:
\p —Puꞌka tijoe toisaamua, ki kaawe teeka itipimamua aamo teꞌta yawichichiopua Seresa. Aaataai yawichi enepakamea, Seresa seepurawarapua.
\p
\v 13 Waꞌa chaachapopa puꞌkao, Piiratoa maꞌchipanurakapua Eesusio. Waikao peerei kateweniachi yasirachi yasipakapua, nuurari yasirachi tewaniamechi, Eureo naewaniachio, Kawata, Tehtewetiame Pooe, cheeka chaniwame.
\v 14 Iꞌka nokioio, oowetaweapapua waꞌasi, puꞌka meere enemiachikapua Semejenato pahkoo, yooma kateweniachikapua waꞌasi, pahkowichioo. Piiratoa chaanekapua iꞌisaerio:
\p —Née, waꞌa weeri aamo yawichiwaa, tesiwa yoratiame.\fig |139-CN01823B.TIF|col|||Piiratoa Eesusio waꞌatia toinarekaopua, muuwari siinakoamechi tetewitena.|19:14\fig*
\p
\v 15 Nape aapoeo sisinakokapua:
\p —¡Kurusichi meꞌyáaa! ¡Kurusichi meꞌyáaa!
\p Piirato chaanekapua:
\p —¿Kurusi chuhchaka meritarene aamo yawichi waꞌapi?
\p Nape iꞌisaeri neꞌneseriosiai chaachapakapua:
\p —Kiꞌtiame piirechi taamo yawichiwaa, apoe Seresa yawichichepua.
\p
\v 16 Waikao Piiratoa, kiꞌyakapua puꞌkao, kurusichi chuhchaka meripuaichioopua, iꞌtoka.
\s Eesusi kurusichi meriwa
\r (Maateo 27:32-44; Marako 15:21-32; Ruuka 23:26-43)
\p
\v 17 Waikaopua iꞌtotia Eesusia. Waikao waꞌa oꞌinia machenasaopua Eesusia kurusi mahtokao, ahkasi Mukukame Moꞌora Wakiyame tewaniachisi mahtotokapua, Eureo nayewaniachioo, Ókota tewaniachi.
\v 18 Waikao waꞌa ajasitioopua, kurusichi chuchatiapua Eesusia, ooka kurusichi chuchatiame naasipa chuchatia Eesusia. \fig |140-DN00492b.tif|col|||Soꞌsontaroa Eesusi neneku kurusichi chuchaniame apechuchani.|19:18\fig*
\v 19 Waꞌa ikitioopua Piiratoa, itapitichi iyotenurakapua Eesusi kurusiwachi chuhchepuame, pukachio chiiamekapua: “Eesusi Nasare tijoe, uurio tiꞌtijoeri yawichira.”
\v 20 Muuwaeme waꞌa enapaka iyonapua puꞌka waꞌa iyotetiameo, waapi muuwarichikopua waꞌao mochiwachio. Puꞌka Eesusi kurusichi chuchatiameo naati, rieko naewachi iyotetiamekapua, raatini nayewaniachi, eureo nayewaniachi tiame.
\v 21 Pukaepa isaeri neꞌneseriosi paꞌpamuratuamea, chaachapakapua Piiratoo:
\p —Kaꞌte iyotemitiamua waꞌa kurusichio: “Uurio tiꞌtijoeri yawichi ihjia” —cheekao. Ohso kaawe iyotemitia muuua kurusichio, eee cheeka: “Uurio tiꞌtijoeri yawichiko tuukame ihjia.”
\p
\v 22 Nape Piiratoa nehjiakapua:
\p —Noꞌo iyoteriaa, waꞌa chiiame iyotetiame puuuapa.
\p
\v 23 Kurusichi chuchasaopa Eesusio soontaroa, ahpo naachutekapua wisasorirao, naaochi ahpo. Nape ampawakira tepekumao, yomatiame ihchiamekopa soontaroa, ki siꞌpananariapao,
\v 24 puꞌka ampawakirao, kaꞌchi iika naachutame tiiamekopa puꞌkao, ahpo newitowa teꞌeriapua puꞌkawichioo. Puuu waꞌa noonoitiamea, ehkoriami oꞌinia waꞌa teeremio tuutiamekapua, Ehkoriami Riosi Iyoterichio.
\p Puuu Ehkoriami Iyoteria eee chiiamepua: “Noꞌo wisasoriwao ahpo naachutekapua, puꞌka wisasori newitowawichioo, apochi newitowa teꞌeka.”
\p
\v 25 Eesusi kurusichi waapio, waꞌa ajakamea naatikapua: Eesusi yeeyera, Eesusi yeꞌchira, Eesusi yeeyera koꞌchira tiame, Maaria Kereojá tewaniame uupira, waꞌa ikisa Maaria Maarena tewaniame tiame.
\v 26 Eesusia noꞌoo, ahpo yeeye ahjama weeriame tetewapao, chaanekapua ahpo yeeyeo:
\p —Yeꞌyee, aamo chokichi weeriamea, aamo taanapua ehpeo.
\p
\v 27 Waikao noꞌoo, teꞌta ahpo nakiya weerariao, noꞌo chaanekapua:
\p —Nee, ehpe waanamio noꞌo yeeyea, aamo yeeye enemapua. \fig |141-CN01840B.TIF|col|||Eesusia ahpo yeeyeo, Waani toowenapua kuꞌika neesetomichioo.|19:27\fig*
\p Waika oꞌinia Eesusi yeeyerao, noꞌo petechi ohjoetekania.
\s Eesusi kurusichi mukuria
\r (Maateo 27:45-56; Marako 15:33-41; Ruuka 23:44-49)
\p
\v 28 Waꞌa cheesapa Eesusia, naneꞌriapa ahpo naꞌara yorapuao, waꞌa tiiame ikimio tuuyo Ehkoriami Iyoterichi chiiao, ahsieme ikimichiopua waꞌa chiiameo, cheekapua:
\p —Paramunane.
\p
\v 29 Waꞌaoi kurusitereo waꞌa weratiamekapua, itapiti choꞌkoame toꞌwame. Waikao waꞌa isapatesa itapiti aꞌpotiameo, iisopo kuhsira kuachi chuchasa kiꞌyakapua waꞌapote, Eesusi piꞌpika rupitumichiopua.
\v 30 Eesusia puꞌka piꞌpisaopua nerojika, chaachakapua:
\p —Kuuwepakamenia waꞌasi.
\p Waikao Eesusia, koomorasipakao ahpo iikao, ahpo Noonochi noꞌrapukapua.
\s Aaata soontaroa Eesusio, nasijicherae wachikachi checheria
\p
\v 31 Waikao isaeri paꞌpamiratuamea, puꞌka meere oꞌichachikopua, ahpo teꞌta iyoriwa taawechiopua pahkoo, Piirato itariaipua Eesusi chapakara kahsinepuaichioo, ikanati mukimichiopua erawisuka. Waꞌa tiame itariai Piiratoa, ki tehpe chuchumichiopua waꞌao, amori asiyamekopa resipuniame taawechio, puꞌka kurusichi chuchukuameo ikanati tekipusa katewepuawichiopua waikao, wahjipakame toaniachiopua.
\v 32 Waikao soontaroa, waꞌa eꞌnaka kahsinakapua chapakarao, naꞌpa Eesusi chokichi kurusichi chuchatiameo, piiripio pahcha, piireo neipa.
\v 33 Nape Eesusi chapakara kahponemiaio, mukuriopa puꞌkaopa, waꞌatia toitiapua waikao, ki kahponesa chapakarao.
\p
\v 34 Nape piiripi soontaroa, nasijicherae checheka yeewatakapua Eesusi wachikachio, waꞌa yooratiapao, eera wiꞌsukapua neerompakame.
\v 35 Neee Waani teꞌta iꞌka waꞌa tiiame tetewikamea, teꞌta pichiwa chiiame neeea. Teꞌta pichikepuapua iꞌkao.
\v 36 Ihji waꞌa tiiame ikitiamea, Ehkoriami Iyoterichi chiiapua, puuua eee chanitiame: “Piiripioi oꞌwara ki kahsinetiapua.”
\v 37 Pirenachi Ehkoriami Iyoterichioi, eee chiiamepua tiame: “Puuua tetewipuamepua, chokichi ajakamea, checheka otowinakapua.”
\s Eesusi mukukatewewa
\r (Maateo 27:57-61; Marako 15:42-47; Ruuka 23:50-56)
\p
\v 38 Neipa Eesusi mukusoopua, Oose Arimatéa mochiwachi oꞌinia eenakamea, Piiratochi eenaka itarepua reesiseri, Eesusi weerewara tekipumio tuuka, waꞌa ikisaopua katewenario tuuka wahjipakame toaniachi. Piiratoa waikao, reesiserepua puꞌkao.\fig |142-cn01846B.tif|col|||Oose Arimatéa ohjoemea, Eesusi weerewara itanenapua Piiratoo.|19:38\fig* Puuu Oosea, Eesusichi paparame eneriaipua tiame, nape noriwi teereka, seewiapa puuua isaeri yaꞌyawichio. Waikao Oosea, tekipusapua Eesusi weerewarao, iꞌtokapua wahjipame toaniachi.
\v 39 Nikoremo tiame, Eesusi ahjama naewakame piie tukao, waꞌachi eenakapua tiame, piire weerewa aampa oosa mariki pehtiame uꞌmatoame petejitiame iꞌtoka, sewajuya mirira tewaniame, ároe teewaeme sewajuya ahjama naꞌpetiame.
\v 40 Waikao Oosea Nikoremo tiamea, riino wisasori peeniajurichi isapatesaopua, ahjae ikapisapa ahpo yoyorachitia isaeri tiꞌtijoerio, katewemia iꞌtokapua wahjipame toaniachi.
\v 41 Eesusi kurusichi mukukachio, waapikapua waꞌao itapiti taakewa echitiachi. Waꞌao, weemera yeewatatiachikapua, mukukame tekipuachi, ki aaata tekiwachiopua pehjio.
\v 42 Waꞌa katewetiapua Eesusia, waapikopa waꞌao ahpo mukiriachio, resipuniame taawechioi asiyachikopua waꞌasi, Semejenato pahkowichioo, yooma kateweniachikapua waꞌasi.
\c 20
\s Eenechi ahjaniame Eesusi
\r (Maateo 28:1-10; Marako 16:1-8; Ruuka 24:1-12)
\p
\v 1 Maaria Maarenaa, píiiari tukapoi eenariaipua waꞌa Eesusi katewetiachio, nape wahjonatiame tewakapa waꞌao, yeetera tehteo ikicha iintapatiame,
\v 2 uꞌmasiriapua waikao taamoo tuuyemiao, Peeroopua noꞌoopua tiame. Puuua tamochi eenakao chaanekapua:
\p —Maꞌchipaka iꞌtoretia taamo Paamiraa wahjipame toaniachio, wahka iꞌtoretiare puuua, ki naneꞌrena teemea iꞌtotiachio.
\p
\v 3 Waꞌa chiiopa Maaria Maarenao, ujumasika teemea, neee Peero tiameo, waꞌa wahjipakame toaniachiopua neꞌnemia.
\v 4 Pirena ujumasikai teemea, pahcha asikania wahjipame toaniachio, epeche uwatiame uꞌmasikapa.
\v 5 Nape pahcha asikainia, ki pakikania. Pakirachi chukipaka yooremina noꞌo neꞌnioipua, wisasorirache waꞌa maaniapua saꞌrunatiame.
\v 6 Peeroa noꞌo pukamina asika yooremina pakisao, puꞌkachi tetewikapua tiame, riino wisasoriche ahjae ikapitiame waꞌa maaniame.
\v 7 Moochi ikapitiamea wisasori, poanachi yachatiame, kaawe ikapitiame.
\v 8 Waikao neeea tiame waꞌa pakisaopua wahjipame toaniachio, kaawe neꞌnesaopua yooreminao, pichiwa oijenario erapakania waikao.
\v 9 Ki inatepai teemea waꞌa tiame ikimioiopua, ki pahteriapa teemea puꞌka Iyoteri Ehkoriami chiiaopua, oijenamio tuuyoiopua puꞌkao.
\v 10 Waꞌa tiame tetewisaapua waꞌa yooreminao, Peeroa neee tiameo, nonoraka teemea taamo petechio.
\s Eesusia Maaria Maarena machejenena
\r (Marako 16:9-11)
\p
\v 11 Maaria Maarenaa waꞌa itipikapua pehji, wahjipame toaniachi maꞌchio, naaraka. Maaria Maarenaa waꞌa itipikaio eenechi taamo petechi enasaopua, eee tiiame taamo tuuyekapua:
\p —Neeea maꞌchi itipisaa naarakao, yooreminapo noꞌo neꞌnioiopua chukipakao,
\v 12 waꞌa mochikame tetewakane ooka Riosi kuꞌiwari, tísia totosaname wakiraeme; piiripia Eesusi poiriachi moota kahtiapua, piirea tarachitu.
\v 13 Puuua noꞌo iinatukekapua: “¿Achinikai naaranimua?” Waikao nehjiakania puꞌkao: “Neeea noꞌo Paamira ki tewakapa naaramenia, ki naneꞌriapa ahka iꞌtotiachio.”
\v 14 Waꞌa cheesaania kuꞌrika noꞌo neꞌnepasoo, waapi weeriame tetewakania aaata, puꞌkao Eesusikoi kiisi machiriania.
\v 15 Puuua noꞌo, iinatukekapua: “¿Achinikai naarani muuua? ¿Aatana iꞌyani muuua?” Waikaonia, tísia oꞌkewaekapaopua ki maꞌchiame tetewapaopua Eesusikoio, waꞌa echitiame inatiame maaekao, iinatukekania: “Noꞌo Paamira wekatekapa naaramenia, ki naneꞌriapa aaata iꞌtoriameo. Muuu iꞌtokame enesaa, noꞌo tuuyepuapua ahka aamo teekariachio, noꞌo waꞌa siimichiopua iꞌnoramiao.”
\v 16 Waikao noꞌo chaanekapua: “Maaria.” Waꞌa cheesoche machika inamukania puꞌkao. \fig |143-CN01856B.TIF|col|||Maariaa, Eesusie ahpo nayewachaniame machina.|20:16\fig*Waikaonia, tísia kaawe erapakao, kuꞌrika neꞌnepakao chaanekania: “¡Naakona muuukaitepua, Masitari!”, eureo naewakao, Raawoni chaniwamepua.
\v 17 Waikaonia chapakachi koorepakainia, iyoriwa iyoreka Eesusio, nape apoeo noꞌo chaanekapua: “Noꞌo tooamua pehjio, noꞌoo ki mooenamekopua pehjio, noꞌo Noonochiopua. Nape muuua noꞌo maꞌmasiterao chaanemitiamua, noꞌoo, noꞌo Noono kahtiachi mooenamio tuuyo, puꞌkao yooma aamo Noonorachi tiame; puuua apoe noꞌo Noonoa, noꞌo Riosiwapua, yooma aamo Riosiwa tiame.”
\p
\v 18 Waꞌasa tiiame taamo tuuyekapu Maaria Maarenaa, taamo petechi noꞌrasaapua taamo tuuyemiao.
\s Eesusi ahpo ajawaria machejeneria
\r (Maateo 28:16-20; Marako 16:14-18; Ruuka 24:36-49)
\p
\v 19 Puꞌka waꞌapi taawechio amori tukapasipoio, taamo isaeri yaꞌyawichi majayapao, taamo kariwa yeetesa yooremina mochikai teemea. Nape waꞌa teꞌterenioio yeetaekao, senawato waꞌa weeriame tetewika teemea Eesusio. Waꞌa werikao taamo teepotekapua cheeka:
\p —¡Kúíra, kaawe erakoka mochiwíii! ¡Kaꞌte majakóo! \fig |144-DN00496b.tif|col|||Eesusia eenechi ahjaka oijenasaapua, ahpo ajawaria oowisani tetewitena.|20:19\fig*
\p
\v 20 Waꞌa cheesapa puuua, taamo neꞌnetekapua ahpo sekachi, ahpoopua wachikachi chechetiachi tiame. Waikao tísia kaawe erakoa teemea, taamo Paamirao eenechi tetewapa.
\v 21 Waikao eenechi taamo chaanekapua:
\p —¡Kúíra, iika yachapasa eemeapa amochío!
\p Waꞌa cheesaopua taamo chaanekapua:
\p —Neeea noꞌo Noono noꞌo uhjurariachitia, waꞌachitia aamo uhjurame neeeai, eemepechi simitemichiopua noꞌo iꞌwa weeechi oꞌineria noꞌo Noono tehkiwao.
\p
\v 22 Puꞌkawichioo, neeea aamo kiamapua kuꞌiwario, noꞌo Noono utewarira utewarieme Riosiwari.
\p Waꞌa cheesapao, tamochi pupuchekapua cheeka:
\p —Ía, amochi uꞌwi eemea, Riosi utewario.
\v 23 Iꞌka Riosi kaaweruma tuuyewari aamo teetoachio, noꞌo Noono utewarie aamo nayewatuachio, yooma aaata uuka tetewikame aamo nayewatuao, cheriwetiame itipimeripua ahpo tatakoririao, Apoe teꞌta noꞌo Noonoeo. Nape ki apochi uuka tetewikamea puꞌka aamo nayewatuao, waꞌatia itipimeripua ahpo tatakoririao, kiisi cheriwetiame noꞌo Noonoeo.
\s Toomasia, Eesusi oijenakame tetewani
\p
\v 24 Toomasia, piiripi puuu oosa mariki aampa ooka Eesusi ajawariaa, puuua tiameo Okasauti teewataniamea, kiꞌtiaipua taamo ahjamao, Eesusi pukeri pahcha taamo mochikachi machejenoiopua.
\v 25 Nape teemea neipamio, tuuyekapua chaachapaka:
\p —¡Tetewakasai teemea taamo Paamirao!
\p Nape Toomasia, ohsotia chiiapua:
\p —Oowera waꞌa chaachapani eemea, kiisi pichiwakoi. Nooe tetewisaape, pichikemania puꞌkao. Ahkasi nooe sutue tahchinesaape raositeretetiachio, ahkasi nooe sekae neꞌnesaape wachikachi yeewatatiachiopua tiameo, pichikemania.
\p
\v 26 Nape osanao taawechi neipao, eenechi taamo napawikoio waꞌapi taꞌpechio, waꞌachi kahtiapua waikao Toomasiai, taamo yooremina yeetaeka mochikoio. Waꞌa teꞌterioi taamoo, senawato waꞌa weeriame tetewika teemea Eesusio, waꞌa yooreminaopua taamo chokichi. Waikao Eesusia, taamo teepotekapua cheeka:
\p —Kúíraa, kaawe erakósa.
\p
\v 27 Waikao Eesusia Toomasi waꞌa tetewapao, chaanekapua:
\p —Ehsoko naaju. Yaapi noꞌo neꞌnesa naaju. Noꞌo sekachi raositeka yeewatatiachio. Yaapi noꞌo neꞌnesao naaju, noꞌo wachikachi yeewatatiachiopua naaju. ¿Ki neeekosapu naaju Eesusia? Kaꞌte oosa aampa ki maaemitiamua naaju, pichikemitiachemua. \fig |145-WA03933b.tif|col|||Toomasia, ahkasi Eesusi wachikachi oowaratatiachi neꞌnesaapa pichikena.|20:27\fig*
\p
\v 28 Waikao Toomasia chaachakapua:
\p —¡Nee, pichiwa noꞌo teꞌta Paamírakamera muuua, Apoe noꞌo Riosiwa!
\p
\v 29 Eesusia chaanekapua:
\p —¿Noꞌo tetewapa pichikenapua ehpeo? Ki noꞌo tetewai pichikiamea, teꞌta kaawe erakowa kiapuamepua noꞌo Noonoeo.
\s Aatia tiiachipua ihji iyotapea
\p
\v 30 Eesusia muuwaeme itapiti ki maaeniame yoorakapua pehji, nape puuua ki yooma iyotetiamepua iꞌka noꞌo iyotiachio.
\v 31 Nape ihji noꞌo iyoteriaa, pukachi aamo pichikemichio puuua, Riosi tiiarie naawakamechi pichikemichiopua, Eesusi Riosie Weratiamechi; yooma aaata pukachi paparakameo, weemera ahjari kiapuamepua pukaeo, ahkasi ki wahjiamesi ahjari.
\c 21
\s Eesusia oowisani ahpo ajawariachi machejenena
\p
\v 1 Neipa iꞌkao, eenechi tetewitiapua Eesusia, Tiiweria Paꞌwechi suuwerachi. Eee teerekapua waꞌao:
\v 2 Waꞌa mochimioi Siimoni Peeroa, Toomasi (Okasauti teewataniame tiame), Natanaéri (Kaana ohjoeme Arirea weeechi), Sewereo tatanara tiameo, wahjachi ooka noꞌo ahjama Eesusi masitewara tiame.
\v 3 Waikao Siimoni Peeroa, taamo chaanekapua:
\p —Soꞌchi chapimia siimania, noꞌo sochichaira iꞌtoka.
\p Waikao teemea, chaanekapua tiame:
\p —Siimpama teemeai aamo ahjama.
\p Waꞌa chaachapasao siimpakapua teemeai, soꞌchi chapimiaopua pawekakerachi. Nape puꞌka tukawarichio, yooma tukao nokakai, kihta chapika teemea.
\v 4 Piari taaa cherayoio, pukeri asitoa teemea suuwerachio, waꞌa weeriame tetewaka teemea aaatao.\fig |146-cn01876B.tif|col|||Eesusi ajawariaa aaata tetewani paꞌwesuwe, ki machiriaipua pukerio.|21:4\fig* Ki machikai teemea pukerio, nape Eesusikai teereriapua, puuu aaataa.
\v 5 Puuua waꞌa werikao, taamo sisinamukapua cheeka:
\p —Tehtémariii, ¿weeka chapitú soꞌchíii?
\p —¡Kaꞌíii, kihtáaa! —chaachapaka teemea.
\p
\v 6 Waikao Eesusia taamo chaanekapua:
\p —¡Aamo ahjamina pawekakerachi ipasesa puꞌka aamo sochichairáo, waꞌaope chapima eeméaaa! Waikao waꞌa ipasao teemea, kiisi chechewa teemea sochichairao, ki ookapi chuchatopa soꞌchio.
\p
\v 7 Waikao neee Waania, Eesusi neꞌnepaka machikapao, chaanekania Peeroo:
\p —¡Nee naakona! ¿Ki Eesusikaitepu puuu, puuu aaataa taamoo sisinamukamea? Apoe taamo Paamirakaite puuua.
\p Waikao Peeroa, naneꞌresache Eesusikoopua, yaapiti uꞌmasikapua ahpo wisasoriwa chuchamia, pujakamekapa puuua neerochi tekipanamiapa. Waikao chuchasache wisasorio, ikanati asinariapa Eesusi weeriachi, ikanati neerochi niipaka kaꞌkeka akipakapua.
\v 8 Teeme pawekakerachi itipikamea, tesiwatia panisutoka pawekakerachi sochichairao, suuwerachisi eꞌenaka teemea; soꞌchi chapitiachi oꞌiniao, kiiya piie siento matokahka eneriapua suuwerachisio.
\v 9 Wakiyachi puuyasaapa, naꞌitiame tewitiapua waꞌao, waꞌa ihsawichio piiripi soꞌchi wahseniame poꞌyapua, paani tiame.
\v 10 Waikao Eesusia, taamo chaanekapua:
\p —Iꞌnorame ookapi soꞌchi, puꞌka weemera aamo chapiria.
\p
\v 11 Waikao Siimoni Peeroa, pawekakerachi mooenaka naꞌsonasaopua sochichairao, suuwerachisi uꞌpakapua setechi. Póóchikame chuchatome eneriapua, soꞌchi apoche weeweruma, piire siento ooka weerewa aampa oosa mariki ahka, soꞌchi eneriapua. Ki ookapikoi soꞌchi, kiisi tehpuria sochichairaa.\fig |147-CN01877B.TIF|col|||Peeroa, sochichaira panisutona paꞌwesuwete.|21:11\fig*
\v 12 Eesusia taamo chaanekapua waikao:
\p —Eꞌenasa waꞌana koꞌkomia.
\p Aaataai teemea ki iinatukeme erakoapua aatanakoo, machikapa teemea waꞌasi Eesusikoo.
\v 13 Eesusia puꞌka paanio, chiꞌwanasa taamo naachutekapua. Waꞌachi iintokapua soꞌchioi chiꞌwanasa.
\p
\v 14 Ihji Eesusia paisa simiyachikapua, senawato taamo machejeniachiopua.
\s Eesusia Siimoni Peero ahjama nayewanipua
\p
\v 15 Neipa koꞌkosepatioopa, Eesusia chaanekapua Siimoni Peeroo:
\p —Siimoni Waani taanara, ¿epeche nahkimua noꞌoo ki iꞌka noꞌo aamo ajawaria wahjachitia?
\p Peeroa nehjiakapua Eesusio:
\p —Ejeꞌe Paamira, naneꞌriamemua noꞌoo aamoo, nakiyamekoo.
\p
\v 16 Oosa simiyachio, chaanekapua Peeroo:
\p —Siimoni Waani taanara, ¿pichiwa noꞌo nakiyamemua?
\p Peeroa nehiakapua eenechio:
\p —Ejeꞌe, pichiwa aamo nakiyamenia.
\p Waikao Eesusia chaanekapua:
\p —Kaawe neesetomitia muuua naaju, noꞌo ijinuwaopua poꞌwa.
\p
\v 17 Eesusia Peeroo, paisa simiyachi iinatukekao chaanekapua:
\p —Siimoni Waani taanara, ¿tiiisiwá noꞌo nakiyamemua?
\p Peeroa, paisa simiyachi ahpo iinatukioio Eesusio, tísia yuuwesipakao, chaanekapua:
\p —Yomatiame naneꞌriamemua noꞌoo; naneꞌriame muuua noꞌoo, káaatisia aamo nakiyamekoo.
\p Eesusia waikao chaanekapua puꞌkao:
\p —Kaawe neesetomitia naaju, noꞌo ijinuwaopua poꞌwa, noochi paparakameo.
\v 18 Pichiwa aamo chaanenania, temarikaio muuua, amoe apechuka seekara wakiratariaipua, waikamio ahkaoi aamo siminariachi siisimiriaimua; nape aamo oochetupasoopua, aaata aamo seekara apechuneka wakiratemapua, ki aamo siminariachi iꞌtoka.
\p
\v 19 Iꞌka Eesusi waꞌa cheeriaa, Peero mukimia naewaka cheeriapua, aꞌchi teeka mukimia puꞌkao, Eesusichi simiyame nayewaturiamekapapua. Neipa iꞌka cheesao Eesusia, chaanekapua Peeroo:
\p —Nahpesa naaju. Noꞌo naꞌnaritomitiamua.
\s Eesusi ahpo weeraria teꞌta nakiya
\p
\v 20 Waikao neee Waania, wahjachi Eesusi ajawaria ahjama ihtoania, Eesusi pukamina nokisiwachi. Neeekapu Eesusi chokichi kahtiamea, puꞌka Eesusio aari koiꞌwame koayoio, aaatakamera iinatukekamea Eesusio, aatanakoopua ahpo noriwi nehjimerio.
\v 21 Waikao Peeroa, noꞌo Eesusi pukamina ihtoame neꞌnepakao, iinatukekapua Eesusio cheeka:
\p —Paamira, ¿ihjipe? ¿Ihtana ikimera puuua?
\p
\v 22 Eesusia chaanekapua puꞌkao:
\p —Iꞌkao noꞌo tewekachi oꞌinia eenachisi noꞌo ahjatenariao, ¿ihtanawichio naneꞌrenariamemua puꞌkao? Muuua oowera noꞌo naꞌnaritopuapua.
\p
\v 23 Waꞌa chaaneriopa Eesusio Peeroo noꞌo naewaka, yooma Riosichi paparakamechio, noꞌoo ki noꞌo mukimeriko erakowa, mehtariapua. Nape ki noꞌo ki mukimio waꞌa cheeka naewariaopua Eesusia. Puꞌkao Eesusia oowera chiiapua: “Noꞌo puꞌkao, ahkasi tewekachi oꞌinia noꞌo eenachisi ahjatenaresoopua seenekachio, ¿ihtana tiiamepua aamowichioo?”
\p
\v 24 Neee Waania, yooma iꞌka noꞌo iyoterichi chiia, pichiwa chiiame puuua, nooe waꞌapi Eesusi ahjama oika tetewamekapa. Yooma ehpiami mochitoamea, teꞌta pichiwa noꞌo chiiameko iꞌka noꞌo iyotiao.
\p
\v 25 Eesusia ki ookapi itapiti yoorariopua pehjio, ki yooma iyotetiamepua iꞌka iyotaperichio. Yomatiame Eesusi cheeriaa iintotiame tiameo, yomatiame iyotetiame enesaa, pochikame yasipamiipua yomatiame iꞌka wehjoarichio, yomatiame iꞌka iyotaperi iyotetiamea, kiisi ojowika.
\p Ehpeonia iꞌwasioi iyotesa kaawe eꞌraka itipiamenia, yooma Eesusi inisiria noꞌo tetewaria iyoteriapua. Waꞌasi kajunania noꞌo iyotiao. Ehpeo cheriwemapua yomatiame iꞌka wehjoarichi noꞌo iyoteria inamukameo. Waꞌasipua waꞌasi.